Real Madridi ka finalizuar tashmë largimin e Endrick Felipe, që pritet të jetë lëvizja e vetme e klubit gjatë afatit kalimtar dimëror.
Megjithatë, ekzistonte mundësia që edhe Franco Mastantuono të largohej me huazim.
Mastantuono pati një fillim premtues në Real Madrid pas transferimit të tij nga River Plate gjatë verës, por muajt e fundit ka rënë në disfavor.
Lëndimet kanë luajtur një rol, por realiteti është se Xabi Alonso nuk e sheh më si titullar të rregullt, një situatë e vështirë për të përballuar.
Mesfushori 18-vjeçar kërkon kohë të rregullt lojë për të siguruar vend në ekipin kombëtar të Argjentinës për Kupën e Botës 2026.
Ai mund të ketë vështirësi të marrë minuta të shumta në ‘Bernabeu’, prandaj i ishte ofruar mundësia për të kaluar me huazim në Itali.
Sipas gazetës Marca, Napoli pyeti Real Madrid për mundësinë e huazimit të Mastantuonos për gjysmën e dytë të sezonit, por kërkesa u refuzua kategorikisht.
Zyrtarët e Los Blancos e konsiderojnë atë si një lojtar të rëndësishëm, dhe arsyeja e mungesës së tij të fundit në fushë lidhet me dëmtimin që ende nuk është shëruar plotësisht.
Rikthimi i Rodrygo Goes e ka vënë Mastantuonon në disavantazh për të rikthyer vendin në formacionin titullar të Real Madrid, por me shumë ndeshje në vijim gjatë muajve të ardhshëm, ai do të ketë mundësi për të treguar vlerat e tij.
Mastantuono shihet si një lojtar i së tashmes, një fakt i rëndësishëm duke pasur parasysh moshën e tij vetëm 18-vjeçare.
Real Madridi e ka në plan të llogarisë tek ai, prandaj kërkesa e Napolit u refuzua. /Telegrafi/
Barcelona po shkon drejt një situate të ndërlikuar në portë, pavarësisht faktit se ky repart konsiderohet si një nga më të mbuluarit në skuadër, raporton “Diario Sport”.
Transferimi i Joan Garcia ka siguruar të ardhmen, por rikthimet e shumta nga huazimet pritet të detyrojnë klubin të marrë vendime të vështira në fund të sezonit.
Garcia, i cili ka kontratë deri në vitin 2031, konsiderohet qartazi si portieri numër një i së ardhmes së Barcelonës. Brenda klubit pritet që ai ta mbajë këtë rol për shumë vite, duke qenë i vetmi portier me vend të garantuar titullari.
Në anën tjetër, Marc-Andre ter Stegen, i lidhur me kontratë deri në vitin 2028, nuk është më pjesë e planeve të klubit. Barcelona i ka komunikuar portierit gjerman se nuk do të ketë minuta loje, por ai nuk është i gatshëm të largohet, përveçse në rast se i vjen një ofertë bindëse.
Wojciech Szczesny ka rinovuar kontratën edhe për një sezon tjetër, por situata e tij mbetet e paqartë: kontrata mund të ndërpritet ose portieri polak mund të vendosë edhe për pensionim. Ndërkohë, Inaki Pena pritet të rikthehet nga huazimi te Elche, me vlerë të rritur në treg dhe interes nga disa klube.
Po ashtu, edhe Ander Astralaga dhe Aron Yaakobishvili do të kthehen te Barcelona, ndërsa Diego Kochen mund të ketë nevojë për një tjetër huazim për të vazhduar zhvillimin e tij.
Në klub pranojnë se mbipopullimi në portë është një problem real, por njëkohësisht shohin mundësi për të realizuar shitje, të cilat do të ndihmonin në gjenerimin e të ardhurave. Për Barcelonën, zgjidhja e këtij “nyje” në portë do të jetë një nga sfidat kryesore në planifikimin e sezonit të ardhshëm./Telegrafi
Një nga tiparet më të dukshme të Barcelonës nën drejtimin e Hansi Flick është etja e pandalshme për gola.
Trajneri gjerman e nxit vazhdimisht ekipin e tij të sulmojë, pavarësisht rezultatit në tabelën e rezultateve – një filozofi që u ka sjellë katalanasve shifra mbresëlënëse në aspektin ofensiv.
Barcelona e mbylli vitin 2025 me statistika të jashtëzakonshme: 169 gola të shënuar në 60 ndeshje në të gjitha garat, sipas të përditshmes spanjolle Marca.
Një ritëm “vrasës” gjatë gjithë vitit
Skuadra blaugrana ka qenë veçanërisht e fuqishme në La Liga, ku ka shënuar 102 gola në 37 ndeshje gjatë dymbëdhjetë muajve të fundit – një mesatare prej 2.75 golash për ndeshje.
Vetëm në periudhën gusht–dhjetor, Barcelona realizoi 67 gola, prej të cilëve: 51 në kampionat, 14 në Ligën e Kampionëve dhe 2 në Kupën e Mbretit.
Ky sezon do të mbahet mend edhe për fitoret spektakolare: nga gjashtë gola kundër Valencias dhe Olympiacos, pesë ndaj Real Betisit, si dhe katër gola kundër Athletic Bilbaos dhe Celta Vigos.
Në 13 nga 25 ndeshje të luajtura këtë sezon, Barcelona ka shënuar tre ose më shumë gola.
Performanca më e mirë që nga epoka e Luis Enriques
Shifra prej 169 golash përfaqëson performancën më të mirë të Barcelonës që nga viti 2016, kur ekipi i drejtuar nga Luis Enrique realizoi 174 gola, me një mesatare prej 2.94 golash për ndeshje. Në atë kohë, barra e golave mbahej nga treshja legjendare Messi – Neymar – Luis Suárez.
Në vitin 2025, përgjegjësia për finalizimin është shpërndarë mes disa emrave: Robert Lewandowski, Ferran Torres, Raphinha, Lamine Yamal dhe Fermín López, duke treguar një Barcelonë më kolektive në sulm.
“Mallkimi” i shtyllave të portës
Statistikat mund të kishin qenë edhe më mbresëlënëse po të mos ishte “aksidenti” me shtyllat e portës. Lojtarët e Barcelonës kanë goditur shtyllën ose traversën 36 herë gjatë vitit kalendarik.
Rasti më i fundit ishte ai i Raphinhas, të dielën e kaluar në La Cerámica, kur topi përfundoi në traversë. Nga këto 36 goditje: 17 kanë ndodhur këtë sezon, prej tyre 15 në La Liga dhe 2 në Ligën e Kampionëve.
Një detaj që tregon se shifrat sulmuese të Barcelonës nën Flick mund të kishin qenë edhe më të frikshme. /Telegrafi/
Barcelona, nën drejtimin e trajnerit Hansi Flick dhe drejtorit sportiv Deco, ka përcaktuar prioritetet për afatin kalimtar të verës 2026, sipas La Vanguardia.
Prioriteti kryesor është afrimi i një mbrojtësi qendror, për shkak të problemeve të vazhdueshme me dëmtimet e Andreas Christensen dhe formës jo të qëndrueshme të Ronald Araujo.
Po ashtu, në plan është edhe zëvendësimi i Inigo Martinez, i cili u largua në drejtim të Al-Nassr.
Një tjetër fokus i rëndësishëm është përforcimi i repartit ofensiv. Pavarësisht paraqitjeve të mira të Raphinha dhe Lamine Yamal, klubi kërkon më shumë alternativa si në krahë, ashtu edhe në qendër të sulmit.
Marcus Rashford është një nga objektivat kryesorë, me Barcelonën që po shqyrton mundësinë e një transferimi të përhershëm prej rreth 30 milionë eurosh për sulmuesin anglez.
Në rast se Robert Lewandowski largohet, klubi katalanas do të synojë afrimin e një sulmuesi të nivelit të lartë për të ruajtur cilësinë e golave.
Strategjia e verës së Barcelonës parashikon një “mini-ristrukturim” të skuadrës, me synim rritjen e thellësisë së ekipit dhe konkurrueshmërisë për sezonin 2026-2027./Telegrafi/
Detaje të reja mbi klauzolat komplekse në kontratën e Endrick me Real Madridin kanë dalë në dritë, sipas Diario AS.
Reali arriti një marrëveshje prej 35 milionë eurosh me Palmeiras-in, me deri në 25 milionë euro të tjera në formë bonusesh të bazuara në performancë, të cilat u aktivizuan pasi sulmuesi mbushi 18 vjeç në vitin 2024.
Duke përfshirë tarifën fikse, komisionet dhe pagën, Real Madridi ka investuar tashmë afro 70 milionë euro te talenti brazilian.
Një pjesë e konsiderueshme e bonuseve lidhen drejtpërdrejt me performancën individuale të lojtarit.
Deri në vitin 2030, klubi madrilen paguan 35 mijë euro për çdo gol, asist ose penallti të fituar nga Endrick, me një kufi maksimal prej 12.5 milionë eurosh.
Çdo paraqitje si titullar prej të paktën 45 minutash i kushton Real Madridit 75 mijë euro, ndërsa ekzistojnë edhe shpërblime shtesë të lidhura me sukseset ekipore.
Nga ana tjetër, Palmeiras përfiton deri në 1 milion euro për fitimin e titullit në La Liga dhe deri në 2 milionë euro për paraqitjet në Ligën e Kampionëve, në varësi të rolit dhe aktivizimit të Endrick.
Me Endrick që këtë sezon ka mbetur shpesh në stol nën drejtimin e Xabi Alonsos dhe ka hasur vështirësi për të gjetur vazhdimësi, Real Madridi ka miratuar një huazim te Lyoni, me synimin për të mbrojtur investimin e bërë te talenti i ri./Telegrafi/
Hansi Flick ka dhënë shenja se është i hapur për të zgjatur kontratën e tij me Barcelonën përtej afatit aktual që skadon në 2027, duke dhënë një mesazh inkurajues për klubin përballë thirrjeve në rritje që trajneri të qëndrojë më gjatë.
Një raport i fundit i COPE zbulon se Barcelona ka kontaktuar zyrtarisht trajnerin gjerman për të shtuar një vit të ekstra në kontratë, duke e çuar atë deri në vitin 2028.
Ndërsa Flick kishte planifikuar fillimisht të tërhiqej pas përmbushjes së kushteve aktuale, burime të afërta tregojnë se ai tani është më i hapur ndaj idesë, pas interesimit të fundit të klubit, megjithatë ai mbetet i qetë përsa i përket marrjes së një vendimi përfundimtar.
Pozitiviteti i 60-vjeçarit buron nga kënaqësia e tij e thellë me jetën në Kataloni, si në aspektin profesional, ashtu edhe personal.
Flick thuhet se është i entuziazmuar nga projekti sporti, veçanërisht nga shtimi i talentit nga La Masia, ndërsa familja e tij ka gjetur vendin e përsosur, me gruan, vajzat dhe nipërit që vizitojnë shpesh terrenin e stërvitjes dhe e shohin Barcelonën si një shtëpi ideale.
E rëndësishme, e ardhmja e tij duket e lidhur ngushtë me presidentin Joan Laporta, me të cilin ndan një marrëdhënie të shkëlqyer, si dhe me drejtorin sportiv Deco, duke e bërë perspektivën e qëndrimit të tij në klub edhe më të besueshme./Telegrafi/
Lyon ka kompletuar huazimin e sulmuesit Endrick nga Real Madrid. 19-vjeçari u transferua te klubi i Ligue 1 për pjesën e mbetur të sezonit, në një marrëveshje që nuk përmban opsion blerjeje.
Sipas marrëveshjes, skuadra franceze do të mbulojë pjesërisht pagën e Endrick, ndërsa Madrid do të marrë kompensim shtesë nëse sulmuesi nuk luan të paktën 25 ndeshje.
Shuma e kompensimit do të ndryshojë në varësi të ndeshjeve që Lyon do të zhvillojë në kupë dhe në Ligën e Evropës. Endrick do të mbajë fanellën me numrin 9 te Lyon.
Rregulloret franceze parashikojnë që një lojtar duhet të presë katër ditë nga regjistrimi i marrëveshjes përpara se të mund të luajë për klubin e ri, që do të thotë se Endrick nuk do të jetë i disponueshëm për ndeshjen e Lyon kundër Monacos më 3 janar, pasi marrëveshja nuk mund të regjistrohet zyrtarisht para 1 janarit.
Endrick është tërhequr nga oferta e Lyon pas vështirësive për të gjetur minutazh të rregullt në Madrid dhe beson se ky transferim mund të rrisë shanset e tij për t’u përfshirë në skuadrën e Brazilit për Kupën e Botës të vitit të ardhshëm.
Real Madrid kishte vonuar vendimin për të ardhmen e Endrick gjatë sezonit, në pritje të ndryshimeve, por u bë e qartë se ai nuk është pjesë e planeve të trajnerit Xabi Alonso.
Endrick ka luajtur vetëm tri herë këtë sezon, një herë si zëvendësues në La Liga, një herë si zëvendësues në Ligën e Kampionëve dhe një herë si titullar në fitore ndaj CF Talavera në rundin e 32-të të Kupës së Mbretit.
Gjatë sezonit 2024/2025, ai luajti më rregullisht nën drejtimin e Carlo Ancelotti, tani përzgjedhës i Brazilit, duke regjistruar 22 paraqitje në La Liga, por vetëm tri prej tyre si titullar.
Endrick iu bashkua Madridit si 17-vjeçar nga Palmeiras në dhjetor 2022 dhe nënshkroi zyrtarisht në korrik 2024.
Deri më tani, ai ka zhvilluar 40 ndeshje në të gjitha kompeticionet për Madridin, duke shënuar shtatë gola dhe një asistim./Telegrafi/
Çdo muzikant do të ndihej krenar po të kishte shkruar këngë gjysmë të bukura dhe prekëse si të tijat.
Nga: Neil McCormick, kritik i muzikës / The Telegraph (titulli: Chris Rea winced when I mentioned his hits. He shouldn’t have) Përkthimi: Telegrafi.com
Chris Rea ishte me të vërtetë këngëtar, tekstshkrues dhe kitarist i madh britanik dhe, për më tepër, një njeri vërtet i mrekullueshëm. Nëse jeni rrugës për në shtëpi për Krishtlindje, ose i ngujuar në trafik duke shkuar për të vizituar familjen, ka shumë gjasa të pëshpëritni një këngë të Chris Reas. Por, kishte diçka më shumë te Rea - i cili ka vdekur në moshën 74-vjeçare - sesa hitet e tij. Një herë kalova një pasdite me të në studiot “Abbey Road”, në vitin 2016, duke xhiruar një emision televiziv, dhe u mahnita nga mirësjellja e tij, përulësia, humori, filozofia e tij e lodhur nga jeta, por prapë optimiste, dhe pasioni i tij i dukshëm për art dhe muzikë.
Ai ishte në siklet kur përmenda hitin e tij të parë të madh, këngën e lehtë disko-romantike, Fool (If You Think It’s Over), por çfarë kishte për t’u ndier në siklet? Është një këngë e mrekullueshme, një klasik absolut, me një melodi të lehtë dhe vargje prekëse për të cilën cilido do të ndihej krenar po ta kishte shkruar. Rea gjithmonë e kishte ndier atë si një mallkim, sepse bëri të kategorizohej gabimisht si baladist sentimental, mesatar, një lloj miksi i lirë verior mes Barry Manilowit dhe Barry Whiteit. Kënga doli në vitin 1978, kur supozohej se panku kishte ndryshuar peizazhin muzikor britanik.
Chris Rea(Foto: Samir Hussein/Redferns)
“Ende njoh gazetarë të cilët nuk më vlerësojnë për shkak të asaj kënge”, tha ai. Epo, ata gazetarë e kanë gabim. Rea ishte talent i jashtëzakonshëm, që shkroi muzikë me përmasë të gjerë, me inteligjencë dhe imagjinatë, duke u ngritur për t’u bërë një superyll stadiumesh në moshën e tij të mesme. “Në ëndrrën time më të bukur, do të isha një muzikant filmi dhe kompozitor klasik”, më tha ai. “Kjo ishte ajo që doja, por ky zë më doli përpara”.
Ah, zëri. Rea kishte zë të ulët, të rëndë, me tone melankolike dhe të mbushur me ndjesinë e një mençurie të fituar me mund, dhe kur vërtet u bazua te zëri, ai gjeti stilin e vet. Por, kur ishte i ri në Midëlsbrou, duke punuar në biznesin familjar të akulloreve dhe duke ëndërruar arratisjen, ndjeu se zëri ishte pengesë për t’u bërë këngëtar. “Nuk kam zërin që do të doja të kisha”, më tha ai. “Është i thellë, i vështirë, e mbush miksin, pengon që daullet të dalin në pak, gjëra të tilla”.
Kur ishte 21 vjeç, dëgjoi në radio një këngë të vjetër bluz të Charlie Pattonit dhe ajo e mahniti. “Tingëllonte sikur të ishte xhaxhai im”, mendoi ai. Gjëja tjetër që i tërhoqi vëmendjen qe kitara vajtuese. “Ishte tingulli i mjegullt ai që më dridhi”. Një mik muzikant i shpjegoi se ishte kitara bottleneck [interpretim me slide/slajd - shufër çeliku]. “Dy ditë më vonë isha pronar krenar i një kitare Hofner. Nuk kishte bottleneck në dyqanet muzikore të Midëlsbrou, ndaj përdora një nga shishet e llakut të thonjve të motrës së madhe. Ishte rozë metalike dhe u bë slajdi im për dy vjet”.
Rea ishte fillestar i vonshëm, por mësonte i shpejtë. Formoi një grup të quajtur Beautiful Losers - emër i marrë nga një roman i Leonard Cohenit, që ishte “aty ku unë isha mendërisht”. Heronjtë e tij muzikorë përfshinin artistët origjinalë të bluzit, si Blind Willie Johnson dhe Sister Rosetta Tharp, dhe kitaristët Ry Cooder, Joe Walsh dhe Eric Clapton.
Por, Fool (If You Think It’s Over) e futi atë në një rrugë të çuditshme, si një djalosh i pashëm me një zë tërheqës, dhe me një aftësi për të shkruar melodi të rrjedhshme dhe tekste që kanë mendim. “Drejtuesit e kompanisë diskografike donin vetëm zërin. Nuk mund të shkoja përtej kësaj”, më tha ai. Kishte një opinion edhe më të keq për drejtuesit e industrisë muzikore sesa për gazetarët. “Janë tmerrësisht të neveritshëm”, më tha me një buzëqeshje. “Nuk ka fjalë tjetër për ta, sepse kam kaluar një çerek shekulli me njerëz që më gënjejnë”.
Chris Rea(Foto: George Wilkes Archive/Hulton Archive)
Rea për shumë vite pati një karrierë mesatare, i tallur nga kritikët muzikorë dhe i nxitur nga drejtuesit e kompanive diskografike për të krijuar vazhdimësi të hitit të tij të vetëm ndërkombëtar. Megjithatë, në fund të të tridhjetave e gjeti disi ritmin e vet - me një stil më bluz, më të rëndë dhe më të pasur që nxori në pah mendimin dhe mjeshtërinë e tij. The Road to Hell ishte albumi që e shndërroi në superyll - kënga kryesore ishte një këngë ogurzezë dhe e zymtë për ngecjen në trafik. Ai e dinte saktësisht ku i erdhi ideja për këngën: “Në [rrugën] M4 kthehesh për të shkuar në M25, duke dalë nga Londra. Duhet të vendosin një pllakë të kaltër aty”.
I ngecur në trafik për katër orë e gjysmë, këngën e kompozoi në kokë duke përmbledhur gjendjen e çdo udhëtari të bllokuar, por duke i shtuar një frymë gospeli, thuajse kërkonte shpëtim nga ky ferr automobilistik. Kompania e tij diskografike fillimisht e refuzoi (“Kam një faks nga një prej ‘djemve të mëdhenj’ që thotë se Road to Hell do të dalë veç mbi trupin tim të vdekur”), por Rea nguli këmbë. Ajo ia dha atij hitin e parë numër një, në vitin 1989, kur ishte 38 vjeç.
Chris Rea bëri 25 albume në karrierën e tij, dhe pati shumë hite në stile të ndryshme, përfshirë I Can Hear Your Heartbeat, Stainsby Girls, Josephine, On the Beach, Let’s Dance dhe Julia. Pati një hit të madh - tashmë të përhershëm sezonal - në vitin 1988 me Driving Home For Christmas (një nga këngët e preferuara të Krishtlindjes për Cliff Richardin, siç më tha vetë Cliffi një herë).
Është ndoshta ironike që dy nga këngët më të mëdha të Reas ishin për udhëtime të gjata dhe të ngadalta me makinë, sepse ai ishte adhurues dhe koleksionues i makinave të shpejta. Shkroi dhe kompozoi muzikën për La Passione, në vitin 1996 - një film autobiografik për obsesionin e një djali me garat me makina. Ishte gjithashtu një piktor i talentuar në teknikën vaj në pëlhurë, dhe makinat ishin shpesh subjekt i pikturave të tij. Ai më tha se “kreativiteti nuk është talent, është gjendje”. Duhej të mbante veten të angazhuar, gjatë gjithë kohës. “Pikturoj, shkruaj, nuk ka asnjë moment, as edhe gjatë pushimeve familjare, që të mos jem duke bërë diçka”.
Nëse është kështu, gjendja e Reas ishte diçka që adhuruesit e tij e vlerësuan. Por, gjatë jetës vuajti shumë nga shëndeti, me episode të përsëritura të kancerit të pankreasit, ulcera stomaku dhe diabet. Një goditje në tru në vitin 2016 ishte pengesë e përkohshme, por u kthye shpejt në studio dhe në skenë. Pasioni i tij për muzikën dukej se rrezatonte nga ai.
Gjatë pasdites që kaluam së bashku, bëmë një shëtitje nëpër “Abbey Road”, ndërsa ai fliste me entuziazëm për muzikantët e mëdhenj të xhazit dhe bluzit, për stile të ndryshme të interpretimit në kitarë, dhe ndaluam shkurtimisht për të testuar jehonën në një dhomë të vogël ku Beatles (dhe siç theksoi Chris, edhe Cliff Richard) kishin incizuar vokalet. Isha me fat të dëgjoja atë zë të thellë, të rëndë, por ende të pasur, që më kthehej nga muret. Si shumë njerëz, do ta dëgjoj atë zë sërish gjatë Krishtlindjes - dhe për një kohë edhe më të gjatë.
***
Pesë këngët esenciale të Chris Reas
Nga: Ed Power Përkthimi: Telegrafi.com
1. I Can Hear Your Heartbeat (1983)
I Can Hear Your Heartbeat (1983)
Një nga këngët më të bukura të incizuara ndonjëherë, balada e ndjeshme e Reas fuqizohet nga vokalet që shkaktojnë dhembje përmes butësisë. Edhe pse Rea ishte më krenar për interpretimin e tij në kitarë dhe i shpërfillte hitet e tij pop, I Can Hear Your Heartbeat vërtetoi se kur ai hapte shpirtin, pak kompozitorë mund të shkaktonin emocione kaq të forta.
2. Fool (If You Think It’s Over) (1978)
Fool (If You Think It’s Over) (1978)
Një nga hitet e para të Reas, kjo këngë e ndarjes, thellësisht e çiltër, ishte prezantim i përkryer për një zë njëkohësisht të ashpër dhe ekspresiv, stoik dhe të ndjeshëm. Frymëzuar nga ndarja e motrës së tij, ishte sukses i ngadaltë i cili me kalimin e kohës e hodhi Rean në një nivel yllësie të cilin ai kurrë nuk e kishte kërkuar. U rrit duke ëndërruar të bëhej muzikant bluzi - dhe e kishte shkruar këngën duke e pasur në mendje këngëtarin e gospelit, Al Green. “Është e vetmja këngë ku nuk kam luajtur në kitarë, gjë që tregon diçka për shpirtin e saj. Për më tepër, ishte një hit i madh”, ka thënë ai. “Kështu që nuk kisha çfarë të bëja. Ishte sikur: ‘Ky nuk jam unë’”!
3. On the Beach (1986)
On the Beach (1986)
Kjo elegji medituese u keqkuptua gjerësisht kur u publikua, si një këngë e lehtë për dëgjim - muzikë ashensorësh e zbukuruar me interpretimin mjeshtëror të Reas në kitarë. Në të vërtetë, ishte një letër shpirtërore dashurie për bukurinë e natyrës, frymëzuar nga ishulli i Formenterës dhe kohët e lumtura që kaloi atje me bashkëshorten e tij, Joan. E rrjedhshme si një koktej i shijuar mbi shezlong dhe e ngrohtë si dielli i mbrëmjes, dhimbja e ëmbël e saj i dha cilësinë e një peizazhi të pikturuar me muzikë.
4. The Road to Hell (1989)
The Road to Hell (1989)
Rea nuk e kishte shijuar shumë jetën si yll popi - nuk e pëlqente idenë se ishte aty për të argëtuar publikun, në vend që të komunikonte me ta në një nivel muzikor. Ai i derdhi ato zhgënjime në albumin The Road to Hell - i konsideruar nga shumica si kryevepra e tij - dhe, në veçanti, në këngën me të njëjtin titull që shërben si një paralajmërim kundër paqëndrueshmërisë sociale dhe politikës përçarëse që Rea parashikonte se po vinte.
5. Driving Home for Christmas (1986)
Driving Home for Christmas (1986)
Rea u frymëzua për të shkruar këtë klasik festiv me tinguj bluzi, kur ai dhe bashkëshortja e tij mbetën të bllokuar në dëborë jashtë Notingemit, në dhjetor të vitit 1978. “Na ndodhte shpesh të ngecnim në trafik”, ka thënë ai. “Shikoja shoferët e tjerë, që dukeshin të gjithë po aq të dëshpëruar. Për shaka nisa të këndoj: We’re driving home for Christmas ... Pastaj, sa herë që dritat e rrugës ndriçonin brendësinë e makinës, fillova të shkruaja tekstin”. Në atë kohë, Rea po përpiqej të afirmohej si një muzikant serioz dhe kishte frikë se një këngë për Krishtlindje do ta kategorizonte si artist zbavitës. Vite më vonë, pasi kishte pushtuar industrinë muzikore, i riktheu ato vargje të shkruara dhe krijoi një këngë të zjarrtë dhe plot ndjenja që mbërthen ndjesinë thuajse universale të rikthimit në shtëpi te njerëzit e dashur. Shumica e këngëve moderne të Krishtlindjes shoqërohen me një dozë “boze” - por, këtë herë ishte një reflektim i thellë mbi kënaqësinë e ribashkimit me familjen.
Mesfushori i Barcelonës, Pedri, zhvilloi sezonin e tij më të mirë që nga problemet e shumta me dëmtimet që e shqetësuan për dy sezone radhazi, por pas një viti pa lëndime, ai po përballet sërish me probleme muskulore.
Blaugranasit do të jenë pa të në ndeshjen e fundit të vitit ndaj Villarrealit.
Pedri u rikthye në fushë më herët se sa ishte parashikuar këtë muaj, duke luajtur dy javë para afatit dhe duke u paraqitur në ndeshje vendimtare kundër Atletico Madridit, Real Betisit dhe Eintracht Frankfurtit.
Para përballjes me Villarrealin, Hansi Flick konfirmoi se do të mbetej sërish pa mesfushorin e tij më të mirë.
“Ai nuk do të jetë aty. Nuk jam i kënaqur për këtë. Ai është i dëmtuar. Pres që të rikthehet kundër Espanyolit. Ka probleme me muskujt e pasmë të kofshës”.
“Ai edhe mund të luajë, por rreziku është shumë i madh; nëse ndodh diçka, atëherë do të mungojë për dy muaj”.
Duke dhënë më shumë detaje mbi situatën, Flick shpjegoi se Pedri, nëse do të shtyhej deri në fund, mund të luante, por do të rrezikonte një dëmtim më serioz.
“Duhet të kujdesemi për të dhe të sigurohemi që të marrë trajtimin e duhur. Nuk mund të stërvitet, por është e pamundur të luajë. Vendosëm të mos marrim asnjë rrezik. Kjo është gjëja më e mirë për momentin”.
“Na duhet për ndeshjet e ardhshme në vitin e ri kundër Espanyolit dhe më pas për Superkupën. Kjo ndeshje ndaj Villarrealit është e rëndësishme, por kemi shumë cilësi në skuadër”, ka deklaruar gjermani./Telegrafi/
Trajneri i Barcelonës, Hansi Flick, ka hedhur dyshime mbi rinovimin e kontratës së tij, duke këmbëngulur se do të varet nga disa faktorë, veçanërisht nga prania e presidentit Joan Laporta pas zgjedhjeve të vitit të ardhshëm.
Kontrata e Flick është e vlefshme deri në vitin 2027 dhe Barcelona po kërkon ta zgjasë atë edhe për një sezon tjetër.
Megjithatë, trajneri gjerman ka thënë se rinovimi i kontratës së tij varet nga disa faktorë dhe kjo do të kuptohet në muajt në vazhdim.
“Një vit e gjysmë është një kohë e gjatë për një trajner. Jam shumë i lumtur që punoj në këtë klub, me Decon dhe të gjithë stafin. Stafi im është fantastik, Deco është i pabesueshëm dhe kam një marrëdhënie të shkëlqyer me të”, ka thënë fillimisht Flick.
“Jam këtu për shkak të presidentit dhe është e rëndësishme të kem besimin e tij. Për mua, edhe një vit e gjysmë është në rregull, por gjithashtu ka rëndësi për mua nëse presidenti është ende këtu. Nëse luajmë mirë dhe kemi sukses, kjo është e rëndësishme", përfundoi trajneri gjerman.
Ndryshe, Barcelona momentalisht është liderë në La Liga me katër pikë më shumë se Real Madridi i vendit të dytë, teksa në Ligën e Kampionëve renditet në pozitën e 15-të, ku kërkon të perfundojë në top 8 nga dy ndeshjet e mbetura në fazën e ligës. /Telegrafi/
Ka tension të madh në Barcelonë, por jo për shkak të asaj që ndodh në fushë, por për shkak të problemeve që po zhvillohen pas dyerve të mbyllura në dhomën e zhveshjes.
Për javë të tëra, informacionet konfidenciale nga takimet taktike të Barcelonës përfunduan në mënyrë misterioze në mediat spanjolle, duke shqetësuar seriozisht qetësinë e ekipit.
Sipas gazetarit Rafael Hernández në Twitter, trajneri Hansi Flick ka zbuluar tashmë se kush fshihet pas rrjedhjes së informacionit.
Metoda e zgjuar e Flick
Flick ndërmori një veprim të zgjuar për të identifikuar “spiunin” në dhomën e zhveshjes. Ai qëllimisht i dha informacion të rremë një lojtari që dyshonte se po rridhte detaje të brendshme. Kurthi ishte i thjeshtë: Flick përhapte lajmin se Wojciech Szczęsny do të luante në vend të Marc-André ter Stegen për ndeshjen e Kupës së Mbretit të martën.
Plani funksionoi. Ter Stegen mbajti portën në atë ndeshje, duke konfirmuar se informacioni i rremë kishte rrjedhur nga një rreth shumë i ngushtë brenda ekipit. Me këtë, sipas mediave, spiuni u zbulua.
Reagimi i klubit
Edhe pse Barcelona nuk ka komentuar zyrtarisht për këtë çështje, brenda klubit thuhet se është e qartë kush tradhtoi besimin e Flick.
Pritet që trajneri të ndërmarrë hapa konkretë në periudhën në vijim, duke marrë parasysh se rrjedhjet e vazhdueshme të informacionit kanë shqetësuar seriozisht stafin dhe kanë zemëruar trajnerët.
Një precedent i ngjashëm
Metoda e Flick kujton një rast të famshëm nga Liga Premier në vitin 2019. Coleen Rooney, gruaja e legjendarit Wayne Rooney, përhapi informacion të rremë përmes profilit të saj privat në Instagram për të zbuluar se kush po i kalonte detaje tabloideve.
Informacioni përfundimisht u gjurmua te Rebekah Vardy, gruaja e Jamie Vardyt, dhe çështja përfundoi në gjykatë, me një kompensim prej rreth 1.6 milion euro.
Në Barcelonë, një epilog i tillë nuk pritet, por është e qartë se Flick nuk do të tolerojë më tradhtinë e besimit brenda dhomës së zhveshjes. /Telegrafi/
Barcelona ka qenë e angazhuar në muajt e fundit në disa negociata kontratash dhe më e rëndësishmja prej tyre ende pritet të vijë.
Raphinha, Frenkie De Jong dhe Eric Garcia janë ndër lojtarët që kanë rinovuar qëndrimin e tyre në ‘Spotify Camp Nou’, ndërsa i radhës mund të jetë Hansi Flick.
Në fund të sezonit të kaluar, Flick nënshkroi një zgjatje kontrate njëvjeçare, e cila e mban atë në klub deri në verën e vitit 2027.
Aktualisht, atij i kanë mbetur edhe 18 muaj kontratë, por sipas BILD, Barcelona dëshiron të sigurojë që ai të mos hyjë në sezonin 2026/27 me më pak se një vit të mbetur në marrëveshje.
Barcelona shpreson të arrijë një zgjatje të re njëvjeçare me Flick, e cila do ta mbante atë në krye të ekipit deri në fund të sezonit 2027/28.
Negociatat mes palëve tashmë kanë nisur, me drejtorin sportiv Deco në rolin kryesor.
Flick është i lumtur te Barcelona dhe e sheh veten duke qëndruar si trajner i ekipit të parë të paktën deri në fund të sezonit të ardhshëm.
Megjithatë, ekzistojnë dyshime nëse ai është i gatshëm të nënshkruajë një tjetër zgjatje kontrate, pasi raportime të mëparshme kanë sugjeruar se synimi i tij është të tërhiqet nga futbolli në verën e vitit 2027./Telegrafi/
Klubi katalunas, Barcelona thuhet se është duke planifikuar një zgjatje tjetër të kontratës për trajnerin gjerman, Hansi Flick.
Pavarësisht një fillimi të luhatshëm të sezonit, Barça është qartësisht në rrugën e duhur me gjashtë fitore radhazi, duke ruajtur stilin e tyre agresiv të futbollit.
Flick i ka kapërcyer problemet e hershme me lëndimet dhe të metat sistematike dhe tani e ka vënë Barçën në rrugën e duhur për të përsëritur heroizmat e sezonit të kaluar.
Trajneri gjerman i frymëzoi Blaugranët drejt një triplete vendase në sezonin 2024/25, duke e lënë emrin e tij në nivelet e larta të historisë së klubit.
Ndërsa ai nënshkroi një zgjatje kontrate deri në vitin 2027 në fillim të këtij viti, presidenti i Barcelonës, Joan Laporta, po kërkon ta zgjasë qëndrimin e tij, gjë që tregon besimin e klubit te trajneri gjerman për të udhëhequr projektin e tyre afatgjatë.
Sipas gazetës gjermane Bild, Barcelona po planifikon të zgjasë kontratën e trajnerit Hansi Flick deri në vitin 2028.
Për më tepër, klubi katalunas po planifikon ta mbështesë Flick me më shumë nënshkrime verën e ardhshme. /Telegrafi/
Përveç Nico Schlotterbeck të Borussia Dortmund, Barcelona ka identifikuar edhe qendërmbrojtësin e Aston Villa, Pau Torres, si një objektiv të mundshëm transferimi.
Mbrojtësi spanjoll, i cili luan për Aston Villa nën drejtimin e Unai Emery që prej vitit 2023, raportohet se është i hapur për një rikthim në La Liga nëse klubi katalanas konkretizon interesimin.
Barcelona kishte tentuar ta afronte Torres edhe gjatë kohës kur ai ishte pjesë e Villarrealit.
Megjithatë, Schlotterbeck mbetet objektivi kryesor i trajnerit Hansi Flick, pasi mbrojtësi gjerman po kërkon një sfidë të re dhe nuk është i prirur të pranojë rinovimin e kontratës me Borussia Dortmund.
Pavarësisht interesit për përforcime, Barcelona duhet së pari të përmirësojë gjendjen financiare për të mundësuar afrime gjatë verës.
Largimi i emrave të mëdhenj, si Robert Lewandowski sezonin e ardhshëm, do t’i lejonte klubit të lironte hapësirë në buxhetin e pagave dhe të përshtatej me rregullat e Fair Play Financiar të La Ligës.
Nevoja për përforcime në mbrojtje është bërë edhe më urgjente pas vendimit të Ronald Araujo për të marrë një pushim të pacaktuar, me qëllim përqendrimin në shëndetin e tij mendor. /Telegrafi/
Barcelona tremb Inter, me ekipin blaugrana që ka vendosur në majën e listës së dëshirave një prej titullarëve të padiskutuar të ekipit zikaltër.
Sipas Diario Sport, drejtuesit e Barçës synojnë të sjellin në Spanjë qendërmbrojtësin “azzurr”, Alessando Bastoni.
Në sezonin e tij të dytë në Barcelonë, Hansi Flick, vijon të ketë probleme të theksuara në qendër të mbrojtjes, për këtë arsye kërkon me çdo kusht një lojtar ekspert, një mbrojtës që sjell garanci në prapavijë.
Bastoni vlerësohet si një nga mbrojtësit më të mirë në botë në rolin e tij, por për të arritur te Bastoni nuk është aspak e lehtë.
Inter vlerëson kartonin e “sallaksit” me 80 milionë euro, një shifër shumë e lartë në kushtet ku ndodhet klubi blaugrana, në vështirësi të madhe financiare.
I “zhytur” në borxhe, presidenti Laporta duhet të shpik ndonjë lëvizje për të realizuar këtë dëshirë të Hansi Flick.
Gjatë verës, Laporta është fillimisht i detyruar të shes, ose të ul shpenzimet në mënyrë që të jenë korrekt me rregullat e Fair Play Financiar.
Inter është në pozita komode në këto negociata pasi Bastoni ka një kontratë të vlefshme deri në qershor 2028.
Real Madridi po përgatit ndryshime të rëndësishme në afatin kalimtar dhe ka konfirmuar se Endrick nuk do të vazhdojë të jetë pjesë e skuadrës në ‘Santiago Bernabeu’.
Sulmuesi brazilian do të nisë një etapë të re në karrierën e tij, duke u huazuar te Olympique Lyon, me shpresën për të rikthyer besimin dhe minutat e lojës që i mungojnë te madrilenët.
Në Valdebebas e konsiderojnë huazimin si një vendim strategjik, duke synuar të ruajnë një investim të rëndësishëm dhe të shmangin uljen e mëtejshme të vlerës së lojtarit.
Operacioni është punuar me kujdes dhe diskrecion, dhe marrëveshja me Lyon është përfundimisht e mbyllur, pavarësisht ndryshimeve të mundshme në stolin e Real Madrid.
Roli i Endrickut te Real Madridi
Endrick nuk ka arritur të gjejë vendin e tij te Real Madrid dhe nuk është pjesë e planeve sportive afatshkurtra.
Me Carlo Ancelottin kishte një rol të kufizuar, i cili u zvogëlua edhe më shumë me ardhjen e Xabi Alonsos.
Gjatë sezonit, braziliani ka grumbulluar vetëm 22 minuta në La Liga dhe Ligën e Kampionëve, një tregues i qartë i mungesës së besimit dhe rolit të përcaktuar.
Minutat e tij të fundit kundër Manchester City u konsideruan thjesht një rastësi, jo një ndryshim real në situatë.
Gjithashtu, një episod i pahijshëm me kartonin e kuq dhe pezullimin dy ndeshjesh në La Liga për protestë nga stoli ka përshpejtuar vendimin për largimin e tij.
E ardhmja e tij me fanellën e Real Madrid pritet të mbyllet përkohësisht në Copa del Rey kundër Talavera.
Real Madridi kishte paguar rreth 60 milionë euro te Palmeiras për Endrick, një investim historik për potencialin e tij.
Megjithatë, performanca e tij nuk ka qenë në nivelin e pritur dhe vlera e tij në treg ka rënë ndjeshëm, duke u ulur nga 60 milionë në rreth 25 milionë euro. /Telegrafi/
Trajneri i Barcelonës, Hans-Dieter Flick, komentoi komentet e Real Madridit për gjyqtarët, duke cilësuar kritikat si diçka të padrejta.
Real Madridi me anë të televizionit të tyre Real Madrid TV vazhdon të bëjë presion ndaj gjyqtarëve, gjë që zakonisht zë vend në mediat botërore.
Megjithatë, kjo taktikë e tyre është kritikuar nga rivali i tyre, trajneri i Barcelonës, Flick, i cili ka thënë se kjo nuk është mënyra e tij.
“E dimë që gjyqtarët janë një pjesë e rëndësishme e lojës dhe nuk mund të luajmë pa ta”, ka thënë fillimisht Flick.
“Të gjithë bëjnë gabime. Duhet të përqendrohemi te vetja dhe të shohim se çfarë mund të bëjmë më mirë. Nuk dua të flas për të tjerët”.
“Ne duhet të ndërtojmë ekipin më të mirë të mundshëm dhe është e padrejtë të ushtrojmë presion shtesë mbi gjyqtarët. Kjo nuk është mënyra ime”, përfundoi gjermani.
Ndryshe, Barcelona është aktualisht në krye të tabelës së ligës spanjolle, me Real Madridin në vendin e dytë, me katër pikë më pak. /Telegrafi/
Trajneri i Barcelonës, Hansi Flick, ka folur për opsionet që ka ekipi në repartin ofensiv, pasi u pyet për alternativat e mundshme në rast se Robert Lewandowski mungon, duke theksuar rëndësinë e përgatitjes dhe fleksibilitetit të skuadrës përpara përballjes ndaj Guadalajara në Kupën e Mbretit.
Tekniku gjerman pranoi se stafi teknik i kushton vëmendje të vazhdueshme këtij aspekti, duke nënvizuar se Barcelona ka disa lojtarë që mund të luajnë në rolin e sulmuesit qendror.
“Ne gjithmonë mendojmë për këtë. E dimë që ka lojtarë që mund të luajnë si numër 9 dhe e analizojmë vazhdimisht këtë mundësi. Kjo është puna jonë”, ka thënë Flick.
Ai përmendi konkretisht Fermin Lopez, Marcus Rashford dhe Ferran Torres si lojtarë të aftë për të mbuluar këtë pozicion, përveç Lewandowskit, duke shtuar se ka edhe alternativa të tjera brenda skuadrës.
“Ka edhe lojtarë të tjerë që janë të aftë të luajnë në këtë rol”, shtoi Flick, duke vënë në pah thellësinë e skuadrës dhe opsionet që ka në dispozicion për ndeshjen e ardhshme të Barcelonës ndaj Guadalajaras në Kuadër të Kupës së Mbretit. /Telegrafi/
Portieri gjerman Marc-Andre ter Stegen nuk ka ndërmend të heqë dorë nga kontrata e tij aktuale me Barcelonën, e vlefshme deri në vitin 2028.
Marc-Andre ter Stegen e ka të qartë pozicionin e tij.
Pavarësisht se prej kohësh Barcelona i ka lënë të kuptohet se mund të largohet, lojtari nuk ka asnjë synim të ndërpresë marrëveshjen përpara afatit.
Sipas Mundo Deportivo, në mendjen e tij vazhdon të jetë prioritet respektimi i kontratës deri në fund.
Sidoqoftë, i vetëdijshëm se aktualisht është pothuajse e pamundur të rrëzojë Joan Garcia nga roli i titullarit, gjermani ka nisur të shqyrtojë seriozisht opsionin e një huazimi në janar.
Vendimi i tij do të varet në masë të madhe nga ajo që do të ndodhë në ndeshjen e Kupës së Mbretit, ku Barça përballet këtë të martë me Deportivo Guadalajara.
Nëse Hansi Flick i jep mundësinë të luajë dhe i konfirmon rolin si zëvendësuesi kryesor, pritet që ter Stegen të qëndrojë.
Në të kundërt, nëse Flick zgjedh Wojciech Szczesny, do të kërkojë një largim të përkohshëm.
Faktorët vendimtarë
Prania e Kupës së Botës 2026 në horizont është thelbësore për të kuptuar qëndrimin e portierit gjerman.
Ter Stegen e di se do të jetë shumë e vështirë të sigurojë një vend në përfaqësuesen e Gjermanisë pa asnjë minutë loje gjatë sezonit.
“Gjermani ka folur tashmë me Flick. Një bisedë private, që mbetet mes tyre, siç tha edhe trajneri. Ai e di se për të shkuar në Botëror duhet të luajë. Te Barça e ka të vështirë dhe është i vetëdijshëm për këtë”, përmbledh Mundo Deportivo.
Natyrisht, për drejtuesit e klubit katalanas zgjidhja ideale do të ishte një transferim përfundimtar, por as lojtari nuk është i gatshëm të heqë dorë nga kontrata e nënshkruar, as nuk ka klube të interesuara të paguajnë një shumë transferimi.
Edhe zgjidhja e prishjes së kontratës nuk është e favorshme, pasi Barça do të duhej t’i paguante pjesën e mbetur të pagës.
Në këto kushte, vetëm një huazim mund të lehtësojë pjesërisht një situatë që mbetet e ndërlikuar dhe pa zgjidhje të shpejtë. /Telegrafi/
Login
Chris Rea(Foto: Samir Hussein/Redferns)
Chris Rea(Foto: George Wilkes Archive/Hulton Archive)
