PARIS, 6 janar /ATSH-DPA/- Takimi i nivelit të lartë i vendeve mbështetëse të Ukrainës dërgon një sinjal të fortë uniteti, tha sot presidentja e Komisionit Evropian, Ursula von der Leyen.

“Deklarata e përbashkët e dakordësuar dërgon një mesazh të qartë”, shkroi ajo pas diskutimeve në Paris.

Von der Leyen tha se kolektivisht, ata mbështesin Ukrainën, e cila vazhdon të kundërshtojë pushtimin e plotë rus që ka zgjatur pothuajse katër vjet.

“Vendi ka një të ardhme të sigurt, të qëndrueshme dhe të begatë përpara”, shtoi ajo.

Sipas qeverisë franceze, përfaqësues nga më shumë se 30 vende, si dhe BE dhe NATO, morën pjesë në takimin e nivelit të lartë të të ashtuquajturit “Koalicion i të Gatshmëve” në Paris. //a.i/

The post PARIS – Von der Leyen: Takimi i “Koalicionit të të Gatshmëve” dërgon sinjal uniteti për Ukrainën appeared first on Agjencia Telegrafike Shqiptare.

LONDËR, 6 janar /ATSH/- Rowan Atkinson feston sot ditëlindjen e tij të 71-të dhe me siguri ka patur shumë momente të jashtëzakonshme për të kujtuar nga jeta e tij, sipas “The Oldie”.

Nga një fëmijëri e qetë në Consett, County Durham, ai u shnderrua në një ikonë globale e komedisë i konsideruar gjithashtu, një thesar britanik.

Atkinson i ka dhënë botës personazhe të paharrueshëm si Mr. Bean, Johnny English dhe Blackadder – dhe ka luajtur në filma të suksesshëm si “Love Actually”, “Dead On Time” dhe “Wonka”.

Jeta e tij është plot surpriza dhe fakte të çuditshme që ndoshta mund të mos i dini.

Hidhini një vështrim jetës së jashtëzakonshme të Rowan Atkinson deri më tani:

Rowan ishte më i riu nga katër djemtë dhe u dërgua në dy shkolla me konvikt.

Fillimisht, ai ndoqi të njëjtën shkollë përgatitore si ish-kryeministri i Mbretërisë së Bashkuar Tony Blair, të quajtur “Durham Choristers”.

Rowan më pas ndoqi shkollën e mesme në shkollën “Saint Bees”, në West Cumbria, duke shkëlqyer në shkencë.

Komedia dhe aktrimi nuk ishin plani i tij

Ndërsa shumë fansa e njohin Rowan si njeriun që gjithmonë i bën njerëzit të qeshin, komedia dhe aktrimi nuk ishin plani i tij fillestar.

Duke ndjekur gjurmët e të atit, ylli i komedisë mori një diplomë Master në Inxhinieri Elektrike në Universitetin e Newcastle.

Më vonë ai nisi një doktoraturë në Universitetin e Oksfordit, ku zbuloi dashurinë e tij për aktrimin.

Pikërisht atëherë ai takoi shkrimtarin e “Katër Dasma dhe Një Funeral”, në të cilin Rowan bëri një dalje të shkurtër publike.

Ai gjithashtu bashkëshkroi librin “Blackadder”.

Rowan vuan nga belbëzimi

Rowan ka vuajtur nga belbëzimi për pjesën më të madhe të jetës së tij.

Ai gjithashtu shmang intervistat për shkak të kësaj.

Shërbimi Shëndetësor Kombëtar (NHS) sqaron se belbëzimi, është një problem i zakonshëm i të folurit në fëmijëri, i cili mund të vazhdojë në moshë madhore.

Varet nga secili individ dhe mund të përfshijë përsëritjen e tingujve ose rrokjeve të caktuara, ose zgjatjen e disa tingujve më shumë se të tjerët.

Rowan shpëtoi familjen e tij nga një aksident me avion

Në vitin 2001, Rowan arriti të shpëtojë jetën e bashkëshortes dhe dy fëmijëve të tij kur avioni tyre privat u rrëzua.

Bashkëshortja e tij në atë kohë, Sunetra Sastry, dhe fëmijët Ben dhe Lily ishin me pushime në Kenia.

Familja po udhëtonte nga Ukundu në Nairobi me avionin “Cessna 202”.

Megjithatë, fatkeqësia ndodhi 45 minuta pas fillimit të fluturimit, pasi piloti humbi ndjenjat.

Ndërsa familja luftonte për ta sjellë atë në vete, Rowan, i cili nuk kishte fluturuar kurrë më parë, u detyrua të merrte kontrollin e avionit.

Për fat të mirë të të gjithëve në bord, piloti rifitoi vetëdijen para se avioni të ulej.

Piloti mori kontrollin dhe e ktheu familjen në tokë shëndoshë e mirë.

Rowan ka lidhje me Familjen Mbretërore

Rowan është mik i Familjes Mbretërore Britanike dhe ka një lidhje të ngushtë me mbretin Charles.

Aktori ka marrë pjesë në disa evente private të organizuara nga monarku dhe ishte ndër të ftuarit ekskluzivë që morën pjesë në dasmën e tij me mbretëreshën Camilla.

Ai ishte gjithashtu pjesë e festimit të 60-vjetorit të lindjes së Mbretit Charles, i cili u organizua në rezidencën e tij private, Highgrove Gardens.

Rowan është ftuar gjithashtu në ngjarje të mëdha të organizuara nga Familja Mbretërore, duke përfshirë kurorëzimin e Mbretit Charles dhe dasmën mbretërore të Princit Harry dhe Meghan Markle.

Në vitin 2013, ai u emërua Komandant i Urdhrit të Perandorisë Britanike.

Rowan u bë baba në moshën 62-vjeçare

Rowan u bë baba i fëmijës së tij të tretë, një vajze, në moshën 62-vjeçare.

Partnerja aktore e legjendës së komedisë, Louise Ford, 45 vjeç, lindi vajzën e tyre Isla, në dhjetor 2017.

Aktori i “Johnny English” tashmë ka dy fëmijë të rritur, djalin Ben, 32 vjeç, dhe vajzën Lily, 30 vjeç, nga martesa e tij 24-vjeçare me grimeren e BBC-së, Sunetra Sastry.

Në vitin 2014, marrëdhënia e tij me Sunetra u përkeqësua pasi u raportua se ai kishte një partnere të re në jetën e tij.

Ajo ishte Louise – një aktore që Rowan e takoi në shfaqjen “Quartermaine’s Terms” në vitin 2013.

Ata u takuan gjatë xhirimeve të “West End”, një romancë që zgjati vetëm dy vjet.

Divorci i Rowan nga Sunetra u finalizua në vitin 2015. //a.i/

The post Rowan Atkinson, i njohur si Mr. Bean, mbush sot 71 vjeç appeared first on Agjencia Telegrafike Shqiptare.

PARIS, 6 janar /ATSH/- Kryeministri spanjoll, Pedro Sanchez tha sot se Shtetet e Bashkuara të Amerikës kishin krijuar një precedent të tmerrshëm dhe shumë të rrezikshëm në Venezuelë me bastisjen e tyre për të arrestuar presidentin Nicolas Maduro, sipas “Reuters”.

Sanchez shtoi se objektivi i vetëm i Uashingtonit dukej të ishte ndryshimi i qeverisë dhe përvetësimi i burimeve të energjisë.

“Spanja nuk e njohu kurrë qeverinë e Maduros sepse ajo shkeli rregullat, pasi zgjedhja e tij ishte e paligjshme dhe pikërisht për këtë arsye nuk mund ta njohë legjitimitetin e një veprimi ushtarak që është qartësisht i paligjshëm, që shkel ligjin ndërkombëtar dhe objektivi i vetëm i të cilit duket të jetë askush tjetër përveçse ndryshimi i qeverisë së një vendi tjetër për të sekuestruar burimet e tij natyrore”, u tha kryeministri spanjoll, gazetarëve në Paris.

Trump tha se Maduro organizoi transportimin e drogës në SHBA, një veprim i paligjshëm në pushtet për shkak të manipulimit të votave.

Maduro i ka mohuar këto pretendime dhe zyrtarët në Karakas kanë kërkuar lirimin e tij. //a.i/

The post PARIS – Sanchez: SHBA kërkon të përvetësojë burimet e Venezuelës appeared first on Agjencia Telegrafike Shqiptare.

KALIFORNI, 6 janar /ATSH/- Kongresmeni republikan nga Kalifornia, Doug LaMalfa ka vdekur papritur në moshën 65-vjeçare, sipas BBC.

“Shpreh hidhërimin tim të madh për humbjen e një anëtari të shkëlqyer”, tha presidenti amerikan, Donald Trump duke i bërë homazh, LaMalfa-s.

Shkaku i vdekjes së kongresmenit nuk u bë menjëherë i qartë. LaMalfa ishte u zgjodh anëtar i kongresit në vitin 2013.

Ai u përqendrua në çështjet e ujit dhe bujqësisë gjatë mandatit të tij.

Vdekja e tij ul numrin e kongresmenëve republikanë, në Dhomën e Përfaqësuesve të SHBA-së, pas dorëheqjes së ish-aleates së Trump, Marjorie Taylor Greene ditën e djeshme.

LaMalfa studioi në degën e biznesit të specializuar për Bujqësi në “California Polytechnic State University”.

Aktualisht ka katër vende të lira në Dhomën e Përfaqësuesve, me demokratët që janë të favorizuar për të zënë dy prej tyre – në zgjedhjet e jashtëzakonshme në Teksas në fund të janarit dhe në Nju Xhersi në pranverë.

Sipas ligjit të Kalifornisë, guvernatori Gavin Newsom do të ketë 14 ditë për të kërkuar zgjedhje të jashtëzakonshme për të zënë vendin e LaMalfa-s. //a.i/

The post SHBA – Kongresmeni amerikan Doug LaMalfa vdes papritur në moshën 65-vjeçare appeared first on Agjencia Telegrafike Shqiptare.

UASHINGTON, 6 janar /ATSH/- Presidenti i SHBA-së, Donald Trump tha se SHBA-ja mund të nisë një operacion tjetër ushtarak në Venezuelë nëse autoritetet atje ndalojnë së bashkëpunuari me Uashingtonin.

Ndërsa Nicolas Maduro kaloi natën e parë në qeli në një burg amerikan, presidenti Donald Trump paralajmëroi për një sulm të dytë ndaj Venezuelës, në rast se ajo nuk bashkëpunonte me Amerikën.

Gjatë një interviste për “NBC News”, Trump tha se nuk beson se kjo do të ndodhë dhe nga ana tjetër nuk hezitoi të vlerësonte ushtrinë amerikane për arrestimin e Nicolas Maduro.

“Shtetet e Bashkuara të Amerikës vërtetuan sërish se kemi ushtrinë më të fuqishme, më vdekjeprurëse, më të sofistikuar dhe më të frikshme në planetin Tokë. Askush nuk mund të na mposhtë. Askush nuk mund të bëjë atë që bëmë ne. Askush tjetër nuk i ka armët tona”, tha Trump.

Ku është Maduro?

Maduro dhe bashkëshortja e tij, Cilia Flores, kaluan natën e parë në paraburgim, në Qendrën Metropolitan të Paraburgimit në Bruklin.

Kur u paraqitën në gjykatë të hënën, ata nuk e pranuan fajësinë për akuzat kundër tyre.

Gjatë seancës dëgjimore, Maduro tha se e konsideronte veten një “rob lufte”.

Rasti Maduro dhe përplasjet e brendshme politike

Ndërkohë, sikur të mos mjaftonin akuzat zyrtare, një tjetër akuzë po përgatitet në Florida kundër tij.

Guvernatori Ron DeSantis tha sot në një konferencë se Florida po shqyrtonte mundësinë e ngritjes së një aktakuze kundër Maduros – bazuar në pretendimin se Maduro ka qenë i përfshirë në trafikun e drogës në Florida.

Senatorët amerikanë do të mblidhen nesër në një dhomë të mbyllur për të marrë të gjithë informacionin lidhur me operacionin që çoi në arrestimin e Maduros.

Do të jenë sekretari amerikan i Shtetit, Marco Rubio, sekretari amerikan i Mbrojtjes, Pete Hegseth, prokurorja e përgjithshme Pam Bondi, drejtori i CIA-s John Ratcliffe dhe gjenerali Dan Caine, kryetar i Shefave të Përbashkët të Shtabit, të cilët do të ndajnë informacione të detajuara me senatorët.

Takimi do të mbahet në një vend të mbyllur pa praninë e kamerave ose telefonave. Demokratët në veçanti kanë këmbëngulur të njihen menjëherë me detajet e operacionit.

Çfarë po ndodh në Karakas?

Ndërkohë, situata në Karakas thuhet se është e tensionuar, veçanërisht si rezultat i konfuzionit midis forcave të ndryshme qeveritare.

Dje në mbrëmje, ndërtesat qeveritare u evakuuan pasi u dëgjuan të shtëna me armë pranë pallatit presidencial.

Ndërsa Delcy Rodriguez u betua si presidente në detyrë, udhëheqësja e opozitës venezueliane, Maria Corina Machado njoftoi planet për kthimin e saj të menjëhershëm në atdheun e saj.

“3 janari do të mbahet mend në histori si dita kur drejtësia mundi tiranin. Është diçka e madhe jo vetëm për Venezuelën dhe të ardhmen e saj, por edhe për njerëzimin, lirinë dhe dinjitetin njerëzor”, tha ajo.

Planet për Venezuelën

Gjatë një interviste për NBC, Trump tha se para zgjedhjeve të ardhshme në Venezuelë, amerikanët duhet të kujdeseshin për rikthimin e shëndetit të vendit.

Sipas Trump, një grup zyrtarësh amerikanë do të përfshihen drejtpërdrejt në mbikëqyrjen e punëve të Venezuelës.

Edhe pse nuk e bëri të qartë se si do ta administrojë SHBA-ja Venezuelën, sekretari amerikan i Shtetit, Marco Rubio ka lënë të kuptohet se administrata do të fillojë me ekonominë dhe eksportet e naftës.

E megjithatë, kur u pyet se kush do të ishte përgjegjës, Trump u përgjigj: “Unë!”

Sipas “NBC News”, administrata Trump po vlerëson mbështetjen financiare që duhet t’u jepet kompanive të naftës për të rindërtuar infrastrukturën energjetike të vendit pas rënies së Nicolas Maduro. //a.i/

The post SHBA – Trump paralajmëron Venezuelën: Bashkëpunim ose sulm të dytë appeared first on Agjencia Telegrafike Shqiptare.

EMDEN, 6 janar /ATSH-DPA/- Një fregatë e Marinës Gjermane u nis sot për t’u bashkuar me forcat e NATO-s që monitorojnë kalimet strategjike në Detin e Veriut dhe Detin Baltik, si dhe në Atlantikun e Veriut, mes tensioneve në rritje midis SHBA-së dhe Danimarkës mbi kontrollin e Groenlandës.

“Luftanija u largua sot pasdite nga porti Wilhelmshaven i Detit të Veriut  me rreth 250 trupa në bord”, tha një zëdhënëse e marinës.

Anija do t’i bashkohet Grupit 1 Detar të Përhershëm të NATO-s (SNMG 1), një task forcë detare që përbëhet nga disa shkatërrues dhe fregata të vendosura nga aleatë të ndryshëm të NATO-s, si dhe një anije furnizimi.

“Misioni kryesor i fregatës në SNMG 1 do të jetë monitorimi dhe mbrojtja e rrugëve strategjike detare dhe infrastrukturës së rëndësishme në Atlantikun e Veriut, Detin e Veriut dhe Detin Baltik”, tha në një deklaratë Komandanti i Marinës, Wolfgang Eckmüller.

Anija u nis ndërsa tensionet po rriten për shkak të kërcënimeve të ripërtërira të SHBA-së për të aneksuar Groenlandën, një territor kryesisht autonom në Atlantikun e Veriut dhe ishulli më i madh në botë që është pjesë e Mbretërisë së Danimarkës.

Danimarka i ka kundërshtuar fuqimisht pretendimet e SHBA-se dhe u mbështet nga shtatë udhëheqës evropianë, të cilët shprehën solidaritet me Groenlandën.

“Groenlanda i përket popullit të saj. Është detyrë e Danimarkës dhe Groenlandës, dhe vetëm atyre, të vendosin për çështjet që kanë të bëjnë me Danimarkën dhe Groenlandën”, thuhej në deklaratën e nënshkruar nga udhëheqësit e Francës, Gjermanisë, Italisë, Polonisë, Spanjës, Britanisë së Madhe dhe Danimarkës.

Fundjavën e kaluar, Trump pretendoi edhe një herë se SHBA-ja ka nevojë për Groenlandën për arsye sigurie kombëtare, duke përmendur një prani në rritje të anijeve kineze dhe ruse në rajon. //a.i/

The post FOKUS – Fregata gjermane i bashkohet forcave të NATO-s mes tensioneve në rritje për aneksimin e Groenlandës appeared first on Agjencia Telegrafike Shqiptare.

BERLIN, 6 janar /ATSH-DPA/- Kancelari gjerman, Friedrich Merz e ka vënë në plan të parë rritjen ekonomike në vend, duke e renditur atë në krye të axhendës së tij për vitin 2026, dhe duke paralajmëruar se masat e marra deri më tani nuk kanë arritur ta përmirësojnë mjaftueshëm konkurrueshmërinë e Gjermanisë.

Në një letër dërguar anëtarëve të koalicionit të tij qeverisës, në fillim të vitit, Merz tha se situata ekonomike mbetej shumë kritike në disa fusha.

“Në vitin 2026, Gjermania do të duhet të përqendrohet në ndërmarrjen e veprimeve vendimtare politike dhe legjislative për të përmirësuar ndjeshëm kushtet për bizneset”, shkroi Merz, duke shtuar se vetëm atëherë ekonomia mund të rritej dhe të dilte nga kriza.

Gjithashtu, në letër Merz rikonfirmon mbështetjen e vazhdueshme të Gjermanisë për Ukrainën, duke thënë se vendimi për të përdorur asetet ruse të ngrira në Bashkimin Evropian kishte krijuar bazën financiare për të mbështetur mbrojtjen e Kievit kundër Rusisë në planin afatgjatë.

“Rusia nuk duhet të ketë dyshime për vendosmërinë tonë”, shkroi kancelari.

Në të njëjtën kohë, Merz theksoi se qeveria gjermane do të vazhdonte përpjekjet për një armëpushim që ruante sovranitetin e Ukrainës.

“Puna jonë diplomatike po kryhet në kushte të vështira”, tha ai, duke vënë në dukje gatishmërinë e kufizuar të Rusisë për të negociuar, përpjekjet e presidentit ukrainas Volodymyr Zelensky për të ruajtur unitetin në vend dhe atë që ai e përshkroi si ndryshime të thella në bashkëpunimin transatlantik.

Në përfundim, Merz u bëri thirrje ligjvënësve të rivendosnin besimin në politikë duke ofruar zgjidhje për problemet konkrete.

“Kështu do ta bindim edhe shumicën dërrmuese të popullsisë sonë për vlerat e demokracisë sonë dhe sistemit tonë ekonomik të bazuar në treg”, shkroi ai. //a.i/

The post BERLIN – Merz rikonfirmon mbështetjen për Ukrainën appeared first on Agjencia Telegrafike Shqiptare.

PARIS, 6 janar /ATSH-DPA/- Presidenti ukrainas Volodymyr Zelensky njoftoi se do të takohet sot me përfaqësuesit amerikanë në Paris, si pjesë e bisedimeve të nivelit të lartë me aleatët perëndimorë mbi garancitë e sigurisë për Ukrainën.

Duke shkruar në mediet sociale pas mbërritjes në Paris, Zelensky tha se vizita e tij do të përfshijë diskutime me udhëheqësit e Koalicionit të të Gatshmëve, bisedime me sekretarin e Përgjithshëm të NATO-s, Mark Rutte dhe një takim me anëtarët e ekipit negociator të SHBA-së.

Aleatët e Ukrainës po mblidhen në kryeqytetin francez për të diskutuar me SHBA-në mënyrat se si të mbështesin një armëpushim të mundshëm ose një zgjidhje paqeje në luftën e nisur nga Rusia gati katër vjet më parë.

Në takim pritet të marrin pjesë përfaqësues nga rreth 35 vende, përfshirë kancelarin gjerman Friedrich Merz.

“Kievi po mbështetet në hapat që mund të garantojnë siguri të vërtetë për popullin ukrainas”, shkroi Zelensky në X.

Ai u bëri thirrje sërish aleatëve të forcojnë mbrojtjen ajrore të Ukrainës, duke vënë në dukje se Rusia nuk i kishte ndaluar sulmet e saj ndaj civilëve dhe infrastrukturës së rëndësishme pavarësisht aktivitetit të madh diplomatik në javët e fundit.

Zelensky tha se e kishte diskutuar tashmë çështjen me presidentin francez Emmanuel Macron.

“Ky do të jetë takimi më përfaqësues i Koalicionit të të Gatshmëve deri më sot, ku do të marrin pjesë udhëheqës kombëtarë, krerët e organizatave ndërkombëtare, ministrat dhe ambasadorët”, tha ai.

“Ne po përgatisim hapa të rëndësishëm politikë”, shkroi Zelensky.

I dërguari special i SHBA-së, Steve Witkoff, dhe Jared Kushner, dhëndri i presidentit të SHBA-së, Donald Trump do të marrin pjesë në emër të Uashingtonit.

Koalicioni i të Gatshmëve është një grup vendesh perëndimore aleate me Kievin që po punojnë për t’i dhënë fund konfliktit.

Bisedimet e tyre pritet të përqendrohen në krijimin e një force shumëkombëshe për të siguruar paqen midis Rusisë dhe Ukrainës, të cilat kanë luftuar që kur Moska nisi një pushtim të plotë në shkurt 2022.

Diskutimet pritet gjithashtu të përqendrohen në mbështetjen për ushtrinë ukrainase, bashkëpunimin afatgjatë me Kievin për çështjet e mbrojtjes dhe mbështetjen për vendin në rast të sulmeve të reja nga fqinji i saj.

Macron ka planifikuar një konferencë për shtyp pas takimit. //a.i/

The post PARIS – Ukraina dhe aleatët takohen me të dërguarit e SHBA-së në një përpjekje të re diplomatike appeared first on Agjencia Telegrafike Shqiptare.

DUBLIN, 6 janar /ATSH/- Dëshironi të shpëtoni nga i ftohti këtë janar? Atëherë hidhini një sy këtij vendi të bukur mesdhetar me diell dhe paketa pushimesh njëjavore duke filluar nga 685 euro, sipas të përditshmes irlandeze “The Irish Sun”.

Shumë pushues irlandezë po dynden në Tiranë, kryeqytetin shumëngjyrësh dhe historik të Shqipërisë, i njohur për temperaturat e ngrohta gjatë dimrit, jetën e natës dhe çmimet e shkëlqyera.

Tirana është e njohur për jetën e natës dhe pamjet historike. Turistët mund të vizitojnë fshatrat e bukura të Shqipërisë.

Tirana gëzon temperatura mesatare prej 14 deri në 16 gradë Celsius në dhjetor dhe janar.

Shtetasit irlandezë mund të fluturojnë nga Dublini në Tiranë për vetëm 39 euro me linjën ajrore “Ryanair”.

Aeroporti i Tiranës është vetëm 20 minuta larg nga qendra e qytetit me makinë ose taksi.

Një numër hotelesh gjithashtu ofrojnë paketa gjithëpërfshirëse.

Vizitorët mund të kalojnë një javë të plotë në “Mosaic Home” për vetëm 685 euro, duke përfshirë fluturimet.

Tirana ofron temperatura mesatare prej 14 deri në 16 gradë Celsius në dhjetor dhe janar, me mot të thatë gjatë gjithë vitit – dhe qyteti ofron shumë mundësi aktivitetesh.

Vizitoni Sheshin Skënderbej në Tiranë, ku mund të eksploroni arkitekturën madhështore, ndërtesat shumëngjyrëshe dhe “zemrën” e gjallë të qytetit.

Gjithashtu, mund të merrni teleferikun në malin Dajti për të shijuar pamjen spektakolare të të gjithë Tiranës dhe maleve përreth.

Nëse dëshironi të dilni jashtë kryeqytetit, vizitoni plazhet e Durrësit dhe Golemit, si vendpushime ideale për t’u relaksuar në ajrin e pastër të detit dhe diellin dimëror.

Adhuruesit e historisë mund të vizitojnë Kalanë e Krujës, një nga monumentet më të famshme të Shqipërisë, me pamje gjithëpërfshirëse të fshatit.

Gjithashtu, adhuruesit e kuzhinës do të kenë mundësinë të provojnë dhe shijojnë ushqime tradicionale vendase.

Vizitoni “Restorantin Shendeverë” dhe shijoni disa gatime të shkëlqyera tradicionale shqiptare, të tilla si byrek ose tavë kosi.

Byreku shqiptar shpesh shitet si ushqim rruge dhe konsumohet i ngrohtë.

Brumi i kripur, i bërë me shtresa të holla, mbushet me përbërës të tillë si, spinaq dhe djathë në stilin e rikotës, mish i grirë dhe qepë, ose presh.

Tava e kosit është një pjatë tradicionale e Shqipërisë – qengj i pjekur në ​​kos të athët dhe vezë.

Ju mund të vizitoni “Restorantin Rooms”, i cili është i famshëm për kuzhinën mesdhetare dhe pjatat elegante.

Dhe sigurisht, ju mund të përfitoni nga çmimet e lira të pijeve.

“Mi-to Culture Bar Tirana” – krenohet me vlerësimet e shkëlqyera me pesë yje dhe është i njohur për pijet dhe koktejet e tij të shkëlqyera.

Nëse jeni duke kërkuar një vend premium me pamje të mrekullueshme, vizitoni “Sky Bar” – me pamje nga qyteti.

Dhe nëse ju mungon vërtet shtëpia, vizitoni “Meduza’s Irish Pub” për të shijuar një krikëll birrë.

Me fluturime të lira, pamje të mrekullueshme dhe mot të ngrohtë dimëror, Tirana është vendi ideal për të vizituar këtë janar nëse doni të shpëtoni nga i ftohti. //a.i/

https://www.thesun.ie/travel/16313406/winter-sun-capital-heat-historic-sights-albania-ryanair-euro/

The post “Irish Sun”: Tirana, arratisja dimërore e irlandezëve appeared first on Agjencia Telegrafike Shqiptare.

NJU JORK, 5 janar /ATSH-DPA/- Venezuela, Rusia dhe Kina i kanë kërkuar Shteteve të Bashkuara të Amerikës të lirojnë udhëheqësin venezuelian Nicolás Maduro dhe bashkëshorten e tij, Cilia Flores.

Pas sulmit të SHBA-së ndaj vendit të Amerikës së Jugut gjatë fundjavës, ambasadorët e Venezuelës, Rusisë dhe Kinës në OKB kritikuan atë që e quajtën veprim agresiv të SHBA-së, të cilin e klasifikuan si veprim kundër ligjit ndërkombëtar.

Në një seancë të posaçme të Këshillit të Sigurimit të OKB-së sot në Nju Jork, Rusia dhe Kina dënuan fuqimisht sulmin e SHBA-së ndaj Venezuelës në fundjavë.

Rusia e përshkroi veprimin e SHBA-së si një paralajmërues të një kthimi në epokën e paligjshmërisë dhe dominimit të SHBA-së me forcë, kaosit dhe mungesës së ligjit, i cili vazhdon të prekë dhjetëra shtete në rajone të ndryshme të botës.

“Asnjë vend nuk mund të veprojë si policia e botës, as të pretendojë të jetë gjykatësi ndërkombëtar”, tha Kina.

Si Kina ashtu edhe Rusia janë anëtarë të përhershëm të Këshillit të Sigurimit të OKB-së.

Rusia kritikoi sulmin e SHBA-së – e cila po vepronte si një gjykatëse globale e vetëshpallur për motive ekonomike dhe politike dhe për të shfaqur fuqinë e saj.

“Nuk ka asnjë justifikim për këtë”, tha përfaqësuesja e Rusise në OKB, duke shtuar se heshtja në këshill do të përbënte një erozion të rendit ndërkombëtar.

Përfaqësuesi kinez theksoi se mjetet ushtarake nuk ishin zgjidhje për problemet. Sipas tij, përdorimi arbitrar i forcës do të çonte vetëm në një krizë më të madhe. //a.i/

The post NJU JORK – Venezuela, Rusia dhe Kina i kërkojnë SHBA-së lirimin e Maduros appeared first on Agjencia Telegrafike Shqiptare.

NJU JORK, 5 janar /ATSH/- Shtetet e Bashkuara të Amerikës kanë hedhur poshtë pretendimet se operacioni në Venezuelë përbën një akt lufte ose pushtim, duke e përshkruar atë si një operacion policor për të zbatuar akuzat penale kundër presidentit Nicolas Maduro, sipas “CBS News”.

Gjatë një takimi të Këshillit të Sigurimit të Kombeve të Bashkuara për ngjarjen në Venezuelë, përfaqësuesi i përhershëm i Shteteve të Bashkuara të Amerikës, Mike Waltz, deklaroi se SHBA-ja nuk ishte në luftë me Venezuelën apo popullin e saj.

“Siç e ka theksuar sekretari amerikan i shtetit, Marco Rubio, nuk ka luftë kundër Venezuelës apo popullit të saj. Ne nuk po pushtojmë Venezuelën, ky është një operacion policor”, tha Waltz.

“Në bazë të akuzave legjitime që kanë qenë në fuqi për disa dekada, Shtetet e Bashkuara të Amerikës kanë arrestuar një trafikant droge – i cili tani do të gjykohet në SHBA, në përputhje me shtetin e së drejtës, për krime të kryera kundër popullit tonë gjatë 15 viteve të fundit”, tha Waltz në fjalimin e tij para Këshillit të Sigurimit.

Ai e krahasoi operacionin me ndërhyrjen e SHBA-së në vitin 1989 kundër ish-diktatorit panamez Manuel Noriega, duke kujtuar se ai u arrestua, u padit, u dënua nga një gjykatë amerikane dhe vuajti dënimin e tij në SHBA dhe më pas në Panama.

Deklarata e Waltz vjen mes reagimeve të forta ndërkombëtare ndaj arrestimit të presidentit venezuelian dhe debatit të nxehtë në Këshillin e Sigurimit mbi ndikimin e këtij veprimi në paqen dhe sigurinë ndërkombëtare. //a.i/

The post NJU JORK – Ambasadori i SHBA-së në OKB: Nuk po pushtojmë Venezuelën appeared first on Agjencia Telegrafike Shqiptare.

NJU JORK, 5 janar /ATSH/- Këshilli i Sigurimit i Kombeve të Bashkuara zhvilloi sot një takim urgjent për të diskutuar operacionin e SHBA-së në Venezuelë dhe arrestimin e presidentit Nicolas Maduro, një ngjarje që ka shkaktuar reagime të forta në rajon dhe më gjerë, sipas “The Hill”.

Takimi u zhvillua nën rendin e ditës “Kërcënimet për paqen dhe sigurinë ndërkombëtare”, të thirrur me kërkesë të Kolumbisë, të mbështetur nga Kina dhe Rusia.

Në emër të sekretarit të përgjithshëm të OKB-së, Antonio Guterres, deklarata zyrtare u citua nga nënsekretarja e përgjithshme për Çështjet Politike dhe Ndërtimin e Paqes, Rosemary DiCarlo.

Në deklaratë, Guterres e përshkruan operacionin e SHBA-së si një precedent të rrezikshëm, duke paralajmëruar për pasoja që mund të ndikojnë në rendin ndërkombëtar dhe stabilitetin global.

“Jam thellësisht i shqetësuar për potencialin e përshkallëzimit të paqëndrueshmërisë në vend, ndikimin e mundshëm në rajon dhe precedentin e rrezikshëm – për mënyrën se si zhvillohen marrëdhëniet midis shteteve”, tha Guterres në një deklaratë.

Sipas OKB-së, zhvillimet e fundit rrezikojnë të përshkallëzojnë tensionet në Amerikën Latine dhe të minojnë parimet e sovranitetit shtetëror dhe të drejtës ndërkombëtare.

Mbledhja e Këshillit të Sigurimit pritet të vazhdojë me diskutime midis anëtarëve të përhershëm dhe jo të përhershëm, ndërsa unioni ndërkombëtar po ndjek me shqetësim pasojat politike dhe diplomatike të arrestimit të presidentit venezuelian.

Operacioni amerikan në Venezuelë dhe arrestimi i Nicolas Maduros konsiderohen ndër zhvillimet më serioze gjeopolitike të kohëve të fundit, duke rihapur debatin mbi ndërhyrjet ndërkombëtare, ekuilibrin e fuqive të mëdha dhe rolin e OKB-së në garantimin e paqes dhe sigurisë globale. //a.i./

The post NJU JORK – Këshilli i Sigurimit i OKB-së takim urgjent, Guterres: Precedent i rrezikshëm appeared first on Agjencia Telegrafike Shqiptare.

BRUKSEL, 5 janar /ATSH-DPA/-  Komisioni Evropian ka paralajmëruar se interesat e sigurisë nuk duhet të përdoren kurrë si pretekst për aneksimin e Groenlandës nga SHBA-ja.

“Ne do të donim t’u kujtonim të gjithëve se Groenlanda është një aleat i SHBA-së dhe gjithashtu nën mbrojtjen e aleancës së NATO-s”, tha sot një zëdhënëse në Bruksel.

Dje në mbrëmje, presidenti i SHBA-së Donald Trump shprehu sërish interesin e tij për aneksimin e ishullit të Atlantikut të Veriut, duke thënë se Shtetet e Bashkuara të Amerikës kishin evojë për Groenlandën për arsye sigurie kombëtare.

Ai tha se ishulli kishte rëndësi të madhe strategjike dhe aktualisht ishte i rrethuar nga anije ruse dhe kineze dhe se Danimarka nuk mund të garantonte sigurinë atje.

Ishulli i Groenlandës është pjesë e mbretërisë së Danimarkës, por është kryesisht autonom dhe nuk është anëtar i BE-së.

Ai është strategjikisht interesant për shkak të pasurisë së tij të lëndëve të para dhe si bazë për kontrollin ushtarak të Arktikut.

Për më tepër, rritja e ndryshimeve klimatike po rezulton në rrugë më të shkurtra detare, të paktën në verë.

Katër të pestat e ishullit Arktik janë të mbuluara nga akulli dhe janë gjashtë herë më të mëdha se Gjermania, por kanë një popullsi prej më pak se 57 000 banorësh.

“BE qëndron në solidaritet me Danimarkën dhe Groenlandën. Groenlanda është një territor autonom brenda mbretërisë së Danimarkës dhe çdo ndryshim në statusin e saj është vetëm çështje e groenlandezëve dhe danezëve, tha një zëdhënëse e shefes së politikës së jashtme të BE-së, Kaja Kallas. //a.i/

The post BRUKSEL – KE: Interesat e sigurisë së SHBA-së nuk duhet të përdoren kurrë si pretekst për aneksimin e Grenlandës appeared first on Agjencia Telegrafike Shqiptare.

BRUKSEL, 5 janar /ATSH-DPA/- Rastet e Venezuelës dhe Groenlandës nuk janë në asnjë mënyrë të krahasueshme, paralajmëroi Bashkimi Evropian, duke anashkaluar një vlerësim të qartë të operacionit të SHBA-së për të rrëzuar udhëheqësin venezuelian Nicolás Maduro.

“Ne do të donim t’u kujtonim të gjithëve se Groenlanda është një aleat i SHBA-së dhe gjithashtu nën mbrojtjen e aleancës së NATO-s”, tha sot një zëdhënëse në Bruksel.

“Interesat e sigurisë nuk duhet të përdoren kurrë si pretekst”, shtoi ajo.

Dje në mbrëmje, presidenti i SHBA-së Donald Trump shprehu sërish interesin e tij për aneksimin e ishullit të Atlantikut të Veriut, duke thënë se Shtetet e Bashkuara të Amerikës kishin evojë për Groenlandën për arsye sigurie kombëtare.

Ai tha se ishulli kishte rëndësi të madhe strategjike dhe aktualisht ishte i rrethuar nga anije ruse dhe kineze dhe se Danimarka nuk mund të garantonte sigurinë atje.

Këto ishin arsyet e përdorura nga SHBA-ja për të justifikuar ndërhyrjen e saj ushtarake në Venezuelë dhe arrestimin e Maduros.

Presidenti i rrëzuar, i cili ka qenë në detyrë që nga viti 2013, akuzohet në SHBA për narko-terrorizëm.

Hetuesit besojnë se ai e përdori detyrën e tij për të lehtësuar kontrabandën e mijëra tonë kokainë në Shtetet e Bashkuara të Amerikës.

Komisioni Evropian deri më tani ka shmangur një vlerësim të qartë të veprimit të fundit të SHBA-së për të arrestuar Maduron dhe në vend të kësaj po e paraqet situatën si një “mundësi” për vendin e Amerikës së Jugut.

“Këto ngjarje krijojnë mundësinë për një tranzicion demokratik në Venezuelë dhe për një tranzicion të udhëhequr nga populli venezuelian”, tha një zëdhënëse në Bruksel.

SHBA-ja nisi të shtunën në mëngjes, sulmet ajrore mbi objektivat në Venezuelë dhe arrestoi Maduro dhe bashkëshorten e tij Cilia Flores.

Ndërkohë, një zëdhënëse e Kaja Kallas iu referua një deklarate të lëshuar të dielën, e cila u mbështet nga të gjitha shtetet e BE-së përveç Hungarisë.

Ajo thekson se parimet e së drejtës ndërkombëtare dhe Karta e Kombeve të Bashkuara duhet të mbështeten në të gjitha rrethanat.

Kjo mund të shihet si kritikë ndaj veprimeve të SHBA-së në Venezuelë, veçanërisht pasi deklarata thotë se SHBA-ja dhe të gjithë anëtarët e tjerë të Këshillit të Sigurimit të OKB-së kanë një përgjegjësi të veçantë për të mbështetur këto parime si shtylla të arkitekturës ndërkombëtare të sigurisë. //a.i/

The post BRUKSEL – BE: Rastet e Venezuelës dhe Groenlandës nuk janë të krahasueshme appeared first on Agjencia Telegrafike Shqiptare.

ZYRIH, 5 janar /ATSH/- Zvicra ka ngrirë asetet e mbajtura në vend nga Nicolas Maduro i Venezuelës dhe bashkëpunëtorët e tij, tha sot qeveria zvicerane, pas arrestimit të tij nga forcat amerikane në Karakas dhe transferimit në Shtetet e Bashkuara të Amerikës, sipas “Reuters”.

Një zëdhënës i Ministrisë së Jashtme Zvicerane tha se urdhri prek 37 persona.

Zëdhënësi tha se ministria nuk mund të jepte asnjë detaj mbi vlerën e aseteve në fjalë.

“Masa, që hyn në fuqi menjëherë dhe është e vlefshme për katër vjet, synon të parandalojë një rrjedhje të aseteve potencialisht të paligjshme dhe i shtohet sanksioneve ekzistuese të vendosura ndaj Venezuelës që nga viti 2018”, tha qeveria në një deklaratë.

Ngrirja e aseteve nuk prek anëtarët e qeverisë aktuale të Venezuelës dhe Zvicra tha se do të kërkonte të kthente çdo fond që është fituar në mënyrë të paligjshme.

Qeveria tha se situata në Venezuelë ishte e paqëndrueshme, me rezultate të ndryshme të mundshme në ditët dhe javët në vijim.

Ajo tha se po e ndiqte situatën nga afër dhe bëri thirrje për shmangie të përshkallëzimit dhe vetëpërmbajtje, ndërsa gjithashtu ofroi shërbimet e saj të mira për të gjetur një zgjidhje paqësore.

“Këshilli Federal kërkon të sigurojë që çdo pasuri e fituar në mënyrë të paligjshme të mos transferohet jashtë Zvicrës në situatën aktuale”, tha qeveria.

“Ngrirja e pasurisë ishte një masë paraprake dhe u zbatua ndaj Maduros dhe bashkëpunëtorëve të tij si persona të huaj të ekspozuar politikisht”, tha ajo. //a.i/

The post FOKUS – Zvicra ngrin asetet e lidhura me Maduron pas arrestimit nga SHBA-ja appeared first on Agjencia Telegrafike Shqiptare.

TEHERAN, 5 janar /ATSH/- Demonstratat dhe përleshjet me thirrjet “Vdekje Khamenei”, kanë shpërthyer në Teheran dhe qytete të tjera, sipas NCRI.

Mbrëmjen e djeshme, ditën e tetë të kryengritjes mbarëkombëtare, Teherani dhe shumë qytete të tjera u përfshinë nga demonstrata dhe përleshje intensive midis të rinjve rebelë dhe forcave shtypëse.

Kryengritjet, tani janë përhapur në 107 qytete në të gjithë Iranin, në tetë ditët e fundit.

Pavarësisht një gatishmërie të lartë nga forcat ushtarake, të sigurisë shtetërore dhe të inteligjencës në Teheran, banorët protestuan në zona të ndryshme të qytetit.

Dje në mëngjes, forcat e sigurisë përdorën gaz lotsjellës dhe armë me fishekë kundër njerëzve që protestonin në rrugët Saadi dhe Hafez dhe përreth kalimeve Alaeddin dhe Charsou.

Të rinjtë sfidues i rezistuan bastisjes duke i vënë flakën kazanëve të plehrave dhe duke krijuar bllokada rrugore.

Në rrugën Molavi, agjentët e regjimit hapën zjarr ndaj shitësve të perdeve që protestonin.

Përleshjet midis studentëve dhe forcave shtypëse vazhduan deri vonë natën. Studentët në Tarbiat Modares në Teheran dhe Birjand u zotuan të vazhdonin kryengritjen.

Në Nurabad Mamasani (provinca Fars), demonstratat u përshkallëzuan në konfrontime të armatosura me agjentët e regjimit, me përleshje të vazhdueshme në rrugë.

Në Isfahan, të rinj sfidues u përleshën me forcat shtypëse në Si-o-Se-Pol, Urën Khaju dhe Chaharbagh, duke i vënë flakën automjeteve të tyre.

Në Fuladshahr, Isfahan, të rinj të guximshëm u përballën me forcat policore që qëllonin mbi protestuesit.

Regjimi, nga frika e përhapjes së kryengritjes studentore, mbylli Universitetin e Teknologjisë të Isfahanit, për nëntë ditë.

Dje në mbrëmje, forcat shtypëse sulmuan gjithashtu Spitalin Khomeini në Ilam, ku ishin shtruar të plagosurit e përleshjes së fundit.

Në Mehdi Shahr, provinca Semnan, u mbajt një protestë me thirrjet “Vdekje diktatorit”.

Dje pasdite, protestuesit bllokuan rrugën Ahvaz-Andimeshk në Abdolkhan, Ahvaz, duke i vënë flakën gomave.

Në Qorveh, provinca e Kurdistanit, të rinjtë protestues u përleshën me policinë.

Në Mashhad (Ahmadabad dhe Shandiz), banorët, të udhëhequr nga gra heroike, u përleshën me forcat e sigurisë ndërsa brohorisnin “Vdekje diktatorit”.

Në Sari, Mashkan-e Niriz, Yazd, Lahijan, Sarableh, Hamedan, Bushehr, Yasuj, Zahedan, Qazvin, Dorud, Khorramabad dhe Dezful (Abdol Khan), të rinjtë rebelë morën kontrollin e rrugëve duke vënë zjarre, duke bllokuar rrugët dhe duke u përleshur me mercenarët e regjimit. //a.i/.

The post IRAN – Kryengritjet zgjerohen në 107 qytete në mbarë vendin appeared first on Agjencia Telegrafike Shqiptare.

Rreth 30,000 familje në Berlin mbetën pa energji elektrike dhe ngrohje për të tretën ditë me radhë, pasi një sulm i fundjavës në rrjetin elektrik ndërpreu furnizimin me energji elektrike në jugperëndim të kryeqytetit gjerman të mbuluar nga bora.

Rreth 45,000 familje dhe mbi 2,200 biznese në lagjet Nikolassee, Zehlendorf, Wannsee dhe Lichterfelde të qytetit u ndërprenë herët të shtunën, pasi kabllot që të çojnë në një termocentral u vunë në flakë nga ajo që autoritetet e Berlinit e quajnë një grup militantësh të krahut të majtë.

Rreth 15,000 familjeve dhe rreth 500 bizneseve u është rikthyer energjia elektrike që atëherë, por operatori Stromnetz Berlin tha se mund të duhet deri të enjten që të gjithë të rikthehen në rrjet, pasi punimet e riparimit janë komplekse.

Duke folur në një program mëngjesi të transmetuesit publik ZDF të hënën, kryetari i bashkisë së Berlinit, Kai Wegner, tha se incidenti tregoi se infrastruktura mbetet e ndjeshme ndaj sulmeve.

Ndërsa vetëm një pjesë e vogël e rrjetit elektrik funksionon mbi tokë, masat mbrojtëse duhet të shtohen, tha Wegner, duke kërkuar më shumë kamera mbikëqyrjeje dhe personel sigurie për të monitoruar rrjetin.

Me temperaturat nën 0 gradë Celsius, disa shkolla dhe kopshte në zonë mbetën të mbyllura në atë që është dita e parë e shkollës pas festave të Krishtlindjeve.

Policia, zjarrfikësit dhe ushtria janë vendosur në zonat e prekura për të ndihmuar ata që nuk ishin në gjendje të strehoheshin te familja ose miqtë në pjesë të tjera të Berlinit.

Spitalet ishin në gjendje të vazhdonin operacionet falë gjeneratorëve të emergjencës dhe që atëherë kanë parë energjinë e tyre të rikthyer, por shumë shtëpi kujdesi mbeten të prekura, me organizatat e ndihmës dhe brigadën e zjarrfikësve që po ngrenë strehimore për ata që kanë nevojë.

Në një letër përgjegjësie të postuar në internet të dielën, ekstremisti i krahut të majtë Vulkangruppe (Grupi i Vullkanit) thotë se “sabotoi me sukses” një termocentral gazi në Lichterfelde.

Grupi tha se qëllimi i tij kryesor ishte të shënjestronte industrinë e karburanteve fosile, duke vënë në dukje se veprimi “rezultoi në ndërprerje të energjisë elektrike në lagjet më të pasura të Wannsee, Zehlendorf dhe Nikolassee”.

“U kërkojmë ndjesë banorëve më pak të pasur të Berlinit jugperëndimor”, tha ai.

Autoritetet e Berlinit thanë të dielën se e konsiderojnë letrën autentike, me kryebashkiakun Wegner që e përshkroi sulmin si një akt terrorizmi.

Por autoritetet federale kërkuan kujdes të hënën, me Ministrinë e Brendshme që tha se nuk ishte ende e qartë se kush qëndronte pas sulmit.

Një motiv ekstremist i krahut të majtë dukej “i dukshëm”, por hetimet janë ende në vazhdim, tha një zëdhënëse, duke shtuar se agjencia e inteligjencës së brendshme të Gjermanisë po shqyrtonte ende letrën e postuar në internet.

The post SHBA – Maduro nuk pranon fajësinë në gjykatën e Nju Jorkut appeared first on Agjencia Telegrafike Shqiptare.

BERLIN, 5 janar /ATSH-DPA/- Qeveria gjermane kundërshtoi sot deklaratat e fundit të presidentit të SHBA-së Donald Trump, të cilat sugjeronin se ai do të vazhdonte të ndiqte qëllimin për të marrë kontrollin e Groenlandës.

“Groenlanda është një territor i administruar në mënyrë autonome që i përket Danimarkës”, tha zëvendëszëdhënësi i qeverisë Sebastian Hille, në Berlin.

“Kufijtë nuk duhet të zhvendosen me forcë dhe territoret nuk duhet të aneksohen me forcë”, theksoi ai.

Trump ka këmbëngulur vazhdimisht që SHBA-ja duhet të marrë kontrollin e Groenlandës, një territor kryesisht autonom danez i vendosur midis oqeaneve Arktik dhe Atlantik, për hir të sigurisë kombëtare, një pretendim që ai e përsëriti në fundjavë.

Duke folur me gazetarët në bordin e avionit presidencial “Air Force One”, ai pretendoi se Groenlanda ishte mbuluar me anije ruse dhe kineze kudo.

Danimarka i ka hedhur poshtë pretendimet e Trump, së bashku me fqinjët nordikë Suedinë, Finlandën dhe Norvegjinë, pasi ndërhyrja e fundit e SHBA-së në Venezuelë ka ngjallur shqetësime në lidhje me lëvizjet e ardhshme të administratës Trump.

Zëdhënësi i qeverisë gjermane Hille theksoi se Gjermania i përmbahej parimeve të së drejtës ndërkombëtare, siç përcaktohen në Kartën e OKB-së.

Ai tha se Berlini ishte në konsultim të ngushtë me Danimarkën dhe partnerët e tjerë evropianë për të gjitha çështjet që lidhen me Groenlandën.

“Ne jemi të qartë në komunikimin tonë me SHBA-në në këtë drejtim”, shtoi ai.

Neni 2 i Kartës së OKB-së thotë se të gjithë anëtarët duhet të përmbahen në marrëdhëniet e tyre ndërkombëtare nga kërcënimi ose përdorimi i forcës kundër integritetit territorial ose pavarësisë politike të çdo shteti, ose të çdo mënyre tjetër që nuk përputhet me Qëllimet e Kombeve të Bashkuara.

Më herët, ministri i Jashtëm gjerman, gjatë një vizite në Lituani, shprehu gjithashtu mbështetjen e tij të plotë për Danimarkën.

“Groenlanda, ashtu si Ishujt Faroe, është pjesë e mbretërisë daneze”, theksoi ministri i Jashtëm gjerman, Johann Wadephul në një konferencë shtypi me homologun e tij lituanez Kęstutis Budrys në Vilnius.

“Dhe meqenëse Danimarka është anëtare e NATO-s, Groenlanda në parim do të duhet të mbrohet edhe nga NATO”, shtoi Wadephul.

“Nëse ka kërkesa të mëtejshme për të forcuar përpjekjet mbrojtëse në lidhje me Groenlandën, atëherë do të duhet ta diskutojmë këtë së bashku brenda kornizës së aleancës”, tha Wadephul.

“Të gjitha çështjet që kanë të bëjnë me Groenlandën duhet të diskutohen vetëm brenda kornizës së së drejtës ndërkombëtare dhe në frymën e aleatëve – shumë qartë, shumë dallueshëm dhe pa asnjë motiv të fshehtë”, tha ministri i Jashtëm lituanez, Budrys.//a.i/

The post BERLIN – Gjermania kundërshton planin e Trump për të marrë kontrollin e Groenlandës appeared first on Agjencia Telegrafike Shqiptare.

Shqetësimi për Groenlandën po rritet në Danimarkë pas deklaratave të përsëritura të presidentit amerikan, Donald Trump për të marrë kontrollin e ishullit Arktik.

“Arrestimi i presidentit venezuelan, Nicolás Maduro nga SHBA-ja të shtunën – sugjeron se Uashingtoni gjithashtu, mund të jetë duke përgatitur plane të tjera tronditëse – duke përdorur kërcënimin e ndërhyrjes për të imponuar politikën e jashtme”, thanë vëzhguesit.

“Sidoqoftë, amerikanët po tregojnë se janë të përgatitur të shkojnë larg dhe se nuk u interesojnë vendet e tjera”, tha studiuesi i Arktikut, Jon Rahbek-Clemmensen nga “Akademia Daneze e Mbrojtjes” për stacionin radiofonik DR.

“Ata e konsiderojnë kontinentin amerikan si brendësinë e tyre. Ky është një lajm i keq për Danimarkën dhe Groenlandën”, tha ai.

Groenlanda është një territor i administruar autonomisht në Arktik dhe i përket Mbretërisë së Danimarkës.

Megjithatë, dje në mbrëmje, Trump u tha sërish gazetarëve se SHBA-ja kishte nevojë për Groenlandën nga pikëpamja e sigurisë kombëtare.

“Ishulli ka rëndësi të madhe strategjike dhe Danimarka nuk mund të garantojë sigurinë atje”, tha Trump.

Kryeministrja daneze, Mette Frederiksen e hodhi poshtë pretendimin e presidentit amerikan për pronësinë e territorit.

Shumë krerë qeverish nga vendet e BE-së, si dhe kryeministri britanik Keir Starmer, mbështetën deklaratën e Frederiksen.

“Mjaft tani”, tha kryeministri i Groenlandës, Jens Frederik Nielsen, në përgjigje të deklaratës së fundit të Trump, duke postuar në Facebook “Mjaft me fantazitë e aneksimit”.

Trump pretendoi pronësinë e Groenlandës gjatë mandatit të tij të parë.

Në atë kohë, shumë drejtues në Danimarkë e hodhën poshtë këtë duke e konsideruar si shaka.

Para mandatit të tij të dytë, Trump e përmendi sërish aneksimin e Groenlandës. Që atëherë, ai ka kërcënuar vazhdimisht të marrë ishullin.//a.i/

The post FOKUS – Danimarka dhe Groenlanda të shqetësuara për deklaratën e Trump për aneksimin e ishullit appeared first on Agjencia Telegrafike Shqiptare.

PARIS, 5 janar /ATSH-DPA/-  Presidenti francez, Emmanuel Macron kritikoi sot metodën e përdorur nga Shtetet e Bashkuara të Amerikës për të arrestuar presidentin venezuelian, Nicolás Maduro dy ditë më parë.

“Kjo, as nuk mbështetet dhe as nuk miratohet nga Franca”, tha Macron gjatë një takimi të kabinetit në Paris, citoi zëdhënësja e qeverisë Maud Bregeon.

Bregeon, nuk specifikoi nëse Macron po kritikonte sulmin e SHBA-së apo vetëm mënyrën se si ishte arrestuar Maduro.

“Ne mbrojmë të drejtën ndërkombëtare dhe lirinë e popujve”, tha presidenti francez.

Deklarata e Macron vjen pasi partitë e majta të Francës kundërshtuan sulmin e SHBA-së ndaj Venezuelës, i cili kulmoi me kapjen e Maduros dhe bashkëshortes së tij, Cilia Flores dhe transportimin e tyre në Nju Jork.

Pa kritikuar veprimin e SHBA-së, Macron tha të shtunën se populli venezuelian mund të gëzohej për çlirimin nga diktatura.

“Maduro ka shkelur rëndë dinjitetin e popullit të tij”, shkroi Macron në X.

Fillimisht, kritikat për veprimin e SHBA-së erdhën vetëm nga ministri i Jashtëm francez Jean-Noël Barrot.

“Operacioni ushtarak që çoi në arrestimin e Nicolás Maduro shkel parimin e mospërdorimit të forcës mbi të cilin bazohet e drejta ndërkombëtare”, tha Barrot.

“Franca kujton se asnjë zgjidhje politike e qëndrueshme nuk mund të imponohet nga jashtë dhe se vetëm popujt sovranë vendosin për të ardhmen e tyre”, shtoi ai.

Qëndrimet e ndryshme të presidentit Emmanuel Macron dhe ministrit të Jashtëm, Jean-Noël Barrot mbi ngjarjet në Venezuelë shkaktuan habi në Francë. //a.i/

The post FRANCË – Macron kritikon metodën e përdorur për arrestimin e Maduros appeared first on Agjencia Telegrafike Shqiptare.