TIRANË, 31 janar /ATSH-Etleva Xhajanka/ Ambasadori i Spanjës në Shqipëri, Gabriel Cremades Ventura, shprehu kënaqësinë për pjesëmarrjen në Forumin e Dialogut “Edhe disa hapa drejt BE-së”, të zhvilluar në Vlorë, ku morën pjesë edhe ambasadori i Shqipërisë në Austri, Fate Velaj, raportuesi për Shqipërinë në Parlamentin Europian, Andreas Schieder, dhe miq të tjerë të vendit tonë.

Në fjalën e tij, ambasadori Cremades Ventura theksoi rëndësinë e përfundimit të procesit të integrimit të Shqipërisë në Bashkimin Europian dhe shprehu mbështetje për reformat e vendit, sidomos në fushat e sundimit të ligjit, drejtësisë dhe luftës kundër korrupsionit dhe krimit të organizuar.

Ai kujtoi se Shqipëria u njoh si kandidat për në BE në vitin 2014, por për shkak të zhvillimeve ndërkombëtare dhe jo për mos përmbushjen e kritereve, procesi u vonua. Sipas tij, ngjarjet e fundit rajonale dhe prioritetet strategjike të BE-së kanë rihapur dritaren e mundësive për vendet e Ballkanit Perëndimor, duke përfshirë Shqipërinë.

“Në vitin 2022 agresioni ndaj Ukrainës ishte një zile zgjimi për BE-në. Zgjerimi i BE-së nuk u perceptua më si një barrë e mundimshme por si një nevojë gjeostrategjike që do të sillte përfitime edhe për BE. Njohja e dokumentit të Granadës që zgjerimi i BE-së ishte një investim strategjik në siguri, stabilitet dhe prosperitet, ishte një dritare sigurie që u çel për të gjitha vendet e rajonit dhe Shqipëria e kapi këtë mundësi”, tha ai.

Ambasadori theksoi se anëtarësimi nuk është dhuratë, por rezultat i meritës së Shqipërisë dhe përpjekjeve të saj institucionale dhe shoqërore.

“Përparimi i Shqipërisë ka qenë i madh dhe ne pamë së fundi, se u arrit çelja e të gjithë grupkapitujve të negociatave për integrimin në BE, por dy vitet e ardhshme mbeten kritike për procesin. Shqipëria duhet të vazhdojë vendosmërisht me përpjekjet e saj me procesin e reformave që ka nisur. Shqipëria duhet të vazhdoj me përpjekjet që ka bërë sidomos me kapitujt e sundimit të ligjit, reformën në drejtësi dhe luftën kundër korrupsionit dhe krimit të organizuar, për të garantuar përmbushjen e kushteve dhe avancimin drejt anëtarësimit”, deklaroi ambasadori Cremades Ventura.

Ai nënvizoi mbështetjen praktike të Spanjës për vendin tonë përmes projekteve të BE-së në drejtësi dhe sundim të ligjit, si dhe rëndësinë e diplomacisë parlamentare dhe informimit të opinionit publik europian për të shmangur keqkuptimet mbi zgjerimin.

Cremades Ventura shprehu shpresën që deri në vitin 2027 të nënshkruhet traktati i anëtarësimit të Shqipërisë në BE, i cili do të ratifikohet nga 27 vendet anëtare, duke sjellë përfitime për vendin dhe duke forcuar bashkëpunimin dhe stabilitetin në rajon.

Ai nënvizoi gjithashtu se integrimi i Shqipërisë është në interes të të gjithë Europës dhe duhet të përparojë me vendosmëri dhe përkushtim.

“Spanja dëshiron që Shqipëria të jetë sa më pranë standardeve europiane dhe shpreh shpresën që integrimi në BE t’i sjellë vendit përfitime konkrete, duke i bashkuar frytet e zhvillimit të brendshëm me përparësitë e Bashkimit Europian”, deklaroi Ambasadori i Spanjës në Shqipëri, Gabriel Cremades Ventura.

/a.f/

The post Ambasadori i Spanjës: Deri në 2027 mund të nënshkruhet traktati i anëtarësimit të Shqipërisë në BE appeared first on Agjencia Telegrafike Shqiptare.

TIRANË, 31 janar /ATSH/ Skemat e reja të mbështetjes dhe orientimi i fermerëve drejt tregut janë në fokus të politikave mbështetëse të Ministrisë së Bujqësisë dhe Zhvillimit Rural për këtë vit, i cili ka në dispozicion një buxhet prej 16,3 miliardë lekësh për sektorin bujqësor, me qëllim rritjen e konkurrueshmërisë dhe zhvillimin e qëndrueshëm të bujqësisë.

Zëvendësministri i Bujqësisë, Fatmir Guri, tha se Skema Kombëtare e Mbështetjes nuk është vetëm një instrument për financimin e fermerëve, por edhe një mekanizëm i rëndësishëm orientimi për ta. Sipas tij, synimi është që fermerët të drejtohen drejt kushteve më të mira të prodhimit, të kenë më shumë siguri ushqimore, si dhe kapacitete më të larta ruajtjeje dhe përpunimi.

Në një intervistë për “Vizion Plus”, ai bëri të ditur se skema e këtij viti, e cila do të shpërndajë rreth 52 milionë euro, do të fokusohet kryesisht në investime që u mundësojnë fermerëve dhe operatorëve ushqimorë të rrisin kapacitetet në përpunim, etiketim dhe seleksionim, me qëllim që prodhimi bujqësor të mos humbasë vlerën, por të rrisë cilësinë dhe të diversifikohet si për nga lloji, ashtu edhe për nga tregjet ku tregtohet.

Sipas zëvendësministrit Guri, Ministria e Bujqësisë ka nisur një tur kombëtar informues, nga Tropoja deri në Sarandë, ku deri më tani janë zhvilluar mbi 23 takime dhe janë kontaktuar më shumë se 2 mijë fermerë për të dëgjuar shqetësimet dhe nevojat e tyre.

Ai theksoi se skema e këtij viti shënon edhe fillimin e përshtatjes së politikave të mbështetjes me parimet kryesore të Bashkimit Europian në bujqësi. “BE prej vitesh nuk mbështet më prodhimin për litër apo për kilogram. Ne po ruajmë të njëjtat parime, në mënyrë që fermerët tanë të jenë të përgatitur për tregun europian dhe politikat e ardhshme të mbështetjes”, u shpreh Guri.

Zëvendësministri vuri theksin edhe te mbështetja për të rinjtë, duke i cilësuar ata si një element kyç për zhvillimin e bujqësisë. Sipas tij, në skemën e re po punohet për instrumente të dedikuara posaçërisht për të rinjtë, si në aspektin e investimeve, ashtu edhe në mbështetjen direkte, me qëllim që fshati të kthehet në një mundësi reale dhe atraktive për ta.

Sa i përket procedurave, Guri tha se ato janë të thjeshtuara. Fermerët që disponojnë NIPT fermeri dhe shesin produktet e tyre te subjekte të regjistruara për TVSH duhet të ruajnë autofaturat dhe dy herë në vit, në muajt qershor dhe janar, t’i dorëzojnë pranë administratës tatimore, e cila kryen automatikisht rimbursimin në masën 10% të vlerës së autofaturave.

Ministria e Bujqësisë synon që përmes këtyre masave të rrisë konkurrueshmërinë e sektorit, të forcojë zinxhirin agro-ushqimor dhe të përgatisë bujqësinë shqiptare për integrimin në tregun europian.

e.xh/

The post 52 milionë euro për bujqësinë, mbështetje e re për fermerët dhe të rinjtë appeared first on Agjencia Telegrafike Shqiptare.

TIRANË, 31 janar /ATSH/ Drejtoria për Hetimin e Krimit Ekonomik dhe Financiar në Departamentin e Policisë së Shtetit (DPPSh) ka finalizuar operacionin e koduar “Brand 3”, duke goditur një rast të kontrabandës së veshjeve dhe shmangies së detyrimeve tatimore.

Si rezultat i hetimeve të kryera nga Sektori për Hetimin e Krimit Ekonomik dhe Financiar, mbi bazën e informacioneve të siguruara për kontrabandë mallrash dhe shitjen e tyre në informalitet, u identifikuan 7 shtetas, të cilët në bashkëpunim me njëri-tjetrin kontrabandonin veshje nga Kina dhe Turqia, i magazinonin në Tiranë dhe më pas i tregtonin duke shmangur detyrimet tatimore.

Gjatë operacionit, këta shtetas u kapën në flagrancë teksa transportonin me dy automjete 17 valixhe me veshmbathje të markave të shtrenjta, të dyshuara të kontrabanduara. Mallrat dhe dy automjetet u sekuestruan në cilësinë e provës materiale.

Sipas njoftimit të policisë, në përfundim të veprimeve procedurale, u arrestuan shtetasit Sofokli Bushi, 69 vjeç, Bilbil Llangozi 72 vjeç dhe Ali Bushati 57 vjeç. Ndërsa nisi procedimi penal për shtetasit R. Ll., 45 vjeç, I. B., 39 vjeç, E. B., 23 vjeç dhe Z. M., 65 vjeç.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Shkelja e të drejtës së pronësisë industriale”, “Kontrabanda me mallra të tjera”, “Tregtimi dhe transportimi i mallrave që janë kontrabandë”, “Mospagimi i taksave dhe i tatimeve” dhe “Fshehja e të ardhurave”.

Policia bën me dije se hetimet vijojnë për identifikimin dhe kapjen e shtetasve të tjerë të përfshirë në këtë veprimtari kriminale.

/e.xh//a.f/

The post Kontrabandonin veshje nga Kina dhe Turqia, tre në pranga dhe katër nën hetim appeared first on Agjencia Telegrafike Shqiptare.

TIRANË, 30 janar /ATSH/ Presidenti i Republikës, Bajram Begaj i dorëzoi sot flamurin kombëtar ekipit olimpik “Team Albania” që do të përfaqësojë Shqipërinë në Lojërat Olimpike Dimërore 2026, të cilat do të zhvillohen në datat 6-22 shkurt 2026 në Milano dhe Cortina d’Ampezzo të Italisë.

“Flamuri kuqezi që po merrni sot është i “rëndë”. Ai mban në vetvete pritshmërinë e një vendi të tërë. Flamuri kuqezi nuk ju kërkon domosdoshmërisht medalje, ju kërkon dinjitet. Ai mishëron vlerat e paqes, respektit, krenarisë. Ai i tejkalon kufijtë përmes sportit.  Flamuri kuqezi ju kërkon të tregoni se Shqipëria është aty me ju, është e fortë, e denjë dhe e barabartë mes të barabartëve dhe mes më të mirëve të botës. Nisuni me besim! Garoni fort dhe me nder. Flamuri është në duart tuaja”, deklaroi Presidenti i Republikës, ndërsa i dorëzoi ekipit tonë flamurin kombëtar.

Veç urimit për sukses në Alpet e Italisë, Begaj i shprehu ekipit tonë të skiatorëve mirënjohje dhe përgëzime për atë që kanë arritur në sport, duke e renditur Shqipërinë krah vendeve që kanë traditë shekullore në sportet dimërore dhe njëherazi u uroi sukses në gara.

“Një fakt i tillë na bën të gjithëve krenarë”, deklaroi Kreu i Shtetit.

“Në Lojërat Olimpike të Milanos dhe Cortinës ju do të përfaqësoni Shqipërinë, vendin tuaj, do të mbani ambicien e Shqipërisë që po garon me më të mirët, aty ku deri dje ishim thjesht vizitorë të largët. Fakti që sot renditemi me dinjitet krah vendeve që kanë traditë shekullore në sportet dimërore, duhet të na bëjë të gjithëve krenarë. Kjo tregon se madhësia e një kombi për t’u përfaqësuar në sport e kudo nuk matet vetëm me kilometrat katrorë të pistave të skive që ne mund të kemi, apo terreneve sportive që ne mund të kemi, por matet me madhësinë e zemrës së atyre sportistëve që na përfaqësojnë”, theksoi Presidenti.

“Investimi tek talenti i jashtëzakonshëm i Lara Colturit dhe mbështetja për sportistët tanë, Denni Xhepa, Lisa Brunga dhe Semire Dauti, tregojnë qartë se sporti shqiptar ka dalë nga faza e pjesëmarrjes simbolike”, u shpreh Begaj, i cili falënderoi të gjithë kontribuuesit që bënë të mundur arritjen e deritanishme dhe bëjnë krenarë të gjithë shqiptarët.

Duke iu drejtuar katërshes së ekipit shqiptar që do të përfaqësojë flamurin kuqezi në Lojërat Olimpike Dimërore 2026 në Itali, Kreu i Shtetit theksoi se kjo pjesëmarrje, pavarësisht rezultatit, ju bën fitues të krenarisë së të gjithë shqiptarëve, veçanërisht të brezit të ri që mëson përmes shembullit tuaj se suksesi vjen me disiplinë, me punë, përkushtim dhe pasion.

“Kur të jeni në startin e garës, mbani mend se pas jush janë familjet tuaja, të cilat unë dua t’i falënderoj pafund për sakrificën e tyre, janë federatat dhe Komiteti Olimpik, por pas jush është edhe një popull i tërë që po mësohet të shohë flamurin e tij kuqezi të garojë si i barabartë mes të barabartëve”, deklaroi Presidenti i Republikës.

1 nga 3

/r.e/a.f/

The post Begaj i dorëzon flamurin ekipit përfaqësues në Lojërat Olimpike Dimërore 2026 appeared first on Agjencia Telegrafike Shqiptare.

TIRANË, 30 janar /ATSH/ Ministria e Mjedisit po avancon me përmbushjen e reformave dhe harmonizimin e legjislacionit në përputhje me standardet e Bashkimit Evropian.

Ministri i Mjedisit, Sofjan Jaupaj, së bashku me një ekip të ministrisë, u takuan këtë javë me Grupin Ndërinstitucional të Integrimit Europian për Kapitullin 27, me fokus në përshpejtimin e reformave në mjedis dhe përfaqësimin e legjislacionit shqiptar me acquis-in e BE-së.

Gjatë takimit u diskutua rishikimi i Planit të Veprimit, vendosja e një ritmi mujor për dorëzimin e paketave të plota ligjore, si dhe ndërtimi i një sistemi të fortë monitorimi të brendshëm, me qëllim garantimin e koordinimit të institucioneve dhe respektimin e afateve të përcaktuara.

Jaupaj nënvizoi se vitet 2026 dhe 2027 do të jenë një “kantier ligjor” për Kapitullin 27, duke kërkuar angazhim maksimal nga të gjitha institucionet.

Ai theksoi se vetëm përmes koordinimit të vazhdueshëm dhe monitorimit të fortë do të arrihet përmbushja e standardeve europiane dhe avancimi i Shqipërisë në rrugën e integrimit.

Sipas ministrit, implementimi i këtij ritmi dhe ndërtimi i sistemeve të brendshme të monitorimit janë vendimtarë për të siguruar dorëzimin në kohë të paketave ligjore dhe për të garantuar progres real në harmonizimin e legjislacionit mjedisor me BE-në.

1 nga 4

/e.xh/r.e/a.f/

The post Shqipëria avancon me paketat ligjore për Kapitullin e Mjedisit appeared first on Agjencia Telegrafike Shqiptare.

TIRANË, 30 janar /ATSH/ Transporti ajror në Shqipëri po shënon një rritje të qëndrueshme, si në numrin e fluturimeve, ashtu edhe në pasagjerë, duke reflektuar zhvillimin ekonomik dhe rritjen e kërkesës për lëvizshmëri ndërkombëtare.

Tirana International Airport (TIA) njoftoi se gjatë vitit 2025 u ka shërbyer 11,6 milionë pasagjerëve, duke regjistruar rritje, krahasuar me 10,7 milionë pasagjerë në vitin 2024.

Ky rekord përfaqëson një sukses të rëndësishëm për transportin ajror dhe është një tregues i qartë i rritjes së kapacitetit dhe efikasitetit të infrastrukturës ajrore në vend.

Rrjeti ajror i TIA-së përfshin 68 destinacione, operim me 17 linja ajrore dhe lidhje direkte me 22 shtete, duke ofruar mundësi të gjera për lëvizjen e pasagjerëve, veçanërisht gjatë periudhës së festave të fundvitit.

Rritja e vazhdueshme e trafikut shoqërohet me zgjerim të destinacioneve, përmirësim të shërbimeve dhe investime në infrastrukturë, duke e kthyer TIA-n në një nyjë të rëndësishme lidhjeje për rajonin dhe më gjerë.

Administratori i aeroportit falënderon udhëtarët për besimin dhe mbështetjen e tyre gjatë vitit 2025, duke theksuar se investimet e vazhdueshme synojnë rritjen e cilësisë së shërbimeve, fluksin e fluturimeve dhe mbështetjen e turizmit dhe biznesit në Shqipëri.

/e.xh/r.e/a.f/

The post TIA mbyll 2025-ën me 11,6 milionë pasagjerë appeared first on Agjencia Telegrafike Shqiptare.

TIRANË, 30 janar /ATSh/ Ministrja për Evropën dhe Punët e Jashtme, Elisa Spiropali priti ditën e sotme në një takim, ambasadorin e Italisë në vendin tonë, Marco Alberti, me fokus koordinimin e përgatitjeve për mbajtjen në Tiranë të Forumit të Korridorit VIII.

Spiropali e cilëson këtë projekt “një arterie strategjike që sjell me vete potencial ndërlidhjeje infrastrukturore me rëndësi politike, ekonomike, të sigurisë rajonale e europiane”.

Ministrja njoftoi se kjo platformë e nivelit të lartë do të mbahet më 18 shkurt, në Tiranë, me praninë e ministrave të Jashtëm të Italisë, Bullgarisë, Maqedonisë së Veriut dhe Rumanisë.

Mbajtja e këtij forumi në Tiranë, konfirmon sipas Ministres së Jashtme, vendosmërinë e Shqipërisë për forcimin e bashkëpunimit politik, ekonomik dhe operacional përgjatë Korridorit VIII, nga Adriatiku në Detin e Zi.

1 nga 3

/e.xh/a.f/r.e/

The post Spiropali pret Albertin, diskutojnë përgatitjet për Forumin e Korridorit VIII në Tiranë appeared first on Agjencia Telegrafike Shqiptare.

TIRANË, 30 janar /ATSH/ Autoriteti Kombëtar i Ushqimit (AKU) njofton se pas një sinjalizimi të marrë nga autoritetet europiane, lidhur me gjetjen e një lënde toksike gjatë kontrolleve të kryera në Gjermani, ka ndërmarrë masa të menjëhershme për tërheqjen nga tregu të produktit “Aptamil 1 Pronutra”, me paketim 800 gramë dhe datë skadence 10 nëntor 2026.

Sipas të dhënave paraprake, në total janë importuar 648 njësi të këtij produkti, nga të cilat 362 njësi janë shpërndarë në Kosovë, ndërsa 267 njësi janë hedhur në tregun shqiptar.  AKU bën me dije se sasia më e madhe e produktit është tërhequr tashmë nga tregu, ndërkohë që kontrollet po vijojnë në qarqet Tiranë, Durrës, Vlorë, Lezhë dhe Shkodër, për të garantuar sigurinë ushqimore dhe mbrojtjen e shëndetit të konsumatorëve.

Në bazë të ligjit “Për Ushqimin”, i ndryshuar, ushqimi konsiderohet i pasigurt kur është i dëmshëm për shëndetin e njeriut dhe, si i tillë, nuk lejohet të nxirret në treg apo të përdoret për përpunim. Po ashtu, ligji parashikon detyrimin e operatorit të biznesit ushqimor që, në rast konstatimi të një ushqimi ose lënde të parë që nuk përmbush kërkesat e sigurisë ushqimore, të ndërmarrë menjëherë masat për refuzimin, bllokimin dhe njoftimin e autoritetit kompetent.

AKU vlerëson angazhimin e industrisë së përpunimit të qumështit për zbatimin e standardeve të sigurisë ushqimore, duke theksuar se, përveç kontrollit për aflatoksinën, industria është e detyruar me ligj të kryejë analiza të rregullta edhe për praninë e antibiotikëve dhe nivelin e qelizave somatike, indikatorë kyç të cilësisë dhe sigurisë së produkteve të qumështit.

/a.f/r.e/

The post Substanca toksike, AKU tërheq nga tregu 648 njësi të importuara “Aptamil 1 Pronutra” appeared first on Agjencia Telegrafike Shqiptare.

TIRANË, 29 janar /ATSH/ Përparimi i reformave në sektorin agro-ushqimor dhe përafrimi i tyre me standardet e Bashkimit Evropian ishte në fokus të takimit të zhvilluar në Tiranë ndërmjet ministrit të Bujqësisë dhe Zhvillimit Rural, Andis Salla, dhe përfaqësuesve të donatorëve të huaj, Delegacionit të Bashkimit Evropian, Bashkëpunimit Gjerman për Zhvillim dhe Organizatës së Ushqimit dhe Bujqësisë së Kombeve të Bashkuara (FAO).

Gjatë takimit, ministri Salla theksoi rëndësinë e ndërtimit të sistemeve funksionale që synojnë përmirësimin e qeverisjes dhe administrimit në bujqësi, si dhe zbatimin e politikave të orientuara drejt Politikës së Përbashkët Bujqësore (CAP) të Bashkimit Evropian.

Ministri vlerësoi bashkëpunimin e ngushtë me partnerët ndërkombëtarë për avancimin e bujqësisë digjitale, forcimin e shërbimeve këshillimore për fermerët, garantimin e sigurisë ushqimore dhe zhvillimin e sistemeve bujqësore të qëndrueshme ndaj ndryshimeve klimatike.

Nga ana e tyre, donatorët theksuan se synimi kryesor mbetet përkthimi i prioriteteve të reformave në rezultate konkrete për fermerët dhe komunitetet rurale, duke kontribuar në ndërtimin e një sektori agroushqimor modern, efikas dhe të qëndrueshëm.

Ky angazhim vjen në kuadër të mbështetjes së vazhdueshme për zhvillimin rural, forcimin e kapaciteteve institucionale dhe përmbushjen e kërkesave të Bashkimit Evropian për integrimin e sektorit bujqësor shqiptar në standardet evropiane.

1 nga 2

/e.xh/r.e/a.f/

The post Salla: Bashkëpunim ndërkombëtar për avancimin e bujqësisë digjitale appeared first on Agjencia Telegrafike Shqiptare.

The post Forcohet dollari, bie lehtë euroja appeared first on Agjencia Telegrafike Shqiptare.

TIRANË, 29 janar /ATSH/ Guvernatori i Bankës së Shqipërisë, Gent Sejko, priti sot në një takim zyrtar drejtoreshën e re Ekzekutive të Autoritetit të Mbikëqyrjes Financiare (AMF),  Adela Xhemali.

Në fokus të takimit ishin zhvillimet kryesore të ekonomisë shqiptare, masat e fundit rregullatore për mbrojtjen e konsumatorit dhe forcimi i stabilitetit financiar, si dhe rëndësia e bashkëpunimit ndërinstitucional në kuadër të integrimit në Bashkimin Evropian.

Sejko prezantoi situatën e përgjithshme ekonomike dhe perspektivat afatmesme, ndërsa u ndal tek ndërveprimi në rritje mes sektorit bankar dhe atij jobankar, konsolidimi i grupeve financiare ndërsektoriale dhe shkëmbimi i të dhënave statistikore për monitorimin e rreziqeve.

Palët diskutuan gjithashtu mbi bashkëpunimin për përmbushjen e detyrimeve nga kapitujt e acquis communautaire, duke përfshirë Kapitullin 4 “Lëvizja e lirë e kapitalit”, Kapitullin 9 “Shërbimet Financiare” dhe Kapitullin 17 “Politika ekonomike dhe monetare”.

Guvernatori Sejko riafirmoi angazhimin e Bankës së Shqipërisë për një bashkëpunim të qëndrueshëm dhe efektiv me AMF-në, si dhe për mbështetjen e vazhdueshme të stabilitetit makroekonomik dhe financiar të vendit.

e.xh/j.p/

The post Banka e Shqipërisë dhe AMF, bashkëpunim në kuadër të integrimit në BE appeared first on Agjencia Telegrafike Shqiptare.

TIRANË, 29 janar /ATSH/ Komisioni për Bujqësinë, Ushqimin dhe Zhvillimin Rural, miratoi sot projektligjin për ratifikimin e marrëveshjes së financimit ndërmjet Republikës së Shqipërisë, Francës dhe Komisionit Evropian për programin e bashkëpunimit Interreg Europe 2021-2027 (Interreg VI-C).

Drejtori i Konvergjencës dhe Kohezionit në SASPAC, Klajdi Demko tha se, marrëveshja, e miratuar nga Komisioni Evropian më 23 korrik 2024, i mundëson Shqipërisë të përfitojë fonde nga Instrumenti për Asistencën e Paraanëtarësimit (IPA) për projekte ndërrajonale bashkëpunimi dhe shkëmbimi të praktikave më të mira evropiane.

Demko bëri të ditur se, deri tani 38 përfitues institucione publike, janë angazhuar në zbatimin e projekteve në kuadër të “Interreg Europe”, me një vlerë totale 3.7 milionë euro.

Sipas tij, Interreg Europe synon përmirësimin e politikave rajonale dhe zhvillimit territorial, përmes shkëmbimit të njohurive, përhapjes së praktikave të mira dhe forcimit të kapaciteteve të institucioneve publike. Programi fokusohet tek fushat: zhvillim inteligjent, qëndrueshmëri mjedisore, politika sociale, inovacion dhe qeverisje vendore.

Gjatë diskutimit fjalën e mori edhe relatori i pr/ligjit deputeti Ornaldo Rakipi.

Ai vuri në dukje se pr/ligj forcon bazën ligjore për të përfituar nga projektet e europiane ku siç tha ai, bujqësia, agroturizmi janë ndër sektorët kryesorë.

Projektligji përcakton gjithashtu strukturën e menaxhimit të programit në Shqipëri, me Agjencinë Shtetërore të Programimit Strategjik dhe Koordinimit të Ndihmës (SASPAC) si autoritet kombëtar përgjegjës për koordinimin, monitorimin dhe certifikimin e projekteve.

“Përfituesit shqiptarë do të kenë mundësi të aplikojnë për projekte bashkëpunimi ndërkombëtar, duke zhvilluar rrjete bashkëpunimi me homologët evropianë dhe duke përvetësuar praktika të suksesshme të zhvillimit rajonal në vendet e Bashkimit Evropian”, vuri në dukje deputeti socialist.

“Ky projektligj përfaqëson një hap të rëndësishëm drejt integrimit evropian dhe modernizimit të politikave publike në Shqipëri, duke ofruar instrumente ligjore dhe financiare për projekte të qëndrueshme dhe efektive rajonale”, u shpreh Rakipi.

Referuar relacionit që shoqëron këtë pr/ligj programi ka një buxhet total prej 493 milionë eurosh, ku pjesa më e madhe sigurohet nga Bashkimi Evropian (rreth 394 milionë euro), ndërsa pjesa tjetër përbën bashkëfinancimin e shteteve pjesëmarrëse. Shqipëria, si vend përfitues, pritet të përfitojë rreth 2 milionë euro për periudhën e zbatimit të programit.

e.xh/j.p/

The post 38 institucione publike, përfituese nga programi Interreg Europe 2021-2027 appeared first on Agjencia Telegrafike Shqiptare.

TIRANË, 28 janar /ATSH/ Ministri i Bujqësisë dhe Zhvillimit Rural, Andis Salla, deklaroi se sektori i bujqësisë dhe agropërpunimit po shënon përmirësim të qëndrueshëm në eksport, duke u mbështetur në rritjen e standardeve, certifikimit dhe investimeve, me synimin që eksportet bujqësore të arrijnë në 1 miliard dollarë amerikanë deri në vitin 2030.

Gjatë përshëndetjes në aktivitetin “ExportON”, ministri Salla vlerësoi këtë platformë si një hap të rëndësishëm që bashkon në një tryezë të vetme politikat e eksportit, financimin, standardet, promovimin dhe pengesat reale të sektorit privat, veçanërisht në bujqësi dhe agropërpunim, ku potenciali i rritjes mbetet i lartë, por kërkesat për standarde janë gjithnjë e më të forta.

Salla theksoi se sot eksporti nuk përfaqëson vetëm shitjen e produkteve jashtë vendit, por lidhet ngushtë me besueshmërinë, certifikimin dhe garantimin e sigurisë për konsumatorin.

Sipas tij, raporti i eksporteve ndaj importeve ka arritur aktualisht në 1 me 3, nga 1 me 7 që ishte rreth një dekadë më parë, ndërsa objektivi afatmesëm i qeverisë është arritja e raportit një import me dy eksporte.

Ministri bëri të ditur se eksportet bujqësore shqiptare shtrihen sot në rreth 80 shtete, ku Bashkimi Evropian mbetet partneri kryesor tregtar, duke përfaqësuar rreth 58% të vlerës totale të eksporteve bujqësore.

Ai vuri në dukje se struktura e eksporteve tregon qartë fushat ku Shqipëria ka avantazh konkurrues, me zarzavatet që zënë peshën më të madhe si në sasi ashtu edhe në vlerë, të ndjekura nga peshku dhe produktet e detit.

“Kjo tregon se jemi në rrugën e duhur, pasi në tregun e Bashkimit Evropian hapet dera vetëm kur plotësohen standardet, kontrollet, dokumentacioni dhe siguria e produktit”, theksoi Salla.

Ministri bëri të ditur se aktualisht po punohet në disa drejtime paralele, ku një ndër prioritetet kryesore është përafrimi i plotë i legjislacionit me atë të Bashkimit Evropian, me synimin për finalizimin e transpozimit ligjor deri në vitin 2027 dhe konsolidimin e kontrollit zyrtar në nivel qendror dhe rajonal brenda vitit 2026.

Një tjetër drejtim i rëndësishëm është digjitalizimi i kontrollit ushqimor, i cili do të mundësojë monitorim të vazhdueshëm, standardizim të të dhënave në kohë reale dhe rritje të transparencës, në shërbim si të konsumatorit ashtu edhe të eksportuesit.

Në këtë kuadër, Salla nënvizoi rëndësinë e investimeve në rrjetin laboratorik, modernizimin e laboratorëve rajonalë dhe forcimin e pikave të inspektimit kufitar, të cilat janë thelbësore për besueshmërinë e analizave dhe lehtësimin e procedurave të eksportit.

Ministri theksoi se për të arritur objektivin “Bujqësia 2030”, rritja e eksporteve kërkon domosdoshmërisht edhe investime të reja. Për këtë qëllim, përmes skemave kombëtare dhe së shpejti edhe nëpërmjet programit IPARD, do të mbështetet modernizimi i fermave dhe kapaciteteve të përpunimit.

Salla bëri të ditur se për vitin 2026 janë planifikuar rreth 2 miliardë lekë mbështetje investimi, me grante deri në 50% të vlerës së investimeve, si dhe instrumente financiare përmes Fondit të Garancisë Sovrane për subjektet agropërpunuese, duke krijuar një paketë të integruar mbështetjeje.

“Ne do të vazhdojmë të ndërtojmë sistemin e standardeve dhe infrastrukturën mbështetëse. Ndërkohë, sektori privat duhet të investojë në cilësi, certifikim dhe organizim, sepse eksporti është një maratonë, jo një sprint. Së bashku duhet ta bëjmë Shqipërinë dhe produktin shqiptar një histori suksesi që lexohet në etiketë dhe provohet në treg, ‘Made in Albania’”, përfundoi ministri Salla.

e.xh/

The post Salla: Eksportet bujqësore drejt konsolidimit, synojmë 1 miliard dollarë deri në vitin 2030 appeared first on Agjencia Telegrafike Shqiptare.

TIRANË, 28 janar /ATSH/ Ministrja e Ekonomisë dhe Inovacionit, Delina Ibrahimaj, në prani të Kryeministrit Edi Rama mori pjesë në konferencën “Eksport On”, ku prezantoi vizionin dhe politikat e qeverisë për nxitjen e eksporteve dhe forcimin e prodhimit vendas, si shtylla kyçe të modelit të ri të zhvillimit ekonomik të Shqipërisë.

Në fjalën e saj, ministrja theksoi se ekonomia shqiptare ka shënuar përmirësime të qëndrueshme vitet e fundit, me rritje të prodhimit të brendshëm bruto, investimeve, punësimit dhe pagave, duke reflektuar një klimë pozitive për biznesin dhe sektorin privat. Megjithatë, ajo vuri në dukje nevojën për transformimin e strukturës ekonomike, duke kaluar nga një ekonomi e mbështetur kryesisht në shërbime dhe konsum vendas, drejt një modeli të bazuar në investime, eksporte dhe rritje të produktivitetit.

Ibrahimaj nënvizoi se, pavarësisht rritjes së eksporteve shqiptare në vitet e fundit, struktura e tyre dominohet nga shërbimet, ndërsa eksportet e mallrave kanë nevojë për mbështetje më të fortë, për shkak të lidhjes së drejtpërdrejtë me kapacitetin prodhues dhe industrializimin e vendit. Në këtë kuadër, ministrja bëri të ditur, se gjatë vitit 2026 do të miratohet një politikë e re industriale për nxitjen e prodhimit vendas.

Fokusi i fjalës së ministres ishte Programi për Nxitjen e Eksporteve, i miratuar në dhjetor të vitit të kaluar, i cili mbështetet në katër shtylla kryesore: ndërgjegjësimin dhe promovimin, thjeshtimin dhe digjitalizimin e procedurave, harmonizimin e standardeve me Bashkimin Europian dhe instrumentet financiare.

Në këtë kuadër, ajo vlerësoi rolin e AIDA-s dhe platformës Eksport On në rritjen e ndërgjegjësimit dhe informimit të bizneseve, si dhe njoftoi se gjatë këtij viti do të miratohet ligji për “Made in Albania”, i cili synon ndërtimin dhe promovimin e markës kombëtare, në përputhje me standardet e Bashkimit Europian.

Ministrja theksoi gjithashtu rëndësinë e digjitalizimit të procedurave tregtare, përmes çeljes së dritares së vetme unike për eksportuesit dhe zbatimit të projekteve të Bankës Botërore për lehtësimin e tregtisë. Ajo njoftoi se do të lançohet së shpejti edhe programi kombëtar për mbështetjen e biznesit në procesin e integrimit europian, me fokus në rritjen e kapaciteteve dhe financimin për arritjen e standardeve.

Një rol kyç në mbështetjen e eksporteve do të luajë edhe Banka e Zhvillimit, e cila do të shërbejë si instrument për financimin, modernizimin e industrisë dhe sigurimin e eksporteve, duke ulur kostot dhe riskun për bizneset shqiptare.

Në përfundim, Ibrahimaj theksoi rëndësinë e dialogut të vazhdueshëm me biznesin dhe garantoi se shqetësimet e tyre do të përkthehen në politika konkrete mbështetëse, me synimin që bizneset shqiptare të jenë më konkurruese dhe të përfitojnë nga aksesimi i tregut të përbashkët europian.

e.xh/j.p/

The post Ibrahimaj: Eksportet dominohen nga shërbimet, nevojitet mbështetje më e fortë për mallrat appeared first on Agjencia Telegrafike Shqiptare.

TIRANË, 28 janar /ATSH/ Në tregun e këmbimit valutor vendas, të mërkurën dollari amerikan humbi terren në raport me lekun, krahasuar me një ditë më parë, ndërsa euroja u forcua lehtë.

Sipas kursit zyrtar të Bankës së Shqipërisë, monedha e gjelbër amerikane zbriti me 0,60 lekë dhe këmbehet me 80,69 lekë.

Ndërsa euroja u forcua me 0,04 lekë dhe këmbehet me 96,65 lekë.

Paundi britanik, krahasuar me një ditë më parë, u nënçmua me 0,10 lekë, duke zbritur në kuotën e 111,26 lekëve.

Ndërkohë, franga zvicerane këmbehet me 105,16 lekë, ose 0,39 lekë më shumë se ditën e martë.

Banka e Shqipërisë vlerëson se kursi i këmbimit valutor paraqitet i qëndrueshëm dhe reflekton kërkesë ofertën e tregut, ndikuar nga faktorët sezonalë.

e.xh/j.p/

The post Dollari humb terren ndaj lekut, euroja forcohet lehtë appeared first on Agjencia Telegrafike Shqiptare.

TIRANË, 28 janar /ATSH/ Ministri i Shtetit për Pushtetin Vendor, Ervin Demo, deklaroi sot në një konferencë për mediet se “Paketa e Maleve” përbën një instrument të rëndësishëm që synon nxitjen e zhvillimit ekonomik dhe social të territorit, veçanërisht në zonat me potencial të pashfrytëzuar.

I pyetur nga ATSH mbi ecurinë e aplikimeve për investime të reja në kuadër të kësaj nisme, si dhe mbi shifrat konkrete, Demo bëri të ditur se janë miratuar tashmë 69 zona prioritare për zhvillim, me vendim të Këshillit të Ministrave, të shpërndara në 13 bashki.

Sipas tij, këto bashki janë Vau i Dejës, Klos, Mat, Shkodër, Shijak, Kukës, Skrapar, Elbasan, Përmet, Belsh, Memaliaj, Tepelenë dhe Dibër, të cilat kanë përfituar miratimin e zonave prioritare për zhvillim në kuadër të paketës.

Ministri theksoi se deri më tani janë evidentuar rreth 100 raste aplikimesh për investime të reja, të cilat ndodhen në faza të ndryshme të procesit të shqyrtimit, duke nënvizuar se ky proces është dinamik dhe ndryshon nga dita në ditë, për shkak të interesit në rritje.

“Fluksi më i lartë i aplikimeve lidhet me bashkitë që kanë territore më të mëdha. Bashkia Shkodër ka shfaqur interes shumë të lartë, po ashtu edhe Kukësi, por edhe bashkitë e tjera po ndjekin procesin me vëmendje” u shpreh Demo.

Ai shtoi se brenda dy muajve në vijim pritet të ketë një tablo më të qartë të aplikimeve, ndërsa qytetarët dhe sipërmarrësit do të ndërgjegjësohen gjithnjë e më shumë për përfitimet që ofron kjo nismë.

Demo bëri të ditur gjithashtu se numri i bashkive të përfshira në procesin e plotësimit të aplikimeve do të vijojë të rritet duke u shtrirë në 61, çka sipas tij tregon rritje të angazhimit në nivel vendor.

“Jam i bindur se bashkitë e kanë kuptuar rëndësinë e kësaj nisme, e cila është në interes të zhvillimit të territorit dhe të vetë bashkive, për të ndërtuar zona që ose nuk kanë pasur mundësi zhvillimi për shkak të problematikave të ndryshme, ose mund të shërbejnë si incentiva për të motivuar sipërmarrje të caktuara që të investojnë në këto zona”, tha ai.

Ministri nënvizoi se një investim i qëndrueshëm në agroturizëm ka efekt transformues jo vetëm për një fshat të vetëm, por për grupe fshatrash, duke ndikuar pozitivisht në prodhimin bujqësor, krijimin e tregjeve dhe veçanërisht në zhvillimin turistik të zonës.

Në përfundim, Demo shprehu bindjen se Paketa e Maleve është një element shtytës për zhvillimin e qëndrueshëm, duke siguruar se qeveria qendrore mbetet e gatshme të mbështesë bashkitë me informacion dhe asistencë teknike për zbatimin e plotë të kësaj nisme.

“Paketa e Maleve” është një nismë e qeverisë shqiptare e prezantuar në fillim të vitit 2025, që synon të nxisë zhvillimin ekonomik dhe social në zonat malore dhe rurale me potencial zhvillimi, përmes lehtësimit të procedurave dhe krijimit të incentivave për investime private.

Paketa fokusohet kryesisht në sektorë si agroturizmi, bujqësia, blegtoria, përpunimi i produkteve lokale dhe turizmi natyror, duke synuar krijimin e vendeve të reja të punës dhe frenimin e emigrimit nga zonat e thella. Në kuadër të kësaj nisme, bashkitë propozojnë zona prioritare për zhvillim, të cilat miratohen me vendim të Këshillit të Ministrave dhe përfitojnë mbështetje institucionale për realizimin e projekteve. e.xh/j.p/

The post Demo për ATSH-në: 69 zona prioritare në 13 bashki, 100 aplikime për investime në Paketën e Maleve appeared first on Agjencia Telegrafike Shqiptare.

TIRANË, 27 janar /ATSH/ Në tregun e këmbimit valutor vendas, të martën leku fitoi pikë ndaj valutave, krahasuar me një ditë më parë.

The post Leku fiton terren ndaj të gjitha valutave appeared first on Agjencia Telegrafike Shqiptare.

TIRANË, 27 janar /ATSH/ BERZH shënon vit rekord në financimin e projekteve në Shqipëri.

Drejtore e Zyrës së BERZH-it në Shqipëri, Ekaterina Solovova, bëri të ditur se viti 2025 ishte një vit jashtëzakonisht i suksesshëm për Bankën Evropiane për Rindërtim dhe Zhvillim në vend, me një nivel rekordi të financimeve dhe projekteve të mbështetura.

Duke marrë fjalën gjatë prezantimit sot në Tiranë, të raportit të tranzicionit të BERZH, 2025-26 “Brave old World”, Solovova tha se “gjatë vitit të kaluar, BERZH ofroi 217.5 milionë euro financim për 31 projekte, duke përfshirë projekte të rëndësishme infrastrukturore, energjetike dhe të sektorit privat, si dhe asistencë teknike dhe mbështetje për sipërmarrësit dhe institucionet vendase”.

Sipas saj, investimet kryesore u adresuan në infrastrukturë dhe energji.

“Nga totali i financimeve, 111 milionë euro u alokuan për projekte të infrastrukturës së qëndrueshme në sektorët e transportit dhe energjisë. Një nga projektet kryesore ishte rehabilitimi i Korridorit 8 të hekurudhës Durrës-Rrogozhinë, me financim të përbashkët nga BERZH (30 milionë euro) dhe grante prej 60 milionë euro nga Bashkimi Europian”, u shpreh Solovova.

Në sektorin e energjisë, vijoi ajo, BERZH ofroi 45.75 milionë euro për OSHEE për ristrukturimin e borxheve afatshkurtra dhe për modernizimin e rrjetit elektrik, ndërsa 30 milionë euro u dhanë KESH për ndërtimin e centralit diellor fotovoltaik prej 50 MW, duke përfshirë edhe 9.2 milionë euro grante investimi.

Në fokus të mbështetjes tonë është edhe sektori privat dhe sipërmarrësit.

“Përveç projekteve infrastrukturore, BERZH ka mbështetur konkurrueshmërinë e sektorit privat përmes programeve të turizmit, agrobiznesit dhe teknologjive inovative, duke ofruar ndihmë dhe asistencë teknike për bizneset, përfshirë gratë sipërmarrëse dhe sipërmarrësit e rinj.

Gjatë vitit 2025, BERZH realizoi gjithashtu 42 projekte këshillimi për bizneset e vogla, duke kontribuar në avancimin e programëve qeveritare dhe në integrimin e sipërmarrësve shqiptarë në tregjet ndërkombëtare”, theksoi Solovova.

Solovova vuri në dukje rëndësinë e ndihmës ndaj institucioneve financiare vendase dhe zhvillimit të kapitalit njerëzor në sektorin privat, duke ofruar mbështetje për një rritje të qëndrueshme dhe profesionalizim të sektorit financiar në Shqipëri.

“Viti 2025 ka qenë një vit i jashtëzakonshëm për BERZH në Shqipëri. Projeketet tona kanë sjellë ndryshime reale në infrastrukturë, energji, sipërmarrje dhe zhvillim rural. Historitë e suksesit që kemi ndihmuar të ndërtohen janë dëshmi e angazhimit tonë për një Shqipëri më moderne dhe konkurruese”, tha Drejtorja e BERZH-it Solovova.

e.xh/j.p/

The post Solovova: BERZH, 217.5 milionë euro për 31 projekte në Shqipëri gjatë vitit 2025 appeared first on Agjencia Telegrafike Shqiptare.

TIRANË, 27 janar /ATSH/ Ministri i Financave, Petrit Malaj, prezantoi sot në Kuvend aktin normativ për ndryshime në ligjin e buxhetit të vitit 2025, që parashikon mbështetjen e  shtresave në nevojë, përfshirë familjet me ndihmë ekonomike, personat me aftësi të kufizuar dhe kujdestarët e tyre, si dhe garanton fondet për skemën e pensioneve.

Ministri bëri të ditur se “mbështetja buxhetore për familjet me ndihmë ekonomike dhe personat me aftësi të kufizuar për vitin 2025 arrin në 256 milionë euro, përfshirë fondin për bonusin e fundvitit. Ndërsa fondi për pensionistët, që përfshin indeksimin dhe bonusin, është rreth 11,8 miliardë lekë”.

Akti normativ, parashikon transferimin e fondeve të papërdorura nga ministritë dhe institucionet buxhetore drejt llogarisë së mbështetjes së pensionistëve pranë Bankës së Shqipërisë dhe rialokimin e kursimeve të evidentuara që nga janari 2025 drejt projekteve me ecuri më të mirë.

“Me anë të këtij akti normativ ne synojmë mbajtjen të pandryshuar të totalit të të ardhurave buxhetore, rishpërndarjen e rreth 30 miliardë lekëve kursime të evidentuara për realizim sa më të plotë të shpenzimeve publike”, u shpreh Malaj.

Ministri deklaroi se, nga perspektiva makroekonomike, viti 2025 pritet të mbyllet me një rritje ekonomike prej 3,9%, borxhi publik vlerësohet të jetë 54% të PBB-së, në nivelin më të ulët se ndonjëherë. Të ardhurat nga tatimet, doganat dhe kontributet, sipas të dhënave paraprake, arritën në 668 miliardë lekë.

Ndër masat e tjera, akti siguron financim shtesë për fermerët (2 miliardë lekë), mbështetje për furnizimin me medikamente në QSUT dhe spitale të tjera (1,76 miliardë lekë), fonde për Policinë e Shtetit (1,3 miliardë lekë) dhe aktivitete sportive kombëtare dhe ndërkombëtare (847 milionë lekë).

Në drejtim të investimeve kapitale, janë parashikuar rialokime prej 10 miliardë lekësh për projekte me performancë më të mirë, përfshirë transportin rrugor (5,8 miliardë lekë), transportin ajror (4 miliardë lekë) dhe ujësjellës kanalizime (508 milionë lekë).

Investime të tjera përfshijnë: 200 milionë lekë për Institutin e të Miturve në Konflikt me Ligjin, 551 milionë lekë për blerjen e Selisë Diplomatike në Londër, 1 miliard lekë për kapitalin e Bankës Shqiptare të Zhvillimit dhe 1,2 miliardë lekë për shlyerjen e detyrimeve të prapambetura të njësive vendore.

Ministri i Financave theksoi se ky akt nuk është vetëm një instrument teknik buxhetor, por një akt përgjegjësie politike që ruan ekuilibrat fiskalë, garanton vijimësinë e konsolidimit fiskal dhe stabilitetin makroekonomik të vendit.

/e.xh/j.p/r.e/

The post Malaj: Rritja ekonomike 3,9%, borxhi publik në nivelin më të ulët prej 54% appeared first on Agjencia Telegrafike Shqiptare.

TIRANË, 26 janar /ATSH/ Federata Shqiptare e Futbollit (FSHF) prezantoi këtë të hënë strategjinë e re katërvjeçare “Vision to Victory 2026-2030”, e cila synon të sjellë zhvillime cilësore në të gjitha nivelet e futbollit shqiptar. Strategjia është ndërtuar në bashkëpunim me ekspertët e UEFA-s dhe mbështetet në një punë kërkimore të gjatë.

Në prezantim morën pjesë presidenti i FSHF-së, Armand Duka, ministri i Turizmit, Kulturës dhe Sportit, Blendi Gonxhja, përfaqësues të klubeve dhe shoqatave rajonale të futbollit, ish-futbollistë, sponsorë dhe media.

Presidenti Duka bëri një bilanc të strategjisë së kaluar “Futbolli për Kombin”, duke nënvizuar se 95% e objektivave janë realizuar ose janë në fazë të avancuar zbatimi. Ai theksoi se strategjia e re synon rritjen e pjesëmarrjes dhe cilësisë së futbollit, forcimin e strukturave organizative, investime të qëndrueshme në infrastrukturë dhe zhvillimin e talenteve të rinj.

“Kjo strategji është ndërtuar për të qenë e matshme, e zbatueshme dhe e lidhur drejtpërdrejt me realitetin e futbollit shqiptar. Deri në vitin 2030, synojmë të arrijmë 26 mijë futbollistë të regjistruar, nga 24.078 që janë sot”, tha presidenti Duka. Ai shtoi se rritja do të arrihet përmes zgjerimit të programeve në shkolla dhe komunitete, mbështetjes së klubeve për moshat e vogla, aktiviteteve të organizuara për fëmijët dhe vazhdimit të projekteve “Uniforma Ime” dhe “Topi YT”.

Në aspektin e infrastrukturës, strategjia parashikon shtimin e 30 deri në 40 fushave të reja futbolli deri në vitin 2030, kryesisht në rajonin e Tiranës. Duka theksoi se objektivi kombëtar është ndërtimi i 200 fushave të reja, një synim që kërkon mbështetje nga buxhetet e shtetit.

“Objektiv strategjik mbetet gjithashtu rritja e numrit të spektatorëve në stadiumet kombëtare, forcimi financiar i klubeve dhe akademive të futbollit dhe përfundimi i ligjit të Sponsorizimeve në Sport. Progresi i futbollit shqiptar do të jetë shumë i ngadaltë pa një ligj të tillë”, shtoi ai.

Presidenti i FSHF-së prezantoi edhe objektivat për ekipet kombëtare: pjesëmarrjen e ekipit A të djemve në turnetë finale europiane dhe botërore, kalimin e fazës së grupeve nga ekipi U-21 në Euro 2027 dhe Euro 2029, si dhe qëndrimin në Ligën B për ekipin kombëtar të vajzave dhe synimin për kualifikimin në Kampionatin Europian 2029.

Ministri i Turizmit, Kulturës dhe Sportit, Blendi Gonxhja, vlerësoi rëndësinë e partneritetit me Federatën Shqiptare të Futbollit (FSHF) dhe angazhimin e ministrisë për të çliruar potencialet e sportit dhe futbollit në vend.

Gonxhja theksoi se sporti është një nga gjeneratorët më të mëdhenj ekonomikë dhe turistik të vendit, ndërsa ligji i sponsorizimit do të përfaqësojë një hap kyç për zhvillimin e sportit, artit dhe kulturës.

“Kur kemi një partneritet dhe një aktor kaq të rëndësishëm dhe kaq të strukturuar siç është Federata Shqiptare e Futbollit, çfarë do të duhet të bënte më shumë Ministria që drejtoj sesa të sinkronizohej në strategji, në plan veprimi, në mendim, në gjithçka me FSHF, që është një organizatë në funksion të interesit publik”, tha ministri.

Ai shtoi se MTKS synon të çlirojë çdo mundësi dhe energji të bllokuara deri më sot, duke lidhur sportin me artin, kulturën dhe turizmin, të cilat sipas tij përbëjnë fitime të jashtëzakonshme për vendin.

“Ligji i sponsorizimit nuk është më zotim, është në masat e një betimi tim dhe të Presidentit të Federatës, sepse do të vijë për artin, sportin dhe rininë. Një kampionat, një skuadër e suksesshme, një sport i zhvilluar janë automatikisht gjeneratorë ekonomikë të jashtëzakonshëm”, deklaroi Gonxhja.

Ministri nënvizoi gjithashtu rëndësinë e mbështetjes së futbollit në të gjitha nivelet dhe bashkëpunimin me klubet, akademitë dhe institucionet për të forcuar zhvillimin e sportit në Shqipëri.

1 nga 3

/e.xh/a.f/r.e/

The post Strategjia për zhvillimin e futbollit 2026-2030, Gonxhja: Ligji për sponsorizimet, hap kyç appeared first on Agjencia Telegrafike Shqiptare.