Pavarësisht shtrëngimit të ndjeshëm të politikave të imigracionit nga qeveria e koalicionit të CDU/CDU dhe Socialdemokratëve në Berlin, këtë vit janë lëshuar më shumë se 100.000 viza për bashkim familjar. Kjo sipas shifrave nga Ministria e Jashtme, të raportuara së fundmi.

Sipas të dhënave nga Ministria e Jashtme, 101.756 viza u dhanë deri në fund të nëntorit për pesë kombësitë me më shumë aplikime.

Më së shumti vizat u dhanë për turqit (14.907) dhe sirianët (13.148), të ndjekur nga qytetarë nga India (9.286), Kosova (7.143) dhe Shqipëria (4.426).

E drejta për bashkimin familjar në Gjermani kryesisht vlen vetëm për familjen bazë, që do të thotë bashkëshortët/et dhe fëmijët e mitur.

E drejta për bashkimin familjar në Gjermani përgjithësisht vlen vetëm për familjen bazë, që do të thotë bashkëshortët/et dhe fëmijët e mitur.

Ekzistojnë përjashtime për raste të vështira dhe, që nga një reformë në mars 2024, edhe për prindërit dhe vjehrrit e profesionistëve dhe punëtorëve të kualifikuar me kualifikim të lartë që mund të sigurojnë në mënyrë të pavarur jetesën e të gjithë familjes.

Në korrik, qeveria gjermane e CDU/CSU dhe SPD e pezulloi ribashkimin familjar për dy vjet për personat me status mbrojtjeje të kufizuar - ndryshe nga refugjatët e njohur.

Vetëm në "raste të vështira" atyre u lejohet ende të sjellin bashkëshortët/et e tyre, fëmijët e mitur si edhe, në rastin e të miturve të pashoqëruar, prindërit e tyre në Gjermani./Deutsche Welle/

Sot, në varrezat e Rimanishtës, u varros me nderime ushtarake dhe me pjesëmarrje të lartë qytetare Jahja Mustafa, babai i Sali Mustafës – Calit.

Në emër të familjes dhe shokëve, veprimtari Valon Murati mbajti fjalimin përshëndetës.

“Jemi mbledhur për t’i dhënë lamtumirën e fundit një njeriu të dashur, një familjari të mirë, një babai të përkushtuar, i cili një pjesë të madhe të jetës së tij, duke qenë se e gjithë familja – në krye me Calin tonë të dashur – ka qenë e angazhuar në veprimtarinë patriotike, natyrisht që ka qenë edhe vetë i përfshirë. Shtëpia e tij ka qenë një prej bazave më të rëndësishme në Prishtinë.

Kur humbim një njeri të dashur, humbim diçka edhe nga vetja jonë. Ne varrosim edhe një pjesë të vetes sonë.

Dhimbja është e madhe, por sot ajo është e trefishtë. Është e trefishtë sepse po humbim bacën Jah, një njeri të dashur, i cili ka dhënë kontribut dhe shtëpia e të cilit ka qenë shtëpi e madhe e lirisë së Kosovës. Por po ndjejmë dhimbje edhe sepse Cali nuk është këtu. Nuk e kemi djalin e tij, shokun tonë të dashur, një nga njerëzit më kontribuues për lirinë që e gëzojmë sot.

Dhimbja është edhe më e madhe sepse ai nuk është këtu për shkak të një padrejtësie të madhe që po na shkaktohet. Një padrejtësi që e bën dhimbjen edhe më të rëndë. Cali nuk është këtu sepse është dënuar në mënyrë të padrejtë, fatkeqësisht nga një gjykatë e padrejtë, e cila flet në emrin tonë, por nuk vepron në emrin tonë.

Ai nuk është këtu edhe pse është dënuar padrejtësisht. Me asnjë rregull dhe me asnjë parim ndërkombëtar nuk do të duhej t’i ndalohej të vinte dhe ta shihte babanë e tij në shtratin e vdekjes. Po ashtu, nuk do të duhej të ndalohej që të ishte sot këtu, në këtë ditë të fundit, dhe të ndahej me babanë e tij me dinjitet”.

Kongresisti republikan, Mike Lawler, ka thënë se mbështetja e Shteteve të Bashkuara për Kosovën mbetet e “fortë dhe dypartiake” në Kongresin amerikan, në një letër dërguar kryeministrit në detyrë, Albin Kurti.

Në letër, të cilën Qeveria në detyrë e publikoi të premten në Facebook, thuhet: “Veprimet e fundit legjislative, duke përfshirë miratimin e Ligjit për Autorizimin e Mbrojtjes Kombëtare për vitin fiskal 2026, nënvizojnë përkushtimin e vazhdueshëm të Amerikës ndaj së ardhmes euro-atlantike të Kosovës”.

Përpjekjet e tilla, thuhet tutje në letër, janë të domosdoshme për promovimin e stabilitetit afatgjatë, sigurisë dhe sundimit të ligjit në mbarë Ballkanin Perëndimor.

Ai po i referohej një Aktit për Autorizimin e Mbrojtjes Kombëtare, që u nënshkrua në ligj nga presidenti Donald Trump, javën e kaluar, në të cilin Kosovës dhe Serbisë gjithashtu u kërkohet ta zbatojnë marrëveshjen për normalizimin e marrëdhënieve nga viti 2023.

Kjo letër vjen pasi Lawler e kishte takuar Kurtin gjatë vizitës së tij në Uashington në shtator, për çka e falënderoi në letër.

Komentet e kongresistit republikan vijnë në një kohë kur marrëdhëniet mes Kosovës dhe SHBA-së pësuan goditje gjatë vitit 2025, kryesisht për shkak të vendimeve të Kurtit për ta shtrirë sovranitetin në veriun e banuar me shumicë serbe pa bashkërendim me bashkësinë ndërkombëtare.

Madje këto veprime çuan në pezullimin paafat të një dialogu të planifikuar strategjik mes dy vendeve.

Kurti i ka arsyetuar këto veprime si në përputhje me Kushtetutën dhe ligjet e Kosovës dhe së voni ka thënë se marrëdhëniet me SHBA-në “janë shumë të mira” dhe që mospajtimet kryesore kanë pasur të bëjnë gjithmonë lidhur me Serbinë dhe strukturat e saj, dhe asnjëherë për çështje bilaterale.

Më 11 dhjetor, Kurti tha, po ashtu, se sa u përket mbrojtjes dhe sigurisë, raportet “kurrë nuk kanë qenë më të mira”.

Ndërmarrja publike Trainkos Sh.A. ka njoftuar se ka ndërmarrë hapa konkretë për shlyerjen e një pjese të konsiderueshme të obligimeve ndaj Administrata Tatimore e Kosovës (ATK), në vlerë prej 206,343.72 euro.

Në një njoftim zyrtar të dërguar stafit dhe përfaqësuesve sindikalë, kryeshefi ekzekutiv i Trainkos, Agron Statovci, bën të ditur se këto mjete janë siguruar përmes kursimeve të realizuara nga masat për menaxhim racional të shpenzimeve. Me këtë pagesë synohet të mbulohen kontributet e papaguara për rreth 15 muaj, të trashëguara nga ish-menaxhmenti për periudhën 2020–2022 dhe janar–prill 2023.

Sipas të dhënave zyrtare, në momentin e marrjes së menaxhimit, obligimet e Trainkos ndaj ATK-së përbëheshin nga: Obligime bazë: 633,235.34 euro, ndëshkime: 218,194.88 euro, interes: 227,575.13 euro

Kjo e çon totalin e borxhit ndaj ATK-së në 1,079,005.35 euro.

Në njoftim theksohet se, përveç borxheve tatimore, ekzistojnë edhe obligime ndaj operatorëve ekonomikë, si pasojë e keqmenaxhimit të periudhave të kaluara. Po ashtu, rikujtohet se në vitin 2020 linja hekurudhore Fushë Kosovë – Hani i Elezit ka qenë e mbyllur për shkak të rehabilitimit, ndërsa operimi ka vazhduar me numër të njëjtë trenash, duke ruajtur fluks të pandryshuar të shërbimeve.

Trainkos bën të ditur se gjatë vitit 2024 punonjësit kanë përfituar rritje pagash, bazuar në vendimin e Bordit të Drejtorëve, të miratuar më 30 shtator 2025. Rritja përfshin 30 euro shtesë në pagën bazë për të gjithë punonjësit dhe 2.5 euro shtesë për çdo ditë pune, deri në një maksimum prej 85 euro.

Kryeministri Albin Kurti, shoqëruar nga partnerët qeverisës, Albert Kinolli dhe Sejnur Veshall, takoi të rinj nga komuniteti rom.

Në një bashkëbisedim të ngrohtë, Kurti tha se këta të rinj vlerësuan që sllogani i PRBK-së “Është koha jonë”, merr kuptim të plotë vetëm shoqëruar nga ai i Lëvizjes Vetëvendosje, “Mos lësho pe”.

"Në këtë frymë, u theksua edhe një herë se fitorja edhe më të madhe më 28 dhjetor, si dhe vazhdimësia e projekteve zhvillimore e ndërtimi j shoqërisë gjithëpërfshirëse, arrihet vetëm me mbështetjen e secilit qytetar", thuhet në njoftimin e LVV-së.

Paneli Zgjedhor për Ankesa dhe Parashtresa (PZAP) ka pranuar ankesat e subjektit politik Lidhja Demokratike e Kosovës (LDK) dhe ka gjobitur subjektin politik Lëvizja Vetëvendosje (LVV) me 6,000 euro për shkelje të Kodit të Mirësjelljes gjatë fushatës zgjedhore.

Sipas vendimit të datës 25.12.2025, PZAP ka shqiptuar gjobën ndaj LVV-së për shkak të përdorimit të burimeve publike për qëllime elektorale nga kandidatët e saj për deputetë.

Vendimi vjen pas shqyrtimit të ankesave të LDK-së me numra ZP.Anr.41/2025, ZP.Anr.43/2025 dhe ZP.Anr.45/2025.

Në arsyetim thuhet se kandidatja Arbëre Nagavci ka shfrytëzuar zyrën e saj si ministre në detyrë në Ministrinë e Arsimit, Shkencës dhe Teknologjisë për fushatë zgjedhore, ndërsa kandidati Hysen Durmishi ka përdorur pronën publike në rastin e një aktiviteti në Mitrovicë për përfitim elektoral.

PZAP ka konstatuar se këto veprime përbëjnë shkelje të Ligjit për Zgjedhjet e Përgjithshme, përkatësisht nenit 36, paragrafi 1, si dhe dispozitave të Rregullores Zgjedhore Nr.07/2024 që rregullojnë fushatën zgjedhore, monitorimin dhe deklarimin financiar.

LVV obligohet që gjobën prej 6,000 eurosh ta paguajë brenda 15 ditëve nga dita e plotfuqishmërisë së këtij vendimi.

Hotelet në Durrës kanë përfunduar përgatitjet për festat e fundvitit. Interesi për të kaluar natën e Krishtlindjes dhe ndërrimin e viteve është i lartë, ndërsa këtë vit vihet re një prani më e madhe e turistëve të huaj që kanë zgjedhur Durrësin për këto festa.

Sipas operatorëve turistikë, kapacitetet e hoteleve në zonën e plazhit janë ezauruar në rreth 90 për qind të kapacitetit të tyre.

“Këtë vit kemi një risi, që viti i ri ka pasur një kërkesë të lartë të huajsh për të festuar në Shqipëri. Pra kemi 90% të rezervimeve janë nga shtetas të huaj, të cilët janë shtetas bullgarë, gjerman, por edhe anglez. Gjëja e veçantë është që kemi një grup nga Amerika, prej rreth 40 personash, të cilët kanë vendosur të festojnë vitin e ri në Shqipëri”, tha Blerim Norja, operator turistik.

Hoteleritë janë përgatitur me programe të veçanta artistike dhe festive për t’i ofruar një atmosferë të veçantë klientëve.

“Ajo gjëja që është më interesante dhe që tërheq më shumë është tradita shqiptare, pasi mënyra se si ne festojmë dhe mënyra se si ne organizojmë është 100% traditë. Pra, kemi menunë tonë të pa negociueshme, pra menu tradicionale shqiptare që nuk mungon kurrë bakllavaja, gjeli i detit, byrek me qumësht… por dhe mënyra se si orgaziojmë festën që është muzikë shqiptare, valle shqiptare dhe kostume tradicionale shqiptare. Pra, çdo gjë 100% traditë”, shton Norja.

Durrësi vijon të forcohet si një destinacion turistik ndërkombëtar, duke tërhequr vizitorë nga vende të ndryshme të botës.

Kulinaria, traditat dhe mikpritja mbeten ndër vlerat më të vlerësuara nga turistët e huaj./Tv Klan

Nënkryetari i PDK-së dhe i dyti në listën zgjedhore për zgjedhjet e 28 dhjetorit, Uran Ismaili, i ftuar në emisionin Debat Plus në RTV Dukagjini, ka folur për klimën politike në vend dhe pritjet nga zgjedhjet e ardhshme.

Ismaili tha se qeverisja aktuale ka instaluar një klimë të thellë polarizimi, e cila, sipas tij, ka depërtuar edhe brenda familjeve kosovare. Ai theksoi se përçarja nuk ka qenë vetëm politike, por ka prekur çdo zë ndryshe në shoqëri.

“Ky konflikt nuk ka qenë vetëm me partitë politike, por me këdo që ka pasur mendim ndryshe – shoqërinë civile, mediat, intelektualët, sociologët apo ekonomistët. Nëse nuk ke menduar njëjtë, je sulmuar,” tha Ismaili.

Sipas tij, Bedri Hamza përfaqëson të kundërtën e kësaj qasjeje.

Ai vlerësoi se Hamza ka pasur gjithmonë rol bashkues dhe ka punuar për krijimin e konsensusit në vend.

“Z. Hamza çdo herë ka pasur rol në drejtim të krijimit të konsensusit dhe bashkimit,” u shpreh Ismaili.

Ai shtoi se kjo është një nga arsyet kryesore pse qytetarët sot po kërkojnë stabilitet dhe normalitet politik, si dhe politika që përmirësojnë mirëqenien e familjeve.

Ismaili theksoi se besimi i qytetarëve ndaj Bedri Hamzës lidhet edhe me pritjet për ulje të çmimeve, politika që lehtësojnë barrën e faturave të energjisë elektrike, rritje pagash dhe investime që përmirësojnë strukturën ekonomike të vendit.

“Të gjitha këto janë iniciativa që e shtyjnë Kosovën përpara,” përfundoi Ismaili.

Presidentja e Kosovës, Vjosa Osmani, pas takimit me zëvendëssekretarin amerikan të Shtetit, Christopher Landau, bëri të ditur se shumë shpejt në Washington do ta nënshkruajnë edhe heqjen reciproke të vizave me Bahamas, shtetin që së fundmi e njohu shtetësinë e Kosovës.

“Vazhduam në Bahamas ku morëm njohjen nga ky shtet. Lidhjen e marrëdhënieve diplomatike dhe po ashtu kemi arritur dakordim me kryeministrin e Bahamas për heqjen reciproke të vizave që është një lajm shumë i mirë dhe kjo marrëveshje do të nënshkruhet së shpejti këtu në Washington D.C”, deklaroi Osmani pas takimit me zëvendëssekretarin amerikan të Shtetit.

Bahamas është bërë shteti i 121-të që e njeh Kosovën si shtet të pavarur dhe sovran, ka njoftuar presidentja Vjosa Osmani të premten e 19 dhjetorit.

Ajo ka bërë të ditur se në kryeqytetin e Bahamas ka nënshkruar marrëveshjen dypalëshe për njohje dhe vendosje të marrëdhënieve diplomatike me ishullin që gjendet në Karaibe.

“Kur shteti bllokohet, qytetet si Suhareka mbeten pa investime, projekte dhe përkrahje”, ka deklaruar i pari i LDK-së, njëherësh kandidati për Kryeministër Lumir Abdixhiku, gjatë tubimit në Suharekë.

Ai kritikoi çasjen e qeverisë në detyrë karshi zhvillimit, dhe jo vetëm.

“Viti i fundit ka qenë vit i bllokadës institucionale, ndërsa pesë vitet e fundit kanë qenë vite të humbura për Kosovën. Institucionet janë paralizuar. Vendimmarrja është bllokuar”, tha ai.

Abdixhiku po ashtu potencoi se konfliktet politike dhe shkeljet kushtetuese kanë prodhuar pasiguri.

Gjykata Supreme, ka shfuqizuar dispozita të Statutit dhe të Rregullores së UP-së për shkak të shkeljes së parimit të barazisë dhe meritokracisë.

"Kolegji i Gjykatës Supreme e ka aprovuar si të bazuar padinë e B.P., nga P., e paraqitur kundër të paditurit: Universiteti i Prishtinës “Hasan Prishtina”. Është shpallur i paligjshëm dhe është shfuqizuar neni 153 paragraf 3 dhe 4 i Statutit të Universitetit të Prishtinës (UP). Është shpallur i paligjshëm dhe është shfuqizuar neni 7 paragraf 6 i Rregullores nr.2/254, për Procedurat Vlerësuese për Angazhimin e Bashkëpunëtorëve të Jashtëm në Universitetin Prishtinë", njofton Supremja.

Gjykata Supreme pas shqyrtimit të nenit 153 paragraf 3 dhe 4 të Statutit të Universitetit të Prishtinës dhe nenit 7 paragraf 6 të Rregullores nr. 2/254, për Procedurat Vlerësuese për Angazhimin e Bashkëpunëtorëve të Jashtëm në Universitetin e Prishtinës, ka konstatuar se dispozitat e sipërcituara janë të paligjshme.

Gjykata vlerëson se këto dispozita vendosin ndalesa absolute dhe automatike për angazhimin e kandidatëve që kanë familjarë të punësuar ose të angazhuar në njësinë akademike përkatëse, pa një vlerësim dhe identifikim konkret të konfliktit të interesit. Kjo qasje shkel parimet e barazisë, meritokracisë, dhe ndalimin e diskriminimit të garantuara me Kushtetutë.

Duke pasur parasysh se Ligji Nr. 04/L-037 për Arsimin e Lartë dhe Ligji Nr. 06/L -011 për Parandalimin e Konfliktit të Interesit, parashikojnë mekanizma proporcionale dhe të rastit për shmangien e konfliktit të interesit, masat e parashikuara me Statut dhe Rregullore janë jo proporcionale, jo të nevojshme dhe cenojnë të drejtat e individëve për të konkurruar dhe për të ushtruar funksione akademike. Në këtë mënyrë, Gjykata arrin në përfundimin se neni 153 paragraf 3 dhe 4 i Statutit të UP-së dhe neni 7 paragraf 6 i Rregullores nr. 2/254 duhet të shfuqizohen.

Gjykata vlerëson se dispozitat e kontestuara tejkalojnë qëllimin legjitim të parandalimit të konfliktit të interesit dhe nepotizmit, duke vendosur ndalesa të përgjithshme dhe absolute, pa marrë parasysh rrethanat konkrete të rastit.

Gjithashtu, Gjykata vlerëson se këto dispozita bien ndesh me parimin mundësive të barabarta për të gjithë individët për të konkurruar për pozita akademike, si dhe me parimet e meritokracisë dhe transparencës në procesin e angazhimit, të garantuara me nenin 7 të Ligjit Nr. 08/L-197 për Zyrtarët Publik dhe me nenin 2 të Ligjit Nr. 04/L-037 për Arsimin e Lartë. Përjashtimi i automatizuar i kandidatëve për shkak të lidhjeve familjare krijon një diskriminim të drejtpërdrejtë, duke cenuar të drejtën e individit për të ushtruar funksione akademike në mënyrë të barabartë dhe sipas meritës.

"Gjykata thekson se nepotizmi dhe konflikti i interesit nuk janë nocione identike, dhe se ekzistenca e një lidhjeje familjare, në vetvete, nuk përbën automatikisht nepotizëm. Nepotizmi presupozon favorizim të padrejtë në procesin vendimmarrës, ndërsa në rastin konkret, dispozitat e kontestuara parandalojnë në mënyrë paraprake dhe absolute edhe situata në të cilat nuk ekziston asnjë ndikim real apo i mundshëm në procesin e vlerësimit", thuhet në komunikatëne Supremes.

Kandidati për deputet nga LDK, Berat Rukiqi, ka reaguar sërish lidhur me gjendjen ekonomike dhe sektorin e prodhimit në Kosovë, duke theksuar rënie të ndjeshme të qarkullimit të bizneseve prodhuese.

“Edhe njëherë për Hekuranin. Shiko pak qarkullimin e bizneseve që prodhojnë. Ka rënie në raport me vitin e kaluar”, ka shkruar Rukiqi.

Sipas tij, qarkullimi i këtyre bizneseve ka shënuar një ulje prej rreth 200 milionë euro, që përkthehet në −9% krahasuar me vitin 2024, duke rënë nga 1.9 miliardë euro në 1.7 miliardë euro.

Rukiqi e ka paraqitur këtë të dhënë si tregues shqetësues për ekonominë dhe prodhimin vendor.

Xhavit Haliti është një nga themeluesit e UÇK-së.

Pas goditjeve politike ndaj krerëve të luftës nga Gjyka ta Speciale, ai mbetet i vetmi ish-anëtar i Shtabit të Përgjithshëm të UÇK-së që garon për deputet të Kuvendit të Kosovës, nga radhët e PDK-së, me numrin 14.

Gjatë luftës çlirimtare, roli i tij ishte vendimtar në diplomaci.

Xhavit Haliti ishte ura lidhëse mes UÇK-së dhe diplomacisë ndërkombëtare, duke ndërtuar kontakte të drejtpërdrejta me diplomatë amerikanë dhe evropianë, në një kohë kur fati i Kosovës vendosej në tavolina të mëdha.

Rëndësia e tij strategjike u konfirmua edhe në proceset gjyqësore në Hagë ndaj krerëve të UÇK-së, kur John Duncan, ish-këshilltar i ish-komandantit suprem të NATO-s, Wesley Clark, e cilësoi Xhavit Halitin si person me rëndësi të veçantë për NATO-n, duke kërkuar që çdo diskutim për të të zhvillohej në seancë të mbyllur.

Është përshkallëzuar situata në protestën e opozitës në bulevardin Dëshmorët e Kombit në kryeqytet.

Protestuesit kanë hedhur molotov në derën e kryeministrisë gjatë fjalës së liderit demokrat Sali Berisha.

Pas kësaj janë shtuar forcat policore në protestë.

Forcat Shqiponja dhe FNSH i bashkohen forcave të rendit.

Protestuesit kanë tërhequr gardhin që policët kishin vendosur para turmës së protestuesve, para kryeministrisë

Shoqërohet nga policia një protestues që hodhi molotov drejt kryeministrisë.

Protesta ka nisur në orën 18:00 dhe sipas pjesëmarrësve nuk dihet se sa do të zgjasë./A2 CNN

Prokuroria suedeze në bashkëpunim me Prokurorinë Speciale të Kosovës, kanë kryer një operacion ndaj një personi i dyshuar për krim të organizuar, pastrim të parave dhe përdorim të lëndëve narkotike.

Një person është arrestuar të enjten në zonën e Göteborgut, në kuadër të një operacioni të gjerë kundër krimit të organizuar, të zhvilluar nga disa institucione shtetërore suedeze. I dyshuari ndodhet tani në paraburgim dhe akuzohet për vepër penale trafikim të narkotikëve si dhe për pastrim parash.

Paralelisht me arrestimin në Suedi, janë kryer kontrolle dhe bastisje në Kosovë, ku me mbështetjen e policisë dhe prokurorisë janë sekuestruar pasuri të konsiderueshme, përfshirë prona të paluajtshme, shuma të mëdha parash të gatshme dhe një automjet.

Sipas autoriteteve suedeze, gjatë operacionit janë siguruar prova edhe në Suedi, përfshirë objekte me vlerë dhe materiale digjitale, të cilat do të shërbejnë për vazhdimin e hetimeve dhe analiza më të thelluara të rrjedhave financiare.

Operacioni i koordinuar është realizuar në bashkëpunim të ngushtë me Prokurorinë Speciale të Kosovës, bashkëpunim që autoritetet suedeze e kanë cilësuar si vendimtar për suksesin e aksionit.

“Jemi në ofensivë në punën për konfiskimin e pasurive dhe po përdorim legjislacionin e ri për të goditur asetet brenda dhe jashtë vendit. Bashkëpunimi me Prokurorinë Speciale të Kosovës ka qenë shumë profesional dhe me gatishmëri të plotë, gjë që na ka mundësuar të sekuestrojmë prona, para të gatshme dhe një automjet në këtë rast", ka deklaruar prokurori shtetëror Daniel Larson nga Autoriteti Suedez për Krime Ekonomike.

Autoritetet suedeze bëjnë të ditur se ndërhyrja e së enjtes është rezultat i një hetimi afatgjatë, ku kanë bashkëpunuar disa institucione me qëllim goditjen dhe pengimin e krimit të organizuar, si dhe konfiskimin e fitimeve të paligjshme, si brenda Suedisë ashtu edhe jashtë saj.

“Krimi nuk duhet të shpërblehet dhe nuk ka rëndësi nëse dikush përpiqet t’i fshehë fitimet kriminale jashtë vendit. Ne i gjejmë ato dhe synimi ynë është t’i konfiskojmë”, ka theksuar Tomas Stakeberg Jansson, shef i policisë në rajonin Perëndimor të Suedisë.

Hetimet paraprake po udhëhiqen nga prokurorët shtetërorë Daniel Larson nga Autoriteti për Krime Ekonomike dhe Håkan Larsson nga Njësia Kombëtare kundër Krimit Ndërkombëtar dhe të Organizuar (RIO), në kuadër të Prokurorisë Suedeze./Telegrafi/

Inspektorati Policor i Kosovës (IPK) ka arrestuar sot një zyrtar policor nën dyshimin për kryerjen e veprës penale “Marrje ryshfeti”, si dhe një qytetar, shtetas i Republikës së Serbisë, i dyshuar për “Dhënie ryshfeti”.

Sipas IPK-së, bazuar në hetimet fillestare, dyshohet se zyrtari policor, gjatë ushtrimit të detyrës zyrtare në Stacionin e Policisë Kufitare në Vërmicë, ka pranuar përfitim financiar për t’i mundësuar hyrjen në territorin e Republikës së Kosovës një qytetari të Serbisë, ndonëse këtij të fundit i ishte ndaluar paraprakisht hyrja në Kosovë.

Pas pranimit të informacioneve të para për rastin, hetuesit e IPK-së kanë nisur menjëherë hetimet me autorizim dhe në koordinim të ngushtë me Prokurorinë Themelore në Prizren.

Si rezultat i veprimeve hetimore dhe operative në terren, zyrtari policor është arrestuar dhe, me vendim të prokurorit kompetent, ndaj tij është caktuar masa e ndalimit për 48 orë.

Në lidhje me të njëjtin rast, është arrestuar edhe qytetari – shtetas i Republikës së Serbisë – ndaj të cilit është iniciuar procedurë penale për veprën “Dhënia e ryshfetit”, ndërsa edhe atij i është caktuar masa e ndalimit për 48 orë./Telegrafi/

Presidentja e Republikës së Kosovës, Vjosa Osmani, u takua me Zëvendës Sekretarin e Shtetit të Shteteve të Bashkuara të Amerikës, Christopher Landau.

Presidenca njofton se gjatë takimit, Presidentja Osmani shprehu mirënjohjen e popullit të Kosovës për nënshkrimin nga Presidenti Donald Trump të Ligjit për Autorizimin e Mbrojtjes Kombëtare (NDAA), për mbështetjen amerikane ndaj sovranitetit dhe integritetit territorial të Kosovës, për vizionin e Presidentit Trump që dialogu të bazohet në njohje reciproke ndërmjet Kosovës dhe Serbisë, për mbështetjen për anëtarësimin e Kosovës në NATO, si dhe për rritjen e investimeve strategjike ekonomike.

Presidentja Osmani foli poashtu edhe për zhvillimet e fundit, situatën e sigurisë në rajon, si dhe për rëndësinë e shtyrjes përpara të Dialogut Strategjik Kosovë–SHBA, si një platformë thelbësore për forcimin e partneritetit dypalësh dhe avancimin e bashkëpunimit në fushat me interes të përbashkët.

Presidentja theksoi përkushtimin e Kosovës ndaj aleancës me Shtetet e Bashkuara të Amerikës dhe gatishmërinë për të vazhduar punën e ngushtë me Administratën e Presidentit Trump, siç është reflektuar përmes heqjes së tarifave për produktet amerikane, marrëveshjes për shtetasit e vendeve të treta, linjëzimit me politikën e jashtme amerikane, harmonizimit të plotë të listës së organizatave të huaja terroriste me urdhrat ekzekutivë të Presidentit Trump, si dhe përmes veprimeve të tjera që dëshmojnë mbështetjen e Kosovës për Administratën e Presidentit Trump.

Në këtë takim, Presidentja ka ngritur çështjen e shkeljeve flagrante nga ana e Serbisë të të drejtave të shqiptarëve në Preshevë, Medvegjë e Bujanoc, duke kërkuar përkrahjen e Administratës Trump për këtë çështje.

"Sa i përket raporteve ndërmjet Kosovës dhe Serbisë, Presidentja shprehi mirënjohje ndaj politikës së qartë të Administratës Trump që dialogu duhet të bazohet në njohje reciproke dhe për faktin që janë përjashtuar idetë e rrezikshme për ndryshime të kufijve apo ndarje. Kjo qasje, shtoi ajo, është e domosdoshme, në mënyrë që të ruhet paqja e stabiliteti në rajonin tonë", vijon tutje njoftimi i Presidencës.

Në takim me Zëvendës Sekretarin Landau, që përbën takimin e dytë bilateral brenda këtij viti, Presidentja Osmani ritheksoi se Kosova do të vazhdojë të ecë përkrah Shteteve të Bashkuara të Amerikës, aleatin e përhershëm të Kosovës./Telegrafi/

Ka nisur rreth 20 minuta më vonë se orari i lajmëruar protesta e Partisë Demokratike para Kryeministrisë.

Kryedemokrati Sali Berisha i është bashkuar mbështetësve të mbledhur në bulevard duke ecur në këmbë nga selia e PD, i shoqëruar nga nënkryetarët Flamur Noka dhe Oerd Bylykbashi.

Ai është pritur me ovacione dhe thirrje “O Sali o hero, gjithë Shqipëria ty të do”, nga simpatizantët.

1400 forca policie janë angazhuar në terren për mbarëvajtjen e protestën së opozitës, për të cilën është lajmëruar vetëm orari i nisjes, ora 18:00 ndërsa nuk dihet sa do të zgjasë.

Policia ka njoftuar se për shkak të protestës e cila nis në orën 18:00 do të ketë kufizime në disa rrugë.

Sipas njoftimit parkimi në disa rrugë nuk do të lejohet që nga ora 14:00. Përkatësisht nuk lejohet parkimi në bulevardin ”Dëshmorët e Kombit”, në sheshin “Nënë Tereza, në rrugën “Ismail Qemali”, nga kryqëzimi i Rrugës së Elbasanit me rrugën “Ibrahim Rrugova”, në rrugën “Papa Gjon Pali II”, në bulevardin ”Zhan D’Ark” dhe bulevardin ”Bajram Curri”, nga kryqëzimi i Rrugës së Elbasanit me rrugën “Ibrahim Rugova”.

Gjithashtu nga ora 14:00 do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Më herë ambasada amerikane përmes një njoftimi të shpërndarë ka këshilluar personelin e saj të shmangë protestën.

“Një protestë është planifikuar të zhvillohet të hënën, më 22 dhjetor 2025, në orën 18:00. Protestuesit planifikojnë të mblidhen pranë godinës së Kryeministrisë, e vendosur në Bulevardin “Dëshmorët e Kombit”, midis Sheshit Nënë Tereza dhe Sheshit Skënderbej./Euronews Albania

Për dikë familja e për dikë zgjedhjet e 28 dhjetorit, janë arsye për të ardhur në Kosovë këtë fundvit. Për dallim prej ditëve të kaluara kur pritjet në pika kufitare ishin të gjata, këtë të hënë, në disa pika kufitare pritjet shkuan deri në 1 orë.Për dallim nga ditët e kaluara, kur pritjet në pikat kufitare shkuan deri në 10 orë, këtë të hënë situata ishte më e qetë.

Në pikën kufitare e cila vazhdimisht është më e frekuentuar nga mërgimtarët që vijnë në Kosovë, atë të Merdares pritjet ishin deri në 15 minuta.

Sipas zyrtarëve policor në këtë pikë, fluksi më i madh ishte gjatë së premtes e të shtunën. Ata që erdhën në Kosovë, thanë se nuk kanë pritur gjatë as në pika kufitare të tjera.

“Mirë kemi kaluar shumë mire pa probleme pritje s’ka pas kërku, jashtëzakonisht mirë..Vendlindja thotë shumë neve edhe për atë arsye çdo herë vijmë, jo vetëm për festa por edhe tjera herë..”, ka thënë Besim Bahtiri, qytetar.

“Rruga, udhëtimi u kanë shumë mirë, nuk kemi pas pengesa asgjë as kolona, perfekt.. I kam pas do familjar që kanë prit shumë por tash puna është tyre, do janë nis më herët menxi kanë prit, për fat s’ka pas..”, ka thënë një qytetar, Kristjan Raja.

Ndërkohë që disa nga ata patën ankesa për mungesë të energjisë elektrike.

“Tash bisedova me vllaun për me nxe shpin nuk kemi rrymë, prej dje.. Nuk ka prej Prizreni një fshat afër kufirit me Shqipërinë, gjithmonë ka edhe verës ka por është më pak se njerëzit harxhojnë më pak rrymë, dimrit është katastrofë..”, ka thënë Hashim Vejza, qytetar.

Meqë javën tjetër në Kosovë do të mbahen zgjedhjet e parakohshme parlamentare, për disa nga mërgimtarët kjo ishte arsyeja e ardhjes në Kosovë.

“Rrugës kemi kaluar mirë kemi ardhur prej Gjermanisë, jo s’ka pasur kolonë është krejt hapur… Po do të votojmë për atë kemi ardhur”, ka thënë Lavdim Gashi.

Sipas qendrës për menaxhimin kufitar gjatë së hënës, më së shumti pritje deri në 1 orë ka pasur tek pika kufitare Dheu i Bardhë./Tv Dukagjini/

- YouTube youtu.be

Gjykata Supreme e Dhomave të Specializuara të Kosovës ka hedhur poshtë kërkesën e ish-kryetarit të Kuvendit të Kosovës, Kadri Veseli, për lirim të përkohshëm.

Sipas njoftimit zyrtar të Speciales, më 19 dhjetor 2025, Paneli i Gjykatës Supreme, i përbërë nga gjykatësit Ekaterina Trendafilova (Kryegjykatëse), Kristinë van den Vajngart dhe Daniel Fransen, ka refuzuar kërkesën e Veselit për mbrojtje të ligjshmërisë, e cila ishte paraqitur në mënyrë konfidenciale në nëntor të këtij viti.

Kërkesa kishte të bënte me një vendim të Panelit të Gjykatës së Apelit, të datës 13 gusht 2025, përmes të cilit ishte konfirmuar vendimi i Trupit Gjykues për rrëzimin e kërkesës së Veselit për lirim të përkohshëm.

Me këtë vendim të fundit të Gjykatës Supreme, mbetet në fuqi refuzimi i lirimit të përkohshëm të Kadri Veselit, ndërsa procedurat gjyqësore ndaj tij vazhdojnë në Dhomat e Specializuara.