Trajneri i përkohshëm i Manchester United, Michael Carrick, e ka nisur fuqishëm mandatin e tij, duke siguruar fitore ndaj Manchester Cityt dhe Arsenalit në dy ndeshjet e para si trajner, por mund të mos konfirmohet edhe përkundër suksesit.

Sipas gazetarit Ben Jacobs, Unitedi e ka bërë të qartë se procesi i përhershëm menaxherial do të vazhdojë për sa kohë që Carrick është në detyrë.

Djajtë e Kuq shpresojnë se ai mund të sigurojë vazhdimësi dhe stabilitet për këdo që emërohet përfundimisht, me procesin e përshkruar si të plotë dhe të gjerë, duke dhënë kohë të mjaftueshme për të identifikuar kandidatin e duhur.

Pavarësisht kërkimit të vazhdueshëm, Carrick ka ende mundësinë të ndikojë në bisedën e drejtuesve.

Një formë e mirë deri në fund të sezonit mund ta vendosë atë në garë për rolin e përhershëm, megjithëse disa kandidatë pritet të intervistohen pavarësisht rezultateve të tij. /Telegrafi/

Arsenali është gati të shesë mbrojtësin 20-vjeçar shqiptar, Maldini Kacurri në një marrëveshje të përhershme me ekipin e League Two, Grimsby Toën, përpara mbylljes së afatit të transferimeve të janarit.

“Topçinjtë” kanë arritur një marrëveshje me “Mariners” për një tarifë të pazbuluar, ndërsa kushtet personale po finalizohen tani.

Kacurri bëri përshtypje gjatë gjysmës së parë të sezonit si i huazuar te skuadra që po vuan nga vështirësitë në National League, Morecambe, duke fituar interes nga disa klube përpara se Grimsby të siguronte nënshkrimin e tij.

Ky transferim përfaqëson një hap përpara për reprezentuesin e Shqipërisë, i cili iu bashkua Arsenalit nga Fulham në vitin 2022, por pa arritur të lë gjurmë në ekipin e parë, përkundër debutimit.

Grimsby, i cili ka një seri prej gjashtë fitoresh në të gjitha garat pa pësuar gol në ligë që nga 20 dhjetori, e sheh Kacurrin si përforcim kyç për shtytjen e tyre për t'u ngjitur në një kategori më lartë dhe për ndeshjen e ardhshme të Kupës FA kundër Wolves.

Kacurri luajti një rol të spikatur te Morecambe përpara se huazimi i tij të skadonte më 2 janar, duke ndihmuar në stabilizimin e mbrojtjes së tyre pavarësisht vështirësive financiare të klubit.

Arsenali rikuperon një tarifë modeste për qendërmbrojtësin premtues ndërsa vazhdon të riformësojë rrugën e tyre të akademisë. /Telegrafi/

Interesimi i fortë i Manchester United për Cole Palmer ka ndezur një debat të madh në futbollin anglez.

Ylli i Chelseat është shndërruar në një nga emrat më të përfolur të afatit kalimtar, duke shkaktuar shqetësim në Stamford Bridge.

Në moshën 23-vjeçare, Palmer është afirmuar si një nga lojtarët më vendimtarë të Ligës Premier, çka e bën çdo lëvizje të mundshme për të një çështje me peshë të madhe sportive dhe financiare.

Manchester United e sheh Palmer si liderin ofensiv që i mungon projektit të tyre.

Në Old Trafford vlerësohet talenti, qëndrueshmëria dhe aftësia e tij për të marrë përgjegjësi në momentet kyçe.

Mediat britanike raportojnë për një ofertë fillestare rreth 120 milionë euro, një shifër që tregon seriozitetin e interesit dhe dëshirën e klubit për të ndërtuar të ardhmen rreth tij.

Klubi londinez e konsideron Cole Palmer të patransferueshëm, përveç rasteve kur paraqitet një ofertë jashtë çdo standardi të zakonshëm.

Drejtuesit e klubit kanë vendosur një çmim prej 200 milionë eurosh, duke e cilësuar Palmer si boshtin e projektit sportiv afatgjatë dhe një aset strategjik të pazëvendësueshëm.

Kjo përplasje mes dy gjigantëve anglezë pritet të ketë ndikim të madh në tregun e transferimeve.

Man Utd është i vendosur të rikthehet në majën e futbollit evropian, ndërsa Chelsea nuk ka ndërmend të heqë dorë lehtë nga ylli i tij.

Nëse marrëveshja do të konkretizohet, ajo mund të shndërrohet në një nga transferimet më të shtrenjta në historinë e futbollit anglez. /Telegrafi/

Real Madridi po përballet me një skenar të papritur në lidhje me një nga yjet e tyre më të mëdhenj. Jude Bellingham, i sjellë si një përforcim strategjik dhe lojtar kyç në projekt, ka filluar të ngrejë dyshime sepse nuk përshtatet plotësisht me ekipin.

Klubi mbretëror është i vetëdijshëm se mesfushori anglez nuk po kalon periudhën më të mirë dhe, megjithëse nuk është zyrtarisht në shitje, tregu rreth tij ka filluar të lëvizë seriozisht, raportojnë mediat spanjolle.

Në javët e fundit, klubi ka marrë oferta nga Liga Premier që kalojnë 100 milionë euro, një interes që Real Madridi nuk e priste kaq shpejt.

Klubet kryesore të Ligës Premier besojnë se reprezentuesi i Anglisë është ende një mundësi në treg dhe janë gati të investojnë shumë para për ta rikthyer atë këtë verë nëse lind mundësia më e vogël.

Kjo shumë do t’i lejonte Real Madridit të rikuperonte investimin e tyre dhe të lironte hapësirë për një rindërtim të mesfushës. Për momentin, qëndrimi i bordit është i prerë: Bellingham nuk është në shitje, por situata e përgjithshme nuk po injorohet.

Në klub ka shqetësime se lojtari nuk ndihet plotësisht rehat në rolin e tij aktual. Rendimenti i tij sulmues ka rënë, kërkesat mbrojtëse janë rritur dhe statusi i tij brenda ekipit ka ndryshuar me ardhjen e yjeve të rinj. E gjithë kjo ka shkaktuar pak frustrim tek ai.

Real Madridi po e mbështet atë, por nëse forma e tij nuk përmirësohet deri në fund të sezonit, asnjë opsion nuk do të përjashtohet. Klubi vlerëson talentin, moshën dhe ndikimin e tij komercial, por i jep përparësi ekuilibrit të dhomës së zhveshjes dhe qëndrueshmërisë sportive të projektit.

Pranimi i një shitjeje për më shumë se 100 milionë euro do t’i lejonte Real Madridit të forconte disa pozicione kyçe ose të kërkonte një profil lojtari që përshtatet më mirë në sistemin aktual.

Për momentin, gjithçka është pezull. Anglezi dëshiron të ketë sukses në Santiago Bernabeu, por gjithashtu dëshiron të ndihet i rëndësishëm.

Ndryshe, Belligham ka shënuar gjashtë gola dhe ka bërë katër asistime në 27 ndeshje këtë sezon. /Telegrafi/

Real Madridi e ka përfshirë trajnerin e Aston Villas, Unai Emery, si një objektiv të mundshëm për rolin e trajnerit të ekipit nga edicioni i ri.

Vazhdimësia e Alvaro Arbeloas, i cili ka pasuar Xabi Alonson, do të varet nga suksesi i tij në Ligën e Kampionëve dhe La Liga për pjesën e mbetur të sezonit.

Nëse ish-trajneri i Castillas nuk arrin ta bëjë këtë, Real Madridi ka të ngjarë të rekrutojë një trajner të profilit të lartë për të udhëhequr projektin dhe emri më i ri është ai i spanjollit Emery.

Emery e ka revolucionarizuar Aston Villan në vitet e fundit, duke e shndërruar atë në një nga gjigantët e Ligës Premier.

Aston Villa aktualisht është në vendin e tretë në tabelën e ligës, katër pikë prapa liderëve të Arsenalit, duke qenë kandidat serioz për titull dhe trofeun e Ligës së Evropës.

Ndërkohë, seria mbresëlënëse prej tre fitoresh radhazi e Arbeloas u ndërpre papritur pas një humbjeje zhgënjyese 4-2 kundër Benficas në Ligën e Kampionëve, duke i detyruar gjigantët spanjollë të garojnë në fazën e play-offit. /Telegrafi/

Gary McAllister beson se Mohamed Salah po kalon një “vit paqëndrueshmërie” në Anfield, duke theksuar largimin e Trent Alexander-Arnold si shkakun kryesor të rënies së formës së egjiptianit.

Megjithatë, ish-mesfushori i Liverpoolit këmbëngul se 33-vjeçari ka ende shumë për të ofruar në nivelin më të lartë dhe e ka nxitur atë të refuzojë interesimin nga Liga Profesionale Saudite.

Duke folur për OLBG, McAllister theksoi se kimia taktike unike mes dyshes ishte për vite me radhë motori i sulmit të Liverpoolit.

Me Alexander-Arnold që nuk ndodhet më në Anfield për të dërguar pasime precize në hapësira, loja e Salahut ka pësuar në mënyrë të pashmangshme.

“Gjithashtu mendoj se humbja e Trent Alexander-Arnold ka qenë një faktor i madh për Mo, sepse kombinimet që ata kishin në krahun e djathtë, qoftë kur Mo hynte nga brenda dhe Trent ngjitej lart e gjerë, ato kombinime të vogla tashmë kanë zhdukur”, u shpreh McAllister.

“Ata e njihnin lojën e njëri-tjetrit në mënyrë perfekte. Sa herë që Mo kërkonte të shpërthente pas mbrojtjes dhe të depërtonte mes linjave, Trent ishte lojtari që gjente pasimin. Mo ka vuajtur nga largimi i Trent dhe ky ka qenë thjesht një vit paqëndrueshmërie”.

Ndërtimi i një partneriteti të ri kërkon kohë, dhe “viti i paqëndrueshmërisë” që po përjeton Salah është një produkt i natyrshëm i kësaj periudhe tranzicioni.

Dinamika e re kërkon që anësori të përshtasë lëvizjet dhe kohëzgjatjen e vrapimeve, po aq sa mbrojtësit e rinj të krahut duhet të mësojnë nuancat se kur të mbivendosen apo të depërtojnë nga brenda.

“Kjo nuk do të thotë se Connor Bradley nuk mund ta furnizojë Mohamed Salahun apo se Frimpong nuk mund të vijë dhe të ndërtojë një marrëdhënie të tillë, por kjo kërkon kohë, sepse Trent dhe Mo kishin një lidhje të veçantë”, përfundoi ai./Telegrafi/

Chelsea ka konfirmuar se Raheem Sterling është larguar nga klubi me marrëveshje të ndërsjellë, teksa anësori anglez po kërkon një skuadër të re gjatë afatit kalimtar të janarit.

Lojtari që nuk bënte më pjesë në planet e klubit ka lënë përfundimisht Stamford Bridge, me paraqitjen e tij të fundit zyrtare për Chelsean që daton në maj të vitit 2024.

Chelsea ka bërë të ditur se ka arritur një marrëveshje me Sterling për ndërprerjen e bashkëpunimit, duke i hapur rrugë 30-vjeçarit për të gjetur një ambient të ri ku të vazhdojë karrierën e tij.

“Raheem Sterling sot është larguar nga Chelsea me marrëveshje të ndërsjellë, duke i dhënë fund tre vjet e gjysmë si lojtar i klubit tonë, pasi u transferua në verën e vitit 2022 nga Manchester City".

“E falënderojmë Raheem për kontributin e dhënë si lojtar i Chelseat dhe i urojmë sukses në fazën e ardhshme të karrierës së tij”, thuhej në njoftimin e Chelseat.

Sterling ishte degraduar nga trajneri Enzo Maresca, përpara largimit të italianit, me ish-reprezentuesin e Anglisë që ra ndjeshëm në hierarkinë e skuadrës.

Ai u huazua te Arsenali në sezonin 2024/2025, por “Topçinjtë” paguan një penalitet për ta kthyer lojtarin në Stamford Bridge, duke insistuar që ai të rikthehej te klubi amë.

Megjithatë, Sterling nuk ka zhvilluar asnjë ndeshje këtë sezon dhe tashmë do të kërkojë një klub të ri.

Sipas The Athletic, Sterling ka stërvitur i ndarë nga skuadra e parë gjatë gjithë sezonit, pavarësisht faktit se përfiton më shumë se 300 mijë paund në javë, në kuadër të një kontrate shumë të majme.

Maresca ishte veçanërisht i drejtpërdrejtë në deklaratat e tij kur u pyet për situatën e sulmuesit, teksa ishte ende në bankinën e Chelseat./Telegrafi/

Arsenali raportohet se po ndjek nga afër një lëvizje për një nga sulmuesit më të kërkuar në Europë, teksa transferimi veror Viktor Gyokeres po vazhdon të hasë vështirësi para portës.

Gyokeres, i cili iu bashkua Arsenalit nga Sportingu në një marrëveshje me vlerë deri në 64 milionë euro, ka pasur një fillim zhgënjyes në klubin e Londrës Veriore, duke shënuar vetëm pesë gola në 21 paraqitje në Ligën Premier deri tani këtë sezon.

Në fakt, 27-vjeçari nuk ka shënuar nga loja e hapur në kampionat që nga muaji shtator, një seri formash që është vënë nën lupën e kritikëve.

Pas 97 golave në 102 ndeshje me Sportingun e Portugalisë, Gyokeres e ka pasur të vështirë të përshtatet me kërkesat e futbollit anglez që prej transferimit te skuadra e Mikel Artetës.

Megjithatë, kjo nuk do të përbënte problem për objektivin e përfolur të transferimit, Julian Alvarez, i cili kaloi dy sezone te Manchester City përpara se t’i bashkohej Atletico Madridit në verën e vitit 2024.

Alvarez, që ka shënuar 40 gola në 85 ndeshje që prej transferimit te Atletico, po tërheq interesin e disa klubeve të mëdha, përfshirë Chelsean dhe Barcelonën.

Edhe Arsenali është i interesuar, pasi “synon të bëjë një tjetër goditje të madhe” në repartin ofensiv, sipas një raporti nga TEAMtalk.

Sipas ESPN, “Topçinjtë” po eksplorojnë mundësinë e një lëvizjeje verore për Alvarezin, me zyrtarët e klubit që kanë zhvilluar kontakte joformale për të vlerësuar nëse një marrëveshje do të ishte e realizueshme.

Andrea Berta, drejtori sportiv i Arsenalit, mund të luajë një rol kyç në negociata, pasi ka punuar për më shumë se një dekadë te Atletico Madridi dhe mban ende një marrëdhënie të ngushtë me agjentin dhe rrethin e lojtarit.

Më herët gjatë këtij muaji, u raportua se si Arsenali ashtu edhe Chelsea kanë zhvilluar bisedime me ndërmjetës për një transferim të mundshëm të Alvarezit.

Një raport tjetër nga TEAMtalk sugjeron se argjentinasi po bëhet gjithnjë e më i pakënaqur me situatën e tij te “Los Colchoneros”./Telegrafi/

Raporti Global i Transferimeve i FIFA-s zbulon një rekord historik në tregun e transferimeve të futbollit për vitin 2025.

Sipas këtij raporti janë 86,158 transferime ndërkombëtare të përfunduara dhe një shumë marramendëse prej 13.08 miliardë dollarësh të shpenzuara në tarifa në futbollin profesionist të meshkujve.

Edhe futbolli i femrave tregoi një rritje të fortë, duke regjistruar 2,440 transferime (rritje prej 6.3%) dhe shpenzime totale prej 28.6 milionë dollarësh - një rritje masive prej mbi 80% nga viti 2024.

Klubet e Anglisë dominuan tregun e futbollit të meshkujve si shpenzuesit më të mëdhenj (3.82 miliardë dollarë) dhe fituesit më të mëdhenj nga shitjet (1.77 miliardë dollarë), duke nënvizuar fuqinë financiare të Ligës Premier.

Transferimi i jashtëzakonshëm i vitit erdhi nga Liverpooli, i cili theu rekordin britanik të transferimeve duke paguar 172 milionë dollarë (125 milionë funte) për të siguruar sulmuesin e Newcastle, Alexander Isak.Kjo marrëveshje e vetme kryesoi listat si nënshkrimi më i shtrenjtë i vitit 2025, ndërsa pati edhe transferime tjera që kaluan shifrën e 100 milionë dollarëve.

Ndër transferimet tjera më të shtrenjta të vitit ishin ai mesfushorit gjerman, Florian Wirtz nga Bayer Leverkusen te Liverpool. Liverpooli , Hugo Ekitike (nga Eintracht te Liverpool), Jhon Duran (nga Aston Villa te Al-Nassr), Benjamin Sesko (nga RB Leipzig te Manchester United) dhe Nick Woltemade (nga Stuttgart te Newcastle). /Telegrafi/

Gjiganti italian, Milani thuhet se po vazhdon të vlerësojë përforcimet e mundshme në mesfushë për afatin kalimtar të verës.

Sipas mediumit italian Calciomercato, Mateo Kovacic i Manchester Cityt ka dalë si një emër nën shqyrtim të brendshëm të Rossonerëve.

Reprezentuesi kroat thuhet të jetë një lojtar i admiruar nga ekipi i rekrutimit të Milanit dhe kontakti fillestar tashmë ka ndodhur.

Kovacic e ka diskutuar gjithashtu idenë me bashkëkombësin e tij Luka Modric, ndikimi i të cilit mbetet i rëndësishëm brenda qarqeve vendimmarrëse të Milanit.

Ndërkohë që asnjë lëvizje formale nuk është e afërt, klubi po shqyrton mundësinë e një marrëveshjeje për qershorin, si pjesë e planeve të tyre më të gjera për të forcuar skuadrën përpara sezonit të ardhshëm.

Ndryshe, 31-vjeçari në verë hyn në vitin e fundit të kontratës dhe ka një vlerësim tregu prej 15 milionë eurosh. /Telegrafi/

Fabrizio Romano ka raportuar se mesfushori sulmues i West Ham, Lucas Paqueta, është gati të bashkohet me skuadrën braziliane Flamengo.

Me një shumë rekord prej 42 milionë eurosh për klubin brazilian, Paqueta kthehet në klubin e fëmijërisë së tij përpara Kupës së Botës 2026.

“Lucas Paqueta te Flamengo, ja ku jemi! Marrëveshje rekord e arritur për 42 milionë euro”, shkroi fillimisht Romano në postimin e tij.

"West Ham e pranoi propozimin pas kontaktit të drejtpërdrejtë me drejtorin Jose Boto sot”.

“Paquete udhëton më vonë sot dhe nënshkruan kontratë pesëvjeçare", përfundoi eksperti i transferimeve.

Ndryshe, brazilian deri tani këtë sezon ka luajtur 19 ndeshje, duke shënuar 5 gola dhe 1 asistim. /Telegrafi/

Pavarësisht thashethemeve të shumta dhe interesimit të fortë nga disa tregje ndërkombëtare, Liverpool ka marrë një vendim të qartë: Virgil van Dijk nuk do të largohet nga Anfield, as në afatin kalimtar dimëror dhe as në atë veror.

Qendërmbrojtësi holandez dhe kapiteni i skuadrës po kalon një periudhë me pasiguri, për shkak të një rënieje të dukshme në performancë gjatë këtij sezoni.

Megjithatë, drejtuesit e klubit nuk e konsiderojnë të negociueshme largimin e një prej figurave më të rëndësishme të epokës moderne të Liverpoolit, edhe pse oferta të shumta kryesisht nga Arabia Saudite kanë mbërritur në tavolinë.

Me kontratë të vlefshme deri në qershor të vitit 2027, e ardhmja afatshkurtër e Van Dijk mbetet e lidhur fort me “The Reds”.

Klubi beson se përvoja, autoriteti dhe ndikimi i tij në mbrojtje janë ende thelbësore për projektin sportiv.

Van Dijk, lider pavarësisht kritikave

Që prej transferimit të tij në vitin 2018, Virgil van Dijk ka qenë një shtyllë e padiskutueshme e Liverpoolit.

Cilësitë e tij mbrojtëse, aftësia për të organizuar vijën e fundit dhe roli udhëheqës e kanë renditur për vite me radhë ndër mbrojtësit më të mirë në botë.

Edhe pse këtë sezon ka qenë subjekt kritikash për mungesë konsistence në disa ndeshje, realiteti është se Liverpooli vazhdon të varet shumë nga prania e tij në fushë.

Përvoja dhe karakteri i tij mbeten asete të paçmueshme, sidomos në momentet vendimtare.

Drejtuesit e klubit janë të bindur se largimi i kapitenit në një moment kyç të sezonit do të krijonte një boshllëk të vështirë për t’u mbushur, si në aspektin sportiv ashtu edhe në atë të dhomës së zhveshjes.

Për këtë arsye, Liverpool synon ta mbajë Van Dijk në ekip dhe t’i japë atij kohën e nevojshme për të rikthyer formën më të mirë.

Përfundimisht, pavarësisht interesimit të madh dhe rënies relative në formë, Liverpool mbetet i vendosur: Virgil van Dijk nuk është në shitje. /Telegrafi/

Omar Marmoush nuk ka një rol të rëndësishëm te Manchester City dhe po mendon seriozisht për një transferim, me qëllim që të luajë më shumë.

Sulmuesi egjiptian dëshiron të qëndrojë në Angli dhe për këtë arsye ka tërhequr vëmendjen e dy klubeve të Ligës Premier: Tottenham Hotspur dhe Aston Villa.

Transferimi i Antoine Semenyo te Manchester City ka rritur konkurrencën në repartin ofensiv.

Trajneri Pep Guardiola e konsideron Semenyon një lojtar kyç, çka e bën edhe më të vështirë për Marmoush të gjejë hapësira në formacion.

Marmoush, 26 vjeç, ka kontratë me Manchester City deri në vitin 2029, por për shkak të mbingarkesës në sulm, ai po shqyrton mundësinë për t’u larguar dhe për të nisur një kapitull të ri në karrierën e tij.

Tottenham dhe Aston Villa interesohen për Marmoush

Sipas CaughtOffside, Marmoush i jep përparësi vazhdimit të karrierës në Ligën Premier, ku ende nuk ka treguar të gjithë potencialin e tij.

Në ditët e fundit të afatit kalimtar të dimrit, Tottenham dhe Aston Villa kanë shtuar interesimin për sulmuesin egjiptian.

Të dy klubet po ndjekin nga afër situatën dhe Marmoush mund të jetë një nga lëvizjet surprizë në fund të afatit kalimtar.

Gara mes Spurs dhe Aston Villa për shërbimet e tij pritet të jetë e fortë. /Telegrafi/

Trajneri i Napolit, Antonio Conte, ka reaguar ndaj kritikave të ish-sulmuesit të Chelseat, Diego Costa, duke theksuar se në futboll ka njerëz inteligjentë dhe budallenj, dhe se ai nuk do të humbasë kohën duke u fokusuar tek ato që thonë të tjerët.

Conte po kalon një periudhë të vështirë me Napolin, përballë shumë lëndimeve dhe një humbjeje të rëndë 3-0 kundër ish-klubit të tij, Juventusit, në Serie A, raporton Football Italia.

Çfarë tha Diego Costa për Conten?

Diego Costa, i cili fitoi Ligën Premier me Chelsean në sezonin 2016/17 nën drejtimin e Contes, foli së fundmi në podcastin e John Obi Mikel, duke komentuar jo vetëm si trajner, por edhe si person.

“Conte është i mirë si trajner, por si person ai është gjëja më e keqe që mund të të ndodhë në punën tënde të përditshme. Ai është shumë i keq. Ai është një njeri që nuk i beson askujt dhe mendon se di gjithçka. Nuk është kënaqësi të stërvitesh me të. Ai është gjithmonë i zemëruar, gjithmonë i vrenjtur. Ndoshta nuk bën seks në shtëpi sepse është shumë i hidhëruar”.

“Më vjen keq sepse isha shumë i lumtur te Chelsea, por nuk doja t’i shkaktoja probleme klubit. Lojtarët donin që unë të kthehesha, por askush nuk e pëlqente. Kjo është arsyeja pse ai nuk qëndroi gjatë”, deklaroi Costa

Përgjigja e Antonio Contes

Në një konferencë për shtyp përpara ndeshjes vendimtare të Ligës së Kampionëve kundër Chelseat, Conte komentoi shkurt dhe prerë rreth fjalëve të tij.

“Sinqerisht, nuk e humbas energjinë time duke lexuar gazetat dhe duke ndjekur atë që thuhet. Ka njerëz inteligjentë dhe budallenj në futboll, kështu që nuk do ta humbas kohën time duke lexuar atë që thonë ata”.

“Costa ishte me mua për një sezon. Mund të flas për futbollin: ne fituam ligën dhe ai u përpoq të largohej tre herë në të njëjtin sezon. Çfarë ndodhi më pas, nuk e di”, deklaroi Conte.

Një marrëdhënie e tensionuar te Chelsea

Diego Costa dhe Antonio Conte kanë pasur tensione të pazgjidhura që nga koha kur punuan së bashku te Chelsea në vitin 2017.

Gjatë verës, Conte i kishte dërguar një mesazh Costas se nuk ishte më i nevojshëm në klub, pavarësisht se sulmuesi spanjoll kishte shënuar 20 gola në sezonin e Ligën Premier dhe ishte në formë të shkëlqyer.

Marrëdhënia e tyre mbeti e tendosur gjatë gjithë sezonit, duke lënë shije të hidhur për të dyja palët. /Telegrafi/

Afati kalimtar i verës 2026 po fillon të marrë formë me lëvizje strategjike të nivelit të lartë mes gjigantëve të kontinentit të vjetër.

Manchester United e ka identifikuar Marc Casadon si kandidatin ideal për rindërtimin e mesfushës, pas monitorimit të situatës së tij në qytetin katalanas.

Talenti spanjoll po kalon një periudhë pasigurie në skemat e Hansi Flick, pavarësisht aftësive të tij të padiskutueshme. Mungesa e minutave të vazhdueshme në mesfushën katalanase ka ngritur shqetësime në rrethin e mesfushorit të ri.

Drejtuesit sportivë të “Djajve të Kuq” janë të bindur se mund të përfitojnë nga kufizimet financiare që ende ndikojnë te klubi blaugrana. Manchester United beson se një ofertë tërheqëse mund të hapë rrugën për largimin e një lojtari të etur për protagonizëm.

Nën drejtimin e Flick, mundësitë kanë qenë të pakta, me vetëm nëntë paraqitje si titullar deri tani në kampionatin vendas. Casado e di se zhvillimi i tij varet nga koha në fushë dhe ‘Old Trafford’ i garanton një rol qendror.

Klubi anglez është në konkurrencë me Atletico Madridin për shërbimet e tij, por fuqia financiare e Unitedit e vendos atë në një pozitë më të favorshme. Ata kërkojnë një profil organizues që sjell ekuilibër dhe lexim loje, karakteristikë e shkollës së Barcelonës.

Pavarësisht ofertave joshëse, mesfushori vazhdon të shprehë besnikëri ndaj fanellës që ka mbrojtur që nga fëmijëria. Casado ka deklaruar së fundmi se synon të luftojë për çdo minutë teksa mban veshur fanellën e klubit të zemrës.

Megjithatë, Manchester United e mban emrin e tij në listën e prioriteteve, krahas talenteve si Adam Wharton apo Joao Gomes.

Vendimi përfundimtar do të varet nga niveli i besimit që stafi trajner i udhëhequr nga bavarezi Flick do t’i japë produktit të akademisë për sezonin e ardhshëm./Telegrafi/

Kobbie Mainoo, mesfushori i talentuar i Manchester United, po rikthen shkëlqimin nën drejtimin e Michael Carrick, pas një periudhe të vështirë me trajnerin e mëparshëm, Amorim.

Rio Ferdinand e ka krahasuar Mainoo me legjendën Clarence Seedorf, por nën drejtimin e Amorim, talenti i lindur në vitin 2005 u shfrytëzua shumë pak: vetëm 225 minuta në Ligën Premier. Megjithatë, si shpesh ndodh në futboll, një ndryshim në stolin e klubit mund të ndryshojë gjithçka. Ky ishte rasti i Mainoo: nga një rezervë e përhershme, ai u bë titullar i padiskutueshëm.

Fjalët nga Ferdinand dhe Gerrard

Nga akademia e Manchester United deri te debutimi nën Ten Hag, i cili në kohën e tij te Ajax tregoi se di të zhvillojë talentet e reja, dhe rruga e Mainoo ka qenë e shpejtë. Ai ka fituar vendin e tij në ekip ndeshje pas ndeshjeje, duke treguar klas dhe personalitet, pavarësisht moshës së re.

Rio Ferdinand e vlerësoi: “Më duket se luan si Clarence Seedorf. Nuk po them që është po aq i mirë sa ai, apo se do të bëhet njësoj, por shoh shumë ngjashmëri”.

Jo vetëm Ferdinand ka folur për Mainoo. Edhe Steven Gerrard, ish-kapiteni i Liverpool, ka mbetur i impresionuar nga stili i tij.

“Do të doja të isha i aftë të luaja edhe gjysmën e mirë të asaj që bën Mainoo. Ai është e ardhmja. Dhe ju lutem, ndaloni krahasimet me Curtis Jones apo Harvey Elliot: nuk janë në të njëjtin univers me Kobbie”.

Pengesat me Amorim

Pavarësisht talentit të madh, Amorim nuk e konsideroi Mainoo pjesë të rëndësishme të rotacionit. Me sistemin 3-4-2-1, mesfusha u mbush kryesisht nga Casemiro dhe Bruno Fernandes, duke e lënë Mainoo jashtë. Në 14 paraqitje me të gjitha garat, ai nuk ka filluar asnjëherë nga minuta e parë, një vendim që nuk është ndarë nga tifozët dhe familjarët e mesfushorit.

Në ndeshjen kundër Bournemouth, vëllai i Mainoo shkoi në Old Trafford me një fanellë ku shkruhej “Free Kobbie Mainoo”, një mesazh i qartë që Carrick nuk e la pa u dëgjuar.

Ringjallja nën drejtimin e Carrick

Kur Michael Carrick mori drejtimin e Manchester United, ai vendosi të ndryshojë hierarkinë e mesfushës. Mainoo u zgjodh të luajë krahas Casemiro në sistemin 4-2-3-1, duke kombinuar eksperiencën me freskinë dhe teknikun e lartë të mesfushorit anglez.

Rikthimi i tij ishte i menjëhershëm dhe mbresëlënës. Kundër Manchester City të Guardiolas, Mainoo tregoi aftësi të jashtëzakonshme: 34 pasime me 91% saktësi, 2/2 pasime të gjata të sakta, dy duele fitues, tre ndërhyrje dhe tre largime nga zona mbrojtëse. Një performancë e plotë që e bëri të duket si një veteran në fushë.

“Kobbie është një lojtar fantastik, ka talent të jashtëzakonshëm dhe aftësi të mëdha. Ai ka menaxhuar ndeshje të mëdha me përvojë dhe ka luajtur mirë edhe për Kombëtaren. Pres me padurim sukseset e tij”, deklaroi Carrick pas ndeshjes.

Paraqitja që përcakton liderin

Mainoo vazhdoi të tregojë klasën edhe kundër Arsenalit, ku shërbeu me asistim për golin e Cunha në fitoren 3-2, duke thyer një rekord pa humbje prej 267 ditësh në "Emirates Stadium".

Kjo periudhë shënon kthimin më të mirë të mundshëm për Kobbie Mainoo, i cili tani po konsolidon rolin e tij si lider i mesfushës së Manchester United.

Në këtë mënyrë, Kobbie Mainoo ka treguar se një ndryshim në stolin e klubit mund të jetë vendimtar për karrierën e një të riu, duke shndërruar pengesat e mëparshme në një ringjallje të plotë në Ligën Premier. /Telegrafi/

Xabi Alonso mund të sjellë ndryshime të mëdha te Liverpooli nëse emërohet trajner i ri i klubit, me spanjollin që raportohet se është i gatshëm të sakrifikojë disa emra të mëdhenj për të rindërtuar skuadrën sipas vizionit të tij.

Sipas një raportimi nga Fichajes, Alonso ka identifikuar pesë lojtarë të Liverpoolit të cilët do të ishin të disponueshëm për shitje në të ardhmen e afërt, në mënyrë që klubi të gjenerojë fonde për afrime të rëndësishme gjatë afatit kalimtar të verës.

Në repartin defensiv, Alonso thuhet se është i gatshëm të lejojë largimin e Ibrahima Konate, i cili do të mbetej lojtar i lirë pas skadimit të kontratës së tij këtë verë.

Francezi ka qenë objekt kritikash të shumta gjatë sezonit aktual, pavarësisht se më herët ishte lidhur me klube si Real Madridi dhe Paris Saint-Germain.

Surpriza më e madhe pritet të vijë në mesfushë. Alonso raportohet se është i gatshëm të heqë dorë nga Alexis Mac Allister dhe Ryan Gravenberch, dy lojtarë me kontratë deri në vitin 2028.

Të dy kanë pasur vështirësi për të gjetur formën e tyre më të mirë këtë sezon, por largimi i tyre do të ishte i papritur, duke pasur parasysh rolin kyç që luajtën në sezonin e kaluar, kur Liverpooli fitoi titullin.

Në repartin ofensiv, Cody Gakpo është një tjetër emër që mund të largohet nëse Alonso merr drejtimin e ekipit.

Vendimi pritet të mirëpritet nga një pjesë e tifozëve, të cilët kanë shprehur pakënaqësi për aktivizimin e vazhdueshëm të holandezit, pavarësisht paraqitjeve jo bindëse.

Ndërkohë, largimi më i bujshëm mund të jetë ai i Mohamed Salah. Legjenda e Liverpoolit raportohet se po shqyrton mundësinë për t’i dhënë fund aventurës së tij në “Anfield” pas nëntë vitesh, ndërsa Alonso thuhet se është i hapur për shitjen e egjiptianit.

Si zëvendësues ideal për 33-vjeçarin, në radarët e klubit përmendet Michael Olise.

Nëse këto zhvillime realizohen, Liverpooli mund të përballet me një transformim të thellë në përbërje, duke sinjalizuar fillimin e një epoke të re nën drejtimin e mundshëm të Xabi Alonsos./Telegrafi/

Interesi i Ligës Premier për Francesco Pio Esposito po rritet me shpejtësi, por Interi nuk ka ndërmend ta lërë sulmuesin e tyre të ri të largohet me asnjë çmim.

Sipas ekspertit të transferimeve Alfredo Pedulla, klubet në Angli tashmë po përgatisin oferta të mëdha, me shifra deri në 80 milionë euro që përmenden në qarqet e vëzhguesve. Megjithatë, Nerazzurrët e shohin sulmuesin si një pjesë kyçe të projektit të tyre afatgjatë dhe pritet që ta refuzojnë çdo qasje të tillë.

Zhvillimi i Espositos nuk ka kaluar pa u vënë re jashtë vendit. Edhe gjatë huazimit të tij te Spezia sezonin e kaluar, vëzhguesit e rregullt të Ligës Premier ishin vëzhgues, duke ndjekur praninë e tij fizike, lëvizjen dhe pjekurinë përtej moshës së tij.

Kjo vëmendje vetëm është se intensifikuar këtë sezon ndërsa ai vazhdon të rritet brenda sistemit të Interit.

Nga perspektiva e klubit, kjo është më pak një mundësi transferimi dhe më shumë një sinjal se sa lart vlerësohet produkti i akademisë së tyre në të gjithë Evropën.

Në vend që të përfitojnë, Interi ka më shumë gjasa të lëvizë në drejtimin e kundërt, duke siguruar të ardhmen e tij me një zgjatje kontrate të projektuar për të larguar interesin dhe për të përforcuar statusin e tij në hierarkinë e skuadrës.

Mesazhi nga Milano është i qartë: Esposito nuk është në treg. Dhe nëse Anglia vërtet vjen me oferta të mëdha, pritet që ata të përballen me një refuzim të prerë dhe të menjëhershëm. /Telegrafi/

Manchester Unitedi pritet të jetë shumë gjatë pa mbrojtësin e tyre anësor, Patrick Dorgu, i cili u lëndua në ndeshjen e fundit ndaj Arsenalit.

21-vjeçari e zbuloi problemin në pjesën e dytë të fitores 3-2 të së dielës ndaj Arsenalit, një ndeshje në të cilën ai gjithashtu shënoi.

Edhe pse fillimisht mendohej se ishte vetëm një shtrëngim, vlerësimet e mëtejshme sugjerojnë një mungesë më të gjatë.

Sipas mediumit The Athletic, anësori i Manchester United do të mungojë për rreth 10 javë pasi pësoi një dëmtim në kofshë.

Kjo pengesë është një goditje për trajnerin e përkohshëm Michael Carrick, pasi Dorgu rrezikon të mungojë deri në tetë ndeshje.

Dorgu është përmirësuar vazhdimisht që nga largimi i Ruben Amorim dhe po bëhej një lojtar kyç për klubin nga Old Trafford. /Telegrafi/

Kylian Mbappe tani e ka arritur Harry Kanen në krye të renditjes së “Këpucës së Artë” për këtë sezon. Dy golat e francezit në Estadio de La Ceramica të shtunën e kaluar e çojnë atë në 21 gola, i njëjti numër me anglezin e Bayern Munich.

Performanca e Mbappes kundër Villarrealit e ka shtyrë atë të kalojë Erling Haaland në listën e golashënuesve, me norvegjezin që nuk luajti në fitoren e Manchester Cityt kundër Ëolves këtë fundjavë.

Ndërkohë, Kane gjithashtu dështoi të shënonte në humbjen e papritur të Bayernit ndaj Augsburgut në xhiron e fundit.

Një tjetër që vjen nga La Liga dhe gjenden në dhjetëshen e parë është ylli kosovar i Mallorcas, Vedat Muriqi, i cili ka 28 pikë falë 14 golave të tij këtë sezon.

Vlen të përmendet se golat në La Liga, Ligën Premier, Bundesliga, Serie A dhe Ligue 1 vlejnë nga dy pikë secili, ndërsa në ligat e tjera evropiane, golat vlejnë midis 1.5 dhe një pikë për gol.

Renditja aktuale e Këpucës së Artë

Harry Kane (FC Bayern Munich) 21 gola x 2 pikë = 42 pikë

Kylian Mbappe (Real Madrid) 21 gola x 2 pikë = 42 pikë

Erling Haaland (Manchester City) 20 gola x 2 pikë = 40 pikë

Igor Thiago (Brentford FC) 16 gola x 2 pikë = 32 pikë

Darko Lemajic (FK RFS) 29 gola x 1 pikë = 29 pikë

Vangelis Pavlidis (SL Benfica) 19 gola x 1.5 pikë = 28.5 pikë

Vedat Muriqi (RCD Mallorca) 14 gola x 2 pikë = 28 pikë

Ibrahim Diabate (GAIS Goteborg) 18 gola x 1.5 pikë = 27 pikë

Daniel Karlsbakk (Sarpsborg 08) 18 gola x 1.5 pikë = 27 pikë

August Priske Flyger (Djurgardens IF) 18 gola x 1.5 pikë = 27 pikë

Ayase Ueda (Feyenoord) 18 gola x 1.7 pikë = 27 pikë

/Telegrafi/