Një ligjëratë mbi Gjykatën Speciale në ambientet e Shkollës së Mesme “Xhevdet Doda” në Prishtinë ka shkaktuar reagime të ndryshme nga institucione dhe organizata.

Dhomat e Specializuara të Kosovës (KSC) kanë konfirmuar për Telegrafin se zhvillojnë aktivitete informuese në Kosovë që nga viti 2018, si pjesë e Programit të Shtrirjes së Informacionit, duke përfshirë nxënës, komunitetin lokal, gazetarë dhe avokatë.

Zëdhënësja Angela Griep tha se këto takime diskutojnë mbi mandatin dhe procedurat e gjykatës, duke ofruar informacion publik të ngjashëm me atë që gjendet në faqen zyrtare të KSC-së.

"Ekipi i informimit i Dhomave të Specializuara këtë javë po zhvillon aktivitete për të informuar grupet studentore në Prishtinë rreth mandatit dhe procedurave të gjykatës, si dhe për të dëgjuar pikëpamjet e tyre dhe për t'iu përgjigjur pyetjeve të tyre”, thuhet në përgjigje. Siç e dini, që nga viti 2018 ne kemi zhvilluar rregullisht aktivitete me qytetarë në të gjithë Kosovën si pjesë e programit të informimit, duke dëgjuar komentet e njerëzve dhe duke u përgjigjur pyetjeve të tyre”, thuhet në përgjigje me shkrim për Telegrafin.

Megjithatë, Drejtoria e Arsimit e Komunës së Prishtinës ka reaguar, duke paralajmëruar masa ndaj organizatorëve të ligjëratës.

Sipas Drejtorisë, aktiviteti është organizuar nga Nisma e të Rinjve për të Drejtat e Njeriut në Kosovë (YIHR) dhe është miratuar nga Këshilli Drejtues i Shkollës, pa autorizimin e Drejtorisë.

Drejtoria e Arsimit ka theksuar se do të trajtojë përgjegjësitë institucionale dhe rolin e organizatës në aktivitet, duke e konsideruar transparencën dhe llogaridhënien parime të panegociueshme.

Nga ana e shkollës, është sqaruar se asnjë zyrtar apo gjykatës i Dhomave të Specializuara nuk ka mbajtur ligjëratë.

Sipas “Xhevdet Doda”, ligjërata ka qenë një aktivitet edukativ i YIHR-së mbi sistemin e drejtësisë dhe funksionimin e gjykatave, duke përfshirë edhe Gjykatën Speciale në Hagë.

Shkolla thekson se YIHR ka realizuar mbi 100 ligjërata të ngjashme në shkolla dhe fakultete në të gjithë Kosovën.

Reagim ka pasur edhe nga Organizata e Veteranëve të Luftës së UÇK-së (OVL-UÇK), e cila ka kritikuar aktivitetin si përpjekje për kontroll të imazhit të Gjykatës Speciale dhe ka krahasuar qasjen me praktikën e propagandës në ish-Jugosllavi gjatë viteve 1980.

OVL-UÇK ka theksuar se gjykata duhet të respektojë Kushtetutën, ligjet e Kosovës dhe standardet ndërkombëtare të drejtësisë./Telegrafi.

Ivanka Trump ka shkuar në Kryeministri mbrëmjen e së enjtes.

E bija e Presidentit amerikan, Donald Trump, u prit nga Kryeministri Edi Rama.

Të mërkurën në mbrëmje, Ivanka Trump zhvilloi një takim me Kryeministrin Edi Rama dhe një grup arkitektësh ndërkombëtarë. Në fokus të bisedimeve ishin projekte dhe ide të reja zhvillimi, të lidhura me investime strategjike dhe vizion urbanistik në zonën e Vlorës, shkruan A2.

Pas darkës, Rama dhe Ivanka Trump qëndruan disa momente jashtë ambienteve ku u zhvillua takimi, duke shkëmbyer bisedë të shkurtër, ndërsa gjithçka është shoqëruar nga masa të rrepta sigurie.

Më pas, Ivanka Trump është larguar me automjet, së bashku me Kryeministrin Rama, në drejtim të Orikumit.

Sot, Ivanka Trump zhvilloi një tjetër vizitë në Manastirin e Zvërnecit dhe në zonën e Porto Novës.

Kompania Rajonale e Mbeturinave KRM “Pastrimi” Sh.A. ka njoftuar qytetarët dhe bizneset e Prishtinës se ka filluar zbatimin e çmimores së re për shërbimin e grumbullimit dhe transportit të mbeturinave komunale, në përputhje me Rregulloren për Menaxhimin e Mbeturinave, të miratuar nga Kuvendi Komunal i Prishtinës në dhjetor 2023 dhe të publikuar në Gazetën Zyrtare të Republikës së Kosovës (Akt Nr. 90391).

Sipas dokumentit zyrtar të çmimores, tarifa për amvisëritë rezidente është përcaktuar në 5.56 euro në muaj pa TVSH, respektivisht 6.20 euro në muaj me TVSH 8%, ndërsa për amvisëritë jorezidente tarifa vjetore arrin në 17.8 euro me TVSH.

Çmimorja parasheh tarifa të diferencuara edhe për bizneset, varësisht nga madhësia, zona dhe kostoja e shërbimit.

Për dyqanet e vogla dhe bizneset artizanale, tarifa mujore në zonat urbane është 8.4 euro me TVSH, ndërsa në zonat rurale 6 euro me TVSH.

Për bizneset e mesme dhe të mëdha, çmimet mujore në zonat urbane variojnë nga 15 euro deri në 30 euro me TVSH, në varësi të kostos së shërbimit, ndërsa në zonat rurale nga 8.4 deri në 18 euro me TVSH.

Dokumenti përfshin gjithashtu tarifa të veçanta për bizneset dhe institucionet me kontrata specifike për kontejnerë 1.1 m³ dhe 7.1 m³, ku çmimi për zbrazje për kontejnerin 1.1 m³ është 18 euro me TVSH, ndërsa për kontejnerin 7.1 m³ arrin në 64.50 euro me TVSH.

Po ashtu, janë përcaktuar çmime për shërbime me porosi të veçanta, përfshirë grumbullimin e mbeturinave të vëllimshme, të ndërtimit dhe demolimit, si dhe mbeturinave të gjelbra nga kopshtet, me tarifa që variojnë nga 9.4 deri në 9.9 euro për metër kub me TVSH.

Nga KRM “Pastrimi” theksohet se zbatimi i çmimores së re synon sigurimin e një sistemi financiar të qëndrueshëm, rritjen e transparencës në tarifim, përmirësimin e cilësisë së shërbimit dhe përmbushjen e standardeve mjedisore dhe të shëndetit publik.

Kompania mbetet e hapur për sqarime dhe bashkëbisedim me qytetarët dhe bizneset, duke theksuar se prioritet mbetet një qytet më i pastër dhe një proces i drejtë tarifimi për të gjithë.

Udhëheqësja e opozitës bjelloruse, Sviatlana Tsikhanouskaya, ka marrë Kosovën si shembull të lirisë dhe prosperitetit, duke vlerësuar rrugëtimin e saj drejt shtetndërtimit.

Në një postim në Twitter, Tsikhanouskaya ka bërë të ditur se ka takuar presidenten e Kosovës, Vjosa Osmani, gjatë Forumit Ekonomik Botëror në Davos të Zvicrës.

Ajo ka theksuar se përvoja e Kosovës dëshmon se guximi, qëndrueshmëria dhe solidariteti ndërkombëtar mund të çojnë drejt lirisë dhe zhvillimit, duke shtuar se opozita bjelloruse e vlerëson mbështetjen e vazhdueshme të Kosovës për popullin e Bjellorusisë.

Tsikhanouskaya është figura kryesore e opozitës bjelloruse dhe udhëheqësja simbolike e rezistencës kundër regjimit të presidentit Aleksandër Lukashenko.

Ajo u bë e njohur gjatë zgjedhjeve presidenciale të vitit 2020, pasi bashkëshorti i saj, Siarhei Tsikhanouski, u arrestua dhe u pengua të kandidojë.

Sipas vëzhguesve ndërkombëtarë, zgjedhjet u manipuluan në favor të Lukashenkos, ndërsa pas tyre shpërthyen protesta masive në mbarë Bjellorusinë.

Pas shtypjes së protestave, Tsikhanouskaya u detyrua të largohej nga vendi dhe që nga ajo kohë vepron nga jashtë, duke përfaqësuar opozitën bjelloruse në arenën ndërkombëtare.

Bjellorusia vazhdon të mos e njohë pavarësinë e Kosovës.

Organizata e Veteranëve të Luftës së UÇK-së (OVL-UÇK) ka reaguar ndaj ligjëratës së mbajtur nga Dhomat e Specializuara, duke e konsideruar atë jo si një aktivitet edukativ, por si një përpjekje të qartë për të menaxhuar imazhin e gjykatës pas shkeljeve të vazhdueshme ndaj të drejtave themelore të të akuzuarve dhe rendit kushtetues të Republikës së Kosovës.

Sipas OVL-UÇK-së, në vend që të merret me fushata propagandistike, Gjykata Speciale duhet të përmirësojë besueshmërinë e saj duke respektuar Kushtetutën, ligjet e vendit dhe standardet ndërkombëtare të drejtësisë.

Organizata paralajmëron se ligjërata e fundit është e ngjashme me taktikat e përdorura nga organet e pushtetit në ish-Jugosllavi pas demonstratave studentore të vitit 1981, kur mbledhje të ngjashme organizoheshin për të stigmatizuar dhe përgatitur popullin për dënime drakonike ndaj rinisë shqiptare.

Në reagimin e saj, OVL-UÇK identifikon disa shkelje kryesore të Gjykatës Speciale që kanë dëmtuar rëndë besueshmërinë e saj:

Shkelja e parimit të barazisë para ligjit, duke ndjekur penalisht vetëm një palë dhe lënë krimet serbe të pandëshkuara.

Mohimi i lirimit të përkohshëm, edhe në kushte humanitare, në kundërshtim me praktikën evropiane.

Zgjatja e pajustifikueshme e paraburgimit pa vendime përfundimtare, duke e kthyer atë në dënim paraprak.

Cenimi i dinjitetit njerëzor të të paraburgosurve, përmes kushteve kufizuese që nuk përputhen me standardet e Konventës Evropiane për të Drejtat e Njeriut.

Mungesa e transparencës dhe llogaridhënies publike, duke refuzuar të adresojë shqetësimet e institucioneve dhe organizatave të veteranëve.

Ndërhyrje indirekte në fusha të ndjeshme, si arsimi, pa autorizim institucional dhe pa debat publik, duke ngritur dyshime për ndikim dhe propagandë.

OVL-UÇK thekson se veprime të tilla nuk i shërbejnë drejtësisë, por vetëm imponimit të një narrative të parapërgatitur, duke dëmtuar rëndë imazhin dhe besueshmërinë e gjykatës./Telegrafi.

Presidentja e Republikës së Kosovës, Vjosa Osmani, është bërë njëra nga 19 nënshkruesit e Bordit të Paqes, një mekanizëm ndërkombëtar i themeluar me iniciativë të presidentit amerikan, Donald Trump, me synim rindërtimin dhe stabilizimin e Gazës pas luftës dyvjeçare shkatërrimtare.

Vetë Trump ka deklaruar se ky plan pritet të ketë “sukses të madh” në rikthimin e paqes dhe zhvillimit në rajon.

Pjesëmarrja e Kosovës në këtë Bord përfaqëson një moment të rëndësishëm diplomatik dhe politik, duke shënuar një fazë të re të angazhimit të saj në iniciativa globale për paqe, siguri dhe rindërtim pas konflikteve.

Që nga shpallja e pavarësisë në vitin 2008, Kosova ka pasur si prioritet strategjik forcimin e subjektivitetit të saj ndërkombëtar dhe anëtarësimin në organizata rajonale e globale.

Megjithë pengesat e vazhdueshme diplomatike, vendi ka ndërtuar një profil të qartë si shtet pro-perëndimor, i orientuar drejt paqes, demokracisë dhe bashkëpunimit ndërkombëtar.

Në këtë kontekst, përfshirja në Bordin e Paqes shihet si vazhdimësi logjike e këtij orientimi.

Kosova, si shtet që ka përjetuar luftë, shkatërrim dhe rindërtim me ndihmën e komunitetit ndërkombëtar, veçanërisht të Shteteve të Bashkuara, sjell në këtë Bord një përvojë unike dhe të besueshme.

Presidentja Osmani ka theksuar se marrëveshja për pjesëmarrjen e Kosovës në këtë Bord do t’i dërgohet Kuvendit të Kosovës për ratifikim, duke nënvizuar rëndësinë institucionale dhe kushtetuese të këtij angazhimi.

“Anëtarësimi në organizata ndërkombëtare të paqes e që udhëhiqen nga aleati ynë strategjik, fuqizon sovranitetin tonë, pozicionin tonë ndërkombëtar dhe është në interesin më të lartë të Republikës së Kosovës”, ka shkruar Osmani pas ceremonisë së nënshkrimit.

Përfshirja në një mekanizëm të udhëhequr nga SHBA-ja përforcon më tej lidhjen strategjike Kosovë–Shtetet e Bashkuara, një aleancë që ka qenë vendimtare për lirinë, pavarësinë dhe sigurinë e vendit.

Ceremonia e nënshkrimit është mbajtur në Davos të Zvicrës, në kuadër të takimeve të nivelit të lartë ndërkombëtar, duke i dhënë kësaj nisme peshë të veçantë politike dhe simbolike.

Përveç Kosovës, pjesë e Bordit të Paqes janë bërë edhe shtete nga rajone të ndryshme të botës, përfshirë Bahrejnin, Argjentinën, Armeninë, Azerbajxhanin, Belgjikën, Bullgarinë, Egjiptin, Hungarinë, Indonezinë, Jordaninë, Kazakistanin, Mongolinë, Pakistanin, Paraguain, Katarin, Arabinë Saudite, Turqinë, Emiratet e Bashkuara Arabe dhe Uzbekistanin.

Fakti që Kosova është ulur në të njëjtën tryezë me këto shtete, si palë e barabartë, përbën një dëshmi të rritjes së rolit të saj në arenën ndërkombëtare.

Pjesëmarrja e Kosovës në Bordin e Paqes ka edhe një dimension të fortë simbolik.

Një vend që dikur ishte objekt i ndërhyrjeve ndërkombëtare për paqe, sot po shndërrohet në kontribuues aktiv në ndërtimin e paqes globale.

Ky angazhim i ri forcon narrativën e Kosovës si shtet i përgjegjshëm, partner i besueshëm i Perëndimit dhe zë i legjitimuar në diskutimet ndërkombëtare për paqe, siguri dhe rindërtim pas konflikteve./Telegrafi.

Gjykata Themelore në Mitrovicë ia ka vazhduar masën e paraburgimit edhe për dy muaj ish-pjesëtarit të Ministrisë së Punëve të Brendshme të Serbisë, V.M., i cili dyshohet për përfshirje në rrëmbimin dhe plagosjen e Millan Vukashinoviqit, rast që kishte ndodhur më 1 nëntor të vitit të kaluar.

Zëdhënësja e Gjykatës së Mitrovicës, Hateme Haxhaj, ka bërë të ditur se me kërkesë të Prokurorisë Themelore, paraburgimi për të pandehurin është vazhduar nga data 19 janar 2026 deri më 19 mars 2026.

V.M. ishte arrestuar nga Policia e Kosovës në dhjetor të vitit 2025, në kuadër të një operacioni të përbashkët me Agjencinë e Kosovës për Inteligjencë, në zonën e Leshakut.

Ministri në detyrë i Punëve të Brendshme, Xhelal Sveçla, kishte njoftuar se i dyshuari kishte qenë më herët pjesë e Policisë së Kosovës, ku ishte integruar sipas marrëveshjes së vitit 2013, por më pas kishte dhënë dorëheqje.

Sipas autoriteteve, ekzistojnë dyshime se i arrestuari ka bashkëpunuar vazhdimisht me strukturat e sigurisë së Serbisë dhe ka qenë i përfshirë në rrëmbimin e Millan Vukashinoviqit, i cili gjatë këtij akti ishte plagosur rëndë dhe aktualisht po trajtohet në një spital në Serbi.

Autoritetet kosovare kanë bërë të ditur se Vukashinoviq dyshohet se ka pasur kontakte me strukturat e inteligjencës dhe ushtrisë së Serbisë, si dhe se ka qenë në dijeni për përgatitjet e sulmit terrorist në Banjskë.

Pas urdhëresës së Gjykatës, janë bastisur shtëpia dhe objektet përcjellëse të të dyshuarit, ku janë sekuestruar disa telefona celularë, një laptop, dokumente, një pushkë gjuetie me municion, pajisje për armë dhe pjesë të armëve.

Milan Vukashinoviq, shtetas i Republikës së Kosovës me nacionalitet serb, dyshohet se është plagosur dhe rrëmbyer brenda territorit të Kosovës, në afërsi të Leposaviqit, nga struktura të sigurisë së Serbisë.

Rasti ka nxitur reagime të vazhdueshme nga institucionet e Kosovës, të cilat kanë akuzuar Serbinë për veprime destabilizuese dhe shkelje të integritetit territorial të vendit.

Ministri në detyrë i Punëve të Brendshme ka kërkuar nga bashkësia ndërkombëtare që të rrisë presionin ndaj Serbisë dhe të ndërmarrë masa konkrete ndëshkuese, me qëllim parandalimin e incidenteve të ngjashme dhe ruajtjen e stabilitetit në rajon.

Drejtuesit e shkollës së mesme “Xhevdet Doda” në Prishtinë, kanë reaguar publikisht ndaj, siç thuhet, disa informacioneve të pasakta që po qarkullojnë në opinion, duke sqaruar se në ambientet e shkollës nuk është mbajtur asnjë ligjëratë nga zyrtarë apo gjykatës të Gjykatës Speciale.

Sipas reagimit, ligjërata në fjalë është organizuar nga Nisma e të Rinjve për të Drejtat e Njeriut në Kosovë (YIHR), një organizatë e njohur për aktivitetet e saj edukative në shkolla të mesme dhe universitete, me fokus në edukimin juridik dhe qytetar të të rinjve.

Qëllimi i ligjëratës ka qenë informimi i nxënësve mbi sistemin e drejtësisë, llojet e gjykatave dhe mënyrën e funksionimit të tyre, përfshirë edhe gjykatën e Kosovës që funksionon në Hagë, në kuadër të një qasjeje të përgjithshme, neutrale dhe edukative.

Gjatë ligjëratës, procedurat dhe funksionimi i gjykatave janë trajtuar në mënyrë informative, pa përmbajtje politike apo qëndrime të njëanshme.

Behrami reagon ndaj ligjëratës së Gjykatës Speciale në gjimnazin “Xhevdet Doda”: UÇK-ja organizatë e përbashkët kriminale?

Shkolla thekson se çdo interpretim apo pretendim tjetër që sugjeron ndryshe është i pavërtetë dhe i pabazuar.

Po ashtu, bëhet e ditur se YIHR ka realizuar mbi 100 ligjërata të ngjashme në shkolla të mesme dhe fakultete në mbarë Kosovën, duke kontribuar në rritjen e njohurive juridike dhe qytetare të të rinjve.

Në reagim sqarohet se Drejtoria Komunale e Arsimit nuk ka qenë e përfshirë në dhënien e pëlqimit për mbajtjen e kësaj ligjërate, ndërsa autorizimi është dhënë nga Këshilli Drejtues i Shkollës (KDSH).

Në fund, drejtuesit e shkollës riafirmojnë përkushtimin ndaj transparencës, edukimit cilësor dhe informimit korrekt të nxënësve dhe opinionit publik, duke bërë thirrje që për informacione shtesë palët e interesuara t’i drejtohen drejtpërdrejt organizatës përkatëse./Telegrafi.

Shtetet e Bashkuara të Amerikës i kanë dhuruar Kosovës një skaner mobil Rapiscan, prodhim amerikan, në vlerë prej 3 milionë dollarësh për të forcuar sigurinë kufitare.

Ambasada Amerikane në Kosovë ka bërë të ditur se luftimi i trafikimit të paligjshëm dhe parandalimi i përhapjes së mallrave të falsifikuara i bën bizneset amerikane dhe kosovare më të forta dhe më konkurruese.

“Kjo teknologji rrit kapacitetet e zbulimit, mbështet tregtinë e ligjshme dhe avancon interesat e përbashkëta të sigurisë dhe zhvillimit ekonomik”- njofton Ambasada amerikane më 22.01.2026.

Në fotografitë e publikuara shihet e ngarkuara me punë e Ambasadës së Shteteve të Bashkuara, Anu Prattipati; ministri në detyrë i Punëve të Brendshme, Xhelal Sveçla dhe ministri në detyrë i Financave, Hekuran Murati si dhe Drejtori i Përgjithshëm i Doganës, Agron Llugaliu.

Ceremonia e inagugurimit të skanerit mobil, investim në forcimin e kontrolleve doganore dhe rritjen e sigurisë kufitareu mbajt në pikëkalimin kufitar në Merdarë.

Skanerët Rapiscan janë sisteme të avancuara të kontrollit të sigurisë, të prodhuara nga kompania amerikane Rapiscan Systems, e specializuar në teknologji zbulimi.

Ata përdoren gjerësisht në pikat kufitare dhe doganat, portet dhe aeroportet, objektet qeveritare dhe ushtarake e infrastrukturën kritike.

Në varësi të modelit, skanerët Rapiscan mund të zbulojnë armë dhe mjete shpërthyese; drogë dhe kontrabandë; mallra të falsifikuara ose të padeklaruara dhe objekte të fshehura në automjete, kontejnerë apo bagazhe.

Shumica e skanerëve Rapiscan përdorin teknologji me rreze X (përfshirë rreze X me energji të lartë për ngarkesa të mëdha) dhe softuer të avancuar analizues, i cili identifikon forma, dendësi dhe materiale.

Autoritetet serbe e kanë liruar nga paraburgimi shtetasin e Kosovës, Hazir Haziri – rreth katër muaj pasi e kishin arrestuar për gjoja krime lufte – njoftoi të mërkurën avokati Arianit Koci.

Haziri ishte arrestuar më 8 shtator në pikën kufitare në Merdare dhe prej atëherë ishte mbajtur në paraburgim në Serbi.

Lirimi i Hazirit “konfirmon se arrestimi ka qenë i pabazuar dhe i ngritur mbi pretendime të pambështetura në fakte”, tha avokati Koci, i cili ka qenë i angazhuar në rastin e tij.

Avokati Koci ka dalë në pikën kufitare Kosovë-Serbi për ta pritur personalisht Hazir Hazirin pas lirimit.

Ai ka theksuar se do të vazhdojë angazhimin për lirimin e qytetarëve shqiptarë që mbahen padrejtësisht në burgjet e Serbisë.

“Fjalën e dhënë e mbaj. Kam thënë se Hazir Hazirin do ta kthej nga burgu i Serbisë. Sonte, Hazir Haziri është në Kosovë. Asnjë qytetar i pafajshëm nuk guxon të mbetet në burgjet e Serbisë,” ka deklaruar Koci.

Haziri, 77 vjeç, ishte arrestuar për gjoja krime lufte gjatë luftës së fundit në Kosovë më 1998-’99.

Autoritetet serbe pretendonin asokohe se “në qershor të vitit 1999, në Podujevë, në bashkëpunim me disa pjesëtarë të UÇK-së [Ushtrisë Çlirimtare të Kosovës], e ka vrarë me armë zjarri një civil serb”.

Serbia ka arrestuar vazhdimisht shtetas të Kosovës nën pretendime të tilla, dhe vetëm në vitin 2025 u regjistruan disa arrestime të tilla./Telegrafi.

Kryetari i partisë së dytë në zgjedhjet e 28 dhjetorit, Bedri Hamza, ka thënë se nuk e ka problem të takohet me kreun e partisë së parë, Lëvizjes Vetëvendosje, për marrëveshje politike.

Megjithatë, ai ka thënë se përgjegjësia i takon Albin Kurtit për ta konstituuar Kuvendin dhe ta formojë qeverinë.

“I ka 57 ulëse në Kuvend, sigurisht se e bën koalicionin edhe me deputetët e komuniteteve joshumicë, që nuk janë serbë, por të komuniteteve tjera, dhe e ka numrin e mjaftueshëm për të formuar qeverinë. Ka përgjegjësi për të formuar qeverinë, për konstituim të Kuvendit. Ka përgjegjësi që pa vonesa ta konstituojë Kuvendin, të gjitha pozicionet e Kuvendit, edhe të kryetarit e edhe të nënkryetarëve. Ne i votojmë nënkryetarët, për shkak se e kemi edhe nënkryetarin nga radha e PDK-së. Për të gjitha pozicionet tjera, përgjegjësia është e tyre”, u shpreh Hamza mes tjerash në intervistën e parë ekskluzive pas zgjedhjeve të dhjetorit.

I pyetur se a do ta votojë PDK-ja kryetarin e Kuvendit, Hamza tha: “Pse me pasë ne votë? I kanë ata, i mjaftojnë. Dhe normalisht, pa marrëveshje politike, nuk votojmë”.

Tutje, kreu i PDK-së tha se nuk janë në pritje të asnjë partie për marrëveshje, teksa potencoi se partia e tij ka qenë gjithmonë bashkëpunuese për tema në interes të vendit, për çka tha se do të jetë edhe në të ardhmen.

“Asnjëherë nuk u ikim bisedave. Nuk do të thotë se pajtohemi, por bisedave dhe takimeve asnjëherë nuk u ikim. Varet tema dhe mënyra e ftesës. Sepse edhe me të ftu, duhet me të ftu mirë dhe mbarë. Kjo i bie që mos me ta çu ftesën mirë dhe qartë, me pas çfarëdo prapavie apo tendence, nuk funksionon”, deklaroi Hamza në Rubikon të Klan Kosova.

Duke folur për postin e Presidentit, i cili duhet të zgjidhet për rreth 1 muaj e gjysmë, ai shprehu vullnet për të biseduar me Kurtin për këtë çështje, por tha se sërish përgjegjësia i bie partisë së parë.

Ndër të tjera, ai kujtoi edhe rastet e së kaluarës se si janë zgjedhur presidentët.

“Nuk ka kurgjo të keqe me folë, por përgjegjësia për me i ba votat i takon partisë së parë. Presidenti Rugova herën e parë e ka dhënë postin e kryeministrit, ku ka qenë zotëri Rexhepi, dhe vetë ka qenë president. Herën e dytë ia ka dhënë zotit Haradinaj, dhe vetë ka qenë president. Herën e tretë është zhgjedhur zoti Sejdiu me përkrahje të PDK-së, dhe kryeministër ka qenë zoti Thaçi. Mirëpo, PDK i ka pasur shumicën, por e ka marrë kryeministrin dhe e ka zgjedhur presidentin me marrëveshje politike”.

“Në hapin e radhës, zoti Pacolli është zgjedhur po ashtu president, dhe PDK ka qenë partia e parë. Postin e kryerministrit e ka pasur zoti Thaçi, e Pacolli është zgjedhur president. Zonja Jahjaga është zgjedhur në kohën kur shumicën e ka pasur PDK-ja”, deklaroi Hamza.

Ai shtoi se gjithmonë partia e cila e formon qeverinë, i takon përgjegjësia më e madhe që ta gjejë formulën se si ta zgjedh presidentin.

Katër persona kanë përfunduar në prangat e Policisë së Kosovës si të dyshuar për vjedhje të rënda në zonën e Obiliqit.

Policia ka njoftuar se tre nga të arrestuarit janë të mitur.

Katër të arrestuarit dyshohet se janë përfshirë në së paku tri raste të vjedhjeve të rënda që kanë ndodhë gjatë muajit janar 2025, në shtëpi private dhe lokale në zonën e Obiliqit.

Me vendim të prokurorit të shtetit ata janë dërguar në qendrën e mbajtjes.

Aktualisht hetuesit policorë të stacionit të Obiliqit janë në koordinim me stacionet e të gjitha regjioneve, pasi që është ngritur dyshimi se të njëjtit persona janë të përfshirë edhe në raste të tjera.

Një 19-vjeçar është arrestuar në Prishtinë nën dyshimin se ka kryer veprën penale “grabitja”.

Sipas Policisë së Kosovës, i dyshuari me inicialet A.Sh., dyshohet se më 10 nëntor të vitit të kaluar ka kryer grabitjen në rrugën “Halil Alidemaj” në Prishtinë.

Me vendim të prokurorit të shtetit, i dyshuari është dërguar në mbajtje, ndërsa hetuesit policorë janë duke punuar për arrestimin e dy personave të tjerë të dyshuar, të cilët lidhen me të njëjtin rast.

Drejtoria për Hetimin e Krimeve Ekonomike dhe Korrupsionit (DHKEK), përkatësisht Njësia Rajonale për Hetimin e Krimeve Ekonomike dhe Korrupsionit në Pejë, në koordinim me Prokurorin kompetent dhe me autorizim të Gjykatës, ka ndërmarrë veprime hetimore lidhur me një rast të dyshuar për veprën penale “Deklarim i rremë”.

Sipas Policisë së Kosovës, gjatë hetimeve janë siguruar dëshmi të mjaftueshme se personat e dyshuar F.SH. (2000) dhe A.K. (2005), më datë 13 janar 2026, në ambientet e Qendrës për Pajisje me Dokumente të Identifikimit (QPD) në Pejë, kanë deklaruar rrejshëm, duke garantuar për identitetin e saktë të një personi tjetër të dyshuar, A.R. (2003).

Të dyshuarit janë intervistuar në prani të avokatëve mbrojtës, ndërsa pas përfundimit të intervistimit, prokurori kompetent ka nxjerrë vendim për ndalim policor ndaj dy personave të dyshuar.

Policia e Kosovës ka bërë të ditur se, në bashkëpunim me organet e drejtësisë, mbetet e përkushtuar në luftimin e krimeve ekonomike, korrupsionit dhe çdo vepre tjetër penale, duke garantuar ligjshmëri, transparencë dhe llogaridhënie ndaj qytetarëve dhe institucioneve të Republikës së Kosovës.

Nënkryetari i LDK-së, Lutfi Haziri, ka deklaruar se presidenti historik i Kosovës, Ibrahim Rugova, ka qenë i përfshirë drejtpërdrejt në një marrëveshje me presidentin e atëhershëm të Shqipërisë, Ramiz Alia, për krijimin e celulave të para të strukturave të armatosura të Kosovës.

Në një lidhje direkte në Debat Plus në TV Dukagjini, Haziri tha se më 2 shtator 1990 është ngarkuar personalisht me organizimin e celulave të para për përzgjedhje, përgatitje dhe dërgim të të rinjve në trajnim ushtarak në Shqipëri, në kuadër të kësaj marrëveshjeje.

“Është e vërtetë që më 2 shtator 1990 jam ngarkuar me organizimin e celulave të para që kanë pasur për qëllim përzgjedhjen, përgatitjen dhe dërgimin e njerëzve në përgatitje ushtarake në Shqipëri, sipas një marrëveshjeje mes presidentit Rugova dhe presidentit Ramiz Alia”, deklaroi Haziri.

Sipas tij, zbatimi i këtij plani është menaxhuar më vonë nga autoritete të tjera, ndërsa në terren kanë qenë të përfshirë figura të njohura si Afrim Gagica dhe Sali Çeku, i shpallur Hero i Kombit.

Haziri theksoi se përzgjedhja e të rinjve është bërë në mënyrë shumë të kujdesshme në secilën zonë dhe komunë, nga autoritete të caktuara, ndërsa trajnimet janë zhvilluar në Shqipëri mbi bazën e përvojës së shtetit shqiptar në rekrutimin dhe përgatitjen ushtarake.

Duke folur për rolin e Shqipërisë, Haziri bëri të ditur se ish-shefi i Shërbimit Informativ Shtetëror, Irakli Koqollari, ka qenë autoriteti i parë që ka implementuar këtë plan.

“Ai ka qenë autoriteti i parë që e ka implementuar këtë plan”, u shpreh Haziri.

Deklarimet e Hazirit vijnë pas publikimit të audio-incizimeve në emisionin Debat Plus, të cilat, sipas tij, hedhin dritë mbi përfshirjen e Rugovës në fazat e hershme të organizimit të rezistencës për çlirimin e Kosovës.

Ndërkohë, moderatori Ermal Panduri ka bërë të ditur se Koqollari do të flasë për këtë temë më 3 shkurt në Debat Plus, ku pritet të publikohen detaje shtesë nga dosja në fjalë.

Kryesisht grurë e misër, për të bërë bukë apo makarona... gjatë vitit të shkuar u importuan më shumë se 374 mijë ton drithë. Sasia e drithit të hyrë gjatë 2025-ës u zgjerua me gati 40 mijë tonë në raport me 2024-n.

Zef Gjeta, pedagog për bujqësinë, u shpreh për A2CNN se rritja e importeve vjen për shkak të mungesës së prodhimit vendas. Kemi reforma, por jo akte konkrete. Nuk ka financime për bujqësinë.

Ndryshimet në gjeografinë e tregtisë së jashtme, reduktimi i kostove të transportit dhe forcimi i lekut bënë që çmimi i drithit të importuar të ishte më i ulët.

Ndonëse u importuan gati 40 mijë tonë më shumë grurë e misër, vlera e paguar për blerjen e tyre ishte gati e njëjtë me 2024-n, vit në të cilin u shpenzuan rreth 10 miliardë lekë.

Andi Haxhiymeri, administrator i një kompanie bloje, thotë: “Tani, drithi po vjen kryesisht nga Serbia. Më herët vinte nga Rusia e Rumania. Kostot rrjedhimisht janë më të ulëta”.

Pavarësisht se në nivele të papërfillshme, Shqipëria arriti vitin e shkuar të eksportonte 248 tonë drithë me vlerë 28 milionë lekë. Në raport me 2024-n, vit në të cili prodhimi vendas rezultoi i dobët, eksportet gati u dyfishuan.

“Kudo në botë prodhimi i grurit subvencionohet. Në Serbi, Kanada, Francë etj, prodhimi i grurit subvencionohet. Nuk mundet fermeri të marrë përsipër të gjithë procesin, tha Haxhiymeri.

Zef Gjeta tha: “Shteti ynë ka dështuar në drejtim të subvencioneve, ndaj jemi në këtë gjendje ku nuk prodhojmë, por importojmë”.

Përfshirë arat, kopshtet, livadhet, lëndinat, kullotat apo moçalet, në Shqipëri ka rreth 875 mijë hektarë tokë. Nga kjo, hapësira që përmban humus e lëndë minerale, thënë ndryshe toka bujqësore, vlerësohet në gati 700 mijë hektarë.

Por, nga viti në vit, sipërfaqja e mbjellë me grurë, misër, tërshërë, elb apo kultura të tjera bujqësore po rrudhet, ndërsa po zgjerohet hapësira e tokave të djerra.

Në fund të kësaj jave – që nisi me reduktime në furnizimin me energji elektrike – do të dorëzohen aplikimet fillestare në procesin e shqyrtimit vjetor të tarifave.

Kësisoj, më së largu në fillim të javës së ardhshme pritet publikohen aplikimet e secilit akter për të hyrat maksimale të lejuara, përfshirë atë të KESCO-s, që do të tregojë nëse do të propozohet ngritje e serishme e çmimit të rrymës ose jo.

Situata e rënduar veçmas në kohë kur nis procesi i shqyrtimit të tarifave, në vlerësimin e Kushtrim Ahmetit nga Dhoma e Tregtisë dhe Industrisë, nuk është e rastësishme.

Referuar arsyetimeve të kompanive dhe hedhjes së fajit tek njëra tjetra, Ahmeti dyshon se kriza po përdoret “për ta bërë të mundshme një rritje të re”

“Kur e sheh këtë situatë çfarë po ndodhë, sidomos prej Dhjetorit e këndej, këto periudhat që s’jemi duke ditë kurrë kur po kemi reduktime, sa po kemi dhe sa s’po kemi, ti e sheh që këtu është duke u luajtur një lojë jashtëzakonisht e fëlliqur dhe e fshehtë për ta shfrytëzuar këtë periudhën e amullisë institucionale dhe vdekjes totale të ZRRE-së, në këtë rast, dhe shfrytëzoje momentumin e tillë ti dhe bëje tash të mundshme”, ka thënë Kushtrim Ahmeti, Drejtor në Dhomën e Tregtisë dhe Industrisë së Kosovës.

Ai s’ka dyshime për kërkesat që do kenë kompanitë e licencuara.

“Unë jam plotësisht i bindur që të gjitha kompanitë do të kërkojnë rritje të çmimit, të të hyrave të tyre që do t’na bien barë neve si konsumatorë. Dhe kjo nuk është që të bie (barrë) vetëm prej sektorit energjetik, ju po e shihni u rritën çmimet e shërbimeve të gjitha. Rritja në një element e ndikon atë rritjen zingjirore që kemi thënë edhe kur u rritë çmimi për 16.1%”, ka thënë Kushtrim Ahmeti, Drejtor në Dhomën e Tregtisë dhe Industrisë së Kosovës.

KESCO-ja, kompani të cilës ZRRE-ja i ka vendosur obligimin e shërbimit publik si Furnizues i Shërbimit Universal, ende nuk ka dorëzuar dokumentin me kostot dhe propozimet e saja.

Për paraqitjen e aplikimeve të tyre, ditët e fundit të afatit po i presin edhe akterët tjerë: KEDS, KOSTT dhe KEK.

“Në kuadër të procesit vjetor të shqyrtimeve tarifore, përkatësisht përshtatjeve vjetore të të hyrave të lejuara maksimale për vitin 2026, Zyra e Rregullatorit për Energji (ZRRE) ka përcaktuar afatin deri më 23 janar 2026 për dorëzimin e aplikimeve/propozimeve fillestare nga operatorët e licencuar. Deri në këtë fazë të procesit, asnjë nga operatorët e licencuar nuk ka dorëzuar aplikimin apo propozimin e tij në ZRRE. Kjo është në përputhje me dinamikën e zakonshme të procesit, duke qenë se afati ligjor për dorëzim ende nuk ka përfunduar”, thuhet nga ZRRE.

Para fundit të Marsit, ZRRE-ja do të bëjë shqyrtimin e propozimeve dhe do të vendosë për vazhdimin me tarifa të njëjta ose të reja të energjisë elektrike, të cilat do të hyjnë në fuqi nga 1 Prilli.

Në katër vitet e fundit, tri herë janë ngritur tarifat e energjisë elektrike gjatë shqyrtimeve në ZRRE, për herë të fundit në mes të prillit të kaluar, duke nxitur reagime të shumta nga qytetarët e bizneset e vendit.

- YouTube www.youtube.com

Shoqata e Bankave ka ngritur shqetësimin për një rritje të mashtrimeve në internet, ku përdoruesit mashtrohen përmes përdorimit të të dhënave personale dhe bankare.

Spiro Brumbulli, Sekretar i Përgjithshëm i Shoqatës, shpjegon për A2CNN se mashtruesit shpesh krijojnë faqe të rreme që duken si të vërteta dhe kërkojnë të dhëna personale, PIN-e ose kode sigurie, duke e bërë transaksionin të shkojë në llogaritë e tyre.

Ai tregon se qytetarët mashtrohen edhe me mesazhe që informojnë për pakot e supozuara, ku për të marrë dërgesën kërkohet të dhënat personale.

Brumbulli bën thirrje për kujdes: “Fshini çdo mesazh ose email nga burime të panjohura që kërkojnë veprime urgjente, dhe mos jepni kurrë të dhënat e llogarisë bankare. Bankat nuk do t’ju kërkojnë kurrë numrin e kartës, PIN, kode sekrete ose fjalëkalime.”

Tre format kryesore të mashtrimeve online janë: oferta joshëse duke përdorur emra dhe marka të njohura, oferta të rreme nga dyqane të supozuara, dhe njoftime për pako që kërkojnë pagesë online me kartë.

Shoqata e Bankave apelon qytetarët të jenë vigjilentë dhe të shmangin çdo veprim të nxituar në internet, për të mbrojtur të dhënat dhe fondet e tyre.

Kryeministri Edi Rama ka mbërritur në Vlorë, ku do të zhvillojë një takim me Ivanka Trump.

Vizita po zhvillohet nën masa të shtuara sigurie, ndërsa nuk janë bërë ende publike detaje mbi axhendën gjatë takimit.

Mësohet se kryeministri Edi Rama dhe Ivanka Trump po zhvillojnë një darkë pune, së bashku me grupin e punës të cilët janë mbi 50 arkitektë nga e gjithë bota në këtë takim pasi ka qenë një grup i zgjeruar që ka marrë pjesë në këto takime dhe investime që pritet të zhvillohen.

Ivanka Trump, vajza e presidentit amerikan Donald Trump, mbërriti së bashku me bashkëshortin e saj, Jared Kushner, paraditen e kësaj të mërkure, ku sipas informacioneve do të diskutojnë më tepër rreth investimit në ishullin e Sazanit.

Shapi Kamberi, deputeti shqiptar në Parlamentin e Serbisë, ka reaguar pas miratimit të rezolutës H.R. 6411 nga Komiteti për Punë të Jashtme i Kongresit të SHBA, e cila ka të bëjë me të drejtat etnike dhe kombëtare të shqiptarëve në Luginën e Preshevës.

Kamberi ka theksuar se miratimi i kësaj rezolute përfaqëson një qëndrim zyrtar të Shteteve të Bashkuara të Amerikës ndaj diskriminimit sistematik të shqiptarëve në Luginë dhe një hap të rëndësishëm drejt kërkimit të përgjegjësisë ligjore dhe politike nga Serbia.

Ai ka shprehur mirënjohje të veçantë për kongresistin Keith Self, kryetar i Nënkomitetit për Evropë, për iniciativën dhe lidershipin e tij, si dhe për përkrahjen dypartiake të kryetarit të Komitetit, Brian Mast, dhe nënkryetarit Gregory Meeks. Sipas Kamberit, rezoluta tashmë pritet të miratohet edhe nga vetë Kongresi amerikan.

Në postimin e tij, Kamberi ka rikujtuar se kjo arritje është rezultat i një përpjekjeje të gjatë që nga viti 2001, e ndërtuar mbi durim, këmbëngulje dhe besim, nën përkrahjen e vazhdueshme të Joe DioGuardi dhe Shirley DioGuardi, si dhe të Liga Qytetare Shqiptaro-Amerikane.

Ai ka vlerësuar po ashtu rolin e komunitetit shqiptar në Teksas, veçanërisht organizatën Albanians For America, si dhe mbështetjen e Qeverisë së Kosovës për Luginën e Preshevës.

“Një betejë e gjatë dhe e drejtë, sot e kurorëzuar me sukses. Shtetet e Bashkuara po kërkojnë përgjegjësi ligjore dhe politike nga Beogradi për diskriminimin sistematik të shqiptarëve në Luginën e Preshevës”, ka shkruar Kamberi, duke shtuar se “zëri ynë u dëgjua dhe puna jonë po shihet”.

Ai ka falënderuar të gjithë ata që, sipas tij, “nuk u ndalën kurrë”, duke e cilësuar këtë zhvillim si një fitore të rëndësishme politike dhe morale për shqiptarët e Luginës së Preshevës.