Një 38-vjeçar ka rënë në prangat e Policisë së Pogradecit si autor i dyshuar i djegies së qëllimshme të dy automjeteve, ndërsa është shpallur në kërkim porositësi i dyshuar i këtyre ngjarjeve. Në vijim të veprimeve procedurale, është proceduar penalisht edhe një 21-vjeçar për moskallëzim krimi.

Në kuadër të operacionit policor të koduar “The last fire”, uniformat blu të Korçës, kanë zbardhur dy ngjarjet e  ndodhura më 28 dhjetor 2025 dhe 26 shkurt 2026, në lagjen nr. 1 të qytetit të Pogradecit, ku u dogjën dy automjete.

Sipas Policisë, 38 vjeçari i arrestuar në bashkëpunim me një bashkëmoshatar po 38 vjeç, banues në Korçë, i shpallur në kërkim si porositës, dyshohet se kanë organizuar dhe kryer djegien e automjeteve në pronësi të dy shtetasve të ndryshëm.

Gjithashtu, materialet procedurale iu referuan Prokurorisë së Korçës, ku nisi procedimi penal edhe ndaj një 21 vjeçari, po ashtu banues në Korçë, për veprën penale “Moskallëzimi i krimit”.

Policia po vijon punën për kapjen e personit të shpallur në kërkim dhe për dokumentimin e plotë ligjor të kësaj çështjeje./abcnews.al

Ato kohë kur ishin në Olimp thuajse janë harruar. Kur kombëtarja e basketbollit të meshkujve të Kroacisë del sot në parket ndoshta askush nuk e kujton epokën e lavdishme të ndriçuar nga I paharruari Drazhen Petroviç, apo nga Toni Kukoç e Dino Raxha, për të mos folur për brezat e mëparshëm që nga Kreshimir Qosiç.
Gjithsesi, skuadra ballkanase dha një sinjal të fortë se mund të jetë rikthyer.

Kroatët mundën në Zagreb rivalin më të fortë të mundshëm në Europë, dhe më të fortin në botë pas Shteteve të Bashkuara të Amerikës, Gjermaninë.
Kampionët e kontinentit në fuqi dhe kampionët e rruzullit u mundën në një atmosferë të nxehrë në “Arenën Drazhen Petroviç” në kryeqytet me shifrat 93-88.
Rreth 5 500 spektatorë panë më në fund një Kroaci të madhe, ndonëse yjet që ka në përbërje mund të mos jenë me shkëlqimin e një Nikole Jokiç, Luka Donçiç apo Janis Adetokumbo.

Dario Shariç, që luan një rol periferik tek Sakramento në NBA, shënoi 23 pikë si dhe kapi 7 topa në tabela, talenti i Realit të Madridit, Mario Hezonja shtoi 21 pikë, 3 topa në tabela, 5 asistë e 3 vjedhje topi, Roko Baxhim shtoi 15 pikë, po aq sa amerikani I natyralizuar Xhejlën Smith, që pati edhe 5 topa në tabela e 6 asistë.
E përditshmja “Jutarnji List” shkruan se kjo fitore ishte rikthimi I krenarisë dhe bëri thirrje që dekadat e turpit të mos kthehen më.

Shpresojmë që diçka e bukur të ndodhë me basketbollin kroat, por gjithsesi këtë nuk do ta harrojmë, – është komenti I gazetës së Zagrebit.
Kroacia kryeson grupin eliminator të Kupës së Botës me 3 fitore në tri ndeshje, ndonëse prova e madhe do të jetë për pak ditë në Gjermani.

TIRANË– Ilir Proda shkarkohet nga posti i Drejtorit të Përgjithshëm të Policisë së Shtetit, pas akteve të dhunës nga militantët që cënuan sigurinë e qytetarëve. Në krye të Policisë së Shtetit është komanduar Sokol Bizhga, i cili prej vitit 2022 mban detyrën e zv/drejtorit të Përgjithshëm të Policisë së Shtetit.

Sipas burimeve nga detyra është larguar edhe drejtori i policisë së Tiranës, Elton Alushi.

Largimet e tyre vijnë një ditë pas protestës së dhunshme të opozitës ku u vunë në rrezik jeta e qytetarëve dhe e artistëve që ishin brenda vilës së Enver Hoxhës gjatë sulmit me molotovë të organizuar nga militantët e Partisë Demokratike.

Dy drejtuesit e lartë të Policisë së Shtetit janë shkarkuar me argumentin se nuk arritën të sigurojnë rendin dhe qetësinë publike. Në dy protestat e fundit të zhvilluara nga opozita policia nuk ka marrë përsipër zhvillimin e tubimit, për shkak të përdorimit të molotovëve dhe akteve të dhunës.

Proda mbante postin e Drejtorit të Përgjithshëm të Policisë së Shtetit që prej tetorit të vitit 2024.

/abcnews.al

TIRANË- Kryeministri Edi Rama u shpreh pas incidentit të ndodhur në rezidencën artistike “Vila 31 x Art Explora” në Tiranë, ku artistë ndërkombëtarë u gjendën nën një sulm me mjete shpërthyese artizanale.

Gjatë një vizitë të zhvilluar në mjediset e ish rezidencës së diktatorit, Kryeministri bisedoi me drejtoren ekzekutive të programit të Fondacionit Art Explora, Bisej Kapo, e cila ndodhej së bashku me artistët, në rezidencë gjatë kohës së sulmit nga protestuesit.

Kreu i qeverisë e cilësoi ngjarjen si një akt vandalizmi që synon të dëmtojë imazhin e vendit dhe bëri thirrje për përgjegjësi institucionale përballë akteve të dhunës.

Bashkëbisedimi i kryeministrit: 

“Jam këtu me drejtoren ekzekutive të programit të fondacionit ‘’Art Explora’’. Është një ndër fondacionet më prestigjiozë në botë për programet e artistëve  në rezidencë, siç quhen.

Prej disa kohësh kjo rezidencë e diktatorit dikur, është kthyer në një rezidencë artistësh që vijnë nga gjthë bota këtu në Tiranë,  në një destinacion që jep vlerë dhe e bën të çmuar Tiranën dhe Shqipërinë edhe në këtë drejtim dhe erdha për t’u takuar me artistët dhe për t’ju shprehur atyre të gjithë ndjenjën time të keqardhjes, për t’ju kërkuar falje për atë çka ndodhi mbrëmë kur u gjendën nën një sulm bombash artizanale, që largqoftë, mund të kishin sjellë edhe tragjedi këtu dhe ata janë të traumatizuar, nuk janë në gjendje të flasin për publikun.

I mirëkuptoj krejtësisht dhe kjo që ka ndodhur është një turp shumë i madh, është një dëm shumë i madh, është një plagë e hapur në atë që është fytyra e Shqipërisë së re dhe të cilën e përfaqëson dhe ko rezidencë, të cilën e mishërojnë dhe këta djem dhe këto vjaza të talentuara që vijnë nga të katër anët e botës, këtu.

Nuk kam fjalë për të thënë për çfarë turpi është ky, por dua t’ju them të gjithë atyre që ende simpatizojnë dhe ende  mbështesin barbarët e mbrëmshëm, frymëzuesit e tyre më saktë, se edhe ata që hedhin ato bombat artizanale janë ca totalisht të manipuluar. Pra, atyre që i simpatizojnë, dua t’i them që nga kjo, nga këto humbasin të tërë ata që duan të bëjnë punë, që duan të kenë turistë, që duan të zhvillojnë ekonominë e tyre të vogël, me biznesin e tyre të vogël apo që duan të rrisin qetësisht fëmijët këtu sepse Shqipëria e hapur nuk mund të mbyllet dhe këto kërcitje thjesht dhe vetëm e çojnë  ujin totalisht në mullirin e së shkuarës dhe nuk kanë të bëjnë fare me të ardhmen.

Bisej është këtu dhe natyrisht është edhe pjesë e asaj që ndodhi, ka qenë këtu mbrëmë, por duke qenë shqiptare e fortë, e ka pak më të lehtë ta kapërcejë këtë situatë.

Bisej Kapo: Praktikisht dje ishim qetë në rezidencë me program publik ku kemi pasur 100 veta që kanë hyrë në vilë gjatë paradites dhe në darkë vetëm kur dëgjojmë shpërthimet. Ne ishim vetëm sipër, pikërisht tek ai ballkon që e pa gjithë Shqipëria që u duk sikur morëm flakë faktikisht. Dhe në moment artistët u futën në korridorin që është më i mbrojturi, morën fikëset e zjarrit dhe u munduan që të mos na ndodhte ndonjë gjë sepse vila në vetvete është e gjitha prej druri. Zyra është e gjitha dru dhe mund të kishte eskaluar e gjithë situata në një fraksion sekondi.  Për mua fakti që nuk e dinin që është rezidenca e arteve, nuk është fare skuzim, madje më duket e turpshme që ta përdorësh si  një element që padija të justifikojë veprimin.

 Kryeministri Edi Rama: Nuk është padija, është marrëzia, është ligësia, është verbëria, është një kompleks gjërash dhe mbi të gjitha është urrejtja, një turp i pashoq që nxin Shqipërinë, që na nxin të gjithëve pavarësisht se ata që e bënë janë katran i Shqipërisë dhe janë fatmirisht një grusht njerëzish.

Numërimi mbrapsht ka nisur, ndërsa muaji mars kthen në fushë të gjitha kombëtaret e Shqipërisë për herë të parë në vitin 2026. Një kalendar i ngjeshur për të gjitha skuadrat kuqezi, megjithëse takimi më i rëndësishëm është në program më 26 mars.

Përfaqësuesja e parë do të luajë për historinë në sfidën e play off të “Botërorit 2026” në Varshavë kundër Polonisë.

Skuadra e drejtuar nga Silvinjo ëndërron biletën për në finalet e Kupës së Botës, por më parë duhet të kalojë polakët dhe më pas finalen e play off kundër fituesit e të çiftit Ukrainë-Suedi, në program më 31 mars.

Pushimet e gjata përfundojnë edhe për kombëtaren U21. Skuadra e drejtuar nga Alban Bushi kthehet në aksion me dy miqësore në fazën përgatitore që do të zhvillojë në Antalia të Turqisë.

Përfaqësuesja e 21-vjeçarëve do të luajë më 27 mars kundër Japonisë dhe tri ditë më pas kundër SHBA. Një program të ngjeshur kanë edhe kombëtaren e tjera kuqezi të moshave.

Skuadra U19 nis kualifikueset e “Euro 2027” në Grupin B4 me tre ndeshjet e para, të gjitha në shtëpi. Përfaqësuesja e drejtuar nga Fatjon Tafaj do të luajë kundër Luksemburgut më 25 mars, më pas më 28 dhe 31 mars kundër Maltës dhe Norvegjisë.

Ndërkohë, Kombëtarja U-17 do të luajë dy miqësore kundër Letonisë më 26 dhe 28 mars. Por marsi “kuqezi” çelet me përfaqësuesen e vajzave, që do të luajë dy ndeshje në kualifikueset e “Botërorit 2027”.

Skuadra e drejtuar nga Armir Grima e ka përballjen e parë më 3 mars në transfertë ndaj Malit të Zi, ndërsa katër ditë më pas do të presë në “Loro Boriçi” Çekinë.

ITALI– E kemi thënë që ai që quhej dikur më I bukuri ka nevojë për një revolucion. Skuadrat e Serisë A nuk janë edhe aq në modë në Champions, ndonëse Interi është nënkampion në fuqi I kontinentit, dhe pikërisht zikaltërit patën nevojë për një sukses që të harronin atë që ndodhi në mesjavë.

Ekipi nga Lombardia e la pas më në fund eliminimin që në plej ofin e Ligës së Kampionëve, madje prej norvegjezëve modestë të Bodo Glimtit, duke fituar ndaj Xhenoas në kampionatin italian.

Në “San Siro”, në prani të një numri tepër të madh tifozësh, milanezët ia dolën me golat e shënuar nga Dimarko, lojtari I tyre më I mirë I momentit, dhe që doli më I miri I ndeshjes, si dhe nga Hakan Çalhanoglu me penallti.

I pari në pjesën e parë, ndërsa mesfushori veteran turk pas pushimit në 70’. Suksesi ishte I drejtë, pasi Interi bëri trefishin e gjuajtjeve gjithsej dhe pesëfishin e atyre në kuadratin e portës.

Edhe pse kritikat pas disfatës në Champions ishin të forta, trajneri Kristian Kivu nuk është dakord me trajtimin e të besuarve të tij dhe kërkoi më shumë respekt pas ndeshjes.

Kryesuesit e Serisë A mbajnë vendin e parë me 67 pikë, tepër të shkëputur nga ndjekësit, Milan e Napoli./abcnews.al

E shohin si Mesian e ri. Jo thjesht si një tjetër mishërim i Lionel Mesit, por si shpëtimtarin e futbollit spektakolar, dhe jo rastësisht mban fanelën “blaugrana”.

Lamin Jamal është padyshim talenti më I madh I sportit më popullor të botës sot për sot, e ndoshta po kthehet në më të mirin e momentit, ndërsa lumturoi miliona me 3-golëshin e tij të parë në karrierë.

Tregolëshi I parë I tij tek Barcelona u shënua në fitoren 4-1 në “Kamp Nou” ndaj Vijarrealit, në një përballje aspak të lehtë në La Liga.

Jamal vendosi një rekord të klubit dhe një të shekullit. Ai kaloi legjendën Mesi si më I riu që shënon një tregolësh për katalanasit në moshën 18 vjeç, 7 muaj e 15 ditë.

Argjentinasi ia kishte dalë 19 vjeç, 8 muaj e 16 ditë.

Po ashtu, adoleshenti I sotëm u bë më I riu lojtar që shënon një hatrik që nga viti 2000, duke lënë pas një tjetër ish-katalanas, Zhiovani dos Santos.

Siç raporton e përditshmja “Marka”, prej 59 vitesh një futbollist më pak se 19 vjeç nuk kishte shënuar 3 gola në një ndeshje në La Ligë.

Jamal shënoi në minutat 28, 37 e 69.

Pape Geje shkurtoi përkohësisht në 2-1 për Vijarrealin, ndërsa golin e katërt për Barçën e realizoi veterani I sulmit, Robert Levandovski në minutën e parë shtesë.

Kjo ishte dhurata e katalanasve për trajnerin e tyre Hansi Flik që mbushi 100 ndeshje në stol.

Epërsia ishte e madhe, dhe fitorja e merituar. Flitet për një hap tjetër drejt mbrojtjes së titullit kampion, një mision që mbetet shumë I vështirë, si dhe një paralajmërim se kërkohet përmbysja e humbjes 0-4 në Madrid ndaj Atletikos në Kupën e Mbretit.

Jo më kot e quajnë “Der Klasiker”. Është derbi i madh i Gjermanisë kur Dortmundi pret Bajernin, dhe tifozët vendas e nisën ndeshjen e tyre shumë kohë para se të mbërrinin në stadium.

Me mijëra pjesëtarë të “Murit të Verdhë” shkuan si vullkan në “Signal Iduna Park”, ku krijuan gjithashtu koreografinë e tyre të veçantë.

Nga ana tjetër, përkrahësit miq patën fat krejt të kundër. Ata u përplasën me policinë ndërsa do të hynin në stadium, sepse 30 prej tyre kishin bileta të falsifikuara.

Kjo bëri që rreth 500 tifozë të mos e ndiqnin ndeshjen, ndërsa ata që ishin të pranishëm ishin shumë më të heshtur se zakonisht.

Të përditshmet “Bild” dhe “Abendcajtung” shkruajnë se policia përdori shkopat e gomës dhe spraj djegës ndaj tifozëve, ndonëse forcat e rendit e hodhën poshtë këtë.

Gjithsesi, Bajerni ia doli edhe me mbështetje të dobët të tifozëve, edhe pse Dortmundi pati përkrahje të zjarrtë nga 80 000 tifozë.

Borusia kaloi e para në epërsi me golin shënuar nga Shloterbek, ish-yll bavarez.

Harri Kejn përmbysi rezultatin me dy rrjeta në 54’ e 70’, kjo e fundit me penallti, dhe me 30 gola kërcënon rekordin e një sezoni të Bundesligës mbajtur nga Levandovski me 41.

Edhe pse Dormtund barazoi me anë të Svensonit 7 minuta para fundit, bavarezët treguan karakter. Kimih vendosi rezultatin 3-2 në 87’. Bajerni tashmë e ka vrarë luftën për titull duke kryesuar me 63 pikë ndaj 52 të Borusias në vend të dytë.

Udhëheqësi Suprem i Iranit, Ajatollah Ali Khamenei ka mbetur vrarë si pasojë e sulmeve ajrore nga Izraeli dhe Shtetet e Bashkuara të Amerikës mbi kompleksin e tij në Teheran.

Pas konfirmimit nga Izraeli dhe Shtetet e Bashkuara për eliminimin e 86-vjeçarit, lajmi u konfirmua edhe nga vetë Teherani.

Televizioni Shtetëror Iranian njoftoi shpalljen e 40 ditëve zie kombëtare ndërsa regjimi islamik është zotuar për hakmarrje ndaj sulmeve Amerikane dhe Izraelite.

Ndërsa Regjimi pa një kokë drejtuese kërkon respektimin e zisë qytetaret anembanë Iranit kanë festuar eliminimin e Khameneit me shpresën se ky do te jete fundi i këtij regjimi.

Ajatollah Ali Khamenei sundoi Iranin për 36 vjet, duke e shndërruar vendin në një forcë të fuqishme kundër ndikimit amerikan në Lindjen e Mesme dhe duke shtypur me forcë çdo valë protestash të brendshme. Fillimisht i konsideruar si figurë e dobët dhe pa karizëm pas vdekjes së Ajatollah Ruhollah Khomeinit në vitin 1989, ai arriti të përqendrojë pushtetin absolut në duart e tij.

Analistët Ndërkombëtar e kanë konsideruar Khamenein si një rast të rrallë të historisë që u shëndërrua nga një president I dobët, në një nga figurat më të fuqishme Iraniane në Shekullin e fundit.

Gjatë gjithë sundimit të tij, Khamenei mbajti një qëndrim armiqësor ndaj Shteteve të Bashkuara, të cilat i quante shpesh “Djalli i Madh”. Edhe pse në vitin 2015 mbështeti me kujdes marrëveshjen bërthamore me Perëndimin, armiqësia ndaj Uashingtonit u thellua në vitin 2018, kur administrata amerikane u tërhoq nga marrëveshja dhe rivendosi sanksionet ekonomike.

Në planin e brendshëm, ai u përball me protesta të mëdha në vitet 1999, 2009 dhe 2022. Pas vdekjes së Mahsa Aminit në paraburgim, regjimi reagoi me shtypje të ashpër, duke përdorur arrestime masive dhe ekzekutime për të frikësuar popullsinë.

Si udhëheqës suprem, Khamenei kishte kontroll mbi forcat e armatosura, gjyqësorin dhe mediat shtetërore, si dhe ndikim të drejtpërdrejtë mbi Gardën Revolucionare. Ai ndërtoi një rrjet të gjerë ndikimi rajonal duke mbështetur milici shiite në Irak dhe Liban, regjimin e Bashar al-Assadit në Siri, Hamasin në Gaza dhe rebelët Huthi në Jemen, në atë që u quajt “Boshti i Rezistencës”.

Megjithatë, në vitet e fundit aleancat e tij u dobësuan rëndë. Rënia e regjimit sirian dhe humbjet e Hezbollahut dhe Hamasit ndaj Izraelit shënuan një tkurrje të ndjeshme të ndikimit iranian në rajon.

Konflikti mes Iranit dhe Izraelit, që për vite ishte zhvilluar në hije, shpërtheu hapur në vitin 2025, kur Izraeli ndërmori sulme të gjera ajrore ndaj objektivave bërthamore iraniane. Irani reagoi me raketa dhe dronë, duke e shndërruar përplasjen në luftë të drejtpërdrejtë 12-ditore, ku u përfshinë edhe Shtetet e Bashkuara.

Negociatat e fundit diplomatike dështuan për shkak të këmbënguljes së Teheranit për të ruajtur pasurimin e uraniumit. Uashingtoni dhe Tel Avivi deklaruan se kjo përbënte rrezik për prodhimin e armëve bërthamore, ndërsa Irani pretendonte se programi kishte qëllime paqësore.

Khamenei kishte mohuar vazhdimisht synimin për të ndërtuar armë bërthamore dhe kishte nxjerrë një qëndrim fetar kundër përdorimit të tyre. Megjithatë, ai mbeti simbol i vijës së ashpër kundër Perëndimit dhe përkrahës i politikave radikale të revolucionit islamik të vitit 1979.

Vdekja e Ajatollah Ali Khameneit e lë Republikën Islamike në një pasiguri të thelle me përplasje të brendshme se kush do te jete Lideri i Ri I vendit, ndërkohë qe sulmet e jashtme nga Amerika dhe Izraeli vijojnë.

TIRANË- Kryeministri i Shqipëria, Edi Rama, ka reaguar pasi Partia Demokratike hodhi molotovë në rezidencën e artistëve në ish-shtëpinë e diktatorit Enver Hoxha, në zonën e ish-Bllokut.

Ai e përshkroi sulmin si një “akt të verbër dhe të paguar”, që  kishte si qëllim të frikësonte qytetin dhe të njolloste Shqipërinë.

Më tej, Rama kritikoi ashpër gjyqësorin për lirimin e personave të arrestuar për këto akte vandalizmi, duke i cilësuar gjykatësit si bashkëpërgjegjës për ngjarjet.

Kreu i qeverisë theksoi se Shqipëria nuk mund të lejojë plane dhune dhe veprime kriminale brenda territorit të saj dhe u bëri thirrje autoriteteve të sigurojnë drejtësi dhe mbrojtje për komunitetin artistik dhe qytetarët.

“Sapo dola nga rezidenca e artistëve në ish-shtëpinë e diktatorit, ku prej kohësh tanimë fondacioni prestigjoz Art Explora mikpret të rinj të talentuar nga Shqipëria, Kosova e mbarë bota, të cilët i gjeta të traumatizuar nga çmenduria e barbarisë së mbrëmshme.

Një sulm i verbër i një grushti të verbërish të paguar për të frikësuar qytetin dhe njollosur Shqipërinë, nën udhëheqjen e një ligësire kriminale tetëdhjetë e kusur vjeçare, që mban nga pas ca hunj gardhi me status deputeti, e që vjen vërdallë si i marri i lagjes nëpër Tiranë, ndërkohë që s’ia var më thuajse askush!

Gjykatësit që i lirojnë këta zjarrvënës të rrezikshëm, sa herë arrestohen nga policia janë bashkëpërgjegjës për këto vandalizma të pandodhura askund në Europë me bekimin e nën hyqmin e një partie parlamentare, në selinë e të cilës nuk flitet për ide e programe, po bëhen vetëm plane dhune dhe bomba artizanale!

Turp për çdo gjykatës që rinxjerr në rrugë këta keqbërës të Shqipërisë dhe turp për qeverisjen e gjyqësorit që rri e vështron sikur Shqipëria nuk është edhe atdheu i saj”, shkruan Rama./abcnews.al

TIRANË- Tre shtetas janë ekstraduar në Shqipëri nga Gjermania dhe Italia, të dënuar për veprimtari kriminale në fushën e narkotikëve, ndihmë për kalim të paligjshëm dhe korrupsion.

Të ekstraduarit janë Ibrahim Anxhara alias Ibrahim Potka, 27 vjeç, u ekstradua nga Gjermania.

Ai ishte dënuar nga Gjykata e Korçës në vitin 2024 me 3 vite e gjysmë burgim për prodhim dhe shitje të narkotikëve, Samoel Terolli alias Jetmir Hysenaj, 46 vjeç, u ekstradua nga Milano.

Ai rezulton i dënuar nga Gjykata e Lezhës në qershor 2023 me 5 vite burgim për ndihmë në kalim të paligjshëm të kufijve.

Po ashtu u ekstradua Genci Balla, 51 vjeç, banues në Durrës, gjithashtu u ekstradua nga Italia.

Ai ishte dënuar nga Gjykata e Durrësit me 2 vite e 8 muaj burgim për korrupsion pasiv të personave që ushtrojnë funksion publik./abcnews.al.

Forcat e armatosura të Iranit kanë njoftuar se katër zyrtarë të lartë ushtarakë janë vrarë në sulmet amerikano-izraelite ndaj vendit, të cilat nisën një ditë më parë.

Siç raporton agjencia e lajmeve Fars, zyrtarët u shënjestruan teksa merrnin pjesë në një mbledhje të Këshillit të Mbrojtjes.

Nga atje thanë se të vrarët në sulme janë shefi i Shtabit të Përgjithshëm, Abdolrahim Mousavi, komandanti i Gardës Revolucionare Islamike (IRGC), Mohammad Pakpour, sekretari i Këshillit të Mbrojtjes, Ali Shamkhani dhe ministri i Mbrojtjes dhe Logjistikës së Forcave të Armatosura, Aziz Nasirzadeh.

Ushtria tha se emrat e komandantëve të tjerë të vrarë do të bëhen të ditur më vonë.

Më herët, autoritetet iraniane kishin konfirmuar vdekjen e Shamkhanit dhe Pakpourit. Përveç komandantëve të lartë, u konfirmua edhe vrasja e Udhëheqësit Suprem Ajatollah Khamenei. Është shpallur një periudhë zie 40-ditore dhe është emëruar një këshill i përkohshëm deri në zgjedhjen e pasardhësit.

Në disa pamje të publikuara në rrjetet sociale një folës në televizionin iranian u shfaq për të dhënë lajmin e vrasjes së udhëheqësit suprem, Ajatollah Ali Khamenei. Gazetari shpërtheu në lot ndërsa lexonte deklaratën për vdekjen e Khameneit.

Irani konfirmoi vdekjen e udhëheqësit të tij të dielën herët sipas kohës lokale, një ditë pasi filluan sulmet amerikane dhe izraelite në këtë vend. Në këtë drejtim, raportojnë mediat e huaja, Irani ka shpallur 40 ditë zie pas vdekjes së Khameneit.

Siç u raportua më herët, Udhëheqësi Suprem i Iranit, Ajatollah Ali Khamenei, u vra në kompleksin e tij në kryeqytetin Teheran, raportuan mediat shtetërore iraniane.

Khamenei u vra “në zyrën e tij në shtëpinë e udhëheqësit” ndërsa “kryente detyrat e tij” në kohën e sulmit herët të shtunën, raportoi agjencia shtetërore e lajmeve Fars.

Dhe pas konfirmimit të vdekjes së tij, autoritetet shtetërore të Iranit kanë nxituar të zotohen për hakmarrje. Qeveria iraniane tha në një deklaratë se “ky krim i madh nuk do të mbetet kurrë pa përgjigje dhe do të kthejë një faqe të re në historinë e botës islamike”.

TIRANË– Kryeministri i vendit, Edi Rama, u shpreh se raporti i Bankës Europiane për Rindërtim dhe Zhvillim konfirmon se ekonomia e vendit po rritet në mënyrë të qëndrueshme.

Ai theksoi se BERZH po ashtu parashikon një përshpejtim të rritjes ekonomik,  gjë që përbën patjetër një lajm shumë të mirë edhe për Shqipërinë, që pozicionohet me një ritëm konkurrues në këtë rajon.

“Edhe diçka tjetër në këto shënime, raporti i fundit i Bankës Europiane për Rindërtim dhe Zhvillim jep një konfirmim tjetër, edhe një herë, të faktit që ne e përsërisim prej kohësh, po çuditërisht, kur këto i thonë të huajt, kur i thonë organizmat me reputacion ndërkombëtar, ngjisin më shumë, ekonomia shqiptare po rritet me qëndrueshmëri.

Në vitin 2025 sipas Berzh-it rritja reale e Prodhimit të Brendshëm Bruto ishte afro 4%, ndërsa për periudhën 2026-2027 parashikohet një ritëm i ngjashëm. Këto nuk janë thjeshtë shifra statistikore, janë indikatorë të një stabiliteti makro-ekonomik dhe të një besimi të ri të Shqipërisë tek vetja dhe të investitorëve tek Shqipëria. Rritja mbështetet kryesisht në sektorë, jo vetëm tradicional, pra në sektorin e pasurive të paluajtshme që mund ta quajmë tradicional, por edhe në shërbime të teknologjisë së informacionit dhe komunikimit, gjë që është një prurje e re në portofolin e ekonomisë tonë dhe që lidhet edhe me atë që thashë në pikën e mëparshme të këtyre shënimeve.

Një tjetër element domethënës se niveli rekord i investimeve të huaja direkte në vitin 2025, të përqendruara edhe këto në pasuri të paluajtshme dhe shërbime financiare, një pikë që i përgjigjet asaj pyetjes së famshme dhe famëkeqe – “Kush i blen këto apartamente”, “kush i blen këto ndërtime” dhe ndërkohë që blerësit me nënshtetësi të huaj, jo vetëm shqiptarë, që kanë marrë një nënshtetësi të huaj, por flasim këtu për të huaj që kanë nënshtetësi të huaj dhe kombësi të huaj, vetëm rriten. Dhe e fundit, në Ballkanin Perëndimor, Berzh-i parashikon një përshpejtim të rritjes ekonomike, edhe në vitin 2026, edhe në vitin 2027, gjë që përbën patjetër një lajm shumë të mirë edhe për Shqipërinë, që pozicionohet me një ritëm konkurrues në këtë rajon.”, theksoi Rama./abcnews.al

TIRANË- Qeveria e Shqipërisë ka miratuar këtë javë një vendim të rëndësishëm për arsimin, duke hyrë në fuqi nga 1 janari.

Pagat bruto të punonjësve të arsimit parauniversitar do të indeksohen me 2.5%, ndërsa për ata me paga nga 58,000 deri në 74,000 lekë në muaj, shtohet edhe një shtesë prej 3,000 lekësh, që sjell një rritje totale nga 4% deri në 5.17%.

Nga ky indeksim përfitojnë 36,390 punonjës të sistemit arsimor: 30,000 në arsimin parauniversitar, 1,500 në arsimin profesional dhe 4,890 në arsimin parashkollor dhe konvikte.

Kryeministri Edi Rama theksoi në podkastin  “Flasim” se kjo masë tregon përkushtimin e shtetit për rritjen e mirëqenies së mësuesve, edukatorëve, psikologëve dhe punonjësve të tjerë të arsimit.

“Kemi miratuar këtë jave dhe një nga vendimet më të rëndësishme, që lidhet drejtpërdrejt me një nga shtyllat kryesore të jetës së vendit dhe që ka të bëjë në mënyrë të pazgjidhshme me mirërritjen e fëmijëve tanë, që është arsimi.

Nga 1 janari, hyri në fuqi indeksimi me 2.5% i pagës bruto dhe për të gjithë punonjësit mësimorë dhe jo mësimorë të arsimit parauniversitar që nuk është vetëm kaq, por për kategoritë me pagë nga 58 mijë deri në 74 mijë lekë në muaj, aplikohet dhe një shtesë tjetër prej 3 mijë lekësh, që do të thotë që rritja e përgjithshme për këto kategori, arrin nga 4% deri në 5.17%.

Kjo është një risi në buxhetin e shtetit shqiptar, pra indeksimi i pagave, gjë që është aktuale në këtë pikë të bisedës për mësuesit, por nuk janë vetëm mësuesit, që përfitojnë nga ky indeksim gjë që ndodhte deri dje, vetëm për pensionistët, sepse ato ishin dje mundësitë. Sot, kjo Shqipëri ka mundësi të reja dhe siç e kam thënë në kohë të padyshueshme kur i thonë fjalës, pra, atëherë kur këto gjëra nuk ndodhnin, kam thënë se do të ndodhnin, që sa herë ne të rrisim mundësitë, duke rritur ekonominë, aq herë rritja e mundësive do të kthehet në diçka e prekshme për njerëzit.

Dhe është e prekshme aktualisht për 36,390 punonjës të sistemit arsimor: 30,000 në arsimin parauniversitar, 1,500 në arsimin profesional, 4,890 në arsimin parashkollor dhe në konvikte Me një efekt financiar të konsiderueshëm për buxhetin e shtetit, por tërësisht të merituar për njerëzit që përfitojnë dhe nuk është një shifër në tabelë, është një mesazh.

Një mesazh i qartë se tanimë nuk jemi më në kohën kur duhet pritur me vite për të parë një rritje sado simbolike page, po jemi në kohën që rrisim ekonominë, rrisim mundësitë dhe rrisim aftësinë rishpërndarëse të shtetit. Dhe është një mesazh për punën e mësuesit, për punën e edukatorit, psikologut, punonjësit social dhe çdo punonjës të sistemit arsimor, se ne jemi pranë tyre dhe do të vazhdojmë të mbështesim dhe përsëris, sa herë të kemi një mundësi, ajo mundësi e re do të jetë një mundësi për ta, për rritjen e mirëqenies së tyre.”, u shpreh kryeministri./abcnews.al

TIRANË- Kryeministri i Shqipëria, Edi Rama, ka reaguar pas rrëshqitjes së dherave në aksin rrugor Librazhd-Prrenjas, duke theksuar se kjo nuk ka lidhje me korrupsionin.

Sipas Ramës, rrëshqitja është pasojë e kushteve natyrore dhe terrenit të vështirë dhe jo e ndërhyrjeve njerëzore.

Ai njoftoi se Autoriteti Rrugor Shqiptar dhe ekipet inxhinierike kanë ndërhyrë menjëherë për të siguruar rrugët alternative, stabilizuar terrenin dhe përshpejtuar punimet për një zgjidhje të qëndrueshme të problemit.

“Dua të ndalem këtu edhe një herë për të adresuar një zhurmë të jashtëzakonshme bombash artizanale që shpërthyen në të tëra 700 tenxheret politike-mediatike të Shqipërisë, lidhur me një fatkeqësi natyrore ose siç quhet në kontratat e infrastrukturës, një ndërhyrje e një force madhore pra që s’ka të bëjë me njeriun, po me natyrën, në aksin e Korridorit të 8, në kantierin e Korridorit të 8, ku po ndërtohet një nga veprat më kuptimplota të Shqipërisë së viteve pas rënies së regjimit dhe kjo zhurmë, kjo çmenduri, e cila përcolli në mënyrë këmbëngulëse në veshët e shqiptarëve, mesazhin se ajo rrëshqitje prej disa qindra metrash në një aks shumë kilometërsh ishte pasojë e korrupsionit, nuk është asgjë tjetër, përveçse pjesë e  një zinxhiri të tërë histerie,  që i vjen rrotull këmbëve të Shqipërisë, pikërisht në kohën kur Shqipëria është duke kryer misionin më historik të saj për të mbërritur më në fund në majën ku meritojnë të jetojnë shqiptarët, aty ku është shtëpia e përbashkët e Bashkimit  Europian.

E pikërisht kur Shqipëria po e lufton korrupsionin më fort se asnjëherë dhe këto janë fakte, këtu flitet se korrupsioni është më i madh se asnjëherë. Po kaq e vërtetë është kjo, sa ç’është e vërtetë lidhja e korrupsionit me atë rrëshqitje. Zero, zero! Aty ka një gjeologji të vështirë dhe rrëshqitja ka afektuar,  jo aksin e ri, asgjë që lidhet me kantierin dhe me të gjitha punimet që janë bërë me kantierin përgjatë segmentit të rrugës Elbasan-Qafë-Thanë, po rrugën e vjetër, në një vend ku terreni malor, formacionet argjilore dhe shpatet e paqendrueshme janë afektuar ndjeshëm, siç ka ndodhur në shumë vende, duke u nisur nga Greqia fqinje për shkak të reshjeve shumë intensive dhe këmbëngulëse të këtij dimri.

Autoriteti Rrugor Shqiptar ka ndërhyrë menjëherë me masa adekuate emergjence. Policia e Shtetit ka bërë të gjitha përpjekjet për të siguruar prani 24 orë në të gjitha ditët që kur ka ndodhur bllokimi, për të garantuar sigurinë. Puna intensive për hapjen e rrugëve alternative, nuk është ndalur asnjë minutë, po ashtu dhe puna për të stabilizuar gjeoteknikisht terrenin. Paralelisht, ekipet inxhinierike janë në terren për të shkuar përtej riparimit sipërfaqësor që nuk është i mjaftueshëm sepse duhet garantuar stabilizimi i thelluar që t’i japi fund një herë e mirë problemit që është shfaqur aty dhe që ta bëjë këtë në mënyrë të qëndrueshme dhe prandaj, paralelisht me menaxhimin e situatës aktuale po përshpejtohet zhvillimi i kësaj infrastrukture të re strategjike. Edhe një herë, është shembulli tipik, më i freskët i diferencës midis realitetit dhe të vërtetat e një Shqipërie që ngjitet dhe dëshpërimit të atyre që përfaqësojnë Shqipërinë, që ne gjetëm në humnerë dhe që nga humnera ku ndodhen, duan ta tërheqin këtë vend poshtë, po nuk kanë për t’ia dalë sepse kjo Shqipëri nuk ndalet.”, tha ai./abcnews.al

TIRANË– Kryeministri i Shqipërisë, Edi Rama ka komentuar ndryshimet e bëra në kabinetin qeveritar, të enjten që shkoi.

Në podkastin “Flasim”, Rama u shpreh se këto lëvizje janë pjesë e një qasjeje të re, për të cilën kishte folur më herët edhe në fjalimin drejtuar Asamblesë Kombëtare të Partisë Socialiste.

“Këtë javë u zhvillua mbledhja e zgjeruar mujore e grupit parlamentar socialist ku u bë një diskutim i detajuar nga deputetët mbi ecurinë e punës në një sërë sektorësh për të cilët raportuan ministrat përkatës.

Po ashtu, në mbledhjen e zgjeruar mujore të grupit, unë fola për raportet midis politikës dhe drejtësisë, në një fazë kur shumëçka pozitive është arritur, por kur shumëçka tjetër kërkon adresim dhe për të gjithë ata që janë të interesuar mund t’i kthehen fjalës time në po këtë faqe, në ditën kur u mbajt mbledhja e zgjeruar mujore e grupit faktikisht, të enjten e shkuar.

Në ndërkohë po aty, unë ndava me deputetet dhe deputetët edhe planin e ndryshimeve në qeveri, të cilat janë ndryshime që shkojnë në atë që unë e kam konsideruar si një qasje e re në këtë aspekt dhe për të cilën kam folur, qysh në fjalën e drejtuar Asamblesë Kombëtare në krye të punëve të këtij mandati, duke bërë edhe krahasimin, mes ndryshimeve në një skuadër futbolli me ato në një skuadër basketbolli.

Kështu që, në këtë aspekt ndryshimet ishin të parapara, por natyrisht që nëse rrethanat do të kishin qenë të ndryshme, nuk do të kishte ndryshuar për rezultatet e jashtëzakonshme në punë, Zëvendëskryeministrja dhe Ministrja e Infrastrukturës dhe Energjisë që aktualisht në bazë të mbledhjes së zgjeruar të grupit dhe të planit të ri të kompozimit të qeverisë, është ish Zëvendëskryeministrja dhe Ministrja e Infrastrukturës dhe Energjisë.

Por gjithsesi për këtë temë, fola pak në mbledhjen e grupit dhe rezervova dhe më mbetet e rezervuar e drejta që të flas në mënyrë më shterruese, pasi të kem lexuar edhe raportin e Këshillit të Mandateve.”, u shpreh kryeministri./abcnews.al

TIRANË- Katër persona janë arrestuar nga policia pas protestës së zhvilluar të shtunën nga Partia Demokratike. Protesta u shoqërua me tensione dhe akte dhune në rrugët e kryeqytetit.

Gjatë protestës, mbrëmjen e së shtunës janë shoqëruar në komisariat mbi 10 persona, ndërsa katër prej tyre tashmë janë vënë në pranga për veprime të kundërligjshme.

Ndërkohë, Policia e Shtetit  ka referuar materialet në Prokurorinë e Posaçme Kundër Korrupsionit dhe Krimit të Organizuar për deputetin e PD, Klevis Balliun. Ai akuzohet për “Përgjegjësinë Penale të Personave Juridikë” si dhe për veprën penale “Organizimi dhe pjesëmarrja në grumbullime dhe manifestime të paligjshme”.

Autoritetet po vijojnë hetimet për identifikimin e të gjithë personave, të cilët ushtruan akte dhune dhe dogjën 32 kazanë mbeturinash në Tiranë.

Nga veprimet hetimore të kryera dyshohet se këta shtetas, gjatë protestës, kanë ushtruar akte të dhunshme, kanë kundërshtuar punonjësit e policisë, si dhe kanë hedhur lëndë piroteknike dhe molotov në drejtim të punonjësve të policisë dhe të Vilës 31, në momentin kur në ambientet e saj ndodheshin persona brenda, shtetas të huaj, duke rrezikuar sigurinë e tyre. Si pasojë janë shkaktuar dëmtime në këtë godinë, si dhe janë dëmtuar 32 kosha mbeturinash të vendosura nga Bashkia Tiranë.
/abcnews.al