Eksperti i Marrëdhënieve Ndërkombëtare Ledion Krisafi, në një intervistë në emisionin “War Report” në ABC News foli për protestat e dhunshme që kanë përfshirë Iranin.

Ai theksoi se në protesta janë përfshirë edhe zonat e vogla rurale dhe jo vetëm zonat e mëdha. Krisafi nënvizoi se me përshkallëzimet e protestave, duket se regjimi iranian po lëkundet.

“Nëse do ishim kufizuar tek Teherani vështirë se mund të flisnim për lëkundje të regjimit. Në momentin që duhet të nxjerrës elitën për të vrarë protestues tregon që nuk ka funksionuar.  Mundësia e goditje amerikane mund të jetë 50 me 50. Por një goditje amerikane mund të rrëzonte regjimin, por nuk është e qartë se kush mund të vijë në pushtet”, tha ai.

Më tej nënvizoi se administrata amerikane ka një linjë konkrete për të ‘limituar’ lëvizjet e Kinës.

“Në momentin që amerikanët mund të marrin situatën në dorë në Iran, ajo naftë që shkonte në Kinë, nuk shkon më. Më shumë se sa tek nafta duket se po ndiqet një strategji për të kufizuar sa më shumë Kinën. E njëjta gjë edhe me Groenlandën, po tenton të kufizojë apo dobësojë Kinën. Sigurisht që kinezët janë të shqetësuar dhe e shohin që strategjia amerikane është drejtpërdrejt ndaj Kinës”, tha ai.

/abcnews.al/

Read More...

Jani Marka nga “Lëvizja Bashkë”, u shpreh se në shoqëri ka shumë pakënaqësi dhe se kjo duhet të kthehet në reagim kundër mungesës së përgjegjësisë së institucioneve.

Gjithashtu ai theksoi se Lëvizja Bashkë ndryshe nga partitë e tjera kërkon zgjedhje të parakohshme.

“Qytetarët siç e shikojnë personal mungesën e ujit duhet të shikojnë personale edhe vjedhjen e taksave. Ka shumë pakënaqësi në shoqëri. Kur doli rasti i korrupsionit të Ballukut, nuk kemi dalë fare në media. Lëvizja Bashkë të hënën tjetër do jetë seanca e parë në Parlament, ne do jemi sërish aty për të kërkuar zgjedhje të parakohshme. Partitë e tjera kërkojnë qeveri teknike për t’i zgjatur jetën politike Edi Ramës. Duhet të rritet presioni qytetar që ai të detyrohet të japë dorëheqjen”, tha ai.

Dorina Prethi nga “Shqipëria Bëhet”, në një intervistë në emisionin “Real Story” në ABC News, u shpreh se shqiptarët nuk përfaqësohen.

Gjatë intervistës, Prethi nënvizoi se Lëvizja Bashkë ka zgjedhur të mos i bashkohet partive të mëdha, pasi shqiptarët i kanë votuar sepse nuk duan asnjë nga ato parti, as PS dhe as PD.

“Fajet për Shqipërinë e sotme nuk janë vetëm të PS, por të Sali Berishës dhe Edi Ramës. E gjithë perdja ra në zgjedhjet e 11 majit dhe e pamë që qytetarët nuk përfaqësohen. Pra ne nuk i bashkohemi logove të partive sepse jemi vet një parti dhe elektorati na ka votuar sepse nuk do asnjë nga këto dy parti”, tha ajo.

Viti i kaluar ka qenë më i përgjakshmi për civilët në Ukrainë që nga viti 2022, i shënuar nga sulme të intensifikuara përgjatë vijës së frontit dhe përdorim të gjerë të armëve me rreze të gjatë veprimi.

Në vitin 2025, rreth 2,514 civilë u vranë dhe 12,142 u plagosën, një rritje prej 31% e viktimave krahasuar me vitin 2024, tha misioni Misioni i Monitorimit të të Drejtave të Njeriut i OKB-së në Ukrainë.

Përpjekjet e shtuara nga forcat e armatosura ruse për të pushtuar territorin në vitin 2025 rezultuan në vdekje dhe lëndime civile, shkatërrimin e infrastrukturës jetësore, ndërprerjen e shërbimeve bazë dhe valë të reja zhvendosjeje në zonat e vijës së frontit.

Ndërsa qindra mijëra ushtarë nga të dyja palët besohet se janë vrarë ose plagosur në luftën më vdekjeprurëse në Evropë që nga fundi i Luftës së Dytë Botërore.

Kryeministri Edi Rama ka reaguar sërish për situatën e përmbytjeve, duke ndarë në Facebook edhe shifrat që do jenë për marrjen  e masave për parandalimin e situatave të tilla.

“Fondet e parashikuara për mbrojtjen civile synojnë rritjen e sigurisë përballë fatkeqësive natyrore, garantimin e kompensimit për qytetarët e prekur, si dhe forcimin e masave parandaluese për reduktimin e rreziqeve në të ardhmen”, shkruan Rama.

Kosova duhet ta ratifikojë menjëherë marrëveshjen me Bashkimin Evropian për Planin e Rritjes – sapo ta formojë Kuvendin e ri – në mënyrë që të fillojë t’i pranojë miliona euro nga kjo paketë financiare për vendet e Ballkanit Perëndimor, tha të hënën për Radion Evropa e Lirë një zëdhënës i Komisionit Evropian (KE).

Kosova ishte ndër të parat që e miratoi agjendën e reformave në vitin 2024, por nuk ka qenë në gjendje t’i gëzojë të hollat për shkak të mungesës së një Kuvendi funksional për ta ratifikuar marrëveshjen formale me bllokun.

“Është në interes të Kosovës që ratifikimi të ndodhë sa më shpejt, në mënyrë që të shfrytëzohen plotësisht të gjitha mundësitë që ofron Plani i Rritjes, në dobi të popullatës së saj”, tha zëdhënësi.

Kosova pritet ta bëjë Kuvendin e ri në javët në vijim, pas zgjedhjeve të parakohshme parlamentare të 28 dhjetorit, të cilat i fitoi bindshëm Lëvizja Vetëvendosje, partia në pushtet e kryeministrit në detyrë, Albin Kurti. Partia e Kurtit i fitoi 57 vende dhe pritet të udhëheqë edhe për një mandat të tretë katërvjeçar.

Për ratifikimin e marrëveshjes në fjalë me BE-në, nevojiten 80 vota në Kuvendin me 120 ulëse, që nënkupton se janë të nevojshme edhe votat e opozitës.

Pa ratifikimin e marrëveshjes, Kosova nuk mund të paraqesë kërkesë për pagesë.

Plani i Rritjes është një paketë financimi e BE-së për gjashtë vendet e Ballkanit Perëndimor – Kosovën, Shqipërinë, Maqedoninë e Veriut, Malin e Zi, Serbinë dhe Bosnje e Hercegovinën – me qëllim të përafrimit të këtyre ekonomive me standardet evropiane.

Nga pakoja, 2 miliardë euro janë fonde të pakthyeshme, ndërsa 4 miliardët tjerë jepen në formën e kredive të volitshme. Kosovës i kanë rënë hise rreth 900 milionë euro – që do të thotë se për kokë banori është përfituesja më e madhe e këtyre mjeteve.

Përveç ratifikimit të marrëveshjes, Kosova duhet të përmbush gjithashtu hapave brenda afateve të përcaktuara për t’i pranuar të hollat.

Ajo e ka përgatitur agjendën reformuese bazuar në rekomandimet paraprake të trupave të BE-së, ndërsa reformat në fushën e rendit dhe të sundimit të ligjit kanë janë thelbësore për të përfituar mjete nga ky plan.

Në rast se ndonjë hap nuk përmbushet brenda afatit të caktuar, përfituesit i jepet mundësia që ta përmbushin atë ende brenda periudhës së ashtuquajtur “periudhë shtesë”, sipas zëdhënësit të bllokut.

Kjo është dy vjet për hapat që duhej të përmbusheshin në dhjetor 2024 dhe një vit për të gjithë hapat që duhej të përmbushen në qershor 2025 dhe më pas.

“Nëse një hap nuk përmbushet deri në fund të periudhës së faljes, partneri përfitues i humb fondet e alokuara për atë hap”, theksoi ai./REL/

Policia spanjolle ka sekuestruar një sasi rekord droge prej 10 tonë kokainë me destinacion Europën, që ishte fshehur në kontejnerë me kripë.

Oficerët e Grupit të Operacioneve Speciale hipën në anijen tregtare me flamur të Kamerunit javën e kaluar pasi ajo u nis nga Brazili, duke kapur 9,994 kilogramë kokainë të fshehur në 294 pako.

13 anëtarët e ekuipazhit u arrestuan dhe një armë zjarri e përdorur për të mbrojtur sasinë e madhe u sekuestrua gjatë operacionit.

Anija mbeti pa karburant pas bastisjes dhe qëndroi në det për gati 12 orë, duke bërë që shërbimi i shpëtimit detar të Spanjës ta tërhiqte atë në Ishujt Kanarie.

Operacioni, me emrin e koduar “Batica e Bardhë”, përfshinte Qendrën e Analizës dhe Operacioneve Detare për Narkotikët, Administratën Amerikane për Zbatimin e Ligjit kundër Drogave, Agjencinë Kombëtare të Krimit në Mbretërinë e Bashkuar, Policinë Federale Braziliane, qendrën e inteligjencës spanjolle dhe autoritetet nga Franca dhe Portugalia.

Policia tha se hetimi kishte në shënjestër një organizatë shumëkombëshe që dyshohet se transportonte sasi të mëdha të kokainës nga Amerika e Jugut në Europë.

Policia e përshkroi operacionin e së hënës si një goditje historike ndaj rrjeteve ndërkombëtare të trafikimit të drogës.

Lidhjet e ngushta të Spanjës me Amerikën Latine e bëjnë atë një pikë kyçe hyrjeje për drogën në Europë.

Norvegjia njoftoi se do të ofrojë 340 milionë euro ndihmë emergjente për të mbështetur sektorin e energjisë të Ukrainës dhe për të ndihmuar qeverinë të mirëmbajë shërbimet kritike.

Kjo paketë vjen si pjesë e ndihmës për Ukrainën e cila është e shkatërruar nga lufta.

Sulmet ruse kanë synuar prej kohësh rrjetin energjetik të Ukrainës dhe janë intensifikuar në muajt e fundit, ndërsa temperaturat e dimrit vijojnë të jenë të ulëta.

Nga paketa e ndihmës politike, 4 miliardë u ndanë edhe për mbështetje fiskale dhe rindërtim, dhe 3.5 miliardë për ndihmë humanitare, me fonde shtesë të destinuara për zhvillimin e biznesit, shoqërinë civile dhe reformat e qeverisjes.

Këtë të hënë u zhvillua në GJKKO procesi paraprak ndaj ish-presidentit Ilir Meta.

Gazetari Ervin Leka tha për ABC News, se Ilir Meta është i pranishëm në seancën gjyqësore.

Në përfundim, seanca është shtyrë sërish. Data e radhës për gjyqin ndaj Ilir Metës është vendosur më 22 janar.

/abcnews.al/

Si pasojë e reshjeve intensive të shiut të regjistruara gjatë orëve të fundit, në disa qarqe të vendit janë evidentuar problematika të lidhura me rritjen e prurjeve në disa lumenj, përmbytje të tokave bujqësore, rrëshqitje dherash si dhe vështirësi në qarkullimin rrugor.

Situata paraqitet më problematike në qarqet Shkodër, Durrës, Lezhë, Gjirokastër, Dibër dhe Berat, ndërsa në qarqet e tjera raportohen problematika të kufizuara ose situatë e qëndrueshme.

Në Qarkun Shkodër, rritja e niveleve të lumenjve Drin, Kir dhe Bunë ka shkaktuar përmbytje në territorin e Bashkisë Shkodër, kryesisht në njësitë administrative Ana e Malit dhe Dajç. Strukturat e bashkisë dhe të emergjencave civile ndodhen në terren dhe po monitorojnë në mënyrë të vazhdueshme situatën, duke evidentuar pikat me risk dhe duke marrë masa paraprake për mbrojtjen e jetës dhe pronës së qytetarëve. Hidrovoret po punojnë me kapacitet të plotë dhe nivelet e ujit janë nën kuotat kritike.

Në Qarkun Durrës janë verifikuar gjithsej 5 477 banesa, nga të cilat në 1 711 raste janë konstatuar dëme. Janë evakuuar 851 persona, kryesisht në zonat Sukth dhe Katund i Ri, ku rreth 2 000 hektarë tokë bujqësore janë nën prezencë uji. Vijon puna për konstatimin dhe vlerësimin e dëmeve.

Në Qarkun Lezhë, niveli i ujit ka shënuar rënie përgjithësisht në tokat bujqësore. Forcat në terren po punojnë për largimin e ujit nga disa banesa. Të gjithë hidrovorët kanë punuar me kapacitet të plotë, me përjashtim të atij të Gocajve, ku është evidentuar mungesë energjie elektrike. Niveli i lumit Drin vijon të jetë në ulje, ndërsa lumi Mat ka shënuar rritje për shkak të shkarkimeve nga HEC-et Shkopet dhe Qafë Mollë. Nuk raportohen probleme në akset rrugore.

Në qarqet Gjirokastër dhe Dibër po punohet për pastrimin e disa akseve rrugore, ku janë shënuar rrëshqitje dherash, si dhe për largimin e ujit nga disa objekte.

Në qarqet Berat dhe Elbasan, rritja e prurjeve të lumenjve Osum dhe Devoll ka sjellë përmbytje të sipërfaqeve bujqësore. Situata vijon të monitorohet në mënyrë të vazhdueshme nga strukturat përgjegjëse.

Në terren janë të angazhuar efektivë të Forcave të Armatosura, të cilët, nën koordinimin e Agjencisë Kombëtare të Mbrojtjes Civile dhe Ministrisë së Mbrojtjes, po asistojnë në transportimin e banorëve, shpërndarjen e ndihmave dhe mbështetjen e operacioneve emergjente, sipas nevojave të autoriteteve vendore.

Në fushë ishin dy prej skuadrave më të forta. Maroku dhe Senegali cilësohen ndër kandidatët kryesorë për të fituar Kupën e Kombeve të Afrikës, dhe ata I respektuan parashikimet.

Sukseset përkatësisht 2-0 ndaj Kamerunit dhe 1-0 kundër Malit ishin të merituara, edhe pse të vështira. Marokenët duan të tregojnë se jo më kot janë gjysmëfinalistë në fuqi të Kupës së Botës, pasi eliminuan Spanjën e Portugalinë në Katar.

Ylli kryesor, Brahim Diaz, dhe pastaj Ismail Saibari, shënuan golat në sfidën që u luajt në shtëpinë e tyre, në stadiumin e kryeqytetit Rabat.

Ishte një duel i ashpër dhe Kameruni nuk u dorëzua për asnjë minutë. Jo më kot e mbajti topin 59 për qind, edhe pse nuk mundi ta kërcënonte portën e Marokut, madje pa pasur asnjë gjuajtje në kuadrat.

Afrikanët e veriut, që gjithashtu janë arabë, kanë yje si Bono, Hakimi, Mazraui, Saibari, Brahim Diaz apo El Kabi dhe padyshim që janë favoritë për ta fituar trofeun.

Senegali ndërkaq dominoi plotësisht ndaj Malit, edhe pse fitorja ishte vetëm 1-0.

Iliman Ndiaje ishte autori I golit të vetëm të ndeshjes në 27’, ndërsa në fund të pjesës së parë ndodhi momenti që përcaktoi edhe më shumë.

Malezët mbetën me 10 vetë pasi Bisuma doli nga loja me të kuqe.

Ata që cilësohen “Luanët e Terangës” nuk patën nevojë për dhurata të tjera dhe patën epërsi të theksuar në stadiumin e Tanzhierit.

Plot 18 gjuajtje drejt portës dhe 9 në kuadrat ndaj vetëm një të rivalit.

Senegalezët kanë 16 ndeshje radhazi pa humbje në Kupën e Kombeve të Afrikës, duke qenë të dytët në historinë e këtij konkurrimi pas Egjiptit që ia doli për 24 sfida në vitet 2004-2007.

Uji ka nisur të tërhiqet nga fshati Adriatik i Kurbinit. Situata po shkon drejt stabilizimit sidomos pas izolimit të argjinaturës së lumit Drojë ditën e djeshme.

Ndërkohë që hidrovoret po punojnë me kapacitet të plotë  duke bërë që niveli i ujit të ulet me 30-40 cm. Gjergj Çuli ish-specialist i pompave të hidrovorëve në Adriatik thotë se reshje me kaq intensitet janë të rralla, në Kurbin.

Pjetër Preni kryeplaku i fshatit Adriatik thekson se do të nisë edhe vlerësimi I dëmeve si në tokë bujqësore po ashtu edhe në bagëti

Gjatë kësaj jave si rezultat i reshjeve të dendura, disa fshatra në Kurbin u përmbytën, banesat  u rrethuan nga uji, duke krijuar situatë të vështirë për banorët.

Lumi Erzen është rikthyer në shtratin e tij dhe pak e nga pak uji po tërhiqet nga zonat e përmbytura në njësinë Administrative Sukth dhe Katund i Ri. Situata duket drejtë përmirësimit por dita për t’u rikthyer jetës së përditshme për banoret e prekur nga përmbytja duket shume e largët. Tërheqja e ujit në zonën e Sukthit dhe të Katundit te Ri ia ka lënë vendin mbetjeve dhe baltës.

Banesa të përmbytura me prani uji ka vetëm në zonën e Ish -Kënetës, ku dhjetëra shtëpi e objekte janë ende nën pushtetin e përmbytjeve.

Banoret e ish-Kënetës kanë nevojë për ndihmën e autoriteteve për largimin e ujit nga shtëpitë dhe oborret e tyre.

Nga të dhënat e deritanishme përmbytja përfshiu të paktën 4 mijë banesa e objekte, ndërsa janë evakuuar mbi 850 banoreve, pasi shtëpitë e tyre ishin të pabanueshme. Strukturat e Bashkisë dhe ato të strukturave operacionale të emergjencave ndodhen në terren dhe po e ndjekin situatën. Plote 508 specialiste te ndare ne grupe pune janë në terren për t’u ardhur ne ndihme banoreve të cilët kanë nevojë. Aktualisht po punohet edhe me vlerësimin e dëmeve.

Furia e Vjosës dy ditë më parë ka lënë pas shkatërrim. Thasë me rërë në oborret e shtëpive, inerte në anë të rrugëve dhe banorët që përpiqen të bëjnë sërish të banueshme shtëpitë e tyre.

Në një nga rrugët e Ferrasit, Pëllumb Tetenaj 84 vjeç, një ish-zetorist qëndron i vetëm në të ftohtë, në hyrje të banesës së tij.

“Pres nipin … të më pastrojë të paktën kuzhinën… kam fjetur të kunati.. Kam fjetur në makinë … kjo përmbytje ishte e madhe”, tha ai.

Përtej shkatërrimit të orendive dhe pajisjeve, përmbytja e 8 Janarit ka lënë pas edhe tronditje të thellë psikologjike. Flora Sulejmani, rrëfen tmerrin që përjetoi, me bashkëshortin invalid, teksa në pak minuta uji vërshoi brenda shtëpisë. Nuk kishte kohë as të merrte telefonin, ndaj kërkoi ndihmë duke fikur dhe ndezur një elektrik dore.

Pajisjet dhe orenditë shtëpiake janë dëmtuar tërësisht, në banesat një katëshe. Pjesa më e madhe e tyre janë blerë te reja, pas përmbytjeve të vitit 2017.

Në terren ndodhen automjete dhe efektivë zjarrfikës për pastrimin e baltës nga banesat e përmbytura.

Në Ferras gjatë vërshimeve të Vjosës u përmbytën 75 banesa, disa banesa të tjera u përmbytën në Çerven dhe Kashisht. Në Rromës të Mallakastrës u evakuua një familje pas daljes së Vjosës nga shtrati. Gjithsej në këtë përmbytje nga Vjosa, u evakuuan 7 familje, pjesa më e madhe në Ferras.

Dëmet nga përmbytjet po inventarizohen nga komisionet e verifikimit. Bilanci paraprak i përmbytjeve  flet për mbi 700 ha tokë bujqësore nën ujë dhe afërsisht 100 shtëpi të përmbytura në Ferras, Çerven, Kashisht, Adë dhe Rromës.

Lumi Vjosa është rikthyer gradualisht në nivele normale, pas rritjes së prurjeve të ditëve të fundit që sollën përmbytje në disa zona, teksa niveli ka shkuar ne 5,5 metra. Sipas informacioneve më të fundit nga terreni, uji është tërhequr nga banesat në fshatin Bishan, duke lehtësuar situatën për banorët e zonës.

Megjithatë, në disa banesa dhe në hapësirat përreth tyre ende ka prezencë të ujit, kryesisht në oborre dhe toka përreth, çka vijon të krijojë vështirësi për banorët.

Problem mbetet edhe nënkalimi i Bishanit, ku ka ende ujë të grumbulluar, por pavarësisht kësaj, rruga është e kalueshme dhe qarkullimi i automjeteve nuk është ndërprerë.

Banorët shprehen se situata është përmirësuar krahasuar me ditët e mëparshme, por tashmë janë në pritje të procesit të evidentimit të dëmeve, veçanërisht në tokat bujqësore që janë përmbytur për disa ditë me radhë. Sipas tyre, sipërfaqe të konsiderueshme toke janë dëmtuar, duke rrezikuar prodhimin bujqësor dhe të ardhurat e familjeve të zonës

Ndërkohë, autoritetet vendore pritet të vijojnë monitorimin e situatës dhe të nisin verifikimet në terren për të vlerësuar dëmet e shkaktuara, si dhe për të marrë masat e nevojshme në ndihmë të banorëve të prekur.

Aktori i famshëm turk, Can Yaman është arrestuar në Turqi si pjesë e një hetimi mbi trafikimin dhe përdorimin e drogës midis personazheve të njohur, gazetarëve dhe personazheve VIP në Stamboll, sipas rainewsofficial.

Yaman, shumë i njohur në Itali për rolet e tij kryesore në disa seriale televizive të suksesshme, përfshirë “Sandokan” të kohëve të fundit, por edhe për njohuritë e tij të thella të gjuhës italiane, u arrestua mbrëmë së bashku me gjashtë persona të tjerë, përfshirë aktoren Selen Gorguzel.

Yaman u gjet me disa doza droge me vete. Të shtatë të arrestuarit tani po i nënshtrohen një sërë testesh në Institutin e Mjekësisë Ligjore për të përcaktuar nëse, kur dhe çfarë droge kishin konsumuar.

Policia kontrolloi nëntë klube të ndryshme nate në metropolin e Bosforit mbrëmë duke arrestuar disa tregtarë dhe menaxherët e lokaleve ku shiteshin narkotikë.

Në javët e fundit, si pjesë e të njëjtit hetim, më shumë se 20 personalitete, personazhe të famshëm dhe gazetarë janë kapur nga policia.

Hetimi ka të bëjë me akuzat për “posedim droge ose stimuluesish për përdorim personal”, “lehtësim të përdorimit të drogës” dhe “inkurajim të një personi për t’u angazhuar në prostitucion, lehtësim të një praktike të tillë ose ndërmjetësim ose sigurim të një vendi për prostitucion”.

Spitalet në Iran po përballen me mbingarkesë të rëndë, ndërsa protestat antiqeveritare vazhdojnë në shumë qytete të vendit, sipas BBC.

Një mjek dhe një punonjës shëndetësor në dy spitale të ndryshme thanë se numri i të plagosurve është rritur ndjeshëm, duke vënë sistemin shëndetësor nën presion ekstrem.

Sipas një mjeku nga Teherani, spitali kryesor oftalmologjik i kryeqytetit ka hyrë në gjendje krize, me shërbimet emergjente të tejmbushura.

“Janë pezulluar ndërhyrjet jo urgjente dhe stafi shtesë është thirrur për të përballuar fluksin e pacientëve”, tha një zyrtar.

Një tjetër punonjës shëndetësor nga qyteti Shiraz raportoi se spitali i tij nuk kishte mjaft kirurgë për të trajtuar të plagosurit që po silleshin vazhdimisht.

Protestat, që nisën më 28 dhjetor, janë shtrirë në dhjetëra zona në të gjithë Iranin.

Organizata ndërkombëtare për të drejtat e njeriut raportojnë se dhjetëra protestues kanë humbur jetën, përfshirë edhe fëmijë, ndërsa mijëra persona janë arrestuar.

Read More...

Read More...