Kryeministri në detyrë, Albin Kurti ka kujtuar përvjetorin e 27-të të masakrës së Rakovinës. Tha se më 24 janar 1999, në Rakovinë të Gjakovës, policia e Serbisë vrau pesë civilë të paarmatosur, vetëm pse ishin shqiptarë.
“Besimi ishte 12 vjeç, e Haxhiu vetëm 11. Dy vëllezërit po udhëtonin me babanë e tyre, Shaban Kelmendin. Ata u qëlluan për vdekje. Bashkë me ta u ekzekutuan edhe çifti Hysen dhe Sanije Kurti nga fshati Cërmjan. Ata po lëviznin me një traktor dhe rimorkio, mbi të cilin forcat e armatosura serbe shtinë me rafale automatike”, shkroi Kurti në përkujtim të kësaj dite.
Ai thotë se sot, 27 vjet pas, këta fëmijë e këta qytetarë kujtohen me dhimbje të thellë dhe nderim të përhershëm.
“Kujtimi i Besimit dhe Haxhiut na rikujton dhunën serbe në Kosovë mbi trupat e fëmijëve, mbi familje të tëra, mbi jetë që nuk patën mundësi të mbroheshin. Kujtojmë për të mos lejuar që e vërteta të zbehet dhe që krimet të mbesin pa emër e pa përgjegjësi”, ka shkruar tutje Kurti.
Ai shtoi se dhimbja e familjeve të tyre është plagë e shoqërisë, ndërsa kujtesa kolektive është zotim për drejtësi.
“Republika e Kosovës i kujton sot viktimat e Masakrës së Rakovinës dhe nuk i harron kurrë krimet e luftës, krimet kundër njerëzimit dhe gjenocidin e kryer nga Serbia në Kosovë. Lavdi të rënëve për liri!”, ka shkruar Kurti, derisa kujtoi këtë masakër në përvjetorin e 27 të saj.
Dega e Lidhjes Demokratike të Kosovës (LDK) në Pejë ka mbajtur mbledhjen e Kryesisë, ku është diskutuar për Kuvendin Qendror të partisë që do të mbahet më 31 janar 2026, në të cilin pritet të vendoset për votëbesimin ndaj kryetarit Lumir Abdixhiku.
Gjatë mbledhjes, anëtarët e Kryesisë kanë diskutuar hapur për situatën aktuale në parti, duke analizuar zhvillimet e fundit dhe sfidat politike.
Sipas njoftimit, shumica e diskutimeve kanë qenë në mbështetje të kryetarit Lumir Abdixhiku dhe vazhdimit të udhëheqjes së tij.
Në Kuvendin Qendror të 31 janarit pritet që delegatët të shprehen përmes votës lidhur me besimin ndaj kryetarit aktual, një proces që shihet si i rëndësishëm për orientimin e mëtejmë politik të LDK-së./Telegrafi/
Komuna e Mitrovicës ka intensifikuar aksionet për lirimin e hapësirave publike të shfrytëzuara në mënyrë të kundërligjshme, në kuadër të angazhimit për zbatimin e ligjit dhe ruajtjen e rendit urban.
Sipas njoftimit të Komunës, Drejtoria e Inspekcionit aktualisht është duke realizuar rrënimin e një objekti të ndërtuar pa leje, i cili ndodhet në afërsi të shtëpisë së Islam Shipolit.
Drejtori i Inspekcionit, Mujë Igrishta, ka theksuar se drejtoria që ai udhëheq mbetet e përkushtuar dhe e vendosur në zbatimin e ligjit, pa toleruar asnjë shkelje që cenon hapësirat publike.
Ai ka bërë të ditur se aksione të tilla do të vazhdojnë edhe në ditët në vijim, deri në lirimin e plotë të të gjitha hapësirave të uzurpuara në mënyrë të kundërligjshme, me qëllim të krijimit të rendit, sigurisë dhe barazisë për të gjithë qytetarët e Mitrovicës.
Partia për Veprim Demokratik ka publikuar tekstin e propozim Ligjit të kongresistit, Keith Self që u miratua në Komisionin për Politikë të Jashtme e përmes së cilit adresohet diskriminimi ndaj shqiptarëve në Luginë nga Serbia.
Ata kanë paraqitur gjithë rrjedhën nga fillimi e deri të miratimi i këtij projektligji.
Pika A thotë se “Jo më vonë se 180 ditë pas datës së hyrjes në fuqi të këtij ligji, Sekretari i Shtetit duhet të përgatisë dhe t’ia dorëzojë Komisionit për Punë të Jashtme një raport mbi trajtimin e pakicave etnike në Serbi, i cili duhet të përfshijë vlerësim për çështjet e mëposhtme”.
Sipas këtij dokumenti të publikuar nga Partia për Veprim demokratik aty vijohet me çështjen e pasivizimit të adresave.
Këto janë të gjitha pikat e propozim ligjit që u votua ditë më parë në Kongres.
1. Çaktivizimi i vendbanimeve të regjistruara, i njohur si “pasivizim” i adresave nga autoritetet qeveritare të Serbisë, që u përkasin shqiptarëve etnikë në Luginën e Preshevës (e njohur gjithashtu si “Lugina e Preshevës”, “Presheva Valley” ose “Presevo Valley”).
2. Nëse një praktikë e tillë, nëse konfirmohet, po i pengon shqiptarët etnikë të rinovojnë dokumentet e identitetit dhe të ushtrojnë të drejta themelore që kërkojnë identifikim, siç është votimi.
3. Nëse Serbia shpërfill integrimin proporcional të shqiptarëve etnikë në institucionet shtetërore dhe institucionet e tjera publike.
4. Nëse Serbia neglizhon ose refuzon të njohë diplomat dhe gradat e fituara në Kosovë nga shqiptarët që jetojnë në Luginën e Preshevës.
5. Nëse Serbia kufizon ose ndalon përdorimin e gjuhës shqipe në institucionet publike në çdo nivel ose në dokumentet personale, përfshirë dokumentet e identitetit, patentat e shoferit, kartelat shëndetësore, certifikatat e lindjes, martesës ose vdekjes, veçanërisht në komunat e Serbisë ku shumica e banorëve janë shqiptarë.
6. Nëse Serbia po pengon ose vështirëson furnizimin e rregullt dhe në kohë me tekste shkollore në gjuhën shqipe për nxënësit shqiptarë etnikë në Luginën e Preshevës.
7. Nëse Serbia kundërshton në mënyrë aktive ose shpërfill integrimin proporcional të shqiptarëve etnikë në institucionet shtetërore ose institucionet e tjera publike.
8. Nëse Serbia u ndan komunave me shumicë shqiptare fonde të ulëta nga buxheti qendror në krahasim me komunat me shumicë serbe, dhe nëse këto fonde janë të mjaftueshme për t’u mundësuar qeverive lokale mirëmbajtjen ose ndërtimin e infrastrukturës së re apo ofrimin e shërbimeve të tjera publike të nevojshme për banorët lokalë.
9. Nëse Serbia shtyp ose kufizon përdorimin e simboleve që përbëjnë pjesë të identitetit etnik.
10. Nëse Serbia përdor policinë ose forcat e tjera të zbatimit të ligjit për të marrë në pyetje, kërcënuar ose frikësuar shqiptarët etnikë lokalë pa arsye ose procedurë të rregullt ligjore.
11. Niveli i mbështetjes që Serbia ofron për mediat, shtypin ose aktivitetet kulturore në gjuhën shqipe.
12. Shqyrtimi nga ana e Serbisë për zbatimin e shërbimit të detyrueshëm ushtarak për shqiptarët etnikë.
13. Nëse Serbia ndërmerr masa për të rritur qëllimisht varfërinë ose për ta bërë jetën të paqëndrueshme për shqiptarët etnikë në Luginën e Preshevës.
Tutje, sipas Partisë për Veprim Demokratik, raporti duhet të dorëzohet në formë jo të klasifikuar, por mund të përmbajë një shtojcë të klasifikuar, nëse është e nevojshme.
Platforma “Superpuna” tash disa javë është jashtë funksionit, duke pamundësuar regjistrimin e punëtorëve, ndërsa bizneset rrezikojnë penalizime nga institucionet shtetërore për shkak të një problemi që nuk është i tyre.
Edhe nga Agjencia për Punësim e Republikës së Kosovës jo zyratisht i kanë konfirmuar pwr KosovaPress këto telashe. Madje thonë se kanë pranuar një numër të madh të ankesave për këtë shqetësim.
Krahas mosfunksionimit të platformës, ankesa të mëdha janë ngritur edhe për vonesat e pagesave dhe mungesën e sqarimeve institucionale për vazhdimin e programit në vitin 2026.
Drejtori Ekzekutiv i Dhomës së Tregtisë dhe Industrisë Kosovës, Kushtrim Ahmeti thotë se problemet me platformën “Super Puna” vetëm se po përsëriten dhe se ankesat nga bizneset për mosfunksionim të saj janë përsëritur edhe së fundmi, ashtu si në fund të vitit të kaluar.
“Në fakt, duket që kjo problematika e platformës Super Puna nuk është diçka e re, pasi që këtë çështje ne e kemi diskutuar para afërsisht, nëse nuk gaboj, diku vitin e kaluar nga fundi, mundet me qenë nëntor ose dhjetor, afërsisht me disa prej bizneseve të cilat ma kanë përmendur nëpër takime që janë duke hasur në telashe në funksionimin e kësaj platforme. Por, më pas duket që u kthye pa funksionim. Këto kohët e fundit, faktikisht edhe sot kemi pasur disa komunikime me biznese, të cilat na kanë lajmëruar që prapë kanë telashe me mosfunksionim të kësaj platforme”, shprehet Ahmeti.
Ahmeti theksoi se mosfunksionimi i platformës “Superpuna” po i vë bizneset në një situatë të vështirë, pasi ato rrezikojnë të penalizohen nga Administrata Tatimore për mos regjistrim të punëtorëve, ndonëse problemi buron nga vetë sistemi shtetëror.
Ai u bëri thirrje institucioneve që të mos ndërmarrin masa ndëshkuese ndaj bizneseve pa u verifikuar më parë se përgjegjësia nuk është e tyre.
“Në njërën anë, biznesi do ta regjistrojë punëtorin. Në anën tjetër, nuk ka qysh e mban punëtorin në punë pa regjistruar. Me e mbajtur në punë, rrezikohet që të penalizohet nga agjencia, nga Administrata Tatimore e Kosovës. Pse? Sepse nuk e ka, nuk e ka bërë regjistrimin e punëtorit. Në fakt, në këtë rast nuk është faji i biznesit, por është faji i sistemit prapë shtetëror në këtë rast, i cili nuk është duke funksionuar dhe shpeshherë po ndodhin këto telashe. Unë edhe në takime të ndryshme që kam pasur edhe me zyrtarë të Administratës Tatimore, po edhe me zyrtarë të tjerë shtetërorë, u kam kërkuar që mos të ndërmarrin veprime të menjëhershme, sepse duket që zgjidhja më e lehtë për shumë institucione të vendit është që t'i dënojnë menjëherë bizneset, pa e vërtetuar saktë se problemi nuk është te biznesi, por është problemi tek një shërbim ose një sistem që e ka nën mbikëqyrje ë qeveria e Kosovës ose shteti i Kosovës në këtë rast dhe që për një arsye ose tjetër i njëjti nuk funksionon”, deklaroi ai.
Njohësi i ekonomisë, Adem Qorrolli thekson se platforma për regjistrim ka pasur vazhdimisht probleme teknike, si në të kaluarën ashtu edhe aktualisht.
Por, sipas tij, shqetësimi kryesor është se përdoruesit nuk po mund të regjistrohen përsëri.
“Realisht sistemi i platformës ka pasur probleme dhe të mëhershme dhe kemi ankesa edhe të tashme. Po ajo që është shqetësuese është që nuk po munden të regjistrohen përsëri dhe a është tash problem i sistemit financiar, apo është problemi institucional që nuk po i financon ende. Dhe problemi i dytë është që nuk po kryhen pagesat me afat kohor 15 ditë pas përfundimit të muajit. Domethënë kemi ankesa që i marrin mbas dy muajve, tre apo ende nuk i kanë marrë të ardhurat e tyre, siç janë premtuar nga pako fiskale e Ministrisë së Financave, pako buxhetore e Ministrisë së Financave gjegjësisht për sektorin privat, gjegjësisht për bizneset”, thotë Qorrolli.
Sipas Qorollit, ka paqartësi institucionale edhe rreth vazhdimit të programit “Superpuna” në vitin 2026.
“Dhe ajo që është shqetësim i madh është që nuk e dinë ende, a ekziston mundësia e Super Punës dhe informatori kryesor institucional nuk po jep dritën e gjelbër që a ekziston edhe në vitin 2026 ky sektor. A ekziston edhe financimi? A është vetëm për sektorin privat, apo vlen edhe për institucione të tjera, apo financohet ende? Dhe ky është boshllëku që sot ne kemi shumë thirrje nga sektori privat dhe kemi shumë zëra nga fuqia punëtore që a ekziston kjo mundësi dhe pse nuk po paguhen mbetjet e punëtorëve të vitit 2025”, theksoi ai.
KosovaPress ka dërguar pyetje në Ministrinë e Financave, Punës dhe Transfereve dhe tek Agjencia për Punësim të Republikës së Kosovës lidhur me mos funksionimin e platformës “Superpuna” , por deri në publikimin e këtij raporti nuk kanë kthyer asnjë përgjigje.
Në fillim të vitit 2023 Qeveria e Kosovës kishte lansuar platformën “Superpuna” në mbështetje të sektorit privat në krijimin e vendeve të reja të punës për të rinjtë e moshës 18-25 vjeç.
Përmes kësaj platforme, çdo punëdhënës mund të angazhojë deri në 30% të stafit të tyre ekzistues, po që fillimisht duhet t’i shpallë vendet e lira të punës./KosovaPress
Policia e Kosovës ka gjetur dhe sekuestruar armë, municion dhe eksploziv në një shtëpi të braktisur në fshatin Jagnjenicë të komunës së Zubin Potokut, në kuadër të detyrave të rregullta policore në rajonin e veriut.
Sipas njoftimit zyrtar, më 24.01.2026 Policia ka pranuar informacione se në një objekt të braktisur dyshohej se ndodheshin armë dhe mjete shpërthyese. Menjëherë pas marrjes së informacionit, njësitë relevante policore kanë dalë në lokacion, ku gjatë kontrollit kanë gjetur dhe sekuestruar:
Në vendin e ngjarjes ka intervenuar edhe Njësia për Trajtimin e Eksplozivit (EOD), e cila ka larguar eksplozivin në mënyrë të sigurt. Hetimet janë duke vazhduar për të përcaktuar llojin e saktë të eksplozivit të gjetur.
Të gjitha veprimet policore janë zhvilluar në koordinim të plotë me Prokurorin e Shtetit, i cili ka udhëzuar inicimin e rastit me veprën penale “Mbajtje në pronësi, kontroll ose posedim të paautorizuar të armëve”.
Lidhur me këtë rast nuk ka persona të arrestuar, ndërsa hetimet mbeten në vazhdim.
Policia e Kosovës ka falënderuar qytetarët për bashkëpunimin dhe i ka ftuar ata që çdo informacion që ndihmon në ruajtjen e rendit dhe sigurisë publike ta raportojnë në numrin 192.
Një delegacion i Grupit të Bashkuar të Mbështetjes Logjistike të KFOR-it (Joint Logistic Support Group – JLSG) ka zhvilluar sot një vizitë zyrtare në Portin e Durrësit, ku është pritur në takim nga Drejtori Ekzekutiv i Autoritetit Portual Durrës, Liburn Aliu.
Vizita u realizua në kuadër të bashkëpunimit të vazhdueshëm ndërmjet institucioneve shqiptare dhe forcave aleate të NATO-s, me qëllim njohjen nga afër të kapaciteteve dhe infrastrukturës që Porti i Durrësit ofron për mbështetjen e operacioneve logjistike dhe ushtarake, njofton Autoriteti Portual Durrës.
Bëhet e ditur se delegacioni i KFOR-it, i përbërë nga përfaqësues të niveleve të ndryshme drejtuese dhe operative, u informua mbi potencialin operacional të portit, zonat e shërbimit, si dhe mbi mundësitë që Shqipëria mund të ofrojë si vend pritës në kuadër të operacioneve të zhvilluara apo të mbështetura nga KFOR-i.
Takimi shërbeu gjithashtu për të forcuar bashkëpunimin institucional, si dhe për shkëmbimin e informacioneve lidhur me nevojat logjistike, planifikimin operacional dhe rolin strategjik të Portit të Durrësit në rajon.
Kompania Rajonale e Ujësjellësit “Prishtina” ka njoftuar se si pasojë e dëmtimit të një gypi nga disa kontraktorë privatë të cilët, thonë se, për dëmin e shkaktuar nuk kanë raportuar, është ndërprerë furnizimi me ujë të pijshëm për një pjesë të qytetit të Obiliqit dhe disa fshatra.
“Ju njoftojmë se, si pasojë e dëmtimit të gypit Ø200 ACC nga kontraktorë privatë, të cilët kanë shkaktuar dëmin dhe nuk e kanë raportuar atë, është ndërprerë furnizimi me ujë të pijshëm. Pa furnizim me ujë të pijshëm kanë mbetur: një pjesë e qytetit të Obiliqit (lagjja kah Kosova B ), fshati Plemetin, fshatrat Prelluzhë dhe Hamidi”, thotë KRU “Prishtina”.
Ata kanë bërë të ditur se furnizimi me ujë të pijshëm do të rikthehet pas sanimit të plotë të dëmit derisa u kanë bërë thirrje konsumatorëve të këtyre zonave që ujin të mos e përdorin për pije deri të jetë i kthjellët plotësisht.
Ambasadori i Gjermanisë në Kosovë, Rainer Rudolph, ka ndarë përshtypjet e tij për 100 ditët e para të qëndrimit në Kosovë, duke veçuar ngrohtësinë e jashtëzakonshme të mikpritjes që ka ndjerë gjatë vizitave në vende të ndryshme të vendit.
Në një postim në rrjetet sociale, Rudolph theksoi se që nga ardhja e tij në Prishtinë është pritur me mirësi, hapje dhe buzëqeshje të sinqerta, një përvojë që, sipas tij, e ka shoqëruar kudo që ka udhëtuar në Kosovë.
Ai tregoi se kurioziteti për ta njohur vendin përtej kryeqytetit e ka çuar në ecje në malet pranë Brodit, vizita në qytetin e vjetër të Prizrenit, në manastirin e Deçanit, si dhe udhëtime në veri të Kosovës.
“Kudo që kam qenë, përvoja ka qenë e njëjtë: njerëz mikpritës, biseda kuptimplote dhe një ndjenjë e thellë lidhjeje me Gjermaninë,” ka deklaruar ambasadori gjerman.
Rudolph vlerësoi gjithashtu bukurinë natyrore të Kosovës, duke theksuar se ajo është e pranishme edhe në jetën e përditshme. Sipas tij, bukuria e vendit nuk kërkon udhëtime të gjata, por fillon që në pragun e shtëpisë, gjatë vrapimeve të fundjavës në Parkun e Gërmisë në Prishtinë.
Në përfundim, ambasadori shprehu entuziazmin për vazhdimin e misionit të tij diplomatik në Kosovë, duke theksuar se pret me padurim shumë ditë të tjera të bukura në vend./Telegrafi/
Aksioni i Prokurorisë Themelore në Prizren ndaj dyshimeve për manipulim të votave ka marrë jehonë të gjerë në mediat ndërkombëtare.
Ditën e sotme, autoritetet e Kosovës kanë ndaluar 109 persona, kryesisht komisionerë të përfshirë në procesin e numërimit të votave, nën dyshimet për ndërhyrje dhe falsifikim të rezultateve zgjedhore.
Lidhur me këtë ngjarje kanë raportuar disa nga mediat më të njohura botërore, raporton Telegrafi.
Agjencia Reuters e ka cilësuar rastin si një “turp i madh” për Kosovën, duke theksuar se vendi, si shtet i ri, synon anëtarësimin në Bashkimin Evropian. Reuters raporton gjithashtu se Komisioni Qendror i Zgjedhjeve (KQZ) ka bërë të ditur se hetimet fillestare për këtë çështje kanë nisur rreth dy javë më parë.
Edhe media amerikane ABC News i ka kushtuar vëmendje arrestimeve, duke raportuar se autoritetet në Kosovë kanë arrestuar mbi 100 persona për manipulim të fletëvotimeve gjatë zgjedhjeve parlamentare të dhjetorit.
Sipas ABC News, ky zhvillim ka rritur shqetësimet se kriza politike njëvjeçare në Kosovë mund të zvarritet edhe më tej.
Jehonë arrestimeve u kanë dhënë edhe mediat gjermane, duke i cilësuar hetimet si një test serioz për integritetin e procesit zgjedhor dhe për sundimin e ligjit në Kosovë.
Ndërkohë, media franceze Le Monde ka raportuar se në Kosovë janë kryer rreth njëqind arrestime për “falsifikim të rezultateve zgjedhore”.
Sipas Prokurorisë së Prizrenit, më shumë se 68 mijë fletëvotime dyshohet se janë përvetësuar gjatë zgjedhjeve parlamentare të 28 dhjetorit, të cilat u fituan nga partia e kryeministrit në largim, Albin Kurti. Në mes të muajit janar, Komisioni Qendror i Zgjedhjeve kishte urdhëruar rinumërimin e plotë të votave.
Edhe agjencia italiane ANSA ka raportuar se Kosova ka arrestuar mbi 100 komisionerë zgjedhorë për falsifikim të rezultateve të zgjedhjeve, duke theksuar se hetimet janë ende në vazhdim.
Autoritetet kosovare kanë deklaruar se veprimet po ndërmerren për të garantuar transparencë, zbardhje të plotë të rastit dhe ruajtje të integritetit të procesit zgjedhor, ndërsa pritet që drejtësia të zgjerojë hetimet edhe në komuna të tjera ku rinumërimi ka nxjerrë parregullsi.
Faqja e Shtëpisë së Bardhë në rrjetin social X ka ndarë një fotografi të presidentit amerikan Donald Trump, i rrethuar me liderë të tjerë.
Menjëherë prapa tij shihet edhe homologia e tij nga Kosova, Vjosa Osmani, e cila ishte ndër nënshkrueset e Kartës së Bordit të Paqes.
“Besoj fuqishëm në lidershipin e presidentit Trump dhe ekipit të tij. Kjo është për të shpëtuar jetë. [Paqja] nuk është gjithmonë e lehtë për ta arritur, por mund të mundësohet me bashkimin e të gjithëve”, kishte deklaruar Osmani pas nënshkrimit.
Ermal Frashëri, pedagog dhe ekspert me bazë në Shtetet e Bashkuara, ka komentuar në emisionin “Balkan Talks” pjesëmarrjen e presidentes së Kosovës, Vjosa Osmani, në Forumin Ekonomik Botëror në Davos, ku ajo mori pjesë në firmosjen e themelimit të “Bordit të Paqes” për Gazën.
Frashëri u ndal gjithashtu te mirënjohja e shprehur nga Osmani ndaj ish-presidentit amerikan Donald Trump për aktin e autorizimit të mbrojtjes kombëtare.
Sipas ekspertit, përfshirja e Kosovës në një akt federal të miratuar nga Kongresi amerikan është një zhvillim i rëndësishëm. Ai theksoi se ky akt krijon një parashikueshmëri të qartë për Kosovën duke bërë që administrata amerikane ti kushtojë vëmendje të shtuar vendit.
“E pashë si një surpizë të këndshme që një vëmendje e tillë për Kosovën të reflektojë në një hallkë që miraton Kongresi. Që Kongresi të jetë kaq specifik saqë të fusë një parashikueshmëri për Kosovën dhe një sërë veprimesh që i tërheqin vëmendje administratës amerikane që ti kushtojë më tepër rëndësi Kosovës, është një gjë që nuk ndodh zakonisht.
Më në fund Kosova arrin që të ketë në Kongres një lobim aq të fortë sa të fusë një parashikueshmëri të tillë në një akt federal.
Nga ana tjetër mendoj se Presidentja Osmani ka bërë mire që ka falënderuar Trump, që ndonëse ky është një akt i Kongresit prap ka falënderuar udhëheqjen e Trump, është një veprim i saktë. Mendoj që kjo do japë një dimension personal dhe një pikë reference që Kosova do ketë edhe në raport me Departamentin e Shtetit.
Kam përshtypjen se në çdo bisedë të ardhshme, vëmendja e Departamentit të Shtetit do kushtëzohet nga parashikimi që është bërë në aktin e mbrojtjes. Është një lloj ndërhyrje që nuk ndodh shpesh. Kosova ka arritur që këtë vëmendje ta përkthejë në legjislacion”, tha Ermal Frashëri./Euronews Albania
Analistët vlerësojnë se manipulimet me vota, të cilat kanë dalë në pah pas rinumërimit, e kanë dëmtuar procesin zgjedhor në Kosovë. Sipas tyre, kjo ka ndodhur si pasojë e mungesës së monitorimit gjatë fazës së numërimit të votave. Ata e konsiderojnë urgjente nevojën për ndryshimin e Ligjit për Zgjedhjet.
Manipulimi me vota, si asnjëherë më parë, tashmë ka dalë hapur në pah. Megjithatë, dallavere me vota, raste të vjedhjes së votës dhe madje edhe përfshirje të personave të dënuar kanë pasur edhe në zgjedhjet e kaluara.
Sadik Zeqiri, nga këndvështrimi i analistit politik, vlerëson se procesi zgjedhor është dëmtuar rëndë, duke theksuar nevojën urgjente për ndryshimin e Ligjit për Zgjedhjet. Sipas tij, monitorimi i këtij procesi është në mandatin e Komisionit Qendror të Zgjedhjeve (KQZ), por gjatë fazës së numërimit nuk ka pasur vëzhgim as nga organizatat vendore, as nga ato ndërkombëtare.
“Ligji për zgjedhjet duhet të ndryshohet sa më parë, sepse përndryshe krijohen keqpërdorime. Ndodh që votuesi voton për disa persona, por nuk i kujton të gjithë. Unë nuk shoh një organizim të mirëfilltë të njerëzve të mençur që kanë ndikuar te komisionerët, por kjo ka ndodhur si një dukuri shoqërore, e cila fatkeqësisht ka ndikuar në dëmtimin e kandidatëve”, tha Zeqiri.
Sipas tij, komisionerët janë të mbikëqyrur nga KQZ-ja, por është dashur të vëzhgohen edhe nga organizatat e ndryshme joqeveritare, mediat dhe vëzhgues të tjerë.
"Nuk ka pasur vëzhgim dhe, kur nuk ka vëzhgim, manipulohet vota. Prandaj ekziston një hierarki e fajit, nga KQZ-ja e nga lart-poshtë e anasjelltas. Dikush duhet të marrë përgjegjësi për këtë çështje. Megjithatë, vëzhgim nuk ka pasur dhe kjo lidhet edhe me faktin se numërimi ka filluar gjatë kohës festive”, thaksoi ai.
Edhe organizatat joqeveritare që kanë monitoruar procesin deri në ditën e votimit vlerësojnë se procesi zgjedhor është dëmtuar. Mirëpo, sipas tyre, faza e numërimit nuk ka qenë pjesë e mandatit monitorues.
Në këtë kontekst, Vullnet Bugaqku nga Instituti Demokratik i Kosovës (KDI) theksoi se monitorimi i IKD-së, si projekt, ka qenë i fokusuar vetëm deri në ditën e zgjedhjeve dhe jo në qendrat e numërimit, duke theksuar gjithashtu nevojën për ndryshimin e Ligjit për Zgjedhjet.
“Që nga viti 2021 janë instaluar dhe janë mbikëqyrur procedurat e numërimit të kandidatëve për deputet në qendrat komunale të numërimit, si dhe në Qendrën e Numërimit dhe Rezultateve, si për balotazhin ashtu edhe për asambletë komunale. Edhe në këto zgjedhje të dhjetorit kanë qenë funksionale. Normalisht, KQZ i përdor këto mekanizma kur dëshiron të verifikojë mundësinë e manipulimit të ndonjë rezultati apo vote të ndonjë kandidati, qoftë me kërkesë të kandidatëve që dyshojnë se janë dëmtuar nga sistemi i formularëve, qoftë edhe me vetëiniciativë. Pra, në çdo variant, KQZ i ka të gjitha mundësitë për t’i zbuluar këto manipulime në procesin e administrimit të votave, prandaj besoj se të gjitha veprimet që po ndodhin tani janë në kuadër të përgjegjësive të KQZ-së për të zbardhur dhe qartësuar rezultatin e saktë për të gjithë kandidatët që i janë nënshtruar zgjedhjeve të dhjetorit”, theksoi Vullnet Bugaqku nga KDI.
Pas komunës së Prizrenit, ku deri më tani nga rinumërimi ka rezultuar përqindja më e madhe e manipulimeve me vota, pritet që drejtësia të merret edhe me komunat e tjera, ku rezultatet e rinumërimit tregojnë se ka pasur ndërhyrje në proces./RTK
Presidentja e Kosovës, Vjosa Osmani, deklaroi se Kosova e mbështet fuqishëm nismën e Bordit të Paqes, duke theksuar se përvoja e vendit në ndërtimin dhe ruajtjen e paqes mund të shërbejë si shembull për botën.
Deklarata e Osmanit u bë para mediave ndërkombëtare pas nënshkrimit të Kartës së Bordit të Paqes, në prani të Presidentit të Shteteve të Bashkuara të Amerikës, Donald Trump, dhe bashkëthemeluesve të tjerë të kësaj nisme.
Osmani theksoi se Kosova vjen nga një përvojë e dhimbshme lufte dhe se paqja që sot gëzon vendi është rezultat i mbështetjes ndërkombëtare, veçanërisht të SHBA-së.
“Duke ardhur nga Republika e Kosovës, një vend i shkatërruar nga lufta, dhe që sot jeton në paqe falë udhëheqjes amerikane, jemi thellësisht mirënjohës dhe krenarë që qëndrojmë krah Presidentit Trump në këtë nismë të re,” tha Osmani.
Ajo potencoi se beson fuqishëm në udhëheqjen amerikane dhe në qëllimin e Bordit të Paqes për të arritur rezultate konkrete. “Besoj fuqishëm në lidershipin e presidentit Trump dhe ekipit të tij. Kjo është për të shpëtuar jetë”, tha Osmani, duke shtuar se gjenerata e saj është rritur si “fëmijë lufte”.
Presidentja e Kosovës deklaroi se Kosova ka mbi 20 vjet përvojë në ndërtimin dhe ruajtjen e paqes, si dhe në proceset e ndërtimit të shtetit.
“Kosova është një nga ato shembujt ndriçues që mund të ofrojë praktikat më të mira për ndërtimin dhe ruajtjen e paqes,” tha ajo.
Duke folur për rolin e organizatave ndërkombëtare, Osmani theksoi se procedurat komplekse të vendimmarrjes në Kombet e Bashkuara e kanë bërë të vështirë arritjen e paqes, ndërsa Bordi i Paqes synon një qasje më të drejtpërdrejtë.
“Me këtë organizatë të re, jam e bindur se paqja mund të çojë përpara përmes një procesi vendimmarrjeje më pak kompleks,” tha Osmani. Ajo sqaroi se kjo nismë nuk synon të zëvendësojë OKB-në, por të punojë së bashku me të.
“Në rajonin tonë, OKB-ja ka pasur rol kryesisht në ruajtjen e paqes, ndërsa kur ishte fjala për arritjen e paqes, udhëheqja erdhi nga Shtetet e Bashkuara,” deklaroi presidentja.
Vjosa Osmani potencoi se Kosova sot është një vend i sigurt dhe se përvoja e saj mund të kontribuojë në përpjekjet globale për paqe. “Sipas organizatave ndërkombëtare, Kosova është një nga vendet më të sigurta në botë,” tha ajo, duke shtuar se “jeta e njerëzve është në qendër të kësaj nisme”.
Kryetari i Këshillit Kombëtar Shqiptar, Enkel Rexhepi, njoftoi se ka marrë sot një ftesë nga gjykata lidhur me vendosjen e flamurit kombëtar shqiptar në institucionin zyrtar të shqiptarëve në Luginën e Preshevës.
Në një postim në rrjetin social Facebook, Rexhepi theksoi se kjo është një dëshmi e presionit institucional ndaj shqiptarëve në Preshevë.
“Flamuri trajtohet si shkelje, ndërsa diskriminimi si politikë shtetërore. Nuk do të tërhiqemi. Dinjiteti nuk gjykohet”, shkruan ai.
Rexhepi riafirmoi vendosmërinë për të mbrojtur të drejtat dhe dinjitetin e komunitetit shqiptar në rajon, pavarësisht sfidave institucionale.
Brenda vitit 2026, Shqipëria do të nisë prodhimin e armëve “Made in Albania”.
Qeveria shqiptare ka nisur prezantimin e projektligjit në komisionet parlamentare, ku ministri i Mbrojtjes, Pirro Vengu, bëri njoftimin zyrtar.
Aktualisht janë nënshkruar gjashtë kontrata për krijimin e kompanive të përbashkëta shtet–privat, përmes kompanisë shtetërore KAYO dhe gjashtë operatorëve privatë. Këto kontrata parashikojnë prodhimin e municioneve, mjeteve dhe pajisjeve personale, uniformave, armatimit të lehtë, dronëve, sistemeve antidron, si edhe mjeteve për emergjencat civile.
Ministri i Mbrojtjes bëri me dije gjithashtu se negociatat për ringritjen e kantierit detar të Pashalimanit janë në fazën përfundimtare dhe po zhvillohen në bashkëpunim me gjigantin italian “Fincantieri”.
Sipas qeverisë, synohet sigurimi i një zinxhiri furnizimi të qëndrueshëm për të gjitha nënproduktet e prodhimit ushtarak, në mënyrë që Shqipëria të jetë plotësisht në përputhje me standardet e NATO-s dhe politikat kombëtare, duke respektuar preferencat dhe bashkëpunimin me vendet aleate./Tv Klan
Në një deklaratë publike, Gjykata Speciale ka dhënë një sqarim për ligjëratën e bujshme në shkollën “Xhevdet Doda” në Prishtinë të enjten. Një ditë më parë në këtë shkollë të kryeqytetit, Nisma e të Rinjve për të drejtat e njeriut (YIHR), mbajti një aktivitet që sipas organizatës kishte qëllim informimin e qytetarëve për Gjykatën Speciale.
Ngjarja nxiti reagime. Organizata e Veteranëve të Luftës së Ushtrisë Çlirimtare e cilësoi si “përpjekje për të kontrolluar dëmin ndaj imazhit të rënduar” të Dhomave të Specializuara. Sipas OVL UÇK-së, aktiviteti ishte i ngjashëm me pushtetin e ish-Jugosllavisë që pas protestave mbante mbledhje për t’i përgatitur qytetarët psikologjikisht që t’i pranojnë dënimet.
“Kjo qasje e njohur e propagandës dhe presionit institucional nuk i shërben drejtësisë, por imponimit të një narrative të parapërgatitur”, është thënë nga OVL-UÇK-ja. Edhe Komuna e Prishtinës reagoi duke paralajmëruar masa. Ajo vlerësoi se ligjërata është mbajtur pa autorizimin e Drejtorisë së Arsimit. Nga shkolla kanë thënë se asnjë zyrtar i gjykatës nuk ka mbajtur ligjëratë, por se ishte e YIHR-së. Edhe kjo organizatë ka thënë se aktiviteti ishte për prezantim të informatave bazike dhe publike mbi Dhomat e Specializuara.
Ngjashëm ka reaguar edhe Gjykata Speciale të premten pasdite. Ajo ka thënë se që prej vitit 2018 organizohen aktivitete të tilla komunikimi dhe ndërgjegjësimi me audiencat në Kosovë.
“Këto aktivitete të përcjelljes së informacionit kanë për qëllim të sigurojnë praninë në Kosovë, të ofrojnë informacion bazë për mandatin dhe veprimtarinë e Gjykatës, t’u japin njerëzve në Kosovë mundësinë të shprehin pikëpamjet e tyre dhe, mbi të gjitha, t’u përgjigjen pyetjeve të tyre. Janë organizuar aktivitete me studentë, juristë, shoqërinë civile, qytetarë të komuniteteve vendore, dhe me shumë të tjerë. Duke qenë se gjykimet kryhen në Hagë, që në fillim u vlerësua se Gjykata duhet të komunikojë me njerëzit që ndikohen nga proceset gjyqësore, duke u ofruar atyre informacion transparent, asnjanës dhe të qasshëm, sikurse kanë vepruar edhe tribunalë të tjerë”, thuhet në njoftimin e Gjykatës Speciale.
Sipas njoftimit, informacionet që jepen në këto aktivitete janë të njëjta me ato që gjenden online. Aty thuhet po ashtu se prezumimi i pafajësisë së një të akuzuari komunikohet në aktivitete.
“DHKS-ja e vlerëson të rëndësishme të dëgjojë mendimet e njerëzve në Kosovë dhe t’u përgjigjet pyetjeve të tyre përmes Programit për Komunikim dhe Ndërgjegjësim”, thuhet në njoftim.
Oda Ekonomike Gjermano-Kosovare (OEGJK / KDWV) ka riafirmuar përkushtimin e saj për forcimin e marrëdhënieve bilaterale dhe shkëmbimit tregtar ndërmjet Gjermanisë dhe Kosovës, duke prezantuar një paketë rekomandimesh strategjike për zhvillimin ekonomik të vendit gjatë vitit 2026.
OEGJK bën të ditur se, përmes rrjetit të saj prej mbi 200 kompanish anëtare, këshillon, mbështet dhe përfaqëson interesat e kompanive gjermane që operojnë ose synojnë të operojnë në Kosovë, si dhe kompanive kosovare që bashkëpunojnë me tregun gjerman, duke krijuar ura bashkëpunimi dhe duke promovuar investime të reja.
Sipas Odës, prioritet kryesor mbetet rritja ekonomike, integrimi evropian dhe përmirësimi i klimës së biznesit në Kosovë. Në këtë kuadër, OEGJK ka identifikuar disa shtylla kryesore strategjike për vitin 2026, të bazuara në kërkesat e anëtarëve, bashkëbisedimet me investitorë gjermanë dhe përvojën praktike në ekonominë kosovare.
Në fushën e promovimit të tregtisë, investimeve dhe diplomacisë ekonomike, OEGJK rekomandon krijimin e mekanizmave të dedikuar investivë, përfshirë fonde të specializuara dhe instrumente financiare të garantuara nga shteti, si dhe themelimin e një “One-Stop Shop” për investitorët strategjikë. Fokus i veçantë kërkohet në sektorë si ICT, BPO, energjia e ripërtëritshme dhe industria kreative.
Në aspektin e diplomacisë ekonomike, Oda thekson rëndësinë e forcimit të rolit ekonomik të ambasadave të Kosovës, emërimit të atasheve ekonomikë dhe përfshirjes aktive të diasporës, veçanërisht në vendet e Bashkimit Evropian, për rritjen e eksporteve dhe investimeve.
Sa i përket klimës së biznesit dhe digjitalizimit, OEGJK vlerëson si jetike integrimin e Kosovës në marrëveshjet ndërkombëtare të transportit, lehtësimin e lëvizjes ndërkufitare dhe avancimin e sovranitetit digjital përmes sigurimit të domenit të nivelit të lartë (TLD) për Kosovën.
Në kuadër të reformave administrative dhe infrastrukturës ekonomike, Oda propozon uljen e barrës administrative për bizneset, digjitalizimin e procedurave doganore, përmirësimin e logjistikës dhe rifunksionalizimin e Këshillit Ekonomiko-Social, si parakusht për dialog social funksional dhe integrim evropian.
Në fushën e arsimit dhe tregut të punës, OEGJK thekson nevojën urgjente për zhvillimin e arsimit profesional dhe zgjerimin e sistemit dual, duke u bazuar në përvojën gjermane, për të përgatitur fuqi punëtore të kualifikuar dhe për të reduktuar migrimin e të rinjve.
Në fund, Oda nënvizon rëndësinë e dialogut publiko-privat, duke kërkuar përfshirje më të hershme dhe të strukturuar të sektorit privat në hartimin e legjislacionit ekonomik, si mënyrë për rritjen e cilësisë së politikave publike dhe besimit të investitorëve.
OEGJK vlerëson se zbatimi i këtyre rekomandimeve do të kontribuonte drejtpërdrejt në rritjen e konkurrueshmërisë së ekonomisë së Kosovës dhe në forcimin e partneritetit strategjik Kosovë–Gjermani./Telegrafi/
Një efektive policie ka rënë pre e dhunës brenda ambienteve të komisariatit nga dy vajza. Sipas njoftimit të Policisë, 38-vjeçarja M. A. dhe 29-vjeçarja R. A. janë arrestuar pasi kanë dhunuar oficeren e Policisë brenda ambienteve të Komisariatit të Policisë Nr. 3 në Tiranë.
Sipas Policisë, efektivja është dhunuar për shkak të detyrës, ndërsa vijojnë hetimet për dokumentimin e ngjarjes.
Njoftimi i Policisë
“Specialistët për Hetimin e Krimeve të Komisariatit të Policisë Nr. 3 arrestuan shtetaset M. A., 38 vjeçe, dhe R. A., 29 vjeçe, pasi dyshohet se në hyrje të ambienteve të komisariatit kanë goditur një oficere policie për shkak të detyrës së saj”, njofton policia.
Zëvendësdrejtori i Drejtorisë të Krimeve Ekonomike, Luan Ibrahimi tha se ky operacion ka qenë prej më të mëdhatë që ka realizuar Policia e Kosovës.
“Jemi angazhuar në të marrë informacionet për keqpërdorime, gjithashtu edhe me tu pajisur me autorizimin e lëshuar nga Prokuroria Themelore në Prizren, edhe përkundër vështirësive që kemi pasur për shkak se ky ka qenë një prej operacioneve ndoshta më të mëdha që ka realizuar Policia e Kosovës".
"Ne jemi përgatitur, jemi mobilizuar në koordinim me Prokurorinë edhe drejtorinë rajonale dhe siç shihet ja kemi arritur qëllimit që të parandalojmë edhe t’i arrestojmë personat të cilët kanë keqpërdorur me vota, të cilët kanë ndikuar, kanë kërcënuar ose kanë dhënë ryshfet dhe kanë dhënë ryshfet lidhur me votimin e fundit që kanë ndodhur në Kosovë”, tha ai.
Lidhur më atë se a janë intervistuar ndonjë kandidatë për deputetë, kryeprokurori i Prokurorisë Themelore të Prizrenit, Petrit Kryeziu tha se deri tani janë intervistuar kryesisht komisionerët dhe ata që kanë keqpërdorur me votat drejtpërdrejt, por shtoi se edhe kandidatët për deputetë do të dëgjohen.
Login
