Gazeta Si – Në një postim në X, zëvendëspresidenti i SHBA-ve, J.D. Vance mbrojti veprimet e agjentit të ICE-së, i identifikuar si Jonathan Ross nga mediat amerikane, i cili qëlloi dhe vrau një grua amerikane të mërkurën, më 7 janar, gjatë një proteste në Minneapolis, Minnesota.

Vance e quajti atë një “tragjedi për të cilën gruaja dhe të gjithë ekstremistët, të mësojnë se emigracioni është i vetmi ligj në të cilin mund të ndërhyjnë protestuesit”.

Zëvendëspresidenti i SHBA-ve, iu përgjigj analizës së incidentit nga një avokat, duke argumentuar se “agjentët nuk po e kontrollojnë rastësisht; ata po i afrohen automjetit të saj, sepse ajo po shkel ligjin: konkretisht, ajo po pengon një operacion të zbatimit të ligjit”.

Zëvendëspresidenti amerikan foli gjithashtu për vetëmbrojtje, duke iu referuar incidentit: “Edhe një herë, nuk lejohet të ndërprisni një operacion të zbatimit të ligjit, gjë që është pikërisht ajo që po bënte kjo grua”.

Kur agjenti qëlloi, përfundoi Vance, “ajo e kishte drejtuar automjetin nga ai dhe kishte shtypur pedalin e gazit. Ai qëlloi për vetëmbrojtje, dhe kënde të tjera në video tregojnë qartë gruan duke goditur oficerin me makinën e saj. Ai po bënte punën e tij. Ajo u përpoq ta ndalonte. Kur ai iu afrua makinës së saj, ajo u përpoq ta godiste atë”.

Por ish-Sekretarja e Shtetit, Hillary Clinton, nuk është dakord, duke e konsideruar ngjarjen një “vrasje” dhe duke lavdëruar të gjithë protestuesit që dolën në rrugë kundër “dhunës së paligjshme” të administratës Trump.

“Mbrëmë, në cepin ku një agjent i ICE, vrau Renee Good, mijëra banorë të Minesotës u mblodhën në errësirën e acartë për të protestuar për vrasjen e saj”, shkroi ish-Sekretarja e Shtetit.

“Përballë dhunës së paligjshme të kësaj administrate, solidariteti është përgjigjja. Ata duan ta formësojnë Amerikën sipas mizorisë së tyre. Ne refuzojmë”, shtoi Clinton.

Ndërkohë, protestat vazhdojnë në Minneapolis kundër vdekjes së Renee Good: të enjten, më 8 janar, agjentët federalë përdorën gaz lotsjellës për të shpërndarë një demonstratë, siç u vu re nga një ekip i CNN në vendngjarje.

Tensionet janë përshkallëzuar në qytet, me përleshje midis demonstruesve dhe forcave të rendit: plumba gome u qëlluan drejt turmës jashtë një ndërtese federale, dhe agjentët përdorën gjithashtu një substancë të ngjashme me gazin për të shpërndarë të pranishmit.

Një re tymi mbushi zonën, dhe, siç tregon videoja nga vendi i ngjarjes, disa protestues filluan të kolliten dhe të gulçojnë, duke pasur qartë vështirësi në frymëmarrje.

The post Ngjarja në Mineapolis, J.D.Vance mbron agjentin e ICE. Hillary Clinton: Është një vrasje appeared first on Gazeta Si.

Nga Gazeta ‘Si’- Komisioni Qendror i Zgjedhjeve të Kosovës përfundoi numërimin e plotë të votave për zgjedhjet e parakohshme parlamentare të 28 dhjetorit. 

Zyra e shtypit e KQZ saktësoi se në orët e para të kësaj të premteje, u mbyll numërimi i fletëve të fundit që kishin mbërritur me postë nga jashtë Kosovës.

Kjo përbën edhe mbylljen përfundimtare të procesit të numërimit, i cili i lë vendin tashmë shpalljes së rezultatit e më tëj certifikimit të tij.

Sipas Ligjit subjektet politike kanë të drejtë të dërgojnë ankesa brenda 48 orësh nga ndodhja e shkeljes së supozuar, ndërsa deri më tani është regjistruar vetëm një e tillë nga PDK. 

Ndërkohë, organi që administron zgjedhjet, përditësoi edhe rezultatet, sipas të cilave Lëvizja Vetëvendosje ka dalë fituese me shumicën e votave dhe ulëseve në Kuvend.

Partia Lëvizja Vetëvendosje, ishte fituesi i ditur i zgjedhjeve, ndërsa me përfundimin e procesit ka thelluar rezultatin. Sipas të dhënave të fundit partia e Albin Kurtit, ka arritur 57 mandate pasi mori 51.11 për qind të votave, konkretisht 486,994 vota.

PDK renditet e dyta me 22 deputetë dhe 20.19 për qind të votave, ose 192,407 vota. Kurse LDK do të dërgojë në parlament 15 deputetë pasi mori 13.23% mbështetje të votave, përkatësisht 126,102 vota, një rezultat shumë më i dobët në raport me zgjedhjet e 9 shkurtit.

AAK e Ramush Haradinaj do të përfaqësohet në parlament me 6 deputetë pas 5.50% të votave të siguruara, specifikisht 52,370 të tilla.

Lista Serbe ka siguruar 9 karriget e rezervuara për komunitetin serb në Parlament, ndërsa 1 prej tyre i shkon deputetit Nenad Rashiç. Ndërkohë 10 të tjera do të shpërndahen për partitë joserbe duke plotësuar 120 vendet.

Në votimet për zgjedhjet e parakohshme të 28 dhjetorit, Komisioni Qendror i Zgjedhjeve, raportoi se morën pjesë 45 % e qytetarëve me të drejtë vote

The post Numërohen të gjithë votat në Kosovë/ Kurti fiton 57 mandate appeared first on Gazeta Si.

Hulumtimet e reja sugjerojnë se personat që humbin peshë dhe që heqin dorë nga injeksionet për humbje peshe, mund të rifitojnë kilogramët e humbur katër herë më shpejt se ata që ndalojnë dietat dhe ushtrimet.

Të dhënat e publikuara në British Medical Journal sugjerojnë se njerëzit mbipeshë humbasin sasi të mëdha peshe kur përdorin injeksione, rreth një të pestën e peshës së trupit të tyre, por sapo i lënë, ata rifitojnë mesatarisht 0.8 kg çdo muaj.

Kjo do të thotë se ata kthehen në peshën e tyre para trajtimit brenda një viti e gjysmë.

“Njerëzit që i blejnë këto duhet të jenë të vetëdijshëm për rrezikun e rifitimit të shpejtë të peshës kur mbaron trajtimi”, paralajmëron studiuesja Dr. Susan Jebb, nga Universiteti i Oksfordit.

Ajo theksoi se gjetjet vijnë nga provat mjekësore dhe jo nga jeta reale dhe më shumë studime mbi efektet afatgjata të injeksioneve të reja për dobësim do të ishin të dobishme.

Studiuesit shqyrtuan 37 studime me mbi 9,000 pacientë për të krahasuar injeksionet e suksesshme për humbje peshe me dieta ose pilula të tjera.

Rreziku i rikthimit

NHS rekomandon injeksionet për njerëzit që janë mbipeshë me rreziqe shëndetësore të lidhura me obezitetin, jo për njerëzit që duan vetëm të dobësohen pak.

Dhe mjekët duhet gjithashtu të përshkruajnë ndryshime në stilin e jetës që përfshijnë të ngrënit shëndetshëm dhe të bërit të ushtrimeve të mjaftueshme për të ndihmuar njerëzit të mbajnë peshën.

Shumë thonë se trajtimi duhet të konsiderohet gjatë gjithë jetës, duke pasur parasysh rrezikun e rikthimit.

Dr. Adam Collins, ekspert i të ushqyerit, thotë se mënyra se si funksionojnë injeksionet në tru dhe trup mund të shpjegojë pse rifitimi i peshës amplifikohet pasi të ndalosh së marri ato.

Ato imitojnë një hormon natyror të quajtur GLP-1, i cili rregullon urinë.

“Ofrimi artificial i niveleve të GLP-1 disa herë më të larta se normalja gjatë një periudhe të gjatë mund të bëjë që ju të prodhoni më pak nga GLP-1 tuaj natyral, dhe gjithashtu mund t’ju bëjë më pak të ndjeshëm ndaj efekteve të tij.

“Ky nuk është problem kur merrni ilaçet, por sapo të ndërprisni këtë ‘dozë’ të GLP-1, oreksi nuk mbahet më nën kontroll dhe ka shumë më tepër gjasa të hani më shumë.”

Të ndalosh së ngrëni është një sfidë e vërtetë, thotë ai.

The post Njerëzit që ndalojnë injeksionet për dobësim rifitojnë peshë katër herë më shpejt se ata që mbajnë dietë appeared first on Gazeta Si.

Nga Gazeta ‘SI’ – Qeveria ka parashikuar një fond prej 50 mln eurosh për situatën e përmbytjeve në vend.

Ministri i Financave, Petrit Malaj, tha se 15 mln do të shkojnë për dëmshpërblimin e familjeve dhe bizneseve të prekura, ndërsa 10 mln euro për fondin e emergjencave civile.

Malaj tha se për këtë rast do të vihet në punë edhe Fondi Rezervë.

“Nga ana tjetër, kemi edhe fondin rezervë të Këshillit të Ministrave në vlerën rreth 25 milionë euro që do të vendoset në dispozicion në varësi edhe të vlerësimeve që do të bëhen nga strukturat përkatëse përsa i përket dëmeve të shkaktuara. Sikundër, kemi edhe fondin për digat dhe rezervuarët, i cili është një fond për shpenzimet kapitale dhe lidhet me financimin e projekteve që lidhen me sigurimin e digave dhe të rezervuarëve. Ky fond është rreth 5 milionë euro”, tha ministri.

Deklarata e Malajt erdhi pas fjalës së kryeministrit Edi Rama, i cili premtoi dëmshpërblim për çdo dëm të krijuar si pasojë e reshjeve.

Rama bëri një bilanc të përmbytjeve dhe raportoi se janë nën ujë 13.211 ha tokë bujqësore, 1.587 banesa dhe janë evakuuar 339 persona dhe 51 familje.

The post 50 mln euro fond për përmbytjet, ministri: 15 mln shkojnë për dëmshpërblim appeared first on Gazeta Si.

Nga Gazeta ‘Si’- Tre autorë shqiptarë janë vlerësuar me çmime kombëtare  letrare për kontributet e tyre në fusha të ndryshme të letërsisë, duke sjellë në vëmendje rolin e përkthimit, studimit kritik dhe prozës artistike në kulturën bashkëkohore.

Çmimi për përkthim i është akorduar Romeo Çollakut për veprën “Retorika” të Aristotelit, botuar nga Albas. Juria ka vlerësuar përkthimin si një punë të kujdesshme dhe të rëndësishme për pasurimin e fondit të teksteve themelore filozofike në gjuhën shqipe.

Në kategorinë studime letrare, çmimi i është dhënë Anila Mullahit për librin “Krijimi letrar në proces”, botim i Pegi, për qasjen analitike dhe reflektuese mbi procesin krijues dhe marrëdhënien mes autorit dhe veprës.

Ndërkohë, çmimi për roman i ka shkuar Eni Karafilit për veprën “Epope intime”, botuar nga Pegi.

Gjatë ceremonisë u ndanë edhe çmime mirënjohjeje për poetin Lulzim Tafa dhe Hamit Aliajn ( pas vdekjes)  si vlerësim për kontributin e tyre afatgjatë në letërsinë shqipe dhe në jetën kulturore.

 Juria përbëhej nga Besnik Mustafaj ( kryetar) Elsa Skënderi, Fatmira Nikolli, Maklena Nika dhe Dhurata Shehri.

The post Ndahen çmimet kombëtare të letërsisë/ Eni Karafili vlerësohet për prozën më të mirë appeared first on Gazeta Si.

Gazeta Si – Rusia goditi “objektiva strategjikë” në Ukrainë gjatë natës duke përdorur raketën hipersonike “Oreshnik”, njoftoi Ministria Ruse e Mbrojtjes në një deklaratë. Sipas autoriteteve ukrainase, u vranë 4 persona dhe u plagosën 19 të tjerë.

Sulmet, numri i saktë dhe objektivat e të cilave nuk u specifikuan, u kryen “në përgjigje të sulmit terrorist të kryer nga regjimi i Kievit” kundër rezidencës së Vladimir Putinit në fund të dhjetorit, të cilin Ukraina e pretendon se ishte një “gënjeshtër”. Sipas autoriteteve lokale, Kievi mbeti pa energji elektrike dhe ujë.

“Mbrëmë, një dron rus dëmtoi gjithashtu ndërtesën e Ambasadës së Katarit,” deklaroi Presidenti ukrainas Volodymyr Zelenski në Telegram.

Sulmet ruse gjatë natës, shtoi Zelenski u kryen “me 242 dronë, një raketë balistike me rreze të mesme veprimi “Orekhnik” dhe 22 raketa lundrimi” kundër “infrastrukturës civile dhe objekteve të energjisë”, duke rezultuar në katër vdekje dhe dhjetëra të plagosur në të gjithë Ukrainën.

Sulmi, i cili filloi në orën 23:45 sipas kohës lokale, u krye me raketa balistike dhe dronë. Kryetari i bashkisë së Kievit, Vitali Klitschko, tha se midis të vdekurve ishte një punonjës mjekësor i cili u vra ndërsa ndihmonte të tjerët me kolegët e tij. Kryetari i bashkisë tha gjithashtu se 14 nga 19 të plagosurit u shtruan në spital.

Gjatë sulmit, u goditën zona banimi në disa lagje të qytetit, duke i vënë flakën disa ndërtesave. Në disa zona, bombardimet shkaktuan gjithashtu ndërprerje të furnizimit me ujë të rrjedhshëm dhe energji elektrike.

The post Rusia sulmon me raketa hipersonike ‘Oreshnik’ Ukrainën, 4 të vrarë e 19 të plagosur appeared first on Gazeta Si.

Gazeta Si – Protesta në të gjithë Iranin: nga Urmiam në Kermanshah, përfshirë kryeqytetin Teheran, demonstrata masive kundër qeverisë së Ajatollahëve po zhvillohen në shumë qytete iraniane.

Në kryeqytet, sipas dëshmitarëve në mediat sociale, një ndërtesë qeveritare thuhet se u përfshi nga flakët. Mijëra protestues dolën në rrugë duke brohoritur, “kjo nuk është beteja e fundit, Pahlavi po kthehet”, një referencë për djalin e Shahut, Reza Pahlavi, i cili ditët e fundit është bërë i disponueshëm për popullin iranian për t’u kthyer në shtëpi dhe për të udhëhequr lëvizjen.

Sipas BBC Persian, demonstratat më të mëdha u zhvilluan në Teheran dhe qytetin e dytë më të madh, Mashhad dhe nuk u shpërndanë nga forcat e sigurisë.

Teheran jetzt! pic.twitter.com/DqJuST8HE7

— Natalie Amiri (@NatalieAmiri) January 8, 2026

Organizata mbikëqyrëse online “Netblocks”, raportoi në X një ndërprerje të internetit në Teheran dhe në disa qytete iraniane.

“Ngjarja vjen pas një sërë masash të censurës digjitale në rritje që synojnë protestat në të gjithë vendin dhe pengojnë të drejtën e publikut për të komunikuar në një kohë kritike”, deklaroi grupi në mediat sociale.

Kjo nuk është hera e parë që regjimi i ajatollahëve ka përdorur këtë mjet për të penguar komunikimin midis protestuesve dhe për të parandaluar përhapjen e ngjarjeve të vërteta në vend jashtë vendit.

Protestat, të nxitura nga shqetësimet ekonomike, janë përhapur në të gjithë vendin. Aktivistët raportuan se e mërkura, më 7 janar, pa demonstratat më intensive, duke arritur si në qytete rurale ashtu edhe në qytete të mëdha.

Duket se ka qenë më e përgjakshmja e 12 ditëve. Autoritetet kanë arrestuar mbi 2,000 persona dhe numri i të vdekurve midis protestuesve gjatë shtypjes është rritur në të paktën 45, përfshirë tetë të mitur. Ndërkohë, qindra njerëz janë plagosur.

Princi iranian Reza Pahlavi, i cili ka qenë në mërgim në SHBA për vite me radhë, ka qenë shumë aktiv në media ditët e fundit, duke mbështetur protestat dhe shpesh thirret nga demonstruesit si një alternativë pas rënies së regjimit.

Të enjten, më 8 janar, ai gjithashtu shkroi një mesazh në mediat sociale për popullin iranian: “Sytë e botës dhe të Trumpit janë mbi ju, dilni në rrugë dhe shprehni vullnetin tuaj, të gjithë së bashku”.

The post Protesta masive në Iran, digjet ndërtesa qeveritare. Të paktën 45 të vdekur (video) appeared first on Gazeta Si.

Nga Gazeta Si- Për shkak të situatës së krijuar nga përmbytjet, mësimi është ndërprerë përkohësisht në 54 shkolla të vendit, kryesisht në zonat malore.

Në Durrës ka një ndërprerje të përkohshme këto tre ditë në 12 shkolla ndërsa në Vlorë dhe Gjirokastër ka ndërprerje të mësimit në shkollat në zona të thella.

Në Korçë, Berat dhe Elbasan janë rreth 32 zona malore ku për shkak të ngricës është pezulluar mësimi.

Sipas ministres së arsimit Mirela Kumbaro, të hënën nis mësimi normalisht në universitetin e Durrësit.

The post Moti i keq, ndërpritet mësimi në 54 shkolla appeared first on Gazeta Si.

Gazeta Si – Një përleshje e dhunshme në burgun e Reçit në Malësinë e Madhe, ka shkaktuar plagosjen e dy të dënuarve, të cilët përfunduan në spital.

Sipas burimeve paraprake, ish-boksieri Astmer Bilali dhe Mikel Thani janë përfshirë në një konflikt me njëri-tjetrin, të cilët kanë marrë dëmtime të rënda në trup.

Sipas burimeve, Bilali dhe Thani kanë qenë duke ngrënë drekë sëbashku me disa persona të tjerë dhe në ato momente ka lindur një debat mes tyre.

Më pas, kanë nisur të godasin njëri-tjetrin me grushte. Thani, është ndihmuar edhe nga disa persona të tjerë, shokë të tij në burg.

Mikel Thani u arrestua në vitin 2015, pasi ishte i dyshuar për plagosjen e prindërve të ish të fejuarës dhe mbesës së tyre, ndërsa Astmer Bilali është arrestuar në kuadër të dosjes “Metamorfoza”.

Pak kohë më parë po në burgun e Reçit, pati një tjetër sherr fizik, mes Safet Bajrit dhe Sokol Sanxhaktarit, i cili u dëmtua rëndë fizikisht.

Ai u arrestua në vitin 2018 si pjesë e grupit “Bajri”. Në 2020-ën, Bilali, po ashtu ish-boksier, u dënua nga gjykata me 3 vite heqje lirie, me gjykim të shkurtuar. Ai akuzohej për armëmbajtje pa leje, ndërtim i paligjshëm dhe paracaktim i rezultateve sportive.

Astmer Bilali është në hasmëri me familjen Lici në Shkodër. Po ashtu, emri i tij u përmend nga Fahrije Alija, nëna e Endri Mustafës, i vrarë në maj 2021, i dyshyar si si porositës dhe i implikuar në vrasjen e të birit.

Po ashtu, babai dhe xhaxhai i Astmer Bilalit, Astrit Bilali dhe Brahim Bilali, u vranë me armë zjarri në 2019-ën.

The post Përleshje në burgun e Reçit, ish-boksieri dhe një tjetër i dënuar përfundojnë në spital appeared first on Gazeta Si.

Nga Gazeta ‘Si’- Niveli i lumit Vjosë ka filluar rënien që prej mesnatës. Aktualisht, Vjosa ka zbritur në kuotën 8.4 metra, duke bërë që uji të nisë të tërhiqet gradualisht.

Megjithatë, problematike mbetet zona e Bishanit, ku prania e ujit në nënkalimin e Bishanit vijon të jetë ende rreth 2 metra, duke e bërë të pamundur qarkullimin e automjeteve.

Uji ka hyrë te rreth 20 familje në Bishan, në pjesën e jashtme të banesave, duke shkaktuar dëme dhe shqetësim për banorët e zonës

The post Vjosa nis të tërhiqet, Bishani zona më problematike appeared first on Gazeta Si.

Nga Gazeta Si – Real i Madridit fitoi 2-1 ndaj Atletico Madrid falë golave të Federico Valverde-s dhe Rodrygo-s, duke siguruar një “El Clásico” në Finalen e Superkupës së Spanjës, e cila po zhvillohet në Arabinë Saudite.

Valverde e kaloi Real-in në avantazh që në minutën e dytë të ndeshjes në Xhedah, kur mesfushori uruguaian shënoi drejtpërdrejt nga goditja e dënimit me një silurë prej 108 km/h

Rodrygo dyfishoi rezultatin me golin që rezultoi vendimtar në minutën e 55-të, përpara se Alexander Sørloth ta rihapte rezultatin për Atletico-n vetëm 3 minuta më vonë.

Real Madrid luajti pa të dëmtuarin Kylian Mbappé, i cili mungoi në ndeshjen e dytë rradhazi.

Skuadra e Xabi Alonso-ss do të përballet me Barcelona-n në Finalen e të dielës.

Barcelona shkatërroi 5-0, Athletic Bilbao-n të mërkurën, në ½ finalen e parë.

The post ‘El Clasico’ në Superkupën e Spanjës appeared first on Gazeta Si.

Administrata Trump po shqyrton dërgimin e pagesave të njëpasnjëshme për banorët e Groenlandës për t’i bindur ata të shkëputen nga Danimarka dhe të bashkohen me Shtetet e Bashkuara, sipas zyrtarëve amerikanë, të cituar nga Reuters në një raport ekskluziv.

Pagesat mund të jenë deri në 100,000 dollarë për person, me administratën Trump që gjithmonë po shqyrton një qasje ushtarake ose diplomatike për blerjen e ishullit.

Sipas raportit të Reuters, propozimi për të dërguar pagesa të njëpasnjëshme për banorët e Groenlandës në një përpjekje për t’i bindur ata të shkëputen nga Danimarka dhe të bashkohen me Shtetet e Bashkuara është duke u diskutuar midis zyrtarëve amerikanë. Pavarësisht pasigurisë mbi shumën e saktë dhe detajet e procesit, zyrtarët e Shtëpisë së Bardhë, përfshirë ndihmësit e Presidentit të SHBA-së Donald Trump , kanë thënë se pagesat mund të variojnë nga 10,000 deri në 100,000 dollarë për person.

Ideja e dhënies së parave direkt për banorët e Groenlandës ofron një shpjegim të mundshëm se si Shtetet e Bashkuara mund të përpiqen të “blejnë” ishullin me 57,000 banorë, pavarësisht deklaratave kategorike nga autoritetet në Kopenhagen se Groenlanda nuk është në shitje.

Propozimi për t’u paguar grenlandezëve vjen pas deklaratave të Presidentit të SHBA-së, Donald Trump, i cili përsëriti dëshirën e tij për të blerë ishullin. Pavarësisht reagimit nga udhëheqësit evropianë, diskutimi mbi këtë çështje vazhdon.

The post Reuters zbulon planin: SHBA mendon pagesa deri në 100 mijë dollarë për çdo banor të Groenlandës për t’i shkëputur nga Danimarka appeared first on Gazeta Si.

Ambasadori i Bashkimit Evropian në Shqipëri, Silvio Gonzato, në një takim me kryetaren e re të Gjykatës Kushtetuese, Fiona Papajorgji, tha se Gjykata Kushtetuese ka arritur tashmë nivelin e nevojshëm të stabilitetit institucional, duke ruajtur cilësinë, transparencën dhe pavarësinë si institucioni më i lartë i drejtësisë në vend.

“Rikonfirmoj angazhimin tonë për të mbështetur sundimin e ligjit në Shqipëri, duke theksuar rolin kyç të Gjykatës në mbrojtjen e të drejtave të qytetarëve shqiptarë”, tha Gonzato.

Ambasadori shtoi se BE-ja do ta përfshijë Gjykatën Kushtetuese si përfituese në projektet e ardhshme të Bllokut.

“Planifikojmë ta përfshijmë Gjykatën si përfituese në projektet tona të ardhshme dhe të mbështesim përpjekjet e saj për të harmonizuar më tej praktikën gjyqësore me të drejtën e BE-së. Bashkëpunimi me të gjithë sistemin gjyqësor shqiptar është thelbësor për integrimin europian, dhe Gjykata Kushtetuese mbetet një partner qendror në këtë proces,” tha Gonzato.

The post Gonzato: Gjykata Kushtetuese partner qendror për integrimin appeared first on Gazeta Si.

Presidenti i Kongresit venezuelian, Jorge Rodriguez, tha sot se qeveria ka vendosur të lirojë një “numër të konsiderueshëm” të burgosurish politikë në orët në vijim, si venezuelianë ashtu edhe të huaj, me qëllim që të “kontribuojë në përpjekjet për unitet kombëtar”.

Lirimet, një kërkesë e përsëritur nga opozita e vendit, përbëjnë një gjest paqeje, tha Rodriguez, duke shtuar se veprimi është i njëanshëm dhe nuk është rënë dakord me asnjë palë tjetër.

“Qeveri, së bashku me institucionet shtetërore, ka vendosur të lirojë një numër të konsiderueshëm venezuelianësh dhe të huajsh, dhe këto procese lirimi po ndodhin tani”, tha Rodriguez në një video të transmetuar në kanalin publik lokal TeleSur. Ai tha se lirimi ishte një “gjest i qeverisë, me një qëllim për të ndjekur paqen”.

Anëtarët e administratës Trump u kanë thënë ligjvënësve amerikanë se ia kanë bërë të qartë Venezuelës se duhet të lirojë të burgosurit politikë.

The post Qeveria venezueliane gati të lirojë të burgosurit politik, presidenti i Kongresit të vendit: Duam unitet kombëtar appeared first on Gazeta Si.

Presidenti francez Emmanuel Macron tha të enjten se Franca do të votojë kundër marrëveshjes tregtare të Bashkimit Europian me bllokun Mercosur, një ditë para një votimi përfundimtar nga shtetet anëtare.

Ai tha se qëndrimi bazohej në refuzimin unanim të marrëveshjes nga parlamenti francez pas më shumë se 25 vjet negociatash.

Njoftimi erdhi ndërsa fermerët dolën në rrugët e Parisit në numër të madh për të protestuar si kundër marrëveshjes BE-Mercosur ashtu edhe kundër politikës bujqësore të qeverisë. Ata mbushën pjesët qendrore të qytetit me traktorë, duke shprehur kundërshtimin e tyre të fortë.

Rreth 20 traktorë arritën në Kullën Eiffel dhe Harkun e Triumfit, ndërsa grupe të tjera bllokuan rrugët kryesore. Policia mbajti një qëndrim të qetë për të shmangur incidentet, ndërsa presidentja e Parlamentit Francez, Yael Brown-Pivet, pritet të takohet me përfaqësues të sindikatave bujqësore.

The post Macron dorëzohet përballë protestave të fermerëve: Do votojmë kundër marrëveshjes tregtare BE-Mercosur appeared first on Gazeta Si.

Nga Gazeta Si- Është përfshirë nga flakë masive tregu i rrobave të përdorura që ndodhet pranë rrugës 5 maji në Tiranë. Zjarri, i cili ka nisur rreth orës 19:00, ka shkaktuar dëme të mëdha materiale në dy kapanone të tregut.

Fillimisht ka marrë flakë një kapanon dhe më pas zjarri është përhapur. Gjithë zona është e mbuluar me kabuj elektrikë, duke e bërë situatën tepër të rrezikshme. Për këtë arsye, autoritetet kanë ndërprerë energjinë elektrike në zonë si dhe kanë zgjeruar perimetrin e sigurisë.

Si shkak i flakëve masive, të cilat tashmë janë drejt fikjes, dyshohet të ketë qenë një defekt në rrjetin e energjisë elektrike, ndërsa kreu i Shërbimit Zjarrfikës në Tiranë, Shkëlqim Goxhaj, shprehet i bindur se nuk ka indicie që zjarri të ketë qenë i qëllimshëm.

60 forca policore dhe 11 mjete të shërbimit zjarrfikës janë dërguar në vendngjarje për shuarjen e zjarrit. Pjesë për shuarjen e flakëve është bërë edhe ushtria. Për shkak të situatës së vështirë janë kërkuar përforcime nga shërbimet zjarrfikëse të bashkive Vorë, Kamëz dhe Elbasan.

Ndërsa dhjetëra forca zjarrfikëse luftonin për të vënë nën kontroll flakët, pronarët e bizneseve që ndodhen brenda tregut por nuk janë përfshirë nga flakët kanë nxjerrë mallrat nga dyqanet për t’i shpëtuar.

The post Tiranë/ Zjarr masiv në tregun e rrobave të përdorura të ‘5 majit’ (foto, video) appeared first on Gazeta Si.

Nga Gazeta Si- Senati Amerikan miratoi të enjten një rezolutë dypartiake për të parandaluar Donald Trump nga ndërmarrja e veprimeve të mëtejshme ushtarake kundër Venezuelës, pasi ai urdhëroi një bastisje në fundjavë për të kapur presidentin e atij vendi, Nicolas Maduro, pa i dhënë Kongresit njoftim paraprak.

Masa u miratua me 52 senatorë pro dhe 47 kundër. Të gjithë demokratët votuan për rezolutën, ashtu si edhe republikanët Rand Paul, Todd Young, Lisa Murkowski, Josh Hawley dhe Susan Collins.

Nëse Senati e miraton masën, ajo do të duhet të miratohet nga Dhoma e Përfaqësuesve dhe të nënshkruhet nga Trump.

Rezoluta për fuqitë e luftës, e paraqitur nga senatori demokrat Tim Kaine, kërkon që Trump të kërkojë leje para se të sulmojë ose të përdorë ushtrinë kundër Venezuelës. Pas bastisjes së së shtunës që pa forcat speciale amerikane të sulmonin kryeqytetin e Venezuelës, Karakas, dhe të dërgonin Maduron në New York City për t’u përballur me gjyqin për akuzat që lidhen me “narkoterrorizëm”, presidenti tha se nuk i kishte njoftuar ligjvënësit paraprakisht sepse “Kongresi ka tendencë të rrjedhë informacione”.

Kjo shkaktoi zemërim midis demokratëve dhe disa republikanëve, të cilët argumentuan se bastisja ishte e paligjshme dhe rrezikonte të zhyste Shtetet e Bashkuara në një konflikt të zgjatur.

Ndërsa republikanët në përgjithësi e kishin mbështetur ofensivën për të rrëzuar Maduron, disa kanë shprehur shqetësime se një prani e zgjatur ushtarake në Venezuelë do të kërkonte miratimin e Kongresit, pjesërisht në konkurrencë me kërcënimin e Trump për një angazhim ushtarak të pacaktuar.

Senatori republikan Todd Young tha se një fushatë e zgjatur ushtarake në Venezuelë, edhe nëse e paqëllimshme, do të binte ndesh me qëllimin e Trump për t’i dhënë fund ndërhyrjeve të huaja.

Donald Trump ka thënë se nuk ka sulme të mëtejshme ndaj Venezuelës, por ato mund të bëhen të nevojshme nëse Presidentja e përkohshme e vendit, Delcy Rodriguez, nuk pranon kërkesat e SHBA-së për qasje në rezervat e mëdha të naftës së Venezuelës.

The post Senati amerikan miraton rezolutën që bllokon veprime ushtarake të SHBA në Venezuelë appeared first on Gazeta Si.

Delegacioni i Bashkimit Europian në Tiranë tha sot se po ndjek me shqetësim situatën e përmbytjeve në vendin tonë.

Në një postim në rrjetet sociale, Delegacioni shkruan se Drejtoria e Përgjithshme e BE-së për Mbrojtjen Civile dhe Ndihmën Humanitare (DG ECHO) është në kontakt me autoritetet shqiptare dhe po ndan informacionin dhe pamjet përkatëse nga sateliti Copernicus.

Gjithashtu, në postim thuhet se së bashku me Shtetet Anëtare, Bashkimi Europian është i gatshëm të mbështesë popullin shqiptar për përballimin e kushteve ekstreme atmosferike, përfshirë edhe përmes Mekanizmit të Mbrojtjes Civile të BE-së.

The post Delegacioni i BE-së reagon për përmbytjet në Shqipëri: Mbështesim popullin shqiptar appeared first on Gazeta Si.

Nga Gazeta Si- Me thirrjet “Durrësi, skenë e krimit” “shpallni gjendjen e emergjencës” qindra banorë kanë protestuar në rrugët e Durrësit kundër situatës që po kalon Durrësi.

Ata e kanë nisur protestën e tyre nga rrethrrotullimi pranë burgut për të vijuar marshimin drejt bashkisë së Durrësit ku dhe ka pasur përplasje pasi disa prej protestuesve kanë tentuar të futen në bashki, duke u ndaluar nga policia.

Sipas protestuesve, përmbytjet janë pasojë e keqmenaxhimit dhe abuzimeve me fondet dhe jo fatkeqësi natyrore dhe sot janë mbledhur për ti kërkuar llogari kryebashkiakes Emiriana Sako për situatën aktuale.

“I bashkohemi popullit tonë durrsak. Njerëzit po vuajnë, janë në mes të ujit. Këta janë në mes të kolltuqeve. Po i vjedh Emirjana Sako, Emirjana Sakon ka për ta dënuar Zoti. Kam ardhur këtu nga halli, për moshën që kam. Kam dalë nga shtëpia për ju. Rinia të vijë këtu, mos të rrijë në kafe, të na bashkohet”, tha një grua e moshuar e cila iu bashkua protestës edhe pse deklaroi se nuk rrezikon nga përmbytjet.

The post Përmbytjet në Durrës, banorët në protestë, i kërkojnë llogari kryebashkiakes (video) appeared first on Gazeta Si.

Nga Gazeta Si- Prej tre ditësh, Durrësi vijon të jetë i përmbytur për shkak të reshjeve të dendura të shiut, duke shkaktuar dëme të konsiderueshme.

Këtë të enjte është regjistruar edhe viktima e parë nga moti i keq. Një 54-vjeçar u gjet pa shenja jete në një kanal kullues në afërsi të Ish-repartit Ushtarak. Paraprakisht dyshohet se A. H. është marrë nga rrjedha e ujit pasi kishte dalë për verifikime.

Për përmbytjet në Durrës, Prokuroria e Durrësit ka nisur hetimet.

Hetimet kanë nisur për 3 vepra penale, “Shpërdorimi i detyrës”, “Shkatërrimi i pronës me përmbytje” dhe “Shkatërrimi i pronës nga pakujdesia”.

“Regjistrimi i këtij procedimi penal erdhi pas situatës së krijuar përgjatë dy ditëve ku për shkak të rreshjeve të vazhdueshme u krijuan problematika reale, të dukshme për personat fizikë, për mirëqënien e tyre por edhe dëme të konsiderueshme”, informoi Prokuroria e Durrësit.

Prokuroria thotë se gjendja e krijuar 2 ditë më parë nga përmbytjet, pengoi “zhvillimin normal i aktiviteteve arsimore, shtetërore, shëndetësore, ka krijuar bllokimin e rrugëve urbane dhe interurbane, përmbytjen e banesave dhe vendosjen në rrezik real të jetës së qytetarëve, përmbytjen e institucionit penitenciar duke vendosur në gjendje emergjente të gjithë qarkun” dhe se në këto kushte ka të dhëna të mjaftueshme dhe të arsyeshme se jemi përpara një fakti penal.

Gjithashtu, hetimet kanë nisur edhe pas vdekjes së punonjësit të komunales.

“Nga të dhënat paraprake ka dyshime që ai ka humbur jetën për shkak se është marrë nga rrjedhja e ujit e shkaktuar në vend”, njofton Prokuroria e Durrësit.

Prokuroria e Durrësit thekson se do të jetë hetimi ai që do të përcaktojë nëse shkaqet e përmbytjes kanë qenë natyrore apo kanë ardhur si pasojë e pakujdesisë apo mospërmbushjes së detyrës nga ana e organeve kompetente shtetërore apo të vetëqeverisjes vendore.

Situata në qarkun e Durrësit mbetet kritike nga përmbytjet, sidomos në Njësitë Administrative Sukth dhe Katund i Ri, ku përmbytja erdhi edhe nga rritja e prurjeve të lumit Erzen, duke rënduar më tej situatën. Emergjencat civile urdhëruan evakuimin e detyrueshëm të banorëve.

The post Shiu përmbyt Durrësin! Prokuroria nis hetim për 3 vepra penale appeared first on Gazeta Si.