Zëvendësministri i Punëve të Brendëshme, Astrit Iseni, për Lajm Tv paralajmroi zgjerimin dhe modernizimin e sistemit të kamerave të sigurisë, me synim që çdo rrugicë në Shkup të mbulohet me kamera, ndërsa më pas, ky sistem të shtrihet në të gjithë territorin e Republikës së Maqedonisë së Veriut.

Sipas planit të MPB-së, Iseni tha që deri nga mesi i vitit 2026, kamerat e reja pritet të vendosen në të gjithë vendin, duke mos u kufizuar vetëm në qytetet e mëdha.

“Në Shkup do të mundohemi që çdo rrugicë të ketë kamerë. Përveç kësaj, aktualisht po planifikojmë modernizimin e kamerave, pasi me ato që kemi tani nuk mund t`i shohim të gjitha veprat penale apo shkeljet që kryhen. Për momentin, nga kamerat mund të marrim vetëm disa informacione, siç janë tejkalimi i shpejtësisë, parkimi i parregullt apo kalimi në semafor të kuq. Ne, si ministri, mundohemi ta zhvillojmë më tej këtë sistem dhe kapacitetet njerëzore kompetente, dhe normalisht do të përpiqemi që brenda vitit të ardhshëm, 2026, diku nga gjysma e vitit, këto kamera të vendosen në të gjithë shtetin e Republikës së Maqedonisë së Veriut, dhe të mos mbeten vetëm në qytetet e mëdha”, tha Iseni.

Drejtori i Fondit Shëndetësor, Sasho Klekovski, njoftoi se nga 1 janari do të rritet çmimi i shërbimeve shëndetësore.

Participimi nga 40 denarë shtrenjtohet në 60 denarë. Kontrolli specialistik nga 380 denarë rritet në 720 denarë. Paketa e përgjithshme e urgjencës do të ketë rritjen më të madhe, nga 780 denarë në 2.450 denarë.

Drejtori i Fondit Shëndetësor paralajmëroi gjithashtu masa ndëshkuese në rast të tejkalimit të kuotave për përshkrimin e antibiotikëve dhe barnave për uljen e ankthit. Përveç kësaj, do të intensifikohen kontrollet për keqpërdorimet e pushimeve mjekësore.

“Sistemi do t’i mbrojë gjithashtu mjekët nga presioni për të përshkruar terapi të gatshme, sepse e dimë që ndonjëherë presioni vjen nga qytetarë që duan të marrin një ilaç pavarësisht nëse është i përshtatshëm për indikacionin e tyre. Forcimi i ndërgjegjësimit publik është gjithashtu i rëndësishëm. Për ne, më kritiku është përdorimi i Sumamed, i cili duhet të jetë një antibiotik për vijën e fundit të mbrojtjes, dhe vitin e kaluar patëm një rritje prej 23 për qind në përdorimin e tij”, deklaroi Sasho Klekovski, drejtor i Fondit Shëndetësor.

Dukshmëri e zvogëluar për shkak të mjegullës së dendur është vërejtur në qafat malore Strazhë dhe Pletvar, ku dukshmëria është deri në 50 metra, si dhe në Krushevë, ku është rreth 70 metra, njofton NP “Rrugët e Maqedonisë”.

Trafiku në rrugët shtetërore po zhvillohet pa probleme, por në rrugë të lagështa. Në disa rrugë që kalojnë nëpër prerje dhe gryka, janë të mundshme rrëshqitje të vogla dheu.

NP “Rrugët e Maqedonisë” u bën apel shoferëve që të ngasin me kujdes, të respektojnë sinjalistikën e vendosur të trafikut dhe ta përshtatin shpejtësinë me kushtet e rrugës.

Ekipet e kujdestarisë së kompanisë janë vazhdimisht në terren dhe po i mbajnë të gjitha rrugët të kalueshme. Për informacione më të hollësishme, përdoruesit e rrugës mund të telefonojnë në numrin e telefonit të kujdestarisë 02 25 61 502

Kryetari i Bashkimit Demokratik për Integrim, Ali Ahmeti në emisionin “Debat në Shenja”, tha se nuk të bën përfaqësues të shqiptarëve dhe misionar të shqiptarëve të qenit në pushtet, por deklaroi se shpallja e tij si lider të shqiptarëve është epiteti i thënë nga shumë personalitete si atyre kombëtare edhe atyre ndërkombëtare.

“Për mua është një nder që u bëhet shqiptarëve të RMV-së dhe unë nuk kam bërë ndonjë si të them brifing me gjeneralin e NATO-s Klark që mua ai më emërtoi legjendë e gjallë. Është e vërtetë që unë kam mbijetuar nëpër shumë ngjarje të mëdha të historisë kombit shqiptar të shekullit 20 e fillim shekullit 21”, tha Ahmeti.

Ai tha se nuk është e rëndësishme se si ai ndjehet, por e rëndësishme është si e vlerësojnë shqiptarët.

“Maqedoninë e kam gjet me shqiptarë të pushtuar e kam gjet me shqiptarë me shqiptarë të diskriminuar, e kam gjet me të vrarë për flamur, e kam gjet me të vrarë për arsim të lartë dhe Marrëveshja e Ohrit vendosi gurthemelin e shtetësisë të shqiptarëve, dhe kjo marrëveshje nuk do të bëheshte pa kryengritje të shqiptarëve pa luftarët e UÇK-së. Sot, shqiptarët i kanë vlerat e veta këtu por këto vlera dhe ky gjak i derdhur duhet të mbrohet nga çdo shqiptarë jo vetëm nga agta të cilët organizuan ndryshimin e statusin politik e juridik, jo vetëm nga pjesëtarët e UCK-së”, deklaroi Ahmeti.

Ahmeti tha se ai para një viti e gjysmë Maqedoninë e ka lënë me kryeministër shqiptar.

Ministri i Punëve të Brendshme, Pançe Toshkovski, njoftoi sot disa nga tolerancat që do t'i ketë projekti "Safe City".

"Këto tolerime do të jenë identike me ato që tashmë zbatohen nga radarët e tjerë policorë. Kjo do të thotë tolerancë prej 6 kilometra në orë për shpejtësi deri në 100 km/orë, 8 kilometra në orë për shpejtësi mbi 100 km/orë dhe 12 kilometra në orë për shpejtësi mbi 200 km/orë", tha Toshkovski.

Ministri Toshkovski sqaroi se toleranca e përmendur vlen ekskluzivisht për kundërvajtje në komunikacion, por nuk aplikohet në rastet kur kryhet vepër penale e lidhur me trafikun.

Sistemi “Safe City” do t’i përpunojë edhe automjetet zyrtare në rastet kur ato nuk veprojnë në kuadër të veprimeve operative të arsyetuara.

“Kur automjetet zyrtare veprojnë në kuadër të angazhimit të tyre operativ, ato nuk do të përfshihen. Kur nuk veprojnë, do të përfshihen. Kjo do të thotë se çdo automjet i ndihmës së shpejtë, zjarrfikësve, MPB-së, Ministrisë së Mbrojtjes, gjatë kryerjes së detyrave zyrtare nuk do të jetë pjesë e sistemit, nëse kjo justifikohet sipas qëllimit të veprimit të tyre brenda detyrës zyrtare. Por nëse veprimet e tyre zyrtare nuk e justifikojnë shpejtësinë e lartë, sigurisht që do të ndëshkohen. Sistemi do të shqiptojë gjobë vetëm nëse bëhet fjalë për drejtim të parregullt të automjetit motorik jashtë nevojave reale të institucioneve”, deklaroi Toshkovski.

Sipas tij, nëse nuk ka arsye të arsyetuar për vozitje të shpejtë, gjobat do të vlejnë edhe për automjetet zyrtare.

“Kur një automjet zyrtar përdoret në kuadër të veprimeve operative, atëherë ai nuk mund të trajtohet sipas respektimit strikt të rregullave të komunikacionit në kuadër të sistemit Safe City. Por kur një automjet zyrtar, për shembull nga Agjencia për Administrimin e Pasurisë së Sekuestruar, siç pati një rast që qarkulloi në media, drejtohet nga kushdo qoftë, ai duhet t’i respektojë rregullat e komunikacionit, sepse përdorimi i tij nuk është në përputhje me rregullat e posaçme të përcaktuara nga MPB-ja apo nga legjislacioni”, shtoi Toshkovski.

Në vitin 2026, qytetarë e Maqedonisë i presin 7 fundjava të zgjatura, me gjithë festat fetare, numri arrin në 10 fundjava të zgjatura.

Programi për ditët jo pune dhe festat zyrtare në vitin 2026 do t'ju lejojë të planifikoni fundjavat tuaja në kohë.

Në vitin 2026, do të ketë gjithsej 7 fundjava të zgjatura për të gjithë qytetarët, dhe për qytetarët e besimit ortodoks do të ketë edhe tre të tjera, pra gjithsej 10.

Më poshtë është lista e ditëve jo pune dhe festave zyrtare:

Për të gjithë qytetarët:

1 Janar (e Enjte), Viti i Ri
7 Janar (e Mërkurë), Krishtlindjet ortodokse
20 Mars (e Premte), Bajrami i madh
13 Prill (e Hënë), dita e dytë e Pashkëve sipas kalendarit ortodoks
1 Maj (e Premte), Dita e Punëtorëve
24 Maj (e Diel) "Shën Kirili dhe Metodi" - ditë jo pune është 25 Maj (e Hënë)
2 Gusht (e Diel), Dita e Republikës - ditë jo pune është 3 Gusht (e Hënë)
8 Shtator (e Martë), Dita e Pavarësisë
11 Tetor (e Diel), Dita e Kryengritjes Popullore - ditë jo pune është 12 Tetor (e Hënë)
23 Tetor (E premte), Dita e Luftës Revolucionare Maqedonase
8 Dhjetor (E martë), “Shën Klementi i Ohrit”

Për qytetarët e besimit ortodoks:

6 Janar (E martë), Nata e Krishtlindjeve

19 Janar (E hënë), Epifania

10 Prill (E premte), E Premtja e Madhe, e premtja para Pashkëve

29 Maj (E premte), Pentekosti, e premtja para Pentekostit

28 Gusht (E premte), Ngritja e Virgjëreshës së Bekuar Mari

Për qytetarët e besimit katolik:

6 Prill (E hënë), Pashkët, dita e dytë e Pashkëve

1 Nëntor (E diel), Dita e Gjithë Shenjtorëve

25 Dhjetor (E premte), dita e parë e Krishtlindjeve katolike

Për besimtarët e fesë islame:

27 Maj (E mërkurë), Kurban Bajrami

Për qytetarët shqiptarë:

22 Nëntor (E diel), Dita e Alfabetit Shqip

Për qytetarët serb:

27 Janar (e Martë), Shën Sava

Për qytetarët që i përkasin komunitetit rom:

8 Prill (e Mërkurë), Dita Ndërkombëtare e Romëve

Për qytetarët që i përkasin komunitetit vlleh:

23 Maj (e Shtunë), Dita Kombëtare e Vllehëve

Për qytetarët që i përkasin komunitetit hebraik:

21 Shtator (e Hënë), Jom Kipur, dita e parë e Jom Kipur

Për qytetarët që i përkasin komunitetit boshnjak:

28 Shtator (e Hënë), Dita Ndërkombëtare e Boshnjakëve

Për qytetarët që i përkasin komunitetit turk:

21 Dhjetor (e Hënë), Dita e Mësimit të Gjuhës Turke

Ministri i Ekonomisë, Besar Durmishi tha sot se shporta qeveritare e konsumit nuk do të publikohet në janar, siç u paralajmërua disa ditë më parë, ai shtoi se edhe rritja e pagës minimale nuk mund të bëhet aktualisht pasi kompanitë kanë pasur produktivitet të ulët.

"Nuk ka asnjë mundësi për rritje intervenuese të pagës minimale, pasi produktiviteti është i ulët dhe kompanitë nuk do ta përballojnë. Për festat nuk do të ketë masa, sepse çmimet e ushqimit nuk janë rritur, deklaroi Durmishi.

Ai tha se metodologjia e re për shportën qeveritare të konsumit është e gatshme, u është dorëzuar sindikatave dhe punëdhënësve që para zgjedhjeve dhe tani po presin vërejtje prej tyre.

“A kanë kritika, a kanë propozime, a pajtohen apo jo. Ajo metodologji është gjithëpërfshirëse, bazohet në institucione relevante, ku nuk e konteston shportën minimale sindikale të sindikatave, por ne kemi bërë një metodologji më konkrete, e cila më saktë do të tregojë sa është një shpenzim, një shportë mesatare e konsumit për një familje, familje katëranëtarëshe”, tha Besar Durmishi.
Ministri Durmishi tha se nuk do të ketë Shportë të Vitit të Ri, as masa për kufizimin e çmimeve, sepse çmimet nuk janë rritur.
“Ne, kur kishte sjellje devijuese nga ana e tregtarëve, sollëm masa që ishin zgjidhje afatshkurtra. Kështu që, diçka e tillë deri më tani, ja edhe para dy ditësh dhe sot jam në kontakt me drejtorin e Inspektoratit të Tregut, deri më tani nuk kemi informacione se ka diçka të tillë apo sjellje devijuese ose rritje të çmimeve, konkretisht për ato produkte që përdoren më shumë gjatë festave”, deklaroi Durmishi.

Ai edhe një herë e përsëriti qëndrimin se Qeveria nuk është kundër rritjes së pagës minimale dhe do të respektojë gjithçka që do të bien dakord sindikatat dhe punëdhënësit.

Gjykata Kushtetuese hapi procedurë për uljen e pagave të gjyqtarëve dhe prokurorëve.

Sipas Kushtetueses, me këtë vendim Qeveria dhe Kuvendi kanë vepruar në kundërshtim me parimin e ndarjes së pushteteve pasi janë përzier në punën e pushtetit gjyqësor. Kjo, siç theksoi kryetari i Gjykatës Kushtetuese, Darko Kostadinovski është në kundërshtim me standardet ndërkombëtare.

“Shumica e gjyqtarëve vlerësojnë se me atë ligj, ndërhyhet në pavarësinë e pushtetit gjyqësor nga ana e pushtetit ekzekutiv dhe legjislativ…Për uljen e pagave të gjyqtarëve ekzistojnë standarde të pranuara ndërkombëtare”, deklaroi Darko Kostadinovski, Kryetar i Gjykatës Kushtetuese.

Me këtë, nënkuptohet që Gjykata Kushtetuese në fazën e ardhshme mund të marrë vendim për shfuqizimin ose anulimin e ndryshimeve ligjore dhe rikthimin e neneve që parashikojnë paga më të larta për gjyqtarët dhe prokurorët në vlerë prej mbi 15.000 denarësh.

Ndërkohë Gjykata hapi procedurë edhe për kontestimin e neneve që kanë të bëjnë me publikimin e aktgjykimeve. Shumica e gjyqtarëve vlerësuan se gjykatat mund t’i publikojnë vendimet gjyqësore edhe nëse ata nuk janë të plotfuqishme.

Ndër temat më të nxehta në Gjykatën Kushtetuese ishte vendimi për nenet kontestuese të Kodit Penal që kanë të bëjnë me shpërdorimin zyrtar. Kushtetuesja, e ka shtyrë diskutimin meqë Kuvendi e ka njoftuar se kanë filluar procedurën në bazë të rekomandimeve që kanë marrë ma herët.

Ndërkohë vendimin për rritjen lineare të pensioneve, pensionistet duhet të presin pas janarit të vitit të ardhshëm, meqë sot nuk u sigurua shumica pasi gjysma e gjyqtarëve mendojnë se rritja lineare duhet të shfuqizohet dhe gjysma tjetër, duhet të mbetet në fuqi.

Nga ana tjetër, gjyqtarët hodhën poshtë iniciativën që kontestonte përllogaritjen e çmimit të rrymës në bazë të katër blloqeve. Pra, në fuqi mbeten rregullat e njëjta juridike.

Nxënësit do të vijojnë mësimin deri në fund të muajit dhe pastaj shkojnë në pushim dimëror. Nuk do të ketë më herët pushim për shkak të ndotjes së ajrit, kështu deklaroi ministrja e Arsimit dhe Shkencës, Vesna Janevska.

Ajo tha se në këtë moment nuk kanë informacione se shëndeti i tyre është rrezikuar dhe se nuk është problem nëse për shkaqe shëndetësore mungojnë një-dy ditë nga mësimi. Por, shtoi, duhet të mënjanohet dukuria negative nga e kaluara kur për shkaqe të ndryshme janë shkurtuar ditët e shkollës.

“Më vjen keq që duhet të bëj krahasim të përafërt, por në disa vende evropiane, fëmijët, edhe kur kanë grip, si në kopshte ashtu edhe në shkollë, shkojnë në mësim për sa kohë që shëndeti i tyre nuk është i rrezikuar. E them këtë për shkak të komenteve se fëmijët tanë mësojnë shumë dhe janë të ngarkuar. Jo, nuk janë. Nëse shëndeti i tyre është në rrezik, sigurisht, mjekët dhe prindërit do të vendosin për këtë, por nëse nuk është asgjë serioze, mendoj se edhe nëse mungojnë për një ose dy ditë, nuk është problem. Dhe do të ishte problem, siç ndodhi në të kaluarën, të shkurtohen ditët e mësimit, që nxënësit të mungojnë sepse prindërit e tyre i çojnë në pushime më të lira, për t’u përgatitur për provim me shkrim, etj. Do të duhet të fillojmë ngadalë të eliminojmë këto fenomene negative. Por gjithmonë do të vendosim në favor të shëndetit të tyre. Në këtë moment, nuk kemi informacione se shëndeti i tyre është i rrezikuar”, tha Janevska.

Ministria e Punëve të Brendshme u ka bërë apel të gjithë pjesëmarrësve në komunikacion që të drejtojnë automjetet e tyre me kujdes maksimal në kushte të dukshmërisë së reduktuar, si dhe në asnjë mënyrë të mos ulen pas timonit nëse kanë konsumuar alkool në ahengje para Vitit të Ri apo në festa familjare.

MPB sqaron se për pesë ditë, nga 15 deri më 20 dhjetor në territorin e Shkupit janë konstatuar 53 aksidente trafiku, ndërsa kontrollet policore në komunikacion po vazhdojnë me intensitet të pandërprerë.

“Apelojmë gjithashtu që pjesëmarrësit në komunikacionin rrugor të jenë të kujdesshëm dhe t’i respektojnë plotësisht rregullat dhe dispozitat e trafikut, të posedojnë patjetër pajisje dimërore dhe të mos ulen pas timonit nën ndikimin e alkoolit. U bëjmë thirrje qytetarëve të respektojnë dispozitat ligjore dhe të bashkëpunojnë me policinë”.

Zëdhënësi I MPB-së foli edhe për aktiviteteve që po ndërmerren kundër përdorimit të mjeteve piroteknike. Masat, siç tha ai, po zbatohen me dinamikë të shtuar, duke pasur parasysh faktin se përdorimi i këtyre mjeteve të rrezikshme është karakteristik për periudhën rreth Vitit të Ri.

Qëllimi, shtojnë ata, është rritja e vetëdijes te të rinjtë, por edhe te prindërit e tyre, se fishekzjarrët dhe petardat nuk janë lodra, por mjete të rrezikshme që mund të shkaktojnë pasoja të pariparueshme dhe të përhershme për shëndetin.

M-NAV informon se sot me sukses ka përfunduar aktiviteti për çmontimin e plotë të radarit të vjetër në Aeroportin ndërkombëtar të Shkupit.

Punimet, siç informojnë ata, janë kryer gjatë një periudhe me mjegull dhe dukshmëri të ulët e cila është shfrytëzuar në mënyrë optimale për përfundimin e plotë dhe të sigurt të aktiviteteve, pa asnjë ndikim në zhvillimin e qarkullimit ajror.

Kjo fazë rrumbullakon procesin e çmontimit të radarit të vjetër dhe të papërdorshëm, si parakusht për aktivitete të mëtejshme që lidhen me instalimin e sistemit të ri modern të radarit.

“M-NAV mbetet plotësisht i përkushtuar ndaj sigurisë dhe vazhdimësisë së qarkullimit ajror, si dhe ndaj zbatimit në kohë dhe profesional të të gjitha aktiviteteve të planifikuara”, thuhet në komunikatë.

Ndryshe, Navigacioni i Maqedonisë prej muajit shtator po punon për heqjen e defektit në një nga radarët në Aeroportin Ndërkombëtar të Shkupit.

Maqedonia po përballet sërish me një situatë shqetësuese sa i përket ndotjes së ajrit, ku shumë qytete ndodhen në gjendje alarmi për shkak të rritjes së ndjeshme të grimcave të dëmshme PM10 dhe PM2.5, të cilat kanë arritur nivele shumë të larta dhe tejkalojnë kufijtë e lejuar.

Sipas matjeve të stacioneve monitoruese, në disa zona urbane ndotja ka kaluar disa herë normat e rekomanduara, duke e kthyer ajrin në një rrezik serioz për shëndetin e qytetarëve. Ditët e fundit, qytetarët kanë raportuar mjegull të dendur (smog), erë të rëndë dhe vështirësi në frymëmarrje, ndërsa shumë prej tyre janë detyruar të kufizojnë daljet jashtë.

Ekspertët paralajmërojnë se situata përkeqësohet veçanërisht gjatë periudhës së dimrit, për shkak të përdorimit masiv të lëndëve djegëse për ngrohje, trafikut të dendur dhe kushteve atmosferike që pengojnë shpërndarjen e ndotjes. Megjithatë, kjo gjendje tashmë nuk konsiderohet vetëm sezonale, por një problem i vazhdueshëm dhe serioz mjedisor, thotë profesor doktori Trajçe Stafirov.

“Zgjidhja e vetme është të zvogëlojmë burimet e ndotjes. Ata kryesorët i përmenda; masat janë të njohura, tanimë janë bërë shumë studime për qytetin e Shkupit dhe për shumë qytete tjera të Maqedonisë, por masat shumë ngadalë po realizohen, disa edhe zvarriten prej 20 vitesh, siç janë deponitë rajonale ku strategjia është përpunuar në vitin 2006, por nuk kemi asnjë nga ato stacione rajonale të ndërtuara. Kështu që nuk është se nuk dijmë si, jo se nuk mundemi, por duhet të intensifikohen përpjekjet”, tha Trajçe Stafirov – Ekspert i Çështjeve Mjedisore.

Përkundër paralajmërimeve të vazhdueshme, qytetarët kërkojnë masa më konkrete dhe më efikase nga institucionet për të mbrojtur shëndetin publik dhe për të përmirësuar cilësinë e ajrit. Situata aktuale po rikthen në fokus urgjencën për politika të qëndrueshme mjedisore dhe ndërgjegjësim më të madh shoqëror.

“Vetëqeverisja lokale duhet të subvencionojë qytetarët me inverter dhe me peleta. Gjithashtu, komuna duhet t’i përforcojë kontrollet e inspektorëve në terren për të parandaluar dhe zvogëluar ata që djegin goma të vjetra, vaj dhe plastikë, dhe disa materiale të tjera të cilat ndotin ajrin me qeliza kancerogjene. Shteti do ta këshilloja të mundohet ta gazifikojë TEC Oslomen, sepse e njëjta ka mundësi të ngrohë të gjithë qytetin e Kërçovës me vendosjen e sistemit në nivel qyteti”, u shpreh Mile Aleksovski – ekspert i Ekologjisë.

Kjo situatë është veçanërisht alarmante për fëmijët, të moshuarit, gratë shtatzëna dhe personat me sëmundje kronike të frymëmarrjes dhe zemrës, andaj Ministria e Mjedisit Jetësor, dy ditë më parë, vendosi masa restriktive për mbrojtjen e shëndetit të qytetarëve, për gratë, të moshuarit, personat me sëmundje kronike dhe fëmijët, që të kufizojnë lëvizjet dhe të shkurtohet orari i punës, ndërsa Inspektorati të dalë në terren për të kontrolluar lejet A dhe B të industrive vendase. /tv21

Një shtetas person nga Nigeria, me pasaportë amerikan, është arrestuar në orët e para të mëngjesit, pasi ka sulmuar fizikisht një zyrtar të policisë në një lokal në Parkun e Qytetit të Shkupit.

Sipas njoftimit të Policisë, gjatë kontrollit që i janë bërë, tek personi në fjalë është gjetur armë dhe municione, për të cilat nuk kishte leje.

“Më 21.12.2025, në orën 04:30, para një objekti hotelierik në Parkun e Qytetit në Shkup, zyrtarë policorë nga SPB-Shkup e kanë privuar nga liria U.I.U. (37) nga Nigeria (me pasaportë dhe letërnjoftim amerikan), për shkak se ka sulmuar fizikisht një zyrtar policor i cili po kryente detyra zyrtare. Gjatë kontrollit ndaj tij janë gjetur dhe sekuestruar një pistoletë “Glock”, dy karikatorë dhe 30 fishekë, për të cilat nuk posedonte leje. Pas dokumentimit të plotë të rastit do të pasojë parashtresë përkatëse”, thonë nga MPB.

Gjoko Velkovski, zëvendësministër për Politikë Sociale, Demografi dhe të Rinj, në një intervistë për Radio Evropa e Lirë ka deklaruar se likuiditeti i Fondit të Sigurimit Pensional mund të përmirësohet përmes rritjes së numrit të të punësuarve në tregun e punës.

Sipas tij, kjo mund të arrihet duke stimuluar më fuqishëm punësimin e përfituesve joaktivë të ndihmës sociale nga shteti.

“Bazuar në të gjitha statistikat që i kemi, në Maqedoninë e Veriut ende ekziston një numër i mjaftueshëm i qytetarëve që mund të punësohen. Po jap një shembull konkret: në sistemin e mbrojtjes sociale sot kemi 32 mijë familje që përfitojnë ndihmë minimale të garantuar. Këto janë familje ku ka gjyshër, prindër, vajza dhe djem, dhe në pjesën më të madhe bëhet fjalë për persona madhorë dhe të aftë për punë”, tha Velkovski.

Ai theksoi se ekziston potencial real, por sipas tij nevojitet një riorganizim i tërë sistemit shtetëror.

“Nuk mund të veprojë vetëm Ministria e Politikës Sociale duke zbatuar masa aktive. Nevojitet angazhim i përbashkët i të gjithë shtetit dhe i ministrive të tjera, për të përmbushur nevojën për fuqi punëtore, e cila sipas të dhënave për këtë vit arrin rreth 18 mijë vende të lira pune. Ky hendek mund të plotësohet edhe nga burime të tjera që për vite me radhë kanë qenë të përjashtuara nga tregu i punës”, deklaroi Velkovski.

Përcaktimi i qartë i përgjegjësive dhe forcimi i koordinimit ndërinstitucional janë thelbësore për suksesin e reformave. Ky është përfundimi i takimit javor të mbajtur sot nga kryeministri Hristijan Mickoski.

Fokusi i diskutimeve ka qenë dinamika e zhvillimit të proceseve dhe respektimi i afateve të përcaktuara. Kryeministri informoi për rrjedhën e takimit përmes rrjeteve sociale:

“Sot mbajtëm takimin javor me temë agjendën reformuese. Gjatë takimit u shqyrtuan prioritetet aktuale dhe afatet për zbatimin e reformave kyçe, duke u theksuar nevoja për koordinim ndërinstitucional dhe shpërndarje të qartë të përgjegjësive. Për zbatimin e suksesshëm të agjendës reformuese, është thelbësore që ta kryejmë detyrën tonë të brendshme”, shkroi Mickoski.

Gripi ende nuk ka arritur pikun. Madje gjatë javës së kaluar janë raportuar 126 raste të reja, por që përbëjnë një rënie prej 31 për qind për qind krahasuar me javën paraprake. Gjatë kësaj periudhe mbizotëron influenza A.

Simptomat zakonisht shfaqen papritur dhe përfshijnë temperaturë të lartë, dhimbje muskujsh dhe kollë. Në disa raste, gripi mund të shoqërohet me komplikime, si infeksione bakteriale sekondare dhe infeksione të traktit të poshtëm respirator, të cilat mund të kërkojnë edhe trajtim spitalor.

“Sipas raportit të Institutit të Shëndetit Publik gripi është ende nën pragun e aktivitetit sezonal në bazë të rasteve të raportuara, këtë e shohim edhe në terren numri i pacientëve nuk i kalon ato numra që janë tipik për këtë sezon, në fakt numri është më i vogël në dallim me vitin e kaluar…megjithatë pritet që pas festave të fillojë aktivitetit sezonal i gripit”, tha Sanja Cilevska Mlladenovska.

Më të ekspozuar ndaj gripit janë fëmijët, pasi ata janë më shpesh në kontakt me njëri-tjetrin dhe më të ekspozuar ndaj infeksioneve, veçanërisht në ambiente kolektive si çerdhet dhe shkollat.

“Më të rrezikuar janë qytetarët që janë në kolektive të mbyllura, pra parasë gjithash fëmijët në çerdhe, pasi kalojnë shumë kohë në grupe të mëdha, me shumë fëmijë dhe fëmijët janë mjaft të ekspozuar ndaj infeksioneve, më pas të moshuarit, qytetarët me imunitet të dobët, qytetarët me probleme kronike, pra këta kanë pasqyrë më serioze klinike”, shtoi Sanja Cilevska Mlladenovska .

Instituti i Shëndetit Publik rekomandon që personat me simptoma gripi të qëndrojnë në shtëpi, të pushojnë dhe të marrin shumë lëngje, si dhe të shmangin kontaktet e ngushta me të tjerët. Po ashtu, duhet ajrosur shpesh ambienti dhe të mbahen të pastra sipërfaqet. Personat mbi 65 vjeç, ata me sëmundje kronike ose në rast të përkeqësimit të simptomave, duhet të kërkojnë ndihmë mjekësore.

Ministrja për Europën dhe Punët e Jashtme, Elisa Spiropali, do të zhvillojë një vizitë zyrtare në Republikën e Maqedonisë së Veriut në dy ditët e ardhshme, 22 dhe 23 dhjetor.

Spiropali do të pritet në Shkup nga Presidentja e Republikës së Maqedonisë së Veriut, Gordana Siljanovska-Davkova, Kryeministri Hristijan Mickoski, Kryetari i Parlamentit Afrim Gashi dhe Ministri për Punë dhe Tregti të Jashtme, Timço Mucunski.

Nesër në orën 11.30, Spiropali dhe Mucunski do të mbajnë një konferencë të përbashkët për shtyp.

Spiropali do të ketë gjithashtu edhe një darkë pune me Zëvendës Kryeministrin për Mirëqeverisje dhe Antikorrupsionin, Arben Fetai dhe Ministrin e Integrimit në detyrë, Orhan Murtezani.

Gjatë kësaj vizite ajo do të rikonfirmojë mbështetjen e fortë për integrimin europian të Maqedonisë së Veriut, duke theksuar se zgjerimi i BE-së mbetet një instrument strategjik për paqe, stabilitet dhe qëndrueshmëri demokratike në Europën Juglindore.

Në fokus të takimeve do të jetë edhe projekti i Korridorit VIII si një projekt strategjik energjetik dhe i sigurisë, që lidh Mesdheun me Detin e Zi.

Ministrja do të takohet në Tetovë me Kryetarin e Bashkimit Demokratik për Integrim, Ali Ahmeti, dhe me Kryetarin e Aleancës për Shqiptarët, Arben Taravari.

Ajo do të zhvillojë gjithashtu një takim edhe me Kryetarët e koalicionit qeveritar VLEN, Izet Mexhiti, Bilal Kasami dhe Bekim Sali.

Spiropali do të takohet me Kryetarin e Komisionit të Jashtëm të Kuvendit Musa Xhaferri, me deputetet nga të gjitha partitë politike shqiptare dhe me përfaqësues shqiptarë të pushtetit lokal.

Ministrja do të vlerësojë rolin vendimtar të faktorit shqiptar në Maqedoninë e Veriut në ruajtjen e stabilitetit dhe avancimin e proceseve euroatlantike, si dhe rëndësinë e Marrëveshjes së Ohrit si themel i harmonisë shumëetnike dhe kohezionit social.

Spiropali do të zhvillojë një vizitë në Institutin e Trashëgimisë Kulturore dhe Shpirtërore të Shqiptarëve në Shkup.

Vizita do të përmbyllet me një bashkëbisedim në Universitetin e Tetovës.

Nga TAV Maqedoni njoftojnë se për shkak të mjegullës, e cila edhe sot, më 21 dhjetor 2025, është e pranishme në luginën e Shkupit, në Aeroportin Ndërkombëtar të Shkupit ka ulje të dukshmërisë, gjë që rezultoi që, në periudhën nga ora 00:00 deri në ora 12:00, kompanitë ajrore të anulojnë 20 fluturime dhe të riorientojnë 1 fluturim.

Në njoftimin e fundit thuhet se pas orës 11:00 kanë ateruar avionët nga Dortmundi dhe Vjena, ndërsa aktualisht pritet të fluturojë avioni për Hamburg.

Sipas parashikimit të motit që na vjen nga Shërbimi Meteorologjik i M-NAV, ulja e dukshmërisë pritet edhe për pjesën tjetër të ditës, si dhe gjatë ditës së nesërme.

“Megjithatë, duke marrë parasysh se kushtet e motit ndryshojnë vazhdimisht dhe çdo kompani ajrore ka pragun e vet të tolerancës për dukshmëri të reduktuar, bëjmë apel te të gjithë pasagjerët të ndjekin informacionet dhe udhëzimet për fluturimet e tyre që i marrin nga kompania e tyre ajrore. Për pasagjerët dhe publikun, përsërisim – Aeroporti Ndërkombëtar i Shkupit nuk është i mbyllur. Aeroporti është i hapur, pavarësisht kushteve të motit. Personeli ynë, me pajisjet dhe sistemet aeroportuale, është i gatshëm të shërbejë si avionët, ashtu edhe pasagjerët. Dëshirojmë të sqarojmë se aeroporti mbyllet vetëm me vendim të veçantë, kur dërgohet një njoftim ajror NOTAM për të gjithë aktorët në aviacion, dhe kjo bëhet vetëm në situata të jashtëzakonshme, kur ndonjë kapacitet i aeroportit i lidhur me shërbimin e avionëve nuk funksionon, ose në rast të një gjendjeje të jashtëzakonshme të përgjithshme. Në Aeroportin Ndërkombëtar të Shkupit, të gjitha kapacitetet janë në funksion, prandaj jemi të hapur për trafikun ajror. Në të gjitha rastet me mjegull, Aeroporti Ndërkombëtar i Shkupit nuk mbyllet, por qëndron i hapur. Ne presim që Shërbimi Meteorologjik i M-NAW, si institucioni përgjegjës për sistemet e navigacionit në aviacion, të na informojë për përmirësim të kushteve të motit – si ne si operator aeroportual, ashtu edhe kompanitë ajrore, të cilat vendosin pilotët nëse do të aterojnë apo do të riorientohen në një aeroport tjetër, varësisht nga dukshmëria minimale që kompania ka vendosur si të pranueshme”, thonë nga TAV-Maqedoni.

Nga TAV-Maqedoni thonë se personeli i aeroportit punon 24/7, pulti i informacionit është i gatshëm të përgjigjet në të gjitha pyetjet lidhur me ndryshimet në orarin e rregullt të fluturimeve, si fizikisht, ashtu edhe në linjën telefonike +389 2 3148 333.

residentja e Maqedonisë së Veriut, Gordana Siljanovska-Davkova, ka uruar komunitetin turk dhe mësimdhënësit me rastin e 21 Dhjetorit – Ditës së Arsimit në Gjuhën Turke në vend.

Në mesazhin e saj të urimit, Siljanovska-Davkova theksoi se arsimi në gjuhën amtare është një e drejtë themelore e njeriut, thelbësore për ruajtjen dhe ndërtimin e identitetit kombëtar e kulturor, si dhe për zhvillimin dhe suksesin personal.

Presidentja shprehu mirënjohje për mësimdhënësit dhe punonjësit arsimorë që, sipas saj, me përkushtim, profesionalizëm dhe dashuri për profesionin, kontribuojnë në edukimin e brezave të rinj dhe në përhapjen e dijes në gjuhën turke.

“Uroj që të vazhdojmë të jemi shembull i unitetit në diversitet dhe të jemi krenarë për atdheun tonë të përbashkët”, ka theksuar Siljanovska-Davkova.

Në autostradën Shkup-Veles, në afërsi të pikës pagesore Petrovec, dje vonë pasdite ka ndodhur një aksident trafiku, në të cilin pesë persona kanë pësuar lëndime trupore, informojnë nga Ministria e Punëve të Brendshme. Në aksidentin, i cili ka ndodhur në orën 16:20, u përfshinë dy automjete pasagjerësh.

Të lënduarit u transportuan me automjete të Ndihmës urgjente mjekësore në institucionet shëndetësore në Shkup për mjekim.

Është kryer inspektim nga një ekip inspektimi nga SPB Shkup. Mjegulla që ka përfshirë luginën e Shkupit që nga dje po e vështirëson trafikun ajror në aeroportin e Shkupit, ndërsa trafiku në rrugët shtetërore po zhvillohet me dukshmëri të zvogëluar në disa akse rrugore.