Presidentja e Kosovës, Vjosa Osmani dhe kryeministri në detyrë Albin Kurti, kanë reaguar pas aksidentit tragjik hekurudhor në Spanjë, ku deri tani raportohet se kanë humbur jetën 39 persona dhe dhjetëra të tjerë u plagosën.

Osmani, ka shprehur ngushëllime dhe mbështetje për popullin spanjoll.

“Lajme zemërthyese nga jugu i Spanjës pas një aksidenti tragjik hekurudhor që ka marrë shumë jetë dhe ka lënë shumë të tjerë të lënduar. Ngushëllimet tona më të sinqerta për familjet që kanë humbur më të dashurit e tyre dhe urimet për shërim të shpejtë për të gjithë të plagosurit. Kosova qëndron në solidaritet me popullin e Spanjës në këtë kohë të vështirë”, ka shkuar Osmani në “X”.

Kryeministri në detyrë Kurti gjithashtu shprehu pikëllimin e tij përmes një postimi, duke theksuar solidaritetin me viktimat dhe familjarët e tyre:

“Jemi thellësisht të pikëlluar nga lajmet që vijnë nga Spanja për aksidentin tragjik të trenit që mori shumë jetë njerëzish. Mendimet tona janë me viktimat dhe familjet e tyre, ndërsa ekipeve të shpëtimit u urojmë forcë në përpjekjet e tyre”, ka shkruar Kurti.

Autoritetet spanjolle po vazhdojnë operacionet e shpëtimit dhe hetimet për shkaqet e aksidentit, ndërsa reagime ngushëllimi kanë ardhur nga liderë të shumtë botërorë. /Telegrafi/

Të paktën 39 persona kanë humbur jetën dhe 12 të tjerë janë në kujdes intensiv pasi dy trena u përplasën në Spanjën jugore të dielën në mbrëmje, në atë që kryeministri, Pedro Sánchez, e quajti "një natë dhimbjeje të thellë për vendin".

Sipas raportimeve, një tren me shpejtësi të lartë i Iryo që udhëtonte nga Malaga në Madrid doli nga shinat pranë komunës Adamuz në provincën e Kordobas rreth orës 7.40 të mbrëmjes së së dielës, duke kaluar në shinën tjetër ku goditi një tren që po vinte përballë.

Treni i dytë, i cili operohej nga kompania shtetërore hekurudhore, Renfe, gjithashtu doli nga shinat dhe ra në një argjinaturë, thanë autoritetet.

"Rreth 300 persona ishin në bord në kohën e aksidentit", ka thënë Iryo.

Guardia Civile dhe zjarrfikësit po punojnë intensivisht në vendngjarje për të evakuuar të gjithë pasagjerët dhe kanë ngritur një ekip të përbashkët reagimi ndaj emergjencave.

Të hënën në mëngjes, shërbimet e emergjencës në Andaluzi thanë se 122 persona ishin trajtuar për lëndimet e tyre dhe 48 persona ishin ende në spital, nga të cilët 12 ishin në njësitë e kujdesit intensiv, përcjell Telegrafi.

“Ka shumë të lënduar - ende po dridhem”, ka thënë për El País, María San José, 33 vjeçe, një pasagjere në trenin që doli i pari nga shinat.

Një dëshmitar tjetër i tha transmetuesit publik RTVE se një nga vagonët e trenit të parë ishte përmbysur plotësisht.

Një pasagjer i paidentifikuar në trenin e dytë - i cili po shkonte nga Madridi në Huelva - i tha transmetuesit publik TVE: “Kishte njerëz që bërtisnin, çantat e tyre ranë nga raftet. Po udhëtoja për në Huelva me vagonin e katërt – të fundit, për fat të mirë”.

Shefi i zjarrfikësve të Kordobas, Paco Carmona, i tha TVE se ndërsa Iryo ishte evakuuar brenda pak orësh nga aksidenti, vagonët e Renfe ishin dëmtuar rëndë, me metal dhe sedilje të shtrembëruara.

“Ka ende njerëz të bllokuar. Operacioni po përqendrohet në nxjerrjen e njerëzve nga zonat që janë shumë të ngushta”, tregoi ai. “Duhet të nxjerrim trupat për të arritur te kushdo që është ende gjallë. Po rezulton të jetë një detyrë e ndërlikuar”.

Ndërsa ministri i transportit i Spanjës, Óscar Puente, theksoi se shkaku i aksidentit ende nuk ishte përcaktuar.

Duke folur në një konferencë për shtyp në stacionin Atocha në Madrid, ai shtoi se ishte "shumë e çuditshme" që një dalje nga shinat të kishte ndodhur në një pjesë të drejtë të binarit. Ky seksion i binarit u rinovua në maj, tregoi ai.

Puente bëri të ditur se shumica e të vrarëve dhe të plagosurve kishin qenë në dy vagonët e parë të trenit të dytë.

Ndërkohë, një gazetar nga transmetuesi publik RNE, i cili po udhëtonte në një nga trenat, tha se impakti ishte ndjerë si një tërmet.

Pasagjerët kishin përdorur çekiçë emergjence për të thyer xhamat e vagonëve dhe për të dalë jashtë, tha ai.

Raportet e mediave spanjolle sugjeruan se 400 persona kishin qenë në dy trenat.

Imazhet televizive lokale treguan një qendër pritjeje të ngritur për pasagjerët në Adamuz, një qytet me 5,000 banorë, me vendasit që sillnin ushqim dhe batanije ndërsa temperaturat e natës luhateshin në rreth 6 gradë Celsius.

Adif ka pezulluar të gjitha shërbimet hekurudhore midis Madridit dhe Andaluzisë.

Aksidenti hekurudhor më vdekjeprurës në Spanjë këtë shekull ndodhi në korrik 2013, kur një tren që udhëtonte me 179 km/orë doli nga shinat në një pjesë të binarëve me një shpejtësi maksimale prej 50 km/orë në rajonin veriperëndimor të Galicisë, duke vrarë 80 persona. /Telegrafi/

Disa pamje të publikuara në rrjetet sociale që vijnë nga vendi i ngjarjes pas një aksidenti vdekjeprurës që përfshinte trena me shpejtësi të lartë në Spanjën jugore, tregojnë punonjësit e emergjencës në vendngjarje.

Incidenti ndodhi pranë qytetit të Adamuz, pasi një tren me shpejtësi të lartë që udhëtonte nga Malaga në Madrid doli nga shinat dhe u përplas në një shinë fqinje, sipas operatorit të rrjetit hekurudhor.

Një tren i dytë që udhëtonte në drejtim të kundërt doli gjithashtu nga shinat.

Dhe sipas raportimeve të fundit, numri i personave të vdekur është rritur në 39.

Përveç tyre, raportohet edhe për rreth dhjetëra të tjerë të lënduar, me rreth 70 prej tyre në spital.

Siç theksohej më tej, një tren që udhëtonte nga Malaga për në Madrid me rreth 300 pasagjerë doli nga shinat pranë Kordobas në orën 7.45 të mbrëmjes të së dielës, sipas kohës lokale, sipas operatorit hekurudhor ADIF.

Ai u përplas me një tren me rreth 200 pasagjerë që po vinte nga Madridi për në Huelva. /Telegrafi/

Numri i personave të vdekur nga një aksident kur një tren doli nga shinat dhe u përplas me një tjetër në Spanjë është rritur në 39, sipas shërbimeve të emergjencës, shkruan Sky News.

Përveç tyre, raportohet edhe për rreth dhjetëra të tjerë të lënduar, me rreth 70 në spital, përcjell Telegrafi.

Ndërkohë ishte raportuar se pesëmbëdhjetë persona janë lënduar rëndë, katër prej të cilëve janë fëmijë.

Siç theksohet më tej, një tren që udhëtonte nga Malaga për në Madrid me rreth 300 pasagjerë doli nga shinat pranë Kordobas në orën 7.45 të mbrëmjes të së dielës, sipas kohës lokale, sipas operatorit hekurudhor ADIF.

Ai u përplas me një tren me rreth 200 pasagjerë që po vinte nga Madridi për në Huelva.

Shkaku i aksidentit është i panjohur, por ministri i transportit i Spanjës, Oscar Puente, e quajti atë "një incident vërtet të çuditshëm", duke vënë në dukje se ndodhi në një pjesë të sheshtë të binarëve që ishte rinovuar në maj.

Një hetim për shkakun e aksidentit mund të zgjasë rreth një muaj. /Telegrafi/

Dhjetë persona raportohet se kanë vdekur nga dalja e trenit nga shinat në Spanjë, sipas mediave spanjolle.

Më shumë se 25 persona janë plagosur rëndë, sipas shërbimeve të emergjencës në Andaluzi.

Incidenti ndodhi rreth orës 19:40 sipas orës lokale.

Një tren që udhëtonte nga Malaga për në Madrid, me 317 persona në bord, doli nga shinat dhe kaloi në shinat ngjitur, ku edhe një tren tjetër doli nga shinat, shkruajnë mediat e huaja, përcjell Telegrafi.

Ministri i transportit i Spanjës, Oscar Puente, ka dhënë më shumë informacione në lidhje me aksidentin në X, duke thënë se informacioni i fundit që vjen është 'shumë serioz'.

Sipas Puente, vagonët e fundit të trenit Iryo që udhëtonte për në Madrid dolën nga shinat dhe "pushtuan" shinat e kundërta.

Në atë moment po kalonte një tren Renfe, që shkonte drejt Huelvas.

"Përplasja ka qenë e tmerrshme, duke bërë që dy njësitë e para të trenit Renfe të hidheshin përtokë si rezultat," tha ai.

"Numri i viktimave nuk mund të konfirmohet në këtë kohë. Prioriteti themelor tani është ndihma ndaj të lënduarve".

Ndërkohë, Juanma Moreno, presidenti i Andaluzisë, ka dhënë më shumë detaje ekipeve mjekësore të angazhuara në zonë.

Sipas tij, struktura mjekësore në terren, po trajton pasagjerët e lënduar, ofron shërbime shëndetësore dhe po stabilizon të lënduarit para se të transferohen në spital.

"Solidariteti dhe mbështetja jonë për të gjithë të prekurit", tha ai në X. /Telegrafi/

(E plotësuar) Mediat e huaja tanimë raportojnë për shtatë persona të vdekur pas daljes së trenave nga shinat në Spanjë.

Një numër i panjohur njerëzish janë ende të bllokuar, me punonjës të emergjencës në vendngjarje.Pesë persona kanë vdekur dhe një numër i panjohur njerëzish janë bllokuar pas daljes nga shinat të dy trenave në Spanjë.

----------

Të paktën pesë të vdekur pas daljes nga shinat të dy trenave në Spanjë

Sipas mediave të huaja, përcjell Telegrafi, dy trena me shpejtësi të lartë dolën nga shinat të dielën në Spanjën jugore, sipas operatorit hekurudhor ADIF.

Kanali televiziv shtetëror RTVE tha se aksidenti ndodhi në Adamuz, pranë Kordobas, duke cituar burime policore.

Siç bëhet e ditur më tej, kishte 300 pasagjerë në trenin Iryo nga Malaga, sipas RTVE.

Shumë prej tyre arritën të largoheshin vetë pas aksidentit.

Të gjitha shërbimet e emergjencës dhe zjarrfikësve tani janë përqendruar në vagonin e dalë nga shinat, i cili ishte i fundit në tren.

Përveç daljes nga shinat, dritaret u thyen, duke shkaktuar shumë lëndime.

- YouTube www.youtube.com

Óscar Puente, ministri i transportit i Spanjës, tha se po monitoron situatën.

Garda Civile i tha organizatës së lajmeve se ka disa persona të lënduar dhe të bllokuar dhe se personeli i emergjencës po punon aktualisht në vendngjarje. /Telegrafi/

Të paktën 32 persona kanë humbur jetën dhe 66 të tjerë janë lënduar pasi një vinç ndërtimi ra mbi një tren në lëvizje në Tajlandën verilindore.

Vinçi nxori trenin nga shinat dhe shtypi disa nga vagonët e tij, njëri prej të cilëve u përfshi nga flakët, transmeton Telegrafi.

Një njëvjeçar dhe një 85-vjeçar janë midis të plagosurve, ndërsa shtatë persona janë në gjendje kritike, sipas autoriteteve.

Zyrtarët thonë se rreth 171 pasagjerë kishin qenë në tren kur ndodhi aksidenti rreth orës 09:00.

Hekurudha shtetërore e Tajlandës ka nisur një hetim për incidentin, dhe njoftoi se po ndërmerr veprime ligjore kundër kompanisë së ndërtimit përgjegjëse për vinçin.

Italo-Thai Development Public Company Limited tha se shprehu keqardhje dhe se do të ofronte kompensim dhe ndihmë për familjet e atyre që vdiqën ose u lënduan.

Treni po udhëtonte nga Bangkoku në provincën verilindore Ubon Ratchathani kur ndodhi aksidenti, duke transportuar kryesisht nxënës dhe punëtorë që udhëtonin për në shkollë dhe punë në rrethe të tjera.

Media lokale The Nation raportoi se incidenti ndodhi ndërsa vinçi po ngrinte një pjesë të madhe betoni e cila ra mbi tren, duke shkaktuar daljen nga shinat e disa vagonëve.

Një i mbijetuar, anëtari i stafit të trenit Thirasak Wongsoongnern, i tha medias lokale se ai dhe pasagjerët e tjerë u hodhën në ajër pasi vinçi ra mbi ta. /Telegrafi/

Tre persona kanë marrë lëndime trupore një aksident i cili ka ndodhur sot rreth orës 13:50 mes trenit dhe një veture në fshatin Grabovc të Poshtëm.

Lajmin për Telegrafin e ka konfirmuar zëdhënësja e Policisë së Kosovës për rajonin e Prishtinës, Flora Ahmeti.

Ahmeti tha se me rastin po merret Njësiti i Trafikut Rajonal.

“Rreth orës 13:50 kemi pranuar informatën për një aksident trafiku në fshatin Grabovc i poshtëm. Në këtë aksident ka qenë i përfshirë një tren dhe një automjet . Si pasojë e aksidentit, tre persona kanë marrë lëndime trupore . Me rastin po merret Njësiti i Trafikut Rajonal”, ka thënë Ahmeti. /Telegrafi/

BRUKSEL, 7 janar /ATSH-DPA/- Komisioni Evropian ka dhuruar rreth 40,000 bileta treni për udhëtim falas nëpër Evropë për të rinjtë që festuan ditëlindjen e tyre të 18-të, vitin e kaluar.

“Dyzet vjetori i zonës së udhëtimit të lirë, Shengen vitin e kaluar shërbeu si një rast i veçantë për shpërndarjen e biletave”, njoftoi sot komisioni në Bruksel.

Fituesit mund të udhëtojnë nëpër Evropë deri në 30 ditë. Periudha e mundshme e udhëtimit shtrihet nga marsi 2026 deri në maj 2027.

Për më tepër, ekziston një kartë me zbritje çmimi për transporte të tjera publike, si dhe oferta kulturore, akomodimi dhe të tjera në 36 vende evropiane.

Programi filloi në vitin 2018 dhe dhuron mijëra bileta dy herë në vit. //a.i/

The post BRUKSEL – BE dhuron 40,000 bileta treni për të udhëtuar nëpër Evropë appeared first on Agjencia Telegrafike Shqiptare.

PARIS, 31 dhjetor /ATSH-ANSA/ – Kompania hekurudhore Eurostar njoftoi këtë mëngjes rifillimin e shërbimeve midis Londrës dhe kontinentit pasi një problem teknik ndërpreu operacionet për disa orë, por paralajmëroi për ndërprerje të mundshme.

“Ne planifikojmë të rifillojmë të gjitha shërbimet tona sot, por për shkak të ndikimit të vazhdueshëm, mund të ketë vonesa dhe anulime të minutës së fundit”, sipas faqes zyrtare të internetit të Eurostar.

Dje, mijëra pasagjerë përjetuan një makth përpara natës së Vitit të Ri kur shërbimi i trenit me shpejtësi të lartë Eurostar që lidh Londrën me kryeqytete të tjera të mëdha – Parisin, Brukselin dhe Amsterdamin – u pezullua për disa orë.

Shkaku ishte një ndërprerje e energjisë elektrike në Tunelin e Kanalit, së bashku me ndërprerjen e një treni LeShuttle që transportonte pasagjerë dhe automjete, duke ndërprerë kështu të gjithë linjën.

Eurostar njoftoi një rifillim të pjesshëm të shërbimeve vetëm këtë pasdite, por ndërkohë, dhjetëra trena janë anuluar, shumë prej të cilëve mbërrijnë dhe nisen nga stacioni ndërkombëtar St Pancras i Londrës.   /os/

The post PARIS – Eurostar rifillon të gjitha shërbimet midis Londrës dhe kontinentit appeared first on Agjencia Telegrafike Shqiptare.

Një skenë e pazakontë është filmuar me kamerë amatore në qytetin italian Varese.

Bëhet fjalë për drerin që u kap duke vrapuar nëpër një stacion treni, transmeton Telegrafi.

Trenat u ndalën pasi ndërhyrësi me brirë të gjatë vrapoi shkurt përgjatë shinave përpara se të hidhej në një platformë dhe të vraponte drejt daljes.

Trenat u ndalën për arsye sigurie derisa dreri u pa duke vrapuar shkurtimisht përgjatë shinave përpara se të hidhej në një platformë dhe të vraponte drejt daljes.

Kjo bëri që autoritetet të intervenojnë menjëherë për ta larguar drerin me qëllim që të vazhdojnë rrugëtimin trenat që ishin planifikuar të nisen. /Telegrafi/

Të paktën 13 persona kanë vdekur dhe dhjetëra të tjerë po trajtohen për lëndimet e tyre pasi një tren doli nga shinat në Meksikë, thanë autoritetet.

Aksidenti ndodhi të dielën midis qyteteve Chivela dhe Nizanda në shtetin jugor të Oaxacas, në një linjë që lidh Oqeanin Paqësor me Gjirin e Meksikës, përcjell Telegrafi.

Rreth 250 persona, përfshirë 241 pasagjerë dhe nëntë anëtarë të ekuipazhit, ishin në bord, sipas detajeve të publikuara nga Marina Meksikane, e cila kontrollon rrugën.

Të paktën 13 persona gjetën vdekjen, tha marina, me 98 të plagosur - përfshirë 36 që kishin nevojë për ndihmë mjekësore spitalore.

Presidentja Claudia Sheinbaum bëri të ditur në një postim në X se pesë nga të lënduarit janë në gjendje kritike.

Gjatë operacioneve të gjera të kërkim-shpëtimit, marina tha se kishte vendosur një total prej 360 personash, 20 automjete, katër ambulanca tokësore dhe tre ambulanca ajrore.

Një hetim për incidentin është hapur, tha Prokurorja e Përgjithshme Ernestina Godoy Ramos në një postim në mediat sociale. /Telegrafi/

Një aksident ka ndodhur sot (12 dhjetor) në afërsi të Tregut të Madh në Prishtinë, ku një tren ka përplasur një veturë në vendkalimin e trenit pas tregut.

Nga pamjet e siguruara nga lexuesit e Telegrafit, duket qartë momenti i përplasjes.

Aksidenti raportohet të ketë ndodhur rreth orës 14:30.

Telegrafi ka kontaktuar me Policinë për informacion shtesë dhe mbetet në pritje të detajeve të mëtejshme mbi shkaqet e incidentit dhe nëse ka të lënduar. /Telegrafi/

Një tren është përplasur me një makinë të hënën në periferinë perëndimore të Hinsdale, Illinois - duke e lënë shoferin e makinës të lënduar.

Sipas mediave të huaja, përcjell Telegrafi, aksidenti ndodhi rreth orës 11:34 të paradites në kalimin hekurudhor të Rrugës Monroe, sipas Departamentit të Policisë së Hinsdale.

Aksidenti u filmua në video, të cilën policia e Hinsdale e publikoi në rrjetet sociale.

- YouTube youtube.com

Videoja tregon makinën duke u ngjitur në kryqëzim me pjesën e përparme pak mbi shina dhe duke u kthyer pak prapa përpara se të goditej nga treni.

Pas kësaj, thuhet se treni mbeti “mekanikisht i paaftë” dhe pasagjerët në tren do të transferoheshin në një tren tjetër.

Shoferi i makinës u dërgua në Spitalin e Hinsdale me lëndime shumë të lehta, tha policia. /Telegrafi/

Udhëtimi me tren zakonisht ka të bëjë me kalimin e kohës, shikimin nga dritarja ose bisedën me pasagjerët e tjerë.

Por për një grup udhëtarësh, një udhëtim normal me tren u shndërrua në një moment të papritur muzikor.

Një video e ndarë nga grupi indian Stone Keys, tregon se si një vagon treni u shndërrua në një koncert gjatë udhëtimit të tyre nga Ahmedabad në Lucknow.

Videoja tani është bërë virale, duke mbledhur mbi 18 milionë shikime në Instagram, transmeton Telegrafi.

Duke ndarë videon, Stone Keys përshkroi në mbishkrimin se si një udhëtim tipik papritmas u shndërrua në një mini-koncert.

Ata thanë se gjatë udhëtimit nga Ahmedabad në Lucknow, një atmosferë e gëzueshme u zhvillua në tren pa asnjë përgatitje.

Mbishkrimi i postimit shkruante: "Gjatë rrugës nga Ahmedabad në Lucknow, dhe po, ne përfunduam duke krijuar një atmosferë të tërë në tren".

Videoja tregonte disa pasagjerë duke nxjerrë telefonat e tyre për të regjistruar seancën e drejtpërdrejtë të improvizimit.

Disa madje iu bashkuan grupit ndërsa ata performuan këngën popullore "Inteah Ho Gayi Intezaar Ki" nga kënga "Sharaabi" me Amitabh Bachchan të vitit 1984.

Videoja mori një reagim të madh në mediat sociale, ku njerëzit vlerësuan transformimin e ndarjes së trenit në një mini-koncert.

Amazon Music India gjithashtu komentoi me shaka se edhe ata po mbërrinin në stacionin tjetër. /Telegrafi/

Dy trena u përplasën pranë Ceske Budejovice në Republikën Çeke duke lënë pesë persona të plagosur rëndë dhe dhjetëra të tjerë me lëndime të lehta.

Treni ekspres R 658 goditi trenin e pasagjerëve Os 8053 midis stacioneve Zlivi dhe Divcice, duke i detyruar autoritetet të ndalonin trafikun hekurudhor në linjë dhe të organizonin shërbime zëvendësuese me autobusë.

Hekurudhat Çeke konfirmuan përplasjen e dy trenave të saj, kur shërbimet zakonisht transportojnë udhëtarë që shkojnë në punë.

Shtatë ekipe shpëtimi dhe një helikopter iu përgjigjën vendit të aksidentit.

Hetuesit e hekurudhave kanë mbërritur në vendin e aksidentit për të përcaktuar se çfarë e shkaktoi përplasjen.

Jan Kucera, Inspektori i Përgjithshëm i Inspektimit Hekurudhor, tha se po shqyrtojnë nëse incidenti ka rezultuar nga një gabim njerëzor, një defekt teknik apo probleme sistemike. /Telegrafi/

Një tren pasagjerësh u përplas me një tren mallrash në Indinë qendrore, duke vrarë të paktën 11 persona.

Një nga vagonët e pasagjerëve përfundoi sipër një vagoni nga treni i mallrave.

Pas orësh përpjekjesh, ekipi i shpëtimit e uli vagonin në tokë dhe përdori prerës hekuri për ta hapur, duke gjetur tre trupa të pajetë.

Rreth 20 persona u lënduan në aksident dhe po marrin trajtim në spitalet lokale.

Në një deklaratë, operatori i rrjetit Indian Railways tha se ka filluar një hetim për shkakun e aksidentit.

Gjithashtu njoftoi ndihmë financiare për familjet e të ndjerëve dhe të plagosurve.

Ndryshe, përplasjet e trenave nuk janë të rralla në Indi.

Më shumë se 12 milionë njerëz udhëtojnë çdo ditë me 14,000 trenat e Indisë, të cilët kalojnë 64,000 kilometra shina.

Pavarësisht përpjekjeve të qeverisë për të përmirësuar sigurinë hekurudhore, disa qindra aksidente - disa prej të cilave vdekjeprurëse - ndodhin çdo vit dhe shpesh i atribuohen gabimit njerëzor ose sistemeve të sinjalizimit të vjetëruar. /Telegrafi/

Kompania e hekurudhave Trainkos Sh.A. ka njoftuar se studentët mund të përfitojnë zbritje prej 50% në udhëtimet me tren, por vetëm nëse plotësojnë disa kushte të përcaktuara nga kompania.

Sipas njoftimit, studentët duhet të posedojnë ID kartelën e fakultetit për vitin akademik aktual ose fletëpagesën e semestrit për vitin përkatës.

Gjithashtu, studentët e diplomuar (absolventët) që janë të liruar nga pagesat duhet të kenë vërtetim nga fakulteti që dëshmon statusin e tyre për vitin akademik përkatës.

Në rastet kur studentët nuk kanë ID kartelë nga fakulteti, ata duhet të sigurojnë një vërtetim zyrtar nga fakulteti që dëshmon statusin e tyre si studentë.

Nga kompania Trainkos bëhet e ditur se këto kërkesa kanë për qëllim të sigurojnë transparencë dhe verifikim të saktë të statusit të studentëve që përfitojnë nga lehtësia e udhëtimit.

“Falënderojmë studentët për mirëkuptimin dhe bashkëpunimin e tyre,” thuhet në njoftimin e Departamentit të Transportit të Udhëtarëve të Trainkos Sh.A.

Ky vendim synon të lehtësojë udhëtimet e studentëve drejt qyteteve të ndryshme të Kosovës, duke mbështetur qasjen më të lirë dhe të qëndrueshme në transport publik. /Telegrafi/

Turqia do të lansojë nëntë komplete trenash elektrikë vendas dhe një tren me shpejtësi të lartë vitin e ardhshëm.

Sipas mediave të huaja, përcjell Telegrafi, qëllimi kryesor për vitin e ardhshëm është të projektohen dhe prodhohen automjete të sistemit hekurudhor për transport duke përdorur mjete dhe burime vendase për të rritur raportin e përmbajtjes së prodhuar vendase në komponentët kryesorë.

Programi përfshin kërkimin dhe zhvillimin (R&D) e kapaciteteve të prodhimit vendas dhe prodhimin e të gjitha llojeve të automjeteve dhe nënkomponentëve të sistemit hekurudhor, plus mirëmbajtjen dhe riparimet.

Prokurimet publike do të përfitojnë prodhimin vendas të sistemeve hekurudhore, ndërsa aktivitetet e projektimit dhe R&D do të inkurajohen me programin e ri.

Siç theksohet më tej, prodhuesi turk i automjeteve hekurudhore Turasas po punon në projektimin vendas dhe prototipimin e automjeteve vendase për të përmbushur nevojat e sektorit hekurudhor.

Prototipi i trenit të parë vendas me shpejtësi të lartë thuhet se është i aftë të arrijë një shpejtësi maksimale prej 225 kilometrash në orë (140 milje në orë). Projekti do të përfundojë vitin e ardhshëm.

Ndërkohë, janë gjithashtu në zhvillim e sipër rreth nëntë komplete trenash elektrikë të prodhuar në vend, që arrijnë shpejtësi deri në 160 km/orë (99 mph). Turasas do të ofrojë gjithashtu rreth 30 lokomotiva kombëtare kryesore elektrike.

Programi i vitit 2026 i jep përparësi transportit hekurudhor dhe detar për të minimizuar ndikimin dhe kostot mjedisore, duke siguruar njëkohësisht efikasitetin e energjisë në sektorët e transportit dhe logjistikës. /Telegrafi/

Komisioni Evropian prezantoi të mërkurën një plan për të ulur ndjeshëm kohën e udhëtimit me tren midis qyteteve kryesore evropiane deri në vitin 2040, me qëllim uljen e nevojës për fluturime të shkurtra.

"Përmirësimi i kohëzgjatjes së udhëtimit midis kryeqyteteve në të gjithë Evropën është një rezultat i prekshëm dhe pragmatik i vullnetit tonë për ta bërë Evropën më të bashkuar dhe më efikase", tha Zëvendëspresidenti i Komisionit Evropian, Raffaele Fitto.

Plani synon të lidhë qytetet e mëdha me shpejtësi prej 200 km/orë ose më shumë, shkruajnë mediat e huaja, përcjell Telegrafi.

Kështu, pasagjerët do të jenë në gjendje të udhëtojnë nga Berlini në Kopenhagen në 4 orë në vend të 7 orëve aktuale.

Veç kësaj, koha e udhëtimit nga Sofja në Athinë do të shkurtohet nga 13 orë e 40 minuta që është aktualisht në 6 orë, dhe Vjena dhe Berlini do të lidhen me një udhëtim që zgjat 4 orë e 30 minuta në vend të 8 orë e 10 minutave aktuale.

Për ta arritur këtë, komisioni dëshiron që shtetet anëtare të koordinojnë afatet kohore përtej kufijve, të zhvillojnë strategji financimi, të përmirësojnë kushtet e investimeve dhe të krijojnë një sistem ndërkufitar biletash dhe rezervimesh.

Komisioni theksoi se transporti hekurudhor aktualisht përbën 0.3% të emetimeve në sektorin e transportit. Transporti rrugor përbën 73.2% dhe aviacioni civil 11.8%. /Telegrafi/