Policia e Kosovës, përkatësisht Drejtoria për Hetimin e Trafikimit të Narkotikëve (DHTN), pas hetimeve intensive dhe veprimeve operative në terren, ka realizuar dy operacione të ndara, në të cilat janë arrestuar gjithsej katër persona dhe janë konfiskuar sasi të ndryshme të substancave narkotike, armë dhe dëshmi të tjera materiale.

Rasti i parë – Operacioni “Pinku”

Sipas Policisë së Kosovës, më 14 janar 2026, rreth orës 15:20, në rrugën “Xhemajl Mustafa” në Fushë Kosovë, hetuesit e DHTN-së kanë identifikuar dhe arrestuar në flagrancë dy persona të dyshuar me inicialet M.K., të cilët dyshohet se ishin të përfshirë në shitblerje të substancave narkotike.

Gjatë kontrollit, te njëri nga të dyshuarit janë gjetur dy qese të vogla me marihuanë, me peshë rreth 2 gramë. Ndërkaq, te i dyshuari tjetër dhe në veturën e tij janë gjetur nëntë qese me substancë të dyshuar narkotike të llojit kokainë, me peshë 4.9 gramë, tetë qese me marihuanë, me peshë 12.7 gramë, para të gatshme në vlerë prej 475 eurosh, që dyshohet se janë përfituar nga shitja e narkotikëve, si dhe dy telefona mobilë.

Me autorizim të Prokurorit Kujdestar nga Departamenti i Krimeve të Rënda, është realizuar bastisje edhe në shtëpinë e njërit nga të dyshuarit, ku janë gjetur dhe konfiskuar një armë e shkurtër, 15.8 gramë kokainë, 79 tableta të dyshuara ekstazi me peshë 37.7 gramë, 2.6 gramë kokainë ngjyrë e kuqe, 322.9 gramë marihuanë, dy peshore digjitale dhe qese najloni për paketimin e narkotikëve.

Pas intervistimit, të dyshuarit janë dërguar në mbajtje për 48 orë, me urdhër të prokurorit.

Rasti i dytë – Operacioni “Dora e Kapur”

Në një rast tjetër, po më 14 janar 2026, DHTN – Sektori Qendror për Hetimin e Trafikimit me Narkotikë, ka realizuar operacionin e koduar “Dora e Kapur” në Prishtinë.

Gjatë këtij operacioni, në rrugën “Imzot Nikprelaj”, është arrestuar në flagrancë një person i dyshuar me inicialet M.K., te i cili janë gjetur dhe sekuestruar gjashtë doza heroinë, me peshë totale rreth 4 gramë. Gjatë kontrollit në banesën e tij janë gjetur edhe rreth 9 gramë hashash dhe 18 gramë marihuanë.

Po ashtu, gjatë bastisjes në një banesë tjetër të lidhur me rastin, policia ka konfiskuar 52 paketime me substancë të dyshuar heroinë, me peshë totale 14 gramë, një pushkë gjuetie me nëntë fishekë, para të gatshme në vlerë rreth 25 mijë euro, një veturë, një peshore, dy telefona mobilë dhe prova të tjera materiale.

Policia e Kosovës ka bërë të ditur se Drejtoria për Hetimin e Trafikimit të Narkotikëve do të vazhdojë me përkushtim luftimin e trafikimit me narkotikë dhe sjelljen para drejtësisë të të gjithë personave të përfshirë në këto veprimtari të kundërligjshme. /Telegrafi/

Nxënësit e shkollës “Mihal Grameno” në Fushë Kosovë, nuk do të fillojnë nesër procesin e mësimit.

Klasat 6 deri 9, do të fillojnë gjysmëvjetorin e dytë më vonë, për shkak të mungesës së ngrohjes qendrore dhe temperaturave të ulëta.

Sipas njoftimit të Drejtorisë Komunale të Arsimit në Fushë Kosovë, mësimi do të shtyhet deri më 19 janar 2026.

“Vendimi është marrë për të garantuar kushte më të sigurta dhe më të rehatshme për nxënësit dhe mësimdhënësit”, është bërë e ditur në njoftimin e shkollës.

Shkolla ka falënderuar prindërit, nxënësit dhe stafin për mirëkuptim dhe bashkëpunim gjatë kësaj periudhe.

Kujtojmë se fillimi i procesit mësimor ishte planifikuar të niste më 8 janar, por për shkak të vërshimeve pas reshjeve MASHTI mori vendim për shtyrje deri më 12 janar. /Telegrafi/

Dy persona të dyshuar, njëri prej tyre i mitur, janë arrestuar pasi dyshohet se janë përfshirë në një përleshje fizike ku kanë sulmuar dy viktima meshkuj kosovarë.

Ngjarja ka ndodhur më 10 janar 2026, rreth orës 17:17, në rrugën “17 Shkurti” në Fushë Kosovë.

Si pasojë e sulmit, viktimat kanë pësuar lëndime të lehta trupore dhe kanë pranuar trajtim mjekësor.

Me vendim të prokurorit kompetent, pas inicimit të rastit, të dyshuarit janë dërguar në mbajtje, ndërsa rasti është duke u hetuar nga organet përkatëse. /Telegrafi/

Komuna e Fushë Kosovës, në bashkëpunim me Këshillin e Bashkësisë Islame të Fushë Kosovës, ka siguruar 65 pako ushqimore, ujë dhe batanije për familjet në nevojë, si pjesë e përpjekjeve për t’u ardhur në ndihmë qytetarëve të prekur nga situata e krijuar pas reshjeve të shiut.

“Komuna e Fushë Kosovës, në bashkëpunim me Këshillin e Bashkësisë Islame të Fushë Kosovës, ka arritur të sigurojë 65 pako ushqimore, ujë dhe batanije për familjet në nevojë”, thuhet në njoftimin e komunës.

Sipas këtij njoftimi, shpërndarja e ndihmave po vazhdon në fshatrat Graboc i Poshtëm, Pomozotin, Henc dhe Miradi e Epërme.

Komuna ka falënderuar të gjithë kontribuuesit për angazhimin humanitar, duke theksuar se “ky është një angazhim i përbashkët humanitar, në shërbim të qytetarëve”.

Po ashtu, autoritetet komunale u kanë bërë thirrje qytetarëve që të shmangin zonat e përmbytura dhe të raportojnë çdo situatë që paraqet rrezik për sigurinë publike.

“Institucionet e Komunës së Fushë Kosovës janë në gatishmëri të plotë për monitorim dhe ndërhyrje sipas nevojës”, theksohet më tej, duke shtuar se komuna mbetet e përkushtuar që përmes veprimeve konkrete dhe reagimit të shpejtë institucional të jetë pranë qytetarëve në këtë situatë emergjente. /Telegrafi/

Qytetarët që lëvizin në magjistralen Fushë Kosovë – Prishtinë po përballen me kolona të gjata trafiku, si pasojë e reshjeve të dendura të shiut që po vazhdojnë në vend.

Bazuar në të dhënat e fundit nga Instituti Hidrometeorologjik i Kosovës, gjatë 24 orëve të fundit në kryeqytet janë regjistruar mbi 25 mm reshje shiu, ndërsa pritet që reshjet të vazhdojnë edhe në ditët në vijim me intensitet të ndryshueshëm.

LIVE: Kosova nën reshje të dendura, vërshime në disa zona

Ndërkohë Komuna e Prishtinës ka apeluar qytetarët për kujdes, për shkak të rrezikut nga përmbytjet.

Vështirësi në qarkullim e përmbytje janë raportuar në disa komuna, si ajo e Malishevës dhe Gjakovës. /KP/

Një mashkull kosovar është gjetur pa shenja jete në oborrin e shtëpisë së tij në Fushë Kosovë.

Vdekjen e tij e ka konstatuar mjeku në vendin e ngjarjes.

Rrethanat e rastit ende nuk janë të qarta, ndërsa me vendim të prokurorit, trupi i pajetë është dërguar në Institutin e Mjekësisë Ligjore për obduksion.

Hetimet për zbardhjen e plotë të shkaqeve të vdekjes janë duke vazhduar. /Telegrafi/

Reshjet e rrëmbyeshme të shiut gjatë ditëve të fundit kanë shkaktuar vërshime dhe probleme të shumta në disa komuna të Kosovës, duke rrezikuar infrastrukturën dhe sigurinë e qytetarëve.

Në Drenas, shira të pandërprerë gjatë 24 orëve të fundit kanë përmbytur disa zona të qytetit, ndërsa sipas disa ankesave që ka marrë Telegrafi nga qytetarët, ata kanë mbetur të ngujuar në shtëpitë e tyre.

Vërshime në Drenas

Telegrafi ka kontaktuar me Nexhmendin Grudën nga Drejtoria për Shërbime Publike dhe Emergjencë në Komunën e Drenasit, i cili ka thënë se aktualisht gjendja nuk është alarmante, por që zonat më të prekura janë Arllati, Komorani dhe një pjesë e qytetit.

“Aktualisht në komunën tonë nuk është gjendja kritike, por që në bashkëpunim me zjarrëfikësit, jemi duke u dalë në ndihmë qytetarëve që janë prekur nga reshjet e shiut. Zonat më të prekura janë Arllati, Komorani dhe një pjesë e qytetit, por që situatën e kemi nën kontroll”, tha Gruda.

Meteorologët paralajmërojnë se reshjet mund të vazhdojnë edhe në ditët në vijim, duke rritur rrezikun për përmbytje të tjera.

Situatë problematike vazhdon të jetë edhe në Malishevë, ku parkingu nëntokësor dhe nënkalimi për vetura janë përfshirë sërish nga uji. Ky objekt kishte dalë jashtë funksionit edhe pak ditë pas përurimit të tij, si pasojë e reshjeve dhe grumbullimit të ujit. Edhe pse Komuna e Malishevës më herët kishte deklaruar se problemi lidhej me bllokimin e sistemit të kullimit nga qytetarë të papërgjegjshëm, pamjet e fundit të publikuara në rrjetet sociale tregojnë se situata nuk është zgjidhur. Parkingu mbetet i pakalueshëm për automjetet, duke shkaktuar vështirësi të konsiderueshme për drejtuesit e tyre.

Parkingu nëntokësor në Malishevë sërish i përmbytur pas reshjeve të shiut

Ndërkohë, Komuna e Gjakovës ka njoftuar se për shkak të shkrirjes së shpejtë të borës në zonat malore dhe reshjeve të vazhdueshme të shiut, gjendja në disa pjesë të komunës paraqitet e paqëndrueshme. Më e rrezikuar situata është pranë lumenjve, të cilët po përballen me prurje të mëdha të ujit. Si pasojë, është bllokuar përkohësisht rruga “Bujar Roka” dhe ura e Shkugëzes, pasi kalimi është vështirësuar nga rritja e nivelit të lumit Erenik.

Situatë e rënduar është edhe në disa pjesë të Prishtinës, ku lagjet si Prishtina e Re, Dardania, Lakërishtë dhe disa zona të tjera janë duke u përballur me vërshime.

Vërshime të mëdha janë raportuar edhe në fshatin Fortesë të Rahovecit, ku pothuajse i gjithë fshati është vërshuar nga uji.

Sipas Institutit Hidrometeorologjik të Kosovës, reshjet e shiut nga data 3 deri më 5 janar 2026 kanë shkaktuar rritje të ndjeshme të niveleve të ujit në pjesën perëndimore të vendit, veçanërisht në pellgun e Drinit të Bardhë.

Fshati Fortesë në Rahovec

Vërshime janë raportuar edhe në Gllarevë, më saktësisht në pjesën ku është duke u punuar në rrugën Klinë-Pejë, ku veturat janë duke hasur në vështirësi të kalojnë.

Situatë e rënduar raportohet edhe nga Lipjani, ku lexuesit e Telegrafit kanë dërguar edhe video se si veturat e kanë të vështirë të qarkullojnë lirshëm.

Lumenjtë që burojnë nga Alpet Shqiptare, përfshirë Erenikun, Bistricën e Pejës, Bistricën e Deçanit dhe Lumin e Istogut, kanë shënuar rritje të theksuar të niveleve, duke rritur rrezikun për dalje nga shtrati në disa zona.

Sasitë më të mëdha të reshjeve janë regjistruar në Junik me 231.5 mm, Gllogjan me 151.6 mm, Kuqishtë me 130.4 mm dhe Radoniq me 124.7 mm. Ndërkohë, niveli i lumit Erenik në Gjakovë ka arritur në 3.4 metra, një nga nivelet më të larta të matura gjatë kësaj periudhe.

Autoritetet komunale dhe institucionet përgjegjëse u bëjnë thirrje qytetarëve, veçanërisht atyre që jetojnë pranë rrjedhave lumore, të tregojnë kujdes të shtuar dhe të ndjekin njoftimet zyrtare, pasi situata mbetet e ndjeshme dhe kërkon vëmendje të vazhdueshme. /Telegrafi/

Njësiti i Hetimeve të Stacionit Policor të Fushë Kosovës, me autorizim të prokurorisë kompetente, ka kërkuar bashkëpunim nga qytetarët për të ndihmuar në identifikimin e vendodhjes së një personi të dyshuar për vjedhje të rëndë.

Sipas njoftimit të Policisë, personi i dyshuar është: Kushtrim Beqiraj, i cili kërkohet për përfshirje në veprën penale të vjedhjes së rëndë.

Policia bën thirrje: “Të nderuar, për çdo informatë që mund të çojë në identifikimin dhe gjetjen e tij, ju lutemi kontaktoni Policinë e Kosovës në numrin 192 ose në adresën info@kosovopolice.com”.

Autoritetet vlerësojnë çdo informacion të dhënë dhe sigurojnë konfidencialitet për personat që ofrojnë ndihmë, duke theksuar rëndësinë e bashkëpunimit qytetar në parandalimin e krimeve dhe sigurimin e rendit publik. /Telegrafi/

Një rast i rëndë është raportuar më 31 dhjetor 2025 në Fushë Kosovë, ku rreth orës 05:30 një grua ka kërkuar ndihmë mjekësore pas një ngjarjeje të dyshuar si dhunim seksual.

Sipas deklarimit të viktimës, asaj fillimisht i janë dhënë alkool dhe substanca narkotike, ndërsa më pas është dhunuar në një motel nga dy persona meshkuj të panjohur. Tutje, viktima ka deklaruar se është futur me forcë në një veturë dhe më pas është lënë në rrugë.

Lidhur me rastin janë njoftuar njësitë policore, ndërsa me vendim të prokurorit kompetent, viktima është dërguar në Institutin e Mjekësisë Ligjore (IML) për ekzaminime të mëtejme.

Rasti është duke u hetuar dhe autoritetet po punojnë për identifikimin dhe arrestimin e personave të dyshuar. /Telegrafi/

Policia e Kosovës ka njoftuar për dy raste të personave të zhdukur që janë raportuar ditët e fundit në Fushë Kosovë.

Sipas policisë, rasti i parë është raportuar më 26 dhjetor 2025, rreth orës 22:00, në rrugën Kadri Minushi, ku ankuesi mashkull kosovar ka njoftuar se vajza e kunatit të tij ka dalë nga shtëpia dhe që nga ajo kohë nuk dihet për vendndodhjen e saj.

Ndërkaq, rasti i dytë është raportuar më 29 dhjetor 2025, ndërsa zhdukja ka ndodhur më 27 dhjetor 2025, rreth orës 12:00, në rrugën Bedri Pejani. Ankuesi ka deklaruar se djali i tij i mitur ka dalë nga shtëpia dhe nuk është kthyer më.

Policia ka bërë të ditur se të dy rastet janë duke u hetuar dhe se janë duke u ndërmarrë veprimet e nevojshme për lokalizimin e personave të zhdukur. /Telegrafi/

Një aksident me fatalitet ka ndodhur rreth orës 00:50 në rrugën “Shefki Kuleta” në Fushë Kosovë.

85-vjeçari Isuf Obrazhda, u godit nga një veturë.

Si pasojë e lëndimeve të rënda, viktima u dërgua për trajtim mjekësor në Qendrën Klinike Universitare të Kosovës, por megjithë përpjekjet e stafit mjekësor, rreth orës 06:00 të mëngjesit të sotëm, është konfirmuar vdekja e tij.

Me urdhër të Prokurorit kujdestar, trupi i pajetë i viktimës i është dorëzuar familjarëve.

Rasti po hetohet nga organet kompetente si aksident komunikacioni me fatalitet, për të zbardhur të gjitha rrethanat e ngjarjes.

Një person është arrestuar të martën pasdite në rrugën “Nëna Terezë” në Fushë Kosovë, nën dyshimin për blerje, posedim, shpërndarje dhe shitje të paautorizuar të substancave narkotike.

Sipas njoftimit të Policisë, gjatë kontrollit në trup dhe në banesën e të dyshuarit mashkull kosovar, njësitë policore kanë gjetur dhe konfiskuar 534.6 gram substanca të dyshuara narkotike, të paketuara në qese plastike.

Po ashtu, nga i dyshuari është konfiskuar edhe një telefon celular.

I dyshuari është intervistuar në prani të organeve kompetente dhe, me vendim të prokurorit, është dërguar në mbajtje. /Telegrafi/

Një 21-vjeçar është arrestuar në Fushë Kosovë, i dyshuar për përfshirje në disa raste të vjedhjeve të rënda, ka njoftuar Policia e Kosovës.

Sipas policisë, rastet kanë ndodhur kryesisht në rajonin e Fushë Kosovës, ku nga tetë automjete të ndryshme janë vjedhur mjete pune dhe gjësende të tjera.

Gjatë bastisjes në vendbanimin e të dyshuarit, E.H., hetuesit policorë kanë gjetur dhe sekuestruar mjete pune dhe sende të vjedhura, të cilat më pas u janë kthyer pronarëve të tyre.

Personi i dyshuar, mashkull 21-vjeçar, shtetas i Republikës së Kosovës, është dërguar në mbajtje për 48 orë, ndërsa hetimet lidhur me këto raste po vazhdojnë.

Policia ka bërë të ditur se po kryhen të gjitha veprimet e nevojshme procedurale për zbardhjen e plotë të rasteve.

Qendra Kryesore e Mjekësisë Familjare (QKMF) në Fushë Kosovë është pajisur me një autoambulancë të re, e cila është siguruar nga Ministria e Shëndetësisë, me qëllim të përmirësimit të shërbimeve shëndetësore dhe rritjes së kapaciteteve për intervenim të shpejtë emergjent.

Nga Komuna e Fushë Kosovës bëhet e ditur se kjo autoambulancë paraqet një ndihmë të rëndësishme, duke pasur parasysh numrin e madh të banorëve dhe nevojat e shtuara për shërbime shëndetësore në komunë. Sipas njoftimit, pajisja e re do të ndikojë drejtpërdrejt në ofrimin më efikas dhe më cilësor të shërbimeve mjekësore për qytetarët.

“Duke marrë parasysh ngarkesën dhe kërkesat e vazhdueshme për shërbime emergjente, kjo autoambulancë është një ndihmë e mirëseardhur dhe e domosdoshme për QKMF-në dhe për qytetarët e Fushë Kosovës”, thuhet në njoftimin e komunës.

Komuna e Fushë Kosovës ka shprehur falënderim ndaj Ministrisë së Shëndetësisë për mbështetjen dhe bashkëpunimin e vazhdueshëm, duke theksuar se investime të tilla janë në funksion të drejtpërdrejtë të përmirësimit të shëndetit publik dhe shërbimeve për qytetarët. /Telegrafi/

Drejtoria e Infrastrukturës e Komunës së Fushë Kosovës ka realizuar inspektim në terren në kuadër të kontratës për projektin dyvjeçar “Rregullimi i Rrugës Dardania në Fushë Kosovë”.

Gjatë inspektimit, Autoriteti Kontraktues ka kryer hapje kontrolluese për të verifikuar pozicionin, nivelin dhe përputhshmërinë teknike të instalimeve nëntokësore, në përputhje me projektin ekzekutiv, paramasat dhe paralogaritë përkatëse.

Këto ndërhyrje janë pjesë e procedurave të rregullta të kontrollit teknik të punimeve në terren.

Nga komuna bëhet e ditur se, për shkak të kushteve sezonale dhe periudhës së festave, është paraparë nivelizimi i përkohshëm i sipërfaqes së punuar, me qëllim të sigurimit të qasjes funksionale për bizneset dhe krijimit të kushteve të përshtatshme për vazhdimin e punimeve në fazat e ardhshme të projektit. /Telegrafi/

Komuna e Fushë Kosovës ka njoftuar se hapësira e parkingut brenda oborrit të objektit komunal tashmë është e lirë dhe e qasshme për të gjithë qytetarët.

Sipas njoftimit zyrtar, nga data 8 dhjetor 2025, parkingu i komunës do të jetë në shërbim të qytetarëve që vizitojnë institucionin për të marrë shërbime administrative. Vendimi është marrë me rekomandim të kryetarit të Komunës së Fushë Kosovës, Valon Prebreza.

Deri më tani, kjo hapësirë parkimi ka qenë e dedikuar ekskluzivisht për automjetet zyrtare dhe stafin administrativ të komunës.

Nga komuna bëhet e ditur se ky vendim ka për qëllim lehtësimin e qasjes së qytetarëve në shërbimet komunale dhe përmirësimin e kushteve gjatë vizitave të tyre në institucion. /Telegrafi/

Lidhja Demokratike e Kosovës ka njoftuar përmes një postimi në Facebook se sot do të zhvillojë takime publike në Obiliq, Fushë Kosovë dhe Prishtinë Dega 2.

“Kryetari i LDK-së dhe kandidati ynë për kryeministër, Lumir Abdixhiku, vjen për t’ju folur drejtpërdrejt për vizionin e tij për një Kosovë më të fortë, më të drejtë dhe plot shpresë”, shkruan LDK.

"Në kuadër të këtyre takimeve, partia do të prezantojë programin qeverisës dhe kandidatët nga këto degë, të cilët sipas njoftimit janë “të njohur, të përkushtuar dhe të gatshëm të punojnë për qytetarët me ndershmëri dhe përgjegjësi”.

Partia fton qytetarët, familjarët, miqtë dhe aktivistët që të marrin pjesë në këto takime për të dëgjuar vizionin e LDK-së dhe për të dhënë mbështetjen e tyre për të ardhmen e Kosovës.

“Zgjidh shpresën! Le të jemi bashkë për Kosovën, për ndryshimin që e presim!”, përfundon postimi.

Drejtori i Kulturës, Rinisë dhe Sportit në Fushë Kosovë, Ylber Kelmendi, ka reaguar për gjendjen e rënduar të Shtëpisë së Kulturës në këtë komunë, duke theksuar se objekti është lënë në harresë dhe pa mirëmbajtje për vite me radhë.

Në një postim në Facebook, Kelmendi ka bërë të ditur se shfaqja e fundit në këtë objekt është mbajtur para rreth 20 vitesh dhe se që nga ajo kohë kultura në Fushë Kosovë nuk ka pasur vëmendjen e duhur.

Sipas tij, objekti që dikur kishte jetë kulturore, sot ndodhet në gjendje të mjerueshme, me mungesë të plotë të mirëmbajtjes.

Ai ka njoftuar se Drejtoria e Kulturës, Rinisë dhe Sportit ka ndërmarrë hapin e parë konkret, duke filluar me pastrimin e brendshëm të objektit, një proces që, sipas tij, nuk ka ndodhur prej dekadash. “Ky është vetëm fillimi”, ka theksuar Kelmendi.

Drejtori ka paralajmëruar se Shtëpia e Kulturës do t’i nënshtrohet një rikonstruksioni të plotë dhe se synimi është që ajo t’u rikthehet qytetarëve si hapësirë funksionale për artin dhe kulturën. Në fund, ai ka nënvizuar se Fushë Kosova meriton më shumë dhe se kultura duhet të trajtohet me dinjitet. /Telegrafi/

Pas hetimeve të policisë dhe Prokurorisë lidhur me rastin e dyshuar të dhunimit të një të mituri në Ferizaj, autoritetet kanë njoftuar se një person është arrestuar dhe dërguar në mbajtje.

“Më 16.12.2025 pas hetimeve të zhvilluara lidhur me rastin është arrestuar një i dyshuar mashkull kosovar dhe i njëjti pas intervistimit me vendim të prokurorit është dërguar në mbajtje”, ka njoftuar policia.

Rasti ishte raportuar më 15.12.2025, kur Policia e Kosovës në stacionin policor të Fushë Kosovës ka pranuar informacion për një i mitur të dyshuar se ishte abuzuar seksualisht.

E njohu në TikTok, i mituri nga Fushë Kosova dyshohet se u dhunua në Ferizaj

Viktima, i mitur ka treguar se përmes rrjetit social TikTok ishte njohur më parë me personin që dyshohet të ketë kryer veprën. Ngjarja dyshohet të ketë ndodhur në territorin e Ferizajt.

Specialistët e Policisë për hetimin e rasteve të tilla, në bashkëpunim me institucionet përkatëse, kanë ndërmarrë veprimet e nevojshme për zbardhjen e plotë të rastit.

Me autorizim të Prokurorit të Shtetit, është iniciuar hetim për veprën penale “dhunimi”.

Nga Prokuroria Themelore në Prishtinë dje është bërë e ditur se çështja është në fazë preliminare dhe po shqyrtohen provat dhe informacionet, ndërsa procedurat i nënshtrohen rregullave të procedurës për të mitur, duke qenë se viktima është i mitur dhe informacione të tjera janë konfidenciale. /Telegrafi/

Një rast i rëndë dyshohet të ketë ndodhur ditë më parë në qytetin e Ferizajt, ku një i mitur nga Fushë Kosova, po dyshohet se është dhunuar nga një person të cilin e kishte njohur në rrjetet sociale.

I mituri raportohet se ka treguar se përmes rrjetit social TikTok ishte njohur me një person që nuk e njihte më herët.

Lidhur me rastin Telegrafi ka kontaktuar me Prokurorinë Themelore në Prishtinë, të cilët kanë njoftuar se janë në fazën e mbledhjes së provave.

“Prokurori i Shtetit ka pranuar një informacion të tillë në lidhje me këtë çështje. Aktualisht çështja në fjalë është në fazën preliminare të grumbullimit të informacioneve dhe provave tjera të cilat do të shërbejnë për vijimin e procedurës së mëtejshme hetimore”, ka thënë zëdhënësja e kësaj prokurorie, Kaltrina Shala.

Ajo tutje ka shtuar se kjo çështje penale i takon procedurës për të mitur andaj kufizimi i informacioneve është konfidencial.

Ndryshe Policia e Kosovës ka njoftuar se më datë 15.12.2025, rreth orës 11:00, policia e stacionit policor në Fushë Kosovë, ka pranuar informacionin lidhur me një rast të dyshuar të abuzimit ndaj një të mituri.

“Dyshimet e ngritura sugjerojnë se i mituri është kontaktuar përmes rrjeteve sociale dhe se ngjarja dyshohet të ketë ndodhur diku në territorin e Ferizajt. Specialist të policisë për hetimin e rasteve të tilla, në bashkëpunim me institucionet relevante, janë duke ndërmarrë të gjitha veprimet e nevojshme për zbardhjen e plotë të rastit”, thuhet në njoftimin e policisë.

Policia ka shtuar se me autorizim të Prokurorit të Shtetit, gjithnjë duke garantuar konfidencialitetin dhe mbrojtjen e viktimës, është iniciuar një hetim në drejtim të veprës penale “Dhunimi”, përderisa po punohet intensivisht në identifikimin e të dyshuarit dhe përcaktimin e vendndodhjes së tij. /Telegrafi/