Zëdhënësja e Qeverisë, Marija Miteva, deklaroi se qeveria në seancën e sotme e miratoi programin e punës së Qeverisë për vitin 2026, i cili përfaqëson një dokument strategjik, gjithëpërfshirës dhe reformues prej mbi 400 faqesh, që definon qartë prioritetet, dinamikën dhe vizionin për zhvillimin e shtetit në periudhën e ardhshme.

Programi, sqaroi ajo, është i strukturuar sipas fushave që përfshijnë kompetencat e pushtetit legjislativ, por edhe të atij ekzekutiv, dhe përfaqëson hartën tonë të qartë për reformat që vijojnë dhe që do të ndikojnë drejtpërdrejt në cilësinë e jetës së qytetarëve, funksionalitetin e institucioneve, por edhe në perspektivën evropiane të shtetit.

“Ky Program është një plan i qartë me vizion, afate dhe përgjegjësi. Ai pasqyron vullnetin politik të kësaj Qeverie për reforma, stabilitet, por edhe një të ardhme evropiane dhe përfaqëson themelin tonë të fortë për një vit në të cilin Qeveria do të japë rezultate”, theksoi Miteva.

Programi qeveritar, siç shpjegoi ajo, parashikon zgjidhje të reja moderne ligjore dhe sistemike në kujdesin shëndetësor dhe arsim, ndërsa prioritetet përfshijnë transformimin digjital, reformat në gjyqësor dhe administratën publike, si dhe programe që synojnë përmirësimin e drejtpërdrejtë të standardeve të jetesës në fushat e mjedisit jetësor, kujdesit shëndetësor, sigurisë, arsimit dhe mbrojtjes sociale.

“Në lidhje me pjesën legjislative, ose atë që nënkuptojmë si kompetencë të Kuvendit, fokusi është vendosur aty ku shteti ka përgjegjësinë më të madhe, shëndetësia dhe arsimi. Janë parashikuar ligje të reja, bashkëkohore dhe sistemore që rregullojnë arsimin e lartë dhe të mesëm, veprimtarinë kërkimore-shkencore, por edhe shërbimin pedagogjik, si dhe avancimin e statusit dhe zhvillimit profesional të kuadrit mësimdhënës. Këto zgjidhje janë të orientuara drejt cilësisë, aksesueshmërisë dhe qëndrueshmërisë së sistemit arsimor, si themel i zhvillimit afatgjatë”, theksoi Miteva.

Paralelisht, tjeksoi ajo, Qeveria po e shtyn fuqishëm edhe transformimin digjital, mes tjerash përmes miratimit të Ligjit të ri për faturën elektronike, me të cilin digjitalizimi i procedurave tatimore bëhet shtyllë kyçe e reformës tatimore. Me këtë do të sigurojmë më shumë efikasitet, më shumë transparencë, por edhe më pak barrë administrative për qytetarët dhe për kompanitë.
Reforma në drejtësi, nënvizoi ajo, mbetet prioriteti ynë i lartë.

“Në kompetencë të Ministrisë së Drejtësisë janë parashikuar ndryshime të Kodit Zgjedhor, me inkorporimin e plotë të rekomandimeve nga misionet ndërkombëtare, si një sinjal i qartë për përkushtimin ndaj standardeve demokratike, zgjedhjeve të ndershme, por edhe sundimit të ligjit”, shtoi Miteva.

Në lidhje me reformën në administratën publike theksoi se janë parashikuar ligje sistemore për shërbimin e lartë drejtues, avancimin e cilësisë në sektorin publik dhe për herë të parë vendosjen e një sistemi unik të pagave në sektorin publik.
“Bëhet fjalë për zgjidhjen e një problemi shumëvjeçar, ku pagat rregullohen në mënyrë të fragmentuar, shpesh të pakoordinuara dhe në kundërshtim me parimet kushtetuese. Zgjidhja e re sjell drejtësi, transparencë dhe më e rëndësishmja, pajtueshmëri me Agjendën Reformuese, më saktësisht me hapin 18”, tha Miteva.

Në pjesën e dytë të Programit, atij që i referohet akteve dhe materialeve për të cilat vendosim ne si Qeveri, informon se janë parashikuar një sërë programesh që synojnë përmirësimin e drejtpërdrejtë të standardit të jetesës, në fushën e mjedisit jetësor, shëndetësisë, sigurisë, arsimit dhe mbrojtjes sociale.

“Për vitin 2026 është planifikuar Plani Operativ për masa aktive për punësim, i bashkërenduar me nevojat reale të tregut të punës, me qëllim rritjen e përfshirjes së personave të papunë dhe integrimin më efikas të kategorive të ndjeshme. Në kontekstin ekonomik dhe promovues, po hapet një kapitull i ri përmes brendimit nacional të turizmit, ekonomisë dhe shtetit, nën një imazh të qartë, të identifikueshëm dhe bashkëkohor. Kjo është një mundësi e fuqishme që Maqedonia të pozicionohet në mënyrë strategjike para publikut evropian si një destinacion tërheqës turistik dhe një ekonomi e qëndrueshme e hapur, me potencial serioz investimi”, tha zëdhënësja qeveritare.

Në shëndetësi, shtoi ajo, Ministria e Shëndetësisë inicion përgatitjen e Strategjisë për mjekët e rinj 2026–2030, diçka që ka një qëllim të qartë: mbajtjen, motivimin dhe zhvillimin profesional të kuadrit mjekësor.

“Jemi të vetëdijshëm se në një kohë të mungesës dhe largimit të punonjësve shëndetësorë, kjo strategji do të vendosë mbështetje sistemore, mentorim, por edhe edukim të vazhdueshëm, gjë që në afatgjatë do të thotë një sistem shëndetësor më i fortë dhe më i qëndrueshëm”, deklaroi Miteva.

Gjithashtu, është shumë e rëndësishme të theksohet se për herë të parë do të ngrihet edhe Qendra për aftësi digjitale në administratën publike, një instrument kyç për transformimin digjital të shtetit. Programet do të jenë të dedikuara për të gjitha strukturat, që nga ato drejtuese, vendimmarrësit dhe ekspertët e kibernetikës, por edhe për të gjithë kuadrin administrativ, sepse digjitalizimi nuk është një projekt, por për ne përfaqëson një proces afatgjatë.

Lidhja e Sindikatave të Maqedonisë do të fillojë më 10 shkurt me një bllokadë në Kuvendin e Maqedonisë dhe vazhdojnë më 12 shkurt me bllokada para Odës Ekonomike.

Bllokada para Qeverisë është paralajmëruar për më 17 shkurt.

“Dje skadoi afati që mijëra punëtorë ua dhanë deputetëve në Kuvend për të bërë ndryshime të shpejta në Ligjin për pagën minimale, të cilët do ta rrisin atë në 600 euro, ndërsa të tjerat do të rriten me diferencën nga rritja e pagës minimale, pra me të paktën 6.000 denarë. Qëndrimi injorant i treguar nga deputetët ndaj punëtorëve na ka bërë që të kalojmë në fazën e dytë të aktiviteteve që po zbatojmë për rritjen e pagave të punëtorëve”, tha sot kryetari i LSM-së, Slobodan Trendafilov.

Nesër, në orën 11:00, LSM do t’i paraqesë Kuvendit një nismë për ndryshime në Ligjin për pagat dhe shpërblimet e tjera të deputetëve të Kuvendit dhe personave të tjerë të zgjedhur dhe të emëruar.

“Me këtë nismë, po e ndryshojmë nenin që përcakton bazën për llogaritjen e pagave, në mënyrë që në vend të pagës mesatare aktuale si bazë për llogaritjen e koeficientit të kompleksitetit, baza të jetë paga minimale për koeficient kompleksiteti. Në këtë mënyrë, po u japim atyre mundësinë të tregojnë se nuk do të lejojnë një rritje shtesë të inflacionit në Maqedoni dhe se janë të gatshëm të ulin pagat e tyre me 40 për qind vetëm duke ndryshuar këtë dispozitë ligjore, dhe gjithashtu të ulin koeficientët e kompleksitetit me 40 përqind”, tha Trendafilov.

Nëse nuk e bëjnë këtë, LSM po nis një nismë për të mbledhur 10,000 nënshkrime për t’u bërë propozues i autorizuar i ndryshimeve të tilla ligjore. Një grevë e përgjithshme njëzet e katër orëshe mbetet një mundësi, dhe nuk përjashtohet mundësia e organizimit të një proteste tjetër si ajo e mbajtur të mërkurën e kaluar.

Lidhur me heqjen e seksionit të pagave nga Marrëveshja e Përgjithshme Kolektive, LSM thotë se nuk do t’u lejojë punëtorëve të heqin dorë nga një e drejtë e fituar dikur e garantuar me Kushtetutë dhe ligj.

Ministri i Punëve të Brendshme, Pançe Toshkovski, deklaroi në Tv Alfa se gjithsej 508 kundërvajtje ka regjistruar sistemi “Qyteti i sigurt” dje deri në orën 20 në ditën e dytë të zbatimit të tij zyrtar. Prej tyre, 454 janë për shpejtësi të tejkaluar, 42 janë për kalim në dritë të kuqe, 12 janë për automjete të paregjistruara.

Numri i djeshëm i kundërvajtjes është përafërsisht i njejtë si edhe të dielën kur filloi “Qyteti i sigurt”.

Toshkovski është i kënaqur nga, siç theksoi, numri i vogël i dënimeve dhe pret ashtu edhe të mbetet gjatë tërë periudhës 24-orëshe.

Statistika e MPB-së tregon se në katër vitet e fundit, pjesa më e madhe e kundërvajtjeve, përkatësisht 55.405 qytetarë, kanë nga një ndalesë të shqiptuar. Sipas Toshkovski, janë ata qytetarë të cilëve çdoherë mund t’u ndodhë të kryejnë kundërvajtje.

Me dy kundërvajtje janë 7 987 shoferë, përderisa me nga tre aktvendime fuqiplote për ndalesë të drejtimit të automjetit kanë 1 863 shoferë.

Theksoi se janë 677 persona me katër ndalesa, 291 me pesë ndalesa, ndërsa rekord kanë shënuar dy shoferë të cilët kanë nga madje 40 ndalesa të shqiptuara për drejtim të automjetit motorizues.

Zëvendësministri i Ekonomisë dhe Punës, Marjan Risteski, ka deklaruar se Qeveria nuk është kundër rritjes së pagës minimale.

Ai theksoi se Qeveria mbetet e përkushtuar ndaj dialogut social trepalësh në kuadër të Këshillit Ekonomik-Social (KES) dhe se është e hapur për diskutim transparent për të gjitha çështjet.

“Sipas zgjidhjes sistematike që është miratuar në kuadër të KES-it dhe me mbështetjen e Lidhjes së Sindikatave, paga minimale rregullohet sipas një formule të miratuar disa vite më parë. Atëkohë, kjo zgjidhje u paraqit si një fitore e madhe, duke garantuar rritje të pagës minimale pa ndërhyrje administrative apo politike. Sot, i njëjti subjekt ka ndryshuar plotësisht narrativën, duke kërkuar rritje prej 50 për qind jashtë kësaj formule ligjore, pavarësisht stabilizimit të ekonomisë dhe inflacionit prej 4 për qind. Këto kërkesa, pa marrë parasysh produktivitetin e punës si tregues kyç ekonomik, janë pa logjikë ekonomike,” deklaroi Risteski.

Ai shtoi se krahasimet e thjeshta me shtetet e tjera mund të krijojnë një pasqyrë të shtrembëruar, pasi çdo ekonomi ka strukturën dhe veçoritë e saj. Ai vlerësoi se zgjidhja e çështjeve ekonomike kërkon një qasje serioze.

“Ekonomia e Maqedonisë së Veriut karakterizohet nga një strukturë specifike, ku mbi 90 për qind e kompanive janë mikro, të vogla dhe të mesme, si dhe zejtarë dhe tregtarë individualë, të cilët punësojnë pjesën më të madhe të fuqisë punëtore dhe do të preken drejtpërdrejt nga këto vendime. Po ashtu, sektorët intensivë të punës, si industria e tekstilit dhe ajo e lëkurës, ku paga minimale është më e përhapur, mund të rrezikohen seriozisht nga rritje të pamenduara. Si Qeveri, mbetemi të përkushtuar në zbatimin e politikave që forcojnë ekonominë dhe rrisin standardin jetësor, por kjo nuk arrihet përmes vendimeve ad-hok apo ndërhyrjeve administrativo-politike. Paga minimale duhet të rritet në mënyrë sistematike, të qëndrueshme dhe në përputhje me realitetet ekonomike,” deklaroi Risteski.

Prokuroria për Ndjekjen e Krimit të Organizuar dhe Korrupsionit ka dorëzuar aktakuzë në Gjykatën Penale të Shkupit për një rast korrupsioni lidhur me fondet IPARD.

Një person akuzohet për dhënie ryshfeti dhe shpërblim për ndikim të paligjshëm, tre persona për marrje shpërblimi për ndikim të paligjshëm, ndërsa një person tjetër për marrje ryshfeti.

Sipas prokurorisë, drejtuesi i një kompanie kishte aplikuar për mbështetje financiare, por aplikimi nuk plotësonte kushtet.

Për ta ngritur në renditje dhe për ta miratuar shumën e plotë, ai kishte premtuar 50 mijë euro dhe kishte dhënë 5 mijë euro për persona që të ushtronin presion për vendim të paligjshëm.

Prokuroria kërkon vazhdim të masave të paraburgimit dhe konfiskim të parave e pajisjeve të përdorura në vepër.

Një nënë nga Gostivari së bashku me djalin e saj, kanë denoncuar në polici fqiun e tyre për sulm fizik.

Sipas deklaratës,sulmi ka ndodhur për një vendparkim.

Të enjten në ora 19:25, në stacionin policor në Gostivar, B.M. 48-vjeçe dhe djali i saj D.S. (20) nga Gostivari kanë denoncuar se në rrugën “Goce Dellçev” në Gostivar, pas një debati të shkurtër për një vendparkim, janë sulmuar fizikisht nga fqinji i tyre I.Q. (66), i cili ka përdorur edhe një objekt të fortë. Rreth orës 19:45, I.Q. është paraqitur vetë në stacionin policor dhe po ndërmerren masa për zbardhjen dhe dokumentimin e plotë të rastit, ndërsa ndaj tij do të vijojë parashtresa përkatëse", thuhet në raportin e policisë.

Ministria e Financave, Gordana Dimitrievska-Koçoska deklaroi se me konstituimin e Këshillit Nacional për Hetime Financiare dhe Konfiskimin e Pronave, Maqedonia krijon mekanizëm qendror dhe të koordinuar për luftën e intensifikuar kundër krimit financiar, pastrimit të parave dhe fitimit të paligjshëm të pronës.

Në mbledhjen e sotme konstituive, ajo theksoi se themelimi i këshillit paraqet hap krucial nga politikat deklarative drejt qasjes sistemike të bazuar në përgjegjësinë të qartë, koordinimin institucional dhe rezultatet e matshme.

“Hetimet financiare dhe konfiskimi i pronës së fituar në mënyrë të paligjshme nuk janë vetëm çështje sigurie dhe drejtësie, por ndikojnë drejtpërdrejt edhe në stabilitetin fiskal, integritetin e sistemit financiar dhe besimin e qytetarëve në institucionet”, theksoi Dimitrieska-Koçoska.

Siç theksoi ministrja, Ministria e Financave, si institucion qendror në këtë proces, ka kompetencë shumë dimensionale përmes institucioneve nën ombrellën e saj – Drejtorinë e Policisë Financiare, Drejtorinë Doganore dhe Sistemin për parandalimin e pastrimit të parave dhe financimit të terrorizmit.

Në kuadër të Strategjisë nacionale për hetimet financiare dhe konfiskimin e pronave për periudhën 2025–2028, Ministria po ndërmerr aktivitete konkrete, të matshme dhe thelbësore që orientohen në përmirësimin e efikasitetit të sistemit.

Në këtë drejtim, po përforcohet korniza juridike që përkrah drejtpërdrejt efikasitetin e hetimeve financiare.

“Drejtoria e Policisë Financiare në vitin 2025 nisi 58 hetime financiare që përfshinin rreth 400 persona fizikë dhe 95 persona juridikë, ku 33 hetime tashmë kanë përfunduar dhe pjesa tjetër është në vazhdim. Në suaza të Ligjit për Konfiskimin e Pronës në Procedurën Civile, me iniciativën e prokurorive publike, janë siguruar masa gjyqësore për pronat me vlerë mbi 38 milionë denarë”, theksoi ministrja dhe nënvizoi faktin se në vitin 2022 u kryen vetëm 9 hetime financiare, në vitin 2023 u kryen 17 hetime dhe në vitin 2024 u kryen 10 hetime financiare.

Ministrja theksoi se këto numra tregojnë qartë se hetimet financiare nuk janë vetëm procedura formale, por destinohen në konfiksimin real dhe në mbrojtjen e interesit publik.

Ajo deklaroi se po investohet në forcimin e kapaciteteve institucionale përmes përforcimit sistematik të kuadrit, pajisimit teknik me faza dhe dixhitalizimit të njësive të specializuara, ndërsa segment kryesor është krijimi i ndërveprimit të plotë dhe shkëmbimit elektronik të të dhënave ndërmjet institucioneve, si parakusht për hetimet financiare në kohë dhe të suksesshme.

Paralelisht me aktivitet vendore, po përforcohet edhe bashkëpunimi ndërkombëtar me agjencitë e Bashkimit Evropian dhe rrjetet ndërkombëtare realevante, mes të cilave me EUROPOL-in, CEPOL-in, EUROJUST-in dhe OLAF-in, me qëllim të shkëmbimit të informacioneve, përvojave dhe praktikave adekuate.

Sindikata e punonjësve të administratës, organeve gjyqësore dhe shoqatave të qytetarëve DOJSH, e konfirmoi se të enjten në orën 16:45 në Qeveri do të ulen në tryezën e negociatave lidhur me kërkesat e Sindikatës për rritje të rrogave të të punësuarve në administratë dhe jurisprudencë.

Nga Sindikata e DOJSH-së, mes tjerash, theksojnë se Qeveria, sipas tyre, menjëherë ka dalë me ofertë për rritje të rrogave të të punësuarve në administratë dhe jurisprudencë pas protestës së mbajtur më 28 janar.

“Theksojmë se të punësuarit kanë të drejtë për të drejtat e fituara, të caktuara me marrëveshjet kolektive dhe rritjen e re të rrogave nënkuptojnë të drejta materiale shtesë, për çka angazhohet Sindikata e DOJSH-së”, qëndron në kumtesën e DOJSH-së.

Kryeministri Hristian Mickoski të enjten pasdite do të takohet me Sindikatën e DOJSH-së. Takimi është caktuar për në orën 16:45, ndërsa vjen pasi që Mickoski dha ofertë për rritje të rrogave për çka DOJSH tha se është e pranueshme dhe do të bisedohet plotësisht në suaza të organizatave sindikale.

Ish-ministri i Drejtësisë, Krenar Lloga, ka reaguar në Facebook për kërkesën e studentëve shqiptarë të juridikut për mbajtjen e provimit të jurispodencës edhe në gjuhën shqipe.

Lloga sqaron se ky ligj edhe pse u dorëzua në Kuvend në janarin e vitit 2024, i njejti është tërhequr nga procedura parlamentare.

Ai ka hedhur akuza edhe ndaj partnerit shqiptar në qeveri, koalicionit VLEN, që sipas tij do të duhej të zgjidhnin këtë problematikë e jo të detyrohen studentët të nënshkrujnë peticione.

Reagimi i plotë:

Propozim-ligji për ndryshimin e Ligjit për Provimin e Jurisprudencës është dorëzuar në Kuvendin e RMV-së më 24 janar 2024. Këtij veprimi i është paraprirë duke krijuar nga ana ime si Ministër i Drejtësisë edhe Komisionin i ri për dhënien e provimit të Jurisprudencës, ku në cdo provim, njëri nga dy profesorët ishte shqiptar - parakusht ky për zbatimin e ndryshimeve ligjore, përkatësisht që provimi të jepet edhe në gjuhën shqipe. Fatkeqësisht, me ardhjen e Qeverisë VLEN–OBRM-PDUKM, propozimligji u tërhoq nga procedura parlamentare pa asnjë arsyetim, as nga Qeveria/Ministria e Drejtësisë dhe as nga Kryetari i Kuvendit dhe partneri qeveritar, z. Afrim Gashi.Ky akt qyqar i kësaj qeverisjeje të dobët dëshmon edhe njëherë pafuqinë politike të një grumbulli partish që vetes i kanë vënë emrin VLEN, por që nuk vlejnë as pesë pare. Kjo situatë tregon thelbin e tyre: se nuk janë të zotë të hedhin asnjë hap në drejtim të zgjidhjes së problemeve, në asnjë fushë, bile as aty ku të tjerët ua kanë lënë materialet e gatshme mbi tavolinë.Sot, studentët shqiptarë detyrohen t’u drejtohen institucioneve dhe titullarëve të këtyre institucioneve përmes peticionesh – si pasojë direkte e paaftësisë dhe pafuqisë së disa qeveritarëve shqiptarë të nënshtruar, por edhe si rezultat i veprimeve të disa politikanëve albanofobë maqedonas nga ZNAM dhe OBRM-PDUKM.

Maqedonia e Veriut ishte e përfshirë në zbulimin e dosjeve që lidhen me miliarderin e ndjerë amerikan Jeffrey Epstein, por e gjithë procedura u krye ligjërisht, tha për DW ish-drejtori i Institutit të Mjekësisë Ligjore në Shkup, Aleksej Duma.

Shkencëtarët amerikanë të lidhur me Universitetin e Kolumbias kanë krijuar një bankë të madhe truri njerëzor të destinuar për kërkime mbi vetëvrasjet, skizofreninë dhe çrregullime të tjera psikiatrike. Koleksioni përfshin rreth 1,000 tru - disa nga njerëz që kanë kryer vetëvrasje, dhe disa si mostra kontrolli.

Maqedonia përmendet në këtë kontekst, pasi kontribuoi me mostra.

Raporti thotë se truri u mor pas vdekjes, u ngri menjëherë dhe u transportua në Shtetet e Bashkuara nën kontroll të rreptë, ku u arkivua dhe u shënua me kode QR. Protokollet strikte ishin në fuqi: truri udhëtonte në kushte të kontrolluara, i paketuar në enë speciale dhe i ruajtur në -80°C.

Profesor Aleksej Duma, ish-drejtor i Institutit të Mjekësisë Ligjore në Shkup, shpjegon për DW se sa mostra dhe për çfarë qëllimesh u dërguan nga Maqedonia në Shtetet e Bashkuara.

"Ishte projekti më i madh ndërkombëtar në të cilin morëm pjesë", tha Duma.

Ai shpjegoi në një deklaratë për Deutsche Welle se ishte një projekt ndërkombëtar, në të cilin vendi ishte i përfshirë duke dërguar 10 deri në 15 mostra. Procedura për dërgimin e mostrave në Shtetet e Bashkuara kryhej sipas rregullave dhe kontrolleve shumë të rrepta. Çdo mostër duhej të miratohej nga Komitetet e Etikës nga Maqedonia dhe ato Amerikane.

"Mostrat udhëtonin më ligjërisht me aeroplan, kalonin nëpër doganë dhe kishin dokumentacion të plotë për to. Pa leje, një mostër nuk mund të hynte në Shtetet e Bashkuara", deklaroi Duma, i cili hedh poshtë mundësinë e përfitimit nga e gjithë procedura.

Ai thekson gjithashtu se shifra prej 1,000 truri nuk i referohet mostrave nga Maqedonia, por të gjithë koleksionit nga disa vende.

Maqedonia siguronte rreth 10-15 mostra në vit.

“Duke marrë parasysh që kishim 300 deri në 350 autopsi nga të gjitha fushat çdo vit, pyetja është se sa prej tyre vdiqën për shkak të vetëvrasjes. Në fund të fundit, numri zbret në 10-15 raste”, thotë Duma.

Ai nuk mban mend nëse leja nga familjet për ndërhyrjen kërkohej në atë kohë, apo vetëm pëlqimi i Komitetit të Etikës dhe një letër informuese.

Profesor Duma, nga kjo distancë kohore, thotë se ata kanë marrë të dhëna interesante rreth skizofrenëve dhe lidhjes së tyre me vetëvrasjet.

"Pjesa jonë ishte të punonim mbi morfologjinë - nëse ka ndonjë ndryshim në tru që është karakteristikë e vetëvrasjeve. Për më tepër, një universitet tjetër punoi në gjetjen e barnave", deklaroi ai.

Duma është i vendosur se projekti ka sjellë rezultate të rëndësishme shkencore, duke sqaruar se janë zhvilluar metoda për njohjen e ndryshimeve morfologjike në vetëvrasje, janë fituar njohuri të reja rreth lidhjes midis skizofrenisë dhe vetëvrasjeve, rezultatet janë përdorur në studime të shumta ndërkombëtare, poashtu Maqedonia ka marrë pajisje, laboratorë dhe mundësinë për studime doktorature për shkencëtarë të rinj.

Të shtunën u bë i ditur lajmi se 385 studentë shqiptarë të fakulteteve juridike në Maqedoninë e Veriut, kanë nënshkruar një peticion me një kërkesë të qartë dhe legjitime që provimi i jurisprudencës të mbahet edhe në gjuhën shqipe.

385 studentë të juridikut nënshkruan peticion që provimi i jurisprudencës të mbahet edhe në gjuhën shqipe

Kërkesa e studentëve është dërguar tek Ministria e Drejtësisë, Inspektorati për Zbatimin e Gjuhëve, Kuvendi dhe Qeveria e Maqedonisë së Veriut.

Mevlan Ademi, ish-kryertar i Parlamentit Studentor, në televizionin Alsat, deklaroi se Kuvendi dhe Qeveria e Maqedonisë së Veriut nuk e pranuan peticionin në gjuhën shqipe, pasi kërkuan që i njejti të jetë në gjuhën maqedone.

“Tek Agjencioni, tek Inspektorati dhe tek Ministria e Drejtësisë mu lejua që ta dorëzojë në gjuhën shqipe, ndërsa në Kuvend dhe tek qeveria na u kërkua që të jetë në gjuhën maqedone. U revoltova dhe i pyeta se përse nuk më lejohet ta dorëzojë në gjuhën shqipe, ata nuk më dhanë arsye por më thanë se pa maqedonisht nuk të japim vulë. Pastaj u detyrova ta përkthej dhe ta dorëzojë në gjuhën maqedone”, tha Ademi.

Ademi sqaroi se pavarësisht përpjekjeve të vazhdueshme ndër vite për këtë të drejtë, deri më sot kërkesa e studentëve nuk është marrë parasysh, ndaj pret që këtë herë kjo kërkesë të konkretizohet.

Shtohet numri i rasteve të fëmijëve dhe të miturve që kërkojnë ndihmë për shkak të komplikimeve shëndetësore nga konsumimi i pijeve energjike, njoftojnë nga Reparti i Ndihmës së Shpejtë.

Mjeku Sejfullah Ademi, tregon se përballet çdo ditë me raste të tilla dhe kërkon sensibilizim më të madh të shoqërisë, që jeta e fëmijëve të mos vihet në rrezik.

“Fatkeqësisht, edhe ne si Ndihmë e Shpejtë ballafaqohemi me raste të këtilla, ku shohim që fëmijët konsumojnë në mënyrë të pakontrolluar pije energjetike. Pijet e tilla energjetike nuk janë aspak të preferuara për fëmijët, duke pasur parasysh problemet që mund të ndodhin me takikardinë, gjë që, nëse nuk reagohet në mënyrë adekuate, e vendos në rrezik edhe vetë jetën e fëmijës. Ne, si Ndihmë e Shpejtë, kemi thirrje të tilla dhe dalim në mënyrë sa më të shpejtë të mundshme në teren, që t’iu afrojmë ndihmën fëmijëve të tillë, por të bëjmë apel pasi komplikimet mund të bëhen të rënda dhe fatkeqësisht të përfundojnë letalisht edhe për fëmijën.” – tha Sejfullah Ademi, mjek i Ndihmës së Shpëjtë.

Ademi nënvizon se për të parandaluar këtë fenomen negativ, duhet vepruar edhe në aspektin ligjor dhe kërkon përfshirjen e të gjithë aktorëve shoqërorë.

“Duhet të ndikojmë si shoqëri këtu edhe në aspektin ligjor, të kërkohet që edhe me ligj të jetë rreptësisht e ndaluar shitja e pijeve energjetike te të miturit. Fatkeqësisht, njerëz të papërgjegjshëm, për arsye të pakta fitimprurëse, bëjnë një gjë të tillë – ju shesin fëmijëve pije energjetike, duke pasur parasysh rrezikun e madh që ndodh pastaj tek fëmijët. Ju bëjmë apel prindërve për kujdes të shtuar dhe të komunikojnë me fëmijët e tyre, duke u shpjeguar për rreziqet. Atyre të cilët merren me tregti, mos u shisni fëmijëve dhe të miturve pije të tilla, sepse rreziku është i madh për shfaqjen e sëmundjeve kardiovaskulare, ku në mënyrë direkte e vendosin jetën e fëmijëve në rrezik.” – u shpreh Ademi.

Në Maqedoni, aktualisht shitja e pijeve energjike për fëmijët nuk është e ndaluar me ligj, prandaj mjeku Ademi propozon miratimin e një vendimi të tillë në Kuvend.

Ai thekson se në vendet e Bashkimit Evropian dhe të Ballkanit Perëndimor, kjo është e rregulluar ligjërisht dhe jep rezultate në mbrojtjen e shëndetit të fëmijëve. /RTVM2

Kryetari i Aleancës për Shpiptarët, Ziadin Sela i ka bërë thirje gjykatësve të Gjykatës Kushtetuese që sa më shpejt ta shqyrtojnë iniciativën që ata e kanë dorëzuar dhe kundërshtojnë projektin “Safe City".

Sela i bën thirrje edhe qytetarëve që të bëjnë kujdes dhe të kenë durim derisa të fitohet beteja kundër sistemin "Safe City".

"Pa dashur të ndërhyj në pavarësinë e gjyqësorit, parim që ne e kemi promovuar vazhdimisht, por që në realitet është ende shumë larg, dua tu bëj një thirrje gjykatësve të Gjykatës Kushtetuese. Shqyrtoni sa më shpejtë iniciativën të cilën e dorëzuam ditë më parë, ku qartë do të shihni edhe vetë ju arsyet e shumta për të sjellë vendimin për shfuqizimin e ndryshimeve ligjore për projektin “Safe City”. Thirreni seancën sa më shpejtë që të mos lejojmë as një ditë më shumë të lindin komplikime, të lëshohen gjoba e të plaçkiten qytetarët përmes një mekanizmi që në fund jemi të bindur se do të rezultojë antikushtetues”, shkruan Sela në Facebook.

Partia në pushtet OBRM-PDUKM i është kundërpërgjigjur LSDM-së për skandalin me drogën e nisur nga Maqedonia e Veriut drejt Serbisë.

Sipas OBRM-PDUKM-së tentimet e opozitës për të hapur tema për rastin e drogës janë dyfytyrësi dhe kanë për qëllim defokusimin e opinionit.

OBRM-PDUKM-ja thotë se LSDM-ja në vend që të pyes institucionet, përgjigjet duhet t’i kërkojë të siç thekson pronari i fabrikës së marijuanës dhe ish kryeministri Zoran Zaev.

Nga kjo parti theksojnë se pikërisht në kohën e qëverisjes së LSDM-së u miratuan vendime dhe zgjidhje ligjore lidhur me prodhimin e kanabisit.

OBRM-PDUKM thotë se LSDM-ja nuk ka kredibilitet të flasë për luftën kundër kriminalitetit dhe drogës, duke e akuzuar opozitën se pikërisht në kohën e tyre u krijuan, siç thonë, kushte për zgjerimin e industrisë së kanabisit dhe bizneseve të dyshimta të lidhura me të.

Kryetari i LSDM-së, Venko Filipçe akuzon qeverinë për izolimin e shtetit nga rruga evropiane dhe hedh pretendime për lidhje me pushtetet në Serbi dhe Hungari, si dhe me Rusinë.

Sa i përket zhvillimeve brenda partisë së tij, ai shton se nuk frikësohet nga ndonjë puç, pasi në kongresin e fundit ka qenë i suksesshëm dhe ka marrë sugjerime të sinqerta dhe të ndershme.

“Kjo qeveri kujdeset vetëm për interesat e veta, sepse duhet të realizohet ajo që kurrë nuk e kanë mohuar – se do të vijnë migrantë për para – dhe për këtë arsye nevojiten zgjedhje të parakohshme. A do të jenë në fund të këtij viti apo vitin e ardhshëm, do ta shohim, por deri në vitin 2028 nuk do të mund të vazhdohet kështu”, tha Filipçe.

Në lidhje me pyetjen nëse ka informacion për ndonjë platformë apo iniciativë të brendshme partiake për zëvendësimin e tij, ai tha se ka dëgjuar edhe vetë spekulime të tilla, por i vlerëson ato si të pavërteta.

“Nuk ka të vërtetë në këtë. Duhet të them një gjë: unë kam mandat legjitim. Para disa muajsh, 20.000 anëtarë më votuan që ta udhëheq partinë në mandatin e ardhshëm katërvjeçar. Dyert janë të hapura për të gjithë”, thotë ai.

Çdo fragmentarizim brenda LSDM-së, sipas tij, shkon në dobi të OBRM-PDUKM-së.

“Edhe ne e dimë për atë komunikim dhe mbështetje që ata e kishin edhe në periudhën kur po formohej ZNAM-i, ndërsa tani edhe formalisht janë në koalicion me OBRM-PDUKM-në. Ata janë ish-anëtarë tanë. Pra, çdo fragmentarizim shtesë shkon vetëm në dobi të OBRM-PDUKM-së dhe, për fat të keq, në asnjë dobi për qytetarët apo për shtetin”, thotë Filipçe.

Lidhja e Sindikatave hodhën poshtë akuzat e qeverisë se protesta për paga më të larta ka motiv politik.

Statuti i Lidhjes së Sindikatave të Maqedonisë thotë se është një organizatë apolitike dhe nuk ka absolutisht asnjë lidhje me politikën, dhe kryetari dhe drejtuesit nuk guxojnë të jenë anëtarë të ndonjë partie politike.

“I them këtu përfaqësuesit të Qeverisë dhe përfaqësuesit faktikisht të partisë politike të gjejë një argument që dikush diku është politikisht i orientuar dhe i ngjyrosur. Por politikanët nuk i frikësohen politikanëve, shohim se ata bien dakord me njëri-tjetrin. Politikanët i frikësohen punëtorëve”, theksoi Slobodan Trendafilov, kryetar LSM-së.

Ata publikisht e ftojnë përfaqësuesin e qeverisë të vijë të hënën për të nënshkruar marrëveshjen kolektive për rritje prej 40 për qind të pagave të punonjësve administrativë. Thonë se me marrëveshjen kolektive u ishte ofruar rritje e pagave në këste katërvjeçare prej 7 dhe 5 për qind, por kushti ishte të hiqnin dorë nga marrëveshja kolektive e përgjithshme. Me të, vetëm në vitet 2025 dhe 2026 punonjësit e sektorit publik duhet të marrin rritje prej 12,5 dhe 10% për shkak të rritjes së pagës mesatare, e cila ishte më e madhe se ajo e ofruar me marrëveshjen kolektive.

“Ejani, të hënën, të martën, të mërkurën, kur të doni, unë ec me vulat në xhep gjithë kohën, për çdo rast, do të nënshkruajmë marrëveshje kolektive, nuk është problem. Megjithatë, heqja dorë nga një të drejtë më e favorshme për të kërkuar nga sindikata, unë jam sindikalist, mandati im më është dhënë që të jem sindikalist. Mandati nga anëtarësia e sindikatës ishte, po, do t’i nënshkruajmë këto marrëveshje kolektive, por nuk ka heqje dorë nga marrëveshja kolektive e përgjithshme”, tha Trpe Deanoski, Kryetar i Sindikatës.

Pas protestës, sindikalistët nga java e ardhshme do të fillojnë me bllokadë, së pari të deputetëve dhe institucioneve të tjera.

Ndalesa për qarkullimin e automjeteve të rënda në rrugën Gostivar – Strazhë – Kërçovë hiqet nga ora 14:30, njoftoi NP “Rrugët e Maqedonisë”. Ndalesa u vendos sot nga ora 9:40 në të dy drejtimet e rrugës për shkak të reshjeve të borës.

Ndalesa për qarkullim të kamionëve dhe autobusëve nga ora 9:20 është vendosur për kamionë dhe autobusë në segmentin rrugor Shipkovicë – Kodrën e Diellit dhe nga ora 5:45 për automjetet e rënda mallrash në segmentin rrugor Mavrovë – Dibër.

Siç informon NP “Rrughët e Maqedonisë”, reshje bore ka në Krushevë, Kodrën e Diellit dhe Mavrovë, si dhe në dkalimet malore Strazhë, Presekë, Bukovë dhe Xhavatë.

Kryeministri i vendit, Hristijan Mickoski informoi sot se përmes Ministrisë së Transportit dhe në bashkëpunim me Bankën Botërore do të furnizohen 40 automjete të reja për nevojat e NP “Higjiena Komunale”-Shkup.

Ai theksoi se me këtë furnizim do të zgjidhet një nga problemet më të mëdha shumëvjeçare në punën e ndërmarrjes – makineritë e vjetruara, të pamirëmbajtura dhe të konsumuara, të cilat pengonin seriozisht mirëmbajtjen e higjienës publike në kryeqytet.

Sipas Mickoskit, situata u ndërlikua edhe më tej nga puna e tepërt, si dhe nga efikasiteti i pamjaftueshëm i disa punonjësve.

“Me këto 40 kamionë, jam i sigurt se do të përmirësohet shumë gjendja me higjienën në Shkup. Siç njoftuam edhe në fushatë, dhe siç njoftoi edhe vetë kryetari i komunës, higjiena është përparësia jonë e parë dhe ky proces po ecën në atë drejtim”, tha Mickoski.

Ai njoftoi se procesi i prokurimit pritet të përfundojë deri në fund të pranverës, dhe dorëzimi i automjeteve të fillojë deri në fund të vitit. Sipas kryeministrit, mekanizimi i ri do të mundësojë punë më efikase të Higjienës Komunale dhe një përmirësim të dukshëm të pastërtisë në qytet.

Partia opozitare LSDM ka reaguar për konfiskimin e drogës në Serbi, për të cilat dyshohet se kanë kaluar përmes territorit të Maqedonisë së Veriut.

Nga LSDM-ja thonë se bëhet fjalë për një skandal të madh, për të cilin duhet të ketë përgjegjësi.

Sipas partisë opozitare, është e pakuptueshme se si një sasi kaq e madhe droge ka kaluar kufirin pa u vërejtur nga institucionet, ndërsa Qeveria, sipas tyre, vazhdon të hesht.

Nga LSDM theksojnë se pa mbështetje nga struktura brenda institucioneve shtetërore, një operacion i tillë kriminal nuk do të ishte i mundur.

Ata kujtojnë se prej ditësh kanë paralajmëruar për lidhje të dyshuara mes strukturave kriminale në Maqedoni dhe Serbi, por ende nuk ka reagim institucional.

Përmes sistemit elektronik për aplikime në konkursin vjetor për projekte kulturore për vitin 2026 janë pranuar 2,618 aplikime, njoftoi ministri i Kulturës dhe Turizmit, Zoran Lutkov, duke prezantuar rezultatet e konkurseve dhe duke theksuar se ky numër tregon interesin dhe besimin në sistem.

“Bëhet fjalë për projekte që do të pasurojnë ofertën kulturore, do të hapin hapësirë për shprehje të reja krijuese dhe do të kontribuojnë në afirmimin ndërkombëtar të kulturës maqedonase. Interesi i treguar edhe këtë vit nga artistët dhe organizatat kulturore për konkursin vjetor është një konfirmim i qartë se skena jonë kulturore është dinamike, inovative dhe e gatshme për krijim. Programi vjetor për projekte kulturore për vitin 2026 është një hap i rëndësishëm përpara dhe provë se kulturën nuk e shohim si shpenzim, por si një investim strategjik në identitetin tonë kombëtar, potencialin krijues të njerëzve dhe të ardhmen e shoqërisë në tërësi”, tha Lutkov.

Ministri njoftoi se janë rritur fondet për disa aktivitete, duke u fokusuar në cilësi, sasi dhe zhvillim të barabartë të kulturës. Sipas tij, vëmendje e veçantë i është kushtuar krijimtarisë bashkëkohore, bashkëpunimit ndërkombëtar dhe industrive krijuese, fusha që jo vetëm që sjellin vlerë kulturore, por edhe potencial të rëndësishëm ekonomik.

“Veçanërisht e rëndësishme është që edhe në vitin 2026 vazhdojmë me forcimin sistematik të institucioneve kombëtare”, tha Lutkov dhe njoftoi se pasi vitin e kaluar për herë të parë u implementua modeli i buxhetit të deleguar për 18 institucione kombëtare si projekt pilot, këtë vit modeli do të zgjerohet në 28 institucione kombëtare për shkak të përvojës pozitive.

“Ky model është një hap konkret drejt autonomisë më të madhe, menaxhimit më efikas të fondeve programore dhe drejt përgjegjësisë dhe llogaridhënies së qartë”, theksoi ministri i Kulturës dhe Turizmit.

Ljutkov njoftoi se buxheti total i Ministrisë së Kulturës dhe Turizmit për vitin 2026 është 5 miliardë 194 milionë e 975 mijë denarë, që është 519 milionë e 713 mijë denarë më shumë se vitin e kaluar. Buxheti i dedikuar për projekte me interes kombëtar në kulturë arrin 1 miliard e 70 milionë e 417 mijë denarë.