Futbollisti Nemanja Matic iu bashkua këtë verë ekipit të Sassuolos, ku menjëherë fitoi vend në formacionin titullar, ndërsa mbron ngjyrat e klubit italian me Aro Muricin.

Gjatë një interviste për portalin “Four Four Two”, Matić u pyet për festimet e Xherdan Shaqirit dhe Granit Xhakës kundër Serbisë në Kupën e Botës, në vitet 2018 dhe 2022, ku të dy përdorën shqiponjën dykrenare – simbolin e flamurit shqiptar.

Matic e kritikoi këtë veprim, duke e konsideruar si një fitore politike, jo sportive.

“Unë i respektoj ata si futbollistë, kam luajtur kundër tyre disa herë në Ligën Premier. Por me këto gjëra të vogla ata fitojnë pikë të lira politike. Ata janë rritur në Zvicër. Me një veprim të tillë, nuk tregon respekt për vendin për të cilin luan. Nëse e do kaq shumë Shqipërinë, atëherë pse nuk luan për Shqipërinë? Kjo është pyetja ime”, deklaroi Matic.

Ai shtoi se dashuria për vendet të ndryshme nuk është problem, por sinqeriteti është thelbësor.

“Mund të duash disa vende, kjo nuk është problem. Unë e dua Serbinë, është vendi im. Gjithashtu e dua Anglinë, kam kaluar shumë kohë atje. Por kurrë nuk do të them se e dua Anglinë më shumë se Serbinë. Duhet të jesh i sinqertë”.

“Kam luajtur kundër Xhakës shumë herë dhe kurrë nuk kam pasur problem. Gjithmonë shtrëngonim duart, ai është një lojtar i mirë – ashtu si edhe Shaqiri. Por unë kurrë nuk do ta bëja për të provokuar dikë. I respektoj të gjithë”, ka thënë mesfushori. /Telegrafi/

Ish-mesfushori i Baselit Carlos Varela e ka kritikuar tejmase sulmuesin shqiptar Xherdan Shaqiri, duke pretenduar se ky i fundit nuk bën asgjë përpos ankesave në fushë.

Në një intervistë për “Blue Sport”, Varela thotë se po të ishte në të njëjtën skuadër me Shaqirin do ta godiste për ankesat e shumta.

“Shaqiri? Nuk mundëm ta mbajë më... Nëse do ta kisha në skuadër, do të shkoja ta godisja. Jam lodhur. Edhe kur dështon në pasime, është gjithnjë faji i tjetërkujt”.

Varela, i cili pas karrierës e ka nisur punën si analist ndër të tjera edhe kërkoi që Shaqiri të dënohet më shumë nga gjyqtarët shkaku “që bënë protesta”.

“Në ndeshjen ndaj Winterthur, gjyqtari e paralajmëron në një pikë të lojës, por duhej ta ndëshkonte. Nëse doni ta qetësoni, jepni karton të verdhë. Ai nuk ka të drejtë të ankohet kështu”.

“Të gjitha vendimet e gjyqtarit janë të gabuar sipas Shaqirit... edhe skuadra e tij më gjasë është lodhur. Po, ai shënon gola, ka talent, nuk po argumentojmë për këtë pjesë, por sanksionone. Është e mërzitshme ta shohim ligën ku mund të ankohet 25 herë në një ndeshje dhe ende nuk ka marrë karton”.

Ndërkohë, Shaqiri nuk ka reaguar fare lidhur me analizën e çuditshme të ish futbollistit spanjoll./Telegrafi/

Xherdan Shaqiri, në mënyrë befasisht, nuk e nisi si titullar të dielën te Baseli në ndeshjen në shtëpi ndaj Laussanes. Kampioni i Zvicrës vazhdoi serinë negative në “St. Jakob-Park”, pasi për ndeshjen e tretë rresht në shtëpi nuk arriti të shënojë gol, ndërsa takimi i Superligës helvetike përfundoi pa gola.

Shaqiri u inkuadrua në lojë në pjesën e dytë dhe pati rastin më të mirë të ndeshjes, por nuk arriti ta konkretizojë, duke lënë Basel-in pa fitoren e pritur para tifozëve të vet.

Trajneri i Baselit, Ludovic Magnin, ka shpjeguar arsyen pse vendosi që kapiteni i skuadrës të nisë nga stoli.

“Kemi biseduar pas ndeshjes me Aston Villan për mënyrën se si ndihet dhe për gjendjen e muskujve të tij. Më pas kemi analizuar të dhënat fizike dhe kemi vendosur që të luajë si zëvendësues”, ka deklaruar Magnin.

Magnin shtoi se skuadrës i mungoi pasimi final dhe besimi i nevojshëm për ta zhbllokuar ndeshjen, duke pranuar në mënyrë indirekte se mungesa e Shaqirit nga minuta e parë u ndje dukshëm në lojën ofensive.

Baseli vazhdon të jetë shumë i varur nga forma e Xherdan Shaqirit, ndërsa çdo rënie e tij fizike apo mungesë në formacion reflektohet menjëherë në rezultatet dhe kreativitetin e ekipit.

Këtë edicion, Baseli zë pozitën e katërt pas 17 xhirove me 28 pikë, gjashtë më pak se lideri aktual, Thun./Telegrafi

Xherdan Shaqiri është rikthyer si protagonist te Baseli në fitoren 2-1 në udhëtim te Winterthur.

Sulmuesi gjilanas ishte më i miri te Baseli, duke shënuar edhe golin e parë në këtë sfidë.

33-vjeçari shkëlqeu në këtë sfidë, duke fituar edhe një penallti.

Shaqiri mori notën 8,3 nga SofaScore që ishte një nga notat më të larta në gjithë Superligën e Zvicrës. /Telegrafi/

Xherdan Shaqiri ka vazhduar shkëlqimin me Baselin, teksa ka shënuar gol ndaj Winterthurit.

Ylli kosovar e ka nisur nga minuta e parë si gjithmonë duelin ku Baseli fitoi me rezultat 1-2 në udhëtim.

Ishte minuta e 29-të e ndeshjes, ku Shaqiri pranoi një top në zonë dhe me një gjuajtje të saktë realizoi për 0-1.

Kapiteni i Baselit fitoi penallti në minutën e 65-të, por ia la atë ta ekzekutonte Otele, i cili dështoi nga pika e bardhë.

Gjithsesi Baseli fitoi në fund për të vazhduar garën për titullin kampion.

Për Shaqirin ky ishte goli i gjashtë sezonal, derisa ka edhe tetë asistime. /Telegrafi/

Trajneri i FC Basel, Ludovic Magnin, ka dashur të shuajë çdo dilemë sa i përket debatit që është krijuar së fundi rreth ekzekutuesit të penalltive te skuadra zvicerane.

Pas barazimit pa gola kundër St. Gallen, ku Xherdan Shaqiri humbi penalltinë e tretë të sezonit, trajneri kishte paralajmëruar se do të analizohej hierarkia e gjuajtësve brenda ekipit — deklaratë që shkaktoi menjëherë reagime në Basel.

Megjithatë, Magnin e sqaroi çështjen me tone të qarta, duke konfirmuar se Shaqiri do të vendosë nëse do të vazhdojë t’i gjuajë ose jo.

"Nëse Shaqiri dëshiron të vazhdojë të gjuajë penallti, ai do t’i gjuajë ato. Nuk ka diskutim për këtë".

"Kjo më dukej gabim. Thashë që do ta shqyrtonim. Kështu u interpretua. Kjo më kujtoi se jam në Basel tani. Në Lausanne, një deklaratë e tillë nuk do të kishte pasur asnjë efekt fare", shtoi ai me një buzëqeshje.

Momenti kur Amir Shaipi ia pret penalltinë Xherdan Shaqirit

Magnin pranoi se humbja e dy penalltive radhazi nga Shaqiri është e dhimbshme dhe fatkeqe për ekipin, por insistoi se besimi tek kapiteni mbetet i palëkundur.

"Ai është kapiteni ynë dhe nëse e merr topin, do ta marrë. Për mua nuk ka absolutisht asnjë arsye për ta vënë në dyshim”.

Ky qëndrim i trajnerit dëshmon qartë se pozita e Shaqirit si lider i skuadrës mbetet e fortë, pavarësisht periudhës së vështirë para portës nga pika e bardhë./Telegrafi/

Sulmuesi Xherdan Shaqiri thotë se do të ishte e shkëlqyer nëse Kosova kualifikohet në Kampionatin Botëror, ndërsa është i lumtur me përparimin që kanë bërë “Dardanët”.

Ai në një intervistë së fundmi përgëzoi përmirësimin e madh që ka bërë Kosova, ku edhe prandaj shumë lojtarë po duan ta veshin fanellën dardane.

Fillimisht, Shaqa tregoi se bisedon shpesh me presidentin e FIFA-s Gianni Infantino, si dhe që i shkroi kur mori medalje nderi në Kosovë.

“U takuam rastësisht. Po udhëtonim për në Londër dhe asistenti i tij u ulë pranë meje, pastaj nisëm të bisedonim. Rrugës për në aeroport mora një mesazh në ËhatsaApp nga Gianni (Infantino) dhe pastaj kemi folur rregullisht. Ai së fundmi mori një çmim në Kosovë dhe e urova”.

I pyetur për formatin e ri të Kupës së Botës, Shaqiri shtoi se është adekuati meqenëse edhe kombëtaret kanë më shumë gjasa. Ai përmendi që Shqipëria dhe Kosova janë ende në garë shkaku i play-offit.

“Ka kombëtare që po garojnë për herë të parë dhe mendoj se është më mirë që kombëtaret më të vogla kanë më shumë shanse kualifikimi. Mund të shihni se Shqipëria dhe Kosova mund të kualifikohen përmes play-offit”.

Në fund, i pyetur për mundësinë që Kosova të jetë në Botëror, Shaqiri me entuziazëm nënvizoi se do të ishte madhështore.

“Kosova në Botëror? Do të ishte një histori e jashtëzakonshme. Do të ishte turneu i tyre i parë. Fakti që kanë ende mundësi tregon se çfarë progresi kanë bërë. Mund të shihni se gjithnjë e më shumë lojtarë po duan të luajnë për Kosovën, prandaj po përmirësohen dhe po ia dalin nën presion. Tani janë skuadër me lojtarë në liga të mira, prandaj edhe kanë një ndihmë më të madhe”, deklaroi ai për “watson.ch”.

Në fund, ylli i Baselit shtoi se nuk po e konsideron pensionimin.

“Jo, ndihem mirë. Zgjohëm në mëngjes dhe dua të luaj çdo ditë futboll, sidomos në ndeshjet si vendas. Kjo më jep energji dhe fuqi”./Telegrafi/

Përzgjedhësi Murat Yakin thotë se nuk e ka pritur rikthimin e Granit Xhakës në Ligën Premier, ndërsa shtoi se Zvicra është mbushur me plot yje, prandaj duhet fokusuar te ardhmja dhe jo të Xherdan Shaqiri.

Zvicra është në Kosovë ku po e zhvillon stërvitjen e fundit në “Fadil Vokrri” para përballjes, që luhet të martën në Prishtinë.

Yakin në konferencë lavdëroi shumë Xhakën për kualitetin që po e dëshmon vazhdimisht.

“Nuk prisja që Granit Xhaka të rikthehet në Ligën Premier. Është e pabesueshme çfarë ka arritur të klubi i sapo promovuar Sunderland. Graniti është lider, luftues, këto kualitete janë shumë të rëndësishme para ndeshjes së nesërme”.

Ndërsa, për Shaqën tha se “Helvetikët” janë fokusuar te ardhmja.

“Sa i përket Xherdan Shaqirit, statistikat te Baseli janë të jashtëzakonshme. Por, kemi lojtarë të mirë në pozitën e tij: Ndoye, Vargas, Manzambi dhe të mos harrojmë Sanches. Kemi një miks të mirë. Nuk jam unë ai që e mbylli derën”.

Yakin në fund foli pak edhe për lidhjen me Granit Xhakën, për të cilin theksoi se nuk ka qenë aq e madhe, thjesht mediat i kanë dhënë kuptim tjetër.

“Nuk ka ndryshuar shumë që prej ndeshjes me Kosovën para dy viteve. Ishte nxjerrë nga konteksti. Jemi marrë dhe kemi udhëtuar së bashku në këtë rrugë. Është lider. Sigurisht kemi qenë të zhgënjyer që pranuam gol në fund, por nuk ishte aq dramatike sa e keni bërë”.

Kujtojmë përballja mes Kosovës dhe Zvicrës do të zhvillohet të martën prej orës 20:45./Telegrafi/

Xherdan Shaqiri, një nga futbollistët më të suksesshëm në historinë e Zvicrës, ka folur sërish për njërin prej momenteve më të përfolura të karrierës së tij: festimin me shqiponjën dykrenare pas golit kundër Serbisë në Botërorin “Rusia 2018”.

Bashkë me Granit Xhakën, të dy u bënë kryelajm në media botërore pas fitores 2-1, por edhe shënjestër e provokimeve që kishin nisur ditë të tëra para ndeshjes.

I ftuar në emisionin “Gredig direkt” në televizionin zviceran SRF, Shaqiri tregoi se çfarë kishte ndodhur prapa skenave në prag të asaj përballjeje.

“Shumë gjëra janë shkruar atëherë. Familjet tona dhe ne vetë u provokuam jashtëzakonisht shumë nga serbët para ndeshjes, sidomos në rrjetet sociale. Kjo na shtoi edhe më shumë motivin. Në fund të fundit, për ne rëndësi kishte vetëm fitorja sportive”, tha Shaqiri.

Ylli me prejardhje nga Zhegra e Gjilanit ka luajtur 125 ndeshje për Zvicrën, duke u bërë një nga futbollistët më të rëndësishëm të kombëtares helvetike. Ai foli edhe për çështje të tjera, si fëmijëria e vështirë, lidhja emocionale me Kosovën dhe mundësinë e rikthimit te Baseli.

Dueli Kosovë – Zvicër, me emocione të dyfishta për Shaqirin

Ndeshja mes Kosovës dhe Zvicrës më 18 nëntor në stadiumin “Fadil Vokrri” do të jetë një sfidë e veçantë për sulmuesin zviceran. Shaqiri nuk e fsheh dot emocionin që i sjell ky takim.

“Sigurisht se jam për të dyja, për Kosovën dhe Zvicrën. Por do ta mbështes ‘Nati’-n”, u shpreh ai.

Aktualisht, Zvicra kryeson grupin me 10 pikë, tre më shumë se Kosova. Nëse Kosova merr pikë ndaj Sllovenisë dhe Suedia e mposht Zvicrën, atëherë sfida në Prishtinë mund të kthehet në “finale” për vendin e parë në grup.

Shaqiri shtoi gjithashtu se Zvicra ka përfituar shumë nga personalitetet e ndryshme brenda ekipit dhe se “jo të gjithë zviceranët e kanë shpirtin luftarak të kosovarëve”, duke nënvizuar rolin e futbollistëve me prejardhje të huaj në sukseset e kombëtares. /Telegrafi/

Në një intervistë për televizionin publik të Zvicrës (SRF), Xherdan Shaqiri flet për rritjen e tij mes dy kulturave, fillet e karrierës, prindërit, provokimet e palës serbe ndaj tij dhe familjes së tij dhe për të ardhmen si futbollist.

Shaqiri ka bërë një intervistë e cila është publikuar gjatë ditës së sotme (e premte) dhe Telegrafi ua sjell atë në formën e plotë pyetje-përgjigje.

Si shënohen gola të rëndësishëm nën presion të madh?

Xherdan Shaqiri: Kjo lidhet shumë me instinktin. Shpesh vendosin milisekondat. I dua golat spektakolarë dhe kam provuar shpesh gjëra të guximshme. Por asnjëherë nuk kam hyrë në një ndeshje me mendimin për të shënuar një gol të veçantë.

A ju duk i vështirë kthimi në Zvicër?

Xherdan Shaqiri: Rikthimi te FC Basel ka qenë gjithmonë një ëndërr që e kisha në mendje. Të dilja edhe një herë para prindërve të mi në stadiumin St. Jakob-Park. Dhe, sigurisht, ta çoj përsëri FC Baselin aty ku e ka vendin.

A krijon roli juaj qendror në Basel edhe presion?

Xherdan Shaqiri: Patjetër, por më pëlqen presioni pozitiv. Megjithatë, sapo përmendet emri im, gjithmonë shkruhet shumë.

Mendoni se raportimet janë negative?

Xherdan Shaqiri: Aspak. Si futbollist duhet të mësosh të përballosh tituj negativë pas ndeshjeve të dobëta. Por kur vendosin vetëm “Shaqiri” në titull për të gjeneruar klikime, aty mbaron mirëkuptimi im.

Si ju ka formuar rritja në kushte të thjeshta?

Xherdan Shaqiri: Shumë. Ajo më ka çuar aty ku jam sot. Por jam edhe krenar për prindërit e mi, sepse kurrë nuk kanë futur hundët në rrugën time.

Qëllimi juaj ka qenë të fitonit aq sa të mos punonin më prindërit. Ju pëlqen të merrni përgjegjësi?

Xherdan Shaqiri: Ëndrra ime ka qenë që nga kontrata ime e parë si profesionist të nxirrja prindërit nga bota e punës dhe të kujdesesha për ta. Këtë e kam realizuar. Çdo gjë që erdhi pas kësaj ka qenë thjesht një “desert”.

A janë më luftarakë lojtarët me prejardhje të huaj?

Xherdan Shaqiri: Ndoshta jo të gjithë zviceranët kanë vullnetin luftarak të një kosovari, por ata kanë saktësi në kohë apo aftësi shprehëse. Kombëtarja (zvicerane) ka përfituar prej vitesh, sepse karaktere të ndryshme sjellin cilësi të ndryshme.

Në çfarë mënyre u ndihmon futbolli të rinjve me prejardhje të huaj për t’u integruar?

Xherdan Shaqiri: Sporti ndihmon përgjithësisht dhe i largon të rinjtë nga rruga. Ai nuk formon vetëm trupin, por edhe karakterin e njeriut.

A shqetësoheshin prindërit tuaj se mund të përfshiheshit në rrethe të këqija?

Xherdan Shaqiri: Nëna ime shqetësohej sepse isha i vogël, por luaja gjithmonë me të rriturit. Por kështu mësova t’i përvishem betejës. Edhe e kuptova herët se isha diçka i veçantë, sepse gjithmonë më zgjidhnin të parin.

A ju shikon publiku juve dhe Granit Xhakën më shumë nën thjerrëz?

Xherdan Shaqiri: Sigurisht që herë pas here ndihesh pak i trajtuar padrejtësisht, por duhet të dish të përballosh këtë situatë. Njerëz të ndryshëm kanë mendime të ndryshme. Por kur njerëzit hyjnë te politika, tërhiqem.

A pati “afera e bërjes së shqiponjës” më 2018 (në ndeshjen kundër Serbisë) jehonë tepër të madhe?

Xherdan Shaqiri: Asokohe u shkrua shumë. Ne dhe familjet tona u provokuam jashtëzakonisht shumë nga pala serbe para ndeshjes së Botërorit, sidomos në rrjetet sociale. Kështu lindi tek ne një uri për të fituar - dhe në fund me rëndësi ishte vetëm fitorja sportive.

A ju shkakton dyzim të brendshëm prejardhja juaj zvicerano-kosovare?

Xherdan Shaqiri: Patjetër. Në shkollën fillore isha i vetmi i huaj në klasë. Ndonjëherë më kanë ngacmuar, por zakonisht jam ndier shumë mirë dhe kam mësuar shumë nga zviceranët.

Dhe për kë jeni kur luajnë Kosova me Zvicrën?

Xherdan Shaqiri: Për të dyja, natyrisht.

Sa gjatë do të luani ende?

Xherdan Shaqiri: Kur të zgjohem një mëngjes dhe të mos kem më dëshirë, do të ndalem.

/Telegrafi/

Paraqitja e shkëlqyeshme e sulmuesit Xherdan Shaqiri ia ka fituar atij një vend në 11-shen më të mirë të formacionit të javës për Ligën e Evropës.

Shaqa shkëlqeu në fitoren 3-1 të Baselit ndaj FCSB, ku kontribuoi me dy gola e një asistim.

Pas kësaj paraqitje maestrale, ylli nga Kosova u vlerësua me notën 9.6, si dhe zuri vend në formacionin më të mirë të javës.

Formacioni më i mirë i javës nga SofaScore: Ederson; Malic, Skriniar, Graovac, Terzic; Bianco; Salzar, Shaqiri, Konstentelias, Gogorza; Duran.

Kësisoj, Shaqa pavarësisht moshës po vazhdon të ketë rolin kyç në sukseset e Baselit si në Zvicër, ashtu edhe në Evropë./Telegrafi/

Sulmuesi Xherdan Shaqiri e ka pranuar se ka shikuar portierin e gabuar para se të shënonte penalltinë në fitoren 3-1 ndaj klubit rumun FCSB.

Ylli nga Kosova shënoi dygolësh dhe asistoi në fitoren e madhe të Baselit, ku njëri nga ta ishte nga penalltia. Megjithatë Shaqa ka zbuluar një prapaskenë interesante pasi priste që në portë të ishte një tjetër portier.

“Nuk ishte karton i kuq as për mua (ndaj portierit të parë). E analizova portierin e parë, pastaj erdhi i dytë, të cilin nuk e kisha analizuar në penallti. Doja të gjuaja në mes që nga fillimi”.

Xherdan Shaqiri

Ndërkohë, Shaqiri gjithashtu i ka bërë thirrje Baselit që të përfitojnë nga situata kur janë me një lojtar më shumë në fushë dhe të mos pranojnë më gola.

“Në fund të ditës shënuam tre pikë dhe morëm tre pikë. Nuk mund të jetë gjithnjë perfekt. E analizuam dhe shikuam lojën dhe goli që pranuam, sigurisht nuk duhej të ndodhte”, deklaroi ai.

Të njëjtat fjalë i tha edhe trajneri Ludovic Magnin, që shtoi se Baseli “po luan me zjarrin”.

“Mendoj se po luajmë me zjarrin. Kishim shumë shanse shënimi, por gjithashtu i dhamë shumë mundësi kundërshtarit për të ndërtuar. Kjo me nervozon shumë. Nuk luajtëm perfekt, por mësuam”./Telegrafi

Baseli ka shënuar fitore me rezultat 3-1 në shtëpi ndaj FCSB-së në kuadër të raundit të katërt të Ligës së Evropës.

Më meritori për këtë fitore të klubit zviceran ishte padyshim Xherdan Shaqiri i cili e udhëhoqi skuadrën e tij drejt fitores.

Shaqiri fillimisht realizoi në minutën e 19-të nga penalltia për rezultatin 1-0, ndërsa golin e tij të dytë personal dhe të dytin për Baselin e realizoi në minutën e 73-të.

Ylli shqiptar në fund asistoi tek goli i tretë i realizuar nga Ibrahim Salah në minutën e 88-të për epilogun përfundimtar të takimit 3-1.

Kjo paraqitje e tij bëri që ai të vlerësohet si lojtari më i mirë i ndeshjes nga Sofascore me notë 9.6.

Përveç dy golave dhe asistimit, Shaqiri pati 47 pasime me një saktësi prej 72 për qind, katër pasime kyçe, katër goditje në kuadrat si dhe tri duele të fituara.

Kjo ishte fitorja e dytë e Baselit në Ligën e Evropës pas asaj që morën me Stuttgartin me rezultat 2-0 në rrethin e dytë./Telegrafi/

Baseli ka kaluar në epërsi në duelin ndaj FCSB-së që po luhet në kuadër të raundit të katërt të Ligës së Evropës.

Autor i golit të avantazhit ishte Xherdan Shaqiri, i cili u gjend mjaft mirë brenda zonës për ta çuar në rrjetë një top të kthyer nga shtylla për 2-1.

Ky ishte goli i dytë i Shaqirit në këtë ndeshje pasi paraprakisht ai kishte shënuar për t’i dhënë epërsinë prej 1-0 Baselit.

Në rast fitoreje, Baseli do të shkonte në kuotën e gjashtë pikëve në tabelën e klasifikimit.

Kujtojmë se Shaqiri deri para kësaj ndeshje kishte një gol të realizuar në Ligën e Evropës, pasi kishte shënuar edhe në fitoren ndaj Stuttgartit në raundin e dytë./Telegrafi/

Xherdan Shaqiri po del të jetë protagonist i momentit në fillim të ndeshjes mes Baselit dhe FCSB-së, duke shënuar golin e avantazhit nga pika e bardhë në minutën e 19-të.

Pas një ndërhyrjeje në VAR-, gjyqtari Juxhin Xhaja sinjalizoi penallti në favor të skuadrës zvicerane.

Shaqiri mori përgjegjësinë dhe me qetësi e dërgoi topin në qendër të portës, duke mashtruar portierin Lukas Zima, që ishte sapo futur në lojë.

Vetëm pak minuta më herët, në minutën e 12-të, Stefan Tarnovanu i FCSB-së u ndëshkua me karton të kuq pas një reagimi të pamatur, duke lënë skuadrën rumune me dhjetë lojtarë.

Baseli po kërkon ta shfrytëzojë epërsinë numerike dhe golin e hershëm të Shaqirit për të marrë një fitore të rëndësishme në shtëpi. /Telegrafi/

Pas më shumë se tre vitesh përplasje ligjore, Xherdan Shaqiri ka marrë më në fund lejen për të ndërtuar vilën e tij luksoze në Rheinfelden, në kantonin e Aargaut.

Vendimi përfundimtar u mor nga Gjykata Administrative e Aargaut, e cila i dha dritën jeshile projektit pas ndërhyrjes së Gjykatës Federale Zvicerane.

Në gusht të vitit 2022, ylli i Baselit kishte marrë fillimisht lejen për ndërtimin e vilës, e cila vlerësohet në rreth 3 milionë franga zvicerane, por kundërshtimet e disa fqinjëve e kishin bllokuar projektin.

Në janar të vitit 2024, Gjykata Administrative ia kishte revokuar lejen e ndërtimit, duke detyruar Shaqirin ta çojë çështjen në Gjykatën Federale.

Në pranverë, gjykata më e lartë e vendit e rrëzoi këtë vendim, duke e cilësuar si të pabazuar dhe duke kërkuar rishqyrtim të çështjes.

Tani, gjykata e Aargaut ka miratuar projektin, por me disa kushte, ndër to, detyrimi për të vendosur perde në dritare për të reduktuar ndotjen e dritës për banorët gjatë natës.

Edhe pse fqinjët fituan këtë detaj të vogël, ata konsiderohen pala humbëse, pasi janë urdhëruar të paguajnë 7,777 franga për shpenzime gjyqësore, si dhe 6,600 franga Shaqirit dhe 4,125 franga komunës së Rheinfeldenit si kompensim.

Shaqiri, që u rikthye te Baseli në verën e vitit 2024, ka shkëlqyer që në sezonin e parë duke fituar dopietën kombëtare të trofeve.

Ai synon ta përsërisë këtë sukses edhe këtë edicion, ndërsa me klubin bazeler është aktiv në Ligën e Evropës ku të enjtën i pret sfida me FCSB. /Telegrafi/

Gjatë fitores së fundit të Baselit ndaj Zurichut, kishte një “përplasje” mes dy futbollistëve shqiptarë Xherdan Shaqiri e Lindrit Kamberi.

Incidenti ndodhi gjatë ndeshjes, pasi Kamberi kishte për detyrë ta ruante direkt Shaqirin, me këtë të fundit që “fitoi” meqenëse dhuroi dy asistime në fitoren 2-0.

Sidoqoftë, ajo që ra në sy ishte ‘përplasja’ gjatë ndeshjes, ku Kamberi e shtynë Shaqirin, shihen duke u fjalosur, por gjithçka mbyllet shpejtë.

Shaqiri beson se e tërë kjo ndodhi shkaku se Kamberi po bënte ndërhyrje agresive, vetëm që të mos e linte atë të luante ndeshjen e tij.

“Kisha një kundërshtar (Lindrit Kamberi) direkt gjatë tërë ndeshjes. Kjo nuk është gjithmonë e lehtë. Mund ta ndjeja agresionin e kundërshtarit dhe e di se po bënte gjithçka për të mos më lejuar të luaj. Sidoqoftë, isha në gjendje ta bëja që prezenca ime të ndihet sërish”, deklaroi ai.

Kurse Kamberi u shpreh se e “shijoi” këtë përballje me Shaqirin dhe që gjithçka mbetet në fushë.

“Sigurisht kishim një betejë të mirë. Kishte disa shkëmbime fjalësh, por gjithçka mbetet në fushë”, u shpreh shkurtimisht ai.

Kamberi u lavdërua për paraqitjen e bërë të Zurichu pavarësisht kësaj humbje nga Baseli. Kujtojmë, qendërmbrojtësi së fundmi konfirmoi se është i interesuar për ta përfaqësuar Kosovën, por që ende s’është kontaktuar nga përzgjedhësi Franco Foda./Telegrafi/

Ka përfunduar xhiro e nëntë në elitën e futbollit zviceran me disa rezultate mjaftë befasuese.

Por si gjithmonë edhe këtë xhiro futbollistët shqiptarë kanë pushtuar formacionin e javës në elitën e futbollit zviceran.

Qendërmbrojtësi dardan, Kreshnik Hajrizi pati paraqitje fantastike me fanellën e Sionit në fitoren 0-1 ndaj Grasshopper dhe mori notën 7,6 duke u futur në formacionin e javës.

Në mesfushë është Kastriot Imeri i Thun që realizoi gol në fitoren 3-1 ndaj Servettes.

Nuk ka se si të mungoj Xherdan Shaqiri, i cili ishte i pandalshëm me një gol dhe një asistim në fitoren e Baselit 3-0 ndaj Winterthurit, derisa ikona shqiptare ishte lojtari me notën më të madhe në Superligë nga SofaScore 8,9.

Në qendër të sulmit është Rilind Nivokazi i Sionit, që përkundër se nuk shënoi ishte i pandalshëm në fitoren 0-1 te Grasshoppers. /Telegrafi/

Ylli shqiptar Xherdan Shaqiri ka zhvilluar një tjetër paraqitje fantastike në fitoren e thellë të Baselit 3-0 ndaj Winterthur.

Sulmuesi nga Gjilani shënoi golin e dytë, si dhe asistoi te goli i fitores për ta ndihmuar Baselin t’i fitojë pikët e plota.

Brenda 73 minutave sa ishte në fushë, Shaqiri krijoi edhe një shans të madh për gol, kompletoi pesë pasime kyçe ndërsa dështoi vetëm në nëntë pasime, nga 36 që provoi.

Kësisoj, Shaqiri ishte “Lojtari i Ndeshjes” nga “SofaScore”, që i dha një notë të lartë 8.9.

Kujtojmë, Shaqiri së fundmi konfirmoi se nuk rikthehet më te Zvicra derisa mund të jetë i pranishëm në “Fadil Vokrri” për përballjen Kosovë – Zvicër./Telegrafi/

Ylli shqiptar Xherdan Shaqiri e ka konfirmuar se nuk do të rikthehet më te kombëtarja e Zvicrës, ndërsa ndoshta do të udhëtojë për në Kosovë për ta shikuar ndeshjen e fundit kualifikuese për Kupën e Botës.

Tifozët zviceranë vazhdimisht e kanë kërkuar rikthimin e kapitenit të Baselit që kur njoftoi pensionimin nga “Helvetikët”, megjithatë një gjë e tillë duket se nuk do të ndodhë.

Shaqiri në një intervistë për “Tages-Anzeiger” e ka thënë haptas se nuk do ta shohim më në fanellën e Zvicrës.

“Atëherë do ta them tani: Po e hedhi poshtë (mundësinë që të luajë prapë për Zvicrën)”.

Shaqa gjithashtu shtoi se po konsideron të udhëtojë për në Prishtinë që të shikojë ndeshjen Kosovë – Zvicër.

“Sa e shikon Zvicrën që prej pensionimit? I shikoj thuajse të gjitha ndeshjet, me plot emocione. Ndoshta do të udhëtojë për në Kosovë si tifoz që ta shoh ndeshjen finale të kualifikuesve për Kupën e Botës”.

Xherdan Shaqiri

Në fund, ish lojtari i Liverpoolit dhe Bayern Munichut bëri me dije se nuk po i mungon më fanella e Zvicrës, sidomos disa ndeshje që është dashur një udhëtim i gjatë.

“Ndonjëherë mendoj se çfarë do të kisha provuar në këtë apo atë situatë. E di çfarë mund të arrija ende. Por kjo nuk më ngjall më dëshirë. Dhe kur mendoj për ndonjë udhëtim të rastësishëm në San Marino, Andorra apo Ishujt Faroe, jam me të vërtetë i lumtur që gjërat janë kështu siç janë”, përfundoi ai.

Kujtojmë, në rast që Kosova e mposht Slloveninë dhe Zvicra lëshon pikë ndaj Suedisë, atëherë përballja në “Fadil Vokrri” do të jetë vendimtare se cila kombëtare do të shkojë direkt në Kupën e Botës./Telegrafi/