Mes atmosferës verore dhe rinore në shëtitoren e Himarës, vëmendjen e merr stenda e vetme dedikuar librit.

Mësuesi Ilir Bobo prej shtatë vitesh ndodhet në Himarë me stendën e tij, duke prezantuar me shumë pasion librat për të apasionuarit. Librashitësi thotë se libri për të është kulturë dhe vetë jeta, ndërsa vepra “Krim dhe Ndëshkim” është ndër më të preferuarat.

“Është viti i shtatë që prezantoj librin me shumë pasion. Kënaqësia ime është kur jap dhe marr emocione te qytetarët, sidomos kur recitoj ndonjë poezi. Të apasionuar pas librave, edhe pse mosha e tretë ka probleme, ata janë lexues, por ka edhe të rinj e të reja që lexojnë.

Teknologjia ka bërë punën e vet, rinia është në celular dhe lodhen të lexojnë qoftë edhe një paragraf. Libri është kulturë dhe vetë jeta! Kryeveprat e Dostojevskit, “Krim dhe Ndëshkim”, kanë qenë më të shiturit.”  / abcnews.al /

Në një intervistë për emisionin më të ri në ABC News, “Summertime Show”, 20-vjeçari Maksi ka rrëfyer eksperiencën e tij si kamarier në një prej hoteleve të Vlorës pas përfundimit të studimeve për hoteleri-turizëm.

I riu, i cili punon krah kolegëve të huaj nga India e Tunizia, apelon që bashkëmoshatarët e tij të mos largohen, por ta ndërtojnë të ardhmen në Shqipëri. Për të, bregdeti i Vlorës mbetet zgjedhja ideale për t’u zhvilluar profesionalisht dhe për të dhënë më të mirën në fushën e shërbimit.

“Unë një djalë prej të rinjve të Shqipërisë, jam 20-vjeç dhe kam mbaruar shkollën për hoteleri-turizëm, kryesisht për kuzhinë dhe shërbim. Kam zgjedhur që të punoj në Vlorë, sepse është një prej vendeve më të bukura dhe më të zhvilluara për turizmin. Të gjithë të rinjtë zgjedhin që të largohen nga Shqipëria, unë dua të jap një mesazh për të gjithë:

Qëndroni në Shqipëri, duajeni Shqipërinë, sepse jo vetëm gjërat e këqija, por ka shumë gjëra të mira dhe ju duhet t’i zgjidhni. Në fakt unë e kam nisur shërbimin para një viti e gjysmë dhe doja që ta provoja veten, diku më shumë dhe diku më mirë për një eksperiencë më të mirë. Këtu punonjës nga India, nga Tunizia. Unë do të veçoja tunizianët sepse jemi bërë një palë shumë e bukur”, tha ai.

Presidenti ukrainas Volodymyr Zelensky ka emëruar sekretarin e Këshillit të Sigurisë Kombëtare dhe Mbrojtjes, Rustem Umerov, në postin e drejtuesit të Shërbimit të Inteligjencës së Jashtme të Ukrainës.

Vendimi është bërë publik përmes një dekreti të publikuar në faqen zyrtare të presidencës më 3 gusht.

Në një dekret tjetër, Zelensky emëroi ish-ministrin e Brendshëm Ihor Klymenko si sekretar të Këshillit të Sigurisë Kombëtare dhe Mbrojtjes, duke zëvendësuar në këtë detyrë Umerov.

Sipas presidentit ukrainas, Umerov do të vijojë të koordinojë nismën “Drone Deal”, ndërsa do të mbetet i përfshirë edhe në negociatat e paqes për t’i dhënë fund luftës së gjithanshme të Rusisë kundër Ukrainës.

Umerov drejton delegacionin ukrainas në bisedimet trepalëshe me Rusinë dhe Shtetet e Bashkuara, të cilat kanë mbetur të bllokuara që prej muajit shkurt. Paralelisht, ai po punon edhe për sigurimin e marrëveshjeve të mbrojtjes me partnerët e Ukrainës në Lindjen e Mesme.

“Ka kapacitet më të madh për t’u marrë me këto çështje njëkohësisht, diplomacinë, mbrojtjen dhe procesin e negociatave me SHBA-në dhe disa partnerë të tjerë”, tha Zelensky gjatë një aktiviteti me diplomatë më herët gjatë ditës.

Këto emërime janë pjesë e ristrukturimit të gjerë qeveritar të nisur nga Zelensky në korrik, një proces që shkaktoi një krizë politike dhe ushtarake për Ukrainën.

Shërbimi i Inteligjencës së Jashtme të Ukrainës ka qenë pa një drejtues të përhershëm që prej janarit. Gjeneralmajori Oleh Luhovskyi, i cili kishte mbajtur detyrën e drejtuesit në detyrë që nga shkurti, u shkarkua më 3 gusht.

Umerov ka mbajtur disa poste të rëndësishme gjatë administratës së Zelenskyt dhe ka qenë një nga figurat kryesore të qeverisjes ukrainase, pavarësisht disa polemikave që e kanë shoqëruar.

Ai shërbeu si ministër i Mbrojtjes nga shtatori i vitit 2023 deri në korrik të vitit 2025, një periudhë e shoqëruar me skandale në prokurimet publike dhe akuza për shpërdorim detyre.

Emri i Umerov është përmendur gjithashtu në skandalin më të madh të korrupsionit gjatë presidencës së Zelenskyt. Ai është marrë në pyetje në kuadër të çështjes, por deri tani nuk janë ngritur akuza zyrtare ndaj tij.

Sipas mediave, Umerov është konsideruar disa herë si kandidat për postin e ambasadorit të Ukrainës në Shtetet e Bashkuara, përfshirë edhe gjatë ristrukturimit të fundit qeveritar. Megjithatë, kjo ide më pas u braktis.

Presidenti amerikan, Donald Trump deklaroi se bisedimet me Iranin janë duke u zhvilluar.

Ai u tha gazetarëve në Shtëpinë e Bardhë sse SHBA-të do ta godisnin Iranin “më fort se çdo sulm që nga Lufta e Dytë Botërore” përpara se ai t’i anulonte sulmet.

“Ky është shansi i fundit që ata të nënshkruajnë një marrëveshje të mirë”, theksoi presidenti, shkruan Sky News.

Trump ka shprehur vazhdimisht zhgënjimin e tij sot, pasi Irani kundërshtoi pretendimin e tij se bisedimet ishin duke vazhduar dhe se ishte arritur një marrëveshje midis të dyja palëve për të rihapur Ngushticën e Hormuzit, me bisedime të mëtejshme që do të zhvillohen rreth programit bërthamor të Iranit.

Ministria e Jashtme e Iranit mohoi se ishte në bisedime me SHBA-në, diçka që shkaktoi zemërimin e Trump, i cili e quajti udhëheqjen e Teheranit “jashtëzakonisht të dyfishtë”./abcnews.al

Për më shumë se 500 vjet, një traget i pazakontë prej druri ka transportuar banorë dhe udhëtarë mbi lumin Adda në rajonin italian të Lombardisë. I njohur si “Traghetto di Leonardo” (Trageti i Leonardos), ai konsiderohet një nga mjetet më të vjetra të transportit që vazhdon të funksionojë ende sot.

Megjithëse nuk ka prova se u projektua nga vetë Leonardo da Vinci, trageti lidhet ngushtë me të, pasi ai studioi lumin Adda gjatë shërbimit te Duka i Milanos në fund të shekullit XV. Në dorëshkrimet e tij gjenden skica dhe përshkrime të mekanizmave të ngjashëm me sistemin që përdor trageti aktual.

Ndryshe nga tragetet moderne me motor, Trageti i Leonardos lëviz falë: një kablloje çeliku të tendosur mbi lumin Adda; forcës së rrymës së lumit; këndit në të cilin vendoset trageti ndaj rrjedhës së ujit. Operatori ndryshon orientimin e tragetit dhe vetë rryma e shtyn atë nga njëri breg në tjetrin, pa përdorur karburant apo energji elektrike. Ky sistem është konsideruar një shembull i hershëm i transportit të qëndrueshëm.

Një trashëgimi e gjallë

Trageti ndodhet në komunën e Imbersago, rreth 35 kilometra në verilindje të Milanos. Ai vazhdon të përdoret si nga banorët vendas, ashtu edhe nga turistët që vizitojnë Parkun Rajonal të lumit Adda. Përveç funksionit praktik, trageti është kthyer në një atraksion historik, pasi u ofron vizitorëve mundësinë të përjetojnë një teknologji që ka mbijetuar për pesë shekuj me shumë pak ndryshime. Sot, trageti ‘Leonardo’ mbetet një simbol i zgjuarsisë inxhinierike të Rilindjes italiane dhe dëshmi se disa zgjidhje të thjeshta mekanike mund t’i rezistojnë provës së kohës, duke lidhur historinë me jetën e përditshme edhe pas 500 vitesh.

Nëse zgjedhjet do të mbaheshin të dielën e ardhshme në Berlin, kryeqyteti gjerman do të përjetonte një tronditje politike.

Sipas sondazhit të institutit Insa, partia e ekstremit të djathtë AfD kryeson me 19% të mbështetjes, duke lënë pas me një pikë si CDU-në ashtu edhe Die Linke, të cilat renditen me nga 18%.

Rezultatet janë befasuese në prag të zgjedhjeve rajonale të 20 shtatorit dhe tregojnë se rritja e partisë së drejtuar nga Alice Weidel dhe Tino Chrupalla ka shkuar përtej bastioneve tradicionale të ish-Gjermanisë Lindore. Përveçse mund të sjellin një tërmet politik në kryeqytet, këto shifra kanë edhe një vlerë të fortë simbolike: Berlini, një qytet kozmopolit, multikulturor dhe për dekada një bastion i së majtës gjermane, po i shtohet listës së rajoneve ku AfD ka arritur ta shndërrojë pakënaqësinë e qytetarëve në mbështetje elektorale.

Gara mbetet e hapur

AfD e ka cilësuar rezultatin në sondazhe si një “tronditje politike”, duke sulmuar edhe një herë partitë tradicionale si të paafta për të qeverisur. Megjithatë, rreth dy muaj para zgjedhjeve, gara mbetet e hapur.

Pas AfD-së me 19%, CDU-ja dhe Die Linke ndajnë vendin e dytë me 18%, ndërsa të Gjelbrit renditen me 16% dhe socialdemokratët e SPD-së me 13%.

Megjithëse AfD kryeson në sondazhe, rruga drejt pushtetit mbetet e vështirë. Asnjë nga partitë kryesore nuk pranon të bashkëpunojë me të, duke ruajtur të ashtuquajturin “kordon sanitar” për të izoluar ekstremin e djathtë.

Berlini dhe kriza e strehimit

Vëmendja ndaj politikës në Berlin u shtua pas 10 korrikut, kur kryebashkiaku Kai Wegner (CDU), në detyrë që nga viti 2023, vendosi të mos rikandidojë. Vendimi erdhi pas kritikave të forta për menaxhimin e ndërprerjes masive të energjisë elektrike që goditi periferinë jugperëndimore të qytetit në fillim të janarit.

Wegner deklaroi se kishte punuar për orë të tëra për zgjidhjen e krizës, por më pas u zbulua se gjatë asaj kohe kishte qenë duke luajtur tenis, ndërsa mijëra qytetarë mbetën pa energji elektrike dhe ujë të ngrohtë. Tërheqja e tij konsiderohet një goditje për konservatorët.

Një nga temat kryesore të fushatës është kriza e banesave. Kostoja e lartë e strehimit dhe mungesa e apartamenteve e kanë bërë gjithnjë e më të vështirë jetesën në Berlin.

Kjo çështje ka qenë tradicionalisht një nga kauzat kryesore të Die Linke, por tashmë është përvetësuar edhe nga AfD.

Slogani kryesor i partisë është “Banesat në radhë të parë për berlinezët”. Programi parashikon një sistem pikësh që favorizon banorët afatgjatë të kryeqytetit, duke u dhënë përparësi atyre në ndarjen e banesave publike.

Emigracioni dhe siguria në qendër të programit

Programi i AfD-së fokusohet gjithashtu te kufizimi i emigracionit dhe forcimi i sigurisë.

Partia kërkon ndalimin e pranimit të azilkërkuesve, rritjen e dëbimeve, zgjerimin e politikës së “riatdhesimit”, shtimin e patrullave policore në lagje, uljen e moshës së përgjegjësisë penale nga 14 në 12 vjeç, si dhe futjen e kastrimit kimik për autorët e krimeve seksuale.

Rritja e AfD-së në nivel kombëtar

Rezultati në Berlin nuk konsiderohet rasti i vetëm. Ai është pjesë e rritjes së vazhdueshme të AfD-së, e cila ka arritur nivelet më të larta që nga themelimi i saj në vitin 2013.

E krijuar fillimisht si një parti euroskeptike, AfD është shndërruar në forcën kryesore të opozitës në Bundestag, duke ndërtuar mbështetjen e saj mbi çështje si emigracioni, siguria dhe identiteti kombëtar.

Sondazhet kombëtare e rendisin tashmë pranë nivelit të 30% të mbështetjes, një zhvillim që po sfidon ekuilibrat tradicionalë të politikës gjermane të pasluftës, të ndërtuar mbi dominimin e partive të mëdha dhe izolimin e forcave radikale.

Për këtë arsye, kryesimi i AfD-së në Berlin shihet si kapërcimi i një pragu psikologjik të rëndësishëm për politikën dhe shoqërinë gjermane.

Read More...

Një makinë dhe një furgon janë përplasur në aksin Elbasan-Peqin.

Raportohet paraprakisht se janë 3 persona të lënduar të dërguar në spitalin e Elbasanit.

Shkak i aksidentit dyshohet një parakalim i gabuar./abcnews.al

Qeveri të shumta në Evropën Qendrore dhe Lindore po marrin masa për të shmangur një krizë energjetike, pasi rënia rekorde e nivelit të ujit në lumin Danub ka çuar termocentralet në prag të mbylljes.

Thatësia e vazhdueshme dhe valët e njëpasnjëshme të të nxehtit ekstrem kanë pakësuar ndjeshëm prurjet e njërit prej lumenjve më të mëdhenj të Evropës.

Të hënën, niveli i Danubit në Budapest, kryeqytetin e Hungarisë, ka rënë edhe për 10 centimetra të tjerë.

Nuk pritet që niveli i ujit në Danub të rritet gjatë ditëve apo javëve në vijim, pasi nuk parashikohen reshje të konsiderueshme, ndërsa rajoni po përballet me një valë të re të nxehti ekstrem, me temperatura që kalojnë 38 gradë celsius. Si pasojë, konsumi i energjisë elektrike dhe i ujit është në rritje.

Rënia rekorde e nivelit në Danub e ka çuar centralin e vetëm bërthamor të Hungarisë, Paks, në prag të ndalimit të plotë të funksionimit për herë të parë në 44 vjet.

Centrali i Paksit, i cili përdor ujin e Danubit për të ftohur reaktorët, të hënën prodhoi vetëm 240 megavat energji, krahasuar me rreth 2.000 megavat që prodhon zakonisht, për shkak të uljes graduale të fuqisë së katër reaktorëve.

Në një video të publikuar në Facebook të hënën, kryeministri hungarez, Peter Magyar, ka thënë se inxhinierët kanë arritur ta mbanin përkohësisht në funksion turbinën e fundit operative të centralit.

“Ky është një lajm shumë i mirë, sepse mbyllja e plotë e centralit bërthamor të Paksit ende mund të shmanget, të paktën përkohësisht, në një nga ditët me konsumin më të lartë të energjisë”, ka thënë Magyar.

Sipas tij, ndalimi i plotë i centralit ka të ngjarë të ndodhë të martën ose të mërkurën.

Ndërkohë, edhe centralet në vendet fqinje të Hungarisë kanë pësuar rënie të ndjeshme të prodhimit të energjisë.

Ushtria rumune ka përdorur të hënën 180 kilogramë eksplozivë për të kryer një shpërthim të kontrolluar në shkëmbinj pranë Kanalit Bala, në pjesën e poshtme të Danubit, me synimin për të devijuar më shumë ujë drejt rrjedhës kryesore të lumit dhe më pas drejt centralit bërthamor shtetëror të Cernavodës.

Prurja e ujit në Danub në territorin rumun ka rënë në 1.500 metra kub në sekondë, më pak se një e treta e mesatares së muajit korrik. Autoritetet kanë ndalur tashmë një nga njësitë e reaktorëve në centralin e Cernavodës, i cili po funksionon me rreth gjysmën e kapacitetit normal.

Në Serbi, niveli i ulët i Danubit ka bërë që hidrocentrali kryesor i vendit të funksionojë me vetëm 20% të kapacitetit të tij, duke detyruar kryeministrin Gjuro Macut të drejtojë të hënën një mbledhje urgjente kushtuar krizës energjetike.

Ndërsa në fshatin Batina në Kroacinë lindore, banorët vendas kanë gjetur vetura të shkatërruara dhe sende të tjera të hedhura në shtratin e lumit, ndërsa niveli i ujit ka rënë për më shumë se 130 centimetra javën e kaluar.

Zjarret në lindje të Uashingtonit kanë detyruar evakuimin e 60,000 njerëzve në zonën e Spokane dhe kanë shkatërruar të paktën 600 shtëpi, biznese dhe struktura të tjera.

Zjarret në dhe përreth Spokane, qytetit të dytë më të madh të shtetit, dogjën rreth 21 kilometra katrorë gjatë fundjavës dhe ishin ndër dhjetëra zjarre në të gjithë Shtetet e Bashkuara Perëndimore që shtrënguan aftësinë e agjencive federale, shtetërore dhe lokale për t’i luftuar ato.

Afërsisht 1.000 km katrorë janë djegur në të gjithë shtetin dhe disa nga zjarret, përfshirë ato në zonën e Spokane, nuk janë vënë në kontroll.

Zyrtarët e zjarrfikësve dhe të zbatimit të ligjit thanë se nuk kishte raportime për të lënduar ose persona të zhdukur, por ata theksuan se ishte në fazat e hershme të përpjekjeve të reagimit.

Videot nga zona e Spokane tregojnë ndërtesa në flakë, tym të zi që ngrihej lart pranë lagjeve dhe rrënojat e shtëpive që tymosnin.

Disa zyrtarë shprehën shqetësim se zona duket se do të vazhdojë të ketë mot të thatë në ditët në vijim.

“Nuk jemi jashtë rrezikut”, tha senatorja Maria Cantwell gjatë një konference për shtyp me zyrtarë federalë, shtetërorë dhe lokalë në Spokane.

Ndërkohë, hetuesit nuk kanë përcaktuar se si filluan flakët.

Spokane nuk është rajoni i vetëm që po lufton për të mbajtur nën kontroll zjarret.

Ekipet duke përdorur helikopterë vazhduan për të dhjetën ditë me radhë për të luftuar një zjarr që ka djegur gati 1,360 km katrorë kullota në Idahon perëndimore dhe Oregonin lindor.

Zona është shtëpia e fermave të bagëtive, me autoritetet që thonë se zjarri po kërcënon më shumë se 600 shtëpi dhe 800 struktura të tjera.

Në Utahun qendror, një zjarr masiv u dyfishua në madhësi gjatë fundjavës, duke u rritur nga rreth 41 km katrorë në 145 km katrorë deri të dielën në mëngjes. Më shumë se 100 bagëti janë vrarë, sipas forcave lokale të rendit.

Një aksidnet i rëndë është shënuar këtë pasdite në Ksamil. Në zonën ‘Pema e Thatë’, ka humbur jetën shtetasi Antonio Mateli, 20 vjec teksa drejtonte një furgoni. I riu humbi jetën rrugës për në spital, ndërkohë që policia po punon për zbardhjen e plotë të rrethanave të ngjarjes.

Sipas një analize të Financial Times, valët e të nxehtit dhe zjarret në pyje gjatë këtij viti i kanë shkaktuar kontinentit një kosto që tejkalon 3 miliardë euro, duke nxjerrë në pah pasojat e drejtpërdrejta ekonomike të fenomeneve ekstreme.

Që nga fillimi i sezonit të zjarreve janë djegur rreth 5 milionë hektarë tokë. Vetëm në pesë vendet më të prekura të Eurozonës – Francë, Spanjë, Portugali, Greqi dhe Rumani – kostoja e ripyllëzimit dhe restaurimit të zonave të djegura vlerësohet në 3.1 miliardë euro. Shifra tejkalon vlerësimin mesatar vjetor prej 2.5 miliardë eurosh që Komisioni Evropian llogarit për të gjithë Bashkimin Evropian.

Në këtë vlerësim nuk përfshihen dëmet në banesa, biznese, të mbjella dhe turizëm, si edhe kostot afatgjata, si rritja e primeve të sigurimit apo investimet shtesë në pajisjet për shuarjen e zjarreve.

Përveç zjarreve, mungesat e zgjatura të ujit po rëndojnë më tej ekonominë evropiane. Ulja e nivelit të lumenjve Rajn dhe Danub po pengon transportin e mallrave dhe aktivitetin industrial, ndërsa në Hungari dhe Rumani disa termocentrale bërthamore janë detyruar të kufizojnë prodhimin për shkak të mungesës së ujit për ftohjen e reaktorëve.

Në Francë, zjarret në Gironde detyruan kompani të mëdha industriale, si Safran, Dassault Aviation dhe ArianeGroup, të pezullonin përkohësisht prodhimin dhe të evakuonin objektet. Flakët prekën gjithashtu turizmin, kultivimin e butakëve në pellgun e Arcachon dhe mijëra biznese, me rreth 20 mijë sipërmarrje që ndërprenë aktivitetin.

Në Spanjë, vatrat e zjarrit janë afruar deri në 50 kilometra nga Madridi, duke shkatërruar banesa, automjete dhe sipërfaqe të mëdha bujqësore. Sipas shoqatës së fermerëve të vegjël, rreth 185 mijë hektarë tokë, kryesisht kullota, janë djegur deri më tani.   / abcnews.al /

Pas pesë ditësh nga përshkallëzimi i krizës në Ceuta, situata në kufirin mes Spanjës dhe Marokut po shkon drejt normalizimit, pasi shumica e emigrantëve janë kthyer në Marok.

Sipas fotoreporterit Antonio Sempere, në një intervistë për “Faqja 4” në ABC Neës në territor ka mbetur rreth 10% e personave që hynë gjatë valës së fundit, megjithëse ai thekson se kriza ka qenë më e rëndë se ajo e vitit 2021.

Ndërkohë, në kufi vijojnë operacionet e kthimit të emigrantëve, ndërsa shqetësim mbetet numri i viktimave dhe largimi i të miturve drejt territorit spanjoll.

“Pas pesë ditëve nga situata kritike në Ceuta situata e normalitetit po vjen sepse pjesa më madhe e emigrantëve që hynë po kthehen në Marok. Nëse duhet të flasim për shifra reale duhet të themi se ka mbetur vetëm 10%. Nuk mund të themi se kemi një situatë normale, pasi kjo krizë ka qenë më e kushtueshme se ajo e vitit 2021.

Njerëzit po ndjekin jetën e tyre, por duhet të jemi të qartë në diçka, qeveria nuk po mbështet qytetarët e kësaj zone. Ka një kthim mbrapsht të njerëzve që vijnë nga Maroku, nuk kemi informacion për njerëzit që vijnë nga Afrika. Është e trishtë të shikosh 13-14 vjeçare që largohen nga toka e tyre me not për të hyrë në një territor tjetër.

Janë mbi 100 të vrarë. Tani situata në kufi është e mbushur me kamionë për të kthyer mbrapsht të rinjtë që të kthehen në Marok. Ky është një sulm ndaj integritetit territorial të Spanjës dhe kjo është ajo se çfarë ka ndodhur”, tha fotoreporteri.

Të paktën 7 të vrarë dhe mbi 40 të plagosur, ky është bilanci i viktimave si pasojë e një sulmi me dron nga Ukraina mbi një plazh në jugperëndim të Rusisë, sipas asaj që kanë raportuar autoritetet lokale.

Në mesin e 7 viktimave, 3 prej tyre janë fëmijë, thonë autoritetet ruse. Pamjet e publikuara kudo në rrjetet sociale tregojnë momentin kur droni ukrainas godet plazhin Gelendzhik pranë Detit të Zi.

Ukraina nuk ka dhënë asnjë koment zyrtar mbi ngjarjen, ndërsa mediat ndërkombëtare raportojnë se sulmi besohet se kishte në shënjestër një bazë detare ushtarake ruse në Novorossiysk, rreth 40 kilometra larg vendit ku ndodhi sulmi.

Sulmi ndaj plazhit vjen vetëm pak orë pasi Ukraina goditi një depo të kompanisë më të madhe të shitjeve online në Rusi, Wildberries, rreth 180 kilometra në lindje të Moskës.

Ukraina ka deklaruar më herët se sulmet ndaj objekteve të tilla synojnë të dëmtojnë infrastrukturën që, sipas saj, mund të lidhet me furnizimin e ushtrisë ruse. Moska i ka mohuar këto pretendime.

Sulmet e Ukrainës vijnë pas një vale goditjesh ruse në Kiev përgjatë fundjavës, ku, sipas autoriteteve ukrainase, humbën jetën të paktën nëntë persona./abcnews.al

Spanja po avancon me një ligj të ri anti-duhan, i cili do të ndalojë pirjen e duhanit dhe përdorimin e cigareve elektronike në një sërë hapësirash publike në natyrë, përfshirë tarracat e bareve dhe restoranteve si edhe plazhet detare dhe lumore. Projektligji është miratuar nga Këshilli i Ministrave dhe tani duhet të kalojë procedurat parlamentare përpara se të hyjë në fuqi.

Masat kryesore të parashikuara janë:

• Ndalimi i duhanit dhe cigareve elektronike në tarracat e lokaleve.
• Ndalimi në plazhe, pishina publike, impiante sportive, parqe kombëtare dhe ambiente ku zhvillohen aktivitete publike në natyrë.
• Krijimi i një zone mbrojtëse prej 15 metrash rreth hyrjeve të spitaleve, shkollave, universiteteve, muzeve, bibliotekave dhe këndeve të lojërave për fëmijë.

Ligji parashikon gjithashtu:

• Trajtimin e cigareve elektronike, vape-ve, nargjileve dhe produkteve të tjera me nikotinë me të njëjtat kufizime si duhani tradicional.
• Ndalimin e konsumimit të produkteve të duhanit nga të miturit nën 18 vjeç, jo vetëm ndalimin e shitjes së tyre.
• Kufizime më të forta për reklamimin, promovimin dhe sponsorizimin e produkteve të duhanit.

Qeveria spanjolle argumenton se ndryshimet synojnë të mbrojnë shëndetin publik dhe të ulin ekspozimin ndaj tymit pasiv. Sipas Ministrisë së Shëndetësisë, duhani shkakton rreth 50,000 vdekje çdo vit në Spanjë. Megjithatë, projektligji ka hasur edhe kundërshtime nga sektori i hotelerisë dhe restoranteve, i cili paralajmëron se ndalimi i duhanit në tarraca mund të ketë ndikim negativ te bizneset dhe turizmi.

Analisti Frrok Çupi thotë se 61 bashki në territorin shqiptar janë shumë, teksa sipas tij, reforma territoriale po merr peshë më shumë sesa duhet.

Në një intervistë për “Tirana Live” në ABC News, Çupi u shpreh se djegia e teserave të PS në Poliçan, ishte veprim i shëmtuar.

Lidhur me propozimin e PD për 100 bashki, Çupi e cilësoi qesharake.

“Propozimi i kryeministrit është formuluar si ide qysh prej fillimit të idesë së reformës territoriale. Kemi hyrë në 60 ditëshin e përcaktuar sipas ligjit. Është një nga reformat e cila, po merr peshë më shumë sesa duhet. Praktikisht, reforma në drejtësi nuk është diskutuar kaq gjatë, me nerv. Këtë tension nuk e ka krijuar në popull, këtë komedi nuk e ka bërë. Reforma territoriale ka vlerë, sjell reforma të tjera. Është shumë i hallakatur pushteti lokal me 61 bashki. Këto bashki janë për arsye qokash. Reforma nuk e ka peshën, reforma në territore nuk e ka peshën tek numri i bashkive, ky është problemi i madh. Jo vetëm në Poliçan, edhe në bashki të tjera e kanë bërë këtë shaka të shëmtuar. Kanë djegur teserat e PS, kanë djegur veten.

Është nervozizëm i tepruar i kryetarit të bashkisë. Të gjitha bashkitë, që nuk do jenë bashki, tregojnë se kryebashkiakët janë të korruptuar, kanë nxjerrë njerëzit për të protestuar. I paguajnë, me favore, me ndere. Propozimi i PD me 100 bashki, nuk është real, qesharak. Akoma më qesharak se 61 bashki. Pa projekt, pa program, pa skema, pa kosto, pa rezultate. Populli ka nevojë për zgjidhje. Opozita nuk do ta votojë reformën”, theksoi ai./abcnews.al

Qindra emigrantë kanë ngritur kampe në një plazh në enklavën spanjolle të Ceutës, në Afrikën e Veriut, të hënën, ndërsa autoritetet vendase po përpiqen të përballojnë mijëra persona që vazhdojnë të ndodhen në këtë territor të vogël, pas valës masive të kalimeve kufitare javën e kaluar.

Spanja vlerëson se rreth 69.500 emigrantë janë kthyer në Marok gjatë katër ditëve të fundit, duke tejkaluar vlerësimin fillestar prej rreth 50.000 personash që kishin mbërritur në Ceutë të enjten.

Bilanci zyrtar i viktimave në anën spanjolle të kufirit ka arritur në 72 të vdekur, ndërsa në anën marokene janë regjistruar 11 viktima.

Shumë emigrantë kanë thënë se vendosën të largoheshin pasi mbyllja e dyqaneve i kishte lënë pa ushqim, kishin hasur në armiqësi nga banorët vendas dhe nuk kishin mundësi të udhëtonin drejt Spanjës kontinentale.

Ceuta dhe enklava tjetër spanjolle në Afrikën e Veriut, Melilla, ndodhen në bregdetin mesdhetar të Marokut dhe përballen herë pas here me përpjekje të emigrantëve për të hyrë në Evropë.

Kreu i Ceutës, Juan Jesus Vivas, i ka thënë televizionit Telecinco se mes 3.000 dhe 5.000 emigrantë ndodheshin ende në enklavë, duke shtuar se dy qendrat e pritjes për emigrantë, njëra për të rritur dhe tjetra për të mitur, ishin “tejmbushur”.

Muaji korrik shënoi fluksin më të lartë të këtij sezoni turistik në Pikën e Kalimit Kufitar Qafë Botë dhe Terminalin e Trageteve në Portin e Sarandës, ku në total u regjistruan 138 mijë e 189 pasagjerë në hyrje dhe dalje.

Sipas të dhënave zyrtare, gjatë kësaj periudhe PKK Qafë Botë dhe Terminali i Trageteve operuan me kapacitet të plotë, në bashkëpunim me agjencitë private, duke përballuar fluksin pa vonesa apo problematika.

Në dalje u regjistruan 71 mijë e 061 pasagjerë, duke përbërë pjesën më të madhe të lëvizjeve, ndërsa në hyrje u regjistruan 67 mijë e 128 pasagjerë.

Sa i përket automjeteve, gjatë muajit korrik hynë në vend 18 mijë e 640 mjete, ndërsa dolën 19 mijë e 642 mjete.

Nga 67 mijë e 128 pasagjerët që hynë në vend, 28 mijë e 910 ishin shtetas shqiptarë dhe 38 mijë e 218 shtetas të huaj. Ndërkaq, nga 71 mijë e 061 pasagjerët që dolën nga vendi, 31 mijë e 015 ishin shtetas shqiptarë, ndërsa 40 mijë e 046 shtetas të huaj.

Më shumë se 20 anije luftarake të Marinës Amerikane po operojnë në të gjithë Lindjen e Mesme, sipas Komandës Qendrore të SHBA-së (CENTCOM), e cila është përgjegjëse për operacionet në Lindjen e Mesme.

Dy transportues aeroplanësh amerikanë mund të shihen në imazhet satelitore më 1 gusht, pranë vijës së bllokadës së imponuar nga SHBA-të.

Anijet luftarake USS Abraham Lincoln dhe USS George HW Bush janë transportues aeroplanësh me motor bërthamor të klasit Nimitz; ato u panë pak më pak se 100 km larg njëra-tjetrës dy ditë më parë.

Të dy transportuesit e aeroplanëve të parë në imazhet satelitore udhëtojnë me një grup sulmues transportuesish.

Këto përfshijnë rreth 70 aeroplanë luftarakë dhe mbështetës dhe disa shkatërrues me raketa të telekomanduara të klasit Arleigh Burke që ofrojnë mbrojtje ajrore, luftë anti-nëndetëse dhe aftësi sulmi me rreze të gjatë veprimi.

Imazhet satelitore tregojnë një aeroplanmbajtëse amerikane që udhëton me dy anije të tjera.

Raportet e sotme sugjerojnë se po zhvillohen bisedime për të rihapur Ngushticën e Hormuzit dhe për të hequr bllokadën detare amerikane ndaj porteve iraniane.

Megjithatë, Irani mohon bisedimet e drejtpërdrejta me SHBA-në, duke thënë se diskutimet janë vetëm me Omanin për kalimin e sigurt nëpër ngushticë.