Një person është arrestuar pasditen e së premtes për sulm ndaj zyrtarëve policorë në oborrin e Stacionit Policor në Ferizaj.
Sipas Policisë, rreth orës 15:40, një zyrtar policor i caktuar në detyrë në portën hyrëse të stacionit ka njoftuar se një veturë me targa të huaja ishte parkuar para portës hyrëse dhe se drejtuesi i saj nuk po i bindej urdhrave për t’u larguar.
Në vendngjarje kanë dalë edhe zyrtarë të tjerë policorë për asistencë, ndërsa i dyshuari, A.N., 35 vjeç, ka vazhduar të përdorë fjalë fyese dhe kërcënuese ndaj policisë, duke shfaqur sjellje agresive dhe mosbindëse.
Gjatë ndërhyrjes policore, i dyshuari u është vërsulur zyrtarëve policorë, me ç’rast ata janë detyruar të përdorin sprej mbrojtës dhe ta arrestojnë atë. Si pasojë e incidentit, tre zyrtarë policorë dhe i dyshuari kanë pësuar lëndime të lehta.
Në rast është përfshirë Njësia e Hetimeve Rajonale, e cila ka intervistuar të dyshuarin dhe, me urdhër të prokurorit të shtetit, ka iniciuar rastin për veprën penale “Sulm ndaj personit zyrtar”. I dyshuari është dërguar në mbajtje për 48 orë për procedura të mëtejme hetimore.
Policia Rajonale e Ferizajt u bën thirrje qytetarëve që të respektojnë dhe zbatojnë urdhrat e ligjshme të zyrtarëve policorë gjatë kryerjes së detyrave zyrtare, duke theksuar se bashkëpunimi me policinë kontribuon drejtpërdrejt në ruajtjen e rendit dhe sigurisë publike.
Ish-zyrtari i lartë amerikan, Charles Kupchan, vlerëson se Kongresi i Shteteve të Bashkuara po përpiqet të rikthejë Ballkanin Perëndimor në fokusin e politikës së jashtme amerikane, në një moment kur rajoni përballet me mungesë stabiliteti dhe ngërç politik.
Sipas tij, përfshirja e Kosovës dhe Serbisë në dokumentin e Aktit të Autorizimit të Mbrojtjes Kombëtare të Shteteve të Bashkuara synon të ushtrojë presion konstruktiv mbi Prishtinën dhe Beogradin për të ecur përpara në dialog dhe për të kapërcyer bllokimin aktual, duke kërkuar njëkohësisht qeveri të qëndrueshme në të dyja vendet.
Ai nënvizon në Euronews Albania se Kongresi po përpiqet të nxisë presidentin Trump dhe administratën e tij që të angazhohen më aktivisht në rajon, në një kohë kur nevojitet rifokusim serioz i SHBA-së në çështjet e sigurisë në Ballkan.
“Trump do të përpiqet që ta fusë në listën e tij të arritjeve normalizimin e marrëdhënieve Kosovë–Serbi. Pra, kemi rritjen e shqetësimit amerikan që vjen pas tërheqjes së SHBA-së nga dialogu mes Serbisë dhe Kosovës dhe kemi mungesën e qeverisë së Kosovës për një periudhë të gjatë. Dokumenti e nxit kryeministrin Kurti që, pas fitores së zgjedhjeve, ta formojë sa më shpejt qeverinë. Por ka shqetësime në lidhje me qasjen e zotit Kurti".
"Prania e Kosovës në këtë dokument synon të nxisë Prishtinën dhe Beogradin që të ecin përpara në dialogun dypalësh dhe të tejkalojnë ngërçin që i ka kapur. Gjithashtu, dokumenti u kërkon këtyre dy vendeve që të kenë qeveri të qëndrueshme. Në Serbi kemi një situatë të destabilizuar, në Kosovë kemi muaj të tërë pa qeveri, prandaj është koha që të dy vendet të avancojnë përpara me punën e vështirë që kanë".
"Në Kongres, në të dyja dhomat, ka shumë zyrtarë që kanë kaluar kohë të konsiderueshme në Ballkan, ndaj kemi një draft që ka ardhur posaçërisht për Ballkanin. Më parë, administrata Trump nuk ishte fokusuar shumë në aspektin e sigurisë së Evropës, sikurse bëri administrata Biden, dhe kjo është një përpjekje e Kongresit për ta nxitur presidentin dhe njerëzit rreth tij, përfshirë sekretarin Rubio, që ta marrin në dorë këtë axhendë".
"Vetë Trump ka bërë disa deklarata për Kosovën dhe Serbinë, duke marrë meritat se ka parandaluar një luftë mes tyre. Tani Kongresi i kërkon presidentit Trump që të angazhohet në Ballkan, pasi po shohim një tërheqje dhe nevojitet që të rifokusohemi sërish në çështjet e rajonit të Ballkanit”, tha ai.
Në Kuvendin e Kosovës që doli nga zgjedhjet e 28 dhjetorit të vitit 2025, janë 9 deputetë që kanë arritur të fitojnë mandatin e deputetit për të shtatën herë, por ka prej tyre që kanë fituar mandatin e 10.
Kryetari i AAK-së, Ramush Haradinaj, është i vetmi deputet në historinë e pasluftës së Kosovës që është zgjedhur në të gjitha legjislaturat e deritanishme, duke fituar gjithsej 10 herë besimin e qytetarëve për t’i përfaqësuar në Parlament, shkruan Telegrafi.
Megjithatë, ka pasur raste kur Haradinaj është tërhequr nga mandati për arsye të ndryshme.
Pas Haradinajt, Enver Hoxhaj ka fituar mandate në 9 legjislatura që nga zgjedhjet e dyta të pasluftës, ndërsa bashkëpartiaku i tij nga PDK, Xhavit Haliti, ka fituar 8 herë ulëse në Kuvend, duke mos u zgjedhur vetëm dy herë (2019 dhe shkurt 2025).
Të tjerët në këtë listë me 7 mandate janë Glauk Konjufca, Blerta Deliu – Kodra, Anton Quni, Armend Zemaj, Hykmete Bajrami dhe Time Kadriaj, të gjithë të zgjedhur rregullisht në zgjedhjet e fundit dhe më parë.
Pakënaqësi të mëdha u raportuan për faturat e muajit të fundit të vitit të kaluar. Shumë qytetarë i publikuan ato në rrjetet sociale.
Dhjetorin e vitit 2024, në këtë faturë janë harxhuar 2,298 kWh teksa në të njëjtin muaj një vit më vonë, 3,570 kWh, që i bije 1,272 kWh më shumë apo 55% shpenzime më të mëdha të energji.
Fatura në këtë rast nuk është 55% më e lartë, por është 110% më e lartë apo për 162 euro më shumë.
Ankesa nga qytetarët kanë pas edhe për dallime drastike të faturave nga nëntori në dhjetor të 2025.
Edhe Këshilli për Mbrojtjen e të Drejtave dhe Lirive të Njeriut ka pranuar një numër të madh ankesash nga qytetarë e Kosovës, të cilët raportojnë se faturat e energjisë elektrike për muajin dhjetor janë mbi 70 për qind më të larta krahasuar me muajin paraprak.
“KMDLNj vlerëson se kjo situatë përbën abuzim të drejtpërdrejtë ekonomik dhe rëndon në mënyrë disproporcionale mbi buxhetin e familjeve kosovare, duke thelluar varfërinë dhe pasigurinë sociale”, thuhet në reagim.
Nga ana tjetër, KESCO e përjashton mundësinë e rritjes së cmimeve, por vetëm deri në fund-mars. Por, nuk e përjashton nga 1 prilli, kur edhe ZRRE do të anaizoi faturat.
“Për të shmangur keqkuptimet, duhet theksuar qartë se tarifat aktuale janë në fuqi deri më 31 mars 2026, ashtu siç përcaktohet në vendimin tarifor të miratuar nga ZRRE-ja. ZRRE-ja nuk ka pranuar ndonjë kërkesë nga KEDS/KESCO për shqyrtim të jashtëzakonshëm të tarifave në muajin dhjetor. Çdo pretendim për rritje tarifash në këtë periudhë është spekulim dhe nuk mbështetet në ndonjë proces të hapur apo vendim rregullator. Sipas kornizës rregullative në fuqi, viti tarifor në sektorin e energjisë elektrike në Kosovë fillon më 1 prill. Vendosja dhe rishikimi i tarifave është kompetencë ekskluzive e Zyrës së Rregullatorit për Energji (ZRRE), e cila i përcakton ato në përputhje me procedurat dhe analizat e saj të rregullta”, tha zëdhënësja e KESCO, Margarita Rashiti.
Drejtori ekzekutiv i Institutit për Politika Zhvillimore, Burim Ejupi është i bindur se rritje do të ketë nga 1 prilli.
“ Deri tash ata që janë akterë as KEDS as KESCO as KOST nuk kanë kërkuar që me pas rritej të parakohshme para procesit vjetor. Kështu që edhe ZRRE nuk është që do t’i rrit tarifat për arsye se ata nuk kanë kërkuar të rriten e dhe kjo gjithashtu mund të lidhet me procesin zgjedhor...Edhe tash rryma do të shtrenjtohet, por do të shtrenjtohet prej 1 prillit”, theksoi Ejupi.
Ai beson që mos investimi në shtim të kapaciteteve energjetike, rritja e konsumit, por edhe tregtimi i rrymës do jenë faktor që do të ndikojnë në rritje të çmimit nga prilli.
Duke pas parasysh konsumi që po rritet për arsye se nuk ka ndonjë alternativ viteve të fundit për ngrohje dhe qytetarët të vetmen alternativë për ngrohje besoj duke e pas energjinë elektrike. Gjithashtu konsumi nga termocentralet ka rënë sivjet për arsye të disa riparimeve dhe disa prishjeve që i kanë pasur termocentralet, çmimi i importit nuk është që është rritur në krahasim me vitet e kaluara...Jemi duke e paguar transportin e energjisë elektrike prapë shumë të lartë dhe krejt këto kur i mbledhim besoj se do të kemi prapë rritje të çmimit të energjisë elektrike për vitin 2026”, thotë Ejupi.
Rritja e çmimit të energjisë elektrike po ka ndikim tw menjwherwshwm te shporta e qytetarwve.
“Veç shpirtin ka mbet me na marr rëndime për çdo vit e çdo gjashtë muaj e çdo një vit. Ne nonstop jemi duke u rritur s’jemi duke zbritur. Nuk po e kuptoj çka domethënë kjo. Kushtet i kemi katastrofal”, theksoi Sali Ajupi.
“Sigurisht që e rëndon fort shportën e buxhetit familjar. Me siguri duke marr parasysh çfarë të ardhurash kemi me siguri që e rëndon, por unë besoj që kishim mund me gjet një zgjedhje se sa e shoh unë më shtrenjtë rryma nuk është kërkund në rajon, jo në rajon por as në Evropë nuk është më shtrenjtë se këtu…Me rëndu buxhetin e rëndon fort, sidomos dimrit, dimrin vjen fatura një faturë e rrymës për një familje mesatare më pak se 40 euro nuk mbetet atëherë të gjithë e dimë sa e kemi buxhetin mesatar mujor”, deklaroi Bajram Havolli.
“Është keq pastaj një e keqe më e madhe se kjo është çelësi i të gjitha shtrenjtimeve të tjera pastaj. Posa po ndodh një shtrenjtim shumë i vogël pastaj gjitha çmimet po lëvizim nëpër lokale gjithkund nuk po ka kontroll fare në çmime. Kjo është edhe më tragjike sesa korenti elektrik sepse korenti është shumë e nevojshme se ne shumë e përdorim”, tha Hysni Zuka Zuka.
Luan Hasanaj nga grupi “Asnjë cent më shumë“, thotë se shqyrtimi i organizimit të protestave është i pashmangshëm në rast të shtrenjtimit të faturave të energjisë elektrike.
“I vetmi mekanizëm që ne si shoqëri civile dhe qytetarë aktiv që mund ta bëjmë janë ngritja e zërit për t’i kundërshtuar këto vendime të dëmshme, sigurisht që do t’i shqyrtojmë përsëri organizimin e protestave. Pra, nuk do të ndalemi sepse konsiderojmë që nëse kjo rritje e tarifave të energjisë nuk shoqërohet me përmirësim të mirëqenies që nga rritja e pagave e politikave të tjera që favorizojnë qytetarin. Ky vend dita ditës po bëhet më pak i jetueshëm”, deklaroi Hasanaj.
Më 16 prill 2025, Zyra e Rregullatorit të Energjisë Elektrike (ZRRE) vendosi që të rrisë tarifat e energjisë elektrike për 16.1%.
Vendimi për shtrenjtimin e energjisë elektrike u kundërshtua nga qytetarët dhe shoqëria civile, përmes organizimit të protestave. Kundër këtij vendimi u rreshtuar edhe presidentja, Vjosa Osmani, derisa Avokati i Popullit kërkoi pezullimin e vendimit./KosovaPress
Prokuroria Themelore në Mitrovicë ka bërë të ditur se pas zbatimit të masave të veçanta hetimore, në koordinim me Policinë e Kosovës ka arrestuar dy persona, me iniciale Q.H., dhe R.H.,
Siç bëhet e ditur në njoftim, të dy personat u arrestuan për shkak të dyshimit se në bashkëkryerje kanë kryer veprën penale “Blerja, posedimi, shpërndarja dhe shitja e paautorizuar narkotikeve substancave psikotrope apo analoge“.
Po ashtu bëhet e ditur se gjatë urdhër kontrollit janë gjetur dhe sekuestruar një sasi kokaine, armë dhe para.
Me urdhër të Prokurorit të Shtetit, të arrestuarit janë ndaluar për 48 orë.
Shtëpi, lokale, oborre dhe vetura të përmbytura nga uji janë disa nga pamjet që ditëve të fundit janë shënuar në shumë komuna të Kosovës.
Si pasojë e reshjeve të dendura të shiut, të cilat nisën më 5 janar, janë shkaktuar vërshime që kanë sjellë dëme në prona private, infrastrukturë publike, evakuime të qytetarëve si dhe bllokim të rrugëve.
Fushë-Kosova, Malisheva, Rahoveci, Klina, Mitrovica e Jugut, Vushtrria, Drenasi, Skenderaj dhe Gjakova, sipas Agjencisë për Menaxhimin e Emergjencave (AME), janë komunat më të prekura nga këto vërshime.
Të gjithë qytetarët që kanë pësuar dëme në të mira materiale si pasojë e këtyre vërshimeve, duhet t’u drejtohen komunave përkatëse për kompensim, tha për Radion Evropa e Lirë (REL), drejtori ekzekutiv i Asociacionit të Komunave të Kosovës (AKK), Sazan Ibrahimi.
Sipas rregullores për metodologjinë e vlerësimit të dëmeve nga fatkeqësitë natyrore, në të mira materiale përfshihen: objekte banimi, objekte tjera përcjellëse, pajisje, mjete të punës, kafshë, prodhimtaria aktuale bujqësore, mallra, mjete të transportit të te gjitha llojeve, orenditë, gjësendet shtëpiake dhe të gjitha mjetet dhe pajisjet që përdoren për jetën dhe punën e qytetarëve dhe bizneseve.
Disa komuna kanë njoftuar tashmë qytetarët për fillimin e aplikimeve për vlerësimin e dëmeve nga vërshimet, ndërsa disa të tjera ende s’e kanë bërë.
Komunat e Skenderajt, Pejës, Drenasit, Rahovecit dhe Klinës, përmes njoftimeve të publikuara në faqet e tyre zyrtare në Facebook, kanë ftuar qytetarët të paraqesin kërkesa për vlerësim të dëmeve.
Në njoftime janë të publikuara edhe dokumentacionet e nevojshme për aplikim, si: të dhënat personale të aplikuesit (emri, mbiemri, numri personal, adresa dhe numri kontaktues), kopja e letërnjoftimit, llogaria bankare dhe fotografi që dëshmojnë gjendje reale të dëmeve, të realizuara nga vendi i dëmtuar.
Afati për aplikim është nga tetë deri në dhjetë ditë, varësisht nga komuna.Në Komunën e Skenderajt, deri në mesditën e së premtes, janë paraqitur dhjetë kërkesa për vlerësim të dëmeve, ka bërë të ditur Amir Lushtaku, zëdhënës i kësaj komune.
Ndërkohë, komunat e Fushë-Kosovës dhe Obiliqit kanë formuar të premten komisionet për vlerësimin e dëmeve, konfirmuan kryetarët e këtyre komunave, Valon Prebreza, dhe Halil Thaqi, përkatësisht.
REL-i, deri në publikimin e këtij teksti, nuk ka pranuar përgjigje lidhur me nisjen e procesit të aplikimit për vlerësimin e dëmeve materiale nga komunat e Malishevës, Mitrovicës së Jugut, Gjakovës dhe Vushtrrisë.
Sipas Sazan Ibrahimit, komisionet komunale përpilojnë raportet e dëmeve, ato miratohen në Kuvendet Komunale dhe më pas dorëzohen në institucionet qendrore.
“Niveli lokal është përgjegjës për analizimin e situatës dhe vlerësimin e dëmeve në ekonomitë familjare, bizneset dhe infrastrukturë. Komisioni komunal harton raportin bazuar në dëmet e argumentuara nga qytetarët, i cili miratohet në Kuvendin Komunal dhe më pas i dërgohet AME-së”, tha ai.
Më pas kjo agjenci bën verifikimin e vërtetësisë së dëmeve të vlerësuara, përgatitë raportin përmbledhës për dëmet e vlerësuara dhe ia dorëzon Qeverisë së Kosovës për shqyrtim dhe miratim.
Ibrahimi tha se deri në kompensimin e dëmeve nga Qeveria, qytetarët janë të detyruar të gjejnë zgjidhje vetanake.
“Komunat kanë vullnet për t’i ndihmuar të prekurit, por nuk kanë buxhet të mjaftueshëm, ndërsa përgjegjësia për kompensimin e dëmeve është obligim ligjor i Qeverisë", tha ai.
Disa qytetarë në fshatin Kuzmin të Fushë-Kosovës janë detyruar të evakuohen për shkak të përmbytjeve. Disa prej tyre madje janë detyruar të gjejnë një vendbanim tjetër me qira.
Ndryshe, edhe gjatë vitit 2023 disa komuna të Kosovës u përballën me vërshime, të cilat shkaktuan dëme të konsiderueshme materiale.
Ndër komunat e prekura ishin Skenderaj, Istogu, Klina dhe Mitrovica e Jugut.
Zyra e kryeministrit të Kosovës dhe Agjencia për Menaxhimin e Emergjencave nuk kanë dhënë përgjigje lidhur me vlerën totale të këtyre dëmeve dhe nëse ato janë kompensuar.
Megjithatë, sipas të dhënave të komunave në atë kohë, vlera e përgjithshme e dëmeve vlerësohej rreth 26 milionë euro.
Sazan Ibrahimi tha se komunat vazhdojnë të ankohen se bizneset që pësuan dëme nga vërshimet e atij viti ende nuk janë rimbursuar.
Vetëm në komunën e Skenderajt, dëmet e shkaktuara nga vërshimet e janarit 2023 arritën vlerën 12.2 milionë euro, duke përfshirë dëmet në ekonomitë familjare, bizneset, kulturat bujqësore dhe infrastrukturën rrugore.
Zëdhënësi i kësaj komune, Amir Lushtaku, tha se deri më tani janë kompensuar rreth 1.5 milion euro, kryesisht për dëmet në ekonomitë familjare, ndërsa nuk ka pasur asnjë kompensim për dëmet në biznese, infrastrukturë publike dhe sektorin e bujqësisë.
Qeveria e Kosovës, në tetor të vitit 2023, ka ndarë nëntë milionë euro për rimëkëmbjen e ekonomive familjare të prekura nga fatkeqësitë natyrore në komunat e goditura./Radio Evropa e Lirë/
Paneli Zgjedhor për Ankesa dhe Parashtresa (PZAP) ka hedhur poshtë si të pasafatshme ankesën e Partisë Demokratike të Kosovës, e cila kërkoi anulimin e fletëvotimeve të pranuara me postë pas datës 29 dhjetor 2025.
Paneli i përbërë nga gjyqtarët Kujtim Pasuli, Hidajete Gashi Alaj dhe Skender Çoçaj, konstatoi se ankesa është parashtruar jashtë afatit ligjor prej 48 orësh.
“Hedhet e pasafatshme ankesa ZP.Anr.69/2025, e datës 08.01.2026, e parashtruar nga subjektit politik Partia Demokratike e Kosovës (PDK), me seli në Prishtinë, me të cilën ka kërkuar që të urdhërohet Komisioni Qendror i Zgjedhjeve (KQZ) që të anuloj të gjitha fletëvotimet të pranuara me postë pas datë 29.12.2025 dhe të përjashtoj nga numërimi të gjitha fletëvotimet të pranuara pas këtij afati përfshirë ato të pranuara me 02.01.2026 dhe 05.01.2026, për Zgjedhjet e Parakohshme për Kuvend të Republikës së Kosovës, të mbajtura më 28 dhjetor 2025”, thuhet në vendimin e PZAP-së.
Sipas PZAP shkelja e supozuar ka ndodhur më datat 2 dhe 5 janar 2026 (kur janë tërhequr pakot), derisa ankesa në PZAP është dorëzuar më 8 janar 2026. Për pasojë, paneli e hodhi ankesën pa e shqyrtuar bazueshmërinë e saj lëndore.
PDK kishte pretenduar se Komisioni Qendror i Zgjedhjeve (KQZ) ka shkelur Ligjin për Zgjedhjet e Përgjithshme duke numëruar fletëvotime që kanë arritur në kutitë postare më 2 dhe 5 janar 2026.
Në përgjigjen e saj, KQZ-ja u mbrojt duke argumentuar se ndryshimi i afateve ishte i domosdoshëm për të garantuar të drejtën e votës për diasporën, për shkak të festave të fundvitit dhe vonesave postare; Dështimit të kontraktimit të operatorit ekonomik për shërbime postare në kohë dhe faktit që në disa shtete (si Zvicra), data 29 dhjetor nuk ishte ditë pune.
KQZ theksoi se ky vendim ishte marrë me votat e të gjithë anëtarëve dhe ishte bazuar në ligjin që i lejon KQZ-së të ndryshojë afatet në rrethana të zgjedhjeve të parakohshme.
Tani Partia Demokratike e Kosovës ka të drejtë të ankohet kundër vendimit të PZAP në Gjykatën Supreme të Kosovës brenda 48 orëve nga momenti i pranimit të vendimit.
Prokuroria Themelore në Prizren ka kërkuar caktimin e masës së paraburgimit, ndaj katër të pandehurve që u arrestuan dje gjatë bastisjeve në të gjithë vendin si pjesë e një hetimi kundër dy ish-drejtuesve të Byrosë Kosovare të Sigurimit (BKS), të cilët dyshohen për keqpërdorime që i kanë shkaktuar dëme byrosë në vlerë mbi 1 milion euro.
Prokuroria i ka kërkuar Gjykatës Themelore në Prizren të caktojë masën e paraburgimit për ish-drejtorin ekzekutiv të BKS-së, Sami Mazreku, ish-drejtorin e Financave, Valon Berisha, si dhe F.S., dhe Y.Ç.,
Ndërkaq, për 35 të pandehurit e tjerë, Prokuroria ka kërkuar caktimin e masës ‘Paraqitja në Stacion Policor’ dhe’ Ndalimin’ për t’iu ofruar vendit ose personit të caktuar.
Gjyqtari i procedurës paraprake, ka caktuar seancën dëgjimore në ora 16:00, tha Gjykata Themelore e Prizrenit në një komunikatë për mediat.
Pas përfundimit të kësaj seance, gjykata tha se do të njoftojë publikun me vendimet e gjyqtarit të procedurës paraprake.
Mazreku dhe Berisha u arrestuan gjatë bastisjeve të djeshme nën dyshimin se kanë i kanë keqpërdorur autorizimet e BKS-së duke ua mundësuar personave të ndryshëm që përmes tyre të kryejnë transaksione të jashtëligjshme.
Prokuroria tha se ata kanë keqpërdorur autorizimet ekonomike dhe kanë përpiluar dokumente të falsifikuara, ku ne deri në këtë fazë është vlerësuar se ato dokumente të dyshuara i kanë përdorur për përfitime personale dhe i kanë shkaktuar dëm BKS-së në vlerë prej 1 milion e 43 mijë euro.
Prokurorët i kanë sekuestruar 23.700 euro, ari, aksesorë, orë dore të ndryshme dhe pajisje elektronike gjatë bastisjeve.
Presidentja e Republikës së Kosovës, Vjosa Osmani, ka pritur sot në takim Ambasadorin e Mbretërisë së Bashkuar në Kosovë, Jonathan Hargreaves.
Sipas njoftimit të Presidencës, gjatë takimit u diskutuan zgjedhjet e 28 dhjetorit dhe procesi i themelimit të institucioneve të reja, për të cilin Osmani ka shprehur pritjen që formimi të ndodhë sa më shpejt. Ajo ka vlerësuar se zgjedhjet e parakohshme u zhvilluan sipas standardeve më të larta demokratike dhe ka theksuar rëndësinë e funksionimit të shpejtë të institucioneve të reja.
Po ashtu, gjatë takimit u trajtua edhe iniciativa e Presidentes për lidhjen e marrëveshjeve strategjike me Mbretërinë e Bashkuar në fushat e interesit të përbashkët, përfshirë mbrojtjen, sigurinë, ekonominë dhe tregtinë.
Presidenca thekson se këto marrëveshje ishin diskutuar edhe gjatë vizitës së Sekretarit të Jashtëm britanik në Kosovë në prill të vitit të kaluar.
Takimi nënvizon përpjekjet e Kosovës për forcimin e bashkëpunimit me partnerët ndërkombëtarë dhe avancimin e procesit demokratik në vend.
Instituti Kombëtar i Shëndetësisë Publike të Kosovës, ka njoftuar se për shkak të reshjeve të shiut dhe vërshimeve, janë intensifikuar monitorimet e cilësisë së ujit, kësisoj, IKSHPK, ka shtuar se janë marr mostra për analizë fiziko-kimike dhe mikrobiologjike nga sistemet publike të ujëfurnizim.
Në komunikatën e IKSHPK’së, njoftohet edhe për situatën në rajonet e vendit, ku bëhet e ditur se fabrika për trajtimin e ujit në Shkabaj dhe Bivolak janë jashtë funksionit për shkak të turbullirës së madhe, ndërsa ato në Badoc dhe Batllavë funksionojnë normalisht, cilësia e ujit është brenda standardeve.
Pos rajonit të Prishtinës, IKSHPK njofton edhe për situatën në rajonet e tjera.
Njoftimi i plotë:
Si pasojë e reshjeve të shtuara atmosferike ditët e fundit, IKSHPK në bashkëpunim me Qendrat Rajonale të Shëndetit Publik ka intensifikuar monitorimin e cilësisë së ujit të pijshëm në të gjithë territorin e Republikës së Kosovës.
Gjatë kësaj periudhe janë realizuar marrje të mostrave për analizë fiziko-kimike dhe mikrobiologjike nga sistemet publike të ujëfurnizimit.
Situata me ujin e pijshëm më 9 janar 2026
Rajoni i Prishtinës
Fabrika për trajtimin e ujit në Shkabaj dhe Bivolak janë jashtë funksionit për shkak të turbullirës së madhe.
Fabrika e ujit në Badoc dhe Batllavë funksionojnë normalisht, cilësia e ujit është brenda standardeve.
Rajoni i Prizrenit
Burimi i ujit nga “40 bunarët” në qytetin e Prizrenit është lëshuar vetëm për nevoja teknike. Burimet e tjera, si Cvilen dhe Soz, uji është brenda standardeve.
Në Suharekë dhe Dragash uji është brenda standardeve.
Në Malishevë uji përdoret vetëm për nevoja teknike.
Rajoni i Gjilanit
Në qytetin e Gjilanit uji është brenda standardeve.
Në Kamenicë, Viti dhe fshatrat Makresh, Ropotovë, Ranillug dhe Berivojcë vlerat e turbullirës janë të rritura dhe uji nuk rekomandohet për pije.
Rajoni i Pejës
Në qytetin e Pejës dhe Istogut uji është brenda standardeve.
Ujësjellësi Deçan, Junik, Klinë furnizimi me ujë është vetëm për përdorim teknik.
Mbivada dhe Vrella me turbullirë, uji shfrytëzohet vetëm për nevoja teknike.
Burimi i Jarines, uji shfrytëzohet vetëm për nevoja teknike
Rajoni i Ferizajt
Uji është i pijshëm – brenda standardeve.
Rajoni i Gjakovës
Furnizimi me ujë nga rrjeti KRU Gjakova është i sigurtë për pije.
Hoqa e Madhe, Opterusha, Zaqishta vlera të rritura të turbullirës, uji nuk është i pijshëm.
Rajoni i Mitrovicës
Uji përdoret vetëm për nevoja teknike.
IKSHPK në koordinim me Qendrat Rajonale të Shëndetit Publik dhe Kompanitë Rajonale të Ujësjellësit vazhdon me monitorim të shtuar të cilësisë së ujit të pijshëm me qëllim të mbrojtjes së shëndetit të popullatës.
Partia Demokratike e Kosovës (PDK) ka mirëpritur aktgjykimin e Gjykatës Kushtetuese, me të cilin 13 ligje të miratuara nga Qeveria Kurti më 5 dhjetor 2024 janë shpallur antikushtetuese.
Ligjet ishin kontestuar nga deputetët e Grupit Parlamentar të PDK-së.
Sipas PDK-së, ky vendim është një konfirmim i qartë institucional se shumica qeverisëse ka shkelur Kushtetutën e Kosovës, duke cenuar parimin e ndarjes së pushteteve, rolin kushtetues të deputetit, Rregulloren e Punës së Kuvendit dhe funksionimin e komisioneve parlamentare. Partia thekson se procedurat parlamentare janë përdorur si instrument force politike dhe jo si mekanizëm demokratik i vendimmarrjes.
PDK vlerëson rëndësinë e veprimit opozitar të saj, duke theksuar se ka zgjedhur rrugën institucionale për të mbrojtur rendin kushtetues përballë një qeverisjeje që ka shfaqur prirje antikushtetuese dhe përqendrim të kundërligjshëm të pushtetit.
PDK rithekson se Kushtetuta është themeli i shtetit dhe asnjë shumicë parlamentare nuk ka të drejtë ta shkelë atë në emër të pushtetit momental.
PDK thotë se mbetet e vendosur të vazhdojë angazhimin politik dhe institucional për mbrojtjen e rendit kushtetues, sundimit të ligjit dhe funksionimit demokratik të institucioneve të Republikës së Kosovës, duke theksuar se shteti i së drejtës duhet të mbrohet çdo ditë./Telegrafi/
Një zjarr i madh kaishte përfshirë të enjten pasdite tregun e rrobave të përdorura në lagjen ‘5 Maji’ në Tiranë.
Zjarrfikësit kanë vënë nën kontroll zjarrin dhe për të parandaluar përhapjen e tij.
Për shkak të materialeve lehtësisht të djegshme, kryesisht tekstile, flakët u përhapën me shpejtësi dhe përfshinë dy kapanone.
Pas disa orësh ndërhyrjeje intensive, forcat zjarrfikëse arritën ta vendosin zjarrin nën kontroll, duke shmangur përhapjen e tij në objektet e tjera përreth.
Komandanti i Forcës së Sigurisë së Kosovës (FSK), gjenerallejtënant Bashkim Jashari, ka pritur në një takim zyrtar Drejtorin e Ushtrisë së Gardave Kombëtare të Shteteve të Bashkuara të Amerikës, gjenerallejtënant Jonathan M. Stubbs, i shoqëruar nga gjeneral major Levon E. Cumpton dhe delegacioni i tij.
Gjatë takimit, palët diskutuan për bashkëpunimin e shkëlqyer ndërmjet FSK-së dhe Byrosë së Gardës Kombëtare të SHBA-së, me theks të veçantë në partneritetin me Gardën Kombëtare të Ajovës. U vlerësua lart mbështetja amerikane në ngritjen e kapaciteteve profesionale të FSK-së, zhvillimin e trajnimeve të përbashkëta si dhe avancimin e ndërveprueshmërisë me partnerët ndërkombëtarë.
Gjenerallejtënant Jashari shprehu mirënjohje për mbështetjen e vazhdueshme të Shteteve të Bashkuara ndaj Forcës së Sigurisë së Kosovës, duke e cilësuar këtë partneritet si thelbësor për zhvillimin, modernizimin dhe profesionalizimin e FSK-së.
Në takim u theksua gjithashtu se Programi i Partneritetit të Përbashkët (State Partnership Program – SPP) ndërmjet Gardës Kombëtare të Ajovës dhe FSK-së përfaqëson një shembull suksesi, me rezultate konkrete dhe aktivitete të përbashkëta në fusha të ndryshme.
Në përmbyllje, të dy gjeneralët u pajtuan se thellimi i mëtejmë i bashkëpunimit është thelbësor për avancimin e ndërveprueshmërisë ndërmjet forcave, duke theksuar njëherësh rëndësinë e mbështetjes së SHBA-së në përmbushjen e synimeve strategjike të Kosovës drejt anëtarësimit në organizatat ndërkombëtare të sigurisë, në funksion të paqes, sigurisë dhe stabilitetit rajonal./Telegrafi/
Eugen Cakolli nga Instituti Demokratik i Kosovës (KDI) ka deklaruar se Gjykata Kushtetuese, përmes dy aktgjykimeve, ka rrëzuar pothuajse të gjitha ligjet e miratuara në seancën e Kuvendit të mbajtur më 5 dhjetor 2024, përfshirë edhe Ligjin për Byronë për Verifikimin dhe Konfiskimin e Pasurisë së Pajustifikueshme.
Sipas Cakollit, asnjë nga këto ligje nuk është shpallur antikushtetues për shkak të përmbajtjes së tyre. Ai ka theksuar se Gjykata nuk është marrë fare me substancën e ligjeve, por i ka rrëzuar ato për shkak të shkeljeve serioze procedurale gjatë miratimit, të cilat kanë cenuar thelbin e funksionimit parlamentar.
Ai ka bërë të ditur se, në disa raste, komisionet parlamentare kanë qenë të obliguara të shqyrtojnë projektligje, amendamente dhe raporte brenda afateve prej vetëm 5 deri në 20 minutash. Për ligje të tjera, materialet për shqyrtim u janë shpërndarë deputetëve pas kohës së paraparë për fillimin e seancës plenare.
Cakolli ka theksuar se në rastin konkret të Ligjit për Byronë, dokumentet përkatëse u janë dërguar deputetëve rreth 21 minuta pas orarit zyrtar të fillimit të seancës, duke e bërë të pamundur një shqyrtim real parlamentar.
Sipas tij, me afate të tilla deputetët nuk kanë pasur kohë reale për lexim, debat apo vlerësim të ligjeve, çka ka bërë që roli i tyre të reduktohet në votim formal. Ai ka vlerësuar se një vit me përqindje rekord të ligjeve të miratuara nuk mund të konsiderohet sukses, nëse ky rezultat arrihet duke anashkaluar procedurat e rregullta parlamentare.
Ai ka theksuar se rëndësia kryesore e këtyre aktgjykimeve qëndron në vendosjen e një standardi të qartë se procedurat parlamentare duhet të respektohen në plotni, përveç rasteve vërtet emergjente.
Ai ka paralajmëruar se miratimi i dhjetëra ligjeve brenda një seance të vetme cenon parlamentarizmin, cilësinë e ligjeve dhe mandatin e deputetëve, duke theksuar se deputetët janë ligjvënës e jo “makineri votimi”./Telegrafi/
Naim Jakaj nga Instituti i Kosovës për Drejtësi (IKD) ka kritikuar ashpër mënyrën se si Kuvendi i Kosovës i ka miratuar 12 ligje më 5 dhjetor të vitit të kaluar, duke vlerësuar se procedura e ndjekur ka cenuar rëndë demokracinë parlamentare dhe shtetin e së drejtës.
Përmes një reagimi publik, Jakaj ka theksuar se pavarësisht se ligjet e miratuara mund të jenë të mira dhe të rëndësishme për vendin, mënyra e miratimit të tyre ka qenë “fatale” për procedurën parlamentare.
Sipas tij, Gjykata Kushtetuese ka konstatuar disa shkelje serioze në procesin legjislativ, përfshirë miratimin e ligjeve brenda një dite, në lexim të parë dhe të dytë, duke e shndërruar procesin legjislativ në një procedurë formale dhe jo përmbajtësore.
Jakaj ka kritikuar gjithashtu anashkalimin e komisioneve parlamentare, të cilave, sipas tij, u janë dhënë vetëm disa minuta për shqyrtimin e projektligjeve, gjë që ka pamundësuar analizën profesionale dhe substanciale të tyre.
Ai ka vlerësuar se ka munguar debati parlamentar, pasi deputetët nuk kanë pasur kohë të mjaftueshme për të lexuar materialet, për të diskutuar apo për të propozuar amendamente. Po ashtu, është përdorur pa arsye procedura e përshpejtuar, pa ekzistuar situata emergjente apo arsye objektive që do ta justifikonin shmangien nga afatet e rregullta ligjore.
Sipas Jakajt, materialet ligjore janë shpërndarë me vonesë, madje edhe pas fillimit të seancave, duke cenuar transparencën dhe cilësinë e procesit vendimmarrës. Ai ka theksuar se deputetëve u është pamundësuar ushtrimi real i mandatit, duke u reduktuar në votues formalë, pa rol të vërtetë në hartimin e ligjeve.
Në fund, Jakaj ka vlerësuar se kjo mënyrë e miratimit të ligjeve ka cenuar standardet e shtetit të së drejtës, pasi procedurat e shkurtra kanë shkelur parimet e ligjshmërisë, përgjegjshmërisë dhe procesit demokratik./Telegrafi/
Ministri në detyrë i Drejtësisë, Blerim Sallahu, ka reaguar pas pranimit të aktgjykimit të Gjykatës Kushtetuese lidhur me Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme, duke e cilësuar procesin si të vonuar dhe të dëmshëm për luftën kundër korrupsionit.
Përmes një postimi në Facebook, Sallahu ka bërë të ditur se aktgjykimi është pranuar pas një viti e 28 ditësh, duke tejkaluar, sipas tij, afatet ligjore të parapara. Ai theksoi se Gjykata Kushtetuese ka konstatuar shkelje procedurale gjatë miratimit të projektligjit në Kuvend, për çka ligji duhet të kthehet sërish për rishqyrtim dhe miratim.
Sallahu e ka cilësuar të papranueshme mbajtjen e një ligji kaq të rëndësishëm për më shumë se një vit për arsye procedurale, duke e quajtur këtë veprim joligjor, joprofesional dhe joetik.
Sipas tij, vonesa të tilla cenojnë kompetencat kushtetuese të Qeverisë dhe Kuvendit në procesin e miratimit të ligjeve dhe dëmtojnë përpjekjet institucionale për luftimin e krimit dhe korrupsionit, veçanërisht të zyrtarëve publikë.
Megjithatë, ministri në detyrë i Drejtësisë ka shprehur bindjen se, pavarësisht pengesave, procesi i konfiskimit të pasurisë së pajustifikueshme do të nisë gjatë këtij viti./Telegrafi/
Reshjet e ditëve të fundit kanë përmirësuar situatën e prodhimit të energjisë elektrike ndërsa prurjet në Kaskadën e Drinit kanë shënuar nivele të larta. Për këtë arsye, Korporata Elektroenergjetike Shqiptare ka hapur procedura për të shitur energji elektrike në tregun e huaj.
Përmes një procedure të zhvilluar për periudhën 10–11 janar, KESH ka arritur të shesë 19 000 megavat-orë energji, me çmim mesatar 57.6 euro, duke gjeneruar rreth 1.1 milionë euro të ardhura.
Ndërkaq, sipas të dhënave të përditësuara mbi situatën në Kaskadën e lumit Drin, prurjet natyrore në Fierzë janë 1500 m³/s, në Koman 500 m³/s, ndërsa në hidrocentralin e Vaut të Dejës 60 m³/s. Në raport me një ditë më parë, prurjet natyrore kanë shënuar rënie të ndjeshme. Ndërkohë, prodhimi ditor në të tre HEC-et është 16 300 MWh dhe, në krahasim me një ditë më parë, vihet re një rritje e prodhimit ditor, sipas të dhënave të raportuara nga KESH.
Sa i takon niveleve në liqenet e Kaskadës së Drinit, Fierzë ka arritur nivelin 290 metra mbi nivelin e detit, Koman 173 m, ndërsa Vau i Dejës 75 m. Po ashtu, KESH njofton se po vazhdojnë shkarkimet nga hidrocentralet e Komanit dhe Vaut të Dejës.
Ditët e para të këtij viti tregojnë për një situatë krejt tjetër nga ajo e vitit të kaluar, kur për shkak të mungesës së reshjeve të shiut, KESH kërkonte të blinte energji elektrike jashtë vendit./Euronews Albania/
Gjykata Kushtetuese e Republikës së Kosovës ka shpallur aktgjykimin lidhur me kërkesat e paraqitura nga dymbëdhjetë deputetë të Kuvendit nga Grupi Parlamentar i Partisë Demokratike të Kosovës (PDK), të cilët kishin kontestuar kushtetutshmërinë e vendimeve të Kuvendit për miratimin e 15 ligjeve më 5 dhjetor 2024.
Në aktgjykimin e saj, Gjykata ka vendosur që 12 nga vendimet e kontestuara të Kuvendit nuk janë në përputhshmëri me Kushtetutën e Republikës së Kosovës, konkretisht me nenet 4, 7, 74, 76 dhe 77 të Kushtetutës.
Vendimet që Gjykata i ka shpallur jokushtetuese janë ato përmes të cilave janë miratuar këto ligje:
Ligji për Shërbimet e Pagesave; Ligji kundër dukurive negative në sport; Ligji për ndryshimin dhe plotësimin e Ligjit për parandalimin e pastrimit të parave dhe luftimin e financimit të terrorizmit; Ligji për provimin e maturës shtetërore; Ligji për Banim Social dhe të Përballueshëm; Ligji për ndryshimin dhe plotësimin e Ligjit për Kontabilitet, Raportim Financiar dhe Auditim; Ligji për Sigurimin e Detyrueshëm të Kujdesit Shëndetësor; Ligji për ndryshimin dhe plotësimin e Ligjit për Prokurorinë Speciale; Ligji për Inspektoratin Qendror të Trashëgimisë Kulturore; Ligji për Financimin e Menaxhimit të Resurseve Ujore; Ligji për Inspektoratin Qendror të mjedisit, ujërave, natyrës, ndërtimit si dhe mbrojtjen nga rrezatimi dhe siguria bërthamore; Ligji për Lojërat Mesdhetare XXI “Prishtina 2030”.
Ndërkaq, Gjykata ka vendosur se tre vendime të Kuvendit janë në përputhshmëri me Kushtetutën, përkatësisht vendimet për miratimin e:
Ligjit për Bankat; Ligjit për Inspektoratin Qendror të Mbikëqyrjes së Tregut; Ligjit për Gjykatën Administrative.
Gjykata Kushtetuese ka konstatuar se, për ligjet e shpallura jokushtetuese, procedurat e ndjekura nga Kuvendi më 5 dhjetor 2024 nuk kanë qenë në përputhje me dispozitat kushtetuese që rregullojnë ushtrimin e funksionit të deputetëve, rregulloren e punës dhe rolin e komisioneve parlamentare.
Aktgjykimi është marrë pas shqyrtimit të kërkesave të bashkuara KO246/24 deri KO260/24, të parashtruara nga deputetët e PDK-së, dhe është miratuar më 9 janar 2026.
Besian Mustafa nga Lidhja Demokratike e Kosovës, gjatë një paraqitjeje në emisionin Debat Plus, ka deklaruar se votimi i Hashim Thaçi për president nga LDK-ja ka qenë, sipas tij, një gabim i madh.
“Ajo që ka rezultuar me Hashim Thaçin ka qenë gabim trashanik për LDK-në kur e ka votuar dhe ky është mendim personal i imi që ka qenë gabim atëherë dhe LDK duhet me qenë e vetëdijshme për të gjitha veprimet”, ka thënë Mustafa.
Ai ka theksuar se për zgjedhjen e presidentit është thelbësore arritja e një konsensusi të gjerë ndërmjet partive politike.
“Ajo që është e rëndësishme për me zgjedh një president është me pas konsensus mes partive politike”, ka deklaruar ai.
Mustafa ka shtuar se qëndrimi në sallë apo votimi kundër, në rastin e zgjedhjes së presidentit, prodhon të njëjtin efekt
“Pra, e krijon kuorumin, votove a s’votove e krijon kuorumin, rezultati është i njëjtë – zgjidhet ose nuk zgjidhet presidenti”, ka thënë ai.
Në fund, Mustafa ka theksuar se konsensusi ndërpartiak është i domosdoshëm edhe në rast se kryeministri Albin Kurti synon rizgjedhjen e Vjosa Osmani si presidente, duke nënvizuar se një gjë e tillë kërkon marrëveshje me partitë e tjera politike.
Jehona Lushaku-Sadriu e Lidhja Demokratike e Kosovës, gjatë një paraqitjeje në emisionin Debat Plus, ka deklaruar se partia e saj nuk ka obligim as të qëndrojë në sallë, as t’i japë mbështetje Vjosa Osmani për një mandat tjetër si presidente.
Ajo ka kritikuar Osmanin për, siç tha, njëanshmëri gjatë ushtrimit të detyrës.
“Gjatë këtyre pesë viteve kemi parë një presidente që në shumë momente ka qenë e anshme. Presidentja duhet të jetë mbi partitë politike dhe të ketë një rol unifikues e përbashkues, dhe vendimet e saj të jenë në interes të vendit. Shpeshherë kemi parë vendime që kanë dhënë efekte dhe anësi politike ndaj partisë që ka qenë në pushtet”, ka thënë ajo.
Lushaku-Sadriu theksoi se për këto arsye, LDK nuk e sheh si obligim pjesëmarrjen në sallë apo dhënien e mbështetjes për Osmanin.
“Prandaj ne nuk e shohim si diçka që neve na obligon që të rrimë në sallë e as që t’i japim mbështetje. Pra, ne si deputetë duhet ta kryejmë obligimin tonë duke votuar ose duke marrë një qëndrim politik. Normalisht që si parti politike, në këtë moment, për aq sa kemi përgjegjësi, duhet të jemi edhe përgjegjës në kuptimin e marrëveshjeve politike”, ka deklaruar ajo.
Login
