Marc-Andre Ter Stegen gjendet sërish në qendër të tregut europian.

Portieri gjerman po kalon një moment kyç në karrierën e tij dhe e ardhmja e tij te Barcelona po shkakton më shumë dyshime se siguri, një skenar që Milan po e ndjek me kujdes.

Në ‘San Siro’, ata synojnë të përsërisin një formulë të fundit që dha rezultate të menjëhershme: ardhja e një veterani të provuar, qoftë me transferim të lirë apo me një kosto të ulët, i cili është në gjendje të udhëheqë nga dita e parë.

Paraqitja e Luka Modric te Real Madrid është ende e freskët në mendjen e bordit të ‘Rossonerëve’ dhe emri i portierit të Barcelonës përshtatet në këtë plan.

Situata e Ter Stegen Barcelona nuk është më po aq e qëndrueshme sa në sezonet e mëparshme. Edhe pse ai mbetet një pikë reference në dhomën e zhveshjes, klubi po konsideron skenarë të ndryshëm për të ardhmen e afërt.

Milani po ndjek me kujdes çdo lëvizje. Largimi i mundshëm i Mike Maignan, i cili ende nuk ka rinovuar kontratën, ka ndezur alarmin te drejtuesit italianë.

Klubi është i vendosur të mos marrë vendime të nxituara. Ata kërkojnë një portier të nivelit të lartë, me eksperiencë ndërkombëtare dhe karakter konkurrues.

Ter Stegen plotëson të gjitha këto kritere dhe ofron garanci të menjëhershme. Për më tepër, profili i tij përshtatet me idenë e Milanit për të mbetur pjesë e elitës europiane./Telegrafi/

Mesfushori kroat i Milanit, Luka Modric, deklaroi të mërkurën se Jose Mourinho ishte një trajner kaq i rreptë gjatë kohës së tyre te Real Madrid, sa që njëherë e bëri Cristiano Ronaldon të qante.

“E pashë që e bëri Cristiano Ronaldon të qante në dhomën e zhveshjes, një njeri që jep gjithçka në fushë, vetëm pse një herë nuk i bëri presion mbrojtësit kundërshtar”, tha Modric për gazetën italiane Corriere della Sera.

Ronaldo, tashmë 40 vjeç dhe te Al Nassr, u stërvit nga Mourinho në Madrid për tre vite, nga 2010 deri në 2013 dhe rrëfimi i Modricit për këtë moment emocional pasqyron marrëdhënien e tyre shpesh të tensionuar, e cila është përshkruar në detaje në një biografi të Ronaldos nga gazetar veterani spanjoll Guillem Balague, botuar në vitin 2015.

Modric luajti te Real Madridi me Ronaldon për gjashtë sezone nën drejtimin e Mourinho, Carlo Ancelotti, Zinedine Zidane dhe Rafa Benitez.

Ronaldo, që luajti nëntë sezone për ‘Los Blancos’, është pesë here fitues i Topit të Artë. Me Real Madridin ai fitoi katër herë Ligën e Kampionëve, tre herë Kupën e Botës për Klube dhe Superkupën e UEFA-s, dy herë titullin e La Ligës, dy Kupa të Mbretit dhe dy Superkupa të Spanjës.

Mourinho ishte trajneri që e transferoi Modricin nga Tottenham Hotspur dhe besimi i tij te mesfushori u shpërblye. Ata fituan së bashku Superkupën e Spanjës, ndërsa ndikimi i Modricit te e ardhmja e Madridit u bë i qartë.

Pavarësisht momenteve të tensionuara, Modric e përshkroi Mourinhon si “të veçantë".

“Si trajner dhe si person, ai ishte ai që më donte te Real Madrid. Pa Mourinhon, unë kurrë nuk do të kisha ardhur. Më vjen keq që e pata vetëm një sezon pranë tij”, ka deklaruar kroati./Telegrafi/

Një klub surprizë raportohet se është i interesuar për transferimin e Mohamed Salahut, pas përkeqësimit të marrëdhënies mes egjiptianit dhe trajnerit të Liverpoolit, Arne Slot.

Salah ndodhet aktualisht në Kupën e Afrikës së Kombeve (AFCON), ku ka ndihmuar Egjiptin të kalojë fazën e grupeve dhe të kualifikohet në raundin e 1/16-ave, duke shënuar dy gola në dy paraqitjet e tij në turne.

Natyrisht, përpara fillimit të turneut, ai dha një intervistë shumë kontroverse për gazetarët në zonën mikse, pas barazimit 3-3 të Liverpoolit në transfertë ndaj Leeds United më 6 dhjetor.

Sipas Teamtalk, disa burime kanë bërë të qartë se Salah ka pak gjasa të largohet nga Liverpool gjatë afatit kalimtar dimëror, i cili hapet më 1 janar, megjithatë po rritet ndjesia se ai mund të largohet gjatë verës.

Megjithatë, një raport ndryshe nga media italiane La Repubblica pretendon se ish-klubi i Salahut, Roma, po “luan me idenë” e një lëvizjeje për golashënuesin që aktualisht nuk është në planet kryesore.

Për shkak të pagës së raportuar prej 400 mijë eurosh në javë, klubi italian e konsideron këtë transferim si një “ëndërr”, ndërsa mbetet gjithashtu e mundur që lojtari të transferohet drejt një klubi nga Arabia Saudite.

Ndërkohë, Football Italia raporton se Liverpool do të ishte i gatshëm të shqyrtonte një marrëveshje huazimi në janar, edhe pse aspekti financiar i marrëveshjes pritet të jetë i vështirë për t’u negociuar.

Salah shënoi 34 gola dhe dhuroi 21 asistime në 83 paraqitje për Romën mes viteve 2015 dhe 2017, përpara se të transferohej te Liverpooli për një shumë të raportuar prej 34 milionë eurosh gjatë asaj vere./Telegrafi/

Mesfushori i Bayern Munich, Leon Goretzka, duket se do të largohet gjatë kësaj vere, dhe tashmë është bërë e ditur se ai do të ishte i hapur për një transferim në La Liga. Aq më tepër, ai ka qenë në kontakt me trajnerin e Barcelonës, Hansi Flick, lidhur me këtë ide.

Goretzka ka kontratë me Bayernin deri verën e ardhshme dhe, ndonëse klubi bavarez raportohet se po kërkon rinovimin e marrëveshjes së tij, mesfushori me përvojë po shqyrton seriozisht një lëvizje jashtë Gjermanisë.

Tottenham Hotspur, Napoli dhe Atletico Madrid janë lidhur të gjithë me një transferim të mundshëm të Goretzkës, me dy klubet e fundit që thuhet se janë veçanërisht të interesuara për shërbimet e 30-vjeçarit.

Sipas Mundo Deportivo, Goretzka ka qenë në kontakt me Flickun dhe e ka bërë të qartë se do të ishte i lumtur të luante sërish nën drejtimin e tij. Goretzka ishte një nga lojtarët që spikati më shumë te Bayern gjatë periudhës së suksesshme të Flickut në Bavari.

Të dy kanë bashkëpunuar ngushtë edhe më pas, me Flickun që mori drejtimin e kombëtares gjermane, ku kishte nën urdhra edhe Goretzkën.

Edhe pse Barcelona nuk po e konsideron prioritet përforcimin e mesfushës, Flick më herët ka lënë të kuptohet se do të ishte i interesuar për një transferim të Goretzkës.

Në janarin e kaluar, kur blaugranët po kalonin vështirësi, Flick ishte i prirur të sillte një mesfushor dominues dhe kishte shprehur interes të madh për një huazim të Goretzkës në atë periudhë./Telegrafi/

Një lojtar i kombëtares egjiptiane, i cili më parë ka luajtur përkrah Mohamed Salahut dhe ka pasur edhe një periudhë në Ligën Premier, është dënuar me një vit burg.

Raporte të ndryshme nga Egjipti kanë bërë të ditur se sulmuesi i Pyramids FC, Ramadan Sobhi, është dënuar me një vit burg, përfshirë punë të detyruar, për shkak të një çështjeje mashtrimi në provime, në të cilën ai dhe tre persona të tjerë janë akuzuar.

Sipas Egypt Independent, Gjykata Penale e Gizës e shpalli dënimin të martën (30 dhjetor), pasi i pandehuri u përball me akuza për lehtësimin e personifikimit në një institut privat, duke lejuar persona të tjerë të jepnin provime në vend të studentëve, në këmbim të përfitimeve financiare.

Personi që kishte dhënë provimet në vend të të pandehurit tjetër mori të njëjtin dënim.

Sobhi u arrestua në korrik, pasi u kthye nga Turqia, ku ishte duke u stërvitur, pas akuzave për falsifikim dokumentesh lidhur me provime në turizëm dhe hoteleri në një kolegj në Giza.

Dy të pandehur, përfshirë Sobhin, u dënuan me nga një vit burg dhe punë të detyruar, ndërsa një tjetër i pandehur, i cili sipas Sportstar është në arrati, u dënua me 10 vjet burg, por nuk ishte i pranishëm në gjykatë. Një roje sigurie u shpall i pafajshëm.

Sobhi përballet gjithashtu me një pezullim katërvjeçar pasi Gjykata e Arbitrazhit Sportiv (CAS) konfirmoi shkelje të rregullave antidoping në nëntor 2025, me testin e kryer në mars 2024.

Sulmuesi 28-vjeçar ka zhvilluar 37 ndeshje me kombëtaren e Egjiptit dhe ka përfaqësuar dy klube të atëhershme të Ligës Premier, duke luajtur 46 ndeshje për Stoke City dhe më pas katër ndeshje për Huddersfield Town./Telegrafi/

Ferizaj ka konfirmuar arritjen e marrëveshjes me mesfushorin Kushtrim Shabani, duke forcuar repartin e mesfushës së skuadrës bardhekaltër.

Shabani, i cili më parë ka qenë pjesë e Gjilanit, ka luajtur së fundmi për Llapin, ku ka treguar eksperiencë dhe stabilitet në lojën e tij.

Me këtë transferim, Ferizaj synon të shtojë cilësi dhe siguri në mesfushë për sezonin aktual.

Njoftimi i plotë i Ferizajt:

FC Ferizaj ka kënaqësinë të njoftojë arritjen e marrëveshjes me mesfushorin Kushtrim Shabani.

Kushtrimi ka qenë më herët pjesë e SC Gjilanit, ndërsa së fundmi ka luajtur për KF Llapi.

Ai sjell me vete eksperiencë, stabilitet dhe cilësi në repartin e mesfushës.

I urojmë mirëseardhje Shabanit në Ferizaj dhe shumë suksese me fanellën bardhekaltë./Telegrafi/

Ish-mbrojtësi i majtë i Real Madridit dhe i Brazilit, Roberto Carlos, po rikuperohet në spital pasi iu nënshtrua një operacioni në zemër.

Roberto Carlos, 52 vjeç, e kreu ndërhyrjen kirurgjikale në Brazil, pasi fillimisht ishte shtruar në spital për të kryer ekzaminime në këmbë.

Burime pranë fituesit të Kupës së Botës 2002 kanë bërë të ditur se ai ndodhet tashmë në proces rikuperimi.

Roberto Carlos i dha fund karrierës së tij si futbollist në vitin 2012, pas një karriere profesionale që zgjati 21 vite dhe përfshiu periudha te Palmeiras, Inter, Real Madrid, Fenerbahce, Corinthians dhe Anzhi Makhachkala.

Ai kaloi 11 vite te Real Madridi, nga 1996 deri në 2007, duke fituar katër tituj të La Ligës dhe Ligën e Kampionëve në tri raste. Aktualisht, ai mban një rol ambasadorial në klub.

I konsideruar gjerësisht si një nga mbrojtësit e majtë më të mëdhenj në historinë e futbollit, Roberto Carlos zhvilloi 125 ndeshje me kombëtaren e Brazilit nga viti 1992 deri në 2006.

Ai ishte pjesë e ekipit brazilian që fitoi Kupën e Botës në vitin 2002 dhe që arriti në finale në vitin 1998, ndërsa në dhjetor u pa edhe në shortin e Kupës së Botës 2026 në Uashington DC.

Ish-reprezentuesi brazilian ishte i njohur për aftësitë e tij në goditjet standarde, me golin e shënuar ndaj Francës në vitin 1997 që shpesh cilësohet si goditja e dënimit më e bukur e të gjitha kohërave.

Ai u rikthye për pak kohë nga pensionimi në vitin 2015, si pjesë e një roli lojtar-trajner te skuadra indiane, Delhi Dynamos, përpara se të largohej nga klubi në vitin 2016./Telegrafi/

Real Madrid nuk do të bëjë asnjë përforcim gjatë afatit kalimtar dimëror, por mund të ketë një njoftim në lidhje me një kontratë të re.

Zyrtarët e klubit kanë rinovuar kontratat e disa lojtarëve gjatë 12 muajve të fundit, dhe njëri prej tyre ka qenë Brahim Diaz.

Brahim, i cili aktualisht po shkëlqen me Marokun në Kupën e Afrikës së Kombeve, ka pasur vështirësi për të siguruar minuta të rregullta këtë sezon, por pavarësisht kësaj, ai mbetet një pjesë e vlerësuar e skuadrës së Xabi Alonsos.

Kjo është bërë e qartë nga fakti se ai ka rënë dakord për një kontratë të re gjatë verës, siç raporton Marca.

Ishte në muajin qershor që Brahim arriti një marrëveshje me Real Madridin për të zgjatur qëndrimin e tij në klub.

Kontrata e tij e mëparshme ishte parashikuar të skadonte pas 18 muajsh, gjë që do të kishte krijuar pasiguri për të ardhmen e tij, veçanërisht duke pasur parasysh se nuk ka pasur asnjë njoftim zyrtar apo prezantim nga klubi.

Real Madrid e konsideron Brahimin një lojtar të rëndësishëm, ndaj edhe e ka lidhur atë me klubin për disa vite të tjera.

Koha për ta bërë rinovimin zyrtar do të vijë, por kjo nuk do të ndodhë të paktën deri pas përfundimit të Kupës së Kombeve të Afrikës./Telegrafi/

Në vitin 2026, Barcelona do të zhvillojë zgjedhjet e radhës për president, me një numër kandidatësh të vendosur për të rrëzuar Joan Laportën.

Njëri prej tyre është Marc Ciria, fushata e të cilit mban emrin “Moviment 42”.

Ciria, me formim në ekonomi dhe financë, e sheh veten si kandidatin ideal për të zgjidhur problemet financiare të Barcelonës.

Siç i ka thënë ai Sport, këtë synon ta realizojë duke rikthyer Lionel Messin në klub, i cili ka një marrëdhënie të vështirë me Laportën.

“Leo Messi është një figurë globale. E vërteta është se ai ngjall zili, dhe ne duhet të marrim shembull nga shumë gjëra, sepse ai ka profesionistë të nivelit më të lartë në çdo aspekt”.

“Pra, kjo nuk ka të bëjë me të shkuarit për të ngrënë një barbecue, por me propozimin e një projekti real, në të cilin Leo Messi është një partner strategjik për klubin”.

“Rrethi dhe njerëzit që marrin vendime bashkë me Leo Messin kanë një projekt për të që ai të jetë partner strategjik në të gjitha fushat ku ne kemi urgjentisht nevojë të rrisim të ardhurat”.

“Vetëm një fakt: aktualisht ne po gjenerojmë 994 milionë euro të ardhura. Në vitin financiar 2017/18, me atë që për mua ishte bordi më i keq drejtues në historinë e klubit, ne gjeneronim 990 milionë euro”.

“Nëse aplikojmë vetëm inflacionin dhe koston e jetesës, Barça sot duhet të ishte në 1.2 miliardë euro të ardhura”.

“Ose e kuptojmë që Leo Messi është strategjik, jo për sot, por për të ardhmen e klubit dhe për të mbrojtur e ruajtur modelin e pronësisë, ose nuk po e kuptojmë botën e sportit”, ka deklaruar ai./Telegrafi/

Toni Kroos ka përmendur Marokun si një befasi të mundshme për Kupën e Botës 2026, përkrah pretendentëve të zakonshëm kryesorë nga Evropa.

Gjatë një bisede me ikonën braziliane Romario, Kroos u pyet për favoritët e tij për turneun që do të zhvillohet në SHBA, Meksikë dhe Kanada.

“Maroku, zgjedhje surprizë. Dhe nuk do të them Brazili, edhe pse nëse fitojnë, është në rregull”, ka deklaruar Kroos.

Përveç kësaj zgjedhjeje të papritur, Kroos përmendi Spanjën, Portugalinë dhe Francën si favoritët kryesorë, por theksoi se Maroku mund të sfidojë sërish pritshmëritë.

Ai duket se i rendit ata madje përpara Gjermanisë, duke vlerësuar cilësinë teknike dhe përmirësimet e fundit të skuadrës.

Përfaqësuesja e Afrikës së Veriut arriti gjysmëfinalet e Kupës së Botës 2022 dhe ka nisur fuqishëm edhe Kupën e Kombeve të Afrikës, duke mposhtur Zambinë 3-0.

Kroos gjithashtu kritikoi formatin e zgjeruar të Kupës së Botës me 48 ekipe, duke thënë: “Nuk jam tifoz i rezultateve 5-0 apo 6-0”./Telegrafi/

Uganda përdori të tre portierët e saj kundër Nigerisë në një ndeshje kaotike të Kupës së Kombeve të Afrikës.

Uganda kishte nevojë patjetër për fitore ndaj Nigerisë për të kaluar në raundin tjetër. Shpresat e saj për kualifikim u goditën që në pjesën e parë, kur Nigeria kaloi në epërsi me golin e Paul Onuachu. Ata shënuan edhe dy gola të tjerë në pjesën e dytë, me Raphael Onyedik që realizoi dopietë.

Sulmuesi i Ugandës, Rogers Mato, ngushtoi diferencën 15 minuta para fundit të ndeshjes.

Sfida u bë e vështirë për “The Cranes” që në fillim, pasi situata u përkeqësua kur portieri titullar Denis Onyango pësoi një përdredhje të kyçit të këmbës në rezultatin 0-0, teksa përpiqej të shmangte një goditje nga këndi.

Onyango, 40 vjeç, vazhdoi lojën pavarësisht dhimbjeve dhe madje bëri edhe një pritje vendimtare për të ndalur ish-sulmuesin e Southamptonit, Paul Onuachu. Megjithatë, ai u mposht në minutën e 28-të, kur Onuachu hapi serinë e golave.

Para pushimit, Onyango kishte nevojë për trajtim shtesë dhe në pjesën e dytë u zëvendësua nga Salim Jamal Magoola.

Por paraqitja e Magoolës zgjati vetëm 11 minuta. Ai u ndëshkua me karton të kuq direkt pasi preku topin me dorë jashtë zonës, duke dalë për të ndalur sulmuesin yll Victor Osimhen.

Si pasojë, portieri i tretë, Nafian Alionzi, u aktivizua në mënyrë të papritur.

Ai u mposht vetëm tre minuta pas hyrjes në lojë. Raphael Onyedik, i Club Brugge, shënoi duke ia kaluar topin mes këmbëve në minutën e 62-të dhe realizoi golin e dytë personal vetëm pesë minuta më vonë.

Uganda u eliminua kështu nga AFCON pasi përdori të tre portierët në ndeshjen e fundit të fazës së grupeve./Telegrafi/

Arsenal dhuroi një paraqitje autoritare, duke mposhtur Aston Villën në kuadër të javës së 19-të në Ligën Premier me rezultatin e thellë 4-1, në një ndeshje ku vendasit treguan qartësisht diferencën në cilësi, ritëm dhe efikasitet

Pjesa e parë u karakterizua nga raste në të dyja krahët. Aston Villa humbi një mundësi të artë në minutën e 13-të, kur Ollie Watkins dështoi të shfrytëzonte një pasim ideal brenda zonës.

Nga ana tjetër, Arsenal iu afrua golit disa herë me Viktor Gyokeres, i cili në minutën e shtatë dhe më pas në të 36-tën dërgoi topin vetëm pak centimetra jashtë portës.

Zhbllokimi i ndeshjes erdhi menjëherë pas pushimit. Në minutën e 48-të, pas një goditjeje këndi të ekzekutuar nga Bukayo Saka, Gabriel reagoi më shpejt në zonë dhe shënoi për 1-0.

Arsenal vazhdoi presionin dhe në minutën e 52-të dyfishoi avantazhin. Martin Odegaard shërbeu saktë në zonë, ndërsa Martin Zubimendi finalizoi me qetësi për 2-0, duke vendosur kontrollin total të ndeshjes në duart e “Topçinjve”.

Skuadra e Mikel Artetës nuk u ndal me kaq. Pas një pritjeje spektakolare të Emiliano Martinez ndaj Odegaard në minutën e 66-të, erdhi momenti më i bukur i takimit.

Në minutën e 69-të, Leandro Trossard realizoi një volej të mrekullueshëm nga jashtë zone pas asistit të Jurrien Timber, duke e çuar rezultatin në 3-0. Edhe ky gol kaloi filtrin e VAR-it dhe u pranua pa shkelje.

Goditja përfundimtare erdhi në minutën e 79-të, kur Gabriel Jesus, i futur si zëvendësues, përfitoi nga një aksion i shpejtë ofensiv dhe shënoi për 4-0.

E tëra çfarë mund të bënin mysafirët ishte një gol nderi nga Ollie Watkins që realizoi për 4-1 në minutën e 93-të të takimit.

Pas kësaj fitoreje Arsenali shkon në kuotën e 45 pikëve dhe mban kryesimin në tabelë, me pesë më shumëse Man City në pozitën e dytë që ka 40 pikë dhe një ndeshje më pak të luajtur./Telegrafi/

Jack Grealish mund të jetë i disponueshëm për një shumë shumë më të ulët sesa opsioni prej 50 milionë paundësh që përfshihet në marrëveshjen e huazimit me Evertonin.

Everton arriti verën e kaluar një marrëveshje huazimi njëvjeçare me Manchester City për Grealish, e cila përfshin edhe një opsion blerjeje të përhershme për 50 milionë euro, gjysma e shumës që City pagoi për ta transferuar në “Etihad” në verën e vitit 2021.

Megjithatë, Everton mund të gjendet në një situatë ku 30-vjeçarin ta sigurojë për një shumë dukshëm më të vogël.

Sipas ish-këshilltarit financiar të Manchester City, Stefan Borson, nuk ka asnjë mundësi që Everton të paguajë shumën e plotë të klauzolës së blerjes.

Borson ka shpjeguar se si David Moyes mund t’i sigurojë shërbimet e Grealish në mënyrë të përhershme për vetëm 20 milionë euro.

“Nuk mendoj se do të ketë një luftë të madhe ofertash për lojtarin. Mendoj se ai është i lumtur te Evertoni. Besoj se Everton mund ta marrë për rreth 20 milionë euro, maksimumi”.

“Nëse City arrin të dalë nga marrëveshja në vitin e fundit për vlerën e amortizuar të lojtarit, e cila ndoshta do të jetë rreth 20 milionë paundë deri në verë, mendoj se City do ta pranojë këtë, ose edhe një humbje të vogël, vetëm për ta hequr nga lista e pagave”, u shpreh Borson.

Grealish, i cili i kushtoi Manchester Cityt 100 milionë euro, ka kontratë me klubin deri në qershor të vitit 2027.

Ai ka zhvilluar 157 paraqitje dhe ka shënuar 17 gola në katër sezone me Cityn, pas transferimit nga Aston Villa./Telegrafi/

Milan po shqyrton opsione për të zëvendësuar potencialisht Christopher Nkunku dhe sipas Gazzetta, Jean-Philippe Mateta dhe Darëin Nunez janë në axhendën e ‘Rossonerëve’.

Burime të shumta në Itali bëjnë me dije se klubi turk Fenerbahce ka dërguar një ofertë hapëse për të nënshkruar me sulmuesin e Milanit, Nkunku, ndërsa Rossonerët po bëjnë vlerësime mbi të ardhmen e francezit te San Siro.

Sipas Gazzetta, Rossonerët kanë vendosur tashmë synimet mbi disa sulmues që mund të zëvendësojnë Nkunku gjatë afatit të janarit.

Sidiki Cherif i Angers, autor i katër golave këtë sezon në Ligue 1, është një nga opsionet e Milanit, dhe raporti shton se dy klubet kanë nisur tashmë bisedime preliminare.

Megjithatë, me Francesco Camarda që pritet të kthehet nga huazimi te Lecce verën e ardhshme, Rossonerët mund të vendosin të mos nënshkruajnë një tjetër sulmues të ri.

Darwin Nunez ishte një lojtar që Milan interesohej gjatë verës së kaluar, dhe Gazzetta konfirmon se ish-lojtari i Liverpool tashmë dëshiron të largohet nga Al-Hilal, por kërkesat e klubit arab pritet të jenë të larta.

E njëjta gjë vlen për Jean-Philippe Mateta, një objektiv i gjatë i Milanit, por Crystal Palace nuk pranojnë ta shesin për më pak se 40 milionë euro.

Mauro Icardi dhe Joshua Zirkzee kanë eksperiencë në Serie A dhe mund të lejohen të largohen në janar, por vetëm në gjysmën e dytë të muajit, pasi Galatasaray dhe Manchester United kanë mungesë opsionesh në sulm për shkak të AFCON.

Së fundi, është edhe Rayan i Vasco da Gama. Brazilian nuk është pikërisht një sulmues qendre, pasi preferon të luajë si krah ose si sulmues anësor.

Pavarësisht se ka një klauzolë lirimi prej 80 milionë eurosh, ai mund të largohet për një shumë më të ulët sepse klubi brazilian po kalon vështirësi financiare, por konkurrenca për 19-vjeçarin do të jetë e fortë./Telegrafi/

Real Madrid ka intensifikuar përpjekjet për transferimin e qendërmbrojtësit të Crystal Palace, Marc Guehi, përpara afatit të transferimeve verore, duke informuar drejtpërdrejt përfaqësuesit e lojtarit për interesin e tyre të fortë dhe njohurinë mbi vlerën e tij në treg.

Reprezentuesi anglez, i cili ka kontratë deri në qershor, është shfaqur si një kandidat kryesor për të forcuar mbrojtjen e ‘Los Blancos’, me klubin gati të hapë negociata zyrtare nga 1 janari sipas rregullave të FIFA-s për parakontrata.

Sipas raportimeve të AS, Real Madrid ka shprehur shqetësim ndaj kampit të Guehit për marrëveshje të mundshme të mëparshme me Liverpool, pas thashethemeve që lindën nga një marrëveshje e dështuar prej 35 milionë eurosh verën e kaluar, kur mbrojtësi kaloi testin mjekësor, por Palace tërhoqi ofertën pas kërcënimit të dorëheqjes nga trajneri Oliver Glasner.

Burimet konfirmojnë se një marrëveshje e tillë nuk ekziston dhe ndërsa Liverpool mbetet i interesuar, çdo bisedë do të niste nga e para në rrethana krejtësisht të ndryshuara pasi Guehi afrohet tek liria e kontratës.

Guehi po mban opsionet e hapura mes interesit nga disa klube elitare, por thuhet se do t’i jepte prioritet Real Madrid nëse ata konkretizojnë qasjen e tyre, duke parë një transferim në ‘Santiago Bernabeu’ si një ëndërr të jetës.

Alternativa të tjera si Ibrahima Konate dhe Dayot Upamecano janë ftohur për shkak të kërkesave të fryra të pagave nga agjentët e tyre, duke u përputhur me mosgatishmërinë e drejtuesve madrilen për të hyrë në luftë ofertash./Telegrafi/

Rasmus Hojlund ka folur për kohën e tij te Manchester United dhe thotë se ndihej se ishte paraqitur mirë, veçanërisht gjatë sezonit të tij të parë në ‘Old Trafford’.

Sulmuesi danez më pas u largua me një huazim njëvjeçar te skuadra e Serie A, Napoli, dhe aktualisht po shkëlqen nën drejtimin e Antonio Contes, duke e bërë të mundur që qëndrimi i tij te klubi italian të bëhet i përhershëm.

Hojlund ka shënuar gjashtë gola në 12 ndeshje në kampionatin italian, duke ndihmuar Napolin të ngjitet në vendin e tretë në tabelë, vetëm dy pikë pas udhëheqësve, Interit.

Transferimi përfshinte gjithashtu një opsion blerjeje, i cili pritet të aktivizohet nëse Napoli kualifikohet në Ligën e Kampionëve.

Sulmuesi foli gjithashtu për largimin e tij nga United dhe arsyet pse duhej të niste një aventurë të re.

“United më bëri të qartë që nuk bëja pjesë të planeve për këtë sezon. Duke ardhur në sezon, dhe pa futboll evropian, mendoj se Napoli pa një mundësi për të më marrë”.

“Sapo dëgjova për interesin e tyre, i bëra të qartë ekipit tim dhe njerëzve rreth meje që doja vetëm të shkoja atje. Kam pasur disa biseda të mira me trajnerin dhe me drejtorin sportive”.

Sulmuesi foli më pas për bisedën e tij me Conten rreth transferimit.

“Nuk zgjati shumë. Mendoj se të dy ishim të qartë që ishte një hap i mirë për mua dhe një përputhje e mirë. Ishte një bisedë e shkurtër, por shumë e mirë”.

“Ai është një trajner i jashtëzakonshëm, unë pothuajse gjithmonë kam parë që ai bën gjëra të mira kudo ku ka qenë. Sigurisht, kjo ishte një pjesë e madhe e vendimit. Kur të thërret ai, thjesht duhet të thuash po”, ka deklaruar Hojlund./Telegrafi/

Sulmuesi i krahut të Rayados de Monterrey, Lucas Ocampos, do të mungojë për të paktën dy javë pasi është diagnostikuar me paralizë faciale në anën e majtë të fytyrës, që besohet të ketë origjinë virale.

Argjentinasi, një lojtar kyç në sulmin e klubit, do të humbasë ndeshjen hapëse kundër Toluca më 11 janar dhe duhet të qëndrojë në pushim të plotë shtrirë në shtrat si pjesë e trajtimit të tij.

Në një deklaratë zyrtare, Monterrey njoftoi: “Lojtari Lucas Ocampos është diagnostifikuar me paralizë faciale në anën e majtë të fytyrës, që besohet të jetë me origjinë virale. Lojtari u vlerësua nga një specialist për të përcaktuar trajtimin e duhur”.

Klubi shtoi se Ocampos do të qëndrojë në pushim për shtatë ditë, pas së cilës do të vlerësohet përparimi i tij për të vendosur se kur mund të rikthehet në stërvitjen e grupit gjatë përgatitjeve parasezonale.

Ky problem shëndetësor është pjesë e një periudhe të vështirë për 31-vjeçarin që kur u bashkua me Monterrey nga Sevilla në vitin 2024, e karakterizuar nga disa lëndime të pazakonta.

Së fundmi, vetëm disa muaj më parë, ai pësoi një frakturë të dorës dhe trauma faciale gjatë një aksidenti të çuditshëm, ndërsa ndihmonte njërën nga vajzat e tij për të kalëruar./Telegrafi/

Oficeri i policisë përgjegjës për sigurinë e ekipit kombëtar francez të futbollit është sanksionuar me pension të parakohshëm nga Drejtoria e Përgjithshme e Policisë Kombëtare të Francës (DGPN).

Gjithçka ndodhi pasi ai mori një dhuratë monetare nga Kylian Mbappe, raporton AFP, duke iu referuar një burimi pranë çështjes dhe duke konfirmuar shkrimin e gazetës Le Monde.

Bëhet fjalë për një donacion në shumën prej 60,300 eurosh që një oficer policie i caktuar në Federatën Franceze të Futbollit (FFF) mori në qershor 2023.

Janë para që Mbappe mori si bonus pasi fitoi vendin e dytë në Kupën e Botës në Katar në vitin 2022. Në korrik 2024, banka ia raportoi transaksionin Tracfinës, shërbimit të inteligjencës financiare të Ministrisë Franceze të Financave, pas së cilës u hap një hetim gjyqësor.

Avokati i oficerit të policisë, Jean-Baptiste Soufron, i tha AFP-së më parë se donacioni ishte plotësisht i ligjshëm, i bërë me çek dhe se nuk kishte asnjë detyrim ligjor për ta raportuar atë.

Edhe pse polici ishte subjekt i një hetimi administrativ nga Inspektorati i Përgjithshëm i Policisë (IGPN), në tetor ai u thirr para këshillit disiplinor, i cili nuk vendosi asnjë sanksion në atë kohë.

Megjithatë, disa javë më vonë, më 20 dhjetor, DGPN vendosi për pensionimin e tij të parakohshëm sepse ai nuk i informoi eprorët e tij për donacionin.

Sipas burimeve, oficeri i policisë, duke ushtruar të drejtat e tij, ka kërkuar gjithsesi daljen në pension dhe është larguar nga shërbimi më 31 dhjetor.

Gjithashtu shtohet se ai është një mik familjar i familjes Mbappe dhe se FFF duhet ta punësojë atë përmes një kontrate të përkohshme për Kupën e Botës të ardhshme.

Avokati i tij njoftoi një apel në gjykatën administrative, duke argumentuar se vendimi i DGPN është kontradiktor, pasi akuzat e tjera, përfshirë pretendimet për punë paralele ose të fshehur në Kamerun, ishin rrëzuar më parë pas paraqitjes së shpjegimeve para panelit disiplinor.

"Kjo histori nuk ka bazë ligjore. Donacioni ishte i ligjshëm dhe nuk u kundërshtua kurrë. Ekziston një qëllim i qartë për të ngacmuar, veçanërisht duke pasur parasysh që komandanti duhej të dilte në pension në fund të vitit", ka thënë Abdel Aissou.

Pavarësisht kësaj, një hetim gjyqësor në lidhje me dyshimet për punë të fshehtë dhe pastrim parash që lidhen me mashtrim të mundshëm tatimor është ende në vazhdim.

Në të njëjtin kontekst, katër brigadierë të tjerë morën nga 30,000 euro secili, duke e çuar shumën totale të donacioneve të shpërndara nga Mbappé në 180,300 euro. Ata që rrethojnë kapitenin e ekipit kombëtar francez thonë se "gjithçka u bë në përputhje me rregullat" dhe se nuk kishte "asnjë favorizim"./Telegrafi/

Trajneri i Manchester City, Pep Guardiola, ka zbuluar çelësin pas rikthimit të “Cityzens” dhe njëkohësisht ka dërguar një paralajmërim për garën e titullit në Ligën Premier ndaj Arsenalit.

Gunners u përkohësisht zëvendësuan në krye të tabelës pas fitores së City ndaj Nottingham Forest të shtunën e kaluar, përpara se londinezët e veriut të rikuperonin vendin e parë pas triumfit ndaj Brighton më vonë gjatë ditës.

“Energjia, energjia, energjia. Energjia që humbëm sezonin e kaluar, të gjithë filluan të stërviten më mirë dhe të konkurrojnë më mirë [kur ishim në Amerikë]. Energjia”.

“Kjo është veprimi i parë, pas kësaj mund të flasim për katërshejen e mbrojtjes, krahët e sulmit por së pari duhet të jetë energjia”.

“Kur shkuam te Al-Hilal nuk ishte çështja që nuk fituam Kupën e Botës për Klube, ishte fakti që ishim kaq mirë atje. Nuk ishin pushime. U zemërova sepse ishim mirë atje”.

“Mirë në stërvitje, lojtarët në Boca Raton, para plazhit, të gjithë ishin të lumtur, organizuam shumë darka, shumë biseda për atë që do të ndodhte këtë sezon. Dhe dëshironim të qëndronim atje”.

“Por pas kësaj, bisedova me Pep (Lijnders), James (French), Manel (Estiarte), Hugo (Viana), Txiki (Begiristain), dhe diçka ndryshoi”.

“Kjo nuk do të thotë që do të fitojmë gjithçka, por të njohësh një skuadër që mund të bëjë tetë fitore radhazi dhe të konkurrojë në mënyrën që bëjmë ne. A mund të përmirësohemi? Absolutisht, por ky mentalitet është më i mirë”, ka deklaruar tekniku spanjoll.

Në përgjithësi, Guardiola thekson rëndësinë e energjisë dhe mentalitetit të skuadrës si bazën e rikthimit të City në garën për titull./Telegrafi/

Borussia Dortmund ka vendosur një çmim prej 70 milionë eurosh për mbrojtësin Nico Schlotterbeck, i cili pritet gjerësisht të largohet nga klubi në verën e vitit 2026, pasi ka refuzuar të rinovojë kontratën që zgjat deri në vitin 2027.

Problemet e brendshme dhe bisedimet e bllokuara për rinovimin e kontratës e kanë bërë largimin e tij pothuajse të pashmangshëm.

Kjo e ka shtyrë klubin e Bundesligës të maksimizojë përfitimin nga mbrojtësi 26-vjeçar gjerman përpara se ai të hyjë në vitin e fundit të kontratës.

Barcelona, Real Madrid dhe Bayern Munich janë ndër klubet kryesore që po ndjekin atë, me Barcelonën veçanërisht të interesuar për të përforcuar këtë pozicion pas largimit të Inigo Martinez, pavarësisht paraqitjeve solide të Gerard Martin.

Tarifa e lartë e kërkuar, e kombinuar me konkurrencën e fortë dhe kufizimet e vazhdueshme financiare të Barcelonës, si edhe nevoja për të financuar një zëvendësues për Robert Lewandowskin që pritet të largohet, mund ta komplikojë çdo lëvizje të mundshme, duke e kthyer Schlotterbeck në një nga sagat më të mëdha të afatit kalimtar të verës së ardhshme.

Nga ana tjetër, Bayern Munich e sheh Schlotterbeck si një përforcim ideal për të ardhmen, duke qenë se ai e njeh mirë kampionatin dhe nuk do të kishte nevojë për periudhë të gjatë përshtatjeje.

Edhe Real Madrid po ndjek situatën, në kuadër të politikës së tyre për të rinovuar gradualisht mbrojtjen me lojtarë të rinj dhe të dëshmuar në nivel të lartë./Telegrafi/