Presidenti i Partisë së Lirisë, Ilir Meta, nuk arriti të siguronte votat e nevojshme për të qenë pjesë e parlamentit të ardhshëm.

Meta garonte nën siglën e koalicionit ‘Për Shqipërinë Madhështore’ të udhëhequr nga PD dhe Sali Berisha dhe ndodhej në listën e hapur të Tiranës.

Me anë të një postimi në Facebook, nga burgu, Meta falenderon ata qytetarë që votuan për të më 11 maj, ndërsa fushatë e konsideron të pabarabartë.

Për Ilir Metën standardet e zgjedhjeve, demokracia dhe shteti i së drejtës u cënuan.

Meta u distancua qartë nga çdo tentativë për të marrë mandat parlamentar përmes dorëheqjeve të kandidatëve në listën e Partisë së Lirisë në Qarkun Tiranë, duke deklaruar se një veprim i tillë do të binte ndesh me parimet dhe bindjet e tij të vazhdueshme për përfaqësim të ndershëm.

“Dua t’i siguroj të gjithë se Ilir Metaj që nga viti 2008, që kur u bënë ndryshimet e mbrapshta kushtetuese, ka luftuar për përfaqësim vetëm nëpërmjet vullnetit të lirë dhe të hapur të qytetarëve, në mënyrë të vazhdueshme dhe parimore, sepse kjo është çështje e bindjes dhe karakterit tim dhe si pasojë nuk mund të pranoj asnjë marifet apo zgjidhje pragmatiste që shkon në kundërshtim me kauzat madhore për cilat unë kam luftuar dhe do luftoj gjithmonë”, tha Presidenti i PL-së.

Reagimi i Ilir Metës: 

Së pari falenderoj rreth 8 mijë zgjedhës që votuan për Ilir Metaj, të cilët i rezistuan presioneve të jashtëzakonshme të Narkoshtetit dhe nuk e shitën as lirinë, as shpirtin dhe as karakterin e tyre përballë një makinerie kriminale shtetërore, që cënoi rëndë standardet e zgjedhjeve, demokracinë dhe shtetin e së drejtës në themel të tij.

Për mua ata nuk janë votues por heronj dhe do të gëzojnë përjetë të gjithë mirënjohjen time të pakufijshme.

Disa zëra dashamirës, por edhe të tjerë djallëzorë, sugjerojnë si mënyrë për marrjen e mandatit tim parlamentar, dorëheqjen e kandidatëve të Partisë së Lirisë në listën e mbyllur të Qarkut Tiranë.

Dua t’i siguroj të gjithë se Ilir Metaj që nga viti 2008, që kur u bënë ndryshimet e mbrapshta kushtetuese, ka luftuar për përfaqësim vetëm nëpërmjet vullnetit të lirë dhe të hapur të qytetarëve, në mënyrë të vazhdueshme dhe parimore, sepse kjo është çështje e bindjes dhe karakterit tim dhe si pasojë nuk mund të pranoj asnjë marifet apo zgjidhje pragmatiste që shkon në kundërshtim me kauzat madhore për cilat unë kam luftuar dhe do luftoj gjithmonë.

Dëshiroj të falenderoj dhe vlerësoj Tedi Blushi , dhe kolegët e tjerë në Partinë e Lirisë të cilët luftuan me përkushtim në këtë fushatë të pabarabartë përballë Narkoshtetit dhe makinerisë së tij zgjedhore kriminale, pabesive dhe thikave pas shpine.

Një falenderim të veçantë edhe për të gjithë ata komisionerë, numërues dhe vëzhgues, të cilët po vazhdojnë me këmbëngulje dhe përgjegjësi të lartë të numërojnë dhe të mbrojnë çdo votë deri në votën e fundit.

The post Nuk mori mandatin e deputetit, Ilir Meta reagon nga burgu appeared first on Lapsi.al.

Disa deputetë me karrierë të gjatë parlamentare dhe funksionarë të lartë politikë nuk morën votëbesimin e qytetarëve më 11 maj. Vendin e tyre pritet ta zënë figura të reja, të rinj në moshë dhe pa përvojë të mëparshme politike.

Po kush janë veteranët e politikës shqiptare që mbeten jashtë Parlamentit dhe do t’u duhet të dorëzojnë çelësat e zyrave?

Në qarkun e Tiranës, nga radhët e Partisë Socialiste, jashtë mbeten: Olta Xhaçka, Blerina Gjylameti, Plarent Ndreca, Mimi Kodheli, Pandeli Majko, Ermonela Felaj dhe Klotilda Bushka.

Nga aleanca “PD – Shqipëria Madhështore”, nuk u rizgjodhën: ish-presidenti Ilir Meta, Asllan Dogjani, Myslim Murrizi, Petrit Doda, Dhurata Çupi dhe Shpëtim Idrizi.

Ndërkohë, në Kuvend hyjnë emra të rinj dhe ende të panjohur për publikun, si Sara Mila në Elbasan – kandidatja me më shumë vota në rang kombëtar, Zegjine Çaushi në Fier dhe Marjana Koçeku në Shkodër, e njohur si “Neomalsorja” në rrjetet sociale, kandidate e PS-së në listë të mbyllur.

Emrat që për vite me radhë “ngrinin kartonin” në seancat plenare, sot mbeten jashtë loje, ndërsa një brez i ri hyn në skenën politike me premtimin për të ndryshuar rregullat e saj. 

The post Nga Majko, Meta, Xhaçka e Kodheli, kush mbetet jashtë kuvendit nga “garda” e vjetër appeared first on Lapsi.al.

Nga Dorian Kodra

Ideja e një fronti të madh opozitar, që duhej t’i linte mënjanë inatet e vogla dhe ndarjet ideologjike për të shpëtuar demokracinë, është artikuluar vazhdimisht nga analisti Fatos Lubonja, i cili tek qeverisja e Edi Ramës ka parë prej vitesh rrugëtimin drejt autokracië, që ai e quan herë “putinizëm” e herë “tirani e mazhorancës”, apo “narkoshtet”.

Si shembull se si duhet rrëzuar modeli qeverisës i Edi Ramës, Lubonja përshkruante atë që ndodhi në Izrael pak kohë më parë, ku e gjithë opozita, presidenti, shoqëria civile u bashkuan dhe dolën në shesh bashkë me sindikatat drejt një greve të përgjithshme për ta ndaluar kapjen e drejtësisë nga Netanjahu.

“Teza ime është që nuk fiton dot kushdo qoftë, kur janë kapur të gjitha institucionet. Atëherë duhen bashkuar të gjitha forcat. Unë u kam bërë thirrje të gjithëve nëpërmjet shembullit izraelit” shprehej ai para 11 Majit.

Por propozimi i Lubonjës ra në vesh të shurdhër dhe u refuzua nga elementët opozitarë, jo vetëm për shkak të paaftësisë për t’i tejkalur inatet e vogla, por edhe sepse askush prej tyre nuk arriti t’i kuptojë përmasat e partisë-shtet që kishin përballë. Pretendimet kundër një bashkimi të madh opozitar ishte se një aleancë me dyshen Berisha-Meta njollos njësoj, pra është po aq mëkatare në thelb, sa edhe flirti me sistemin e korruptuar dhe klientelist të Edi Ramës.

Nga shenja e barazimit që politikanët e rinj vendosën mes Ramës dhe Berishës, analisti Fatos Lubonja i përmblodhi këta me termin “të baraslarguarit”.

“Një pjesë nga këta nuk e quan as regjim, nga këta të baraslarguarit. Duket sikur jemi vend normal, në një vend që vetëm se është Berisha dhe Meta të pabesueshëm për shkak të së kaluarës së tyre (dhe këtu ka për të folur sa të duash), nuk fiton opozita, se përndryshe mund të fitojë” shprehej Lubonja.

Lubonja e pati parashikuar humbjen dërrmuese të opozitës në 11 Maj, jo si problem të brendshëm përfaqësimi të opozitës, por si pamundësi e rrëzimit të një regjimi si ky i Ramës me mjetet normale që ofron një demokraci.

“Me identitetet e tyre këto forca të reja që janë kundër regjimit duhet të shkojnë në këtë front dhe nesër të bëjnë debat me Berishën, t’i vënë kushte Berishës. Këta as nuk mendojnë të shkojnë tek Berisha sepse të baraslarguarit thonë që edhe Berisha është njësoj dhe duhet përjashtuar nga politika. Ky është problemi” ngulmonte Lubonja para zgjedhjeve.

“Të baraslarguarit” u paralajmëruan se i priste përpara një katastrofë elektorale dhe ashtu ndodhi. Partitë e reja të opozitës, jo vetëm refuzuan të bashkohen me koalicionin Berisha-Meta, por hodhën poshtë edhe një mundësi bashkëpunimi mes tyre.

PS me shifrat/ Më pak vota se 2021, por më shumë mandate në parlament

Për pasojë, në 11 Maji thuajse të gjithë “dogjën” një numër shumë të madh votash, që iu besua nga mbështetësit e tyre.

Dyshja Shabani-Lapaj që shohin njësoj të keqen, si tek Berisha edhe tek Rama, morën vetëm 1 deputet në Tiranë megjithëse në të gjithë Shqipërinë kanë 49 mijë e 393 vota, pa llogaritur mbështetjen në diasporë.

Agron Shehaj, që refuzoi ftesën e PD dhe Lapajt për koalicion, arriti të marrë vetëm 2 deputetë në Tiranë megjithëse në rang vendi iu besuan 43 mijë e 25 vota. (numërimi i diasporës ende nuk ka përfunduar).

Arlind Qori, si dogmatik i pakompromis që përjashtonte çdo mundësi bashkëpunimi me të tjerë, me vështirësi mori një deputet në Tiranë, ndërsa në të gjithë vendin iu besuan 20 mijë e 264 vota.

Dashamir Shehi dhe Enkelejd Alibeaj dështuan dhe nuk morën asnjë deputet dhe në të gjithë vendin arriten tek 5 mijë e 533 vota, më pak se Lulzim Basha që në të gjithë vendin mori gati 19 mijë e 461 vota.

Edi i Katërt drejt parlamentit me mbi 80 mandate

Votat e opozitarëve që refuzuan koalicionin e madh

Lapaj – 49 mije e 393

Shehaj- 43 mijë e 25 vota

Qori – 20 mije e 264

Shehi- 5 mije e 533 vota

Lulzim Basha KEA – 19 mije e 461

Nëse të gjitha partitë e reja, ata që Lubonja i quante “të baraslarguarit” të paktën do bëheshin bashkë, do të kishin mbledhur 138 mijë vota në rang kombëtar dhe me gjasë në disa qarqe do të kishin disa deputetë më shumë.

Por çfarë do të ndodhte nëse shkohej më tej; nëse realizohej ideja e një fronti të përbashkët opozitar edhe me Berishën, edhe me Metën, me Lapajn, Shabanin, Shehajn, Qorin, Bashën, Dash Shehin etj?

Edhe atëherë për opozitën situata do të ishte humbëse, pasi gjithsej opozita do të kishte mbledhur 630 mijë vota brenda vendit, thënë ndryshe gati 100 mijë vota më pak se Edi Rama, që arriti rreth 730 mijë vota.

Raporti i OSBE-ODIHR/ Mediat në Shqipëri, bashkëpuntoret e pushtetit

Në përfundim, matematika duket sikur e rrëzon tezën e Lubonjës, sipas të cilit bashkimi në një front të madh opozitar mund ta rrëzojë Edi Ramën. Në fakt rezultati e përforcon teorinë e tij për një arsye të thjeshtë; edhe duke lënë mënjanë inatet e vjetra, ambiciet meskine apo sofizmat ideologjike, jemi në situatën kur Edi Rama e ka deformuar aq keq sistemin, duke kapur gjyqësorin, mediat, policinë, bashkëpunimin me krimin dhe ka bashkuar patronazhimin me shërbimet publike, sa që është thuajse e pamundur të rrëzohet me votë./Lapsi.al

The post Sa vota dogjën të “baraslarguarit” që refuzuan tezën e Lubonjës për bashkim appeared first on Lapsi.al.

Kreu i Partisë Demokratike Sali Berisha komentoi rezultatin e zgjedhjeve në Tiranë, ku deri tani Ilir Meta, që garoi në listë të hapur nuk arrin ta marrë mandatin e deputetit.

Berisha tha se Metës iu bë lufta më e egër politike nga armiku më i madh i votës së lirë që është Edi Rama dhe ky rezultat është pasojë e terrorit politik ndaj tij

“Atij i bëhet lufta më e egër që i është një njeriu ndonjëherë nga armiku kryesor i votës së lirë. Si është kjo, mbahet në burg që të fitojë? Kjo dëshmon efektin e terrorit politik ndaj tij”, tha Berisha.

The post Ilir Meta pa mandat, Berisha: Efekt i terrorit politik ndaj tij appeared first on Lapsi.al.

Një zyrë elektorale e padeklaruar e Partisë Socialiste është zbuluar nga grupi i xhirimit të Syri TV në rrugën Marko Boçari në Tiranë. Zyra nuk kishte asnjë logo, nuk figuron e regjistruar në KQZ dhe ndodhet brenda një rrezeje prej më pak se 150 metrash nga një qendër votimi, gjë që përbën shkelje ligjore.

Sapo kanë parë kamerat, personat brenda zyrës – të cilët identifikohen si patronazhistë dhe funksionarë publikë – janë larguar me nxitim. Gazetarja Ambrozia Meta ka filmuar momentin kur ata dalin me vrap, ndërsa më pas ka pasur një përplasje verbale me deputetin socialist Erjon Braçe, i cili u kthye në zyrën që ndërkohë ishte boshatisur. VIDEO KËTU

Braçe, i cili është kandidat në listë të hapur për PS-në në këtë zonë, deklaroi se nuk njihte asnjërin prej personave që po punonin në emër të tij. Ngjarja ka alarmuar opozitën, ndërsa kandidatë të PD-së dhe policia kanë rrethuar zyrën e dyshimtë, duke kërkuar ndërhyrje ligjore për shkeljen e rregullave të fushatës.

The post (VIDEO) Patronazhistët ja fusin vrapit, Braçe përplaset me gazetaren appeared first on Lapsi.al.

Presidenti i PL dhe kandidanti për deputet i PD-ASHM, Ilir Meta, përmes një postimi në rrjetin e tij social Facebook, u bëri thirrje shqiptarëve të mblidhen ne mbylljen e fushtatës elektorale në Tiranë dhe të marrin pjesë masivisht në votimet e 11 majit.

Meta u kërkoi qytetarëve, që me votën e tyre, t të ndëshkojnë mashtrimet e përindëshme të Ramës dhe të Rilindasve.

Postimi i plotë:

Në 11 Maj do të ndëshkohen me votën masive të qytetarëve mashtrimet e përbindshme të Ramës dhe rilindasve.

Këto mashtrime larguan 1 milionë shqiptarë, i lanë shqiptarët vetëm edhe përballë Covidit dhe i vodhën pa meshirë.

Mos i harroni mashtrimet e tyre dhe dërrmojini me votën tuaj plebishitare.

The post Meta: Më 11 Maj, qytetarët ndëshkojnë mashtrimet e Ramës appeared first on Lapsi.al.

Nga qelia ku ndodhet në arrest, Ilir Meta, ish-President dhe kandidat në listat e hapura të opozitës për zgjedhjet e 11 majit, ka reaguar ashpër ndaj situatës në burgjet shqiptare, duke e quajtur regjimin aktual “një shtet që ndëshkon pa gjykuar”.

“Në Shqipëri, gati 2/3 e të burgosurve janë të paraburgosur dhe mbi 1/3 e tyre pa asnjë akuzë. Paraburgimi është kthyer në një dënim pa proces gjyqësor, duke shkelur çdo standard europian”, deklaron Meta.

Ai e quan këtë një “regjim policor” të Edi Ramës dhe premton se pas 11 majit, opozita do të rishikojë Kodin Penal dhe do të garantojë hetime në liri për rastet e pajustifikuara. “Në burg do të përfundojnë më në fund kriminelët elektoralë, jo qytetarët e zakonshëm pa akuzë”, thotë ai.

Ministri famoz i Drejtësisë, ai i “Dosjes 184”, të krimeve elektorale të Dibrës, i cili duhet të ishte sot në qeli, duke vuajtur dënimin e tij për krimin elektoral që tronditi edhe mediat europiane, Bundestagun dhe Parlamentin Europian dhe që bllokoi për vite të tëra integrimin. Por ai ishte dje në emision, duke mashtruar publikisht për situatën dramatike në burgjet shqiptare, ku abuzimi me paraburgimin ua kalon edhe vendeve më diktatoriale afrikane.

Gati 2/3 e qytetarëve, që janë sot në burgje, janë të paraburgosur dhe mbi 1/3 e tyre pa asnjë akuzë. Nëse mesatarja në vendet e Bashkimit Europian, është 22–25% e totalit të popullsisë në burgje, në Shqipëri, kjo mesatare është gati 3 herë më e lartë, duke sjellë një mbipopullim të theksuar dhe kushte skandaloze.
Numri ekstremisht i lartë i të paraburgosurve, është një nga treguesit më demaskues të regjimit policor dhe arbitrar të Edi Ramës, që s’ka asnjë lidhje me shtetin e së drejtës dhe standardeve europianë të drejtësisë.
Ky numër kaq i lartë i të paraburgosurve në Shqipëri, dëshmon abuzimin e hapur me paraburgimin, që përdoret si mjet penal përpara se të ketë vendim gjykate, gjë që e bën inekzistent parimin e pafajësisë deri sa të provohet faji.

Kjo sjell zvarritje pa fund të proceseve gjyqësore dhe këtu, për fat të keq ka njerëz, që janë marrë në pyetje vetëm një herë, gjatë dy viteve paraburgim dhe pa asnjë akuzë. Ndaj, jo vetëm “Amnesty International”, por edhe Këshilli i Europës edhe Komiteti për Parandalimin e Torturës, e kanë kritikuar vazhdimisht Shqipërinë, për situatën e rëndë në burgje, për mungesën e transparencës së trajtimit të ankesave të të burgosurve, për mungesën e stafit mjekësor dhe terapeutik, që ka çuar deri në kushte të trajtimit çnjerëzor për qindra të paraburgosur me probleme shëndetësore.

Vetëm duke votuar për “Aleancën për Shqipërinë Madhështore”, Shqipëria do të përmbushi standardet europiane të të drejtave të njeriut dhe do të garantojë një sistem të drejtë dhe human të drejtësisë penale.
Si mund të shqetësohet për të drejtat e njeriut në burgje, një Kryeministër, që 12 vite më parë premtoi shëndetësi falas , ndërsa tani edhe “Amnesty International” , siç u detyrua ditët e fundit, theksoi trajtimin çnjerëzor të qytetarëve të lirë, siç e dinë të gjithë dhe të sëmurë, jo vetëm tek Onkologjiku.

Statistikat skandaloze me mijëra të paraburgosur, ku mbi një mijë prej tyre nuk kanë akuzë, nuk e fshehin faktin se qëllimisht janë lëshuar fletë-arrest fiktive, ndërkohë që duhet të ishin ndaluar prej kohësh për kriminelë elektoralë të provuar nga përgjimet ndërkombëtare, të cilët sot veprojnë për llogari të Edi Ramës, në Elbasan, në Durrës, në Lezhë, në Shkodër dhe në zona të tjera.

Por më 11 Maj, ata të gjithë do të marrin përgjigjen e merituar, ne do të rishikojmë Kodin Penal, në përputhje me standardet europiane dhe qindra të paraburgosur, do të hetohen në liri. Nuk do ketë më zvarritje të proceseve hetimore dhe gjyqësore.

Ndërkohë në burgje, me prioritet, do të vijnë kriminelët elektoralë , që nga ata të dosjes që fle të Dibrës dhe deri te këta të zgjedhjeve të 11 Majit.

The post Ilir Meta nga burgu: Në Shqipëri paraburgimi është kthyer në dënim pa gjyq! appeared first on Lapsi.al.

Në një mesazh audio nga burgu, drejtuar anëtarëve dhe simpatizantëve të Partisë së Lirisë, Ilir Meta ku ka renditur një sërë arsyesh përse nuk duhet votuar qeveria e Edi Ramës sipas tij.

Meta ka denoncuar situatën aktuale të vendit, duke akuzuar qeverinë për korrupsion të organizuar dhe lidhje nepotike, që sipas tij, kanë sjellë një grumbullim të taksave të larta dhe të ardhurave të ulëta për shqiptarët.

“Jemi vendi me taksat më të larta në të gjithë rajonin, por edhe me të ardhurat  më të ulëta, e shkak për këtë është vetëm korrupsioni i organizatës të Edi Ramës dhe  mbi 400 lidhje nepotike në sistemin e tatimeve dhe të doganave që janë sot”, u shpreh ai.

Meta theksoi se programi i Partisë së Lirisë, i integruar në “Aleancën për Shqipërinë Madhështore”, është një plan gjithëpërfshirës që do të ofrojë mundësi për çdo familje shqiptare, duke i ndihmuar ato të dalin nga varfëria ekstreme brenda 100 ditëve të para.

“Programi ynë është i mirëintegruar në programin e “Aleancës për Shqipërinë Madhështor”, i cili është edhe më i plotë dhe që i jep zgjidhje të shpejtë çdo familje shqiptare për të dalë nga varfëria ekstreme brenda 100 ditëve të para.

Është programi i çlirimit nga super-taksat e regjimit, që do të sjellë një liri tjetër ekonomike dhe konkurrencë zhvilluese. Është programi që mbështet shndërrimin e Shqipërisë në fuqi prodhuese dhe eksportuese, duke hedhur në koshin e plehërave modelin çnjerëzor të Narkoekonomisë, ku përfitojnë vetëm disa dhe vuajnë shumica”, tha ai.

Në prag të zgjedhjeve të 11 Majit, Meta apeloi te qytetarët të votojnë për një Shqipëri që është fuqi eksportuese dhe një qendër investimesh në teknologji, duke kundërshtuar projektin e “Ballkanit të Hapur”, i cili, sipas tij, ka çuar në falimentimin e shumë bizneseve shqiptare.

“Shqiptarët, me mençuri, do të votojnë për familjet e tyre, do të votojnë për interesin e tyre, do të votojnë për Shqipërinë Madhështore, do të votojnë për mbështetjen e prodhimeve të tyre, kundër “Ballkanit të Hapur”, që i falimentoi”, tha Meta.

Në përfundim, Meta kërkoi mbështetje për një fitore të sigurt në zgjedhjet e ardhshme, duke theksuar se 11 Maji do të jetë një ditë historike, kur shqiptarët do të ndahen njëherë e mirë me “Narkoregjimin” dhe do të përqafojnë Shqipërinë Madhështore.

“Edhe 2 javë drejt ditës historike të ndarjes me Narkoregjimin e instaluar nga kukulla e Sorosit, që në dëshpërim të thellë nga disfata që e pret, sillet në mënyrë të papërgjegjshme, duke keqpërdorur fëmijët dhe duke i ftuar ata të shohin lakuriqësinë e tij”, përfundoi kreu i PL.

The post Meta lëshon një tjetër audio-mesazh nga qelia appeared first on Lapsi.al.

Autoritetet e Singaporit i kanë urdhëruar Metës, pronarit të Facebook-ut, të bllokojë aksesin në postime të caktuara nga të huajt për përdoruesit e Singaporit, duke përmendur rregullat e reja zgjedhore që u ndalojnë të huajve të ndërhyjnë në politikën lokale përmes mediave sociale.

Autoriteti i Mediave të Informacionit dhe Komunikimit e ka lëshuar urdhrin pasi njoftimet e të huajve të caktuar janë vlerësuar si përpjekje për të ndikuar në suksesin zgjedhor të partive politike apo kandidatëve, njoftoi Ministria e Punëve të Brendshme dhe Komisioni Zgjedhor i Singaporit, raporton Reuters.

Zgjedhjet e ardhshme më 3 maj do të jenë të parat që do të mbahen sipas rregullave të reja të miratuara në 2023 dhe pritet të fitohen sërish nga Partia e Veprimit Popullor (PAP), e cila ka qenë në pushtet që nga pavarësia në 1965.

Të huajt, postimet e të cilëve janë ndaluar përfshijnë Iskandar Abdul Samad, arkëtar i partisë islamike malajziane PAS, Mohamed Sukri Omar, udhëheqës i të rinjve PAS nga shteti Selangor dhe përdoruesi i Facebook “Zai Nal”, i identifikuar si Zulfikar bin Mohamad Sharif, një shtetas australian që hoqi dorë nga shtetësia e tij Singapore në 202.

Në postim, Iskandar shprehu mbështetje për kandidatin e opozitës Faisal Manap të Partisë së Punëtorëve, ndërsa Zulfikar akuzoi deputetët malajzo-myslimanë në Singapor se nuk përfaqësojnë interesat e myslimanëve.

Sukri ka shpërndarë postimin e tij. Autoritetet vlerësuan se këto përmbajtje paraqesin një përpjekje për të ndikuar tek votuesit në bazë të përkatësisë fetare dhe etnike.

Në përgjigje të një kërkese për të hequr postimet, Zulfikar tha se kjo tregon frikën e qeverisë dhe njoftoi nisjen e një kanali “Vocap” (WhatsApp) dhe një faqe interneti të re për të mbrojtur më tej pikëpamjet e tij.
Partia e Punës njoftoi sot se nuk ka kontroll mbi postet e të huajve dhe theksoi se kandidati i saj Faisal mbron ndarjen e fesë nga politika.

The post Singapori urdhëron META-n të bllokojë postimet e huaja përpara zgjedhjeve appeared first on Lapsi.al.

Presidenti i Partisë së Lirisë, Ilir Meta, ka shpërndarë një postim në Facebook, duke kritikuar ashpër qeverinë e Edi Ramës për gjendjen e rëndë të arsimit në Shqipëri, të cilin e cilëson si “narkoqeverisje”. Meta theksoi se arsimi shqiptar po përjeton një krizë të thellë, duke u përpjekur të mbajë pushtetin përmes shtimit të analfabetizmit dhe injorancës mes rinisë.

Ai theksoi se analfabetizmi është rritur në mënyrë dramatike, dhe se qeveria e Ramës ka lënë pas premtimet për buxhetimin e arsimit. Buxheti për arsimin, tha Meta, është mbetur në 2.4%, niveli më i ulët në rajon. Në këtë kontekst, mësuesit janë të keqpaguar dhe shkollat po braktisen nga nxënësit, ndërsa edukimi i brezit të ri është bërë një fushë e nënvlerësuar dhe e nënshtruar.

Meta shprehu shqetësimin për mbylljen e shkollave në zona të ndryshme dhe mësimin me turne në Tiranë. Ai theksoi gjithashtu nevojën për mbështetje të kërkimit shkencor dhe zhvillimin e talentëve.

Në programin e tij dhe të koalicionit “PD-ASHM”, Meta paraqiti disa masa për të reformuar arsimin në Shqipëri:

-Rritja e pagave të mësuesve në 1500 euro dhe të pedagogëve në 2000 euro.

-Reduktimi i numrit të nxënësve në klasa nga 40 në 25.

-Dixhitalizimi i sistemit arsimor dhe financimi i inovacionit mbi mesataren e BE-së.

-Mbështetje e fortë për arsimin profesional dhe shkencën, me reforma të thella në kurrikula dhe mbështetje financiare për bizneset start-up.

-Implementimi i sistemit të kateringut për fëmijët në kopshte dhe shkolla, sipas modelit europian.

Meta apeloi për mbështetje për koalicionin “PD – Aleanca për Shqipërinë Madhështore”, duke e quajtur votën për këtë koalicion si mundësinë për të ndryshuar situatën e arsimit dhe për të krijuar një të ardhme më të ndritshme për fëmijët dhe të rinjtë shqiptarë.

The post Meta vazhdon fushatën nga qelia me premtim për arsimin appeared first on Lapsi.al.

Presidenti i Konferencës Ipeshkvnore të Shqipërisë, Imzot Gjergj Meta ka drejtuar një mesazh urimi në emër të gjithë Kishës Katolike në Shqipëri në festën e madhe të Pashkëve. Duke theksuar rëndësinë e kësaj dite të shenjtë, ai ka përcjellë urimet e tij jo vetëm për besimtarët katolikë, por edhe për ata ortodoksë dhe ungjillorë. Këtë vit Pashkët kremtohen në të njëjtën ditë nga të gjitha degëzimet e krishterimit në vend.

Imzot Meta thekson se nuk ka kuptim të urosh Pashkët, nëse nuk bëhesh Pashkë ti vetë. Sipas tij që të bëhesh Pashkë, duhet të bëhesh më parë Kryq, të zbresësh në varr e prej aty të kumtosh lajmin e mirë të jetës që shpërthen nga nata e Pashkës. Ai shtoi se duke zbritur në varret e hapura të shumë situatave shoqërore dhe shpirtërore, mund të bëhesh lajmëtar i ditës së re.

Urimi për Pashkët nga Dom Gjergj Meta:

Të dashur miq, Si çdo herë, për shkak të angazhimit dhe të qenit ipeshkëv në një Dioqezë që përfshin një territor të varfër e të shpopulluar, veçanërisht në këto ditë përgatitjeje për Pashkët, kam hasur në situata varfërie e mjerimi ekonomik dhe njerëzor, që shpesh u ikin reflektorëve të mediave, madje edhe vetë kujdesit tonë fetar, duke qenë se ndodh shpesh që ne të kujdesemi më shumë për pompozitetin e kremtimeve tona, sesa për jetën e njerëzve. Nuk e fsheh se jo rrallëherë më kap njëfarë trishtimi dhe fjalët e mia, të cilat mëtojnë të sjellin fjalën e Zotit, i shoh të pafuqishme përballë shumë situatave dhembjeje e vuajtjeje që nganjëherë e tejkalojnë imagjinatën tonë.

E pyes veten se ç’fjalë mund të them gjatë këtyre ditëve? A thua kanë vlerë fjalët e mia përballë dhembjes dhe vuajtjes së shumë njerëzve, qofshin këto fizike, shpirtërore apo edhe morale? Ndërkohë që çdokush në bashkësitë tona mundohet të kapë një audiencë sa më të madhe në rrjetet sociale, për të “reklamuar” gjërat e shenjta, në shumë familje nëpër fshatra, por edhe nëpër zona urbane, konsumohen situata të kalcifikuara dhembjeje dhe vuajtjeje. Jam i sigurt se Zoti më shumë se kudo, është aty, shpesh i heshtur e do të thoja i pafuqishëm për të ndryshuar diçka jashtë jetës së këtyre personave, për faktin e thjeshtë se këtë mision Ai na e ka lënë neve. Ai ndryshon zemrat tona dhe ne mundemi e duhet të ndryshojmë realitetin tonë.

Prandaj, të bësh një urim për Pashkët është një përgjegjësi e madhe, pasi rrezikojmë të biem në klishe-të e zakonshme, në fjalët që përdoren për çdo herë, por që gjithnjë e më shumë e largojnë festën nga jeta e shumë njerëzve. Nëse Krishti, me vdekjen e tij, e mundi vdekjen, sikurse thotë një himn i vjetër i Pashkës që këndohet në këto ditë, na ka lënë ne, që me angazhimin tonë, të bëhemi Pashkë për të tjerët, sidomos për ata që janë në vargonjtë e padrejtësisë, të dhunës, të luftës e të situatave të rënduara ekzistenciale. Nuk ka kuptim të urosh Pashkët, nëse nuk bëhesh Pashkë ti vetë. Por që të bëhesh Pashkë, duhet të bëhesh më parë Kryq, të zbresësh në varr e prej aty të kumtosh lajmin e mirë të jetës që shpërthen nga nata e Pashkës. Vetëm kështu, duke zbritur në varret e hapura të shumë situatave shoqërore dhe shpirtërore, mund të bëhesh lajmëtar i ditës së re.

Këtë vit, Pashkët kanë qëlluar në të njëjtën ditë për të gjithë të krishterët: katolikë, ortodoksë dhe ungjillorë. Është një rast i bukur që të kremtojmë dhe të gëzohemi të gjithë një zemre, edhe pse secili në bashkësitë e veta.

Le të jemi ne së pari Pashkë në jetën tonë e kështu të kumtojmë ditën pa mbarim të fitores së Krishtit mbi vdekjen. Sigurisht që e gjithë kjo do të ndodhë në liturgjitë dhe shërbesat që do të bëjmë nëpër kishat tona, por këtë duhet ta bërtasim me të madhe nëpër rrugët dhe në situatat e njerëzve të çdo dite, në veçanti të atyre, që për një arsye a një tjetër, gjenden në kryq, janë në varret e vuajtjes dhe të mjerimit për shkak të luftës, ndasive, inatit dhe zemërimit. Vetëm kështu do të kemi kremtuar me të vërtetë Pashkë. Po ju uroj të gjithëve, katolikë, ortodoksë dhe ungjillorë, me përshëndetjen e të krishterëve: Krishti u ngjall! Me të vërtetë u ngjall!

The post Dom Gjergj Meta u uron besimtarëve Festën e Pashkëve appeared first on Lapsi.al.

Monika Kryemadhi ka bërë reagimin e parë pas zyrtarizimit të divorcit të saj me Ilir Metën ditën e sotme. Me anë të një postimi në rrjetet sociale u bën thirrje qytetarëve që sot në orë 19:00 t’i bashkohen hapjes zyrtare të fushatës së opozitës në sheshin “Nënë Tereza”.

Kryemadhi thotë se kërkon prap me të njëjtin përkushtim dhe dashuri votën për babain e fëmijve të saj, për të cilët ajo thotë se do të jepte jetën e jo më votë. Ajo shton se mediat sot vrapuan për të zyrtarizuar divorcin e tyre dhe se kjo është një ditë jo shumë të mirë për të dhe familjen e saj.

POSTIMI:

Të dashur miq!

Uroj që të më mirëkuptoni sot në këtë ditë të jo shumë të mirë për mua dhe familjen time. Mediat vrapuan sot për të zyrtarizuar sot divorcin tim me Ilir Metën. Familjarë që nga mamaja, vëllai, kushërinjtë, miqtë dhe mikeshat e mia për të gjithë ju që më keni ndjekur në të gjitha sfidat e mia dhe iu jam mirënjohëse për gjithçka.

Sot do iu lutesha të mos ndikoheni nga ky lajm, unë kërkoj prap me të njëjtin përkushtim dhe dashuri votën për babain e fëmijve të mi, për të cilët unë do të jepja jetën e jo më VOTËN për Ilir Metaj .

Sot kudo që jeni në çdo rrugicë dhe cep të Tiranës bashkohuni në hapjen e fushatës të opozitës sepse ky regjim është aq i keq dhe i helmuar sa helmon në qelizë dhe familjen shqiptare. Prandaj ju lutem sot më shumë se kurrë të jeni në Sheshin Nënë Tereza në orën 19 :00.

The post Sot u divorcuan zyrtarisht, Kryemadhi: Për të do të jepja dhe jetën! appeared first on Lapsi.al.

Presidenti i Partisë së Lirisë, Ilir Meta në prag të hapjes së fushatës elektorale të PD-Aleanca për Shqipërinë Madhështore ka dhënë një mesazh nga burgu. Meta shprehet nga burgu se sonte është fillimi i betejes finale për çlirimin e çdo shqiptari.

Meta gjithashtu thekson se sonte starton fushata fitimtare që do të kurorëzohet më 11 Maj me Fitoren Madhështore të Lirisë kundër Narkoregjimit të dorëzuar në duart e krimit dhe korrupsionit.

Ndër të tjera Meta theksoi se ai nuk do të jetë vetëm fizikisht, por me të gjithë fuqinë e kauzës, do të jetë krah të gjithëve në Sheshin “Nënë Tereza”, në ora 19:00.

Reagimi i Ilir Metës

Asnjë izolim fizik sado ekstrem nga Narkoregjimi, nuk më ndal dhe nuk do të më ndalë në përballjen time për të mbrojtur liritë dhe të drejtat e shqiptarëve nga dhuna e Narkoqeverisë, që ka zaptuar dhe plaçkit vendin.

Sonte vetëm fizikisht nuk do të jem në shesh, por me të gjithë fuqinë e kauzës, do të jem krah jush në Sheshin “Nënë Tereza”, në ora 19:00.

Sonte është fillimi i betejes finale për çlirimin e çdo shqiptari, sonte starton fushata fitimtare që do të kurorëzohet më 11 Maj me Fitoren Madhështore të Lirisë kundër Narkoregjimit të dorëzuar në duart e krimit dhe korrupsionit!

Sot të gjithë në shesh ku do gjëmojë zëri i qytetarëve për Shqipërinë Madhështore që meritojnë shqiptarët e ndershëm, punëtorë dhe patriotë.

VOTO NR.1 Koalicionin “PD-Aleanca për Shqipërinë Madhështore”

VOTO ILIR METAJ, Qarku Tiranë.

The post Hapja e fushatës, Meta mesazh nga burgu appeared first on Lapsi.al.

Pas shumë vitesh martesë, Ilir Meta dhe Monika Kryemadhi janë divorcuar zyrtarisht. Vendimi u mor sot (11 prill ) nga Gjykata Civile.

“Kjo është thjesht me një objekt, për zgjidhjen e martesës. Dhe gjykata pasi ne parashtruam shkaqet e zgjidhjes së martesës, administroi edhe aktet shkresore dhe mori vendimin për zgjidhjen e martesës mes paditësit Ilir Meta dhe të paditurës Monika Kryemadhi”, tha avokati i Ilir Metes, Genc Gjokutaj.

The post Divorcohen zyrtarisht Ilir Meta dhe Monika Kryemadhi appeared first on Lapsi.al.

Kreu i misionit të OSBE/ODIHR, ambasadori Lamberto Zannier, zhvilloi sot një takim informues në selinë e Partisë së Lirisë, në kuadër të vëzhgimit të fushatës për zgjedhjet parlamentare të 11 majit.

Në mungesë të kryetarit Ilir Meta, i cili ndodhet në paraburgim që prej 21 tetorit 2024 për tre akuza të ngritura nga SPAK, takimi u zhvillua në orën 10:30 me pjesëmarrjen e drejtuesve të tjerë të partisë, përfshirë sekretarin e përgjithshëm Tedi Blushi.

Në një deklaratë për mediat, Blushi tha se e informoi ambasadorin për problematikat që, sipas tij, kanë shoqëruar këtë fushatë, duke përfshirë përdorimin e administratës publike dhe patronazhistëve nga Partia Socialiste, si dhe përfshirjen e aseteve shtetërore në zgjedhje. Ai dënoi gjithashtu mbajtjen në paraburgim të Ilir Metës, duke e cilësuar të paligjshme dhe një përpjekje për ta izoluar nga fushata elektorale.

“E njoftuam ambasadorin për burgosjen pa gjyq të Metës dhe për ndalimin që i bëhet atij për të takuar drejtuesit e partisë apo për të komunikuar me votuesit. Arrestimi i tij është një akt i drejtpërdrejtë për të ndikuar në rezultatin e zgjedhjeve të 11 majit”, u shpreh Blushi.

Nga ana tjetër, ambasadori Zannier konfirmoi për gazetarët se u njoh me shqetësimet e ngritura nga PL, por nuk komentoi mbi arrestimin e Metës.

“Nuk kam një qëndrim në lidhje me këtë çështje dhe nuk mund të jap një mendim apo gjykim. Qëndrojmë pas shtetit të së drejtës, transparencës dhe ligjit të papolitizuar,” tha ai shkurtimisht.

Blushi e mbylli deklaratën duke theksuar besimin në një fitore madhështore të koalicionit opozitar më 11 maj dhe dorëzimin e provave konkrete te misioni i OSBE/ODIHR për veprimet që, sipas tij, po cenojnë procesin zgjedhor.

The post Zannier: Meta në burg? Qëndrojmë pas shtetit të së drejtës appeared first on Lapsi.al.

Presidenti i Partisë së Lirisë, Ilir Meta ka dërguar një mesazh nga burgu lidhur me zgjedhjet parlamentare të 11 majit. Meta shprehet se kanë mbetur 6 javë nga dita e fitores së lirisë dhe programit mbi pushtetin.

Në mesazhin e tij, kreu i PL-së ka ironizuar edhe programin e Partisë Socialiste për qeverisjen dhe thotë se kryeministri Edi Rama pasi vodhi për 12 vjet taksat e shqiptarëve, ka nisur të vjedhë edhe premtimet e opozitës. Sipas tij Rama i fshihet debatit të vërtetë dhe llogaridhënies, për shkak të shkeljeve që ka kryer gjatë qeverisjes.

Mesazhi i plotë:

Të dashur qytetarë, të dashur miq! Edhe 6 javë na ndajnë nga 11 maji, dita e fitores së lirisë mbi tiraninë. Dita e fitores të programit mbi pushtetin. Dita e fitores të patriotëve ndaj mercenarëve. Dita e fitores së Shqipërisë, që prodhon dhe eksporton dhe asaj që vetëm importon. Pasi vodhi për 12 vjet taksat e shqiptarëve me inceneratorët që nuk ekzistojnë dhe me rrugët që më shpejt rrëzohen sesa inagurohen, si ajo e Ersekës dhe shumë të tjera.

I mbetur pa program, se i kanë shteruar të gjitha mashtrimet e mundshme elektorale prej 12 vitesh, tani Edi Rama ka nisur të vjedhë edhe premtimet elektorale të opozitës, të cilat për muaj të tërë i quante të parealizueshme. I pamundur për të dalë në debate me kundërshtarët politikë. I pamundur të dalë në konferenca shtypi me gazetarët e pavarur, si detyrim ndaj qytetarëve që kërkojnë transparencë dhe llogaridhënie, Kryetari i Organizatës ka zgjedhur të flasë me vetveten përmes autointervistave të fabrikuara.

Dhe ai ka të drejtë që i fshihet debatit të vërtetë dhe llogaridhënies. Ç’të thotë ai për zgjidhjen e plotë të ujit të pijshëm, që brenda mandatit të parë qeveritar, kur edhe sot, mbas 12 vjetësh në pushtet, shumica e kryeqytetit është pa ujë dhe për ujë të pijshëm as që bëhet më fjalë. Po për legalizimet që do t’i zgjidhte që në mandatin e parë, ç’të thotë ai pas 12 vjetësh?

Po për shëndetësinë falas, e cila është 60% më e shtrenjtë për shqiptarët, ç’mund të thotë? Apo për ilaçet që mungojnë tek Onkologjiku. Po për arsimin që premtoi se që në mandatin e parë do e çonte buxhetin në 5% të GTP-së, ndërkohë që sot është në nivelin mjeran 2.3%, mbas 12 vitesh çfarë mund të thotë? Po për fëmijët që vriten me thika në oborret e shkollave, në mes të Tiranës dhe askush nuk mban përgjegjësi, çfarë mund të thotë?

Vetëm për shkak të korrupsionit të tij dhe të organizatës që drejton, Shqipëria ka, pas 12 vitesh, nivelin më skandaloz të mbledhjes së të ardhurave deri në 28% të PBB, ndërsa Bosnja, Mali i Zi, Serbia arrijnë të mbledhin nga 41 në 42.6% të PBB.

Kjo diferencë prej 14% me mesataren e vendeve të rajonit tonë është 3.3 miliard euro në vit ose 13.2 miliard euro në katër vite, pra në një mandat qeverisës, e cila grabitet prej Edi Ramës dhe organizatës të tij në tatime, dogana dhe kudo.

Me këto të ardhura, tejkalohen të gjitha premtimet e opozitës, por edhe ndryshon rrënjësisht situata sociale dhe ekonomike për të gjithë shqiptarët, 50% e të cilëve jetojnë sot në varfëri zyrtare. Edi Rama, duke ju fshehur llogaridhënies, pas 12 vitesh, për të gjitha ato mundësi që i kishte në dorë, premton sot, çuditërisht, ato që si ka në dorë.

Kush ja ka fajin Edi Ramës që edhe fondet e Bashkimit Europian për bujqësinë, i çoi te inceneratori që nuk ekziston dhe klientët e tij që nuk merren fare me aktivitete bujqesore dhe blegtorale. Kush i zeroi fondet europiane të IPARD-it për bujqësinë? Vetëm korrupsioni i Edi Ramës dhe i klientëve të tij. Pse Shqipëria në këto 12 vite është vendi i fundit përfitues nga projekte të financuara nga Bashkimi Europian apo “Procesi i Berlinit” me nivelin më të ulët të disbursimit dhe përfitimit.

Kush e mbylli Ministrinë e Integrimit Europian në vitin 2017, kur e mori edhe timonin edhe tepsinë i vetëm Edi Rama. Të gjithë e dinë se e mbylli shakaxhiu i integrimit, Edi Rama.

Kush refuzoi thirrjen dhe përpjekjen serioze të Bundestagut Gjerman në Qershor 2019, që Shqipëria të mos bënte zgjedhje vendore pa opozitën, sepse do të humbiste shansin për Çeljen e Negociatave, njëkohësisht me Maqedoninë e Veriut që kishte arritur Marrëveshjen historike të Prespës. Përsëri këtë refuzim e bëri shakaxhiu i integrimit, sepse për Edi Ramën, pushteti absolut dhe korrupsioni absolut është i vetmi prioritet, ndërsa integrimi është gjëja më e parëndësishme. Sepse projekti i tij i vërtetë ishte dhe ende është “Ballkani i Hapur” që ka rrënuar fermerët dhe blegtorët shqiptarë. Kush ja ka fajin Edi Ramës, që në 8 vite që ai drejton i vetëm, është përgjysmuar numri i gjedhëve dhe i të imtave dhe që prodhimi bujqësor është në pikiatë?

Kush ja ka fajin Edi Ramës që Shqipëria eksporton edhe pas 12 vitesh, që ai është në pushtet, vetëm 8% të PBB, kur Maqedonia e Veriut fqinje eksporton 57%? Ndërkohë eksportet shqiptare vazhdojnë pikiatën e tyre të pandalshme për shkak të Narkoeuros, por edhe të klimës diskriminuese ndaj prodhuesve vendas dhe ndaj investimeve prodhuese dhe eksportuese.

Ndaj shqiptarët jam i bindur do të votojnë për programin e opozitës që është tepër realist dhe në interes të shumicës dërrmuese të shqiptarëve.

Për programin e opozitës që synon fuqizimin e ekonomisë familjare, por edhe të ekonomisë kombëtare në mënyrë të qëndrueshme dhe afatgjatë. Opozita është edhe garantja e përshpejtimit të integrimit europian, sepse ajo i ka dhënë të gjitha provat për këtë. Po kështu, Partia Demokratike është anëtare e Partive Popullore Europiane, të cilat drejtojnë Bashkimin Europian dhe tani do të marrin dhe drejtimin e Gjermanisë. Opozita ka edhe ekspertët më të mirë për çështjet me Bashkimin Europian, një pjesë e të cilëve do të jenë edhe në Kuvendin e ardhshëm.

Ndaj të gjitha votat për numrin 1 në fletën e votimit. PD – ASHM. Unë çdo ditë, këtu, në kushte ekstreme izolimi, përpiqem të shkruaj 50 deri në 100 letra, sepse kuptohet edhe këtu ikin dritat herë pas here, për bashkëpunëtorët, për anëtarët e Partisë së Lirisë, për shokët, për miqtë, për të afërmit. Për t’u kujtuar të gjithëve se sa e rëndësishme është të mos humbasim asnjë sekondë kohë kot në këto 6 javë që kanë mbetur.

Që t’i njohim shqiptarët me programin tonë, që është edhe shpëtimi i tyre nga shtypja, nga bullizimi dhe nga grabitja e këtij sekti të papërgjegjshëm, që pasi hëngri dhe grabiti taksat e shqiptarëve për 12 vjet, tani po ha dhe vetveten në mënyrën më të pabesë. Besoj që të gjithë ju që më dëgjoni, keni shumë më tepër mundësi se sa unë që të lëvizni, që të takoni dhe që të luftoni në këto 6 javë në mënyrë që 11 Maji të jetë dita historike e triumfit të lirisë mbi tiraninë.

The post Meta: Rama vodhi premtimet e opozitës si taksat e shqiptarëve, 11 maji dita e fitores appeared first on Lapsi.al.

Për rreth 3 muaj, kreu i Partisë së Lirisë, Ilir Meta ndodhet në burgun “313” në Tiranë. Ai u arrestua në tetor të vitit të kaluar me urdhër të SPAK për akuzat e korrupsionit dhe fshehjes së pasurisë.

Izolimi në burg duket të ketë ndikuar së tepërmi te mënyra e jetesës së Metës, i cili njihej për udhëtimet e tij në natyrë veçanërisht në ngjitjen e maleve.

Ai është filmuar në ambientet e ajrosjes së burgut, duke bërë ecje përgjatë oborrit të brendshëm. Siç kanë deklaruar njerëzit pranë tij, Meta mundohet të vijojë me regjimin stërvitor edhe në kushtet e izolimit.

The post Del VIDEO/ Ilir Meta në burgun “313” duke bërë ecje gjatë orarit të ajrosjes appeared first on Lapsi.al.

Kreu i Prokurorisë së Posaçme Altin Dumani ka komentuar ndryshimin e masës së sigurisë nga GJKKO për kryedemokratin Sali Berisha. Gjatë një takimi informal me gazetarët, Dumani theksoi se ata janë zbatues të ligjit dhe nëse nuk kënaqen me vendimet ushtrojnë ankimim. Ndërkohë që për hetimet ndaj presidentit të Partisë së Lirisë Ilir Meta, Dumani theksoi se hetimi vijon.

“Nuk kemi ndjeshmëri. Respktojmë vendimin e gjykatave. Jemi zbatues të ligjit. Kur nuk kënaqemi, ushtrojmë te drejtën e ankimimit. Për Ilir Metën, hetimi po vijon. Kërkesat e SPAK janë gjetur të drejta nga shkallët e gjyqsorit dhe Kushtetuesja i dha fundit të gjithave,” tha Dumani.

The post Masa e sigurisë për Berishën/ Dumani: Për Ilir Metën vijojnë hetimet appeared first on Lapsi.al.

Ish-presidenti i Republikës, Ilir Meta, i kërkon Gjykatës së Lartë ta lirojë nga qelia.

Përmes avokatit Genci Gjokutaj, Meta ka depozitur një rekurs kundër vendimit të 19 nentorit 2024, që konfirmoi masën e sigurisë “arrest në burg” ndaj tij.

Meta qëndron në paraburgim teksa po hetohet nga SPAK për “korrupsion”, “pastrim të parave” dhe “fshehje e mosdeklarim të pasurisë”.

Avokati i tij mbrojtës, Genc Gjokutaj deklaroi se “çështja do të mbërrijë deri në Gjykatën e Strasburgut, nëse do të jetë e nevojshme”.

The post Meta/ Gjokutaj dorëzon rekurs në Gjykatën e Lartë për ndryshim të masës së sigurisë appeared first on Lapsi.al.

Të tjera detaje kanë dalë lidhur me ngjarjen e ndodhur dy ditë më parë në fshatin Zall Bastar të Tiranës, ku 64-vjeçari Isuf Hasa (majtas në foto) dyshohet se vrαu me çekiç fqinjin e tij 81-vjeçar, shtetasin Xhemal Meta (djathtas).

Burime për mediat bëjnë me dije se autori dhe viktima ishin miq dhe e kishin lënë një ditë para ngjarjes që të konsumonin një kafe në nja lokal i cili ndodhet rreth 30 minuta larg nga fshati.

Autori dhe i moshuari e kishin lënë të takoheshin në orën 09:00 dhe më pas të niseshin drejt lokalit, por në momentin kur janë takuar Hasa dhe Meta dyshohet se janë konfliktuar me njëri-tjetrin e më pas 64-vjeçari e ka qëlluar me çekiç mbrapa kokës.

Si pasojë e plagëve i moshuari humbi jetën në vendin e ngjarjes, ndërkohë 61-vjeçari u largua pasi i mori dhe portofolin me para 81-vjeçarit.

Referuar po të njëjtave burime mësohet se Isuf Hasa pas ngjarjes kishte shkuar i vetëm drejt kafenesë, ku e kishte lënë që të pinte kafen me fqinjin e tij.

Xhemal Meta kishte planifikuar që pasi të pinte kafen me Isuf Hasën të nisej drejt Tiranës, ku jetonin familjarët e tij, përfshirë edhe bashkëshorten.

Lidhur me këtë ngjarje, pasditen e kësaj të mërkure Drejtori i Drejtorisë së Policisë së Tiranës, Elton Alushi, në një deklaratë për mediat tha se sipas informacioneve të zbuluara zyrtarisht nga Policia e Shtetit, Xhemal Meta është qëlluar me çekiç në kokë nga 64-vjeçari, Isuf Hasa.

“Nga hetimet e zhvilluara se më datën 13 janar të këtij vitit, rreth orës 09:00, 64-vjeçari Isuf Hasa i shkoi në banesën e fqinjit të tij dhe për motive të dobëta e ka qëlluar atë me një mjet të fortë (çekiç) në pjesën e pasme të kokës duke i shkaktuar vdekjen. Më pas, pasi e ka goditur 81-vjeçarin, i ka marrë dhe një sasi vlerash monetare që ai mbante në xhep, dhe më pas është larguar.

Nga kontrollet e shumta të kryera në disa banesa të autorit dhe familjarëve të tij, janë gjetur dhe sekuestruar një sasi prej 200.000 lekë të rinj. Po nga kontrollet ushtruara në banesën e vajzës së autorit, është gjetur dhe sekuestruar dhe çekiçi me të cilin 64-vjeçari vrau të moshuarin, Xhemal Meta” – tha drejtori i policisë. /Newsbomb

The post Vrαsja në Zall Bastar/ Autori dhe viktima e kishin lënë të pinin bashkë kafen appeared first on Lapsi.al.