Taksitë ajrore elektrike të zhvilluara nga Joby Aviation do të fillojnë operacionet komerciale në Dubai deri në fund të këtij viti, tha të premten Mattar al-Tayer, kryetar i Autoritetit të Rrugëve dhe Transportit të Dubait.
Joby Aviation kreu fluturimin e parë provë të taksisë së saj ajrore elektrike në emirat në qershor 2025, një moment i rëndësishëm në përpjekjet e Dubait për t’i futur ato në rrjetin e tij ekzistues të transportit.
Joby Aerial Taxi, avioni kryesor elektrik për ngritje dhe ulje vertikale i zhvilluar nga kompania me seli në Kaliforni, mund të fluturojë në distanca deri në 160 kilometra me shpejtësi deri në 320 km/orë.
Me zero emetime, taksia ajrore e Joby-t është projektuar të jetë miqësore me mjedisin dhe mjaftueshëm e qetë për përdorim komercial në zona urbane me popullsi të dendur.
Në fillim të vitit 2024, Joby nënshkroi një kontratë me Autoritetin e Rrugëve dhe Transportit të Dubait, e cila i dha kompanisë të drejtat ekskluzive për të operuar taksi ajrore në qytet për gjashtë vitet e ardhshme.
Qeveria e Republikës së Kosovës ka miratuar vendimin për rritjen e pagës minimale, duke përcaktuar dy faza të reja të rritjes gjatë vitit 2026.
Sipas vendimit zyrtar me numër 10/273, të datës 31 tetor 2025, i nënshkruar nga kryeministri në detyrë Albin Kurti, paga minimale do të jetë: 425 euro bruto duke filluar nga 1 janari 2026, për një punë të rregullt me orar të plotë dhe 500 euro bruto duke filluar nga 1 korriku 2026, po ashtu për punë të rregullt me orar të plotë.
Me këtë vendim: Obligohen Ministria e Financave, Punës dhe Transfereve, Administrata Tatimore e Kosovës dhe Inspektorati i Punës për zbatimin e tij.
Ky vendim hyn në fuqi ditën e publikimit në Gazetën Zyrtare të Republikës së Kosovës.
Ndryshime pas rinumërimit po pëson edhe lista për deputetë e Lidhjes Demokratike të Kosovës. Në kutitë e rinumëruara deri tani, në listën e partisë që drejton Lumir Abdixhiku janë minusuar 276 vota, derisa janë shtuar vetëm 103.
Listës së kandidatëve që u janë minusuar vota më së shumti në LDK i prinë kryetari i kësaj partie me minus 20 vota, Xhafer Gashi e Zeni Krasniqi me nga 17 vota më pak, Anton Quni me 16, Rrezarta Krasniqi me -11, Serbeze Muçaj me -11 dhe Arben Gashi me -10.
Paris Gurit ndërkohë i janë shtuar 10 vota, Esra Myrtezanit 6, Fetah Rudit 6, Ermal Sadikut 5 dhe Kimete Hasallarit 5.
Procesi i rinumërimit po vazhdon dhe do të realizohet për mbi 900 vendvotimet. Deri tani janë rinumëruar 217 vendvotime.
Në Qendrën e Numërimit dhe Rezultateve (QNR) po vazhdon numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.
Ndryshimeve të votave ka në të gjitha partitë, në Lëvizjen Vetëvendosje, Partinë Demokratike të Kosovës, Lidhjen Demokratike të Kosovës, Aleancën për Ardhmërinë e Kosovës.
Te disa kandidatë vërehet rënie e numrit të votave, e te disa rritje.
Në linkun e KQZ-së, nga të dhënat e orës 10:50, del se lideri i LVV-së ka rënie për 86 vota, Glauk Konjufca ka rënie për 56 vota, Donika Gërvalla minus 6 vota, Avni Dehari – 29 vota, Albulena Haxhiu -18 vota.
Rritje të votave ka Hekuran Murati për 4 vota, Mimoza Kusari, Shqipe Selimi plus 36 vota.
Nga PDK, rënie ka Bedri Hamza për 21 vota, Uran Ismaili – 20, Vlora Çitaku ka rënie për 11 vota, Enver Hoxhaj – 14.
Rritje të votave ka Ganimete Musliu për 10 vota, Përparim Gruda për 31 vota, Elmi Reçica për 27 vota.
Ndërkaq, te Lidhja Demokratike e Kosovës rënie të votave ka Lumir Abdixhiku për 20 vota, Kujtim Shala për 7 vota, Hykmete Bajrami minus 8 vota, Anton Quni – 16 vota.
Rritje të votave në LDK ka Jehona Lushaku për 1 votë, Adelina Thaçi Meta +3 vota, Visar Azemi +3 vota.
Një nga burra më të vjetër të njohur në Arabinë Saudite, Nasser bin Radan Al Rashid Al Wadaei, ka ndërruar jetë në moshën 142 vjeçare, duke lënë pas 134 fëmijë, nipër dhe mbesa.
Ai u nda nga jeta më 8 janar në Riad, sipas raportimeve nga media lokale.
Al Wadaei, i cili ka lindur në vitin 1884, ka jetuar në të njëjtin vit kur nisi ndërtimi i Statujës së Lirisë dhe shumë para bashkimit të Arabisë Saudite.
Besohet se ai ka jetuar nëpër monarkë dhe epoka të shumta, nga udhëheqësi themelues, Mbreti Abdulaziz, deri te Mbreti Salman.
Familja e tij tha se ai kreu pelegrinazhin e Haxhit më shumë se 40 herë dhe ishte shumë i përkushtuar ndaj fesë së tij.
Në moshën 110 vjeç, Al Wadaei u martua për herë të fundit dhe më vonë pati një vajzë, transmeton Klankosova.tv.
Çfarë thotë një ekspert?
Për shkak se Arabia Saudite ka një jetëgjatësi mesatare prej afërsisht 78 vjeç, ka pasur disa pyetje nëse “burri i tyre më i vjetër” mund të jetë vërtet 142 vjeç.
Kryetari i Shoqërisë Britanike për Kërkime mbi Plakjen (BSRA), Profesor David Weinkove, i tha Metro: “Duket shumë e pamundur që ky person [Al Wadaei] të ketë qenë vërtet 142 vjeç.
“Askush nuk mund ta dijë me siguri sepse në shumë pjesë të botës, ata nuk kanë të dhëna të mira që datojnë kaq larg”
Profesor Weinkove shpjegoi se një nga themelet e plakjes është se sa më i vjetër të jesh, aq më shpejt plakesh raporton Metro.co.uk.
Ai tha: “Pra, kur të arrish rreth 100 vjeç, shanset e tua për të arritur vitin tjetër, në 101 vjeç, janë afërsisht 50%, kështu që është si të hedhësh një monedhë”, transmeton Sinjali.
“Nuk është e pamundur sepse gjithmonë ka një shans, por është si të hedhësh një monedhë 40 herë radhazi dhe gjithmonë të biesh mbi kokat e monedhave.”
Kompanitë evropiane të aviacionit, përfshirë Wizz Air, Lufthansa dhe British Airways, të enjten vazhduan të shmangin hapësirën ajrore të Irakut dhe Iranit, pavarësisht se ajo u rihap, duke ridrejtuar fluturimet përmes Afganistanit dhe Azisë Qendrore.
Irani të mërkurën mbylli përkohësisht hapësirën ajrore për shkak të shqetësimeve për një veprim ushtarak të mundshëm, gjë që çoi në anulimin dhe ridrejtimin e fluturimeve, shkruan reuters.
Megjithëse hapësira ajrore u rihap pas gati pesë orësh, shumë operatorë, përfshirë Singapore Airlines dhe TUI, mbajtën rrugë alternative.
Gjermania ka lëshuar një rekomandim për kompanitë ajrore që të mos hyjnë në hapësirën ajrore iraniane, ndërsa shumë operatorë kanë përshtatur operacionet e tyre.
Wizz Air ka njoftuar se disa fluturime kërkojnë ndalesa shtesë për furnizim me karburant dhe ndërrim të ekuipazhit, ndërsa British Airways ka anuluar fluturimet për Bahrein deri më 16 janar.
KLM, Finnair, Ryanair dhe Air France gjithashtu, nga masa paraprake, shmangin hapësirën ajrore iraniane dhe irakiane, duke paralajmëruar se situata e paqëndrueshme e sigurisë ende përbën rrezik për ndërprerje të reja në trafikun ajror. /Telegrafi/
Manchester City ka përparuar ndjeshëm në ndjekjen e qendërmbrojtësit të Crystal Palace, Marc Guehi, duke i paraqitur një propozim të rëndësishëm kontrate reprezentuesit anglez në 12 orët e fundit, ndërsa përgatit një qasje zyrtare ndaj “Shqiponjave”.
Burimet tregojnë se skuadra e Pep Guardiolës është gati të vazhdojë me negociatat pasi e ka identifikuar Guehin si një objektiv kryesor mbrojtës për të forcuar mbrojtjen e tyre.
“Manchester City përparon në marrëveshjen për Marc Guehi, pasi një përpjekje e madhe është bërë në 12 orët e fundit”.
“Manchester City i paraqiti një propozim të rëndësishëm Guehit për sa i përket kontratës, përfundimisht gati të vazhdojë edhe me Crystal Palace. Marrëveshja tani është më afër”, ka shkruar Fabrizio Romano.
🚨🔵 EXCLUSIVE: Manchester City advance on Marc Guehi deal as big approach has been made in the last 12h.
Manchester City presented important proposal to Guehi in terms of contract, eventually ready to proceed also with Crystal Palace.
25-vjeçari, një figurë kyçe për Crystal Palace që nga transferimi i tij prej 18 milionë funtesh nga Chelsea në vitin 2021, ka qenë në radarin e Cityt mes shqetësimeve të vazhdueshme për lëndime dhe nevojës për më shumë lojtarë.
Guehi ka qenë një lojtar i qëndrueshëm për Palace, duke bërë 33 paraqitje në të gjitha garat këtë sezon me tre gola dhe katër asistime. Qetësia e tij me topin dhe cilësitë e liderit e bëjnë atë një lojtar ideal për sistemin e Cityt të bazuar në posedim të topit. /Telegrafi/
Drejtoria e Doganave ka bërë të ditur se në pikën kufitare Bogorodicë janë sekuestruar nëntë pistoleta nga të cilat pesë me fuqi të lartë depërtuese. Siç kanë bërë të ditur, një shtetas i Maqedonisë është privuar nga liria dhe ndodhet në paraburgim.
“Është parandaluar tentativë për krim të rëndë ndërkombëtar, gjatë së cilës janë sekuestruar nëntë pistoleta, nga të cilat pesë me fuqi të lartë depërtuese, ndërsa një person, shtetas i Maqedonisë së Veriut, është privuar nga liria dhe ndodhet në paraburgim. Rasti është zbuluar të martën në mbrëmje nga nëpunësit doganorë në pikën kufitare Bogorodicë, në dalje nga shteti, gjatë një kontrolli të detajuar të një automjeti me targa maqedonase, të drejtuar nga shtetas i Maqedonisë së Veriut, ku në tavanin e automjetit, midis llamarinës dhe tapicerisë, janë gjetur pistoleta të markës “Crvena Zastava”.
Rasti i është dorëzuar Departamentit të Hetimeve pranë Sektorit për Kontroll dhe Hetime, i cili e ka privuar nga liria personin, dhe pas ndërmarrjes së veprimeve parahetimore ndaj tij, është paraqitur kallëzim penal në Prokurorinë Themelore Publike të Gjevgjelisë për veprën penale “mbajtje, ndërmjetësim dhe tregtim i paautorizuar i armëve dhe lëndëve shpërthyese”, e dënueshme sipas Kodit Penal.
Me urdhër të prokurorit publik, personi ndodhet në paraburgim, ndërsa hetimi vazhdon”, thuhet në njoftimin e drejtorisë së doganave.
Situata me mbeturina në Komunën e Prishtinës po vazhdon të jetë e rëndë, pasi edhe në vitin e kaluar kishte probleme me grumbullimin e tyre.
Madje, kishte edhe dilema për qytetarët se a duhet paguar mbeturinat Kompanisë “Pastrimi” apo komunës.
Por, në marrëveshjen e arritur mes kompanisë dhe komunës, u mor vendim që qytetarët të paguanin faturat tek këta të fundit, raporton Telegrafi.
Mirëpo, edhe pas kësaj situate ka ankesa nga qytetarët që mbeturinat ka me javë që nuk mblidhen nga Kompania e Pastrimit, duke bërë që ato të kundërmojnë rëndë.
Grumbulli i tyre në masë të madhe nëpër lagje të ndryshe të kryeqytetit, ka shkaktuar edhe rrezik nga qentë endacak që në këtë kohë ngricash, është piketim i tyre për të gjetur ushqim.
Një zonë e rënduar mbetet edhe pjesa tek Muzeu i Kosovës, ku mbeturinat janë grumbulluar tash e disa ditë dhe vazhdojnë të sjellin probleme për qytetarët. /Telegrafi/
Real Madridi ka kaluar brenda një kohe shumë të shkurtër nga lavdia në krizë.
Pas fitimit të dy titujve të Ligës së Kampionëve në tre vite, klubi madrilen është eliminuar nga Kupa e Mbretit prej Albacetes dhe ka shkarkuar trajnerin para përfundimit të muajit janar.
Shkaqet e kësaj rënieje janë të shumta dhe përfshijnë si lojtarët, ashtu edhe drejtuesit e klubit.
Real Madridi po shkon drejt një sezoni 2025–2026 për t’u harruar.
Projekti i Xabi Alonsos, i cili synonte ndërtimin e një futbolli modern dhe inovativ, nuk arriti as në muajin shkurt.
Ekipi mbeti pa një lider në stol dhe tani është në pritje për të parë se si do të funksionojë eksperimenti i vendosjes së Alvaro Arbeloas në krye të skuadrës, pavarësisht mungesës së përvojës në elitë.
Kur Alonso mbërriti në Madrid, ideja ishte të zhvillohej një sistem kolektiv, me presion të lartë dhe përfitim të qartë të grupit.
Megjithatë, kjo nuk u reflektua në fushë dhe arsyet mbeten të paqarta për tifozët që ndjekin ndeshjet nga televizori.
Diçka ka ndodhur brenda dhomave të zhveshjes, por në fushë mungonte përkushtimi që pritet nga profesionistë të këtij niveli.
Sipas disa burimeve, gjithçka nisi të shkojë drejt greminës gjatë El Clasicos kundër Barcelonës.
Vinicius Jr., pasi u zëvendësua, thuhet se ka deklaruar se nëse situata vazhdonte kështu, do të largohej nga ekipi, duke vënë në pikëpyetje autoritetin e Xabi Alonsos.
Real Madridi, në vend që të mbronte trajnerin, zgjodhi heshtjen për të mos pakënaqur yllin brazilian.
Pas këtij episodi, Alonso e kishte të pamundur të kërkonte disiplinë dhe angazhim nga pjesa tjetër e skuadrës.
Mungesa e një mesfushori organizator
Përtej problemeve të brendshme, ka edhe faktorë të tjerë që kanë ndikuar në performancën e dobët, për të cilët përgjegjëse është drejtoria, me Florentino Perez në krye.
Një prej tyre është mungesa e një mesfushori organizator që të qartësojë ndërtimin e lojës nga prapavija.
Pas epokës së Toni Kroos dhe Luka Modric, kontrasti me Camavinga dhe Tchouameni është i theksuar, por faji nuk mund t’u atribuohet atyre, pasi nuk janë mesfushorë të atij profili.
Shpresa e fundit: Liga e Kampionëve
Me dy ndeshje ende të hapura, pjesa e mbetur e sezonit paraqitet e paparashikueshme për “Los Blancos”.
Megjithatë, në një kampionat me 38 javë, është e natyrshme që një skuadër më e konsoliduar, si Barcelona e drejtuar nga Flick, të grumbullojë më shumë pikë në renditjen përfundimtare.
Liga e Kampionëve mbetet e vetmja kartë që i ka mbetur Real Madridit, një turne ku klubi i Chamartinit ka treguar gjithmonë se di të ringrihet për të shpëtuar sezonin.
Pas 19 javësh të zhvilluara në La Liga, Real Madridi ndodhet në vendin e dytë me 45 pikë, katër më pak se Barcelona dhe katër më shumë se Villarreal, që ka një ndeshje më pak. /Telegrafi/
Kryeministri i Shqipërisë, Edi Rama gjatë fjalës së mbajtur në mbledhjen e grupit të PS e vuri theksin tek siguria ushqimore duke thënë se pavarësisht punës së bërë, ende nuk janë arritur standardet e BE.
Rama u shpreh se do të kërkojë një fazë të ndërmjetme, 5 vite pas anëtarësimit në BE, për të plotësuar kriteret për këtë sektor, ndërsa theksoi se nuk do të falet asnjë shkelje në këtë aspekt.
“Po përpiqemi të fitojmë një fazë të ndërmjetme prej 5 vitesh. Por vitet kalojnë shpejt dhe përgatitje duhet të fillojnë. Po të kemi parasysh kur ne kemi marrë detyrën rrugët e Shqipërisë, ishin tregje ushqimore dhe thertore. Duke u kthyer pas në vitin 2013, të gjithë të kalonin filmin e kujtesës, gjënë e gjallë që therej në rrugë. Apo të gjitha autostradat e Shqipërisë që veçse ishin lënë rrugëve ishin të kufizuara nga tezga dhe tregje informale ushqimore.
Që nga ajo kohë ka përparim por në raporte me kriteret e sigurisë ushqimore të BE jemi shumë larg. Por në momentin e anëtarësimit dhe kur përfundon periudha e ndërmjetme asnjë ushqim i prodhuar në Shqipëri nuk mund të shitet veçse në Shqipëri. Pra edhe në Shqipëri ushqimet mund të bllokohen sepse nuk përmbushin kriteret e sigurisë dhe në skenarit më pesimist do të thotë që gjithçka që hahet të importohet. Pra duhet punë dhe vendosmëri, nga ana jonë si vendimmarrës, për të mos falur asgjë dhe askënd në emër të nevojës që të vazhdojë të punojë. Të gjithë do vendosen në pozita të forta përgjegjësie. Pra në rastin më të mirë janë 10 vite përpara”, tha ai, raporton euronews.al.
Nënkryetari i LSDM-së, Aleksandar Trajanovski, theksoi se takimi i liderëve qëllimi kryesor i të cilit ishte shfuqizimi i qeverisë teknike, nuk përfaqëson një dialog të vërtetë dhe se LSDM nuk synon të jetë alibi për skenarët e parapërgatitur të qeverisë.
"Absolutisht nuk kemi ndërmend t'i japim legjitimitet dhe alibi partisë në pushtet për skenarët e tyre dhe shfuqizimin e qeverisë teknike. Kjo është arsyeja pse vendosëm të mos marrim pjesë në atë takim të liderëve, i cili pas përfundimit të takimit rezultoi të ishte vendimi i duhur", tha Trajanovski në "Alsat".
Lidhur me shfuqizimin e qeverisë teknike, ai paralajmëroi se vendi nuk është gati për një hap të tillë dhe se qeveria nuk është e pjekur demokratikisht, duke marrë parasysh përvojat nga proceset e fundit zgjedhore lokale.
"Ne e dinim për zgjedhjet lokale, veçanërisht në raundin e dytë, kryesisht përmes Ministrisë së Brendshme, veçanërisht në zona të vogla lokale. A mendoni se jemi mjaftueshëm të pjekur për ta lënë mënjanë qeverinë teknike?" tha Trajanovski.
Njëkohësisht, Trajanovski kujtoi se qeveria teknike u miratua me një konsensus të gjerë politik dhe me mbështetjen e Bashkimit Evropian, me qëllim sigurimin e zgjedhjeve të rregullta./Telegrafi/
Zyra Kombëtare e Auditimit (ZKA) ka njoftuar fillimin e auditimit të performancës me temën “Siguria e nxënësve në shkollat publike në Kosovë”, i cili do të përqendrohet në klasat VI-XII për periudhën 2022-2025, në kuadër të Planit Vjetor të Auditimit 2025/2026.
Sipas ZKA-së, ky auditim synon vlerësimin e sigurisë dhe përshtatshmërisë së ambientit shkollor, si dhe të mekanizmave që institucionet përgjegjëse kanë vendosur për parandalimin, trajtimin, raportimin dhe monitorimin e incidenteve të dhunës në shkolla.
“Qëllimi ynë është të sigurojmë që nxënësit të kenë një ambient të sigurt dhe të përshtatshëm për zhvillimin e tyre akademik dhe personal”, ka bërë të ditur ZKA.
Fushëveprim i auditimit përfshin Ministrinë e Arsimit, Shkencës, Teknologjisë dhe Informacionit, Inspektoratin e Arsimit, si dhe Drejtoritë e Arsimit në komunat e Prishtinës, Ferizajt dhe Gjakovës.
Po ashtu, në auditim mund të përfshihen edhe Policia e Kosovës dhe drejtoritë e saj rajonale, si dhe Qendrat për Punë Sociale të tri komunave të përfshira.
ZKA ka theksuar se auditimi do të ndihmojë në identifikimin e sfidave dhe dobësive në menaxhimin e sigurisë në shkolla dhe do të ofrojë rekomandime për përmirësim të mekanizmave ekzistues, në funksion të mbrojtjes së nxënësve dhe zhvillimit të një ambienti arsimor më të sigurt. /Telegrafi/
Shfaqja teatrore “Hotel Grand”, me autorë dhe interpretë Rebeka Qena dhe Armend Smajli, e realizuar në Barabar Center në Prishtinë, është përzgjedhur nga platforma rajonale SEEstage si një nga shfaqjet më të mira teatrore të vitit 2025 në Evropën Juglindore.
Sipas njoftimit të Ministrisë së Kulturës, Rinisë dhe Sportit (MKRS), shfaqja është vlerësuar për qasjen artistike dhe fuqinë e saj emocionale, si dhe për trajtimin e thellë të marrëdhënieve njerëzore në kontekstin e luftës dhe kujtesës kolektive.
Ky vlerësim e rendit “Hotel Grand” si një përfaqësuese të denjë të krijimtarisë bashkëkohore teatrore nga Kosova në skenën ndërkombëtare.
SEEstage, e njohur si platformë rajonale për kritikë teatrore dhe gazetari kulturore, ka theksuar cilësinë artistike, guximin krijues dhe potencialin ndërkombëtar të kësaj vepre, duke e cilësuar atë si një nga arritjet më të spikatura teatrore të vitit.
Ministria e Kulturës, Rinisë dhe Sportit, e cila ka mbështetur realizimin e shfaqjes, ka uruar ekipin krijues për këtë sukses, duke ritheksuar përkushtimin institucional për mbështetjen e artit dhe kulturës që promovojnë Kosovën përtej kufijve të saj. /Telegrafi/
Gjykata Themelore në Prishtinë ka refuzuar propozimet e mbrojtjes për dëgjimin e 9 dëshmitarëve të propozuar nga avokatja Jovana Filipoviq, duke vlerësuar se as pretendimet e Prokurorisë Speciale të Republikës së Kosovës (PSRK) nuk tregojnë se i pandehuri ka pasur rol të drejtpërdrejtë gjatë datave kritike të përshkruara në parashtrimin e mbrojtjes.
Gjykata theksoi se dëshmitarët e propozuar nuk do të ndryshonin vlerësimin mbi fajësinë ose pafajësinë e të pandehurit, i cili sipas aktakuzës akuzohet vetëm për rol ndihmues brenda grupit të akuzuar.
Po ashtu, u refuzuan edhe propozimet e mbrojtjes për nxjerrjen e ekspertizës për krahasimin e uniformave, pasi gjykata vlerësoi se një vlerësim i tillë mund të bëhet direkt nga përmbajtja e fotografive. Në lidhje me pyetjen nëse arma ishte snajper apo pushkë gjuetie, gjykata tha se kjo nuk ka relevancë për të përcaktuar përfshirjen e Dushan Maksimoviq në grupin terrorist.
Kryetari i trupit gjykues, Ngadhënjim Arrni, deklaroi se arsyetimi më i detajuar mbi bazën ligjore dhe arsyeshmërinë e refuzimit të këtyre propozimeve do të përfshihet gjatë përpilimit të aktgjykimit.
Gjithsesi, propozimi i avokates Jovana Filipoviq për dëgjimin e dëshmitarit Millosh Radosajlleviq mbetet i validuar dhe do të mbahet, ashtu siç ishte miratuar paraprakisht nga kjo gjykatë.
Rasti “Banjska”, sërish dy të akuzuarit nuk deklarohen e njëri thotë se nuk është fajtor
(Përditësuar 10.41) Sot ka nisur vazhdimi i gjykimit në rastin “Banjska” në Gjykatën Themelore në Prishtinë, pas ndryshimit të trupit gjykues.
Rasti që më herët udhëhiqej nga gjyqtari Arben Hoti, tash drejtohet nga gjyqtari Ngadhënjim Arrni si kryetar i trupit gjykues, me anëtarë Rrahman Beqiri dhe Donikë Shala, pas avancimit të Hotit në Gjykatën e Apelit.
Në seancë ishte i pranishëm dëshmitari Millosh Radosajlleviq, i propozuar nga mbrojtja për të dhënë deklarimin e tij. Kryetari Arrni njoftoi se për momentin nuk ka mundësi kohore për të vazhduar me dëshminë, për shkak të ndryshimit të trupit gjykues, raporton “Betimi për Drejtësi”.
Gjithashtu u konstatua se aktakuza e Prokurorisë Speciale të Republikës së Kosovës (PSRK) është lexuar dhe pranuar nga të gjitha palët, pasi mbrojtja dhe prokuroria hoqën dorë nga leximi zyrtar.
Blagoje Spasojeviq dhe Vladimir Toliq thanë se nuk dëshirojnë të deklarohen.
Ndërsa, Dushan Maksimoviq tha se nuk është fajtor për akuzën që ngarkohet.
Avokati Millosh Deleviq, theksoi se aktakuza duhet të përqendrohet në veprimet konkrete të Vladimir Toliq.
Prokurori Naim Abazi tha se shqyrtimi duhet të fillojë rishtazi dhe provat të lexohen për të vazhduar nga faza e mëparshme. Avokatët e të akuzuarve dhe të pandehurit ranë dakord, duke thënë se kjo shmang vonesa dhe siguron efikasitet të procedurës.
Lidhur me propozimin për dëgjimin e nëntë dëshmitarëve të ri nga ana e mbrojtjes, pas analizimit të shkresave, Prokuroria ka kundërshtuar këtë propozim.
Sipas prokurorisë, propozimi i tillë ka mungesë të relevancës dhe individualizimin konkret të provës që janë propozuar.
Prokuroria konsideron se dëshmitarët e propozuar nuk rezultojnë të tregojnë për atë se çfarë ka ndodhur në Bansjkë.
“Dëshmitarët e propozuar synojnë të ndërtojnë një narrativë të përgjithshme të mbrojtjes apo alibi kolektive a ndonjë vlerë të re provuese dhe që është krejtësisht në kundërshtim me provat materiale dhe personale që i kemi dorëzuar në këtë shqyrtim gjyqësor”, ka thënë prokurori Abazi.
Avokatja Jovana Filipoviq kërkoi që dëshmitarja Dragana Antonijeviq të ftohet sërish, pasi ka punuar me Maksimoviq dhe mund të japë informacione, por gjykata konstaton se nuk është arritur ta sigurojë prezencën e saj. Deklarata e saj është konsideruar e lexuar për të mos zvarritur procesin, ndërsa gjykata do të bëjë një përpjekje të re në të ardhmen.
Prokurori njoftoi se nga shqyrtimi i mëparshëm më 17 prill 2025 nuk ka ndryshime në situatën e të akuzuarve, por do të dorëzohen prova të reja materiale me shkrim.
Përfaqësuesi i palës së dëmtuar, avokati Arianit Koci dhe palët e dëmtuara nuk kanë pasur çfarë të shtojnë, ndërsa avokatët e të akuzuarve mbeten pas fjalës hyrëse.
Gjykata Themelore në Prishtinë pas propozimit të prokurorit special Naim Abazi që gjykimi të vazhhdojë në mungesë, i ishte drejtuar Gjykatës Supreme për të kërkuar opinion nëse në rastin “Banjska” mund të aplikohet gjykimi në mungesë. Por, Supremja, pas shqyrtimit të kërkesës “për dhënie të mendimit juridik përkitazi me nenin 303 par.7 të Kodit Procedurës Penale në rastin “Banjska”, kishte sqaruar se nuk jep mendime juridike për dilemat që ka shkalla e parë gjatë procedimit të rastit.
Kështu, Gjykata Themelore në Prishtinë ka marrë vendim, me të cilin ka refuzuar propozimin që gjykimi për 42 të akuzuarit tjerë (41 persona fizikë dhe një person juridik) të akuzuar për sulmin terrorist në “Banjskë” të vazhdojë në mungesë. Gjykata po ashtu kishte bërë të ditur që për këta të pandehur është lëshuar letërreshtim ndërkombëtar dhe pritet ndalimi dhe ekstradimi i tyre për zhvillimin e procedurës ndaj tyre.
Seanca e shqyrtimit gjyqësor ndaj të tre akuzuarve në rastin “Banjska”: Vladimir Toliq, Dushan Maksimoviq dhe Blagoje Spasojeviq, u mbajt më 17 prill 2025, në të cilën tre të akuzuarit u deklaruan të pafajshëm. Ndërsa, prokurori special Naim Abazi, mbrojtja e të akuzuarve dhe pala e dëmtuar, kanë dhënë fjalën hyrëse.
Edhe në shqyrtimin fillestar të mbajtur më 9 tetor 2024, tre të pandehurit janë deklaruar të pafajshëm.
Ndryshe, Gjykata Themelore në Prishtinë – Departamenti Special, me aktvendimin e 6 dhjetorit 2024, i kishte refuzuar si të pabazuara kërkesat për hudhje të aktakuzës dhe kundërshtimet ndaj provave, të paraqitura nga mbrojtësit e të akuzuarve të lartpëmendur kundër aktakuzës së Prokurorisë Speciale të Republikës së Kosovës.
Kurse, Gjykata e Apelit më 13 mars 2025 njoftoi se ka marrë vendim, me të cilin e ka vërtetuar aktvendimin e Gjykatës Themelore në Prishtinë me të cilën u konfirmua aktakuza ndaj të akuzuarve në rastin “Bajska”.
Deri tani, të arrestuar dhe nën masën e paraburgimit për këtë rast janë: Blagoje Spasojeviq, Vladimir Toliq dhe Dushan Maksimoviq, për të cilët është veçuar procedura penale.
Aktakuza e Prokurorisë Speciale ngarkon 44 persona fizikë dhe një person juridik “RAD D.O.O”. Listës së të akuzuarve i prin Milan Radoiçiq.
Prokuroria Speciale e Republikës së Kosovës (PSRK) më 11 shtator 2024 ka ngritur aktakuzë kundër Milan Radoiçiqit dhe 44 të tjerëve për sulmin terrorist të 24 shtatorit 2023 në Banjskë të Zveçanit. Të akuzuarit ngarkohen se përmes përdorimit të dhunës me armatim të rëndë, tentuan ta shkëpusin pjesën veriore të territorit të Republikës së Kosovës e t’ia bashkojnë Republikës së Serbisë, me ç’rast si rezultat i dhunës së përdorur ka mbetur i vdekur zyrtari policor Afrim Bunjaku e u rrezikua jeta e zyrtarëve tjerë policorë dhe popullatës civile. Aktakuzën e plotë mund ta gjeni: KËTU.
Në Bajsnkë të Zveçanit, në orët e hershme të 24 shtatorit 2023, ishte vrarë rreshteri Afrim Bunjaku si dhe ishin plagosur dy të tjerë. Pastaj, të vrarë kishin mbetur edhe tre sulmues, kurse të tjerët ishin larguar pasi ishin strehuar për disa orë në Manastirin e Bajnskës. Milan Radoiçiq e kishte marrë përsipër përgjegjësinë për sulmin terrorist. /BetimipërDrejtësisë/
Forcat e Mbrojtjes së Izraelit (IDF) njoftojnë se një helikopter Black Hawk u rrëzua këtë mëngjes gjatë një përpjekjeje për ta rimarrë, pasi kishte bërë një ulje emergjente më herët gjatë kësaj jave për shkak të motit të keq.
Sipas ushtrisë, helikopteri kishte aterruar në një zonë të hapur në rajonin Gush Etzion të Bregut Perëndimor për shkak të kushteve të vështira të motit.
Gjatë operacionit të rimarrjes sot, aeroplani i dëmtuar u shkëput gjatë transportit ajror dhe u rrëzua.
דובר צה"ל:
במהלך השבוע (ג'), נחת מסוק מסוג 'ינשוף' בעקבות תנאי מזג האוויר בשטח פתוח בחטיבת עציון. הבוקר (ו'), במהלך ניסיון איסוף המסוק, אירעה תאונה והמסוק התקול התנתק והתרסק - אין נפגעים.
Autoritetet izraelite nuk raportuar për viktima apo të lënduar, shkruan timesofisrael.
Shefi i Forcës Ajrore Izraelite, Gjenerali Maj. Tomer Bar, ka urdhëruar krijimin e një komiteti hetimor ushtarak për të zbardhur ngjarjen.
Helikopterët Black Hawk, të njohur në Forcën Ajrore Izraelite si Yanshuf - “Dhelpra e natës” - përdoren si për misione të zakonshme transporti, ashtu edhe për të zbarkuar dhe rimarrë trupa gjatë operacioneve ushtarake. /Telegrafi/
Ky dimër pritet të jetë vendimtar për Atletico Madrid, që ka shumë punë përpara si në dalje ashtu edhe në afrime.
Nga ana tjetër, situata te Real Madrid është edhe më e tensionuar: Xabi Alonso u shkarkua pas humbjes në Superkupën e Spanjës ndaj Barcelonës, ndërsa pasuesi i tij, Alvaro Arbeloa, e nisi aventurën me një eliminim surprizë nga Albacete në Kupën e Mbretit.
Shitje të domosdoshme
Pas investimeve të rëndësishme gjatë verës, drejtuesit e Atleticos nuk kishin në plan të lëviznin shumë këtë janar, përveç rastit kur do të realizoheshin disa shitje.
Fillimisht u shfaq mundësia e largimit të Giacomo Raspadori drejt Romës, por negociatat u zvarritën.
Paralelisht, u hap edhe pista e largimit të Thiago Almada, i transferuar verën e kaluar për 21 milionë euro.
Benfica, Napoli, Gremio dhe së fundmi Palmeiras kanë shprehur interes për mesfushorin argjentinas.
Sipas disa burimeve, lojtari nuk është plotësisht i kënaqur dhe pritet të takohet me agjentët e tij për të analizuar situatën.
Megjithatë, qëndrimi i klubit madrilen ka ndryshuar.
Sipas Estadio Deportivo, Atletico nuk është më i detyruar të shesë, pasi ka realizuar disa operacione të rëndësishme financiare.
Siç analizon edhe gazetarja e FootMercato, Dahbia Hattabi, klubi ka përfituar mbi 60 milionë euro nga shitja e Conor Gallagher te Tottenham për 40 milionë dhe nga transferimi i Raspadorit te Atalanta për 22 milionë euro.
Kjo situatë i lejon Simeones të mos sakrifikojë Almadan, edhe pse e ardhmja e tij mbetet e hapur.
Përforcime në mesfushë
Atletico synon të afrojë një ose dy mesfushorë gjatë këtij muaji.
Ky është objektivi i drejtorit sportiv Mateu Alemany, me mbështetjen e plotë të Diego Simeones.
Aktualisht, në dispozicion janë Pablo Barrios, Koke dhe Johnny Cardoso, por “Cholo” kërkon më shumë energji dhe cilësi.
Sipas Estadio Deportivo dhe mediave angleze, objektiv kryesor është Joao Gomes i Wolverhampton.
Braziliani po spikat në një sezon zhgënjyes për klubin anglez, por çmimi prej 50 milionë eurosh e bën operacionin të vështirë.
Kontrata e tij është e vlefshme deri në vitin 2030 dhe për lojtarin interesohen edhe Napoli dhe Manchester United.
Alternativa të tjera në tryezë
Sipas AS, në listë janë edhe emra të tjerë:
Manu Kone (Roma), me vlerë rreth 50 milionë euro.
Kees Smit (AZ Alkmaar), talent 20-vjeçar për të cilin kërkohen 60 milionë.
Ruben Neves, në fund të kontratës me Al-Hilal, që mund të kushtojë rreth 20 milionë euro.
Lamine Camara, finalist i Kupës së Afrikës me Senegalin.
Edhe sulmi në vëzhgim
Përveç mesfushës, Marca raporton se Atletico nuk përjashton afrimin e një lojtari ofensiv, por vetëm nëse ai përmirëson ndjeshëm repartin sulmues.
Aktualisht, Simeone ka në dispozicion Julian Alvarez, Alexander Sorloth dhe Antoine Griezmann, ky i fundit i kërkuar nga klubet meksikane.
Me rreth 62 milionë euro në arkë dhe disa pista të hapura, Atletico Madrid synon të bëjë disa korrigjime të domosdoshme në skuadër gjatë afatit kalimtar të janarit 2026, me ambicien për të mbetur konkurrues në të gjitha frontet. /Telegrafi/
Jafar Panahi, regjisori i filmit fitues të Palmës së Artë, Ishte thjesht një aksident[Yek tasādof-e sāde], thotë se udhëheqësit iranianë duan ta shkatërrojnë vendin.
Nga: Philip Oltermann / The Guardian (titulli: Khamenei regime will not be able to keep control of Iran, says dissenting film-maker) Përkthimi: Telegrafi.com
Pas shtypjes së dhunshme të valës më të fundit të protestave, regjimi i Khameneit nuk do të jetë në gjendje të mbajë kontrollin mbi shoqërinë iraniane, ka parashikuar një nga kineastët kryesorë të vendit.
“Është e pamundur që kjo qeveri të mbajë veten në këtë situatë”, tha për Guardian, regjisori Jafar Panahi. “Edhe ata e dinë këtë. E dinë që do të jetë e pamundur të sundojnë mbi njerëzit. Ndoshta qëllimi i tyre i vetëm tani është ta çojnë vendin në prag të kolapsit të plotë dhe të përpiqen ta shkatërrojnë”.
Protestat e shkaktuara nga ekonomia e dobët kanë përfshirë Iranin që nga fundi i dhjetorit dhe janë përballur me goditje vdekjeprurëse nga forcat e sigurisë gjatë fundjavës, me raporte për më shumë se 2 500 njerëz të vrarë.
Ndërprerja e internetit të premten e kaluar, që bllokoi 95-99 përqind të rrjetit të komunikimit të vendit, ishte “shenjë se një masakër shumë e madhe po vinte”, tha Panahi. “Por, ne kurrë nuk parashikuam që shtypja do të kishte përmasa dhe shifra të tilla”.
Panahi, 65 vjeç, foli për Guardian-in nga ShBA-ja, ku ai po promovon filmin e tij më të fundit, Ishte thjesht një aksident. Vitin e kaluar, ai filmi fitoi Palmën e Artë në festivalin e filmit në Kanë dhe është një pretendent kryesor për Oskar më 2026 në kategorinë e filmit artistik ndërkombëtar.
Pjesërisht triler hakmarrjeje, pjesërisht komedi e zezë, konkurrimi francez për çmimin e Akademisë ndjek një grup ish-të burgosurish politikë iranianë që përpiqen të vendosin nëse do të marrin hak ndaj një burri për të cilin ata besojnë se i ka torturuar ata në burg.
“Ajo që kam paraqitur në këtë film është se kur cikli i dhunës vazhdon, atëherë bëhet shumë e vështirë për ta ndaluar atë”, tha Panahi. “Për fat të keq, për shkak të egërsisë që po kryhet nga shteti, frika është se ky cikël i dhunës do të vazhdojë”.
Në dhjetor, regjisori u dënua me një vit burg në mungesë për akuza për krijimin e propagandës kundër sistemit politik, por ai ka shpallur synimin e tij për t’u kthyer në vend.
Ai është burgosur dy herë, për protestimin kundër ndalimit të dy kineastëve kolegë që kishin qenë kritikë ndaj autoriteteve në vitin 2022, dhe për mbështetjen e protestave kundër qeverisë në vitin 2010.
Panahi tha se ndërsa kolapsi i qeverisë së udhëhequr nga udhëheqësi klerik, Ajatollah Ali Khamenei, ishte i pashmangshëm pas shtypjeve të përgjakshme të fundit, koha e tij ishte e pamundur për t’u parashikuar.
“Regjimi do të bjerë, 100 përqind”, tha Panahi. “Kjo është ajo që u ka ndodhur qeverive diktatoriale në të gjithë historinë. Kur do të bjerë, askush këtë nuk e di. Ne duam që të ndodhë sa më shpejt të jetë e mundur, në minutat e ardhshëm, por ka shumë faktorë që duhet të bashkohen që kjo të ndodhë”.
Ai paralajmëroi qeveritë perëndimore për përfshirjen me regjimin klerikal si akterë racionalë. “Në diktatura të tjera rreth botës, do të shihni që do të ketë të paktën disa njerëz që do të veprojnë duke u bazuar në racionalitet dhe që nuk do ta lejojnë që të arrijë në këtë pikë”, tha ai, duke folur përmes përkthyeses së tij Sheida Dayani. “Por, për fat të keq, në këtë sistem nuk ka racionalitet. Gjithçka për të cilën ata mund të mendojnë është shtypja dhe si të qëndrojnë në pushtet edhe vetëm një ditë më shumë. Gjëja e fundit për të cilën ata po mendojnë janë njerëzit”.
Disa protesta kundër regjimit, në Iran dhe mes diasporës iraniane në Evropë dhe ShBA, kanë bërë thirrje për kthimin e Reza Pahlavit, djalit të mërguar të shahut të fundit të Iranit. Pahlavi, i cili jeton në Uashington, babai i ndjerë i të cilit sundoi Iranin si një monark autokrat nga viti 1941 deri më 1979, ka bërë thirrje që njerëzit të dalin në rrugë.
Panahi e pranoi që thirrjet për kthimin e djalit të shahut ishin “zëri që po del [nga protestat], me të vërtetë”. Megjithatë, ai shtoi: “Siç ka thënë vetë Reza Pahlavi, pas tranzicionit duhet të ketë një referendum në Iran, dhe atëherë njerëzit do të vendosin çfarë lloj qeverie duan dhe kë duan që t’i sundojë ata. Gjatë kësaj periudhe të tranzicionit, duhet të gjithë të jemi të bashkuar”.
I pyetur nëse Pahlavit mund t’i besohet mbikëqyrja e tranzicionit post-regjim, ai tha se kjo i takon popullit të Iranit për të vendosur. “Qoftë nëse biem ose jo në pajtim me Pahlavin, ajo që dimë është se shumica dërrmuese e popullsisë së Iranit duan që regjimi aktual të largohet”. /Telegrafi/
Login
