Në muajin dhjetor, teksa inflacioni ishte 2.2%, tre grupe, të lidhura direkt me aktivitetin e turistëve sollën rreth 54% të rritjes së së çmimeve.

Sipas të dhënave të INSTAT, grupi “Qira, ujë, lëndë djegëse dhe energji” ndikoi me 0.96 pikë përqindje; “Hotele, kafene dhe restorante”, me 0.15 pikë përqindje dhe “Argëtim dhe kulturë” me 0.08 pikë përqindje.

Ndërsa në dhjetor ishte më e dukshme, kjo tendencë ka qenë e pranishme përgjatë gjithë vitit. Sipas INSTAT, inflacioni mesatar në ekonomi ishte 2.2% në vitin 2025, por struktura e tij tregon se një pjesë e rëndësishme e rritjes së çmimeve buron nga turizmi, përmes akomodimit, shërbimeve, ushqimit jashtë shtëpisë, transportit dhe qirave dhe kafeve e restoranteve.

Të dhënat e INSTAT për 2025 tregojnë se presionet inflacioniste po përqendrohen dhe po bëhen më selektive, të lidhura më shumë me kërkesën sezonale dhe flukset turistike, sesa me fuqinë vendase të konsumit.

Në krye të rritjes vitin e kaluar qëndruan shërbimet e akomodimit, me një rritje prej 6.5%, si dhe argëtimi dhe kultura (+5.6%), duke reflektuar zgjerimin e aktivitetit turistik dhe rritjen e kërkesës për shërbime rekreative.

Paralelisht, janë shtrenjtuar ndjeshëm edhe shërbimet dhe produktet e konsumit jashtë shtëpisë, si kafeja, çaji dhe kakaoja (+5.4%), pijet alkoolike (mbi 3%), si dhe ushqimet që përdoren gjerësisht nga sektori i bareve dhe restoranteve, si mishi dhe bylmeti.

Shërbimet e transportit u rritën me 3.9%, pavarësisht se grupi i transportit në total shfaq rënie, për shkak të uljes së çmimeve të karburanteve. Kjo ndarje tregon se kërkesa turistike ka rritur koston e shërbimeve, edhe kur faktorë të tjerë kanë vepruar në drejtim të kundërt.

Një element kyç në strukturën e inflacionit të vitit 2025 janë qiratë, të cilat shënuan rritje mesatare prej 4.5%. Rritja ishte e fortë në gjysmën e dytë të vitit, ku kulmi arriti në dhjetor me 8%. Ky zhvillim lidhet ngushtë me orientimin e një pjese të konsiderueshme të banesave drejt tregut të qiradhënies afatshkurtër për turistët, veçanërisht në zonat urbane dhe bregdetare.

Përshpejtimi i rritjes në fund të vitit 2025 tregon se presioni mbi tregun e strehimit pritet të vijojë edhe në muajt në vijim, duke e kthyer çështjen e qirave nga një problem tregu në një sfidë sociale dhe ekonomike. Në mungesë të politikave për rritjen e ofertës së banesave të përballueshme dhe frenimin e spekulimit, ritmi aktual i rritjes sugjeron se qiratë në Shqipëri po hyjnë në një fazë të re shtrenjtimi, shumë më agresive se ajo e viteve të mëparshme.

Sipas të dhënave nga agjencitë imobiliare në segmentin e qirave rezidenciale, sivjet çmimet për apartamente 1+1 në Tiranë kanë arritur deri në 900 euro në muaj në zonat më të kërkuara të qytetit. Të dhënat nga agjencitë e pasurive të paluajtshme tregojnë se tregu i qiradhënies po shënon rritje të vazhdueshme, me çmime që janë rritur mesatarisht 6 deri në 57% në vetëm një vit.

Rritja e çmimeve ka qenë e pranishme edhe në disa nën-grupe të tjera që lidhen me turizmin, të tilla si furnizimi i hoteleve me mobilie dhe tapiceri, importet dhe çmimet e të cilave janë rritur ndjeshëm dy vitet e fundit. Çmimet e tekstileve dhe tapeteve u rritën 5–6.4%.

Në vitin 2025, vendin e kanë vizituar më shumë se 12 milionë shtetas të huaj, të cilët kanë rritur kërkesën për shërbime të shumta, por ka kryesuar, akomodimi, kafeja e restorantet e argëtimi, çka siç shihet nga të dhënat e inflacionit, po përkthehet në një shtrenjtim të kostos së jetesës për vendasit.

The post Nga hotelet, qiratë, kafetë e argëtimi, si turistët ndikuan në 54% të rritjes së çmimeve në dhjetor appeared first on Revista Monitor.

TIRANË, 20 janar/ATSH/ Lagjja 300-vjeçare e Zdrales në Shkodër, një prej zonave historike më të njohura të qytetit në veri të vendit tashmë është e transformuar.

Falë projektit të bashkisë Shkodër nisur në vitin 2024, kjo lagje historike është shndërruar në një destinacion të ri tregtar, social dhe turistik, duke i shtuar vlerë të konsiderueshme ofertës turistike të qytetit.

Kryeministri Edi Rama ndau sot në rrjetet sociale, një album fotografish nga kjo zonë e njohur në Shkodër, duke e etiktuar lagjen Zdrale, si një tjetër shembull të rilindjes.

Projekti për rivitalizimin e Zdrales është një investim prej 2.5 milionë eurosh. I konceptuar në detaje për transformimin e kësaj lagjeje historike, projekti ka prekur infrastrukturën tokësore, fasadat, pjesën e xhamave dhe dyqaneve.

Lagja Zdrale, sot shërben edhe si një pedonale për këmbësorët, ndërsa subjektet tregtare janë unifikuar të gjithë në ngjyra dhe detaje.

/e.i/j.p/

The post Lagjja tregtare Zdrale i shtohet ofertës turistike të Shkodrës appeared first on Agjencia Telegrafike Shqiptare.

TIRANË, 20 janar /ATSh/ Në katër qarqe dhe 14 bashki të veriut të Shqipërisë ka nisur programi për Rijetëzimin e Kullave dhe përfshirjen e tyre në zinxhirin e turizmit, një nismë që lidh trashëgiminë, turizmin dhe zhvillimin e qëndrueshëm.

Ministri i Turizmit, Kulturës dhe Sportit, Blendi Gonxhja tha se institucioni që ai drejton po ndërmerr një qasje e re për rivitalizimin e kullave tradicionale, duke i trajtuar ato jo vetëm si monumente kulture, por si hapësira funksionale dhe të gjalla, të integruara në zhvillimin turistik, kulturor dhe ekonomik të zonave ku ndodhen.

Programi shtrihet në qarqet Dibër, Kukës, Shkodër dhe Lezhë dhe synon kthimin e kullave në bujtina, qendra kulturore, muze lokalë dhe pika edukimi, si pjesë e itinerareve turistike që ofrojnë përvoja autentike për vizitorët vendas dhe ndërkombëtarë.

Sipas Gonxhes, kjo ndërhyrje synon të kontribuojë në ruajtjen e trashëgimisë, forcimin e identitetit lokal dhe krijimin e mundësive të reja për zhvillim të qëndrueshëm në komunitetet përkatëse.

Gonxhja informoi se në këtë kuadër, është përgatitur një pyetësor informues, i cili shërben për mbledhjen e të dhënave mbi gjendjen aktuale, historinë dhe potencialin e kullave tradicionale në këto zona, si bazë për planifikimin e mëtejshëm të ndërhyrjeve.

“Të dhënat e mbledhura do të përdoren për analiza dhe vendimmarrje në kuadër të zbatimit të programit”, tha ai.

“Rijetëzimi i Kullave” bëhet pjesë e një strategjie më të gjerë që synon krijimin e itinerareve kulturore dhe turizmit malor, që do të lidhin zonat e veriut përmes historisë, artit dhe natyrës së paprekur, duke ndërtuar një rrjet të qëndrueshëm përvoje turistike që zgjat gjatë gjithë vitit.

Faza e parë e programit ka nisur vitin e kaluar dhe do të zgjasë edhe gjatë 2026-ës. Kjo fazë fokusohet në identifikimin e kullave në 4 qarqe: Lezhë, Shkodër, Dibër dhe Kukës. Kjo fazë përfshin hartimin e projekteve tip për secilin qark dhe zhvillimin e programit të plotë për rijetëzimin e kullave që synon të përfshijë më tepër aktorë të tjerë publikë, apo donatorë të tjerë.

Faza e dytë do të zhvillohet në periudhën 2026-2028 dhe përfshin restaurimin e kullave, rijetëzimin e tyre, lidhje me operatorë turistikë, përfshirje në itinerare dhe zhvillimin e produkteve të tjera turistike rreth kullave, etj.

/e.i/j.p/

The post Gonxhja: Rivitalizimi i kullave, monumente kulture por dhe hapësira të gjalla për zhvillim ekonomik appeared first on Agjencia Telegrafike Shqiptare.

TIRANË, 20 janar/ATSh/ Ministri i Turizmit, Kulturës dhe Sportit, Blendi Gonxhja ka zhvilluar një vizitë në Pazarin e Krujës, ku është takuar me artizanë dhe sipërmarrës.

Ministri Gonxhja bëri të ditur se, mbështetja e artizanatit, e ekonomisë lokale dhe e turizmit kulturor mbetet një prioritet i rëndësishëm, për të garantuar zhvillim të qëndrueshëm, punësim dhe promovim dinjitoz të Shqipërisë si destinacion me rrënjë të forta kulturore dhe potencial të madh turistik.

Artizanët dhe sipërmarrësit e këtij pazari, përmes punës së tyre ruajnë identitetin kombëtar dhe promovojnë produktet “Made in Albania” si vlera autentike për vizitorët vendas dhe të huaj.

Pazari i Krujës është një ansambël që ruan vlera historiko-arkitektonike, me rrugë me kalldrëm që të çojnë drejt kalasë së qytetit.

Ky pazar është zemra e qytetit të Krujës, një vend me gjallëri, i frekuentuar gjatë gjithë vitit nga vizitorë vendas e të huaj të cilët tërhiqen edhe nga suveniret e shumta. Çdokush i dhënë pas blerjeve artizanale patjetër që kalon nga Pazari i Krujës, në dyqanet e të cilit edhe mund të shihet endja e pëlhurave.

1 nga 8

/r.e/

The post Gonxhja: Prioritet mbështetja e artizanatit dhe e turizmit kulturor appeared first on Agjencia Telegrafike Shqiptare.

TIRANË, 19 janar /ATSH/ – Ndërsa kushtet arktike po godasin Britaninë e Madhe me erëra të akullta dhe reshje dëbore, shumë britanikë kanë filluar të mendojnë për pushime në vende më të ngrohta.

Një vend evropian i nënvlerësuar dhe shumë i lirë, ku një gotë birrë kushton vetëm 2,20 paund mund të jetë zgjidhja ideale, dhe vjen i rekomanduar edhe nga eksperti i udhëtimeve Simon Calder për britaniken ”Express”.

Ky vend mesdhetar arrin temperatura rreth 28 gradë Celcius në prill dhe 40 gradë Celcius në korrik dhe pushimet atje mund të jenë shumë më të lira krahasuar me destinacione të tjera të njohura evropiane.

Çmimet janë të ngjashme me ato që Britania e Madhe kishte në vitet ’90: turistët mund të blejnë një birrë për 2,20 paund dhe një kafe për vetëm 1,50 paund, sipas kalkulatorit të kostos së jetesës “Numbeo”.

”Pushuesit mund të kursejnë edhe në hotele, pasi qëndrimi mesatar kushton rreth 49 paund për natë”, sipas BudgetYourTrip.

Për më tepër, Simon Calder është një admirues i vendit, gjë që flet vetë.

Ai foli në emisionin ”This Morning” të ITV-së në shtator 2024 për qytetin e bukur të Durrësit.

Duke biseduar me prezantuesit Ben Shepherd dhe Cat Deeley, ai tha se ”është një nga qytetet më historike dhe më të bukura të Shqipërisë”.

Calder u shpreh gjithashtu entuziast për çmimet, duke kujtuar se kishte blerë një picë dhe një birrë për rreth 6,0 paund. Ai shtoi se udhëtimi i tij prej rreth 35 kimometrash nga aeroporti deri në hotel do t’i kishte kushtuar vetëm disa paund, po të mos kishte humbur autobusin e fundit.

Për turistët që kërkojnë histori, Durrësi është destinacion ideal, i njohur për amfiteatrin e tij romak mbresëlënës, me mozaikë ende të paprekur.

Nëse preferoni plazhin, shumë udhëtarë e kanë krahasuar Shqipërinë me Greqinë, por pa çmimet e larta, falë ujërave të kristalta dhe bregdetit mahnitës.

Vendi ka njohur një rritje të shpejtë të popullaritetit mes turistëve, me qytete bregdetare si Ksamil që janë bërë virale në rrjetet sociale. Megjithatë, sipas udhëtarëve në Reddit, Shqipëria mbetet ende e nënvlerësuar, ndërsa ata lavdërojnë peizazhet mahnitëse, udhëtimet e përballueshme dhe njerëzit jashtëzakonisht mikpritës.

Shumë plazhe janë private dhe të lidhura me bare ose restorante, ndaj mund të jetë e nevojshme të paguani për të qëndruar gjatë ditës. Pasi të sistemoheni, mund të notoni në ujërat e qeta dhe blu të thellë.

Shqipëria është gjithashtu një destinacion i preferuar evropian për ecje malore, me Alpet Shqiptare që ofrojnë maja të larta, bujtina lokale në fshatra të largëta dhe ujëvara mbresëlënëse./  /Ad.Ab./ a.jor.

The post “Express”: Shqipëria në qendër të vëmendjes britanike për plazhet e kristalta dhe çmimet e ulëta appeared first on Agjencia Telegrafike Shqiptare.

TIRANË, 18 janar/ATSH/ Ministri i Turizmit, Kulturës dhe Sportit Blendi Gonxhja ndau sot statistikat e zhvillimit të turizmit dhe kulturës për vitin 2025, që dëshmojnë rritjen e interesit për Shqipërinë.

Gonxhja u shpreh se këto statistika reflektojnë ndikimin e politikave të ndjekura, investimeve të realizuara dhe bashkëpunimit mes institucioneve qendrore e vendore.

Konkretisht në vitin 2025 Shqipërinë e vizituan mbi 12,4 milionë vizitorë të huaj, ose rreth 770 mijë më shumë krahasuar me vitin 2024.

Vetëm nga Kosova, numri i vizitorëve shënoi rritje me 5,3% krahasuar me vitin 2024.

Të ardhurat nga turizmi për 9-mujorin 2025 arritën në 4,4 miliardë euro, ose një rritje prej 14,5%.

Po ashtu, sitet e trashëgimisë kulturore u vizituan nga mbi 1,5 milionë vizitorë, duke shënuar rritje të të ardhurave me 30,63% krahasuar me vitin 2024.

“Këto të dhëna dëshmojnë jo vetëm rritjen e interesit për Shqipërinë si destinacion, por edhe përmirësimin gradual të standardeve, shërbimeve dhe ofertës kulturore në të gjithë territorin”, u shpreh Gonxhja.

Njëkohësisht, Ministri theksoi se “ato na vendosin përpara nevojës për planifikim më të kujdesshëm, menaxhim të qëndrueshëm dhe orientim strategjik, në mënyrë që ky zhvillim të përkthehet në përfitime afatgjata për komunitetet, ekonominë dhe imazhin ndërkombëtar të vendit”.

/m.m/r.e/

The post Gonxhja: Mbi 12,4 milionë vizitorë të huaj në 2025-ën appeared first on Agjencia Telegrafike Shqiptare.

“Turizmi malor ka filluar që për Krishtlindje, sidomos në destinacionet e Korcës, Voskopojës dhe Dardhës, që janë më të preferuarat dhe ofrojnë disa shërbime turistike. Në Dardhë ka një pjesë për ski, e përshtatshme kryesisht për fillestarët, pasi nuk kemi qëndra të mëdha skijimi. Presim që vitet e ardhshme të rritet kapaciteti akomodues dhe të zhvillohen edhe vende të tjera si Puka…

Source

TIRANË, 18 janar /ATSH/ Brenda gjashtëmujorit të parë të vitit, bizneset e sektorit të turizmit, si edhe subjekte të tjera të shërbimeve, do të jenë të detyruara që, përveç pagesave kesh (cash), të garantojnë edhe forma alternative të pagesave elektronike, përfshirë pagesat me karta krediti, karta debiti dhe mjete të tjera elektronike.

Kreu i Shoqatës së Operatorëve Turistikë, Zak Topuzi, në një prononcim për ATSH-në, e cilësoi këtë nismë të qeverisë si një hap pozitiv për vendin, duke theksuar se ajo ndikon drejtpërdrejt në formalizimin e ekonomisë dhe në përmirësimin e shërbimit ndaj turistëve.

“Plani ambicioz i Kryeministrit për ta shndërruar Shqipërinë në një vend me përdorim minimal të parasë kesh është interesant dhe i domosdoshëm. Është e sigurt që një nga sektorët kryesorë ku do të zbatohet kjo masë është turizmi dhe shërbimet”, u shpreh Topuzi.

Sipas tij, turizmi dhe transporti sigurojnë rreth 43,6% të totalit të eksporteve të vendit dhe përbëjnë një sektor strategjik për ekonominë shqiptare. Megjithatë, Topuzi vuri në dukje se industria e turizmit përballet me disa problematika serioze që e kanë vështirësuar deri më tani zbatimin e plotë të pagesave elektronike.

“Dy elementë thelbësorë nuk janë trajtuar mjaftueshëm. Arsyeja kryesore është niveli shumë i lartë i komisioneve që aplikojnë bankat e nivelit të dytë për pagesat me karta. Ndërkohë që në Bashkimin Europian komisionet variojnë nga 0,3 deri në 0,6% në Shqipëri ato shkojnë nga 1,8 deri në 5%”, theksoi ai.

Topuzi nënvizoi se për bizneset e vogla të shërbimit, që operojnë me marzhe fitimi 7 deri në 10 për qind, këto komisione e penalizojnë ndjeshëm aktivitetin. “Në këto kushte, banka kthehet në një aksionar kryesor, duke marrë deri në 30-40 për qind të të ardhurave të biznesit”, tha ai.

Një tjetër shqetësim i ngritur prej tij lidhet me faktin se komisionet për pagesat elektronike rëndojnë mbi subjektet dhe jo mbi klientët, ndërsa në transaksione të vogla kjo kosto bëhet e papërballueshme. “Nuk është normale që për një pagesë të vogël, siç është një kafe, të paguhen komisione shtesë”, u shpreh Topuzi.

Ai e cilësoi proces për pagesave elektronike si një “revolucion të përgjithshëm”, që nuk lidhet vetëm me vendosjen e pajisjeve POS në njësitë e shërbimit, por kërkon ndërhyrje rregullatore nga Banka e Shqipërisë. “Banka Qendrore nuk duhet të jetë vetëm rekomanduese, por vendimmarrëse për kufizimin e komisioneve, ashtu siç kanë vepruar shumë vende europiane”, tha Topuzi, duke përmendur shembuj nga Greqia dhe Zvicra, ku komisionet janë ulur në nivele minimale.

Një tjetër çështje e rëndësishme, sipas tij, është mundësia e dhënies së bakshishit (tips) përmes kartës bankare. “Turizmi është kthyer në një nga industritë më të rëndësishme në Shqipëri, me rreth 12 milionë turistë të huaj në vit. Sistemi aktual nuk e lejon që bakshishi të kalojë përmes kartës, gjë që penalizon punonjësit e shërbimit”, theksoi Topuzi.

Ai bëri të ditur se Shoqata e Operatorëve Turistikë ka zhvilluar takime me përfaqësues të institucioneve dhe bankave për të mundësuar këtë proces, i cili është i aplikuar gjerësisht në vendet europiane dhe realizohet në mënyrë transparente përmes sistemit bankar dhe tatimor.

Ndër të tjera Topuzi gjithashtu theksoi rëndësinë e fushatave të informimit dhe trajnimeve për bizneset, veçanërisht për ato të vogla, si dhe zhvillimin e infrastrukturës teknike dhe teknologjike. “Është e vështirë që ky proces të realizohet plotësisht brenda gjashtë muajve pa mbështetje konkrete dhe pa uljen e komisioneve bankare”, tha ai.

Sipas tij, kjo masë do të ndikojë edhe në formalizimin e sektorit të akomodimit, ku aktualisht rreth 70 për qind e kapaciteteve janë apartamente dhe vila në formën B&B, ndërsa vetëm 22 për qind janë hotele. “Vendosja e pagesave elektronike do ta fusë këtë sektor në një regjim më të kontrolluar dhe më transparent”, përfundoi Topuzi.

Kreu i Shoqatës së Operatorëve Turistikë, Zak Topuzi, foto: Florian Abazaj

1 nga 9

/e.xh/j.p/r.e/

The post Topuzi për ATSH: Pagesat elektronike në turizëm hap pozitiv, problem nivelet e larta të komisioneve bankare appeared first on Agjencia Telegrafike Shqiptare.

Agroturizmi po ecën në një trajektore të qartë viteve të fundit: rritje e qëndrueshme, pa zhurmë dhe pa luhatje sezonale.

Ky sektor nuk premton rekorde por është i sigurt se do të tërheqë pranë vetes më shumë vizitorë edhe këtë vit duke u kthyer në segmentin më të stabilizuar të turizmit.

Agroturizmi duket se ka gjetur formulën që vizitorët kërkojnë dhe e rikërkojnë dhe mbi të gjitha janë të gatshëm të paguajnë.

Dikur një territor i paeksploruar fort dhe me rrezik të lartë, për shkak të kompleksitetit që ka gërshetimi në një i dy sektorëve, sot ky model shpërblen ata pak sipërmarrës që investuan herët dhe me vizion.

Ndryshe nga turizmi klasik, që ndikohet fort nga sezonaliteti, agroturizmi ka ndërtuar një identitet që funksionon gjatë gjithë vitit.

Viti 2025 e konfirmoi plotësisht këtë prirje pozitive, falë konsolidimit të strukturave ekzistuese që po zgjerojnë ofertën, po eksperimentojnë me ide të reja dhe po përshtaten gjithnjë e më shumë me kërkesat e vizitorëve.

Nuk bëhet fjalë për perfeksion, por për identitet dhe origjinalitet, diçka që i shërben qëndrueshmërisë në një realitet sfidues.

Mes kostove në rritje, mungesës së fuqisë punëtore dhe boshatisjes së fshatrave, agroturizmi po shndërrohet në një nxitës të ekonomisë lokale duke hapur mundësi për prodhimet vendase dhe po krijon arsye reale që fermerët dhe banorët të mos largohen, të paktën aty ku modeli po funksionon.

Agroturizmi hyn me optimizëm në këtë vit të ri

Ky vit po shihet me optimizëm nga operatorët e agroturizmit, të cilët janë të mësuar me rritje modeste, por të qëndrueshme dhe presin që ritmi të vijojë njëlloj. Bazë e kësaj pritshmërie janë së pari investimet e vazhdueshme për përmirësim dhe zgjerim të ofertës në strukturat e tyre.

Së dyti është interesi që të huajt po vijojnë të tregojnë për Shqipërinë, në veçanti, për dimensionin e saj rural, aty ku agroturizmi ka ditur të ndërthurë përvojën autentike me traditën lokale.

Sipas operatorëve të sektorit, qëllimi fillestar është së pari ruajtja e nivelit aktual të vizitorëve që ky sektor ka marrë dhe me të cilin mbylli vitin 2025.

Agroturizmi mbështetet sot në dy shtylla të forta: klientët besnikë që rikthehen rregullisht dhe vizitorët e rinj, të nxitur nga kureshtja për një Shqipëri ndryshe nga turizmi masiv.

“Për ne është e rëndësishme të mos kemi rënie dhe të mbajmë stabilitetin. Kemi klientë që kthehen dhe të tjerë që na zbulojnë për herë të parë. Interesi ekziston dhe kjo na bën optimistë për këtë vit, sidomos nëse ruajmë këtë qëndrueshmëri në afatgjatë”, thekson z. Prenga.

Në të njëjtën linjë, z. Gjepali vë në dukje avantazhet konkurruese që Shqipëria vijon të ketë: klimën e favorshme dhe raportin cilësi–çmim, veçanërisht në gastronomi.

Sipas tij, agroturizmet shqiptare mbeten ende të përballueshme krahasuar me standardet perëndimore për atë që ofrojnë.

“Jemi mësuar të rritemi vit pas viti dhe kjo na bën pozitivë. Ushqimi i mirë dhe jeta autentike rurale në Europë kushtojnë shumë më shtrenjtë.

Shqipëria ofron një mikroklimë të shkëlqyer dhe përvoja reale, faktorë që besoj do të vazhdojnë të jenë vendimtarë për ata që na zgjedhin”, nënvizon ai.

Pse agroturizmi po tërheq turistë më cilësorë se turizmi klasik

Ndërsa turizmi klasik në sezonin veror që lamë pas u përball me luhatje të dukshme gjatë verës, agroturizmi u rezistoi më mirë tronditjeve, duke konfirmuar një nivel më të lartë qëndrueshmërie.

Përfaqësues të sektorit vlerësojnë se suksesi afatgjatë varet nga ecja në një linjë të përbashkët mes turizmit dhe agroturizmit, me fokus të qartë tek ajo që po rezulton pika kyçe: oferta autentike dhe identiteti kombëtar.

Sipas tyre, nëse ky vizion i përbashkët mungon, zinxhiri prishet. Dobësimi i një segmenti reflektohet menjëherë te tjetri, duke rrezikuar ekuilibrin e gjithë sektorit.

“Rritja nuk është përgjegjësi vetëm e agroturizmit. Identiteti nuk ndërtohet nga një pikë e vetme, por nga Tirana deri në Çamëri. Nuk është thjesht çështje marke, por mendësie dhe vizioni të unifikuar.

Promovimi sjell turistë, por mënyra si i presim dhe çfarë u ofrojmë përcakton nëse ata rikthehen. Të punosh vetëm për momentin dhe jo për të nesërmen na dëmton të gjithëve. Pa identitet, nuk ka turizëm të vërtetë”, thekson z. Prenga.

Tregu i turizmit dhe agroturizmit vijon të kalojë një proces testimi që përsëritet çdo vit: disa operatorë konsolidohen dhe rriten, ndërsa të tjerë luhaten ose dalin nga tregu. Sipas z. Gjepali, kjo është një fazë tranzitore që do të qartësojë peizazhin e sektorit në një afat relativisht të shkurtër.

“Agroturizmet, ndryshe nga turizmi tradicional, menaxhohen kryesisht nga familje dhe kjo sjell më shumë përkushtim dhe shërbim më cilësor. Faza që po vjen është ajo e selektimit natyror për të gjithë sektorin.

Do të bëhet diferencimi i qartë mes atyre që ofrojnë standard real dhe atyre që premtojnë më shumë sesa japin. Në dy-tre vitet e ardhshme, do të konsolidohet një bërthamë e fortë strukturash serioze dhe panorama e turizmit dhe agroturizmit do të jetë shumë më e qartë”, thotë ai.

The post Rritja e qëndrueshme e agroturizmit pritet të vazhdojë edhe këtë vit appeared first on Revista Monitor.

Turizmi i viteve të fundit u ka dhënë një shtysë të dukshme kantinave të verës, por ky impuls mbetet ende larg potencialit real. Arsyeja kryesore, sipas prodhuesve, është një zinxhir mbështetës që nuk funksionon siç duhet.

Vera shqiptare vijon të përballet me paragjykim dhe shpesh mbetet jashtë menusë së bareve dhe restoranteve, të cilat favorizojnë etiketat e importuara. Ndërkohë, sjellja e konsumatorit po ndryshon dhe kostot janë në rritje të vazhdueshme.

Kantinat theksojnë se përballë këtij realiteti, investimet dhe masat nuk janë më zgjedhje, por domosdoshmëri.

Gjatë vitit 2025, panorama për verërat lokale mbeti pothuajse e pandryshuar krahasuar me një vit më parë, ndërsa sfidat janë shtuar.

Turizmi, si një nga motorët kryesorë të rritjes, i ka tërhequr kantinat një hap përpara, por sërish jo në masën që lejon potenciali real i këtij zinxhiri nëse do të ishte i mirëkoordinuar. Edhe gjatë këtij viti, ky sektor pritet të shtrijë efektin e tij te kantinat vendase të verës, ku më shumë e ku më pak.

Interesi i të huajve për produktet lokale është real dhe vera shqiptare nuk bën përjashtim. Ajo që e frenon përhapjen e saj është “lufta” me importet.

Për shumë biznese, kjo është thjesht një llogari fitimi: zgjidhen produktet që shiten më lehtë dhe që perceptohen si “më të mira” vetëm sepse janë të importuara.

Kantinat shqiptare e kundërshtojnë këtë, duke theksuar se vera vendase, për të njëjtën kategori, ofron cilësi të barabartë ose më të lartë se importi.

Por në një treg me konkurrencë të fortë globale, vera shqiptare vijon të luhatet mes një rritjeje të vështirë, sfidash e paragjykimi që do ta shoqërojnë edhe këtë vit.

Për të forcuar kantinat, subjektet po tentojnë të bashkojnë forcat me agroturizmin duke i ndërthurur këto aktivitete, diçka që duket se jep qëndrueshmëri më të madhe.

Pritshmëritë: 365 ditë të reja mes sfidave të vjetra, turizmi si nxitës

Kantinat e verës janë të vetëdijshme se paragjykimi për markën shqiptare nuk do të mund të shuhet brenda një viti, pavarësisht punës për ndërgjegjësim apo marketimit të etiketave vendase.

Kjo sfidë do të vijojë që t’i shoqërojë ato edhe këtë vit, ashtu si shumë të tjera.

Prodhimi i bollshëm i rrushit cilësor gjatë viteve të fundit dhe pritshmëria se turizmi do të nxiste konsumin i ka bërë ato që ndër vite të prodhojnë vrullshëm.

“Në aspektin cilësor, këtë vit, prodhimi i verës duket se do të premtojë një standard të lartë cilësie, identifikuar kjo jo vetëm nga rezultatet e analizës së rrushit para procesit të vjeljes, por edhe nga analizat që i bëhen vazhdimisht gjatë proceseve të trajtimit të saj si ai i fermentimit.

Këtë e lidh specifikisht me analizat e kloneve autoktone të rrushit, të cilat jo vetëm që nuk prodhohen në sasi të larta, por rriten si të thuash ‘në shtëpinë tyre’, ndryshe nga kultivarët ndërkombëtarë, të cilët duhen trajtuar për t’ju përshtatur terrenit ku rriten.

Në aspektin sasior, ky vit ka qenë bujar për prodhuesit vendas, duke sjellë në treg më shumë prodhim ‘Made in Albania’, por në termat e përqindjes, jemi herët për të zbuluar shifra dhe do të duhet të presim ende që të zbulojmë deklarimet e sasive të prodhimit nga çdo subjekt prodhues”, shprehet Rigers Kaçorri nga Kantina “Arbëri”.

Turizmi, sipas tij, është një lokomotivë e rëndësishme e konsumit të kantinave, diçka që është reflektuar vit pas viti, madje edhe gjatë 2025-s që lamë pas.

“Kantina jonë ka pritur vizitorë nga kombësi të ndryshme gjatë gjithë vitit 2025 dhe në periudha të caktuara si p.sh. në sezonin veror, ky numër ka qenë i lartë.

Pavarësisht se ka edhe grupe turistësh që futen te profili i turistit me shpenzime të reduktuara, do të thosha që çdo turist i huaj e provon gjithmonë një produkt të vendit, qoftë kjo pije e verës apo çdo gjë tjetër që mban origjinën e prodhimit në Shqipëri. Mendoj se ‘Konsumatori Turist’, le ta quajmë

kështu, luan rol të rëndësishëm në rritjen e kërkesës nga ana e restoranteve apo dyqaneve të verës për produktet e vendit dhe si rrjedhojë, kjo sjell edhe rritjen e konsumit të produkteve shqiptare nga konsumatori fundor” nënvizon ai.

Por teksa prodhimi i kantinave ka qenë i nxitur nga turizmi, pjesa që merr importi “ndrydh” prodhimin vendas duke krijuar një qasje më të rezervuar në prodhim nga ana e kantinave.

“Prodhimi i verës ka qenë mirë. Jemi të kënaqur me cilësinë e rrushit por këtë vit kemi prodhuar më pak.

Gjatë 2018 deri në 2021, ne merrnim nga familjet që bashkëpunonim 100 tonë rrush. Këtë vit kemi marrë vetëm 15 tonë, sepse kantina është plot ngaqë verën e vendit e mbyt importi.

Ndiej keqardhje vetëm që s’mund të ndihmojmë më shumë ato 200 familje me të cilat kemi bashkëpunuar ndër vite sepse nuk po funksionon zinxhiri.

Kështu po detyrohemi të braktisim familjet me vreshta që në kushtet kur s’kanë treg detyrohen ose të prodhojnë raki ose ta shesin me çmim shumë të ulët”, shprehet Flori Uka, nga “Uka Farm”.

Lidhur me pritshmëritë për këtë vit, ai pohon se për sipërmarrjen e tij pret që puna të vijojë njëlloj, edhe si efekt i emrit të markës dhe faktit që së pari mbizotëron agroturizmi dhe më pas prodhimi i verës, por lidhur me industrinë e verës në vetvete rritja është bërë më e vështirë.

“Nuk jam pesimist për turizmin, mendoj se Shqipërinë do të vijojnë ta vizitojnë të huajt, sepse kemi kompani që sjellin turistë me kontrata dhe kjo është një lloj garancie. Duhet të reflektojmë që ata që vijnë të kenë një përvojë pozitive dhe të duan të kthehen apo të flasin mirë.

Agroturizmi është një nga ato pikat që pëlqehet më shumë sepse sjell identitet dhe për këtë ka kureshtje, ama kjo duhet të nxitet” nënvizon ai. / Nertila Maho

The post Mes rritjes dhe nënvlerësimit, rrugëtimi i verës vendase appeared first on Revista Monitor.

TIRANË, 17 janar/ATSH/ Ministri i Turizmit, Kulturës dhe Sportit Blendi Gonxhja deklaroi sot se viti 2025 falë punës, bashkëpunimit dhe politikave të mirëqeverisjes u mbyll me rekorde tejet pozitive në fushën e turizmit.

Gjatë takimit me kryetarët e bashkive, ku ishte i pranishëm edhe kryeministri Edi Rama, ministri Gonxhja paraqiti  shifrat më të përditësuara të vitit 2025, duke sjellë një panoramë të qartë mbi ecurinë e turizmit dhe mbi trendet që e kanë ndikuar dhe karakterizuar këtë periudhë”.

“Sipas të dhënave, numri i vizitorëve të huaj në vitin 2025 ka arritur në 12,466,038, duke reflektuar një rritje prej rreth 6.6%, ose +769,960 vizitorë të huaj më shumë se gjatë vitit 2024. Kjo rritje është një tregues shumë rezultativ për sektorin dhe për ekonominë e vendit në tërësi”, informoi ministri Gonxhja.

Në të njëjtën kohë, sipas tij, është e rëndësishme të theksohet se rritja e këtyre shifrave i vendos përpara një përgjegjësie edhe më të madhe: për të garantuar jo vetëm vazhdimësinë, por mbi të gjitha për të siguruar që kjo rritje të përkthehet në të ardhura reale nga turistë që konsumojnë më shumë, që frekuentojnë ekonomi formale dhe shërbime cilësore, me standarde më të larta, organizim më të mirë dhe me menaxhim të qëndrueshëm të destinacioneve tona, për t’u rikthyer e për të ndjerë tërheqje më të fortë nga eksperienca e vizitës në Shqipëri

Gonxhja bëri të ditur se për 9-mujorin 2025 hynë 4.4 miliardë euro nga turizmi, 14,5% rritje e të ardhurave në krahasim me të njëjtën periudhë të vitit 2024.

Më tej, Gonxhja u ndal tek plazhet publike, ku theksoi se “gjatë 2025 kishte rritje të konsiderueshme të plazheve publike me 17.4% krahasuar me 2024, ku plazhet publike janë shtuar me mbi 1.1 milionë metër”.

Duke u ndalur tek fluturimet, Gonxhja tha se “Aeroporti Ndërkombëtar i Tiranës ka shënuar një rritje të ndjeshme të flukseve turistike, me 3,589,137 vizitorë të huaj të regjistruar, ndërsa në periudhën janar–shtator2025 janë përpunuar mbi 9 milionë pasagjerë, duke konfirmuar një trend rritës gjatë gjithë vitit dhe muaj kulmorë me mbi 1 milion pasagjerë në muaj”.

Sipas tij, ky zhvillim mbështetet edhe nga operimi i 30 linjave ajrore në TIA dhe zgjerimi i rrjetit të fluturimeve me 70–80 destinacione direkte në 20 shtete, ku tregjet kryesore mbeten Italia, Mbretëria e Bashkuar, Gjermania, Benelux, Europa Qendrore dhe ajo Nordike.

“Po ashtu, zhvillime të rëndësishme priten me Ryanair, e cila do të hapë bazë në Tiranë nga prilli 2026 me 3 avionë të bazuar dhe 10 linja të reja, duke çuar në rreth 33 linja totale, ndërkohë që Wizz Air vijon të mbetet operatori kryesor me zgjerim të vazhdueshëm të frekuencave. Një hap historik është edhe njoftimi i linjës direkte Tiranë–Toronto, si linja e parë direkte transoqeanike, e planifikuar për sezonin veror 2026, që do të sjellë diversifikim tregjesh dhe turizëm me vlerë të lartë”, tha Gonxhja.

Sa i përket vizitorëve në sitet kulturore, Gonxhja tha se “1,523,587 vizitorë vizituan sitet e trashëgimisë kulturore si muze, kala, parqe arkeologjike”.

“Këto shifra kaq pozitive janë një arritje e rëndësishme dhe një tregues i qartë i besimit në rritje ndaj Shqipërisë si destinacion turistik, çka paralelisht ngre imazhin tonë ndërkombëtarisht, ndihmon perceptimin globalisht. Njëkohësisht, rekordet janë edhe një sinjal shumë i fortë se turizmi sot kërkon më shumë kapacitet menaxhues, profesionistë, edukim të tregut të punës, optimizim, sinergji dhe bashkëveprim”, tha Gonxhja.

/k.s/j.p/

The post Gonxhja: Rritje e të ardhurave nga turizmi, ta përkthejmë me menaxhim të qëndrueshëm të destinacioneve tona appeared first on Agjencia Telegrafike Shqiptare.

Shqipëria, destinacion i jahteve: Forbes e sheh vendin si qendrën e re të luksit në Mesdhe   Shqipëria, destinacion i jahteve, po tërheq gjithnjë e më shumë vëmendjen e industrisë ndërkombëtare të luksit. Revista prestigjioze Forbes i ka kushtuar një artikull të posaçëm bregdetit shqiptar, duke e cilësuar vendin si destinacionin e ardhshëm strategjik për […]

The post Shqipëria, destinacion i jahteve: Forbes e sheh vendin si qendrën e re të luksit në Mesdhe appeared first on Saranda Web.

TIRANË, 17 janar/ATSH/ Ministri i Turizmit, Kulturës dhe Sportit, Blendi Gonxhja zhvilloi një takim me drejtuesit kryesorë të strukturave në varësi të MTKS-së ku diskutuan për  prioritetet strategjike për 2026.

Gjatë takimit fokus të veçantë iu kushtua objektivave dhe ndërtimit të politikave sektoriale të qëndrueshme 2026-2030.

Gjatë fjalës së tij, Gonxhja theksoi se zhvillimi i turizmit të qëndrueshëm, përmirësimi i menaxhimit të sezonit turistik veror, frekuentimi gjithëvjetor i destinacioneve tona, rritja e cilësisë së shërbimeve të mikpritjes dhe strukturave të akomodimit, si dhe garantimi i një eksperience konkurruese dhe cilësore për vizitorët, promovimi digjital dhe formalizimi, janë ndër prioritetet kryesore të kësaj fushe jetike për ekonominë shqiptare.

Po ashtu, në portofolin e kulturës vëmendja u përqendrua te mbështetja e artistëve dhe profesionistëve të kulturës, pasurimi i kalendarit kulturor, ndjekja e ecurisë së kantiereve kulturore, proceset e rijetëzimit, konservimit dhe mbrojtjes së trashëgimisë kulturore,   risitë ligjore e reformimi institucional, si dhe fuqizimi i industrisë dhe ekonomisë kreative.

Sipas ministrit Gonxhja, sporti mbetet një prioritet i rëndësishëm.

“Zhvillimi i sportit elitar dhe sjellja e eventeve sportive ndërkombëtare në Shqipëri, si instrument për promovimin e vendit, rritjen e turizmit sportiv dhe forcimin e imazhit ndërkombëtar janë ndër prioritet kryesore në këtë fushë”, tha Gonxhja.

Ministri Gonxhja u shpreh se “koordinimi i skuadrës së re të MTKS, ndjekja prioritare e vizionit të qeverisë, ecuria ndërinstitucionale, mes ndarjes së qartë të përgjegjësive e afateve, garanton angazhim e ritëm maksimal për zbatim cilësor të synimeve, mirëqeverisjes, rritjes së vlerës ekonomike dhe forcimit të misionit për identitet kulturor, rini aktive e zhvillim”.

Për këtë vit MTKS ka një buxhet prej 7.4 mld lekë, ku kultura ka pjesën më të madhe  me 4.95 mld lekë, turizmi 919 milionë lekë dhe sporti  834.6 milionë lekë.

Ky buxhet paraqet një vizion të qartë për forcimin e turizmit të qëndrueshëm, mbrojtjen e trashëgimisë kulturore dhe rritjen e kapaciteteve krijuese e sportive në vend.

/k.s/j.p/

The post Gonxhja: Turizmi i qëndrueshëm, kultura dhe sporti në fokus të prioriteteve 2026 appeared first on Agjencia Telegrafike Shqiptare.

TIRANË, 16 janar/ATSh/ Zonat e mbrojtura malore në qarkun e Shkodrës janë ndër pikat e referimit për turizmin e aventurës dhe natyrës, duke tërhequr vizitorë vendas dhe të huaj që kërkojnë eksperienca autentike në zemër të maleve.

Këto ditë janari zonat malore tërheqin turistë që shijojnë bukuritë që ato ofrojnë nën petkun e dëborës.

Drejtori i Administratës së Zonave të Mbrojtura, Agim Dardha tha sot për ATSh-në se “Thethi, Boga, Vermoshi, Lëpusha, Razma janë ndër destinacionet më të rëndësishme të turizmit të aventurës, ku natyra e egër dhe terreni malor krijojnë kushte ideale për përvoja sfiduese dhe autentike”.

“Me rënien e dëborës ditët e fundit këto zona po preferohen nga të pasionuarit pas skive në pistat natyrore dhe ecjes në dëborë”, tha Dardha.

Dardha u bën apel të gjithë vizitorëve vendas e të huaj që të shoqërohen nga guidat vendase kur eksplorojnë shtigjet e ndodhura në Alpe, në mënyrë që shmangen incidentet për shkak të dëborës.

Por edhe gjatë vitit që lamë pas, ky park ishte një ndër më të vizituarit nga turistë vendas e të huaj në 12 muajt e vitit.

Dardha tha se numri i turistëve që vizitojnë zonat e mbrojtura vitet e fundit ka një tendencë rritjeje.

“Vitin e kaluar kemi arritur të kalojmë mbi 1 milion vizitorë në zonat e mbrojtura të qarkut Shkodër si Velipoja, lumi Buna, liqeni i Shkodrës, Parku Kombëtar i Alpeve që përfshin Thethin, Vermoshin, Lëpushën, Razmën dhe Bogën. Ndërkohë që destinacioni më i vizituar është lumi i Shalës”.

“Konkretisht nga janari deri në fund të dhjetorit zonat e mbrojtura të qarkut u vizituan nga 1 298 200 vizitorë, ku 785 820 ishin vendas dhe 512 380 të huaj”, tha Dardha.

Shkodra, me sipërfaqen e madhe të zonave të mbrojtura, përbën një nga potencialet më të rëndësishme të vendit sa i përket turizmit të natyrës, kulturës dhe historisë.

/k.s/j.p/r.e/

The post Dëbora shton turistët e aventurës në Theth, Lëpushë e Razmë appeared first on Agjencia Telegrafike Shqiptare.

“Kam gjet një Kryezi të dytë këtu”, thotë Tonin Alia i “Ardenos” së famshme, teksa kundrojmë bashtinat e agroturizmit të tij në proces, në Purez të Kasharit, vetëm pak kilometra nga autostrada Tiranë – Durrës, ku është e treta herë që vijmë. Kryeziu, vendlindja e Toininit, ka lumë dhe pisha, kurse këtu ka liqen dhe ullinj, por dhe vreshta rrushi, pyll lisi, shtrirë e gjitha në 5 ha.

Source

TIRANË, 12 janar/ATSH/ Dëbora ka zbardhur zonat malore të Elbasanit, si Funari, Gjinari dhe Labinot-Mal duke i shndërruar ato në një kartolinë dimërore.

Fundjava solli një atmosferë magjike në këto zona, të cilat u vizituan nga shumë qytetarë duke u kthyer në destinacionet më të preferuara këtë muaj të parë të vitit.

Male, pyje dhe liqene të rrethuar nga bora krijojnë një panoramë magjepsëse, ku natyra shfaqet në formën e saj më të bukur dhe më të qetë.

Edhe pse temperaturat kanë rënë dhe reshjet e dëborës kanë qenë të dendura, rrugët drejt Funarit, Gjinarit dhe Labinot-Malit janë të hapura dhe të kalueshme.

Qarkullimi i mjeteve bëhet me zinxhirë dhe goma dimërore, ndërsa autoritetet lokale kanë qenë në terren për të garantuar sigurinë e udhëtarëve dhe mirëmbajtjen e akseve rrugore.

Më të lumturit nga kjo tablo dimërore janë fëmijët, të cilët shijojnë borën me lojërat me topa dëbore.

Familje të shumta kanë zgjedhur këto zona malore për të kaluar fundjavën, larg zhurmës së qytetit, pranë natyrës dhe ajrit të pastër.

Këto zona vijojnë të jenë ndër destinacionet më të frekuentuara turistike të qarkut të Elbasanit, edhe në ditët e ftohta të dimrit.

Investimet e kryera ndër vite nga bashkia Elbasan në infrastrukturë, shërbime dhe promovimin e zonës kanë dhënë rezultatet e tyre, duke i bërë destinacione të aksesueshme dhe të preferuar për vizitorët.

Pavarësisht kushteve të vështira atmosferike, turistë nga qytete të ndryshme kanë mbërritur për të parë nga afër Funarin e mbuluar nga dëbora, liqenet e ngrira pjesërisht dhe qetësinë që vetëm dimri di të sjellë.

Edhe Gjinari, 22 km larg Elbasanit ishte këtë fundjavë i mbushur me turistë.

Zonat malore nën dëborë, mbeten një thesar i Elbasanit, një destinacion që fton vizitorët t’i zbulojnë në çdo stinë, duke ofruar pamje që lënë gjurmë.

1 nga 14

/k.s/j.p/

The post Funari, Gjinari dhe Labinot-Mal nën dëborë tërheqin vizitorë të shumtë appeared first on Agjencia Telegrafike Shqiptare.

Dëbora ka zbardhur Funarin, duke e shndërruar këtë zonë perle të Bashkisë Elbasan në një kartolinë dimërore. Male, pyje dhe liqene të rrethuar nga bora krijojnë një panoramë magjepsëse, ku natyra shfaqet në formën e saj më të bukur dhe më të qetë. Edhe pse temperaturat kanë rënë dhe reshjet e dëborës kanë qenë të dendura, rrugët drejt Funarit janë të hapura dhe të kalueshme.

Source

Kryeministri Edi Rama ka ndarë disa pamje nga Kolonja dhe shprehet se kjo zonë duket magjike dhe i fton qytetarët që ta vizitojnë. “Dhe me Kolonjën magjike dhe ftesën për ta vizituar, ju uroj një javë të mbarë”, shkruan Rama krahas pamjeve që sjell në Facebook.

Source

 

View this post on Instagram

 

A post shared by Edi Rama (@ediramaal)

TIRANË, 11 janar/ATSH/ Bujtina Trojani në Lëpushë është “ftesë” për të shijuar bukuritë e Alpeve shqiptare në dimër.

Mes petkut të bardhë të dëborës, sportit të skive, bukurive të natyrës alpine dhe ushqimit tradicional, ky investim i familjes Trojani mikpret vizitorët që shkojnë në Lepushë dhe Këlmend.

Kryeministri Edi Rama ndau në rrjetet sociale videon e guesthousetrojani, ku vajza 11- vjeçare me emrin Suela, së bashku me familjen e saj mikpresin mes traditës dhe bukurive natyrore.

“Aty ku mrekullia e natyrës dhe e shqiptarit jetojnë më bukur se kudo. Këto vende jetojnë me turizëm në të 4 stinët. Rrugët janë lehtësisht të kalueshme me goma dimri për Lepushë dhe Këlmend”, shkruan Rama.

Ndërkohë, ministri i Turizmit, Kulturës dhe Sportit, Blendi Gonxhja u shpreh se destinacionet turistike malore vijojnë të jenë të aksesueshme.

Sipas tij, “edhe pse ka pasur reshje të dendura dëbore, falë punës së koordinuar në terren nga bashkitë dhe autoritetet përkatëse, akset rrugore që lidhin pikat turistike janë pastruar dhe funksionale, duke mundësuar lëvizje të sigurt për vizitorët dhe operatorët turistikë”.

“Fundjavat në zonat malore po kthehen në një alternativë ndryshe pushimi për familjet dhe të rinjtë, duke kombinuar natyrën, sportet dimërore dhe mikpritjen lokale, si një mundësi e mirë për zhvillim dhe promovim të turizmit gjatë gjithë vitit”, tha Gonxhja.

Gonxhja shtoi se “në disa raste trafiku dhe numri i lartë i mjeteve rrugore në të njëjtën kohë, drejt destinacioneve fundore, ka krijuar ngadalësim lëvizjeje e radhë pritjeje por kërkohet mirëkuptimi i qytetarëve, ndërsa policia dhe autoritetet rrugore vijojnë monitorimin dhe informimin”.

/e.i/j.p/

The post Rrugët drejt destinacioneve turistike dimërore, lehtësisht të kalueshme me goma dimri appeared first on Agjencia Telegrafike Shqiptare.

TIRANË, 11 janar/ATSH/ Reshjet e borës të rëna gjatë orëve të fundit në Qafë Thanë kanë krijuar një panoramë të jashtëzakonshme dimërore.

E “veshur” tërësisht nga petku i bardhë i borës, Qafë Thana ka tërhequr qytetarë dhe vizitorë që kanë zgjedhur këtë vend për të kaluar momente çlodhjeje dhe argëtimi në natyrë.

Kryeministri Edi Rama ndau në rrjetet sociale, pamje të qytetarëve, mes tyre familje e fëmijë përgjatë përgjatë segmentit të Qafë Thanës që shijojnë momente të bukura të lojës me borë.

Vizitorët kanë shfrytëzuar reshjet për të luajtur me borë, për të bërë fotografi, duke gjallëruar këtë pikë turistike edhe gjatë muajit të parë të vitit.

Autoritetet rrugore kanë bërë të ditur se qarkullimi i automjeteve vijon normalisht, megjithatë drejtuesit e mjeteve këshillohen të tregojnë kujdes të shtuar, të përdorin goma dimërore dhe të respektojnë udhëzimet e Policisë Rrugore, për shkak të rrugës së rrëshqitshme.

Pika në Qafë Thanë po shndërrohet në një alternativë ideale për turizmin dimëror, duke ofruar pamje unike për vizitorët vendas dhe ata të huaj.

/e.i/j.p/

The post Qytetarët shijojnë Qafë Thanën e “zbardhur” nga bora appeared first on Agjencia Telegrafike Shqiptare.