PRISHTINË, 28 dhjetor /ATSH/ Komisioni Qendror i Zgjedhjeve e ka vlerësuar procesin zgjedhor si të qetë dhe pa incidente që do të cenonin integritetin apo besueshmërinë e procesit zgjedhor në Kosovë.

Kryesuesi i Komisionit Qendror të Zgjedhjeve, Kreshnik Radoniqi, ka bërë të ditur se deri në përditësimin e fundit nga 98 për qind e vendvotimeve, në zgjedhje kanë votuar 890 mijë e 859 qytetarë, apo 44.56 për qind e votuesve me të drejtë vote.

Sipas të dhënave paraprake të KQZ-së, numri i përgjithshëm i qytetarëve me të drejtë vote është 1 milionë e 999 mijë e 204. Radoniqi bëri edhe një krahasim me zgjedhjet e 9 shkurtit 2025, ku deri në të njëjtën kohë, nga rreth 91 për qind e vendvotimeve, kishin votuar 40.04 për qind, apo 789 mijë e 172 votues nga 1 milion e 970 mijë e 944 gjithsej.

Ai theksoi se gjatë gjithë ditës së votimit nuk janë evidentuar incidente që do të cenonin integritetin apo besueshmërinë e procesit zgjedhor në Kosovë.

“Në të dhënat preliminare nga 98 për qind e vendvotimeve numri i qytetarëve me të drejtë vote 890 mijë e 859 votues apo 44.56 për qind nga 1 milion e 999 mijë e 204 votues. Deri në të njëjtën kohë në zgjedhjet e 9 shkurtit 2025, rreth 91 për qind e vendvotimeve kishin votuar 40.04 për qind apo 789 mijë e 172 votues nga 1 milion e 970 mijë e  944 votues”,tha ai.

Sipas tij, pas konferencës së pasdites janë raportuar tri ndërprerje të energjisë elektrike në qendra votimi në komunat Rahovec, Dragash dhe Han i Elezit, por situata është menaxhuar shpejt.

“Duke u mbështetur në komunikimet dhe raportimet që kemi pranuar gjatë gjithë ditës nga terreni, vlerësojmë se procesi zgjedhor në Kosovë është zhvilluar në mënyrë të qetë, të rregullt dhe në përputhje me kërkesat ligjore. Deri në këtë kohë që flasim, nuk janë evidentuar incidente të cilat do të mund të cenonin integritetin, besueshmërinë apo mbarëvajtjen e përgjithshme të procesit. Pas konferencës së pasdites, kemi pasur tri raportime për ndërprerje të energjisë elektrike në tri qendra votimi të komunave Rahovec, Dragash dhe Han i Elezit. Menjëherë është njoftuar KEDS-i dhe sipas informatave, energjia elektrike është rikthyer në kohë shumë të shpejtë.  Në emër të KQZ-së, falënderojmë institucionet e ndryshme për angazhimin e tyre në mbarëvajtjen e procesit zgjedhor, si, Policinë e Kosovës, Prokurorinë e Shtetit, si dhe KEDS-in për trajtimin në kohë të shpejtë të rasteve të paraqitura”, tha Radoniqi.

Ai ka folur edhe për votimin me postë, duke thënë se në këto zgjedhje procesi ka qenë ndryshe. Sipas tij, të gjitha dërgesat e pranuara në adresat e KQZ-së, do të tërhiqen dhe do të kthehen në Kosovë më së largu deri më 5 janar, për shkak të festave të fundvitit dhe mosfunksionimit të shërbimeve postare gjatë vikendeve.

“Në këto zgjedhje procesi i votimit me postë ka shkuar më ndryshe. Të gjitha që i kemi pranuar në adresat tona, ato do të tërhiqen dhe do të kthehen në Kosovë. Tërheqja do të bëhet më së largu deri më datën 5 janar, për shkak të festave te fund vitit dhe vikendeve ku shërbimi postar nuk punojnë as në shtete të botës as tek ne. Sa i përket materialeve të votimit në përfaqësi diplomatike edhe këto do të pranohen por nuk ka ndonjë datë të caktuar, megjithatë, besoj se brenda javës së ardhshme do të arrijnë të gjitha në Kosovë…Mund të konfirmoj se rryma nuk do të ndalet, ashtu jemi dakorduar me KEDS, ashtu të gjithë zyrtarët e KEDS janë në terren dhe në vazhdimësi janë duke na dërguar fotografi nga secila qendër votimi që tregojnë se ka energji elektrike dhe nuk do të ketë shkëputje të energjisë elektrike”, u shpreh ai. Sa i përket rezultateve preliminare, Radoniqi ka paralajmëruar se ato pritet të publikohen sonte.

“Po, besoj sonte, diku rreth orës 22:30 apo 23:00, do t’ju njoftojmë me kohë kur do të mbajmë edhe konferencën”, nënvizoi ai.

Kosova votoi sot për zgjedhjet e parakohshme parlamentare – për herë të katërt brenda vitit – pas dështimit për muaj të tërë për formimin e institucioneve të vendit. /KosovaPress/

The post KQZ: Zgjedhje të qeta në Kosovë, mbi 44% e qytetarëve dolën në votim appeared first on Agjencia Telegrafike Shqiptare.

PRISHTINË, 28 dhjetor /ATSH/ Kosova sot ka përmbyllur me sukses procesin zgjedhor të votimit të zgjedhjeve të parakohshme parlamentare.

Në platformën e KQZ-së për procesimin e rezultateve ka nisur dalja e rezultateve të para.

Nga 100 vendvotimet e para të procesuara apo 3.91% të tyre, LVV kryeson me 7 mijë e 535 vota apo 43.28% e pasuar nga PDK me 18.40% të votave apo 3204 vota, LDK me 12.96% apo 2 mijë e 256 vota dhe AAK me 8.28% apo 1442 vota.

/KosovaPress/

The post KQZ publikon rezultatet paraprake të zgjedhjeve në Kosovë appeared first on Agjencia Telegrafike Shqiptare.

PRISHTINË, 28 dhjetor /ATSH/ Kosova votoi sot për zgjedhjet e parakohshme parlamentare – për herë të katërt brenda vitit – pas dështimit për muaj të tërë për formimin e institucioneve të vendit.

Viti 2025 nisi me votime më 9 shkurt për Kuvendin e Kosovës, vazhdoi në vjeshtë me votimin për zgjedhjet lokale të 12 tetorit dhe 9 nëntorit dhe mbyllet me votimin e ditës së sotme.

24 subjekte politike me 1180 kandidatë janë në garë për vende në legjislaturën e nëntë të Kuvendit të Kosovës, prej të cilave 8 janë subjekte shqiptare me 624 kandidatë, ndërkaq pjesa tjetër janë subjekte nga radhët e komuniteteve pakicë që garojnë për 20 ulëse të garantuara.

Sipas platformës së KQZ-së për publikimin e rezultateve preliminare dhe statistikave për pjesëmarrjen në votime për çdo komunë interesimi i qytetarëve për të votuar është i lartë.

Numri i votuesve që kanë votuar deri në orë 17:49 është 770 mijë e 79, apo 38.52% e votuesve. /KosovaPress/

The post Mbyllet votimi në Kosovë, pritet dalja e rezultateve të para appeared first on Agjencia Telegrafike Shqiptare.

PRISHTINË, 28 dhjetor /ATSH/ Procesi i votimit në komunat veriore deri në këto momente ka kaluar pa incidente, derisa janë ndaluar hyrjet ilegale nga Serbia për të votuar.

Veton Elshani, zëvendësdrejtor i rajonit të veriut i ka thënë KosovaPress-it, se që nga orët e hershme të mëngjesit, kur është bërë hapja e vendvotimeve në veri të vendit, nuk kemi iniciuar asnjë rast për hetim deri në këtë moment.

“Më herët, gjatë zgjedhjeve të kaluara, kemi pasur informacione se njerëzit po vinin përmes rrugëve ilegale, konkretisht nga ura e Bërnjakut, kalonin tek ne dhe më pas vazhdonin në veri të vendit. Këtë e kemi ndaluar edhe atëherë, por e kemi ndaluar edhe tani paraprakisht. Kjo ka qenë arsyeja pse janë marrë këto masa. Po ashtu, kemi pasur koordinim me Policinë Kufitare, pasi aty janë edhe barkat, si dhe me KFOR-in. Nuk kemi pasur raste për të ndaluar dikë, pasi ata persona janë kthyer nga ajo rrugë”, tha ai.

Elshani komentoi edhe votimin e organizuar të Listës Serbe.

“Në orët e mëngjesit kemi pasur edhe një votim të organizuar, të ashtuquajtur, nga sheshi “Car Lazari” e më pas drejt qendrave të votimit. Kjo ka ndodhur edhe në komunat e tjera të veriut të vendit dhe ka qenë një praktikë e përsëritur edhe herëve të kaluara. Për këtë e kemi njoftuar KQZ-në dhe Prokurorinë e Shtetit, por nuk kemi pasur rast për të hapur”, tha ai.

Ai shtoi se ekziston një plan i përgjithshëm në nivel të Kosovës lidhur me zgjedhjet që po mbahen sot dhe se ata janë pjesë e atij plani, por me disa specifika për shkak se janë zonë kufitare me Serbinë.

Ai shtoi se në veri ka shumë rrugë ilegale dhe të gjitha janë të mbuluara nga ana e Policisë Kufitare, ndërsa dje edhe nga njësitë e KFOR-it, në kuadër të bashkëpunimit të përbashkët që kemi.

Sipas tij, deri tani nuk ka ndodhur asnjë incident në veri. /KosovaPress/

The post Zgjedhjet në veri pa incidente, Policia ndalon hyrjet ilegale nga Serbia appeared first on Agjencia Telegrafike Shqiptare.

PRISHTINË, 28 dhjetor /ATSH/ Në platformën e KQZ-së Kosovë u publikuan të dhënat për pjesëmarrjen në zgjedhje deri në orën 17:00. Sipas procesimit të 98.12 për qind të vendvotimeve, dalja është 38.25 për qind.

Kjo nënkupton se deri më tani kanë votuar 764.694 votues.

Kur kanë mbetur më pak se një orë deri në mbylljen e vendvotimeve në 38 komuna të Kosovës, përfaqësues të partive të ndryshme politike po u bëjnë thirrje qytetarët që të shfrytëzojnë këtë kohë për të ushtruar të drejtën e tyre kushtetuese.

Deri më tani, sipas institucioneve, nuk ka pasur ndonjë incident të madh dhe aktualisht nuk ka asnjë të ndaluar për veprat penale që ndërlidhen me zgjedhjet.

Ndërkaq, KQZ-ja ka raportuar se në disa qendra të votimit ka pasur ndërprerje të energjisë elektrike, por që KEDS-i ka ndërhyrë duke e zgjidhur problemin. /REL/

The post KQZ: Mbi 38% pjesëmarrje në votime deri në orën 17:00 appeared first on Agjencia Telegrafike Shqiptare.

PRISHTINË, 28 dhjetor /ATSH/ Presidentja e Kosovës, Vjosa Osmani ka hedhur sot votën e saj për zgjedhjet e parakohshme parlamentare, duke uruar që procesi të zhvillohet në mënyrë të qetë, të rregullt dhe demokratike.

Osmani po ashtu ka ftuar qytetarët të marrin pjesë masivisht në procesin zgjedhor.

“Uroj që sot Republika jonë të ketë zgjedhje të qeta, të rregullta, demokratike, uroj po ashtu që të kemi zgjedhje me pjesëmarrje sa më masive të qytetarëve të Republikës sonë me të drejtë vote. Si gjithnjë zgjedhjet janë një proces i rëndësishëm demokratik, ku vendimmarrja kthehet tek qytetarët tanë. Shpresoj natyrisht që rezultatet e këtyre zgjedhjeve të rezultojnë me krijim sa më shpejtë të Parlamentit dhe zgjedhje të Qeverisë së Kosovës të cilat janë të domosdoshme për procese të rëndësishme të brendshme dhe ndërkombëtare për Republikën tonë. Dua t’i falënderoj të gjitha institucionet që janë angazhuar dhe angazhohen edhe gjatë ditës se sotme që ky proces zgjedhor të jetë sa më i rregullt. Nga KQZ, tek institucionet tona të sigurisë dhe ato të drejtësisë. Falënderim edhe për juve mediet që sot gjatë tërë ditës do të raportoni për këtë proces. I uroj gjithë qytetarët e Kosovës dhe shpresoj që çdo gjë të shkojë në rregull dhe qetë”, tha Osmani.

Presidentja Osmani theksoi se pas përfundimit të zgjedhjeve, partitë politike do të gjejnë rrugën për të krijuar institucione funksionale dhe të qëndrueshme.

“Ky ka qenë mesazhi im gjatë tërë kohës, dhe menjëherë pasi të përfundojë ky proces zgjedhor, jam e bindur që të gjitha partitë politike do të gjejnë një rrugë përpara, në mënyrë që të kemi institucione funksionale, stabile dhe me legjitimet të plotë të cilat do të marrin vendime në të mirë të qytetarëve tanë dhe të Republikës sonë”, ka theksuar Osmani.

Komisioni Qendror i Zgjedhjeve ka bërë të ditur se deri në orën 11:00 kanë dalë në zgjedhje 165 mijë e 404 votues apo 8,27 për qind. Në të njëjtën periudhë, në zgjedhjet e kaluara të 9 shkurtit kishin votuar 169 mijë votues apo 8,58 për qind. /KosovaPress/

The post Osmani thirrje për pjesëmarrje masive në votime appeared first on Agjencia Telegrafike Shqiptare.

PRISHTINË, 28 dhjetor /ATSH/ Kandidati për kryeministër nga Lëvizja Vetëvendosje, Albin Kurti, shpreson që të ketë pjesëmarrje masive në zgjedhjet e sotme.

Ai pasi votoi në Fakultetin Juridik në Prishtinë, tha se pret që rezultati i zgjedhjeve të parakohshme të jetë i qartë.

“Uroj që legjilstura e ardhshme e dhjetë të konstituojë Kuvendin dhe formojë Qeverinë”, tha ai.

Sipas të dhënave nga Lista Votuese, numri i qytetarëve me të drejtë vote në vendvotime, në Republikën e Kosovës është 1 999 204 votues, ndërkaq numri i qytetarëve që janë regjistruar për të votuar jashtë Kosovës është 77 086 votues.

Procesi zgjedhor brenda vendit do të zhvillohet në 948 Qendra të Votimit, me gjithsej 2614 vendvotime, prej të cilave 910 qendra me 2557 vendvotime për votimin e rregullt dhe 38 qendra, nga një për çdo komunë, me 57 vendvotime për të mundësuar votimin me kusht.

/KosovaPress/

The post Kurti: Uroj që legjislatura e ardhshme të konstituojë Kuvendin dhe formojë qeverinë appeared first on Agjencia Telegrafike Shqiptare.

TIRANË, 28 dhjetor /ATSH/ Kategoria “Abissnet Superiore” do të kthehet në fushë në datat 14 dhe 15 janar 2026 për të luajtur ndeshjet e vlefshme për Javën e 19-të.

Ekipet dhe lojtarët do të kenë mjaftueshëm pushime për t’u përgatitur për pjesën e mbetur të sezonit. Gjithashtu janë zbuluar edhe përballjet dhe oraret për javën e 20-të dhe të 21-të.

“Egnatia” është shpallur “kampionia e dimrit” me 37 pikë, ndërsa “Tirana” mbyll tabelën e renditjes me 10 pikë.

Sot luhet finalja e Superkupës së Shqipërisë, ku përballen mes tyre Egnatia dhe Dinamo City. Kjo finale, që do të luhet në orën 19:00, pritet të sjellë emocione dhe spektakël në stadiumin “Air Albania”.

JAVA E 19-TË

Të mërkurën 14.01.2026

Bylis-Tirana(13:30)
Vllaznia-Egnatia(17:00)
Elbasani-Flamurtari(17:00)

Të enjten 15.01.2026

Partizani-Vora(13:30)
Teuta-Dinamo(17:00)

JAVE E 20-TË

Të shtunën 24.01.2026

Bylis-Egnatia(13:30)
Tirana-Flamurtari(13:30)
Vllaznia-Partizani(16:30)

Të dielën 25.01.2026

Teuta-Vora(13:30)
Elbasani-Dinamo(16:30)

JAVA E 21-TË

Të shtunën 31.01.2026

Vora-Flamurtari(13:30)
Partizani-Elbasani(16:30)
Dinamo-Bylis(19:00)

Të dielën 01.02.2026

Teuta-Vllaznia(16:30)
Egnatia-Tirana(16:30)

The post Kalendari i Superiores për tri javët e para të 2026-ës appeared first on Agjencia Telegrafike Shqiptare.

PRISHTINË, 28 dhjetor /ATSH/ Të gjitha qendrat e votimit për zgjedhjet e sotme të parakohshme janë hapur me kohë, tha zëdhënësi i Komisionit Qendror të Zgjedhjeve Kosovë, Valmir Elezi.

Ai tha se në orët e hershme të mëngjesit janë shpërndarë me kohë të gjitha materialet zgjedhore, përfshirë edhe fletëvotimet.

“Në orët e hershme të mëngjesit, materiali zgjedhor, përfshirë fletëvotimet, është shpërndarë me kohë në të gjitha qendrat e votimit. Gjithashtu njoftojmë se, duke u mbështetur në informacionet e pranuara nga KQZ, procesi i votimit për zgjedhjet e parakohshme për Kuvendin e Kosovës ka nisur në të gjitha qendrat e votimit në Republikën e Kosovës”, tha ai.

Elezi shtoi se procesi i votimit po zhvillohet në 948 qendra të votimit, ndërkaq numri i qytetarëve me të drejtë vote është 1 milion e 999 mijë e 205 votues.

“Sot procesi i votimit do të zhvillohet në 948 qendra të votimit me gjithsej 2614 vendvotime, prej të cilave 910 janë qendra me 2557 vendvotime që do të mundësojnë votimin e rregullt dhe 38 qendra të tjera, nga 1 për secilën komunë, me 57 vendvotime për të mundësuar votimin me kusht”, shtoi Elezi.

Krahas këtyre, Elezi shtoi se ditëve të fundit ka pasur kontakte me KEDS-in në lidhje me furnizimin me energji elektrike gjatë ditës së sotme. /KosovaPress/

The post KQZ: Të gjitha qendrat e votimit janë hapur në kohë appeared first on Agjencia Telegrafike Shqiptare.

TIRANË, 21 dhjetor /ATSH/ Shërbimi Meteorologjik Ushtarak njoftoi se sot vendi ynë do të ndikohet nga kushte atmosferike kryesisht të qëndrueshme.

Moti parashikohet i kthjellët me vranësira kalimtare.

Mjegulla/mjegullina do të jenë të pranishme në orët e mëngjesit dhe të mbrëmjes, kryesisht përgjatë zonave luginore.

Era do të fryjë me drejtim nga kuadrati i veriut me shpejtësi mesatare 5 m/sek.

Valëzimi në detet Adriatik dhe Jon pritet të jetë i forcës 1 ballë.

Moti, e diel, 21 dhjetor

1 nga 2

The post E diel 21 dhjetor, mot i qëndrueshëm dhe i ftohtë appeared first on Agjencia Telegrafike Shqiptare.

TIRANË, 20 dhjetor /ATSH/ Është mbyllur me dy ndeshjet e sotme Java e 17-të e kampionatit “Abissnet Superiore”.

Klasikja e futbollit shqiptar, Tirana-Vllaznia, e zhvilluar në “Selman Stërmasi”, u mbyll në barazim 1-1. Të dy golat u shënuan me penallti. Rafa për Tiranën në minutën e 5-të dhe Balaj barazoi në minutën e 26-të për shkodranët. Balaj pati një mundësi të artë për të marrë fitoren, por gaboi në penalltinë e dytë të akorduar në minutën e 44-rt, pasi portieri vendas Tafas ia priti.

Kështu Tirana e vendit të fundit, pavarësisht mungesave të shumta, ia doli të marrë 1 pikë me Ardijan Nuhijun në krye, barazim i cili e lë në fundin e renditjes me 9 pikë.

Ndërsa Vllaznia e vendit të katërt numëron 27 pikë. Kuqeblutë e Edi Martinit tashmë janë me 7 pikë më pak se Egnatia kryesuese.

Në Ballsh, në stadiumin “Adush Muça” Bylisi mposhti AF Elbasanin me rezultatin 3-2.

Kështu Bylisi rikthehet te fitorja, ku për herë të fundit fitonte në javën e 10-të ndaj Tiranës dhe i largohet zonës së rrezikut. Ndërsa për Elbasanin nuk ka vazhdimësi, kur pas dy fitoresh në dy ndeshje, tani mposhtet në transfertën e Ballshit. Golat për Bylisin u shënuan respektivisht në minutat 44′ (P), 48′, 55′ nga Mustafa, ndërsa për AF Elbasanin shënuan Loukili me një supergol në 52′dhe Tsague në 69′.

Ditën e shtunë Egnatia triumfoi ndaj Partizanit në “Arena Egnatia” me rezultatin 2-1. Falë këtij suksesi të rëndësishëm, rrogozhinasit morën kryesimin e kampionatit me 34 pikë.

Dinamo City mundi Vorën në “Air Albania” me përmbysje 2-1, ndërsa ndeshja Flamurtari – Teuta u mbyll në barazim 2-2.

The post Mbyllet java e 17-të e Superiores, Egnatia merr kryesimin e kampionatit appeared first on Agjencia Telegrafike Shqiptare.

PRISHTINË, 19 dhjetor /ATSH/ Akademikja Justina Shiroka Pula është zgjedhur kryetare e Akademisë së Shkencave dhe Arteve të Kosovës.

Ajo është gruaja e parë që udhëheq këtë institucion të themeluar më 1975 dhe pason në këtë detyrë akademik, Mehmet Krajën.

Gjatë mbledhjes më 19 dhjetor, ASHAK zgjodhi edhe kryesinë e saj, ku Fejzullah Krasniqi u zgjodh nënkryetar, ndërkaq Bardh Rugova sekretar shkencor.

Mandati i kryetarit të ASHAK-ut është katërvjeçar, me mundësi rizgjedhje.

Kush është Justina Shiroka Pula?

Udhëheqësja e re e ASHAK-ut ka përfunduar shkollën fillore dhe të mesme në Prishtinë. Po ashtu, më 1976 ka përfunduar Fakultetin Ekonomik në Prishtinë.

Ndërkaq, studimet pasuniversitare, në fushën e teorisë dhe politikës së zhvillimit ekonomik i përfundoi më 1984 në Fakultetin e Shkencave Ekonimike të Zagrebit.

Ajo u doktorua në UP me tezën e doktoratës me titull: “Investimet demografike dhe zhvillimi ekonomik i Kosovës”.

Kryetarja e re e Akademisë së Shkencave ka punuar në Bankën Popullore të Kosovës dhe më 1978 ka nisur karrierën si ligjëruese në Fakultetin Ekonomik.

Sipas biografisë të publikuar në faqen e ASHAK, Shiroka Pula ka marrë pjesë edhe në studime të posdoktoratës, në Universitetin e Lincit në Aushtri, në atë të Arizonës në SHBA si dhe ka kryer trajnime të ndryshme profesionale në universitete të ndryshme të botës.

Pas luftës, ajo është angazhuar në shoqërinë civile, në fushën e fuqizimit të grave, barazisë gjinore dhe zhvillimit të bizneseve dhe ndërmarrësisë.

Nga viti 2008 deri më 2011 ka qenë ministre e Energjisë dhe Minierave të Kosovës, ndërkaq nga viti 2011 deri më 2014 ka qenë deputete e Kuvendit të Kosovës. /REL/

The post Justina Shiroka Pula zgjidhet kryetare e Akademisë së Shkencave të Kosovës appeared first on Agjencia Telegrafike Shqiptare.

PRISHTINË, 15 dhjetor /ATSH/ Festivali mbarëkombëtar i radiove “Radiofest 2025” përmbylli edicionin e tij të 16-të, organizuar nga Radio Gjakova.

Gjakova u shndërrua në qendër të radiostacioneve shqiptare nga Kosova, Shqipëria, Maqedonia e Veriut, Mali i Zi dhe Lugina e Preshevës. Në shkollën e muzikës “Prenk Jakova” u mbajt manifestimi përmbyllës ku u shpallën fituesit në garën për spot publicitar, raport radiofonik dhe reportazh që iu kushtua trashëgimisë kulturore.

Kështu vendi i parë për radioreportazh i takoi Radio Tiranës dhe autorit Jaho Margjeka, i dyti Radio Kosovës dhe i treti Radio Gjirokastrës. Në vendin e parë për raport radiofonik doli Radio Alba e Klinës, në të dytin Radio Lushnja dhe të tretin Radio Peja.

Ndërsa më të mirët në spote publicitare ishin Radio Plus (Prishtinë) me vendin e parë, pasuar nga Glam Radio (Prishtinë) dhe Radio Klea (Elbasan). Çmimi i organizatorit i takoi Radio Malit të Zi – seksionit shqip, Radio Prizrenit dhe Radio Ylberit (Mitrovicë).

Zëri më i mirë radiofonik i takoi Fitore Istrefi Alushi nga Radio Struga. Shpallja e fituesve në “Radiofest 2025” u shoqërua edhe me një program të pasur artistik me të ftuar nga Kosova dhe Shqipëria. Ky edicion i këtij festivali u mbështet nga Ministria e Kulturës së Republikës së Kosovës dhe Drejtoria për Kulturë e Komunës së Gjakovës. /KosovaPress/

The post Ndahen çmimet e festivalit mbarëkombëtar “Radiofest 2025” appeared first on Agjencia Telegrafike Shqiptare.

TIRANË, 14 dhjetor /ATSH/ Ditën e diel vendi ynë do të ndikohet nga kushte atmosferike të qëndrueshme.

Shërbimi Meteorologjik Ushtarak njoftoi se orët me diell do të mbizotërojnë në pjesën më të madhe të vendit, përjashtuar vranësira të pakta kalimtare në relievet malore në juglindje.

Era do të fryjë me drejtim nga kuadrati i veriut, me shpejtësi mesatare 5 m/sek, e cila hera-herës në bregdet e kryesisht në atë jugperëndimor dhe lugina fiton shpejtësi deri në 14 m/sek.

Valëzimi në detet Adriatik e Jon pritet të jetë i forcës 1-3 ballë.

Parashikimi i motit 14 dhjetor 2025

1 nga 2

The post 14 dhjetor, mot i kthjellët dhe ulje e temperaturave appeared first on Agjencia Telegrafike Shqiptare.

TIRANË, 13 dhjetor /ATSH/ U luajtën sot 3 përballjet e para të vlefshme për javën e 16-të të kategorisë Abissnet Superiore, ku spikatën fitoret e Elbasanit dhe Partizanit.

Verdheblutë mposhtën në frymën e fundit Vorën me rezultatin 1 me 0, duke ruajtur kreun e tabelës.

Partizani bëni detyrën në shtëpi ndaj Flamurtarit me rezultatin 2 me 1.

Ndërkohë dueli tjetër, ai mes Teutës dhe Tiranës u mbyll në barazim 1 me 1.

Të dielën do të luhen dy takimet e tjera: Vllaznia-Bylis dhe Dinamo-Egnatia.

Rezultatet e Javës së 16-të:

E shtunë (13.12.2025)

Vora 0-1 AF Elbasani

Partizani 2-1 Flamurtari

Teuta 1-1 Tirana

E diel (14.12.2025)

Vllaznia – Bylis 16:30

Dinamo – Egnatia 19:00

RENDITJA:

The post Java e 16-të e Superiores, renditja pas tri ndeshjeve të para appeared first on Agjencia Telegrafike Shqiptare.

PRISHTINË, 13 dhjetor /ATSH/ Presidentja e Kosovës Vjosa Osmani u prit sot në takim nga papa Leone XIV në Pallatin Apostolik në Vatikan, njofton KosovaPress.

Gjatë takimit me papa Leonen XIV presidentja Osmani ka kërkuar zyrtarisht njohjen e pavarësisë së Kosovës nga Selia e Shenjtë.

Takimi u zhvillua në Pallatin Apostolik, ku Osmani u prit nga Ati i Shenjtë, ndërsa gjatë vizitës ajo u takua gjithashtu me sekretarin e Shtetit të Vatikanit, kardinalin Pietro Parolin, si dhe me sekretarin për Marrëdhënie me Shtetet, monsignor Paul Richard Gallagher.

Pas takimeve, në një videomesazh në Facebook presidentja Osmani e cilësoi këtë vizitë si një moment të rëndësishëm për marrëdhëniet ndërmjet Kosovës dhe Vatikanit dhe shprehu shpresën që të merret vendimi i shumë pritur për njohjen e Kosovës nga Selia e Shenjtë.

“Paraqita shpresën dhe besimin e gjithë popullit të Kosovës që Vatikani më në fund të marrë vendimin për njohjen e Republikës së Kosovës, duke njohur vuajtjet e gjata të popullit tonë për të jetuar i lirë, i pavarur dhe në demokraci”, tha Osmani.

Osmani bëri të ditur se gjatë vizitës ka ftuar papa Leonen XIV që të vizitojë Republikën e Kosovës. /KosovaPress/

The post Osmani shpreson të merret vendimi për njohjen nga Vatikani appeared first on Agjencia Telegrafike Shqiptare.

PRISHTINË, 13 dhjetor /ATSH/ Paneli Zgjedhor për Ankesa dhe Parashtresa (PZAP) ka rrëzuar vendimin e KQZ-së për mos certifikimin e kandidatëve për deputetë nga Lista Serbe për zgjedhjet e parakohshme parlamentare të 28 dhjetorit.

Në vendimin e publikuar sot, PZAP thotë se vendimi i Komisionit Qendror të Zgjedhjeve (KQZ) për mos certifikimin e kandidatëve më 10 dhjetor është i mangët, jo i plotë dhe nuk i trajton çështjet dhe faktet vendimtare që lidhen me vlerësimin e kushteve ligjore për certifikimin e subjektit politik.

“Në mungesë të një arsyetimi të mirëfilltë ligjor konkludohet se vendimi i tillë nuk mund të qëndrojë juridikisht pasi që nuk përmban as vlerësimin e duhur të fakteve në raport me dispozitat ligjore të Ligjit për zgjedhjet e përgjithshme dhe me rregulloren e certifikimit të subjekteve politike”, thuhet në vendim.

Lista Serbe në zgjedhjet e parakohshme hyn me gjithsej 33 kandidatë. /KosovaPress/

The post Lista Serbe certifikohet për zgjedhjet e 28 dhjetorit appeared first on Agjencia Telegrafike Shqiptare.

SHKUP, 13 dhjetor /ATSH/ Mijëra njerëz u mblodhën të shtunën pasdite në qendër të kryeqytetit të Maqedonisë së Veriut, Shkup, për të kërkuar “drejtësi të mirëfilltë” në përfundim të gjyqit për krime lufte ndaj ish-eprorëve të Ushtrisë Çlirimtare të Kosovës (UÇK) në Gjykatën Speciale të Kosovës në Hagë.

Ata u tubuan në sheshin “Skënderbeu” në Shkup mes brohoritjeve “UÇK, UÇK”, dhe valëvitjeve të flamujve kombëtarë shqiptarë dhe flamujve të UÇK-së.

Protesta kaloi pa ndonjë incident të raportuar dhe nën mbikëqyrje të rreptë policore.

Qëllimi i protestës, e thirrur nga kategoritë e dala nga lufta e UÇK-së, ishte shprehja e pakënaqësive me gjyqin ndaj ish-eprorëve të saj, Hashim Thaçi, Kadri Veseli, Jakup Krasniqi e Rexhep Selimi, në Dhomat e Specializuara të Kosovës në Hagë.

Gjyqi ndaj Thaçit, Veselit, Krasniqit dhe Selimit nisi më 2023 dhe pritet të përmbyllet në fillim të vitit të ardhshëm.

Që të gjithë ata i mohojnë akuzat për krime lufte dhe krime kundër njerëzimit para dhe gjatë luftës së viteve 1998–1999.

Hysni Gucati, kryetar i Organizatës së Veteranëve të Luftës së UÇK-së, tha se sot “jemi mbledhur këtu për ta ngritur zërin”, dhe për të kërkuar “drejtësi të mirëfilltë”, për ish-krerët e UÇK-së.

“Ne sot, me këtë numër kaq të madh njerëzish… i tregojmë Trendafilovës se Ushtria Çlirimtare e Kosovës buron, lind dhe vepron nga populli”, tha Gucati duke iu referuar Ekaterina Trendafilovës, kryetares së Dhomat të Specializuara të Kosovës në qytetin holandez.

Ai shtoi se UÇK-ja “u rrit dhe u mbrojt nga populli dhe sot populli i qëndron mbrapa asaj. Ne sot kërkojmë drejtësi. Kjo gjykatë i ngjan gjykatave të Serbisë dhe merret me fakte të falsifikuara dhe fabrikuara, të cilat nuk qëndrojnë”.

Kryetar i Bashkimit Demokratik për Integrim nga Maqedonia e Veriut, Ali Ahmeti, si dhe politikanë nga Kosova, si Fatmir Limaj e Daut Haradinaj, morën pjesë në protestë.

Kryeministri i Maqedonisë së Veriut, Hristijan Mickoski, tha më herët këtë javë se nuk do ta mbështeste protestën, por njoftoi se ishte formuar një shtab krize për ta vëzhguar të gjitha rrjedhën e tubimit 24 orë para dhe pas tij.

Megjithatë protesta u mbështet nga kryetari i Komunës së Çairit, Izet Mexhiti, i cili vjen nga VLEN, partia shqiptare që është partnere e koalicionit qeverisës së Mickoskit.

Shqiptarët përbëjnë 24.3 për qind apo një të katërtën e popullsisë së Maqedonisë së Veriut prej 1.8 milion.

Kjo protestë vjen në një sërë protestash të ngjashme që janë mbajtur këtë vit në qytete të ndryshme, përfshirë në Prishtinë, Tiranë, Hagë dhe Strasburg./REL/

Prtesta në Shkup 14 dhjetor 2025; Fotot: KosovaPress

1 nga 7

The post Mijëra protestues në Shkup kërkuan “drejtësi të mirëfilltë” në Hagë ndaj ish-krerëve të UÇK-së appeared first on Agjencia Telegrafike Shqiptare.

PRISHTINË, 11 dhjetor /ATSH/ Komandanti i misionit paqeruajtës të NATO-s në Kosovë, KFOR, gjeneralmajor Ozkan Ulutash, tha se komunikimet e rregullta me ushtrinë serbe janë të rëndësishme për të parandaluar çdo përshkallëzim të mundshëm.

Ulutash i bëri këto deklarata pas vizitës në Serbi, ku u takua me kreun e ushtrisë serbe, gjeneralin Millan Mojsilloviq.

“Komunikimet e rregullta dhe të hapura mes KFOR-it dhe Forcave të Armatosura të Serbisë janë vitale për të adresuar zhvillimet e rëndësishme dhe për të parandaluar çdo rrezik të mundshëm të përshkallëzimit me kohë, në mënyrë të duhur, transparente dhe konstruktive. Në javët dhe muajt në vijim, unë do të bëj pjesën time për t’u siguruar që të vazhdojmë t’i shfrytëzojmë sa më mirë këto komunikime të rregullta”, tha Ulutash përmes një deklarate.

Edhe gjatë mandatit të parë të tij në krye të KFOR-it, Ulutash kishte vizituar Beogradin.

Ulutash e falënderoi për mikpritjen Mojsilloviqin me të cilin, tha se “veçse kam zhvilluar një bashkëpunim të hapur dhe frytdhënës gjatë mandatit tim të parë në krye të KFOR-it. Mezi pres të takohem sërish me të, së shpejti”.

Kreu i KFOR-it tha se misioni është i angazhuar për të ofruar siguri që “mundëson krijimin e kushteve të nevojshme për dialog politik”.

“NATO – përfshirë përmes punës së përditshme të KFOR-it – vazhdon të mbështesë dialogun e lehtësuar nga Bashkimi Evropian mes Prishtinës dhe Beogradit, si kornizë për të adresuar çështjet e mbetura me qëllim që të përfitojnë të gjithë njerëzit”, tha Ulutash.

Sipas gjeneralmajorit Ulutash tha se ky mision për çerekshekulli ka luajtur rol kyç në mirëmbajtjen e paqes dhe duke ofruar siguri për të gjithë qytetarët në Kosovë. Siguria në rajon, sipas gjeneralmajorit turk është e lidhur me sigurinë e Evropës dhe në mbarë zonë euroatlantike.

Gjeneralmajori turk u rikthye në drejtimin e KFOR-it në muajin tetor. Mandati i parë njëvjeçar i Ulutashit në krye të KFOR-it nisi në tetor të vitit 2023 dhe përfundoi në tetor të vitit pasues.

KFOR-i është reaguesi i tretë i sigurisë në Kosovë, pas Policisë së Kosovës dhe misionit të Bashkimit Evropian për sundim të ligjit, EULEX.

KFOR-i, veç tjerash, është përgjegjës për sigurinë në vijën kufitare mes Kosovës dhe Serbisë.

NATO-ja e shtoi praninë e saj në Kosovë gjatë vitit 2023, pas rritjes së tensioneve në veriun e banuar me shumicë serbe.

Në KFOR aktualisht janë mbi 4 mijë paqeruajtës nga vende të ndryshme të botës. /REL/

The post Ulutash: Komunikimet e rregullta me ushtrinë serbe, jetësore për të parandaluar përshkallëzime appeared first on Agjencia Telegrafike Shqiptare.

TIRANË, 9 dhjetor /ATSH/ Shërbimi Meteorologjik Ushtarak njoftoi se sot vendi ynë do të ndikohet nga kushte atmosferike të qëndrueshme.

Moti parashikohet kryesisht i kthjellët, por nuk do të mungojnë alternime vranësirash mesatare të larta transparente, kryesisht në pjesën e parë të ditës, përqendruar në relievet malore.

Era do të fryjë me drejtim verilindje-veriperëndim me shpejtësi mesatare 6 m/s, ndërsa në bregdet dhe lugina era fiton shpejtësi deri në 10 m/s, me valëzimin në det të forcës 1-2 ballë.

Temperaturat parashikohen:

The post Sot mot i kthjellët appeared first on Agjencia Telegrafike Shqiptare.