Linjat e transportit interurban në Vlorë janë ngritur këtë të hënë në protestë. Drejtuesit e autobusëve që bëjnë linjat me Tiranën, Beratin, Elbasanin, Sarandën dhe qytete të ndryshme në këto intenerare kanë pezulluar aktivitetin.

Në intervistat e tyre kërkojnë dënimin dhe ndalimin e aktivitetit të paligjshëm të taksive dhe furgonave private dhe te palincesuara si dhe ndërtimin e terminalit ku sipas tyre Vlora mbetet i vetmi qytet që ende se ka një të tillë.

Thonë se do të pezullojnë aktivitetin duke penalizuar qytetin deri në zgjidhje. Kërkojnë një takim me përfaqësuesit e pushtetit lokal pasi kundërshtojnë dhe zhvendosjen drejt periferisë.

VLORË- Pamjet që shihni vijnë nga Porti i Vlorës, ku dhjetëra makina qëndrojnë në rradhë për të kaluar. Festat e fundvitit kanë sjellë fluks të lëvizjes së qytetarëve në Portin e Vlorës.

Mëngjesin e kësaj të diele kanë mbërritur në qytetin bregdetar rreth 700 pasagjerë dhe mbi 140 automjete me tragetin e linjës Brindisi–Vlorë, duke rritur ndjeshëm numrin e udhëtimeve drejt Shqipërisë për festat e fundvitit.

Sipas të dhënave zyrtare, edhe një ditë më parë në Portin e Vlorës kanë mbërritur rreth 300 pasagjerë.

Autoritetet portuale bëjnë me dije se lëvizjet pritet të vijojnë me intensitet edhe në ditët në vijim. Parashikohet që piku i fluksit të regjistrohet në datat 23–24 dhjetor, si dhe në periudhën 26–29 dhjetor, kur numri i udhëtarëve dhe automjeteve do të jetë më i lartë.

Përballë këtij fluksi, strukturat portuale dhe shërbimet përkatëse janë angazhuar për të garantuar përpunimin normal të pasagjerëve dhe mjeteve, si dhe për të shmangur vonesat apo problematikat gjatë procedurave të hyrje-daljeve./abcnews.al

Zbardhet ngjarja e ndodhur 3 javë më parë në qytetin e Vlorës, ku shpërtheu një sasi lënde plasëse në portën e një banese.

Në kuadër të operacionit policor të koduar “Objektivi”, të finalizuar nga Komisariati i Policisë Vlorë dhe strukturat hetimore të DVP Vlorë nën drejtimin e Prokurorisë Vlorë, u identifikuan, lokalizuan dhe u vunë në pranga autorët e dyshuar, babë e bir.

D. G., 59 vjeç, banues në Babicë e Madhe, Vlorë;
F. B., 29 vjeç, banues në Babicë e Madhe, Vlorë.

Nga hetimet paraprake dyshohet se babë e bir, 59 dhe 29 vjeç, kanë mbajtur në banesën e tyre automjetin tip “Volkswagen Golf Plus”, i cili rezulton i vjedhur në qytetin e Elbasanit.

Më pas, më datë 29.11.2025, ky automjet dyshohet se është përdorur nga këta shtetas për t’u afruar pranë banesës së shtetases B. Z., ku dyshohet se është vendosur një sasi lënde plasëse në portën e jashtme të banesës, e cila më pas ka shpërthyer.

Pas kryerjes së ngjarjes, automjeti i përdorur nga këta shtetas është gjetur i djegur në fshatin Babicë e Vogël, Vlorë./abcnews.al

Një person është gjetur i pajetë mëngjesin e së martës përgjatë Lungomares në qytetin e Vlorës.

Sipas policisë, personi është parë nga qytetarë të Vlorës teksa ishte futur në det, dhe më pas është njoftuar policia, e cila ka ndërhyrë për të nxjerrë trupin e pajetë në breg të detit.

Identiteti i viktimës është Shezai Hoxha, rreth 87 vjeç, i cili vuante nga skleroza./abcnews.al

Në këtë automjet të bardhë, të fshehur mes pemëve në Qafën e Llogarasë u gjet një trup plotësisht i djegur.

Zyrtarisht policia e Vlorës thotë se si pasojë e zjarrit ka humbur jetën një shtetas ende i paidentifikuar në sediljen e shoferit.

Trupi është i shkrumbuar plotësisht, çka e bën të vështirë identifikimin e viktimës, ndërsa dyshohet se mund të jetë rreth moshës 40 vjeçare.

Nga djegia totale e mjetit, edhe targa e makinës tip BMW nuk është e mundur të identifikohet.

Pista kryesore është e ajo e vetëvrasjes, megjithatë nuk përjashtohet mundësia se kemi të bëjmë me një ngjarje kriminale.

Ka qenë telefonata e një qytetari që ka konstatuar makinën duke u djegur e cila vuri në lëvizje policinë e Vlorës.

Grupi I hetimit në vendngjarje po punon për grumbullimin e provave të mundshme për të zbardhur rrethanat.

/abcnews.al/

VLORË- Detaje të reja dalin në pah për rrëmbimin dhe mbajtjen peng të shqiptarit nga Kosova. Tre personat nga Vlora, të cilët e mbajtën peng janë njohur me shqiptarin nga Kosova në një vend të Bashkimit Europian.

Gjatë kësaj njohjeje kanë kryer marrëveshje të paligjshme për trafik droge. Shqiptari nga Kosova i ka lidhur ata me një person tjetër jashtë vendit, dhe vlonjatët kanë dërguar drogën në një vend të BE-s, vend i pacaktuar, pasi të arrestuarit nuk kanë treguar, madje as nga telefonat e sekuestruar nuk u gjet ky informacion.

Pas kësaj, personi që mori drogën jashtë vendit nuk u ka kthyer paratë vlonjatëve.

Për këtë arsye, këta të fundit kanë marrë peng shqiptarin e Kosovës, duke e mbajtur për rreth dy javë, madje kanë ushtruar dhunë me shpresën për të marrë pagesën për mallin.

Motra e shqiptarit, që jeton në Suedi dhe kishte dijeni për ngjarjen ka kontaktuar Interpolin. Pas kësaj, Interpoli njoftoi Policinë e Vlorës, e cila, duke përdorur vendndodhjen e dërguar nga motra, arriti të arrestojë tre personat brenda 15 minutash.

Shqiptari kishte plagë të lehta në trup dha më pas iu dha ndihma e parë dhe u lirua. Ndërkohë, autorët nuk kanë pranuar të zbulojnë vendin e saktë ku ishte dërguar droga, në çfarë vendi të BE-së.

Nga policia e Vlorës konfirmohet se shqiptari nga Kosova kishte dalë garant për një ngarkesë lënde narkotike drejt një vendi europian me vlerë 70 mijë euro./abcnews.al

Tre persona janë vënë në pranga nga Policia e Vlorës, pasi morën peng një shtetas kosovar, Fisnik Xhaka.

Sipas informacioneve në prangat e bluve të Vlorës, janë vënë shtetasit Vilson Agaj, Orest Çorapaj dhe Julian Zogaj.

Dyshohet se e kanë mbajtur shtetasin kosovar për rreth dy javë në një banesë pranë zonës së quajtur “Rruga e re” ne Vlore duke i kërkuar 70 mije euro.

Katër të shoqëruarit nga policia e Vlorës dyshohet se kanë marrë peng një tjetër shtetas, të cilin e mbanin në një banesë në afërsi të Rrugës së Re. Policia e Vlorës bën me dije se shtetasit ishin nga fshatrat e Lumit të Vlorës dhe i kërkonin personit 70 mijë euro.

Ndërkohë, motra e pengut, që jeton në Suedi, ka njoftuar policinë e Vlorës, e cila ka bërë të mundur gjetjen e banesës dhe shoqërimin e katër personave. Sipas policisë dyshohet se shtetasi mbahej prej dy javësh.

Katër persona janë shoqëruar nga Policia e Vlorës mbrëmjen e së enjtes.

Dyshohet se ata mbajtën peng një person brenda një banese.

Shkak mësohet se ka qenë për një gjobëvënie./abcnews.al

Një aksion me fokus kontrollin e disa banesave është zhvilluar gjatë ditës së sotme në qytetin e Vlorës. Operacioni është ndërmarrë nga Drejtoria Vendore e Policisë së Vlorës, sektori i Krimeve të Rënda.

Ndërkohë, forcat e FNSH-së dhe ato operacionale kanë kryer kontrolle në disa pika të ndryshme të qytetit.

Në Vlorë, 36-vjeçari Besmir Aliu është një nga të paktët të rinj që ka trashëguar dhe vazhdon zanatin e artizanatit në lëkurë nga babai i tij.

Ai krijon këpucë, çanta, rripa dhe aksesorë të ndryshëm, por gjithashtu ofron riparime dhe produkte të personalizuara sipas dëshirës së klientëve.

Besmiri rrëfen se dashuria për këtë profesion ka nisur shumë herët. Kur ishte në klasën e shtatë ka realizuar edhe punimin e tij të parë. Sot, pas shumë vitesh përvojë, Besmiri e njeh çdo lloj materiali dhe dallon menjëherë lëkurën origjinale nga imitimet.

Puna e tij zgjat thuajse gjithë ditën. Ai tregon se pjesa më e madhe e njerëzve vijnë për riparimin e këpucëve, por punimet e reja dhe personalizimet nuk mungojnë.

Megjithatë, mjeshtri vlonjat shpreh shqetësimin e tij për të rinjtë./abcnews.al

Mesditën e kësaj të premteje ka ndodhur një aksident në hyrje të Vlorës, ku një automjet është përplasur me një tjetër.

Për shkak të përplasjes, drejtuesi i automjetit, por edhe pasagjeri, kanë marrë plagë të lehta dhe janë dërguar në spitalin rajonal të Vlorës për mjekim.

Ndërkohë, policia rrugore ka mbërritur në vendngjarje, duke kryer këqyrjen e vendit të ngjarjes, si dhe duke hetuar shkaqet e aksidentit, që dyshohet se janë shpejtësia mbi normat e lejuara dhe lagështia në rrugë./abcnews.al

Një grua rreth moshës 50 vjeç duke ecur në bulevardin “Ismail Qemali” është rrëzuar përtokë Pas rrëzimit gruaja ka humbur jetën.

Vdekja i ka ardhur pasi ka plasur kokën në një prej bordurave të bulevardit të Vlorës. Trupi i pajete është dërguar në murgun e spitalit rajonal të qytetit. Policia njofton se shkak është bërë era e fortë.

Vrapojmë për Pavarësinë.  Në Vlorë u zhvillua ediconi i pestë i  gjysmë maratonës, një garë ku morën pjesë  400 vrapues shqiptar dhe të huaj.

Gara zhvillohet u zhvillua ne tre etapa, 5, 10 dhe 21 km  dhe u  shtri në të gjitha rrugët e qytetit.

Fitues i 21 km është shpallur ukrainasi Bogdan Simonoviç.

Të tjerë vrapues shprehën kënaqësinë për pjesëmarrjen.

Në fund të nëntorit   zhvillimi i gjysmë maratonës është kthyer në traditë në Vlorë, pjesë e kalendarit festiv./abcnews.al

Detaje të reja kanë dalë sa i takon shpërthimit me lënë plasëse në portën e jashtme të një shtëpie në Vlorë. Siç bën të ditur gazetari i ABC News, lënda plasëse është vendosur në banesën e Bakie Zotos, e cila është mamaja e Gentjan Zotos.

Ky u fundit nuk është një emër i padëgjuar për policinë. Gentian Zoto është një nga personat e dyshuar për atentatin ndaj Inez Hajrullas.

Inez Hajrulla është një emër i cilësuar si kontingjent kriminal për Policinë, i cili i ka shpëtuar dy atentate, fillimisht në vitin 2017 dhe më pas në 2019.

Atentati i 2017:

Ky atentat u krye me lëndë eksplozive në automjetin e tij, ku humbi një këmbë. Atentati ndodhi një prej lokaleve, që në Vlorë njihet si vendi që frekuentohej nga Edison Harizaj, një prej të fortëve të Vlorës, i vrarë në Durrës. Hajrulla dyshohet se është pjesë e grupit të Harizajt. 26- vjeçari at’here është djali i një biznesmeni të njohur në qytetin bregdetar dhe njihet si person me rrezikshmëri.

I riu është dënuar dy herë. Në shkurt 2018, Hajrulla ka marrë një dënim me 2 vite heqje lirie për “Mosbindje ndaj urdhrit të punonjësit të Policisë së Rendit Publik” dhe “Mbajtja pa leje dhe prodhimi i armëve, armëve shpërthyese dhe i municionit”. Dënimi kishte lidhje pikërisht me armën që iu gjet gjatë atentatit me eksploziv, të ndodhur në nëntor të 2017, por ky dënim u pezullua duke e lënë të riun në shërbim prove. Gjithashtu, në fund të vitit u dënua me 8 muaj për “Largimi i të burgosurit nga vendi i qëndrimit”.

Inez Hajrulla është person i marrë në hetim për zhdukjen e Elvis Troqes në Vlorë, në korrik 2017. Përfshirja e tij në këtë çështje erdhi pasi një nga dëshmitarët, që është personi i fundit që ka takuar 25-vjeçarin Troqe, ka deklaruar për hetuesit se Elvisi ishte larguar nga lokali ku po qëndronin, duke i thënë se do të takonte një shok me emrin Ini, që dyshohet se i referohet pikërisht Inez Hajrullës, pasi në Vlorë njihet si “Ini i Çones”. Përveç zhdukjes së 25-vjeçarit, Hajrulla dyshohet se është përshirë dhe në ngjarje të tjera kriminale, të cilat janë ende të pazbardhura.

Atentati i 2019:

Hajrulla po qëndronte në  një kafene në kompleksin “Oslo” në zonën e Lungomares, në shoqërinë e dy personave të tjerë, kur papritur nga dy makina janë lëshuar breshëri automatiku.

Qitësit me sa duket kanë qenë amatorë, pasi asnjë nga plumbat nuk ka kapur objektivin, por është plagosur krejt rastësisht një punonjës i bashkisë së Vlorës i quajtur Dajko Cenodemaj, 58 vjeç, i cili po pinte kafe me tre miq të tij.

Autorët u larguan duke i djegur dy makinat në zonës e Babicës, njëra prej të cilëve Land Rover, që nga hetimet rezultoi të ishte me targa të vjedhura ku dhe janë sekuestruar dy automatikë të djegur.

Policia e Vlorës ka arrestuar një 28-vjeçar banuese në Vlorë, pasi dyshohet se ka thyer masën e sigurisë “Arrest në burg” dhe ka kryer vjedhje, brenda një dyqani, të një çante me një shumë monetare dhe sende personale të një shtetaseje.

Ka nisur ceremonia në Vlorë për festën e 28 Nëntorit, Ditën e Flamurit, me rastin e 113 vjetorit të Pavarësisë.

Të pranishëm janë figura politike dhe qytetarë të shumtë që i janë bashkuar aktiviteve.

Presidenti Bajram Begaj, Presidentja e Kosovës, Vjosa Osmani gjithashtu janë në ceremoninë shtetërore, si edhe kryeministri Edi Rama kanë vendosur kurorë pranë “Sheshit të Flamurit.

Qytetarë të shumtë nga Kosova gjithashtu kanë zgjedhur Vlorën për të festuar 28 Nëntorin. Gazetari i ABC News Elton Nika raportoi se Vlora është veshur kuqezi me një atmosferë festive.

Qytetarë nga të gjitha trevat shqiptare janë bërë bashkë në Vlorë, në këtë 28 Nëntor. Grupe popullore janë gjithashtu në shesh, me tupana duke dhuruar shfaqje për qytetarët.

“Koncerti do të mbahet në Bulevard, grupe të ndryshme kanë ardhur në “Sheshin e Flamurit”, raportoi gazetari.

Mes emocionesh qytetarët shprehen për gazetarin Elton Nika “se Vlora sot është e të gjithë shqiptarëve”.  Gazetari Nika ndau edhe urime të veçanta të dhënë nga qytetarë të ndryshëm: “Një komb të gjithë së bashku, një Shqipëri e Madhe, të gjithë se bashku”, janë shprehur ata.

Më 28 Nëntor 1912, Kuvendi Kombëtar i Vlorës, i kryesuar nga Ismail Qemali, shpalli Pavarësinë e Shqipërisë. Ky akt ishte kurorëzimi i përpjekjeve dhe i luftërave shekullore të shqiptarëve, për mbrojtjen e tërësisë tokësore dhe ngritjen e një shteti të pavarur shqiptar.

Në shpalljen e Pavarësisë morën pjesë 83 delegatë nga të gjitha trevat shqiptare, por 40 ishin firmëtarët që nënshkruan Aktin e Pavarësisë.

28 nëntori i vitit 1912 u quajt si “Nëntori i dytë” pasi më 28 Nëntor 1443, Heroi Kombëtar Gjergj Kastriot Skënderbeu çliroi Krujën nga pushtimi osman dhe ngriti flamurin mbi kalanë e saj.

VLORË– Shqipëria kremton 113-vjetorin e shpalljes së pavarësisë. Për të shënuar këtë ditë historike për kombin shqiptar, qytetarë nga të gjitha trojet janë mbledhur në qytetin e Vlorës, qytetin ku u shpall pavarësia e Shqipërisë, më 28 nëntor 1912.

Disa qytetarë nga Kosova kishin zgjedhur që këtë ditë të shënuar ta festojnë në Vlorën historike. Ata dhanë përshtypjet dhe emocionet e tyre për ABC News, ndërsa uruan shqiptarët për Ditën e Flamurit

“Kam ardhur nga Kosova. Jam nga Komuna e Skenderajt. Erdhëm në Vlorën heroike. Kam ardhur për herë të parë kam ardhur për 28 nëntorin. Ta gëzojmë të gjithë shqiptarët. Vlora është e të gjithëve. Ju urojmë festën”

“Vij nga Suhareka e Kosovës. I përshëndes kudo ku janë shqiptarët neper botë. Urime festa!”

“Kemi kënaqësinë të jemi këtu. Ky është vendi ynë i përbashkët. Vlora është vendi ynë, i përbashkët.”/abcnews.al

Struktura e bashkisë së Vlorës dhe numri i punonjësve të saj pritet të ndryshojë. Kryetarja e re e bashkisë së Vlorës, dalë nga zgjedhjet e pjesshme lokale të 9 nëntorit, ka propozuar projektvendimin i cili pritet të miratohet nga këshilli bashkiak i Vlorës në ditët në vijim.

Brunilda Mersini në projektvendimin që mban firmës e saj ka propozuar ndryshime që lidhen me numrin e punonjësve dhe nivelit të pagave të bashkisë si edhe ndryshime në disa prej institucioneve në varësi të pushtetit vendor.

Me argumentin se kërkohet nevoja e plotësimit të shërbimeve dhe rritje të eficences, Mersini kërkoi miratimin për shtimin e punonjësve në disa ndërmarrje të varësisë së bashkisë.

Të tjera pika të cilat janë propozuar në këtë projektvendim janë edhe njohja e shtesës në pagë për vështirësi pune për punonjësit e policisë bashkiake si edhe punonjësit mbështetës të specialiteteve të veçanta.

Shërbimi I funksionit të ndërmarrjes së gjelbërimit do të transferohet në ndërmarrjen e pastrimit dhe do shërbejë si institucion më vete. Po kështu sektori I ndriçimit do kalojë në varësi të ndërmarrjes së shërbimeve publike.

Një vit më parë, në mbledhjen e këshillit bashkiak struktura e bashkisë u bë me tre drejtori, Ndërmarrja e gjelbërimit, e pastrimit dhe ndërmarrja e shërbimit publik.

Shkrirja e ndërmarrjes së pastrimit dhe gjelbërimit në një institucion të vetëm sipas projektvendimit, kërkohet për shkak të keqmenaxhimit.

Në këtë projektvendim është kërkuar gjithashtu që godina e shkollës “Shaban Demiraj” të vihet në shërbim të institucioneve të shërbimeve publike dhe drejtorisë së tatim taksave të bashkisë së Vlorës.

Nëntori është muaji i festave dhe Vlora padyshim është në qendër të aktiviteteve kulturore.

Muzeu i Pavarësisë ka programuar një sërë aktivitetesh gjatë gjithë muajit, të cilat do të kulmojnë në prag të 28 dhe 28 nëntorit.

Drejtoresha e Muzeut Kombëtar të pavarësisë konfirmon se aktivitetet kanë nisur me ekspozitën e trashëgimisë për të vijuar edhe me aktivitete të thera në bashkëpunim me shkollat e qytetit apo teatrin.

Muzeu i Pavarësisë pritet të regjistrojë edhe një numër të lartë vizitorësh.

Sipas statistikave, Muzeu i Pavarësisë ka patur rritje të konsiderueshme të vizitorëve krahasuar me një vit më parë, ndërsa në kuadër të festave të nëntorit, ambientet do të jenë në funksion të qytetarëve edhe përtej orarit zyrtar.

Muzeu i Pavarësisë mbetet një nga më të vizituarit e sidomos përgjatë muajit nëntor./abcnews.al