Mbi 50 civilë, shumica të moshuar, janë zhdukur pasi dyshohet se janë marrë me forcë nga trupat ruse dhe janë deportuar në Rusi nga fshati Hrabovske, në rajonin ukrainas të Sumy-t, bëjnë të ditur autoritetet e Kievit.

Ngjarja ka ndodhur mesnatën e 19 dhe 20 dhjetorit, kur njësi të Brigadës së 36-të ruse kaluan kufirin dhe shkuan shtëpi më shtëpi, duke marrë banorët që kishin mbetur në fshat pavarësisht urdhrit të evakuimit. Sipas burimeve zyrtare, një nga personat e rrëmbyer është 89 vjeç, ndërsa fati i të gjithë të deportuarve mbetet ende i panjohur.

Hrabovske ndodhet në kufi me rajonin rus të Belgorodit dhe vetëm 10 kilometra larg autostradës strategjike R45 Sumy–Kharkiv, një arterie e rëndësishme për lëvizjen e forcave ukrainase. Për shkak të kësaj pozite, zona ka qenë objekt interesimi për ushtrinë ruse, e cila prej ditësh po përpiqej të avanconte në këtë drejtim.

Rrëmbimi i civilëve është konfirmuar nga Shtabi i Përgjithshëm i Ukrainës dhe nga qeveria e Kievit. Ministri i Jashtëm ukrainas, Andrii Sybiha, e cilësoi ngjarjen si “një krim të hapur lufte”, duke i bërë thirrje komunitetit ndërkombëtar të kërkojë kthimin e personave të deportuar.

Ai theksoi se, përveç të moshuarve, mijëra qytetarë ukrainas, përfshirë fëmijë, janë marrë me forcë dhe dërguar në Rusi. Sipas autoriteteve ukrainase, numri i të miturve të transferuar me dhunë arrin të paktën në 19 mijë.

Për shkak të rrezikut të shtuar në zonat kufitare, presidenti Volodymyr Zelensky ka urdhëruar evakuimin e detyruar të 5 mijë e 700 banorëve të rajonit Sumy që ende refuzojnë të largohen nga shtëpitë e tyre. Kryqi i Kuq dhe vullnetarë lokalë kanë nisur operacionet e evakuimit, ndërsa një pjesë e popullsisë mbetet ende në zonat e rrezikut.

Ndërkohë, autoritetet ukrainase raportojnë për lëvizje të reja të trupave ruse pranë Hrabovskes, si dhe për tërheqje taktike të forcave ukrainase nga disa pozicione për shkak të ofensivës së vazhdueshme.

Sipas Avokatit të Popullit të Ukrainës, personat e deportuar janë mbajtur fillimisht në izolim dhe nuk kanë pasur asnjë mundësi kontakti me familjarët. Deri tani, asnjë informacion zyrtar nuk është bërë publik mbi vendndodhjen e tyre.

The post Mbi 50 të moshuar të zhdukur në Ukrainë, dyshohet se… first appeared on JavaNews.al.

Për shkak të protestës të lajmëruar nga Partia Demokratike pasditen e sotme para Kryeministrisë, Policia e Tiranës ka ndërmarrë një plan masash për garantimin e rendit publik dhe rregullimin e qarkullimit rrugor. Protesta është e parashikuar të nisë në orën 18:00, ndërsa kufizimet për lëvizjen e automjeteve do të fillojnë që në orën 14:00.

Në këtë kuadër, Policia e Tiranës ka njoftuar se do të kufizohet parkimi dhe qarkullimi i automjeteve në disa akse të qytetit:

Nga ora 14:00, do të ndalohet parkimi i automjeteve në:

Bulevardi “Dëshmorët e Kombit”

Sheshi “Nënë Tereza”

Rruga “Ismail Qemali”

Kryqëzimi i Rrugës së Elbasanit me Rrugën “Ibrahim Rugova”

Rruga “Papa Gjon Pali II”

Bulevardi “Zhan D’Ark”

Bulevardi “Bajram Curri”

Nga ora 14:00 deri në përfundim të tubimit, do të ketë bllokim të lëvizjes së automjeteve në:

Bulevardi “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”

Rrugët “Ukraina e Lirë”, “Papa Gjon Pali II” dhe “Ismail Qemali”

Në varësi të zhvillimit të protestës, mund të ketë kufizime edhe në akse të tjera rrugore. Policia e Tiranës ka përgatitur rrugë alternative për të devijuar qarkullimin e automjeteve dhe për të minimizuar pengesat për qytetarët.

The post Protesta e PD para Kryeministrisë, policia plan masash: Ja rrugët që bllokohen first appeared on JavaNews.al.

Adriana Kalaja thotë se mendimi i saj personal është që Kryeministria duhet të rrethohet deri në dorëheqjen e kreut të qeverisë, Edi Rama.

Duke folur në MCN, Kalaja tha se kjo protestë do të bashkojë opozitën dhe demokratët e zhgënjyer. Ajo theksoi se në vijën e parë të protestës, apo nëse ndërmerret një veprim i tillë, duhet të jenë deputetët demokratë.

“Sot ndryshuan të gjitha kushtet politike. Jemi përballë një situate të paprecedentë. Nuk flas në emër të PD-së, pasi prej 30 tetorit jam dorëhequr nga strukturat drejtuese.

Do të dal aty si demokrate, si qytetare. Duhet të ngrihemi dhe të reagojmë. Jam për veprime radikale, që të rrethohet Kryeministria dhe të mos largohemi deri në dorëheqjen e Ramës dhe dorëzimin e tij përpara drejtësisë.

Të gjitha çështjet na çojnë te Edi Rama. Drejtuesja reale e organizatës është bashkëshortja e kryeministrit, Linda Rama.

Mendoj se protestat do të bashkojnë opozitën dhe ata demokratë që kanë shumë të drejtë të jenë tërhequr dhe të zhgënjyer.

Kur të shohin se deputetët dalin në krye, që policët të mos merren me qytetarët e thjeshtë, atëherë situata do të radikalizohet.

Sa kohë pretendohet se jetojmë në regjim dhe drejtohemi nga një narko-qeveri, nuk mjafton të paralajmërojmë protesta për një apo dy orë, por duhet të shkojmë pa kthim pas deri në rrëzimin e regjimit”, tha ajo.

The post “Të qendrojmë në shesh deri sa të largohet Rama”, Kalaja: Drejtuesja e organizatës është e shoqja… first appeared on JavaNews.al.

Autorët e dyshuar në sulmin në Bondi Beach hodhën eksplozivë në fillim të incidentit vdekjeprurës dhe kishin praktikuar qitje me armë javë më parë ndërsa planifikonin sulmin, sipas dokumenteve të reja të gjykatës.

Pesëmbëdhjetë persona u vranë dhe dhjetëra të tjerë u plagosën kur dy persona të armatosur hapën zjarr në një festë hebreje të Hanukkah më 14 dhjetor. Eksplozivët, përfshirë një “bombë me top tenisi”, nuk shpërthyen, sipas dokumenteve.

Naveed Akram, 24 vjeç, është akuzuar për 59 vepra penale, duke përfshirë 15 akuza për vrasje dhe një për terror. Personi i dytë i armatosur – babai i tij, Sajid Akram – u qëllua për vdekje nga policia në vendngjarje.

Sipas dokumenteve, dyshja e planifikoi “me kujdes” sulmin për disa muaj dhe dy ditë para të shtënave, vizitoi plazhin Bondi për zbulim.

Në materialet e publikuara nga policia përfshihen detajet e disa videove që gjurmojnë lëvizjet e personave të dyshuar të armatosur në muajt, ditët dhe orët para sulmit.

Një video, e bërë me një nga telefonat e tyre celularë në tetor përshkruhet si një video që tregon burrat të ulur para një imazhi të një flamuri të grupit të Shtetit Islamik (IS).

Ata dëgjohen duke bërë deklarata në lidhje me motivet e tyre për sulmin dhe dënojnë “aktet e ‘sionistëve’”, thotë policia.

Naveed Akram është gjithashtu “i regjistruar duke recituar, në arabisht, një fragment nga Kurani”.

Policia tha se pamje të veçanta nga tetori tregojnë babanë dhe djalin “duke kryer stërvitje me armë zjarri në një vend rural”, që besohet të jetë në Uellsin e Ri Jugor. Ata shihen “duke qëlluar me pushkë dhe duke lëvizur në një mënyrë taktike”, shtuan zyrtarët.

Pamjet e kamerave të sigurisë nga mbrëmja e 12 dhjetorit thuhet se tregojnë dy meshkuj “që besohet të jenë i akuzuari dhe babai i tij” në makinën e tyre pranë Bondi Beach.

“I akuzuari dhe babai i tij, S Akram, shihen duke dalë nga automjeti dhe duke ecur përgjatë urës për këmbësorë, duke qenë në të njëjtin pozicion ku ata u vendosën dy ditë më vonë dhe qëlluan ndaj anëtarëve të publikut”, thuhet në dokument.

“Policia pretendon se kjo është provë e zbulimit dhe planifikimit të një akti terrorist.”

Rreth orës 02:00 (15:00 GMT) të ditës së sulmit, dy burra u kapën nga kamerat e sigurisë duke dalë nga një banesë me qira në periferi të Sydney-t, Campsie, “duke mbajtur sende të gjata dhe të rënda të mbështjella me batanije”, të cilat i vendosën në një makinë.

Dokumentet shënojnë se këto përfshijnë dy pushkë me një tytë, një pushkë Beretta, katër pajisje shpërthyese të improvizuara (IED) dhe dy flamuj të ISIS.

Policia thotë se pak pas orës 17:00 (08:00 GMT), burrat u panë duke dalë nga banesa me qira. Pamje të veçanta i kapin ata duke mbërritur në Bondi në orën 18:50 (09:50 GMT), ku parkuan dhe vendosën flamujt në pjesën e brendshme të dritareve të përparme dhe të pasme.

Më pas, ata shihen duke hequr armët e zjarrit, përpara se të ecin drejt një ure këmbësorësh, sipas dokumenteve.

Pikërisht nga ky vend, policia beson se ata hodhën eksplozivët drejt turmës, megjithëse asnjë nuk shpërtheu.

Pak kohë më vonë, ata përdorën armët e zjarrit për të qëlluar drejt turmës, thotë policia. Katërmbëdhjetë persona u vranë në vendngjarje. Një tjetër vdiq nga plagët e marra më vonë në spital.

Sajid Akram u qëllua dhe u vra gjatë një shkëmbimi zjarri me oficerët e Policisë së Uellsit të Ri Jugor.

Naveed Akram u plagos rëndë nga zjarri i policisë. Ai u lirua nga spitali të hënën dhe u transferua në një burg.

Sulmi në Bondi Beach shkaktoi thirrje për kufizime më të ashpra mbi pronësinë e armëve dhe më shumë përpjekje për të mbrojtur komunitetin hebre nga antisemitizmi në rritje.

Të hënën, shteti i Uellsit të Ri Jugor thirri parlamentin e tij për të debatuar një sërë ligjesh të reja për armët dhe protestat, të propozuara pas të shtënave.

Disa grupe të të drejtave civile dhe avokatë pro-armëve kanë ngritur shqetësime se ligjet do të vendosin kufizime të panevojshme mbi armët e zjarrit dhe protestat.

The post Sulmi në Australi me 15 viktima, autorët hodhën eksplozivë para se të qëllonin, kryen stërvitje për disa javë first appeared on JavaNews.al.

Në seancën e së hënës të dosjes “Partizani”, avokatët e ish-kryeministrit, Sali Berisha, Klodiana Gjyzari dhe Genc Gjokutaj, pretenduan se nuk ekzistojnë faktet penale që e ngarkojnë atë me akuzën e “korrupsionit pasiv”.

“SPAK si në aktet e formulimit të akuzës nuk ka parashtruar fakte të qarta, çfarë ka bërë Berisha, cila është pasoja, nuk ka sjellë asnjë provë dhe veprim konkret se çfarë ka bërë Sali Berisha. Gjatë këtij procesi do provojmë se ndjekja penale është kryer për qëllime politike duke cënuar pluralizmin në Shqipëri”, tha Gjyzari.

The post “Partizani”, avokatja e Berishës në seancë: SPAK nuk ka asnjë fakt dhe nuk ka sjellë asnjë provë first appeared on JavaNews.al.

Kryeministri Edi Rama mori pjesë këtë të hënë, më 22 dhjetor, në aktivitetin “Me fermerët në Shqipërinë 2030”, ku prezantoi mekanizmat praktikë për mbështetjen e bujqësisë shqiptare dhe përgatitjen e sektorit për standardet e Bashkimit Europian.

Gjatë fjalës së tij, Rama theksoi rëndësinë e përgatitjes për ndryshimet që sjell anëtarësimi në BE, duke paralajmëruar se prodhimet që nuk përmbushin standardet nuk do të pranohen më në tregun europian. Po ashtu, ai prezantoi edhe disa nga ndryshimet konkrete që qeveria po implementon, mes të cilave, finalizimi i regjistrave kombëtarë të fermave dhe kafshëve.

“Çfarë do të bëjmë ne konkretisht? Sepse janë dy anë të të njëjtës medalje. Ne do të bëjmë sistemin e integruar të administrimit të kontrollit, do të finalizojmë regjistrat kombëtarë të fermave, parcelave dhe të kafshëve. Është një punë e nisur dhe do ta finalizojmë. Do të ndërtojmë deri në fund laboratorët e akredituar nga BE.

Sot kemi një nivel krejt tjetër të analizës me Institutin, etj, por duhet të përfundojë gjithë projekti i laboratorëve dhe do të shtyjmë shumë fort, në projektin e shërbimeve këshillimore në terren dhe do mbështetemi tek Universiteti Bujqësor i Tiranës. Ku besojmë se vit pas viti do kemi gjithmonë e më shumë aftësi, për të na udhëhequr, neve si sektor publik dhe juve si sektor privat.“, tha Rama.

Këshilla sipërmarrësve të sektorit bujqësor: Do ishte fatkeqësi…

Kryeministri Rama i këshilloi fermerët dhe sipërmarrësit e sektorit të mos neglizhojnë investimin në dijen dhe aftësitë e stafit të tyre.

“Nuk është diçka që duhet thënë se kështu e do muhabeti, por është diçka që del si mësim nga ajo çfarë kanë bërë të tjerët më parë. Mos lini pa investuar tek mendja e kompanisë, mos lini pa investuar tek fuqia njerëzore e kompanisë, mos lini ditë të kalojë pa trajnuar fuqinë njerëzore, pa sjellë diçka të re, sado të vogël në aspektin e të mësuarit, sepse dija është ajo që kur ka munguar, ka sjellë falimentim të menjëhershëm në momentin e hapjes së dyerve të BE-së. Thjesht dhe vetëm të vendoset dryni dhe nuk t’i pranon më njeri ato që prodhon, sepse nuk je më si sot. Sot je një fermer eksportues, që eksporton jashtë BE-së. Nesër do të prodhosh për BE-në, njëlloj si nga Lushnja për Tiranën. Nëse je ti problem për sigurinë ushqimore në Lushnjë, t’i bllokohesh në Lushnjë dhe mbaron. Do ishte fatkeqësi të vijë dita që Shqipëria të jetë anëtare në BE dhe qoftë një sipërmarrës i vetëm të thotë, nuk e dinim që do përballeshim me këto kushte të reja, nuk u përgatitëm për këto kushte të reja, apo nuk u informuam. Detyra jonë është t’ju informojmë. Detyra juaj është të informoheni. Detyra e përbashkët, që këtë ta shfrytëzojmë për të rritur kapacitetet që reciprokisht t’i vëmë në dispozicion të këtij sektori kaq jetik dhe kaq të rëndësishëm.“, vazhdoi kryeministri.

Rama e përfundoi fjalën e tij duke uruar një vit të ri të mbarë dhe të suksesshëm për fermerët, familjet e tyre dhe punonjësit e sipërmarrjeve bujqësore.

The post Si do modernizohet bujqësia? Rama: Do bëjmë regjistrin e fermave e kafshëve, fatkeqësi nëse… first appeared on JavaNews.al.

Në Gjykatën e Prishtinës janë publikuar prova audiovizive lidhur me rastin e vrasjes së Liridona Ademajt. Krisma arme dhe britmat e fëmijëve dëgjohen në një audio të prezantuar para trupit gjykues për vrasjen e ndodhur më 29 nëntor të vitit 2023.

Në sallë ishin të gjithë të akuzuarit, përfshirë ish bashkëshortin e të ndjerës, Naim Murseli. Paraprakisht, janë shfaqur pamje të cilat tregojnë për vendin e ngjarjes. Në vazhdim të prezantimit të këtyre provave, janë shfaqur edhe pamje në një karburant, ku shihen Naim Mueseli dhe Granit Plava.

Gjatë administrimit të provave materiale në seancën ndaj të akuzuarve për vrasjen e Liridona Ademajt, janë shfaqur video nga restauranti “Etnokuqa”, ku pasi Liridona, Naimi dhe fëmijët hyjnë, pas pak minutave në të kundërtën e tyre ulet edhe Granit Plava. Në pamje shihet edhe Naim Murseli, i cili lëviz brenda restaurantit dhe i drejtohet tavolinës së Granit Plavës.

Ky i fundit kishte deklaruar se vetë Naim Murseli e kishte përgatitur armën me 5 fishekë. Ndër të tjera, Plava në dëshminë e tij ka thënë se në natën kritike ishte Naimi ai që e hapi pak xhamin e veturës, ndërsa ky i fundit shtiu me armë.

The post Darka e fundit dhe mesazhi sekret, publikohen videot, momenti i vrasjes së Liridonës dhe britmat e fëmijëve first appeared on JavaNews.al.

Demokracia amerikane mbetet funksionale, por po përballet me tensione serioze institucionale. Kështu shprehet gjyqtari i Gjykatës së Lartë të Shteteve të Bashkuara, Samuel Alito, në një intervistë për Corriere della Sera, teksa analizon gjendjen e sistemit kushtetues amerikan në prag të 250-vjetorit të pavarësisë së SHBA-së.

“Institucionet funksionojnë, por është shumë e vështirë të miratohen ligje në Kongres. Kjo i shtyn presidentët të zgjerojnë kompetencat e tyre deri në kufi, ndonjëherë edhe përtej tij, ndërsa gjykatat përfshihen gjithnjë e më shpesh në përplasje me pushtetin ekzekutiv”, deklaron Alito.

Gjykata e Lartë aktualisht ka një supermazhorancë konservatore 6 me 3, e cila ka rishikuar precedentë të rëndësishëm ligjorë mbi abortin, të drejtën për armë, politikat e barazisë racore (affirmative action) dhe lirinë fetare. Sipas sondazheve, rreth gjysma e amerikanëve kanë një opinion negativ për institucionin më të lartë gjyqësor të vendit.

Në një kontekst ku Kongresi shihet si i paralizuar dhe presidentët përdorin gjithnjë e më shumë urdhra ekzekutivë, Alito thekson rëndësinë e ruajtjes së ekuilibrit mes tre pushteteve.

I pyetur për vendimin historik Dobbs, që rrëzoi Roe v. Wade dhe ia riktheu vendimmarrjen mbi abortin shteteve dhe Kongresit, Alito thotë se kritikat ndërkombëtare janë shpesh të pabazuara.

“Në shumë vende evropiane, përfshirë Britaninë dhe Francën, ligjet për abortin miratohen nga parlamentet. Pikërisht këtë parashikon edhe vendimi Dobbs”, shprehet ai, duke pranuar se çështja mbetet thellësisht përçarëse në shoqërinë amerikane.

Alito mohon se bindjet fetare të gjyqtarëve ndikojnë në vendimet e Gjykatës, edhe pse sot gjashtë nga nëntë anëtarët e saj janë katolikë. “Vendimet merren mbi bazën e Kushtetutës dhe ligjit, jo të fesë”, thekson ai.

Gjyqtari amerikan paralajmëron se polarizimi politik ka dobësuar rolin e Kongresit, duke i lënë më shumë hapësirë pushtetit ekzekutiv. Kjo ka sjellë një rritje të ndjeshme të çështjeve urgjente që përfundojnë në Gjykatën e Lartë, përfshirë vendime mbi rishpërndarjen elektorale dhe përdorimin e Gardës Kombëtare.

Duke komentuar vendimin për imunitetin presidencial, Alito thotë se ai nuk përbën kërcënim për Kushtetutën. “Imuniteti nuk vlen vetëm për një president, por për të gjithë. Demokracia funksionon vetëm nëse humbësi i zgjedhjeve e pranon rezultatin dhe dorëzon pushtetin”, shprehet ai.

Alito pranon se Gjykata e Lartë po përballet me një krizë besimi, por paralajmëron se delegjitimimi i saj nga politika dhe media dëmton vetë shtetin e së drejtës.

The post Gjykatësi i Gjykatës së Lartë të SHBA paralajmëron për përplasje mes presidentit, Kongresit dhe gjykatave first appeared on JavaNews.al.

Punimet për realizimin e fazës së parë të projektit Rolling Hills Liqeni po avancojnë me ritme të qëndrueshme dhe njësitë e para pritet t’u dorëzohen banorëve brenda vitit të ardhshëm. Aktualisht, disa prej njësive janë në fazën e ndërtimit të karabinasë, ndërsa të tjerat i janë afruar përfundimit të rifiniturave. Ndërkohë, Piazza po përmbyll fazën e karabinasë dhe vijon me punimet për ndarjet e brendshme dhe sistemimet përreth.

Shumë shpejt pritet të nisin edhe punimet e fazës së dytë të projektit, duke sjellë më pranë realitetit një nga projektet më moderne në periferi të kryeqytetit.

Pozicionuar në kodrat e liqenit të Farkës, vetëm 10 minuta larg qendrës së Tiranës, Rolling Hills Liqeni është alternativa ideale për ata që kërkojnë qetësi, pa sakrifikuar komoditetin dhe aksesin në të gjitha shërbimet.

Rezidenca ofron një mënyrë jetese ekskluzive me vila dhe apartamente të ndërtuara sipas standardeve më të larta të cilësisë dhe një arkitekturë moderne.

Fare pranë kompleksit ndodhet parku rekreativ, me hapësira të dedikuara për sport, relaks dhe aktivitete në natyrë, krijuar për t’i shërbyer çdo grupmoshe.

Ngjitur me parkun, banorët do të kenë edhe një qendër shërbimesh që do të funksionojë si një hapësirë dinamike jo vetëm për komunitetin, por edhe për vizitorët. Piazza do të ketë lidhje direkt në Lungolagon e Liqenit të Farkës dhe pritet të shndërrohet në një pikë referimi për jetën sociale dhe ekonomike të zonës.

Hapësirat komerciale të Piazza-s janë konceptuar për të mbuluar një gamë të gjerë shërbimesh që variojnë nga supermarketet, farmacitë dhe dyqanet, tek baret, restorantet, palestrat dhe qendrat SPA. Infrastruktura e projektit është e detajuar për të siguruar funksionim efikas të çdo biznesi, me parkime të dedikuara për klientë dhe furnitorë, ashensorë të veçantë për mallra dhe vizitorë, akses të garantuar për persona me aftësi të kufizuara, si dhe administrim dhe siguri 24/7.

Me ecurinë e shpejtë të punimeve, e gjithë kjo zonë pritet të shndërrohet shumë shpejt në një qendër dinamike, me një komunitet të gjallë që do të mirëpresë jo vetëm banorë të rinj, por edhe vizitorë. Rolling Hills Liqeni nuk është thjesht një rezidencë banimi, por një mundësi për të përjetuar një stil modern jetese në mes të natyrës, me gjithë komoditetin që ofron një projekt premium.

Zhvillimi i projektit mbështetet në një bazë të rregullt ligjore dhe ndjek me përpikëri të gjitha kërkesat e legjislacionit në fuqi, duke garantuar siguri dhe transparencë për çdo investim.

The post Rolling Hills Liqeni, drejt finalizimit faza e parë e projektit first appeared on JavaNews.al.

Protesta e thirrur në orën 18:00 nga Opozita ka vënë në gatishmëri Policinë e Shtetit dhe ka marrë masat për çdo skenar të mundshëm. Burime nga policia bëjnë me dije se rreth 1300 forca të policisë, duke nisur nga ato të rendit, FNSH, Shqiponjat do të jenë në terren për mbarëvajtjen e protestës. Në gatishmëri do të jenë edhe forcat RENEA.

Gjithashtu edhe Garda e Republikës do të jetë e gjitha në gatishmëri për të kryer detyrën në ruajtjen e institucioneve. Ndërkohë në protestë të gjithë efektivët do të jenë të pajisur me maska kundërgaz. Do të ketë edhe 5 autobotë me ujë nëse do të ketë nevojë në raste incidentesh.

Si në çdo protestë do të krijohet kordoni me efektivë policie para Kryeministrisë dhe perimetrit rreth saj. Në terren do të përfshihen edhe agjentët civilë, të cilët do të jenë të shumtë për të monitoruar mbarëvajtjen e protestës. Dyert e kryeministrisë do të jenë të blinduara me veshje metalike. Policia ka instaluar përgjatë gjithë bulevardit ‘Dëshmorët e Kombit’ kamera me rezolucion të lartë.

Burime për A2 CNN bëjnë me dije se dje Policia e Tiranës ka zhvilluar mbledhje për protestën duke qenë e angazhuar maksimalisht. Në mbledhje kanë qenë të gjithë drejtuesit e policisë së Tiranës dhe shefat e rendit dhe sigurisë dhe shefat e komisariateve të Tiranës. Në mbledhje janë dhënë porositë lidhur me detyrat e policisë për ruajtjen e rendit dhe të sigurisë dhe mbarëvajtjen e protestës. Efektivëve u është kërkuar që të kenë kujdes dhe të mos provokohen nga protestuesit dhe të ruajnë qetësinë. Gjithashtu u është kërkuar që ndërhyrjet të jenë të minimizuara vetëm në raste nevoje dhe mos të krijohen përplasje të provokuara.

The post Protesta e Berishës, Policia e përgatitur për çdo skenar, rreth 1300 efektivë në terren first appeared on JavaNews.al.

Qeveria e Italisë ka propozuar një amendament në ligjin e buxhetit për vitin 2026, sipas të cilit ari i mbajtur nga Banka e Italisë “i përket popullit italian”, dhe jo “shtetit”. Kjo fjali mund të duket e padëmshme – kush do të pretendonte të kundërtën? – megjithatë ajo ka shkaktuar një valë spekulimesh të shqetësuara, […]

The post Manovra strategjike e Italisë me arin appeared first on Reporter.al.

Kryetari i grupit parlamentar të Partisë Demokratike, Gazment Bardhi, zhvilloi një takim me banorët e njësisë nr.1 në Tiranë, ku në qendër të diskutimeve ishte protesta e paralajmëruar për datën 22 dhjetor, përpara Kryeministrisë.

Gjatë bashkëbisedimit, Bardhi theksoi se qytetarët kanë arsye të forta për t’u bashkuar në këtë protestë, duke akuzuar qeverinë për korrupsion dhe për pengimin e drejtësisë.

Ai u shpreh se është koha që qytetarët të reagojnë dhe të japin një mesazh të qartë kundër keqqeverisjes.

“Nga Njësia 1 Tiranë demokratët dhe qytetarët janë të gjithë bashkë kundër Qeverisë së korruptuar të Edi Ramës, Belinda Ballukut dhe Ergys Agasit. Fundi i tij po vjen ashtu siç e kishim paralajmëruar: si Kryeministri i bandave dhe më i korruptuari në historinë e shtetit shqiptar. Duke penguar drejtësinë të bëjë punën e saj, Edi Rama po zvarritet duke menduar se do të shpëtojë veten dhe familjen e tij. E ka gabim, qytetarët do të ngrihen dhe do ti japin përgjigjen e merituar. Duke nisur nga kjo e hënë.” deklaroi Bardhi.

Bardhi riafirmoi se opozita do të jetë në krah të qytetarëve, duke e konsideruar këtë protestë si një hap të rëndësishëm në betejën politike.

The post Gazment Bardhi: Qytetarët kanë arsye të forta për t’u bashkuar në protestën e 22 dhjetorit first appeared on JavaNews.al.

Arkeologët kinezë zbuluan tre vende furrash në formë thundrash kali që besohet të jenë pjesë e një punishteje qeramike që daton që nga dinastia Liao dhe Jin (907-1234), pranë një qyteti të lashtë në Rajonin Autonom të Mongolisë së Brendshme në veri të Kinës, njoftoi Instituti rajonal i Relikteve Kulturore dhe Arkeologjisë, shkruan “Xinhua”.

Zbulimi u bë gjatë gërmimeve të kryera midis korrikut dhe nëntorit rreth ish-vendndodhjes së Wu’anzhou, një qytet i themeluar fillimisht nga themeluesi i dinastisë Liao (907-1125) rreth një mijëvjeçari më parë, i vendosur në qytetin Chifeng të Mongolisë së Brendshme.

Çdo furrë zakonisht përbëhet nga një zonë pune, një dhomë pjekjeje dhe një dhomë oxhaku, të shkatërruara në shkallë të ndryshme.
Deri më tani këtë vit, arkeologët kanë zbuluar më shumë se 50 mbetje arkitekturore në një zonë gërmimi prej 500 metrash katrorë, duke përfshirë themele shtëpish, gropa hiri, bodrume magazinimi dhe furra qeramike.

Një sërë objektesh janë gjetur, duke përfshirë qeramikë, porcelan, objekte prej guri dhe hekuri, objekte prej kockash, statuja bakri, monedha dhe komponentë arkitektonikë. Artikujt prej qeramike përfshijnë kavanoza, legenë dhe tasa. Artikujt prej hekuri janë kryesisht vegla bujqësore.

Gjetjet ofrojnë prova të vlefshme materiale dhe referenca të rëndësishme akademike për të studiuar sistemin hierarkik dhe planimetrinë e qyteteve të epokës Liao, si dhe jetën e përditshme dhe aktivitetet prodhuese të banorëve të tyre, sipas Gai Zhiyong, zëvendësdrejtor i Institutit të Relikteve Kulturore dhe Arkeologjisë së Mongolisë së Brendshme.

Gërmimet sistematike arkeologjike në Wu’anzhou filluan në korrik 2023.

The post Zbulohen tre vende të lashta furrash në Mongolinë e Brendshme first appeared on JavaNews.al.

Në Universitetin e Sporteve, një histori frymëzuese po shkon drejt finalizimit. Një student i veçantë, është gati të mbyllë studimet Bachelor këtë vit akademik. 25-vjeçari Gersi Troka, zgjodhi auditorët duke thyer barrierat dhe paragjykimet ndaj personave me aftësi ndryshe.

“Kisha shumë vullnet për të realizuar Universitetin e Sporteve dhe e realizova.Ka qenë e vështirë të thyeja barriera po tani jam përmirësuar.”

Ai tregon se ambientimi me jetën universitare dhe sportin ka qenë i natyrshëm, pasi aktiviteti fizik është pjesë e jetës së tij prej thuajse 15 vitesh.

“Më është dukur shumë mirë jam shumë i kënaqur me cdo gje nga petagogët dhe nga shokët që më kanë mirëpritur në universitet.
E kaloj syhumë mirë më afrohen, duan të hyjnë në bisedë pak a shumë, pyesin për orare mësimore.”

Por për Gersin, suksesi nuk është vetëm personal. Ai ka një mesazh të drejtpërdrejtë për prindërit.

“I bëj dhe një mesazh prindërve të mos i lini femijët tuaj pasiv në shtëpi, pasi duhet të stërviten të dalin të qarkullojnë, të stërviten edhe në kushtet e shtëpisë. Duhen të ndihmohen nga të gjitha anët, fizioterapike dhe ekonomike.”

Sipas tij, kjo kategori ka nevojë për më shumë politika mbështetëse, si në arsim ashtu edhe në sport, për të pasur mundësi të barabarta zhvillimi.

The post Një student ndryshe tek sportet, 25-vjeçari Gersi Troka “mposht” sindromën “down” first appeared on JavaNews.al.

Belakis mban emrin e frymëzuar nga një mbretëreshë arabe, por jeta nuk e ka trajtuar aspak si të tillë. Përkundrazi, gjithçka ajo mban mend, është sakrificë dhe stërmundim i vazhdueshëm. Rrëfimi i saj në “Ka Një Mesazh Për Ty” nga “E Diela Shqiptare” në Tv Klan nis me kujtimet e një shtëpie në Spitallë të Durrësit ku jetonte me prindërit, dy xhaxhallarët dhe gjyshen.

Barra e shtëpisë dhe menaxhimit të ekonomisë familjare i kishte rënë nënës së saj që mundohej ta fshihte para fëmijëve atë që ndiente. Pavarësisht kësaj, ata ia lexonin ankthin dhe stresin çdo datë 5, kur priste me padurim të hynte i shoqi në derë.

Ardit Gjebrea: Mbaroi shtëpia, u futët në shtëpinë e re?

Belakis: U futëm në shtëpinë e re, akoma pa përfunduar. Dritaret ishin plastmasë, dera ishte nga një raft i vjetër që e kishim marrë nga shtëpia ku ishim dhe në dysheme kishim shtruar po prapë plastmasë dhe sipër tyre plot me çimento që mos të na shkelnin këmbët në tokë. Mami dhe babi punonin të dy, por vesi i bixhozit vazhdonte.

Ardit Gjebrea: Vazhdonte?

Belakis: Vazhdonte.

Belakis apo Bela siç e thërrasin, mori një propozim në shkollë që të përfshihej në një organizatë të quajtur World Vision ku fokusi ishte familja. Me shumë këmbëngulje, ajo ia doli që të bindte të atin të merrnin pjesë dhe më në fund, ia arritën ta shkëpusnin nga lojërat e fatit.

Belakis: Vazhduam duke shkuar në çdo takim, ishte shumë i përqendruar, kishte dëshirë të shkonte më shumë, kishte dëshirë më shumë të shkonte ai sesa ne dhe e la bixhozin. U përqendrua komplet te familja, vazhduam të kishim një jetë shumë të lumtur. Gjithë darkën e kalonim duke parë “E Diela Shqiptare” të dielave, filma të ndryshëm, seriale, duke diskutuar për politikën, Blendi Fevziu, çdo gjë që përmbante televizoni ishim aty të bashkuar.

Ardit Gjebrea: Fantastike!

Belakis: Babi, nuk dua të përmend vetëm gjërat negative, por ka qenë një prind që ka qenë pranë për mua, vëllain, vëllain tjetër se ne jemi tre fëmijë dhe na ka mbështetur në çdo lloj hapi.

Ardit Gjebrea: Pra jeta juaj u stabilizua.

Belakis: Po.

The post “Babi vonohej çdo datë 5, mami priste pas dere”, vuajtja e gjatë e familjes nga vesi i errët first appeared on JavaNews.al.

Policia e Shtetit ka finalizuar operacionin e koduar “Relay”, për goditjen e veprimtarisë kriminale që kishte si qëllim ndihmën ndaj shtetasve të huaj për kalim të paligjshëm të kufirit kundrejt fitimit.

Si rezultat i këtij operacioni, u arrestuan në flagrancë dy shtetas, B. M., 56 vjeç, dhe M. M., 24 vjeç, të cilët u kapën duke transportuar 12 emigrantë kundrejt shpërblimit monetar. Ata kishin planifikuar të kalonin emigrantët nga kufiri grek, me destinacion final vendet e Bashkimit Europian.

Gjatë operacionit u sekuestruan dy automjete dhe dy aparate celulare.

Në vijim të hetimeve, u identifikuan dhe u shpallën në kërkim dy bashkëpunëtorët e tyre, Sh. K., 40 vjeç, dhe E. S., 22 vjeç, të dyshuar për përfshirje në këtë veprimtari kriminale. Policia vijon punën për kapjen e tyre dhe dokumentimin e plotë të rastit.

Materialet procedurale i janë dorëzuar Prokurorisë për veprime të mëtejshme.

The post Transportonin klandestinë kundrejt fitimit, arrestohen 2 persona! Në kërkim bashkëpunëtorët first appeared on JavaNews.al.

Ndarja e bërë nga Kristi nuk i ka pëlqyer aspak Ilirit, i cili u shpreh se nuk donte të flinte me një mashkull tjetër në krevat (këtë rast Armiri).

Iliri: Profesor Kristi…

Kristi: A mund ta shpreh mendimin të lutem? Pse nuk më dhe një mundësi ta sheshonim?

Iliri: Ti me këtë qetësinë tënde dhe me këtë buzëqeshjen tënde helmuese… je shumë i vogël. Sa të hapësh gojën, unë të kuptoj. Ti harroje, më dëgjo mua. Ti jep tip që ta fut edhe qesh, skuth. Skuthët janë kështu.

Kristi: Skuth jam unë?

The post Nisin përplasjet e para në Big Brother, Vrenozi debaton me Kristin: Skuth, ta fut edhe qesh first appeared on JavaNews.al.

“Frikë, panik dhe blerje kohe”, kështu e quajti kreu i grupit parlamentar demokrat, Gazment Bardhi, deklaratën e Kryeministrit Edi Rama se socialistët do të shtyjnë shqyrtimin e kërkesës së SPAK për heqjen e imunitetit të Belinda Ballukut pasi të shprehet Gjykata Kushtetuese për pezullimin e saj nga detyra.

“Reagimi i sotëm i Edi Ramës është reagimi i një frikacaku, që e di se rrethi po i ngushtohet. Ai është frikacak, sepse nuk përballet me akuzën, por sulmon ata që e hetojnë. Një kryeministër i pastër, pa lidhje me korrupsionin dhe krimin e organizuar, sot do të duhej të mblidhte me urgjencë Parlamentin dhe t’i hiqte imunitetin zëvendëses së tij, të pandehur për 1.1 miliardë euro tenderime korruptive”, tha Bardhi përmes një postimi në rrjetet sociale.

“Pse nuk bëhet kurioz Edi Rama për “dardhat dhe mollët” që Belinda Balluku i ka ngrënë, por na u bëka kurioz pse SPAK-u po vepron shpejt? Sepse ai e di më mirë se kushdo tjetër se kush është porositësi i aferave korruptive të firmosura nga Belinda Balluku. Çështja “Balluku” nuk është rast i izoluar, por hallkë e një zinxhiri vendimmarrjeje që kalon nga zyra e Kryeministrit. Prandaj, Edi Rama kërkon të blejë kohë me një çështje në Gjykatën Kushtetuese, pa asnjë lidhje me kërkesën për heqjen e imunitetit të Belinda Ballukut”.

Sipas Bardhit, Rama e di se hetimi nuk do të ndalet te zëvendësja e tij dhe po blen kohë. “Një kryeministër i pafajshëm nuk frikësohet nga shpejtësia e drejtësisë. Një kryeministër i pastër nuk sulmon SPAK-un. Një kryeministër i drejtë nuk ndërton alibi procedurale. Rrethi po ngushtohet. Dhe frika e Edi Ramës vjen nga ajo që tani drejtësia e di: se tenderat, koncesionet, korrupsioni dhe krimi i organizuar në Shqipëri janë rrugë me një kalim. Ajo të çon në zyrën apo shtëpinë e Edi Ramës!”.

The post Bardhi reagon pas deklaratës së Ramës: Kërkon të blejë kohë, e di që rrethi po i ngushtohet first appeared on JavaNews.al.

Më 30 dhjetor, shërbimi postar danez do të shpërndajë letrën e fundit, duke i dhënë fund një tradite që ka zgjatur mbi katër shekuj. Vendimi i kompanisë PostNord, e krijuar në vitin 2009 nga bashkimi i posteve suedeze dhe daneze, shënon një kthesë historike për vendin që sot konsiderohet ndër më të digjitalizuarit në botë.

PostNord ka njoftuar se do të shkurtojë 1 mijë e 500 vende pune dhe do të heqë 1 mijë e 500 kuti postare të kuqe, duke u fokusuar vetëm tek shpërndarja e pakove. Kërkesa për letra ka rënë me mbi 90% gjatë 25 viteve të fundit, ndërsa blerjet online janë rritur ndjeshëm.

Kutia postare e kuqe, simbol i postës daneze, është kthyer në objekt nostalgjie. Vetëm në tre orë, 1 mijë prej tyre u blenë kur dolën në shitje këtë muaj, me çmime që varionin nga 1 mijë e 500 deri në 2 mijë korona daneze. 200 të tjera pritet të dalin në ankand në janar.

Megjithatë, dërgimi i letrave nuk do të zhduket plotësisht. Kompania Dao do të marrë përsipër këtë shërbim duke zgjeruar kapacitetin e saj nga 30 milion letra në vit në 80 milion. Klientët do të duhet t’i dorëzojnë letrat në dyqanet e Dao ose të paguajnë ekstra për mbledhjen në shtëpi, ndërsa pullat do të blihen online ose përmes aplikacionit.

Ligji danez kërkon që mundësia për të dërguar letra të ekzistojë gjithmonë. Kjo do të thotë se nëse Dao ndalon shërbimin, qeveria duhet të caktojë një kompani tjetër. Ministria e Transportit ka theksuar se ndryshimi është më shumë “sentimental” sesa praktik, pasi qytetarët do të vazhdojnë të kenë mundësi të dërgojnë e marrin letra.

Sistemi kombëtar i identitetit digjital MitID ka bërë që komunikimet zyrtare të kalojnë automatikisht në “postë digjitale”. Sot, 97% e danezëve mbi moshën 15 vjeç janë të regjistruar në MitID, ndërsa vetëm 5% kanë zgjedhur të marrin postë fizike.

Ekspertët thonë se kjo është një epokë e re. “Është e vështirë të kthehesh tek posta fizike në një vend kaq digjital,” tha Magnus Restofte, drejtor i muzeut të komunikimeve Enigma në Kopenhagë. Megjithatë, ai shtoi se vlera e letrave fizike është rritur: “Kur merr një letër të shkruar me dorë, e di që dikush ka shpenzuar kohë dhe para.”

Zëvendësdrejtori ekzekutiv i PostNord Denmark, Kim Pedersen, e përshkroi vendimin si të vështirë: “Ne kemi qenë shërbimi postar danez për 400 vjet. Por danezët janë bërë gjithnjë e më digjitalë dhe sot ka shumë pak letra. Tregu i letrave nuk është më i qëndrueshëm.”

The post Danimarka mbyll kapitullin 400-vjeçar të postës: Nuk do të shpërndahen më letra! first appeared on JavaNews.al.

Një lajm i keq për doktorin, vetëm 1 ditë para protestës kombëtare të së hënës. Revolta ka humbur pa filluar, simbolin e saj. Superstari demokrat, Ilir Vrenozi, do të mungojë, por me arsye.

Mbrëmjen e së shtunës, ai u fut në shtëpinë e madhe të Big Brother VIP. Statusin e ka fituar si opozitari më i famshëm në rrjetet sociale.

Por, kjo nuk është një humbje e pakët për doktorin, pavarësisht se kohët e fundit Vrenozi, përveçse kritik ndaj Berishës, po ia bojkotonte foltoret modeste para Kryeministrisë.

Tashmë një më pak, dhe edhe për këtë fajin me siguri e ka Ervini dhe Grida. Por, pasi doktori ia dha duart, Salianji ka reflektuar.

Ndonëse nga organizimi i partisë është përjashtuar, ish-deputeti ka bërë thirrje publike për pjesëmarrje në protestë. Një shenjë kjo se, me shumë gjasë, do të jetë dhe vetë.

Salianji hyri në burg si hero dhe doli si tradhëtar. Të njëjtin fat, mesa duket, do të ketë edhe Ilir Vrenozi në izolimin e Big Brother.

“Kush do çuditet më shumë? Edi Rama. Ka 6 muaj më kërkon të pimë kafe. Gjithmonë ai është 1 hap para. Nuk çuditem edhe po erdhi.”

ABC News

The post Vrenozi lë protestën për Big Brother/ Militanti simbol i PD: Tani pres Ramën për kafe first appeared on JavaNews.al.