TIRANË, 10 janar /ATSH/ Ministria e Mbrojtjes njoftoi sot se reshjet intensive të shiut gjatë orëve të fundit kanë krijuar problematika në disa qarqe të vendit, përfshirë rritje të prurjeve në lumenj, përmbytje të tokave bujqësore, rrëshqitje dherash dhe vështirësi në qarkullimin rrugor.

Situata paraqitet më e rënduar në Shkodër, Durrës, Lezhë, Gjirokastër, Dibër dhe Berat, ndërsa në qarqet e tjera problemet janë të kufizuara ose situata është e qëndrueshme.

Në Qarkun Shkodër, rritja e niveleve të lumenjve Drin, Kir dhe Bunë ka sjellë përmbytje në njësitë administrative Ana e Malit dhe Dajç. Strukturat e bashkisë dhe të emergjencave civile ndodhen në terren dhe monitorojnë vazhdimisht situatën, ndërsa hidrovoret punojnë me kapacitet të plotë dhe nivelet e ujit mbeten nën kuotat kritike.

Në Qarkun Durrës janë verifikuar 5 477 banesa, nga të cilat 1 711 kanë pësuar dëme. Janë evakuuar 851 persona, kryesisht në zonat Sukth dhe Katund i Ri, ku rreth 2 000 hektarë tokë bujqësore janë nën prezencë uji. Në Lezhë, niveli i ujit në tokat bujqësore ka shënuar rënie, por disa banesa vijojnë të jenë të prekura. Lumi Drin është në ulje, ndërsa lumi Mat ka shënuar rritje për shkak të shkarkimeve nga HEC-et Shkopet dhe Qafë-Mollë.

Në qarqet Gjirokastër dhe Dibër po punohet për pastrimin e akseve rrugore dhe largimin e ujit nga disa objekte, ndërsa në qarqet Berat dhe Elbasan rritja e prurjeve të lumenjve Osum dhe Devoll ka sjellë përmbytje të tokave bujqësore.

Në terren janë angazhuar efektivë të Forcave të Armatosura, nën koordinimin e Agjencisë Kombëtare të Mbrojtjes Civile dhe Ministrisë së Mbrojtjes, të cilët asistojnë në transportimin e banorëve, shpërndarjen e ndihmave dhe mbështetjen e operacioneve emergjente sipas nevojave.

Ministria u bën thirrje banorëve të zonave të prekura të kontaktojnë autoritetet vendore për çdo nevojë dhe të bashkëpunojnë me strukturat në terren për menaxhimin sa më efektiv të situatës.

/e.xh/r.e/

The post MM: Situatë e rënduar nga reshjet në disa qarqe appeared first on Agjencia Telegrafike Shqiptare.

TIRANË, 10 janar /ATSH/ Situata në territorin e bashkisë Shkodër paraqitet e qëndrueshme, me nivele uji nën kuotat kritike dhe pa problematika të evidentuara, ndërsa strukturat përgjegjëse vijojnë monitorimin e pandërprerë të situatës.

Kështu shkruan sot kryeministri Edi Rama në rrjetet sociale, duke shtuar se, “nivelet e ujit në lumenjtë Bunë dhe Drin mbeten të kontrolluara dhe brenda parametrave të sigurisë. Megjithatë, gjatë 24 orëve të fundit është regjistruar një rritje e niveleve me rreth 10–20 centimetra krahasuar me një ditë më parë, pa sjellë pasoja për zonat e banuara”.

Kryeministri theksoi se në të gjithë territorin e bashkisë Shkodër nuk raportohet asnjë banesë e përmbytur dhe nuk ka prezencë uji në banesa. Ai shtoi se situata po ndiqet nga afër nga strukturat vendore dhe qendrore, të cilat janë në gatishmëri për të ndërhyrë në rast nevoje.

Rama informoi gjithashtu se bashkia Shkodër ndodhet në monitorim të vazhdueshëm dhe se po vërehet një tendencë e tërheqjes së ujit nga zonat ku ka pasur prani të tij në ditët e mëparshme.

Institucionet u bëjnë thirrje qytetarëve të qëndrojnë të informuar dhe të ndjekin udhëzimet e strukturave përgjegjëse, ndërsa monitorimi i situatës hidrike do të vijojë në mënyrë të pandërprerë.

/e.xh/r.e/

The post Situata në bashkinë Shkodër e qëndrueshme, nivelet e ujit nën kuotat kritike appeared first on Agjencia Telegrafike Shqiptare.

TIRANË, 10 janar /ATSH/ Kjo e shtunë i gjen në banka nxënësit olimpiadistë të Olimpiadës Kombëtare të Biologjisë, të cilët po marrin pjesë në fazën e dytë të këtij konkurrimi kombëtar, që zhvillohet njëkohësisht në Tiranë, Vlorë, Berat, Shkodër dhe në qytete të tjera të Shqipërisë.

Ministrja e Arsimit, Mirela Kumbaro e cilësoi këtë aktivitet si një moment të rëndësishëm për nxitjen e dijes dhe pasionit për shkencën, veçanërisht për Biologjinë.

Sipas saj, kjo fazë e olimpiadës përfaqëson një hap të rëndësishëm në evidentimin e talenteve të reja dhe potencialeve akademike të nxënësve shqiptarë.

“Është një ditë në të cilën investimi në dije dhe pasioni për shkencën e Biologjisë do të përkthehen në rezultate konkrete, që zbulojnë potencialet e nxënësve”, u shpreh Kumbaro.

Ajo theksoi se aktivitetet shkencore do të vijojnë edhe në javët në vijim, me Festivalin e Shkencës, ku idetë më të mira të nxënësve do të kenë mundësinë të transformohen në produkte dhe projekte frymëzuese.

Sipas ministres, këto iniciativa kontribuojnë në konsolidimin e një modeli suksesi në shkollat shqiptare, duke nxitur mendimin kritik, kërkimin shkencor dhe inovacionin që në moshë të hershme.

Olimpiada Kombëtare e Biologjisë synon të identifikojë dhe mbështesë nxënësit më të talentuar në këtë fushë, si dhe të promovojë interesin për shkencat natyrore në sistemin arsimor shqiptar.

/e.xh/r.e/

The post Zhvillohet faza e dytë e Olimpiadës Kombëtare të Biologjisë appeared first on Agjencia Telegrafike Shqiptare.

TIRANË, 10 janar /ATSH/ Reshjet e dendura të dëborës dhe temperaturat e ulëta kanë sjellë vështirësi në veri dhe verilindje të vendit, por furnizimi me energji elektrike po garantohet falë angazhimit të vazhdueshëm të ekipeve të Operatorit të Sistemit të Shpërndarjes së Energjisë Elektrike (OSHEE).

Zëvendëskryeministrja dhe njëherazi ministre e Infrastrukturës dhe Energjisë, Belinda Balluku, bëri të ditur se OSHEE ka angazhuar 1600 punonjës dhe 186 mjete në terren, të cilët po punojnë në kushte të vështira atmosferike për përballimin e problematikave të shkaktuara nga moti dhe për riparimin e rrjetit energjetik.

Sipas Ballukut, ekipet janë të shpërndara në të gjitha zonat e prekura, duke ndërhyrë në kohë reale për të shmangur ndërprerjet dhe për të rikthyer sa më shpejt furnizimin me energji elektrike aty ku janë evidentuar probleme.

“Pavarësisht kushteve të vështira të motit, strukturat e OSHEE-së ndodhen në gatishmëri të plotë për të garantuar furnizim pa ndërprerje për abonentët kudo në vend”, u shpreh Balluku.

Ajo theksoi se situata po monitorohet në mënyrë të pandërprerë dhe se ka koordinim të vazhdueshëm mes strukturave qendrore dhe atyre në terren, me qëllim reagimin e menjëhershëm ndaj çdo defekti të mundshëm.

MIE u bën thirrje qytetarëve të tregojnë kujdes në kushtet e motit të keq dhe të raportojnë çdo problematikë të konstatuar në rrjetin energjetik, ndërsa ekipet e OSHEE-së vijojnë punën për të siguruar furnizim normal me energji elektrike në të gjithë vendin.

/e.xh/r.e/

The post Balluku: 1600 punonjës dhe 186 mjete të OSHEE-së ndodhen në terren appeared first on Agjencia Telegrafike Shqiptare.

TIRANË, 10 janar /ATSH/ Kryetari i Partisë Demokratike, Sali Berisha deklaroi se fronti opozitar nuk ka si qëllim dominimin e një force politike mbi të tjerat, por krijimin e një fryme të gjerë bashkimi për largimin e qeverisë aktuale nga pushteti.

Në mbledhjen e sotme të kryesisë së PD-së, Berisha u ndal te takimi i zhvilluar një ditë më parë me përfaqësues të shoqërisë civile dhe forca të ndryshme politike, të cilin e cilësoi si jashtëzakonisht të rëndësishëm.

“U bashkuam kundër një të keqeje të përbashkët dhe aty erdhën të gjithë ata që besojnë se Edi Rama është e keqja më e madhe e këtij vendi. Ishte një akt i guximshëm dhe i përgjegjshëm qytetar”, u shpreh Berisha, duke shtuar se opozita do të vijojë dialogun me këto grupe për të dëgjuar zërin dhe këshillat e tyre.

Ai ftoi individë, organizata dhe forca të tjera politike që nuk ishin të pranishme në takim t’i bashkohen frontit opozitar, të cilin e përshkroi si një forum të përbashkët për largimin e qeverisë aktuale. Sipas Berishës, ky front synon institucionalizimin dhe shtrirjen e tij edhe në rrethe e qarqe, në funksion të një përpjekjeje mbarëkombëtare.

Gjatë fjalës së tij, Berisha njoftoi gjithashtu se kryesia e PD-së do të përcaktojë datën e protestës së ardhshme, duke theksuar se protestat e vazhdueshme janë e vetmja rrugë për largimin e qeverisë.

“Koha për protestë ka kaluar. Rruga e vetme për largimin e kësaj qeverie është kalimi në protestë të vazhdueshme. Variantet e tjera janë iluzive”, deklaroi ai.

Berisha shtoi se përgjegjësinë për ndryshimin e situatës politike duhet ta marrin qytetarët shqiptarë, ndërsa u shpreh se zhvillimet e fundit në krahun e opozitës janë pozitive.

/e.xh/r.e/

The post Berisha: Protestat e vazhdueshme, rruga e vetme për largimin e qeverisë appeared first on Agjencia Telegrafike Shqiptare.

TIRANË, 9 janar /ATSH/ Ministri i Bujqësisë dhe Zhvillimit Rural, Andis Salla, bëri të ditur se situata e krijuar nga reshjet intensive të ditëve të fundit po shënon përmirësim të ndjeshëm, si pasojë e uljes së reshjeve gjatë 24 orëve të fundit, por edhe punës së kryer nga strukturat e emergjencave në terren.

Sipas ministrit, në disa prej lumenjve kryesorë janë regjistruar ulje të niveleve të ujit, ndërsa strukturat e kullimit dhe hidrovoret po funksionojnë me kapacitet të plotë për të përballuar situatën dhe për të tërhequr ujërat nga zonat e prekura bujqësore.

“Ndërhyrjet në terren vijojnë pa ndërprerje. Mjetet e rënda janë angazhuar në rehabilitimin e argjinaturave, duke ndihmuar në mbrojtjen e tokave bujqësore dhe në rikthimin gradual të normalitetit”, u shpreh ministri Salla.

Ai theksoi se ekipet e Ministrisë së Bujqësisë dhe Zhvillimit Rural janë të angazhuara në të gjithë territorin e vendit, në bashkëpunim me strukturat vendore dhe institucionet përkatëse, për menaxhimin e situatës dhe për të garantuar reagim të shpejtë ndaj çdo problematike.

Ministri Salla nënvizoi se puna në terren do të vijojë deri në normalizimin e plotë të situatës, ndërsa paralelisht po kryhet vlerësimi i dëmeve në bujqësi, me qëllim pasqyrimin e saktë të ndikimit të reshjeve dhe marrjen e masave të nevojshme mbështetëse për fermerët e prekur.

/e.xh/a.f/

The post Salla: Hidrovoret funksionojnë me kapacitet të plotë, vijon rehabilitimi i argjinaturave appeared first on Agjencia Telegrafike Shqiptare.

The post Forcohet dollari me 0,24 lekë, euroja e qëndrueshme appeared first on Agjencia Telegrafike Shqiptare.

TIRANË, 9 janar /ATSH/ Rritja e çmimeve të qirave dhe ushqimeve ka ndikuar në inflacionin e muajit dhjetor 2025, sipas të dhënave të publikuara nga INSTAT. Ky zhvillim pasqyron ndikimin e kostove të jetesës dhe ndryshimet në tregun e pasurive të paluajtshme dhe të konsumit ushqimor gjatë periudhës festive.

Sipas INSTAT, çmimet e konsumit në muajin dhjetor 2025 u rritën 2,3 % nga 2,1% që ishte një vit më parë, bëri të ditur INSTAT.

Ndërsa ndryshimi mujor i indeksit të çmimeve të konsumit në muajin dhjetor 2025, krahasuar me nëntor 2025 është 0,7%. Rritja mesatare vjetore e çmimeve të konsumit në vitin 2025 është 2,2%, njësoj si një vit më parë.

INSTAT bën të ditur se, çmimet e grupit “Qira, ujë, lëndë djegëse dhe energji” u rritën me 0,96 pikë përqindje, pasuar nga grupi “Ushqime dhe pije joalkoolike” me 0,56 pikë përqindje.

Çmimet e grupit “Mobilje, pajisje shtëpie dhe mirëmbajtje e shtëpisë” kontribuuan me 0,16 pikë përqindje në rritjen e përgjithshme të çmimeve, pasuar nga grupi “Hotele, kafene dhe restorante” me 0,15 pikë përqindje dhe “Pije alkoolike dhe duhan” me 0,11 pikë përqindje.

Rritje u shënuan gjithashtu edhe nga grupet “Mallra dhe shërbime të ndryshme” me 0,10 pikë përqindje, “Argëtim dhe kulturë” me 0,08 pikë përqindje, “Shërbimi arsimor” me 0,06 pikë përqindje dhe “Komunikimi” me 0,03 pikë përqindje. Ndërkohë, grupet “Veshje dhe këpucë”, “Shëndeti” dhe “Transporti” ndikuan secili me 0,02 pikë përqindje.

Krahasuar me muajin dhjetor 2024, rritja më e madhe e çmimeve u vërejt në grupin “Qira, ujë, lëndë djegëse dhe energji”, me 4,8%, pasuar nga “Argëtim dhe kulturë” me 3,6% dhe “Hotele, kafene dhe restorante” me 2,6%. Më tej, çmimet e grupit “Pije alkoolike dhe duhan” u rritën me 2,2%, “Mobilje, pajisje shtëpie dhe mirëmbajtje e shtëpisë” me 2,1%, ndërsa “Shërbimi arsimor” dhe “Mallra dhe shërbime të ndryshme” shënuan rritje prej 1,9% secili. Rritje u shënuan edhe në grupet “Ushqime dhe pije joalkoolike” me 1,6%, “Komunikimi” me 0,9%, “Shëndeti” me 0,5%, “Veshje dhe këpucë” me 0,4% dhe “Transporti” me 0,3%.

Brenda grupit të ushqimeve, rritja më e lartë e çmimeve u regjistrua në nëngrupin “Qumësht, djathë dhe vezë”, me 4,4%, pasuar nga “Peshk” dhe “Vajra dhe yndyrna” me nga 3,8% secili, “Mish” me 2,3% dhe “Fruta” me 0,4%, ndër të tjera.

/e.xh/a.f/

The post Çmimet e konsumit në rritje të lehtë, inflacioni në dhjetor 2,3% appeared first on Agjencia Telegrafike Shqiptare.

TIRANË, 9 janar /ATSH/ Të gjithë operatorët e regjistruar në regjistrin e vreshtave, përfshirë vjelësit, prodhuesit, përpunuesit dhe mbushësit e shisheve, janë të detyruar të dorëzojnë deklaratat e prodhimit dhe të stoqeve sipas rregullores së re të publikuar në Fletoren Zyrtare.

Deklarata e prodhimit për vitin aktual të verës duhet të dorëzohet deri më 15 janar dhe duhet të përmbajë identitetin e prodhuesit; vendin ku mbahen produktet; kategorinë e produkteve të përdorura rrush, musht rrushi ose verë në fermentim; furnizuesit dhe vëllimin e produkteve, të ndara sipas ngjyrës dhe kategorisë.

Formulari i deklaratës dorëzohet pranë Agjencive Rajonale të Ekstensionit Bujqësor të qarkut përkatës dhe duhet të dorëzohet edhe nëse prodhimi ka qenë zero.

Po ashtu, deklarata e stoqeve duhet të dorëzohet deri më 10 shtator, duke përfshirë identitetin dhe vendin ku mbahen produktet. Vjelësit janë të detyruar të dorëzojnë deklaratën e vjeljes deri më 15 janar, duke specifikuar sipërfaqen e mbjellë, sasitë e rrushit të vjelë dhe destinacionin e tij.

Rregullorja parashikon kontroll të sipërfaqeve të mbjella dhe sanksione administrative për operatorët që nuk e zbatojnë atë, me qëllim mbajtjen e një regjistri të përditësuar dhe të saktë të prodhimit të verës në vend.

/e.xh/a.f/

The post Regjistri i vreshtave, dorëzimi i deklaratave nga operatorët brenda 15 janarit appeared first on Agjencia Telegrafike Shqiptare.

TIRANË, 9 janar /ATSH/ Mbi 50 milionë euro janë vënë në dispozicion për përballimin e situatës së krijuar nga moti i keq i ditëve të fundit, si pasojë e nivelit tejet të lartë të reshjeve të shiut, bëri të ditur ministri i Financave, Petrit Malaj.

Duke folur në mbledhjen e Komitetit Ndërministror të Emergjencave Civile, të drejtuar nga Kryeministri Edi Rama, Malaj sqaroi se këto fonde janë të ndara në disa zëra buxhetorë, të dedikuar si për menaxhimin e emergjencave, ashtu edhe për parandalimin e fatkeqësive natyrore.

“Në total, kemi mbi 50 milionë euro në dispozicion dhe të disponueshme për përballimin e situatës së krijuar nga moti i keq. Në programin e Emergjencave Civile janë parashikuar 30 milionë euro, nga të cilat 15 milionë euro janë alokuar për financimin e projekteve dhe veprave që lidhen me parandalimin e fatkeqësive natyrore”, deklaroi Malaj.

Sipas ministrit të Financave, një tjetër instrument i rëndësishëm është fondi i kushtëzuar për Emergjencat Civile, me vlerë 10 milionë euro, i cili menaxhohet nga Ministria e Mbrojtjes dhe do të shpërndahet për njësitë e qeverisjes vendore sipas një metodologjie të bazuar mbi nivelin e riskut.

“Gjithashtu, kemi fondin rezervë të Këshillit të Ministrave, me vlerë 25 milionë euro, i cili do të vihet në dispozicion të nevojave konkrete, në bazë të vlerësimit të dëmeve të shkaktuara nga kjo situatë”, tha Malaj.

Ai shtoi se është parashikuar edhe fondi për digat dhe rezervuarët, me një vlerë totale prej 5 milionë eurosh, i dedikuar për financimin e ndërhyrjeve dhe investimeve në infrastrukturën ujore.

Komiteti Ndërministror i Emergjencave Civile u mblodh sot në Tiranë, nën drejtimin e Kryeministrit Edi Rama, për të përditësuar situatën e krijuar nga moti shumë i keq i ditëve të fundit dhe për të koordinuar masat ndërinstitucionale për përballimin e pasojave në zonat e prekura.

/e.xh/a.f/

The post Malaj: Mbi 50 milionë euro në dispozicion për përballimin e pasojave të motit të keq appeared first on Agjencia Telegrafike Shqiptare.

TIRANË, 8 janar /ATSH/ Ndotja mjedisore dhe problemet e sigurisë teknike të mjeteve mbeten shqetësime kryesore në qarkullimin rrugor.

Sipas të dhënave zyrtare të Drejtorisë së Përgjithshme të Shërbimeve të Transportit Rrugor, nga mbi 338 mijë testime të kryera gjatë vitit, 81.065 automjete u refuzuan, duke përbërë 23,5 për qind të totalit. Arsyet kryesore të refuzimit lidhen me shkarkimin e gazrave mbi normat e lejuara, defektet vizuale, problemet në sistemin e frenimit, si dhe mangësitë në drejtim dhe pezullim.

Konkretisht, 37,6 për qind e refuzimeve erdhën për shkak të ndotjes nga gazrat, 34,4 për qind për defekte vizuale, 15,2 për qind për probleme me frenat dhe 12,8 për qind për defekte në drejtim dhe pezullim.

DPSHTRR bën të ditur se, pas ndërhyrjeve dhe riparimeve, 73.230 automjete u ritestuan dhe kaluan me sukses kontrollin teknik, ndërsa 7502 mjete vijojnë të jenë ende në pritje të riparimit. Ndërkohë, 333 automjete u refuzuan përfundimisht gjatë vitit 2025, pasi u konstatua manipulim i odometrit, një shkelje që cenon drejtpërdrejt sigurinë rrugore.

DPSHTRR thekson se kontrolli teknik mbetet një element kyç për garantimin e sigurisë së përdoruesve të rrugës dhe reduktimin e ndotjes mjedisore, teksa i bën thirrje drejtuesve të mjeteve të respektojnë standardet e kërkuara për qarkullim të sigurt.

/e.xh/r.e/a.f/

The post Mbi 81 mijë automjete nuk e kaluan kontrollin teknik gjatë 2025-ës appeared first on Agjencia Telegrafike Shqiptare.

TIRANË, 8 janar /ATSH/ Zëvendëskryeministrja dhe njëherazi ministre e Infrastrukturës, Belinda Balluku ka inspektuar sot në terren situatën e rënduar nga përmbytjet në zonën e Urës së Mifolit (Fier) shkaktuar nga reshjet intensive.

Balluku bëri të ditur se prioritet është shpëtimi i gjësë së gjallë, ndërsa informoi se Kryeministri po përgatit një paketë dëmshpërblimi që do të përfshijë si banesat, ashtu edhe pasuritë bujqësore.

Ajo njoftoi gjithashtu se nesër do të zhvillohet një mbledhje e Komitetit të Emergjencave, ku Kryeministri do të bëjë një adresim për masat urgjente dhe ndërhyrjet e nevojshme.

“U bëjmë thirrje qytetarëve t’u përgjigjen thirrjeve të Emergjencave Civile dhe të marrin masat e nevojshme për të shmangur rreziqet, pasi situata mund të agravojë”, tha ministrja Balluku.

Ajo shtoi se pritet një rënie graduale e nivelit të Vjosës – ndikuar edhe nga reshjet në Greqi – dhe situata do të monitorohet në orët dhe ditët në vijim.

“Kemi të gjithë angazhimin e duhur për mbrojtjen dhe për shpëtimin e gjësë së gjallë në këtë moment. Duhet të jeni në dijeni se Kryeministri bashkë me Ministrinë e Financave është duke dizenjuar një paketë që do të garantojë dëmshpërblimin si për pjesën bujqësore, dhe për banesat”, tha Balluku.

“Nesër në mëngjes, – shtoi ajo, – do ketë një mbledhje të komitetit të emergjencave ndërqeveritare, ku do të bëhet edhe një adresim nga Kryeministri, jo vetëm për zgjidhjen e situatës, por edhe për përballimin e të gjithë kësaj situate, por edhe për aspekte të tjera të rëndësishme që duhen bërë të ditura. Në këtë moment u bëj thirrje dhe u kërkojmë qytetarëve t’u përgjigjen thirrjeve të emergjencave civile.”

“Kemi shpresë për një rënie të nivelit të Vjosës që ndikohet edhe nga reshjet në vendin tonë, por edhe në Greqi në këto momente, por shpresojmë që në orët e ardhshme do të përmirësohet situata”, tha Balluku.

Zëvendëskryeministrja informoi se sistemi energjetik ka funksionuar shumë mirë, pavarësisht kushteve të vështira të motit, pa ndërprerje të gjata të energjisë, qoftë nga linjat e transmetimit të OST, qoftë nga OSHEE.

Ndërsa theksoi se, gjatë 24 orëve të ardhshme priten erëra të fuqishme në disa zona, që mund të arrijnë deri në 17 m/s, ndërsa më vonë shpejtësia e erës pritet të arrijë deri në 25 m/s, teksa reshjet e borës kanë nisur në rajonet veriore dhe juglindore, duke krijuar një situatë kritike, ndaj ekipet janë në terren për ta përballuar.

“Situata është e ndjeshme edhe për furnizimin me ujë: në Fier, katër pompa ndodhen nën ujë, por qyteti po furnizohet normalisht, dhe do të ketë vëmendje maksimale për menaxhimin e energjisë dhe ujësjellësve”, deklaroi ajo.

Ekipet e emergjencave dhe institucionet lokale vijojnë të jenë në terren për menaxhimin e situatës dhe mbështetjen e banorëve të prekur.

/e.xh/a.f/r.e/

The post Balluku: Paketë dëmshpërblimi për banesat dhe bujqësinë appeared first on Agjencia Telegrafike Shqiptare.

/a.f/r.e/

The post Dollari amerikan forcon pozitat ndaj lekut appeared first on Agjencia Telegrafike Shqiptare.

TIRANË, 8 janar /ATSH/ Ministri i Bujqësisë dhe Zhvillimit Rural, Andis Salla deklaroi sot se të gjithë strukturat e ministrisë, bashkë me bordet e kullimit dhe veterinarinë, janë angazhuar në terren për evakuimin e bagëtive të rrezikuara nga përmbytjet, me qëllim parandalimin e dëmeve në sektorin e blegtorisë dhe bujqësisë nga moti me reshje intensive të shiut.

Gjatë monitorimit në terren të situatës, në urën e Mifolit në Fier, Salla tha për mediet, se disa banorë nuk kanë pranuar të evakuohen, ndaj ndërhyrja po bëhet në bashkëpunim me Emergjencat Civile.

“Bordi i Kullimit në këtë qark është në terren me 16 ekskavatorë, duke punuar për riparimin e argjinaturave dhe ndërhyrje të shpejta me mjete të rënda për parandalimin e përmbytjeve”, tha ministri.

Ai shtoi se hidrovoret funksionojnë me kapacitet të plotë për të përballuar situatën e krijuar nga reshjet e dendura dhe po monitorohet çdo zhvillim për të mbrojtur banorët dhe pronat e tyre.

“Jemi pranë banorëve bashkë me ekipet e bashkive për të evidentuar dëmet e shkaktuara nga situata në sektorin e blegtorisë dhe bujqësisë, dhe për të mbështetur çdo familje të prekur me dëmshpërblim të dëmeve nga kjo situatë”, theksoi Salla.

Ministri bëri thirrje që banorët të respektojnë udhëzimet e autoriteteve dhe të bashkëpunojnë gjatë evakuimit për të shmangur rreziqet e mundshme. Ekipet e Ministrisë dhe të Emergjencave Civile do të vazhdojnë të jenë në terren deri në normalizimin e plotë të situatës.

/e.xh/r.e/a.f/

The post Salla në Fier: Ekipet në terren për mbështetjen e banorëve dhe evakuimin e bagëtive appeared first on Agjencia Telegrafike Shqiptare.

TIRANË, 8 janar /ATSH/ Moti i keq me reshje bore që ka përfshirë në zonat veriore dhe juglindore të vendit ka vështirësuar qarkullimin e mjeteve.

Autoriteti Rrugor Shqiptar (ARRSH) bën të ditur se kontraktorët janë në terren në mënyrë të pandërprerë në të gjitha akset rrugore, teksa rekomandon për drejtuesit e mjeteve, që në akset me prezencë bore të përdoren gomat dimërore.

Sipas njoftimit zyrtar, gjatë natës kanë vijuar reshjet e shiut, ndërsa në shumë zona malore ka nisur dëbora. Reshje dëbore janë evidentuar në disa segmente rrugore të Rajonit Verior, ku përfshihen akset Bajram Curri–Valbonë, Ura e Bujanit–Qafë Morinë, Bujan–Qafë Morinë (doganë), Sopot–Kërrnajë, Qafë Mejdan–Tropojë–Buçaj, Bulqizë, Qafë Bualli–Peshkopi, Peshkopi–Maqellarë, Hani i Hotit–Dogana Vermosh, Kukës–Shishtavec, Kukës–Bushtricë, Pukë–Fushë-Arrëz, Bogë–Theth si dhe Qafë Mali–Fushë Dukagjin.

Në Rajonin Qendror, reshje dëbore janë regjistruar në akset Surrel–Qafë Priskë–Qafë Mollë, Elbasan–Gjinar dhe Ibë–Kërrabë–Elbasan.

Ndërkohë, në Rajonin Jugor, situata me dëborë është konstatuar në Llogora, Qafë Thanë, Korçë–Voskopojë, Boboshticë–Dardhë, Korçë–Ersekë dhe Ersekë–Leskovik.

ARRSH bën me dije se kontraktorët e mirëmbajtjes rrugore janë në terren pa ndërprerje, 24 orë në 7 ditët e javës, me mjete dhe punëtorë, për pastrimin e akseve nga dëbora dhe garantimin e qarkullimit.

Autoriteti Rrugor u bën thirrje drejtuesve të mjeteve të shmangin lëvizjet jo të domosdoshme dhe të kryejnë udhëtime vetëm për nevoja esenciale, me qëllim rritjen e sigurisë në rrugë dhe lehtësimin e punës së ekipeve të mirëmbajtjes.

Po ashtu, ARRSH thekson se përdorimi i gomave dimërore është i detyrueshëm për automjetet që qarkullojnë në zonat malore ose aty ku është njoftuar për prani dëbore dhe ngricash, pasi ato sigurojnë drejtim më të sigurt, frenim dhe kontroll më të mirë të mjetit.

Autoriteti Rrugor Shqiptar apelon që drejtuesit e mjeteve të ndjekin paralajmërimet e strukturave përgjegjëse, të mos nënvlerësojnë rrezikun nga ndryshimet e motit dhe të informohen vazhdimisht për gjendjen e rrugëve, përmes komunikatave zyrtare.

/e.xh/r.e/a.f/

The post Borë në zonat malore, ARRSH: Përdorni gomat dimërore appeared first on Agjencia Telegrafike Shqiptare.

TIRANË, 7 janar /ATSH/ Reshjet e dendura të shiut kanë shkaktuar dëme të konsiderueshme materiale edhe në Qarkun e Vlorës, ku situata më problematike paraqitet në bashkinë e Selenicës. Si pasojë e shkarjes së dherave në aksin rrugor Kotë–Sevaster, pranë fshatit Vajzë, janë shembur tri banesa.

Prefektja e Qarkut Vlorë, Evis Allushi, së bashku me kryetarin e bashkisë Selenicë, inspektuan nga afër situatën në terren, për të vlerësuar dëmet dhe për të ndjekur ndërhyrjet e nevojshme nga strukturat përkatëse.

“Banorët po përballen me një situatë të vështirë. Iu bashkova shqetësimit të tyre dhe kërkova nga bashkia dhe të gjitha strukturat përgjegjëse që të jenë në shërbim të pandërprerë të komunitetit, duke i siguruar për mbështetjen e plotë të prefekturës”, u shpreh prefektja Allushi.

Më herët, prefektja e Qarkut të Vlorës, në koordinim me kryetarin e njësisë administrative Novoselë, zhvilloi një takim me kryetarët e fshatrave të kësaj njësie, ku u diskutua mbi masat parandaluese dhe informimi i banorëve për rrezikun e daljes së lumit nga shtrati.

“Prefektura është në terren dhe në ndjekje të vazhdueshme të situatës, me qëllim koordinimin në kohë reale të strukturave përkatëse dhe zgjidhjen sa më të shpejtë të çdo problematike që mund të lindë”, theksoi prefektja Allushi.

Aktualisht në qarkun e Vlorës situata e krijuar nga reshjet paraqitet e qëndrueshme dhe nën kontroll.

1 nga 5

/e.xh/r.e/a.f/

The post Rrëshqitje të tokës në Vlorë, Allushi: Strukturat në gatishmëri të plotë appeared first on Agjencia Telegrafike Shqiptare.

The post Forcohen lehtë euroja dhe dollari në raport me lekun appeared first on Agjencia Telegrafike Shqiptare.

TIRANË, 7 janar /ATSH/ Gjirokastra është një nga qytetet që u përball me problematika të shumta si pasojë e motit të keq dhe reshjeve intensive të shiut. Gjatë mbrëmjes të së martës përroi doli nga shtrati, duke shkaktuar përmbytje dhe sjellje të sasive të mëdha të inerteve në rrugë dhe zona të ndryshme të qytetit.

Kryetari i bashkisë Gjirokastër, Flamur Golemi, deklaroi se po vijon puna për largimin e inerteve nga rrugët. Golemi bëri të ditur se, të gjitha forcat vendore me mjete janë në terren deri në normalizimin e plotë të situatës.

“Kemi kaluar orë të vështira gjatë gjithë ditës së djeshme. Fillimisht patëm problematika në njësinë administrative Odrije, por gjatë mbrëmjes situata u përkeqësua shumë për shkak të reshjeve intensive, të papara prej vitesh, siç na kanë konfirmuar edhe specialistët. Nuk ishin thjesht reshje shiu, por rënie materialesh të shumta të ardhura nga Mali i Gjerë në lagjet kryesore të qytetit”, u shpreh Golemi.

Sipas kryebashkiakut, situata më e keqe tashmë ka kaluar dhe nuk ka pasur rrezik për jetën e qytetarëve. “Nuk kemi pasur jetë njerëzish të rrezikuara. Kemi kryer edhe disa evakuime për arsye sigurie dhe sot mund të themi se situata më e vështirë ka kaluar”, tha ai.

Golemi theksoi se puna për pastrimin e rrugëve ka nisur që mbrëmjen e djeshme. “Sa i përket rrugëve të qytetit, kemi filluar menjëherë me pastrimin e inerteve. Janë tonelata materialesh që po largohen nga rrugët kryesore, fillimisht në aksin ‘18 Shtatori’, dhe puna do të vijojë edhe në lagjet e tjera të qytetit. Kemi mbështetjen e Forcave të Armatosura, Drejtorisë së Rrugëve dhe strukturave të tjera ndihmëse”, tha kryebashkiaku.

Ai shtoi se vëmendja nuk është përqendruar vetëm në qendrën e qytetit.

“Jemi fokusuar në akset kryesore, por nuk kemi lënë pas edhe njësitë administrative. Kemi pasur bllokim në fshatin Lazarat, në njësinë administrative Lunxhëri, ndërsa aktualisht rrugët rurale janë zhbllokuar, me përjashtim të fshatit Dhoksat, ku lumi ka përmbytur rreth 50 metra rrugë dhe po punohet për normalizimin e situatës”, u shpreh Golemi.

Sipas kryetarit të bashkisë, për momentin në Gjirokastër mbeten vetëm dy vatra problematike.

“Njëra është pranë Kishës së Vjetër dhe tjetra në zonën e Cfakës. Specialistët kanë vlerësuar se familjet nuk rrezikohen, por situata po monitorohet për të shmangur probleme të mundshme nga rrëshqitjet e dherave”, tha ai.

Golemi bëri të ditur se nuk janë konstatuar dëme të mëdha në banesa, ndërsa për çdo rast janë vënë në dispozicion konviktet për strehim të përkohshëm. “Me zjarrfikëset dhe grupet e punës po punojmë për largimin e ujit nga banesat dhe bizneset në periferi të qytetit”, shtoi ai.

Sa i përket dëmeve në biznese, kryebashkiaku theksoi se vlerësimi do të kryhet në një fazë të dytë, në përputhje me legjislacionin në fuqi.

/e.xh/a.f/r.e/

The post Golemi: Situata më e vështirë në Gjirokastër ka kaluar, vijon pastrimi i inerteve appeared first on Agjencia Telegrafike Shqiptare.

TIRANË, 7 janar /ATSH/ Banka e Shqipërisë bën të ditur se u shitën 1,73 miliardë lekë obligacione 20-vjeçare në ankandin e së martës, me yield (normë interesi) 6,72%, nga 6,88% që kishte qenë në ankandin e fundit në shtator të vitit të kaluar.

Ulja e yield-it u përcaktua kryesisht nga kërkesa e lartë e investitorëve, ndërsa vlera totale e ofruar në ankandin për obligacionet 20-vjeçare arriti në 2,92 miliardë lekë.

Obligacionet 20-vjeçare janë instrumentet më afatgjata të borxhit që ofron aktualisht tregu i brendshëm financiar. Ato janë një alternativë e mirë sidomos për investitorët institucionalë.

Banka e Shqipërisë çerli ankandin e parë për obligacionet 20-vjeçare në fillim të 2025. Ky instrument u prit me interes nga investitorët, duke nxitur organizimin edhe të tre ankande të tjera gjatë vitit 2025.

Gjatë 3-mujorit të parë të këtij viti, parashikohet që huamarrja e qeverisë shqiptare në tregun e brendshëm financiar të rritet lehtë. Sipas kalendarit të emetimeve të Ministrisë së Financave, huamarrja e planifikuar do të ketë vlerën e 134 miliardë lekëve, në rritje me 1,1% krahasuar me të njëjtën periudhë të një viti më parë.

/e.xh/a.f/r.e/

The post Shiten 1,73 miliardë lekë obligacione 20-vjeçare me normë interesi 6,72% appeared first on Agjencia Telegrafike Shqiptare.

TIRANË, 7 janar /ATSH/ Prefektja e Qarkut Gjirokastër, Albana Hasanaj, deklaroi për ATSH-në se, pavarësisht reshjeve intensive të shiut, të gjitha akset rrugore nacionale në territorin e qarkut janë të kalueshme, ndërsa po vijon puna për pastrimin e rrugëve urbane të qytetit të Gjirokastrës nga inertët dhe rrëshqitjet e dherave.

Sipas prefektes, aktualisht janë konstatuar rrëshqitje dherash kryesisht në akset rrugore rurale, ku grupet e punës dhe ekipet e kompanive kontraktore po punojnë intensivisht për të garantuar qarkullim normal dhe siguri për përdoruesit e rrugëve.

Problematika më e theksuar paraqitet në Bashkinë Gjirokastër, ku sasia e madhe e reshjeve ka sjellë prani inertësh në disa segmente të rrugëve të qytetit. Për normalizimin e situatës janë angazhuar të gjitha strukturat përkatëse, përfshirë Policinë e Shtetit, Bashkinë Gjirokastër, Forcat e Armatosura dhe ekipet e mirëmbajtjes së rrugëve.

Prefektja Hasanaj bëri të ditur se furnizimi me energji elektrike po vijon normalisht në të gjithë qarkun, me përjashtim të dy njësive administrative, ku energjia është stakuar për arsye sigurie, pasi kabinat elektrike ndodhen në zona me prurje të shtuar të ujit. Ndërkohë, furnizimi me ujë të pijshëm vijon normalisht.

Sa i përket bashkive të tjera të qarkut, Përmet, Këlcyrë dhe Tepelenë, situata paraqitet e qetë dhe nën kontroll, krahasuar me Bashkinë Gjirokastër.

Prefektja theksoi se situata mbetet dinamike dhe varet nga intensiteti i reshjeve.

“Aktualisht po monitorohen nga afër prurjet në lumenj, të cilat regjistrohen në nivelin 6.5 metra në Memaliaj dhe 4.4 metra në Përmet. Sipas saj, monitorimi i vazhdueshëm është i domosdoshëm, pasi prurjet e shtuara mund të krijojnë problematika edhe për qarqet Fier dhe Vlorë”, tha Hasanaj, teksa bëri të ditur se, “strukturat përgjegjëse vijojnë monitorimin 24-orësh të situatës dhe janë në gatishmëri për ndërhyrje të menjëhershme në rast të përkeqësimit të kushteve atmosferike”.

/e.xh/a.f/

The post Hasanaj: Në Gjirokastër po punohet për pastrimin e rrugëve nga inertet  appeared first on Agjencia Telegrafike Shqiptare.