Duke folur në emisionin “NOW me Erla Mëhillin”, deputeti i ri i PS, i dalë nga zgjedhjet e 11 majit në qarkun e Vlorës, Ardit Bido paralajmëroi aksione të tjera të qeverisë pas këtij aktualit për lirimin e hapësirave publike.

“Nisma për lirimin e hapësirave publike është vetëm një nga veprimet që do të pasohen me iniciativa të tjera në shërbim të qytetarëve”, tha ai.

Bido shtoi se gjatë fushatës zgjedhore janë njohur nga afër me problematikat që shqetësojnë qytetarët, dhe pas marrjes së mandatit të ri, qeveria do të veprojë për t’u dhënë zgjidhje.

“Nuk duhet të harrojmë se në fund të ditës, si qeverisja vendore, ashtu edhe ajo qendrore, janë në shërbim të qytetarëve. Sapo vijmë nga fushata, kemi dëgjuar ankesat e qytetarëve nga fillimi deri në fund. Dhe janë të drejta. Ajo që po ndodh është vetëm pak, do të bëjmë shumë më shumë. Nuk ecje dot, as në Vlorë, as në Sarandë, as në qytete të tjera. Po zgjerohej një zaptim i hapësirave publike nga bizneset, të cilët përpiqen të përfitojnë, por kjo nuk justifikon situatën. Ky është një problem i akumuluar ndër vite, dhe vjen një moment që duhet të marrë fund.A do të ishte më mirë që institucionet të kishin vepruar më parë? Po, jam dakord. Por në momentin që kjo na ka ndodhur, dhe qytetarët e kanë të nevojshme ndërhyrjen tani, çfarë të bëjmë? Ta lëmë të ndodhë përsëri?”, tha ai.

Bido theksoi gjithashtu se ka një mendësi të gabuar që duhet të ndryshojë ku sipas tij ekziston një mentalitet i keq, i tipit ‘kap çfarë të kapësh’.

“Edhe një ambient që e kemi pasur me qira për vite të tëra, e trajtojmë si pronë personale. Kjo duhet të marrë fund,” u shpreh ai.

LEXONI GJITHASHTU:

• “Jam më i motivuar pas kritikave të Ramës”, Dredha: Aspak i fyer, aksioni vazhdon
• “Lejoi ndërtim pa leje në Theth”, Rama sulmon prokuroren, kërkon shkarkimin e saj

The post Jo vetëm lirimi i hapësirave publike, deputeti i Vlorës paralajmëron aksione të reja appeared first on Euronews Albania.

Kryetari i Bashkisë së Vlorës, Ermal Dredha, gjatë një lidhje live për emisionin “NOW me Erla Mëhillin” foli në lidhje me aksionin e iniciuar nga kryeministri Edi Rama për lirimin e hapësirave publike.

Dredha i cilësoi kritikat e kryeministrit si normale dhe në funksion të përmirësimit të jetës së qytetarëve të Vlorës, duke shtuar se ndjehet më i motivuar për të punuar dhe aspak i fyer nga kjo iniciativë.

Ai theksoi se duhet të përpiqen të jenë në lartësinë e duhur për të ofruar shërbimin që qytetarët meritojnë.

“Kjo situatë nuk mund të vazhdojë pafundësisht, pasi problematika është e trashëguar prej vitesh. Të gjithë zyrtarët që punojnë në administratën bashkiake duhet të jenë sy e vesh në monitorimin e hapësirave publike. Funksionarët duhet të jenë të kujdesshëm në ndjekjen e detyrës, ndërsa gjatë inspektimeve në terren kuptuam se disa prej tyre nuk e kishin përmbushur misionin e tyre,” tha Dredha.

Duke folur për konkretisht për aksionin, ai u shpreh se problematika qëndron te tejkalimi i lejeve nga ana e bizneseve, të cilat nuk respektojnë parashikimet kontraktuale. Sipas tij, po vërehet një përgjigje pozitive nga bizneset, të cilat po i binden ligjit.

“Janë marrë masa me gjoba, ndërkohë që vetë bizneset kanë ndërmarrë hapin për të liruar hapësirat që kishin zaptuar ose, thënë ndryshe, të marra peng. Po mendojmë që tendat të unifikohen për t’i sjellë në standard, ashtu siç ka qenë parashikuar në projektin e Lungomares,” deklaroi ai.

Sa i përket dorëheqjeve të disa drejtorëve, Dredha tha se ato kanë qenë vullnetare dhe nuk kanë ardhur si kërkesë nga kryeministri.

“Ne bëmë një analizë, pasi bashkërendojmë punën me qeverinë për të mirën e qytetit dhe shkëmbejmë ide e mendime. Kërkesa për llogari është mëse normale nga ana e kryeministrit, sepse ai ka dëshirën e mirë për t’i shërbyer qytetit. Nuk ka asgjë problematike në këtë pjesë, përkundrazi, është diçka pozitive. Nuk është e vërtetë se kryeministri u ka kërkuar dorëheqjen drejtorëve dhe as nuk i ka takuar”, u shpreh Dredha.

Ai tha se në momentin që po jepte intervistën ndodhej në inspektim dhe shtoi se problematika nuk është konstatuar tani, por ka ardhur momenti për të mos pasur më tolerancë ndaj shfrytëzimit të padrejtë të hapësirave publike.

Në lidhje me çështjen e zjarrit në fushën e mbetjeve në qytetin e Vlorës, kryebashkiaku tha se nuk ka qenë aspak e lehtë të përballesh me flakët.

“Po përpiqemi me mish e me shpirt që të parandalojmë një zjarr të ri në fushën e mbetjeve, por rreziku ekziston, pasi edhe temperaturat janë shumë të larta,” tha ai.

LEXONI GJITHASHTU:

• A e keni menduar dorëheqjen? Si përgjigjet kryebashkiaku i Vlorës, Ermal Dredha
• Rama flet për shkarkimet në Vlorë: Të gjithë drejtorët do të jenë të rinj, aplikoni
• Rama inspektim në bashkinë e Vlorës: Lironi hapësirat publike

The post “Jam më i motivuar pas kritikave të Ramës”, Dredha: Aspak i fyer, aksioni vazhdon appeared first on Euronews Albania.

Në një ceremoni të mbajtur në Korçë, është inauguruar godina e re e Konsullatës së Përgjithshme Greke, një ndërtesë me rëndësi historike dhe simbolike, ku dikur ka shërbyer poeti i njohur dhe fituesi i Çmimit Nobel, Jorgo Seferis.

I pranishëm në këtë ngjarje ishte Ministri i Jashtëm i Greqisë, i cili përcolli mesazhe të forta për miqësi, respekt dhe bashkëjetesë mes dy popujve.

“Politikat e ndryshimit të kufijve i përkasin të kaluarës. Sot na bashkon një histori e përbashkët, vlera të përbashkëta dhe sidomos minoriteti grek, i cili është një urë bashkëpunimi dhe mirëkuptimi. Ashtu siç do të shkruante Seferis, historitë e vjetra nuk i interesojnë njeriut,” tha Giorgios Gerapetritis – Ministri i Jashtëm i Greqisë.

Nga ana tjetër, Ministri i Jashtëm shqiptar e cilësoi ndërtimin e konsullatës si një akt që mishëron marrëdhëniet e reja mes dy vendeve, të bazuara në respekt dhe miqësinë shekullore.

“Le të jemi brezi që ndërton një partneritet të vërtetë dhe të qëndrueshëm mes Shqipërisë dhe Greqisë. Greqia ka qenë dhe mbetet partner i rëndësishëm për Shqipërinë. Siç thoshte Seferis, urat nuk ndërtohen me gurë, por me fjalë e kujtesë,” tha Igli Hasani – Ministri i Jashtëm i Shqipërisë.

Në thelb të kësaj vizite dhe ceremonie u vendosën mesazhet e qarta politike: nuk ka më vend për retorika për ndarje apo ndryshim kufijsh, ndërsa minoriteti grek në Shqipëri dhe komuniteti shqiptar në Greqi janë ura që lidhin të dy kombet drejt një të ardhmeje europiane të përbashkët.

LEXONI GJITHASHTU:

• Inagurohet konsullata greke në Korçë, Hasani: Partner të rëndësishëm për ne
• Beleri merr pjesë në inaugurimin e konsullatës greke në Korçë: Dëshirë e qytetarëve

The post “Nuk ka ndryshim kufijsh”, Ministri i Jashtëm grek flet nga Konsullata e re në Korçë appeared first on Euronews Albania.

Komisioni i Ankimimeve dhe Sanksioneve (KAS) vendosi këtë të hënët, me shumicë votash, rrëzimin e kërkesës ankimore të Partisë Demokratike – Aleanca për Shqipërinë Madhështore (PD-ASHM) për shpalljen e pavlefshmërisë së zgjedhjeve të 11 majit në qarqet Elbasan, Fier, Durrës dhe Tiranë.

Kërkesa u vlerësua si e pambështetur në ligj dhe në prova e për rrjedhojë, nuk do të ketë përsëritje të zgjedhjeve në këto katër qarqe.

Ndërkohë, javën e kaluar përfundoi rinumërimi i votave në disa prej qarqeve, përfshirë Tiranën dhe Fierin, pa sjellë ndryshime në rezultatin e shpallur për zgjedhjet e 11 majit.

LEXONI GJITHASHTU:

• Rinumërimi në Tiranë, anëtari i KAS: Nuk ndryshon shpërndarja e mandateve
• Manipulim apo gabim? Braho: KAS po shqyrton rritjen e votave për kandidaten në Fier

The post KAS rrëzon kërkesën e PD-ASHM për shpalljen e pavlefshme të zgjedhjeve në 4 qarqe appeared first on Euronews Albania.

Presidenti amerikan Donald Trump po rrit presionin ndaj vendeve partnere për të përshpejtuar arritjen e marrëveshjeve tregtare, ndërsa afati i pezullimit të tarifave të reja po i afrohet fundit.

Sipas këshilltarëve të Shtëpisë së Bardhë, Trump mund të bëjë koncesione të reja, por gjithçka mbetet në dorën e tij. Afati 90-ditor për pezullimin e tarifave skadon më 9 korrik, ndërsa aplikimi i tyre do të nisë më 1 gusht.

“Shtetet e Bashkuara janë gjithmonë të hapura për dialog. Por kur afatet skadojnë, presidenti vendos nëse do të ketë zgjatje apo jo”, deklaroi Kevin Hassett, drejtor i Këshillit Kombëtar Ekonomik.

Në të njëjtën linjë u shpreh edhe Stephen Miran, kreu i grupit të këshilltarëve ekonomikë, i cili konfirmoi se koncesione të tjera janë të mundshme, por nën presion.

Shtëpia e Bardhë pritet të dërgojë letra zyrtare vendeve të interesuara, duke i njoftuar për aplikimin e tarifave. Kjo lëvizje ka shtuar pasigurinë për bizneset dhe partnerët tregtarë të SHBA-së, të cilët nuk e dinë ende nëse do të përfshihen në këtë valë të re tarifash.

Tarifat e shpallura më 2 prill kishin ngritur shqetësime për ndikimin negativ në ekonominë globale, duke shkaktuar rënie të tregjeve financiare. Si pasojë, Uashingtoni pezulloi zbatimin për 90 ditë. Deri më tani, marrëveshje të plota janë arritur vetëm me Mbretërinë e Bashkuar dhe Vietnamin.

“Kush bashkohet me BRICS, përballet me 10% tarifë shtesë” – Trump paralajmëron vendet anti-amerikane

Në një tjetër deklaratë të ashpër, presidenti Trump paralajmëroi se çdo vend që bashkohet me politikat anti-amerikane të grupimit BRICS do të përballet me një tarifë shtesë prej 10 për qind.

“Çdo vend që rreshtohet me politikat anti-amerikane të BRICS do të përballet me një tarifë shtesë 10%. Nuk do të ketë përjashtime,” shkroi Trump në rrjetet sociale.

BRICS, grupim ku bëjnë pjesë Kina, India, Rusia, Brazili dhe Afrika e Jugut, është shpesh në fokus të kritikave të Trumpit. Presidenti amerikan e ka konsideruar këtë grup si një sfidë të drejtpërdrejtë për interesat ekonomike të SHBA-së.

Nga ana tjetër, Rusia ka reaguar ndaj deklaratës së presidentit amerikan, duke theksuar se BRICS “nuk është i orientuar kundër asnjë vendi” dhe promovon një rend botëror shumëpalësh dhe të drejtë.

LEXONI GJITHASHTU:

• BRICS kritika për tarifat dhe tensionet në Lindjen e Mesme por jo SHBA-në apo Rusinë
• Trump: Jemi afër një marrëveshjeje për Rripin e Gazës, mund të arrihet brenda javës

The post Trump rrit presionin, paralajmëron tarifa për vendet që nuk pranojnë marrëveshje appeared first on Euronews Albania.

Prokuroria pranë Gjykatës së Shkallës së Parë në Shkodër ka reaguar pas deklaratave të Kryeministrit Edi Rama, i cili kritikoi prokuroren Elsa Gjeli për refuzimin e hapjes së një çështjeje penale ndaj një biznesmeni.

Policia e Shtetit kishte bërë denoncim për ndërtimin pa leje të një kompleksi turistik në Theth ndërsa Rama i kërkoi ministrisë së Drejtësisë bërjen e një kërkese në Këshillin e Lartë të Prokurorisë për shkarkimin e kësaj prokuroreje.

Por sipas Prokurorisë së Shkodrës, vendimi i prokurores Gjeli është marrë në përputhje të plotë me nenin 290, pika ç, të Kodit të Procedurës Penale, që parashikon: “Procedimi penal nuk mund të fillojë kur fakti nuk parashikohet nga ligji si vepër penale ose kur del qartë që fakti nuk ekziston”.

“Nga vlerësimi i plotë i fakteve dhe akteve procedurale, u konstatua se faktet e referuara nga Policia e Shtetit nuk përbëjnë ndërtim të paligjshëm në kuptim të nenit 199/a të Kodit Penal”, njofton Prokuroria e Shkodrës.

Në njoftimin zyrtar, Prokuroria thekson se çdo përpjekje për të ndikuar në mënyrë direkte apo indirekte në vendimmarrjen e një prokurori cënon parimin e ndarjes së pushteteve, të sanksionuar në nenin 7 të Kushtetutës së Republikës së Shqipërisë.

“Shteti i së drejtës nuk mund të funksionojë nëse prokurorët frikësohen nga vendimmarrjet e ligjshme që mund të mos përkojnë me interesat e pushteteve të tjera”, thuhet në njoftim.

Po ashtu, Prokuroria nënvizon se çdo shqetësim institucional duhet të adresohen përmes rrugëve ligjore të përcaktuara dhe jo përmes mesazheve politike publike që synojnë të ushtrojnë presion mbi sistemin e drejtësisë.

Vendimi i arsyetuar i mosfillimit të hetimeve i prokurores “Gjeli” për rastin e Thethit

1 of 10

Reagim i plotë i Prokurorisë pranë Gjykatës së Shkallës së Parë të Juridiksionit të Përgjithshëm Shkodër

Nisur nga deklaratat publike të bëra nga Kryeministri i Republikës së Shqipërisë, ku është komentuar vendimi i një prokurori të Prokurorisë pranë Gjykatës së Shkallës së Parë të Juridiksionit të Përgjithshëm Shkodër, sqarojmë opinionin publik, si më poshtë vijon:

Vendimi i datës 30.05.2025 i prokurores zj. Elsa Gjeli është marrë në përputhje të plotë me nenin 290, pika ç, të Kodit të Procedurës Penale, ku parashikohet se: “Procedimi penal nuk mund të fillojë kur fakti nuk parashikohet nga ligji si vepër penale ose kur del qartë që fakti nuk ekziston”.

Në rastin konkret, nga vlerësimi i plotë i fakteve dhe akteve procedurale, u konstatua se faktet e referuar nga policia e shtetit nuk përbëjnë ndërtim të paligjshëm në kuptim të nenit 199/a të Kodit Penal, për arsyen se:

Strukturat e konstatuara dhe që janë referuar nga policia kanë qenë kontenjerë të përkohshëm pa themele, të vendosura mbi pllaka guri, dhe si të tilla nuk përmbushin kriteret për të konsideruar objekt ndërtimi sipas standardeve të përcaktuara në ligjin nr. 107/2014 “Për planifikimin dhe zhvillimin e territorit”, i ndryshuar.

Vetë Policia, në procesverbalin e këqyrjes së vendit të ngjarjes, është shprehur se kontenjerët nuk janë vendosur mbi bazamente betoni, por kanë qenë të vendosura mbi rrasa guri të prera.

Sipas nenit 7, pika 3, gërma “i” e VKM nr. 408, datë 13.05.2015, e ndryshuar, strukturat që instalohen për nevoja të çastit dhe/ose të përkohshme, pa themele dhe me materiale të çmontueshme, nuk kërkojnë pajisje me leje ndërtimi, por vetëm deklaratë paraprake.

Vetë IMT, Bashkia Shkodër, në shkresën e saj drejtuar Policisë Gjyqësore, e ka klasifikuar faktin si kundërvajtje administrative, jo si vepër penale, dhe në këto kushte duhet të kishin vepruar institucionet që kanë në përgjegjësi menaxhimin e territorit.

Në këto kushte, mungesa e elementit objektiv dhe pasojës penale, sipas analizës së zbatuar të ligjit, e bën të pamundur ngritjen e ndjekjes penale, dhe prokurori, si organ kushtetues i pavarur, ka detyrimin ligjor që të vlerësojë faktet në përputhje me ligjin.

Në një shtet të së drejtës, pavarësia funksionale e prokurorit garantohet nga Kushtetuta dhe nga ligji nr. 97/2016 “Për organizimin dhe funksionimin e Prokurorisë në Republikën e Shqipërisë”. Prokuroria është një institucion kushtetues i pavarur që vepron në përputhje me ligjin, ku çdo vendimarrje procedurale merret mbi bazën e fakteve dhe provave të administruara, dhe jashtë çdo ndikimi të jashtëm politik. Çdo përpjekje për të ndikuar në mënyrë direkte ose indirekte në vendimmarrjen e një prokurori cënon parimin e ndarjes së pushteteve të sanksionuar në nenin 7 të Kushtetutës.

Respektimi i ndarjes së pushteteve është themel i funksionimit të shtetit demokratik dhe ndërhyrjet e pushtetit ekzekutiv në proceset vendimmarrëse të institucioneve të drejtësisë, qofshin ato edhe përmes komenteve publike, mund të perceptohen si presion mbi institucionet e drejtësisë dhe dëmtojnë besimin e qytetarëve në këto institucione.

Vendimi për mosfillimin e procedimit penal nuk është një akt vullneti personal, por një akt ligjor, që mbështetet mbi rregullat themelore të të drejtës penale materiale dhe procedurale. Çdo shqetësim institucional duhet të adresohet përmes rrugëve të përcaktuara ligjore dhe jo përmes mesazheve politike publike që synojnë t’i imponohen sistemit të drejtësisë. Shteti i së drejtës nuk mund të funksionojë nëse prokurori frikësohet për çdo vendimmarrje të ligjshme që mund të mos përkojë me interesat e pushteteve të tjera.

Prokuroria mbetet e angazhuar për të kryer funksionin e saj në mënyrë të drejtë, të paanshme dhe në përputhje me Kushtetutën dhe ligjin.

• “Lejoi ndërtim pa leje në Theth”, Rama sulmon prokuroren, kërkon shkarkimin e saj
• Theth| Rama ndan videon e prishjes së fshatit turistik: Shikojeni, betoni i dynjasë

The post Prokuroria e Shkodrës reagon ndaj deklaratave të Ramës për objektet në Theth appeared first on Euronews Albania.

Gjykata e Posaçme e Shkallës së Parë kundër Korrupsionit dhe Krimit të Organizuar ka shpallur të pafajshëm ish-gjyqtarin e Gjykatës së Lartë, Shkëlzen Selimi, i cili akuzohej për fshehje pasurie.

Selimi u hetua nga SPAK për veprën penale “Refuzimi për deklarim, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, parashikuar nga neni 257/a i Kodit Penal.

Në përfundim të gjykimit, trupa gjykuese e kryesuar nga gjyqtarja Rudina Palloj vendosi:

• Deklarimin e pafajshëm të Shkëlzen Selimit, pasi faktet penale të ngritura nga akuza nuk u provuan.
• Shpenzimet procedurale dhe gjyqësore mbeten siç janë kryer.
• Palët kanë të drejtë të ankimojnë vendimin në Gjykatën e Posaçme të Apelit për Korrupsion dhe Krim të Organizuar brenda 15 ditëve nga njoftimi i vendimit të arsyetuar.

Shkëlzen Selimi punoi për dy dekada në sistemin e drejtësisë, përpara se të shkarkohej në vitin 2018 nga vetingu për fshehjen e kontakteve me persona të përfshirë në krim të organizuar. Edhe bashkëshortja e tij, ish-gjyqtarja e Apelit Administrativ, Rilinda Selimi u sharkua nga Kolegji për shkak të kontakteve të papërshtatshme, ndërkohë që shumica e trupit gjykues nuk gjeti probleme shkarkuese për pasurinë.

Procedimi penal për Selimin dhe disa gjyqtarë të tjerë u regjistrua nga SPAK pesë vjet më parë për veprën penale të “deklarimit të rremë të pasurisë”. Në prill 2021, Gjykata e Posaçme vendosi sekuestro preventive mbi pasuritë në zotërim të Selimit dhe familjarëve të tij; një pikë karburanti në lungomaren e Vlorës si dhe një truall me sipërfaqe 2400 m2 në Jonufër të Vlorës.

LEXONI GJITHASHTU:

• Akuzohet për fshehje të pasurive, dënohet në GJKKO ish-gjyqtari Guxim Zenelaj
• Fshehu pasurinë, SPAK kërkon dënimin me burg të ish-gjyqtarit të Lartë

The post SPAK e akuzoi për fshehje pasurie, shpallet i pafajshëm ish-gjyqtari i njohur appeared first on Euronews Albania.

Pamjet e kësaj të moshuare, kur këtë të hënë kërkonte të bisedonte me kryeministrin Edi Rama në Vlorë, u bënë virale në rrjet.

Euronews Albania ka arritur t’i marrë një intervistë ekskluzive 82-vjeçares nga Vlora, Katina Thanasi, e cila ngulmoi dhe ia arriti të bisedonte me Ramën gjatë kohës që kryeministri ishte në Vlorë për inspektim në kuadër të lirimit të hapësirave publike.

Katina Thanasi tregon edhe momentet e bisedës me Ramën dhe çfarë i kërkoi ajo atij.

Ajo thotë se, pasi u shty me një efektive dhe truprojat e Ramës, i shprehu atij shqetësimin e saj.

Katina thotë se Rama i tha “çfarë ke që bërtet” dhe më pas ajo i shpjegoi problemin e kanalit pranë banesës së saj, i cili duhej pastruar.

“Jam Katina Thanasi, jam 82 vjeçare. Doli Rama, unë isha atje, më rrethuan policët se s’donin të më linin të takoja Ramën. Unë i thashë do ta takoj. Shty ata policët, shty unë dhe ata duke më shtyrë mua. Përplasja me ta ishte e vështirë. Më thanë do të arrestojmë. I thashë: ‘S’më arrestoni dot, se s’kam bërë ndonjë gjë. Nuk kam vjedhur, s’kam bërë ndonjë gjë.’ Ishte një police vajzë dhe pesë të tjerë. Shty ata mua, shty unë ata. Rama ikte poshtë, i thashë: ‘Rama, mos ik se të dua! Mos ik se të dua për kokë të djalit’, kështu i thashë. Këta më shtynin mua, Rama qëndroi aty në anë. Policët më mbanin, ndërsa unë i shtyva. Rama më tha mua: ‘Pse bërtet?’ I thashë: ‘Po bërtas për këta’. I thashë Ramës, ky kryetari i bashkisë që rrin me ty… Kam dy vjet e gjysmë që i them për pastrimin e kanalit dhe të tokës dhe ky nuk vjen. Kam shqetësim që të më pastrohet kanali dhe toka.” – tha ajo.

E pyetur nga gazetari i Euronews Albania në Vlorë nëse tani që bisedoi me Ramën do t’i zgjidhet problemi, ajo thotë se nuk ka besim pa parë veprime konkrete, ndërsa thekson se nëse kjo gjë nuk zgjidhet, do vazhdojë të kërkojë sërish që t’i jepet zgjidhje.

“Të them të drejtën, për kokë të djalit të vetëm, nuk është se kam shpresë se do më zgjidhet problemi për kokë të djalit, sepse këta të gënjejnë, të keqen nëna. Megjtihatë pasdi kam biseduar me Ramën, erdhen dy djem, i thanë këtij që ka tokën: ‘A të futemi dot te toka jote të pastrojmë?’ Ai i tha: ‘Futuni’, por ata s’janë futur akoma me prentendimin që nuk lejohet të futesh te toka e dikujt tjetër,” – thotë 82-vjeçarja.

Katina thotë se këtë problem më parë ia kishte parashtruar kryetarit të bashkisë dhe për gati dy vjet e gjysmë nuk ishte marrë asnjë masë

“Unë kam vajtur  te kryetari, e takova dhe më krehu dorën kështu. Problemi kanalit të madh… Hedhin qen të ngordhur, mushkonjat të hanë se vijnë prej kanalit. S’kanë vënë një kazan të hedhin mbeturinat, mileti. Atë i thashë: ‘Vini një kazan se njerëzit janë të papërgjegjshëm. Shqiptarët i hedhin në kanal, po s’po vënë dorë.’ Unë e takova Ramën, po merakun s’e kam hequr akoma sa të pastrohet kanali. Merakun do ta çoj deri në fund. Nëse nuk vijnë këtu, më kanë atje nesër. Për kokë të djalit, që në mëngjes, në orën 8–9 jam atje, nëse nuk do vijnë,” – thotë 82-vjeçarja.

LEXONI GJITHASHTU:

• “O Edi”,- E moshuara përplaset me truprojat e Ramës, kryeministri: Ç’a ke që bërtet
• Theth| Rama ndan videon e prishjes së fshatit turistik: Shikojeni, betoni i dynjasë

The post Ekskluzive| U përlesh me truprojat e Ramës, flet e moshuara: Pse kërkova ta takoj appeared first on Euronews Albania.

Kryeministri Edi Rama ka ndarë në rrjete sociale pamjet e aksionit të IKMT-së në Theth për prishjen e godinave pa leje.

Shefi i qeverisë vijoi akuzat ndaj prokurores Elsa Gjeli, për të cilën tha se i ka kërkuar Ministrisë së Drejtësisë bërjen e një kërkese në Këshillin e Lartë të Prokurorisë për shkarkimin e saj.

Shefi i qeverisë theksoi se prokurorja Gjeli ka refuzuar të hapë çështje penale ndaj një biznesmeni, për të cilin Policia e Shtetit ka bërë denoncim për ndërtimin e një fshati të tërë turistik pa leje. Rama theksoi se lugina e Thethit do të pastrohet nga betoni dhe do të kthehet në gjendjen e mëparshme.

“Ja, shikojeni vetë LIVE nga Thethi!
Kjo është fusha e mrekullueshme e Thethit, ku një kriminel – që as nuk ka kurajë të shfaqet ndërkohë që IKMT po zbaton ligjin – ka hedhur betonin e dynjasë për të ndërtuar ‘fshatin e tij turistik’ pa asnjë leje. Një krim i shumëfishtë, për të cilin një prokurore e quajtur Elsa Gjeli ka refuzuar të hapë çështjen duke hedhur në kosh denoncimin e Policisë së Shtetit.

Tani, çfarë borxhi i kanë zonjës Gjeli Republika e Shqipërisë, Parku Kombëtar i Thethit, banorët e mrekullueshëm e punëtorë të Thethit, vizitorët e turistët e shumtë dhe gjithë këto forca që kanë zbarkuar sot në Theth, bashkë me taksapaguesit shqiptarë që do të paguajnë tërë këto shpenzime për paga e për karburant, për pastrimin e kësaj katrahure dhe kthimin e qendrës së qytezës magjike në gjendjen e mëparshme?”

LEXONI GJITHASHTU:

• “Lejoi ndërtim pa leje në Theth”, Rama sulmon prokuroren, kërkon shkarkimin e saj 
• Rama në Vlorë: Nuk kemi tendencë t’i zëmë frymën bizneseve, trotuaret do të lirohen

The post Theth| Rama ndan videon e prishjes së fshatit turistik: Shikojeni, betoni i dynjasë appeared first on Euronews Albania.

Jamarbër Malltezi, dhëndri i kryetarit të Partisë Demokratike, Sali Berisha, është liruar nga masa e arrestit në shtëpi, që mbahej që prej 21 nëntorit 2023. Masa e arrestit është zëvendësuar me garanci pasurore.

Malltezi ndodhet nën hetim për çështjen e njohur si “dosja Partizani”, ku akuzohet për korrupsion pasiv dhe pastrim parash. Sipas akuzave, ai ka përfituar në mënyrë të parregullt të ardhura në vlerën e 5.4 milionë eurove nga një biznes ndërtimi, falë vendimeve të qeverisë të marra nga vjehrri i tij, Sali Berisha.

Në një prononcim për media nga Gjykata e Posaçme Kundër Korrupsionit dhe Krimit të Organizuar, Malltezi e cilësoi procesin ndaj tij si politik dhe me urdhër të kryeministrit Edi Rama.

“Kemi zëvendësimin e masës me garanci pasurore. Ka mbi 20 muaj që kjo ishte një farsë politike, ishte një urdhër politik. Nuk kemi të bëjmë me një shtet ligjor, por me një shtet që lufton armiqtë e PS. Vendimi i sotëm vjen pas 20 muajsh privim lirie thjesht me një urdhër politik të Edi Ramës. E mbani mend se si në Kongresin e PS Edi Rama urdhëroi SPAK të procedojë penalishët Sali Berishën, të njëjtën gjë e kërkoi edhe ambasadorja e korruptuar amerikane si Yuri Kim. Prandaj kemi të bëjmë me një proces politik,” deklaroi Malltezi.

LEXONI GJITHASHTU:

• Dosja “Partizani”, GJKKO shtyn sërish seancën paraprake për Berishën
• Dosja “Partizani”, Gjykata Kushtetuese zbardh vendimin për Jamarbër Malltezin

The post Jamarbër Malltezi lirohet nga masa e sigurisë e arrestit në shtëpi appeared first on Euronews Albania.

Kryeministri Edi Rama ishte këtë të hënë në qytetin e Vlorës, ku inspektoi nga afër aksionin e nisur në qytet për lirimin e hapësirave publike të zëna në mënyrë të paligjshme nga bizneset.

Shefi i qeverisë mbajti dhe një deklaratë për media nga Vlora, ku foli mbi shkarkimet e drejtorëve të bashkisë Vlorë, por dhe të administratës qendrore në këtë qytet.

Rama përshëndeti dorëheqjen e drejtorëve dhe tha se, duke parë performancën e tyre të ulët, ata nuk do të mund të riciklohen si drejtorë në pozicione të tjera.

Kryeministri tha se të gjithë drejtorët në bashkinë e Vlorës dhe administratën qendrore të qytetit do të jenë të rinj.

Ai ftoi pedagogët e universitetit të Vlorës, por dhe të rinj të diplomuar që të konkurrojnë për t’iu bashkuar administratës, pasi procesi i përzgjedhjes do të jetë meritokratik.

“Secilit dhe secilës mund t’u jepen mundësi të reja në të ardhmen. Por ndërkohë dua t’i ftoj të gjithë burrat, gratë dhe vajzat profesioniste që të aplikojnë për të shërbyer në administratën e bashkisë së Vlorës, duke i siguruar që ne do të jemi shumë kërkues dhe shumë rigorozë në funksion të meritës.

Ata janë dorëhequr dhe i falënderoj e i përshëndes, dhe asnjë person që ka mbuluar pozicione drejtuese në bashkinë e Vlorës ose në qarkun e Vlorës nuk do të rimerret si drejtues në këtë fazë. Të gjithë drejtuesit do të jenë të rinj.

Kam një thirrje të veçantë për pedagogët e universitetit. Natyrisht që puna e tyre në universitet është shumë e vyer, por janë të mirëpritur të kontribuojnë më shumë për qytetin. Cilado dhe cilido prej tyre që do të dojë të afrohet në administratën e bashkisë apo në role drejtuese në administratën qendrore do të jetë i mirëseardhur. Vlerësimi pastaj do të bëhet sipas performancës së secilit në procesin përzgjedhës, i cili do të jetë një proces meritokratik.

Po ashtu, të gjithë ata që kanë studiuar në Vlorë, në Tiranë, apo jashtë vendit dhe që janë të dëshiruar të shërbejnë për administratën e bashkisë apo të shtetit, por që ndërkohë punojnë kamarierë apo punë të tjera, janë të mirëpritur të konkurrojnë,” tha Rama.

LEXONI GJITHASHTU:

• Rama dha ultimatum për lirimin e zonës pranë “Muradies” në Vlorë, bashkia në aksion
• Rama “furtunë” në Vlorë, kërkon shkarkime masive në bashki! Zbardhen porositë e lëna

The post Rama flet për shkarkimet në Vlorë: Të gjithë drejtorët do të jenë të rinj, aplikoni appeared first on Euronews Albania.

Kryeministri Edi Rama pritet të zhvillojë një retreat me kryetarët e bashkive. Burime bëjnë me dije se takimi do të mbahet më 11 korrik, në një prej qyteteve bregdetare të vendit. Fokusi i mbledhjes do të jetë mbi problematikat e pushtetit vendor, veçanërisht ato që lidhen me sezonin turistik.

Edhe këtë të hënë, shefi i qeverisë ishte në Vlorë, ku së bashku me kryebashkiakun e qytetit, Ermal Dredha, inspektoi lirimin e hapësirave publike të zëna nga bar-kafenetë në zonën e Muradies.

Rama ka bërë apel të vazhdueshëm gjatë ditëve të fundit që bizneset të lirojnë vetë hapësirat e zaptuara, përndryshe do të përballen me ndjekje penale.

Duket se aksioni për lirimin e hapësirave publike do të shtrihet në të gjitha qytetet e vendit. Duhet pritur data 11 korrik që të zbulohen edhe porositë që kryeministri do t’u japë dhe kryebashkiakëve të tjerë të vendit.

LEXONI GJITHASHTU:

• Rama dha ultimatum për lirimin e zonës pranë “Muradies” në Vlorë, bashkia në aksion
• Rama “furtunë” në Vlorë, kërkon shkarkime masive në bashki! Zbardhen porositë e lëna

The post Zënia e hapësirave publike dhe problemet e sezonit, Rama mbledh kryebashkiakët appeared first on Euronews Albania.

Në zbatim të masës së sigurisë “detyrim paraqitje”, ish-kryeministri Sali Berisha është paraqitur këtë të hënë në Prokurorinë e Posaçme kundër Korrupsionit dhe Krimit të Organizuar. Berisha u prit me entuziazëm nga një grup mbështetësish dhe pas daljes nga SPAK mbajti një deklaratë për mediat, ku zbuloi edhe letrën që i ka dorëzuar drejtuesit të institucionit, Altin Dumani.

Gjatë fjalës së tij, Berisha vijoi akuzat ndaj kreut të SPAK për, siç u shpreh ai, “mbrojtjen e krimeve zgjedhore dhe atyre mjedisore të kryera nga qeveria”.

“Altin Ttoplini me mbrojtjen që u bën karteleve të drogës në Shqipëri, krimeve zgjedhore dhe krimeve të rënda mjedisore,këto të fundit kryekëput qeveritare, dëshmon se pas Ramës është de facto përgjegjësi më kryesor, delinkuenti numër 2 për kriminalitetin në Shqipëri. Kjo u la në këtë prokurori,” tha Berisha.

Kryedemokrati denoncoi gjithashtu djegien e mbetjeve në fushat e plehrave në Elbasan dhe Vlorë, duke i cilësuar si “krime të rënda mjedisore që rrezikojnë jetën e banorëve” dhe për të cilat tha se janë në kompetencë për t’u hetuar nga SPAK.

“Siç jeni informuar, për 6 ditë me radhë qytetarët e Elbasanit pësuan agresionin toksik më të madh në historinë e atij qyteti dhe ky krim i rëndë mjedisor, sikundër krimi ciklik mjedisor në Vlorë, nuk ekziston për Altin Troplinin, paçka se ligji ia ngarkon kësaj prokurorie për shkak se konsiderohen krime të rënda. Ky mercenar i Edi Ramës ka vendosur institucionin në funksion të partisë së krimit dhe të qeveritarëve të krimit,” deklaroi Berisha.

LEXONI GJITHASHTU:

• “Partizani”/ Jep dorëheqjen gjyqtarja, shtyhet seanca për Jamarbër Malltezin
• Shtyhet gjyqi në themel për dosjen “Partizani”: Mungon Berisha, kërkesa e avokates

The post Berisha paraqitet në SPAK, zbulon letrën që i dorëzoi Altin Dumanit appeared first on Euronews Albania.

Kryeministri Edi Rama ka mbërritur në Vlorë, ku është pritur nga kryetari i bashkisë, gjithashtu nga Pirro Vengu, dhe ministri Bledi Çuçi. Teksa zbriste nga makina për të inspektuar procesin e nisur për lirimin e hapësirave publike në Lungomare, Rama u prit me duartrokitje nga qytetarët.

Në një koment të djeshëm, kryeministri theksoi se aktivitetet e bizneseve, sidomos lokaleve, kishin zaptuar trotuaret dhe i kishin bllokuar ato për këmbësorët. Pas ultimatumit 48-orësh të dhënë në rrjetet sociale, aksioni për heqjen e bizneseve që shfrytëzojnë paligjshëm hapësirat publike ka nisur në mesnatë.

Rama theksoi se ky aksion është i nevojshëm për të përmirësuar shërbimet dhe për të sjellë Lungomaren në përputhje me imazhin e “Shqipërisë Turistike”.

Ai e konsideroi Lungomaren si model për një qytet bregdetar modern dhe theksoi se duhet të shërbejë si shembull për dizajnin e vijës bregdetare.

LEXONI GJITHASHTU:

• Lirimi i hapësirave publike/Policia bllokon 98 mjete, arreston 2 persona, 9 në hetim
• Heqja e bizneseve të zaptuara në Lungomare, nis aksioni pas ultimatumit të Ramës

The post Kryeministri Rama mbërrin në bashkinë e Vlorës, pritet me duartrokitje nga qytetarët appeared first on Euronews Albania.

Policia e Shtetit ka intensifikuar zbatimin e planit të posaçëm të masave për sezonin turistik veror 2025, i cili ka nisur të zbatohet që dy javë më parë. Ky operacion ka si qëllim garantimin e sigurisë, qetësisë dhe rendit në zonat turistike dhe bregdetare të Shqipërisë.

Sipas njoftimit të policisë, pikat kryesore të operacionit përfshijnë:

• Sigurinë dhe rendin në zonat urbane dhe turistike;

• Përimetrin e sigurisë në plazhe;

• Parandalimin e ndotjes akustike dhe mjedisore;

• Lirimin e hapësirave publike të zëna paligjshme.

Nga Velipoja deri në Ksamil, operacioni ka rezultuar me bllokimin e 16 mjeteve lundruese (13 Jet Ski dhe 3 skafe), pasi drejtuesit e tyre kanë shkelur kufijtë e sigurisë, duke u ndëshkuar me gjoba administrative prej 100,000 lekësh.

Po ashtu, janë sekuestruar 1230 çadra dhe shezlongë të vendosura në plazhe publike, për të cilat janë proceduar 27 shtetas për shkelje të ligjit. Në kuadër të operacionit “Plazh i lirë”, janë liruar gjithashtu 9 hapësira publike që përdorej paligjshëm, kryesisht për parkim, në Vlorë dhe Shkodër.

Në qytetet kryesore si Tiranë, Durrës dhe Vlorë, Policia Rrugore ka ngritur me karrotrec 98 automjete dhe 34 motomjete që ishin parkuar në kundërshtim me ligjin mbi trotuaret dhe vijat e bardha.

Përsa i përket ndotjes akustike, janë kryer kontrolle intensive me aparatura matëse, ku 15 shtetas janë proceduar penalisht për tejkalim të kufijve të lejuar të zhurmës në zonat turistike. Po ashtu, janë bllokuar 72 automjete dhe motomjete që krijonin zhurmë të tepërt, kryesisht në Tiranë dhe Vlorë.

Për ndotjen e mjedisit, janë evidentuar 11 raste të ndotjes së ujërave dhe tokës, ku janë arrestuar 2 shtetas dhe janë proceduar 9 të tjerë.

Policia e Shtetit ka apeluar për respektimin e ligjit nga pronarët e lokaleve dhe drejtuesit e automjeteve. Apelohet që drejtuesit e automjeteve të mos parkojnë mbi trotuare apo vija të bardha, pasi mjetet e konstatuara në shkelje do të bllokohen dhe do të transportohen me karrotrec në pikat përkatëse të bllokimit.

LEXONI GJITHASHTU:

• Heqja e bizneseve të zaptuara në Lungomare, nis aksioni pas ultimatumit të Ramës
• Zjarr i madh në malin Vastak, flakët dalin jashtë kontrollit gjatë natës

The post Lirimi i hapësirave publike/Policia bllokon 98 mjete, arreston 2 persona, 9 në hetim appeared first on Euronews Albania.

Aksioni për heqjen e bizneseve që kanë zaptuar hapësirat publike në zonën e Lungomares në Vlorë ka nisur në mesnatë, pas ultimatumit 48-orësh të dhënë nga kryeministri Edi Rama përmes rrjeteve sociale.

Siç shihen në pamje, inspektorët dhe përfaqësues të bashkisë kanë ndërhyrë gjatë natës për të çmontuar strukturat dhe për të liruar hapësirat e zëna nga bizneset, në përputhje me kërkesën e qeverisë për t’i kthyer këto hapësira publikut dhe turizmit.

Ky veprim është pjesë e një aksioni më të gjerë për sistemimin dhe rregullimin e ambienteve publike, duke siguruar që ato të jenë të aksesueshme dhe funksionale për qytetarët dhe vizitorët. Sipas informacionit, kryeministri Rama do të rikthehet nesër në Vlorë, ku do të zhvillojë një takim të dytë me autoritetet lokale në bashki, si dhe një inspektim në terren për të monitoruar nga afër zbatimin e këtij urdhri.

Ky aksion ka sjellë reagime të ndryshme nga bizneset, por për autoritetet, është një hap i rëndësishëm për rregullimin dhe zhvillimin e zonës, veçanërisht në kuadër të sezonit turistik.

LEXONI GJITHASHTU:

• “As Parisi nuk i uzurpon trotuaret”, Rama ultimatum të ri bizneseve në Lungomare
• Turizmi i luksit në Shqipëri, eksperti tregon shifrat: Sa kushtoi një natë në jug

The post Heqja e bizneseve të zaptuara në Lungomare, nis aksioni pas ultimatumit të Ramës appeared first on Euronews Albania.

Pas më shumë se 21 muajsh luftë, shpresat për një armëpushim në Gaza po rriten ndërsa kryeministri izraelit Benjamin Netanyahu takohet me presidentin e SHBA-së, Donald Trump, në Uashington. Gjatë një konference për media, Trump theksoi se ishte “shumë i vendosur” për të ndihmuar në arritjen e një marrëveshjeje që do të sillte fundin e këtij konflikti, duke shtuar se ai besonte se “do të kemi një marrëveshje këtë javë.”

Ndërkaq, Netanyahu, i cili ka udhëhequr Izraelin gjatë gjithë kësaj periudhe të tensioneve, shprehu besimin se bisedimet me Trump mund të përshpejtojnë një marrëveshje për armëpushimin. “Po punojmë për të arritur marrëveshjen që është diskutuar, sipas kushteve që kemi rënë dakord,” tha Netanyahu përpara se të nisej për në Uashington. Ai shprehu shpresën se diskutimet mund të sjellin një rezultat pozitiv për të cilin gjithkush po shpreson.

Në të njëjtën kohë, bisedimet indirekte midis Izraelit dhe Hamasit kanë rifilluar në Katar për një propozim të sponsorizuar nga SHBA-të për një armëpushim 60-ditor dhe për një marrëveshje për lirimin e pengjeve. Këto bisedime janë në një fazë delikate, me shumë paqartësi nëse dallimet e thella midis palëve mund të kapërcehen.

Në Izrael, të shtunën në mbrëmje, u zhvilluan protesta masive, ku qytetarët kërkuan që qeveria të nënshkruante një marrëveshje që do të mundësonte kthimin e rreth 50 pengjeve nga Gaza, të paktën 20 prej të cilëve besohet të jenë ende gjallë.

Ky zhvillim ka shkaktuar një valë tensioni dhe pasigurie, por bisedimet për armëpushim mbeten në fokus, ndërsa pasiguria përfundimtare e një marrëveshjeje vazhdon të mbetet e paqartë.

LEXONI GJITHASHTU:

• OKB: Qindra mijëra afganë detyrohen të largohen nga Irani
• Sulmet me dronë ukrainas shkaktojnë kaos në trafikun ajror të Rusisë

The post Shpresat për armëpushim në Gaza pas 21 muajsh luftë, Netanyahu viziton SHBA-në appeared first on Euronews Albania.

Qindra mijëra afganë janë larguar nga Irani javët e fundit, pasi Teherani u dha afat deri më 6 korrik më shumë se katër milionë imigrantëve afganë pa dokumente për ta lënë vendin, thanë Kombet e Bashkuara dhe organizata të tjera ndërkombëtare, duke ngritur alarmin për mungesën e theksuar të fondeve për t’i ndihmuar të kthyerit.

Më shumë se 256.000 afganë janë kthyer në vendin e tyre nga Irani vetëm gjatë qershorit, sipas Organizatës Ndërkombëtare për Migracionin (IOM).

Agjencia tha se rritja e madhe e numrit të të riatdhesuarve po e bën të vështirë për IOM-in dhe partnerët për të ofruar ndihmë.

Këto organizata arrijnë t’i ndihmojnë vetëm te 10 për qind të atyre që kanë nevojë.

Irani thotë se i strehon më shumë se 6 milionë afganë, shumë prej të cilëve jetojnë atje pa status të ligjshëm. Shumë imigrantë afganë pretendojnë se përballen me diskriminim të rregullt në Iran.

Disa media iraniane kanë raportuar se edhe afganët me viza të vlefshme janë dëbuar me forcë gjatë valës së fundit të dëbimeve.

Lufta 12-ditëshe e Iranit me Izraelin në mes të qershorit thuhet se ka kontribuar në largimet, me mediat shtetërore iraniane dhe përdorues të rrjeteve sociale që pretendojnë se një numër i pacaktuar shtetasish afganë janë arrestuar nën dyshime për spiunazh për Izraelin.

LEXONI GJITHASHTU:

• “As Parisi nuk i uzurpon trotuaret”, Rama ultimatum të ri bizneseve në Lungomare
• Teksasi në emergjencë pas përmbytjeve, Trump nënshkruan gjendjen e jashtëzakonshme

The post OKB: Qindra mijëra afganë detyrohen të largohen nga Irani appeared first on Euronews Albania.

Në emër të aksionit për lirimin e hapësirave publike, kryeministri Edi Rama ka komentuar sërish situatën në Lungomare të Vlorës, ku sipas tij veprimtaria e bizneseve, kryesisht lokaleve, ka pushtuar trotuaret, duke i bllokuar ato për këmbësorët.

Rama e konsideroi këtë një situatë që duhet të marrë fund, duke theksuar se çlirimi i hapësirave publike është një hap i domosdoshëm për rritjen e standardit të shërbimit dhe për ta sjellë atë në përputhje me imazhin e “Shqipërisë Turistike”.

Ai tha se nuk është kundër shërbimit të shtrirë në një pjesë të trotuarit, si në qytete të mëdha të botës, por theksoi se kjo nuk duhet të kthehet në uzurpim të hapësirës publike.

“Asnjë problem me karriget dhe shërbimin në një pjesë të trotuarit, si në Paris, Londër apo New York, por pa harruar që trotuari është i njerëzve dhe kurrsesi i barrikadave, si në Lungomare! Koha për të çliruar trotuaret nga barrikadat dhe për ta ngritur edhe shërbimin edhe dukjen në një nivel të ri, të denjë për Shqipërinë Turistike,” tha Rama.

Kryeministri e konsideroi Lungomaren si një model të dizajnit të një qyteti bregdetar modern dhe theksoi se ajo duhet të shërbejë si model për dizajnin e jashtëm të vijës së shërbimeve.

Ai i bëri thirrje të drejtpërdrejtë pronarëve dhe menaxherëve të bizneseve:

“Pronarët dhe menaxherët e vijës së shërbimeve duhet të heqin vetë tërë barrikadat dhe të bashkëpunojnë me Bashkinë e Vlorës dhe Agjencinë e Zhvillimit të Territorit për dizajnin e ri, për të cilin do t’i mbështesim me kënaqësi.”

Rama nënvizoi se ndërhyrja synon jo vetëm përmirësimin e pamjes, por edhe funksionalitetin e vijës turistike, në përputhje me standardet kombëtare të mikpritjes dhe shërbimit.

Postimi i plotë i kryeministrit Edi Rama 

“Asnjë problem me karriget dhe shërbimin në një pjesë të trotuarit, si në Paris, Londër apo New York, por pa harruar që trotuari është i njerëzve dhe kurrësesi i barrikadave, si në Lungomare! Koha për të çliruar trotuaret nga barrikadat dhe për ta ngritur edhe shërbimin edhe dukjen në një nivel të ri, të denjë për Shqipërinë Turistike.

Lungomarja është modeli i vijës ujore të një qyteti turistik bregdetar, tani duhet dhe do të jetë model i dizajnit të jashtëm të një vije shërbimesh.

Prandaj pronarët e menaxherët e vijës së shërbimeve, duhet të heqin vetë tërë barrikadat dhe të bashkëpunojnë me bashkinë e Vlorës e me Agjencinë e Zhvillimit të Territorit për dizajnin e ri, për të cilin do t’i mbështesim me kënaqësi”, shkruan Rama.

LEXONI GJITHASHTU:

• Rama ultimatum bizneseve në Vlorë: Keni 48-orë kohë të lironi Lungomaren
• Rama publikon me foto bizneset: Lironi hapësirat, do përballeni me ndjekje penale

The post “As Parisi nuk i uzurpon trotuaret”, Rama ultimatum të ri bizneseve në Lungomare appeared first on Euronews Albania.

Presidenti Donald Trump ka shpallur gjendjen e jashtëzakonshme në Qarkun Kerr të Teksasit, pas përmbytjeve të menjëhershme dhe shkatërruese që kanë shkaktuar të paktën 59 viktima dhe dhjetëra të zhdukur, përfshirë 11 kampistë dhe një këshilltar nga Kampi Mystic.

Deklarata e shpallur nga presidenti aktivizon Agjencinë Federale të Menaxhimit të Emergjencave (FEMA) dhe burime të tjera federale për të mbështetur operacionet e kërkim-shpëtimit dhe përpjekjet për rimëkëmbje.

“Roja Bregdetare dhe ndërhyrësit e parë kanë shpëtuar mbi 850 persona,” deklaroi Trump përmes rrjeteve sociale, duke shtuar se administrata e tij po bashkëpunon ngushtë me autoritetet vendore dhe shtetërore për t’u dhënë ndihmë banorëve të prekur. Mesazhin e tij ai e përmbylli me fjalët: “Zoti i bekoftë familjet dhe Zoti e bekoftë Teksasin!”

Ndërkohë, Sekretarja e Sigurisë Kombëtare, Kristi Noem, ndodhet në Teksas, ku zhvilloi takime me Guvernatorin Greg Abbott dhe autoritete të tjera lokale. “Jemi duke vendosur burime të specializuara federale dhe lutemi për viktimat, familjet dhe ekipet e ndihmës së shpejtë”, deklaroi Noem.

LEXONI GJITHASHTU:

• Përmbytjet në Teksas: 51 të vdekur dhe mbi 850 të shpëtuar
• Numri i viktimave nga përmbytjet në Teksas shkon në 27, përfshirë 9 fëmijë

The post Teksasi në emergjencë pas përmbytjeve, Trump nënshkruan gjendjen e jashtëzakonshme appeared first on Euronews Albania.