Italia ka zgjatur me 15 ditë pezullimin e zbatimit të Marrëveshjes së Shengenit me Spanjën. Në përgjigje të këtij vendimi, edhe Ministria e Brendshme spanjolle ka njoftuar zgjatjen e kontrolleve kufitare për pasagjerët që mbërrijnë nga Italia.

Roma e kishte vendosur masën më 1 gusht, për një periudhë njëmujore, për shkak të situatës së krijuar në enklavën spanjolle të Ceutës.

Sipas Ministrisë së Brendshme italiane, vendimi për zgjatjen e kontrolleve është marrë pas analizës së Komitetit të Analizës së Migracionit dhe Sigurisë Kufitare. Autoritetet italiane vlerësojnë se kushtet që çuan në vendosjen e masës më 1 gusht vijojnë të jenë të pranishme.

Qeveria italiane ka bërë të ditur se në vendimmarrje janë marrë parasysh edhe iniciativat e ndërmarra nga Spanja, në bashkëpunim me Bashkimin Evropian, me synim normalizimin sa më të shpejtë të situatës në Ceuta.

Kriza në enklavën spanjolle u shoqërua me një fluks masiv emigrantësh nga Maroku, duke shtuar shqetësimet për menaxhimin e migracionit dhe sigurinë kufitare.

Ndërkohë, kryeministri spanjoll Pedro Sánchez deklaroi të hënën, më 31 gusht, se qeveria e tij po vijon hetimet për atë që ndodhi në Ceuta, një muaj pas fluksit masiv të emigrantëve nga Maroku drejt enklavës spanjolle.

Me zgjatjen e masës, kontrollet kufitare mes dy vendeve do të vijojnë edhe për 15 ditë të tjera.

Komisioni Evropian ka njoftuar se ChatGPT do t’i nënshtrohet rregullave më të rrepta të Bashkimit Evropian për platformat e mëdha online, në kuadër të Aktit të Shërbimeve Dixhitale (DSA). ChatGPT, së bashku me platformën e lojërave Roblox dhe rrjetin social Reddit, është përfshirë në listën e platformave dhe motorëve kryesorë të kërkimit që i nënshtrohen regjimit më të rreptë të DSA-së, pasi të trija kanë kaluar pragun prej 45 milionë përdoruesish në Bashkimin Evropian.

Ky zhvillim e bën ChatGPT shërbimin e parë të Inteligjencës Artificiale (IA) që përfshihet në këtë kuadër të zgjeruar rregullator të BE-së.

Sipas të dhënave të publikuara nga kompanitë, funksioni i kërkimit i ChatGPT kishte mesatarisht rreth 159 milionë përdorues aktivë mujorë në BE gjatë gjashtë muajve që përfunduan në mars 2026. Në të njëjtën periudhë, Reddit raportoi rreth 57.2 milionë përdorues, ndërsa Roblox rreth 48 milionë.

Pas përcaktimit si platforma shumë të mëdha online, të tre shërbimet kanë një afat prej katër muajsh, deri në fund të nëntorit, për të përmbushur detyrimet shtesë të parashikuara nga DSA.

Ndër kërkesat kryesore janë kryerja e vlerësimeve vjetore të rreziqeve sistemike, që duhet të analizojnë çështje të tilla si përhapja e përmbajtjes së paligjshme, mbrojtja e të miturve, ndikimi i platformave në mirëqenien mendore dhe fizike të përdoruesve, respektimi i të drejtave themelore, proceset zgjedhore dhe siguria publike.

Platformat do të duhet gjithashtu t’i nënshtrohen auditimeve të pavarura dhe të ofrojnë të dhëna për rregullatorët evropianë dhe studiuesit e miratuar.

Kina jep alarmin se ka rrezik të lartë për një tjetër përmbytje pranë kufirit me Nepalin, pasi rrëshqitjet e dheut kanë krijuar një liqen të ri natyror.

Mbetjet e shembjeve kanë bllokuar rrjedhën e dy lumenjve, Chhochen Khola dhe Purepu Tsangpo, duke bërë që uji të grumbullohet pas barrierës së krijuar nga dheu dhe shkëmbinjtë.

Deri të premten, liqeni kishte grumbulluar rreth 2.5 milionë metra kub ujë, ndërsa niveli pritet të rritet më tej për shkak të reshjeve. Autoritetet kineze druhen se nëse barriera natyrore nuk përballon presionin e ujit, liqeni mund të dalë nga shtrati dhe të shkaktojë një valë të re përmbytjesh dhe rrëshqitjesh dheu në zonat përreth.

Paralajmërimi vjen vetëm pak ditë pas një përmbytjeje të fuqishme në rajon, e cila shkaktoi qindra viktima dhe persona të zhdukur. Sipas shkencëtarëve, katastrofa mund të jetë shkaktuar nga shembja e një akullnaje, e cila çliroi një sasi të madhe uji dhe mbetjesh që u përhapën përgjatë lumit. Për shkak të rrezikut të situatës, autoritetet kineze kanë pezulluar përkohësisht disa operacione shpëtimi, ndërsa ekipet inxhinierike po monitorojnë vazhdimisht nivelin e ujit dhe stabilitetin e liqenit.

Për këtë qëllim po përdoren edhe dronë për të vëzhguar zonën dhe për të identifikuar ndryshime që mund të tregojnë një çarje ose shembje të barrierës. Megjithatë, ka ende shpresa se jo çdo rritje e nivelit të ujit do të çojë domosdoshmërisht në një katastrofë. Ekziston mundësia që uji të gjejë gradualisht një rrugë natyrore për të dalë nga liqeni, duke ulur presionin dhe duke shmangur një përmbytje të menjëhershme.

Ndërkohë, edhe Nepali ka marrë masa parandaluese. Autoritetet u kanë kërkuar banorëve të qëndrojnë larg lumenjve Bhote Koshi dhe Trishuli, pasi bllokimet e mundshme të rrjedhave dhe rritja e nivelit të ujit mund të shkaktojnë përmbytje të tjera.

Bekim Sejdiu pritet të jetë kandidati për president i dalë nga marrëveshja mes Lëvizjes Vetëvendosje dhe Lidhjes Demokratike të Kosovës, duke u shfaqur si figura mbi të cilën dy subjektet politike kanë gjetur dakordësinë pas javësh diskutimesh.

Por përtej zhvillimeve të fundit politike, Sejdiu ka pas vetes një karrierë të shtrirë në drejtësi, diplomaci dhe akademi.

I lindur në vitin 1974, ai ka qenë pjesë e Gjykatës Kushtetuese të Kosovës për gjashtë vite. Sejdiu u emërua gjyqtar në prill të vitit 2015 dhe qëndroi në këtë detyrë deri në vitin 2021, kur dha dorëheqje.

Gjatë punës në Gjykatën Kushtetuese, ai ka pasur rol në disa çështje me rëndësi për zhvillimet politike dhe institucionale në vend. Në mesin e tyre ishte edhe rasti që lidhej me Qeverinë e Avdullah Hotit, i cili u bë pjesë e një prej vendimeve më të rëndësishme politike të vitit 2020.

Përpara se të merrte detyrën si gjyqtar kushtetues, Sejdiu ishte angazhuar në diplomacinë e Kosovës.

Nga viti 2008 deri në vitin 2012, ai ka shërbyer si ambasador i Kosovës në Turqi. Pas përfundimit të këtij mandati, karrierën diplomatike e vazhdoi në Shtetet e Bashkuara, ku ishte konsull i përgjithshëm i Kosovës në Nju-Jork nga viti 2012 deri më 2014.

Rrugëtimi i tij në institucionet e politikës së jashtme kishte nisur edhe më herët. Sejdiu ka qenë këshilltar politik në kabinetin e ministrit të parë të Punëve të Jashtme të Republikës së Kosovës.

Paralelisht me angazhimet institucionale, ai ka ndërtuar një karrierë në akademi. Sejdiu është profesor në Fakultetin Juridik të Universitetit të Prishtinës, ku ligjëron që nga viti 2002.

Formimi i tij akademik nis me studimet në drejtësi në Universitetin e Prishtinës dhe vazhdon me studime pasuniversitare në marrëdhënie ndërkombëtare, demokraci dhe të drejta të njeriut. Ai ka përfunduar edhe doktoraturën në fushën e studimeve ndërkombëtare dhe diplomatike.

Emri i Sejdiut u vendos në tryezën e negociatave mes Albin Kurtit dhe Lumir Abdixhikut në kuadër të përpjekjeve për të gjetur një kandidat që do të mund të siguronte mbështetje politike për postin e presidentit.

Pas disa takimesh, përfshirë edhe diskutimet e zhvilluara në ambientet e Kuvendit, dy liderët politikë u dakorduan për kandidaturën e tij.

Tashmë, rruga e Sejdiut drejt Presidencës varet nga votimi në Kuvendin e Kosovës.

Në dy raundet e para kërkohen 80 vota, ndërsa në raundin e tretë kandidati mund të zgjidhet me 61 vota. Për zhvillimin e votimit duhet të jenë të pranishëm të paktën 80 deputetë.

Kryeministri Edi Rama ka njoftuar se ka nisur zbatimi i projektit për pajisjen e shkollave me kamera inteligjente, me synim rritjen e sigurisë së nxënësve dhe reagimin më të shpejtë ndaj situatave problematike.

Gjatë prezantimit të projektit, Rama tha se në Tiranë janë pajisur tashmë 20 shkolla me sistemin e ri të kamerave, ndërsa theksoi se ky është vetëm fillimi i një procesi që do të shtrihet gradualisht në të gjitha shkollat.

Kryeministri e lidhi këtë nismë me një tragjedi të ndodhur më herët në një shkollë të Tiranës, ku humbi jetën Martin Cani, ku sipas Ramës, sistemet ekzistuese të kamerave nuk kishin mundur të ndihmonin sa duhej në zbardhjen e dinamikës së ngjarjes.

“Kur një tragjedi e tmerrshme në një shkollë të Tiranës mbajti frymën e mbarë Shqipërisë, kamerat nuk na ndihmuan dot mjaftueshëm për të kuptuar dinamikën e asaj ngjarjeje. Atëherë unë bëra një zotim; do të sjellim Shqipërinë në nivelin më të lartë të teknologjisë për të forcuar si asnjëherë më parë sigurinë në shkolla”, tha Rama.

Rama theksoi se kamerat inteligjente ndryshojnë nga sistemet e mëparshme, pasi nuk shërbejnë vetëm për monitorim, por mund të sinjalizojnë në kohë reale drejtuesit e shkollave, punonjësit e sigurisë dhe Policinë e Shtetit.

“Sot, ky zotim ka nisur të bëhet realitet. Kemi në Tiranë 20 shkollat e para të pajisura me kamera inteligjente, të cilat janë një mjet me aftësi të jashtëzakonshme në duart e drejtuesve të shkollave, punonjësve të sigurisë, por natyrisht edhe të vetë prindërve.”

Sipas Ramës, sistemet e reja do të vendosen në të njëjtat hapësira ku kanë qenë kamerat e vjetra, por do të kenë mundësi më të avancuara për identifikimin dhe sinjalizimin e situatave të dyshimta.

“Ato jo vetëm shohin, por edhe sinjalizojnë në kohë reale drejtoria, punonjësit e sigurisë apo vetë Policinë e Shtetit, duke i ndihmuar ata të kapin shpejt sinjalin, të kuptojnë shumë më mirë për çfarë bëhet fjalë dhe të ndërhyjnë pa humbur kohë. Zotimin e bërë pas asaj tragjedie, do ta bëjmë realitet shkollë pas shkolle, me teknologjinë në shërbim të njeriut dhe me sigurinë e fëmijëve mbi gjithçka”, u shpreh Rama.

Kryeministri inspektoi edhe gjimnazin “Partizani” në Tiranë, një prej 20 shkollave ku është instaluar sistemi i kamerave inteligjente në kuadër të projektit Smart City.

Rama informoi se kamerat inteligjente nuk janë vendosur brenda klasave, por në ambientet e përbashkëta të shkollës, aty ku kanë qenë edhe sistemet e mëparshme të monitorimit. Ndryshimi, sipas kryeministrit, qëndron te teknologjia e re, e cila mund të identifikojë situata problematike dhe të dërgojë sinjalizime në kohë reale te personat përgjegjës.

“Kamerat do të jenë vetëm në ambientet e përbashkëta dhe jo nëpër klasa. Unë personalisht do doja të kishte edhe në klasa, pasi kemi parë se sa shumë ndihmon në rregullin dhe kundër kopjet, por meqë ka një kufizim të qartë sa i përket vendeve të BE-së, ne nuk do luftojmë me këtë kufizim. Nëse prindërit do e duan, do e shohim, por ne nuk kemi këtë qëllim”, tha Rama.

Një ngjarje e rëndë ka tronditur Pogradecin, ku një 37-vjeçare shtatzënë, Marjana Karolina Bunaj, ka humbur jetën teksa po transportohej drejt Tiranës për ndihmë të specializuar mjekësore.

Motra e të ndjerës, Albina Mekolli, kërkuar zbardhjen e plotë të rrethanave, duke shtuar se një ndërhyrje apo transport më i shpejtë mund të kishte ndryshuar fatin e motrës së saj.

“Në orën 12 më merr në telefon dhe më tha: Eja se kam dhimbje të forta barku. Shkova shumë shpejt sepse jemi afër. E çova në maternitet sepse ishte shtatzënë. Mjekja roje i bëri një vizitë, një eko dhe tha se ka një gjakderdhje të brendshme”, rrëfeu Albina.

Sipas motrës, gjatë kësaj kohe u diskutua edhe mundësia e transportit me helikopter, por kjo nuk u realizua.

“Dëgjova që po thonin helikopterin, por u shprehën se nuk vjen dot sepse është natë”, tregoi ajo.

Më tej, sipas dëshmisë së saj, Marjana u dërgua te reanimacioni, ndërsa familjarët pretendojnë se pati vonesa përpara nisjes me ambulancë drejt Tiranës.

“Mjekja foli me dikë dhe erdhën mjekët e reanimacionit, e dërguan atje dhe pati vonesa. Me ambulancë e nisën pas orës 4 të mëngjesit. Në Pogradec nuk iu bë asnjë ndërhyrje kirurgjikale. Në tre orë i vunë vigonë për serume dhe gjak”, deklaroi Albina.

 “Nëse do të ishim nisur pak më parë, do të më kishte shpëtuar motra të paktën, sepse mbase fëmija nuk do të kishte shpëtuar. Mbase nëse arrinim më herët në Tiranë do të shpëtonte”, tha ajo.

 “Kërkoj drejtësi, të zbardhet e vërteta, a ndërroi jetë nga pakujdesia apo jo. Unë besoj që nëse do të kishte më shumë shpejtësi, sot do të ishte mes nesh”, u shpreh motra e Marjana Karolina Bunajt. (

Banorët e Vuklit në Malësinë e Madhe janë ngritur në protestë, teksa shprehin shqetësimin e tyre se në Cem të Kelmendit është vendosur ndërtimi i një HEC-i. Ata kanë kërkuar konsultime dhe dëgjesa me komunitetin.

Prej ditësh në zonë janë parë makineri të mëdha që kalojnë me materiale, gjë e cila ka rritur frikën e tyre se punimet janë gati.

Ndërtimi i një HEC-i do të sillte degradimin e tokave bujqësore dhe banesave, pasi, sipas banorëve, ekziston rreziku që devijimi dhe menaxhimi i ujërave të shkaktojë përmbytje në zonë.

Banorët kërkojnë transparencë mbi projektin, dokumentacionin dhe lejet përkatëse.

Ndërkohë që deri më tani nuk ka një përgjigje zyrtare nga institucionet shtetërore në vend, nëse në Cem është hartuar ndërtimi i një HEC-i apo jo.

Kreu i PD-së, Sali Berisha ka deklaruar se do të udhëtojë drejt Teksasit në SHBA, udhëtim që vjen disa muaj pasi DASH e përjashtoi atë nga ndalimi për të hyrë në SHBA.

Në një komunikim për mediat, Berisha tha se do të marrë pjesë në konferencën e Partisë Republikane amerikane për zgjedhjet e mes-mandatit.

“Dokumentet janë në ambasadën amerikane dhe unë nuk kam prenotuar asnjë takim. Unë shkoj, siç e dini, shkoj në Teksas në konferencën e Partisë Republikane amerikane për zgjedhjet midterm. Unë jam në një delegacion të Unionit Demokrat Ndërkombëtar, një delegacion i gjerë, i cili është i ftuar nga Partia Republikane, parti kryesore në IDU, për të marrë pjesë në këtë konferencë. Përveç kësaj, unë kam një ftesë dhe nga një institut republikan”, tha Berisha.

Një aksident ka ndodhur pak minuta më parë në Çukas, pranë Urës së Kuçit, në Berat, në aksin rrugor Lushnjë-Berat.

Sipas informacioneve paraprake, një automjet tip “Dacia” ka dalë nga rruga dhe ka përfunduar në kanalin anësor, duke u përmbysur. Si pasojë ka mbetur i plagosur drejtuesi i mjetit, një shtetas i huaj 32-vjeçar, i identifikuar si pastor. Për shkak të përmbysjes, dyert e automjetit janë bllokuar dhe për nxjerrjen e drejtuesit nga makina është dashur ndërhyrja e shërbimit zjarrfikës. Punonjësit e zjarrfikëses kanë prerë pjesë të llamarinës së automjetit dhe kanë bërë të mundur nxjerrjen e 32-vjeçarit.

Fatmirësisht, kanali ku përfundoi automjeti nuk kishte ujë, çka shmangu një rrezik edhe më të madh për jetën e drejtuesit. I plagosuri është transportuar për ndihmë mjekësore në Spitalin e Lushnjës, ku mësohet se ndodhet jashtë rrezikut për jetën.

Në vendngjarje ka mbërritur policia, e cila ka nisur hetimet për zbardhjen e rrethanave të aksidentit. Paraprakisht dyshohet se shkak mund të ketë qenë shpejtësia ose një parakalim i gabuar nga drejtuesi i automjetit.

Dashi

Kryetari i Partisë Demokratike, Sali Berisha, ka denoncuar sot atë që e quajti një krizë të thellë ekonomike që po shoqëron krizën politike në vend.

Sipas të dhënave të cituara prej tij, çmimet e ushqimeve në Shqipëri gjatë këtij viti janë rritur 5.2 herë më shumë se mesatarja e vendeve të Bashkimit Evropian.

Gjatë fjalës së tij, Berisha bëri një paralelizëm me masa politike të ndërmarra nga vendet fqinje, duke marrë si shembull Greqinë.

“Së dyti, dhe një problem themelor është problemi i çmimeve. Kriza e thellë politike e vendit po shoqërohet nga një krizë e thellë ekonomike. Qeveria e vendit fqinj, Greqia, ka vendosur të ulë me koston nga 5 përqind në 30 përqind të çmimeve të 1600 artikujve. Çmimeve të ushqimeve bazë, çmimeve të të gjitha mjeteve shkollore për fëmijët, çmimeve me përdorim të gjerë nga konsumatorët në shtëpi.  Pra, Greqia, ndonëse qytetarët e saj kanë një rrogë mesatare katër herë më të madhe se qytetarët shqiptarë dhe çmime qartësisht më të ulëta se në Shqipëri, përsëri konsideron çmimet tejet munduese për qytetarët dhe bën një ndërhyrje shumë të rëndësishme për lehtësimin e qytetarëve të saj”, tha Berisha.

“Ndërkohë, çmimet në Shqipëri, sipas statistikave më të fundit, çmimet e ushqimeve në Shqipëri u rritën këtë vit 5 herë më shumë se sa mesatarja e vendeve të BE. Dhe qeveria ka zero reagim. Çmimet pra janë rritur këtë vit krahasuar me rritjen mesataren të çmimeve të ushqimeve në BE, 5.2 herë më shumë. Dhe qeveria ndërmerr zero veprime. Këto të dhëna, së bashku me të dhënat e tjera, të cilat faktojnë se 30 përqind e shqiptarëve kërcënohen nga uria, janë kambanat e alarmit më të trishtë që bien në këtë vend. Indiferenca e Edi Ramës, qeverisë së tij ndaj kësaj situate, tejkalon qëndrimet do të thosha më çnjerëzore”, vijoi ai.

LDK dhe VV kanë arritur marrëveshje për çështjen e presidentit të Kosovës.

Këtë e ka bërë të ditur kryetari i LDK-së, Lumir Abdixhiku, pas takimit me kryetarin e Lëvizjes Vetëvendosje, Albin Kurti.

Abdixhiku ka thënë se gjatë diskutimeve janë përmendur dhe shqyrtuar emra të shumtë të personaliteteve të shquara, të cilët, sipas tij, kanë dhënë kontribut profesional dhe kombëtar.

“Gjatë diskutimeve janë përmendur shumë emra të personaliteteve të shquara, që kanë dhënë kontribut profesional e kombëtar. Nga të gjithë emrat e propozuar e shqyrtuar, jemi dakorduar për një emër, Bekim Sejdiu”, ka deklaruar Abdixhiku.

Marrëveshja mes dy subjekteve politike synon të zhbllokojë procesin për zgjedhjen e presidentit të ri të Kosovës.

Bizneset shqiptare do të kenë së shpejti një portal të dedikuar për programin “Dyfisho Sipërmarrjen Tënde”. Platforma pritet të lançohet javën e ardhshme dhe do të jetë e integruar me e-Albania, duke synuar lehtësimin e aplikimit për kredi dhe ndjekjen e procesit në kohë reale.

Ministrja e Ekonomisë dhe Inovacionit, Delina Ibrahimaj, përmes një videomesazhi në rrjetin social Facebook bëri të ditur se portali do t’u mundësojë bizneseve të përgatisin dokumentacionin e nevojshëm për aplikim, ndërsa përmes tij do të mund të shohin në çdo moment se në çfarë faze ndodhet kërkesa e tyre. Sipas ministres, platforma është konceptuar si një “pasqyrë” e të gjithë procesit të aplikimit, duke rritur transparencën dhe duke e bërë më të thjeshtë aksesin e bizneseve në skemën e financimit.

Në kuadër të programit, Ministria e Ekonomisë dhe Inovacionit po bashkëpunon me bankat dhe Shoqatën Shqiptare të Bankave për të thjeshtuar procedurat dhe për ta bërë skemën sa më të aksesueshme për sipërmarrjet që synojnë të investojnë dhe të zgjerohen.

Programi parashikon kredi me normë interesi nga 2 deri në 3%, me afat shlyerjeje deri në 10 vite dhe me vlerë maksimale deri në 2 milionë euro.

Përveç financimit, bizneset do të kenë në dispozicion edhe asistencë nga Ministria e Ekonomisë gjatë procesit të aplikimit. Sipas Ibrahimajt, do të ofrohet ndihmë edhe për hartimin e planeve të biznesit, me synimin për të rritur mundësinë e miratimit të kredisë.

Nga Baton Haxhiu

Prej disa ditësh po mendoj se Ergys Agasi nuk është vetëm emri i një njeriu dhe as vetëm personazhi i një dosjeje penale. Ai është emri i një modeli: i njeriut që, i fuqizuar nga pafuqia e shtetit dhe mungesa e ligjit, nuk e kupton më se ku përfundon e drejta e tij dhe ku fillon shkelja e së drejtës së tjetrit.

Ky është ndoshta modeli më i rrezikshëm, sepse nuk e sheh veten si shkelës të ligjit. Nuk mendon se kërcënon, por se paralajmëron; nuk mendon se ushtron presion, por se kërkon të drejtën e vet; nuk mendon se bën vetëgjyqësi, por se zgjidh një problem që shteti nuk është në gjendje ta zgjidhë. Kështu, gjuha kriminale afrohet aq shumë me veprimin kriminal, sa kufiri ndërmjet tyre fillon të zhduket. Dhe krimi nis pikërisht atëherë kur djem të rinj, që nuk e kuptojnë peshën e pasojave, me armë në brez kërcënojnë në emër të “shefit”, ndërsa shefi vazhdon të qëndrojë i qetë në restorantet e Tiranës.

Këto ditë këtë model e kam përjetuar edhe personalisht. Pas tridhjetë vjetësh përvojë në Shqipëri, e kuptova më afër se çfarë përjeton një njeri i zakonshëm kur përballet me njerëz që nuk përpiqen ta ndërtojnë suksesin e tyre përmes konkurrencës, por duke penguar suksesin e tjetrit; që nuk e shohin biznesin si treg, por si territor ku fiton ai që ka më shumë lidhje, ushtron më shumë presion dhe ka më pak frikë nga ligji.

Agasët nuk janë vetëm problem i drejtësisë penale. Ata janë pengesë për biznesin, investimin dhe suksesin. Ata e bindin shoqërinë se puna nuk mjafton, se prona dhe kontrata nuk të mbrojnë dhe se, për të përparuar, duhet ose të gjesh një lidhje më të fortë, ose të bëhesh si ata. Nuk marrin vetëm një tender apo një avantazh; shkatërrojnë besimin se në këtë vend mund të ecësh përpara duke respektuar ligjin.

Ky model nuk lind vetëm nga karakteri i njerëzve të tillë. Ai krijohet në boshllëkun që lë shteti. Kur institucionet vonojnë, ata shpejtojnë; kur ligji hesht, ata vendosin; kur shteti nuk mbron të drejtën, ata ndërtojnë një të drejtë private, ku fjala e më të fortit zë vendin e vendimit të institucionit.

Prandaj diskutimi për “Besën”, “Pasqyrë Albania” dhe përgjigjen e Qeverisë ndaj protestës nuk mund të jetë vetëm një diskutim për komunikimin me qytetarin. Duhet të jetë një diskutim për shtetin që kemi ndërtuar, për njerëzit që kemi fuqizuar dhe për boshllëqet ku janë rritur Agasët. Sepse qytetarit nuk i duhet vetëm një platformë ku të regjistrojë hallin; i duhet një shtet që ta mbrojë përpara se halli të shndërrohet në kërcënim dhe kërcënimi në vetëgjyqësi.

Po të isha sot në një mbledhje të socialistëve, do të flisja jo për ta mbrojtur Qeverinë nga protesta, por për ta mbrojtur Partinë Socialiste nga tundimi për të mos e kuptuar atë.

Protesta mund të mos ketë gjithmonë të drejtë në diagnozën e saj, mund të mos ketë një program të plotë dhe mund të mos përfaqësojë shumicën e shqiptarëve. Por kur mijëra qytetarë dalin për javë e muaj në rrugë, pushteti nuk ka luksin t’i trajtojë të gjithë si të mashtruar, të instrumentalizuar apo si armiq. Protesta nuk është referendum, por është alarm. Dhe një qeveri serioze nuk e sulmon alarmin; kontrollon nga vjen zjarri.

Pikërisht për këtë arsye mendoj se “Besa”, “Pasqyrë Albania” dhe takimet që po zhvillohen janë të nevojshme. Por duhet ta themi hapur: ato nuk janë ende përgjigjja. Janë vetëm fillimi i një përgjigjeje.

“Besa” është përmbledhur në katër fjalë: besim, empati, shërbim dhe angazhim. Janë fjalë të bukura dhe vlera të drejta, por pas trembëdhjetë vjetësh në pushtet nuk mund t’u kërkohet qytetarëve të besojnë vetëm sepse Qeveria ka zgjedhur fjalën “besim”. Besimi nuk shpallet nga foltorja dhe nuk miratohet në mbledhjen e Qeverisë. Ai fitohet nga mënyra se si administrata sillet me qytetarin që nuk ka mik, nuk njeh deputet, nuk arrin te ministri dhe nuk mund t’i shkruajë kryeministrit.

Empatia nuk matet me numrin e qytetarëve që dëgjohen para kamerave, por me mënyrën se si shteti i trajton ata kur kamerat nuk janë aty. Shërbimi nuk është premtim moral, por detyrim ligjor, ndërsa angazhimi nuk matet me orët e mbledhjeve, por me afatet që respektohen, problemet që zgjidhen dhe përgjegjësit që ndëshkohen kur nuk bëjnë punën.

Prandaj “Besa” duhet të pushojë së qeni vetëm një akronim politik dhe të shndërrohet në një kontratë të matshme. Çdo Ministri, Bashki dhe drejtori duhet të ketë detyrime të qarta. Qytetari duhet ta dijë se kur merr përgjigje, kush mban përgjegjësi dhe ku ankohet kur institucioni hesht. Përndryshe, pas disa muajsh do ta kemi harruar përmbajtjen dhe do të na ketë mbetur vetëm emri.

Edhe “Pasqyrë Albania” mund të jetë një instrument i dobishëm. Ideja që qytetari ta ndjekë kërkesën e vet si një pako postare, të shohë se në cilin institucion ndodhet, kush po e trajton dhe pse është vonuar, duhet mbështetur. Nuk ka arsye të përqeshet vetëm sepse erdhi pas protestës. Përkundrazi, nëse protesta e ka detyruar Qeverinë të ndërtojë një mekanizëm më të mirë, atëherë ajo ka prodhuar një rezultat konkret.

Por “Pasqyra” përmban edhe një rrezik: të shndërrohet në një ekran të ri, pas të cilit fshihet e njëjta administratë e vjetër.

Nëse qytetari duhet të hyjë në një platformë të lidhur me vëmendjen e kryeministrit që Kadastra, Bashkia apo Ministria të bëjë punën e vet, atëherë shteti nuk është depersonalizuar. Është personalizuar edhe më shumë. Kemi krijuar një sportel të ri, por përsëri mbi atë sportel qëndron fytyra e kryeministrit.

Një shtet modern nuk funksionon kur çdo hall arrin tek Edi Rama. Funksionon kur qytetarit nuk i duhet Edi Rama për ta zgjidhur hallin.

Prandaj platforma duhet të tregojë jo vetëm se ku ndodhet ankesa, por edhe kush e ka bllokuar. Nëse premtohet zgjidhje brenda dy javësh, duhet të dihet çfarë ndodh në ditën e pesëmbëdhjetë. Kush jep shpjegim? Kush penalizohet? A publikohen të dhënat? A do ta dijë publiku se cilat Ministri, Bashki dhe drejtori u përgjigjen qytetarëve dhe cilat i sorollatin ata?

Pa këtë transparencë, “Radar” mund ta gjurmojë hallin, por nuk do ta godasë papërgjegjshmërinë. Mund të na tregojë se ku ka ngecur qytetari, por jo pse administrata vazhdon ta lërë atë të presë.

Duhet të jemi të kujdesshëm edhe me përzierjen e partisë dhe të shtetit. Kur për “Besën” dhe “Pasqyrën” mblidhen në të njëjtën dhomë ministrat, deputetët, drejtuesit politikë dhe administrata, qytetari mund të mos e kuptojë më se kujt po i drejtohet: Republikës së Shqipërisë apo Partisë Socialiste.

Partia ka të drejtë të organizohet, të dëgjojë njerëzit dhe të përgatitet politikisht. Por ankesat ndaj shtetit duhet t’i zgjidhë shteti. Qytetari që nuk voton për Partinë Socialiste duhet të marrë të njëjtën përgjigje, në të njëjtën kohë dhe me të njëjtin respekt si qytetari që e ka votuar.

Kjo është vija që nuk duhet kaluar. Sepse, nëse një platformë shtetërore bëhet mekanizëm i “Pranisë Besnike” të partisë, në vend që ta hapim administratën, do ta forcojmë dyshimin se shteti dhe partia janë bërë një.

Takimet që po zhvillohen janë të nevojshme. Kryeministri duhet t’i mbledhë ministrat, t’u kërkojë llogari dhe ta detyrojë administratën të reagojë. Do të ishte shumë më shqetësuese sikur, përballë gjithë kësaj pakënaqësie, Qeveria të sillej sikur nuk ka ndodhur asgjë.

Por edhe këtu duhet të jemi të sinqertë: numri i orëve të mbledhjes nuk është masë e seriozitetit. Një mbledhje shtatë apo nëntë-orëshe vlen vetëm nëse në fund të saj ka vendime, afate dhe emra përgjegjësish. Përndryshe, kemi prodhuar një ditë të gjatë televizive, jo një kthesë të qeverisjes.

Partia Socialiste ka mandat deri në vitin 2029 dhe ky mandat duhet respektuar. Protesta nuk mund ta zëvendësojë votën dhe rruga nuk mund ta vetëshpallë veten shumicë. Por mandati i jep Qeverisë të drejtën për të qeverisur; nuk i jep të drejtën për të mos reflektuar. Të thuash “kemi fituar zgjedhjet” është përgjigje kushtetuese ndaj kërkesës për dorëheqje, por nuk është përgjigje politike ndaj pakënaqësisë.

Gabimi më i madh që mund të bëjnë socialistët është ta bindin veten se, meqë një pjesë e protestës është e ekzagjeruar, çdo kritikë është e pavërtetë; ose se, meqë opozita kërkon të përfitojë, problemet e ngritura nga qytetarët nuk ekzistojnë. Një pushtet nuk fillon të dobësohet kur kritikohet nga kundërshtarët, por kur askush brenda tij nuk guxon t’i tregojë më se ku po gabon.

Po të isha socialist, do ta mbështesja “Besën”, por do të kërkoja që ajo të prodhonte detyrime. Do ta mbështesja “Pasqyrën”, por do të kërkoja që ajo të tregonte edhe fytyrën e përgjegjësit. Do t’i mbështesja takimet, por do të kërkoja që prej tyre të dilnin vendime dhe jo vetëm pamje.

Dhe, mbi të gjitha, do t’i kërkoja Partisë Socialiste që të mos e shihte protestën vetëm si një betejë që duhet fituar, por si një paralajmërim që duhet kuptuar.

Sepse “Pasqyrë Albania” mund t’i tregojë qytetarit se ku ka ngecur ankesa e tij. Por prova e vërtetë është nëse pushteti ka guximin të shohë në atë pasqyrë edhe veten: mënyrën si ka qeverisur, pushtetin që ka përqendruar, njerëzit që ka toleruar dhe institucionet që, pas kaq vitesh, ende presin një telefonatë nga lart për të bërë detyrën e tyre.

Nëse e bën këtë, “Pasqyra” mund të jetë fillimi i një korrigjimi.

Nëse jo, do të jetë vetëm pasqyra e radhës ku pushteti sheh fytyrën e vet, ndërsa qytetari vazhdon të presë pas derës dhe Agasët vazhdojnë të hyjnë pa trokitur.

Instituti i Statistikave (INSTAT) ka publikuar raportin paraprak mbi aksidentet rrugore për muajin korrik 2026, duke dëshmuar një tendencë shqetësuese të rritjes së ngjarjeve aksidentale në rrugët e vendit.

Gjatë muajit korrik 2026 janë regjistruar gjithsej 165 aksidente rrugore, ku si pasojë e tyre kanë mbetur të vrarë dhe të plagosur 235 persona. Për periudhën 7-mujore (janar-korrik 2026), numri i aksidenteve është rritur me 10 % krahasuar me të njëjtën periudhë të një viti më parë, duke arritur në 844 aksidente nga 767 që ishin regjistruar në vitin 2025.

Faktorët kryesorë dhe grupmoshat më të rrezikuara

Të dhënat tregojnë se faktori njerëzor vijon të mbetet shkaku kryesor i fatkeqësive në rrugë.

Sjellja e drejtuesve të mjeteve, 90,3 % e aksidenteve të muajit korrik kanë ndodhur për shkak të moszbatimit të rregullave të qarkullimit (shpejtësia, mosrespektimi i sinjalistikës apo veprime të gabuara në timon).

Drejtuesit e mjetit të grupmoshës 25–34 vjeç janë më të ekspozuarit, duke përbërë 21,8 % të totalit të aksidenteve të regjistruara në këtë periudhë.

Pjesa më e madhe e aksidenteve (25,5 %) ndodhin gjatë harkut kohor 19:00–24:00. Sipas ditëve të javës, e enjtja shënon volumin më të lartë të aksidenteve (18,8 %), ndërsa e marta paraqitet si dita më e qetë (12,1 %).

Situata sipas qarqeve, Tirana dhe Fieri në krye të statistikave

Në nivel qarqesh, bilanci i muajit korrik dhe i shtatëmujorit dëshmon se qendrat e mëdha urbane dhe akset e zonave bregdetare mbeten pikat më problematike.

Në Tiranë, gjatë muajit korrik 2026 u regjistruan 59 aksidente (kundrejt 37 në korrik 2025), me një total prej 74 personash të vrarë e të plagosur. Një rritje e ndjeshme e shifrave dëshmohet edhe në Fier, ku aksidentet u rritën nga 8 në korrikun e kaluar në 20 për korrikun e këtij viti, si dhe në Durrës, me 15 aksidente të regjistruara gjatë muajit.

Në shkallë vendi, për periudhën janar-korrik 2026, numri total i personave të vdekur dhe të plagosur nga aksidentet ka shkuar në 1.187 persona, duke reflektuar nevojën për masa më të rrepta parandaluese dhe rritje të sigurisë rrugore.

Kreu i PD-së Sali Berisha njoftoi se do të shkojë në Teksas të SHBA-ve, në konferencën e Partisë Republikane, për zgjedhjet e mes-mandatit.

I pyetur nga gazetarët a keni fiksuar ndonjë takim të rëndësishëm në SHBA, Berisha tha: “Jo, ju sqaroj. Dokumentet janë në ambasadën amerikane dhe unë nuk kam prenotuar asnjë takim. Unë shkoj, siç e dini, shkoj në Teksas në konferencën e Partisë Republikane amerikane për zgjedhjet midterm. Unë jam në një delegacion të Unionit Demokrat Ndërkombëtar, një delegacion i gjerë, i cili është i ftuar nga Partia Republikane, parti kryesore në IDU, për të marrë pjesë në këtë konferencë. Përveç kësaj, unë kam një ftesë dhe nga një institut republikan”.

I pyetur a keni pasur ndonjë njoftim të orëve të fundit se kur e merrni pasaportën, Berisha u përgjigj: “Jo, nuk kam pasur njoftim, as orën, as minutat”.

Një 36-vjeçar nga Prishtina ka rënë në prangat në pikën kufitare të Morinës pasi tentoi të kontrabandonte në vendin tonë lëndë piroteknike.

Sipas njoftimit të policisë 36-vjeçari dyshohet se do t’i shiste në Tiranë.

Gjatë kontrollit në makinën tip ‘Benz u gjetën dhe u sekuestruan si provë materiale 11 kuti me 691 fishekzjarre.

“Shërbimet e Policisë Kufitare në Morinë, në vijim të kontrolleve të bazuara në analizën e riskut, për goditjen e paligjshmërive në kufi, në hyrje të RSh-së, kanë kaluar në vijë të dytë, për kontroll të imtësishëm, automjetin tip “Benz”, me drejtues shtetasin G. M.

Gjatë kontrollit të kryer në këtë automjet, u gjetën dhe u sekuestruan me cilësinë e provës materiale, 11 kuti me 691 fishekzjarre, të cilat ky shtetas synonte t’i kontrabandonte në Republikën e Shqipërisë, dyshohet për t’i shitur në Tiranë.

Në përfundim të veprimeve procedurale, specialistët për Hetimin e Krimeve të DVKM Kukës arrestuan në flagrancë shtetasin G. M., 36 vjeç, banues në Prishtinë, për veprën penale “Kontrabanda me mallra të ndaluara ose kufizuara”, njoftoi sot policia.

Materialet procedurale iu referuan Prokurorisë, për veprime të mëtejshme.

Nga Skënder Minxhozi/

Parimi i madh i përfaqësimit që ndodhet në themelin e dëmokracisë funksionon për veteranët e “të konsumuarit” e profesionit të politikës, por funksionon edhe për “rishtarët”. Për ata që humbasin momentin dhe minutën e artë, duke mos ditur se kur është koha të hidhen në garë e të marrin atë që ju sjell fati dhe historia. Madje për këta të fundit, rishtarët, mosrespektimi i parimit të përfaqësimit tregon shumëcka për atë që ata simbolizojnë, për idetë, për filozofinë e tyre, nëse e kanë një të tillë, për raportin me drejtimin dhe pushtetin, me shoqërinë dhe politikën. Për faktin nëse i pranojnë në fund të fundit rregullat dhe sinoret e një mjedisi demokratik.

Ajo që kemi parë e degjuar deri tani në protestë është “ik ti që je majë kalit, të vij unë që jam në këmbë”. Një kriter kinse demokratik i cili në fakt i përket një tjetër sistemi nga ai i përfaqësimit me votë të qytetarëve në institucione.

Pikërisht provimin e madh të minutës së parë, atë që lidhet me krijimin e një profili e fizionomie politike, i cili më pas të fut në garën për pushtet, “flamengot” nuk e kaluan. As kur ishin disa dhjetra mijëra, as sot kur janë disa qindra. Madje qysh në krye të herës, ata thanë me force e duke rrahur gjoksin se për ta ky hap cilësor dhe i nevojshëm as që egziston fare. Duke u bërë kësisoj bartës të një lëvizjeje rruge që shpërfilli dhe shpërdoroi në fakt mbështetjen dhe dëshirën e madhe të sheshit që kishin te këmbët, për t’i dhënë formë, peshë dhe vlerë sentimentit popullor për ndryshim dhe progres kundër sistemit dhe elitave të konsumuara të këtij vendi.

Protesta prodhoi gjithashtu një listë kërkesash joreraliste dhe të panegociueshme, të cilat mbyllën de facto derën e përmbushjes së tyre qysh në momentin e bërjes publike. Protesta prodhoi shumë oratorë nga ata që u kishte rënë rruga andej dhe donin të thonin një fjalë, ose më keq akoma, prodhoi folës të tjerë që banalitetin e vunë si trajtë dalluese me “të tjerët”. Vulgaritete dhe “marrina me okë” siç thonë në Shkodër, janë dëgjuar pafund në këto tre muaj e ca proteste nga ai podium.

Njerëz me mllefe meskine ndaj një shefi, komshiu apo zyrtari taksash, që ligjërojnë sikur kanë në dorë fatet e botës dhe japin mend për gjithçka: për shtetin, ekonominë, politikën e jashtme, Sorisin dhe Trumpin, emigracionin dhe ngrohjen globale. Nëse donim një shesh ku të flitej me potere dhe pa filtra për gjithçka dhe për gjithkënd, si ajo rrëkeja akullnajore e Nepalit, e kemi tashmë. Nëse donim një alternativë ndaj sistemit të vjetër politik, ku t’i bëhej skaneri tranzicionit shqiptar e të hidheshin ide racionale për atë që vjen më pas, këtë s’e kemi ende dhe me gjasë nuk kemi për ta pasur nga kjo protestë.

Llogaritë me sfida numrash në bulevard dolën huq siç shihet, por protesta ka ende të shkruara në kopertinën e saj kërkesat e asaj kohe kur ishte e madhe dhe e frikshme për pushtetin. Me kalimin e javëve kësaj turme njerëzish i ndodhi si në atë shprehjen “jep një lek për të hyrë në valle dhe njëqind të tjera për të dalë nga vallja”.

Protesta po i drejtohet shtatorit me shpresën se sezoni studentor do të vijë ta shpëtojë nga bataku i vapës. Po hyn në vjeshtë me një bilanc që ka shbërë praktikisht gjithçka të mirë që ndërtoi në pranverë. Ka rënë në duar personash që kanë inate me qeverinë, po që janë krejt të paditur për mënyrat me të cilat rrëzohet qeveria. Parullat janë konsumuar, folësit janë mplakur dhe mpakur pa hyrë ende në garë, podiumi kontrollohet nga bodigardët e të fortit të rradhës, duke u munduar të fshehin me dhunë sa të munden banalitetin që ofron ky procesion i tkurrur dhe selektiv njerëzish.

Edhe një herë kjo protestë provoi se të luftosh për pushtetin nuk është thjesht çeshtje entusiazmi dhe opozitarizmi, por mbi të gjitha një çeshtje vizioni, largpamësie dhe mençurie taktike. Është edhe një çeshtje emrash e fytyrash me vullnet për ta çuar në fund mllefin popullor duke sfiduar me vepra e jo me fjalë pushtetin politik tradicional. Të tillë nuk u panë në 100 ditë, a thua do të shfaqen papritur në shtator!?

Të thuash katër muaj rresht “Rama në burg” ndërkohë që Rama rri në Dhërmi nuk ka asnjë dobi. Ka vetëm frustrim dhe apati me bollëk tek ata që të dëgjojnë dhe që në heshtje kuptojnë se nuk je për këtë punë.

Pas tre dekadash përgjumje, shoqëria shqiptare ka një prezencë në sheshin publik që kërkon të rrëzojë sistemin. Kjo do të ishte një gjë shumë e mirë sikur ky shpirt lirie të mos ishte uzurpuar me kalimin e javëve nga inatçinj e anonimë të vegjël në shpirt dhe në mendje, të cilët kujtojnë se sistemi politik 35 vjeçar është si një grip që luftohet për dy-tre ditë me aspirina dhe çaj.

Pushteti nuk merret me vezë, por me vota. Ndërkohë që shefat e protestës nuk po arrijnë të kuptojnë se kjo që po bëjnë vetëm sa i konsumon si kartë në sytë e opinionit publik. Sepse mesa duket paska konsum edhe për notarët që nuk pranojnë të hyjnë në ujë. Konsumohesh edhe pa u lagur fare në ujin e garës. Siç po ndodh me krerët e protestës të cilët po plaken në shesh dhe rrjete sociale pa e provuar betejën politike, por vetëm duke e refuzuar atë dhe duke e ofruar këtë sjellje si vlerë dhe standart.

Skeptri i protestës qytetare, kauza e madhe e lëvizjes civile antiqeveritare ka rënë në duar që është pak t’i quash rastësore dhe anonime. Kjo kauzë ndodhet në duar personash që ende pa u bërë emra publikë janë duke u konsumuar pasi thonë përditë të njëjtat gjëra, duke e mbajtur dhunshëm dhe në mënyrë të gabuar debatin brenda dhe rreth protestës në nivelin e parapolitikës dhe të banalitetit.

Nga Ylli Manjani

Platformat politike të pagëzuara si “Besa” apo “Pasqyra” janë, pa dyshim, forma më e re e marketingut politik që Edi Rama ka zgjedhur për komunikimin me publikun. Mund të jesh dakord ose jo me përmbajtjen e tyre, por një gjë është e padiskutueshme, ato përfaqësojnë vizionin politik të momentit të njeriut që qeveris vendin.

Të kuptohemi, këtu nuk ka asgjë të jashtëligjshme apo të pazakontë. Kush qeveris ka jo vetëm të drejtën, por edhe detyrimin të shpalosë vizionin e vet, të propozojë ide, të hapë debate dhe të kërkojë mbështetje për to.

Në këtë pikë, Edi Rama është krejtësisht legjitim.

Problemi nis një hap më pas.

Kur pas kryeministrit rreshtohen ministrat, deputetët dhe çdo vartës politik për të prodhuar jehonën e tij, tabloja bëhet e shëmtuar. Njerëz që paguhen për të qeverisur, për të zgjidhur probleme dhe për të dhënë llogari, shfaqen çdo ditë si komentatorë të vizionit të shefit të tyre. Nuk komunikojnë çfarë kanë bërë, le pastaj atë që skanë bërë, por komunikojnë çfarë ka menduar Edi Rama. Ata shfaqen njësoj bosa si bosi i tyre.

Është shtuar në mënyrë alarmante prania e ministrave dhe deputetëve bosa në jetën publike me shkrime e statuse që nuk kumtojnë asnjë mendim personal, nëse kanë ndonjë. Janë tekste pa identitet, pa karakter, pa përgjegjësi. Papagaj politikë që përsërisin të njëjtat formula, të njëjtat metafora dhe të njëjtin ton. Në vend që ta forcojnë mesazhin e shefit të tyre me zgjidhje ekzekutive, ia zbehin atë. I nxjerrin bojën një konstruksioni politik që ai vetë përpiqet ta ndërtojë me kujdes.

Fjala vjen, lexova para disa ditësh një shkrim patetik të një ministri që fliste me kritika për shërbimet që qytetarët nuk i marrin, pa thënë asnjë fjalë për veten që ka dështuar ta bëjë atë shërbim. Le pastaj gjuha e dhimbsurisë për qytetatët, që e përdorte si hartim i klasës së katërt… Bahhh!!

Nëse Edi Rama beson seriozisht se “Besa” apo “Pasqyra” mund të jenë instrumente të dobishme komunikimi, atëherë duhet t’u japë një udhëzim shumë të thjeshtë ministrave të tij: bëhuni ekzekutivë, jo analistë. Aq më pak kritikë publikë të sektorëve që drejtojnë.

Ministri nuk është filozof i administratës. Ai nuk paguhet për të bërë diagnoza publike mbi problemet e shtetit, por për t’i zgjidhur ato. Deputeti nuk është jehonë e zërit të kryeministrit, por përfaqësues i qytetarëve.
Raportoni ore për çfarë keni bërë, çfarë keni zgjidhur, ku keni dështuar dhe çfarë do të bëni nesër. Kjo është politika ekzekutive. Pjesa tjetër është propagandë.

Propaganda, kur bëhet nga vartësit, kthehet në servilizëm.

O Zot, sa patetike është bërë gjuha e komunikimit në këto kushte! Nuk është më komunikim politik, është një garë kush kopjon më mirë stilin e Ramës. Një gjuhë qokash, sloganesh dhe moralizimesh, aq artificiale sa provokojnë lodhje publike dhe deri në neveri. Ironia është se shumë prej këtyre shkrimeve duken sikur nuk i besojnë as vetë autorët e tyre.

Nëse Rama po mendon seriozisht të bëjë edhe një ligj për “Pasqyrën”, do të ishte më e dobishme të shihte fillimisht pasqyrën e kabinetit dhe të bashkëpunëtorëve të vet. Aty do të gjente problemin e parë të komunikimit publik, ku vartës që sillen si udhëheqës në Facebook dhe si spektatorë në qeveri.

Le t’i ndalojë komunikimet teorike, qokat trushpërlarëse dhe imitimet groteske të liderit. Nuk bindin askënd, vetëm neverisin.

Në fund të fundit, secili le të komunikojë si të dojë. Por një gjë është e qartë se servilizmi nuk prodhon autoritet, prodhon përçmim. Sot, paradoksalisht, jo opozita, por vetë vartësit e Edi Ramës po e bëjnë komunikimin qeveritar më të bezdisur dhe të lodhshëm se kurrë.