Federata Ndërkombëtare e Futbollit (FIFA) ka publikuar ranglistën e fundit për vitin 2025, me pak ndryshime krahasuar me publikimin e muajit nëntor.
Kosova e përfundon vitin në pozitën e 80-të, që është renditja më e mirë në historinë e saj dhe e njëjtë me atë të muajit të kaluar. Ky pozicion vjen pas paraqitjeve të suksesshme në kualifikimet për Kupën e Botës 2026, ku Kosova e mbylli grupin në vendin e dytë, pas Zvicrës, duke lënë prapa Slloveninë dhe Suedinë.
Ndërkohë, Shqipëria e mbyll vitin 2025 në vendin e 63-të në ranglistën botërore.
Sa i përket kundërshtarëve të Kosovës në plejof, Sllovakia renditet e 45-ta dhe është rivali në gjysmëfinale më 26 mars në Bratisllavë. Në rast kualifikimi në finale, Kosova mund të përballet me Turqinë (25-ta) ose Rumaninë (47-ta).
Në krye të ranglistës botërore, nga viti 2026 do të jetë Spanja, e ndjekur nga Argjentina, Franca, Anglia dhe Brazili.
Për suksesin historik të Kosovës ka folur edhe presidenti i FIFA-s, Gianni Infantino, i cili në një videomesazh theksoi arritjen e Kombëtares së Kosovës, duke veçuar pozitën e 80-të si renditjen më të mirë ndonjëherë në historinë e saj. /Telegrafi/
FIFA ka njoftuar të mërkurën se fondi total i shpërblimeve për Kupën e Botës 2026 do të arrijë në 558 milionë euro, që përfaqëson një rritje prej rreth 50 për qind krahasuar me Kupën e Botës 2022 në Katar.
Kampion në fuqi i botës mbetet Argjentina, e cila tri vite më parë e fitoi trofeun pas finales dramatike ndaj Francës, të vendosur me penallti.
Çdo kombëtare që do të kualifikohet për Kupën e Botës 2026 do të përfitojë 1.28 milionë euro si mbulim për kostot e përgatitjes, para nisjes për SHBA, Kanada dhe Mekisikë.
Në total, FIFA do të shpërndajë rreth 619 milionë euro për ekipet pjesëmarrëse në turneun që do të organizohet në Shtetet e Bashkuara të Amerikës, Kanada dhe Meksikë.
Kosova dhe Shqipëria, në muajin mars do të luajnë për mundësinë për t’u kualifikuar për Kampionatin Botërorin të vitit 2026, por edhe për milionat që mund të marrin.
Kosova luan me Sllovakinë e më pas në finale kundër Rumanisë apo Turqisë, ndërsa Shqipëria kundër Polonisë në gjysmëfinale dhe më pas fituesen e çiftit Ukrainë-Suedi.
Me 1.2 milion euro për kualifikim dhe 7 milionë euro minimalisht për pjesëmarrje, për ekipet që zënë vendet nga 33 deri në 48, pra që eliminohen në fazën e grupeve, Kosova dhe Shqipëria, do të kishin minimalisht 8.2 milionë euro.
Në një mbrëmje gala të zhvilluar në Teatrin e Operës dhe Baletit u ndanë çmimet për më të mirët e futbollit shqiptar.
Trofeu kryesor, ai i “Topit të Artë”, iu akordua sulmuesit të Vllaznisë, Bekim Balaj, i cili u shpërblye gjithashtu edhe me “Këpucën e Artë” për meshkuj, pas një sezoni të jashtëzakonshëm.
Çmimi “Topi i Artë” për femra shkoi për yllin e Vllaznisë, Megi Doci, e cila konfirmoi edhe një herë dominimin e saj në futbollin e femrave në Shqipëri.
Sa i përket pankinës, titulli i trajnerit më të mirë të vitit u fitua nga tekniku i Egnatias, Edlir Tetova, pas rezultateve të shkëlqyera me skuadrën rrogozhinase.
Ndërkohë, lojtarët e Kombëtares shqiptare votuan për më të mirin e ekipit kuqezi, duke përzgjedhur kapitenin Berat Gjimshiti.
Një nga trofetë më të rëndësishëm të akorduar mbrëmjen e sotmen ishte nderimi i lojtarëve të Kombëtares për arritjen e këtij objektivi madhor dhe historik. “Ëndërr Botërori” ishte trofeu që iu akordua sonte 12 lojtarëve të pranishëm në këtë event: Berat Gjimshiti, Elseid Hysaj, Mario Mitaj, Naser Aliji, Kristjan Asllani, Myrto Uzuni, Rey Manaj, Klisman Çeka, Alen Sherri, Mario Dajsinani, Juljan Shehu dhe Nazmi Gripshi.
Presidenti i FSHF-së, Armand Duka, i dorëzoi secilit prej lojtarëve nga një trofe, në shenjë falënderimi për këtë arritje historike.
Në fund, analistët dhe gazetarët sportivë përzgjodhën edhe 11-shen më të mirë të Kategorisë Superiore, duke kompletuar kështu mbrëmjen festive të futbollit shqiptar. /Telegrafi/
Shqipëria po jeton një prej momenteve më të bukura sportive të viteve të fundit. Entuziazmi në vend është i jashtëzakonshëm, ndërsa kombëtarja po kërkon të vendosë copën e fundit të “enigmës” për të siguruar pjesëmarrjen e saj të parë në një fazë eliminatore të Kupës së Botës.
Vetë përzgjedhësi brazilian e përshkruan këtë udhëtim si një nga përvojat më të rëndësishme të karrierës së tij.
“Pas fitores ndaj Serbisë, gjithçka ndryshoi. Na pritën me aq shumë entuziazëm sa e kuptuam se futbolli po nxjerr Shqipërinë në një dimension të ri”, thotë Sylvinho.
Ai shprehet se tri vitet e punës në krye të kuqezinjve kanë qenë një proces i gjatë durimi dhe ndërtimi, por tashmë rezultatet po flasin vetë.
“Arritja në një fazë eliminatore të Kupës së Botës është një sukses i jashtëzakonshëm. Jemi të lumtur, por duhet të përgatitemi mirë”.
Sylvinho thekson se stili i lojës së Shqipërisë është kthyer në një përzierje të veçantë kulturash futbollistike.
“Ekipi ka diçka evropiane, një kombinim të futbollit spanjoll, intensitetit britanik dhe, natyrisht, energjinë time braziliane. Lojtarët janë shumë të organizuar dhe kanë përparuar shumë”.
Me formatin e ri të Kupës së Botës dhe praninë e 48 ekipeve, rruga për kualifikim është edhe më sfiduese.
“Ka shumë ekipe të forta si Italia, Suedia apo Polonia. Vetëm katër do të kalojnë. Nuk është e lehtë, por forca jonë qëndron te besimi se mund ta bëjmë”, vlerëson Sylvinho.
Trajneri flet edhe për punën jashtë fushe, duke zbuluar mënyrën sesi stafi mban kontakte të vazhdueshme me lojtarët nëpër kampionate të ndryshme:
“Unë, Doriva dhe Pablo Zabaleta udhëtojmë nëpër qytete për të pirë një kafe me lojtarët. Është një mënyrë e rëndësishme për të ruajtur lidhjen. Nga janari do të fillojmë punën intensive”.
Një rol të rëndësishëm e kanë edhe lojtarët që luajnë në Serie A. Sipas Sylvinhos, ata sjellin shumë taktikë, disiplinë dhe rritje profesionale në ekip.
Ai përmend dy mesfushorë që kanë bërë progres të madh: Medon Berisha i Lecces dhe Adrion Pajaziti i Hajduk Split.
“Unë besoj shumë te të dy. Po rriten me ritme të jashtëzakonshme”, përfundoi ai.
Ndërsa marsi afrohet, pritshmëritë rriten. Shqipëria ka më shumë se kurrë një mundësi të artë për të shkruar histori. Sylvinho është i qetë, i fokusuar dhe optimist.
Ajo që mbetet, është të shihet nëse pranvera do të sjellë momentin që gjithë vendi ëndërron./Telegrafi/
Kombëtarja e Shqipërisë ka mësuar kundërshtarët për Kupën e Botës, gjithnjë nëse arrin të kualifikohen.
“Kuq e Zinjtë” do t’i zhvillojnë dy ndeshje në play-off në muajin mars, kurse në rast që arrijnë fitore atëherë do të prejnë biletën për në Kupën e Botës.
Në shortin e tërhequr në Washington, Shqipëria ka mësuar se do të jetë në grupin F, së bashku me Holandën, Japoninë dhe Tunizinë.
Kujtojmë, gjysmëfinalja e play-offit do të zhvillohet më 26 mars, finalja më 31 mars, kurse Kupa e Botës nis më 11 qershor./Telegrafi/
Shorti i Kampionatit Botëror 2026 do të zhvillohet të premten, më 5 dhjetor, në qendrën Kennedy në Uashington, duke nisur nga ora 12:00 me kohën lokale (18:00 sipas orës sonë).
Ceremonia pritet të ndjekë traditën e eventeve të mëdha të FIFA-s: fjalime zyrtare, performanca artistike dhe video simbolike që nënvizojnë misionin e futbollit për të afruar njerëzit në mbarë botën.
Për herë të parë në histori, Botërori do të ketë 48 skuadra pjesëmarrëse (nga 32 më parë) dhe do të organizohet njëkohësisht në SHBA, Kanada dhe Meksikë. Turneu do të zgjasë pesë javë, nga 11 qershori deri më 19 korrik 2026. Të 48 ekipet janë shpërndarë në katër vazo me nga 12 ekipe.
Vazoja e parë përfshin tre vendet pritëse — SHBA, Meksika dhe Kanadaja, së bashku me nëntë përfaqësueset më të mira të renditjes aktuale të FIFA-s.
Vazot e tjera janë ndarë sipas renditjes botërore, ndërsa ekipet më poshtë në renditje janë vendosur në vazon 4.
Nga shorti do të krijohen 12 grupe, secili me katër skuadra, një nga secila vazo,sipas rregullave të FIFA-s.
Format i ri i turneut lejon kualifikimin e dy ekipeve të para nga secili grup, si dhe tetë skuadrave më të mira të vendeve të treta. Kështu, 32 ekipe do të vazhdojnë në fazën eliminatore.
Në anën tjetër, FIFA ka planifikuar të shmangë përplasjet e parakohshme mes disa prej favoritëve më të mëdhenj. Çifte si Spanja-Argjentina apo Franca-Anglia do të ndahen në kahe të ndryshme të rrugës eliminatore nëse kryesojnë grupet, duke mos u ndeshur me njëra-tjetrën deri në fazat e vona.
Turneu përfshin një raund të ri të 16-shes, që do të thotë se skuadra fituese e Botërorit do të duhet të luajë tetë ndeshje, një më shumë se në formatin e mëparshëm.
Vazo 3: Norvegjia, Panamaja, Egjipti, Algjeria, Skocia, Paraguai, Tunizia, Bregu i Fildishtë, Uzbekistani, Katari, Arabia Saudite, Afrika e Jugut.
Vazo 4: Jordania, Kepi i Gjelbër, Gana, Kuraçao, Haiti, Zelanda e Re, katër ekipe evropiane të “play-off”-it dhe dy ekipe nga “play-off”-et ndërkontinentale.
Sipas formulës së re, çdo grup do të ketë pikërisht nga një skuadër prej secilës vazo. Ndeshjet që do të përcaktojnë gjashtë ekipet e fundit të kualifikuara do të zhvillohen në fund të marsit 2026.
Në këto duele, Shqipëria do të përballet në Varshavë me Poloninë, ndërsa Kosova do të sfidojë Sllovakinë në Bratislavë, me shpresën për të siguruar një biletë për finalen e madhe, e cila do të vendos kush do të shkojë në Botëror./Telegrafi/
Dinamo Zagreb ka marrë një fitore të rëndësishme 2-0 në transfertë ndaj Goricës, por ndeshja ka sjellë edhe lajme të këqija për skuadrën e trajnerit Mario Kovacevic.
Sulmuesi shqiptar, Arbër Hoxha – një nga lojtarët më të mirë të Dinamos këtë sezon – pësoi një lëndim serioz dhe u detyrua të largohej nga fusha me barelë, duke shkaktuar shqetësim të madh në kampin “blu”.
Hoxha, i cili ka pesë gola në këtë edicion të HNL dhe është shndërruar në një pikë referimi për sulmin e Dinamos, u rrëzua pas një dueli në pjesën e dytë. Menjëherë pas ndërhyrjes së stafit mjekësor, u bë e qartë se lëndimi ishte i rëndë sa për ta larguar menjëherë nga loja.
Në bankinë, Kovacevic u pa dukshëm e shqetësuar, ndërsa përkrah tij, edhe tifozët e Dinamos në stadium mbajtën frymën, duke u lutur që situata të mos jetë aq serioze sa dukej.
Alarmi është ndezur veçanërisht për shkak të derbit që e pret Dinamon në javën e ardhshme kundër Hajdukut – një prej ndeshjeve më të rëndësishme të sezonit.
Nëse Hoxha nuk riaftësohet me kohë, Dinamo do të humbasë një nga lojtarët më vendimtarë në duelet e fundit.
Klubi pritet të konfirmojë shkallën e lëndimit pas kontrolleve të detajuara mjekësore. /Telegrafi/
Kombëtarja e Kosovës ka shënuar fitore në udhëtim te Shqipëria, në kuadër të parakualifikuesve për “Euro basket 2029”.
“Dardanët” zhvilluan një paraqitje fantastike për të fituar me 15 pikë dallim 84-99 (14:25, 14:19, 32:30, 24:25).
Kosova e nisi shumë mirë me një epërsi të madhe prej 11 pikëve në çerekun e parë 14:25. Ata vazhduan me të njëjtin ritëm edhe në çerekun e dytë, që e mbyllën me pesë pikë epërsi 14:19, kësisoj shkuan në pushime me 16 pikë avantazh.
Shqipëria tentoi të këndellet në çerekun e tretë, por avancuan vetëm me dy pikë përpara 32:30, ose thënë ndryshe rezultatin e përgjithshëm e zvogëluan në 14 pikë dallim.
Në çerekun e fundit, Kosova e ruajti rezultatin për ta mbyllur me epërsi prej një pike 24:25, apo totalin 84:99.
Dardan Berisha ka qenë i pandalshëm me plot 35 pikë, tre topa të kthyer e gjashtë asistime, derisa te Shqipëria Juljan Hamati me 19 pikë.
Shqipëria kësisoj regjistron humbjen e dytë në këto parakualifikuese, kurse Kosova e nis me një fitore./Telegrafi/
Kombëtarja e Kosovës e ka mbyllur me epërsi të madhe në Shkodër pjesën e parë ndaj Shqipërisë, në kuadër të parakualifikimeve për “Eurobasket 2029”.
“Dardanët” janë në epërsi për plot 16 pikë, pra 28:44 (14:25, 14:19).
Qysh në çerekun e parë, Kosova dëshmoi që me kualitet është mbi Shqipërinë për ta mbyllur me 11 pikë epërsi (14:25).
Ndërsa, këtë diferencë veçse e rritën në çerekun e dytë për ta mbyllur me pesë pikë epërsi 14:19.
Dardan Berisha është aktualisht më i dalluari me 13 pikë, dy më shumë se Drilon Hajrizi ndërsa te Shqipëria veçohen Celis Tafaj dhe Juljan Hamati me nga gjashtë sosh./Telegrafi/
Si Kosova ashtu edhe Shqipëria me pak fat mund të kualifikohen në Kupën e Botës 2026, kështu ka deklaruar për Telegrafin ish kapiteni i kombëtares shqiptare Rudi Vata.
Kosova dhe Shqipëria për herë të parë në histori luajnë në play-offin e Botërorit 2026, me “Dardanët” që takohen me Sllovakinë derisa “Kuq e Zinjtë” me Poloninë.
Vata për Telegrafin tha se gjasat më të mëdha i ka Kosova ndërsa ka shpresë që të dy kombëtareve t’iu prijë fati dhe të shkojnë në Botëror.
“Si Shqipëria ashtu edhe Kosova ndodhën në një situatë që asnjëherë nuk kanë qenë. Janë edhe dy ndeshje në play-off për të prerë biletën për në Botëror. Si Sllovakia ashtu edhe Polonia janë kundërshtarë të shkollës lindore, pak a shumë në stil të lojës të fokusuar të agresiviteti dhe loja fizike”.
“Polonia është më e avancuar sepse një komb që normalisht është në gjendje të bëjë gjëra të mëdha, komb me eksperiencë dhe kanë marrë pjesë në kompeticione të tilla dhe historikisht kanë pasur përvojë të jashtëzakonshme edhe në gjysmëfinalen e Botërorit”.
“Shanset më të mëdha i ka Kosova, është më e avancuar dhe me prioritet. Kosova në fazën ofensive është më efikase, ka shumë lojtarë që janë të orientuar mirë në portën kundërshtare dhe shënojnë gol thuajse në çdo ndeshje. Të dyja ndeshjet do të jenë të hapura dhe në një ditë të mirë për Kosovën dhe Shqipërinë mund të ndodhi mrekullia”.
Vata kërkoi nga Shqipëria që të jenë një grup i bashkuar, ndërsa këshilloi Sylvinhon që t’i analizojë polakët në secilin detaj të mundshëm.
“Sylvinho e ka një eksperiencë me polakët, ka bërë dy ndeshje ku ka marrë një fitore dhe një humbje. Sigurisht që Sylvinho duhet ta ketë një ide të qartë si ta ndërtojë strategjinë e kësaj ndeshje, çdo detaj duhet analizuar në mënyrë perfekte. Grupi është me rëndësi të jetë i bashkuar, bashkimi bën fuqinë. Si kurrë më parë të jemi të bashkuar, sepse Shqipëria dhe shqiptarët presin të jenë pjesë e Botërorit, i cili është aq pranë”.
Kapiteni legjendar gjithashtu lavdëroi punën që ka bërë Franco Foda te Kosova, ndërsa është i sigurt se “Dardanët” do të jenë kundërshtarë i fortë për secilin ekip të botës brenda pak viteve.
“Franco Foda ka bërë punë të jashtëzakonshme te Kosova. Ka implementuar një mentalitet që të lënë përshtypje sepse vetë grupi dhe futbollistët tregon që disiplina ka qenë çelësi. Të gjithë djemtë i ka pasur titullarë të padiskutueshëm, pranojnë të jenë rezervë dhe e grupit sepse e kanë kuptuar që në çdo moment mund t’i jepet mundësia për të kontribuar. Kosova është komb i talentuar historikisht evropianë dhe botëror, besoj në të ardhmen do të jetë kundërshtar i rrezikshëm për secilin nivel botëror”.
“Kosova po rritet shpejtë sepse janë më të vërtetë grup fantastik lojtarësh, që dinë të shënojnë dhe të luajnë mirë. Tregojnë që janë skuadër kompakte”.
Vata shkurtimisht komentoi edhe situatën e djalit të tij Rokos, i cili aktualisht përfaqëson Irlandën. Ai la të hapur mundësinë që ta shohim yllin e Watfordit në fanellën e Kosovës ose Shqipërisë, megjithatë nënvizoi se projekti duhet të jetë serioz për ta bindur lojtarin.
“Roko e ka bërë një progres shumë të mirë, por ka shumë gjëra që të mëson. Ka qenë mes shumë dilemave për ekipin kombëtar të cilin dëshiron ta përfaqëson. Ka luajtur një ndeshje me Irlandën, e cila normalisht ka treguar seriozitet dhe respekt. E kanë treguar në të gjitha mënyrat e mundshme në aspektin profesional. Nuk e di se çfarë mendon Roko nëse ndonjë Federatë e kontakton, gjithçka është e hapur”, përfundoi Vata për Telegrafin.
Kujtojmë, të dy përballjet gjysmëfinale të play-offit do të zhvillohen më 26 mars 2026. Në rast që kualifikohen në finale, Kosova në Prishtinë do ta priste fituesin e takimit Turqi – Rumani, ndërsa Shqipëria prapë do të luajë si mysafir, ndaj Ukrainë – Suedi./Telegrafi/
Trajneri i Rubin Kazanit Rashid Rakhimov ka kritikuar kombëtaren e Shqipërisë që po i mbingarkon lojtarët me stërvitje, ndërsa më vonë nuk po iu dhanë asnjë minutë.
Daku qëndroi në stol në dy ndeshjet e muajit nëntor te Shqipëria, ku Sylvinho e pa vetëm si zgjedhje të tretë.
Rakhimov ka kritikuar Sylvinhon për gjendjen e Dakut, me këtë të fundit që duket se ka mbetur i lodhur, derisa dha lëvdata për Franco Fodan.
“Fola me Dakun për të hequr presionin nga ai. E telefonova dje. Pasi u kthye nga ekipi kombëtar, e telefonova. I thashë se nuk më pëlqente mënyra se si po punonin në ekipin kombëtar. Ne marrim informacion për ngarkesën e punës te Shqipëria dhe Kosova dhe pamë se si punonte Daku pa luajtur”.
“Ishte e qartë se nuk ishte i tonifikuar. Trajneri në Kosovë është gjerman. Dhe ai nuk e ka idenë që nëse nuk luan, nuk stërvitesh. Por me Dakun, volumi ishte për të ardhur keq”.
Ai ndër të tjera zbuloi edhe bisedën me Dakun, kurse shtoi se ka raste kur as Lionel Messi nuk shënon gola, prandaj nuk duhet ta mbajë afër vetës.
“E pyeta, ‘a nuk po bën asgjë?’. Po i mëson profesionalizëm. Po i japim një program për ta mbajtur të përgatitur. I thashë që edhe Messi ka periudha kur nuk shënon. Ju nuk duhet të mendoni për këtë, duhet të kryeni punën tuaj. Duhet të vlerësoni se si liga ka filluar t’iu trajtojë. Të gjithë po të shikojnë. Sot bëri punë shumë të mirë dhe bëri atë që di ta bëjë më së miri”.
“Është e qartë që ai sjell kualitet. Është i matur. E kemi ngritur dhe tani të themi se nuk mundemi pa të? Ne vetëm duhet të gjejmë lojtarë dhe të shtojmë të tjerë. Të gjithë e njohin atë, e studiojnë. Madje edhe kur ishte një sulm sot, trajneri i ekipit kundërshtar u ka bërtitur lojtarëve që mos ta lënë Dakun vetëm me një lojtar. Ai është aset”, nënvizoi Rakhimov.
Daku i dha fund ecurisë negative prej dy muajve pa gol, duke shënuar një gol të bukur solo të shtunën ndaj Ahmat./Telegrafi/
Në episodin më të ri të podcastit “Arena e Yjeve” vjen analiza nga gazetarët e Telegrafit për rezultatet e Kosovës dhe Shqipërisë në ciklin kualifikues të Botërorit 2026. Ky episod realizohet me mbështetjen e sponsorëve zyrtarë Golden Eagle dhe Air Munich.
Gazetari Lavdim Pireva analizon tre lojtarët që sipas tij kanë bartur barrën kryesore te Shqipëria në këtë cikël kualifikues.
Ai përmend Berat Gjimshitin si një lider të pakontestueshëm të ‘Kuqezinjve’, por vlerëson lart edhe dyshen Juljan Shehu dhe Kristjan Asllani.
“Besoj që Berat Gjimshiti mbetet lojtari më i mirë i kombëtares. Lider i pakontestueshëm, mbrojtës modern, shumë i mirë, edhe po them Juljan Shehu për mënyrën se si i ka zhvillu sidomos dy ndeshjet me Serbinë, ka qenë i jashtëzakonshëm, si në rikuperim të topit, si në shpërndarje të topit”.
“Edhe Asllani veç e ka fitu, Asllani si bonus po them e ka fitu pjekurinë. Ndoshta Interi ka qenë për moshën që ka, shumë barrë e rëndë”.
“Është hap i madh sepse shumë i ri. Në Torino luan rregullisht, edhe pse ndoshta në jaëvt e fundit nuk ka pasur shumë minuta, por luan çdo ndeshje”.
“Kjo është shumë e rëndësishme për një lojtar në moshën e tij. Edhe shoh Torino për dallim, se ne e përcjellim se Torino për dallim nga vitet e kaluara kur i përfundonte ndeshjet 0-0, 1-0, këtë vit është duke luajtur futboll shumë më të hapur”, ka thënë Pireva mes tjerash.
Episodin e plotë me gazetarët e Telegrafit mund ta ndiqni edhe në kanalin zyrtar të Telegrafit në Youtube./Telegrafi/
Në episodin më të ri të podcastit “Arena e Yjeve” vjen analiza nga gazetarët e Telegrafit për rezultatet e Kosovës dhe Shqipërisë në ciklin kualifikues të Botërorit 2026. Ky episod realizohet me mbështetjen e sponsorëve zyrtarë Golden Eagle dhe Air Munich.
Diskutimi fillimisht nisi për rezultatet e Kosovës në ciklin kualifikues, duke vazhduar pastaj tek lojtarët që kanë bërë dallimin gjatë këtyre ndeshjeve, për të vazhduar më pas tek rezultatet e Shqipërisë.
Gazetari Bardh Maxhuni ka ofruar mendimin e tij se kush ishin lojtarët më të dalluar të Kosovës gjatë këtij cikli.
Ai ka zbuluar gjithashtu edhe disa prapaskena nga ndeshja Slloveni – Kosovë, duke treguar atmosferën brenda ekipit dhe momentet që nuk u panë nga publiku.
Performancat e Kombëtares së Shqipërisë janë analizuar nga gazetari Lavdim Pireva, i cili ka përmendur tre lojtarë të cilët kanë mbajtur një nivel constant përgjatë gjithë ciklit.
Në anën tjetër, gazetari Shkumbin Pireva ka komentuar shortin e Kosovës në “play-off”, duke e cilësuar atë si të favorshëm dhe si një mundësi reale për të synuar kualifikimin.
Ai ka ofruar gjithashtu edhe një analizë të ndeshjeve që ka zhvilluar Kombëtarja e Shqipërisë, duke treguar se cila ndeshje ishte vendimtare për fatin e ‘Kuqezinjve’.
Ndërsa në një vlerësim krahasues, gazetari Lavdim Pireva ka shpjeguar se si niveli i lojës dhe potenciali i ekipit dardan është më i lartë se ai i Sllovakisë.
Episodin e plotë me gazetarët e Telegrafit mund ta ndiqni edhe në kanalin zyrtar të Telegrafit në Youtube./Telegrafi/
Faqja zyrtare e Federatës Shqiptare të Futbollit (FSHF) ka publikuar statistikat e pesë futbollistëve më të shpejtë të Kombëtares së Shqipërisë në kualifikueset për Kupën e Botës 2026.
Shqipëria e mbylli grupin në vendin e dytë, pas Anglisë, duke siguruar kalimin në fazën e ‘play-off’, ku pas hedhjes së shortit u mësua se kundërshtari i gjysmëfinales është Polonia, ndërsa në rast kalimi në finale do të ndeshet me fituesin e ndeshjes Ukrainë-Suedi.
Por, një ditë pas shortit, faqja zyrtare e FSHF-së është përkujdesur t’i zbulojë disa statistika nga ndeshjet kualifikuese të grupeve, ku ndër to janë edhe shpejtësia maksimale e arritur nga lojtarët e kombëtares.
Sipas faqes së FSHF-së, Nedim Bajrami ishte lojtari që arriti shpejtësinë më të madhe gjatë ndeshjeve kualifikuese, pasi sprinti i tij në njërën nga ndeshjet shkoi deri në 34.18km/h.
Pas tij vjen Arbër Hoxha, i cili arriti një shpejtësi prej 32.98 km/h, ndërsa Armando Broja dhe Myrto Uzuni arritën shpejtësi të njëjtë prej 32.23 km/h.
Lojtari i pestë më i shpejtë i kombëtares kuqezi në këto kualifikuese ishte Mario Mitaj me një shpejtësi të arritur prej 31.47 km/h. /Telegrafi/
Presidenti i Torinos, Urbano Cairo, ka folur për mesfushorin e huazuar të Interit, Kristjan Asllani, pas një eventi të RCS.
23-vjeçari shqiptar iu bashkua Torinos në formë huazimi për një sezon me mundësi blerjeje, dhe qëndrimi i klubit mbetet i hapur, por i kujdesshëm.
Për mundësinë e blerjes së tij ka folur edhe vetë presidenti i Torinos, Cairo, i cili ndihet i kënaqur me performancat e Asllanit.
“Asllani ka luajtur mirë me Shqipërinë dhe po shkon drejt fazës eliminatore, madje edhe shënoi. Ai pati një pjesë të dytë të shkëlqyer kundër Juventusit. Na pëlqen lojtari, e morëm në huazim, po luan mirë, por varet nga trajneri”, ka thënë fillimisht Cairo.
“Opsion blerjeje? Nuk jemi as në mes të sezonit. Le ta shohim të luajë. Ai duhet të vazhdojë të performojë për të na bindur ta mbajmë përgjithmonë", përfundoi presidenti i Torinos.
Ndryshe, Torino pagoi 1.5 milionë euro për huazimin e Asllanit dhe ka një klauzolë blerje prej 12 milionë eurosh. /Telegrafi/
Njësoi si Kombëtarja e Kosovës, ashtu edhe e Shqipërisë do të luajnë në të njëjtin orar në gjysmëfinalet e play-offit të Kampionatit Botëror 2026.
“Dardanët” do të përballen me Sllovakinë në udhëtim, derisa Shqipëria i shkon Polonisë.
UEFA tashmë ka zyrtarizuar orarin, ku si Kosova ashtu edhe Shqipëria do të përballen me kundërshtarët e tyre me fillim prej orës 20:45.
Lajmi i mirë për Kosovën është se do ta mësojë kundërshtarin e “finales të mundshme” para se ta nis lojën me Sllovakinë, pasi Turqi – Rumani do të nis me fillim nga ora 18:00.
Përndryshe, kjo është e vetmja sfidë që do të nis më herët. Edhe në rast që dy kombëtaret avancojnë në “finalen e play-offit” do t’i pret e njëjta situatë, pra të luajnë në të njëjtin orar.
Orari i plotë:
Kujtojmë, nëse Kosova shkon në finale atëherë do ta presë Turqinë ose Rumaninë në Prishtinë, ndërsa Shqipëria do të jetë sërish mysafir./Telegrafi/
Trajneri i Burnleyt Scott Parker ka konfirmuar se lëndimi i sulmuesit Armando Broja nuk është aq serioz dhe ka gjasa që lojtari të jetë gati për ndeshjet e vikendit kundër Chelseas.
Broja pësoi lëndim derisa po tentonte të bënte një driblim gjatë humbjes 0-2 të Shqipërisë në shtëpi nga Anglia.
Kishte frikë që lëndimi i Brojës është serioz, megjithatë Parker ka konfirmuar se lojtari ka stërvitur në dy ndeshjet e fundit.
“Shpresoj se Armando do të jetë gati për vikend. Gjithçka që ka ardhur duket se është shumë pozitive”.
Armando Broja
“Ka qenë në fushë dje dhe sot, të shohim si do të reagon nesër. Por, për momentin duket mirë. Jam i kënaqur që lëndimi nuk ka sjellë ndonjë rikujtim sepse është top lojtar”, deklaroi ai.
Burnley në vikend do ta presë Chelsean, skuadër në të cilën e ka kaluar pjesën më të madhe të karrierës Broja.
Mbetet të shihet nëse Broja do të ftohet ndaj Chelseas, sidoqoftë, në rast që jo – atëherë pritet të jetë gati për ndeshjen me Brentfordin./Telegrafi/
Kombëtarja e Shqipërisë do të luajë ndaj Polonisë në gjysmëfinale të ‘play-off’-it për Botërorin 2026.
Pas shortit të hedhur në Cyrih të Zvicrës ka ardhur edhe reagimi i përzgjedhësit të Polonisë, Jan Urban i cili e konsideroi si short të mirë Shqipërinë.
“Nuk mendoj se duhet të ankohemi. Kemi short të mirë, jemi favorit në ndeshjen e parë. Nuk mund ta fshehim këtë. Ne duhet ta shfrytëzojmë avantazhin e stadiumit si vendas”.
“Është e qartë se ne jemi favorit, por duhet ta respektojmë çdo ekip. Kemi përjetuar disa befasi, jo vetëm unë personalisht por edhe duke parë përfaqësueset e tjera”.
Kombëtarja e Polonisë
“Respekti është gjithmonë i rëndësishëm, por duhet të kemi vetëbesim sepse kjo na ndihmon. Shorti është i mirë. Do të kthehemi me besim të plotë në rrugëtimin e play-off-it”.
“Jemi të lumtur me shortin. Dy ndeshje në shtëpi do të ishte fat i madh. Nëse luajmë në finale, duhet të luftojmë për vendin në Kupën e Botës".
“Duhet ta bëjmë këtë sepse kështu e kërkon situata. Jemi të fokusuar vetëm në ndeshjen e parë, pa e harruar analizën ndaj Ukrainës dhe Suedisë”, ka deklaruar Urban./Telegrafi/
Përzgjedhësi i Shqipërisë Sylvinho ka komentuar shortin e play-offit të Kupës së Botës 2026, ku deklaroi se i njeh të gjithë kundërshtarët.
Shqipëria do të jetë mysafir i Polonisë, pastaj nëse shkon në finale do të udhëtojë për t’u përballur me fituesin e ndeshjes Ukrainë – Suedi.
Në një intervistë për faqen zyrtare të FSHF-së, tekniku brazilian tha se do të përgatiten në maksimum për polakët.
“Fillimisht, e kemi merituar shumë që të jemi këtu edhe një herë tjetër. Tani luhet futboll. Po flisja me shumë të tjerë, italianë dhe përfaqësues të tjerë. Në futboll, për 90 minuta mund të ndodhë çdo gjë. E njohim mirë skuadrën kundërshtare, por edhe ata na njohin mirë gjithashtu. Luhet futboll, përgatitet ndeshja dhe ecim përpara”.
I pyetur për një finale të mundshme, Sylvinho shtoi se edhe Ukraina e Suedia mbesin kundërshtarë shumë të fortë.
“Finalja e mundshme, ndaj Ukrainës ose Suedisë? – Janë të gjitha skuadra të forta, Polonia fillimisht, por edhe nga ana tjetër dy kundërshtarë të fortë. Ukrainën e njohim tashmë nga Nations League, ndërsa ndaj Suedisë kemi zhvilluar një miqësore. Janë skuadra të forta, me lojtarë të fortë. Janë katër skuadra shumë të forta”, nënvizoi ai.
Kujtojmë, ndeshja e parë mes Shqipërisë dhe Polonisë do të zhvillohet në marsin e vitit 2026./Telegrafi/
Sot (e enjte), 20 nëntor 2025 është hedhur shorti i ndeshjeve të “play-off”-it evropian dhe ndërkontinental për gjashtë vendet e mbetura për Kupën e Botës 2026, ku të gjitha ekipet kombëtare kanë mësuar kundërshtarët.
Ka përfunduar me sukses dhe pa shumë bujë shorti i hedhur në Cyrih të Zvicrës për t’i mësuar çiftet gjysmëfinale dhe finale të mundshme për ndeshjet eliminatore ndërkontinentale dhe evropiane.
Fillimisht u hodh shorti për çiftet ndërkontinentale, ku gjashtë kombëtare luajnë për dy vende.
Kaledonia e Re do të luajë ndaj Xhamajkës, ndërsa fituesi i tyre do të ndeshet me Republikën Demokratike të Kongës për një vend në Kupën e Botës, teksa në ndeshjen tjetër, fituesi i takimit Bolivi-Suriname luajnë ndaj Irakut.
Nga Evropa janë 16 kombëtare që luajnë për katër vende në Kupën e Botës, ku Kosova do të luajë në gjysmëfinale me Sllovakinë, ndërsa në finale me fituesin e ndeshjes Turqi-Rumani.
Në anën tjetër, Shqipëria në gjysmëfinale do të ndeshet me Poloninë dhe në finale me fituesin e takimit Ukrainë-Suedi.
Login
