Në ndeshjen e fundit të Kolnit në Bundesligë, tifozët dëshmuan një skenë të pazakontë, teksa njëri nga gjyqtarët vendosi t’i propozonte të dashurit të tij.

Pascal Kaiser, një gjyqtar i cili më parë doli hapur si biseksual, i propozi të dashurin e tij Moritz në stadiumin RheinEnergie të Kolnit.

Ai e bëri këtë para 50,000 spektatorëve, të cilët e përshëndetën gjestin me duartrokitje të zjarrta, dhe para kësaj, Kaizeri mbajti një fjalim të gjatë dhe emocional.

“Dua që të gjithë ta shohin se e dua këtë person. Si person. Si qenie njerëzore. Në futboll”, tha ndër tjerash Kaiser.

Videoja u shpërnda edhe nga profili zyrtar i Cologne në Instagram.

"Pascal Kaiser është një gjyqtar dhe një tifoz i madh i FC Koln. Tre vjet më parë ai njoftoi se ishte biseksual, dhe sot kishte një plan të veçantë që FC Koln e mbështeti. Pascal i propozoi martesë partnerit të tij në stadiumin RheinEnergie, por shiheni vetë!", thuhet në njoftimin e Kolnit.

Çifti festoi së fundmi përvjetorin e tyre të dytë dhe Moritz i tha "po" propozimit të tij gjatë ndeshjes. /Telegrafi/

Drejtori sportiv i Union Berlin, Horst Heldt, ka konfirmuar se Raheem Sterling (31) i është ofruar klubit gjerman, por transferimi i ish-sulmuesit të Chelseat nuk është marrë seriozisht në konsideratë për shkak të kërkesave shumë të larta financiare.

Sterling është aktualisht lojtar i lirë, pasi arriti një marrëveshje për ndërprerjen e kontratës me Chelsean, raportojnë mediat britanike.

Ish-reprezentuesi anglez është në kërkim të një klubi të ri pas largimit nga "Stamford Bridge", i konfirmuar javën e kaluar. Në sezonet e fundit, Sterling ka pasur vështirësi për të siguruar minuta të rregullta.

Në sezonin 2023/24 ai zhvilloi 31 paraqitje në Ligën Premier, ndërsa sezonin 2024/25 e kaloi si i huazuar te Arsenali. Megjithatë, nën drejtimin e Mikel Artetës, ai nuk arriti të bindë plotësisht, duke luajtur 17 ndeshje në kampionat, por duke qenë titullar vetëm 7 herë.

Pas rikthimit te Chelsea, Sterling u përjashtua nga skuadra e parë dhe u vendos në grupin e lojtarëve jashtë planeve të klubit.

Oferta për Union Berlin, por pa shanse reale

Union Berlin konfirmoi se emri i Sterling u propozua, por klubi nuk e shqyrtoi ofertën. Anësori anglez thuhet se fitonte mbi 300 mijë funte në javë te Chelsea, një shifër jashtë realitetit financiar të Unionit, i cili aktualisht renditet i nënti në Bundesligë.

Heldt deklaroi shkurt: “Më duhej të fërkoja sytë. Oferta nuk dukej serioze dhe nuk e morëm më tej”.

Sterling, 31 vjeç, me 82 paraqitje për Kombëtaren e Anglisë, shpreson të gjejë së shpejti një klub të ri dhe të mbyllë karrierën e tij me dinjitetin që i takon një lojtari me CV kaq të pasur. /Telegrafi/

Tanimë është zyrtare, Mërgim Berisha është bërë me skuadër të re, por që ka mbetur në futbollin gjerman.

Sulmuesi kosovar është larguar nga Hoffenheim dhe karrierën do ta vazhdoj në Bundesliga 2 te Kaiserslautern.

Hoffenheim ka ruajtur një pjesë të madhe të kartonit të Berishës nga shitja e ardhshme, derisa 27-vjeçari është shprehur i lumtur për aventurën e re.

“Jam shumë mirënjohës ndaj 1. FC Kaiserslautern që më dha mundësinë të provoj veten në një klub ambicioz në një mjedis shumë tërheqës".

"Si futbollist, e njoh atmosferën në Betzenberg dhe fuqinë që mund të gjenerojë stadiumi, dhe mezi pres ta bëj. Dua ta bëj gjysmën e dytë të sezonit një sukses së bashku me ekipin dhe, mbi të gjitha, ta shpërblej besimin që menaxhmenti më ka dhënë me performancën time në fushë”, tha Mërgim Berisha pas prezantimit.

27-vjeçari do të bartë fanellën me numër 20 te skuadra e tij e re. /Telegrafi/

Mërgim Berisha është pranë zyrtarizimit te skuadra e tij e re dhe gjatë ditës së sotme pritet konfirmimi përfundimtar i transferimit.

Sulmuesi kosovar nuk do të largohet nga futbolli gjerman, por do të ndryshojë nivel gare, pasi nga Bundesliga do të vazhdojë karrierën në Bundesliga 2.

Berisha do të largohet nga Hoffenheim dhe do të transferohet te Kaiserslautern. Ditët e fundit ishte raportuar se Sturm Graz dhe Lecce kishin shprehur interesim për shërbimet e tij, por sipas Sky Sport, Kaiserslautern ka fituar garën për nënshkrimin e sulmuesit.

Marrëveshja mes dy klubeve tashmë është arritur. Kaiserslautern do ta transferojë Berishën pa paguar dëmshpërblim, ndërsa Hoffenheim ka ruajtur një përqindje të kartonit nga një shitje e mundshme në të ardhmen.

27-vjeçari nuk ka zhvilluar asnjë ndeshje këtë sezon me Hoffenheim dhe tani synon të rikthejë karrierën e tij në rrugën e duhur, duke marrë më shumë hapësira dhe minuta loje në skuadrën e re. /Telegrafi/

Liverpooli po negocion për të sjellë në Anfield mbrojtësin e kombëtares holandeze, Lutsharel Geertruida, në formë huazimi, sipas gazetarit të njohur David Ornstein.

25-vjeçari aktualisht është në huazim njëvjeçar te Sunderland nga RB Leipzig, por klubet po diskutojnë mundësinë e ndërprerjes së këtij huazimi për ta lejuar një transferim drejt Liverpoolit.

Geertruida, që mund të luajë si mbrojtës i djathtë, qendërmbrojtës apo mesfushor mbrojtës, ka tërhequr interesin e Liverpoolit për shkak të mungesave në linjën e tyre mbrojtëse.

Çdo transferim i tij te Reds do të kërkonte miratimin e Sunderlandit.

Holandezi ka bashkëpunuar më parë me trajnerin e Liverpoolit, Arne Slot, gjatë tre sezoneve te Feyenoord, para se të transferohej te RB Leipzig në vitin 2024, duke i dhënë menaxherit njohuri të mirë mbi aftësitë dhe shkathtësinë e tij. /Telegrafi/

Bayern Munichu është ndalur në një barazim në udhëtim te Hamburgu, në kuadër të xhiros së 20-të në Bundesliga.

“Bavarezzët” edhe pse dominuan nuk arritën t’i merrnin pikët e plota, me epilogun përfundimtar që rezultoi të jetë 2-2.

Fabio Vieira u tregua i saktë nga pika e bardhë për të zhbllokuar rezultatin (34’).

Sidoqoftë, Harry Kane shënoi pas asistimit të Joshua Kimmich për ta barazuar shpejtë rezultatin (42’).

Bayerni e përmbysi epërsinë përmes Serge Gnabry, sidoqoftë goli u anulua për pozitë jashtë loje.

Megjithatë, në fillimin e pjesës së dytë – Michael Olise e gjeti Luis Diaz, i cili nuk gaboi përballë portierit për ta përmbysur Hamburgun (46’).

Pas kësaj Hamburgu nisi të sulmojë më shumë dhe e gjeti golin e barazimit përmes Luka Vuskovic, i cili shënoi me kokë (53’).

Bayerni e mori krejtësisht lojën në dorë por assesi s’arriti ta thyente më mbrojtjen vendase. Kësisoj, ata shkojnë në kuotën e 51 pikëve ndërsa Hamburgu qëndron në vendin e 13-të me 19 sosh./Telegrafi

Sipas asaj që ka konfirmuar Fabrizio Romano, Leon Goretzka ka vendosur të refuzojë ofertën e Atletico Madrid dhe të mos largohet nga Bayern Munich gjatë afatit kalimta të janarit.

Mesfushori gjerman, i cili ishte shndërruar në objektivin kryesor të klubit madrilen për të përforcuar repartin e mesfushës, ka zgjedhur të qëndrojë në Mynih deri në fund të sezonit aktual.

Goretzka, kontrata e të cilit skadon në muajin qershor, ka vendosur ta përmbushë marrëveshjen me klubin bavarez dhe të largohet në verë si lojtar i lirë.

Kjo zgjedhje ka prishur planet e Atletico Madrid, që kishte intensifikuar kontaktet ditët e fundit me synimin për ta afruar menjëherë lojtarin dhe për t’i dhënë atij një rol qendror në skuadër.

Vendimi i mesfushorit për të qëndruar te Bayern lidhet kryesisht me stabilitetin dhe me përfitimin e mundësisë për të zgjedhur vetë destinacionin e radhës pa kosto transferimi.

Për Atletico Madrid, ky refuzim nënkupton ndryshim të menjëhershëm të strategjisë.

Me pak ditë para mbylljes së afatit kalimtar, drejtuesit sportivë janë të detyruar të kërkojnë alternativa të tjera për mesfushën, pasi Diego Simeone e konsideronte Goretzkën profil ideal për forcë fizike, personalitet dhe depërtim nga vija e dytë.

Klubi madrilen tashmë punon kundër kohës për të gjetur një zgjidhje që mund të japë ndikim të menjëhershëm. /Telegrafi/

Nicolas Jackson po konsiderohet gjithnjë e më shumë si një nga dështimet më të mëdha të sezonit 2025/26 te Bayern Munich.

Sulmuesi senegalez u afrua në formë huazimi nga Chelsea gjatë verës, me synimin për të ofruar alternativa dhe për të lehtësuar ngarkesën e Harry Kane.

Megjithatë, pritshmëritë nuk janë përmbushur dhe bilanci i tij sportiv ka qenë zhgënjyes.

Që nga mbërritja në Mynih, Jackson nuk ka arritur të përshtatet me stilin e lojës së Bayernit dhe kërkesat e larta të klubit.

Trajneri Vincent Kompany nuk i ka besuar një rol të rëndësishëm në skuadër, ndërsa paraqitjet e tij kanë qenë të dobëta edhe në momentet kur i është dhënë mundësia për të luajtur.

Mungesa e bashkëpunimit me ekipin dhe efektiviteti i ulët para portës e kanë penalizuar ndjeshëm.

Performancat pa ndikim, gabimet elementare dhe mungesa e vetëbesimit kanë bërë që Jackson të shihet si një hallkë e dobët e skuadrës.

Në mediat gjermane flitet hapur për një huazim të dështuar, që nuk i ka sjellë asnjë përfitim sportiv Bayern Munichut në momente kyçe të sezonit.

Bayern pagoi rreth 13 milionë euro për huazimin e Jackson, një shumë e konsiderueshme për një operacion pa asnjë kthim.

Në klub pranohet se vendimi ka qenë i gabuar dhe se lojtari nuk do të qëndrojë përtej këtij sezoni, duke u kthyer te Chelsea në fund të kampionatit.

Një klub i mësuar me lëvizje të sakta në treg, këtë herë ka gabuar, dhe rasti i Nicolas Jackson pritet të mbetet si shembull i një investimi të pasuksesshëm. /Telegrafi/

Mediat nga Izraeli shkruajnë se Maccabi Tel Aviv është i interesuar për huazimin e Emir Sahitit nga Hamburgu.

Sipas gazetës gjermane Bild, tashmë është bërë edhe një kërkesë zyrtare drejt Hamburger SV.

Klubi gjerman thuhet se është i hapur për një transferim të mundshëm, pasi Sahiti nuk ka arritur të sigurojë një rol të rëndësishëm në skuadër që nga ardhja e tij në vitin 2024 nga Hajduk Split, për shumën prej 1.2 milionë eurosh.

Anësori kosovar ka regjistruar 7 paraqitje dhe një gol me Kombëtaren e Kosovës, ndërsa kontrata e tij me Hamburgun është e vlefshme deri në qershor të vitit 2027. Vlera aktuale e tij në treg, sipas Transfermarkt, vlerësohet rreth 1.5 milionë euro.

Përveç Maccabi Tel Avivit, interesim për Sahitin ka shfaqur edhe St. Pauli, duke e bërë të hapur të ardhmen e tij në këtë afat kalimtar. /Telegrafi/

Futbolli evropian po përflitet për të ardhmen e Nico Schlotterbeck, që mund të jetë një nga transferimet kryesore të verës.

Qendërmbrojtësi gjerman ka kontratë me Borussia Dortmund deri në vitin 2027, por nuk ka ndërmend ta rinovojë, duke lënë të hapur rrugën për një largim nga Bundesliga.

Real Madrid shihet si një nga klubet kryesore që e ndjek sulmuesin, me negociata që duket se po avancojnë pozitivisht.

Schlotterbeck, 26 vjeç, ka shkëlqyer si një nga qendërmbrojtësit më premtues të Evropës, duke kombinuar shpejtësinë, aftësinë për të udhëhequr mbrojtjen dhe lojën me topin nga pas.

Performancat e tij me Dortmund dhe përfaqësuesen gjermane e bëjnë atë një zgjedhje tërheqëse për Real Madridin, që kërkon të rinovojë mbrojtjen dhe të ndërtojë një qendër të fortë për të ardhmen.

Megjithatë, marrja e Schlotterbeck nuk do të jetë e lehtë.

Barcelona dhe Bayern Munich janë gjithashtu të interesuar për mbrojtësin gjerman, të cilët kërkojnë të forcojnë linjën e tyre defensivë.

Përparësia duket të jetë në favor të Real Madrid, pasi bisedimet me lojtarin dhe agjentët e tij po ecin me ritëm pozitiv dhe ai shihet i prirur të bashkohet me projektin e klubit spanjoll.

Borussia Dortmund ka vendosur një çmim prej 65 milionë eurosh për Schlotterbeck, një shifër që konsiderohet e drejtë për cilësinë dhe potencialin e lojtarit.

Real Madridi duket i gatshëm ta investojë këtë shumë, duke e parë si një blerje strategjike për të ardhmen.

Klubi i ka mundësitë ekonomike dhe planifikon ta bëjë mbrojtësin gjerman një nga gurët themelorë të mbrojtjes për shumë vite.

Nëse gjithçka ecën sipas planit, Schlotterbeck mund të bëhet një nga shtyllat e mbrojtjes së Real Madridit, duke formuar një partneritet të fortë me Eder Militao ose ndonjë qendërmbrojtës tjetër që mund të vijë në të ardhmen.

Klubi spanjoll ka përparësi në këtë garë dhe synon të sigurojë një nga transferimet më të rëndësishme të sezonit të ardhshëm, duke e bërë mbrojtjen më të rinovuar dhe konkurruese në Evropë. /Telegrafi/

Raporti Global i Transferimeve i FIFA-s zbulon një rekord historik në tregun e transferimeve të futbollit për vitin 2025.

Sipas këtij raporti janë 86,158 transferime ndërkombëtare të përfunduara dhe një shumë marramendëse prej 13.08 miliardë dollarësh të shpenzuara në tarifa në futbollin profesionist të meshkujve.

Edhe futbolli i femrave tregoi një rritje të fortë, duke regjistruar 2,440 transferime (rritje prej 6.3%) dhe shpenzime totale prej 28.6 milionë dollarësh - një rritje masive prej mbi 80% nga viti 2024.

Klubet e Anglisë dominuan tregun e futbollit të meshkujve si shpenzuesit më të mëdhenj (3.82 miliardë dollarë) dhe fituesit më të mëdhenj nga shitjet (1.77 miliardë dollarë), duke nënvizuar fuqinë financiare të Ligës Premier.

Transferimi i jashtëzakonshëm i vitit erdhi nga Liverpooli, i cili theu rekordin britanik të transferimeve duke paguar 172 milionë dollarë (125 milionë funte) për të siguruar sulmuesin e Newcastle, Alexander Isak.Kjo marrëveshje e vetme kryesoi listat si nënshkrimi më i shtrenjtë i vitit 2025, ndërsa pati edhe transferime tjera që kaluan shifrën e 100 milionë dollarëve.

Ndër transferimet tjera më të shtrenjta të vitit ishin ai mesfushorit gjerman, Florian Wirtz nga Bayer Leverkusen te Liverpool. Liverpooli , Hugo Ekitike (nga Eintracht te Liverpool), Jhon Duran (nga Aston Villa te Al-Nassr), Benjamin Sesko (nga RB Leipzig te Manchester United) dhe Nick Woltemade (nga Stuttgart te Newcastle). /Telegrafi/

Eintracht Frankfurt ka gjetur një trajner të ri. Sipas informacioneve nga gazeta gjermane Bild, trajneri i ri i klubit duhet të jetë Albert Riera, i cili do të zëvendësojë Dino Toppmoller në atë pozicion.

Riera është aktualisht trajner i klubit slloven NK Celje, fituesit aktual të Kupës së Sllovenisë, dhe është trajneri më i kërkuar në rajonin tonë, duke marrë parasysh se si Dinamo Zagreb ashtu edhe Crvena Zvezda donin ta shihnin në stol.

Celje është kundërshtari I Dritës në play-offin e Ligës së Konferencës, më 19 dhe 26 shkurt, për një vend në çerekfinale të garës evropiane.

Drejtuesit e Eintrachtit janë në negociatat e fundit me klubin nga Celje dhe janë të bindur se një marrëveshje do të arrihet së shpejti.

"Së shpejti do të prezantojmë një trajner të ri, jemi në fund të procesit të marrëveshjes", tha drejtori i klubit Axel Hellmann të hënën në mbrëmje në takimin e anëtarëve në Jahrhunderthalle të Frankfurtit.

Vendimi për t’ia besuar stolin Rieras është një surprizë për shumë njerëz. Gjatë karrierës së tij si lojtar, ish-lojtari i kombëtares spanjolle luajti për klube të mëdha si Manchester City dhe Liverpool, por përvoja e tij si trajner aktualisht lidhet vetëm me Olimpija Ljubljana, Girondins Bordeaux dhe Celje.

Riera ka një kontratë të vlefshme me Celjen deri në vitin 2028, që do të thotë se Eintracht do të duhet të paguajë kompensim për ardhjen e tij.

Drejtori sportiv i Eintracht, Markus Krosche, e kishte tashmë Rierën në listën e trajnerëve të mundshëm dhe tani shpreson të jetë në gjendje ta prezantojë zyrtarisht spanjollin në ditët në vijim. /Telegrafi/

Brezi i futbollistëve me të cilin u rritën miliona tifozë në mbarë botën sot nuk feston më gola në fushë, por jep udhëzime nga zona teknike.

Ish-yje të Ligës Premier, La Liga, Serie A dhe Bundesligës kanë ndërruar fanellën me kostumin e trajnerit, duke ndërtuar kapituj të rinj në karrierën e tyre.

Disa tashmë udhëheqin klube gjigante, të tjerë po rriten gradualisht – por të gjithë dëshmojnë se koha në futboll ecën shpejt.

Wayne Rooney

Legjenda e Manchester United dhe Anglisë hyri herët në zejen e trajnerit, duke drejtuar Derby County në kushte ekstreme. Ka kaluar edhe nga DC United e Birmingham City dhe mbetet një emër i respektuar për projekte rindërtimi.

Michael Carrick

I qetë dhe inteligjent si dikur në fushë, Carrick u dallua te Middlesbrough për futboll posedues. Në janar 2026 u rikthye te Manchester United si trajner i përkohshëm, duke fituar dy ndeshje të mëdha. E ardhmja pritet të sjellë më shumë suksese.

Jack Wilshere

I detyruar të tërhiqej herët si lojtar, Wilshere u formua si trajner në akademinë e Arsenalit. Në vitin 2025 mori drejtimin e Luton Town, në sfidën e tij të parë serioze si trajner kryesor.

Tom Cleverley

Ish-mesfushori i Manchester United nisi karrierën e trajnerit te Watford dhe më pas u emërua trajner i Plymouth Argyle. Vlerësohet për punën metodike dhe komunikimin e fortë me lojtarët.

Vincent Kompany

Nga Anderlechti te Burnley dhe më pas te Bayern Munich – ngjitje e shpejtë për ish-kapitenin e Man Cityt. Stili i tij intensiv dhe dominues e ka bërë një nga trajnerët më interesantë të Evropës.

Frank Lampard

Filloi te Derby, promovoi talente te Chelsea dhe kaloi beteja të vështira te Everton. Aktualisht po ringjall Coventry City, me synimin e kthimit në Ligën Premier.

Steven Gerrard

Hero i Liverpoolit, fitoi titullin historik me Rangers pa humbje. Pas Aston Villas dhe një aventure në Arabinë Saudite, vazhdon të kërkojë stabilitet në karrierën e trajnerit.

Xabi Alonso

Një nga mendjet më brilante taktike të brezit të tij. Pas suksesit historik me Bayer Leverkusen, u emërua trajner i Real Madridit, por periudha përfundoi në janar 2026. Tani në kërkim të një projekti më afatgjatë.

Xavi Hernandez

Ikonë e Barcelonës, e riktheu klubin te titulli i La Ligës në 2023. Pavarësisht kritikave evropiane, ai simbolizoi rikthimin te ADN-ja klasike e klubit.

Cesc Fabregas

Nga dirigjent në fushë, në arkitekt nga banka. Trajner i Comos në Serie A, Fabregas po ndërton një projekt ambicioz me futboll posedues.

Alvaro Arbeloa

Rrugë akademike dhe disiplinë madrilene. Pas suksesit me të rinjtë, në janar 2026 mori drejtimin e Real Madridit, duke u bërë pjesë e tranzicionit të klubit.

Javier Mascherano

Nga organizator i mbrojtjes, në udhëheqës ekipesh. Pas Argjentinës U-20, drejtoi Inter Miami drejt suksesit dhe fitoi respekt si trajner.

Ruud van Nistelrooy

Metodik dhe i përmbajtur, nisi te PSV dhe fitoi trofe. Pas një eksperience të vështirë te Leicester, sot është pjesë e stafit të Holandës.

Fernando Torres

Ikonë e Atleticos, po rritet si trajner brenda klubit të zemrës. Aktualisht drejton Atletico Madrid B dhe shihet si pasardhës i mundshëm i Simeones.

Rafael Marquez

I qetë dhe taktik, punon me Barcelonën B. Një figurë kyçe në zhvillimin e talenteve dhe në strukturën e brendshme të klubit katalanas.

Andrea Pirlo

Filloi papritur te Juventusi dhe fitoi trofe, por u largua shpejt. Sot vazhdon të kërkojë stabilitet, duke mbetur një emër që tërheq interes.

Thiago Motta

Një nga trajnerët më modernë në Serie A. Me Bolognan ka ndërtuar një ekip agresiv dhe taktikisht inteligjent, pavarësisht dështimit te Juventusi.

Gael Clichy

Ish-mbrojtësi i Arsenalit dhe Man Cityt u emërua trajner i Caen në fund të vitit 2025. Fokus i madh në intensitet dhe zhvillimin e të rinjve.

Stephan Lichtsteiner

Legjenda e Juventusit dhe Arsenalit u rikthye në Zvicër. Në janar 2026 mori drejtimin e Baselit, me misionin për ta rikthyer klubin në majë.

Liam Rosenior

Nga mbrojtës i qëndrueshëm në Ligën Premier, në trajner progresiv. Në janar 2026 u emërua trajner i Chelseat me kontratë afatgjatë.

/Telegrafi/

Sulmuesi Mërgim Berisha mund të rikthehet në futbollin austriak, këtë herë te kampioni në fuqi, Sturm Graz.

Sipas mediave austriake, klubi nga Graci ka hyrë në negociata intensive me Berishën, i cili aktualisht është pjesë e Hoffenheimit, por 27-vjeçari nuk ka zhvilluar asnjë paraqitje në këtë edicion dhe nuk ka qenë as pjesë e listës së të grumbulluarve, duke e bërë të qartë se nuk bën më pjesë në planet e klubit gjerman.

Kontrata e Berishës me Hoffenheimin skadon në verën e vitit 2027, çka e bën të mundur një transferim gjatë këtij afati kalimtar, nëse palët arrijnë marrëveshje.

Sipas të dhënave të “Transfermarkt”, vlera e sulmuesit në tregun e transferimeve vlerësohet rreth 2.5 milionë euro.

Berisha e njeh mirë futbollin austriak, pasi më parë ka luajtur për klube si Salzburg, LASK, Altach dhe Liefering, ku ka lënë gjurmë pozitive. Përveç Austrisë dhe Gjermanisë, ai ka qenë pjesë edhe e Fenerbahces në Turqi.

Ku është Mërgim Berisha?

Për shërbimet e tij raportohet se ka interesim edhe nga disa klube të tjera, por Sturm Graz momentalisht duket më i avancuari në garë për firmën e sulmuesit. /Telegrafi/

Kylian Mbappe tani e ka arritur Harry Kanen në krye të renditjes së “Këpucës së Artë” për këtë sezon. Dy golat e francezit në Estadio de La Ceramica të shtunën e kaluar e çojnë atë në 21 gola, i njëjti numër me anglezin e Bayern Munich.

Performanca e Mbappes kundër Villarrealit e ka shtyrë atë të kalojë Erling Haaland në listën e golashënuesve, me norvegjezin që nuk luajti në fitoren e Manchester Cityt kundër Ëolves këtë fundjavë.

Ndërkohë, Kane gjithashtu dështoi të shënonte në humbjen e papritur të Bayernit ndaj Augsburgut në xhiron e fundit.

Një tjetër që vjen nga La Liga dhe gjenden në dhjetëshen e parë është ylli kosovar i Mallorcas, Vedat Muriqi, i cili ka 28 pikë falë 14 golave të tij këtë sezon.

Vlen të përmendet se golat në La Liga, Ligën Premier, Bundesliga, Serie A dhe Ligue 1 vlejnë nga dy pikë secili, ndërsa në ligat e tjera evropiane, golat vlejnë midis 1.5 dhe një pikë për gol.

Renditja aktuale e Këpucës së Artë

Harry Kane (FC Bayern Munich) 21 gola x 2 pikë = 42 pikë

Kylian Mbappe (Real Madrid) 21 gola x 2 pikë = 42 pikë

Erling Haaland (Manchester City) 20 gola x 2 pikë = 40 pikë

Igor Thiago (Brentford FC) 16 gola x 2 pikë = 32 pikë

Darko Lemajic (FK RFS) 29 gola x 1 pikë = 29 pikë

Vangelis Pavlidis (SL Benfica) 19 gola x 1.5 pikë = 28.5 pikë

Vedat Muriqi (RCD Mallorca) 14 gola x 2 pikë = 28 pikë

Ibrahim Diabate (GAIS Goteborg) 18 gola x 1.5 pikë = 27 pikë

Daniel Karlsbakk (Sarpsborg 08) 18 gola x 1.5 pikë = 27 pikë

August Priske Flyger (Djurgardens IF) 18 gola x 1.5 pikë = 27 pikë

Ayase Ueda (Feyenoord) 18 gola x 1.7 pikë = 27 pikë

/Telegrafi/

Afati kalimtar i verës është i përgatitur për një ndryshim të paparë sizmik në Bundesligë pas zbulimit të ambicieve të klubit gjerman. Bayern Munich ka hartuar një strategji financiare prej 200 milionë eurosh për të sjellë Yan Diomande, Trent Alexander-Arnold dhe Nico Schlotterbeck.

Ky investim masiv synon t’i japë Vincent Kompanyt mjetet që i nevojiten për të dominuar si në kampionatin vendas ashtu edhe në Ligën e Kampionëve. Prioriteti i klubit është të rigjallërojë pozicionet kyçe dhe të sigurojë lojtarë me përvojë ndërkombëtare të nivelit të lartë.

Bayern Munich e kupton se afati aktual i transferimeve kërkon vendime të guximshme për të ruajtur dominimin e saj kundër rritjes së rivalëve të rinj evropianë. Prandaj, drejtuesit sportiv kanë identifikuar tre profile specifike që adresojnë boshllëqet aktuale në skuadër.

Në sulm, klubi bavarez i ka vënë syrin talentit elektrizues Yan Diomande, talenti i ri nga Bregu i Fildishtë. Vetëm 19 vjeç, anësori ka shkëlqyer te RB Leipzig falë driblimit dhe shpejtësisë së tij marramendëse.

Klubi i Mynihut është i përgatitur të ofrojë 100 milionë euro për të siguruar nënshkrimin e tij të menjëhershëm. Ata besojnë se Diomande është lojtari perfekt për të konkurruar dhe për rotacion në krahë me figura si Luis Diaz dhe Micheal Olise.

Ky veprim jo vetëm që do ta forconte sulmin, por edhe do ta dobësonte një rival të drejtpërdrejtë, duke siguruar një të ardhme të ndritur për sulmin. Ylli afrikan, me kontratë deri në vitin 2030, është i etur të bëjë transferimin në Allianz Arena këtë verë.

Për pozicionin e mbrojtësit të djathtë, emri që gjeneron më shumë konsensus është Trent Alexander-Arnold, i cili po kalon një kohë të vështirë në Spanjë. Pas largimit të Xabi Alonsos nga stoli i Real Madridit, mbrojtësi anglez ka humbur statusin e tij të paprekshëm.

Paraqitjet e paqëndrueshme dhe dëmtimet e përsëritura kanë dëmtuar besimin e Alexander-Arnold në Santiago Bernabeu. Klubi gjerman po ofron 50 milionë euro për ta rikthyer mbrojtësin e krahut në formën e tij më të mirë. Kompany vlerëson kreativitetin dhe vizionin e tij, cilësi që përshtaten në mënyrë të përkryer me stilin e tij të lojës të bazuar në posedim të topit.

Njëkohësisht, zona mbrojtëse qendrore kërkon vëmendje urgjente duke pasur parasysh dyshimet rreth së ardhmes së Dayot Upamecanos. Këtu hyn në lojë Nico Schlotterbeck, lojtari aktual i Borussia Dortmund, kontrata e të cilit skadon në vitin 2027.

Afrimi i fundit të kontratës së tij e detyron klubin nga Westfalia të negociojë një transferim këtë verë. Bayern Munich planifikon të shpenzojë edhe 50 milionë euro për të siguruar ardhjen e Nico Schlotterbeck në zemër të mbrojtjes së tyre.

Profili i tij si qendërmbrojtës gjerman, i fortë dhe me shpërndarje të topit, është absolutisht sipas pëlqimit të menaxhmentit teknik. /Telegrafi/

Mos e quani “klub plastik”. Ajo që po bën Hoffenheim në futbollin gjerman është rezultat i një vizioni afatgjatë, i ndërtuar me durim, strukturë dhe ide të qarta – jo thjesht me para.

Mjafton një vështrim në renditjen aktuale të Bundesligës për të habitur shumëkënd: TSG 1899 Hoffenheim ndodhet në vendin e tretë, menjëherë pas gjigantëve Bayern Munich dhe Borussia Dortmund. Rastësi? Aspak.

Pas kësaj historie fshihet rrugëtimi i jashtëzakonshëm i një klubi të vogël dhe i një njeriu që u kthye te rrënjët e tij për të ndërtuar diçka të madhe.

Nga fshati në elitë

Hoffenheim është një vend i vogël në Baden-Württemberg, me vetëm disa mijëra banorë. Megjithatë, çdo fundjavë stadiumi modern i klubit mbushet dhe popullsia e zonës trefishohet, duke e kthyer qytetin në një qendër të vërtetë futbolli.

Gjithçka nisi në fund të viteve ’90, kur Dietmar Hopp – bashkëthemelues i gjigantit teknologjik SAP dhe ish-lojtar i Hoffenheimit në rini – vendosi të marrë në dorë klubin e zemrës. Në atë kohë, Hoffenheim luante në divizionin e shtatë të futbollit gjerman, larg çdo vëmendjeje.

Hopp nuk ndërtoi suksesin përmes “afisheve” apo emrave të mëdhenj, por përmes infrastrukturës, qendrave stërvitore moderne dhe një modeli menaxhimi profesional. Ideja ishte e qartë: suksesi sportiv vjen si pasojë e organizimit të fortë.

Ngritja marramendëse dhe dimri magjik

Rruga drejt elitës u shënua nga dy figura kyçe të futbollit modern. Fillimisht Hans-Dieter Flick, i cili përpara lavdisë me Bayern Munich dhe Barcelonën, ndihmoi Hoffenheimin të hidhte hapa të mëdhenj nga ligat e ulëta. Më pas erdhi Ralf Rangnick, arkitekti i projektit që tronditi Gjermaninë.

Me investime të mëdha për nivelin e atëhershëm – mbi 18 milionë euro në Zweite Liga – Rangnick ndërtoi një skuadër konkurruese me emra ende të panjohur për publikun e gjerë: Demba Ba, Chinedu Obasi dhe Vedad Ibisevic. Rezultati ishte spektakolar: brenda vetëm 24 muajsh, Hoffenheim u ngjit nga liga e tretë në Bundesligë.

Sezoni 2008-2009 mbetet historik. Në debutimin e tyre në elitë, Hoffenheim e mbylli gjysmën e parë të kampionatit si “kampion dimëror”. Vetëm dëmtimi i rëndë i Ibisevicit, i cili kishte shënuar 18 gola në 17 ndeshje, i ndali ëndrrat për titull. Por projekti nuk u ndal kurrë.

Hoffenheim sot - stabilitet dhe ambicie

Sot, Hoffenheim po jeton një tjetër kapitull të artë. I udhëhequr nga përvoja dhe klasi i Andrej Kramarić (6 gola dhe 2 asistime) dhe energjia e talentit të ri Tim Lenperle (6 gola dhe 2 asistime), klubi ka siguruar vendin e tretë në Bundesligë, duke u konfirmuar si forcë serioze në futbollin gjerman.

Gur në këtë mur, këtë vit kanë vënë edhe treshja shqiptare që luan te Kosova, Albian Hajdari, Leon Abdullahu dhe Fisnik Asllani, të moshës nga 21 deri në 23 vjeç, që kanë qenë motorët e skuadrës që nga rikthimi i tyre në formën e lartë.

Edhe pse shpesh është etiketuar si klub “pa histori”, realiteti flet ndryshe. Ndërsa emra të mëdhenj si Schalke 04 dhe Hambur SV kanë rënë në krizë, Hoffenheim ka ndërtuar vazhdimësi. Ky është sezoni i 18-të radhazi i klubit në Bundesligë – një arritje që flet për stabilitet dhe vizion.

Një histori që vazhdon

Hoffenheim është dëshmia se në futbollin modern, pasioni i një ish-lojtari të kthyer në miliarder, i kombinuar me ide të qarta dhe punë afatgjatë, mund ta shndërrojë një fshat të vogël në një emër të respektuar të futbollit evropian.

Nga divizioni i shtatë deri në zonën e Ligës së Kampionëve – rrugëtimi i Hoffenheimit dëshmon se asgjë nuk është e pamundur kur projekti është i fortë dhe ambicia nuk njeh kufij. /Telegrafi/

Milot Rashica mund të jetë pranë një rikthimi në Bundesliga. Pas interesimit për mbrojtësin qendror gjerman Felix Uduokhai, Beşiktaşi ka marrë një tjetër ofertë nga Gjermania, kësaj radhe për anësorin kosovar.

Sipas raportimeve nga gazeta e madhe turke 'Fanatik', Hoffenheim ka shfaqur interes konkret për Rashicën dhe negociatat mes dy klubeve janë duke vazhduar.

Mësohet se klubi gjerman ka propozuar një marrëveshje shkëmbimi, duke përfshirë anësorin çek Adam Hlozek si pjesë të paketës.

Rashica së fundmi shënoi paraqitjen e tij të 100-të me fanellën e Beşiktaşit, në ndeshjen e Kupës ndaj Keçiorengücu.

Futbollisti 29-vjeçar ka qenë një nga lojtarët më të rëndësishëm të klubit turk, duke realizuar 12 gola dhe dhënë 22 asistime në të gjitha garat.

Përvoja e tij e mëparshme në Bundesligë me Werder Bremen e bën Rashicën një profil tërheqës për klubet gjermane, ndërsa e ardhmja e tij pritet të sqarohet në ditët në vijim, në varësi të zhvillimit të bisedimeve mes palëve.

Nëse arrihet marrëveshja, atëherë Rashica te Hoffenheim do t'i bashkohej futbollistëve të tjerë nga Kosova te kjo skuadër si Fisnik Asllani, Leon Avdullahu dhe Albian Hajdari. /Telegrafi/

Borussia Dortmund ka qenë e shqetësuar për largimin e mundshëm të Nico Schlotterbeck për disa javë,por pas Bayern Munich, edhe një tjetër klub i madh duket se është tërhequr nga gara për qendërmbrojtësin 26-vjeçar.

Schlotterbeck ka qenë objekt i vëmendjes së mediave për një kohë të gjatë. Borussia Dortmund është e vendosur ta mbajë lojtarin kyç, i cili ka kontratë deri në vitin 2027, duke i ofruar një rol udhëheqës dhe një rritje të konsiderueshme page.

Së fundmi u raportua se BVB mund të pranojë një klauzolë lirimi duke filluar nga vera e vitit 2027. Shumë klube të mëdha janë lidhur me lojtarin, ndërsa Bayern Munich duket se është tërhequr për momentin.

Sipas raportimeve të gazetës katalunase ‘Sport’, një transferim i Schlotterbeck te Barcelona nuk është më në tavolinë.

Burime të brendshme të klubit katalanas shpjegojnë se, megjithë cilësitë e lojtarit, i mungon “shpejtësia e nevojshme për t’u përshtatur me stilin e lojës së Hansi Flick”.

Dyshimet nga Barcelona ishin raportuar që në dhjetor, dhe tani duket se është marrë një vendim paraprak. Barcelona do të tentojë transferimin e Alessandro Bastonit dhe Nico Schlotterbeck nuk bën pjesë më në planet e gjigantit katalunas. /Telegrafi/

Menaxhmenti i Bayern Munich nuk kishte planifikuar në fakt të sillte ndonjë përforcim të jashtëm gjatë afatit kalimtar të dimrit. Megjithatë, sipas një raporti, një transferim i mundshëm po diskutohet pa praninë e publikut.

Bayern Munich, me sa duket, ende ka një interes të madh për Josh Acheampong (19). Sipas The Guardian, interesi i klubit të Mynihut për mbrojtësin e gjithanshëm nga Chelsea mbetet i pandryshuar.

Verën e kaluar, kampionët gjermanë ishin tashmë të interesuar për lojtarin e gjatë me këmbë të djathtë (1.90 metra), por Chelsea nuk donte ta linte të largohej. Sipas raportit, kjo mbetet ende e njëjtë edhe sot.

Megjithatë, liderët e Bundesligës po shqyrtojnë mundësinë e një transferimi konkret për Acheampong, qoftë në verë, qoftë ndoshta edhe këtë dimër.

Një nënshkrim i tillë do t’i lejonte Bayernit, i cili kohët e fundit është përballur me disa lëndime, të “vriste dy zogj me një gur”, pasi Acheampong mund të luajë në çdo pozicion mbrojtës.

Jo vetëm Bayern Munich, por edhe Crystal Palace janë të interesuar për anglezin, i cili ka kontratë deri në vitin 2029, pasi kërkojnë një pasardhës për Marc Guehi, i cili u transferua te Manchester City.

Mundësia për më shumë kohë të rregullt loje mund ta tundojë Acheampong të bëjë një ndryshim situate. Pyetja mbetet nëse Bayern Munich mund t’ia ofrojë këtë. /Telegrafi/