Mjekët shpesh këshillojnë të shmangim ushqimet e përpunuara ose ato që përmbajnë shumë sheqer dhe yndyra të ngopura. Kjo është një këshillë e domosdoshme, pasi konsumimi i shpeshtë i tyre rrit rrezikun për sëmundje kronike, përfshirë edhe çrregullime neurologjike si goditja në tru dhe demenca.

Megjithatë, si neurolog, mund t’ju them se ekzistojnë edhe disa ushqime të tjera, më pak të njohura, që duhen shmangur për të parandaluar probleme serioze neurologjike.

Këto janë katër ushqime që unë nuk i ha kurrë:

1. Ushqime të konservuara me kanaçe të dëmtuara

Nëse një kanaçe është e fryrë, e çarë ose shumë e gërvishtur, kjo duhet të jetë një sinjal alarmi. Mund të jetë shenjë e kontaminimit me botulinum, një bakter që prodhon toksinën e botulizmit.

Toksina botulinike është një nga neurotoksinat më të fuqishme që njeh shkenca. Ajo bllokon çlirimin e një neurotransmetuesi që i mundëson trurit të komunikojë me muskujt. Pasojat mund të përfshijnë paralizë të gjymtyrëve, shikim të turbullt dhe, në raste të rënda, vështirësi të frymëmarrjes. Pa trajtim të menjëhershëm, botulizmi mund të jetë fatal.

Ajo që e bën këtë toksinë veçanërisht të rrezikshme është fakti se nuk mund të zbulohet nga era, shija apo pamja. Për më tepër, ngrohja e ushqimit nuk garanton neutralizimin e saj.

Mbani mend këtë rregull të thjeshtë: “Kur ke dyshime, hidhe.”

2. Disa peshq shkëmborë, veçanërisht në zona tropikale

Unë e dua peshkun dhe i inkurajoj pacientët e mi të konsumojnë lloje si salmoni, sardelet dhe trofta, të cilat janë të pasura me omega-3 dhe të ulëta në merkur.

Por këshilloj kujdes me peshqit e mëdhenj tropikalë si barrakuda, grouper, morena, ngjala detare dhe amberjack. Këta peshq mund të përmbajnë ciguatoksinë, veçanërisht në zona me shkëmbinj koralorë.

Kam parë personalisht raste të helmimit nga ciguatera. Simptomat përfshijnë ndjesi të çuditshme të të ftohtit, djegie, mpirje, marramendje dhe madje edhe ëndrra shumë të gjalla. Për shkak se simptomat janë të paqarta, diagnoza shpesh vonohet.

Problemi kryesor është se ciguatoksina është rezistente ndaj nxehtësisë — pra, gatimi nuk e shkatërron. Ashtu si toksina botulinike, ajo nuk ka shije apo erë.

Rekomandohet të kufizohet konsumimi i peshqve grabitqarë të mëdhenj, të shmangen pjesë si mëlçia, vezët dhe koka, dhe të tregohet kujdes i veçantë në zona endemike.

3. Mish derri i pagatuar ose i pagatuar dobët

Rreziku këtu është neurocisticerkoza. Neurocisticerkoza është një nga shkaqet kryesore të epilepsisë në mbarë botën. Edhe pse më e rrallë në vendet e zhvilluara, raste janë raportuar edhe në SHBA.

Nëse udhëtoni shpesh ose jetoni në zona me kushte të dobëta sanitare, është thelbësore të gatuani mirë mishin e derrit dhe të mbani higjienë të mirë të duarve.

4. Qumësht i papasterizuar

Pasterizimi i qumështit përfshin trajtimin me nxehtësi për të eliminuar mikroorganizmat e rrezikshëm. Edhe pse procesi ul lehtësisht disa vitamina, ndikimi është minimal.

Qumështi i papasterizuar, është një burim i njohur i baktereve si Listeria, E. coli dhe Salmonella. Studimet tregojnë se konsumimi i tij shkakton rreth 840 herë më shumë sëmundje dhe 45 herë më shumë shtrime në spital krahasuar me qumështin e pasterizuar, edhe pse konsumohet nga një pjesë shumë e vogël e popullsisë.

Fëmijët, gratë shtatzëna, të moshuarit dhe personat me imunitet të dobët janë më të rrezikuarit për pasoja serioze, përfshirë dëmtime të trurit, meningjit, koma, abort spontan dhe madje vdekje.

Kam parë personalisht raste me dëmtime të pakthyeshme neurologjike të shkaktuara nga produkte të papasterizuara.

Pretendimet se qumështi i papasterizuar ul astmën, kancerin apo intolerancën ndaj laktozës nuk mbështeten nga prova shkencore.

Para se të bëni ndryshime të mëdha në dietën tuaj, këshillohuni gjithmonë me një profesionist shëndetësor. Çelësi është të jemi më të vetëdijshëm për atë që konsumojmë veçanërisht kur bëhet fjalë për ushqime që mund të dëmtojnë trurin./KM

Një 39-vjeçar u arrestua nga policia e Lezhës, pasi akuzohet se përndiqte ish-bashkëjetuesen e tij. Ndonëse shtetasi me inicialet A. A., banues në Lezhë, ishte në ‘arrest shtëpiak’, ai e ka thyer atë dhe ka vijuar përndjekjen ndaj ish-partneres.

Po ashtu policia sqaroi se gjatë kontrollit, ai mbante në makinë dhe një shufër hekuri.

i cili ishte aktualisht me masë sigurie “Arrest në shtëpi”, për veprën penale “Përndjekja”, ndaj së njëjtës shtetase që ishte e pajisur me urdhër mbrojtjeje ndaj tij.
“Si rezultat, u kap në ambientet e një lokali, autori i dyshuar i rastit, shtetasi A. A., 39 vjeç, banues në Lezhë, i cili ishte aktualisht me masë sigurie “Arrest në shtëpi”, për veprën penale “Përndjekja”, ndaj së njëjtës shtetase që ishte e pajisur me urdhër mbrojtjeje ndaj tij.”, tha ai./K.M

Nën masa të rrepta sigurie, Jared Kushner, dhëndri i ish-presidentit amerikan Donald Trump, ka mbërritur sot në Vlorë, i shoqëruar nga një delegacion dhe bashkëshortja e tij, Ivanka Trump.

Ai ndodhet në zonën e Ujit të Ftohtë, ku pritet të zhvillojë një takim me një studio arkitekturore për të diskutuar mënyrën e realizimit të projektit dhe investimin në ishullin e Sazanit.

Burimet bëjnë me dije se nuk do të zhvillohet ndonjë takim me përfaqësues të pushtetit lokal./K.M

Po t’i kthehem pas viteve të shkollimit, kujtoj që (si shumë të tjerë) më interesonin vetëm rezultatet e mira në shkollë; ato ishin gjithçka! Kujtoj netët kur stërmundohesha vetëm që të arrija rezultatin maksimal në provim, të nesërmen! Atëherë dukej se kjo ishte gjëja e duhur për t’u bërë por sot, unë nuk dua që im bir të sforcohet aq shumë, në moshën e tij. Mund t’iu duket e çuditshme por lermëni ta shpjegoj mendimin tim…

1. Askush, në gjithë vitet që erdhën më pas, nuk më ka pyetur ndonjëherë për rezultatet që kam arritur në shkollë. As punëdhënësit nuk më kanë kërkuar rezultatet e universitetit. Gjithë çfarë vlente për t’u plotësuar ishte kutia e ‘përvojës në punë’.

2. Kam harruar gjithçka që kam mësuar në shkollë.

E vija re që atëherë se harroja gjithçka që kisha mësuar, menjëherë pas provimit. Kur nisa të punoj kuptova që nuk kujtoja asgjë nga ato që kisha mësuar në shkollë dhe, mbi të gjitha, asgjë prej tyre nuk më duhej! Përveç të tjerash pata edhe një dilemë të madhe meveten; nuk po dija ku t’i aplikoja gjithë gjërat që kisha mësuar. Siç u kuptua më vonë, vitet e studimit nuk më dhanë asnjë përparësi; nuk isha as më e mirë e as më e zonja se njerëzit më pak të shkolluar.

3. Përpjekja për rezultate maksimale më dëmtoi shëndetin

Disa njerëz mund t’i kapin gjërat në ajër por unë nuk jam një prej tyre! Që t’i fiksoja leksionet më duhej të studioja shumë. Në kohën e provimeve studioja 12-15 orë në ditë. Ende më kujtohet se si më zinte gjumi gjatë leksioneve apo në mjetet e transportit publik, prej lodhjes. Për shkak të lodhjes produktiviteti im ra. Tani që i mendoj këto gjëra habitem me veten dhe teknikat e mia të studimit! Jam e sigurtë që nëse do të kthehesha pas, nuk do të bëja më të njëjtën gjë!

4. Nuk kisha kohë për njerëzit

Në universitet kisha mjaft mundësi për të krijuar marrëdhënie me njerëzit por isha tepër e zënë për ta bërë këtë gjë. Studimet rrëmbenin të gjithë kohën që kisha dhe nuk më mbetej kohë për jetën private. Humba mundësinë më të mirë për të krijuar miqtë që nuk kam ku I gjej më! Sot, shumë vite më vonë, kam vënë re që të gjithë studentët e shkathët e të socializuar, jo aq të përkushtuar pas studimeve, janë sot njerëz të rëndësishëm e me ndikim në shoqëri.

Këto janë këshillat që kam sot për fëmijët e mi, kur të nisin shkollën:

-Ndryshimi midis vlerësimit me A apo B është kaq I pandjeshëm sa që nuk duhet të ndikojë në cilësinë e jetës!

-Janë aftësitë e tua ato që do të ndihmojnë për të paguar faturat dhe jo rezultatet e shkollës.

-Një diplomë prestigjoze nuk do të të ndihmojë të kesh përparësi në jetë por miqtë me influencë, po!

-Mos bëj gjëra për të cilat mendon se janë të pakuptimta!

-Mos u mundo të përmbushësh pritshmëritë e të tjerëve!/KM

Më 21 janar 1924, në moshën 54-vjeçare, vdiq Vladimir Iliç Lenin, udhëheqësi i Revolucionit Bolshevik dhe themeluesi i shtetit të parë socialist në botë, Bashkimit të Republikave Socialiste Sovjetike. Shkaku zyrtar i vdekjes ishte një hemorragji cerebrale, pas një serie goditjesh në tru që e kishin larguar gradualisht nga drejtimi aktiv i vendit.

Lenini, emri i vërtetë i të cilit ishte Vladimir Iliç Uljanov, ishte figura qendrore që ndryshoi rrjedhën e historisë ruse dhe ndikoi thellësisht politikën botërore të shekullit XX. Në fillim të viteve 1890, ai braktisi karrierën si jurist për t’iu përkushtuar studimeve marksiste dhe organizimit të veprimtarisë revolucionare mes punëtorëve dhe intelektualëve rusë, duke e parë regjimin carist si pengesën kryesore për emancipimin shoqëror.

Në vitin 1897, Lenini u arrestua nga autoritetet cariste dhe u internua në Siberi, ku kaloi tre vjet në mërgim të detyruar. Pas lirimit, ai u largua nga Rusia dhe jetoi në disa vende të Evropës Perëndimore. Pikërisht në këtë periudhë, në vitin 1903, ai udhëhoqi ndarjen e Partisë Socialdemokrate të Punëtorëve të Rusisë, duke themeluar fraksionin bolshevik – një organizatë militante e revolucionarëve profesionistë që synonte përmbysjen me dhunë të regjimit carist dhe vendosjen e një shteti marksist.

Revoltat e vitit 1905 shënuan përpjekjen e parë serioze për ndryshim, por dështuan. Vetëm më 1917, në kushtet e kolapsit ekonomik dhe ushtarak të Rusisë për shkak të Luftës së Parë Botërore, Lenini e pa momentin e përshtatshëm për marrjen e pushtetit. Në mars të atij viti, garnizoni ushtarak i Petrogradit u rebelua, ndërsa Car Nikolla II u detyrua të abdikojë, duke i dhënë fund monarkisë shumë-shekullore ruse.

Lenini u kthye menjëherë nga Zvicra drejt Rusisë, duke kaluar përmes territorit gjerman – armik në luftë – dhe mbërriti në Petrograd më 16 prill 1917. Vetëm gjashtë muaj më vonë, në tetor, bolshevikët, nën drejtimin e tij, rrëzuan Qeverinë e Përkohshme dhe morën pushtetin. Lenini u bë udhëheqësi absolut i vendit, duke vendosur themelet e diktaturës së proletariatit.

Megjithatë, konsolidimi i pushtetit bolshevik u përball me rezistencë të ashpër. Lufta civile dhe ndërhyrja e fuqive të huaja vonuan kontrollin e plotë të vendit deri në vitin 1920. Gjatë kësaj periudhe, qeveria e Leninit ndërmori masa radikale: shtetëzoi industrinë, konfiskoi tokat dhe shtypi me forcë kundërshtimin politik. Më 30 dhjetor 1922, u shpall zyrtarisht krijimi i Bashkimit të Republikave Socialiste Sovjetike (BRSS).

Pas vdekjes së tij, trupi i Leninit u balsamua dhe u vendos në një mauzole në Sheshin e Kuq, pranë Kremlinit në Moskë, ku ndodhet edhe sot. Qyteti i Petrogradit u riemërua Leningrad, në nder të udhëheqësit të ndjerë.

Pasardhësi i tij në krye të Bashkimit Sovjetik u bë bashkëpunëtori i afërt Jozef Stalin. Megjithatë, në testamentin politik të lënë para vdekjes, Lenini kishte shprehur shqetësimin e tij për karakterin dhe ambicien e Stalinit, duke paralajmëruar se përqendrimi i pushtetit në duart e tij mund të ishte fatal për vendin. Ky paralajmërim u injorua – dhe historia që pasoi do ta vërtetonte tragjikisht.

Përgatiti: L.Veizi

Në konferencën para ndeshjes kundër Juventusit, trajneri i Benficas, Jose Mourinho tha se në një të ardhme nuk e përjashton mundësinë që të ulet në stolin e bardhezinjve, paçka polemikave që ka pasur thuajse 16 vite më parë kur portugezi drejtonte Interin dhe fitonte tripletën e famshme të ngulitur mirë në historinë e zikaltërve.

“Për mua është surprizë kur trajnerë që nuk kanë asnjë arritje, pa histori, vendosen në krye të skuadrave të mëdha në botë. Për mua kjo është një surprizë e vërtetë.

Për mua, kur Milani merr Max (Allegrin), kur Juventusi merr Lucianon (Spallettin) apo kur Roma merr Gasperinin, kjo nuk është një surprizë për mua. Surprizë është kur njerëz që nuk kanë treguar asgjë marrin skuadra të përmasave të mëdha.

A doni të trajnoni Juventusin një ditë? Sigurisht”, tha pa dyshime 62-vjeçari Jose Mourinho.

Sot në orën 21:00 në Torino luhet sfida mes Juventusit dhe Benficas,e vlefshme për raundin e shtatë të fazës së ligës në Champions League./K.M

Gjykata e Posaçme dënoi këtë të mërkurë me 300 mijë lekë (të reja) gjobë Agron Shehajn, kreun e partisë “Mundësia”. Dënimi u vendos për fyerjen e kreut të ‘Shqipëria Bëhet’ Adriatik Lapaj, ndërsa u shpall i pafajshëm për ‘shpifje’.

Adriatik Lapaj e ka paditur Agron Shehajn për shpifje lidhur me një deklaratë që ky i fundit bëri duke pretenduar për lidhje të Lapajt me eksponentë të botës së krimit.

Shehaj e akuzoi Lapajn se kishte marrë 45 milionë lekë nga kompania “Merkaj 3 shpk”, e sekuestruar nga SPAK pasi përdorej për të pastruar paratë e grupit kriminal të  “Çopjave”.

Ai mohoi akuzat duke thënë se paratë nuk i kishte marrë dhe ishin thjesht detyrime ndaj shërbimeve si avokat ndaj kompanisë në fjalë./K.M

Në fundjavën e Golden Globe Awards 2026 në Los Angeles, Jennifer Lawrence u shfaq e qeshur dhe plot dritë krah bashkëshortit të saj, Cooke Maroney. Edhe pse ishte vetëm një hap larg çmimit për Aktoren më të Mirë falë filmit Die My Love, ajo e shfrytëzoi këtë periudhë promovimi për të folur jo vetëm për rolin e një nëne që përballet me sindromën pas lindjes, por edhe për një copëz shumë njerëzore nga jeta e saj reale.

E ftuar në episodin e 12 janarit të podcastit SmartLess me Jason Bateman, Sean Hayes dhe Will Arnett, aktorja tregoi hapur se martesa e saj nuk funksionon sepse janë “të njëjtë”, por pikërisht sepse janë të kundërt. Siç e përshkroi vetë, ajo është tipi me kokën “në re”, ndërsa Maroney është njeriu i rregullit, i organizimit dhe i kohës fikse. Ai, sipas saj, di të mbajë gjithçka në vijë, një aftësi që bëhet edhe më e vyer kur në shtëpi ke dy fëmijë të vegjël.

Por aty ku ka rend, ka edhe presion. Lawrence pranoi se shpesh ndihet në ankth nga pikëpamja e përpikmërisë dhe ritmit të tij, gjë që mund të sjellë keqkuptime dhe përplasje të vogla të përditshme. Pikërisht për këtë, ata vendosën një kompromis shumë konkret, që ajo e quan “rregulli i 15 minutave”.

Ideja është e thjeshtë dhe, sipas Jennifer-it, shpëtuese për raportin e tyre. Kur ajo nuk arrin t’i përmbahet një orari të saktë, qoftë për takime apo për menaxhimin e ditës me fëmijët, ka një “margjinë” prej 15 minutash për t’u riorganizuar dhe për t’u kthyer në ritëm pa u kthyer situata në fajësime. Një hapësirë e vogël që, në praktikë, ul tensionin dhe i bën të dy të ndihen në të njëjtën anë, jo kundër njëri-tjetrit.

Në të njëjtin episod, Lawrence bëri edhe një deklaratë që u komentua: tha se e konsideron veten një “nënë shtëpie”, edhe pse “sigurisht që punon”. Ajo shpjegoi se nuk e kishte fjalën për heqje dorë nga karriera, por për faktin që kur nuk është në xhirime, i pëlqen të jetë në shtëpi me familjen. Sipas saj, ritmi i punës shpesh vjen me periudha të ngjeshura xhirimesh, pastaj një rutinë të qetë, e më pas dy javë promovimi që janë të lodhshme dhe të shpejta.

Në fund, ajo e përshkroi marrëdhënien me Maroney-n si një lidhje ku gjërat e thjeshta kanë peshë. Ka treguar edhe më herët, në një intervistë të vitit 2021, se një nga kënaqësitë e saj është të shkojë në supermarket me bashkëshortin, sepse e sheh si një lloj metafore të martesës: ke një listë, ke nevoja reale, bashkëpunon dhe e çon punën deri në fund.

Nga rregulli i 15 minutave te kënaqësia e një liste blerjesh, Jennifer Lawrence e tregon martesën jo si një histori perfekte, por si një marrëveshje e përditshme: me dallime, me adaptim, me humor dhe me zgjedhjen për ta bërë jetën më të lehtë për të dy, sidomos kur familja është në qendër./KM

Çelësat e pasurisë së Valentino Garavanit janë në duart e një avokati holandez dhe një inxhinieri italian, shkruan Corriere della Sera. Udhëtimi në trashëgiminë “materiale” të stilistit të madh, i ndarë nga jeta më 19 janar në moshën 93-vjeçare, përfshin prona të mëdha imobiliare, jahte, shoqëri financiare të regjistruara në një ishull në Manica dhe objekte të panumërta arti. Por mbi të gjitha, përfshin shoqëri ku inxhinieri Piero Villani (77 vjeç) dhe avokati Ronald Feijen (70 vjeç) kanë një rol kyç. I pari zotëron gjithashtu kuota aksionare të vogla, por shumë domethënëse. Çfarë përmban V.G. Image në Guernsey? Sa ka paguar Valentino për kështjellën e Wideville në Francë? Sa vlen sot jahti i tij T.C. Blue One?

Kush janë trashëgimtarët?

Me shumë gjasë do të jetë një testament që do të përcaktojë trashëgiminë, pasi stilisti nuk kishte fëmijë, por një familje që nis me bashkëpunëtorin historik dhe partnerin e jetës Giancarlo Giammetti (83 vjeç), ish-modelin amerikan Bruce Hoeksema (68 vjeç) dhe brazilianin Carlos Souza, të njohur në Rio në vitin 1973, me bashkëshorten Charlene Shorto de Ganay dhe fëmijët Anthony dhe Sean. Dhe pastaj është stërnipi Oscar Garavani (59 vjeç), ish-model dhe sot dizajner.

Vlera e pasurisë

Të japësh një vlerësim të besueshëm të trashëgimisë është pothuajse e pamundur, sepse bëhet fjalë kryesisht për pasuri personale dhe private. Pas shitjes së shtëpisë së modës në vitin 1998 për rreth 500 miliardë lira, nuk ekziston më një aset korporativ “i fortë” dhe “i matshëm” përmes bilanceve, siç ka qenë, për shembull, Fininvest për familjen Berlusconi, Delfin për Del Vecchio, Giorgio Armani etj. Në çdo rast, ajo që lë Valentino ka një vlerë shumë të madhe, por, nga sa mund të nxirret nga dokumentet e konsultuara, është shumë larg niveleve miliardëshe.

Luksi dhe filantropia

Në Corso Venezia në Milano ndodhet një nga qendrat e gravitetit të perandorisë ekonomike. Nën holdingun Liter, ku inxhinieri Villani zotëron një grusht aksionesh, janë dy shoqëri. E para, Madat, është ajo në emër të së cilës është regjistruar prona romake në via Erode Attico, në kryqëzim me via Appia Pignatelli. Vila ku Valentino festoi 90-vjetorin e tij është e rrethuar nga një park i madh, ka mbi 30 dhoma dhe në bilanc figuron me 1,6 milionë euro, vetëm një pjesë e vogël e vlerës reale të tregut. FVG, shoqëria tjetër nën “çadrën” e Liter, është krijuar së fundmi me një strukturë imobiliare, por qëllimi kryesor është menaxhimi i “akademisë së frymëzuar nga stilisti Valentino Garavani”; “organizimi i eventeve, ekspozitave, sfilatave… menaxhimi i librarive mbi modën, artin, jetën e Valentinos ose të artistëve e stilistëve të tjerë”; “menaxhimi i arkivave të modës” të Valentinos ose të artistëve të tjerë. Në thelb, ajo është motori i Fondacionit Valentino Garavani dhe Giancarlo Giammetti.

Kostot e luksit

Kostot, veçanërisht për menaxhimin e vilës, janë të konsiderueshme: vitin e kaluar vetëm për mobilje antike u shpenzuan 81 mijë euro dhe në tre vite janë grumbulluar 2 milionë euro humbje që Valentino i ka mbuluar vetë. Por çfarë do të bëjnë trashëgimtarët? Edhe jahti është një luks shumë i kushtueshëm: TM Blue One 46 metra, i ndërtuar në vitin 1988 dhe i shlyer nga leasing-u nga stilisti në vitin 1994, i kushton mbi 1 milion euro në vit llogarive të Seaboats. Sot vlen 12,4 milionë euro. Kush e thotë këtë? Një ekspertizë e studios teknike të komandantit Alberto Bertacca.

Dokumentet e operacionit Wideville

Xhevahiri i kurorës është kështjella e shekullit XVI e Wideville pranë Parisit. E kaluar ndër shekuj nga markezë te kontë dhe nga dukë te baronë, në vitin 1981 u ble nga biznesmeni Jacques Setton, ish-numri një i Pioneer France, dhe bashkëshortja e tij. Më pas, në janar 1995, sipas dokumenteve origjinale të blerjes së fundit, shoqëria holandeze “Lyppens Gift Beheer b.v.” e përfaqësuar nga Ronald Feijen blen nga çifti Setton për 80,7 milionë franga franceze (12,3 milionë euro sipas kursit të vitit 1999) 100% të Sci Wideville, shoqëria që edhe sot zotëron “Chateau de Wideville”. Menjëherë pas kësaj, Lyppens, mjeti i përdorur nga Valentino, i kalon një aksion inxhinierit Villani dhe në vitin 2010 transferon përfundimisht 99,9% drejtpërdrejt te stilisti. Sot edhe kjo pronë ka një vlerë jashtëzakonisht më të lartë se shifrat e asaj kohe.

Nga Manica në Sienë

Interesa të tjera financiare të sipërmarrësit lidhen me një shoqëri në Guernsey, V.G. Image, e cila ka financuar blerjen, përmes Antennae srl, të vilës në Toskanë: 74 ambiente, një strehë e mrekullueshme e sipërmarrësit në zonën e Sienës. Valentino dhe Giammetti kanë mbajtur për një kohë të gjatë rezidencën në Londër, ku ende është aktive shoqëria financiare “Li Ter Ltd”, e menaxhuar nga Feijen, një nga të paktat kompani sot të përbashkëta (me Giammetti në pakicë) mes dy partnerëve historikë të shtëpisë së modës. Plotësisht jashtë radarëve mbeten disa prona imobiliare (Valentino nuk ka asgjë të regjistruar personalisht në Itali) dhe, natyrisht, pasuritë personale, veprat e artit dhe investimet financiare. Por është fakt se kudo ku ka një pjesë të pasurisë së Valentinos, shfaqen dy “mbikëqyrësit”: inxhinieri Villani dhe avokati Feijen./K.M

Ish-deputetja e PS-së Blerina Gjylameti është emëruar në krye të Autoritetit Kombëtar të Ushqimit. Gjylametit i është besuar ky institucion, që shpesh herë ka qenë të skandaleve, sa i takon rasteve të abuzuara të produkteve bujqësore me përmbajtje pesticidesh të ndaluara.

Më herët në krye të AKU-së ishte Manush Kullolli, detyrë që e mori në mars të 2025-ës.

Gjylameti në zgjedhjet e 11 majit nuk arriti që të merrte mandatin e saj, pasi Olta Xhaçka siguroi më shumë vota, duke bërë që socialistja të dalë jashtë Parlamentit./ K.M

Lëre pas intensitetin e Bricjapit dhe hyr me butësi në sezonin e Ujorit, i hapur, i barabartë, me një ritëm që të lejon të marrësh frymë. Nga 20 janari deri më 18 shkurt, energjia kozmike sjell një çlirim të ndjeshëm: një lehtësim i qetë pas presionit të akumuluar të muajit të kaluar. Ndershmëria dhe parimet […]

Mburoja është neni 11 i Kushtetutës. Ai i lejon Italisë të jetë pjesë e organizmave ndërkombëtarë që merren me paqen, por vetëm «në kushte barazie me shtetet e tjera». E kundërta, pra, e Board of Peace të ideuar nga Donald Trump, primus inter pares në atë që ngjan me një lloj OKB-je private, me biletë hyrëse prej një miliard dollarësh (të cilës Netanyahu ka njoftuar se dëshiron t’i bashkohet). «Jo, kështu nuk mund të bëhet». Ky është dyshimi i parë që po e shtyn Giorgia Melonin të mos hyjë në Këshillin e Paqes, i cili do të pagëzohet nesër mes maleve të Davosit. Ndoshta kryeministrja në fund do të jetë e pranishme, për arsye të marrëdhënieve të mira me Shtëpinë e Bardhë, në këtë takim. Megjithatë, ajo është gjithnjë e më e vetëdijshme se nuk mund të firmosë në emër të Italisë hyrjen në bord, përtej kuotës së anëtarësimit të nevojshme për të qenë pjesë e klubit trumpian.

Pastaj është edhe një element tjetër, i cili u vlerësua dje në fund të paradites nga kryeministrja gjatë një takimi me zëvendëskryeministrat Matteo Salvini dhe Antonio Tajani, si dhe me ministrin Guido Crosetto. Ratifikimi i traktateve ndërkombëtare duhet të kalojë përmes një vote të Parlamentit me një ligj të zakonshëm, dhe tashmë nuk ka më kohë. Për më tepër, Quirinali, pikërisht në bazë të nenit 11, do ta bllokonte menjëherë masën. E cila, ndër të tjera, do të ishte në rrezik të madh përpara Gjykatës Kushtetuese. «Nuk është një rrugë e përshkueshme», duket se është bindja në Palazzo Chigi, edhe nën shtysën e Forza Italia-s. Partia e Antonio Tajanit shprehet kundër hyrjes së Romës në bordin e Trumpit, që do të ishte një gur varri mbi të drejtën ndërkombëtare. Edhe Liga rreshtohet, duke iu referuar «qëndrimit të qeverisë», megjithëse më shumë se një salvinian i hedh një sy idesë së Nobelit të munguar për Trumpin. Jo vetëm kaq: kush në këto orë ka folur me Crosetton ka mbledhur më shumë se një dyshim, për të përdorur një eufemizëm, për këtë organizëm të ri, i cili për shkak të shtrirjes së gjerë të ftesave — ku përfshihet edhe Putini — nuk do të shërbejë më vetëm për stabilitetin e Gazës.

Pothuajse e panevojshme të thuhet: «jo»-ja e Melonit ndaj mikut Donald do të tingëllonte si një «çarje». Dhe do të vinte pas kritikave të kryeministres, private dhe publike, gjithmonë ndaj Trumpit për shkak të njoftimit të tarifave doganore ndaj vendeve evropiane që mbështesin Groenlandën. Sigurisht, ato të shqiptuara nga Meloni në Japoni ishin fjalë; këto, përkundrazi, do të ishin veprime.

Presidentja e Këshillit kalon ditën duke ndërtuar pozicionin italian në një vorbull kontaktesh me liderët e tjerë evropianë, dhe jo vetëm. Ndoshta nuk është rastësi që në mbrëmje del zëri i Financial Times: kryeministri britanik Keir Starmer është gati të vendosë të refuzojë ftesën e presidentit amerikan Donald Trump për t’iu bashkuar Board of Peace. Dhe pak më pas ja ku del Gjermania e Merzit, anëtarësimi i së cilës konsiderohet «i pamundur», të paktën «në formën e tanishme». Të mëdhenjtë evropianë janë gati të hedhin hapin pas. Në lojë mbeten Hungaria dhe Shqipëria. Është një situatë jo e thjeshtë për Melonin: Palazzo Chigi deri në orët e vona të mbrëmjes nuk jep informacione, shenjë e një shqetësimi politik dhe diplomatik. Mundësia që kryeministrja nesër të jetë në Davos si «vëzhguese», pa firmosur marrëveshje, mbetet në sfond.

Edhe sepse në Romë qarkullon zëri se një pjesë e eskortës së saj ka nisur prej të paktën një dite për në Zvicër për inspektimet rutinë, paraprake për ardhjen e presidentes së Këshillit (e pritur sot në Porta a Porta për një intervistë të regjistruar rreth orës 20, me rastin e 30-vjetorit të emisionit të Bruno Vespa-s). Të shkosh në Davos dhe të mos firmosësh. Ose të mos shkosh fare: ky është dilema. Axhenda e presidentes së Këshillit nesër ka një tjetër takim, këtë herë në Bruksel në orën 19: Këshilli Evropian i jashtëzakonshëm, i thirrur me ngut pas tensioneve të lidhura me Groenlandën të shkaktuara nga Trumpi dhe përgjigjes pasuese ndaj tarifave të reja të kërcënuara nga SHBA-ja.

Meloni dhe Tajani janë «të ftohtë» ndaj bazukës tregtare që Macron dëshiron të përdorë dhe vazhdojnë të thonë se për Ishullin e Akullit nevojitet një përgjigje e «gjithë NATO-s» ndaj ndërhyrjeve ruse dhe kineze. PD-ja dhe pjesa tjetër e opozitës kërkojnë që kryeministrja të raportojë në Kuvend. Sekretarja e PD-së, Elly Schlein, i ka shkruar gjithashtu kryeministres daneze Mette Frederiksen për t’i shprehur solidaritet përballë «shkeljes së standardeve të diplomacisë dhe të respektimit të shtetit të së drejtës». Ndërkohë mbetet nyja: çfarë të bëhet me Trumpin në Davos?/Corriere Della Sera

Blerina Gjylameti është emëruar në krye të Autoritetit Kombëtar të Ushqimit (AKU). Ish-deputetja e Partisë Socialiste zëvendëson në këtë post Manush Kullollin.

Gjylameti ka qenë deputete e Partisë Socialiste në Kuvendin e Shqipërisë për 12 vite.

Në zgjedhjet e përgjithshme të 11 majit 2025, Gjylameti nuk arriti të siguronte mandatin për të hyrë në Kuvend, por theksoi se do vijonte të kontribuojë për Partinë Socialiste.

Xhaxhai i Aleks Nikës, i cili u vra me 21 janar të 2011, Mark Nika ishte sot në SPAK ku u takua me prokurorin e çështjes Alfred Shehun për t’u njohur me ecurinë e hetimeve.

Ai foli me gazetarët, ndërsa tha se prokurori i ka konfirmuar se hetimet po ecin dhe kanë përparuar.

Mark Nika theksoi se pret që drejtësinë për nipin e tij ta japë SPAK sa më shpejt të jetë e mundur.

“Erdha për të mësuar ecurinë e hetimeve, sepse jemi palë në proces. Takova prokurorin e çështjes Alfred Shehun. Ai më shpjegoi se hetimet po ecin, kanë përparim. Së kur do të përfundojnë, kjo është një çështje e tyre.

Nuk u futa në hollësi. Ne kërkojmë me insistim që çështja të avancojë. Drejtësinë e kemi kërkuar nga drejtësia, jo nga e vjetra, por tani nga SPAK. Drejtësinë e duam vetëm nga SPAK.”, tha ai.

Policia e Tiranës ka arrestuar 3 persona, Artur Brahimaj, Ilir Zyberi dhe Artur Rushiti, pjesë e një grupi kriminal që shiste armë zjarri. Të tre të arrestuarit janë me precedentë penalë. 2 prej tyre u kapën në flagrancë, nga shërbimet e Policisë, në Tufinë, në tentativë për të shitur 2 armë zjarri kallashnikov. Identifikohet dhe shpallet në kërkim 1 shtetas, i dyshuar si pjesëtar i këtij grupi. Sekuestrohen 5 armë zjarri dhe municion luftarak, që dyshohet se do të shiteshin në Tufinë dhe në Fresk.  

“Si rezultat i hetimeve të kryera me metoda proaktive, gjatë 3 muajve, nga specialistët për Hetimin e Krimeve të Komisariatit të Policisë Nr. 4, në drejtimin e Prokurorisë së Tiranës, është organizuar në bashkëpunim me Forcën e Posaçme Operacionale të DVP Tiranë dhe është finalizuar operacioni i koduar “Anëtarët”. 

Në kuadër të këtij operacioni u vunë në pranga shtetasit: -I. Z., 55 vjeç, banues në Tiranë, i dënuar më parë për vrasje;  -A. B., 63 vjeç, banues në Tiranë, i dënuar më parë për prodhim dhe shitje të narkotikëve dhe   për mashtrim; A. R., 46 vjeç, banues në Tiranë, i dënuar më parë për plagosje të rëndë me dashje. Gjithashtu, u shpall në kërkim shtetasi E. S., 28 vjeç.

Gjatë operacionit, shërbimet e Policisë kanë kapur në flagrancë, në Tufinë, shtetasit A. B dhe I. Z., në tentativë për të shitur 2 armë zjarri kallashnikov”, tha policia.  

Nga hetimet dyshohet se këta shtetas ishin pjesëtarë të një grupi që shiste armë zjarri në zona të ndryshme të Tiranës, kryesisht në Tufinë dhe në Fresk. Vijojnë hetimet, në drejtimin e Prokurorisë, për dokumentimin e plotë të veprimtarisë kriminale të këtyre shtetasve, identifikimin dhe kapjen e shtetasve të tjerë të përfshirë në grup.

Materialet procedurale iu referuan Prokurorisë, për veprime të mëtejshme.

Kryeministri Edi Rama uroi Presidentin e Kosovës, Vjosa Osmani, për ftesën e marrë nga Donald Trump, për të qenë pjesë e Bordit të Paqes.

“Urime zonja Presidente, e dashur Vjosa, për marrjen e ftesës për t’u bërë pjesë e Bordit të Paqes, një gjest tejet domethënës i Presidentit Trump ndaj Kosovës, që forcon më tej marrëdhënien e Amerikës mike me popullin shqiptar, por që edhe jep një sinjal domethënës për sigurinë e përkatësinë e Kosovës në hapësirën e interesit të gjerë amerikan në botë”, tha Rama në një mesazh në X,.

“Edhe njëherë urime dhe dua të besoj se faktorët politikë të Kosovës, do ta çmojnë këtë dorë të shtrirë nga Presidenti i SHBA, si një gjest që nuk është aspak pa lidhje edhe me respektin për ty personalisht e  për rolin tënd ndërkombëtarisht”.

Kapedanit iu ushtrua kontroll në banesë me urdhër të SPAK. Kontrolli i Kapedanit u krye në 2024 në vazhdën e disa kontrolleve në banesat e disa gjyqtarëve dhe prokurorëve, emrat e të cilëve përmendeshin në Sky Ecc në dosjen e dy grupeve kriminale të Elbasanit. Gjatë asaj kohe SPAK kontrolloi edhe banesën e ish gjyqtares […]

Kryebashkiaku i Tiranës, Erion Veliaj, ka reaguar në rrjetet sociale me një postim ku kujton 21 Janarin. Veliaj shkruan se kanë 15 vite më parë, një nga ditët më të errëta përgjaku kryeqytetin dhe bën thirrje për drejtësi. Postimi i Veliajt: 21 Janar. Sot përulem me respekt para kujtimit të 4 qytetarëve që humbën jetën […]

Një grup kriminal që shiste armë zjarri është goditur nga policia e kryeqytetit. Tre anëtarë të grupit janë arrestuar dhe një tjetër është shpallur në kërkim. Artur Brahimaj, Ilir Zyberi dhe Artur Rushiti janë arrestuar si anëtarë të grupit të trafikut të armëve, ndërsa policia ka sekuestruar 5 armë zjarri dhe municion luftarak, që dyshohet […]

Një aksident rrugor me pasojë vetëm dëme materiale ka ndodhur mesditën e sotme në aksin Fier–Seman, në afërsi të Shkollës Bujqësore Gjatë një tentative për parakalim, një automjet tip “Opel” ka dalë nga rruga dhe ka përfunduar në kanalin anësor. Drejtuesi i mjetit ka arritur të shpëtojë pa lëndime serioze. Në vendngjarje ka mbërritur policia, […]