Presidenti i SHBA-së, Donald Trump, tha sot se do të takohet me presidentin kolumbian Gustavo Petro në Shtëpinë e Bardhë në fillim të shkurtit.

“Jam i sigurt se do të funksionojë shumë mirë për Kolumbinë dhe Shtetet e Bashkuara të Amerikës, por rrjedha e kokainës dhe drogave të tjera në Shtetet e Bashkuara duhet të ndalet”, shkroi Trump në një postim në rrjetet sociale, sipas Reuters.

Trump tha se kishte folur më parë me Petrën në telefon.

Sipas Trump, takimi me Petrën do të zhvillohet në javën e parë të shkurtit.

Sinjali – aty ku e vërteta flet para lajmit

/GazetaSinjali/

The post Trump: Presidenti i Kolumbisë do vizitojë Shtëpinë e Bardhë në fillim të shkurtit appeared first on Sinjali.

Një video e filmuar nga agjenti amerikan i imigracionit, i cili qëlloi për vdekje një grua në Minneapolis të mërkurën, është publikuar, duke treguar momentet para se të dëgjoheshin të shtënat me armë zjarri si dhe kur qëllohet.

Pamja 47-sekondëshe tregon Renee Nicole Good në timon dhe duke folur me oficerin.

Zëvendëspresidenti i SHBA-së, JD Vance, e ndau klipin në mediat sociale, duke komentuar se agjenti kishte vepruar në vetëmbrojtje. Zyrtarët vendas kanë këmbëngulur se gruaja nuk paraqiste rrezik.

VIDEO

Në pamje shihet një agjent tjetër që i afrohet Goodit nga ana e shoferit dhe përdor një fjalë të pahijshme ndërsa ai i thotë: “Dil nga makina”.

Agjenti që po filmon lëviz përpara makinës së Good ndërsa ajo bën prapa.

Brenda disa sekondash kaotike, ajo e kthen timonin djathtas dhe ecën përpara, e në këtë moment një prej efektivëve e qëllon me armë në xhamin e parë të makinës, duke e lënë të vdekur.

FBI-ja po heton incidentin.

Sinjali – aty ku e vërteta flet para lajmit

/GazetaSinjali/

The post Dalin pamjet kur polici qëllon për vdekje 37-vjeçaren në Minneapolis appeared first on Sinjali.

Presidenti i Ukrainës, Volodymyr Zelensky, ka reaguar ashpër ndaj sulmit masiv rus të 8-9 janarit, duke theksuar se Rusia po shfrytëzon motin e ftohtë për të goditur sa më shumë objektet energjetike dhe infrastrukturat civile të Ukrainës.

Sipas Zelenskyt, sulmi përfshiu më shumë se 200 dronë, 13 raketa balistike kundër objekteve energjetike dhe civile, një raketë balistike me rreze të mesme “Oreshnik” (përdorur sërish, këtë herë ndaj rajonit të Lviv-it, afër kufijve të BE-së), si dhe 22 raketa lundruese.

Ai e quajti këtë një taktikë të qartë për të goditur qytetet dhe për të lënë njerëzit pa dritë, ngrohje dhe ujë në mes të dimrit të ashpër.

Sulmi në Kiev ishte veçanërisht i rëndë: katër persona humbën jetën, përfshirë një punonjës të ambulancës dhe personel tjetër emergjence, ndërsa rreth 25-30 persona u plagosën, përfshirë mjekë, shpëtimtarë dhe policë.

Më shumë se 20 ndërtesa të larta banimi u dëmtuan, si dhe ndërtesa e ambasadës së Katarit (një shtet që ndihmon në shkëmbimin e të burgosurve), një depo tramvaje, një supermarket, një stacion karburanti, një kopsht fëmijësh dhe automjete të ndryshme.

Sulmet u përqendruan kryesisht në Kiev, por prekën edhe rajone si Dnipro, Kryvyi Rih, Zaporizhzhia, Odesa, Lviv dhe të tjera.

Zelenskyy theksoi se punëtorët e riparimit janë në punë maksimale në të gjithë vendin, përfshirë Kiev, rajonin e Kievit, Dnipro, Lviv, Kirovohrad, Cherkasy, Odesa, Sumy, Chernihiv dhe Kharkiv, për të rikthyer furnizimin me energji dhe ngrohje sa më shpejt.

Ai kritikoi Rusinë për mungesë respekti ndaj diplomacisë dhe SHBA-së:
“Rusët po shfrytëzojnë motin e ftohtë dhe po përpiqen të godasin sa më shumë objektet tona energjetike. Kjo tregon qartë sa respektojnë ata Amerikën dhe të gjithë diplomacinë.”

Zelensky përsëriti se sulmet nuk kanë asnjë justifikim ushtarak, por synojnë të torturojnë civilët dhe të thyejnë frymën e ukrainasve. Ai kërkoi një reagim të qartë dhe të menjëhershëm nga bota, sidomos nga Shtetet e Bashkuara, si dhe mbështetje të vazhdueshme për mbrojtjen ajrore të Ukrainës.

Sinjali – aty ku e vërteta flet para lajmit

/GazetaSinjali/

The post Zelensky reagon ashpër ndaj sulmit masiv rus: Moska po godet objektet energjetike mes dimrit të ashpër appeared first on Sinjali.

Presidenti i SHBA-së, Donald Trump, ka rikthyer vëmendjen te Grenlanda, duke e përshkruar territorin si një çështje strategjike për sigurinë kombëtare.

I pyetur se sa para do t’i ofronte Danimarkës për ishullin, Trump tha se “nuk po flas për para akoma, por mund të flas për këtë”.

Në vend të kësaj, ai bëri një paralajmërim të fortë, raporton skynews.

“Tani për tani, ne do të bëjmë diçka për Grenlandën, qoftë edhe nëse ata nuk e duan, sepse nëse nuk e bëjmë ne, Rusia ose Kina do ta marrin Grenlandën, dhe ne nuk do të kemi Rusinë apo Kinën si fqinj. Unë do të doja të bëja një marrëveshje në mënyrë të lehtë. Por nëse nuk e bëjmë kështu, do ta bëjmë në mënyrë të vështirë”, tha presidenti amerikan.

Sinjali – aty ku e vërteta flet para lajmit

/GazetaSinjali/

The post Trump paralajmëron: Grenlandën do ta marrim në mënyrë të lehtë ose të vështirë appeared first on Sinjali.

Ambasadori i Mbretërisë së Bashkuar në Kosovë, Jonathan Hargreaves, është takuar sot me Presidenten e Republikës së Kosovës, Vjosa Osmani.

Përmes një postimi në Facebook, ambasadori ka shkruar thënë se shpreson se viti 2026 do ta shoh Kosovën teksa vepron dhe shfrytëzon të gjitha mundësitë politike për t’u kthyer në rrugën e duhur.

“Ne shprehëm shpresën se viti i ri do ta shohë Kosovën duke vepruar me një qëllim të ripërtërirë, duke shfrytëzuar në maksimum mundësitë politike për t’u rikthyer në rrugën e duhur dhe për të arritur përparim drejt së ardhmes së saj euroatlantike, duke përfshirë edhe anëtarësimin përfundimtar në NATO”, shkroi ai.

Sinjali – aty ku e vërteta flet para lajmit

/GazetaSinjali/

The post Ambasadori britanik: 2026-ta të jetë vit i rikthimit të Kosovës në rrugën euroatlantike appeared first on Sinjali.

Presidentja e Kosovës, Vjosa Osmani, ka vizituar dje spitalin ku kanë lindur trenjakët e parë të vitit, me ftesë të nënës së re, Fjolla Ibrahimi Starabaja.

Vizita u pasua me një reagim të Presidentes përmes një postimi në Facebook, ku ajo ka theksuar rëndësinë e familjes si vlerë e fortë e shoqërisë, duke vlerësuar njëkohësisht përkushtimin e personelit mjekësor në kujdesin ndaj foshnjave dhe nënave.

“Në atë dhomë kishte dashuri, forcë dhe përkushtim. Përveç trenjakëve, aty ndodheshin edhe dy foshnja të tjera, nënat e të cilave kishin lindur për herë të tretë, duke dëshmuar se familja mbetet vlera më e fortë e shoqërisë sonë. Trenjakët po rriten të rrethuar nga dashuria e pakushtëzuar e nënës dhe familjes, si dhe nga përkujdesja maksimale dhe profesionale e personelit mjekësor, të cilët çdo ditë japin më të mirën për jetët më të reja mes nesh”, ka shkruar Osmani.

E para e shtetit ka theksuar gjithashtu se dashuria dhe kujdesi i pakushtëzuar i familjes, në bashkëpunim me profesionalizmin e personelit mjekësor, janë faktorë kyç për rritjen e shëndetshme të fëmijëve dhe zhvillimin e shoqërisë.

“Çdo lindje është një investim për të ardhmen tonë të përbashkët. Prandaj, është me rëndësi që mbështetja për nënat, fëmijët dhe familjet të vazhdojë. Uroj që këta fëmijë të rriten me shëndet, dashuri dhe siguri, e që çdo nënë të ndihet e mbështetur, e respektuar dhe e vlerësuar”, ka shkruar Osmani.

Sinjali – aty ku e vërteta flet para lajmit

/GazetaSinjali/

The post Osmani viziton trenjakët e lindur në fillim të vitit të ri: Çdo lindje është një investim për të ardhmen tonë appeared first on Sinjali.

39 familje janë evakuuar nga rreziku i përmbytjeve në Mitrovicë, Skënderaj e Vushtrri.

Kështu ka bërë të ditur Policia e Kosovës.

Në rajonin e Drejtorisë Rajonale të Policisë Mitrovicë Jugu (Mitrovicë, Skenderaj dhe Vushtrri) janë evakuuar 39 familje të rrezikuara nga përmbytjet.

“Policia ka bërë të ditur se do të vazhdojë angazhimin e saj me përkushtim, duke vënë në dispozicion të gjitha kapacitetet për ofrimin e sigurisë dhe asistencën e shërbimeve emergjente, me qëllim mbrojtjen dhe mbështetjen e qytetarëve në këto ditë me situata të jashtëzakonshme.”, njoftoi PK-ja.

Sinjali – aty ku e vërteta flet para lajmit

/GazetaSinjali/

The post Vërshimet në vend: 39 familje u evakuan në Mitrovicë, Skënderaj e Vushtrri appeared first on Sinjali.

Klubi bardhëkaltër Prishtina ka zyrtarizuar huazimin e qendërmbrojtësit Diar Halili te skuadra shqiptare KF Tirana.

Halili është huazuar për gjashtë muajt e mbetur të sezonit 2025/26, ndërsa ende nuk dihet nëse marrëveshja përfshin ndonjë opsion blerjeje.

Huazimi është konfirmuar edhe nga klubi kosovar përmes një komunikate zyrtare, ku thuhet: “Futbollisti ynë, Diar Halili, do ta vazhdojë pjesën pranverore të sezonit 2025/26 te KF Tirana, pas arritjes së marrëveshjes për huazimin e tij.Qendërmbrojtësi ynë kalon te ekipi bardh e blu, ku pritet të jetë një forcë shtesë për skuadrën kryeqytetase në misionin e këndelljes në pjesën e dytë të sezonit”.

Sinjali – aty ku e vërteta flet para lajmit

/GazetaSinjali/

The post FC Prishtina e huazon Diar Halilin te KF Tirana appeared first on Sinjali.

Duke kritikuar Qeverinë e shtetit të tij për metodat e prokurimit për blerjen e armëve të reja, presidenti i Kroacisë, Zoran Milanoviq, ka thënë se Kroacia ka marrë aeroplanë të përdorur nga Franca, përderisa Serbia ka blerë të rinj.

Në një deklaratë të premten, siç ka raportuar “index.hr”, Milanoviq ka kritikuar Qeverinë kroate për pengesën, që sipas tij, po ia bën ndërtimit të anijeve patrulluese kroate.

Ai ka thënë se Qeveria po mburret se i ka ndarë 15 milionë euro për Ukrainën, por ka shtuar se kjo s’mjafton as për ngrohjen e një kazerme për një muaj. E sipas tij, qeveria s’po i ndan 12 milionë euro për ta përfunduar ndërtimin e pesë anijeve patrulluese.

“Mund të them vetëm se projekti po pengohet. Ndërkohë Ukrainës 15 milionë euro, Francës një miliard e gjysmë, Gjermanisë një miliard, diçka nga buxheti, diçka nga lëmosha evropiane”, ka thënë ai duke iu referuar blerjes së avionëve luftarakë francezë Rafale dhe tankeve gjermane Leopard.

Sipas tij, francezët Kroacisë “ia kanë shitur avionët e përdorur” ndërsa Serbisë “të rinj”.

Kjo sipas Milanoviqit detyron Kroacinë “që të blejë pajisje të reja”.

“A është kjo aleancë? Partneritet? Kjo nuk bëhet”, ka thënë ai.

Duke kritikuar blerjen e tankeve gjermane, Milanoviqi ka thënë se “Lituania ka arritur të sigurojë prodhimin e pjesëve të tyre, ndërsa Kroacia edhe pse e ka traditë, nuk e ka bërë”.

Sinjali – aty ku e vërteta flet para lajmit

/GazetaSinjali/

The post Presidenti kroat: Franca na dha aeroplanë të përdorur e Serbisë i shiti të rinj appeared first on Sinjali.

Rastet në Gjykatën Speciale, padrejtësia e Hashim Thaçi, vazhdon të jetë subjekt shkrimi edhe në mediat ndërkombëtare.

Kësaj radhe, temë është bërë në Itali.

Gazeta italiane “Huffingtonpost.it”, në një shkrim të gazetarit Mauro Suttora të publikuar sot, ka trajtuar çështjen e gjyqit që po ndodh në Gjykatën Speciale të Hagës prej vitesh.

Gazetari italian përmend një shembull hipotetik sikur ish-presidenti italian, Alessandro Pertini, të ishte burgosur në vitin 1970 për “krime të kryera nga partizanët që ai udhëhoqi në vitet 1943-1945”.

Sipas gazetarit italian, një gjë e tillë do të ishte surreale dhe e njejta po i ndodh ish-presidentit të Republikës së Kosovës, Hashim Thaçit.

“Imagjinoni që në vitin 1970, 25 vjet pas Çlirimit, Sandro Pertini të ishte burgosur dhe gjykuar për krime të kryera nga partizanët që ai udhëhoqi në vitet 1943–45. Surreale? E megjithatë, kjo është ajo që po i ndodh Hashim Thaçit, 57 vjeç, ministër, kryeministër dhe më pas president i Kosovës deri në vitin 2020, komandant i rezistencës kundër Serbisë gjatë luftës së vitit 1999, i konsideruar një nga etërit e atdheut së bashku me të ndjerin Ibrahim Rugova. Thaçi prej pesë vitesh tashmë po mbahet në një burg holandez”, shkruan gazeta italiane.

“Në fillim ishte dukur një ide e mirë. Për t’ua bërë të pranueshme pavarësinë e Kosovës 90 shteteve (nga 190) që ende nuk e njohin atë, dhe për t’ia lehtësuar hyrjen në BE, ish-presidenti kishte pranuar t’i nënshtrohej një gjykimi për krime lufte, së bashku me edhe tre drejtues të tjerë të UÇK-së (Ushtria Çlirimtare e Kosovës)”, thuhet më tutje në këtë artikull.

Gazeta italiane përmend faktin se Hashim Thaçit nuk iu dha asnjëherë mundësia të mbrohej në liri, ose arrest shtëpiak.

“Mendohej se gjithçka do të zgjaste disa muaj, në maksimum një vit, dhe se Thaçit do t’i jepej arrest shtëpiak. Por asgjë nga këto nuk ndodhi. Gjykata speciale e krijuar posaçërisht në Hagë në vitin 2016 përbëhet nga gjyqtarë të huaj, por vepron sipas kodeve kosovare. Largësia fizike nga Kosova duhej të qetësonte gjakrat dhe të shmangte përplasjet mes shqiptarëve dhe serbëve. Megjithatë, shumë dëshmi të familjarëve të viktimave serbe janë mbajtur sekrete për të shmangur hakmarrjet. Kështu, kosovarët tani e akuzojnë gjykatën për mungesë transparence”, thuhet në artikull.

Në mesin e padrejtësive që përmenden, janë edhe vonesat e zvarritjet.

“Procesi ka nisur në vitin 2020, por mes zvarritjesh të pabesueshme ende nuk ka arritur në përfundim: vendimi pritet në kohët në vijim. Madje, tashmë paralajmërohet një proces i dytë kundër Thaçit, i akuzuar për ndikim ndaj dëshmitarëve, pengim të drejtësisë dhe fyerje të gjykatës për sjelljen e tij gjatë seancave. Vetëm njërit prej të pandehurve i është dhënë liria me kusht një muaj më parë, sepse kohëzgjatja e paraburgimit të tij tashmë e tejkalon gjysmën e dënimit që mund t’i shqiptohet”, thuhet më tutje.

Gazeta italiane përmend edhe dëshmitë nga James Rubin e Ëesley Clark.

“Mes dëshmitarëve në favor të Thaçit, të dëgjuar në javët e fundit, spikasin gjenerali amerikan Ëesley Clark, komandant i NATO-s në vitet 1997–2000, dhe James Rubin, zëdhënës i sekretares së shtetit Madeleine Albright, i deleguar prej saj për të ndjekur çështjen e Kosovës. Të dy kanë mohuar se dhuna e kryer nga disa partizanë një çerek shekulli më parë mund t’i atribuohet përgjegjësisë, apo madje një urdhri të drejtpërdrejtë nga Thaçi. Përkundrazi, sipas Rubinit, ai ishte “zëri i moderimit”, gjithmonë i gatshëm të negocionte “për t’i dhënë fund konfliktit””, thuhet më tutje.

Sinjali – aty ku e vërteta flet para lajmit

/GazetaSinjali/

The post Gazeta italiane shkruan për procesin ndaj Thaçit: Një nga etërit e Kosovës, procesi ndaj tij surreal appeared first on Sinjali.

Altin Dumanit i ka përfunduar mandati tre vjeçar si kryeprokuror i SPAK dhe tani ai është prokuror i thjeshtë në këtë Prokurori si edhe drejtues i sektorit të marrëdhënieve juridiksionale me jashtë.

Siç raporton Top Channel, ditën e sotme Këshilli i Lartë i Prokurorisë ka miratuar një kërkesë të ish kryeprokurorit i cili ka kërkuar miratim për të zhvilluar aktivitet jashtë funksioneve të prokurorisë.

Konkretisht, ish kryeprokurori i posaçëm Altin Dumani ka marrë leje për tu angazhuar si ekspert kryesor në trajnimin praktik të masterklasit të nivelit të lartë për prokurorë, hetues dhe gjyqtarë nga Kosova, të organizuar nga Ambasada Britanike në Prishtinë.

Nga ana tjetër gjatë ditës KLP ka vendosur emërimin e prokurorit Arens Çela në pozicionin e drejtuesit të Prokurorisë Tiranë. Mandati i zotit Arens Çela është 3- vjeçar dhe përfundon në datë 10.01.2029.

Sinjali – aty ku e vërteta flet para lajmit

/GazetaSinjali/

The post Altin Dumani do të trajnojë prokurorë, hetues dhe gjyqtarë në Kosovë appeared first on Sinjali.

Kompania Rajonale e Ujësjellësit “Prishtina” ka njoftuar se Impianti për Trajtimin e Ujit (ITU) Shkabaj ka filluar procesin e trajtimit minimal të ujit, i cili pritet të ketë ndikim pozitiv në përmirësimin e mëtejshëm të situatës së furnizimit.

Në njoftimin drejtuar konsumatorëve thuhet se, pas problemeve të theksuara me furnizimin me ujë gjatë ditëve të fundit, situata ka nisur të stabilizohet gradualisht.

Aktualisht, sipas KRU “Prishtina”, furnizimi me ujë po realizohet në mënyrë graduale, në përputhje me kapacitetet teknike ekzistuese.

Sinjali – aty ku e vërteta flet para lajmit

/GazetaSinjali/

The post KRU “Prishtina”: Nis trajtimi minimal i ujit në ITU Shkabaj, pritet përmirësim i furnizimit appeared first on Sinjali.

Udhëheqësit e Britanisë së Madhe, Gjermanisë dhe Francës e kanë dënuar vrasjen e protestuesve në Iran dhe i kanë bërë thirrje Teheranit të “përmbahet”, pas shtypjes brutale të demonstratave kundër pushtetit klerikal.

Thuhet se të paktën 51 njerëz janë vrarë dhe mbi 2.000 të tjerë janë arrestuar gjatë në dy javët e fundit, të cilat fillimisht u nxitën nga zemërimi për gjendjen e rënduar të ekonomisë së vendit.

Udhëheqësit iranianë e kanë ndërprerë gjithashtu qasjen në internet dhe thirrjet telefonike ndërkombëtare si përgjigje ndaj protestave.

Në një deklaratë të përbashkët, kryeministri britanik Keir Starmer, kancelari gjerman Friedrich Merz dhe presidenti francez Emmanuel Macron thanë se janë “thellësisht të shqetësuar për raportimet mbi dhunën nga forcat e sigurisë iraniane” dhe dënuan “fuqishëm” vrasjen e protestuesve.

Udhëheqësit shtuan: “Autoritetet iraniane e kanë përgjegjësi ta mbrojnë popullsinë e tyre dhe duhet të lejojnë lirinë e shprehjes dhe tubimin paqësor pa frikë nga ndëshkimi”, njofton rel.

“Ne u bëjmë thirrje autoriteteve iraniane të tregojnë përmbajtje, të përmbahen nga dhuna dhe të respektojnë të drejtat themelore të qytetarëve të Iranit”.

Protestat në Iran filluan më 28 dhjetor dhe janë shndërruar në sfidën më të rëndësishme ndaj pushtetit prej disa vitesh.

Veprimet kanë përfshirë edhe thirrje në mbështetje të udhëheqësit të Iranit para revolucionit, shahut, djali i të cilit, Reza Pahlavi, ka bërë thirrje për protesta të mëtejshme.

Demonstratat kanë rinovuar gjithashtu përballjen midis Iranit dhe SHBA-së, pasi presidenti Donald Trump që paralajmëroi se Teherani do të “paguajë shtrenjtë” nëse autoritetet vrasin protestues.

Sinjali – aty ku e vërteta flet para lajmit

/GazetaSinjali/

The post Udhëheqësit evropianë e dënojnë vrasjen e protestuesve në Iran appeared first on Sinjali.

Dy persona janë arrestuar nga autoritetet në Mitrovicë, pas zbatimit të masave të veçanta hetimore nga Prokuroria Themelore në Mitrovicë – Departamenti i Krimeve të Rënda, në koordinim me Policinë e Kosovës.

Sipas njoftimit zyrtar, të arrestuarit me iniciale Q.H. dhe R.H. dyshohen për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope apo analoge”.

Prokuroria ka bërë të ditur se të dyshuarit dyshohet se në bashkëkryerje kanë ushtruar këtë veprimtari të kundërligjshme.

Gjatë zbatimit të urdhër-kontrolleve, autoritetet kanë gjetur dhe sekuestruar një sasi kokaine, armë si dhe para të gatshme.

Me urdhër të Prokurorit të Shtetit, të arrestuarit janë ndaluar për 48 orë, ndërsa Prokuroria Themelore në Mitrovicë ka njoftuar se brenda afatit ligjor do të paraqesë kërkesë për caktimin e paraburgimit ndaj tyre.

Sinjali – aty ku e vërteta flet para lajmit

/GazetaSinjali/

The post Dy persona arrestohen në Mitrovicë për drogë, armë dhe para të gatshme appeared first on Sinjali.

Qeveria venezuelase tha të premten se presidentja e përkohshme, Delcy Rodriguez, nuk do të realizojë ndonjë udhëtim jashtë vendit në të ardhmen e afërt, pasi presidenti i Kolumbisë, Gustavo Petro, la të kuptohej se mund të realizohej një takim në vendin e tij.

Administrata e zonjës Rodriguez është “e përqendruar si qeveri në agjendën vendëse” – tha në rrjetin “Telegram” ministri i Komunikimit, Freddy Nanez, raporton agjencia e lajmeve “Reuters”.

Presidenti kolumbian i kishte thënë gazetës “El Pais” në një intervistë të publikuar të premten se homologia e tij venezuelase pritej që ta vizitonte kryeqytetin e vendit të tij, Bogota, në javët në vijim.

“Ajo ka kërkuar dy javë. I nevojitet që të shohë se çfarë është duke ndodhur në vendin e saj” – citohet të ketë thënë Petro.

Zonja Rodriguez u zgjodh presidente e përkohshme e Venezuelës, pasi presidenti tashmë i rrëzuar, Nicolas Maduro, u kap para disa ditësh nga forcat speciale amerikane Delta përmes një operacioni të befasishëm.

Maduroja tashmë është dërguar në Shtetet e Bashkuara, ku është ngarkuar me akuzat për narko-terrorizëm.

Presidenti amerikan, Donald Trump, e ka paralajmëruar Rodriguezin se mund ta presë “fat edhe më i keq” se i Maduros, nëse ajo “nuk e bën gjënë e duhur” – duke e nënkuptuar, me gjasë, dëgjimin e udhëzimeve nga Uashingtoni.

Sinjali – aty ku e vërteta flet para lajmit!

/GazetaSinjali/

The post Venezuela thotë se presidentja e përkohshme nuk po planifikon udhëtime jashtë vendit appeared first on Sinjali.

Një aksident trafiku i ndodhur ditë më parë në Prishtinë ka përfunduar me pasoja fatale. Gazeta Sinjali mëson se këmbësori i cili ishte goditur nga një veturë në rrugën “Sokol Sopi” ka ndërruar jetë, derisa ishte duke u trajtuar në QKUK.

Ngjarja kishte ndodhur më 30.12.2025, rreth orës 16:45, kur vetura e tipit Hyundai, e drejtuar nga Lulzim Zagragjaj, rreth 60 vjeçar, kishte goditur këmbësorin Nexhmi Osmani, rreth 70 vjeçar. Sipas informatave fillestare, viktima ishte duke kaluar rrugën jashtë vendkalimit për këmbësorë.

Pas aksidentit, Osmani kishte pësuar lëndime trupore në këmbë dhe ishte dërguar për tretman mjekësor në QKUK, ku fillimisht gjendja e tij shëndetësore ishte raportuar si stabile. Rasti në atë fazë ishte trajtuar nga Njësia e Trafikut Rrugor.

Megjithate, sot, më 09.01.2026, rreth orës 09:00, familjarët  janë njoftuar autoritetet se Nexhmi Osmani ka ndërruar jetë gjatë trajtimit mjekësor në QKUK.

Me këtë zhvillim, Prokurori i Shtetit është njoftuar për rastin dhe ka udhëzuar që trupi i të ndjerit të dërgohet për obduksion, me qëllim të sqarimit të plotë të rrethanave të vdekjes.

Rasti tashmë është rikualifikuar dhe do të trajtohet nga Njësia e Hetimeve të Trafikut Rrugor, si aksident trafiku me fatalitet.

Hetimet janë në vazhdim. Gazeta Sinjali do t’ju mbajë të informuar për çdo zhvillim të ri.

Sinjali – aty ku e vërteta flet para lajmit!

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

/GazetaSinjali/

The post Ekskluzive | Ndërron jetë këmbësori i goditur nga vetura në Prishtinë appeared first on Sinjali.

Një aksident i rëndë ka ndodhur të mërkurën, më 7 janar 2026, në zonën e Waldshut-Tingen, pranë kufirit me Zvicrën, ku është përfshirë një familje pesëanëtarëshe shqiptare.

Familja po kthehej nga Kosova, ku kishte qëndruar gjatë pushimeve të fundvitit, ndërsa aksidenti ndodhi vetëm pak minuta para se të mbërrinin në vendin ku jetojnë.

Lajmi ishte konfirmuar edhe nga policia gjermane, e cila kishte bërë të ditur se përveç pesë anëtarëve të kësaj familjeje, i lënduar ka mbetur edhe një person i gjashtë.

Ndërkohë, një familjar i familjes Morina ka bërë të ditur se nga ky aksident ka humbur jetën nipi i tij, Teo Morina.

Postimi i plotë:

Sinjali – aty ku e vërteta flet para lajmit!

/GazetaSinjali/

The post E rëndë: Vdes njëri nga të aksidentuarit e familjes nga Rahoveci që bëri aksident rrugës për Gjermani appeared first on Sinjali.

Instituti Hidrometerologjik i Kosovës (IHMK) ka njoftuar se gjatë vikendit parashihet të mbajë mot kryesisht i vranët, i shoqëruar me reshje shiu dhe bore.

Sipas njoftimit për media, të shtunën fillimisht priten riga shiu, të cilat gradualisht, si pasojë e rënies së temperaturave, do të shndërrohen në reshje bore, veçanërisht në zonat më të larta.

Të dielën, temperaturat ekstreme mbeten në vlera negative.

“Kujdes ngasësit e mjeteve motorike gjatë qarkullimit nëpër rrugë, pasi ngricat janë evidente gjatë gjithë kohës,” thuhet në njoftim.

Temperaturat minimale parashihen të lëvizin ndërmjet -6 dhe -1 gradë Celsius, ndërsa temperaturat maksimale të ditës ndërmjet 0 dhe 5 gradë Celsius. Do të fryjë erë kryesisht nga juglindja dhe veriperëndimi, me shpejtësi prej 1 deri në 12 m/s.

Si pasojë e reshjeve, IHMK bën apel ndaj komunave dhe agjencive përgjegjëse që të jenë vigjilente, veçanërisht në zonat me infrastrukturë të dobët dhe në vendbanimet përreth rrjedhave lumore, pasi lokalisht mund të paraqiten vështirësi në qarkullimin normal të ujërave dhe komunikacion.

“Java e ardhshme parashihet të karakterizohet nga mot më i ftohtë, me rënie të mëtejshme të temperaturave dhe paraqitje të acarit.”, bëhet e ditur tutje.

Sinjali – aty ku e vërteta flet para lajmit

/GazetaSinjali/

The post Shi e borë priten këtë fundjavë në Kosovë appeared first on Sinjali.

Një person është arrestuar pasi sulmoi zyrtarët policorë gjatë një ndërhyrjeje për të larguar një automjet të parkuar në mënyrë të parregullt.

Ngjarja ndodhi rreth orës 15:40, kur një zyrtar policor në detyrë te porta hyrëse e stacionit policor vuri re një automjet me targa të huaja, i parkuar përpara portës. Shoferi, i identifikuar si A.N., 35 vjeç, nuk iu bind urdhrave të policisë dhe përdori fjalë fyese dhe kanosëse, duke shfaqur sjellje agresive.

Gjatë ndërhyrjes, i dyshuari iu vërsul zyrtarëve policorë, gjë që detyroi policinë të përdorte sprej mbrojtës dhe ta arrestonte atë. Si pasojë, tre zyrtarë policorë dhe i dyshuari pësuan lëndime të lehta.

“Në rast është kyçur Njësia e Hetimeve Rajonale, e cila ka intervistuar të dyshuarin dhe me urdhër të prokurorit të shtetit, është iniciuar rasti “Sulm ndaj personit zyrtar”, ndërsa i dyshuari është dërguar në mbajtje për 48 orë për procedura të mëtejme hetimore”, bën të ditur PK-ja.

Sinjali – aty ku e vërteta flet para lajmit

/GazetaSinjali/

The post Shoferi agresiv s’i bindet Policisë: Bllokon stacionin dhe sulmon policët, arrestohet 35-vjeçari në Ferizaj appeared first on Sinjali.

Komandanti i Forcës së Sigurisë së Kosovës (FSK), Gjenerallejtënant Bashkim Jashari, ka pritur në takim zyrtar Drejtorin e Ushtrisë së Gardave Kombëtare të Shteteve të Bashkuara të Amerikës, Gjenerallejtënant Jonathan M. Stubbs, i shoqëruar nga Gjeneral Major Levon E. Cumpton dhe delegacioni i tij.

Gjatë takimit u diskutua për bashkëpunimin e shkëlqyer ndërmjet FSK-së dhe Byrosë së Gardës Kombëtare të SHBA-së, veçanërisht me Gardën Kombëtare të Ajova-s.

Tutje, Jashari shprehu gjithashtu mirënjohjen për mbështetjen e vazhdueshme të SHBA-së ndaj Forcës së Sigurisë së Kosovës, duke e vlerësuar këtë partneritet si thelbësor për zhvillimin dhe modernizimin e FSK-së.

Palët u pajtuan se Programi i Partneritetit të Përbashkët (SPP) ndërmjet Gardës Kombëtare të Ajovës dhe FSK-së është një shembull i suksesit dhe arritjeve të përbashkëta në aktivitete të ndryshme.

Në përfundim të takimit, të dy gjeneralët theksuan “që thellimi i bashkëpunimit është thelbësor për avancimin e ndërveprueshmërisë së forcave tona, njëherit u theksua nevoja e mbështetjes së SHBA në përmbushjen e synimit tonë strategjik, drejt anëtarësimit në organizatat ndërkombëtare të sigurisë, në funksion të paqes, sigurisë dhe stabilitetit rajonal.”.

Sinjali – aty ku e vërteta flet para lajmit

/GazetaSinjali/

The post Jashari takon Gjenerallejtënant Stubbs: Partneriteti me SHBA-në, thelbësor për modernizimin e FSK-së appeared first on Sinjali.