I morën një shtetasi, te rrethrrotullimi i Rinasit, 40 000 euro, duke e mashtruar nëpërmjet komunikimeve në një aplikacion se ishin të njohur të tij, identifikohen 5 shtetas, vihen në pranga 3 prej tyre, shpallen në kërkim 2 të tjerë.

Sekuestrohen dhjetëra bimë Cannabisi, pajisje (llamba dhe ventilatorë) që shërbenin për kultivimin e tyre në ambiente të mbyllura, sasi Kokaine dhe Cannabisi, 4 celularë dhe 1 automjet tip “Audi Q5” me të cilin 5 shtetasit janë larguar pasi morën shumën e eurove.

Sektori për Hetimin e Krimit Ekonomik dhe Financiar, në bashkëpunim me Sektorin e Forcës së Posacme Operacionale në DVP Tiranë, Komisariatet e Policisë të Kavajës dhe Divjakës, pas administrimit të kallëzimit nga një 55-vjeçar, se ishte mashtruar nga disa shtetas të panjohur prej tij, organizuan dhe finalizuan operacionin policor të koduar “Skema”, në kuadër të të cilit u identifikuan dhe u vunë në pranga shtetasit:

-K. T., 36 vjeç, banues në Divjakë, I. Gj., 24 vjeç, banues në Divjakë, A. L., 39 vjeç dhe E. Rr., 38 vjeç, banues në Kavajë. Si dhe u shpallën në kërkim shtetasit E. B., 34 vjeç dhe L. M., 35 vjeç.

Shtetasit K. T, I. Gj, A. L, E. B dhe L. M, në bashkëpunim me njëri-tjetrin, në anë të mashtrimit duke iu prezantuar si i njohuri i tij, i kanë marrë shumë prej 40.000 euro një 55-vjeçari.

Në vijim, gjatë kontrollit të banesës së shtetasit A. L, ku është gjetur dhe shtetasi E. Rr, është zbuluar një ambient i përshtatur me pajisje elektrike, për kultivim të bimëve narkotike.

Në kuadër të operacionit, shërbimet e Policisë kanë gjetur e sekuestruar dhjetëra bimë Cannabisi, pajisje (llamba dhe ventilatorë) që shërbenin për kultivimin e tyre në ambiente të mbyllura, sasi Kokaine dhe Cannabisi, 4 celularë dhe 1 automjet tip “Audi Q5”.

Punohet për kapjen e 2 shtetasve të shpallur në kërkim dhe dokumentimin e plotë të rastit.

Materialet procedurale iu referuan Prokurorisë së Tiranës, për veprime të mëtejshme.

Natën e së shtunës, parullat kundër qeverisë mbushën rrugët e kryeqytetit iranian, Teheran, ndërsa protestuesit bënin thirrje për lëvizjen më të madhe kundër republikës islamike të tre viteve të fundit, pavarësisht një represioni të fortë të ushtruar nga autoritetet të cilat kanë bllokuar edhe internetin prej rreth 3 ditësh.

Numri i personave të vrarë gjatë protestave në Iran është pothuajse dyfishuar brenda pak orësh, duke shkuar në të paktën 116, sipas përditësimit të fundit të organizatës amerikane Human Rights Activists Neës Agency (HRANA) e cila shton se shtatë nga viktimat janë të mitur.

Sipas organizatës, shumica e personave janë vrarë nga municione të vërteta ose nga armë zjarri me plumba gome, kryesisht nga distancë e afërt. Sipas të njëjtit burim, 37 nga viktimat dyshohet se janë anëtarë të forcave të armatosura ose të sigurisë, ndërsa njëri prej tyre është prokuror. HRANA ka njoftuar gjithashtu se 2.638 persona janë arrestuar.

Sardar Radan, komandanti i përgjithshëm i policisë kombëtare iraniane, deklaroi mëngjesin e kësaj të diele se “niveli i përplasjes me rebelët është rritur” dhe përshëndeti ato që i quajti “arrestime të rëndësishme”, duke theksuar se “elementët kryesorë të trazirave të mbrëmshme janë arrestuar”.

Grupet për të drejtat e njeriut kishin raportuar tashmë dhjetëra të vdekur dhe, të shtunën, shprehën shqetësim për intensifikimin e represionit nga autoritetet, me nurmin e të vrarëve që ka shkuar në 550 në total.

Irani ua ka atribuar Shteteve të Bashkuara përgjegjësinë për protestat që shpërthyen dy javë më parë në kryeqytet për shkak të vështirësive ekonomike dhe që më pas janë përhapur në të gjithë vendin me kërkesa për largimin e autoriteteve fetare.

Presidenti i Shteteve të Bashkuara, Donald Trump, deklaroi të shtunën pasdite se vendi i tij ishte “i gatshëm të ndihmonte” lëvizjen duke nënkuptuar ndoshta një përfshirje ushtarake.

“Irani po sheh lirinë, ndoshta si asnjëherë më parë. SHBA janë gati të ndihmojnë”, shkroi Donald Trump.

Teherani paralajmëroi se “çdo sulm amerikan do ta çonte Teheranin të reagonte kundër Izraelit dhe bazave ushtarake amerikane” në rajon. Këtë e deklaroi kryetari i Parlamentit iranian, Mohammad Baqer Qalibaf, duke iu drejtuar deputetëve.

Protesta në Iran nisën përpara ndërrimit të viteve. Ato nisën si pakënaqësi ndaj gjendjes ekonomike dhe zhvlerësimit të monedhës kombëtare. Reagimi kombëtar është regjistruar në 100 qytete e rajone në të gjithë vendin dhe po shihet si kundërshtimi më I madh në vite ndaj regjimit që udhëhiqet nga Ajatollah Ali Khamenei.

Departamenti Amerikan i Shtetit u ka bërë thirrje qytetarëve amerikanë në Venezuelë që të largohen nga vendi “menjëherë”.

“Situata e sigurisë mbetet e paqëndrueshme”, tha departamenti, një javë pas kapjes së udhëheqësit venezuelian Nicolas Maduro, shkruan ANSA.

“Tani që fluturimet ndërkombëtare kanë rifilluar, qytetarët amerikanë duhet të largohen menjëherë nga vendi”, thuhet në njoftim, duke paralajmëruar kundër milicive të armatosura të quajtura “colectivos” të cilat kontrollojnë makina për amerikanë ose prova mbështetjeje për SHBA-në.

Kreu i PD ka reaguar pas deklaratës së Edi Ramës këtë të diel, kur tha ndër të tjera se në vendin tonë nuk ka as drejtësi të paanshme dhe as cilësore.

Për Sali Berishën, kjo është një deklaratë për të cilën populli duhet të ngrihet në protesta për ta rrëzuare nga qeveria.

“Ramaduro sot sulmoi drejtësinë dhe mbrojti menderen e tij!  Të dashur miq, në monologun e tij të neveritshëm, Ramaduro sot nuk foli për hallin e dhjetëra mijëra qytetarëve që nga Gjirokastra në Shkodër kanë banesat të përmbytura. Me këtë, ai mirë bëri, sepse përveç motit, shkak tjetër madhor i gjendjes së tyre të vështirë është vetë ai dhe ministrat e tij që, të pangopur, kanë vjedhur fondet e investimeve në infrastrukturën mbrojtëse nga përmbytjet.

Por Ramaduro foli për menderen e tij. Ai, si peng i Lubisë, pasi ka bllokuar nëpërmjet 83 mandateve të tij të krimit heqjen e imunitetit dhe arrestimin e saj, përsëri sulmoi sot drejtësinë e tij, e cila sipas tij “nuk është as e paanshme dhe as cilësore”.

Me këto akuza, Ramaduro dëshmon se ai nuk pranon dhe nuk do të pranojë vendimet e prokurorëve dhe gjyqtarëve, meqë sipas tij ata nuk janë të paanshëm dhe janë injorantë, jo cilësorë! Me këtë qëndrim, Rama sërish pranon fajësinë e tij dhe ky qëndrim është një apel për çdo shqiptar të ngrihet për largimin e tij nga pushteti, një ditë e më parë!”, shkruan Berisha në Facebook.

Një 38-vjeçar i shpallur në kërkim ndërkombëtar është arrestuar me qëllim ekstradimin në Itali, në kuadër të operacionit të koduar “Operacionalja 77”, të finalizuar nga Drejtoria e Forcës së Posaçme Operacionale e Policisë së Shtetit.

Si rezultat i shkëmbimit të informacionit dhe koordinimit operacional me autoritetet italiane, përmes Drejtorisë së Interpolit, u lokalizua dhe u arrestua provizorisht shtetasi Alesjo Abdija, 38 vjeç.

Sipas Policisë së Shtetit, Abdija është dënuar në vitin 2024 nga Gjykata e Perugias, në Itali, me 6 vjet e 6 muaj burgim, për veprën penale “Trafikimi i lëndëve narkotike”, kryer në bashkëpunim.

Interpol Tirana, në bashkëpunim me Interpol Romën, po vijon procedurat ligjore për finalizimin e ekstradimit të tij drejt Italisë, ku do të vuajë dënimin e dhënë nga autoritetet gjyqësore italiane.

Shtetet e Bashkuara të Amerikës kanë kryer këtë mbrëmje sulme në shkallë të gjerë kundër objektivave të ISIS-it në të gjithë Sirinë.

Sipas mediave të huaja, Komanda Qendrore e SHBA-së dhe forcat partnere kryen sulmet rreth orës 12:30 të pasdites sipas orës lindore të SHBA-së, si pjesë e Operacionit Hawkeye Strike, njoftoi forca në mediat sociale.

Operacioni u nis me urdhër të Presidentit Donald Trump në përgjigje të drejtpërdrejtë ndaj një sulmi “pritë” të ISIS-it, i cili u krye nga një terrorist ndaj forcave amerikane dhe siriane në Siri më 13 dhjetor 2025, ku u vranë dy ushtarë amerikanë dhe një përkthyes civil.

Komanda Qendrore e SHBA-së njoftoi gjithashtu se operacioni ishte pjesë e një angazhimi të vazhdueshëm të SHBA-së për të “çrrënjosur terrorizmin islamik kundër luftëtarëve tanë, për të parandaluar sulmet e ardhshme dhe për të mbrojtur forcat amerikane dhe partnere në rajon”.

Kujtojmë se gjatë kohëve të fundit, SHBA-të e kanë rritur angazhimin ushtarak në botë, ku pak ditë më pare kryen një operacion në Venezuelë, i cili përfundoi me kapjen e Presidentit në detyrë të vendit, Nicolas Maduro.

Ushtria izraelite ka hartuar plane për të nisur operacione të reja masive dhe intensive ushtarake në Gaza në muajin mars”, me një ofensivë të përqendruar në Qytetin e Gazës, që synon ta shtyjë vijën e verdhë të demarkacionit të armëpushimit drejt bregdetit të enklavës, duke zgjeruar më tej kontrollin mbi territorin.

Kështu shkruan Times of Israel, duke cituar një zyrtar izraelit dhe një diplomat arab. Sipas këtij të fundit, megjithatë, operacioni nuk mund të nisë pa miratimin e Shteteve të Bashkuara, të cilat ende po përpiqen ta çojnë armëpushimin e brishtë të arritur në tetor drejt një faze të dytë, që do të përfshinte çarmatimin e Hamasit.

Kryeministri Benjamin Netanyahu, shkruan gazeta, “ka pranuar” gjatë takimit të tij me Donald Trump muajin e kaluar të bashkëpunojë në përpjekjet për avancimin e armëpushimit, “por nuk beson se do të arrijnë ta çarmatosin Hamasin dhe për këtë arsye ka ngarkuar Forcat e Mbrojtjes së Izraelit (IDF) të përgatisin një plan emergjence”.

Përgatitjet për një ofensivë të re konfirmohen edhe nga burime të tjera, këtë herë për Wall Street Journal, sipas të cilave “Izraeli dhe Hamasi po përgatiten për një rifillim të përplasjeve, pasi grupi militant palestinez refuzon të çarmatoset”.

Në Gaza, “Hamasi po përqendrohet në rindërtimin e kapaciteteve ushtarake, përfshirë pjesë të infrastrukturës së tij të tuneleve që janë dëmtuar”. Për më tepër, “ka marrë gjithashtu një fluks të ri fondesh që i ka mundësuar të paguajë rregullisht pagat e luftëtarëve të tij”.

Katër grupe komisionesh verifikimi kanë dalë në terren paraditen e sotme në fshatin Ferras për të konstatuar dëmet e shkaktuara nga përmbytjet e ditëve të fundit.

Procesi i verifikimit po zhvillohet si brenda ashtu edhe jashtë argjinaturës, në kuadër të fazës së parë të evidentimit të prezencës së ujit dhe pasojave të tij në banesa.

Sipas të dhënave paraprake nga komisionet në terren, deri më tani janë evidentuar rreth 120 banesa të prekura, ku dëmet nuk kufizohen vetëm brenda ambienteve të brendshme të shtëpive, por shtrihen edhe në oborre, magazina, pajisje bujqësore dhe infrastrukturë ndihmëse. Në shumë raste, uji ka depërtuar në banesa duke shkaktuar dëme të konsiderueshme materiale, raporton korrespondenti i Top Channel Neritan Trifoni.

Fillimisht, puna e komisioneve ka nisur në zonën brenda argjinaturës, ku situata paraqitet më problematike për shkak të qëndrimit të ujit për disa orë. Më pas, verifikimet do të vijojnë edhe në banesat e dëmtuara nga vërshimi i ujit mbi kanalin e Martines, ku prurjet e shtuara kanë dalë nga shtrati duke përmbytur zona të tëra banimi.

Komisionet po dokumentojnë çdo rast me procesverbale, fotografi dhe të dhëna të detajuara, të cilat do t’i shërbejnë institucioneve përkatëse për hartimin e raportit përfundimtar dhe vlerësimin e masave të nevojshme për ndihmë dhe dëmshpërblim.

Autoritetet lokale bëjnë me dije se procesi i verifikimit do të vijojë edhe në ditët në vijim, ndërsa u bëhet thirrje banorëve të bashkëpunojnë me komisionet dhe të raportojnë çdo dëm të shkaktuar nga përmbytjet. Situata në zonë mbetet nën monitorim të vazhdueshëm, ndërkohë që strukturat e emergjencave janë në gatishmëri.

Britania e Madhe është në bisedime me aleatët evropianë për vendosjen e një force ushtarake në Groenlandë, në një përpjekje për ta bindur Donald Trumpin të mos e ‘pushtojë’ ishullin e Arktikut.

Shefat ushtarakë po hartojnë plane për një mision të mundshëm të NATO-s që do të përfshinte trupa, anije luftarake dhe avionë që mbrojnë territorin strategjikisht të rëndësishëm nga agresioni rus dhe kinez.

Zyrtarët britanikë kanë zhvilluar diskutime me homologët e tyre në Gjermani dhe Francë ditët e fundit, ndërsa përgatitjet për operacionin fillojnë të marrin formë, raportoi The Telegraph.

Planet, të cilat mbeten në një fazë të hershme, synojnë të bindin zotin Trump që të heqë dorë nga planet e tij kontraverse për të aneksuar Groenlandën , një ishull i vetëqeverisur që është pjesë e Danimarkës.

Kombet evropiane besojnë se rritja e ndjeshme e pranisë së tyre ushtarake në Arktik do t’i lejonte presidentit amerikan të shpallte fitoren duke argumentuar se aleatët e Amerikës po mbanin mbi supe një pjesë më të madhe të barrës financiare.

Trump ka refuzuar të përjashtojë përdorimin e forcës ushtarake për të marrë kontrollin e Grenlandës, duke përmendur shqetësimet se Rusia ose Kina mund të ndërhyjnë të parat.

Ai ka këmbëngulur: “Nuk do ta kemi Rusinë apo Kinën si fqinjë.”

Ishulli është gjithashtu i pasur me burime natyrore të vlefshme, duke përfshirë bakrin, nikelin dhe mineralet e rralla të tokës që janë thelbësore për teknologjinë moderne. Burime qeveritare thanë se Sir Keir Starmer e mori kërcënimin nga Rusia dhe Kina në rajon “jashtëzakonisht seriozisht” dhe ra dakord se nevojiteshin veprime.

“Ne ndajmë të njëjtin mendim me Presidentin Trump – agresioni në rritje i Rusisë në Veriun e Epërm duhet të pengohet dhe siguria euroatlantike duhet të forcohet”, i tha një person për median britanike.

“Diskutimet e NATO-s mbi forcimin e sigurisë në rajon vazhdojnë dhe ne kurrë nuk do t’i tejkalonim ato, por Mbretëria e Bashkuar po punon me aleatët e NATO-s për të nxitur përpjekjet për të forcuar parandalimin dhe mbrojtjen në Arktik.

“Mbretëria e Bashkuar do të vazhdojë të punojë me aleatët – siç kemi bërë gjithmonë – në operacione në interesin tonë kombëtar, duke mbrojtur njerëzit në shtëpi.”

Trump më parë ka sugjeruar t’i ofrohet secilit prej 30,000 banorëve të Groenlandës deri në 100,000 dollarë për të ndërruar besnikërinë e tyre ndaj Amerikës.

Kur u pyet për përdorimin e forcës, ai tha: “Ne do të bëjmë diçka në Groenlandë, pavarësisht nëse u pëlqen apo jo.”

Ndjekja e tij e territorit ka shkaktuar trazira brenda NATO-s dhe ka ngritur frikën se aleanca 75-vjeçare mund të shpërbëhet. Vendet evropiane tani shpresojnë të shmangin një krizë duke ofruar të stacionojnë forca në ishull.

Propozimi u diskutua në një takim të aleatëve të NATO-s në Bruksel të enjten, ku anëtarët udhëzuan Shtabin Suprem të Fuqive Aleate në Evropë që të shqyrtonte mundësitë për sigurimin e Arktikut.

Burimet thanë se operacioni i mundshëm mund të variojë nga një vendosje e plotë ushtarake deri në një kombinim ushtrimesh, shkëmbimi të inteligjencës dhe ridrejtimi i shpenzimeve të mbrojtjes.

Çdo mision ka të ngjarë të veprojë nën ombrellën e NATO-s dhe të jetë i ndarë nga operacionet ekzistuese në Baltik dhe Poloni. Zyrtarët britanikë konfirmuan se Forcat e Armatosura po përgatiteshin tashmë për një rol të zgjeruar në sigurinë e Arktikut.

Përgatitjet përfshijnë komando dhe anije të Marinës Mbretërore që marrin pjesë në Stërvitjen e Përbashkët Viking, një stërvitje e NATO-s në kushtet e ftohta të Norvegjisë.

Këtë vit, 1,500 Marinë Mbretërore do të vendosen në Norvegji, Finlandë dhe Suedi për stërvitjen “Reagimi ndaj të Ftohtit”, e cila përqendrohet në mbrojtjen e terrenit të ngrirë. Bashkimi Evropian thuhet gjithashtu se po përgatit sanksione ndaj kompanive amerikane nëse Trump refuzon ofertën e NATO-s për vendosjen e trupave.

Një opsion më drastik që po merret në konsideratë do të përfshinte dëbimin e forcave ushtarake amerikane nga bazat e tyre evropiane, duke i mohuar Amerikës pikat kryesore të nisjes për operacionet në Lindjen e Mesme. Sekretari i shtetit i SHBA-së, Marco Rubio, do të takohet me homologun e tij danez javën e ardhshme, me zyrtarët evropianë që shpresojnë se ai mund ta moderojë qëndrimin e Trump.

Rivali kryesor politik i presidentit turk Recep Tayyip Erdoğan ndodhet i burgosur në një burg të sigurisë së lartë pranë Stambollit, por kjo nuk e ka ndalur nga premtimi se do ta fitojë presidencën edhe nga qelia.

Ish-kryetari i zgjedhur demokratikisht i Bashkisë së Stambollit, Ekrem İmamoğlu, i arrestuar dhe i ndaluar në burgun famëkeq të Silivrit, ka dhënë përgjigje me shkrim për POLITICO, ku shfaqet sfidues dhe i bindur se mbetet kandidati legjitim që mund t’i japë fund dominimit 25-vjeçar të Erdoganit në politikën turke.

Arrestimi i tij në mars të vitit të kaluar shkaktoi protesta masive në mbarë vendin dhe dënime të forta ndërkombëtare. Opozita turke e sheh burgosjen e İmamoğlut si një manovër politike të Erdoganit për të eliminuar kundërshtarin e tij më të fortë laik në vendin anëtar të NATO-s me 88 milionë banorë.

55-vjeçari, i cili përballet me një dënim të mundshëm prej mbi 2.300 vitesh burg, i është përgjigjur pyetjeve përmes avokatëve dhe këshilltarëve të tij politikë. Deklaratat e rralla nga burgu tregojnë se İmamoğlu beson fuqishëm në mbështetjen popullore dhe është i vendosur të mbetet faktor politik edhe pas hekurave.

“Ajo që po përjetojmë sot nuk është një proces i vërtetë ligjor; është një strategji rrethimi politik,” shkruan ai.

“Qëllimi i presidentit Erdoğan nuk është vetëm të ndikojë zgjedhjet e ardhshme. Ai synon të fshijë kandidaturën time tani dhe në të ardhmen, duke më nxjerrë plotësisht nga politika. Arsyeja është e qartë: ata e dinë se në një garë të lirë dhe të ndershme, unë mund ta mposht Erdoganin.”

Goditja e gjerë ndaj İmamoğlut – dhe shumë kryebashkiakëve të tjerë të Partisë Republikane Popullore (CHP) – erdhi në një moment kur balanca politike në Turqi po zhvendosej ndjeshëm në favor të forcave laike.

Islamistët pësuan një humbje të rëndë në zgjedhjet lokale të vitit 2024, ndërsa autoritetet nisën procedime penale ndaj İmamoğlut pikërisht kur ai pritej të shpallej kandidat zyrtar i CHP-së për president. Pavarësisht ndalimit, mbi 15 milionë qytetarë morën pjesë në një proces simbolik brenda CHP-së duke e votuar atë si sfiduesin zyrtar – edhe pse ishte kandidati i vetëm.

İmamoğlu dhe bashkëpunëtorët e tij janë akuzuar për korrupsion, zhvatje, ryshfet, pastrim parash dhe madje edhe spiunazh. Sipas tij, përmasat e çështjes tregojnë dobësinë e saj.

mbi 1.300 kontrolle në Bashkinë e Stambollit pa prova konkrete,

një aktakuzë prej 3.900 faqesh, e bazuar kryesisht në thashetheme dhe dëshmitarë të diskutueshëm,

kërkesa për dënime që arrijnë deri në 2.352 vite burg,

dhe një proces gjyqësor që mund të zgjasë deri në 4.600 ditë.

Zgjedhjet e ardhshme priten në vitin 2028, por İmamoğlu shihet ende si kërcënim serioz për Erdoganin. Ai ka fituar tre herë zgjedhjet për kryetar bashkie në Stamboll, përfshirë zona tradicionale fetare që më parë konsideroheshin bastione të islamistëve. Vetë Erdoğan e nisi karrierën e tij kombëtare pikërisht nga posti i kryetarit të Bashkisë së Stambollit.

Edhe pse i ndaluar, İmamoğlu vazhdon fushatën përmes rrjeteve sociale si X, Instagram dhe TikTok, me ndihmën e ekipit të tij. Megjithatë, llogaria e tij kryesore në X, me rreth 10 milionë ndjekës, u bllokua në Turqi në muajin maj.

Ai pranon kufizimet, por këmbëngul se një fushatë politike nuk varet vetëm nga prania fizike.

“Një fushatë përcaktohet nga idetë, vlerat dhe vullneti i përbashkët i qytetarëve. Ne i kemi të gjitha këto në anën tonë,” shkruan ai.

Sipas tij, edhe një pjesë e votuesve të Partisë për Drejtësi dhe Zhvillim (AKP) e konsiderojnë ndalimin e tij të padrejtë. Ai thekson se më 23 mars 2025, rreth 15.5 milionë qytetarë votuan për ta mbështetur kandidaturën e tij, ndërsa vetëm 2 milionë prej tyre ishin anëtarë të CHP-së.

Gjithashtu, fushata për gjykim pa paraburgim dhe zgjedhje të parakohshme ka mbledhur mbi 25 milionë nënshkrime.

Pengesa ligjore dhe gjyqësori i politizuar

Fati i kandidaturës së tij tani varet nga një sistem gjyqësor që akuzohet gjerësisht për mungesë pavarësie. Në shkurt, prokuroria e Stambollit hapi hetim për vlefshmërinë e diplomës së tij universitare, e cila u anulua një ditë para arrestimit.

Sipas Kushtetutës turke, një kandidat për president duhet të ketë diplomë universitare.

Eksperti i Turqisë, Soner Çağaptay, vlerëson se İmamoğlu ka pak gjasa të lejohet të përballet realisht me Erdoganin, pasi presidenti do të përdorë institucionet shtetërore për ta bllokuar dhe diskredituar.

Kritikë ndaj politikës së jashtme

Nga burgu, İmamoğlu sulmon politikën e jashtme “agresive” të Erdoganit dhe marrëdhëniet e tij të ngushta me presidentin amerikan Donald Trump, duke i lidhur me përkeqësimin e lirive në Turqi.

Ai vë në dyshim përfitimet konkrete të Ankarasë, duke përmendur faktin se Turqia ende nuk është rikthyer në programin F-35 dhe se sanksionet nuk janë hequr. Po ashtu, ai kritikon zhvillimet në Egje, Gaza dhe Lindjen e Mesme.

Nëse zgjidhet president, thotë se një nga prioritetet kryesore do të jetë rindërtimi i marrëdhënieve me Bashkimin Evropian dhe përmbushja e kritereve demokratike për anëtarësim.

Jeta në burg dhe shpresa politike

İmamoğlu thotë se mban një regjim të rreptë në burg: shkruan, lexon dhe ndjek lajmet, duke e parë këtë si detyrë publike.

“Përgjegjësia nuk përfundon te porta e burgut,” shkruan ai, duke theksuar se paraburgimi nuk duhet të normalizohet në një demokraci.

Ajo që i mungon më shumë është familja, si dhe jeta e zakonshme e qytetit – ecja e lirë në rrugë dhe kontakti i drejtpërdrejtë me njerëzit.

“Forcën e gjej duke ditur se jam pjesë e një lëvizjeje demokratike më të madhe se rrethanat e mia personale. Nuk janë muret që përcaktojnë gjithçka.”/mxh

Cristian Chivu, trajneri i Interit doli në konferencë para ndeshjes ndaj Napolit.

“Gjithmonë kemi punuar mirë për të kapërcyer momente të caktuara. Dëshira dhe ambicia kanë qenë gjithmonë aty, ndoshta edhe më shumë tani duke pasur parasysh atë që ka ndodhur muajin e fundit. Kjo është një ndeshje që mund të ndryshojë drejtimin e progresit tonë”.

Ekipi ka ndryshuar me punë të palodhur, besim dhe ambicie. Këto janë gjëra që i kemi sjellë në fushë. Numrat nuk janë të mjaftueshëm, duhet të tregosh vlerën e vërtetë të një skuadre”.

“Është shumë e lehtë të flasësh për ndeshje kokë më kokë që nuk i kemi fituar, vetëm sepse numrat e thonë këtë. Realiteti është se unë jam në krye të tabelës, jam përpara ekipit që më mundi, kam më shumë gola të shënuar. Jemi të vetëdijshëm për rëndësinë e këtyre ndeshjeve, por të gjitha ndeshjet vlejnë njësoj”./mxh

Dimri është sezoni më i mirë për agrumet, ndaj edhe gërshetimi i shijes së tyre në receta u jep atyre një shije unike, qofshin ato të kripura apo të ëmbla. Agrumet e njohura të dimrit përfshijnë portokallin, qitron, limonin, mandarinat apo lime, me të cilat jo vetëm do të krijoni pjata unike që i shtojnë kontrast çdo shijeje, qoftë mish apo peshk, por edhe janë plot me vlera ushqyese.

Sallatë me patate të ëmbla dhe portokall

Përbërësit:

1 patate e ëmbël, 2 portokalle, rucola, 1 qepë e kuqe, 30 g lajthi, 20 g djathë feta, 1 lugë gjelle mjaltë, 1 lugë gjelle lëng limoni, 1 lugë çaji kanellë, majdanoz dhe piper

Për salcën:

1 lugë gjelle vaj ulliri, 1 lugë çaji mjaltë, 1 lugë çaji mustardë

Përgatitja:

Ngroheni furrën paraprakisht në 200 gradë Celsius, pastaj lani dhe qëroni pataten e ëmbël. Priteni në kube dhe vendosini në një tas të vogël duke shtuar mjaltin, lëngun e limonit, kanellën dhe piperin. Përziejini mirë të gjitha. Qëroni dhe pritini qepën në feta. Vendosini në një tepsi me letër furre kubet e patateve të ëmbla dhe qepën e grirë. Piqeni për afërsisht 45 minuta.

Pritini lajthitë trashë dhe piqini në furrë për rreth 10 minuta derisa të bëhen krokante. Qëroni portokallet dhe pritini në feta, po ashtu djathin në copa të vogla.

Kur patatet dhe qepa të jenë gati, vendosini në një pjatë, shtoni rukolën dhe portokallin, përziejini dhe pastaj shtoni lajthitë e copëzuara dhe djathin e prerë në feta. Pjatën shërbejeni duke shtuar salcën që keni përgatitur me vaj ulliri, mjaltë dhe mustardë, si dhe gjethet e freskëta të majdanozit.

Supë me finok, midhje dhe portokall

Përbërësit:

800 g finok, 1 qepë e vogël, 1/2 tufë koriandëri, 8 midhje, 150 ml vaj ulliri, 2 litra lëng pule, lëkura portokalli, 1 qitro, 200 ml krem pana, kripë dhe piper i sapobluar.

Përgatitja:

Qëroni dhe lani perimet. Pritini kokrrat e finokut në feta të trasha dhe qepën grijeni imët. Lani dhe këputni gjethet e koriandrës, pastaj lani midhjet me ujë të freskët.

Skuqni qepën në vaj ulliri, pastaj shtoni finokun dhe sapo të nisë të zbutet, shtojini një litër lëng mishi dhe gjysmën e koriandrës. Sapo të marrin valën e parë, shtoni lëngun e gjysmës së portokallit, kripën, piperin dhe lëreni të ziejë ngadalë. Kur masa të nisë të trashet, shtoni edhe 1 litër tjetër lëng perimesh derisa masa të kthehet në konsistente. Kalojeni supën në blender derisa të formohet një teksturë kremoze. Hiqeni nga blenderi dhe mbajeni të ngrohtë. Para se ta shërbeni, skuqni midhjet për 2 minuta në vaj ulliri, kriposini dhe piperosini dhe në fund, shtojini lëkurën e portokallit dhe majdanozin e mbetur të grirë. Me një lugë vendosini sipër velutesë, duke e shoqëruar me pak tul qitroje, para se ta shërbeni.

Fusili me salcë limoni

Përbërësit:

150 g makarona, 200 g kungull, 2 thelpinj hudhër, 2 lugë vaj ulliri, lëngu i 1 limoni, kripë dhe piper

Përgatitja:

Zieni makaronat sipas udhëzimeve të paketimit, kullojini dhe ruani pak ujë të zierjes. Nxehni vajin në tigan, skuqni hudhrën për 1 minutë, pastaj shtoni kungullin e prerë në kubikë dhe lëreni të zbutet për 5 minuta. Para se t’i hiqni nga zjarri, hidhni lëngun e limonit dhe pak ujë të makaronave për të krijuar salcë homogjene. Në fund shtoni makaronat, përzieni mirë dhe rregulloni shijen me kripë dhe piper. Shërbejini të ngrohta, me feta limoni dhe pak djathë parmigiano./mxh

Vedat Muriqi, vazhdon të shënojë pa u ndalur në Spanjë, aty ku është pjesë e skuadrës së Mallorcas.

Sulmuesi i Kosovës, ka gjetur sërish rrugën e rrjetës në La Liga, ndaj Rayo Vallecano në transfertë. Në minutën e 30-të, Muriqi shfrytëzoi një krosim të Lato nga e majta dhe me kokë e dërgoi topin në fundin e rrjetës.

Vendasit kishin kaluar të parët në avantazh, ndërsa Mallorca barazoi me golin e Muriqit.

Sa i përket ndeshjes, Rayo Vallecano, me Ivan Balliun në fushë, të futur si zëvendësues, e ka mbyllur pjesën e parë në avantazh 2-1./KM

Rusia qëlloi më shumë se 150 dronë gjatë natës deri të dielën duke synuar vende në të gjithë Ukrainën.

Sulmi la të vrarë të paktën katër persona dhe plagosi 20 të tjerë.

Forcat Ajrore të Ukrainës thanë se kanë kapur 125 dronë nga ajri, por konfirmuan se të paktën 25 dronë sulmues goditën objektivat e tyre.

Ata shtuan se breshëria e fundit e Moskës kishte në shënjestër kryesisht Kharkivin, Khersonin, Zaporizhzhian dhe Dnipropetrovskun, të cilët u shënjestruan edhe në sulmet e natës.

Zyrtarët lokalë në rajonin jugor të Zaporizhzhias thonë se sulmet kishin në shënjestër zonat e banimit dhe infrastrukturën energjetike.

Më shumë se 385,000 shtëpi u prekën nga ndërprerjet e energjisë elektrike, gazit ose ujit, në një kohë kritike ndërsa temperaturat ranë në 10 gradë Celsius./KM

Last Updated on 11/01/2026 by Klara

Katër persona u vunë në pranga dhe dy të tjerë u shpallën në kërkim, pasi i morën një shtetasi te rrethrrotullimi i Rinasit 40 000 euro, duke e mashtruar nëpërmjet komunikimeve në një aplikacion se ishin të njohur të tij.

Njërit prej të arrestuarve iu zbulua një dhomë banese e përshtatur me pajisje elektrike për kultivim të bimëve narkotike.

Gjatë operacionit policor të koduar “Skema” u sekuestruan dhjetëra bimë Cannabisi, llamba dhe ventilatorë që shërbenin për kultivimin e tyre në ambiente të mbyllura, sasi Kokaine dhe Cannabisi, 4 celularë dhe 1 automjet tip “Audi Q5” me të cilin 5 shtetasit janë larguar pasi morën shumën e eurove.

Njoftimi:

Sektori për Hetimin e Krimit Ekonomik dhe Financiar, në bashkëpunim me Sektorin e Forcës së Posacme Operacionale në DVP Tiranë, Komisariatet e Policisë të  Kavajës dhe Divjakës, pas administrimit të kallëzimit nga një 55-vjeçar, se ishte mashtruar nga disa shtetas të panjohur prej tij, organizuan dhe finalizuan operacionin policor të koduar “Skema”, në kuadër të të cilit u identifikuan dhe u vunë në pranga shtetasit:

-K. T., 36 vjeç, banues në Divjakë, I. Gj., 24 vjeç, banues në Divjakë, A. L., 39 vjeç dhe E. Rr., 38 vjeç, banues në Kavajë. Si dhe u shpallën në kërkim shtetasit E. B., 34 vjeç dhe L. M., 35 vjeç.

Shtetasit K. T, I. Gj, A. L, E. B dhe L. M, në bashkëpunim me njëri-tjetrin, në anë të mashtrimit duke iu prezantuar si i njohuri i tij, i kanë marrë shumë prej 40.000 euro një 55-vjeçari.

Në vijim, gjatë kontrollit të banesës së shtetasit A. L, ku është gjetur dhe shtetasi E. Rr, është zbuluar një ambient i përshtatur me pajisje elektrike, për kultivim të bimëve narkotike.

Në kuadër të operacionit, shërbimet e Policisë kanë gjetur e sekuestruar dhjetëra bimë Cannabisi, pajisje (llamba dhe ventilatorë) që shërbenin për kultivimin e tyre në ambiente të mbyllura, sasi Kokaine dhe Cannabisi, 4 celularë dhe 1 automjet tip “Audi Q5”.

Punohet për kapjen e 2 shtetasve të shpallur në kërkim dhe dokumentimin e plotë të rastit.

Materialet procedurale iu referuan Prokurorisë së Tiranës, për veprime të mëtejshme./KM

Psikologët kanë vënë re se ekspozimi i vazhdueshëm ndaj lajmeve negative po shkakton lodhje mendore dhe ndjesi apatie. Ky fenomen po njihet si “news fatigue”.

Truri përpunon informacionin negativ më intensivisht, gjë që rrit stresin dhe ul përqendrimin. Kjo shpjegon pse shumë njerëz po kufizojnë konsumimin e lajmeve.

Ekspertët rekomandojnë pushime digjitale dhe balancim të përmbajtjes për të mbrojtur shëndetin mendor./KM

Ish-aktori i Disney-t, Matt Prokop, i njohur më së miri për rolin e tij në “High School Musical 3: Senior Year”, u arrestua nga autoritetet në Qarkun Victoria, Teksas.  34-vjeçari po mbahet në paraburgim pa lirim me kusht dhe përballet me akuza të shumta, përfshirë posedimin e pornografisë me fëmijë, sipas TMZ.

Matt Prokop u arrestua më 24 dhjetor 2025 dhe, siç konfirmohet nga autoritetet lokale, mbetet në paraburgim në burgun e qarkut. Përveç akuzës për posedim të pornografisë me fëmijë, i njëjti informacion thotë se ai përballet gjithashtu me një akuzë për rezistencë ndaj arrestimit dhe dy akuza për rezistencë ndaj arrestimit, kontrollit ose transportimit.

Mediat lokale (Crossroads Today) e lidhin arrestimin me një shkelje të dyshuar të kushteve të lirimit me kusht nga një çështje e mëparshme, pasi në maj 2024 ai u arrestua dhe u akuzua për sulm të rënduar dhe rezistencë ndaj arrestimit.

Matt ka qenë më parë në qender te mediave për akuzat për dhunë në familje nga ish-partnerja e tij, Sarah Hyland, një aktore në serialin televiziv “Modern Family”. Në vitin 2014, Hyland e akuzoi atë për abuzim verbal dhe fizik gjatë marrëdhënies së tyre pesëvjeçare, me dokumentet e gjykatës në atë kohë që pretendonin se ai e kishte shtyrë atë në një automjet dhe e kishte kapur për fyti gjatë një grindjeje. Pas ndarjes së tyre, ai gjithashtu bëri kërcënime të dhunshme, duke përfshirë kërcënimin për të vrarë qenin e saj dhe për t’i vënë flakën shtëpisë së saj./KM

Një zjarr i madh pyjor në Argjentinën jugore ka djegur më shumë se 5,500 hektarë, thanë autoritetet, ndërsa qindra zjarrfikës dhe vullnetarë luftuan për të kontrolluar flakët që kërcënonin komunitetet e vogla.

Zjarri shpërtheu të hënën në Puerto Patriada, rreth 1,700 km (1,050 milje) në jugperëndim të Buenos Aires në rajonin e Patagonisë, dhe që atëherë ka rrethuar Epuyen, një qytet me 2,000 banorë.

Gati 500 persona janë të vendosur, me përforcime që priten nga Kordoba dhe Kili.

Zjarret janë aktive në provinca të tjera të Patagonisë, duke përfshirë Neuquen, Rio Negro dhe Santa Cruz. Rajoni humbi 32,000 hektarë nga zjarret në fillim të vitit 2025./KM

Kur shteti shqiptar aspiron të anëtarësohet në BE, Agjencia Kombëtare e Barnave dhe Pajisjeve Mjekësore i ka hapur rrugën e regjistrimit, medikamentit të pasigurtë të prodhuar në Maltë, i cili është ndaluar për përdorim nga vende të Bashkimit Europian.

Ishte Agjencia Europiane e Barnave që në maj të 2024 vendosi pezullimin e dhjetërave ilaçeve të klinikës indiane Synapse Labs, mes të cilave përfshihej edhe Nilotinib i Pharmascience, ku specifikohej në pikën 5 se për to nuk duhej vijuar procesi i regjistrimit, pasi informacioni klinik u vlerësua i pasaktë dhe janë hasur parregullsi serioze gjatë studimeve klinike me të dhëna jo të besueshme.

Përballë sinjaleve shqetësuese, AKBPM-në në shkelje të ligjit i dha dritën jeshile Megapharmës të ripërsëriste analizat, ndonëse qartazi nuk i kishte përmbushur kriteret laboratorike. Më konkretisht, sipas informacioneve, në qershor 2025, gjatë procesit të regjistrimit të Nilotinib nga Agjencia Kombëtare e Barnave dhe Pajisjeve Mjekësore (AKBPM), u konstatuan rezultate laboratorike të papranueshme për seritë: G0404C, dhe G0405C, që ndërprenë aplikimin.

Megjithatë, në tetor 2025, për arsye të paqarta dhe pa u marrë në konsideratë: rezultatet laboratorike negative, vendimet detyruese të Agjencisë Europiane të Barnave, AKBPM zëvendësoi mostrat fillestare me mostra të tjera dhe ri-aktivizoi aplikimin.

“Rezultatet analitike kanë qenë në përputhje me specifikimet e miratuara për të gjithë parametrat e testuar, me përjashtim të parametrit të disolucionit. Është e rëndësishme të theksohet se metodika e analizimit të disolucionit për lëndën aktive Nilotinib nuk është e përshkruar në Farmakopenë Europiane, pra jemi në kushtet e një metodike in-house të zhvilluar nga prodhuesi dhe me ndjeshmëri shumë të lartë. Duke qenë para këtij fakti, Agjencia ka ndërprerë procedurën e autorizimit të tregtimit deri në sqarimin e kësaj problematike.

Gjithashtu AKBPM ka komunikuar me Agjencinë Hungareze, si vendi referent ku është i autorizuar dhe qarkullon ky bar.  Agjencia Hungareze ka pezulluar përkohësisht lotet e barit të analizuara nga AKBPM të cilat pasi janë analizuar nga Laboratori i tyre kanë rezultuar brenda specifikimeve. Pavarësisht vendimit, është e justifikueshme të kërkohen mostra të reja për të përsëritur procedurat analitike për të 2(dy) formëdozat e sipërpërmendura”, thuhen në informacioni e AKBPM.

Akoma më shqetësues është fakti se, sipas një përgjigjeje zyrtare të AKBPM-së, për Nilotinib Pharmascience të përfaqësuar në Shqipëri nga Megapharma është aplikuar një trajtim lehtësues, ndërsa aplikimi për të njëjtin medikament (Nilotinib) nga kompania Zentiva është refuzuar. Ky standard i dyfishtë administrativ ngre dyshime serioze për shkelje të parimit të barazisë para ligjit dhe favorizim selektiv të interesave private.

“Laboratori i Kontrollit raportoi rezultate të ngjashme për parametrin e disolucionit të Nilotinib Zenetiva. Në vijim, kompania u njoftua për refuzimin e aplikimit. Paralelisht, për këtë çështje u informua edhe Agjencia Rumune e Barnave, e cila deri më sot nuk ka përcjellë një qëndrim zyrtar lidhur me produktin në fjalë, ndryshe nga Agjencia Hungareze e Barnave e cila ka dhënë një përgjigje zyrtare”, thuhet në dokument.

 Dyshimet thellohen edhe më tej. Burime zbulojnë se AKBPM ka modifikuar metodën e analizës laboratorike, pasi edhe mostrat zëvendësuese nuk përmbushnin kriteret e disolucionit, test kyç për të vërtetuar se medikamenti çliron lëndën aktive në organizëm në mënyrë të sigurt dhe efektive. Ndonëse në përgjigje të kërkesës për informacion AKBPM deklaron se këto medikamente nuk janë ende të autorizuara për tregtim në Shqipëri.

Në një deklaratë zyrtare të publikuar më 30 dhjetor 2025, AKBPM deklaron se këto medikamente nuk janë ende të autorizuara për tregtim në Republikën e Shqipërisë. Por, sipas infomacioneve të marra nga Ministria e Shëndetësisë dhe Mirëqenies Sociale, Nilotinib është autorizuar për tregtim pikërisht në të njëjtën datë, duke ngritur dyshime serioze për transparencën dhe vërtetësinë e informacionit zyrtar të publikuar nga institucioni.

Interesit mediatik se përse janë mbajtur dy qëndrime të ndryshme për të njëjtin ilac të paraqitura nga operatorë të ndryshëm, dhe nëse është marr në konsiderate përfshirja e një laboratori tjetër ndërkombëtar të pavarur për të verifikuar saktësinë e analizave, morëm një përgjigje pa përgjigje.

“Sa i përket trajtimit administrativ të aplikimeve të ndryshme për të njëjtin produkt, çdo aplikim shqyrtohet në përputhje me kërkesat e Ligjit105/2014 “Për barnat dhe shërbimin farmaceutik””.

Në këtë situatë, na mbetet të bëjmë sërish pyetje këtë herë publikisht që kërkojnë përgjigje urgjente: Përse të dhënat laboratorike janë “lehtësuar”, relativizuar apo rishikuar vetëm për një kompani të caktuar, ndërkohë që aplikimi i Zentivas është refuzuar pa asnjë mundësi korrigjimi apo trajtimi të barabartë?

Cili është kriteri objektiv, teknik apo ligjor që justifikon këtë diferencim ekstrem në vendimmarrje? A ekzistojnë kontakte, ndikime apo interesa të jashtme që kanë orientuar AKBPM-në drejt një trajtimi preferencial për Pharmascience / Megapharma? Interesat e kujt është e detyruar të mbrojë ky institucion: interesin publik dhe sigurinë e pacientëve apo interesat e industrisë farmaceutike?/KM