Bashkëthemeluesi i Microsoft, Bill Gates, i ka dërguar gati 8 miliardë dollarë ish-gruas së tij, Melinda French Gates, për punë bamirësie, duke e bërë fondacionin e saj një nga organizatat jofitimprurëse më të mëdha në botë.
Çifti njoftoi divorcin e tyre në maj 2021 pas 27 vitesh martesë.
Më pas ata e ndanë punën e tyre dhe French Gates njoftoi në maj 2024 se do të tërhiqej nga posti i bashkëkryetares së Fondacionit Gates.
Fondacioni Gates ka shpenzuar 53.8 miliardë dollarë që nga viti 2000 për shëndetësi, barazi gjinore, zhvillim global dhe arsim, sipas faqes së saj të internetit.
Kur French Gates njoftoi dorëheqjen e saj, ajo shkroi: "Sipas kushteve të marrëveshjes sime me Bill, duke u larguar nga fondacioni do të kem 12.5 miliardë dollarë shtesë për t'i kushtuar punës sime në emër të grave dhe familjeve."
Sipas njoftimit, pjesa më e madhe e këtyre parave iu dha Pivotal Philanthropies, një organizatë jofitimprurëse e themeluar në vitin 2022 si pjesë e grupit më të gjerë Pivotal, të cilin French Gates e themeloi në vitin 2015 për të “përshpejtuar ritmin e progresit shoqëror për gratë dhe të rinjtë në SHBA dhe në mbarë botën”. /Telegrafi/
Microsoft ka njoftuar se do të heqë aplikacionin falas të Office për Windows, që do të thotë se përdoruesit nuk do ta kenë më këtë version si program të shkarkueshëm në kompjuterët me Windows 10 dhe Windows 11.
Bëhet fjalë për aplikacionin Sway, i destinuar për krijimin e prezantimeve interaktive, raporteve dhe historive digjitale, që deri tani ishte i disponueshëm si version desktop falas.
Ky ndryshim pritet të ndodhë gjatë muajit qershor 2026, kur Microsoft do të ndalojë versionin e shkarkueshëm dhe do të lërë në dispozicion vetëm versionin online përmes shfletuesit të internetit.
Kjo shërben për të simplifikuar zhvillimin e aplikacionit dhe për t’u fokusuar më shumë te zgjidhjet cloud (në re).
Kompania thekson se përdoruesit nuk do të humbasin përmbajtjen e tyre – të gjitha projektet dhe dokumentet do të jenë të arritshme përmes shfletuesit, pas logimit me llogarinë e Microsoft-it.
Versioni në ueb do të vazhdojë të përditësohet me funksione të reja dhe përmirësime të sigurisë.
Ky ndryshim nuk ndikon te aplikacionet kryesore të Office-it si Word, Excel dhe PowerPoint, të cilat mbeten të disponueshme në formë klasike në desktop për përdoruesit. /Telegrafi/
Gjigantët e teknologjisë po investojnë shuma rekord për zhvillimin e inteligjencës artificiale (AI), duke e përshpejtuar garën për dominim në një treg që po transformon ekonominë globale dhe po ngre çmimet e aksioneve në nivele historike. Kompanitë Meta, Alphabet dhe Microsoft kanë konfirmuar në raportet e tyre të fundit financiare se do të rrisin ndjeshëm […]
Al është tashmë një realitet transformues në sektorë të shumtë, por ajo paraqet sfida në sigurinë kibernetike dhe mbrojtjen e të dhënave personale. Ekspertë nga Microsoft, Carrefour dhe Iberdrola kanë diskutuar të tashmen dhe të ardhmen e Inteligjencës Artificiale.
Inteligjenca artificiale (Al) nuk është më një utopi futuriste që e shohim nga larg, është një realitet që transformon gjithçka, nga energjia te shpërndarja dhe startup-et.
Kjo është ajo që tre ekspertë mbrojtën në rezidencën e ambasadorit francez në Madrid me rastin e Natës Franceze të Inovacionit, një natë kushtuar inovacionit dhe lidhjes midis kompanive të organizuara nga Business France dhe Ambasada Franceze në Spanjë.
Tre ekspertë të fushës folën rreth trendit të Al dhe se si ai po formëson të tashmen dhe të ardhmen tonë.
Elena Gonzalez-Blanco Garcia, Drejtoreshë e Al për EMEA Digital Natives në Microsoft; Javier Mallo, drejtor i informacionit në Carrefour Spain; dhe Rafael San Juan, drejtues i inovacionit në Iberdrola.
Gonzalez-Blanco, një nga zërat më me përvojë në sektor, nënvizoi shpejtësinë "marramendëse" me të cilën po evoluon fusha: "Edhe për ata që zhvillojnë modelet, është e pamundur të mbajnë hapin me gjithçka që po ndodh."
Prandaj, ajo shpjegon se çelësi është të shoqërohen kompanitë në këtë përvetësim të përshpejtuar dhe të sillet Al "nga laboratori në jetën reale".
Sipas një studimi të McKinsey nga viti 2024, rreth 78% e kompanive tashmë përdorin Al në një pjesë të biznesit të tyre, por për kreun e Al në Microsoft, "kjo shifër është një nënvlerësim": "Ne jemi në pikën e adoptimit të vërtetë. Kushdo që nuk është tashmë në këtë pikë është i vonuar."
Një nga pikat më të debatuara dhe që paraqet sfida të vërteta për bizneset dhe besimin e përdoruesve, është mënyra se si kompanitë i trajtojnë të dhënat personale dhe si Al ndryshon mënyrën se si i përdorin ato.
Rreth 40% e spanjollëve nuk besojnë se kompanitë i mbrojnë në mënyrë të mjaftueshme informacionet e tyre, sipas të dhënave nga studimi i Ipsos AI Monitor 2025.
Mallo, drejtor i teknologjisë në Carrefour, ofroi një perspektivë të dyfishtë: "Si qytetar, jam i vetëdijshëm për rrezikun, por nëse nuk i ndajmë të dhënat tona, mbetemi prapa. Dhe si profesionist, garantoj se investojmë burime të mëdha në sigurinë kibernetike, megjithëse askush nuk mund të premtojë 100% mbrojtje."
Ai argumentoi se kompanitë po investojnë gjithnjë e më shumë në sigurinë kibernetike për të mbrojtur të dhënat e përdoruesve.
Gonzalez-Blanco u pajtua se frika është e ekzagjeruar.
"Ne kemi ndarë informacione në rrjetet sociale për dekada të tëra. Gjëja e rëndësishme nuk është të kesh frikë, por të kuptosh teknologjinë dhe ta përdorësh atë me gjykim të shëndoshë."
Rafael San Juan i Iberdrolas shtoi se siguria kibernetike "do të jetë gjithmonë një garë në të cilën kriminelët janë një hap përpara", por se rregullimi dhe etika "po përparojnë për të balancuar sistemin".
Çdo revolucion teknologjik sjell me vete rrezikun që grupet ta përdorin atë për të kryer krime, kështu që e ardhmja e Al paraqet sfida për bizneset dhe autoritetet, pasi kriminelët gjithashtu evoluojnë dhe përshtaten.
Spanja dhe BE-ja kundër SHBA-së dhe Kinës
Të gjithë ekspertët ranë dakord se Spanja dhe BE-ja po investojnë pak në Al, gjë që dobëson pozicionin e tyre konkurrues kundrejt gjigantëve si SHBA-ja dhe Kina.
"Nuk është vetëm çështje parash, por edhe besimi në të dhe humbja e frikës nga dështimi", tha Gonzalez-Blanco.
San Juan theksoi se "kjo nuk ka të bëjë vetëm me Spanjën, por me një trend evropian", ndërsa Mallo theksoi mungesën e ambicies për të konkurruar me fuqi të tilla si SHBA dhe Kina.
Vetëm 1% e kompanive të anketuara në një studim të McKinsey 2025 konfirmojnë se e kanë integruar Al në një nivel të lartë në rrjedhat e tyre të punës.
Kjo përqindje lë të kuptohet potencialin që po humbet duke mos përdorur në mënyrë të vetëdijshme Al për të rritur produktivitetin dhe për të hequr detyrat mekanike.
Vendet e punës dhe e ardhmja: A do t’i shkatërrojë vërtet Al vendet e punës?
Në përgjigje të frikës se Al do të zëvendësojë punëtorët e kualifikuar, tre ekspertët ishin të prerë: Al nuk është këtu për të zëvendësuar, por për të ndihmuar.
Vlera e ofruar nga një njeri do të jetë gjithmonë e nevojshme.
Sipas tyre, nuk duhet harruar se Al ka gabime në arsyetimin e saj dhe këtu duhet të hyjë në lojë gjykimi njerëzor për të kontrolluar makinën.
“Kemi dëgjuar për gjysmë shekulli se makinat do t’i zëvendësojnë njerëzit, dhe kjo nuk ka ndodhur ende”, kujtoi Gonzalez-Blanco.
“Teknologjia ndryshon mënyrën se si punojmë, por nuk e eliminon vlerën njerëzore.”
San Juan, nga ana e tij, mbrojti idenë se njohuritë dhe përvoja do të vazhdojnë të jenë "të pazëvendësueshme", ndërsa Mallo theksoi se e ardhmja do të jetë në bashkëpunimin midis njerëzve dhe makinave: "Kompanitë që kombinojnë Al dhe prekjen e njeriut do të jenë ato që do të udhëheqin."
Edhe pse zhvillimi i modeleve të përparuara duket se është i rezervuar për gjigantët teknologjikë, folësit hodhën poshtë idenë se kompanitë e vogla dhe të mesme janë jashtë loje.
"Al e aplikuar na lejon të konkurrojmë në bazë të specializimit", shpjegoi Gonzalez-Blanco.
"Nuk ka të bëjë me teknologjinë e prodhimit, por me përdorimin e saj të mirë. Njohuritë lokale dhe sektoriale mund të jenë një avantazh vendimtar."
Mallo u pajtua: "Sot, kushdo që ka një ide të mirë dhe aftësinë për ta zbatuar atë mund të depërtojë. Qasja në treg nuk ka qenë kurrë kaq e hapur."
Çfarë nuk mund të bëjë kurrë Al?
Paneli përfundoi me një pyetje simbolike: Çfarë nuk do të jetë kurrë në gjendje të bëjë Al?
Përgjigjet ishin: të shfaqë emocione, të ndiejë, të udhëheqë me empati.
"Inteligjenca artificiale do të jetë në gjendje të ndërtojë Taxh Mahalin, por nuk do ta dijë kurrë se çfarë do të thotë të duash personin që e ndërton atë", përmblodhi San Juan.
Sepse, siç ranë dakord të tre, inteligjenca e vërtetë, ajo që dallon qeniet njerëzore, vazhdon të jetë në emocione, kreativitet dhe intuitë. /Telegrafi/
SIDNEJ, 27 tetor /ATSH-AFP/ – Autoriteti australian i konkurrencës njoftoi se po ndërmerr veprime ligjore kundër Microsoft për një ofertë mashtruese që përfshinte asistentin e inteligjencës artificiale Copilot.
Gjigandi i teknologjisë akuzohet për dhenien e nje informacioni të rremë rreth 2,7 milionë australianëve te cilet u abonuan përmes rinovimit automatik në Microsoft 365.
Kompania u paraqiti klientëve dy mundësi: të paguanin më shumë për një ofertë që përfshinte Copilot, ose të anulonin abonimet e tyre.
Ekzistonte dhe një opsion i tretë, por që shfaqej vetëm kur abonenti fillonte procesin e anulimit. Ky opsion ofronte mundësinë për të mbajtur një ofertë të ashtuquajtur “Classic”, pa Copilot dhe me çmimin origjinal, delaroi autoriteti i konkurrencës në një njoftim për shtyp.
Copilot është një asistent i mundësuar nga inteligjenca artificiale që ndihmon përdoruesit me kërkime dhe detyra me baze tekstin.
Padia u ngrit në Gjykatën Federale kundër Microsoft Australia dhe Microsoft Corp.
“Ne do të padisim Microsoft per faktin se ato qëllimisht nuk përmenden planet ‘Classic’ në komunikimet e tyre dhe fshehen ekzistencën e ketij opsioni derisa te abonuarit filluan procesin e anulimit, me qëllim që të rrisnin numrin e klientëve për planet më të shtrenjta që përfshijnë Copilot”, theksoi drejtoresha ekzekutive e rregullatorit, Gina Cass-Gottlieb.
“Aplikacionet e Microsoft Office të përfshira në abonimet 365 janë thelbësore për jetën e shumë njerëzve dhe anulimi i abonimit nuk eshte nje vendim i lehtë”, shtoi ajo.
Autoriteti i konkurrencës akuzon Microsoft për përfshirje në praktika të tilla që nga 31 tetori 2024, duke shpjeguar se abonimet me Copilot janë 29 deri në 45% më të shtrenjta se ato pa të.
Gjigandi amerikan i teknologjisë mund të përballet me një gjobë prej 30 milionë dollarësh (26 milionë euro) ose më shumë për çdo shkelje. /f.k/ /os/
Presidentja e Xbox-it, Sarah Bond, ka konfirmuar se konzola e gjeneratës së ardhshme të Microsoftit është në zhvillim.
Para këtij konfirmimi nuk mungonin thashethemet dhe hamendjet për planet e ardhshme të kompanisë për konzolat, veçanërisht gjatë polemikave të fundit rreth çmimeve dhe prezantimit të konzolës së tyre portative, e cila është prodhuar nga ASUS. Shumë detaje për Xbox-in e gjeneratës së ardhshme mbeten ende mister, por tani fansat dinë se diçka po zhvillohet në Microsoft.
Informacione të reja të rrjedhura sugjerojnë se Xbox-i i gjeneratës së ardhshme do të jetë i shtrenjtë, por më i fuqishëm se PlayStation 6.
Hardueri për video-lojëra në përgjithësi ka pasur vështirësi në shitje në të kaluarën, përveç disa përjashtimeve të rëndësishme si Nintendo Switch 2. Tarifat doganore dhe faktorë të tjerë makroekonomikë gjithashtu kanë ngritur dyshime për çmueshmërinë, gjë që ka bërë që disa të besojnë se sistemet e ardhshme do të përjetojnë ndryshime të mëdha. Disa madje kanë pretenduar se Xbox-i i gjeneratës së ardhshme nuk është më i sigurt, megjithatë Microsoft e ka mohuar këtë. Tani lojtarët kanë sqarime shtesë nga kompania teknologjike.
Në një intervistë për Variety, Bond tha se “hardueri i gjeneratës së ardhshme është në zhvillim”, ndërsa foli për disa nga planet e Xbox-it përtej konzolave portative të sapo publikuara. Edhe pse nuk hyri në detaje, përmendi se kompania së paku ka filluar me dizajnimin dhe krijimin e prototipeve. Bond gjithashtu tha se Xbox po bashkëpunon me AMD-në në këtë projekt dhe se së shpejti do ta bëjnë publike këtë partneritet. Lajmet e mëdha lidhur me AMD-në do të përputhen me rrjedhjet e mëparshme të informacionit që thonë se AMD po krijon APU-në më të madh ndonjëherë për Xbox-in e gjeneratës së ardhshme, gjë që do ta ndihmojë konzolën të tejkalojë PlayStation 6, i cili gjithashtu do të përdorë komponentë të AMD-së.
Gjatë intervistës, Bond gjithashtu aludoi për harduerin e ardhshëm përveç pasardhësve të Xbox Series X dhe S. CEO-ja tha se kompania ka njohur mundësinë “të ofrojë lojtarëve një zgjedhje tjetër, përveç harduerit të gjeneratës së ardhshme”. Kjo mund të lidhet me një pajisje portative të prodhuar brenda kompanisë, edhe pse ekzistojnë thashetheme që Xbox ka hequr dorë nga pajisja e tyre portative origjinale pasi AMD kërkoi një objektiv shumë të madh prodhimi për procesorët e destinuar për këtë konzolë portative. Natyrisht, këto janë vetëm thashetheme, por ekzistojnë shumë mënyra me të cilat kompania mund t’u ofrojë lojtarëve më shumë zgjedhje përveç një konzole portative tjetër. Fansat do të duhet të presin më shumë informacione zyrtare për të ditur me siguri se çfarë po propozon Bond.
Pavarësisht se si duket e ardhmja e konzolave Xbox, kompania ka një rrugë të pasigurt përpara. Nga njëra anë, Xbox Game Pass ka shënuar rekord të ri të të ardhurave në vitin fiskal 2024, por të ardhurat nga hardueri ranë me 22 përqind në të njëjtën periudhë. Microsoft gjithashtu po përballet me kritika publike për rritjen e çmimeve të harduerit dhe shërbimeve me abonim, kështu që do të jetë interesante të shihet nëse dhe si këto trende do të ndikojnë në prezantimin e Xbox-it të gjeneratës së ardhshme dhe gjithçkaje tjetër që mund të vijë me të. /Telegrafi/
Microsoft ka zbuluar një sërë përmirësimesh të drejtuara nga AI për Windows 11, duke përfshirë aktivizimin me zë në PC-të me Windows 11 dhe "më shumë AI eksperimentale".
Përditësimet e asistentit Copilot të Microsoft synojnë thjeshtimin e ndërveprimit të përdoruesit dhe automatizimin e detyrave të përditshme, transmeton Telegrafi.
Përdoruesit tani mund ta aktivizojnë Copilot me komandat zanore "Hey Copilot" në çdo PC me Windows 11 përmes një funksioni të ri regjistrimi.
Copilot Vision, një funksion që mund të analizojë atë që është në ekranin tuaj dhe t'u përgjigjet pyetjeve, do të lançohet në të gjitha tregjet ku Copilot është i disponueshëm.
Për më tepër, Microsoft tha, "së bashku me Copilot Labs, ne po sjellim edhe më shumë funksione eksperimentale të AI-së dhe agjentëve për Windows Insiders".
Ndër përmirësimet është një zgjerim eksperimental i Copilot Actions përtej shfletuesit, duke mundësuar veprime të kufizuara në skedarët lokalë në Windows për Windows Insiders.
Copilot Action për uebin u njoftua më parë në maj, i cili i lejon asistentit të AI-së të trajtojë detyra të botës reale si prenotimi i restoranteve ose porositja e ushqimeve.
Yusuf Mehdi, drejtor i marketingut për produktet e konsumit, e përshkroi këtë veprim si një ndryshim të rëndësishëm.
“Ne besojmë se jemi në prag të një evolucioni të ri, ku inteligjenca artificiale nuk kufizohet vetëm te chatbot-et, por integrohet pa probleme në miliona përvoja me të cilat njerëzit angazhohen çdo ditë”, shtoi ai. /Telegrafi/
BERLIN, 16 tetor /ATSH-DPA/- Asnjë vend tjetër në Bashkimin Evropian nuk është më shumë në shënjestrën e hakerave sesa Gjermania, e cila renditet gjithashtu e katërta në botë për numrin më të lartë të sulmeve kibernetike, njoftoi sot “Microsoft”.
Raporti i “Mbrojtjes Digjitale 2025” i gjigantit të teknologjisë amerikane zbuloi se 3,3% e sulmeve kibernetike globale në gjysmën e parë të vitit 2025 ishin të drejtuara kundër objektivave në Gjermani.
“Vetëm në Shtetet e Bashkuara të Amerikës, të cilat përbëjnë gati një në katër sulme (24,8%), në Britani të Madhe (5,8%) dhe Izrael (3,5%) janë regjistruar më shumë tentativa për hakerime”, tha Microsoft.
“Hakerët zakonisht janë të interesuar në fitimet financiare, jo në spiunazhin tradicional”, tha kompania.
Më shumë se gjysma e sulmeve kibernetike (52%) përfshinin “ransomware” për të zhvatur para nga kompanitë, individët ose institucionet.
Sulmet për qëllime spiunazhi përbënin vetëm 4% të rasteve.
“Kërcënimet nga aktorët shtetërorë mbeten një rrezik serioz dhe i vazhdueshëm. Megjithatë, shumica e sulmeve të drejtpërdrejta me të cilat përballen organizatat sot – janë nga kriminelë të zakonshëm që kërkojnë të nxjerrin fitime”, tha një zëdhënës i “Microsoft”.
Sipas raportit, rreziku më i madh në hapësirën kibernetike vjen nga hakerat nga Rusia, Kina, Koreja e Veriut dhe Irani.
Rusia përdor grupet e hakerave, kryesisht për të sulmuar Ukrainën dhe shtetet anëtare të NATO-s, ndërsa Koreja e Veriut dhe Irani kryesisht përdorin sulmet “ransomware” për të zhvatur para për qëllime shtetërore.
Ekspertët e IT-së të Koresë së Veriut që punojnë në Perëndim janë gjithashtu një problem i madh.
Për më shumë se një dekadë, Koreja e Veriut ka infiltruar fshehurazi dhjetëra mijëra punonjës për të punuar në distancë në kompani dhe organizata në të gjithë botën.
“Kjo ushtri në rritje e punonjësve transferon qindra miliona dollarë në Korenë e Veriut çdo vit. Kur zbulohen, disa prej tyre i drejtohen zhvatjes, një metodë tjetër për të mbledhur para për regjimin”, tha “Microsoft”.
Në sulmet klasike, hakerat përpiqen kryesisht të marrin të dhëna aksesi në llogaritë e përdoruesve.
Sulmuesit përdorin kryesisht “email-e phishing” për të mashtruar viktimat që të fusin të dhënat e tyre të aksesit në një sistem të rremë.
Ekspertët në “Microsoft” theksojnë se 99,9% e këtyre sulmeve mund të parandalohen me autentifikim shumëfaktorësh (MFA).
Kur hyjnë me MFA, përdoruesit duhet të japin një formë të dytë prove përveç fjalëkalimit të tyre.
Ky mund të jetë një mesazh teksti ose konfirmim aplikacioni në telefonin celular – ose një gjurmë gishtash ose skanim fytyre.
“Faktori i dytë” mbron aksesin në llogari, edhe nëse hakerat e dinë fjalëkalimin. //a.i/
Një ndryshim i madh po afrohet për përdoruesit e kompjuterëve me Windows. Microsoft ka njoftuar se nga data 14 tetor 2025 do të përfundojë zyrtarisht mbështetjen për sistemin operativ Windows 10. BBC raporton se kjo do të thotë se pas kësaj date pajisjet nuk do të marrin më përditësime sigurie, duke i bërë ato më të […]
Një ndryshim i madh po vjen për shumë njerëz që përdorin kompjuterë me Windows.
Microsoft po i jep fund mbështetjes për sistemin e tij operativ Windows 10, që do të thotë se nga e mërkura, 14 tetor, këta kompjuterë mund të jenë në rrezik.
Kjo ndodh sepse përditësimet e sigurisë do të ndalen, duke i bërë pajisjet më të prekshme ndaj sulmeve, transmeton Telegrafi.
Microsoft po i inkurajon njerëzit të përditësohen falas në Windows 11 - por jo të gjithë kompjuterët do të jenë në gjendje ta bëjnë këtë.
"Fundi i mbështetjes për Windows 10 po duket si një katastrofë si për konsumatorët ashtu edhe për mjedisin", tha Nathan Proctor, drejtor i lartë në grupin amerikan të konsumatorëve PIRG. Pra, çfarë do të thotë kjo për ju?
Windows është sistemi operativ më i popullarizuar i kompjuterëve në botë, me Microsoft që thotë se përdoret në mbi 1.4 miliardë pajisje në të gjithë globin.
Rreth 43% e këtyre përdornin Windows 10 në korrik 2025, sipas Statcounter.
Në Mbretërinë e Bashkuar, udhëzuesi i konsumatorit Which? vlerëson se mund të ketë 21 milionë njerëz që ende përdorin Windows 10.
Në shtator, ajo zhvilloi një anketë e cila zbuloi se rreth një e katërta e këtyre përdoruesve planifikonin të vazhdonin ta përdornin atë edhe pasi të mbaronte mbështetja zyrtare e Microsoft.
Rreth një në shtatë thanë se planifikonin të blinin një kompjuter të ri.
Grupe të tjera konsumatorësh kanë kritikuar fundin e mbështetjes për Windows 10, duke thënë se kjo do të çojë në shpenzime të panevojshme dhe humbje mjedisore.
"Njerëzit janë të lodhur duke jetuar në një botë të mbushur me pajisje jetëshkurtra që nuk mund t'i rregullojmë, ose humbasin mbështetjen e softuerit ose detyrohen të hidhen në rrjedhën e mbeturinave. Ne meritojmë teknologji që zgjat", tha Proctor, i cili bën fushatë për të drejtën e riparimit në SHBA.
Microsoft në thelb u jep përdoruesve personalë dy mundësi: Përditësimin në Windows 11, ose regjistrimin për të marrë përditësime të zgjatura sigurie për 12 muaj.
Këto mund të bëhen në seksionin "Privatësia dhe Siguria" të cilësimeve tuaja.
Njerëzit që zotërojnë PC të përshtatshëm për Windows 11 mund ta përditësojnë falas.
Megjithatë, shumë njerëz "do të duhet të blejnë pajisje të reja - pavarësisht faktit se kompjuterët e tyre aktualë funksionojnë mirë", tha Proctor.
Nëse nuk doni të azhurnoni menjëherë, ose pajisja juaj është shumë e vjetër për Windows 11, mund të regjistroheni në një skemë që do të vazhdojë azhurnimet më të rëndësishme të sigurisë deri në tetor 2026.
Kjo quhet Përditësime të Zgjeruara të Sigurisë (ESU) - por nuk ofron asnjë mbështetje teknike ose azhurnime të tjera të softuerit.
Për ta marrë falas, do t'ju duhet të keni azhurnuar në versionin më të fundit të Windows 10, të keni një llogari Microsoft dhe të bëni kopje rezervë të cilësimeve të kompjuterit tuaj.
Përndryshe, duhet të paguani një tarifë prej 30 dollarësh ose të përdorni 1,000 pikë Microsoft Rewards për të hyrë në ESU.
Për organizatat komerciale që përdorin Windows 10, do të kushtojë 61 dollarë për pajisje. Shuma e saktë që paguani varet nga vendi ku jetoni në botë. /Telegrafi/
Ish-kryeministri britanik Rishi Sunak është punësuar nga gjiganti i teknologjisë Microsoft.
Sunak, i cili mbetet deputet, i është bashkuar kompanisë si këshilltar i lartë me kohë të pjesshme dhe do të ofrojë "perspektiva strategjike të nivelit të lartë mbi trendet makroekonomike dhe gjeopolitike", si dhe se si ato "mbivendosen me inovacionin, rregullimin dhe transformimin digjital".
Ai do ta dhurojë pagën e tij për organizatën bamirëse për aftësitë numerike, Projektin Richmond, të cilin e drejton me gruan e tij Akshata Murty.
Organizata mbikëqyrëse Acoba, e cila vlerëson çështjet e jashtme për deputetët, theksoi se Sunak nuk do të këshillonte për çështjet e politikës britanike.
Ai është paralajmëruar se nuk mund të këshillojë Microsoft për bizneset ose kontratat qeveritare deri në fund të vitit të ardhshëm.
Ish-kryeministri është gjithashtu i ndaluar të lobojë në qeveri ose të përdorë kontaktet e tij në Whitehall gjatë asaj periudhe.
Puna e tij duhet të kufizohet në "dhënien e këshillave mbi strategjinë, çështjet makroekonomike dhe gjeopolitike që nuk bien ndesh" me aktivitetet e tij.
Ndryshe, ky nuk është angazhimi i vetëm i ri i Sunak.
Ai ka marrë gjithashtu një rol në Anthropic me seli në San Francisko, e cila zhvilloi modelet e Al Claude.
Që kur u largua nga detyra, ai është bërë gjithashtu këshilltar i lartë në Goldman Sachs, ku më parë punoi nga viti 2001 deri në vitin 2004. /Telegrafi/
Rreth 5 milionë përdorues kompjuterësh në Britani të Madhe rrezikojnë të bëhen të prekshëm ndaj sulmeve kibernetike dhe mashtrimeve, pasi Microsoft javën e ardhshme ndalon përditësimin e sistemit të tij dhjetëvjeçar Windows 10, kanë paralajmëruar aktivistët e konsumatorëve.
Një në katër nga rreth 21 milionë njerëz në Mbretërinë e Bashkuar që përdorin një pajisje që përdor softuerin Windows 10, kanë ndërmend të vazhdojnë ta përdorin atë pasi të ndërpriten përditësimet dhe kështu do të jenë në rrezik nga shkeljet e sigurisë online, duke përfshirë programet keqdashëse dhe viruset, sipas një sondazhi nga Which?
Më shumë se një e treta e atyre që nuk planifikojnë të ndërmarrin veprime dhe për këtë arsye rrezikojnë të bëhen të prekshëm, janë njerëz mbi 55 vjeç, transmeton Telegrafi.
Ky veprim parashikohet gjithashtu të shtojë malin e mbeturinave elektronike, me miliona PC në të gjithë botën që parashikohet të dalin nga përdorimi nëse nuk mund të përditësohen dhe shumë klientë që shfrytëzojnë mundësinë për të blerë pajisje të reja. Microsoft po i inkurajon konsumatorët të përdorin iniciativa riciklimi.
Çështja prek qindra milionë konsumatorë dhe biznese që përdorin Windows 10 në nivel global. Vlerësimet e industrisë sugjerojnë se deri në 13% të kompjuterëve që aktualisht përdorin softuerin do të duhet të zëvendësohen.
Për pajisjet e tjera, zgjidhja është relativisht e thjeshtë dhe përfshin përditësimin në Windows 11 nëse një PC e mbështet atë. Si alternativë, Microsoft po ofron një zgjatje njëvjeçare të Windows 10 për t'u dhënë përdoruesve kohë për të vlerësuar alternativat.
Por anketa nga Which? zbuloi se ndërsa 39% e përdoruesve aktualë do të përditësonin paketën e tyre të Windows, 26% thanë se kishin ndërmend të vazhdonin të përdornin versionin 10 pasi të ndërpriteshin përditësimet.
"Miliona njerëz mund të jenë të papërgatitur për heqjen graduale të Windows 10 javën e ardhshme", tha Lisa Barber, redaktore e revistës Which? Tech.
"Nëse keni një laptop ose PC në shtëpi që përdor Windows, tani është koha për të kontrolluar se cilin version po përdorni dhe nëse është Windows 10 ose më i vjetër, të bëni një plan veprimi. Nëse nuk veproni, mund të bëheni më të prekshëm ndaj hakerave dhe mashtrimeve", shtoi ajo.
Në një blog, Yusuf Mehdi, zëvendëspresidenti ekzekutiv i Microsoft, tha se pasi të ndërpriten përditësimet e sigurisë dhe të veçorive, si dhe mbështetja teknike për PC-të me Windows 10, pajisjet do të jenë "më të prekshme ndaj kërcënimeve kibernetike, të tilla si programet keqdashëse dhe viruset".
“Aplikacionet që funksionojnë në Windows 10 mund të mos mbështeten më, pasi platforma nuk po merr më përditësime të veçorive. Si rezultat, disa aplikacione mund të përjetojnë funksionalitet të zvogëluar”, tha ai. /Telegrafi/
Presidenti amerikan Donald Trump me sa duket ka emëruar objektivin e tij të radhës: drejtuesen e çështjeve globale të Microsoft, Lisa Monaco.
Ai po bën thirrje që ajo të shkarkohet, shkruan the Verge.
Trump pretendon se Monaco, e cila mori punën në maj dhe e njoftoi publikisht vetëm një muaj më parë, është "e korruptuar", "e çmendur", "një kërcënim për sigurinë kombëtare të SHBA-së", por duket se krimi i saj më i madh në sytë e Trump është puna si zëvendësprokurorja e përgjithshme e 39-të e Shteteve të Bashkuara nën presidentin Joe Biden dhe prokurorin e përgjithshëm Merrick Garland.
Garland ishte përgjegjëse për ndjekjen penale federale të Trump.
Trump njoftoi se ai tashmë ia ka hequr Monacos lejet e sigurisë, por sugjeron që roli i saj në Microsoft tani i lejon asaj të hyjë në "informacion shumë të ndjeshëm". /Telegrafi/
Microsoft po sjell një tjetër nga video-lojërat e veta dikur ekskluzive edhe në konsolën PlayStation 5.
Gjatë ngjarjes më të fundit të Sonyt, State of Play, kompania njoftoi se "Microsoft Flight Simulator 2024" do të vijë në PS5 në fund të këtij viti, konkretisht më 8 dhjetor.
Bazuar në videon promovuese të shfaqur gjatë ngjarjes së Sonyt, versioni për PS5 i Flight Simulator 2024 do të ruajë të njëjtin nivel detajesh grafike dhe aeroplanë të mëdhenj komercialë si origjinali, me mbështetje për pajisjen PS VR 2, për një përvojë edhe më reale "në kabinën e pilotit".
Përveç simulimit të saktë të avionëve të botës reale, Flight Simulator përdor gjithashtu të dhëna reale gjeografike dhe të motit për hartat e tij, duke e bërë përvojën e fluturimit po aq të qetë ose të vështirë sa do të ishte në jetën reale.
Kështu, Microsoft Flight Simulator 2024 i bashkohet koleksionit gjithnjë në rritje të lojërave dikur ekskluzive për Xbox dhe PC, që tani po vijnë edhe në konsolën e Sonyt.
Microsoft filloi me lojëra si "Sea of Thieves" dhe "Pentiment", por tani në PS5 po vijnë edhe tituj më të mëdhenj, si "Indiana Jones and the Great Circle".
E gjithë kjo është pjesë e strategjisë së re të Microsoft-it për Game Pass dhe streaming të video-lojërave, por përfiton edhe Sony.
Për shembull, Helldivers 2 ishte fillimisht ekskluzive për PS5, por kur u publikua për Xbox, u bë menjëherë një nga lojërat më të shitura në atë platformë. /Telegrafi/
Microsoft ka njoftuar se në fillim të vitit 2026 do të vërë në punë “qendrën më të fuqishme” të inteligjencës artificiale në botë, një kompleks gjigant në Mount Pleasant, Wisconsin, të quajtur Fairwater. Kjo qendër të dhënash është projektuar posaçërisht për trajnimin dhe funksionimin e modeleve të mëdha AI dhe do të shtrihet në një sipërfaqe prej 127 hektarësh, me tre […]
Me kufizimet dhe tarifat e reja për vizat e punës në SHBA, nuk është çudi që shumë punëdhënës po i këshillojnë punëtorët jashtë vendit të kthehen në SHBA.
Memo të rrjedhura nga Google, Amazon dhe Microsoft kanë qarkulluar në rrjetet sociale që udhëzojnë çdo mbajtës vize H-1B që udhëton aktualisht të bëjë menjëherë rregullime udhëtimi për të zbarkuar në SHBA, shkruajnë mediat e huaja.
Të gjitha kompanitë e pranojnë paralajmërimin e kufizuar të dhënë dhe kërkojnë ndjesë, duke premtuar të ofrojnë më shumë udhëzime ndërsa situata evoluon.
Memot gjithashtu këshillojnë çdo punonjës H-1B dhe personat e varur prej tyre H-4 që aktualisht ndodhen në SHBA të qëndrojnë dhe të mos udhëtojnë jashtë vendit deri në njoftim të mëtejshëm.
Meqenëse ndryshimet në vizën H-1B janë strukturuar si një kufizim udhëtimi, punëdhënësit janë të shqetësuar se çdo punonjësi që është pjesë e programit do t'i mohohet rihyrja në vend pa një tarifë prej 100,000 dollarësh. /Telegrafi/
Morali midis punonjësve të Microsoft është në nivelin më të ulët historik, ndërsa kompania është tronditur nga një valë e vazhdueshme shkurtimesh pune që kanë prekur mijëra punëtorë.
Shumë prej tyre po dëshmojnë një ndryshim drastik në kulturën brenda kompanisë këtë vit, me një frikë të vazhdueshme nga pushimi nga puna - ose zëvendësimi nga Inteligjenca Artificiale, një teknologji që Microsoft tani po e përqafon me gjithë zemër, shkruan Futurism.
Ndërkohë, CEO Satya Nadella po përballet me një presion të madh për ta mbajtur kompaninë të rëndësishme në garën për të zhvilluar Al, gjë që mund të shpjegojë turbulencën aktuale.
Ndërsa ai po kryen shkurtime masive të vendeve të punës, kompania po investon gjithashtu miliarda dollarë në Al, një ndryshim rrënjësor në prioritete që mund ta lërë atë të prekshme.
Siç raporton The Verge, perspektiva e Microsoft që të bëhet një gjigant teknologjik ndërsa përpiqet të mbajë ritmin me konkurrencën është diçka për të cilën Satya Nadella është i shqetësuar.
Gjatë një takimi me punonjësit javën e kaluar, ai pranoi se e përndjek historia e Digital Equipment Corporation (DEC), gjigantit të kompjuterëve të fillimit të viteve 1970 që shpejt u bë i parëndësishëm për shkak të gabimeve strategjike dhe rritjes së kompanive si IBM.
Nadella shpjegoi se disa nga njerëzit që kontribuan në Windows NT vinin nga laboratorët e DEC, duke iu referuar sistemit operativ që përcaktoi epokën dhe që Microsoft e publikoi në vitin 1993.
Komentet e tij pasqyrojnë dëshirën e sotme për të punësuar ekspertë të rinj në Al, me kompanitë teknologjike të gatshme të shpenzojnë shuma astronomike për të vjedhur talente nga konkurrentët.
Dhe presioni mbi Microsoft është në rritje.
Muajin e kaluar, miliarderi Elon Musk njoftoi se projekti i tij i fundit i Al quhej "Macrohard", një provokim i qartë i drejtuar gjigantit të teknologjisë.
Edhe pse mbetet për t'u parë se sa të suksesshme do të jenë përpjekjet e Musk për të simuluar produkte si paketa Office e Microsoft duke përdorur Al, Nadella ka thënë se është i gatshëm të braktisë çdo produkt nëse bëhet i tepërt.
Ndryshe, Microsoft mbetet plotësisht i përkushtuar ndaj Al për momentin.
Më herët këtë vit, kompania konfirmoi planet për të investuar një shumë marramendëse prej 80 miliardë dollarësh në qendrat e të dhënave të Al, dukshëm më shumë se disa konkurrentë si Google dhe Meta. /Telegrafi/
Microsoft ka njoftuar një ndryshim që do të ndikojë në një numër të madh përdoruesish.
Kompania Microsoft ka bërë të ditur zyrtarisht se mbështetja për Office 2016 dhe Office 2019 do të përfundojë më 14 tetor 2025. Kjo do të thotë se këto paketa të njohura, të cilat ende përdoren nga një numër i madh përdoruesish në mbarë botën, nuk do të marrin më përditësime të sigurisë, mbështetje teknike apo ndonjë përditësim tjetër.
Ky vendim vlen gjithashtu edhe për aplikacionet shoqëruese si Visio dhe Project në versionet e viteve 2016 dhe 2019. Pas këtij afati, përdoruesit do të jenë më të ekspozuar ndaj rreziqeve, sidomos në fushën e sigurisë kibernetike dhe përputhshmërisë me sistemet më të reja.
Microsoft planifikon të instalojë automatikisht aplikacionin Microsoft 365 Copilot në pajisjet Windows, duke filluar nga tetori i këtij viti.
Microsoft ka njoftuar se duke filluar nga tetori 2025, do të fillojë instalimin automatik të aplikacionit Microsoft 365 Copilot në pajisjet Windows që tashmë kanë të instaluara programet Microsoft 365, jashtë Zonës Ekonomike Evropiane (EEA).
Copilot, i bazuar në inteligjencën artificiale, integrohet me aplikacione si Word, Excel dhe PowerPoint, dhe gjithashtu sjell veçori shtesë si Notebooks dhe asistentë të AI për të rritur produktivitetin.
Procesi i instalimit do të përfundojë deri në mesin e nëntorit, dhe aplikacioni do të shfaqet në menynë Start dhe do të aktivizohet si parazgjedhje, transmeton Telegrafi.
Megjithatë, administratorët e IT-së kanë mundësinë të parandalojnë këtë ndryshim përmes Qendrës së Administrimit të Aplikacioneve Microsoft 365, ndërsa Microsoft këshillon që përdoruesit dhe ekipet e mbështetjes të njoftohen paraprakisht për të shmangur konfuzionin.
Përdoruesit evropianë janë të përjashtuar nga ky instalim i detyrueshëm, ndërsa në pjesën tjetër të botës Copilot do të bëhet pjesë e ekosistemit Microsoft 365.
Ky ndryshim është pjesë e përpjekjeve të Microsoft për t'i bërë veçoritë e Copilot lehtësisht të arritshme dhe të integruara në punën e përditshme të përdoruesve. /Telegrafi/
Microsoft prezanton një bibliotekë të re të përbashkët të video-lojërave brenda aplikacionit Xbox për PC në Windows.
Aplikacioni i përditësuar tani do të shfaqë video-lojërat nga Steam, Battle.net dhe dyqane të tjera për PC, duke e kthyer atë në një lëshues për të gjitha lojërat që përdoruesit kanë të instaluara në kompjuterët e tyre.
Microsoft e ka testuar këtë bibliotekë të përbashkët gjatë muajve të fundit me Xbox Insider-at, por tani ajo është e disponueshme për të gjithë përdoruesit e aplikacionit Xbox në PC.
Ajo është dizajnuar kryesisht për përvojën e re të Xbox-it në ekran të plotë, që do të jetë e disponueshme në pajisjet Xbox Ally, por është gjithashtu pjesë e përpjekjeve të Microsoft për ta bërë aplikacionin Xbox në Windows si shtëpinë e lojërave për PC.
"Kur instaloni një lojë nga një dyqan i mbështetur për PC, ajo shfaqet automatikisht në seksionin 'My Library' (Biblioteka Ime) brenda aplikacionit Xbox për PC, si dhe në listën 'Most Recent' (Më të Fundit) në panelin anësor, në mënyrë që të ktheheni te lojërat tuaja të preferuara me vetëm një klikim", shpjegoi Jason Beaumont, nënkryetar për përvojën në Xbox.
Së bashku me integrimin e bibliotekës, Microsoft po prezanton gjithashtu një seksion të ri "My Apps" (Aplikacionet e Mia) në aplikacionin Xbox për PC, i cili u lejon lojtarëve në PC të instalojnë dhe të hapin shpejt aplikacione të palëve të treta si shfletues, mjete të lojërave dhe dyqane konkurrente. Kjo veçori e re është gjithashtu dizajnuar kryesisht për pajisje dore, për të ndihmuar përdoruesit të shkarkojnë dhe nisin lojëra nga dyqane të ndryshme.
Më vonë këtë muaj, Microsoft do të shtojë gjithashtu lojëra që mund të luhen në cloud (në re) dhe historikun e video-lojërave në aplikacionin Xbox, i cili sinkronizon listën e video-lojërave të fundit të luajtura në konzolën Xbox, në kompjuter apo pajisje dore. Microsoft tashmë ka filluar ta sjellë këtë funksion në konzolat Xbox muajin e kaluar.
"Pasi kjo veçori të lëshohet, kërkoni listën 'Jump back in' (Kthehu sërish) në faqen kryesore të konzolës suaj, kompjuterit ose pajisjes dore për të gjetur historikun tuaj të fundit të lojës dhe për të vazhduar aty ku keni mbetur", tha Beaumont. /Telegrafi/
Login
