Read More...

Prefekti i Qarkut Gjirokastër raporton se situata në terren për shkak të reshjeve dhe ngricave vijon të monitorohet dhe menaxhohet nga bashkitë përkatëse. Në qytetet dhe njësitë administrative të qarkut, po kryhen punime për hapjen e rrugëve të bllokuara, pastrimin e dherave dhe vlerësimin e dëmeve të shkaktuara nga moti i keq. Bashkitë po ndërhyjnë në lagjet urbane dhe fshatrat e prekura, ndërsa nivelin e lumit Vjosë në Memaliaj raportohet 2.8 metra. Për momentin furnizimi me energji elektrike në të gjithë qarkun vijon normalisht.

BASHKIA GJIROKASTËR
Ditën e sotme do të vijojë puna në njësinë adm. Qytet në lagjet “Granicë”, SMT dhe në përroin e Gjokanën në lagjen “Zinxhia” gjithashtu do të punohet dhe në njësinë adm. Lunxëri për hapjen përfundimtare të aksit rrugor deri në fshatin Gjatë.
Nga bashkia ka filluar dhe hedhja e kripës në lagjet e qytetit për shkak të ngricës nga ulja e temperaturave.
BASHKIA LIBOHOVË
Në Njësinë Administrative Zagori, rrugët hyrëse të fshatrave Zhej, Lliar dhe Topovë vijojnë të jenë të bllokuara për shkak të rrëshqitjeve të dherave. Nga bashkia po shihet mundësia e ndërhyrjes, pasi formacionet janë të paqëndrueahme.
BASHKIA MEMALIAJ
-Njësia Administrative Memaliaj (fshat)
Një rrugë e brendshme vijon të mbetet e bllokuar, duke izoluar 5 banesa. Ditën e sotme nga bashkia do të vazhdoj puna në rrugët e brendëshme për largimin e dherave, (në ato segmente ku mund të punohet, pasi formacionet e tokës janë të paqëndrueshme).
-Njësia Administrative Luftinjë
Në fshatin Tosk-Martalloz, do të punohet ditën e sotme, për largimin e dherave.
BASHKIA DROPULL
Problem mbetet dëmtimi i urë së Glinës, pasi shirat e fundit dëmtuan dhe një këmbë tjeter.
BASHKIA PËRMET
Aksi rrugor Përmet – Dogana e Tre Urave ênshtë me një kalim në një segment rreth 25 metër, në hyrje të fshatit Petran.
Edhe ditën e sotme sipas një plani nga bashkia do të punohet për pastrimin e dherave në pjesën e sipërme të lagjes Sede, në qytetin e Përmetit dhe në fshatrat Tremishtë, Bënjë dhe Ogdun, njësia adm. Petran. Gjithashtu po vijon puna
për vlerësimin e dëmeve.
BASHKIA KËLCYRË
-Në rrugën e fshatit e fshatit Psar, njësia Ballaban do të ndërhyet ditën e sotme për largimin e dherave. Nga bashkia ditën e sotme do të përfundoj procesi i konstatimit të dëmeve me gjithë dokumentacionin përkatës.
BASHKIA TEPELENË
-Aksi Subash – Hormovë, rruga e vjetër nuk mundëson qarkullimin e mjeteve të rënda. Nga bashkia do të ndërhuet sapo të ulet niveli i ujit nga përroi i Tërbuqit.
Ditën e sotme do të punohet në fshatin Hormovë për drenazhimin e unrave në një banesë e cila rrezikon nga ulja e sipërfaqes së tokës.
Nga OSHEE informohem se gjithë qarku furnizohet normalisht me energji elektrike.
LUMI VJOSË
Memaliaj: niveli i ujit 2.8 metër.
Mbetemi në kontakt.

Read More...

Tre persona kanë mbetur të plagosur nga arma e zjarrit në një lokal në Deçanit, teksa një person është arrestuar në cilësinë e të dyshuarit.

Rastin për Klankosova.tv e ka konfirmuar zëdhënësi i Policisë për rajonin e Pejës, Fadil Gashi.

Ai bëri të ditur se në vendin e ngjarjes është sekuestruar një armë, një karikator dhe nëntë fishekë.

“Më datë 13, rreth orës 00:18, policia është njoftuar se në një lokal ka të shtëna me armë zjarri. Policia ka dalë në vendin e ngjarjes, ku në një lokal ka vërejtur tre persona të shtrirë, të lënduar nga arma e zjarrit. Të njëjtit janë dërguar në QMF dhe pastaj në Emergjencës e Spitalit të Pejës”.

“Një person i dyshuar është arrestuar dhe me urdhër të prokurorit të shtetit është dërguar në mbajtje për 48 orë. Në vendin e ngjarjes kanë dalë të gjitha njësitë kompetente për të sqaruar rrethanat e ngjarje, ndërsa janë sekuestruar 1 armë, 1 karikator me 9 fishekë”, tha Gashi.

Presidenti i Shteteve të Bashkuara, Donald Trump, është informuar për një gamë të gjerë opsionesh ushtarake dhe operacioneve të fshehta që mund të përdoren kundër Iranit, kanë bërë të ditur dy zyrtarë të Departamentit të Mbrojtjes për partnerin amerikan të BBC-së, CBS News.

Sipas burimeve, në mesin e skenarëve të paraqitur përfshihen sulme me raketa me rreze të gjatë veprimi, në rast të një ndërhyrjeje të drejtpërdrejtë ushtarake të SHBA-ve. Megjithatë, zyrtarët e Pentagonit kanë shqyrtuar edhe operacione kibernetike, si dhe fushata psikologjike, që synojnë të godasin strukturat drejtuese dhe sistemet e komunikimit të Iranit.

Tensionet janë rritur më tej, pasi Trump njoftoi të hënën vendosjen e një tarife prej 25% ndaj mallrave nga vendet që kanë marrëdhënie tregtare me Iranin. Vendimi vjen në një kohë kur organizatat e të drejtave të njeriut raportojnë se më shumë se 600 protestues janë vrarë gjatë tre javëve të fundit në protestat antiqeveritare në Iran.

Ndërkohë, ministri i Jashtëm iranian ka deklaruar se Teherani është i hapur për bisedime me Uashingtonin, por theksoi se vendi mbetet “i përgatitur për luftë”. Burimet bëjnë të ditur se ekipi i sigurisë kombëtare i Trump pritet të zhvillojë një mbledhje në Shtëpinë e Bardhë, për të diskutuar hapat e mundshëm ndaj Iranit, megjithëse nuk është ende e qartë nëse vetë presidenti do të marrë pjesë.

Më herët, Trump kishte paralajmëruar se ushtria amerikane po shqyrtonte “opsione shumë të forta”, nëse dhuna ndaj protestuesve do të vazhdonte. Ai ka pohuar gjithashtu se udhëheqës iranianë kanë tentuar ta kontaktojnë për të negociuar, por shtoi se SHBA-ja “mund të detyrohet të veprojë përpara çdo takimi”.

Kriza ekonomike në Iran, e shkaktuar nga rrënimi i monedhës kombëtare dhe keqmenaxhimi financiar, ka thelluar pakënaqësinë popullore dhe ka kthyer situatën në një krizë legjitimiteti për Udhëheqësin Suprem, Ajatollah Ali Khamenei. Sipas Shtëpisë së Bardhë, përfaqësues iranianë kanë kontaktuar në mënyrë private edhe emisarin special amerikan, Steve Witkoff, ndërsa mesazhet zyrtare publike të Teheranit mbeten ndryshe nga ato që përcillen në prapaskenë.

Zëdhënësja e Shtëpisë së Bardhë, Karoline Leavitt, paralajmëroi se presidenti Trump “nuk heziton të përdorë forcën ushtarake nëse e sheh të nevojshme”. Burimet theksuan se çdo reagim ushtarak amerikan ka gjasa të mbështetet kryesisht në fuqinë ajrore, por po shqyrtohen edhe mënyra për të paralizuar komandën dhe komunikimet ushtarake iraniane.

Ndërkohë, SHBA-të iu ka bërë thirrje qytetarëve të saj në Iran që të largohen ose të kenë një plan daljeje pa ndihmën e qeverisë amerikane. Nga ana tjetër, Ajatollah Khamenei ka akuzuar SHBA-në për “mashtrim” dhe përdorim të “mercenarëve tradhtarë”, duke lavdëruar mitingjet pro-qeveritare të organizuara së fundmi në disa qytete iraniane.

Sipas mediave shtetërore, turma të mëdha kanë marrë pjesë në këto tubime, ndërsa BBC Persian raporton se qytetarët kanë marrë mesazhe që i ftojnë të marrin pjesë në protestat pro-qeveritare dhe paralajmërohen të mos bashkohen me demonstratat kundër regjimit.

Vendosja e tarifave të reja amerikane mund ta përkeqësojë më tej situatën ekonomike të Iranit, i cili tashmë përballet me inflacion të lartë dhe rritje të çmimeve të ushqimeve deri në 70%. Kina mbetet partneri më i madh tregtar i Iranit, e ndjekur nga Iraku, Emiratet e Bashkuara Arabe, Turqia dhe India.

Kryeministri i Shqipërisë, Edi Rama, ka njoftuar përmes një postimi në rrjetin social “Facebook” nisjen e Samitit të Javës së Zhvillimit të Qëndrueshëm, i cili po zhvillohet në Abu Dhabi.

Sipas Kryeministrit Rama, samiti organizohet nën kujdesin e veçantë të Presidentit të Emirateve të Bashkuara Arabe, Sheikh Mohammed bin Zayed Al Nahyan, të cilin ai e cilësoi si një mik të madh të Shqipërisë.

Ky aktivitet ndërkombëtar mbledh liderë dhe përfaqësues nga vende të ndryshme të botës, me fokus diskutimet dhe angazhimet për zhvillimin e qëndrueshëm dhe të ardhmen globale.

“E pashë me sytë e mi – ata qëlluan drejtpërdrejt në radhët e protestuesve dhe njerëzit ranë aty në vend”.

Zëri i Omidit dridhej ndërsa fliste, i frikësuar se mos gjurmohej.

Thyerja e murit të heshtjes midis Iranit dhe pjesës tjetër të botës kërkon guxim të madh, duke pasur parasysh rrezikun e hakmarrjes nga autoritetet, shkruan BBC, përcjell Telegrafi

Omid, në fillim të të 40-ave, emri i të cilit është ndryshuar për sigurinë e tij, ka protestuar në rrugët e një qyteti të vogël në Iranin jugor gjatë ditëve të fundit kundër përkeqësimit të vështirësive ekonomike.

Ai tha se forcat e sigurisë kishin hapur zjarr ndaj protestuesve të paarmatosur në qytetin e tij me pushkë sulmi në stilin e Kalashnikovit.

“Ne po luftojmë një regjim brutal me duar bosh”, tha ai.

Qeveria e Groenlandës ka deklaruar se “nuk mund ta pranojë në asnjë rrethanë” dëshirën e Donald Trump për të marrë kontrollin e ishullit, ndërsa sekretari i përgjithshëm i NATO-s, Mark Rutte, tha se aleanca po punon për forcimin e sigurisë në Arktik.

Në fillim të një jave vendimtare për ishullin e madh arktik, i cili gëzon vetëqeverisje të gjerë si pjesë e Mbretërisë së Danimarkës, Trump rikonfirmoi interesin e tij për territorin strategjik dhe të pasur me minerale, duke deklaruar se SHBA-ja do ta merrte Groenlandën “në një mënyrë apo në një tjetër”.

Këto deklarata kanë tronditur Bashkimin Evropian dhe NATO-n, pasi Trump nuk përjashtoi përdorimin e forcës ushtarake për të marrë Groenlandën, e cila përfiton nga mbrojtja e aleancës përmes anëtarësimit të Danimarkës.

Ministrja e Jashtme e Groenlandës, Vivian Motzfeldt, dhe homologu i saj danez, Lars Løkke Rasmussen, pritet të takohen të mërkurën në Uashington me sekretarin amerikan të Shtetit, Marco Rubio.

Danimarka ka theksuar se një traktat i vitit 1951 i lejon tashmë SHBA-së të zgjerojë ndjeshëm praninë e saj ushtarake në Groenlandë, por ka nënvizuar vazhdimisht se ishulli “nuk është në shitje” dhe se shpreson në një zgjidhje diplomatike. Në një deklaratë të publikuar të hënën, qeveria e Groenlandës theksoi se ishulli është “pjesë e Mbretërisë së Danimarkës” dhe “si pjesë e bashkësisë daneze, anëtar i NATO-s”. Ajo shtoi se do të rrisë përpjekjet që mbrojtja e territorit të zhvillohet “brenda kuadrit të NATO-s”.

Deklarata nënvizoi gjithashtu se koalicioni qeverisës beson se Groenlanda “do të mbetet përgjithmonë pjesë e aleancës perëndimore të mbrojtjes” dhe se “të gjitha shtetet anëtare të NATO-s, përfshirë SHBA-në, kanë interes të përbashkët” për sigurinë e saj.

Trump ka argumentuar se kontrolli amerikan mbi Groenlandën është i nevojshëm për rritjen e sigurisë në Arktik, përballë asaj që ai e cilëson si kërcënim nga Kina dhe Rusia. Mark Rutte deklaroi të hënën se NATO po punon për “hapat e ardhshëm për të garantuar mbrojtjen kolektive të interesave strategjike” në rajon.

Gjatë një vizite në Kroaci, Rutte tha se të gjithë aleatët bien dakord për rëndësinë e Arktikut, duke paralajmëruar se hapja e rrugëve detare mund të rrisë aktivitetin rus dhe kinez në zonë. Diplomatë të NATO-s kanë bërë të ditur se disa vende anëtare kanë propozuar nisma si një mision i ri në rajon, vendosje shtesë të pajisjeve ushtarake ose stërvitje të përbashkëta, por diskutimet janë ende në fazë të hershme dhe pa plane konkrete.

Sekretari i përgjithshëm i NATO-s nuk iu referua drejtpërdrejt komenteve të Trump për Groenlandën, por përshëndeti diskutimet mes aleatëve për forcimin e bashkëpunimit. Ai shtoi se Danimarka po përshpejton gjithashtu investimet në mbrojtje.

Nga ana tjetër, ministri i Jashtëm gjerman, Johann Wadephul, minimizoi rrezikun që SHBA-ja të ndërmarrë veprime të njëanshme për të marrë Groenlandën. “Nuk kam asnjë tregues se kjo po shqyrtohet seriozisht”, tha ai pas një takimi me Marco Rubio.

Komisioneri evropian për Mbrojtjen, Andrius Kubilius, paralajmëroi se përdorimië e forcës ushtarake nga SHBA-ja kundër Groenlandës do të shënonte “fundin e NATO-s”, duke shtuar se vendet e BE-së do të ishin të detyruara t’i vinin në ndihmë Danimarkës në rast agresioni, sipas klauzolës së ndihmës së ndërsjellë të Traktatit të BE-së.

Ndërkohë, një grup senatorësh amerikanë, përfshirë Lisa Murkowski nga Alaska, e cila ka deklaruar se marrja e Groenlandës “nuk duhet të jetë në agjendën e SHBA-së”, pritet të vizitojë Kopenhagenin për takime me politikanë danezë.

Edhe Kina reagoi ndaj interesit amerikan për Groenlandën. Zëdhënësja e Ministrisë së Jashtme kineze, Mao Ning, deklaroi se Arktiku lidhet me interesat e gjithë komunitetit ndërkombëtar dhe se aktivitetet e Kinës në rajon synojnë paqen, stabilitetin dhe zhvillimin e qëndrueshëm, duke kërkuar respektimin e të drejtave të të gjitha shteteve për veprimtari të ligjshme në Arktik.

Kryeministri Edi Rama ka ndarë një video në rrjetet sociale me rastin e 113-vjetorit të Policisë së Shtetit. Përmes një mesazhi urimi, Rama vlerësoi rolin dhe përkushtimin e këtij institucioni në shërbim të vendit dhe qytetarëve.

“Edhe me 113 vjet Policia e Shtetit, në shërbim të vendit dhe qytetarëve çdo ditë, ju uroj një ditë të mbarë”, shkruan Kryeministri në postimin e tij.

Presidenti amerikan Donald Trump ndodhet përballë një vendimi të vështirë lidhur me situatën në Iran, ndërsa represioni i dhunshëm ndaj protestuesve po merr përmasa gjithnjë e më shqetësuese.

Dhjetë ditë më parë, Trump deklaroi se Shtetet e Bashkuara ishin të gatshme të ndërhynin për të “shpëtuar” protestuesit iranianë, nëse regjimi do të përdorte dhunë. Ai theksoi se SHBA-të ishin “të armatosura dhe gati për veprim”.

Këto deklarata u bënë përpara se vala e dhunës në Iran të përshkallëzohej. Sot, ndërsa dalin detaje tronditëse mbi shtypjen e protestave, vëmendja ndërkombëtare është përqendruar tek reagimi i Uashingtonit.

Zëdhënësja e Shtëpisë së Bardhë, Karoline Leavitt, tha se vetëm presidenti e di se cili do të jetë hapi i radhës. “Bota mund të vazhdojë të presë dhe të hamendësojë,” u shpreh ajo.

Zyrtarë të lartë pritet të informojnë Trumpin të martën mbi skenarët e mundshëm. Duke folur për gazetarët në Air Force One, presidenti konfirmoi se po shqyrton “disa opsione shumë të forta”.

I inkurajuar nga ajo që e cilësoi si sukses në Venezuelë, Trump duket se nuk e përjashton përdorimin e forcës ushtarake. SHBA-të kanë treguar më herët se janë të afta të kryejnë sulme nga distanca, përfshirë misione të bombarduesve stealth B-2 ndaj objekteve strategjike iraniane.

Sipas burimeve të Pentagonit, të cituara nga media amerikane, reagimi i mundshëm mund të përfshijë edhe operacione kibernetike dhe fushata të fshehta psikologjike për të dobësuar strukturat drejtuese të regjimit iranian.

Analistët theksojnë se një skenar i ngjashëm me atë të Karakasit është pak i mundshëm. Pavarësisht goditjeve të fundit, Irani mbetet një regjim i fortë dhe i përgatitur për konflikt. Rrëzimi i një figure të vetme nuk pritet të sjellë ndryshime të menjëhershme.

Trump ka kujtuar gjithashtu dështimin e operacionit amerikan në vitin 1980 për shpëtimin e pengjeve në Iran, duke treguar kujdes ndaj çdo ndërhyrjeje tokësore.

Ekspertët vlerësojnë se qëllimi i Trumpit nuk është domosdoshmërisht rrëzimi i regjimit, por ndryshimi i sjelljes së tij. Kjo mund të përfshijë lëshime në negociatat bërthamore, ndalimin e represionit ose reforma që do të çonin në lehtësimin e sanksioneve.

Administrata amerikane ka konfirmuar se ka pasur kontakte private me përfaqësues të regjimit iranian, ndonëse publikisht Teherani mban një ton më të ashpër. Zyrtarët amerikanë theksojnë se diplomacia mbetet opsioni i parë.

Megjithatë, nëse dhuna ndaj protestuesve vazhdon, diplomacia rrezikon të shihet si dobësi dhe të demoralizojë opozitën brenda vendit.

Një ndërhyrje ushtarake, edhe e kufizuar, mund të inkurajojë protestuesit, por njëkohësisht rrezikon të forcojë regjimin dhe mbështetësit e tij. Irani ka paralajmëruar se do të kundërpërgjigjet ndaj çdo sulmi amerikan dhe zotëron ende një arsenal të konsiderueshëm raketash.

Edhe pse disa aleatë rajonalë të Teheranit janë dobësuar, grupe si Huthit në Jemen dhe milicitë shiite në Irak mbeten aktive.

Mes zërave që kërkojnë ndërhyrje të menjëhershme është edhe Reza Pahlavi, djali i shahut të fundit të Iranit, i cili deklaroi se veprimi i shpejtë do të shpëtonte jetë dhe do të çonte në rrëzimin e regjimit.

Në Shtëpinë e Bardhë, megjithatë, është e qartë se vendimi i Trumpit është shumë më kompleks sesa deklaratat publike. Vendimi pritet të merret së shpejti, ndërsa situata në Iran mbetet e tensionuar.

Dëbora ka zbardhur zonat malore të Elbasanit, si Funari, Gjinari dhe Labinot-Mal, duke i shndërruar ato në një kartolinë dimërore.

Fundjava solli një atmosferë magjike në këto zona, të cilat u vizituan nga shumë qytetarë duke u kthyer në destinacionet më të preferuara këtë muaj të parë të vitit.

Male, pyje dhe liqene të rrethuar nga bora krijojnë një panoramë magjepsëse, ku natyra shfaqet në formën e saj më të bukur dhe më të qetë.

Edhe pse temperaturat kanë rënë dhe reshjet e dëborës kanë qenë të dendura, rrugët drejt Funarit, Gjinarit dhe Labinot-Malit janë të hapura dhe të kalueshme.

Qarkullimi i mjeteve bëhet me zinxhirë dhe goma dimërore, ndërsa autoritetet lokale kanë qenë në terren për të garantuar sigurinë e udhëtarëve dhe mirëmbajtjen e akseve rrugore.

Më të lumturit nga kjo tablo dimërore janë fëmijët, të cilët shijojnë borën me lojërat me topa dëbore.

Familje të shumta kanë zgjedhur këto zona malore për të kaluar fundjavën, larg zhurmës së qytetit, pranë natyrës dhe ajrit të pastër.

Këto zona vijojnë të jenë ndër destinacionet më të frekuentuara turistike të qarkut të Elbasanit, edhe në ditët e ftohta të dimrit.

Investimet e kryera ndër vite nga bashkia Elbasan në infrastrukturë, shërbime dhe promovimin e zonës kanë dhënë rezultatet e tyre, duke i bërë destinacione të aksesueshme dhe të preferuar për vizitorët.

Pavarësisht kushteve të vështira atmosferike, turistë nga qytete të ndryshme kanë mbërritur për të parë nga afër Funarin e mbuluar nga dëbora, liqenet e ngrira pjesërisht dhe qetësinë që vetëm dimri di të sjellë.

Edhe Gjinari, 22 km larg Elbasanit, ishte këtë fundjavë i mbushur me turistë.

Zonat malore nën dëborë, mbeten një thesar i Elbasanit, një destinacion që fton vizitorët t’i zbulojnë në çdo stinë, duke ofruar pamje që lënë gjurmë.

Më 13 janar 2026, moti në vendin tonë pritet të mbetet kryesisht i qëndrueshëm, me alternime kthjellimesh dhe vranësirash mesatare, hera-herës të dendura.

Në orët e mëngjesit dhe të mbrëmjes, zonat luginore mund të përballen me mjegull, e cila mund të ulë dukshmërinë

Era do të fryjë nga drejtimi verilindor–lindor me shpejtësi mesatare rreth 7 metra për sekondë. Deti do të jetë i qetë, me valëzim të forcës 1–2 ballë.

Meteorologët rekomandojnë kujdes gjatë udhëtimeve në zonat me mjegull dhe mbajtje të ngrohtë për orët e mëngjesit dhe mbrëmjes.

Dashi-Sot do të ndiheni të përhumbur dhe plotësisht pa dëshirën për t’u çuar nga shtrati. Kjo do të bëjë që humori të mos jetë i mirë. Merrni kohën e mjaftueshme për t’u menduar dhe nxirrni një përfundim lidhur me telashin në të cilën jeni përfshirë.

Demi-Mos rrini në një vend, bëhuni të zotët e vetes dhe jepini zgjidhje problemeve. Duhet të përballeni me të tjerët dhe t’u tregoni se jeni ende në “lojë”. Mos harroni se është fillim viti dhe duhet të motivoni veten për të ecur përpara.

Binjakët-Ideja se do të keni plane dhe do të jeni pranë familjes ju mban të motivuar. Mezi po prisni të mbyllni punët e fundit. Në biznes gjërat do të ecin sipas planeve. Të gjithë do i keni afër vetes dhe kjo do t’ju stimulojë më shumë për të punuar.

Gaforrja-Do të kërkoni dhe nuk do të lini gurë pa lëvizur derisa të gjeni rehatinë tuaj. Pjesën më të madhe të ditës do e kaloni me miqtë më të afër dhe kjo do ju kënaqë pafund. Sjellja juaj e butë do të bëjë shumë njerëz për vete.

Luani-Sot do t’i kushtoni shumë vëmendje punës tuaj. Edhe pse mendoni se nuk jeni në vendin e duhur për të shfaqur të gjithë talentin tuaj, gaboheni. Shumë shpejt të gjitha do të shpërblehen. Mos u shqetësoni.

Virgjëresha-Një ditë plot meditime dhe momente të bukura do të jetë kjo e sotmja. Do të gjeni paqen brenda vetes tuaj dhe kjo është shumë e rëndësishme. Një takim do bëjë që zemra juaj të rrahë fort.

Peshorja-Kjo nuk do të jetë dita juaj, prandaj bëni kujdes nga ato që do të thoni dhe me njerëzit që do të përballeni. Mos harroni se jo të gjithë njerëzit janë dashamirës dhe duan të mirën tuaj.

Akrepi-Kjo do të jetë dita me më shumë telashe e gjithë javës. Probleme të shumta do të shfaqen drejt jush. Është mirë të ruani qetësinë dhe t’i zgjidhni me kujdes dhe maturi. Nëse nxitoheni do i prishni shumë punë vetes.

Shigjetari-Të gjitha problemet tuaja do të marrin zgjidhje në mënyrë më të mirë të mundshme. Dikush do të bëjë të pamundurën që të dilni nga kjo vorbull në të cilën jeni përfshirë. Një udhëtim do të shfaqet në horizont, mos thoni jo.

Bricjapi-Nëse jeni artist, interpretues, sipërmarrës çështjet e karrierë do të kenë përparësi. Ndërsa përsa i përket çështjeve personale, të tjerët janë duke pritur që ta bëni ju hapin të parët. Mos nguroni të surpizoni partnerin.

Ujori-Do e kaloni ditën duke menduar, por paqja mendore do të jetë shumë e largët. Disa rrethana të pashmangshme do ju detyrojnë të pranoni disa gjëra për të cilat jeni shprehur gjithmonë kundër. Falë përkushtimit ndaj të tjerëve do të kaloni gjithçka me sportivitet.

Peshqit-Kjo e premte do të jetë shumë produktive. Energjia dhe entuziazmi do të jenë me ju përgjatë gjithë ditës për të arritur të gjitha qëllimet tuaja. Takimet me eprorët do të japin rezultatet e pritshme.

Kryeministri Edi Rama ka reaguar përmes një postimi në Facebook lidhur me situatën e krijuar nga reshjet e dëborës në Bashkinë Korçë. Sipas tij, gjatë orëve të fundit reshjet kanë përfshirë të gjithë territorin e bashkisë, të shoqëruara me temperatura të ulëta dhe ngrica.

Rama bën me dije se punonjësit e Bashkisë Korçë kanë qenë në terren që prej orëve të para të mëngjesit, duke kryer kriposjen e të gjitha rrugëve, si në qytet ashtu edhe në njësitë administrative. Ndërhyrje të posaçme janë realizuar edhe në zonat malore, ku janë evidentuar problematikat më të mëdha për shkak të reshjeve të dendura dhe ngricave.

Sipas informacionit të publikuar, qarkullimi rrugor është mbajtur i hapur dhe po monitorohet në mënyrë të vazhdueshme, me qëllim garantimin e sigurisë për qytetarët.

Në përfundim, Bashkia Korçë u bën thirrje banorëve të tregojnë kujdes gjatë lëvizjes, për shkak të temperaturave të ulëta dhe pranisë së ngricave në akset rrugore.

/abcnews.al

Vatikani bëri të ditur se të hënën 12 janar 2026, Papa Leoni XIV ka zhvilluar një takim me lideren e opozitës venezuelane dhe fituesen e Çmimit Nobel për Paqen, Maria Corina Machado, pa dhënë detaje të mëtejshme mbi përmbajtjen e bisedës. Takimi u përfshi në axhendën zyrtare të Papës për ditën e hënë, të publikuar në buletinin e përditshëm të Selisë së Shenjtë, por nuk ishte përmendur në një njoftim të mëparshëm për shtyp lidhur me programin e tij ditor.

Ditët e fundit, pas operacionit që çoi në kapjen e presidentit venezuelan Nicolás Maduro, Papa Leoni XIV ka bërë thirrje që Venezuela të mbetet një vend i pavarur. Në një fjalim të rëndësishëm mbi politikën e jashtme, të mbajtur të premten, Ati i Shenjtë dënoi përdorimin e forcës ushtarake si mjet për arritjen e qëllimeve diplomatike dhe kërkoi respektimin dhe mbrojtjen e të drejtave të njeriut në Venezuelë.

Maria Corina Machado, ish-anëtare e Asamblesë Kombëtare të Venezuelës, ishte përjashtuar nga kandidimi në zgjedhjet e përgjithshme të vitit 2024 nga autoritetet e regjimin e Maduros. Pas këtij vendimi, ajo mbështeti një kandidat alternativ, i cili nga shumë vëzhgues u konsiderua fitues i zgjedhjeve, pavarësisht pretendimit për fitore nga ana e Maduros.

Vizita e Machado-s në Vatikan përkoi me ditën e lirimit të Alberto Trentinit dhe Mario Burlòs, përkatësisht punonjës humanitar nga Veneto dhe sipërmarrës nga Piemonte, të cilët kishin qenë të ndaluar në Venezuelë për 423 ditë. Lajmi për lirimin e tyre u konfirmua në orët e paradites nga zëvendëskryeministri dhe ministri i Jashtëm italian, Antonio Tajani.

Ndërkohë, liderja e opozitës venezuelane pritet të zhvillojë një takim «të martën ose të mërkurën» me presidentin e Shteteve të Bashkuara, Donald Trump. Lajmi u bë i ditur nga vetë presidenti amerikan, i cili megjithatë ka deklaruar se “përjashton mundësinë që Machado të ketë një rol udhëheqës në Venezuelë”.

Takimi i Machado-s me Papën dhe kontaktet e saj në Shtetet e Bashkuara vijnë në një moment delikat për Venezuelën, e cila po përballet me tensione të thella politike, ndërkombëtare dhe institucionale, ndërsa komuniteti ndërkombëtar po ndjek me vëmendje zhvillimet në vend.

Ulja e taksës së rivlerësimit të pronës nga 15% në 5% pritet të rrisë ndjeshëm interesin e qytetarëve për këtë proces deri më 31 dhjetor 2026.

E ftuar në emisionin “Money Report” në ABC News, agjentja imobiliare Ester Subashi sqaroi se ligji ka karakter fiskal dhe administrativ, pa ndikim të drejtpërdrejtë në tregun imobiliar, ndërsa theksoi se nuk priten rritje të çmimeve në zonat elitare, por një stabilitet i përgjithshëm dhe rritje graduale në zonat në zhvillim, si Paskuqani dhe Farka.

Interesi kryesor për rivlerësimin, sipas saj, mbetet kryesisht në kryeqytet dhe në zonat bregdetare, me synimin që pronat të reflektojnë vlerën reale të tregut.

“Nga 15% do të jetë i reduktuar në 5%. Nuk përcaktohet një numër i caktuar pronash, por çdo qytetar dhe pronar i ndonjë subjekti mund të përfitojë deri në 31 dhjetor 2026. Qytetarët paraqesin vlerësimin e pronës në Kadastër dhe më pas jepet rivlerësimi i pronës. Interesi këtë vit për kryerjen e rivlerësimit do të jetë i lartë, duke qenë se ka pasur një kohë të gjatë që nuk është aplikuar.

Do të kemi prona me vlerë reale në treg. Ligji ka karakter fiskal dhe administrativ, jo ndikim në treg. Nuk mendoj se do të ketë një rritje të çmimeve, vetëm do të ketë një stabilitet. Nuk do të ketë një rritje çmimesh në zonat e zhvilluara, kurse në zonat më pak të zhvilluara do ketë një rritje graduale. Zonat më të ndikuara do jenë zona e Paskuqanit dhe Farkës, duke qenë se janë në një zhvillim graduar. Kurse zonat elitare nuk pritet që të ketë një rritje të çmimeve. Më shumë e përqendruar është në kryeqytet, por edhe në zonat e bregdetit”, tha Subashi.

Nikolin Marku dhe Gjergj Marku kanë mbërritur të plagosur në spitalin e Lezhës dhe pas ndihmës së parë kane bërë kallëzim në policinë e Lezhës ku kanë deklaruar se janë konfliktuar tek një lokal me Gëzim Nokën (vëllain e ish deputetit Arben Ndoka) dhe djalin e tij dhe këta të fundit kanë qenë të armatosur dhe i kanë goditur me qyte pistolete.

Sipas dëshmisë konflikti ishte i momentit por kanë patur edhe me herët konflikt me ta dhe sot agrovoi. Për këtë arsye janë shpallur në kërkim babe e bir dhe janë kryer kontrolle në banesën e tyre./abcnews.al

Ministri i Jashtëm i Iranit, Abbas Araghchi, ka deklaruar se protestat e përhapura në mbarë vendin janë kthyer qëllimisht në të dhunshme dhe të përgjakshme për t’i dhënë Shteteve të Bashkuara një justifikim për ndërhyrje ushtarake.

Gjatë një takimi me diplomatë të huaj në Teheran, Araghchi tha se dhuna u intensifikua gjatë fundjavës, por theksoi se “situata tani është plotësisht nën kontroll”.

Sipas tij, paralajmërimet e presidentit amerikan Donald Trump për ndërhyrje ushtarake në rast se protestat do të përshkallëzoheshin në dhunë, kanë nxitur grupe që ai i cilësoi si “terroriste” të sulmojnë protestuesit dhe forcat e sigurisë për të provokuar ndërhyrje të huaj.

“Ne jemi të përgatitur për luftë, por edhe për dialog”, u shpreh Araghchi.

Ai shtoi se autoritetet iraniane disponojnë pamje filmike që tregojnë shpërndarjen e armëve te protestuesit dhe se së shpejti do të publikohen rrëfimet e personave të ndaluar. Ministri theksoi se autoritetet po ndjekin nga afër zhvillimet në terren dhe se protestat janë “të nxitura dhe të financuara nga elementë të huaj”.

Sipas Araghchi-t, forcat e sigurisë do të identifikojnë dhe ndëshkojnë personat përgjegjës për aktet e dhunës.

Ai konfirmoi gjithashtu se qeveria ka shpallur ditë zie kombëtare për viktimat e rëna gjatë protestave, përfshirë edhe pjesëtarë të forcave të sigurisë.

Duke iu referuar bllokimit të internetit në mbarë vendin, Araghchi tha se lidhja do të rikthehet së shpejti dhe se qeveria po koordinon hapat me strukturat e sigurisë, duke shtuar se shërbimi do të rikthehet edhe për ambasadat dhe institucionet shtetërore.

Protestat e shpërthyera në Iran, të cilat deri më tani kanë shkaktuar rreth 500 viktima, kanë në thelb krizat e thella ekonomike dhe pakënaqësinë sociale, por po shndërrohen gjithnjë e më shumë në një përplasje të fortë mes shoqërisë dhe regjimit fetar.

Kështu u shpreh eksperti i marrëdhënieve ndërkombëtare, Endri Tafani, i ftuar në “News Line” në ABC News, duke theksuar se reagimi i ashpër i qeverisë iraniane, mbyllja e internetit dhe dhuna ndaj protestuesve tregojnë frikën e regjimit nga përhapja masive e revoltës, ndërsa ndërhyrja e jashtme mbetet e pamundur për shkak të interesave gjeopolitike dhe pozitës strategjike të Iranit.

“Protestat janë për shkak të ekonomisë së ulët. Janë shumë faktorë që çuan në një protestë që si fillim në tregjet tregtare dhe më pas shpërthyen në nivel kombëtar. Kur protestat u bënë masive, pati edhe një reagim të ashpër nga qeveria, ku u mbyll interneti për të mos pasur shumë komunikim, dhe u vranë në mënyrë masive shumë protestuese. E vetmja gjë që mund të ndihmojë protestuesit iranianë, është ndërhyrja e jashtme, por që zor se mund të vijë. Trump heziton për shumë arsye.

Irani konsiderohet si aleat i ngushtë, edhe sot e kësaj dite furnizon Rusinë më mjete ushtarake dhe furnizon Kinën me naftë. Është i lidhur me interesa ekonomikë, por edhe gjeopolitikë. Iran nuk mund të futesh me trupa ajrorë. Ideja i territorit dhe popullsisë së madhe bën të pamundur një fushatë me trupa tokësore, e vetmja është ndërhyrja ajrore. Megjithatë duhet parë se sa efekt do të ketë, pasi kemi të bëjmë me një vend diktatorial fetar. Duhet kuptuar që Irani është një komb që ka një kulturë shumë të lashtë. Ka një element kulturore dhe trashëgimie kulturore të kombit iranian që është shumë e fortë që të asimilohet nga feja.

Kjo ka bërë që në Iran, feja të përdoret për të justifikuar dhunën dhe diktaturën, ka bërë që të ketë një neveritje ndaj fesë. Në këto protesta kemi pasur djegie të xhamisë, ka pasur edhe mbyllje të xhamive për shkak të braktisjes së fesë nga të rinjtë. Kjo ka bërë që në Iran të ketë këtë përplasje mes qeverisë që përdor fenë për të justifikuar veprimet e saj. Protestuesit mund të arrijnë një zbutje të regjimit për kërkesat ekonomike, por jo ato politike”, tha eksperti./abcnews.al