TIRANË, 15 janar/ATSh/ Gjykata Kushtetuese vlerësoi sot se vendimet e gjykatave të posaçme për vijimin e masës së sigurimit “Arrest në shtëpi” për kryetarin e Partisë Demokratike Sali Berisha vijnë në kundërshtim me Kushtetutën.

Në 17 dhjetor, Gjykata Kushtetuese mori në shqyrtim në seancë plenare çështjen me kërkues Sali Berishën, i cili kërkonte shfuqizimin e vendimeve të Gjykatës së Posaçme të Shkallës së Parë për Korrupsionin dhe Krimin e Organizuar; të Gjykatës së Posaçme të Apelit për Korrupsionin dhe Krimin e Organizuar; dhe të Kolegjit Penal të Gjykatës së Lartë, si të papajtueshme me Kushtetutën.

Pasi mori në shqyrtim pretendimet e palëve, Gjykata Kushtetuese nënvizoi se në vitin 2023 ndaj kërkuesit rezulton se, për kërkesën e prokurorit, nga gjykatat e zakonshme janë vendosur masat e sigurimit personal “Detyrimi për t’u paraqitur në Policinë Gjyqësore” dhe “Ndalimi i daljes jashtë shtetit”.

“Vendimet gjyqësore që kanë disponuar për këto masa sigurimi janë bërë objekt i shqyrtimit nga Gjykata, e cila, me vendimin e datë 21 nëntor 2024 ka vendosur pranimin pjesërisht të kërkesës dhe shfuqizimin e vendimeve gjyqësore që kishin vendosur ato masa, si të papajtueshme me Kushtetutën, vetëm për pjesën që kanë caktuar masën e sigurimit personal “Ndalimi i daljes jashtë shtetit”. “Kjo me arsyetimin se në caktimin ndaj kërkuesit të këtyre dy masave vendimeve të gjykatave u mungon arsyetimi, për rrjedhojë nuk rezulton që të kenë vlerësuar nevojën për caktimin tyre për të njëjtin procedim ndaj tij”, thuhet në njoftimin e Gjykatës Kushtetuese.

Për shkak se Berisha nuk respektoi një prej masave të sigurimit të caktuar nga gjykata, “Detyrimi për t’u paraqitur në Policinë Gjyqësore”, për kërkesën e prokurorit gjykatat e zakonshme, në datën 30 dhjetor 2023, ka zëvendësuar masat e sigurimit të vendosura ndaj kërkuesit me masën “Arresti në shtëpi”.

“Edhe procesi gjyqësor që disponoi për zëvendësimin e masave të sigurimit ndaj kërkuesit, duke caktuar masën “Arresti në shtëpi”, është bërë objekt i kontrollit kushtetues nga Gjykata, e cila, me vendimin e datës 17 janar 2025, ka vendosur rrëzimin e kërkesës”, bëri të ditur Gjykata Kushtetuese.

Ndërkohë rasti që u shqyrtua sot lidhet me një vendim të Gjykatës së Posaçme të Shkallës së Parë për Korrupsionin dhe Krimin e Organizuar të datës 30 korrik 2024, përmes të cilit është disponuar për vijimin e zbatimit të masës së sigurimit “Arresti në shtëpi”.

Gjykata, bazuar në jurisprudencën e GjEDNj-së vlerësoi t’i analizojë vendimet gjyqësore në drejtim të kufizimit të lirisë personale për periudhën që ato kanë prodhuar pasoja juridike.

Në vlerësimin e kësaj çështjeje, Gjykata konstatoi se gjykatat në shqyrtimin e kushteve dhe të kritereve për vijimin e masës së sigurimit “Arresti në shtëpi” kanë arsyetuar se nevojat e sigurimit paraqiten të pandryshuara me ato për të cilat në gjenezë është konkluduar se kërkuesi duhej të vendosej nën një masë sigurimi.

Në këtë kuptim, Gjykata Kushtetuese evidentoi se gjykatat që kanë lejuar vijimin e masës së sigurimit personal “Arresti në shtëpi”, u janë referuar të njëjtave nevoja sigurimi si në momentin fillestar, kur janë caktuar masat e sigurimit ndaj kërkuesit “Detyrimi për t’u paraqitur në Policinë Gjyqësore” dhe “Ndalimi i daljes jashtë shtetit”.

Gjykata konstaton se për këtë të fundit, në vendimin e saj ka konsideruar që për sa kohë u konstatua mungesë në vlerësimin e elementit të nevojës për kufizimin e të drejtave dhe të lirive të kërkuesit, në raport me mbarëvajtjen e procedimit penal, kjo përbën shkak të mjaftueshëm për të konstatuar cenimin e parimit të proporcionalitetit në caktimin e masës “Ndalimi i daljes jashtë shtetit”.

Po kështu, Gjykata, mbi bazën e të njëjtave argumente, konstatoi se edhe vetëm masa e sigurimit personal “Detyrimi për t’u paraqitur në Policinë Gjyqësore” duket se i plotësonte nevojat e sigurimit.

“Ndërkohë, në vendimet e gjykatave të zakonshme objekt kontrolli, ndonëse kishin kaluar 7 muaj nga caktimi i masës së sigurimit ‘Arrest në shtëpi”’ në lidhje me rrezikun e ikjes, nuk ka ndonjë arsyetim, ndërsa për rrezikun e marrjes dhe të vërtetësisë së provave organi i prokurorisë, në vijim, por edhe gjykatat e zakonshme, në momentin fillestar të caktimit të masave të sigurimit, kanë vlerësuar se ajo përmbushej nga masa e sigurimit ‘Detyrimi për t’u paraqitur në Policinë Gjyqësore’”, vlerëson Gjykata Kushtetuese.

Megjithatë, Gjykata Kushtetuese konstaton se për të njëjtën nevojë sigurimi dhe pa evidentuar ndonjë rrethanë të re për ndonjë sjellje konkrete të kërkuesit në aspekt të kësaj nevoje sigurimi, në rastin në shqyrtim gjykatat e zakonshme kanë konsideruar se ajo përmbushej nga një masë sigurimi më e rëndë, ajo e “Arrestit në shtëpi”.

Nisur nga kjo, Gjykata konstatoi se arsyetimi i vendimeve gjyqësore nuk është i mjaftueshëm në aspektin kushtetues në vlerësimin e kësaj nevoje sigurimi, duke mbajtur parasysh edhe faktin se justifikimi për caktimin fillimisht të masës së sigurimit “Arresti në shtëpi” konsistonte në mosrespektimin, moszbatimin nga kërkuesi të masës “Detyrimi për t’u paraqitur në Policinë Gjyqësore”.

Në vlerësimin e Gjykatës, vetëm një rrethanë e tillë nuk mund të justifikojë vijimin e zbatimit ndaj kërkuesit të masës “Arresti në shtëpi”, pra nuk mund të përbëjë arsye të mjaftueshme për zgjatjen në kohë të gjatë të kufizimit të lirisë, pa arsyetuar për ndonjë arsye të re që justifikon vijimin e masës konkrete.

Për këtë arsye, Gjykata vlerësoi se vendimet objekt i këtij gjykimi kushtetues, që kanë disponuar për vijimin e masës së sigurimit “Arresti në shtëpi”, vijnë në kundërshtim me Kushtetutën.

Për shkak se masa e sigurimit “Arresti në shtëpi” nuk është më në fuqi, pasi Gjykata e Posaçme e Apelit për Korrupsionin dhe Krimin e Organizuar në datën 3 janar 2025 ka vendosur zëvendësimin e saj me masën e sigurimit “Detyrimi për t’u paraqitur në Policinë Gjyqësore”, Gjykata vendosi të mos i shfuqizojë vendimet objekt të këtij shqyrtimi kushtetues.

Në përfundim të këtij gjykimi, Gjykata vendosi pranimin e pjesshëm të kërkesës dhe deklarimin si antikushtetuese të vendimeve të Gjykatës së Posaçme të Shkallës së Parë për Korrupsionin dhe Krimin e Organizuar; të Gjykatës së Posaçme të Apelit për Korrupsionin dhe Krimin e Organizuar; dhe të Kolegjit Penal të Gjykatës së Lartë. “Shpenzimet e përfaqësimit të kërkuesit në vlerën 75.000 lekë i ngarkohen Ministrisë së Financave”, thuhet në vendim.

/m.m/a.f/r.e/

The post Gjykata Kushtetuese: Vijimi i “Arrestit në shtëpi” për Berishën, në kundërshtim me Kushtetutën appeared first on Agjencia Telegrafike Shqiptare.

TIRANË, 15 janar/ATSh/ Ministri i Drejtësisë, Besfort Lamallari zhvilloi sot një takim me Grupin Ndërinstitucional të Punës për Integrimin Evropian, ku u diskutua për ecurinë e negociatave në nivel teknik përgjatë vitit 2025.

Ministri vlerësoi se “falë bashkëpunimit serioz ndërinstitucional kemi arritur rezultate domethënëse duke adresuar 51 nga 64 boshllëqet kritike të grupkapitullit të Themelorëve, ndërsa pjesa tjetër është në proces të avancuar”.

Ndërkohë, Lamallari theksoi se Reforma në Drejtësi ka nevojë të konsolidohet më tej, ndërsa janë bërë hapa të rëndësishëm në forcimin e pavarësisë së gjyqësorit, në mbrojtjen e të drejtave themelore, në lirinë e medias dhe në përafrimin e legjislacionit penal me standardet e Bashkimit Evropian.

“2026 mbetet një tjetër vit sfidues për ecurinë e negociatave dhe për rrugën tonë pa kthim drejt përmbushjes së aspiratës për Shqipërinë në BE”, u shpreh Ministri i Drejtësisë.

/m.m/a.f/r.e/

The post Negociatat me BE-në, Lamallari: Adresuam 51 nga 64 boshllëqet kritike të “Themelorëve” appeared first on Agjencia Telegrafike Shqiptare.

TIRANË, 15 janar/ATSh/ Këshilli i Ministrave emëroi sot Marjeta Përlalën në postin e drejtores së përgjithshme të Agjencisë Kombëtare të Mjedisit.

Agjencia Kombëtare e Mjedisit është një institucion qendror publik në varësi të ministrit të Mjedisit, që ushtron juridiksionin e vet në të gjithë territorin e Republikës së Shqipërisë, përmes zyrës qendrore dhe katër Agjencive Rajonale të Mjedisit.

AKM-ja ka për mision mbrojtjen, ruajtjen dhe përmirësimin e mjedisit si një pasuri jetike për brezat e sotëm dhe të ardhshëm, parandalimin dhe pakësimin e rreziqeve ndaj jetës e shëndetit të njeriut.

Po ashtu, ajo sigurohet për përdorimin e matur dhe racional të natyrës e të burimeve të saj në kuadër të zhvillimit të qëndrueshëm të vendit.

/m.m/r.e/a.f/

The post Marjeta Përlala emërohet në krye të Agjencisë Kombëtare të Mjedisit appeared first on Agjencia Telegrafike Shqiptare.

TIRANË, 15 janar/ATSh/ Këshilli i Ministrave përcaktoi sot kriteret e veçanta dhe procedurat për përzgjedhjen, emërimin, vlerësimin e rezultateve në punë, disiplinën, lirimin dhe shkarkimin nga detyra të Inspektorit të Përgjithshëm.

Vendimi parashikon kriteret që duhet të plotësojë kandidati për Inspektor të Përgjithshëm, si dhe procedurat e përzgjedhjes dhe emërimit të tij.

Vendimi parashikon krijimin e një komisioni ad hoc të përbërë nga: një përfaqësues nga institucioni që ka në varësi Inspektoratin e Përgjithshëm; një përfaqësues nga Departamenti i Administratës Publike; një përfaqësues nga Ministria e Drejtësisë.

Ky komision shqyrton dokumentacionin dhe zhvillon intervistat me kandidatët, brenda një afati jo më shumë se 15 ditë kalendarike nga data e përfundimit të afatit për dorëzimin e aplikimeve.

“Vlerësimi i kandidatëve bëhet në një total prej 100 pikësh, ku me 60 pikë vlerësohet përvoja profesionale dhe me 40 pikë intervista e strukturuar me gojë.

Komisioni harton listën përfundimtare të kandidatëve të kualifikuar, të shoqëruar me renditjen sipas pikëve të grumbulluara, dhe ia paraqet sekretarit të Përgjithshëm të institucionit përgjegjës brenda 3 ditëve kalendarike nga përfundimi i procesit të vlerësimit.

Po ashtu, Komisioni garanton barazi, objektivitet dhe transparencë gjatë gjithë procesit të vlerësimit.

Ndërkohë vendimi parashikon se në rastet kur ka indicie të arsyeshme për shkelje disiplinore, sekretari i Përgjithshëm i institucionit përgjegjës, me iniciativë të tij ose pas informacionit zyrtar të ardhur nga institucione shtetërore, vendos fillimin e procedurës disiplinore dhe njofton me shkrim Inspektorin e Përgjithshëm për shkeljen e dyshuar dhe për fillimin e hetimit administrativ.

Për këtë urdhërohet ngritja e një grupi të posaçëm për hetimin administrativ të Inspektorit të Përgjithshëm, duke mbledhur prova, dëshmi, raportime dhe deklarata, sipas natyrës së shkeljes së pretenduar.

Sekretari i Përgjithshëm i institucionit përgjegjës, në rast të konstatimit të shkeljes dhe në varësi të rrethanave të konstatuara, i propozon titullarit të institucionit përgjegjës edhe masat përkatëse disiplinore.

Inspektori i Përgjithshëm lirohet dhe shkarkohet nga detyra me vendim të Këshillit të Ministrave, me propozim të titullarit të institucionit përgjegjës, që ka në varësi Inspektoratin e Përgjithshëm.

/m.m/a.f/r.e/

The post Komision ad hoc për përzgjedhjen e Inspektorit të Përgjithshëm appeared first on Agjencia Telegrafike Shqiptare.

TIRANË, 15 janar/ATSh/ Këshilli i Ministrave vendosi sot shpronësimin për interes publik, të pronarëve të pasurive të paluajtshme që preken nga realizimi i projektit të parkut “Dua të luaj” në Fier.

Sipas këtij vendimi, pronarët do të kompensohen me një vlerë të përgjithshme prej 193 385 534 lekësh, që përballohet nga buxheti i shtetit.

Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të tij është brenda 3 muajve nga data e hyrjes në fuqi.

Pronarët e pasurive të paluajtshme do të kompensohen pasi të kenë paraqitur dokumentacionin justifikues për likuidim pranë Agjencisë Shtetërore për Shpronësimin.

Ndërkohë, Agjencia Shtetërore për Shpronësimin kryen procedurat për likuidimin e pronarëve të shpronësuar, sipas përcaktimeve të bëra në këtë vendim.

Agjencia Shtetërore e Kadastrës, Drejtoria Vendore Fier, brenda 30 ditëve nga data e miratimit të këtij vendimi, nis procedurat për hedhjen e gjurmës së projektit mbi hartën kadastrale, sipas planimetrisë së shpronësimit të miratuar, dhe regjistron aktin e kalimit të pronësisë në favor të Bashkisë Fier për pasuritë e shpronësuara.

Kjo agjenci pezullon të gjitha transaksionet me pasuritë e shpronësuara deri në momentin e realizimit të procesit të hedhjes së gjurmës së projektit mbi hartën kadastrale dhe të regjistrimit të aktit të kalimit të pronësisë në favor të Bashkisë Fier për pasuritë e shpronësuara.

/m.m/a.f/r.e/

The post Parku “Dua të luaj” në Fier, 193,4 milionë lekë për shpronësimet appeared first on Agjencia Telegrafike Shqiptare.

TIRANË, 15 janar/ATSh-Maela Marini/ Presidenti Volodymyr Zelensky i dorëzoi sot Urdhrin e princeshës Olga, Klasi I, një nga dekoratat më të larta të shtetit ukrainas, ministres për Evropën dhe Punët e Jashtme, Elisa Spiropali.

Urdhri i lartë iu akordua Spiropalit në cilësinë e Kryetares së Kuvendit të Shqipërisë, detyrë që ajo e ka mbajtur në periudhën 2024-2025.

Dekreti i Presidentit të Ukrainës jepet me motivacionin: “Për kontributin e çmuar personal në forcimin e bashkëpunimit ndërshtetëror në mbështetjen e sovranitetit dhe integritetit territorial të Ukrainës si dhe për veprimtarinë e saj bamirëse në shërbim të shtetit ukrainas”.

Nga ana e saj, Spiropali u shpreh se ky nderim nuk i përket vetëm një personi, por qëndrimit të Shqipërisë dhe të çdo europiani që zgjedh të qëndrojë në anën e lirisë.

“Ukraina sot nuk po mbron vetëm tokën e saj. Ajo po mbron ndërgjegjen e Europës.
Në qytetet e saj të bombarduara, në rezistencën e popullit të saj, po shkruhet nëse kontinenti ynë do të jetojë në paqe dhe të drejtë, apo nën frikë dhe forcë”, u shpreh ajo.

Spiropali vlerësoi se ky urdhër mban emrin e princeshës Olga, një grua që udhëhoqi me dinjitet në kohë të errëta.

“Ta marr sot këtë dekoratë në mes të një lufte për mbijetesë dhe liri, është një përgjegjësi morale, po aq sa një nder. Shqipëria qëndron me Ukrainën jo nga protokolli, por nga bindja. Sepse historia na ka mësuar se liria nuk ruhet duke heshtur, por duke qëndruar drejt, edhe kur kjo ka kosto. Ukraina sot po e mban këtë vijë për të gjithë ne”, tha ajo.

Duke iu drejtuar presidentit Zelensky, Spiropali u shpreh se ky urdhër është një nga nderimet më të mëdha të jetës së saj publike.

“Nuk e konsideroj këtë vetëm si një shenjë nderimi dhe një vlerësimi të madh për mua personalisht, por edhe si një shenjë të marrëdhënieve të shkëlqyera mes kombeve, qeverive dhe popujve tanë, veçanërisht në kohë sfiduese. Ne lutemi për paqe, për Shqipërinë dhe Ukrainën”, tha Spiropali.

/a.f/r.e/

The post Zelensky i dorëzon Spiropalit Urdhrin e princeshës Olga, Klasi I appeared first on Agjencia Telegrafike Shqiptare.

TIRANË, 15 janar/ATSh/ Ministrja për Europën dhe Punët e Jashtme, Elisa Spiropali deklaroi sot nga Kievi se “drejtësia për viktimat, mbajtja e përgjegjësisë për agresorin dhe rivendosja e plotë e sovranitetit, unitetit dhe integritetit territorial të Ukrainës nuk janë të negociueshme”.

Në konferencën e përbashkët për shtyp në Kiev me homologun ukrainas, Sybiha, kryediplomatja shqiptare u shpreh se këto janë parakushte për paqen.

“Prej gati katër vitesh, Ukraina po përballet me një luftë të pajustifikuar dhe të paprovokuar agresioni, shkaktuar nga Federata Ruse, e cila vazhdon të sjellë shkatërrim, vuajtje dhe humbje. Gjithsesi, nuk ia ka dalë të mposhtë vullnetin dhe shpirtin e popullit ukrainas”, u shpreh ajo.

Spiropali theksoi se “ndërsa dimri ashpërsohet, Ukraina po përballet sërish së fundmi me sulme brutale dhe të qëllimshme të Rusisë ndaj sistemeve energjetike, instalimeve të ngrohjes dhe infrastrukturës tjetër kritike”.

Kjo, sipas saj, ka detyruar miliona ukrainas të luftojnë për përditshmërinë e tyre ekzistenciale, për të pasur shtëpi të ngrohta, spitale funksionale dhe shërbime thelbësore operative.

“Këto sulme janë të paprovokuara, të pajustifikuara dhe të kryera në shpërfillje të hapur të së drejtës ndërkombëtare dhe dinjitetit njerëzor, duke rrezikuar qëllimisht jetën e civilëve dhe duke goditur infrastrukturën kritike. Goditjet masive, përfshirë përdorimin e raportuar të një rakete balistike me rreze të ndërmjetme, përfaqësojnë një përshkallëzim shumë më të rrezikshëm dhe të papërgjegjshëm”, u shpreh Spiropali.

Ato, sipas saj, “synojnë jo vetëm të terrorizojnë dhe të thyejnë shpirtin e popullit ukrainas, por edhe të dërgojnë një mesazh kërcënues përtej kufijve të Ukrainës”.

Spiropali theksoi se veprime të tilla rrezikojnë sigurinë e të gjithë rajonit dhe vazhdojnë të minojnë stabilitetin global.

“Shqipëria i dënon këto krime pa asnjë rezervë. Nuk mund të ketë asnjë justifikim, asnjë paqartësi përballë një agresioni kaq brutal. Ata që janë përgjegjës për këto mizori, duhet mbajnë përgjegjësi të plotë. Mosndëshkimi nuk është opsion”, shtoi ajo.

Kryediplomatja shqiptare nënvizoi se Shqipëria ka qenë një mbështetëse e qëndrueshme dhe e palëkundur e Ukrainës që nga fillimi i agresionit të paprovokuar të Rusisë.

“Ne jemi rreshtuar plotësisht me sanksionet dhe masat kufizuese të BE-së, si edhe me ato të organizatave të tjera ndërkombëtare, kemi mbështetur integrimin evropian të Ukrainës dhe kemi përkrahur të gjitha nismat për pezullimin e Rusisë nga organizatat ndërkombëtare. Në mbështetjen tonë, nuk jemi kushtëzuar nga përmasat e dimensionit tonë gjeografik, por nga qartësia e qëllimeve, vlerave, kontributeve dhe veprimeve tona”, u shpreh Spiropali.

Si çdo komb tjetër demokratik dhe i qytetëruar që e çmon paqen, Spiropali theksoi se “ne dëshirojmë që vuajtjet të marrin fund dhe të nisë rindërtimi, në mënyrë që fëmijët të mund të flenë pa frikë”.

“Por, për ta arritur këtë, është thelbësore një paqe e drejtë dhe e qëndrueshme. Shqipëria mirëpret përpjekjet ndërmjetësuese të Shteteve të Bashkuara dhe presidentit Trump, të Bashkimit Evropian dhe të gjithë partnerëve që sinqerisht kërkojnë një zgjidhje që nderon sakrificat e jashtëzakonshme të Ukrainës. Çdo nismë që na afron realisht drejt përfundimit të kësaj lufte meriton angazhimin tonë”, theksoi ajo.

Gjithsesi, Spiropali theksoi se “një paqe e drejtë do të thotë garanci reale sigurie”.

“Një paqe e drejtë do të thotë kthimi në shtëpi i fëmijëve të rrëmbyer, kthimi i të burgosurve, hetimi dhe ndjekja penale e krimeve të luftës dhe mbajtja e përgjegjësisë nga ana e agresorit. Me sytë nga e ardhmja, besoj se është po aq e rëndësishme të shohim përtej fushëbetejës. Të fillojmë që tani të projektojmë të ardhmen e Ukrainës. Kjo e ardhme përcaktohet nga perspektiva jonë e përbashkët si anëtarë të ardhshëm të familjes evropiane”, theksoi ajo.

Nga ana tjetër, Spiropali siguroi se Shqipëria do ta mbështesë këtë vizion. “Ne do ta mbështesim pa asnjë hezitim rrugën evropiane të Ukrainës në çdo forum shumëpalësh dhe jemi të gatshëm të ndajmë përvojën tonë, përfshirë punën teknike të negociatave dhe reformave”, u shpreh ajo.

“Sot zhvilluam diskutime të sinqerta dhe konstruktive edhe sa i takon mënyrave për të avancuar marrëdhëniet tona dypalëshe dhe për të harmonizuar më tej lidhjet tona të forta politike me një bashkëpunim më të fuqishëm në shumë fusha. Bashkërisht ramë dakord që, pavarësisht vështirësive, të përqendrohemi në mundësitë për tregti dhe investime, edhe në rrethana të jashtëzakonshme; Kontakte më të thella ndërmjet komuniteteve të biznesit; Bashkëpunim në sektorë ku Shqipëria dhe Ukraina mund të krijojnë vlerë të shtuar, si energjia, infrastruktura, turizmi, bujqësia dhe teknologjia”, theksoi Spiropali.

Po ashtu, ajo theksoi se do të inkurajohen kontakte më të ngushta mes njerëzve dhe do të thellohet bashkëpunimi në kulturë, arsim, shkencë dhe ruajtjen e trashëgimisë kulturore.

Në këtë drejtim, Spiropali vlerësoi shumë rolin e konsoliduar prej vitesh të komunitetit të diasporës shqiptare në Ukrainë, e cila shërben si një urë e rëndësishme për forcimin e lidhjeve mes dy vendeve tona.

“Diskutuam edhe për gatishmërinë e Shqipërisë për të kontribuar në projektet e pasluftës dhe në rindërtim, në koordinim me partnerët dhe organizatat ndërkombëtare. Ukraina po shkruan një nga historitë e mëdha të kohës sonë, një histori rezistence, dinjiteti dhe refuzimi për t’u dorëzuar përballë tiranisë. Shqipëria është krenare të jetë pjesë e kësaj historie, si një mike që zgjodhi të qëndrojë në krahun tuaj në momentet vendimtare. Dhe do të vazhdojmë të jemi, për sa kohë të kërkohet, sepse nuk mund të jesh neutral mes zjarrit dhe zjarrfikëses. Nuk ka terren të mesëm moral mes një kombi që lufton për mbijetesën e tij dhe një lufte perandorake që synon ta fshijë atë nga ekzistenca”, u shpreh Spiropali.

/m.m/a.f/r.e/

The post Spiropali: Drejtësia për viktimat dhe rivendosja e sovranitetit të Ukrainës parakushte për paqen appeared first on Agjencia Telegrafike Shqiptare.

TIRANË, 15 janar/ATSh-Maela Marini/ Ministri i Jashtëm i Ukrainës, Andrii Sybiha u shpreh sot se Shqipëria mbetet partner kyç në rajon dhe shumë aktiv në formatin Ukrainë-Europa Juglindore.

Në një konferencë të përbashkët për shtyp në Kiev me homologen shqiptare, Elisa Spiropali, ministri Sybiha vlerësoi mbështetjen e palëkundur të Shqipërisë ndaj Ukrainës.

Ai kujtoi se një vit më parë Shqipëria hapi ambasadën e saj në Ukrainë dhe kjo është ambasada e parë dhe e vetme që është hapur pas fillimit të invazionit masiv rus.

Ky sipas tij, është një tregues i mbështetjes, solidaritetit dhe besimit të cilin Ukraina e vlerëson shumë.

“Sot diskutuam një gamë të gjerë çështjesh mbi bashkëpunimin dypalësh, mbi rrugën tonë të përbashkët drejt anëtarësimit në BE. Shqipëria mbetet partneri ynë kyç në këtë rajon dhe një partner shumë aktiv në formatin Ukrainë-Europa Juglindore”, u shpreh ai.

Sybiha informoi për situatën në fushë betejë si dhe për pasojat që po përjeton Ukraina pas goditjeve në sektorin energjetik. “Ndajmë të njëjtën bindje se Moska duhet të detyrohet drejt paqes përmes rritjes së presionit”, u shpreh ai.

Ai vlerësoi gjithashtu Shqipërinë për mbështetjen e saj të palëkundur në kundërshtimin e agresionit rus, si dhe kryeministrin Edi Rama për qëndrimin e tij të fortë gjatë mbledhjes së Këshillit të Sigurimit.

“Ju falënderojmë gjithashtu për pjesëmarrjen tuaj në Koalicionin e Vullnetmirëve, për përpjekjet për kthimin e fëmijëve ukrainas dhe për angazhimin për rikthimin e një paqeje të drejtë në vendin tonë”, u shpreh ai.

Ministri Sybiha u shpreh se Ukraina mbështet vendosjen e sanksioneve ndaj Rusisë dhe regjimin e vizave për qytetarët e e saj.

“Do t’i kushtojmë vëmendje mbajtjes së përgjegjësisë që ka Rusia, ngritjes së një tribunali special për krimin e agresionit, si dhe të mekanizmave të tjerë të drejtësisë në bashkëpunim me Shqipërinë. Ukraina dhe Shqipëria janë të bashkuara nga vlerat tona të përbashkëta europiane dhe jemi partnerë në këtë rrugë drejt anëtarësimit në BE”, u shpreh ai.

Ndaj, ministri Sybiha siguroi se do të vazhdohet me këmbimin e përvojave dhe forcimin e bashkëpunimit dypalësh.

“Kemi një potencial të madh për t’iu kundërvënë kërcënimeve hibride të Rusisë, veçanërisht në rajonin e Ballkanit Perëndimor. Jam dakord të vazhdojmë dialogun tonë politik dhe bashkëpunimin në fushat e sigurisë, fushën humanitare dhe atë ekonomike, përfshirë edhe formatin Ukrainë-Europa Juglindore. Ne vlerësojmë komunitetin shqiptar në Ukrainë që jeton më së shumti në Odesa dhe ju falënderojmë për mikpritjen e bashkatdhetarëve tanë që u larguan drejt vendit tuaj pas agresionit rus, si dhe për lehtësimin e përpjekjeve për riatdhesimin e fëmijëve tanë ukrainas. Do të vazhdojmë të forcojmë lidhjet mes Ukrainës dhe Shqipërisë”, u shpreh ai.

/a.f/r.e/

The post Sybiha: Shqipëria partner kyç, vlerësojmë mbështetjen e palëkundur ndaj Ukrainës appeared first on Agjencia Telegrafike Shqiptare.

TIRANË, 14 janar/ATSh-Maela Marini/ Kryeministri Edi Rama shprehu sot bindjen se deri në fund të vitit 2028 Shqipëria do të jetë plotësisht vend sovran në prodhimin e energjisë elektrike duke mos importuar më energji.

Kryeministri Edi Rama ishte sot i ftuar në panelin e samitit të Javës së Zhvillimit të Qëndrueshëm që po zhvillon punimet në Abu-Dabi (Abu Dhabi), nën kujdesin e veçantë të presidentit sheikh Mohammed bin Zayed Al Nahyan.

Duke folur mbi investimet në fushën e energjisë, Rama u shpreh se ne “jemi me fat, sepse kemi burime hidrike dhe jemi një vend 100% me energji të ripërtëritshme”.

“Këtu jemi te niveli më i lartë në renditje. Por energjia nga burimet ujore do të thotë se ne varemi nga natyra, ndaj na duhet t’i drejtohemi importit”, tha Rama.

Ndaj sipas tij, dekadën e fundit është investuar shumë në energjinë diellore dhe të erës.

“Ne duam të krijojmë një portofol burimesh të ekuilibruara në mënyrë të tillë që ne të mos kemi më nevojë t’i drejtohemi importit dhe të jemi plotësisht sovran duke pasur 100% energji të gjelbër. Plani po ecën mirë dhe besojmë se në fund të 2028 do të jemi plotësisht sovran nuk do të blejmë më energji nga jashtë”, tha Rama.

Kryeministri vlerësoi bashkëpunimin strategjik me Emiratet e Bashkuara Arabe në fushën e energjisë. Ai solli në vëmendje marrëveshjen tripalëshe me Emiratet e Bashkuara Arabe dhe Italinë. “Ne synojmë që përmes kabllit ndërlidhës me Italinë t’i shërbejmë Europës me energji të gjelbër dhe bashkë me miqtë tanë arabë të bëjmë para për t’ia shitur Europës. Është më shumë se 1 miliard”, shtoi Rama.

1 nga 8

/j.p/r.e/

The post Rama në Abu Dhabi: Synojmë t’i shërbejmë Europës me energji të gjelbër appeared first on Agjencia Telegrafike Shqiptare.

TIRANË, 14 janar/ATSH/ Kryetari i grupit parlamentar të Partisë Socialiste, Taulant Balla, njëherësh drejtues politik i PS për Diasporën priti sot në një takim në ambientet e Kuvendit, Enkelejda Dajçin (Beqon), përfaqësuese e diasporës shqiptare në Landin e Bavarisë, Gjermani.

Balla vlerësoi lehtësimin e procedurave për lejet e qëndrimit dhe punësimit në Gjermani, duke i konsideruar ato si faktorë kyç për integrimin dhe suksesin e shqiptarëve që jetojnë e punojnë atje.

“Në Bavari jetojnë e punojnë rreth 18 mijë shtetas shqiptarë, ndaj vlerësojmë lehtësimin e procedurave për lejet e qëndrimit, punësimit. Gjithashtu në universitetet e Bavarisë studiojnë afro 800 studentë shqiptarë”, u shpreh Balla.

Takimi u konsiderua një dëshmi e rëndësisë që institucionet shqiptare i kushtojnë diasporës dhe forcimit të lidhjeve me komunitetet shqiptare jashtë vendit.

/m.m/j.p/

The post Balla pret në Kuvend përfaqësuesen e diasporës shqiptare në Bavari appeared first on Agjencia Telegrafike Shqiptare.

TIRANË, 14 janar/ATSH/ Kryeministri Edi Rama reagoi sërish sot ndaj deklaratave të gazetarit Blendi Fevziu, lidhur me udhëtimet private të ministrave të kabinetit qeveritar gjatë fundjavave.

Rama tha se “Fevziu reagoi prapë duke e pohuar përsëri faktin që ka fabrikuar një shpifje”.

“Ai refuzon t’i japë llogari publikut të vet, një herë të vetme, për një gënjeshtër me shtatë bishta dhe kapet si i mbyturi pas fijes së barit tek video-inspektimet e anëtarëve të qeverisë, për të cilat thotë se janë praktikë unike në botë, jashtë çdo standardi demokratik”, u shpreh Rama.

Më herët, gazetari Blendi Fevziu ka deklaruar se ka fakte që të paktën 7 ministra janë në udhëtime private jashtë shtetit të shtunave e të dielave, dhe lënë kasetat me inspektime nëpër televizione sikur janë në punë.

Kjo deklaratë ka sjellë reagimin e kryeministrit Rama, i cili i ka hedhur poshtë këto pretendime, ndërsa ka deklaruar se ministrat e kabinetit qeveritar edhe kur dalin për arsye personale jashtë vendit e bëjnë këtë me një kërkesë për leje dhe vetëm me miratim.

Më poshtë reagimi i plotë i kryeministrit Rama:

Fevziu reagoi prapë duke e pohuar përsëri faktin që ka fabrikuar një akuzë, më shqip një shpifje, për të cilën as ka çfarë thotë e vjen vërdallë me muhabete kafeneje, duke përmendur si në jerm dy a tre raste sporadike, për të cilat përsëri s’ka asnjë provë se janë të lidhura me udhëtime private të ministrave në fundjavë, e duke i ikur përsëri me një turravrap konfuz të vetmes gjë që duhet të bënte në këtë rast: Ndjesës ndaj shikuesve të tij.

Ndryshe nga më parë, Fevziu deklaron se nuk do përgjigjet më për këtë çështje. Normal, e kupton edhe vetë që s’ka si ia bën ndryshe, përderisa nuk mendon se shikuesit e tij meritojnë aq respekt sa ai t’u kërkojë ndjesë.

Pra Fevziu kërkon llogari edhe për gjëra që nuk i di ose që nganjëherë edhe i shpik, ndërkohë që fton rregullisht në sallonin e tij njerëz të armatosur me gjysmë të vërteta, të cilat janë edhe gënjeshtrat më të mëdha. Por ama ai refuzon t’i japë llogari publikut të vet, një herë të vetme, për një gënjeshtër me shtatë bishta dhe kapet si i mbyturi pas fijes së barit tek video-inspektimet e anëtarëve të qeverisë, për të cilat thotë se janë praktikë unike në botë, jashtë çdo standardi demokratik.

Dakord, atëherë po kaloj tek standardet dhe po i them Blendit, i cili padyshim e ka parë botën shumë më tepër se unë, që të na tregojë një rast të vetëm në botë ku debatet politike janë kacafytje për të marrë fjalën, në një sfond britmash të pandërprera, ku nuk e merr vesh i pari të dytin, e ku mikpritësi me një shkop në dorë nxit palët të zihen, pa vënë ose pa dashur të vendosë as qetësi, as rregulla në debat, as kufi etikë në komunikim, e pa kultivuar as sensin më të vakët të drejtësisë në trajtimin e të ftuarve, të cilëve u ndërpritet fjala rregullisht pa bërë dot 3 fjali bashkë!

Pra le të themi se po, e vërtetë, nuk është normale që anëtarët e qeverisë t’i shmangin daljet në sallonet mediatike (në fakt, në rastin tonë ne nuk shmangim daljet me gazetarë, po vetëm daljet me udhëheqësit barisalifallistë), por nëse Fevziu nuk e nis nga vetja, bashkë me sivëllezërit e simotrat e 700 tenxhereve, e të vendosi standardet demokratike në sallonin e tij të madh, atëherë s’ka si t’i kërkojë llogari ministrave pse nuk hidhen me kokë në tenxheren e Opinionit a në cilëndo tenxhere, ku bubullon e gërrgëron molla e përhershme e sherrit dhe ku shikuesit në vend se të informohen, abuzohen dhe helmohen me politikën!

/m.m/j.p/

The post Rama: Fevziu pohoi faktin që ka fabrikuar një shpifje appeared first on Agjencia Telegrafike Shqiptare.

TIRANË, 13 janar/ATSh/ Kryeministrit Edi Rama iu akordua sot medalja “Zayed” nga presidenti i Emirateve të Bashkuara, Sheikh Mohammed bin Zayed al Nayan.

Kryeministri theksoi se ky është respekti dhe vlerësimi më i madh për një kryeministër shqiptar.

“Thellësisht i prekur prej surprizës së paimagjinueshme dhe nderimit të jashtëzakonshëm nga presidenti i Emirateve të Bashkuara, Sheikh Mohammed bin Zayed al Nayan
akordimi i medaljes më të lartë të vendit mik, e cila mban emrin e themeluesit të Emirateve të Bashkuara, Sheikut Zayed, është respekti dhe vlerësimi më i madh për një kryeministër shqiptar, që e mora përulësisht plot me krenari për Shqipërinë, e me mirënjohje të thellë për mikun e madh të shqiptarëve, lartësinë e tij Sheikh Mohammed bin Zayed, si edhe për çdo shqiptar që ma ka besuar udhëheqjen dhe përfaqësimin e atdheut tonë të përbashkët”, tha Rama.

Në kuadër të Javës së Zhvillimit të Qëndrueshëm në Abu-Dabi (Abu Dhabi) u zhvillua sot ceremonia e ndarjes së çmimeve “Zayed” të cilat nderojnë iniciativat humanitare të atyre që kontribuojnë në vendet në zhvillim.

Çmimet u akorduan për projekte dhe organizata që kanë punuar lidhur me përmirësimin e arsimit dhe shkollimit, sigurimin e ujit të pijshëm, mbështetjen e ushqimit për komunitetet në nevojë si dhe për nisma që adresojnë ndryshimet klimatike dhe mbrojtjen e mjedisit.

/m.m/j.p/r.e/

The post Rama merr medaljen “Zayed”: Respekti dhe vlerësimi më i madh për një kryeministër shqiptar appeared first on Agjencia Telegrafike Shqiptare.

TIRANË, 12 janar/ATSH/ Tregu i automjeteve shënoi rritje të ndjeshme gjatë vitit 2025, ku u regjistruan 98,927 mjete për herë të parë.

Drejtoria e Përgjithshme e Shërbimeve të Transportit Rrugor bëri të ditur sot se krahasuar me vitin 2023, shënohet një rritje prej 27% e mjeteve të regjistruara.

Sipas DPSHTRR-së, 80,739 prej tyre janë autovetura, që përbëjnë 81.6% të totalit të mjeteve të regjistruara.

Edhe tregu i sigurimit të detyrueshëm motorik ka vijuar trendin pozitiv. Gjatë periudhës janar-shtator 2025 u reflektua një rritje e qëndrueshme si në vlerën e primeve të shkruara bruto, ashtu edhe në numrin e kontratave të sigurimit. /j.p/

/m.m/

The post Tregu i automjeteve me rritje, rreth 99 mijë mjete u regjistruan për herë të parë appeared first on Agjencia Telegrafike Shqiptare.

TIRANË, 12 janar/ATSH/ Komisioneri Shtetëror i Zgjedhjeve miratoi sot kërkesën për pajisjen me fletë tip për mbledhjen e nënshkrimeve për zhvillimin e referendumit të përgjithshëm për shfuqizimin e ligjit “Për barazinë gjinore”.

Kërkesa është paraqitur nga grupi nismëtar për referendumin e përgjithshëm për çështje të rëndësisë së veçantë, mbrojtja e familjes, i përbërë nga 16 anëtarë: Erald Aga, Ilir Zmalaj, Alberto Konti, Fatjon Softa, Petrit Levendi, Lirim Fëlluza, Armando Vrushi, Andi Tepelena, Etleva Merko, Igli Zepishta, Perparim Gjeka, Olsi Çaushi, Vladimir Kera, Besnik Muçi,  Ada Lushi, Kastriot Çipi.

Konkretisht përfaqësuesit e komitetit nismëtar për referendumin “Pro Familjes”, kanë paraqitur pranë Komisionit Qendror të Zgjedhjeve, kërkesën për fillimin e procedurave për zhvillimin e një referendumi të përgjithshëm për shfuqizimin e ligjit “Për barazinë gjinore”.

Shqyrtimi i kësaj kërkese u shty për në seancën e radhës dhe iu la kohë grupit nismëtar për qartësimin e çështjeve të rëndësisë së veçantë.

Gjithashtu, në mbledhjen e sotme u plotësua edhe vakanca në Këshillin e Bashkisë Vlorë, me kandidatin nga lista shumemërore e “Partisë Socialiste të Shqipërisë”, Rozina Kormuzi.

/m.m/j.p/

The post “Barazia gjinore”, KSHZ miraton fletën tip për mbledhjen e nënshkrimeve për referendum appeared first on Agjencia Telegrafike Shqiptare.

TIRANË, 12 janar/ATSH-Maela Marini/ Kryeministri Edi Rama u shpreh sot se portofoli energjetik i vendit ka nisur tashmë të diverisifikohet, ndërsa objektivi është që deri në fund të kësaj dekade, 30% e prodhimit të jetë nga era dhe dielli.

Gjatë prezantimit të projektit për parkun eolik të Tropojës, Rama u shpreh se nëse arrihet ky objektiv deri në vitin 2030, Shqipëria do ta ketë plotësisht të garantuar një sistem elektroenergjetik të vetëmjaftueshëm.

Ndërkohë, Rama tha se “çdo gjë që do të prodhojmë përtej nevojave do ta eksportojmë”.

“Nuk do të kemi më para të hedhura jashtë vendit për të blerë energji, por do të kemi shitje të energjisë për të sjellë më shumë të ardhura për ekonominë dhe familjet shqiptare”, tha Rama.

Kryeministri shprehu bindjen se “koha kur Shqipëria duhet të dalë në treg për të blerë energji po shkon drejt fundit”.

“Ne do të jemi në kategorinë e atyre jo shumë vendeve që gëzojnë pavarësi të plotë kur vjen puna te energjia”, shtoi Kryeministri.

Parku i energjisë së rinovueshme me erë në Tropojë do të ketë kapacitet 600 MW.

Kryeministri Rama u shpreh se sot finalizohet një përpjekje e përbashkët rreth 2-vjeçare me kompaninë e mirënjohur për të gjithë procesin parapërgatitor.

Ndërtimi i këtij parku, sipas kryeministrit Rama pritet të realizohet në harkun kohor të 12 muajve.

“Ky park i madh i energjisë së erës në Tropojë do të hyjë në rrjetin e prodhuesve të energjisë së rinovueshme në vendin tonë. Duke pasur parasysh eksperiencën e kompanisë, rrugëtimin e saj të suksesshëm dhe hartën e pranisë së saj në Europë kam shumë besim se do të përfitojmë edhe dije të reja dhe një vlerë të shtuar në kulturën e punës dhe të veprimit në një sektor kaq strategjik sa sektori energjetik”, shtoi Rama.

Kryeministri theksoi se ky investim shkon në rrugën e përmbushjes së objektivit të madh strategjik për ta bërë Shqipërinë një vend sovran në prodhimin e energjisë.

“Ne kemi pasur për një periudhë të gjatë varësi të plotë nga uji i shiut dhe ndërkohë kemi trashëguar një sistem me aq shumë të çara sa që kur na ka munguar shiu na është dashur të dalim në tregun ndërkombëtar dhe të blejmë sasi të mëdha me çmime të kripura”, tha Rama.

Ndërkohë sipas tij, e kundërta ka ndodhur kur ka pasur reshje me shumicë dhe ka pasur shkarkime uji nga HEC-et që ndonjëherë kanë shkaktuar dëme të jashtëzakonshme.

1 nga 17

/j.p/

The post Rama: Deri në 2030 bëhemi eksportues të energjisë, 30% e prodhimit nga burime të rinovueshme appeared first on Agjencia Telegrafike Shqiptare.

TIRANË, 12 janar/ATSH/ Bashkia e Lezhës ka ndërmarrë masa të menjëhershme për pastrimin e vijës bregdetare, pas depozitimit të mbetjeve nga prurjet e shumta të lumenjve.

Punëtorë dhe mjete të shërbimeve të bashkisë janë angazhuar në terren për largimin e mbetjeve nga bregdeti i Shëngjinit dhe Tales.

Drejtori i Shërbimeve Publike në bashkinë Lezhë Jurgen Marku u shpreh për mediet se monitorimi dhe ndërhyrjet do të jenë të vazhdueshme, për të pasur një bregdet të pastër nga Rana e Hedhur deri në Kune.

“Reshjet intensive të shiut që ranë ditët e fundit dhe prurjet e shumta të lumenjve sollën në bregdetin e Lezhës mbetja të shumta. Me përmirësimin e motit, Drejtoria e Shërbimeve Publike në bashkinë Lezhë ka nisur ndërhyrjen për pastrimin. Këto ndërhyrje do të jenë të vazhdueshme  gjatë gjithë kohës”, tha Marku.

Prurjet e lumenjve Drin dhe Mat vijojnë të sjellin ndotje të madhe në bregdetin e Lezhës, sa herë ka shtim të prurjeve nga reshjet e shiut, duke i kthyer në shqetësim për zonat turistike të Shëngjinit dhe Tales.

/m.m/j.p/

The post Nis pastrimi i vijës bregdetare në Shëngjin dhe Tale appeared first on Agjencia Telegrafike Shqiptare.

TIRANË, 12  janar/ATSH-Maela Marini/ Kryeministri Edi Rama deklaroi sot se Shqipëria ka avantazhin se prodhon 100% energji të gjelbër, vlera e së cilës në portofolin energjetik të Europës është shumë e lartë, krahasimisht me energjinë që vjen nga burimet fosile

Gjatë prezantimit të projektit për ndërtimin e parkut eolik në Tropojë, Rama u ndal te një tjetër marrëveshje e rëndësishme në fushën e energjisë, ajo mes Shqipërisë, Italisë dhe Emirateve të Bashkuara Arabe.

“Shqipëria sot është në një nivel krejt tjetër. Nuk besoj se një dekadë më parë do ta imagjinonte dot ndokush që Shqipëria do të bëhej palë me Emiratet e Bashkuara Arabe dhe Italinë për të ndërtuar një bashkëpunim trilateral në funksion të energjisë të Europës dhe Shqipërisë”, tha Rama.

Duke folur për projektet në fushën e energjisë, Rama tha se “kemi në proces dhe rreth 1500 megavat të tjera që janë në ndërtim dhe proces licencimi”.

Me këto kapacitete, Rama tha se vendi plotëson nevojat e brendhshme për sovranitetin energjetik, ndaj dhe sipas tij, “jemi më ambicioz se kaq”.

“Kur them energjinë në Europë, kam parasysh rritjen e kapacitetit këtu në Shqipëri në mënyrë që ne nga njëra anë të kontribuojmë për sigurinë energjetike të Europës, por nga ana tjetër të bëjmë edhe ne para për fondin e Republikës së Shqipërisë njësoj si të tjerët, jo thjesht mbledhje më të mirë të taksave dhe shpenzim të taksave për të blerë energji jashtë siç u bë për shumë e shumë vite me radhë”, tha Rama.

Rama theksoi se Shqipëria ka avantazhin që prodhon energji 100% të gjelbër.

“Ne nuk kemi barrën t’i paguajmë të shkuarës taksën e karbonit e cila me sa di unë është shumë e rëndë. Për këtë arsye kompanitë e shikojnë me shumë interes Shqipërinë”, shtoi Rama.

Duke folur për partneritetin tripalësh me Emiratet e Bashkuara Arabe dhe Italinë, Rama tha se “arsyeja pse këto dy vende janë të fokusuara te ky partneritet me Shqipërinë është se Shqipëria prodhon dhe shet energji të pastër”.

“Shqipëria është treg i vogël, por Shqipëria është një pikë me një kapacitet të madh strategjik, sepse dihet ju do prodhoni këtu nga era dhe do eksportoni. Kështu që tregu juaj është Europa. Se po mos të ishte Shqipëria kaq e rëndësishme potencialisht, kinezët që janë civilizimi më i vjetër edhe tregtarët më të padiskutueshëm nuk do i kishin vënë syrin dhe nuk do e konsideroni Shqipërinë si “pikën e mjaltit” në gjithë Europën apo jo? Kështu që duke u bazuar tek mençuria mijëravjeçare e Kinës edhe duke u bazuar tek eksperienca dhe uria për fitim e Amerikës, ne jemi fiks vendi i duhur, në kohën e duhur për ju edhe për të gjithë të tjerët që duhet të vijnë këtu në këtë treg të vogël, për të kapur tregun e madh që është jashtë kufijve të këtij vendi të vogël”, u shpreh kryeministri. /j.p/

The post Rama: Shqipëria ka avantazhin që prodhon energji 100% të gjelbër appeared first on Agjencia Telegrafike Shqiptare.

TIRANË, 10 janar/ATSH/ Prej ditës së djeshme Parku Kombëtar i Llogorasë, i ndodhur 40 km në juglindje të Vlorës, është mbuluar nga reshjet e borës.

Ndërkohë, pavarësisht problematikave të raportuara dje me bllokimin e një pjese të rrugës, ditën e sotme aksi është plotësisht i kalueshëm.

Kryeministri Edi Rama bëri të ditur sot se rruga për në Parkun e Llogarasë është plotësisht e hapur për të gjithë ata që do të udhëtojnë drejt këtij destinacioni, gjatë fundjavës.

Por, sipas tij, “përdorimi i zinxhirëve është i detyrueshëm”.

Qytetarë të shumtë kanë zgjedhur Parkun Kombëtar të Llogarasë, i cili është veshur nga bora e parë duke ofruar pamje mahnitëse.

Llogaraja vazhdon të mbetet një nga destinacionet më të preferuara jo vetëm gjatë stinës së verës, por edhe në dimër.

/m.m/a.f/

The post Parku i Llogorasë i veshur nga dëbora, rruga e kalueshme me zinxhirë appeared first on Agjencia Telegrafike Shqiptare.

TIRANË, 10 janar/ATSH/ Korporata Elektroenergjetike Shqiptare bëri të ditur sot se prodhimi ditor në tre HEC-et e kaskadës së Drinit është 24,000 MWh, ndërkohë që vijojnë shkarkimet nga HEC-et e Komanit dhe Vaut të Dejës.

Sipas KESH, prurjet natyrore në HEC-in e Fierzës janë 1200m3/s, në HEC-in e Komanit 350 m3/s dhe në HEC-in e Vaut të Dejës 100 m3/s.

Ndërsa nivelet në liqenet e kaskadës së Drinit janë: HEC Fierzë 290.8mmnd; HEC Koman 172 mmnd; HEC Vau Dejës 74.5 mmnd.

Aktualisht nga HEC-i i Fierzës nuk ka shkarkime, ndërsa nga HEC-i i Komanit janë 300m3/s dhe nga HEC-i i Vaut Dejës 700 m3/s.

/m.m/a.f/

The post KESH: Prodhimi ditor në tre HEC-et e Drinit arrin 24,000 MWh appeared first on Agjencia Telegrafike Shqiptare.

TIRANË, 10 janar/ATSH/ Prefektura e qarkut Lezhë bëri të ditur sot se aktualisht ka reduktim të hartës së përmbytjes në bashkinë e Kurbinit, ndërsa problematike mbetet rrëshqitja e tokës në disa zona.

Sipas prefekturës së qarkut Lezhë, gjatë 24 orëve të fundit territori i këtij qarku është përfshirë nga reshje shiu me intensitet të dobët me 23.4 mm shi dhe dëborë në lartësi mbi 700 metra nga niveli i detit.

Nga bashkia Kurbin raportohet reduktim i hartës së përmbytjes që prej ditës së djeshme, duke lënë si pikë më me shumë probleme, vetëm zonën e Adriatikut. Po ashtu është punuar me mjete të FA-s dhe bashkisë në aksin Skuraj-Vinjollë, për rehabilitimin e shtratit të lumit Skuraj dhe përforcim të trasesë së rrugës.

Sipas Prefekturës së qarkut Lezhë, sot do vijojë puna për sjelljen e materialeve mbushëse për këmbët e urës në Gallatë në drejtim të fshatit Vinjollë, si dhe për të bërë të mundur kalimin e mjeteve të rënda për hapjen dhe zhbllokimin e dherave në aksin Gallatë –Vinjollë, në njësinë administrative Milot.

“Problematikë e theksuar mbeten rrëshqitjet e tokës dhe të dherave. Grupet e punës po evidentojnë të gjitha zonat ku ka rrëshqitje dherash. Po vijojmë po ashtu verifikimet dhe evidentimet e dëmeve”, thuhet në njoftim.

Po ashtu ka rritje të nivelit të lumit Mat, pasi nga HEC-i Shkopet po shkarkohen rreth 700 m³/s.

Në bashkinë Lezhë është ndërhyrë në një pallat në lagjen “Besëlidhja” për largimin e ujit në katin e nëndheshëm të një pallati.

Nga OSHEE raportohet se aktualisht ka probleme në furnizimin me energji elektrike në zonën e Dajçit, si dhe njësinë administrative Fan në Mirditë, ku grupet e punës janë në terren për riparimin e defekteve.

Po ashtu në hidrovorin e Gocajve ka pasur mungesë energjie nga ora 00:30- 06:00, duke sjellë problematika në përmbytje të tokave në zonën Gocaj-Kakarriq, njësia Balldren.

“Gjatë mbrëmjes në Rrugën e Kombit është djegur një trailer autobot me karburant, ku si rezultat i ndërhyrjes në kohë mjeteve zjarrfikëse Mirdite është arritur të vihet nën kontroll situata”, thuhet në njoftim.

Prefektura njofton se të gjithë hidrovorët kanë punuar me kapacitet të plotë, me përjashtim të atij të Gocajve, që ka pasur mungesë energjie 00:30-06:00.

/m.m/a.f/

The post Ulet niveli i përmbytjeve në Kurbin, problematike mbetet rrëshqitja e dherave appeared first on Agjencia Telegrafike Shqiptare.