Afati kalimtar i transferimeve të janarit po afron me shpejtësi, dhe klubet do të jenë sërish në garë për të forcuar skuadrat për gjysmën e dytë të sezonit.

Në tregun dimëror të vitit 2025 janë shpenzuar 1.2 miliard euro në ligat kryesore evropiane dhe në Championship, shifra më e lartë në shtatë vitet e fundit, ku vetëm Manchester City ka shpenzuar 191 milion euro.

Mohamed Salah (Liverpool)

Në prill, Mohamed Salah u shpërblye me një kontratë të re dyvjeçare pas udhëheqjes së Liverpool drejt titullit të dytë në Ligën Premier. Por, rreth nëntë muaj më vonë, i ashtuquajturi “Mbreti Egjiptian” është përballë një largimi të tensionuar që mund të dëmtojë trashëgiminë e tij në ‘Anfield’.

Salah aktualisht është në Kupën e Kombeve të Afrikës me Egjiptin dhe është rikthyer te golat, por klubet e pasura të Arabisë Saudite e kanë identifikuar ende si objektiv.

Për herë të parë këtë sezon, Salah ka treguar shenja dobësimi, që do të thotë se kjo mund të jetë mundësia e fundit për Liverpool për të kërkuar një tarifë të madhe, pasi fuqia negociuese e fituar nga kontrata e re mund të mos zgjasë pas dimrit.

Conor Gallagher (Atletico Madrid)

Në fund të nëntorit, Sky Sports zbuloi se 16 klube të Ligës Premier kanë shfaqur interes për Conor Gallagher që nga transferimi prej 33 milionë eurosh nga Chelsea te Atletico Madrid në gusht 2024, duke treguar vlerësimin e tij të lartë në Angli.

The Guardian raporton se Manchester United po e monitoron gjithashtu Gallagher me synim një huazim në janar, por Atletico preferon një shitje të përhershme dhe dëshiron të rikuperojë investimin fillestar, gjë që mund të hapë mundësi për Tottenham dhe Leeds.

Marc-Andre Ter Stegen (Barcelona)

Marc-Andre ter Stegen u rikthye në fushë për Barcelonën pas tre muajsh mungesë në fitore ndaj Guadalajara në Kupën e Mbretit, pasi u rikuperua plotësisht nga operacioni në shpinë.

Megjithatë, trajneri Hansi Flick bëri të qartë se kjo ishte vetëm një rast i veçantë. Joan Garcia dhe Ëojciech Szczesny janë tani portierët kryesorë në ‘Camp Nou’, ndërsa Ter Stegen iu hoq përkohësisht shiriti i kapitenit në gusht pas refuzimit për të ndarë të dhënat mjekësore me La Liga, çka do të kishte liruar 50% të pagës së tij për regjistrim.

Sipas Mundo Deportivo, nuk duket të ketë rrugë kthimi, me klube nga Turqia dhe Arabia Saudite që mund të ofrojnë një rrugëdalje për Ter Stegen..

Kenan Yildiz (Juventus)

Juventus rrezikon të humbasë asetet e saj më të çmuara. Kenan Yildiz ka kontratë deri në 2029, por ndihet se paga aktuale nuk reflekton rëndësinë e tij në skuadër dhe ka kërkuar një zgjatje që do ta vendoste ndër pagat më të larta të klubit, sipas Tuttosport.

Derisa negociatat për rinovimin nuk kanë pasur përparim, Arsenal raportohet se ka kontaktuar agjentin e Yildiz, Jorge Mendes, për të diskutuar disponueshmërinë e tij.

Ruben Neves (Al-Hilal)

The Times raporton se Ruben Neves po kërkon një rikthim në Ligën Premier pas dy e gjysmë vitesh në Arabinë Saudite me Al-Hilal, të cilët nuk kanë arritur ta bindin ish-yllin e Ëolves të nënshkruajë një zgjatje kontrate.

‘Old Trafford’ është përmendur si “destinacioni i dukshëm” për Neves, për shkak të vështirësive të vazhdueshme të Manchester United në mesfushë, ku skuadra e Amorim ende nuk ka një specialist që mund të kontrollojë ritmin e ndeshjeve.

Antoine Semenyo (Bournemouth)

A ka ndonjë sulmues krahu më të mirë në Ligën Premier aktualisht se Antoine Semenyo? Sipas statistikave dhe vlerësimit vizual, përgjigjja është jo.

Liverpool, Chelsea, Manchester United dhe Tottenham kanë shfaqur nivele të ndryshme interesi për Semenyo para afatit të janarit, kur do të hyjë në fuqi klauzola e tij e lirimit prej 65 milionë eurosh.

Megjithatë, edhe pse Semenyo duket si zëvendësues i përsosur për Salah te Liverpool, konsensusi i zakonshëm tani është se Manchester City po udhëheq garën për nënshkrimin e sulmuesit nga Gana, i cili raportohet se dëshiron të vendosë të ardhmen e tij sa më shpejt të jetë e mundur.

Nico Schlotterbeck (Borussia Dortmund)

Nico Schlotterbeck është një futbollist shumë i kërkuar. Raportohet se Barcelona dhe Real Madrid e kanë ndjekur yllin e Borussia Dortmund për muaj me radhë, ndërsa BILD ka shkruar se Bayern Munich po planifikon të përpiqet ta transferojë mbrojtësin nga rivalët e tyre në Bundesliga, duke e parë atë si një alternativë strategjike për Dayot Upamecano, i cili së shpejti do të jetë lojtar i lirë.

Liverpool gjithashtu raportohet se ka shfaqur interes për 26-vjeçarin gjerman, i cili ka kontratë deri në vitin 2027.

Marc Guehi (Crystal Palace)

Marc Guehi ishte shumë pranë një transferimi prej 35 milionë eurosh te Liverpool verën e kaluar, aq sa kishte xhiruar edhe një video zyrtare për njoftimin, por Crystal Palace e bllokoi marrëveshjen pak para afatit.

‘Të Kuqtë’ mbeten admirues të mëdhenj të tij, por konkurrenca për Guehi është rritur ndjeshëm muajt e fundit, me Daily Mail që raporton se Man City, Bayern Munich dhe Atletico Madrid janë të gjithë të etur për të siguruar nënshkrimin e tij në vitin 2026.

Elliot Anderson (Nottingham Forest)

Mesfushorët defensivë nuk janë më të lirë, të paktën jo në Ligën Premier. Enzo Fernandez, Declan Rice dhe Moises Caicedo kanë kushtuar të gjitha më shumë se 100 milionë euro dhe ylli i Nottingham Forest, Elliot Anderson, mund të jetë i radhës.

Sipas gazetarit të Sky Sports, Florian Pletterberg, ky është çmimi minimal i kërkuar nga Forest për mesfushorin anglez, ndërsa klubi është bërë i vetëdijshëm për interes “konkret” nga Manchester United.

Karim Adeyemi (Borussia Dortmund)

Sipas BILD, Karim Adeyemi i ka bërë me dije drejtuesve të Borussia Dortmund se dëshiron të largohet, me të dashurën e tij që thuhet se po nxit një jetë të re në një qytet të madh evropian.

Sulmuesi gjerman ka ndryshuar agjent dhe ka nisur përpjekjet për një transferim në janar, dhe nuk do të ketë mungesë ofertash kur hapet afati i transferimeve.

Interi është lidhur me një transferim të mundshëm të Adeyemit, ndërsa The Mirror raporton se Manchester United dhe Arsenal janë gati të nisin garën për shërbimet e tij./Telegrafi/

Dritan Demiraj, në A2CNN, u pyet mbi tensione të mundshme në Ballkan gjatë vitit që sapo ka nisur.

Eksperti i sigurisë është i bindur që “Ballkani nuk po hyn në një fazë të re pasigurie”, pasi është nën mbështetjen “politike, ushtarake dhe diplomatike të Shteteve të Bashkuara të Amerikës”.

"Ballkani nuk po hyn në një fazë të re pasigurie. Më lejoni të risjell në vëmendjen tuaj atë që në fakt unë e kam deklaruar dhe më përpara, ligjin për Autorizimin e Mbrojtjes Kombëtare dhe Strategjinë e Sigurisë Kombëtare. Dy dokumenta strategjikë të firmosur kohët e fundit në Shtetet e Bashkuara të Amerikës dhe kur them kohët e fundit, në muajin dhjetor. Të dyja paraqesin rëndësinë e madhe të Ballkanit Perëndimor, në mënyrë të veçantë duke përcaktuar Shqipërinë, Kroacinë, Malin e Zi, Maqedoninë e Veriut dhe Kosovën si vende tashmë të afirmuara në rendin e ri global si pjesë e aksit të Perëndimit dhe nën mbikëqyrjen dhe modernizimin, nën mbështetjen politike, ushtarake dhe diplomatike të Shteteve të Bashkuara të Amerikës”, tha Demiraj.

Sipas tij, “pa diskutim që ka problematika të operacioneve hibride” në Ballkan, por shtoi se “angazhimi i madh amerikan nuk do të lejojë operacionet dhe ndikimet malinje të Serbisë për të krijuar destabilitet”.

“Për sa kohë që shërbimet inteligjente ruse, FSB-ja, GRU-ja janë prezente gjatë gjithë kohës në territorin e Serbisë, bashkëpunojmë me qeverinë e saj, me Ministrinë e saj të Mbrojtjes, me shërbimet inteligjente BIA, edhe në Bosnjën serbe do të ketë operacione të asaj që njihen si operacione të intensitetit të ulët, operacione propagandistike, të dezinformimit, pra pjesë të luftës hibride. Por, tendenca e këtyre për shkak të angazhimit të madh amerikan duke e përcaktuar si domejnin e saj territorin e këtyre shteteve që sapo thashë, nuk do të lejojë operacionet dhe ndikimet malinje të Serbisë për të krijuar destabilitet”, theksoi Demiraj.

IMDb ka publikuar listën vjetore të aktorëve më të popullarizuar, e bazuar në interesin e mbi 250 milionë vizitorëve mujorë.

Lista përmbledh një miks të aktorëve të rinj dhe atyre të vjetër, të cilët kanë tërhequr vëmendjen e publikut përmes projekteve të tyre filmike dhe televizive.

Ky vit ka qenë i pasur me role të larmishme, nga super-heronjtë dhe dramë psikologjike, tek serialet televizive me audiencë globale.

Shumë prej aktorëve në listë janë përfshirë edhe në projekte ndërkombëtare dhe kanë mbajtur interesin e fansave për muaj të tërë.

Lista pasqyron gjithashtu kombinimin mes sukseseve komerciale dhe popullaritetit në rrjetet sociale, duke treguar se cilët emra janë më të ndjekur dhe më të kërkuar nga publiku global.

10. Vanessa Kirby

Vanessa Kirby

Vanessa Kirby këtë vit ka kombinuar suksesin në ekran me përvojën e saj personale si nënë.

Në "The Fantastic Four: First Steps", roli i saj si Sue Storm e solli në situata emocionale komplekse, ndërsa publiku ndoqi edhe jetën e saj personale gjatë shtatzënisë.

Ky kombinim i jetës reale dhe rolit në ekran e mbajti të lartë në 'STARmeter' gjatë gjithë verës dhe vjeshtës.

9. David Corenswet

David Corenswet

David Corenswet solli fytyrën e re të Superman-it në universin e DC, duke tërhequr vëmendjen globale që nga publikimi i trailer-it.

Ai u konfirmua si një ikonë ndërkombëtare e super-heroizmit, duke ruajtur vendin e tij në top 10 falë interpretimit dhe mbështetjes së fansave jashtë ShBA-së.

8. Walton Goggins

Walton Goggins

Walton Goggins është shndërruar nga aktor televiziv në një yll të njohur ndërkombëtarisht.

U bë i njohur për rolet në "Fallout" dhe "The Righteous Gemstones", ndërsa performanca e tij në sezonin e tretë të "The White Lotus" e bëri të pëlqyer edhe nga një publik më i gjerë.

7. Sydney Chandler

Sydney Chandler

Sydney Chandler bëri një hap të madh me rolin e saj si Wendy në serinë "Alien: Earth".

Roli i saj si robot me vetëdije njerëzore e vuri në qendër të vëmendjes, duke e konfirmuar si një talent të pavarur dhe duke siguruar projekte të ardhshme si 'Coercion' dhe 'Anima'.

6. Britt Lower

Britt Lower

Pas një pauze prej tre vjetësh nga seria Severance, Britt Lower riktheu publikun në ekran me rolin e saj Helly R.

Interpretimi i saj kompleks mbajti aktoren për pesë javë në top 10 dhe një javë në vendin e parë, duke e bërë një nga figurat më të ndjekura të vitit.

5. Sydney Sweeney

Sydney Sweeney

Sydney Sweeney vazhdon të mbajë interesin e publikut pavarësisht disa projekteve që nuk patën sukses të madh në 'box office'.

Angazhimi i saj në SNL dhe projekti i ardhshëm "The Housemaid" kanë rindezur bazën e fansave, ndërsa sezoni i tretë i "Euphoria" pritet në 2026.

4. Tom Cruise

Tom Cruise

Tom Cruise mbetet një nga figurat më të ndjekura të kinemasë, pavarësisht se "Mission: Impossible - The Final Reckoning" nuk ishte hiti më i madh.

Romanca e tij me Ana de Armas dhe projektet e ardhshme, përfshirë komedinë "Digger", mbajnë interesin e publikut të lartë.

3. Matthew Goode

Matthew Goode

Matthew Goode u rikthye fuqishëm me hitin procedural të Netflix "Dept. Q", duke arritur vendet e para në 'STARmeter'.

Ky sukses e ka vënë përsëri në fokusin e studimeve dhe platformave të 'streaming'-ut, duke e rikthyer si një nga aktorët më të kërkuar.

2. Aimee Lou Wood

Aimee Lou Wood

Aimee Lou Wood u bë shumë e njohur me sezonin e tretë të The White Lotus, ku interpretoi Chelsea-n.

Performanca e saj e veçantë dhe kontrasti me personazhet e tjera e mbajti aktoren dy javë në krye dhe 12 javë në top 100, duke rritur interesin për karrierën e saj.

1. Isabela Merced

Isabela Merced

Në krye të listës është Isabela Merced, e njohur për rolet në "The Last of Us" dhe universin DC.

Si Dina dhe Kendra Saunders, ajo fitoi zemrat e publikut, ndërsa projektet e ardhshme përfshijnë "Man of Tomorrow", "Psyche" dhe sezonin tjetër të "The Last of Us", duke e bërë aktoren më të kërkuar të vitit 2025. /Telegrafi/

Një zjarr i përmasave të mëdha shpërtheu gjatë natës së Vitit të Ri në barin Le Constellation, duke marrë jetën e të paktën 40 personave dhe duke plagosur mbi 115 të tjerë.

Ngjarja ka tronditur kantonin Valais dhe komunitetin ndërkombëtar që frekuenton këtë resort të njohur për ski dhe golf, raporton skynews.

Komandanti i policisë së kantonit Valais, Frederic Gisler, konfirmoi numrin e të vdekurve dhe tha se identifikimi i viktimave mund të marrë disa ditë.

Mes të vdekurve dhe të plagosurve janë dy shtetas francezë dhe një duzinë italianë, ndërsa 15 italianë të tjerë rezultojnë të zhdukur.

Shumë të rinj ishin në bar kur shpërtheu zjarri, sipas Stephane Ganzer, kreut të sigurisë në kanton, transmeton Telegrafi.

Spitali rajonal u mbingarkua nga të plagosurit, duke tejkaluar kapacitetet e njësisë së kujdesit intensiv dhe sallës së operacionit, sipas Mathias Reynard, kreut të qeverisë rajonale.

Pamjet e reja tregojnë fillimin e zjarrit në barin e mbushur me njerëz në resortin e skijimit në Zvicër

Shkaku i zjarrit nuk është konfirmuar zyrtarisht, por kanë dalë dy teori: Ambasadori italian në Zvicër tha se dikush hapi një fishekzjarr brenda lokalit, duke ndezur tavanin, ndërsa dy dëshmitarë raportuan se një barman ngriti një tjetër mbi shpatulla, i cili mbante një qiri në një shishe. Zjarri shkaktoi shpërthime, ndoshta për shkak të gazrave djegës që u ndezën në mënyrë të dhunshme, sipas autoriteteve.

Një turmë njerëzish u përpoq me panik të shpëtonte nga bodrumi përmes një shkalle të ngushtë dhe një dere të vogël, ndërsa të tjerët thyen dritaret për t’u shpëtuar, tha Reynard.

Prokurorja e kantonit Valais, Beatrice Pilloud, përjashtoi çdo skenar sulmi terrorist. Nuk ka të dyshuar dhe askush nuk është arrestuar, tha Ganzer, duke e cilësuar ngjarjen si një “aksident”.

Për të menaxhuar situatën emergjente, u mobilizuan 13 helikopterë, 42 ambulanca, 150 paramedikë dhe 70 zjarrfikës.

Autoritetet vazhdojnë hetimet për të sqaruar shkaqet e sakta të kësaj tragjedie që ka lënë gjurmë të thella në komunitetin lokal dhe ndërkombëtar.

Ndryshe, flamujt zviceran do të qëndrojnë në gjysmështizë për pesë ditë në nderim të viktimave. /Telegrafi/

Prishtina këtë Vit të Ri mirëpriti edhe shumë mysafirë të huaj, të cilët për herë të parë zgjodhën Kosovën për të festuar ndërrimin e moteve.

Temperaturat e ulëta, që zbritën deri në -11 gradë Celsius, nuk i ndalën as vendasit e as turistët. Me pije, vallëzim dhe muzikë, festa në sheshin e kryeqytetit vazhdoi deri në orët e vona.

Edhe pse shumë prej tyre nuk e kuptonin gjuhën e këngëve, ritmi i muzikës i bashkoi të gjithë, duke krijuar një atmosferë festive dhe energjike.

“Urime Vitin e Ri! Uroj që ky vit t’ua plotësojë shqiptarëve të gjitha dëshirat,” u shpreh një qytetar gjatë festës.

Një tjetër pjesëmarrës theksoi se, përveç vendasve, kishte edhe shumë mysafirë që po e zbulonin Kosovën për herë të parë, duke e përshëndetur atmosferën dhe mikpritjen.

“Po kalojmë shumë mirë. Kishim dëshirë të madhe që Vitin e Ri ta presim në Kosovë. Urime!” tha një nga turistët.

Nga Turqia kishin ardhur disa vizitorë, të cilët u shprehën të impresionuar:
“Është hera ime e parë këtu dhe më pëlqen shumë. I uroj gjithë botës sa më shumë paqe.”

Ndërsa një mysafire nga Gjermania tha se, edhe pse kishte qenë më parë në Kosovë, kjo ishte hera e parë që po festonte Vitin e Ri në Prishtinë:
“Kosovës i uroj të gjitha të mirat dhe njerëzve të saj, që janë të mrekullueshëm. Urime Vitin e Ri!”

Në fund të festës, në shesh mbetën vetëm kutitë e fishekzjarrëve, të cilat më herët ndriçuan qiellin e Prishtinës, duke shënuar fillimin e vitit të ri mes gëzimit, muzikës dhe mikpritjes./KlanKosova

- YouTube youtu.be

Në Prishtinë, Hagë, Tiranë, Strasburg e Shkup u ngrit zëri i shqiptarëve për drejtësi.

Shqiptarë nga të gjitha trevat u mblodhën në mbrojtje të ish-krerëve të Ushtrisë Çlirimtare të Kosovës.

Protesta e parë u organizua në Prishtinë nga kategoritë e dala nga lufta. Një muaj më pas, shqiptarë nga e gjithë bota protestuan në qytetin holandez, në Hagë, në afërsi të objektit të Gjykatës Speciale. Atje u protestua një ditë para fillimit të dëgjimit të dëshmitarit të parë të mbrojtjes, ish-ndihmëssekretar i shtetit amerikan, James Rubin.

Diplomati amerikan dëshmoi para trupit gjykues për procesin e Rambujesë, ku ndër tjera ka thënë se Hashim Thaçi nuk kishte rol udhëheqës në Ushtrinë Çlirimtare të Kosovës. Po ashtu, ai ka thënë se UÇK nuk ka pasur strukturë të organizuar komanduese. Dëshmia e tij u vlerësua si një nga më të rëndësishmet në këtë proces.

Edhe në Tiranë, zëri i shqiptarëve jehoi “Drejtësi për Çlirimtarët”.

Organizata e Veteranëve të Luftës së UÇK-së para Asamblesë së Këshillit të Evropës dorëzoi 285 letra, për të shprehur shqetësimin lidhur me procesin në Gjykatën Speciale.

Në fund të vitit, shqiptarët protestuan edhe në Shkup të Maqedonisë së Veriut, me të njëjtën kërkesë për drejtësi.

Gazmend Syla nga Organizata e Veteranëve të Luftës së Ushtrisë Çlirimtare të Kosovës (OVL-UÇK) thotë se gjithë këto protesta kanë pasur për qëllim sensibilizimin e opinionit publik dhe ndërkombëtar për procesin gjyqësor që po zhvillohet në Hagë.

“Pesë protesta, me një buxhet që organizatat e veteranëve të luftës, zero buxhet, do të thotë, prej ardhjes në pushtet të qeverisë Kurti. Me vështirësi të mëdha, kemi arritur me i organizuar këto pesë protesta, qysh e dini edhe ju. Njërën në Kosovë, tjetrën në Den Haag, tjetrën në Tiranë, Strasburg e kështu me radhë, e fundit në Maqedoni. Mendojmë që e kemi ngritë qytetarin, i kemi treguar qytetarit tonë se çka po ndodh atje, sepse duke pasur parasysh faktin se Gjykata Speciale nuk i ka dhënë shumë dritë gjithë procesit atje. Ka qenë tepër e rezervuar me publikun, me shqiptarët, me ato seanca të mbyllura, me ato padrejtësi që ndodhin kohë pas kohe, me gjasë qytetarët nuk kanë mujt me e ditë krejt çka po ndodh atje. Kjo thirrje e jona për qytetarët që me dalë, me u mobilizu e me u sensibilizu për ato që po ndodhin në Gjykatën Speciale, besoj që ka qenë e arritur tepër e madhe edhe besoj që e kemi bërë punën ashtu siç është më së miri, gjithmonë duke pasur parasysh kapacitetet e organizatës së veteranëve të luftës”, deklaron ai.

Syla ka theksuar se paralelisht me protestat, OVL e UÇK-së ka vepruar edhe në rrafshin diplomatik, përmes takimeve me personalitete dhe përfaqësues ndërkombëtarë.

“Neve asnjëherë nuk kërkojmë që të ndërhyjmë në drejtësi, apo të pengojmë drejtësinë, ne kërkojmë vetëm drejtësi. Krejt çka kërkojmë ne është një monitorim i ndonjë instituti të pavarur ndërkombëtar, ose qoftë ndonjë mekanizmi që do të nxirrte Këshilli i Evropës, Asambleja e Këshillit të Evropës, ku edhe e mori dritën jeshile themelimi i Gjykatës Speciale, ose qoftë çfarëdo mekanizmi qoftë ai i pavarur. Vetëm monitorim të punës së Gjykatës Speciale, çfarë ka ndodhur prej atëherë deri më sot. Nëse do të ndodhë një monitorim i mirëfilltë i kësaj gjykate, i punës së gjykatës deri në këto kohë pra, deri në përfundim të procesit, ne jemi të bindur që bashkëluftëtarët tanë do të kthehen të pafajshëm në shtëpitë e tyre. Prandaj, në qoftë se nuk do të ketë monitorim të punës të asaj çka ka ndodhur deri më sot në Gjykatën Speciale, i druhem faktit që do të kemi vendim negativ ose do t'i përcjellë fati edhe bashkëluftëtarët tanë që janë në proces, do t'i përcjellë fati i dy bashkëluftëtarëve tonë që janë veç të dënuar atje”, shton ai.

Në dy prej këtyre organizimeve ishte e pranishme edhe Nevenka Tromp, e cila punoi për shumë vjet në Tribunalin e Hagës për ish-Jugosllavi, ishte prezente në dy prej pesë organizimeve. Ajo për KosovaPress thotë se nuk është e zakonshme që qytetarët të interesohen për çështje penale.

“Nuk është shumë e zakonshme që njerëzit të interesohen për çështje penale, sigurisht jo në numra të mëdhenj. Nëse do të flisnim për protesta, nuk do të isha dakord me këtë përkufizim; këto ishin ngjarje publike për të rritur ndërgjegjësimin mbi atë që po ndodhte në Hagë dhe në gjykatë përmes këtyre proceseve. Një nga arsyet pse pranova me kënaqësi ftesat në gusht dhe tetor të kaluar ishte se njerëzit nga Kosova erdhën për të shprehur shqetësimin e tyre mbi funksionimin e Dhomave Speciale të Kosovës dhe ndikimin që mund të kenë mbi të akuzuarit, por edhe mbi Kosovën dhe luftën e saj për çlirim. Kurdo që një gjyq penal, veçanërisht për krime politike dhe mizori masive, ka elemente që shpesh neglizhohen publikisht, duhet të merret parasysh interesi publik i gjyqit që po vjen. Pra, çfarë është interesi publik? Për shembull, nëse akuzon dhe gjykon presidentin aktual të një shteti, a kontribuon ky veprim për drejtësinë dhe stabilitetin, apo ky veprim vetë mund të çojë në trazira publike, dhunë në rrugë dhe destabilizim më shumë sesa do të ndodhte nëse lihej pas dore. Ky interes publik është gjithashtu arsye pse disa njerëz shumë të lartë nuk u akuzuan për gjithë periudhën e konflikteve në Jugosllavi nga 1991 deri në 1999. Ky interes publik është mjaft i rëndësishëm”, deklaron ajo.

Fatmir Koci, i cili ka qenë përfaqësues i Këshillit të Protestës për Evropë pret se gjatë këtij viti të lirohen ish-krerët e UÇK-së.

“Një vendim të drejtë, të paanshëm, jo-politik dhe po besojmë shumë në pafajësinë e krerëve të UÇK-së dhe në pastërtinë e luftës tonë, dhe shpresojmë dhe presim që liderët tanë sa më shpejt të kthehen pranë familjeve të tyre në shtetin e tyre, ku shumë sakrifikuan si në luftën për çlirimin e Kosovës, po ashtu edhe në shtet-ndërtimin e Republikës së Kosovës...E vetmja mundësi e jona si OVL e UÇK-së ka qenë kjo, sepse ne faktikisht jemi duke i parë çdo ditë politika ditore ku, e them fatkeqësisht, shteti i Kosovës, Qeveria e Kosovës, institucionet e Kosovës janë marrë shumë pak ose hiç me rreth kësaj çështje, edhe përkundër asaj që deklarojnë që kemi dhënë fonde të mjaftueshme për gjykatën”, përfundon ai.

Rasti ndaj ish-krerëve të UÇK-së – Hashim Thaçit, Kadri Veselit, Rexhep Selimit e Jakup Krasniqit pritet të përfundojë gjatë këtij viti.

Katërshja e UÇK-së ndodhet në paraburgim që nga nëntori i vitit 2020.

Në prill të vitit 2023 ka nisur procesi gjyqësor në Hagë ndaj ish-krerëve të UÇK-së.

Zyra e Prokurorit të Specializuar, e cila i ngarkon ish-krerët e Ushtrisë Çlirimtare të Kosovës me përgjegjësi për krime të pretenduara të luftës, pati sjell në gjykatore rreth 125 dëshmitarë, ndërkaq është mbështetur në mbi 100 dëshmi me shkrim.

Më datë 01.01.2026, Njësiti i Hetimeve i Stacionit Policor në Ferizaj ka pranuar informatë se një person kishte publikuar në rrjete sociale një video-incizim duke shtënë me armë zjarri.

Pas një pune intensive hetimore në terren, policia ka identifikuar të dyshuarin T. I. (31 vjeç). I njëjti më pas ka dorëzuar armën e zjarrit, me të cilën dyshohet se kishte shtënë.

I dyshuari është intervistuar në prani të avokatit mbrojtës, ndërsa me urdhër të prokurorit kompetent është liruar në procedurë të rregullt.

Ndaj tij është iniciuar rast penal për veprat:

“Mbajtje në pronësi, kontroll ose posedim i paautorizuar i armëve”, dhe “Përdorim i armës apo mjetit të rrezikshëm”.

Hetimet lidhur me rastin po vazhdojnë.

Viti 2025 shënoi një kapitull të ri dhe transformues në jetën e këngëtarit nga Peja, Gjesti.

Nga pjesëmarrës i Big Brother VIP Kosova 3 deri te fituesi i Big Brother VIP Albania 4, ai përjetoi famë të papritur, suksese muzikore dhe një tragjedi që do ta shënjonte përgjithmonë rrugëtimin e tij.

Ai nisi vitin si pjesëmarrës i Big Brother VIP Kosova 3, ku tregoi karakterin e tij, fëmijërinë e vështirë, përpjekjet për t’u bërë pjesë e skenës muzikore dhe sfidat personale që e shoqëruan gjatë rritjes.

GjestiFoto: YouTube

Ky format ishte një mundësi për t’u shfaqur përpara publikut dhe për të treguar jo vetëm talentin, por edhe karakterin e tij të fortë.

Pas eliminimit nga Big Brother Kosova, Gjesti nuk humbi kohë dhe u ftua të merrte pjesë në atë të Shqipërisë.

Ky kalim i menjëhershëm nga Kosova në Shqipëri shënoi një pikë kthese në karrierën e tij: nga një artist i njohur vetëm në Kosovë, ai u bë një figurë publike e dashur dhe e ndjekur në gjithë trojet shqiptare.

Në prill të 2025, pas një rrugëtimi të gjatë dhe sfidues, Gjesti u shpall fitues i Big Brother VIP Albania 4.

Foto: YouTube

Ky triumf jo vetëm i solli famë të madhe, por edhe një ndryshim rrënjësor në jetën e tij dhe karrierën muzikore.

Fama e papritur i dha mundësinë të shndërrohej në një figurë të njohur publikisht, të ftohej nëpër intervista, evente televizive dhe të kishte një audiencë të gjerë fansash që ndiqnin çdo lëvizje të tij.

- YouTube www.youtube.com

Pas daljes nga Big Brother, Gjesti u fokusua tek muzika.

Në fund të muajit maj solli këngën e re “Veshu Ndrequ”, njëherësh të fundit për 2025.

- YouTube www.youtube.com

Verën e 2025, ai ishte i angazhuar me koncerte dhe performanca të shumta, duke shfrytëzuar famën e fituar për të ndërtuar një karrierë muzikore më të qëndrueshme dhe të njohur.

Por ndërsa jeta profesionale shkëlqente, ajo personale solli një goditje tragjike.

Eldioni dhe Gjesti

Në shtator të 2025, Gjesti humbi vëllanë e tij, Eldionin, vetëm 15 vjeç, në një aksident me motoçikletë.

Kjo humbje dramatike erdhi vetëm disa muaj pas famës së madhe dhe suksesit muzikor, duke e përballur reperin me dhimbje të thellë dhe sfida emocionale të papërshkrueshme.

GjestiFoto: Instagram

Besart Kelmendi (emri i vërtetë) pas disa muajsh bëri rikthimin në Instagram, konkretisht pak para Vitit të Ri.

Njoftoi mes tjerash se në 2026 vazhdon me muzikë, botës ku edhe i përket.

Edhe pse ka kaluar periudha të vështira dhe nuk ka qenë aktiv për një kohë, shpresojmë se kjo do të jetë vetëm një ndalesë e përkohshme dhe se ai do t’i kthehet ëndrrave dhe muzikës që e kanë shoqëruar gjithmonë. /Telegrafi/

GjestiFoto: Instagram

LeBron James festoi të martën (30 dhjetor) 41-vjetorin e lindjes dhe kjo mund të ishte dita e fundit që e kalon si lojtar aktiv i NBA-së.

Ylli i Los Angeles Lakers është shembulli më i jashtëzakonshëm i qëndrueshmërisë dhe vazhdimësisë në historinë e ligës, duke luajtur sezonin e 23-të të tij në elitën e basketbollit amerikan.

Këto janë 23 faktet që e përshkruajnë këtë karrierë epike:

1. Lojtari i parë që luan 23 sezone në NBA, debutoi në 2003 me Cleveland Cavaliers (11 vjet në dy periudha) dhe ka luajtur gjithashtu për Miami Heat (4 vjet) dhe Los Angeles Lakers (8 vjet).

2. Debutimi i tij në NBA ishte 8,099 ditë më parë, më 29 tetor 2003.

3. Më 21 dhjetor 2006, ditën kur lindi Cooper Flagg, lojtari më i ri aktual në NBA, LeBron kishte luajtur tashmë ndeshjen e tij të 263-të.

4. Ai është i vetmi lojtar aktiv nga klasa e draftit 2003, nga klasat e mëvonshme, vetëm Chris Paul (2005) dhe Kyle Lowry (2006) janë ende aktivë.

5. Në moshën 41-vjeçare, ai është lojtar i 12-të më i vjetër në historinë e NBA-së, larg rekordeve të Nat Hickey, që luajti deri në moshën 46-vjeçare në 1948.

6. LeBron është më i vjetër se pesë trajnerë aktual të NBA-së: Joe Mazzulla (37), Will Hardy (37), Mitch Johnson (39), Mark Daigneault (40) dhe Jordan Ott (40), trajneri i tij, JJ Redick, është vetëm gjashtë muaj më i madh dhe debutoi në NBA pas LeBronit, por u tërhoq para tij.

7. Ai ka bashkëpunuar me 82 lojtarë që nuk ishin lindur kur ai debutoi në NBA.

8. Ka luajtur me babë-djalë: Glenn Robinson I dhe II, Ricky dhe Jalen Brunson, Gary Trent dhe Gary Trent Jr, Kenyon dhe KJ Martin, Gary Payton dhe Gary Payton II, Adrian dhe AJ Griffin, Jabari Smith dhe Jabari Smith Jr, Samaki dhe Jabari Walker, Juwan dhe Jett Howard, Dale dhe Trayce Jackson-Davis.

9. Ka përballuar 1,799 kundërshtarë, që përbëjnë 36.43% të të gjithë lojtarëve në histori të NBA-së.

10. Lojtari i parë që luan në NBA me të birin, në tetor 2024, LeBron dhe Bronny James u bënë çifti i parë baba-djalë që luan në të njëjtën skuadër.

11. Lojtari më i ri dhe më i vjetër që shënon 40 pikë në një ndeshje. Rekordi i moshës së re iu mor nga Cooper Flagg. LeBron e arriti këtë në 19 vjet e 88 ditë dhe rekordi si veteran në 40 vjet e 52 ditë. Ai është gjithashtu lojtari i vetëm me dy ndeshje 40-pikëshe pas moshës 40-vjeçare.

12. Lojtari me më shumë ndeshje të rregullta, me 1,576 ndeshje, dhe pritet të kalojë rekordmenin Robert Parish me 1,611 ndeshje.

13. Ka luajtur 59,502 minuta, më shumë se çdo lojtar tjetër, ekuivalent me 991.7 orë ose 41.3 ditë në fushë.

14. Në të gjitha 22 sezonet e tij, ka arritur mesatarisht mbi 20 pikë për ndeshje; aktualisht, me mesataren më të ulët të karrierës, është në 20.5 pikë.

15. Lojtari më i mirë në histori mbi 40 vjeç, me mesatare 23.9 pikë, 7.0 kërcime dhe 7.5 asistime që nga mosha 40.

16. 21 herë All-Star, rekord i jashtëzakonshëm. Nuk u zgjodh për All-Star-in e parë në 2004.

17. Golin më të lartë në histori të NBA-së. LeBron është i vetmi lojtar që ka kaluar shifrën e 40,000 pikëve në sezonin e rregullt, aktualisht me 42,471 pikë, duke kaluar rekordmenin Kareem Abdul-Jabbar (38,387) në shkurt 2023.

18. Anëtar i NBA First Team në 13 raste, duke përfshirë tre dekada të ndryshme (debutimi 2006, hera e fundit 2020).

19. Lojtari i dytë më i vjetër që regjistron ‘triple-double’. Karl Malone e arriti këtë në 40 vjet e 127 ditë, ndërsa LeBron në 40 vjet e 23 ditë me 21+10+13.

20. 1,297 ndeshje radhazi me të paktën 10 pikë, një rekord që sapo u mbyll.

21. Ka luajtur 292 ndeshje play-off, më shumë se çdo lojtar tjetër në histori.

22. Lojtari me më shumë pikë në seritë finale për titull, me 8,289 pikë, 2,302 më shumë se Michael Jordan.

23. Ka luajtur 55 ndeshje në Finalet e NBA-së, duke u renditur i katërti në histori pas Bill Russell (70), Sam Jones dhe Kareem Abdul-Jabbar.

LeBron James nuk është vetëm një ikonë e basketbollit, ai është një shembull i jashtëzakonshëm i qëndrueshmërisë, disiplinës dhe pasionit, duke lënë gjurmë që do të mbeten për breza të tërë në historinë e NBA-së. /Telegrafi/

Temperaturat e ulëta që kanë zbritur deri në –2°C në qytetin e Vlorës, në datën 1 janar, nuk i kanë ndalur vëlla e motër, Gezim Brahimaj (57 vjeç) dhe Shpresa Tafili (60 vjeç), të cilët e konsiderojnë ujin e detit si një lloj terapie kundër sëmundjeve siç shprehen vetë.

Edhe në këto ditë të ftohta dimri, ata kanë sfiduar jo vetëm temperaturat e ulëta të ajrit, por edhe ujin e ftohtë të detit, duke u futur për not në zonën bregdetare të Vlorës. Sipas tyre, deti është pjesë e pandarë e jetës së tyre.

Gëzimi u shpreh se ata nuk janë ndarë kurrë nga deti, as gjatë verës dhe as gjatë dimrit, madje as në ditë me temperatura ekstreme si kjo e sotmja.

Si gëzimi edhe Shpresa me këtë rast, kanë përcjellë edhe një urim për të gjithë shqiptarët, kudo që ndodhen, duke i uruar:
Gëzuar Vitin e Ri 2026, një vit të mbarë e të begatë dhe, mbi të gjitha, plot shëndet për të gjithë./Top Channel

- YouTube youtu.be

Nuk lejohet që shpejtësia e treguar nga shpejtësio-matësi të jetë më e ulët se shpejtësia reale - për shembull, nëse po vozitni 80 km/h, shpejtësia e shfaqur në panel nuk mund të jetë 78 km/h.

Me sa duket, shumica prej nesh e dinë që shpejtësio-matësi në automjete nuk janë pajisje shumë precize. Ka disa arsye për këtë, dhe një nga më të rëndësishmet është se shpejtësia e automjetit zakonisht matet nga shpejtësia e rrotullimit të rrotave.

Gomat shpesh ndryshojnë dimensionet me kalimin e kohës - për shkak të ndryshimeve të madhësisë, konsumimit apo ndryshimeve të tjera - dhe diametri i tyre nuk është gjithmonë i saktë. Për këtë arsye, prodhuesit programojnë një margjinë gabimi, por ajo duhet gjithmonë të bëjë që shpejtësio-matësi të tregojë një vlerë më të madhe sesa shpejtësia reale.

Për shembull, nëse vozitni 70 km/h, shpejtësio-matësi mund të shfaqë 75 km/h. Ai nuk do të shfaqë asnjëherë 68 apo 65 km/h. Kjo u lejon prodhuesve të mbrohen nga mundësitë e padive pas aksidenteve - por ekziston edhe një rregullore që e përcakton këtë saktësisht.

Komisioni Ekonomik i Kombeve të Bashkuara për Evropën (UNECE) ka vendosur që gjatë testimeve zyrtare, shpejtësio-matësit në automjete të lejohen të shfaqin maksimumi 10 % + 4 km/h më shumë sesa shpejtësia reale. Kjo do të thotë se në testim, nëse automjeti po lëviz me 80 km/h, shpejtësio-matësi mund të shfaqë deri në 92 km/h. Çdo gjë mbi këtë nuk është e lejueshme.

Pasi automjeti të certifikohet dhe përdoret në kushte normale të trafikut, zbatohet rregulla e re: për automjete, autobusa, kamionë dhe mjete të tjera tregtare, toleranca është 10 për qind + 6 km/h, ndërsa për motoçikleta dhe mjete me tre rrota që lëvizin mbi 50 km/h, është 10 % + 8 km/h.

Një studim ka shkruar për gabimet që gjenden në disa shpejtësio-matës të automjeteve, dhe përmendet se disa modele (p.sh. Dacia Duster dCi, Mazda MX‑5 2,0, BMW 330i M Sport, Shkoda Kodiaq 2,0 TDI dhe Seat Arona 1,0 TSI) treguan rreth 83 km/h në shpejtësio-matësi kur automjeti po lëvizte me 80 km/h. /Telegrafi/

Profeti vetëshpallur nga Gana, Evans Eshun, i njohur gjerësisht si Ebo Noah, është arrestuar nga Shërbimi Policor i Ganës, pas përhapjes së profecive të tij që tërhoqën vëmendjen e masave dhe medieve.

Ebo Noah kishte fituar famë në internet dhe mediat sociale për parashikimin e tij të një përmbytjeje globale që, sipas tij, do të fillonte më 25 dhjetor.

Ai gjithashtu kishte nisur ndërtimin e “arkave” të mëdha, të destinuara për të strehuar besimtarët e tij gjatë kësaj katastrofe që pritej. Shumë qytetarë dhe ndjekës e morën seriozisht paralajmërimin, duke shkaktuar shqetësim dhe konfuzion në disa komunitete.

Shumë afrikanë po udhëtojnë për të hipur në "Arkën e Noas" - 'profeti' mobilizon besimtarët për një përmbytje biblike

Megjithatë, profecia e Ebo Noah nuk u realizua, dhe ngjarjet që ai kishte parashikuar nuk ndodhën.

Autoritetet policore të Ganës e arrestuan për hetime, duke e akuzuar për shpërndarje të informacionit të rremë dhe shkaktim paniku tek publiku.

Arrestimi i tij vjen pas një periudhe tensioni dhe debatesh mbi ndikimin e profecive të rreme në shoqëri, duke ngjallur diskutime mbi kufijtë e lirisë së fjalës dhe përgjegjësinë për shpërndarjen e lajmeve të rreme.

Në rrjetet sociale, lajmi për arrestimin e Ebo Noah ka shkaktuar reagime të ndryshme, disa duke e mbrojtur dhe disa të tjerë duke e kritikuar ashpër për veprimet e tij dhe frikësimin e njerëzve me parashikime të pabazuara. /Telegrafi/

— (@)

Më 01.01.2026, në orën 04:55, nëpunës policorë nga SPB Veles e privuan nga liria Z.J. (29) nga Velesi. Në rr. “Dimitar Vllahov” në Veles, ai me një automjet udhëtarësh “Seat” me targa regjistrimi të Velesit, të cilin e drejtonte, është përplasur në një kandelabër metalike. Gjatë ndërmarrjes së masave në lidhje me aksidentin, u konstatua se drejtonte mjetin nën ndikimin e alkoolit, përkatësisht se kishte 1.66 promilë alkool në gjak.

Më 01.01.2026, në orën 00:54, në Tetovë, nëpunës policorë nga SPB Tetovë e privuan nga liria A.Z. (19) nga f. Poroj, rrethina e Tetovës. Më herët, në rr. “Ivo Ribar Llolla” në Tetovë, ai me një automjet udhëtarësh “Volksvagen Golf” me targa regjistrimi të Tetovës, ishte përplasur në një bordurë, ndërsa pas ndërmarrjes së masave, u konstatua se ishte nën ndikimin e alkoolit, përkatësisht se kishte 1.68 promill alkool në gjak. Më pas, në Spitalin Klinik të Tetovës, ai sulmoi fizikisht nëpunës policorë që po kryenin veprime zyrtare.

Më 01.01.2026, në orën 01:50, në Koçan, nëpunës policorë nga NJPB Koçan e privuan nga liria D.Gj. (69) nga Koçani për shkak se drejtonte automjet udhëtarësh ,”Ford” me targa regjistrimi të Shtipit në një rrethrrotullim në drejtim të kundërt dhe vazhdoi të lëvizte në drejtim të kundërt përgjatë rr. “Dimitar Vllahov” në Koçan.

Pas dokumentimit të plotë të rasteve, ndaj tyre do të ngrihen kallëzime sipas nenit 297-a të Kodit Penal – “Drejtim i pakujdesshëm i mjetit motorik”.

Liverpool dhe Leeds United nuk arritën të gjenin rrugën e golit në një përballje që përfundoi 0-0, në një ndeshje ku skuadra e Arne Slot dukej e zbehtë dhe pa ide.

Ky rezultat shënon fundin e një serie pozitive për Liverpool, i cili vinte pas tri fitoreve radhazi në kampionat, por nuk arriti të krijonte raste të pastra gjatë 90 minutave.

Ndeshja nisi me ritëm të moderuar, me pak aksione në portat respektive. Leeds tregoi organizim dhe përkushtim në mbrojtje, ndërsa Liverpool duket se nuk kishte ide të qarta taktike për të kaluar mbrojtjen kundërshtare.

Nga ana tjetër, Leeds provonte të shfrytëzonte çdo hapësirë, por e vetmja mundësi e shënimit që u anulua ishte goli i Dominic Calvert-Lewin, i cili u konsiderua pozitë jashtë loje.

Ky barazim i lë Liverpoolin në pozitën e katërtë me 33 pikë, plot 12 pikë pas Arsenalit lider, ndërsa Leeds ka 21 pikë në vendin e 17-të. /Telegrafi/

Ambasada e Maqedonisë në Bern është në komunikim të vazhdueshëm me institucionet kompetente në Zvicër dhe deri në këtë moment nuk ka informacione për shtetas maqedonas të vdekur apo të lënduar në zjarrin në Crans-Montana, njoftojnë nga Ministria e Punëve të Jashtme (MPJ).

Ambasada po e ndjek me vëmendje situatën dhe është në gatishmëri të plotë për t’u ofruar ndihmën e nevojshme shtetasve të saj.

Po ashtu, nga MPJ bëjnë të ditur se në rrjetet sociale të Ambasadës në Bernë dhe të Ministrisë janë publikuar informacionet e kontaktit për të gjithë ata që kanë nevojë për mbështetje.

Komisioni Qendror i Zgjedhjeve (KQZ), bën të ditur se të premten (nesër) do të nis numërimi i mbi 27 mijë fletëvotimeve nga diaspora, respektivisht të fletëvotimeve nga votimi përmes postës, të cilat janë tërhequr nga dy kutitë postare në jashtë Kosovës.

Zëdhënësi i KQZ-së, Valmir Elezi thekson për Telegrafin se të premten, më 2 janar nga ora 10:00 në Qendrën e Numërimit dhe Rezultateve do të fillojë numërimi i fletëvotimeve nga votimi jashtë Kosovës, respektivisht i fletëvotimeve nga votimi përmes postës që deri më tani janë tërhequr nga dy kutitë postare jashtë Kosovës.

“Nga votimi me postë, siç e kemi treguar më herët, numri i shtetasve të regjistruar ka qenë rreth 58 mijë. Ende nuk është përmbyllur procesi i tërheqjes së fletëvotimeve nga kutitë postare, andaj në këtë fazë nuk e dijmë se sa prej këtyre votuesve të regjistruar kanë ushtruar të drejtën e votës. Tërheqjet e fundit të zarfeve me fletëvotime do të bëhen më 2 dhe 5 janar 2026”, thekson Elezi.

Sipas tij, deri më tani, nga dy kutitë postare, Berlin dhe Bernë, janë tërhequr më shumë se 28 mijë e 500 pako me fletëvotime që i takojnë votimit përmes postës dhe të cilat janë vlerësuar dhe verifikuar nga shërbimi votues i KQZ-së.

“Nga numri i përgjithshëm i pakove me fletëvotime të supozuara që deri më tani kemi pranuar, pra nga më shumë se 28 mijë, pas vlerësimit dhe verifikimit janë aprovuar 27,600, ndërkaq janë refuzuar më shumë se 950. Arsyeja më e shprehur te zaret e refuzuara është sepse në pakon me fletëvotim mungon dëftesa e regjistrimit të votuesit”, tha ai.

Në fund ai tha se nga votimi jashtë Kosovës, respektivisht nga votimi në 29 përfaqësi diplomatike, nga 19,187 shtetasit e regjistruar, kanë votuar 16,165 prej tyre apo 84.24%./Telegrafi/

Viti 2025 ka qenë një vit i paharrueshëm për shoubizin shqiptar, një vit që përmbledh ngjarje të forta, emocione të jashtëzakonshme dhe momente që tronditën publikun.

Estrada shqiptare nuk ka qenë kurrë kaq dinamike, duke lëvizur nga periudha të qeta dhe përgatitjeje deri te skandale të papritura, performanca të mëdha dhe tragjedi personale që kanë lënë gjurmë të thella.

Artistët shqiptarë treguan edhe një herë se jeta e tyre profesionale dhe private janë të ndërlidhura dhe shpesh gjenerojnë lajm, debat dhe polemikë.

Muajt e parë të vitit kaluan në heshtje, duke shërbyer si periudhë përgatitore për sezonin e verës, ku shumica e artistëve punuan pas skenave në projekte të reja muzikore dhe koncerte.

Por qetësia u ndërpre në prill me rikthimin e Feronit Shabanit - Feros në muzikë, pas dy vitesh pauzë për t’u përkushtuar fesë islame.

- YouTube www.youtube.com

Kënga e tij e rikthimit “A pe sheh” solli një mesazh të qartë dhe të diskutueshëm për ish-partneren Arbenita Ismajli, me të cilën ka një vajzë.

Pas kësaj, u hapën përplasje të shumta në rrjetet sociale, ku Fero akuzoi se ish-partnerja i kishte mohuar të drejtën për të parë vajzën, duke theksuar se ndodhej jashtë Kosovës.

Fero dhe Arbenita IsmajliFoto: Norik Uka

Situata u komplikua më tej me lëshimin e një urdhërarresti ndërkombëtar për Arbenitën, për moszbatimin e vendimeve të gjykatës për takimet e vajzës me babanë biologjik.

Kjo ngjarje ngjalli diskutime të gjera në media dhe rrjete sociale, duke u kthyer në një nga temat më të ndjekura të vitit.

Në maj, vëmendja u përqendrua tek Eurovisioni, një nga ngjarjet më të mëdha të muzikës.

Shqipëria u përfaqësua nga grupi Shkodra Elektronike, Beatriçen dhe Kolën me “Zjerrm”, të cilët arritën të renditeshin në vendin e tetë, duke sjellë krenari dhe emocione për publikun shqiptar.

- YouTube www.youtube.com

Fitues i edicionit u shpall Austria, e cila do të organizojë Eurovisionin e vitit 2026.

Vera e 2025 ishte e ngarkuar me projekte muzikore, koncerte dhe festivale.

Gushti shënoi kulmin e sezonit me “Sunny Hill Festival”, ngjarja më e madhe kulturore në vend, ku performuan artistët më të njohur shqiptarë dhe ndërkombëtarë.

Dua Lipa solli një performancë të zjarrtë për fansat në Kosovë, ndërsa Shawn Mendes u prezantua për herë të parë në skenën vendore, duke krijuar atmosferë euforike dhe duke mbledhur mijëra spektatorë.

Festivali u kthye në një pikë qendrore të verës dhe një dëshmi të fuqisë së tregut shqiptar.

Megjithatë, vera nuk solli vetëm kënaqësi dhe muzikë.

Një tragjedi e madhe preku publikun shqiptar: vëllai i Gjestit humbi jetën në një aksident me motoçikletë.

Gjesti me të vëllanë tashmë të ndjerë

Humbja e një djali të ri, vetëm 15-vjeç, ishte një goditje e rëndë për artistin dhe familjen e tij.

Në skenën e polemikave, Mozzik u përfshi në një debat të madh për orën e tij luksoze Richard Mill, të cilën pretendoi se e bleu vetë për ditëlindje.

Ora u bllokua nga Dogana e Kosovës dhe rezultoi se ishte false, duke nxitur spekulime për detyrimet e reperit ndaj ATK-së, të cilat arrinin në rreth 500 mijë euro - gjegjësisht para dy viteve.

Mozzik bëri një reagim duke treguar se e gjitha ishte një lloj inskenimi, e madje duke hedhur akuza për Lëvizjen Vetëvendosje, për shkak të preferencave të tij në politikë.

MozzikFoto: Instagram

Në aspektin e performancave muzikore, Alban Skënderaj vazhdoi të dëshmojë profesionalizmin e tij duke mbajtur katër netë koncert me projektin “Motiv”, gjersa mblodhi rreth 20 mijë spektatorë në Prishtinë.

Dafina Zeqiri gjithashtu përmbylli vitin me dy netë koncert “Supernova”, më 25 dhe 26 dhjetor.

Viti 2025 shënoi edhe humbje të rëndësishme në skenën kulturore shqiptare.

Aktori i madh Enver Petrovci, këngëtari Shpat Kasapi dhe Shemsi Krasniqi – Shemi, u ndanë nga jeta, duke lënë pas veprimtari që kanë lënë gjurmë të thella në artin dhe kulturën shqiptare.

Humbjet e tyre tronditën publikun dhe mediat, duke rikujtuar rëndësinë e trashëgimisë artistike që ata lënë pas.

Enver PetrovciFoto: Avni Selmani

Si përfundim, viti i kaluar në shoubizin shqiptar ka qenë një kombinim i pasionit, skandaleve, rikthimeve dhe tragjedive personale.

Nga qetësia e muajve të parë, te polemikat, performancat madhështore, lidhjet e përfolura dhe humbjet që lënë një boshllëk të madh, estrada shqiptare tregoi një vit të jashtëzakonshëm, të mbushur me ngjarje që do të mbeten në kujtesën e publikut për shumë kohë. /Telegrafi/

Shemsi Krasniqi - ShemiFoto: Facebook

Presidenti amerikan, Donald Trump, në një intervistë për The Wall Street Journal, ka përshkruar shëndetin e tij si “të shkëlqyer” dhe ka zbuluar disa detaje nga rutina e tij e përditshme që surprizuan publikun.

Ai tha se merr një aspirinë çdo ditë, por në katërfishin e dozës së ulët të rekomanduar, pavarësisht këshillave të mjekëve për ta reduktuar.

Trump gjithashtu pranoi se fle vonë dhe shpesh dërgon mesazhe në telefon ndihmësve ose personave që ndiqte në Fox News rreth orës 2 të mëngjesit.

Rutina e tij punuese fillon në Zyrën Ovale rreth orës 10:00 dhe zakonisht zgjasë deri në 7-8 të mbrëmjes.

Ai ka zbuluar gjithashtu se ushqehet me McDonald’s dhe i atribuon energjinë e tij “gjenetikës shumë të mirë” të prindërve të tij.

Sa i përket aktivitetit fizik, Trump deklaroi se nuk bën ushtrime të rregullta, përveç golfit, të cilin e konsideron si aktivitetin e vetëm që nuk e mërzit. /Telegrafi/

Me mbi 83 për qind të votave të numëruara për kandidatët për deputetë, tashmë është bërë e qartë pjesa dërrmuese e emrave që kanë siguruar ulëse në Kuvendin e Kosovës.

Edhe pse nuk arritën të bëhen kryetarë komunash në zgjedhjet lokale, një numër i konsiderueshëm ish-kandidatësh për këtë pozitë kanë arritur të fitojnë mandat deputeti në zgjedhjet parlamentare.

Sipas të dhënave nga procesi i numërimit, së paku 10 ish-kandidatë për kryetarë komunash nga Lëvizja Vetëvendosje (LVV) tashmë e kanë siguruar mandatin e deputetit, raporton Telegrafi.

Hajrulla Çeku, në top-dhjetëshen e më të votuarve në LVV

Nga radhët e LVV-së, mandat deputeti kanë fituar:

Hajrulla Çeku (Prishtinë) – mbi 85 mijë vota

Rufki Suma (Hani i Elezit) – mbi 29 mijë vota

Rufksi Suma, poshtu njëra nga surprizat e zgjedhjeve të jashtëzakonshme

Ardian Gola (Gjakovë) – mbi 26 mijë vota

Artan Abrashi (Prizren) – mbi 18 mijë vota

Taulant Kelmendi (Pejë) – mbi 18 mijë vota

Enver Haliti (Ferizaj) – mbi 17 mijë vota

Jeton Raka (Kaçanik) – rreth 17 mijë vota

Arsim Ademi (Viti) – mbi 16 mijë vota

Sylejman Meholli (Vushtrri) – rreth 16 mijë vota

Valon Hoti (Malishevë) – rreth 15 mijë vota

Afër sigurimit të mandatit është edhe ish-kandidati i LVV-së për kryetar të Rahovecit, Ali Dula, i cili deri më tani ka grumbulluar rreth 13 mijë vota.

Ndërkaq, nga Partia Demokratike e Kosovës (PDK), mandat deputeti kanë siguruar dy ish-kandidatët për kryetarë komunash:

Arian Tahiri e Uran Ismaili, ndër më të votuarit e PDK-së

Arian Tahiri (Prishtinë) – mbi 60 mijë vota

Uran Ismaili (Mitrovicë) – mbi 44 mijë vota

Nga Aleanca për Ardhmërinë e Kosovës (AAK), mandat deputeti ka siguruar ish-kandidati për kryetar të Prishtinës:

Bekë Berisha – mbi 14 mijë vota

Procesi i numërimit është duke vazhduar, ndërsa rezultatet përfundimtare do të certifikohen nga Komisioni Qendror i Zgjedhjeve./Telegrafi/

Në veriun ekstrem të Evropës, disa mijëra kilometra larg Italisë, ndodhet Rovaniemi, qyteti i Laplandës i njohur në mbarë botën si shtëpia e Babagjyshit të Vitit të Ri.

Një vend ku dimri dominon pjesën më të madhe të vitit, drita e diellit është e rrallë dhe temperaturat zbresin ndjeshëm nën zero.

Pikërisht këtu ka lindur një nga klubet më të veçanta të futbollit evropian, FC Santa Claus.

Origjina e klubit

Historia e FC Santa Claus nis në vitin 1992. Sipas një legjende lokale, ideja për krijimin e klubit erdhi si një dëshirë për të ndërtuar një ekip futbolli të hapur për të gjithë, në frymën e bashkimit dhe komunitetit.

“Në Rovaniemi, përrallat shpesh duken reale”, shpjegon Juha Etelainen, përgjegjës për marrëdhëniet me median e klubit.

“Madje thuhet se në fillim u kërkua edhe ‘leja’ e Babagjyshit të Vitit të Ri për të nisur projektin”.

Klubi u formua nga bashkimi i dy ekipeve historike lokale, Rovaniemen Lappi dhe Rovaniemen Reipas.

Gjatë viteve, FC Santa Claus ka kaluar faza të ndryshme, duke ndryshuar edhe emrin për shkak të vështirësive ekonomike

Kulmi sportiv u arrit në vitet 2010/11, ndërsa sot klubi po përjeton një proces të qëndrueshëm rindërtimi.

Struktura dhe ambiciet

Aktualisht, FC Santa Claus numëron rreth një mijë anëtarë, meshkuj dhe femra, nga mosha 3 deri në 70 vjeç.

Ekipi i parë, ku rreth gjysma e lojtarëve vijnë nga akademia, militon në Kolmonen, kategoria e pestë e futbollit finlandez.

“Ne kemi shumë skuadra në nivele të ndryshme dhe investojmë shumë në sektorin e të rinjve”, thekson Etelainen.

“Lojtarët nuk vijnë vetëm nga zona jonë, por edhe nga pjesë të tjera të Finlandës dhe nga jashtë vendit. Sezoni nis në mars dhe përzgjedhja e lojtarëve bëhet përmes provave të hapura”.

Motoja e klubit është e thjeshtë dhe domethënëse: “Mos resht kurrë së besuari”.

Identiteti teknik

Trajneri Mika Salmela përshkruan qartë filozofinë e lojës së skuadrës.

“Ne preferojmë një futboll ofensiv, zakonisht me skemën 4-3-3. Skuadra vrapon shumë, mbron mirë dhe kërkon të jetë agresive në fazën sulmuese”.

Kushtet klimatike janë një sfidë e përhershme.

“Stërvitemi 11 muaj në vit, tri herë në javë. Në dimër përdorim ambiente brenda, sepse temperaturat mund të arrijnë deri në -30 gradë Celsius”.

Falë emrit dhe identitetit unik, FC Santa Claus ka fituar vëmendje ndërkombëtare, duke zhvilluar ndeshje miqësore me ekipe nga Anglia, Irlanda dhe Kina.

“Do të na pëlqente të luanim edhe në Itali, me skuadra të nivelit tonë”, shton Salmela me humor.

Babagjyshi, tifozi më i famshëm

Figura simbolike e klubit është vetë Babagjyshi i Vitit të Ri, i cili ndjek nga afër aktivitetin e ekipit.

“E mbështes skuadrën çdo ditë dhe e dua futbollin, edhe pse nuk mund të luaj më”, thotë ai.

“Shpesh jam në stërvitje dhe në ndeshje, por ndonjëherë është e vështirë të përqendrohem për shkak të fëmijëve që kërkojnë autografe”.

Edhe dhuratat për klubin nuk mungojnë, edhe pse mbeten sekrete. “Do të jetë diçka speciale, por duhet të prisni Krishtlindjet”.

Zëri i lojtarëve

Lojtarët e ekipit të parë theksojnë karakterin amator, por ambicioz të klubit.

“Shumica prej nesh kanë edhe punë të tjera, por jemi të përkushtuar për t’u përmirësuar”, shprehen ata.

“Vitin e kaluar arritëm promovimin dhe synojmë të vazhdojmë rritjen”.

Një rol kyç luan akademia: “Edhe lojtarët e ekipit të parë janë të përfshirë si trajnerë për fëmijët. Kjo krijon një lidhje të fortë dhe ndihmon zhvillimin afatgjatë të klubit”.

Një moment simbolik mbetet edhe fakti që, gjatë një ndeshjeje të Kupës së Finlandës, goditja e parë u dha nga vetë Babagjyshi i Vitit të Ri.

Një ftesë nga veriu

“Nga Italia mund të mbërrini në Rovaniemi për vetëm pak orë”, përfundon Etelainen.

“Në verë dielli nuk perëndon kurrë dhe kushtet janë ideale. Të gjithë janë të mirëpritur për të mbështetur FC Santa Claus”.

Një histori e veçantë futbolli, mes legjendës dhe realitetit, që vjen nga zemra e Laplandës. /Telegrafi/