Premtimet janë të vështira për t’u mbajtur, por një tifoz i Manchester United ka respektuar marrëveshjen e tij virale për më shumë se një vit – dhe duket se është gati ta çojë deri në fund, për mirë a për keq…

Tashmë, me shumë gjasë keni dëgjuar për tifozin e pafat të Manchester United që u betua se nuk do t’i priste flokët derisa “Djajtë e Kuq” të fitonin pesë ndeshje radhazi.

Ai vështirë se mund ta kishte imagjinuar ndikimin që ky premtim do të kishte në kulturën e tifozëve të futbollit – apo edhe në jetën e tij personale – me miliona ndjekës në rrjetet sociale dhe me emrat më të mëdhenj të sportit që tashmë e dinë kush është.

Ja gjithçka që duhet të dini për The United Strand – udhëtimin viral “me flokë” të një tifozi drejt famës në botën e futbollit.

Çfarë është sfida e flokëve “The United Strand”?

The United Strand është emri i një fenomeni online që lindi pas një deklarate publike të bërë nga tifozi i përkushtuar i Manchester United, Frank Ilett.

I lodhur nga paqëndrueshmëria e vazhdueshme e ekipit të tij të zemrës, Ilett u betua në tetor të vitit 2024 se nuk do t’i priste flokët derisa Man United të fitonte pesë ndeshje rresht. As ai dhe as ndjekësit e tij nuk e menduan se, 16 muaj më vonë, sfida do të ishte ende në fuqi.

Flokët e tij, që u rritën në një afro gjithnjë e më të madh, u kthyen në një shaka të vazhdueshme mes tifozëve, një “barometër flokësh” që tregonte paqëndrueshmërinë e Man United. Media vendase dhe ndërkombëtare e trajtuan këtë fenomen si një simbol të kulturës së tifozëve.

“Filloi thjesht si një shaka. Mendova se do të ishte diçka argëtuese, për të sjellë pak humor në një periudhë shumë të dhimbshme për tifozët e Manchester United”, deklaroi Ilett për Sky Sports.

Megjithatë, jo të gjithë e morën me sportivitet. Në shtator të vitit 2025, Ilett u sulmua fizikisht nga një tifoz tjetër gjatë fitores 2-1 të United ndaj Chelseat në “Old Trafford”.

“Qëllimi im kurrë nuk ishte të nxirrja në pah të metat e Man United, por të përhapja pozitivitet dhe humor”, këmbënguli ai.

Kur nisi sfida e flokëve?

Sfida The United Strand nisi zyrtarisht më 5 tetor 2024. Që prej asaj dite, flokët e Ilett kanë “mbijetuar” nën drejtimin e tre trajnerëve të ndryshëm të Manchester United: Erik ten Hag, Ruben Amorim dhe tani Michael Carrick.

Deri më 9 shkurt 2026, sfida kishte zgjatur 492 ditë – pra një vit, katër muaj dhe shtatë ditë.

Kur do të përfundojë sfida?

Përgjigjja është e thjeshtë në teori: kur Manchester United të fitojë pesë ndeshje radhazi.

Pas fitores ndaj Tottenhamit më 7 shkurt, që ishte fitorja e katërt rresht, ekziston mundësia që sfida të marrë fund nëse Man United fiton edhe ndaj West Hamit më 10 shkurt 2026.

Madje, është konfirmuar edhe një video “watchalong”, ndërsa Ilett u shpreh optimist.

“Carrick është në timon, këto flokë po ikin shumë shpejt. West Ham është i radhës, katër nga pesë të kryera – për herë të parë që nga nisja e sfidës. Këtë herë po ndodh! Faleminderit Carrick!”, deklaroi ai.

Madje ai ka propozuar gjatë ditës, katër stile flokësh që tifozët mund të votojnë. Shumica e votave, apo 67 përqind mendojnë që ai duhet të kthehej në tullac.

Kur e fitoi për herë të fundit Man United pesë ndeshje radhazi?

Pavarësisht talljeve nga tifozët e Aston Villas, të cilët arritën 11 fitore radhazi në sezonin 2025/26, një seri prej pesë fitoresh nuk është e lehtë as për ekipet më të mira në Ligën Premier.

Duhet të kthehemi në shkurt 2024 për herën e fundit kur Manchester United arriti pesë fitore rresht.

Seria filloi me fitoren ndaj Newport County në FA Cup dhe vazhdoi me fitore ndaj Wolves, West Ham, Aston Villa dhe Luton Town. /Telegrafi/

Drejtori sportiv i Cagliarit, Guido Angelozzi, ka zbuluar detaje rreth transferimit të Semih Kılıçsoy nga Besiktasi, duke theksuar se klubi do të ishte “i çmendur” nëse nuk do ta aktivizonte opsionin e blerjes.

Sipas tij, talenti turk mund të arrijë vlerën 40 milionë euro në të ardhmen, ku deri tani ka arritur 4 gola në Serie A.

Skuadra sarde është sonte në aksion në Stadio Olimpico të Romës, ku përballet me Romën në kuadër të javës së 24-t të Serie A.

Kılıçsoy po shkëlqen te Cagliari

Pak tifozë e njihnin Semih Kılıçsoyn kur ai mbërriti në Cagliari gjatë verës nga Besiktasi. Sulmuesi turk u transferua në huazim për 1 milion euro, me opsion blerjeje prej 12 milionë eurosh. Në marrëveshje përfshihen gjithashtu: 2 milionë euro bonuse dhe 10 për qind përfitim nga shitja e ardhshme për Besiktasin.

“Është një talent i madh dhe shumë klube në Evropë po e ndjekin nga afër”, deklaroi Angelozzi për Sky Sport Italia.

Opsioni i blerjes, i sigurt

Javën e kaluar u raportua se Cagliari kishte tentuar ta aktivizonte më herët opsionin e blerjes për të kursyer para, por Besiktasi kishte refuzuar ndryshimin e kushteve.

Megjithatë, drejtori sportiv ishte i qartë: “Si mund të mos e blejmë? Do të ishim të çmendur të mos e bënim”.

Kjo e bën thuajse të sigurt se Cagliari do ta blejë përfundimisht kartonin e Kılıçsoyt për 12 milionë euro.

Vlerësimi i Montellës dhe potenciali i madh

Përzgjedhësi i Turqisë, Vincenzo Montella, ndodhet aktualisht në Itali dhe ka vizituar disa nga lojtarët e tij që luajnë në Serie A, përfshirë edhe Kılıçsoyn.

“Është një lojtar i ri dhe i jashtëzakonshëm, ka shënuar gola shumë të bukur. Montella na tha se është një futbollist shumë interesan”.

“Nëse vazhdon kështu, ai mund të vlejë deri në 40 milionë euro”, shtoi Angelozzi.

Si e fitoi Cagliari garën për talentin 19-vjeçar?

Angelozzi shpjegoi edhe prapaskenat e transferimit të talentit turk, duke treguar se si ndodhi gjithçka.

“Agjenti Federico Pastorello ia sugjeroi lojtarin presidentit tonë. Ne nisëm ta ndiqnim, dërguam një skaut në Turqi dhe më pas kontaktuam ndihmës-trajnerin e Montellës, i cili foli shumë mirë për të”.

Kështu, Cagliari arriti të mposhtte konkurrencën dhe të siguronte një nga talentët më premtues të futbollit turk. /Telegrafi/

Ky njeri për të cilin po shkruajmë, shumën e madhe të parave që e fitoi në bingo ia dedikoi klubit të tij të zemrës. Julio Roque Perez gjatë gjithë jetës së tij luftoi me varfërinë, nuk kishte para dhe jetonte në rrugë.

Por edhe përkundër kësaj, ai nuk mungonte në asnjë ndeshje të Godoy Cruz, klub i njohur argjentinas dhe, në një mënyrë apo tjetrën, gjente një vend në stadium.

Por fati njëherë trokiti në derën e tij. Perez, kur ishte vetëm 15 vjeç, në lojën e bingos “San Juan” fitoi çmimin e madh. Kur të gjithë mendojnë për shtëpinë apo veturën e fundit që ta blejnë me këto para, mendimi i Perez ishte ndryshe.

Pasi nuk dinte shkrim dhe lexim, për ta tërhequr shumën në bingo, shkoi me ndihmën e të afërmve të tij. Por pa e menduar dy herë, shumën e marrë nga bingo ia dedikoi klubit të tij të zemrës, Godoy Cruz.

Me këto para klubi rregulloi ulëset e tribunave, por edhe sistemin e dritave. Pasi e fitoi vendin e tij të përhershëm në stadium, Roque Perez, sa herë futej brenda, njerëzve përreth iu thoshte: “Këto drita janë të mijat”.

Klubi dhe qyteti këtë besnikëri të paparë nuk e lanë pa e shpërblyer, duke ia dhënë emrin e tij një rruge afër stadiumit.

Po ashtu, edhe në stadiumin që ai e rinovoi, aty afër iu bë një statujë e tij, sa ishte gjallë.

Julio Roque Perez ndërroi jetë në kohën e pandemisë, më 12 maj 2020, në moshën 80-vjeçare.

Në stadiumin “Feliciano Gambarte”, karrigia ku ai ulej, e kthyer në statujë, e njohur si “Tifozi numër 1”, vazhdon të qëndrojë në nderim të tij. /Telegrafi/

Juventusi i është rikthyer menjëherë stërvitjeve pas barazimit ndaj Lazios (2-2), ndeshje në të cilën ylli kosovar Edon Zhegrova zhvilloi të gjithë pjesën e dytë.

Sulmuesi i krahut ishte solid në këtë barazim të “Zonjës së Vjetër”, duke qenë i saktë në pasime, i rrezikshëm në driblime dhe i përfshirë drejtpërdrejt në aksionin nga i cili erdhi goli i parë i Juventusit.

Klubi torinez sot ka publikuar sekuenca nga stërvitja, ku Edon Zhegrova shihet duke shënuar gola, dhënë asiste dhe dribluar kundërshtarët me lehtësi.

Nuk ka munguar as përshkrimi i veçantë nga Juventusi, i cili e ka quajtur “Luani” yllin e Kosovës dhe të bardhezinjve.

Zhegrova ka vuajtur për më shumë minuta në sezonin e tij të parë me Juven, por klubi, nga ana tjetër, ka refuzuar të gjitha ofertat që kanë ardhur për të gjatë afatit kalimtar të dimrit, duke treguar besimin e plotë në potencialin e tij.

Edon Zhegrova te Juventusi u transferua nga Lille, ku kishte qenë një nga lojtarët kryesorë të skuadrës franceze, ndërsa bardhezinjtë paguan një shumë të konsiderueshme për shërbimet e tij, duke e parë atë si një investim afatgjatë për të ardhmen e klubit. /Telegrafi/

Lojërat Olimpike Dimërore Milano-Kortina 2026 kanë filluar dhe për më shumë se dy javë, mbi 3,500 atletë nga gati 100 vende do të garojnë për 195 medalje në 16 disiplina sportive.

Për Jutta Leerdam, patinatoren holandeze dhe të dashurën e boksierit dhe youtube-rit të famshëm Jake Paul, këto lojëra do të mbeten të paharrueshme.

Leerdam, e cila kishte pësuar një rënie dramatike gjatë Garave Olimpike Provuese pak ditë më parë, rikuperoi me një performancë të jashtëzakonshme për të fituar medaljen e artë në garën e patinazhit me shpejtësi 1,000 metra.

Holanda zuri edhe vendin e dytë në këtë garë, me Femke Kok që fitoi medaljen e argjendtë, ndërsa podiumi u kompletuar nga japonezja Miho Takagi që mori medaljen e bronztë.

Jake Paul, i cili kishte qenë i pranishëm gjatë garave provuese dhe kishte mbështetur publikisht Leerdam në rrjetet sociale, shpërndau më pas një postim emocionues për fitimin e ditëlindjes së saj dhe për triumfin olimpik, duke e quajtur “fëmija im” dhe duke treguar krenarinë e tij për arritjen e saj.

Ky sukses vjen pas një periudhe sfidash për Leerdam, e cila kishte rënë në pistën e akullit gjatë garës së 1000 metrave dhe kishte humbur mundësinë për të performuar siç e dëshironte.

Pavarësisht kësaj, patinatorja holandeze tregoi forcë dhe vendosmëri, duke dhuruar një moment të paharrueshëm për sportin dhe për ndjekësit e saj. /Telegrafi/

Manchester City arriti një fitore të rrallë në Ligën Premier në Anfield më 8 shkurt, duke mposhtur Liverpoolin 2-1.

Kjo fitore ka ngushtuar avantazhin e Arsenalit në krye të tabelës në vetëm gjashtë pikë. Kjo ishte vetëm fitorja e dytë e Pep Guardiolës në Anfield që kur mori drejtimin e Cityt rreth një dekadë më parë.

Erling Haaland theksoi rëndësinë e kësaj fitoreje, por shtoi se ekipi duhet të mbajë fokusin te ndeshjet e ardhshme.

“E dimë më parë se garën për titull nuk e fiton derisa të përfundojë. Për momentin, duhet të përqendrohem te ndeshja me Fulhamin të mërkurën, sepse ka ende shumë ndeshje”, tha Haaland.

Duke reflektuar mbi rëndësinë e kësaj fitoreje, duke qenë e para për norvegjezin ndaj Liverpoolit si mysafir.

“Janë thjesht tre pikë, pavarësisht kundërshtarit, qoftë Tottenham apo kushdo tjetër. Por e kuptoj çfarë doni të thoni dhe po, është e vërtetë”.

“Kurrë nuk kam fituar këtu më parë, kështu që është e mahnitshme të vijnë dhe të fitoj për herë të parë”, deklaroi ai. /Telegrafi/

Ismet Munishi do të drejtojë Lirinë në pjesën e mbetur të kampionatit, pas largimit të Liridon Lecit.

Trajneri i njohur kishte arritur një ditë më parë marrëveshje me klubin, i cili këtë sezon ka synim rikthimin në Superligën e Kosovës.

Klubi i Lirisë, përmes një postimi në rrjetet sociale, ka konfirmuar afrimin e Munishit, duke i uruar mirëseardhje.

“FC Liria mirëpret trajnerin e ri të ekipit të parë. Munishi është një nga emrat më të njohur të futbollit kosovar”, shkruan klubi në njoftim.

Munishi ka drejtuar shumë klube gjatë karrierës së tij, përfshirë Vushtrrinë, Vëllaznimin dhe Feronikelin ’74, të cilat janë rivalë të Lirisë në elitë. /Telegrafi/

Organizatorët e Lojërave Olimpike Dimërore "Milan-Cortina 2026" po i kushtojnë "vëmendje maksimale" çështjes së medaljeve që po dëmtohen, pas raportimeve për probleme nga disa atletë fitues.

Dy nga medalistet e arta të SHBA-së, Breezy Johnson dhe Alysa Liu, vunë re se shiriti i medaljes së tyre u shkëput menjëherë pas marrjes së çmimit. Johnson, e cila fitoi medaljen e artë në ski alpin në zbritje për femra, tregoi medaljen e saj të thyer në konferencën për media pas ngjarjes. "Ja ku është medalja. Dhe ja ku është shiriti," tha ajo, duke treguar edhe pjesën e vogël që mbante medaljen.

Liu, fituese e medaljes së artë në garën ekipore të patinazhit artistik, postoi një video në rrjetet sociale ku tregon medaljen dhe shiritin të ndara, me tekstin: "Medalja ime nuk ka nevojë për shirit".

Probleme të ngjashme u panë edhe te ekipi gjerman që fitoi medaljen e bronztë në biatlon, ku një video në Instagram tregon medaljen që bie nga shiriti gjatë festimit në hotel.

Andrea Francisi, drejtor i operacioneve të Lojërave Milan-Cortina 2026, tha: "Jemi plotësisht të vetëdijshëm për situatën dhe po shqyrtojmë saktësisht se cili është problemi. Do t'u kushtojmë vëmendje maksimale medaljeve, sepse ky është një nga momentet më të rëndësishme për atletët".

Një zëdhënës i Komitetit Olimpik dhe Paralimpik të SHBA-së tha për BBC Sport se po presin që organizatorët të zgjidhin çështjen, ndërsa ende nuk është konfirmuar nëse atletët do të marrin medalje zëvendësuese.

Kjo nuk është hera e parë që cilësia e medaljeve olimpike vihet në pikëpyetje. Që nga shkurti i vitit 2025, janë bërë 220 kërkesa për zëvendësimin e medaljeve të fituara në Lojërat Olimpike Paris 2024 për shkak të konsumimit – afërsisht 4% e totalit.

Zhytësja britanike Yasmin Harper, fituese e medaljes së parë për ekipin e saj në Paris 2024, vuri re se medalja e saj po tregonte shenja "zbehjeje". Organizatorët e Lojërave Olimpike të Parisit 2024 konfirmuan se çdo medalje e dëmtuar do të zëvendësohet. /Telegrafi/

Saga që për ditë me radhë tronditi futbollin saudit dhe atë botëror ka marrë fund. Cristiano Ronaldo i ka dhënë fund protestës së tij dhe është rikthyer në aktivitet me skuadrën e Al-Nassr, pasi klubi u dorëzua ndaj presionit të yllit portugez dhe shlyeu të gjitha detyrimet financiare të prapambetura.

Sipas mediave portugeze, të gjithë punonjësit dhe bashkëpunëtorët e Al-Nassr kanë marrë pagat e vonuara në orët e fundit, çka ishte një nga arsyet kryesore të pakënaqësisë së Ronaldos. Me këtë veprim, kriza u mbyll dhe, në mënyrë figurative, “tymi i bardhë” u ngrit mbi Riad.

Megjithatë, pavarësisht rikthimit në stërvitje, Ronaldo nuk do të jetë i gatshëm për ndeshjen e së mërkurës në Ligën e Kampionëve Aziatikë 2 kundër Arkadag në Turkmenistan.

Rikthimi i tij në fushë pritet të ndodhë të shtunën, kur Al-Nassr do të përballet me Al Fateh në kuadër të Ligës Profesionale Saudite.

Përveç mosmarrëveshjeve me Fondin e Investimeve Publike (PIF), të lidhura me atë që Ronaldo e konsideron trajtim të pabarabartë të klubeve kryesore saudite, protesta e tij kishte edhe një dimension të fortë social.

Kapiteni i Kombëtares së Portugalisë kërkoi zgjidhje urgjente për vonesat e pagave të punonjësve të klubit, raporton e përditshmja portugeze A Bola.

Pikërisht ky aspekt rezultoi vendimtar. Me shlyerjen e borxheve ndaj stafit, Al-Nassr përmbushi një nga kushtet kryesore të Ronaldos, ndërsa gjesti i tij i solidaritetit forcoi edhe më shumë autoritetin dhe respektin ndaj tij brenda klubit.

Një zhvillim tjetër i rëndësishëm lidhet me strukturën drejtuese. Pas bisedimeve me Ronaldon, Jose Semedo dhe Simao Coutinho, drejtuesit portugezë të Al-Nassr, rifituan kompetencat që u ishin hequr në fund të dhjetorit, duke qenë më herët të përjashtuar nga proceset e afatit kalimtar të dimrit.

Edhe pse tifozët presin me padurim rikthimin e tij në fushë, Ronaldo dhe klubi kanë vendosur të mos nxitojnë. Qëllimi është një rikthim i plotë dhe në formën maksimale në ndeshjet e ardhshme të kampionatit. /Telegrafi/

Fundi dramatik i derbit të javës së 25-të në Ligë Premier mes Liverpoolit dhe Manchester Cityt në Anfield ka shkaktuar reagime të forta në botën e futbollit.

Qendra e diskutimit ishte vendimi kontrovers i gjyqtarit Craig Pawson, i cili pas ndërhyrjes së VAR në minutën e 100-të përjashtoi mesfushorin e Liverpoolit, Dominik Szoboszlai, për një faull ndaj Erling Haaland, pavarësisht se goli i Manchester Cityt u anulua pak më parë.

Ndeshja përfundoi me fitore 2-1 për Man Cityn, ndërsa Szoboszlai do të humbasë ndeshjet e ardhshme të ligës për shkak të kartonit të kuq.

Futbollisti legjendar anglez, Gary Neville, i cili komentoi për Sky Sports, kritikoi ashpër vendimin dhe përdorimin e teknologjisë VAR.

“Ky është një vrasës i humorit. Një nga momentet më të mëdha të sezonit sapo është shkatërruar. Thjesht nuk e kuptoj. Ai bëri një faull, kjo është e qartë, por duket shumë e padrejtë. E di që ka rregulla, por ekziston edhe fryma e lojës”, deklaroi Neville.

Ai shtoi se një vendim i tillë e shkatërron gëzimin dhe bukurinë e futbollit, duke u dhënë një mesazh të fortë për tifozët dhe lojtarët.

Pas ndeshjes, Liga Premier lëshoi një deklaratë për të sqaruar situatën, duke shpjeguar se Haaland kishte kryer një faull ndaj Szoboszlaik, i cili më pas pengoi një mundësi shënimi, dhe se për këtë arsye u akordua një goditje dënimi për Man City dhe një karton i kuq për hungarezin.

Megjithatë, komunikimi zyrtar u tall nga tifozët dhe mediat për shkak të gabimit në emrin e Szoboszlaik, i cili u shkrua gabim si “Dominic”.

Edhe vetë lojtarët e Manchester Cityt shprehën keqardhje për situatën me Erling Haaland që i doli në krah hungarezit.

Vendimi ka shkaktuar një debat të gjerë për përdorimin e VAR dhe interpretimin e rregullave, ndërsa tifozët dhe ish-lojtarët kërkojnë më shumë drejtësi dhe fleksibilitet në situata të tilla dramatike, që shpesh vendosin emocionet dhe rezultatet në minutat shtesë të ndeshjeve të mëdha. /Telegrafi/

Liridon Leci nuk ishte takuar më parë me kryesinë e FC Lirisë së Prizrenit pas humbjes së thellë ndaj Trepçës ’89 me rezultat 4-1 dhe nuk ishte njoftuar paraprakisht për shkarkimin e tij.

Si panelist i rregullt në emisionin “Dueli Sportiv” në RTV Dukagjini, Leci u shpreh se nuk kishte marrë ende ndonjë përgjigje nga kryesia e klubit.

“Nuk kam asnjë përgjigje akoma nga kryesia, përgjegjësitë i marr unë për humbjen...”, deklaroi trajneri.

Gjatë emisionit, klubi reagoi me një komunikatë për media, ku njoftohej largimi i tij nga posti i trajnerit të ekipit të parë.

“Klubi i Futbollit FC Liria njofton se trajneri i ekipit të parë, Liridon Leci, është larguar nga drejtimi i skuadrës. FC Liria shpreh mirënjohjen më të thellë për përkushtimin, punën e palodhur, kontributin dhe profesionalizmin që trajneri Leci ka treguar gjatë gjithë periudhës së tij në klub. I urojmë suksese të shumta në të ardhmen, si në aspektin personal, ashtu edhe në karrierën profesionale. Në ditët në vijim, klubi do të njoftojë mbi hapat e mëtejshëm në drejtimin e skuadrës”, thuhej në komunikatë.

Kjo lëvizje e klubit prizrenas u konsiderua joprofesionale nga palenistët e tjerë të emisionit, Faruk Statovci dhe Muhamet Dragusha.

Gjatë transmetimit të emisionit u shfaq edhe një fotografi ku shihej Ismet Munishi me një nga drejtuesit e klubit, duke sugjeruar se ai tashmë ka arritur marrëveshje për të marrë drejtimin e Lirisë në vend të Lecit.

Aktualisht, Liria mbetet në vendin e gjashtë në renditjen e Superligës me 36 pikë, pesë më pak se lideri Vushtrria, ndërsa para saj janë edhe Vëllaznimi, Feronikeli ’74, Trepça ’89 dhe Dinamo. /Telegrafi/

Skiatorja legjendare amerikane, Lindsey Vonn, ka pësuar një frakturë të rëndë në këmbën e majtë pas një rënie dramatike gjatë garës olimpike të zbritjes në Cortina d’Ampezzo, Itali.

Pas aksidentit, Vonn u transportua me helikopter në spital, ku iu nënshtrua menjëherë një ndërhyrjeje kirurgjikale për të stabilizuar dëmtimin.

Vonn, 41 vjeç, doli nga pista në pjesën e sipërme dhe nuk mundi ta përfundonte garën, duke lënë pas vetes një moment të tensionuar dhe shqetësues për tifozët dhe skuadrën e saj. Ky incident ngre dyshime për të ardhmen e karrierës së saj, pasi skiatorja tashmë po garonte me një dëmtim të rëndë në gju, me ligamente të këputura kryqëzuese.

Sipas spitalit italian, ndërhyrja ka shkuar sipas planit, dhe Vonn tani ndodhet nën mbikëqyrje mjekësore intensive për të siguruar rikuperimin e saj.

Megjithatë, nuk ka një afat të përcaktuar për rikthimin e saj në sport, duke lënë hapësirë për shqetësime mbi të ardhmen profesionale të skiatores.

Ky aksident shënon një moment të vështirë për një nga emrat më të mëdhenj të skive, e cila ka fituar shumë medalje dhe tituj gjatë karrierës së saj dhe është një figurë inspiruese për sportistët dhe adhuruesit e sportit dimëror në mbarë botën.

Familjarët dhe stafi mjekësor i kanë dhënë mbështetje të plotë, ndërsa fansat dhe kolegët e sportit shprehin solidaritet dhe shpresojnë për një rikuperim të plotë të Lindsey Vonn. /Telegrafi/

Karateistët e Kosovës nuk morën pjesë në Kampionatin Evropian për kadetë, juniorë dhe U21 që u zhvillua në Limasol të Qipros, pasi ky vend nuk lejoi përdorimin e simboleve shtetërore të Kosovës.

Federata jonë kishte marrë njoftim nga autoritetet qipriote dhe nga Federata Evropiane e Karatesë se pjesëmarrja me flamur dhe himn të Kosovës nuk do të ishte e mundur, duke e lënë ekipin kosovar pa të drejta të barabarta me sportistët e vendeve të tjera.

Federata Evropiane e Karatesë (EKF) ofroi një “zgjidhje” alternative, duke sugjeruar që sportistët kosovarë të merrnin pjesë nën emrin dhe flamurin e Federatës së Karatesë së Kosovës, duke respektuar kufizimet ligjore të Qipros.

Megjithatë, drejtuesit e karatesë kosovare refuzuan këtë mundësi, duke vendosur të mos udhëtojnë për ngjarjen kryesore kontinentale. Ky vendim ishte miratuar nga bordi ekzekutiv dhe Kuvendi i Punës i Federatës.

Vendimi i Qipros dhe mbështetja e EKF-së për të respektuar ligjet e vendit organizator sollën një situatë diskriminuese për sportistët kosovarë, të cilët mbetën jashtë garës edhe pse kishin përgatitur pjesëmarrjen e tyre.

Ky nuk është hera e parë që Qiproja vepron në këtë mënyrë, pasi edhe tre vjet më parë karateistët kosovarë nuk u lejuan të paraqiteshin me të drejta të barabarta në Evropianin e organizuar gjithashtu në këtë vend. /Telegrafi/

Trajneri i Juventusit, Luciano Spalletti, ishte i detyruar të ndryshonte planin e tij gjatë pushimit të pjesës së parë në ndeshjen e Serie A ndaj Lazios, të zhvilluar të dielën mbrëma në Allianz Stadium, e cila u mbyll 2-2.

Bardhezinjtë e mbyllën pjesën e parë në disavantazh 1-0 pas golit të Pedros, ndërsa Spalletti kishte vendosur të bënte një ndryshim ofensiv për të reaguar në pjesën e dytë.

Fillimisht, strategu italian kishte planifikuar ta largonte nga loja mbrojtësin e krahut Juan Cabal dhe në vend të tij të fuste anësorin portugez Francisco Conceicao, i cili u pa duke marrë udhëzime të detajuara nga stafi teknik gjatë nxehjes në pushimin mes pjesëve, shkruan Footbal Italia.

Megjithatë, situata ndryshoi në momentet e fundit, pasi Conceicao ndjeu shqetësime në gju gjatë nxehjes. Stafi mjekësor dhe teknik i Juventusit vendosën të mos e rrezikonin lojtarin portugez për pjesën e dytë, duke marrë parasysh gjendjen e tij fizike.

Si pasojë, Spalletti u detyrua të ndryshonte zgjedhjen dhe vendosi ta aktivizonte Edon Zhegrovën, i cili hyri në lojë në vend të Juan Cabal për fillimin e pjesës së dytë.

Ndeshja u komplikua më tej për Juventusin, pasi Lazio realizoi edhe golin e dytë me Gustav Isaksen, por reagimi i vendasve erdhi më vonë.

Weston McKennie ngushtoi rezultatin pak para minutës së 60-të, ndërsa Pierre Kalulu shënoi golin e barazimit dramatik vetëm 15 sekonda para fillimit të kohës shtesë, duke shpëtuar një pikë për bardhezinjtë.

Ndryshimi i detyruar nga Spalletti dhe aktivizimi i Zhegrovës në vend të Conceicaos u bë kështu një nga momentet më të diskutuara të mbrëmjes në Torino, me kosovarin që bëri një paraqitje solide. /Telegrafi/

Real Madridi ka shënuar fitore të rëndësishme ndaj Valencias në kuadër të javës së 23-të të La Ligës, duke triumfuar me rezultat 2-0 në një ndeshje ku vendosi efikasiteti në pjesën e dytë.

“Los Blancos” e nisën takimin me qetësi dhe kontroll të lojës, duke krijuar rastet e para serioze, ndërsa në minutën e 19-të Kylian Mbappe u ndal nga një pritje e sigurt e portierit Stole Dimitrievski.

Pjesa e parë u mbyll pa gola, por Real Madridi e rriti intensitetin pas pushimit. Epërsia erdhi në minutën e 65-të, kur Alvaro Carreras realizoi një gol të bukur pas një aksioni individual, duke goditur saktë pranë shtyllës së majtë.

Valencia pati rast të artë për barazim në minutën e 71-të, por Lucas Beltran, pasi shmangu portierin, goditi shtyllën dhe humbi një mundësi të jashtëzakonshme.

Në minutat shtesë, Real Madridi e vulosi fitoren, kur Brahim Diaz asistoi për Kylian Mbappe, i cili përfitoi nga porta e zbrazët për të shënuar golin e dytë dhe për të mbyllur ndeshjen me rezultat 2-0 .

Me këtë fitore, Real Madridi mbetet në vendin e dytë në renditjen e La Ligës me 57 pikë, vetëm një pikë më pak se lideri Barcelona, duke vazhduar garën e fortë për titullin kampion. /Telegrafi/

Juventusi ka barazuar në xhiron e 24-t të Serie A me rezultat 2-2 me Lazion, në një ndeshje me ritëm të lartë dhe shumë raste shënimi.

Sfida nisi me presionin e bardhezinjve, të cilët krijuan disa mundësi të mira në pjesën e parë, por pa arritur të gjejnë rrjetën.

Ndëshkimi erdhi në minutën e dytë shtesë të pjesës së parë, kur Daniel Maldini asistoi për Pedron, i cili u tregua i saktë brenda zonës dhe kaloi Lazion në epërsi 0-1.

Në fillim të pjesës së dytë, Lazio e dyfishoi avantazhin, teksa Gustav Isaksen përfitoi nga një pasim i Danilo Cataldit dhe realizoi një gol të bukur, me topin që u ndal në rrjetë pasi goditi traversën për rezultatin 0-2.

Juventusi reagoi dhe shtoi presionin, duke krijuar disa raste të rrezikshme, ndërsa goli erdhi në minutën e 59-të, kur Weston McKennie realizoi me kokë pas krosimit të Andrea Cambiasos, duke e ngushtuar rezultatin në 1-2.

Bardhezinjtë vazhduan të kërkonin barazimin, me tentativa nga Edon Zhegrova, Kenan Yildiz dhe Manuel Locatelli, por portieri Ivan Provedel u tregua vendimtar, ndërsa disa goditje përfunduan jashtë kuadratit.

Juventusi shënoi edhe një gol në minutat e fundit shtesë me Pierre Kalulu për 2-2.

Pas kësaj humbjeje, Juventusi mbetet në vendin e katërt në renditjen e Serie A me 45 pikë, ndërsa Lazio ngjitet në pozitën e tetë me 35 pikë, duke mbajtur gjallë shpresat për garat evropiane. /Telegrafi/

Rahoveci 029 ka shënuar një fitore tejet dramatike ndaj Vëllaznimit, në ndeshjen e fundit të xhiros së 19-të të Superligës së Kosovës në basketboll. Të dielën mbrëma, në palestrën “Mizahir Isma”, skuadra rahovecase triumfoi me rezultat minimal 86:84.

Vëllaznimi e pati kontrollin e ndeshjes për pjesën më të madhe të kohës, duke qenë vazhdimisht në epërsi dhe duke krijuar diferencë të konsiderueshme në disa momente. Megjithatë, Rahoveci 029 nuk u dorëzua dhe qëndroi në lojë deri në sekondat e fundit.

Një minutë e 22 sekonda para fundit, vendasit barazuan për herë të parë, kur J’von McCormick realizoi për tri pikë për rezultatin 84:84. Në sulmin pasues, Vëllaznimi gaboi, ndërsa 36 sekonda para fundit u faulua Kentrell Pullian, i cili ishte i saktë nga gjuajtjet e lira për epërsinë vendimtare 86:84.

Skuadra gjakovare pati ende dy mundësi për të kthyer rezultatin, por Jericole Hellems ishte i pasaktë fillimisht për dy pikë dhe më pas edhe për tri pikë, duke i dhënë fund ndeshjes dhe duke nisur festën e madhe për rahovecasit.

Kentrell Pullian ishte figura kryesore e Rahovecit 029 me 32 pikë, nëntë kërcime dhe tetë asistime. Kontribut të rëndësishëm dhanë edhe Bardh Rexha me 13 pikë e shtatë kërcime, si dhe J’von McCormick me 20 pikë, pesë kërcime dhe katër asistime.

Te Vëllaznimi, Jericole Hellems u dallua me 21 pikë, gjashtë kërcime dhe katër asistime, ndërsa Ziggy Reid dhe Derrick Wilson shtuan nga 15 pikë secili, me Reid që regjistroi edhe pesë kërcime.

Pas kësaj xhiroje, të dyja skuadrat kanë nga 25 pikë dhe ndodhen në fund të tabelës, duke e bërë edhe më interesante garën për mbijetesë në Superligë. /Telegrafi/

Pep Guardiola ka pranuar se Man City ka ende rrugë për të bërë përpara se të sfidojë siç duhet Arsenalin për trofeun e Ligës Premie, por u ka kërkuar lojtarëve të tij të jenë të gatshëm të shfrytëzojnë çdo gabim që bëjnë liderët e ligës.

Man City fitoi sot derbin ndaj Liverpoolit si mysafir me rezultat 2-1., duke mbetur gjashtë pikë prapa Arsenalit.

“Kam një ndjenjë se pak përmirësim nuk do të jetë i mjaftueshëm për të konkurruar kundër Arsenalit, por prapëseprapë kemi diferencë [për t’u përmirësuar]”.

telegrafi.com

"Ne duhet të luajmë kundër Arsenalit në shtëpi dhe sigurisht, duhet t'i mposhtim ata".

"E kam thënë, 13 ndeshje në Ligwn Premier, nga pikëpamja ime, nga përvoja ime e vogël, është shumë kohë, shumë".

“Është e drejtë. Kur shkon në ndeshjet e fundit duke luajtur kundër ndonjë ekipi në betejë për rënie nga kategoria, është një ndeshje e drejtë sepse ata jetojnë për të mbijetuar dhe kanë javë të gjata për t’u përgatitur, [ndërsa] ti vjen nga FA Cup, vjen nga Carabao Cup, vjen nga Liga e Kampionëve”.

“Kjo ndikon në garën për titull. Kjo është arsyeja pse të kesh nëntë, dhjetë, njëmbëdhjetë pikë është më e vështirë. Kjo është arsyeja pse e tëra çfarë mund të bëjmë është t’i fryjmë Arsenalit, të jemi aty, dhe të përpiqemi që nëse ata flenë, nëse bëjnë diçka [një gabim], ta përdorim”, deklaroi Guardiola pas ndeshjes. /Telegrafi/

Edhe pse po luajnë shkëlqyeshëm, situata financiare te Barcelona është ende larg të qenit ideale.

Mediat spanjolle po raportojnë se kampionia aktuale Barcelona ka borxh shumë para në tarifat e transferimeve për lojtarët që tashmë i ka sjellë.

Bëhet fjalë për shumën prej 162.84 milionë eurosh. Sipas informacionit në dispozicion, Barcelona mori një mesazh të qartë se deri në fund të sezonit, duhet të shlyejë deri në 142.78 milionë euro të atij borxhi në mënyrë që të ruajë stabilitetin financiar.

Barcelona u detyrohet miliona pesë ekipeve. Borxhi më i madh i referohet 43.07 milionë eurove që i detyrohen Leeds United për Raphinha, pastaj 25.96 milionë euro Sevilla për Jules Koundé dhe 18.29 milionë euro RB Leipzig për Dani Olmo.

Klubi katalanas i detyrohet gjithashtu 14.16 milionë euro Manchester City për Ferran Torres dhe 10.03 milionë euro të tjera Bayern Munich për Robert Lewandowski.

Paratë që i detyrohet Barcelona për transferime

Raphinha - Leeds United - 43.07 milionë euro

Jules Kounde – Sevilla – 25.96 milionë euro

Dani Olmo – RB Leipzig – 18.29 milionë euro

Ferran Torres – Manchester City – 14.16 milionë euro

Robert Lewandowski – Bayern Munich – 10.03 milionë euro

Si kujtesë, Barca kryeson deri më tani La Liga, përpara Real Madridit, është kualifikuar për gjysmëfinalet e Kupës së Mbretit dhe është gjithashtu në raundin e 16-tave të Ligës së Kampionëve. /Telegrafi /

Peja arriti një fitore të madhe në kryeqytet, duke mundur Sigal Prishtinën me rezultatin 82:78 në ndeshjen e xhiros së 19-të të Superligës së Kosovës në basketboll.

Ndeshja u zhvillua të dielën mbrëma në Pallatin e Rinisë dhe u vendos kryesisht falë paraqitjes fantastike të fundorit Musab Mala, i cili përfundoi takimin me 22 pikë, shtatë kërcime dhe dy asistime, pa asnjë top të humbur dhe me një top të rrëmbyer.

Te Peja spikatën edhe qendra Logan Routt me 19 pikë dhe 11 kërcime, si dhe Oshowen Williams me 14 pikë, nëntë asistime dhe tetë kërcime. Tajh Green shtoi 16 pikë e pesë kërcime, duke kontribuar në fitoren vendimtare të ekipit pejan.

Te Sigal Prishtina, paraqitjen më të mirë e bëri Adrio Bailey me 25 pikë e nëntë kërcime, ndërsa Kahlil Dukes shtoi 13 pikë dhe Valmiir Kakruki 12.

Ndeshja nisi me një çerek të parë të barabartë, ndërsa Prishtina bëri një shkëputje prej shtatë pikësh në të dytin, duke përfunduar pjesën e parë 42:34 në favor të skuadrës vendase.

Por Peja reagoi fuqishëm në çerekun e tretë, të cilin e fitoi 26:15, duke kaluar në avantazh 60:57. Në çerekun e katërt, skuadra e verdhë arriti të shkëputej deri në dhjetë pikë dhe mbajti epërsinë deri në fund, pavarësisht presionit të shtuar të Prishtinës.

Kjo ishte fitorja e dhjetë e Pejës këtë sezon, me nëntë humbje, duke mbajtur vendin e tretë me 29 pikë. Prishtina pësoi humbjen e 11-të dhe mbetet në vendin e gjashtë me tetë fitore dhe 27 pikë, të barabarta me Yllin në vendin e pestë. /Telegrafi/