Nga Mero Baze

Debati kundër bektashinjve në politikën shqiptare është i vjetër sa vetë shteti shqiptar. Që në fillimet e tij, politikanët shqiptarë të lidhur me traditën osmane e patën bektashizmin objekt kundërshtimi, jo vetëm për shkak të rolit të madh që bektashinjtë kishin luajtur në lëvizjen kombëtare, por edhe sepse njohja e tyre si komunitet më vete dobësonte mundësinë e përdorimit politik të një bashkësie të vetme myslimane.

Bektashizmi ishte marrë në konsideratë si një nga katër bashkësitë fetare të vendit që në Kongresin e Lushnjës. Kjo u pasqyrua tërthorazi edhe në përbërjen e Këshillit të Lartë të dalë prej Kongresit, i konceptuar si një organ kolegjial prej katër vetash, ku përfaqësoheshin katër bashkësitë fetare që merreshin politikisht në konsideratë në Shqipërinë e kohës: Aqif Pashë Elbasani (Biçakçiu) — bektashi; Abdi Bej Toptani — mysliman sunit; Imzot Luigj Bumçi — katolik; dhe Dr. Mihal Turtulli — ortodoks.

Por ishte Ali Këlcyra politikani që, përmes një debati të fortë parlamentar, arriti të sanksiononte në ligj të drejtën e bektashizmit për t’u organizuar si komunitet fetar më vete.

Debati u zhvillua në Këshillin Kombëtar më 1923.

Debati për ligjin mbi komunitetet fetare (Statuti i Komuniteteve Fetare) ishte një nga debatet më domethënëse, sepse prekte drejtpërdrejt raportin midis shtetit laik dhe organizimit institucional të fesë. Thelbi i debatit lidhej me nenin 2 të projektligjit: a duhej ligji të përmendte shprehimisht komunitetet kryesore fetare që ekzistonin de facto në Shqipëri — sunizmin, bektashizmin, ortodoksinë dhe katolicizmin — apo duhej të adoptohej një formulë e përgjithshme, që të përfshinte çdo fe, sekt apo besim pa emërtim të veçantë.

Qeveria, e mbështetur nga figura si Rauf Fico, argumentonte se formulimi i përgjithshëm garantonte më mirë lirinë e ndërgjegjes dhe shmangte kufizimet e panevojshme ligjore. Sipas këtij argumenti, ligji duhej të mbulonte jo vetëm fetë ekzistuese, por edhe çdo besim të mundshëm që mund të shfaqej në të ardhmen. Formula e propozuar ishte: “Të gjitha fetë, besimet e sektet mund të organizohen në një shoqatë fetare si mbas rregullave kanonike të veta.” Kjo konsiderohej nga qeveria si mënyra më liberale dhe më fleksibël për të ruajtur neutralitetin e shtetit ndaj fesë.

Ali Këlcyra ishte partizan i përmendjes shprehimisht në ligj të komuniteteve fetare që ekzistonin de facto në Shqipëri. Mehdi Frashëri e mbështeti fort. Të dy kërkonin që ligji të mos injoronte realitetin konkret shqiptar, sidomos statusin e veçantë të bektashinjve. Frika kryesore ishte se një formulim tepër i përgjithshëm mund të lejonte interpretime administrative ose politike që, në praktikë, do të nënvlerësonin apo madje mohonin identitetin juridik të bektashizmit si komunitet më vete.

Ali Këlcyra mbajti një nga ndërhyrjet më të artikuluara dhe më politike në këtë debat, duke argumentuar se liria reale garantohej vetëm kur ligji njihte qartë subjektet ekzistuese fetare. Sipas tij, problemi nuk ishte liberalizmi, por rreziku që formulat e paqarta të krijonin interpretime arbitrare.

Ali Këlcyra: Z. Kryetar! …

Disa kohë ma parë, kur u bisedue Statuti mbi pikën fetare, mbi lirinë e ndërgjegjës u tha se një pakicë e popullit asht mësue me iu bindë shumicës. E se po ta studiojmë në shpirt të edhe kundërshtimin e sotshëm, do të konstatojmë se do të thotë se pakica e bektashivet duhet t’i bindet shumicës d.m.th. sunizmit. Neve si deputetë e Shqipnis e si përfaqësuesit e atij populli protestojmë rrebtësisht, se në Shqipnin e lirë s’ka ndonji pakicë që i bindet shumicës.

Zotnija e tij thotë se feja myslimane ka shumë sekte, kjo nuk asht e vërtetë.

Edhe katholikët, protestantët e orthodoksët janë krishtër, po kurr Z. D. Mjeda nuk do të pranojë që këto të marrin pjesë në një xhemet.

Z. Salih Vuçiterni mund ta mbajë mend telegramin që i kemi drejtue kur ishte tue u ba mbledhja muhamedane tue iu thanë se në qoftë se jemi mbledhë si mysliman nuk keni të drejtë të mblidheni pa na thirrë edhe ne, po në asht se jeni mbledhë si sunizëm, atëherë ju urojmë punë të mara.

Neve me caktimin e kjartë këtij artikulli duem të mbrojmë të drejtat e bektashizmes, pse në Shqipni nuk ka ndonji pakicë që duhet t’i bindet shumicës e se lirija e ndërgjegjës asht e sigurueme.

Nuk ka asnji arsye që Zotnija e tyne duen ta lanë t’errët ket artikull e se e vetmja arsye asht, pse nuk duen të njofin indipendencën e plotë të komunitetit të Bektashivet.

Këlcyra i referohej edhe raportit të Sederholmit për bektashizmin dhe përdorte vlerësimin e një të huaji për të goditur kundërshtarët e njohjes së tij:

“Kur një i huej nuk e mohon individualitetin e këtyne, si mundet një deputet shqiptar t’ia mohojë? […] Bektashitë kërkojnë njohjen e individualitetit të tyne zyrtarisht që i asht kenë mohue në kohë të Turqis, edhe Zotnit e tyne nuk kanë aspak të drejtë t’ia mohojnë.”

Argumenti merrte edhe një dimension kombëtar. Këlcyra kujtonte kontributin e bektashinjve ndaj shtetit shqiptar dhe kërkonte shprehimisht që ligji t’u njihte pavarësinë institucionale:

“Tue bisedue me Dervishët e Baballarët këto kanë kërkue që e drejta e individualitetit të tyne t’u njihet zyrtarisht, dhe këtë e kemi për detyrë edhe pse duhet t’i jemi mirënjohës atyne për shërbimet e mdhaja që i kanë ba bektashit Shtetit Shqiptar.”

Dhe e përfundonte kërkesën:

“Në asht se nuk doni t’emnohen fetë tjera, na sa për bektashizmen n’emën të zgjedhësavet tonë kërkojmë që në kët ligjë të thuhet shkoqur, që kleri i bektashizmes formon një kler indipendent.”

Kjo ishte goditja kryesore logjike e tij ndaj projektit qeveritar. Sipas Ali Këlcyrës, vetë qeveria e njihte realitetin e komuniteteve fetare, por, në momentin e formulimit ligjor, përpiqej ta zëvendësonte atë me një abstraksion juridik.

Një tjetër element i rëndësishëm në argumentin e tij ishte mbrojtja e statusit të veçantë të bektashinjve, jo vetëm si çështje juridike, por edhe kombëtare. Ai e shihte bektashizmin si pjesë të identitetit politik e kulturor shqiptar dhe kundërshtonte çdo tentativë për ta tretur atë brenda sunizmit. Fjalia “Në Shqipnin e lirë s’ka ndonji pakicë që i bindet shumicës” përmbledh në një masë të madhe filozofinë politike që ai mbronte në këtë debat.

Shteti shqiptar, sipas kësaj logjike, nuk duhej të garantonte vetëm tolerancën fetare, por edhe njohjen e barabartë dhe dinjitoze të secilit komunitet. Pyetja juridike ishte e qartë: a duhej të njiheshin degët kryesore të myslimanizmit dhe krishterimit si subjekte të organizuara dhe të pavarura juridikisht?

Pikërisht këtu Ali Këlcyra arrin të imponojë formulimin e tij.

Debati ishte i ndërlikuar. Salih Vuçiterni insistonte se struktura e fesë myslimane përbëhej nga degë të ndryshme — sunizëm, bektashizëm, rufaizëm, kadirizëm etj. — ndërsa deputetë si Visar Xhuvani dhe Mehdi Frashëri paralajmëronin se Parlamenti rrezikonte të hynte në çështje teologjike që nuk i takonin.

Ali Këlcyra e nxori debatin pikërisht nga ky kurth teologjik. Për të, çështja nuk ishte nëse bektashizmi ishte “degë” apo “fe më vete” në kuptimin doktrinar. Çështja ishte nëse shteti shqiptar do ta njihte si një entitet juridik të pavarur. Ligji nuk po organizonte “myslimanizmin” si një trup të vetëm; ai po rregullonte marrëdhëniet juridike të komuniteteve konkrete me shtetin.

Më tej, Këlcyra propozoi formulimin që do të fitonte në fund:

“Ç’do degë e myslimanizmës, si synizma, bektashizma, rufaizma e tjerat, ashtu edhe ç’do degë e krishtenizmës si katholiçizma, orthodoxizma, protestantizma, si edhe të gjithë degat e ç’do feje tjetër, mund t’organizohet në nji shoqiatë fetare indipendente njena prej tjetrës, si mbas rregullave të veta kanonike.”

Ky ishte momenti vendimtar i debatit.

Argumenti juridik i Këlcyrës ishte se termat “krishtenizëm” dhe “myslimanizëm” përfaqësonin kategori të gjera fetare dhe jo persona juridikë. Subjektet konkrete, të afta për t’u organizuar dhe për të pasur marrëdhënie juridike me shtetin, ishin degët e tyre:

“Tue qenë se si Krishtenizma ashtu edhe Muslimanizma nuk formojnë nji person juridik, të caktohet mirë e të vehet ‘degët e ç’do feje’.”

Dhe e çonte argumentin deri te pyetja praktike që ishte në zemër të gjithë debatit:

“Muslimanë janë, po tue qenë se janë nji degë e veçantë duhet të dijmë se ç’ relacione do të kenë me qeverin nga pikpamja juridike. Në kët ligjë nuk asht tjetër, veç se ç’do komunitet të dijë se ç’relacione do të ketë me qeverin. E pse mos të vehet Bektashizma?”

Në fazën finale, debati u zhvendos te termi “rregullave kanonike”. Edhe këtu Ali Këlcyra shfaqi kujdes juridik, duke paralajmëruar rrezikun e një interpretimi arbitrar që mund të përdorej më vonë kundër autonomisë së komuniteteve.

Në fund erdhi votimi. Propozimi i Salih Vuçiternit ra, duke marrë vetëm 12 vota, ndërsa propozimi i Ali Këlcyrës mori 26 vota dhe u pranua. Procesverbali e shënon qartë:

“Këndohet proponimi i Z. A. Këlcyrës…”

“Ngrehin dorën 26 vetë e pranohet.”

Kjo shënonte fitoren politike të Ali Këlcyrës në këtë debat. Në fund u miratua formula:

“Çdo degë e Myslimanizmës, si Synizma, Bektashizma, Rufaizma e tjerat, ashtu edhe çdo degë e Krishtenizmës si Katholicizma, Orthodoksizma, Protestantizma si edhe të gjithë degat e çdo feje tjetër, mund t’organizohet në nji shoqiatë fetare indipendente njena prej tjetrës…”

Fitorja e Ali Këlcyrës ishte e rëndësishme në disa nivele. Ajo i dha bektashizmit bazën ligjore për t’u organizuar në mënyrë të pavarur dhe jo për t’u tretur juridikisht brenda sunizmit. Njëkohësisht krijoi një model pluralist të organizimit fetar në Shqipëri, ku degët e feve mund të organizoheshin si subjekte autonome në marrëdhëniet e tyre me shtetin. Dhe, në planin politik, tregoi peshën parlamentare të Këlcyrës: megjithëse deputet i pakicës, ai arriti të impononte jo vetëm argumentin e tij politik dhe juridik, por edhe formulimin konkret të dispozitës që mori shumicën e votave.

E gjithë kjo ndodhte përpara se qendra botërore e bektashizmit të zhvendosej në Shqipëri; në atë kohë ajo ndodhej ende në Turqi.

Sot në politikën shqiptare ka ende një politikë diskriminuese ndaj bektashinjve. Dhe pse janë feja me më shumë kontribute patriotike në historinë e Shqipërisë, pasi janë të vetmit klerikë që nuk varen nga vende fqinje, diskriminimi ndaj tyre vazhdon dhe politikanët shqiptarë, kryesisht të linjës otomane, vazhdojnë të mbrojnë vendimet e kohës së komunizmit që zhbëri kuadrin ligjor të organizimit të bektashinjve njësoj si komunitetet e tjera fetare në Shqipëri.

Madje, disa guxojnë ta quajnë dhe tradhti kombëtare organizimin më vete të bektashinjve, pasi, sipas tyre, bie ndesh me komunitetet e tjera fetare, për të cilat duhet të marrin leje ose në Stamboll, ose në Athinë, ose në Vatikan.

Burimi: Bisedimet e Këshillit Kombëtar, 14 maj 1923.

Katër ditë pas vrasjes me thikë të 21-vjeçarit portugez Luis Mendes, policia e Sarandës ka gjetur armën e krimit. Përveç gjurmimit nëpërmjet kamerave të sigurisë për të parë lëvizjet që ka bërë autori i dyshuar, S.V., hetuesit kanë marrë edhe deklarimet e A.Z. Ky i fundit rezulton të jetë personi që ka marrë në makinë S.V. për ta dërguar në spital, pasi e ka parë me rroba të përgjakura.

Thika me të cilën dyshohet se u qëllua 7 herë 21-vjeçari portugez u gjet në disa ferra, në një rrugë dytësore. Gjatë deklarimeve të tij para hetuesve, A.Z. ka shpjeguar të gjitha lëvizjet që kanë kryer dhe deri ku e ka shoqëruar autorin e dyshuar të ngjarjes.

“A.Z. ka marrë makinën dhe në pjesën e sipërme të lokalit ka dalë S.V., i cili kishte hipur në pjesën e pasme të makinës dhe është nisur menjëherë në drejtim të qendrës shëndetësore të Ksamilit. Gjatë rrugës, S.V. i tha: “Ik vetëm drejt” dhe pas dy-tre minutash, kur shkuan në një rrugë me kalldrëm, i ka thënë: “Ndalo këtu” dhe ka ikur zbathur. Disa metra, pak larg makinës, A.Z. kishte vënë re që S.V. hodhi diçka me forcë.

S.V. në deklarimet e tij, ka theksuar se i ka kërkuar një shtetasi turk me emrin Mahmut, të cilin e kishte njohur në plazh, ta çonte në Tiranë sepse nuk e dinte se çfarë do të ndodhte më tej. Ai ishte futur në bagazhin e makinës, sipas tij, me argumentin se donte të flinte gjumë. S.V. ka mohuar të jetë ai personi që ka goditur me thikë 21-vjeçarin.

Ndërsa shtetasja turke, e cila u arrestua për përkrahje të autorit të krimit pasi u kap së bashku me N.M., duke sjellë në Tiranë autorin e dyshuar S.V., ka mohuar të ketë dijeni për ngjarjen.

“Jam njohur me shtetasin turk N.M., kur ka ardhur me pushime në Shqipëri, nëpërmjet adresës së Instagramit, pasi ky shtetas jep makina me qira. Unë nuk kisha dijeni që kishim S.V. në makinë. Rrugës, kur ishim duke shkuar për në Tiranë, dikush e ka telefonuar N.M., pak para se të shkonim te vendi ku na kapi policia, dhe i ka thënë që ‘shiko se ke polici përpara’. Aty N.M. më tregoi që në bagazh ndodhej S.V.”

Ndërkohë, policia është ende në kërkim të D.Gj., të cilin e akuzon për bashkëpunëtor në vrasje, sipas asaj që duket në pamjet e kamerave të sigurisë. Në kërkim është edhe pronari i lokalit, B.B. Më herët, gjykata caktoi arrest në burg për 6 persona dhe la të lirë 5 të tjerë./Klan News

Ministri i Jashtëm i Iranit e hodhi poshtë kërcënimin e sanksioneve të reja të SHBA-së si një shenjë dëshpërimi të dielën dhe tha se masat e reja të pritura nuk do të arrijnë ta mposhtin Teheranin.

Sekretari i Thesarit i SHBA-së, Scott Bessent, ka kërcënuar të vendosë ” sanksionet më të ashpra në histori ” ndaj Iranit.

Ekonomia e Iranit është tashmë nën presion të madh nga sanksionet ndërkombëtare, infrastruktura e saj është goditur vazhdimisht dhe mijëra njerëz janë vrarë në sulmet ajrore ndaj Republikës Islamike që kur SHBA-të dhe Izraeli nisën sulmet më 28 shkurt.

Por Teherani mbetet sfidues pas gati gjashtë muajsh lufte, ka sjellë transportin detar në një ndalesë praktike në Ngushticën e Hormuzit, duke refuzuar të lejojë anijet cisternë të paautorizuar të kalojnë nëpër një rrugë ujore që është jetike për dërgesat globale të naftës. Bllokada efektive e ngushticës ka rritur çmimet globale të naftës .

Duke përshkruar ato që ai i quajti “skenarë përsëritës”, Ministri i Jashtëm iranian Abbas Araqchi tha në një video të postuar në Telegram, se fakti që udhëheqësit amerikanë kanë hequr dorë nga operacionet ushtarake, për të sjellë të njëjtat plane të vjetra tregon se ata janë të dëshpëruar.

Ai tha se Uashingtoni duhet të flasë me Iranin për të gjetur “një zgjidhje të bazuar në drejtësi dhe nder”.

“Ne kurrë nuk kemi pasur frikë. Të gjitha veprimet e tyre, qofshin bllokada apo lëvizje të tjera ushtarake që kanë bërë, kanë dështuar, dhe kjo çështje e tyre e re do të dështojë gjithashtu”, tha ai.

Presidenti i SHBA-së, Donald Trump, ka paralajmëruar për pasoja ekonomike kundër çdo vendi që ofron “çdo lloj ndihme për Iranin” dhe Bessent ka kërkuar bashkëpunim me Uashingtonin nga Kina , e cila blen më shumë se 80% të naftës së dërguar nga Irani, sipas të dhënave të vitit 2025 nga firma analitike Kpler. Kina ka kërkuar diplomaci.

Irani tha se shefi i ushtrisë së Pakistanit, Asim Munir, do të vizitojë Teheranin të hënën si pjesë e përpjekjeve për të rivendosur paqen dhe sigurinë në rajon, por dha pak detaje.

Pakistani ka ndërmjetësuar në konflikt dhe një burim nga qeveria pakistaneze tha se Munir do të flasë për zhvillimet e fundit, përfshirë kërcënimin e SHBA-së për sanksione të reja. Ndërkohë, Trump tha të premten se Uashingtoni po vëzhgonte “çfarë po ndodh” me konfliktin.

“Ata do të donin shumë të bënin një marrëveshje, por sipas mendimit tim, nuk janë gati të bëjnë marrëveshjen e duhur”, tha Trump për Iranin.

Sulmet amerikane e kanë dobësuar rëndë ekonominë e Iranit dhe kanë shkatërruar forcat detare dhe ajrore të tij, por Teherani mban mjaftueshëm kapacitete raketore dhe dronësh për të penguar trafikun e cisternave të naftës dhe për të sulmuar rivalët rajonalë.

Kryetari i Parlamentit iranian, Mohammad Baqer Qalibaf, tha se Teherani kishte marrë “mesazhe të shumta” nga vendet fqinje në lidhje me krijimin e marrëveshjeve të reja rajonale të sigurisë dhe bashkëpunimit ekonomik.

Qalibaf nuk tha se për cilat vende po i referohej. Ai akuzoi SHBA-në se po rrezikon sigurinë e aleatëve të saj në rajon për hir të Izraelit, duke shtuar se një rend rajonal i pavarur dhe “i rritur në vend” do të sillte paqe dhe siguri.

Trump ende nuk ka arritur objektivat që vendosi në fillim të luftës, siç është çmontimi i programit bërthamor të Iranit, gjendja e të cilit mbetet e pasigurt duke qenë se inspektorët e OKB-së janë mbyllur që nga viti 2025, dhe krijimi i kushteve që iranianët të rrëzojnë sundimtarët e tyre klerikë.

Ndërsa Irani mbetet sfidues, Presidenti Masoud Pezeshkian ka bërë thirrje gjithashtu për një zgjidhje diplomatike.

“Do të ishte më mirë ta përfundonim luftën sot, kur jemi të fuqishëm dhe kemi dinjitet, dhe e gjithë bota e njeh fitoren tonë dhe thekson se Amerika, në kundërshtim me të gjitha rregulloret, sulmoi shkollat, spitalet dhe infrastrukturën tonë dhe është e urryer në botë”, e citoi atë të premten agjencia e lajmeve ISNA.

Franca dhe Gjermania po forcojnë mbështetjen ushtarake dhe financiare për Ukrainën, pas intensifikimit të sulmeve ruse dhe kërkesave të Kievit për më shumë sisteme të mbrojtjes ajrore.

Presidenti francez Emmanuel Macron ka njoftuar përshpejtimin e dërgimit të raketave dhe sistemeve të mbrojtjes ajrore për Ukrainën. Kievi pritet të marrë gjithashtu licencë për prodhimin e raketave penguese, ndërsa Parisi synon të përshpejtojë furnizimin me raketa lundruese me rreze të gjatë dhe armatime të tjera, shkruan A2CNN.

Nga ana tjetër, Gjermania do të kontribuojë me 10 milionë euro në një fond të NATO-s për Ukrainën. Financimi do të përdoret për furnizime me energji, materiale mjekësore dhe sisteme për mbrojtjen kundër dronëve.

Mbështetja e re vjen pas sulmit rus ndaj një qendre tregtare në Krivji Rih, ku, sipas informacionit të raportuar, humbën jetën të paktën 16 persona dhe mbi 130 të tjerë u plagosën, mes tyre 23 fëmijë.

Ndërkohë, fondet e tjera të akorduara për Ukrainën do të përdoren edhe për riparimin e banesave dhe sigurimin e pajisjeve sanitare dhe ngrohëse.

Një i moshuar ka qëndruar për 5 orë jashtë rezidencës qeveritare në Pogradec për të pritur përfundimin e mbledhjes së Partisë Socialiste me drejtuesit politikë.

Në një intervistë për gazetarin e Euronews Albania, Xhensil Shkëmbin, i moshuari u shpreh se kërkon ta falënderojë personalisht kryeministrin Edi Rama dhe kryetarin e bashkisë, Ilir Xhakolli, për zgjidhjen e shqetësimeve të tij.

I pyetur nga gazetari nëse do të presë deri në përfundim të takimit, i moshuari konfirmoi me bindje se do të qëndrojë aty vetëm për ta përqafuar kryeministrin.

Intervista e plotë:

Gazetari: Edhe një herë, s’e kuptova, përse do ta takosh Ramën?

Zotëria: Për problemet që më ka shtruar mua, i kam ndjekur këtu, mi ka zbatuar Iliri. Edhe ta përqafoj atë.

Gazetari: Kush Ilir, kryetari i bashkisë?

Zotëria: Eee.

Gazetari: T’i ka zgjidhur?

Zotëria: Po.

Gazetari: Edhe kërkon thjesht ta falënderosh?

Zotëria: Po, po.

Gazetari: Po mbaron vonë Rama.

Zotëria: Kur të mbarojë, do ta përqafoj njëherë kështu, me kaq.

Gazetari: Vetëm për ta përqafuar?

Zotëria: Po, kaq. Do rri./ Euronews Albania

Partia Socialiste ka nisur diskutimet për zgjedhjet vendore të vitit 2027 në takimin dyditor të thirrur nga kryeministri Edi Rama në rezidencën qeveritare në Drilon të Pogradecit.

Mbledhja, ku marrin pjesë drejtuesit politikë të qarqeve, kryetarët e komisioneve parlamentare dhe anëtarë të qeverisë, është fokusuar te prioritetet politike të sezonit të ri dhe organizimin e partisë në terren.

Gazetari i A2 CNN Artin Halili bëri të ditur se në qendër të diskutimeve kanë qenë dy dokumentet “Besa” dhe “Prania Besnike”, që lidhen me mënyrën se si deputetët, ministrat dhe drejtuesit politikë duhet të komunikojnë me qytetarët dhe të forcojnë praninë e PS-së në komunitet.

Sipas burimeve për A2 CNN, kryeministri ka folur për zgjedhjet lokale të vitit 2027, duke kërkuar që kandidatët e ardhshëm të jenë figura me integritet dhe të lidhura ngushtë me komunitetin. Një pjesë e diskutimeve i është kushtuar edhe reformës territoriale dhe procesit të shkrirjes së 15 bashkive.

Rama ka kërkuar që drejtuesit politikë të jenë ata që t’ua shpjegojnë qytetarëve ndryshimet e propozuara, duke mos e lënë debatin vetëm në media.

“Nga burimet e brendshme që kemi dhe diskutimet e bëra nga aty i gjithë e gjithë tematika ka qenë dokumenti Besa në mënyrën se si ai është arritur të kuptohet nga ana e deputetëve, por dhe ministrave dhe mënyrën se si ata do duhet t’ia shpjegojnë shumë herë dhe më mirë elektoratit dhe zonave të tyre elektorale, por edhe shqiptarëve. Gjithashtu një fokus në këtë takim është vendosur edhe tek pjesa e reformës territoriale për shkrirjen e 15 bashkive, ku po ashtu Rama ka qenë disi i ashpër dhe me drejtuesit politikë të qarqeve. Ndërkohë që një pjesë e tyre sigurisht janë dhe ministra duke kërkuar që duhet të jenë ata të cilët duhet ta shpjegojnë më së miri për komunitetet e tyre respektive këtë reformë territoriale dhe jo ajo të bëhet përmes televizioneve që në shumicën e rasteve nuk arrin të kuptohet aq sa duhet nga qytetarët. Gjithashtu është prekur lehtë edhe pjesa e zgjedhjeve lokale, dhe sigurisht që do duhet të kemi emra të cilët jenë shumë të pastër dhe shumë pranë komunitetit. Të paktën kjo ka qenë një këshillë e kryeministrit Rama në lidhje me këtë pjesë”.

Takimi pritet të vijojë edhe të hënën, kur ministrat dhe drejtuesit e institucioneve do të raportojnë për realizimin e objektivave dhe prioritetet e qeverisë për muajt në vijim.

Një incident është regjistruar në Krastë të Krujës ku zjarrfikësit po vijojnë punën për shuarjen e vatrave të zjarrit. Një person ka shtënë dy herë me armë për të paralajmëruar zjarrfikësit që të largohen.

Këta të fundit kanë njoftuar policinë dhe po vazhdojnë me përpjekjet për të izoluar 5 vatrat që ndodhen në disa pika.

Flakët po përhapen të favorizuara nga era, ndërsa në terren janë angazhuar forcat zjarrfikëse të Krujës, me mbështetje nga Kamza dhe Vora, ndërsa po ndërhyhet nga ajri me 1 helikopter. Ministria e Mbrojtjes thotë se kjo është aktualisht zona ku është përqendruar vëmendja kryesore, pasi zjarri paraqitet me intensitet dhe pranë zonave të banuara.

Gjatë orëve të drekës, zjarri në zonën e Pishë Poros, pranë grykëderdhjes së Vjosës, është riaktivizuar sërish. Edhe mbi Palasë, në malin e Çikës zjarri vijon në terren të thepisur dhe të paaksesueshëm. Në të dy zonat po punohet me 2 avionët “Air Tractor” për shuarjen e flakëve.

Problematike situata paraqitet në Pukë, ku vijojnë të digjen sipërfaqe pyjesh, por nuk ka rrezik për banesat. Ndërkohë, situata në Gojan–Gjegjan është përmirësuar ndjeshëm, me vatrat të izoluara ose të fikura dhe nën mbikëqyrje.

Në dy vatrat e Mirditës, zjarri është aktiv por me intensitet të ulët, ndërsa në Tenë situata paraqitet e stabilizuar. Njëjtë si edhe në Dajt, ku po angazhohet edhe një helikopter për fikjen e plotë të flakëve dhe nuk ka rrezik për zonat e banuara. Ndërkohë po sot, është riaktivizuar zjarri në dy vatra në pyll me pisha të dendura në Bulqizë.

Sipas përditësimit të Ministrisë së Mbrojtjes, në operacionet e sotme janë angazhuar 213 forca, 10 mjete zjarrfikëse, një ekskavator i rëndë, 2 helikopterë dhe 2 avionë Air Tractor.

21 vatra zjarri janë shënuar në 24 orët e fundit në të gjithë vendin, ndërsa deri në orën 14:00 të kësaj të diele, 7 vatra mbeten aktive dhe 8 të tjera janë nën mbikëqyrje.

Nga Leonidha Mërtiri

Kryeministri i Maqedonisë së Veriut Cristijan Mickoski ishte këto ditë në Pustec, për të marrë pjesë në një aktivitet të kësaj zone. Në hapje të ceremonisë, ndërsa himni maqedonas u ekzekutua, himni ynë kombëtar, i cili njihet dhe si himn i flamurit, mbeti i përjashtuar.

Si mund të ndodhte kështu? Simbolet kombëtare personifikojnë historinë, kulturën e një vendi. Në reagimin e Ministrisë së Evropës dhe Punëve të Jashtme nënvizohet qartë: Respekti për simbolet kombëtare në Pustec është pjesë e respektit për qytetarët, bashkëjetesën demokratike, si një element i rëndësishëm i fqinjësisë së mirë dhe marrëdhënieve të shëndosha mes dy vendeve.

Po përse nuk u ekzekutua himni ynë? Sepse paragjykimet e së djeshmes, të njohura tashmë, në forma të ndryshme rrinë zgjuar ndën hi dhe nxjerrin krye dhe trup në momente të veçanta, edhe pse marrëdhëniet dypalëshe është dashur të kalojnë përmes vështirësish të shumta. Janë këto nacionalizma ekstreme apo delire antishqiptare që kërkojnë të toksikojnë ecurinë e këtij bashkëpunimi në rrugën e përbashkët të anëtarësimit në Bashkimin Europian, që mbrojnë ngjyrat e diskriminimit etnik, kundër bashkëjetesës.

Ajo çka ndodhi në Pustec, mendoj se nuk është padije e protokollit. Është hera e dytë që ndodh e njëjta gjë, sikurse ka ndodhur dhe më parë me grisje të flamurit apo me parrulla kundër shqiptarëve. Pavarësisht bashkëpunimit të mirë me fqinjët tanë, me këta të fundit nuk mund të mjaftohemi me një deklaratë. E themi këtë se nuk është rastësi, por dhe as të dëgjojmë parafabrikatin e hershëm se “ka elementë që nuk e shikojnë me sy të mirë mbarëvajtjen e bashkëpunimit tonë me Shqipërinë”. Mirëpo, vizita kryesohej nga kryeministri i vendit që është dhe kryetar i partisë VMRO-DPMNE, të cilën ai e drejton prej nëntë vjetësh, pas largimit të Nikola Gruevskit. Kjo parti është e njohur për historinë e saj antishqiptare, qysh nga themelimi, në 1990.

Ana tjetër. Kryeministria ka një department protokolli, Ministria e Jashtme gjithashtu ka një Drejtori të Protokollit Diplomatik që paraprijnë me programin për vizitën e Kryeministrit, pas një komunikimi të përbashkët me palën pritëse. Gjithçka është e qartë. Atëherë çështje harrese? Sikurse nuk duhet dhe ne ta shtyjmë në harresë. Fjala nuk është kurrsesi për të krijuar tensione, por dhe as për ta reduktuar reagimin në një deklaratë. E themi këtë se nga pala maqedone vazhdon të heshtet. Heshtja nuk është reagim, por udhë për të ecur më tej me lehtësi qëndrime të tilla.

Me sa duket, hijet antishqiptare, sidomos të VMRO-DPMNE-së qëndrojnë, megjithatë, të gatshme të shfaqen në forma të ndryshme si në Pustec. Shqipëria u kushton vëmendje të veçantë marrëdhënieve me fqinjët, sikurse në këtë rast me Maqedoninë e Veriut. Historia e marrëdhënieve tona dypalëshe është dëshmitarja më e mirë. Shpallja e pavarësisë së Maqedonisë së Veriut pas divorcit me Beogradin kërkonte forcimin e bashkëpunimit me fqinjët. Dhe, siç deklaronte në ato vite Ministria e Informacionit të shtetit të ri maqedonas, “Maqedonisë i mbetet në afat sa më të shkurtër të shqyrtojë interesat e veta dhe nevojat për bashkëpunim me fqinjin tonë perëndimor, Shqipërinë dhe të reagojë me kohë në këtë drejtim”. Për këtë qëllim u shpejtua vizita zyrtare në vendin tonë e një delegacioni qeveritar, kryesuar nga kryeministri  Nikolla Klusev, e cila u mbyll me vizitën e tij po në Pustecin që po flasim sot.

Ishim nga vendet e para që e njohëm shtetin e Maqedonisë së Veriut dhe kur u bllokua nga të tjerët, sidomos për daljen në det, Shqipëria i krijoi gjithë lehtësitë përmes portit të Durrësit, me dëshirën e vazhdueshme për bashkëpunim të gjithanshëm. Shqiptarët që jetojnë në Maqedoninë e Veriut janë të përkushtuar për shtetin e tyre. Por ky përkushtim nuk mund të jetë i njëanshëm.

Anatemimi i përdorimit zyrtar të gjuhës shqipe dhe izma të tjera nuk mund të mos vlerësohen seriozisht nga qeveria e Mickoskit, për të ruajtur Marrëveshjen e Ohrit, nënshkruar 25 vite më parë, që i dha ndër të tjera, legjitimitetin rritjes së të drejtave të shqiptarëve, si zyrtarizimi i gjuhës shqipe, çështje që lidhen me arsimin, simbolet e të tjera. Pra, për një vizion të përbashkët për të sotmen dhe të nesërmen, për t’u mbyllur derën tensioneve etnike, që ato të mos nxiten apo të hyjnë nga dritarja.

Presidenti ukrainas Volodimir Zelenski duhet t’i përgjigjet disa pyetjeve për korrupsionin në qeverinë e tij, tha ministri i shkarkuar i Mbrojtjes, Mikhail Fedorov për mediat. Fedorov, një ministër mjaft popullor që modernizoi Forcat e Armatosura dhe ishte pioner i luftës me dron ndaj Rusisë, u shkarkua nga detyra në korrik, pasi siç u raportua nga qeveria në Kiev, dështoi të drejtojë Forcat e Armatosura ukrainase.

Fedorov tha për mediat, se hetimet për pastrim parash, të njoftuara javën e shkuar, ngritën pikëpyetje rreth vetëdijes së Zelenskit për korrupsion potencial brenda rrethit të tij të ngushtë. Sipas ish ministrit, demokracia në Ukrainë, nuk duhet të mbetet peng i Putin, teksa përmes një videoje pak ditë më parë, Fedorov shpalli publikisht ambicien e tij politike dhe thirrjen për mbajtjen e zgjedhjeve parlamentare e presidenciale, edhe në kohë lufte.

Ukraina ka në fuqi ligjin e luftës, që prej nisjes së pushtimit rus në 2022, që nënkupton se zgjedhjet në kohë lufte, janë të pezulluara. Por Fedorov thotë se është në moralin e lartë të Zelenskit, të lejojë mbajtjen e tyre. Ish-kreu i Mbrojtjes vë në dyshim aftësinë e Zelenskit për të fituar sërish zgjedhjet, pas 4 viteve e gjysmë luftë në vend, teksa për vetë presidentin, mbajtja e zgjedhjeve në kohë lufte do të ishte e rrezikshme.

Dy persona kanë rënë në pranga të Policisë së Tiranës, të dyshuar se po trafikonin lëndë narkotike heroinë e kokainë. Lajmin për zhvillimin e këtij operacioni e ka bërë publik drejtori i Policisë së Tiranës, Oliger Torba në një konferencë për shtyp.

“Strukturat vendore të Policisë Tiranë janë të angazhuara maksimalisht për parandalimin e ngjarjeve kriminale, evidentimin dhe goditjen e paligjshmërive, kapjen e personave në kërkim, të atyre që qarkullojnë me armë zjarri apo tentojnë t’i trafikojnë ato, për goditjen e trafikimit të lëndëve narkotike, si dhe për ndjekjen në dinamikë të konflikteve dhe denoncimeve të drejtuara nga qytetarët”, tha Torba.

Konkretisht, 2 të arrestuarit po trafikonin drejt Durrësit me një automjet tip “Mercedes-Benz” 2 kilogramë heroinë dhe 3 kilogramë kokainë, të ndara në pako dhe të futura në një çantë.

“Ky operacion është në vazhdën e operacioneve të njëpasnjëshme të zhvilluara nga strukturat vendore të Policisë Tiranë për goditjen e shitjes dhe trafikimit të lëndëve narkotike, ku jo më larg se një javë më parë u kapën edhe dy shtetas me 250 gramë kokainë, si dhe gjatë dy javëve të fundit janë finalizuar disa operacione për kapjen e personave në kërkim me rrezikshmëri dhe të atyre që qarkullojnë të armatosur, ku ishin të përfshirë edhe shtetas të huaj”, tha Torba.

Ndër të tjera, drejtori Torba solli në vëmendje dhe konflikt mes 28 të miturve në Tiranë që u parandalua në kohë nga policia. Sherri me të miturve nga mosha 13 deri në 17 vjeç, kishte nisur nga rrjeti social TikTok. Njëri prej tyre pretendoi se i kanë ngacmuar motrën në rrjete sociale dhe mblodhi grupin për tu konfliktuar. Të miturit ishin ndarë në grupe ndërsa me vete kishin thika e kaçavida.

“Përfitoj nga rasti t’u drejtohem prindërve që të bashkëpunojnë me inspektorët e Policisë në zona, me Patrullat e Përgjithshme që janë në terren, për çdo rast të dyshimtë që konstatojnë te fëmijët, me qëllim ndërhyrjen në kohë për të parandaluar ngjarje me rrezik për jetën”, tha drejtori i Policisë Tiranë.

Kievi hapi kutinë e Pandorës me sulmet dhe goditjet e saj mbi shënjestrat ekonomike ruse dhe tani Rusia do duhet të hakmerret, duke goditur mbrapsht sektorët më të ndjeshëm të ekonomisë ukrainase.

Ky ishte paralajmërimi i fundit i presidentit rus, Vladimir Putin. Këtë verë, Ukraina ka përshkallëzuar një fushatë të egër me sulme me dronë ndaj infrastrukturës ekonomike ruse, përfshirë këtu edhe rafineritë e naftës dhe fabrikat e magazinat e mëdha të prodhimit masive, duke shkatërruar kësisoj edhe përpjekjet e Rusisë qëndrore, që jo vetëm t’i mbijetojnë luftës, por edhe të fitojnë prej saj.  Rusia nga ana tjetër është kundërpërgjigjur po njësoj, duke sulmuar eksportet e grurit ukrainas përmes detit të zi.

“Regjimi i Kievit ka dëmtuar rëndë ekonominë tonë. Çfarë bëmë ne? Është hapur tashmë kutia e Pandorës. Atëherë, të presin të njëjtën përgjigje, do t’i godasim në sektorët më jetikë të ekonomisë”, tha Putin në një intervistë për televizionin shtetëror rus.

Lideri rus theksoi edhe njëherë pozicionin e tij, se Moska është e hapur për bisedime të paqes por vetëm mbi baza reale dhe jo sipas propozimeve ekzotike që propozon presidenti ukrainas Volodimir Zelenski.

Deputetë të Aleancës për Ardhmërinë e Kosovës (AAK) kanë derdhur në dyert e ndërtesës qeveritare në Kosovë, thasë me qymyr. Ky veprim është simbolikë e pakënaqësisë për blerjen e energjisë elektrike në Serbi, pavarësisht rezervave të mëdha të qymyrit.

Ata kanë lënë në hyrje edhe një pankartë, me mesazhin: “Kurti dhe LVV, nga terri energjetik, në terrin politik”. Deputeti i AAK-së, Burim Ramadani, tha se simbolika e qymyrit lidhet me potencialin energjetik të Kosovës, i cili, sipas tij, nuk po shfrytëzohet.

Kjo protestë përpara godinës së kryeministrit në detyrë Albin Kurti, vjen në një kohë që Kosova ndodhet në krizë për shkak të mosmarrëveshjeve mes partive dhe kundërshtisë së politikave të Kurtit.

Deri dje, Kurtit i ishte “bllokuar” hyrja për në zyrë nga deptuetët e Partisë Demokratike të Kosovës (PDK), të cilët protestonin për mosvazhdimin e procesit për konstituimin e Kuvendit duke thënë se kryeministri aktual është ilegjitim.

Zgjedhjet e fundit në Kosovë u mbajtën me 7 qershor, rezultat që u dominua përsëri nga Lëvizja Vetëvendosje e Albin Kurtit, i cili mori 53 mandate. Rrjedhimisht ai ka nevojë për bashkim forcash me opozitën për t’i dhënë vendit presidentin e ti e për t’i dhënë fund krizës institucionale.

Duhen të paktën 61 për ta konstituuar Kuvendin dhe formuar Qeverinë e re. Për zgjedhjen e presidentit të Kosovës nevojitet prania e 80 deputetëve në sallën e Kuvendit me 120 vende që votimi të jetë i vlefshëm.

Presidenti ukrainas Volodimir Zelenski duhet t’i përgjigjet disa pyetjeve për korrupsionin në qeverinë e tij, tha ministri i shkarkuar i Mbrojtjes, Mikhail Fedorov për mediat. Fedorov, një ministër mjaft popullor që modernizoi Forcat e Armatosura dhe ishte pioner i luftës me dron ndaj Rusisë, u shkarkua nga detyra në korrik, pasi siç u raportua nga qeveria në Kiev, dështoi të drejtojë Forcat e Armatosura ukrainase.

Fedorov tha për mediat, se hetimet për pastrim parash, të njoftuara javën e shkuar, ngritën pikëpyetje rreth vetëdijes së Zelenskit për korrupsion potencial brenda rrethit të tij të ngushtë. Sipas ish ministrit, demokracia në Ukrainë, nuk duhet të mbetet peng i Putin, teksa përmes një videoje pak ditë më parë, Fedorov shpalli publikisht ambicien e tij politike dhe thirrjen për mbajtjen e zgjedhjeve parlamentare e presidenciale, edhe në kohë lufte.

Ukraina ka në fuqi ligjin e luftës, që prej nisjes së pushtimit rus në 2022, që nënkupton se zgjedhjet në kohë lufte, janë të pezulluara. Por Fedorov thotë se është në moralin e lartë të Zelenskit, të lejojë mbajtjen e tyre. Ish-kreu i Mbrojtjes vë në dyshim aftësinë e Zelenskit për të fituar sërish zgjedhjet, pas 4 viteve e gjysmë luftë në vend, teksa për vetë presidentin, mbajtja e zgjedhjeve në kohë lufte do të ishte e rrezikshme.

Nje vatër zjarri eshte shfaqur kete mesdite në zonën e Krastës.

Nga zjarri janë djegur masive me pisha, ndërsa menjëherë zjarrfikësit dhe nje helikopter po punojnë për izolimin e vatrave të zjarrit pranë Krastës.

Dyshohet zjarrvënie e qëllimshme sipas një banori të fshatit Halilaj.

Dylber Shuli nga Zagorçani i Pogradecit është ndarë nga jeta pa mundur të shohë pesë nipërit dhe mbesat e tij, të cilët prej vitesh ndodhen në kampet e Sirisë.

Për më shumë se një dekadë, i moshuari priti kthimin e fëmijëve të familjes së tij në Shqipëri, ndërsa iu drejtua vazhdimisht autoriteteve për ndihmë. Shpresa për t’i parë sërish në shtëpinë e familjes ishte shprehur publikisht prej tij në disa raste.

“Kam shpresë deri sa të vdes”, ishte shprehur Dylber Shuli në një prej intervistave të tij.

Djali i tij, Krenar Shuli, ishte larguar drejt Sirisë në vitin 2013, së bashku me bashkëshorten dhe fëmijët. Pas humbjes së prindërve, fëmijët mbetën në kampet siriane, ndërsa historia e tyre vijoi të mbetet në pritje të një zgjidhjeje për riatdhesimin.

Vajza e madhe, Elona, u martua në Siri kur ishte ende e mitur dhe më pas u bë nënë.

Operacionet e riatdhesimit nuk përfshinë familjen Shuli

Gjatë viteve, Shqipëria ka zhvilluar disa operacione për kthimin e shtetasve shqiptarë nga kampet në Siri. Në vitin 2020 u riatdhesuan pesë shqiptarë, mes tyre katër fëmijë, ndërsa në vitin 2022 u kthyen 13 persona, nëntë prej tyre të mitur.

Por në këto operacione nuk u përfshinë nipërit dhe mbesat e Dylber Shulit.

Çdo operacion i ri i riatdhesimit rikthente përkohësisht shpresën e familjes se edhe fëmijët e tyre do të mund të ktheheshin në Shqipëri. Edhe kthimi i Eva Dumanit, në shkurt të këtij viti, u shoqërua me pritshmëri për një zgjidhje të çështjes.

Por Dylber Shuli nuk arriti ta shihte atë ditë.

Ai u nda nga jeta duke lënë pas një pritje që zgjati për më shumë se dhjetë vjet. Për të, kërkesa ishte e thjeshtë: një lajm për fëmijët dhe, mbi të gjitha, mundësia për t’i parë e për t’i përqafuar sërish.

Vdekja e tij rikthen në vëmendje historinë e familjeve shqiptare që ende presin kthimin e të afërmve të tyre nga kampet e Sirisë dhe pyetjet e pazgjidhura rreth riatdhesimit të tyre.

Një zjarr ka rënë në një nga lokalet në zonën e Triportit, në Vlorë, duke rrezikuar përhapjen edhe në drejtim të Pyllit të Sodës.

Menjëherë pas marrjes së njoftimit, në vendngjarje kanë mbërritur mjetet zjarrfikëse, të cilat kanë nisur ndërhyrjen për të vënë flakët nën kontroll dhe për të parandaluar përhapjen e zjarrit në zonën pyjore.

Forcat zjarrfikëse vijojnë punën në terren për neutralizimin e vatrës dhe shmangien e çdo rreziku të mëtejshëm.

Zjarri në një lokal në Triport, rrezikohet Pylli i Sodës,

Ndërkohë zjarri që ra ditën e djeshme në zonën e Pishporos, pranë grykëderdhjes së Vjosës, është riaktivizuar sërish. Flakët janë përhapur në zonën e prekur nga zjarri, ndërsa në këto momente ka nisur ndërhyrja nga ajri.

Dy avionë janë angazhuar për shuarjen e flakëve dhe vënien nën kontroll të situatës. Terreni i vështirë dhe era favorizojnë përhapjen e zjarrit, duke e bërë ndërhyrjen nga toka më të vështirë.

Ka nisur takimi i thirrur nga kryeministri Edi Rama në rezidencën qeveritare në Pogradec, ku marrin pjesë 12 drejtuesit politikë të qarqeve të Partisë Socialiste, si dhe kryetarët e komisioneve parlamentare.

Drejtuesit politikë kanë mbërritur gradualisht në rezidencën qeveritare, ndërsa kryeministri Rama ka mbërritur rreth orës 11:20.

Sipas burimeve të cituara nga mediat, takimi është përqendruar fillimisht te organizimi i strukturave të Partisë Socialiste dhe orientimet për punën në terren.

Shkrirja e bashkive, pjesë e diskutimeve

Një prej çështjeve të diskutuara raportohet të ketë qenë edhe shkrirja e disa bashkive. Rama mësohet t’u ketë kërkuar drejtuesve politikë të zonave ku është diskutuar kjo çështje që të shpjegojnë te qytetarët se ndryshimet synojnë, sipas tij, ofrimin e shërbimeve më të shumta dhe më të shpejta.

Sipas të njëjtave burime, gjatë diskutimit është ngritur edhe çështja e reagimeve të banorëve dhe strukturave lokale ndaj mundësisë së ndryshimit të organizimit territorial.

Nis përgatitja për zgjedhjet lokale të 2027

Në takim është diskutuar gjithashtu për zgjedhjet lokale të vitit 2027. Kryeministri Rama mësohet t’u ketë kërkuar drejtuesve politikë që të nisin identifikimin e emrave dhe figurave që kanë lidhje të drejtpërdrejtë me komunitetet lokale.

Në fokus pritet të jetë përzgjedhja e kandidatëve dhe forcimi i strukturave të Partisë Socialiste në nivel vendor.

Sipas burimeve, gjatë mbledhjes Rama ka kërkuar gjithashtu leximin e dy dokumenteve të cilësuara “Besa” dhe “Prania Besnike”.

Takimi pritet të vijojë edhe ditën e nesërme, kur në rezidencën qeveritare pritet të jenë të pranishëm ministrat, por edhe drejtues të institucioneve të tjera.

Në përfundim të punimeve pritet të përpilohet një dokument me çështjet e diskutuara dhe objektivat e përcaktuara, përfshirë ato që lidhen me përgatitjet për zgjedhjet lokale të vitit 2027.

Vazhdojnë rezultatet pozitive të mundësve shqiptarë në Lojërat Mesdhetare Taranto 2026, që po transmetohen drejtpërdrejt në RTSH.

Zelimkhan Abakarov është kualifikuar në gjysmëfinalet e stilit të lirë në peshën 65 kg dhe do të përballet me sirianin Dirki për një vend në finalen e madhe sot në orën 17:00.

Edhe mundësi tjetër kuqezi Islam Dudaev ka siguruar një vend në gjysmëfinalet e peshës 74 kg. Dudave do të përballet me spanjollin Mottaghinia për një vend në finalen e madhe sot në orën 17:10.

Policia po mbledh prova të reja për të zbardhur rrethanat e ngjarjes së rëndë në Athinë, ku 50-vjeçari Altin Allmuça vrau të dashurën 45-vjeçare dhe më pas kreu vetëvrasje.

Autoritetet po përpiqen të përcaktojnë marrëdhënien mes dy personave dhe motivin e krimit. Sipas informacioneve të publikuara nga mediat greke, Allmuça ishte i martuar dhe baba i një fëmije. Gruaja e tij mësohet t’u ketë thënë autoriteteve se nuk kishte dijeni për marrëdhënien e bashkëshortit me viktimën.

Policia po shqyrton provat që tregojnë se mes 50-vjeçarit dhe 45-vjeçares mund të ketë pasur një marrëdhënie personale, ndërsa natyra, kohëzgjatja dhe dinamika e saj nuk janë përcaktuar ende.

Në kuadër të hetimeve, policia ka kontrolluar banesën e Allmuçës në Tavros, në kërkim të provave që mund të ndihmojnë në zbardhjen e marrëdhënies mes tyre dhe përgatitjen e krimit.

Në fokus janë pajisjet elektronike, dokumentet dhe sende të tjera që mund të ndihmojnë në rindërtimin e lëvizjeve të tij para ngjarjes.

Gjithashtu, po analizohen telefonat celularë dhe aktiviteti online i dy personave, për të përcaktuar nëse ka pasur komunikime, takime apo konflikte para vrasjes.

Sipas hetimeve paraprake, 50-vjeçari shqiptar dyshohet se kishte ngritur një kurth për 45-vjeçaren dhe e priste jashtë banesës së vajzës së saj. Pasi e qëlloi për vdekje, ai përdori të njëjtën armë për t’i dhënë fund jetës.

Ndërkohë:

“Nuk di asgjë, ajo nuk më kishte thënë asgjë.” Janë këto fjalët e nënës së 45-vjeçares shqiptare, e cila u ekzekutua mëngjesin e së dielës në Nea Smyrni të Athinës nga një 48-vjeçar, i cili më pas vrau veten.

E moshuara tregoi se e mësoi lajmin tragjik për vrasjen e vajzës së saj përmes një telefonate paniku nga vajza tjetër. Me zërin që i dridhej, ajo u shpreh se viktima nuk i kishte treguar kurrë për ndonjë lidhje romantike apo probleme me autorin, ndërsa shtoi se ajo dhe ish-bashkëshorti i saj ishin ndarë shumë kohë më parë.

Ngjarja e rëndë ndodhi rreth orës 05:30 të mëngjesit jashtë pallatit ku 45-vjeçarja jetonte së bashku me vajzën e saj 16-vjeçare. Autori 48-vjeçar, gjithashtu shqiptar, i kishte ngritur një pritë të mirëmenduar duke e pritur në automjetin e tij. Sapo viktima ka dalë nga ndërtesa, ai i është afruar dhe e ka qëlluar për vdekje me armë, para se të drejtonte armën nga vetja dhe të qëllonte në kokë.

Banorët e zonës dëgjuan tre të shtëna të forta brenda pak sekondash, të cilat u pasuan nga mbërritja e menjëhershme e forcave të policisë.

Ndërkohë, Drejtoria Kundër Krimit të Organizuar ka marrë çështjen në dorë për të zbardhur motivet e krimit dhe për të kuptuar natyrën e saktë të marrëdhënies mes tyre, pasi nuk rezulton të kenë qenë të martuar. Autoritetet po ekzaminojnë gjithashtu profilin e autorit në rrjetet sociale, ku ai kishte postuar fotografi duke pozuar me armë zjarri.

Ish-drejtori i Përgjithshëm i Shërbimit Zjarrfikës, Arben Cara, ka reaguar përmes një postimi në rrjetet sociale pas largimit të tij nga detyra në mes të gushtit, në një periudhë të shënuar nga zjarre të shumta në vend.

Në reagimin e tij, Cara ka deklaruar se vendimi i zëvendësministrit të Brendshëm, Besfort Lamallari, për transferimin e kompetencave drejtuese është marrë brenda gjashtë minutash.

Cara ka kundërshtuar mënyrën se si, sipas tij, është vlerësuar puna e drejtimit të strukturave zjarrfikëse. Ai thekson se performanca e një drejtuesi nuk mund të matet vetëm përmes përparimit të flakëve në terren.

Sipas ish-drejtorit, ekipet zjarrfikëse nuk mund të urdhërohen të hyjnë në situata ku rrezikohet jeta e tyre, duke vënë në dukje vështirësitë me të cilat përballen efektivët gjatë ndërhyrjeve.

“Zjarri nuk luftohet me lajme dhe fotografi”, është shprehur Cara në reagimin e tij.

Ndërkohë, pas largimit të tij nga drejtimi i strukturave të mbrojtjes nga zjarri, Ministria e Punëve të Brendshme ka prezantuar Ervis Gjoshin si drejtuesin e komanduar të Shërbimit të Mbrojtjes nga Zjarri dhe Shpëtimit.