Bashkimi Demokratik për Integrim informon publik se sot ka mbajtur mbledhjen e parë të Kryesisë së Këshillit të Përgjithshëm.
Siç njoftojnë nga BDI, në këtë mbledhje u shqyrtua dhe u miratua Rregullorja e punës së Kryesisë së Këshillit të Përgjithshëm, si akt bazë për funksionimin, koordinimin dhe vendimmarrjen e këtij organi.

"Po ashtu, u zhvilluan diskutime dhe u morën vendime të rëndësishme lidhur me organizimin e sekretariateve, si dhe me strukturimin e mëtejmë të Bashkimit Demokratik për Integrim".

"Në kuadër të këtyre vendimeve u vendos për emërimet në funksione kyçe organizative, si vijon: Shef i Kabinetit: Faton Ahmeti; Zëdhënëse e BDI-së: Arta Bilalli-Zenedeli; Këshilltar i Kryetarit të BDI-së për Marrëdhëniet me SHBA-në Shemshedin (Sam) Beqiri".
"Gjithashtu, Kryetari Ali Ahmeti informoi Kryesinë e Këshillit të Përgjithshëm për emërimin e kryetarëve të degëve si vijon: Tetovë Bajram Rexhepi; Kumanovë: Ridvan Asani; Strugë: Faton Pollozhani; Gostivar: Valdet Xhaferi Çair: Bujar Osmani".

"Gjithashtu, Kryetari dha orientime për të gjithë të ngarkuarit si kryetarë degësh të kryejnë detyrimet programore dhe statutare për organizimin dhe konsolidimin e nëndegëve dhe degës përkatëse", thonë nga BDI.

Bora pasditen e sotme ka përfshirë zonat më të larta dhe disa qafa malore, për këtë arsye drejtuesit e mjeteve që lëvizin drejt Strazhës dhe Pletvarit duhet të jenë veçanërisht të kujdesshëm.

Autoritetet për mirëmbajtjen e rrugëve njoftojnë se në këto segmente, në kushte të tilla krijohet shumë shpejt një shtresë e lagësht dhe e rrëshqitshme, ndërsa me rënien e temperaturës rreziku nga ngricat rritet ndjeshëm.

Shërbimet e mirëmbajtjes dhe të qarkullimit apelojnë për shpejtësi të përshtatur, mbajtje të distancës më të madhe mes automjeteve dhe shmangie të frenimeve të papritura dhe parakalimeve, sidomos në kthesa dhe në pjesët me hije.

"Drejtuesit të kontrollojnë nëse kanë pajisjet dimërore, ndërsa ata që udhëtojnë sonte duhet të llogarisin edhe mundësinë e uljes afatshkurtër të dukshmërisë. Nëse niseni drejt Strazhës ose Pletvarit, kontrolloni gjendjen e rrugëve para nisjes dhe planifikoni kohë shtesë për udhëtimin", njoftojnë autoritetet.

Kryetari i Bashkisë së Shkupit, Orce Gjorgievski, njoftoi se Inspektorati i Mjedisit ka vendosur gjoba ndaj personave juridikë - ndotësve në Shkup, pasi inspektime të forta dhe të koordinuara u kryen në terren në dy ditët e fundit.

Gjorgievski, në informacionin që ndau në një postim në profilin e tij në Facebook, u bën thirrje banorëve të Shkupit të raportojnë ndotësit potencialë në email.

"Nuk ka tolerancë për askënd - gjobat janë vendosur ndaj ndotësve në Shkup. Të dashur banorë të Shkupit, Ditët e fundit, Shkupi është përballur me ndotje serioze të ajrit. Sipas të dhënave nga monitorimi shtetëror, pragu i lejuar ishte shkelur dhe situata kërkonte një përgjigje të menjëhershme dhe vendimtare. Si Kryetar i Bashkisë së Shkupit, por mbi të gjitha si një person që, së bashku me familjen e tij, thith të njëjtin ajër si të gjithë ju, nuk kisha të drejtë të heshtja dhe të mos veproja. Inspektime të forta dhe të koordinuara u kryen në terren në dy ditët e fundit. Inspektorati i Mjedisit ka vendosur gjoba ndaj personave juridikë që ndotin dhe ka treguar qartë se ligji vlen për të gjithë", shkroi Gjorgjievski.

Kryetari i Bashkisë së Shkupit njofton se nuk do të ndalen këtu dhe se do të vazhdojnë më intensivisht dhe me vendosmëri.

Për shkak të ngërçit politik në Këshillin e Strugës, kreu i Komunës Mendi Qyra paralajmëron zgjedhje të reja për këshilltarë. Kjo vjen pasi dje për të tretën herë me radhë dështoi përpjekja për zgjedhjen e kryetarit të Këshillit. Qyra sot akuzoi për një koalicion të fshehtë mes AKI-së, LSDM-së dhe listës së këshilltarëve të Ramiz Merkos, me qëllim, siç tha ai, paralizimin e Institucioneve komunale, bllokimin e zhvillimit të komunës dhe mirëqenies së qytetarëve.

Me këtë, sipas tij, ata treguan se të rëndësishme për ta janë vetëm interesat e tyre personale, ndërsa këtë koalicion e quajti antikombëtar. Në këtë mënyrë është penguar realizimi i projekteve të rëndësishme për vitin 2026 me vlerë prej 5 milionë euro.

Këshilltarët e AKI-së i reaguan Qyrës duke thënë se deklaratat e tij përbëjnë përpjekje për të relaivitizuar dhe fshehur të vërtetën politike përmes akuzave selektive.

“Lista Merko të cilës sot i referoheni se gjoja qenka në koordinim me ne për të paralizuar punën e Këshillit, publikisht ka mbështetur kandidaturën tuaj z. Qyra. Propozimi i AKI-së për kryetar të Këshillit nuk u mbështet me 4 vota, ku përfshihen votat e VLEN, VMRO-DPMNE-së, LSDM-së, Levicës dhe Listës Merko. Bllokimi institucional nuk është krijuar nga AKI, por është produkt i drejtpërdrejtë i pazareve politike që disa subjekte kanë zhvilluar mes vete, larg syrit të opinionit publik. Çdo përpjekje për ta zhvendosur fajin nga ata që realisht e kanë krijuar këtë ngërç institucional është e kotë”, thonë Këshilltarët e AKI-së në Strugë.

I pyetur nëse me OBRM-PDUKM tashmë e kanë dakorduar emrin e kryetarit të këshillit, Qyra pa përgjigje konkrete.

VLEN dhe OBRM-PDUKM së bashku kanë gjithsej 10 këshilltarë, gjë që nuk është e mjaftueshme për shumicë në Këshillin e Strugës, i cili ka 23 këshilltarë. Për marrjen e çdo vendimi në të ardhmen, do t’u duhen edhe të paktën dy këshilltarë të tjerë. /Alsa/

Ministrja e Punëve të Jashtme të Shqipërisë, Elisa Spiropali, ka vazhduar edhe sot me takime në ditën e dytë të vizitës zyrtare në Maqedoninë e Veriut. Në selinë e BDI-së në Tetovë, ajo u prit nga kreu i integristëve Ali Ahmeti dhe kryetrari i ASH-së Arben Taravari.

Pas takimit, Ahmeti shkroi se kanë zhvilluar një bashkëbisedim të hapur mbi zhvillimet aktuale politike, marrëdhëniet e shkëlqyera ndërmjet dy vendeve, si dhe rëndësinë e bashkëpunimit të vazhdueshëm institucional në funksion të stabilitetit rajonal dhe perspektivës evropiane.

Në Tetovë, Spiropali u prit edhe nga kryetari i Komunës, Bilall Kasami, i cili shkroi se kjo vizitë bart frymën e një kombi që nuk ndahet me kufij, por bashkohet me gjuhë, histori dhe përgjegjësi të përbashkët. “Tetova mbetet urë bashkëpunimi dhe dinjiteti kombëtar”, shkroi Kasami.

Edhe kryetari i Çairit Izet Mexhiti ka pritur në takim kryediplomaten shqiptare, ndërsa pas takimit ai kumtoi se kanë folur për zhvillimet aktuale rajonale, rolin e diplomacisë shqiptare në forcimin e lidhjeve mbarëkombëtare, si dhe rëndësinë e një bashkëpunimi të thellë ndërinstitucional, në funksion të interesave të përbashkëta.

Ministrja e Jashtme Spiropali po ashtu zhvilloi takim edhe me grupin e deputetëve të Kuvendit të Maqedonisë së veriut për bashkëpunim me Parlamentin e Shqipërisë.

Kryetari i Gjykatës Kushtetuese, Darko Kostadinovski, me kritika serioze për ndryshimet në Kodin Penal të bëra dy vite më parë. Thotë se me uljen e dënimeve për veprat e korrupsionit të lartë, pa debat publik dhe ekspertë, dhe me miratimin e tyre me flamurin evropian në Kuvend, deputetët u kthyen shpinën qytetarëve që i kanë zgjedhur. Sipas Kostadinovskit, Gjykata Kushtetuese ka marrë vendim historik, duke i urdhëruar Kuvendit që brenda gjashtë muajve të bëjë ndryshimet e nevojshme në Kodin Penal, afat i cili megjithatë u shty për shkak të zgjedhjeve lokale.

“Një vendim shfuqizues do të shkaktonte edhe më shumë dëm sesa dëmi që e bënë deputetët duke miratuar ato ndryshime dhe plotësime të Kodit Penal. Pra, ditën kur e morëm vendimin në shkurt, në konferencë për shtyp thashë se Kuvendi ka bërë një dëm të pariparueshëm ndaj shtetit juridik dhe sundimit të ligjit në historinë tonë, dhe ende mbetem në atë qëndrim”, tha Darko Kostadinovski, kryetar i Gjykatës Kushtetuese.

Edhe pse shumica përgatiti zgjidhje kalimtare si ndryshime në Kodin Penal, megjithatë, ambasadori i BE-së, Mihalis Rokas, thotë se bashkësia ndërkombëtare pret një Kod Penal krejtësisht të ri.

“Pra, pritjet tona nuk janë vetëm që vendi të korrigjojë pasojat që i la ky vendim, por edhe të kryejë rishikim të plotë dhe të përgatisë Kod Penal të ri, në mënyrë që të harmonizohet me kuadrin ligjor që e kemi në vendet anëtare të BE-së. Dhe ky harmonizim shkon përtej këtyre problemeve dhe prek shumë fusha të tjera – prek edhe krimin mjedisor, prek sigurinë në komunikacion, dezinformimin”, u shpreh Mihalis Rokas, ambasador i BE-së në vend.

Me nënshkrimin e nëntë deputetëve të shumicës, ndryshimet në Kodin Penal hynë në Kuvend, me të cilat parashikohen dënime më të larta në pjesën e abuzimit me pozitën zyrtare, por ato ende nuk janë vendosur në seancë plenare. Në Ministrinë e Drejtësisë ka edhe një grup pune për hartimin e një Kodi Penal krejtësisht të ri, i cili është pjesë e agjendës reformuese dhe pritet të zbatohet në praktikë gjatë vitit 2026. /Alsat/

Viti 2026 do të nisë me greva, protesta dhe bllokada. Paralajmërimet vijnë nga Lidhja e Sindikatave të Maqedonisë.
Nënkryetari i LSM-së, Ivan Peshevski, për televizionin Alsat, thotë se nëse pushteti nuk e pranon kërkesën për rritjen e pagës minimale në 600 euro, punëtorët do të dalin në rrugë.

Peshevski shton se nuk pajtohen me asnjë propozim që subvencionet të mbeten të njëjta si për pagën minimale.

“Po ashtu pamë hedhjen e topit nga përfaqësuesit e Qeverisë që të merren vesh sindikatat dhe punëdhënësit. Nëse mendojmë se kështu i nënvlerësojmë punëtorët, do të krijojmë revoltë edhe më të madhe. Duke pasur parasysh, nëse mund të biem dakord kështu, hajde të biem dakord se sa të jetë çmimi i rrymës, sa të jetë çmimi i bukës, sa të jetë çmimi i ujit. Qeveria nuk mund të jetë vëzhgues i heshtur apo vetëm ndërmjetës. Qeveria është përfaqësuese e shtetit, dhe shteti, nëse nuk i frenon ose nuk i detyron punëdhënësit t’i rrisin pagat, punëtorët kurrë nuk mund të dalin fitues nga ai rreth i mbyllur dhe magjik, që vazhdimisht rrotullohet, ndërsa ata thonë se edhe 400 euro janë shumë, e lëre më 500 apo 600 euro”, tha Ivan Peshevski – nënkryetar i Lidhjes së Sindikatave të Maqedonisë.

Nga opozita e LSDM-së thonë se të gjithë e kanë të qartë se rritje të pagës minimale nuk do të ketë, duke shtuar se qeveria e Mickoskit nuk ka para as për pagën minimale, as për bujqit, e as për pensionistët.

“Është e qartë se të gjithë do të duhet të mësohen me faktin se paga më të larta nuk do të ketë. Sipas marrëveshjes që e publikuan mediat britanike, shteti ka detyrim t’u sigurojë paga, akomodim, sigurim. Duhet të paguhen pa marrë parasysh nëse ka apo nuk ka punë. Prandaj nuk do të ketë para për paga më të larta për punëtorët, as para për pensione më të larta për pensionistët. Jo, këta nuk janë migrantë, këta janë “punëtorë ekonomikë”, u shpreh Simona Cvetanovski – anëtare e Bordit Ekzekutiv të LSDM.

Nga Qeveria mbeten në qëndrimin se gjithçka që do të dakordohen punëtorët dhe punëdhënësit, ata do ta pranojnë.

Nëse nuk ka marrëveshje, do të mbetet harmonizimi ligjor në vlerë prej 1.500 deri në 2.000 denarë. Sipas të dhënave të LSM-së, mbi 30 mijë qytetarë në vend marrin pagë minimale.

Në Shqipëri, paga minimale nga 1 janari do të jetë 500 euro, në Kosovë 430 euro, ndërsa nga qershori edhe atje do të arrijë në 500 euro, në Serbi 550 euro, ndërsa në Bosnjë e Hercegovinë paga minimale do të jetë sa mesatarja në Maqedoni.

Qeveria e Maqedonisë së Veriut njofton se ka shpallur gjendje krize për shtatë ditë, për shkak të mungesës së prodhimtarisë së energjisë elektrike, e cila vjen si pasojë e mungesës së blerjes së mazutit.

"Qeveria, në mbledhjen e sotme të rregullt të 138-të qeveritare, me propozim të Komitetit Drejtues për koordinim dhe menaxhim të Sistemit për Menaxhimin e Krizave, miratoi vendim për ekzistencën e gjendjes së krizës në furnizimin me energji elektrike në të gjithë territorin e shtetit, për periudhë prej 7 ditësh nga dita e hyrjes në fuqi të këtij vendimi".

"Siç kemi informuar gjatë ditëve të mëparshme, ky vendim rrjedh si pasojë e pamundësisë për sigurimin e mazutit, i cili është i domosdoshëm në procesin e prodhimit. Rezervat e detyrueshme të derivateve të naftës do të vihen në dispozicion pa kompensim, ndërsa SHA EMV ka për detyrë që për shpenzimin e derivatit të naftës – mazut, të dorëzojë raport pranë Qeverisë dhe Ministrisë së Financave", thonë nga Qeveria e Maqedonisë së Veriut.

Sektori për Punë të Brendshme në Ohër njofton se ka ngrtur kallëzim penale kundër dy personave nga Ohri, të moshës 47 dhe 39 vjeç, për shkak të dyshimit se kanë kryer veprat penale "falsifikim dokumenti" dhe "mashtrim".

"I pandehuri i parë, në cilësinë e kryetarit, ndërsa i pandehuri i dytë në cilësinë e sekretarit të Shoqatës Komunale të Futbollit të Ohrit, duke përfituar nga pozicioni i tyre në shoqatë dhe qasja në sistemin e Federatës së Futbollit të Maqedonisë, gjatë vitit 2024, në disa raste kanë krijuar procesverbale të ndeshjeve të luajtura në të cilat kanë futur të dhëna të rreme për gjyqtarët dhe lojtarët e futbollit si pjesëmarrës në ndeshjet e futbollit që dyshohet se janë zhvilluar në ligën rajonale B në kuadër të Shoqatës Komunale të Futbollit të Ohrit".

"Pastaj, ata kanë përgatitur procesverbale me të dhëna të rreme dhe të paplota dhe i kanë futur ato në sistemin e Federatës së Futbollit të Maqedonisë, duke e mashtruar atë, duke paraqitur në mënyrë të rreme se Shoqata Komunale e Futbollit të Ohrit ka organizuar një garë në ligën komunale B me tetë ekipe si pjesëmarrëse", njofton SPB Ohër.

Policia ka arrestuar një grua 45 vjeçe nga Gostivari, nën dyshime për vjedhje të stolive të arit në një shtëpi në Gostivar.
Sipas MPB-së, ari kapte vlerën e 9000 eurove.

“Më 22.12.2025, në orën 10:00, në fshatin Dobërdoll të Gostivarit, punonjës të policisë nga Njësia Policore Gallatë kanë ndaluar M.S. (45 vjeçe) nga fshati Kalishtë i Gostivarit. Ajo dyshohet se më herët gjatë ditës kishte kryer një vjedhje në një shtëpi në fshatin Gradec, pronë e H.A. (49 vjeç) nga fshati Gradec, ku mori stoli prej ari në vlerë rreth 9.000 euro".

"Stoli e marrë është gjetur dhe iu është kthyer pronarit, ndërsa M.S. është mbajtur në stacionin policor dhe pas dokumentimit të rastit kundër saj do të ndiqet me kallëzim të përshtatshëm penal”, thonë nga MPB.

Ministri i Punëve të Jashtme dhe Tregtisë së Jashtme Timço Mucunski konsideron se tema e pranimit të azilkërkuesve të refuzuar në vend është ngritur në mënyrë spekulative nga mediat nga Mbretëria e Bashkuar, dhe jo vetëm për Maqedoninë.

Një diskutim dhe qëllim të tillë nga qeveria jonë nuk ka pasur dhe nuk do të ketë, thotë Mucunski në një intervistë për “360 Gradë” në RTVM.

“Në asnjë formë, as të ligjshme dhe as të paligjshme, të tilla e të tilla, kurrfarë migrantë nuk do të pranohen në shtetin tonë në bazë të ndonjë forme marrëveshjeje me Mbretërinë e Bashkuar… As azilkërkues të refuzuar. As nuk do të jenë në qendra speciale… thamë se nuk do të ketë qendra speciale, kështu që pashë opozitën të fillonte të përhapte histeri – “po, ata nuk do të jenë në qendra speciale, ata do të jenë në banesa”. Nuk do të ketë as atë dhe as atë. Pra, asnjë paketë lidhur me migrantë ose azilkërkuesit e refuzuar kjo qeveri nuk do të lidhë, as nuk ka negociuar diçka të tillë, as nuk ka ndërmend të negociojë diçka të tillë. Pra, ky është një lajm i rremë plotësisht i krijuar që u përhap në një mënyrë të paturpshme dhe të dëmshme nga partia kryesore e opozitës në shtet”, theksoi ministri.

Në pyetjen nëse pika fillestare për të gjithë debatin ishte informacioni i publikuar në mediat britanike, Mucunski thekson se kjo nuk është e diskutueshme, por shton se pavarësisht mohimeve nga njerëzit më me ndikim në shtet – presidentja, kryeministri, ministri i Punëve të Jashtme dhe ministri i Punëve të Brendshme, opozita ende po përhap atë panik.

Lidhja Auto-moto e Maqedonisë (LAMM) njofton se nga ora 21:00, kalimi kufitar Evzoni është i hapur për të gjitha llojet e trafikut që hyjnë në Republikën e Greqisë.

Bllokimi për hyrje në Greqi sot filloi nga ora 18:40.

Pikëkalimi kufitar Evzoni u mbyll sërish për shkak të bllokadave të vazhdueshme nga fermerët grekë, gjë që po krijon probleme serioze për pasagjerët dhe kompanitë e transportit.

Bllokadat po zbatohen çdo ditë, ndërsa në ditët e fundit kryesisht në pasdite. Gjatë bllokadave katër-orëshe, trafiku është pezulluar për të gjitha llojet e automjeteve - pasagjerëve dhe mallrave, me përjashtim të rasteve të emergjencës.

Vendin gjatë kësaj jave pritet ta përfshijë mot kryesisht i vranët, me reshje të dendura shiu në disa zona. Gjithashtu pritet edhe ulje temperaturash, sidomos ditët e fundit të muajit do të jenë nën zero.

Sipas sinoptikëve, ditëve në vijim nuk pritet paraqitje e mjegullës, gjë që do të ndikojë pozitivisht në dukshmërinë në komunikacion.

“Nesër në fund të ditës dhe ditëve të ardhshme zona jonë do të jetë nën ndikimin e motit të lagësht pas çka do të kemi mot me reshje shiu, të cilat nëpër male do të jenë reshje dëbore…të mërkurën kryesisht në pjesët jugore do të kemi reshje më të dendura dhe do presim që do ketë reshje deri në 30 litra metër katror".

"Ndërsa të enjten në pjesët lindore presim mbi 20 litra për metër katrorë. Nëpër male reshjet e shiut do të shndërrohen në reshje bore ku do të formohet shtresë e borës 5 deri 10 centimetra”, deklaroi Lençe Ristova, sinpotike./Alsat/

Dukshmëri e zvogëluar për shkak të mjegullës prej 50 deri në 150 metra ka në akset rrugore Dibër – Strugë, Kumanovë – Kriva Palankë dhe Veles – Katllanovë, informon NP Rrugët e Maqedonisë.

Komunikacioni në rrugët shtetërore po zhvillohet pa probleme, vende-vende në rrugë të lagështa. Në disa akse rrugore që kalojnë nëpër prerje dhe gryka, janë të mundshme rrëshqitje të vogla dheu.
NP Rrugët e Maqedonisë apelon për drejtim të kujdesshëm të automjeteve, respektim të sinjalistikës së vendosur të komunikacionit, si dhe përshtatje të shpejtësisë sipas kushteve të rrugës.

Siç edhe pritej, punëdhënësit dhe Lidhja e Sindikatave të Maqedonisë nuk u morën vesh për rritjen e pagës minimale para harmonizimit ligjor në mars. Po ashtu, siç pritej, edhe Qeveria e përsëriti qëndrimin se është për një pagë minimale më të lartë, por vetëm nëse sindikatat dhe punëdhënësit bien dakord. Në LSM mungesa e zgjidhjes nuk u pëlqeu dhe paralajmëruan se nëse deri në Vitin e Ri nuk ka marrëveshje, do të ketë protesta.

“Sot u paraqitëm me argumente, i rrëzuam të gjitha tezat e deritanishme të punëdhënësve, si dhe të përfaqësuesve të qeverisë. Megjithatë, këto argumente për ta nuk ishin të mjaftueshme, as anketa që e realizoi LSM me 1.600 të anketuar nuk ishte një mostër përfaqësuese. Fakti që hapen më shumë kompani sesa që mbyllen me rritjen e pagës minimale, nuk është i mjaftueshëm. Fakti që rritet numri i të punësuarve, ndërsa zvogëlohet numri i të papunëve, gjithashtu nuk është i mjaftueshëm”, tha Slobodan Trendafilov – kryetar i Lidhjes së Sindikatave të Maqedonisë.

Ministri i Ekonomisë Besar Durmishi thotë se në Këshillin ekonomik-social janë paraqitur të gjitha argumentet pro dhe kundër një page minimale më të lartë. LSM thotë se ajo është më e ulëta në rajon, ndërsa Durmishi se jemi më mirë se Bullgaria dhe Turqia. Por, punëdhënësit kanë prezantuar të dhëna se profitabiliteti i kompanive vendore sillet nga 2 deri në 5 për qind dhe se nuk mund të rritet paga minimale. Sipas disa përllogaritjeve, nëse kompanitë heqin dorë nga profiti, respektivisht të punojnë pa fitim, paga do të ishte diçka mbi një mijë euro.

“Sipas indikatorëve tanë, në këto kushte ekonomike nuk ka arsyetim për rritje intervenuese të pagës minimale para harmonizimit të rregullt në muajin mars, i cili është i përcaktuar qartë me Ligj dhe që do të jetë ndërmjet 1.500 deri në 2.000 denarë. Më saktë do ta dimë pas Vitit të Ri, kur do t’i kemi të gjitha të dhënat dhe përllogaritjet do të tregojnë saktësisht se sa do të jetë paga minimale, respektivisht nga muaji mars kur do të harmonizohet”, theksoi minsitri i Ekonomisë dhe Punës, Besar Durmishi.

Por, janë paraqitur edhe ide të tjera, ndër to edhe që paga minimale të rritet, por kontributet për rritjen për një periudhë të caktuar t’i paguajë qeveria.

“Një nga propozimet e Konfederatës së Biznesit të Maqedonisë në kuadër të Ligjit për Marrëdhënie Pune është që të zgjerohet negocimi kolektiv, me ç’rast të përfshihet edhe paga minimale, veçanërisht në sektorë të caktuar. Propozimi ynë është se me negocimin e pagës minimale në sektorë të caktuar mund të zvogëlohen edhe keqpërdorimet, kështu që topi është mes sindikatave dhe punëdhënësve”, u shpreh Mile Boshkov – Konfederata e Biznesit të Maqedonisë.

Nga LSM i akuzuan sindikatat e tjera se e kanë mbrojtur Qeverinë dhe punëdhënësit dhe për këtë arsye i thirrën të gjithë punëtorët që të japin mbështetje për hapat e ardhshëm të kësaj sindikate./TV21/

Shtetasit e Maqedonisë që punojnë jashtë vendit, kanë filluar të kthehen në vend për festat e fundvitit. Të dhënat e Ministrisë së Punëve të Brendshme tregojnë gjithashtu se mbi 36 mijë shtetas kanë hyrë në pikën kufitare Tabanoc këtë fundjavë.

"Në pikën kufitare Tabanoc nga 20.12.2025 (e premte) ora 10:00 deri më 22.12.2025 (e hënë) deri në orën 10:00, kanë hyrë në vend 36,316 shtetas të Maqedonisë, ndërsa kanë dalë 6,892 shtetas. Sa i përket shtetasve të huaj, në të njëjtën periudhë, kanë hyrë në vendin tonë 16,084 persona dhe kanë dalë 7,720 persona", njoftoi MPB.

Nga MPB thonë se po marrin të gjitha masat dhe po vënë në funksion të gjitha kapacitetet njerëzore dhe teknike për të përshpejtuar fluksin e udhëtarëve, duke kryer kontrolle të detyrueshme kufitare.

Ministria e Bujqësisë njofton se sot ka paguar 1.211 blegtorë, në përputhje me Programin për mbështetje financiare në bujqësi për vitin 2024".

"Sot është realizuar pagesa e mjeteve në shumën e përgjithshme prej 335.963.096 denarë për 1.211 blegtorë, në përputhje me Programin për mbështetje financiare në bujqësi për vitin 2024".

"Sa i përket përfituesve të cilëve nuk u janë paguar mjetet në bazë të subvencioneve për vitin 2023, informojmë se të njëjtit duhet t’i drejtohen Agjencisë për Mbështetje Financiare në Bujqësi dhe Zhvillim Rural, me qëllim që të bëhet verifikim i detajuar dhe shqyrtim i secilit rast individual", thonë nga Ministria e Bujqësisë.

Transporti ajror në Aeroportin Ndërkombëtar të Shkupit po stabilizohet gradualisht, pasi dje dhe sot janë regjistruar anulime dhe devijime të fluturimeve për shkak të pamjes së kufizuar të shkaktuar nga mjegulla, njofton operatori TAV Maqedonia.

Prej atje thonë se në periudhën nga ora 20:00 e mbrëmjes së djeshme, deri në ora 12:00 të ditës së sotme janë realizuar 27 fluturime, ndërsa gjithsej tetë fluturime janë anuluar, tre në ardhje (Beograd, Stamboll dhe Stamboll – Sabiha Gokçen) dhe pesë në nisje (Cyrih, Beograd, Athinë, Stamboll dhe Stamboll – Sabiha Gokçen). Një fluturim nga Frankfurt-Han është devijuar.

“Të gjitha fluturimet e tjera kanë ateruar dhe nisur sipas orarit të planifikuar. Aeroporti është i hapur dhe të gjitha kapacitetet janë në funksion, bëjnë të ditur nga TAV, duke shtuar se personeli dhe pajisjet punojnë 24/7”, thonë nga TAV.

Nga kompania apelojnë që pasagjerët të ndjekin informacionet nga kompanitë ajrore për fluturimet e tyre, pasi kushtet atmosferike mund të ndryshojnë, dhe secila kompani ka procedura të ndryshme për tolerancën gjatë pamjes së kufizuar.

"Informacione të përditësuara për orarin e fluturimeve janë të disponueshme në faqen e internetit https://skp.airports.com.mk/, ndërsa pasagjerët mund të drejtohen edhe te pulti i informacionit në terminal ose në numrin e telefonit +389 2 3148 333", thonë nga TAV Maqedoni.

Nuk do të ketë asnjë krizë, as restrikcione të energjisë elektrike – siguron ministrja e Energjetikës Sanja Bozhinovska, pasi EMV i kërkoi Qeverisë shpalljen e gjendjes së krizës në tregun e energjisë elektrike, për shkak të vështirësive në furnizimin me lëndë djegëse për shkak të bllokadës së kufijve me Greqinë nga bujqit grekë. Ajo informoi se nesër, në seancë qeveritare, do të shqyrtohet kërkesa e EMV-së me të cilën duhet të aktivizohen rezervat shtetërore. Në rezerva kemi 10.500 ton mazut, të cilat janë të mjaftueshme për 47 ditë.

“EMV ka dorëzuar një letër në Qeveri. Ajo do të shqyrtohet nesër në seancë qeveritare. Nuk do të ketë asnjë krizë. Për qytetarët kjo nuk do të thotë asgjë, sepse shteti ka rezerva të mazutit. Kjo do të thotë se, nëse e dini se ka protesta nga grekët, do të thotë se tashmë ka më shumë se 50 ditë pamundësi për furnizim me mazut. Kjo do të thotë se rezervat shtetërore do ta furnizojnë EMV-në me mazut”, tha Sanja Bozhinovska, ministre e Energjetikës.

Protestë të bujqve grekë ka edhe pasdite, por Bozhinovska thotë se paralajmërimet janë se pikat kufitare me Greqinë do të jenë të kalueshme për festat. Po ashtu, ministrja informoi se është përzgjedhur kompania që do të ndërtojë linjën e tensionit të lartë drejt Shqipërisë, pasi më herët, për shkak të mosrespektimit të obligimeve, ishte ndërprerë kontrata me “Energoinvest” nga Bosnja. Tha se detajet do t’i kumtojë MEPSO, dhe theksoi se po punohet intensivisht edhe në ndërtimin e interkonektorit të gazit me Greqinë, i cili duhet të përfundojë në pranverë 2027.

“Ishim edhe në Serbi në një takim dypalësh. Atje biseduam për Serbi-Maqedoni. Atje kemi 23 kilometra. Do të paraqitemi bashkë dhe do të shohim për financim nga Banka Botërore. Presim gjithashtu që deri në fund të vitit 2027 të përfundojë, që do të thotë se Maqedonia do të jetë serioze, do të tranzitohet gazi Greqi-Maqedoni-Serbi”, pohoi Sanja Bozhinovska, ministre e Energjetikës.
Bozhinovska informoi se plani vjetor për vitin 2025 parasheh ndërtimin e objekteve energjetike me fuqi totale prej 1.265 megavatësh, investime rreth 1,4 miliard euro. Për vitin 2026, në Ministria ka mbërritur kërkesa për ndërtimin e kapaciteteve energjetike me gjithsej 10.950 megavat fuqi.

Xhevat Muça, pronari i Muça Solar, është i ftuari i radhës në emisionin PodGo, me të cilin kemi diskutuar për biznesin e tij, sektorin energjetik dhe energjinë ripërtëritëse.

Ai tregoi se zyra kryesore e Muça Solar është në Suharekë, si dhe mënyrën se si i zhvillon punëtorët e tij. Muça gjithashtu tha se u ofron mundësi të ndryshme studentëve.

"Punëtorët tanë e marrin zanatin një vit para se të punësohen. Këtë model e kam marrë në Zvicër. Gjithashtu u ofrojmë mundësi studentëve për punë praktike. Gjatë kohës që ata bëjnë praktikë e zgjedhin një projekt dhe mund ta përgatisin temën e diplomës dhe me atë diplomojnë. Në momentin që studentët diplomon me një projekt të tillë ne kërkojmë që ai student të bëjë një kopje më shumë, dhe të projekt ua dërgojmë kompanive ku studentët aplikojnë për punë", tha Muça.

Ai theksoi si e ka nisur Muça Solar dhe vështirësitë që ka pasur në fillim.

"Për dallim me vitin 2008 kur qytetarët nuk e dinin se çfarë janë. E mbaj mend në një panair në vitin 2008 qytetarët na pyesnin se çfarë janë këto bojlerë. Kjo ka zgjatur deri në vitin 2016, ndërsa në vitin 2016 jemi shpallur shitësit më të mirë në Austri, në mes 42 shteteve. Aty është bërë një kthesë e madhe në sektorin e energjisë ripërtëritëse. Përveç personave fizik, tani e kanë kuptuar edhe bizneset. I vetmi investim që garanton kthimin e investimit, është sektori i energjisë së ripërtritshme", tha Muça.

E pyetëm për mënyrat se si sektori i energjetik të zhvillohet edhe në Maqedoni, ai tha se duhet të fillohet prej poshtë e lartë.

"Mirë do të ishte të filloni prej shkollave teknike. Duhet të ketë bazë. Nuk mund të nisim prej lart e poshtë, por prej poshtë e lartë. Pra prej shkollave deri në universitet. Kam pasur në vizitë disa herë profesorët të shkollave teknike nga Tetova, dhe kam qenë në Tetovë disa herë para shtetë-tetë viteve dhe kemi menduar atëherë të zhvillohem edhe në Maqedoni. Por për shkak të ligjeve nuk arritëm ta bëjmë këtë gjë", tha Muça.

Ndërsa sa i përket të ardhmes së paneleve solare, ai tha se rritja e çmimit të energjisë elektrike do të detyrojë bizneset dhe personat të investojnë në panelet solare.

"Derisa kemi rritje të çmimit të energjisë elektrike, është e patjetërsueshme me investuar në sistemin fotovoltaik, si dhe për disa biznese e papërballueshme çmimi i energjisë elektrike. Janë marrë hapa të shpejt sa i përket liberalizimit të tregut të energjisë elektrike. Bizneset janë vendosur para aktit të kryer me rritjen e çmimit të energjisë elektrike", tha Muça./Telegrafi/