MIAMI (SHBA), 19 dhjetor /ATSH-AFP/ – Aleatët evropianë të Ukrainës po marrin pjesë në një takim tjetër në Shtetet e Bashkuara, ndërsa presidenti Donald Trump bën presion për një plan për t’i dhënë fund konfliktit me Rusinë.

I dërguari amerikan Steve Witkoff dhe dhëndri i presidentit, Jared Kushner, po organizojnë bisedime në Miami që do të përfshijnë negociatorin ukrainas, Rustem Umerov dhe përfaqësues nga Franca, Mbretëria e Bashkuar dhe Gjermania.

Bisedimet diplomatike që synojnë t’i japin fund konfliktit, i cili pritet të hyjë në vitin e tij të pestë në shkurt, janë përshpejtuar në javët e fundit pas publikimit të një plani nga administrata Trump, por ende nuk kanë rezultuar në një armëpushim.

Sekretari i Shtetit i SHBA-së, Marco Rubio tha të premten se Uashingtoni nuk do të imponojë asgjë.

“Ne nuk mund ta detyrojmë Ukrainën të arrijë një marrëveshje. Ne nuk mund ta detyrojmë Rusinë të arrijë një marrëveshje”, tha ai.

Sipas një zyrtari të Shtëpisë së Bardhë, pala amerikane është planifikuar të takohet veçmas me delegacionin rus në Florida këtë fundjavë, ndërsa përpjekjet diplomatike intensifikohen./ a.jor.

The post FOKUS – Evropianët bashkohen me ukrainasit dhe amerikanët për bisedime appeared first on Agjencia Telegrafike Shqiptare.

UASHINGTON, 19 dhjetor /ATSH-AFP/ – Presidenti amerikan, Donald Trump i kërkoi Ukrainës të lëvizë shpejt në negociatat mbi një plan për t’i dhënë fund konfliktit me Rusinë.

”Negociatorët janë afër arritjes së një qëllimi, por shpresoj që Ukraina të lëvizë shpejt. (…) Sa herë që zgjasin shumë, atëherë Rusia ndryshon mendje”, tha presidenti amerikan gjatë një konference për shtyp në Zyrën Ovale.

Një takim midis të dërguarve rusë dhe amerikanë mbi luftën në Ukrainë do të zhvillohet këtë fundjavë në Miami, Florida.

Shtëpia e Bardhë nuk dha asnjë detaj mbi përbërjen e delegacioneve.

Sipas ”Politico”-s, Shtetet e Bashkuara do të përfaqësohen nga i dërguari i saj në Ukrainë, Steve Witkoff, dhe dhëndri i Donald Trump, Jared Kushner, ndërsa Rusia pritet të dërgojë të dërguarin e saj ekonomik, Kirill Dmitriev.

Ky raund i ri bisedimesh do të vijë pasi Volodymyr Zelensky vuri në dukje përparime drejt një kompromisi midis Kievit dhe Uashingtonit mbi përmbajtjen e një plani që do t’i propozohet Moskës për t’i dhënë fund luftimeve, pas takimeve në Berlin midis zyrtarëve amerikanë, ukrainas dhe evropianë.

Megjithatë, presidenti ukrainas paralajmëroi se Rusia po përgatitej, sipas tij, për një tjetër “vit lufte” në vitin 2026.

Nga ana e tij, presidenti rus Vladimir Putin pohoi të mërkurën se objektivat e ofensivës së tij në Ukrainë “padyshim do të arrihen”.

Detajet e planit amerikan, të rishikuar në Berlin me ukrainasit, nuk dihen ende, por Kievi ka treguar se ai përfshin lëshime territoriale.

Dokumenti origjinal i Uashingtonit u perceptua nga Kievi dhe evropianët si kryesisht mbështetës i qëndrimit të Kremlinit./  a.jor.

The post SHBA – Trump i kërkon Ukrainës të lëvizë shpejt për t’i dhënë fund konfliktit appeared first on Agjencia Telegrafike Shqiptare.

UASHINGTON, 15 dhjetor /ATSH-AFP/ – Presidenti amerikan, Donald Trump pohoi sot se një marrëveshje për Ukrainën nuk ka qenë kurrë më afër.

Trump e bëri deklaratën pasi foli me presidentin ukrainas, Volodymyr Zelensky dhe disa udhëheqës evropianë.

“Ne jemi më afër sot sesa kemi qenë ndonjëherë, me një marrëveshje që i jep fund luftës me Rusinë”, deklaroi presidenti amerikan në Zyrën Ovale./  a.jor.

The post SHBA – Trump: Marrëveshja për Ukrainën nuk ka qenë kurrë më afër appeared first on Agjencia Telegrafike Shqiptare.

Më shumë se një milion familje mbetën pa energji elektrike pasi një seri sulmesh ruse gjatë natës goditën infrastrukturën energjetike dhe industriale.

Ministri i Brendshëm ukrainas Ihor Klymenko tha se ”pesë rajone u goditën dhe se të paktën pesë persona u plagosën”.

Po punohet për të shuar zjarret dhe për të rivendosur energjinë elektrike.

KIEV, 12 dhjetor /ATSH-ANSA/ – Presidenti ukrainas, Volodymyr Zelensky konfirmoi se bisedimet e paqes kanë ngecur kryesisht për shkak të fatit të Donbasit, veçanërisht të Donetskut.

SHBA do të donte që forcat ukrainase të tërhiqeshin dhe që ai territor të bëhej një “zonë e lirë ekonomike”.

Megjithatë, Moskës nuk po i kërkohet të bëjë të njëjtën gjë për pjesën që aktualisht posedon.

Një çekuilibër potencialisht fatal.

Zelensky është nën presion të madh nga SHBA dhe, për këtë arsye, për çështjen territoriale, ai përmend kutinë e votimit.

“Populli do të vendosë, përmes zgjedhjeve ose një referendumi”, tha ai.

Përshpejtimi është gjithnjë e më i dukshëm dhe shumë detaje kanë dalë në dritë në 24 orët e fundit.

Kancelari gjerman Friedrich Merz, në një konferencë për shtyp në Berlin me sekretarin e përgjithshëm të NATO-s Mark Rutte, sqaroi se kur foli me presidentin amerikan në telefon me homologët e tij nga Parisi dhe Londra, Shtëpia e Bardhë nuk e kishte marrë ende versionin e fundit të planit, i cili pasqyron qëndrimin euro-ukrainas.

Ai përmban mundësinë e “lëshimeve territoriale” që Ukraina “mund t’i pranojë”.

Tani, negociatat, sipas evropianëve, do të vazhdojnë gjatë ditëve të ardhshme dhe gjatë fundjavës, dhe më pas mund të ketë një takim në fillim të javës së ardhshme në Berlin.

“Pjesëmarrja e administratës amerikane do të varet kryesisht nga dokumentet mbi të cilat do të punojmë gjatë kësaj periudhe”, shtoi Merz.

Trump, shpjegon Shtëpia e Bardhë, shpreh zhgënjim me Moskën dhe Kievin.

“Ai nuk dëshiron më biseda, por veprime. Është i ngopur me takime vetëm për hir të takimeve”, shtoi ajo.

Ndërkohë, të shtunën, zyrtarë nga Ukraina, SHBA-ja, Franca, Gjermania dhe Mbretëria e Bashkuar do të takohen në Paris për të vlerësuar situatën, sipas Axios.

“Ka një takim të shtunën, do të shohim nëse do të marrim pjesë. Do të marrim pjesë nëse mendojmë se ka një shans të mirë për një marrëveshje”, tha Trump.

“Ne nuk jemi të përfshirë në luftë, por jemi të përfshirë në negociata”, theksoi ai.

Pika tjetër e ngërçit, sipas Zelenskyt, është fati i termocentralit bërthamor i Zaporizhias, më i madhi në Evropë dhe thelbësor për zhvillimin ekonomik të Ukrainës.

Aspekti ekonomik do të jetë objekt i një dokumenti të veçantë.

Ish-kryeministri holandez, në një fjalim në prag të vizitës së tij në Berlin, përsëriti se “siguria e Ukrainës është siguria jonë” dhe se “ne jemi objektivi i radhës i Rusisë; nuk mund të lejojmë veten të përçahemi”.

“Duhet të jemi gati të bëjmë atë që bënë baballarët dhe gjyshërit tanë në të kaluarën”, tha ai.

Megjithatë, toni i tij i errët merr parasysh frikën e Evropës, e cila tani i frikësohet një ”glasnosti” (”hapjeje”) midis Rusisë dhe SHBA-së në kurriz të saj.

Sugjerimi se ekziston një version i klasifikuar i strategjisë së sigurisë kombëtare të SHBA-së, e cila parashikon një format të ri jashtevropian, ”C5” (SHBA, Rusia, Kina, India dhe Japonia), dhe qëllimi për të “ndarë” Italinë, Austrinë, Poloninë dhe Hungarinë nga BE-ja, ka ardhur si një tjetër dush i ftohtë për Brukselin. Por, ka edhe nga ata që po shfaqin realizëm.

“Në vitet e fundit, të gjitha qeveritë amerikane janë përpjekur ta ndajnë BE-në kur bëhet fjalë për interesat e tyre: këto janë thjesht më të ndershme dhe kërkojnë aleatë ideologjikë”, komentoi një diplomat evropian.

Mes gjithë kësaj, Evropa po përparon në përdorimin e aseteve ruse, duke luajtur kartën e saj të fundit gjeoekonomike. 27 vendet kanë filluar procedurën me shkrim mbi propozimin për të përdorur Nenin 122 të Traktatit, emergjencën ekonomike, për të ngrirë përgjithmonë fondet e Bankës Qendrore Ruse (dhe për t’i liruar ato, do të kërkohet një shumicë e kualifikuar votash).

Presidenca daneze është e bindur se mbështetja e nevojshme është në dispozicion.

Pastaj do të përpunohet mekanizmi për sigurimin e parave për Ukrainën. Dhe këtu, loja bëhet më e ndërlikuar. Belgjika nuk është i vetmi vend skeptik. Italia, për shembull, gjithashtu heziton/ a.jor.

The post KOMENT – Pingpongu diplomatik për Ukrainën vazhdon, ndërsa tensionet rriten appeared first on Agjencia Telegrafike Shqiptare.

BERLIN, 11 dhjetor /ATSH-DPA/ – Përgjigjja e Ukrainës ndaj versionit të fundit të planit të paqes të SHBA-së trajton gjithashtu çështjen e lëshimeve territoriale, një pikë kyçe ngërçi në negociatat për t’i dhënë fund luftës së nisur nga Rusia, tha sot kancelari gjerman, Friedrich Merz.

”Kievi i dorëzoi përgjigjen e tij presidentit të SHBA-së Donald Trump të mërkurën duke detajuar cilat lëshime territoriale është e gatshme të bëjë Ukraina”, tha Merz gjatë një konference për shtyp me sekretarin e përgjithshëm të NATO-s, Mark Rutte në Berlin.

“Megjithatë, kjo është një pyetje që duhet t’i përgjigjet kryesisht presidenti ukrainas dhe populli ukrainas”, theksoi Merz, duke shtuar se edhe udhëheqësit evropianë e theksuan këtë pikë në bisedimet me Trump të mërkurën.

Presidenti ukrainas Volodymyr Zelensky deri më tani ka refuzuar vazhdimisht lëshimin e territorit ndaj Rusisë, një nga kërkesat kryesore të Moskës për ndalimin e luftimeve në Ukrainë.

Trump tha vonë të mërkurën se kishte folur në telefon me Merz, presidentin francez Emmanuel Macron dhe kryeministrin britanik, Keir Starmer rreth situatës në Ukrainë.

Merz tha se udhëheqësit evropianë ftuan palën amerikane për të diskutuar së bashku përgjigjen e Ukrainës në fundjavë.

Propozimi i Ukrainës, i cili është koordinuar me aleatët e saj evropianë, nuk ishte ende i njohur për Trump në kohën e telefonatës, sipas kancelarit, i cili e përshkroi bisedën si “vërtet shumë konstruktive”.

Merz tha se bisedimet e mundshme gjatë fundjavës mund të pasohen nga një takim në Berlin javën e ardhshme, por ende nuk ishte e qartë nëse SHBA-të do të merrnin pjesë./  a.jor.

The post GJERMANI – Merz: Përgjigjja e Ukrainës ndaj planit amerikan të paqes trajton edhe çështjet territoriale appeared first on Agjencia Telegrafike Shqiptare.

LONDËR, 9 dhjetor /ATSH/ – Ukraina po përgatitet të paraqesë në Shtëpinë e Bardhë një plan të rishikuar paqeje, ndërsa kërkon të shmangë lëshimet territoriale ndaj Rusisë, sipas BBC.

Kievi është gati të propozojë alternativa ndaj SHBA-së, pasi presidenti Volodymyr Zelensky përsëri përjashtoi dorëzimin e territoreve duke thënë se ai nuk kishte të drejtë ta bënte këtë sipas ligjit ukrainas ose ndërkombëtar.

Ai i bëri komentet ndërsa u takua me udhëheqësit evropianë dhe të NATO-s të hënën, pjesë e një shtytjeje kolektive për të penguar SHBA-në të mbështesë një marrëveshje paqeje që përfshin lëshime të mëdha për Ukrainën dhe të cilën aleatët kanë frikë se do ta linte atë të prekshme ndaj një pushtimi të ardhshëm.

Ndërkohë, qyteti i Sumy në Ukrainën veriperëndimore mbeti pa energji gjatë natës pas një sulmi me dron rus.

Guvernatori i rajonit tha se më shumë se një duzinë dronësh kishin goditur infrastrukturën e energjisë, sulmi i fundit i natës i Rusisë. Nuk u raportuan vdekje.

Turneu diplomatik i vazhdueshëm i Zelenskyt në Evropë vjen pas disa ditësh bisedimesh intensive midis negociatorëve amerikanë dhe ukrainas gjatë fundjavës, të cilat dështuan të prodhonin një marrëveshje për të cilën Kievi mund të binte dakord.

Zelensky duhej të informohej për atë samit privat të hënën nga kryenegociatori i tij Rustem Umerov, i cili shkroi në Telegram se do të jepte detaje për bisedimet e drejtpërdrejta midis SHBA-së dhe Presidentit rus Vladimir Putin.

Udhëheqësit evropianë po ecin në një rrugë të ngushtë midis mbështetjes së Ukrainës dhe mbajtjes së SHBA-së në ”bord”.

Presidenti ukrainas tha në një konferencë për shtyp se ekipi i tij mund t’u dërgonte një propozim të ri amerikanëve që sot.

Lidhur me temën e dorëzimit të territoreve, Zelensky tha se “Rusia po këmbëngul që të heqim dorë nga territoret, por nuk duam të lëshojmë asgjë.”

Ai vazhdoi duke thënë se “ne nuk kemi të drejtë ligjore ta bëjmë këtë, sipas ligjit ukrainas, kushtetutës sonë dhe ligjit ndërkombëtar. Dhe nuk kemi asnjë të drejtë morale”.

Zelensky ka pohuar prej kohësh se çdo ndryshim në kufijtë e Ukrainës do të duhet të autorizohet nga një referendum publik.

Diku tjetër, ai u tha gazetarëve se plani fillestar prej 28 pikash i propozuar nga SHBA-ja dhe i refuzuar nga Kievi dhe udhëheqësit evropianë si shumë i favorshëm për Rusinë, ishte reduktuar në 20 pika.

Ai tha se asnjë pikë pro ukrainase nuk ishte hequr nga drafti, megjithëse nuk kishte pasur as kompromis për çështjen e territorit.

Zelensky veçoi kontrollin e rajonit lindor të Donbasit dhe termocentralit bërthamor të Zaporizhias si ndër çështjet më të ndjeshme.

Versioni origjinal i planit të mbështetur nga SHBA-ja propozonte që Ukraina t’ia dorëzonte Rusisë kontrollin e plotë të Donbasit, pavarësisht faktit se forcat e Kremlinit nuk kanë qenë në gjendje ta kapin atë plotësisht pas pothuajse katër vitesh lufte.

Energjia e prodhuar në Zaporizhia, termocentrali më i madh bërthamor në Evropë, do të ndahej midis Rusisë dhe Ukrainës, sipas draftplanit.

Udhëheqësit në Kiev dhe në të gjithë Evropën kanë treguar se ka pasur përparim në rafinimin e atij drafti në javët e fundit dhe kanë lavdëruar administratën Trump për përpjekjen për të ndërmjetësuar përfundimin e luftimeve.

Por, samiti i organizuar me nxitim në Downing Street të hënën – ku morën pjesë Zelensky, kryeministri i Mbretërisë së Bashkuar Keir Starmer, presidenti francez Emmanuel Macron dhe kancelari gjerman Friedrich Merz – u pa gjerësisht si një shfaqje mbështetjeje për Ukrainën, ndërsa ajo kërkon t’i rezistojë presionit të Shtëpisë së Bardhë.

Ndërsa Mbretëria e Bashkuar dhe Franca kanë propozuar vendosjen e trupave ndërkombëtare në Ukrainë, disa lojtarë kryesorë të mbrojtjes në Evropë, përfshirë Gjermaninë dhe Italinë, kanë shprehur skepticizëm në lidhje me këtë ide.

Gjithashtu nuk është e qartë se deri në çfarë mase SHBA-ja do të ishte e gatshme të mbështeste çdo marrëveshje të ardhshme mbrojtëse për Ukrainën.

Pas bisedimeve në Londër, Zelensky fluturoi për në Bruksel për t’u takuar me shefin e NATO-s Mark Rutte dhe shefen e BE-së Ursula von der Leyen dhe do të takohet sot edhe me kryeministren Georgia Meloni në Itali.

Moska gjithashtu ka pretenduar se bisedimet me Shtëpinë e Bardhë kanë qenë konstruktive, pavarësisht pak indikacioneve publike se ka lëvizur në ndonjë nga qëllimet e përcaktuara nga Kremlini kur nisi pushtimin e tij në shkallë të plotë në shkurt 2022.

Të dielën, Trump tha se e shihte Zelenskyn si pengesën kryesore për sigurimin e një marrëveshjeje paqeje, diçka që ai e ka bërë një qëllim kyç të politikës së jashtme dhe të cilën presidenti pretendoi se do të ishte në gjendje ta arrinte shpejt gjatë fushatës zgjedhore presidenciale të vitit 2024.

Ai u tha gazetarëve se Rusia ishte “mirë” me planin e paqes të paraqitur për të dyja palët nga SHBA-të, por se ishte “pak i zhgënjyer që Zelensky nuk e ka lexuar atë”.

Pothuajse njëkohësisht, Zelensky tha se po priste të informohej nga Umerov pas tre ditësh diskutimesh me homologët e tij amerikanë në Miami.

“Disa çështje mund të diskutohen vetëm personalisht”, tha Zelensky./  a.jor.

The post KOMENT – Ukraina drejt një plani të ri paqeje, ku përjashtohet dorëzimi i territoreve appeared first on Agjencia Telegrafike Shqiptare.

KIEV, 6 dhjetor /ATSH-ANSA/ – Tre persona u plagosën mbrëmë në një sulm rus me raketa dhe dronë në rajonin e Kievit, sipas zyrtarëve lokalë të cituar nga mediat ukrainase.

Forcat Ajrore të Kievit raportuan se forcat e Moskës nisën një breshëri raketash – duke përfshirë raketa hipersonike Kinzhal – dhe dhjetëra dronë në qytete në periferi të kryeqytetit ukrainas.

Guvernatori rajonal Mykola Kalashnyk raportoi se një burrë 42-vjeçar u plagos në qytetin Fastiv, rreth 60 kilometra në jugperëndim të Kievit.

Autoriteti hekurudhor i Ukrainës tha se Rusia kreu një bombardim masiv të infrastrukturës.

Kalashnyk shtoi se dy gra, të moshës 40 dhe 46 vjeç, u plagosën në lagjen Vyshhorodskyi, pak në veri të Kievit. /os/

The post KIEV – Sulme me raketa dhe dron rus, tre të plagosur appeared first on Agjencia Telegrafike Shqiptare.

BRUKSEL, 1 dhjetor /ATSH-DPA/ – Kryediplomatja e Bashkimit Evropian deklaroi sot se përpjekjet e paqes për t’i dhënë fund luftës së Rusisë në Ukrainë mund të hyjnë në një fazë vendimtare pas një raundi të ri bisedimesh midis SHBA-së dhe Ukrainës gjatë fundjavës.

“Mund të jetë një javë vendimtare për diplomacinë”, u tha Kallas gazetarëve në Bruksel, duke mbërritur në një takim të ministrave të Mbrojtjes të BE-së.

“Dëgjuam dje se bisedimet në Amerikë ishin të vështira, por produktive”, tha ajo, duke shtuar se do të flasë me ministrat e Jashtëm dhe të Mbrojtjes të Ukrainës gjatë ditës.

Kallas përsëriti qëndrimin e BE-së se blloku duhet të rrisë presionin mbi Rusinë përmes sanksioneve ndaj Moskës dhe duke rënë dakord për t’i vënë në dispozicion Kievit asetet shtetërore ruse të ngrira sipas sanksioneve të BE-së si një kredi.

Ajo gjithashtu bëri thirrje për mbështetje shtesë ushtarake, financiare dhe humanitare.

Një pikë e diskutueshme nën diskutim midis Uashingtonit dhe Kievit kanë qenë kufizimet e mundshme në të ardhmen në madhësinë e forcave të armatosura të Ukrainës.

Kallas e hodhi poshtë idenë duke thënë se “ushtria ruse është ajo që në fakt përbën një rrezik për të gjithë”.

“Nëse ushtria e Rusisë është e madhe, nëse buxheti i tyre ushtarak është aq i madh sa është tani, ata do të duan ta përdorin atë përsëri”, paralajmëroi ajo.

Kallas iu shmang pyetjeve të një gazetari nëse i beson administratës amerikane për të gjetur një zgjidhje të mirë për Ukrainën.

“Ukrainasit janë atje vetëm. Nëse do të ishin së bashku me evropianët, ata padyshim do të ishin shumë më të fortë. Por, unë besoj se ukrainasit do të mbrojnë veten”, u përgjigj ajo./ a.jor.

The post BRUKSEL – Kallas: Ndoshta një javë vendimtare për përpjekjet e paqes për Ukrainën appeared first on Agjencia Telegrafike Shqiptare.

UASHINGTON, 1 dhjetor /ATSH-DPA/ – Presidenti i SHBA-së, Donald Trump deklaroi se  ishte optimist, pas bisedimeve midis përfaqësuesve të Ukrainës dhe administratës së tij mbi mënyrat për t’i dhënë fund luftës në Ukrainë.

Duke folur në bordin e ”Air Force One”, ai iu referua Ukrainës që ka “probleme të vogla të vështira” dhe tha se skandali i korrupsionit në vend “nuk ishte i dobishëm”.

Trump nuk iu përgjigj pyetjes së një gazetari nëse çështja do të pengonte bisedimet e paqes, duke deklaruar pak më pas se “mendoj se ka një shans të mirë që të mund të arrijmë një marrëveshje”.

Edhe një herë, Trump shprehu bindjen e tij se si Rusia ashtu edhe Ukraina dëshironin t’i jepnin fund luftës.

Presidenti i SHBA-së konfirmoi se i dërguari i tij special, Steve Witkoff, do të takohej me presidentin rus Vladimir Putin në Moskë javën e ardhshme, megjithëse nuk dha një datë specifike./  a.jor.

The post SHBA – Trump optimist për marrëveshjen me Ukrainën appeared first on Agjencia Telegrafike Shqiptare.

E ardhmja e luftës në Ukrainë po vendoset aktualisht në bisedimet e vazhdueshme në Shtetet e Bashkuara midis zyrtarëve të lartë ukrainas dhe amerikanë, me Uashingtonin që vë në tryezë lëshime territoriale. Ndërkohë nga ana tjetër Zelenskyy mobilizon aleatët e tij evropianë duke njoftuar se është në kontakt me Sekretarin e Përgjithshëm të NATO-s Mark Rutte dhe […]

The post Lufta në Ukrainë/ Uashingtoni presion Kievit për çështjet territoriale, çfarë pritet appeared first on BoldNews.al.

Dita Kombëtare e Pavarësisë së Shqipërisë u kremtua në zemër të Ukrainës, në një moment simbolik ku vlerat e lirisë dhe dinjitetit njerëzor marrin një kuptim të veçantë. Në kryeqytetin ukrainas u organizua një ceremoni për të nderuar 112-vjetorin e Pavarësisë, me pjesëmarrjen e përfaqësuesve diplomatikë, miqve të Shqipërisë dhe komunitetit shqiptar. Aktiviteti përçoi jo vetëm respekt për…

Source

TIRANË, 30 nëntor/ATSH/ Festa Kombëtare e Pavarësisë së Shqipërisë u kremtua në zemër të Ukrainës, në një moment simbolik ku vlerat e lirisë dhe dinjitetit njerëzor marrin kuptim të veçantë.

Në kryeqytetin ukrainas u organizua një aktivitet për të nderuar 113-vjetorin e Pavarësisë së Shqipërisë, ku morën pjesë përfaqësues diplomatikë, miq të Shqipërisë dhe anëtarë të komunitetit shqiptar.

Ceremonia reflektoi jo vetëm respektin për historinë shqiptare, por edhe solidaritetin me popullin ukrainas, i cili sot po përballet me sfida të rënda për mbrojtjen e sovranitetit dhe lirisë së tij.

Gjatë aktivitetit u vu në dukje se festimi i Pavarësisë së Shqipërisë në Kiev përçon një mesazh të fortë shprese dhe qëndrese, duke theksuar miqësinë mes dy popujve dhe mbështetjen e vazhdueshme të Shqipërisë për Ukrainën në këto kohë të vështira.

Aktiviteti u shoqërua me elemente kulturore dhe simbolike shqiptare, duke sjellë në Ukrainë shpirtin e festës kombëtare. /j.p/

1 nga 15

The post Pavarësia e Shqipërisë festohet edhe në Kiev appeared first on Agjencia Telegrafike Shqiptare.

LONDËR, 25 nëntor /ATSH/ – Gjashtë persona janë vrarë në sulmet ruse në Kiev gjatë natës, tha kryetari i bashkisë së qytetit, ndërsa përpjekjet diplomatike për t’i dhënë fund luftës vazhdojnë.

Në Rusi, zyrtarët thonë se tre persona janë vrarë pasi Ukraina kreu sulme në rajonet kufitare të Krasnodarit dhe Rostovit.

Kjo vjen ndërsa një zyrtar amerikan konfirmon për BBC-në se do të takohen sot me përfaqësues rusë në Abu Dabi.

Takimi do të vijë pas ditësh bisedimesh intensive mbi një plan të mbështetur nga SHBA-të për t’i dhënë fund luftës, i cili fillimisht shkaktoi kritika nga Kievi dhe udhëheqësit evropianë.

Presidenti ukrainas, Volodymyr Zelensky thotë se plani tani përmban “shumë nga elementët e duhur” pas negociatave.

Bisedime të mëtejshme janë planifikuar në ditët në vijim, dhe kryeministri britanik, Keir Starmer do të organizojë një takim virtual të aleatëve të Ukrainës më vonë./ a.jor.

The post FOKUS – Takim ruso-amerikan për Ukrainën në Abu Dabi appeared first on Agjencia Telegrafike Shqiptare.

KIEV, 25 nëntor /ATSH-ANSA/ – Të paktën katër persona janë vrarë në një sulm rus në lagjen Svyatoshynskyi të Kievit, sipas kreut të administratës ushtarake të qytetit, Timur Tkachenko.

Forcat ruse nisën një sulm të kombinuar ajror kundër Ukrainës duke përdorur raketa ”kruiz” dhe balistike, si dhe dronë sulmi.

Kievi kishte raportuar më parë dy vdekje dhe nëntë të plagosur.

Tkachenko deklaroi se “katër persona u vranë dhe të paktën tre u plagosën në lagjen Svyatoshyn”.

Një ndërtesë nëntëkatëshe në lagjen Dniprovskyi u godit gjithashtu, nsprsa zjarret në katet e sipërme janë shuar dhe po punohet për kërkimin e viktimave të mundshme.   /os/

The post KIEV – Rusia rrit sulmet ndaj kryeqytetit, të paktën gjashtë viktima appeared first on Agjencia Telegrafike Shqiptare.

GJENEVË, 22 nëntor /ATSH-AFP/ – Sekretari amerikan i Shtetit, Marco Rubio dhe Steve Witkoff, i dërguari diplomatik i presidentit amerikan, Donald Trump, kanë planifikuar të mbërrijnë nesër në Gjenevë për të diskutuar planin e presidentit amerikan me zyrtarët ukrainas.

Ky zyrtar tha gjithashtu se sekretari amerikan i Ushtrisë, Daniel Driscoll, i cili u takua me presidentin ukrainas Volodymyr Zelensky në Kiev të enjten, kishte mbërritur tashmë në qytetin zviceran.

“Do të kemi një takim paraprak informal sot në mbrëmje midis amerikanëve dhe ukrainasve”, specifikoi ai.

Zyrtarët evropianë priten gjithashtu në Zvicër të dielën për të diskutuar planin, por ende nuk janë dhënë detaje në lidhje me formatin e diskutimeve.

Ky dokument me 28 pika shihet me shqetësim të madh në Kiev, pasi përsërit disa kërkesa kryesore ruse: Ukraina lëshon territore, pranon një reduktim të madhësisë së ushtrisë së saj dhe heq dorë nga anëtarësimi në NATO.

Megjithatë, ai i ofron Kievit garanci perëndimore për sigurinë për të parandaluar çdo sulm të mëtejshëm rus.

Presidenti ukrainas Volodymyr Zelensky e hodhi poshtë këtë plan të premten, pavarësisht presionit nga Donald Trump dhe Vladimir Putin për ta pranuar atë, duke pohuar se ai do të propozonte “alternativa” për amerikanët.

Presidenti Volodymyr Zelensky nënshkroi edhe një dekret sot për delegacionin që do të marrë pjesë “në procesin e negociatave me Shtetet e Bashkuara dhe partnerë të tjerë ndërkombëtarë të Ukrainës, si dhe me përfaqësuesit e Rusisë”.

Sipas dekretit, delegacioni do të udhëhiqet nga krahu i djathtë i Zelenskyt, shefi i presidencës, Andriy Yermak, dhe do të përfshijë, ndër të tjerë, krerët e shërbimeve të sigurisë dhe ato sekrete plus Shefin e Shtabit të Përgjithshëm.

Të takuar në samitin e G20-s në Johanesburg, 11 vende, kryesisht evropiane, deklaruan se plani amerikan “do të kërkojë punë shtesë”, duke pasur frikë se mund ta lërë Ukrainën “të cenueshme ndaj sulmeve të ardhshme”./  a.jor.

The post GJENEVË – Rubio dhe Witkoff bisedime me Kievin për planin e paqes të Trump appeared first on Agjencia Telegrafike Shqiptare.

KIEV, 22 nëntor /ATSH-AFP/ – Ukraina së shpejti do të zhvillojë bisedime në Zvicër me Shtetet e Bashkuara për të diskutuar planin e Donald Trump për t’i dhënë fund luftës me Rusinë, njoftoi sot një zyrtar i lartë ukrainas.

“Në ditët në vijim, ne do të nisim konsultimet në Zvicër midis zyrtarëve të lartë ukrainas dhe amerikanë mbi parametrat e mundshëm të një marrëveshjeje të ardhshme paqeje”, deklaroi Rustem Umerov, kreu i Këshillit të Sigurisë së Ukrainës në Facebook.

“Ukraina po i afrohet këtij procesi me një kuptim të qartë të interesave të saj. Ky është një fazë e re në dialogun që ka vazhduar prej disa ditësh dhe që synon kryesisht të harmonizojë vizionin tonë për hapat e ardhshëm”, shtoi ai.

Presidenti Volodymyr Zelensky nënshkroi një dekret sot për delegacionin që do të marrë pjesë “në procesin e negociatave me Shtetet e Bashkuara dhe partnerë të tjerë ndërkombëtarë të Ukrainës, si dhe me përfaqësuesit e Rusisë”.

Sipas dekretit, delegacioni do të udhëhiqet nga krahu i djathtë i Zelenskyt, shefi i presidencës, Andriy Yermak, dhe do të përfshijë, ndër të tjerë, krerët e shërbimeve të sigurisë dhe ato sekrete plus Shefin e Shtabit të Përgjithshëm.

Në thelb është një delegacion ushtarak.

Të premten, Zelensky hodhi poshtë planin amerikan për t’i dhënë fund gati katër viteve të pushtimit rus dhe pohoi se do të përpiqej të sugjeronte zgjidhje alternative për Uashingtonin.

Teksti shihet me shqetësim në Kiev sepse përfshin disa kërkesa kryesore të bëra nga Rusia.

Plani përfshin, në veçanti, lëshimet territoriale nga Ukraina dhe një zvogëlim të madhësisë së ushtrisë së saj, por gjithashtu ofron garanci sigurie perëndimore për Kievin.

Donald Trump dhe Vladimir Putin, nga ana e tyre, ushtruan presion mbi Zelenskyn që ta pranonte tekstin./ /os/

The post FOKUS – Kievi fillon konsultimet në Zvicër me amerikanët për një marrëveshje paqeje me Moskën appeared first on Agjencia Telegrafike Shqiptare.

UASHINGTON, 22 nëntor /ATSH-DPA/ – Një plan paqeje për t’i dhënë fund luftës në Ukrainë duhet të ruajë sovranitetin e saj, tha zëvendëspresidenti i SHBA-së, JD Vance.

Presidenti i SHBA-së Donald Trump i ka dhënë Kievit një afat deri të enjten për t’iu përgjigjur planit të tij të fundit të paqes për Ukrainën, i cili i habiti vendet evropiane të cilat nxituan t’u përgjigjeshin propozimeve të SHBA-së.

Plani i SHBA-së do të kërkonte që Ukraina të bënte lëshime të rëndësishme, duke përfshirë tërheqjen nga pjesë të Ukrainës lindore që Rusia nuk i ka pushtuar, duke zvogëluar madhësinë e ushtrisë së saj dhe duke hequr dorë nga anëtarësimi në NATO.

Në një postim në platformën e mediave sociale X, Vance tha se çdo plan duhej të “ndalonte vrasjet duke ruajtur sovranitetin e Ukrainës” dhe të ishte i pranueshëm si për Rusinë ashtu edhe për Ukrainën.

“Ekziston një fantazi se nëse japim vetëm më shumë para, më shumë armë ose më shumë sanksione, fitorja është afër. Paqja nuk do të arrihet nga diplomatë të dështuar ose politikanë që jetojnë në një vend fantazie. Mund të arrihet nga njerëz të zgjuar që jetojnë në botën reale”, deklaroi Vance.

Udhëheqësit e Francës, Italisë dhe Mbretërisë së Bashkuar janë ndër ata që pritet të marrin pjesë në takimin e sotëm, ku do të përfshihet edhe presidentja e Komisionit Evropian Ursula von der Leyen, e cila njoftoi takimin në X./ /os/

The post SHBA – Vance: Plani i paqes në Ukrainë duhet të ruajë sovranitetin e saj appeared first on Agjencia Telegrafike Shqiptare.

UASHINGTON, 21 nëntor /ATSH-DPA/ – Presidenti amerikan, Donald Trump ka sugjeruar që një afat deri të enjten, më 27 nëntor, është i përshtatshëm për qeverinë ukrainase për t’iu përgjigjur planit më të fundit të paqes për Ukrainën.

Presidenti ukrainas, Volodymyr Zelensky, u njoh dje me planin.

Zelensky tha se ”Kievi do të punojë ngushtë me Uashingtonin për të gjetur zgjidhje dhe për të eksploruar alternativa”.

Cilat janë 28 pikat e planit amerikan të paqes?

1. Konfirmohet pavarësia e Ukrainës.
2. Një pakt gjithëpërfshirës mossulmimi do të lidhet midis Rusisë, Ukrainës dhe Evropës. Të gjitha paqartësitë e 30 viteve të fundit do të konsiderohen të zgjidhura.
3. Pritet që Rusia të mos pushtojë vendet fqinje dhe NATO të mos zgjerohet më tej.
4. Do të zhvillohet një dialog midis Rusisë dhe NATO-s, i ndërmjetësuar nga Shtetet e Bashkuara, për të zgjidhur të gjitha çështjet e sigurisë dhe për të krijuar kushte për shpërshkallëzim, me qëllim sigurimin e sigurisë globale dhe rritjen e mundësive për bashkëpunim dhe zhvillim ekonomik në të ardhmen.
5. Ukraina do të marrë garanci të besueshme sigurie.
6. Madhësia e Forcave të Armatosura të Ukrainës do të kufizohet në 600,000 njerëz.
7. Ukraina pranon të përcaktojë në kushtetutën e saj se nuk do t’i bashkohet NATO-s, dhe NATO pranon të përfshijë në statutin e saj një dispozitë që Ukraina nuk do të pranohet në të ardhmen.
8. NATO pranon të mos dërgojë trupa në Ukrainë.
9. Avionët luftarakë evropianë do të stacionohen në Poloni.
10. Garancia e SHBA-së:

— SHBA-të do të marrin kompensim për garancinë;

— Nëse Ukraina pushton Rusinë, ajo do të humbasë garancinë;

— Nëse Rusia pushton Ukrainën, përveç një përgjigjeje ushtarake vendimtare të koordinuar, të gjitha sanksionet globale do të rivendosen , njohja e territorit të ri dhe të gjitha përfitimet e tjera të kësaj marrëveshjeje do të revokohen;

— Nëse Ukraina lëshon një raketë drejt Moskës ose Shën Petërburgut pa shkak, garancia e sigurisë do të konsiderohet e pavlefshme.

11. Ukraina është e kualifikuar për anëtarësim në BE dhe do të marrë akses preferencial afatshkurtër në tregun evropian, ndërsa kjo çështje është duke u shqyrtuar.
12. Një paketë e fortë globale masash për rindërtimin e Ukrainës do të përfshijë, ndër të tjera:

— Krijimi i një Fondi Zhvillimi të Ukrainës për investime në industri me rritje të shpejtë, duke përfshirë teknologjinë, qendrat e të dhënave dhe inteligjencën artificiale.

— Shtetet e Bashkuara do të punojnë me Ukrainën për të rindërtuar, zhvilluar, modernizuar dhe operuar së bashku infrastrukturën e gazit natyror të Ukrainës , duke përfshirë tubacionet dhe objektet e magazinimit.

— Përpjekje të përbashkëta për rehabilitimin e zonave të prekura nga lufta për rehabilitimin, rindërtimin dhe modernizimin e qyteteve dhe zonave të populluara.

— Zhvillimi i infrastrukturës.

— Nxjerrja e mineraleve dhe burimeve natyrore.

— Banka Botërore do të zhvillojë një paketë të posaçme financimi për të përshpejtuar këto përpjekje.

13. Rusia do të ribashkohet me ekonominë globale:

— Heqja e sanksioneve do të diskutohet dhe do të miratohet gradualisht dhe rast pas rasti.

— Shtetet e Bashkuara do të hyjnë në një marrëveshje bashkëpunimi ekonomik afatgjatë për zhvillim të ndërsjellë në fushat e energjisë, burimeve natyrore, infrastrukturës, inteligjencës artificiale, qendrave të të dhënave, projekteve të minierave të metaleve të rralla në Arktik dhe mundësive të tjera të partneritetit me përfitim të ndërsjellë.

— Rusia do të ftohet të bashkohet me G8-ën.

14. Fondet e zotuara do të përdoren si më poshtë :

— 100 miliardë dollarë në asete të ngrira ruse do të investohen në përpjekjet e udhëhequra nga SHBA-të për rindërtim dhe investime në Ukrainë.

— SHBA-të do të marrin 50% të fitimeve nga kjo sipërmarrje. Evropa do të shtojë 100 miliardë dollarë për të rritur shumën e investimeve të alokuara për rindërtimin e Ukrainës. Fondet e bllokuara evropiane do të “shkrihen”. Pjesa tjetër e fondeve të bllokuara ruse do të investohet në një mjet të veçantë investimi SHBA-Rusi që do të zbatojë projekte të përbashkëta në fusha specifike. Ky fond do të synojë forcimin e marrëdhënieve dhe rritjen e interesave të përbashkëta, me qëllim krijimin e një nxitjeje të fortë për të mos u rikthyer në konflikt.

15. Do të krijohet një grup pune i përbashkët SHBA-Rusi për çështjet e sigurisë për të promovuar dhe siguruar pajtueshmërinë me të gjitha dispozitat e kësaj marrëveshjeje.
16. Rusia do ta sanksionojë ligjërisht politikën e saj të mos-agresionit ndaj Evropës dhe Ukrainës.
17. Shtetet e Bashkuara dhe Rusia do të bien dakord të zgjasin vlefshmërinë e traktateve për mospërhapjen bërthamore dhe kontrollin e armëve, duke përfshirë Traktatin START I.
18. Ukraina pranon të jetë një shtet jo-bërthamor në përputhje me Traktatin për Mospërhapjen e Armëve Bërthamore.
19. Centrali bërthamor i Zaporizhias do të vihet në funksion nën mbikëqyrjen e IAEA-s, dhe energjia elektrike e gjeneruar do të ndahet në mënyrë të barabartë midis Rusisë dhe Ukrainës — 50/50.
20. Të dy vendet zotohen të zbatojnë programe edukative në shkolla dhe shoqëri që synojnë promovimin e mirëkuptimit dhe tolerancës së kulturave të ndryshme dhe eliminimin e racizmit dhe paragjykimeve:

— Ukraina do të miratojë rregullat e BE-së mbi tolerancën fetare dhe mbrojtjen e pakicave gjuhësore.

— Të dy vendet do të bien dakord të shfuqizojnë të gjitha masat diskriminuese dhe të garantojnë të drejtat e medias dhe arsimit ukrainas dhe rus.

— Të gjitha ideologjitë dhe aktivitetet naziste duhen hedhur poshtë dhe ndaluar.

21. Territoret:

— Krimea, Luhansku dhe Donetsku do të njihen de facto si ruse, përfshirë edhe nga Shtetet e Bashkuara.

— Statusi territorial në Kherson dhe Zaporizhia do të “ngrihet” përgjatë vijës së kontaktit, që do të thotë njohje de facto përgjatë vijës së kontaktit.

— Rusia do të heqë dorë nga territore të tjera jashtë pesë rajoneve.

— Forcat ukrainase do të tërhiqen nga pjesa e rajonit të Donetskut që ato aktualisht kontrollojnë, dhe kjo zonë tërheqjeje do të konsiderohet një zonë neutrale e çmilitarizuar sigurie , e njohur ndërkombëtarisht si territor që i përket Federatës Ruse. Forcat ruse nuk do të hyjnë në këtë zonë të çmilitarizuar.

22. Duke rënë dakord për marrëveshjet e ardhshme territoriale, si Federata Ruse ashtu edhe Ukraina zotohen të mos i ndryshojnë këto marrëveshje me forcë. Asnjë garanci sigurie nuk do të zbatohet në rast të shkeljes së këtij angazhimi.
23. Rusia nuk do ta pengojë Ukrainën të përdorë lumin Dniepër për aktivitete tregtare dhe do të arrihen marrëveshje për transportin e lirë të grurit përmes Detit të Zi.
24. Do të krijohet një komitet humanitar për të zgjidhur çështjet e pazgjidhura:

— Të gjithë të burgosurit dhe trupat e mbetur do të shkëmbehen në bazë të parimit “të gjithë për të gjithë”.

— Të gjithë të burgosurit dhe pengjet civile do të kthehen, përfshirë fëmijët.

— Do të zbatohet një program për ribashkimin familjar.

— Do të merren masa për të lehtësuar vuajtjet e viktimave të konfliktit.

25. Ukraina do të mbajë zgjedhje pas 100 ditësh.
26. Të gjitha palët e përfshira në këtë konflikt do të marrin një amnisti të plotë për veprimet e tyre gjatë luftës dhe do të bien dakord të mos bëjnë asnjë pretendim ose të shqyrtojnë ndonjë ankesë në të ardhmen.
27. Kjo marrëveshje do të jetë ligjërisht e detyrueshme. Zbatimi i saj do të monitorohet dhe garantohet nga Këshilli i Paqes, i kryesuar nga presidenti Donald J. Trump . Do të vendosen sanksione për shkeljet.
28. Pasi të gjitha palët të bien dakord për këtë memorandum, armëpushimi do të hyjë në fuqi që nga momenti që të dyja palët të tërhiqen në pikat e dakorduara për të filluar zbatimin e marrëveshjes./ (sipas https://www.euronews.com)  a.jor.

The post FOKUS – Plani amerikan i paqes për Ukrainën appeared first on Agjencia Telegrafike Shqiptare.

KIEV, 2 nëntor /ATSH-DPA/ – Një ekspert ukrainas i ka dhënë fund spekulimeve rreth një videoje që tregon një qen blu që endet në zonën e kontaminuar të katastrofës bërthamore të Çernobilit, në Ukrainën veriore.

“Ky është absurditet”, u tha Serhiy Kireev gazetarëve në Çernobil.

Kireev, i cili drejton kompaninë shtetërore përgjegjëse për monitorimin e zonës, ”Ecocenter”, konfirmoi se ”nuk ka qen blu në Ukrainën veriore”.

”Qentë janë sterilizuar për të frenuar shumimin e tyre. Ngjyra blu tregon se cilat kafshë i janë nënshtruar procedurës”, shpjegoi ai.

“Ngjyra është e padëmshme për këta qen”, tha Kireev.

Pamjet e disa qenve blu kishin qarkulluar gjerësisht në mediat ndërkombëtare, duke nxitur spekulime rreth efekteve të kontaminimit radioaktiv të zonës.

Shpërthimi i një reaktori bërthamor në termocentralin e Çernobilit në ish-Bashkimin Sovjetik në prill të vitit 1986 konsiderohet katastrofa më serioze në historinë e përdorimit civil të energjisë bërthamore./  /os/

The post KIEV – Zbulohet misteri i qenit blu në centralin bërthamor të Çernobilit appeared first on Agjencia Telegrafike Shqiptare.