Kreu i lëvizjes “Shqipëria Bëhet”, Adriatik Lapaj, deklaroi se nuk pret reflektim nga kryeministri Edi Rama, por synon ndërgjegjësimin e qytetarëve përmes protestës si formë rezistence deri në realizimin e së drejtës. Në një deklaratë për A2 CNN me gazetaren Fjorela Beleshi, Lapaj tha se protesta duhet të vazhdojë me dinjitet, duke kritikuar autoritetet për moslejimin e ngritjes së çadrave dhe duke e cilësuar këtë si mungesë njerëzillëku.

“Nuk pres asnjë reflektim nga Rama. Ajo që pres është të ndërgjegjësojmë njerëz duke u bërë shembull që protesta është rezistencë derisa realizohet e drejta. duhet të vendosen çadra se i merr era. Mua më vjen rëndë që na lënë me plastmas dhe jo me çadër. Kjo është mungesë e theksuar njerëzillëku”, u shpreh Lapaj për A2 CNN.

I pyetur sesi mund ta rrëzojnë kryeministrin Rama i cili ka 83 mandate, Lapaj u përgjigj se mandatet kanë vlerë vetëm kur mbështeten mbi moralin dhe besimin qytetar, ndërsa argumenti i shumicës parlamentare është i pavlefshëm nëse pushteti kapet në shkelje dhe korrupsion.

“Mandatet kanë vlerë kur kanë moral. Dyshoj se janë marrë nën mënyrë të drejtë nëse nuk justifikohen moralisht nuk kanë vlerë mandatet. Kanë fuqi sa qëndron morali. Faktet tregojnë që nuk ka moral se është kapur në flagrancë duke vjedhur në të gjitha nivelet. Argumenti i 83 mandatave është i pavlefshëm. Bëj një qeveri tranzitore, ngri të gjithë drejtorët që të mos japin lekë nga administrata për zgjedhjet”, vijoi Lapaj për A2 CNN.

Ai theksoi se prej vitit 2022 ka pasur përkeqësim të të drejtave të qytetarëve dhe se frika është e instaluar në shoqëri, ndaj protestat me thelb politik janë të domosdoshme.

“Nga 2022 ka një përkeqësim të të drejtave të qytetarëve dhe njerëzit tremben. Protesta që kanë thelb politik janë protesta që i trembin se lidhen me ekzistencën e pushtetit. Kjo është dëshmi e frikës së shoqërisë dhe numrat tanë kanë ardhur duke u rritur. Por edhe sikur një njeri të protestojë”, tha Lapaj, për A2 CNN.

Sipas tij, zgjidhja është krijimi i një qeverie tranzitore, ndalimi i presionit mbi administratën dhe bashkimi i qytetarëve përtej flamujve partiakë. Ai përmendi emrat e Përparim Kabos dhe Tritan Kalo për krijimin e qeverisë tranzitore.

“Nuk është koha të ngremë flamurin e partisë por të bashkohemi për flamurin e Shqipërisë. Asnjë parti politike nuk mund dot regjimin e Ramës. Duke qëndruar dhe ndërgjegjësuar qytetarët. Na bashkon sheshi për këdo që vjen me flamurin kombëtar. Berisha të hyjë në stinën e jetës dhe sheshet t’ia lërë djemve e vajzave të PD-së. Asnjë politikan nuk duhet të jetë në qeveri tranzitore. Përparim Kabo e Tritan Kalo të merrnin përgjegjësinë kombëtare në këtë fazë të rëndësishme”.

Paneli Zgjedhor për Ankesa dhe Parashtresa (PZAP) ka njoftuar se për Zgjedhjet e Parakohshme për Kuvend të Republikës së Kosovës, të mbajtura më 28 dhjetor 2025, janë paraqitur 66 ankesa gjatë gjithë procesit zgjedhor.

Në një përgjigje për Telegrafin, PZAP ka bërë të ditur se subjektet politike që kanë paraqitur numrin më të madh të ankesave përfshijnë: Lëvizjen Vetëvendosje, Lidhjen Demokratike të Kosovës, Listën Serbe, Kosovski Savez, Za Slobodu Pravdu i Opstanak dhe Lëvizjen Përparimtare të Romëve të Kosovës.

Sa i përket natyrës së ankesave, Paneli sqaron se ato lidhen kryesisht me çështje të ndryshme gjatë procesit zgjedhor.

“Sa i përket natyrës së ankesave, kanë të bëjnë kryesisht me vendosjen e materialit promovues në hapësirë publike, shfrytëzimin e resurseve publike të institucioneve, ndikimin në votues, si dhe kundërshtimin e vendimeve të Komisionit Qendror të Zgjedhjeve (KQZ),” thuhet në përgjigjen e tyre.

PZAP ka theksuar se çdo ankesë trajtohet sipas rregullave dhe afateve të parapara me ligj, ndërsa vendimet e panelit synojnë të sigurojnë një proces zgjedhor të drejtë dhe transparent për të gjitha subjektet dhe qytetarët. /Telegrafi/

Një incident i rëndë ka ndodhur dje në Leposaviq, ku një person ka mbetur i lënduar si pasojë e therjes me thikë.

Sipas informacioneve nga Policia e Kosovës, viktima, ka kërkuar ndihmë mjekësore pasi dyshohet se është therur me thikë nga dy persona të dyshuar, gjithashtu meshkuj kosovarë.

Mjekët kanë bërë të ditur se viktima ndodhet jashtë rrezikut për jetë.

Të dyshuarit janë larguar nga vendi i ngjarjes dhe aktualisht gjenden në arrati, ndërsa rasti është duke u hetuar nga njësitë kompetente policore për zbardhjen e plotë të rrethanave dhe identifikimin e të dyshuarve./Telegrafi/

Është përfshirë nga tensionet protesta e “Shqipëria Bëhet”, teksa efektivët e policisë së shtetit janë përleshur me protestuesit.

Ende nuk dihen arsyet e dhunës, por forca të shumta policia kanë shtyrë fizikisht protestuesit duke u përpjekur t’i largojnë.

Ndërkohë kreu i lëvizjes, Adriatik Lapaj është shprehur se efektivë të veshur civilë u kanë bërë foto protestuesve që më pas t’i arrestojnë.

“Ka civilë me xhup ‘Louis Vuitton’ që po u bëjnë foto qytetarëve për t’i arrestuar. Turp të keni, hajdutë. “Arrestoni mua, ja ku jam. Pse u bëni foto qytetarëve? Pse i frikësoni njerëzit?” tha Lapaj, përcjell A2 CNN.

Ndërkaq protestuesit kanë ngritur çadra në bulevard, përballë godinës së qeverisë.

- YouTube www.youtube.com

Kryetari i Lidhjes Demokratike të Kosovës (LDK), Lumir Abdixhiku, së bashku me familjen Zemaj dhe bashkëpunëtorë, ka bërë homazhe me rastin e 23-vjetorit të vrasjes së Kolonelit Tahir Zemaj, të birit të tij Enisit dhe të Hasan Zemajt, kryetar i Forumit të Rinisë së LDK-së në Deçan.

Në një përvjetor të cilin e përshkruan si të dhimbshëm, Abdixhiku ka kujtuar me respekt jetën dhe sakrificën e tre figurave të shquara që, siç tha ai, ia kushtuan jetën Kosovës dhe idealit të lirisë.

“Në këtë përvjetor të dhimbshëm, kujtojmë me respekt të thellë dhe dhimbje të madhe tre burra që ia kushtuan jetën Kosovës dhe idealit të lirisë,” ka thënë Abdixhiku.

Kolonel Tahir Zemaj është përshkruar si një patriot i rrallë, ushtarak vizionar dhe strateg i luftës, i cili me guxim e mençuri udhëhoqi beteja vendimtare të Ushtrisë Çlirimtare të Kosovës në Dukagjin kundër regjimit serb, duke lënë gjurmë të pashlyeshme në historinë e rezistencës.

Dhimbja për vrasjen e tyre mbetet e thellë edhe pas më shumë se dy dekadash, për shkak se autorët e këtij krimi ende nuk janë ndëshkuar.

“Ishte janari i acartë i vitit 2003, kur Kosova u trondit nga lajmi i kobshëm për ekzekutimin e Kolonelit Tahir Zemaj, të birit të tij Enisit dhe të kushëririt Hasan Zemaj… Ata u vranë pabesisht, vetëm sepse besuan dhe punuan për një Kosovë të lirë, demokratike dhe me institucione të forta”, ka theksuar Abdixhiku.

Në nderim të kujtimit të tyre, kryetari i LDK-së e ka përshkruar Kolonelin Tahir Zemaj si një figurë kyçe jo vetëm për çështjen kombëtare, por edhe për historinë e Lidhjes Demokratike të Kosovës dhe bashkëpunimin me Presidentin historik Dr. Ibrahim Rugova.

“Kolonel Tahir Zemaj, veprimtar i shquar i çështjes kombëtare, aktivist i orëve të para të LDK-së dhe bashkëpunëtor i afërt i Presidentit historik Dr. Ibrahim Rugova, mbetet simbol i sakrificës, i dinjitetit dhe i përkushtimit ndaj atdheut.”

Abdixhiku ka theksuar se dhimbja për këtë humbje vazhdon të jetë e hapur, ndërsa padrejtësia bëhet edhe më e rëndë për familjen dhe gjithë LDK-në, duke kërkuar drejtësi për viktimat.

Në fund të mesazhit, ai ka nderuar jetën dhe veprën e Kolonelit Tahir Zemaj, Enisit dhe Hasan Zemaj, duke shprehur lavdi për kontributin e tyre në lirinë dhe të ardhmen e Kosovës. /Telegrafi/

Presidentja e Republikës së Kosovës, Vjosa Osmani, ka shprehur ngushëllimet e saj më të thella për familjen Ramabaja, miqtë, kolegët dhe të gjithë komunitetin kulturor pas ndarjes nga jeta të Rushit Ramabajës, shkrimtar, gazetar dhe intelektual i shquar.

Në një reagim publik, Presidentja Osmani thekson se lajmi për vdekjen e Ramabajës e ka pikëlluar thellë dhe e cilëson atë një emër të veçantë të kulturës dhe gazetarisë shqiptare në Kosovë.

“Me pikëllim të thellë mora lajmin për ndarjen nga jeta të Rushit Ramabajës, shkrimtar, gazetar dhe intelektual i angazhuar, një emër i veçantë i kulturës dhe gazetarisë shqiptare në Kosovë,” ka thënë Presidentja.

Osmani vlerëson jetën dhe veprën e tij, duke theksuar kontributin e tij të madh përmes punës afatgjatë në media dhe letërsi. Ramabaja kishte një karrierë të dalluar në redaksitë e “Rilindjes” dhe Radio Kosova, si dhe një trashëgimi të pasur letrare me mbi 20 vepra.

“Për dekada me radhë, përmes punës së tij në ‘Rilindja’, Radio Kosova dhe përmes një trashëgimie të pasur letrare me mbi 20 vepra, ai i dha zë mendimit kritik, fjalës së lirë dhe shpirtit krijues. Vepra dhe përkushtimi i tij do të jetojnë gjatë në kujtesën kulturore të vendit tonë,” ka thënë Osmani.

Presidentja ka dërguar ngushëllimet e saj më të sinqerta për familjen, miqtë dhe kolegët e Ramabajës, duke theksuar se kujtimi i tij do të mbetet i përhershëm.

“Ngushëllimet më të sinqerta familjes Ramabaja, miqve, kolegëve dhe gjithë komunitetit kulturor. I përhershëm qoftë kujtimi për Rushit Ramabajën!”/Telegrafi/

Kandidati për deputet, Altin Krasniqi, djali i ish-kryetarit të Kuvendit të Kosovës Jakup Krasniqi, ka reaguar pas zgjedhjeve të 28 dhjetorit, duke falënderuar qytetarët për mbështetjen e dhënë, edhe pse ajo nuk ishte e mjaftueshme për të siguruar një mandat të ri.

Në një postim, Krasniqi ka thënë se vota dhe mbështetja e qytetarëve për të përfaqësojnë një besim të madh.

“Ju falënderoj nga zemra secilin qytetar për votën dhe mbështetjen që ma keni dhënë më 28 dhjetor. Kjo mbështetje, edhe pse nuk ishte e mjaftueshme për ta arritur qëllimin, për mua përfaqëson një besim të madh”, ka shkruar ai.

Krasniqi ka theksuar se gjatë fushatës ka ndier pritje për ndryshim në çdo vend ku është takuar me qytetarët.

“Në çdo shtëpi, në çdo fshat e në çdo qytet ku jam pritur me respekt dhe dinjitet, kam ndier nga afër besimin tuaj dhe pritjen për ndryshim”, ka deklaruar ai.

Ai ka shtuar se angazhimi i tij politik nuk ka qenë asnjëherë personal, por gjithmonë në shërbim të interesit të përgjithshëm.

“Ky besim është arsyeja pse angazhimi im publik nuk ka qenë dhe nuk do të jetë kurrë personal, por gjithmonë në shërbim të qytetarëve dhe interesit të përgjithshëm”, ka theksuar Krasniqi.

Duke folur për mandatin e tij të parë, të cilin e cilëson si të shkurtër, Krasniqi ka thënë se është përpjekur të japë maksimumin për vendin dhe për partinë.

“Edhe pse mandati im i parë ishte i shkurtër, jam përpjekur vazhdimisht ta jap maksimumin për vendin dhe për partinë, duke vepruar me përgjegjësi dhe bindje politike”, ka shkruar ai.

Ai ka pranuar se ka mbështetur vendime partiake edhe kur ato nuk kanë qenë të lehta apo të favorshme për të personalisht.

“Edhe në momente të vështira, kur vendimet e partisë nuk kanë qenë të lehta e as gjithmonë të mirëpritura, kam zgjedhur t’i respektoj ato”, ka shtuar Krasniqi.

Në fund, Krasniqi ka bërë thirrje që qeverisja e ardhshme të fokusohet në përmirësimin e jetës së qytetarëve dhe kthimin e Kosovës drejt normalitetit dhe zhvillimit.

“Vendi ka nevojë për qeverisje me vizion dhe përgjegjësi, jo për stagnim, përçarje dhe gjuhë urrejtjeje”, ka përfunduar ai. /Telegrafi/

Presidenti i Serbisë, Aleksandar Vuçiq, iu drejtua mediave pas një mbledhjeje të Këshillit për Siguri Kombëtare, ku u trajtuan tre çështje kryesore: siguria politike dhe ushtarake në rajon dhe botë, siguria energjetike dhe siguria e Serbisë, si dhe veprimet e fundit ushtarake amerikane në Venezuelë.

Vuçiq vlerësoi se rendi i vjetër botëror është duke u shembur, dhe se ligjet ndërkombëtare dhe Kartat e Kombeve të Bashkuara nuk funksionojnë në praktikë, pavarësisht se ekzistojnë në letër.

Ai tha se pas veprimeve në Venezuelë kjo është bërë më se e qartë, dhe se Serbia duhet të jetë e vetëdijshme për këtë realitet.

Sipas mediave serbe, Vuçiq gjithashtu shprehu shqetësim për armatosjen e vazhdueshme të Prishtinës, duke e cilësuar si një shkelje të Rezolutës 1244 të OKB-së, e cila sipas tij është “në praktikë pezulluar” nga fuqitë e mëdha perëndimore dhe disa akter rajonalë.

Ai përmendi edhe një aleancë të re mes Kosovës, Shqipërisë dhe Kroacisë, të cilën e konsideron një kërcënim specifik ndaj sovranitetit të Serbisë.

“Pra, ju e shihni që nuk ka parime. Kjo është arsyeja pse ne jemi veçanërisht të shqetësuar për armatimin e mëtejshëm të Prishtinës, në kundërshtim me Kartën e Kombeve të Bashkuara dhe Rezolutën 1244, e cila është pezulluar de facto, por jo de jure, nga fuqitë e mëdha, siç është Turqia. Ato po e armatosin me shpejtësi Prishtinën. Një kërcënim i veçantë për sigurinë e Serbisë është aleanca ose bashkimi i sapokrijuar i Prishtinës, Tiranës dhe Zagrebit, i cili po zhvillohet në një fushë të gjerë që përfshin zhvillimin e përbashkët të sistemeve komplekse luftarake nga automjetet katër me katër deri te armët dhe mjetet më të fuqishme”, tha Vuçiq.

Duke folur për ushtrinë, Vuçiq tha se Serbia do të përgatitet për mbrojtje nga ata që nuk fshehin më kërcënimet e tyre, duke njoftuar se brenda një viti e gjysmë synon të dyfishojë kapacitetet ushtarake, duke përfshirë edhe forcimin e njësive speciale.

Ai theksoi gjithashtu se Serbia duhet të mbështetet te vetja dhe të jetë e gatshme, sepse nuk pret ndihmë nga askush tjetër në rast të kërcënimeve të ardhshme. /Telegrafi/

Moti i keq ka “pushtuar” vendin ndërsa është shoqëruar me disa problematika në disa zona. Mësohet se në territorin e bashkisë Shkodër ka probleme me furnizimin me energji elektrike në fidrat Zagorë, Vrakë dhe Kelmend.

Ekipet janë në terren dhe po punojnë për riparimin e defekteve. Në aksin Koplik-Bogë dhe Dedaj-Razëm qarkullimi kryhet normalisht, pa problematika. Mjetet duhet të jenë të pajisura me goma dimërore.

Aksi Bogë-Theth, kryesisht në zonën e Qafë Thores gjatë natës janë regjistruar reshje të lehta dëbore. Qarkullimi kryhet me goma dimërore.

Aksi Tamarë-Vermosh, rruga është e kalueshme pa probleme. Ka prezencë gurësh në disa segmente, ndërsa borëpastrueset dhe punonjësit janë në terren dhe po vijojnë pastrimin.

Nivelet e lumenjve Buna, Drin, Kir, Gjadër, Rezervuari i Shkodrës dhe prurjet në përrenjt kryesorë janë nën kuotat e rrezikut për përmbytje. Ndërsa hidrovorët e Velipojës janë në gatishmëri për punë me kapacitet të plotë./euronews/

27-vjetori i themelimit e gjen KosovaPress-in në objekt të ri Agjencia e Lajmeve KosovaPress sot shënon 27-vjetorin e themelimit dhe fillimit të punës. Kjo ditëlindje e gjen Agjencinë në objekt të ri, modern dhe funksional, i cili përmbush të gjitha kushtet për veprimtarinë e një mediumi bashkëkohor.

Ky zhvillim përfaqëson një hap të rëndësishëm përpara në misionin e KosovaPress-it për informim të saktë, të shpejtë dhe objektiv, si dhe një investim në cilësinë e gazetarisë dhe komunikimit medial në Kosovë.

Objekti i ri i KosovaPress-it është i pajisur me studio televizive, sallë konferencash, hapësira redaksionale dhe infrastrukturë teknike bashkëkohore, duke krijuar kushte optimale për prodhim dhe shpërndarje të informacionit profesional dhe të besueshëm.

Me 27 vjet përvojë në shërbim të publikut, KosovaPress vazhdon të mbetet një nga shtyllat kryesore të informimit, duke u përshtatur me trendet moderne dhe nevojat e kohës.

KosovaPress u themelua më 4 janar 1999, duke dhënë kontribut të madh në informimin e opinionit vendor dhe ndërkombëtar për luftën çlirimtare.

Gjatë periudhës së luftës, KosovaPress publikoi lajme në gjuhën shqipe, angleze, gjermane dhe frënge.

Me shuarjen e Qeverisë së Përkohshme, në janar të vitit 2000 dhe krijimin e Këshillit të Përkohshëm Administrativ, në shtator të po këtij viti, KosovaPress nisi rrugëtimin e saj si Agjenci e Pavarur e Lajmeve.

Fillimi ishte i vështirë dhe luftohej për mbijetesë (në shkurt 2002 mediat dëbohen nga ish-ndërtesa e Rilindjes), ndërsa më pas, falë punës dhe këmbënguljes, nisi edhe periudha e zhvillimit dhe, vit pas viti, edhe zgjerimit të produkteve.

Një kronologji e shkurtër:

Në vitin 2002, KosovaPress kaloi në sistemin me parapagim, fillimisht në gjuhën shqipe, e prej vitit 2005 rifilloi publikimet edhe në gjuhën angleze, ndërsa, në 2007 edhe në gjuhën serbe dhe turke.

Në dhjetëvjetorin e themelimit (2009), KosovaPress solli në tregun medial të vendit, produktet më të reja: video-lajmin dhe audio-lajmin.

KosovaPress, në përvjetorin e 17 të punës (2016), prezantoi produktin e vet më të ri e që ishte transmetimi i drejtpërdrejt i ngjarjeve. Transmetimet e drejtpërdrejta u realizuan me teknologjinë më të re, përmes kamerave 4K.

Investimi i vazhdueshëm në teknologji i lejon sot KosovaPress-it të bëjë deri në 10 transmetime “live” në të njëjtën kohë, si dhe me regji.

Kur KosovaPress kremtoi dy dekada punë, u prezantua edhe Departamenti i Produksionit, i cili kujdeset për realizimin e emisioneve edukativo-argëtuese, siç është emisioni.

Në vitin 2017, KosovaPress, pas nje lobimi disavjeçarë anëtarësohet me të drejta të plota në rrjetin e Agjencive të Lajmeve të Vendeve të Ballkanit dhe të Evropës Juglindore (ABNA-SE www.abnase.com). KosovaPress, që prej anëtarësimit, është duke dhënë një kontribut të vlefshëm në promovimin e vlerave nacionale në rrjetin e lajmeve që editohen në platformat e ABNA-SE.

Në shtator të 2021, KosovaPress pasi organizoi suksesshëm Asamblenë e Përgjithshme të ABNA-SE, mori presidencën për një vit.

Pas presidencës 2021-2022, KosovaPress vazhdon të jetë për tri vjet radhazi, pjesë e bordit të ABNA-SE (https://abnase.com/contacts/).

Lobimi dhe përpjekjet për të qenë pjesë edhe e rrjeteve tjera të agjencive të lajmeve nuk u ndalën.

Në shtator të 2022-ës, në Asamblenë Gjenerale, KosovaPress pranohet zyrtarisht si anëtare me të drejta të plota në Aleancën Evropiane të Agjencive të Lajmeve (EANA), dhe me ketë anëtarësim KosovaPress-it iu hapën edhe më shumë rrugët për të bashkëpunuar me të gjitha agjencitë e lajmeve të Evropës duke sjell produktet që i ofrojnë këto agjenci .

Me këtë KosovaPress-it iu hapën edhe me shumë dyert e bashkëpunimit me të gjitha këto agjenci dhe rritjes së lajmeve nga këto vende dhe në këto vende për klientët e ndërsjellët.

Ne shkurt të vitit 2024 në Prishtinë, KosovaPress organizoi konferencën ndërkombëtare “Kufijtë e Lirisë së Fjalës”, për nder të 25-vjetorit të themelimit. Në Prishtinë u bashkuan më shumë se 20 agjenci botërore të lajmeve nga e gjithë Evropa dhe Ballkani.

Falë përkushtimit, përgjegjësisë dhe saktësisë, mediumet më të mëdha e më të rëndësishme në Kosovë, Shqipëri, Maqedoninë e Veriut si dhe vende të tjera të rajonit e me gjerë i besojnë Agjencisë së Lajmeve KosovaPress, duke bashkëpunuar ngushtë çdo ditë, tashmë për vite me radhë.

Agjencia e Lajmeve KosovaPress vijon të sjellë për lexuesin dhe klientin gjithë çfarë ndodhë në jetën e përditshme politike, ekonomike e sociale të Kosovës, regjionit, Evropës dhe botës, por edhe duke ngritur çështje të rëndësishme përmes gjinive të tjera gazetareske si intervista, dokumentarë, reportazhe e të tjera.

KosovaPress është një burim i besuar i lajmit si dhe një kontribuues i madh i rritjes së lirisë së të shprehurit.

Vitin e kaluar i është bashkuar Clive Marshall, ish-shef ekzekutiv i Agjencisë së Lajmeve PA Media Group në Mbretërinë e Bashkuar, si President jo-ekzekutiv i KosovaPress-it.

Mëngjesin e kësaj të diele moti në qytetin e Vlorës nuk ka qenë në favor të aktivitetit detar.

Sipas raportimeve, erërat e forta dhe dallgët e mëdha në det kanë krijuar vështirësi serioze për lundrimin.

Si pasojë e kushteve të rënda atmosferike, trageti është detyruar të dalë në radë, për të shmangur rrezikun e përplasjes në kalatë e portit./euronews/

Në Qendrën e Numërimit dhe Rezultateve (QNR) vazhdon procesi i numërimit të votave me postë nga zgjedhjet e 28 dhjetorit.

Zëdhënësi i Komisionit Qendror të Zgjedhjeve (KQZ) bëri të ditur për Telegrafin se nga pasdita e së shtunës deri në mesnatë janë numëruar 19 kuti votimi që përmbajnë pakot me fletëvotime të dërguara deri tani në Kosovë.

Fletëvotimet e numëruara deri më tani përfaqësojnë komunat: Deçan (4 kuti), Gjakovë (6 kuti), Gllogoc (2 kuti), Gjilan (7 kuti) dhe Mitrovicë e Jugut (2 kuti nga 5 gjithsej).

Procesi i numërimit vazhdon sipas komunave në QNR, ndërsa autoritetet e zgjedhjeve presin që numërimi i votave me postë të përfundojë shumë shpejt. /Telegrafi/

Procesi i numërimit të votave me postë nga zgjedhjet parlamentare të datës 28 dhjetor 2025 në Kosovë ka arritur të përpunojë deri tani rreth 30.43% të totalit të tyre, përkatësisht 28 nga 92 vota me postë që janë pranuar dhe verifikuar deri më tani.

Në fazën e tanishme të numërimit, Lëvizja Vetëvendosje mbetet fuqimisht në krye me 70.69% të votave të numëruara, duke ruajtur një avantazh të konsiderueshëm ndaj subjekteve të tjera politike.

Pas Vetëvendosjes renditet Lidhja Demokratike e Kosovës (LDK) me 10.59% të votave, ndërsa Partia Demokratike e Kosovës (PDK) dhe Aleanca për Ardhmërinë e Kosovës (AAK) kanë marrë përkatësisht 8.83% dhe 8.27% të votave me postë të numëruara deri më tani.

Partitë e tjera, përfshirë Partinë Liberale Egjiptiane dhe Iniciativën e Re Demokratike të Kosovës, kanë përqindje më të vogla të votave në këtë kategori.

Autoritetet zgjedhore kanë njoftuar se numërimi do të vazhdojë dhe pritet të përfundojë së shpejti duke ofruar një pamje më të plotë të rezultatit përfundimtar.

Zgjedhjet e 28 dhjetorit kanë sjellë një garë të ngushtë mes subjekteve kryesore politike, ndërsa numërimi përfundimtar do të përcaktojë përbërjen e Kuvendit të Republikës së Kosovës për legjislaturën e ardhshme. /Telegrafi/

Viti 2025 ka qenë një vit sfidues dhe kompleks për sektorin e arsimit në Kosovë, me rezultate të dukshme në disa fusha, por edhe me probleme të theksuara që prekin nxënësit, mësimdhënësit dhe komunat.

Drejtuesit e drejtorive komunale të arsimit dhe ekspertët shprehen se sfidat janë të shumta, duke filluar nga bllokada buxhetore dhe mungesa e fondeve, deri te cilësia e teksteve shkollore dhe mbyllja e disa shkollave fillor, raporton KosovaPress.

Në Prishtinë, drejtori i Drejtorisë Komunale të Arsimit, Samir Shahini, ka përshkruar vitin 2025 si një ndër vitet më sfiduese për arsimin. Sipas tij, për herë të parë ka pasur një mungesë buxheti të paparë më herët dhe një “bllokadë buxhetore” nga Ministria e Financave që ka penguar realizimin e projekteve për arsim.

Shahini për KosovaPress ka theksuar zgjerimin e mësimit tërëditor nga pesë në shtatë shkolla, duke përfshirë edhe pesë fshatra rurale, ku numri i nxënësve ka kaluar nga 3 mijë e 100 në mbi 5 mijë, ndërsa pritet të shtohen edhe 10 shkolla të tjera në vitin 2026.

Ai ka nënvizuar nevojën urgjente për trajtim të arsimit si prioritet kombëtar.

“Viti 2025 ka qenë një vit shumë kompleks, në fushën e arsimit ka shënuar disa rezultate të prekshme dhe shumë të rëndësishme për zhvillimin edhe të cilësisë por edhe të infrastrukturës në shkolla. Në anën tjetër ka qenë viti më sfidues i mundshëm për të udhëhequr drejtorinë e arsimit por edhe për mësimdhënësit dhe nxënësit prindërit, duke qenë se si vit është shoqëruar për herë të parë me një mungesë buxheti të paparë më herët dhe në një injorim të thellë të komunës së Prishtinës në shtrirjen e mësimit tërëditorë... Zgjerimi i mësimit tërëditorë nga pesë në shtatë shkolla duke përfshi edhe prej tyre në zona rurale në pesë fshatra, në total nga 3 mijë e 100 nxënës sot kemi mbi 5 mijë nxënës. Do të shtojmë edhe 10 shkolla të tjera në shtatorin që vjen.. 20:08 Buxheti i vitit 2025 nuk ka arrit të shfrytëzohet në formën që është aprovuar që ka qenë rreth 37 milionë euro duke përfshirë pagat dhe mëditje, as ky buxhet nuk ka qenë i qasshëm gjatë gjithë kohës..21:58 Si shtet duhet të ulemi dhe rishikojmë urgjentisht se çka po shkon keq me arsimin. Është momenti i fundit që arsimi të trajtohet si një urgjencë kombëtare dhe në aspektin e seriozitetit”, ka thënë Shahini.

Në Prizren, drejtuesja e DKA-së, Luljeta Gutaj, ka theksuar realizimin e projekteve të planifikuara dhe investimet në zhvillimin profesional të mësimdhënësve. Sidoqoftë, ajo ka kritikuar Ministrinë e Arsimit për shpërndarjen e dobët të teksteve shkollore, veçanërisht për shkollat me tri gjuhë mësimore (shqip, turqisht dhe boshnjakisht), duke dëmtuar komunitetin prindëror dhe nxënësit. Tekstet kanë pasur gjithashtu gabime dhe nuk përkojnë me metodologjitë moderne të mësimdhënies.

“Të gjitha projektet tona, të planifikuara edhe në planin zhvillimor të arsimit në komunë, janë realizuar plotësisht, përjashto projektet që i kemi pasur në partneritet me ministrinë e arsimit, si psh funksionalizimi i institucioneve të edukimit të hershëm. Bashkëpunimi ka qenë deri diku i mirë, përveç në rastet e furnizimit me tekstet shkollore. Prizreni ka tri gjuhë mësimore, që nënkupton furnizimin edhe me tekste shkollore në të tria gjuhët mësimore, turqisht dhe boshnjakisht. Konsideroj se me mënyrën e shpërndarjes së teksteve shkollore është dëmtuar komuniteti prindëror, sidomos në zvogëlimin e buxhetit familjar të tyre. Shpesh jemi detyruar të kompensojmë mësimdhënësit nga buxheti i komunës, planifikimi i dobët buxhetor i ministrisë së arsimit na ka sjellë para sfidave të mëdha, të cilat megjithatë i kemi tejkaluar me ndihmën e komunës. Sa për tekstet shkollore, mësimdhënësit tanë kanë gjetur mjaft gabime dhe ata konsiderojnë se nuk përkojnë me zhvillimin e nxënësve duke pasur parasysh arritjet e reja dhe metodologjitë që zhvillojnë mendim kritik tek nxënësit”, ka thënë Gutaj.

Ndërsa, në Kamenicë, drejtori Afrim Dervishi ka raportuar se vitin 2025 e konsideron të suksesshëm për shkak të përmbushjes së projekteve të planifikuara dhe si projekt kryesor për 2026 realizimin e mësimit tërëditor. Ai ka shtuar se punimet për ushqimin e shëndetshëm për nxënësit janë në zhvillim dhe po rishikohen tekstet shkollore për të përmirësuar rezultatet e nxënësve.

“Viti 2025 ka qenë një vit i suksesshëm për ne, kemi arritur t’i përmbyllim të gjitha projektet që kemi planifikuar t’i realizojmë. Jeta në sistemin arsimor në shkolla është shumë dinamike dhe ne kemi arritur t’i dalim ballë, t’i realizojmë sukses dhe të përmbushim të gjitha kërkesat e shkollave për suksese më të larta.. Buxheti për drejtorinë e arsimit për 2025 ka qenë 1 milion e 200 mijë euro, për 2026 1 milion e 100 mijë euro.. Realizimi i planit tërëditor në shkollat e komunës, kemi bërë të gjitha përgatitjet përveç ushqimit, po punojmë në realizimin edhe të ushqimit të shëndetshëm për të gjithë fëmijët, ky është projekti më i madh që do të na marrë kohë ta realizojmë.. Rishikimi i teksteve ka filluar, do vazhdoj, është kompetencë e ministrisë, po përmirësohet, evidentojmë çdo vit përmirësim të tyre, ka me ndikuar në avancimin e rezultateve shkollore të nxënësve”, ka shtuar ai.

Sipas Sekretarit të Këshillit të Prindërve, Enver Balaj, arsimi ka përparuar në disa fusha, por mbyllja e disa shkollave fillore (1-5) dhe mungesa e vendeve të punës për mësimdhënësit mbetet shqetësuese. Ai ka kritikuar gjithashtu ngarkesën e lëndëve në tekstet shkollore dhe mungesën e përkujdesit qeveritar për rishikimin e tyre.

“Ne e kemi parë arsimin kosovarë për vitin 2025 që është bërë punë e madhe, për rritjen e cilësisë në procesin arsimorë dhe krijimin e mundësive dhe kushteve të mira, për të nxjerrë student sa më të mirë për të vazhduar tutje. Kemi një problem që dominon vitet e fundit në Kosovë, disa shkolla fillore 1-5 janë duke u mbyllur dhe mendoj se është shumë alarmante dhe shumë shqetësuese për sistemin arsimor. Shumë mësimdhënës të sistemit para universitar kanë mbetur pa vende pune për shkak të mbylljes së shkollave..4:26 Nuk do të ishte e arsyeshme me diskutua pjesën e teksteve shkollore e cila po krijon shumë probleme. Ne si prind kemi shqetësim te sistemi arsimor që do të duhej më tepër qeveria.. Ne duhet të rishikojmë shumë në tekste shkollore se 1-5 është shumë e ngarkuar në lëndë të ndryshme”, është shprehur Balaj.

Eksperti i arsimit, Rinor Qehaja, ka theksuar se gjatë vitit 2025 nuk ka pasur ndryshime substanciale në sistem, përkundër debatit publik mbi temat kryesore. Ai ka nënvizuar sfidat e vazhdueshme: tekstet shkollore jo të përshtatura, mungesa e llogaridhënies në rekrutimin e mësimdhënësve, dështimi në digjitalizim dhe mungesa e shkathtësive praktike tek nxënësit, duke u bërë një alarm për institucionet për ndryshime të domosdoshme.

“Sistemi arsimor nuk ka pasur një ndryshim substancial përgjatë këtij viti, ka pasur shumë debat publik për plotë tema, mirëpo shumë pak nga këto tema janë konvertuar në një ndryshim të prekshëm përbrenda arsimit. Ne vazhdojmë të ballafaqohemi me probleme të ngjashme, ato të teksteve shkollore, të mungesës së llogaridhënies brenda sistemeve arsimore të rekrutimeve të mësimdhënësve, të dështimit në digjitalizim, të gjitha këto të përmbledhura na rikthehen dhe barten tutje si probleme nga viti në vit.. 3:14 Pisa na tregon sa shumë nxënësit tanë mungojnë në shkathtësi të vërteta për jetë që ata do të mund të ktheheshin mësimet në përfitim për ta për gjenerim të vendeve të punës. Edhe këtë vit na rikujtoj se kush është rezultati, por mbi të gjitha është një alarm për institucionet tona për ndryshimet e domosdoshme”, ka thënë Qehaja.

Në këtë kontekst, viti 2025 shënoi një kombinim të përparimeve në disa fusha dhe sfidave strukturore që kërkojnë ndërhyrje urgjente për të garantuar një arsim cilësor dhe të barabartë për të gjithë nxënësit. /KP/

Kohëve të fundit po qarkullojnë mesazhe të shumta mashtruese që po dërgohen në emër të kompanive të ndryshme, e kryesisht atyre që kryejnë shërbime postare.

Një rast i tillë po ndodh edhe me kompaninë NPOST, e cila ka njoftuar qytetarët se kanë filluar të qarkullojnë mesazhe phishing (mashtruese) që dërgohen në emër të kompanisë.

Kompania u bënë thirrje qytetarëve të jenë të kujdesshëm, pasi NPOST dërgon njoftime vetëm përmes SMS, jo përmes email-it ose iMessage.

“Domain-i i vetëm zyrtar i NPOST është NPO.ST, dhe çdo link tjetër, si .work, .com, .net, etj., nuk i përket kompanisë. Mesazhet mashtruese shpesh kërkojnë përditësim adrese, pagesa shtesë ose konfirmim të të dhënave personale, duke u prezantuar si komunikime zyrtare”, thuhet në njoftim.

Policia e Kosovës paralajmëron qytetarët për fushatë mashtruese përmes SMS-ve

Disa ditë më parë, edhe Policia e Kosovës paralajmëroi qytetarët për fushata të ngjashme mashtruese përmes SMS-ve, duke u bërë thirrje qytetarëve që të mos klikojnë në link-e të dyshimta dhe të kontaktojnë direkt shërbimin ndaj klientit për verifikim.

“Mesazhet mashtruese duhet të fshihen menjëherë, ndërsa çdo pagesë e kryer gabimisht duhet të raportohet menjëherë në bankën përkatëse dhe në stacionin policor më të afërt.

Policia e Kosovës thekson se mbetet e përkushtuar në parandalimin dhe luftimin e mashtrimeve, duke ftuar qytetarët për bashkëpunim dhe vigjilencë të shtuar për të mbrojtur vetveten nga aktivitetet kriminale online”, ka njoftuar policia. /Telegrafi/

Në janar të këtij viti nis zbatimi i Ligjit për plotësim ndryshimin e ligjit për Këshillin Prokurorial të Kosovës (KPK) përmes të cilit parashihet që KPK të ketë 7 anëtarë, nga 13 anëtarë që kishte me ligjin e vjetër.

KPK deri në fund të 2025, nga 13 anëtarë që e përcaktonte ligji, kishte dhjetë anëtarë të emëruar. Ky këshill udhëhiqej nga kryesuesi, Ardian Hajdaraj, zëvendeskryesuesja, Jehona Grantolli, Jetish Maloku, Ariana Shajkovci, Dardan Vuniqi, Veton Shabani, Visar Krasniqi, Arian Gashi, Milot Krasniqi dhe ushtruesi detyrës, Agron Qalaj, raporton “Betimi për Drejtësi”

Dhe anëtari që kishte ofruar dorëheqjen Jovo Radovic.

Çka përcakton ligji për plotësim ndryshim të ligjit për KPK-në? Në nenin 9 të këtij ligji përcaktohet se KPK ka 7 anëtar dhe atë si në vijim:

1. Kryeprokurori shtetit;
2. Tre anëtarë prokurorë të zgjedhur brenda për brenda sistemit prokurorial ku këta një prokuror që vjen prej Prokurorisë Speciale, Apelit apo Zyrës së Kryeprokurorit dhe dy nga radhët e prokurorive themelore;
3. Tre anëtarë joprokurorë të zgjedhur nga Kuvendi

Po ashtu, në ligj, neni 37/A, paragrafi 2 siç është thënë më lartë anëtarëve të zgjedhur paraprakisht u është dhënë mundësia që të ushtrojnë mandatin e tyre deri në fund.

“Anëtarët e zgjedhur të Këshillit, përfshirë ata që ushtrojnë pozitën e Kryesuesit dhe zëvendës kryesuesit të Këshillit, të cilët ushtrojnë këto funksione në kohën e hyrjes në fuqi të këtij ligji, mund të qëndrojnë në këtë detyrë deri në përfundim të mandatit të tyre aktual”, përcaktohet në këtë nen.

Këtë mundësi ligjore deri në fund të 2025 e shfrytëzuan, kryesuesi, Ardian Hajdaraj, zëvendes kryesuesja, Jehona Grantolli, Jetish Maloku, Ariana Shajkovci dhe Veton Shabani.

Përbërja e KPK nga viti 2026

Bazuar në përcaktimet ligjore të cituara del se anëtarë të KPK mbeten, Visar Krasniqi, Dardan Vuniqi, Milot Krasniqi, Arian Gashi dhe ushtruesi detyrës së kryeprokurorit, Agron Qalaj.

Ndërsa Bajrami-Kastrati përmes rrugëve ligjore pranë gjykatës pret që të konfirmohet si anëtare e KPK, ne bazë të mandatit të fituar me 1 nëntor 2025 në Konferencën e Përgjithshme të Prokurorëve të shtetit kishte marr 74 vota kundrejt kandidates, Merita Gaka që kishte marr 58.

Në rast se Bajrami-Kastrati konfirmon mandatin edhe me vendim gjykate KPK në përbërje do të ketë 6 anëtarë, duke mbetur që 1 pozitë të plotësohet prej Kuvendi.

Së fundmi gjykata caktoi masë të sigurisë ndaj vendimit të KPK-së përmes të cilit ishte refuzuar certifikimi i rezultateve zgjedhore dhe në vendim të gjykatë ndër të tjera thuhej se masa sigurisë caktohet për të mos vijuar me shkaktimin e dëmeve ndaj Bajrami-Kastrati.

Ligji përcakton se kuorumi me përbërjen e re të KPK formohet me prezencën e 4 anëtarëve.

“Përjashtimisht nga dispozitat tjera të Ligjit, kuorumi i Këshillit në këto raste dhe rastet tjera në vijim të mos pjesëmarrjes së vazhdueshme të disa anëtarëve të Këshillit, formohet me së paku katër (4) anëtarë të Këshillit, dhe vendimet merren me votat e të gjithë këtyre katër (4) anëtarëve të Këshillit”. /BetimipërDrejtësi/

Tre persona kanë mbetur të lënduar si pasojë e një aksidenti trafiku që ka ndodhur pasditen e së premtes në fshatin Slivovë të Graçanicës.

Sipas njoftimit të Policisë, rasti ka ndodhur më 03 janar 2026, rreth orës 14:33, kur një vozitëse, duke drejtuar veturën nga pakujdesia, ka shkaktuar vetëaksident.

Si pasojë e aksidentit, lëndime trupore ka pësuar vozitësja, si dhe dy pasagjerë të mitur, një mashkull dhe një femër, të dy shtetas të Kosovës. Të lënduarit kanë pranuar trajtim mjekësor.

Policia ka dalë në vendin e ngjarjes dhe rasti është duke u hetuar nga njësitet kompetente për sqarimin e plotë të rrethanave të aksidentit. /Telegrafi/

Kryetari i shoqatës “Konsumatori”, Selatin Kaçaniku, është shprehur se qytetari konsumator nuk është njohur si sovran, taksapagues dhe faktor i rëndësishëm në vendimmarrje, por i diskriminuar dhe i anashkaluar. Krahas rritjes së çmimit në produktet esenciale, qytetarët kërkojnë edhe rrijte të pagës.

“Edhe ky vit ka qenë shumë i vështirë për arsye se ka pasur shumë lëvizje të çmimeve. Për fat të keq, shumica e çmimeve kanë lëvizur nga lart dhe fati edhe më i keq është se as sivjet, as kjo legjislaturë qeveritare nuk e ka njohur konsumatorin e Kosovës, nuk e ka njohur as si sovran, as si elektoral, as si konsumator, as si taksapagues ligjërues të buxhetit të Republikës së Kosovës. Të gjitha këto mosnjohje dëshmojnë se qytetari konsumator nuk është njohur dhe nuk i njihet e drejta demokratike e njeriut, as e njeriut qytetar konsumator dhe këto janë elemente shumë indinjuese dhe qytetari konsumator po ndihet shumë i shkelur, shumë i diskriminuar dhe i indinjuar", tha Kaçaniku në një intervistë për Ekonomia Online.

Sipas tij, pandemia, luftërat dhe mungesa e kapaciteteve qeverisëse kanë ndikuar në rritjen e çmimeve dhe në mosbashkëpunim me shoqërinë civile.

“Mendoj që pesë vjeçari ka shumë pak dallim, sepse me fillimin e pandemisë kanë filluar të shtohen telashet, sepse COVID-i ka ardhur si problem kombëtar, si problem i tregut global. Pastaj filluan edhe luftërat, duke filluar nga Ukraina dhe të tjerat. Të gjitha këto ngjarje sikur e hoqën nga takti edhe menaxhmentin diplomatik e politik dhe ne, në një klasë politike dhe qeverisëse të njomë, si shtet i njomë, si duket nuk patëm kapacitet të mjaftueshëm dhe jemi këtu ku jemi, të mosnjohur dhe pak të interesuar që në bashkëpunim me qeverinë ta japim kontributin tonë”, u shpreh ai.

Qytetarët kërkojnë që rritja e çmimeve të shoqërohet me rritje të pagave dhe pensioneve, ndërsa shprehin shqetësim për rritjen e energjisë elektrike dhe barrën që, sipas tyre, po bie mbi shtresat e varfra.

Qytetari që nuk deshi të prononcohet me emër tha se me rritjen e çmimeve duhet të rriten edhe pagat dhe pensionet.

“Si janë rritur çmimet, t’i rrisin edhe pagat edhe pensionet dhe të gjitha. Si shkojnë çmimet, shkojnë pagat. Energjia elektrike nuk bën me u ngrit, sepse më shumë e prodhon Kosova. Dikush nga ata që kanë mundësi e paguajnë, ndërsa këta milionerët paguajnë si të dojnë, ka gjasa që nuk paguajnë fare, e paguajnë të varfrit.”

Kurse Ilir Binaka kërkon më shumë reflektim dhe ndërhyrje nga qeveria për të ndalur rritjen e çmimeve.

Ai tregon raste të abuzimit, ku produktet shiten më lirë për shkak se janë të skaduara, duke dëmtuar drejtpërdrejt konsumatorin.

“Duhet më shumë me reflektuar edhe qeveria, edhe pse konsiderohet centralizim qeveria për ta ndaluar rritjen e çmimeve. Shkova e mora një produkt i cili kishte rënë prej 15 euro në gjashtë euro, por shkova në banesë e pashë që i kishte skaduar afati. U interesova te ai produkt dhe e pashë përsëri produktin e skaduar dhe këtu e pëson konsumatori. Nuk është vetëm ky rast dhe këtu duhet me pasur dorë shteti dhe jo me u arsyetuar. Ka rritje të çmimeve, ka lojëra të çmimeve”, shprehet Binaka.

Ndërsa qytetari Izet Zhitia theksoi se kjo rritje po e ul mirëqenien familjare dhe çmimet mund të bien vetëm në kushte stabiliteti global.

“Ne nuk mundemi me u nda prej botës, po e shihni se çka po bëhet, luftëra gjithandej. Çmimet janë të parat që reagojnë, edhe biznesi edhe njerëzit. Biznesi reagon duke i rritur çmimet, konsumatorët janë të pakënaqur sepse rritja e çmimeve ia zvogëlon buxhetin, mirëqenien sociale në familjen e vet. Çmimet vetëm në situatën kur është qetësia botërore mund të ulen”, përfundoi Zhitia.

Një i mitur është raportuar i zhdukur në qytetin e Gjilanit, ka njoftuar Policia e Kosovës.

Sipas raportit policor, rasti ka ndodhur më 02 janar 2026, rreth orës 14:40, në rrugën “Lufta e Gjilanit”, ku një mashkull kosovar ka paraqitur ankesë se djali i tij i mitur është larguar nga shtëpia dhe që nga ajo kohë nuk dihet vendndodhja e tij.

Policia ka nisur hetimet për zbardhjen e rastit dhe lokalizimin e të miturit, ndërsa po ndërmerren të gjitha veprimet e nevojshme hetimore./Telegrafi/

Pritje të gjata për të dalë nga Kosova janë shënuar mëngjesin e sotëm në disa prej pikave kufitare.

Sipas përditësimit të fundit nga Qendra Kombëtare për Menaxhim Kufitar, pritjet më të gjata janë në Merdar.

Bashkatdhetarët po presin mesatarisht rreth 1 orë e 30 minuta deri në 1 orë e 50 minuta për të kaluar kufirin. Kjo është e shoqëruar me një kolonë pritjeje prej rreth 800 metrash, duke treguar një fluks të shtuar të trafikut në këtë pikë.

Ndërkaq për të hyrë në Kosovës përmes kësaj pike, pritjet janë dukshëm më të shkurt prej vetëm 5 deri në 10 minuta, dhe nuk raportohet për kolona të gjata.

Pikat e tjera kufitare në Kosovë, si Dheu i Bardhë gjithashtu pritjet për të dalë janë afro 1 orë me kolonë të automjeteve që arrin 400 metra.

Pikat tjera po përballen gjithashtu me pritje të ndryshme, por nuk janë shumë të gjata.

Në përgjithësi, rekomandohet që udhëtarët të kontrollojnë përditësimet në lidhje me trafikun në pikat kufitare përpara nisjes, dhe të jenë të përgatitur për pritje të mundshme, sidomos në dalje të vendit./Telegrafi/