Komisioni Qendror i Zgjedhjeve ka përmbyllur procesimin e rezultateve preliminare nga zgjedhjet e jashtëzakonshme për Kuvendin e Kosovës të cilat u mbajtën më 28 dhjetor 2025. Sipas të dhënave preliminare të publikuara nga KQZ, pas numërimit të 100 për qind të vendvotimeve, Lëvizja Vetëvendosje renditet e para me 49.34 për qind të votave, apo 433,394 vota.

Partia Demokratike e Kosovës (PDK) është e dyta me 20.98 për qind, përkatësisht 184,318 vota, ndërsa Lidhja Demokratike e Kosovës (LDK) ka marrë 13.57 për qind, apo 119,201 vota. Aleanca për Ardhmërinë e Kosovës (AAK) ka siguruar 5.66 për qind të votave, me 49,698 vota, ndërsa Lista Serbe ka marrë 4.81 për qind, apo 42,235 vota. Ndërkaq, Nisma Socialdemokrate ka fituar 1.70 për qind, përkatësisht 14,957 vota.

Ndryshe, ndonëse procesimi i rezultateve preliminare ka përfunduar, procesi i numërimit po vazhdon edhe në Qendrat Komunale të Numërimit (QKN). Aty po zhvillohet numërimi i votave të kandidatëve për deputetë dhe verifikimi i rezultateve të subjekteve politike nga formularët e plotësuar në vendvotime pas numërimit të fletëvotimeve.

Deri më tani janë numëruar mbi 26 për qind të votave për kandidatët për deputetë nga zgjedhjet parlamentare të 28 dhjetorit. Rezultatet e publikuara mbeten preliminare dhe do të konsiderohen përfundimtare vetëm pas përmbylljes së të gjitha fazave të numërimit dhe certifikimit zyrtar nga KQZ.

The post KQZ përfundon procesimin e rezultateve preliminare, LVV-ja afër 50% appeared first on Albeu.com.

Detaje të reja kanë dalë nga ngjarja e rëndë e ndodhur në fshatin Piskupat të Pogradecit. Dyshohet se e mitura është abuzuar seksualisht nga një i moshuar me emrin Rrushan Selko, i cili kishte njohje familjare me familjen e të miturës.

Të afërmit e tij thonë se 67-vjeçari është baba i katër fëmijëve, madje është bërë gjysh, por se nuk kanë dijeni për rastin.

“Unë e njoh si burrë të mirë. Nuk di gjë fare, se çfarë ka ai, se di. Unë nuk kam marrë vesh asnjë gjë. Kur erdhi policia, i çova deri aty lart dhe ika. Vajzën e njoh, është fëmijë. Marrëdhënia e të dyja familjeve është shumë e mirë. Shkojnë e vijnë. Janë komshinj. Rrushani është pensionist, rri në shtëpi. Nuk dimë gjë fare, tani e morëm vesh. S’kemi dëgjuar ndonjëherë. Ai gruan e ka,” tha Adem Selko, kushëriri i autorit.

Të tjerë thonë se autori nuk njihej si njeri problematik madje se ishte familjar dhe i dashur.

“Ai personi është i mirë, nuk është aq i keq, nuk kam dëgjuar llaf të keq për të. Unë tani e mora vesh. Unë s’di gjë, u trondita. Njihet si burrë i mirë në fshat. Ne nuk kemi ndjerë asgjë. Familjen e vajzës nuk e njoh, ia kam idenë fare. Nga i njëjti fshat jemi, por nuk e di unë se çfarë bëjnë. Unë rri në shtëpinë time. Unë u trondita, po ai i mirë është. Nuk njihej si njeri problematik. Ai është familjar, ka 4 vajza. Është edhe gjysh, ka nipa, mbesa. Fëmijët i ka të martuar.”, tha Zybe Selko.

The post U arrestua për abuzim me të miturën/ Fqinjët të tronditur: Është baba i 4 vajzave, është bërë edhe gjysh appeared first on Albeu.com.

Personi që shihni në foto është 70-vjeçari Rushan Selko, i akuzuari për përdhunimin e 12-vjeçares në Pogradec.

Dyshohet se e mitura është abuzuar seksualisht me forcë nga një i moshuar me njohje familjare me familjen e të miturës. Rasti është evidentuar pasi vajza kishte ndryshime fizike, çka detyroi prindërit ta çonin në spital për ekzaminim.

Pas vizitës u konfirmua se e mitura ishte shtatzënë. Mësohet se i moshuari, i dyshuar rreth 70 vjeç e ka kërcënuar vazhdimisht të miturën për të mos treguar ngjarjen ndërsa policia ka bërë arrestimin e këtij të fundit. Aktualisht po kryhen veprimet hetimore dhe po merren në pyetje familjarët, ndërsa vajza ka pranuar ngjarjen në prani të psikologut.

I moshuari dyshohet se ka kryer mardhënie me të miturën në banesën e tij.

The post EMRI/ Përdhunoi 12-vjeçaren, ky është 70-vjeçari që u arrestua nga policia e Pogradecit appeared first on Albeu.com.

Këshilli i Ministrave ka vendosur kompensimin e të ardhurave mujore për pensionistët, sipas niveleve të tyre të pensionit dhe kategorive të ndryshme.

Masa do të hyjë në fuqi nga 1 janari 2026 dhe do të përballohet nga buxheti i shtetit.

Sipas vendimit:

Pensionistët me të ardhura deri në 40,000 lekë në muaj do të marrin deri në 1,800 lekë shtesë.

Pensionistët me të ardhura deri në 22,000 lekë në muaj do të marrin deri në 800 lekë shtesë.

Pensionistët me të ardhura deri në 18,000 lekë në muaj do të marrin deri në 1,000 lekë shtesë.

Pensionistët me pension invaliditeti do të marrin deri në 600 lekë.

Pensionistët me pension familjar do të marrin deri në 700 lekë.

Kompensimi llogaritet në mënyrë që shuma totale e pensionit dhe shtesave të mos kalojë vlerat e parashikuara për secilën kategori. Shuma totale për këtë masë arrin rreth 9.8 miliardë lekë, përfshirë edhe shpenzimet administrative.

V E N D I M
PËR
KOMPENSIMIN E TË ARDHURAVE MUJORE TË PENSIONISTËVE

Në mbështetje të nenit 100 të Kushtetutës, të nenit 5, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, të ligjit nr.115/2024, “Për buxhetin e vitit 2025”, të ndryshuar, dhe të ligjit nr.87/2025, “Për buxhetin e vitit 2026”, me propozimin e ministrit të Ekonomisë dhe Inovacionit, Këshilli i Ministrave

V E N D O S I:

1. Përfitojnë kompensim të të ardhurave mujore deri në 1 800 (një mijë e tetëqind) lekë në muaj personat me të ardhura deri në 40 000 (dyzet mijë) lekë në muaj në datën 31.12.2025, sipas kategorive të mëposhtme:

a) Personat që përfitojnë pension pleqërie të plotë të caktuar sipas ligjit nr.4171, datë 13.9.1966, “Për sigurimet shoqërore në Republikën Popullore të Shqipërisë”, të ndryshuar;
b) Personat që përfitojnë pension pleqërie të plotë urban, pension pleqërie si nënë me shumë fëmijë urban dhe pension të reduktuar të pleqërisë, me datë lindjeje të së drejtës deri në datën 31.12.2014, të caktuara në bazë të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
c) Personat që përfitojnë pension pleqërie me datë lindjeje të së drejtës nga data 1.1.2015 e në vijim, të caktuar në bazë të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar, që plotësojnë periudhën e domosdoshme të sigurimit të parashikuar në nenin 92, pension pleqërie si nënë me shumë fëmijë, të caktuar në bazë të pikës 2, të nenit 31, dhe pension pleqërie të reduktuar, të caktuar në bazë nenit 31/1, të këtij ligji.
ç) Personat që përfitojnë pension pleqërie të caktuar në bazë të ligjit nr.150/2014, “Për pensionet e punonjësve që kanë punuar në miniera, në nëntokë”;
d) Personat që përfitojnë pension për shkak të profesionit, të caktuar në bazë të ligjit nr.29/2019, “Për trajtimin financiar suplementar të punonjësve që kanë punuar në miniera në nëntokë, të punonjësve të industrisë së naftës dhe të gazit dhe të punonjësve që kanë punuar në metalurgji”.

2. Përfitojnë kompensim të të ardhurave mujore deri në 800 (tetëqind) lekë në muaj personat me të ardhura deri në 22 000 (njëzet e dy mijë) lekë në muaj në datën 31.12.2025, sipas kategorive të mëposhtme:

a) Personat që përfitojnë pension pleqërie të pjesshëm, të caktuar sipas ligjit nr.4171, datë 13.9.1966, “Për sigurimet shoqërore në Republikën Popullore të Shqipërisë”, të ndryshuar;
b) Personat që përfitojnë pension pleqërie të pjesshëm urban, me datë lindjeje të së drejtës deri në datën 31.12.2014, të caktuar në bazë të neneve 34 e 95, të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
c) Personat që përfitojnë pension pleqërie, me datë lindjeje të së drejtës nga data 1.1.2015 e në vijim, të caktuara në bazë të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar, që nuk plotësojnë periudhën e domosdoshme të sigurimit të parashikuar në nenin 92 të këtij ligji;
ç) Personat që përfitojnë pension social të caktuar, në bazë të nenit 5/1, të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.

3. Përfitojnë kompensim të të ardhurave mujore deri në 1 000 (një mijë) lekë në muaj personat me të ardhura deri në 18 000 (tetëmbëdhjetë mijë) lekë në muaj në datën 31.12.2025, sipas kategorive të mëposhtme:

a) Personat që përfitojnë pension pleqërie të caktuar në bazë të ligjit nr.4976, datë 29.6.1972, “Për pensionet e anëtarëve të kooperativave bujqësore në Republikën Popullore të Shqipërisë”, të ndryshuar;
b) Personat që përfitojnë pension pleqërie rural, me datë lindjeje të së drejtës deri në datën 31.12.2014, të caktuar në bazë të neneve 31, 34, 93, 95 dhe të paragrafit të dytë të nenit 96 të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.

4. Përfitojnë kompensim të të ardhurave mujore deri në 600 (gjashtëqind) lekë në muaj personat me të ardhura deri në 30 000 (tridhjetë mijë) lekë në muaj në datën 31.12.2025, që përfitojnë pension invaliditeti, të caktuar sipas ligjit nr.4171, datë 13.9.1966, “Për sigurimet shoqërore në Republikën Popullore të Shqipërisë”, të ndryshuar, ligjit nr.4976, datë 29.6.1972, “Për pensionet e anëtarëve të kooperativave bujqësore në Republikën Popullore të Shqipërisë”, të ndryshuar, dhe ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.

5. Përfitojnë kompensim të të ardhurave mujore deri në 700 (shtatëqind) lekë në muaj personat me të ardhura deri në 18 000 (tetëmbëdhjetë mijë) lekë në muaj në datën 31.12.2025, që përfitojnë pension familjar, të caktuar sipas ligjit nr.4171, datë 13.9.1966, “Për sigurimet shoqërore në Republikën Popullore të Shqipërisë”, të ndryshuar, ligjit nr.4976, datë 29.6.1972, “Për pensionet e anëtarëve të kooperativave bujqësore në Republikën Popullore të Shqipërisë”, të ndryshuar, ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar, dhe ligjit nr.8455, datë 4.2.1999, “Për një trajtim të veçantë të familjeve të pilotëve, që humbasin jetën në përmbushje të detyrës, gjatë fluturimit”, të ndryshuar.

6. Masa individuale e kompensimeve të parashikuara në këtë vendim do të përfitohet deri në plotësimin e vlerës së të ardhurave të parashikuar në pikat 1, 2, 3, 4 dhe 5 të këtij vendimi.

Për të gjitha rastet që kompensimi i parashikuar sjell si pasojë tejkalimin e vlerës së të ardhurave sipas pikave 1, 2, 3, 4 dhe 5 të këtij vendimi, masa individuale e kompensimit do të llogaritet si diferencë e të ardhurave të parashikuara në pikat 1, 2, 3, 4 dhe 5 të këtij vendimi, me shumën e të ardhurave mujore të përfituesve, sipas përcaktimeve në këtë vendim.

7. Në kuptim të këtij vendimi, të ardhurat mujore të përfituesve të pensioneve, sipas pikave 1, 2, 3, 4 dhe 5 të këtij vendimi, përfshijnë:

a) masën e pensionit;
b) shtesën mbi pensionin e posaçëm shtetëror, të parashikuar në nenin 5, të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
c) shtesën mbi pensionin e pleqërisë të caktuar sipas nenit 33, të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
ç) trajtimet e veçanta financiare, sipas neneve 5/1/a, 5/1/b, të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar;
d) përfitimet sipas dekretit nr.758, datë 1.2.1994, “Për një mbrojtje të veçantë të ushtarakut”, të miratuar me ligjin nr.7799, datë 24.2.1994, të Kuvendit Popullor, dhe ligjit nr.8097, datë 21.3.1996, “Për pensionet shtetërore suplementare të personave që kryejnë funksione kushtetuese dhe të punonjësve të shtetit”, të ndryshuar, ligjit nr.10139, datë 15.5.2009, “Për pensionet shtetërore suplementare të punonjësve të universiteteve, të shkollave të larta, Qendrës së Studimeve Albanologjike, Akademisë së Shkencave dhe të gjitha institucioneve të tjera kërkimore publike në Republikën e Shqipërisë, të cilët kanë tituj shkencorë”, ligjit nr.10142, datë 15.5.2009, “Për sigurimin shoqëror suplementar të ushtarakëve të Forcave të Armatosura, të punonjësve të Policisë së Shtetit, të Gardës së Republikës, të Shërbimit Informativ të Shtetit, të Agjencisë së Inteligjencës dhe Sigurisë së Mbrojtjes, të Policisë së Burgjeve, të Policisë së Mbrojtjes nga Zjarri dhe të Shpëtimit e të punonjësve të Shërbimit të Kontrollit të Brendshëm në Republikën e Shqipërisë”, të ndryshuar, ligjit nr.9128, datë 29.7.2003, “Për një trajtim të veçantë financiar të pilotëve fluturues në pension”, të ndryshuar, ligjit nr.9361, datë 24.3.2005, “Për një trajtim të veçantë financiar të efektivave, oficerë dhe nënoficerë lundrues, të nëndetëseve dhe palombarëve të Forcave Detare, në pension”, ligjit nr.29/2019, “Për trajtimin financiar, suplementar të punonjësve që kanë punuar në miniera në nëntokë, të punonjësve të industrisë së naftës e të gazit dhe të punonjësve që kanë punuar në metalurgji”, ligjit nr.129/2021, “Për statusin “Fëmijë në përkujdesje të Republikës””;
dh) kompensimet sipas vendimit nr.763, datë 27.11.2006, të Këshillit të Ministrave, “Për kompensimin e të ardhurave mujore të pensionistëve”, vendimit nr.401, datë 21.6.2006, të Këshillit të Ministrave, “Për kompensimin e të ardhurave mujore të pensionistëve”, vendimit nr.17, datë 20.1.2007, të Këshillit të Ministrave, “Për kompensimin e të ardhurave mujore të pensionistëve të fshatit”, vendimit nr.415, datë 27.4.2009, të Këshillit të Ministrave, “Për rritjen e pensioneve”, vendimit nr.474, datë 30.6.2010, të Këshillit të Ministrave, “Për rritjen e pensioneve”.

8. Kompensimi shtesë për të ardhurat mujore, sipas këtij vendimi, u jepet edhe personave që do t’u caktohet pension nga data 1.1.2026 e në vazhdim, të cilët kanë datë lindjeje të së drejtës për pension deri në datën 31.12.2025, përfshirë edhe këtë datë, me kusht që masa e pensionit dhe përfitimet e përmendura në shkronjat “b”, “c”, “ ç”, “d” dhe “dh”, të pikës 7, të këtij vendimi, në datën 31.12.2025 të mos kalojnë të ardhurat e parashikuara në pikat 1, 2, 3, 4 dhe 5 të këtij vendimi.

9. Kompensimi shtesë për të ardhurat mujore, sipas këtij vendimi, u jepet edhe personave që do t’u caktohet pension nga data 1.1.2026 e në vazhdim, me kusht që data e lindjes së të drejtës për pension të jetë deri në datën 31.12.2026, përfshirë edhe këtë datë, me kusht që masa e pensionit dhe përfitimet e përmendura në shkronjat “b”, “c”, “ ç” “d” dhe “dh”, të pikës 7, të këtij vendimi, në datën e lindjes së të drejtës për pension të mos kalojnë të ardhurat e parashikuara në pikat 1, 2, 3, 4 dhe 5 të këtij vendimi. Personave, që do u caktohet pension me datë lindjeje të së drejtës nga data 1.1.2027 e në vazhdim, nuk janë subjekte përfituese sipas këtij vendimi.

10. Kompensimet e përfituara sipas këtij vendimi nuk do të jenë objekt ndryshimi, në rastet e indeksimit të pensioneve me vendime të Këshillit të Ministrave.

11. Efektet financiare, që rrjedhin nga zbatimi i këtij vendimi llogariten në shumën 9 800 960 000 (nëntë miliardë e tetëqind milionë e nëntëqind e gjashtëdhjetë mijë) lekë, të cilat ndahen:

a) 9 728 460 000 (nëntë miliardë e shtatëqind e njëzet e tetë milionë e katërqind e gjashtëdhjetë mijë) lekë, për mbulimin e pagesave të kompensimit të të ardhurave mujore të pensionistëve;
b) 72 500 000 (shtatëdhjetë e dy milionë e pesëqind mijë) lekë shpenzime administrative për procedurat teknike të zbatimit të këtij vendimi dhe për pagesën e komisioneve të shërbimit të pagesave të pensioneve nga Posta Shqiptare, sh.a., dhe bankat e nivelit të dytë.

12. Efektet financiare, që rrjedhin nga zbatimi i këtij vendimi, në shumën 9 800 960 000 (nëntë miliardë e tetëqind milionë e nëntëqind e gjashtëdhjetë mijë) lekë, do të përballohen nga buxheti i shtetit, i planifikuar në buxhetin për sigurimet shoqërore, për vitin 2026.

13. Ngarkohen Ministria e Ekonomisë dhe Inovacionit, Ministria e Financave dhe Instituti i Sigurimeve Shoqërore për zbatimin e këtij vendimi.

Ky vendim hyn në fuqi pas botimit në “Fletoren zyrtare” dhe i shtrin efektet financiare nga data 1.1.2026.

K R Y E M I N I S T R I
EDI RAMA

The post Vendimi i qeverisë, kompensime mujore për pensionistët sipas niveleve, deri në 1,800 lekë shtesë në muaj appeared first on Albeu.com.

Këngëtarja e njohur Vesa Luma ka ndarë së fundmi me ndjekësit e saj një përgjigje të sinqertë dhe plot emocione.

Gjatë një sesioni “Ask me a question” në Instagram, një ndjekës e pyeti nëse ajo dhe partneri i saj, Big Basta, po mendojnë për një fëmijë të dytë.

“Si fillim, gëzuar festat! A keni menduar për fëmijë të dytë?”, ishte pyetja që iu drejtua këngëtares.

Në përgjigjen e saj, Vesa zbuloi se kjo dëshirë i ka shoqëruar prej vitesh, duke shkruar:

“Kemi 9 vite që e mendojmë, dhe në fund na është mbushur mendja për një motër a vëlla për Lianin.”

Megjithatë, ajo theksoi se koha nuk është gjithmonë në anën e tyre, duke shtuar se shpreson që fati t’i buzëqeshë, pavarësisht moshës që, sipas saj “nuk është shumë në favor”.

Deklarata e Vesës u prit me shumë reagime pozitive nga fansat, të cilët vlerësuan sinqeritetin dhe emocionin e saj.

The post “Kemi 9 vite që e mendojmë”, Vesa Luma flet hapur për mundësinë e një femije të dytë: Nuk është shumë në favor appeared first on Albeu.com.

Policia e Tiranës ka ndaluar me iniciativë drejtoreshën e Ministrisë së Brendshme, Alma Bime, e cila dyshohet se ka kanosur përmes mesazheve një shtetas të huaj, identifikuar me inicialet M. M.

Bime dyshohet gjithashtu se në një rast tjetër ka djegur një orendi shtëpiake në banesën e ish-bashkëjetuesit të saj, Mareglen Tomori, e cila ndodhet pranë rrugës “Hysen Gjura” në zonën e Kinostudios.

Alma Bime mban prej disa vitesh postin e drejtoreshës së Politikave të Migracionit, Azilit dhe Antitrafikut në Ministrinë e Brendshme.

The post Dogji krevatin e ish-bashkëjetuesit, ‘arrest shtëpie’ për drejtoreshën e Ministrisë së Brendshme appeared first on Albeu.com.

Një ngjarje e rëndë ka ndodhur në qytetin e Elbasanit. Një person është gjetur i djegur plotësisht, në një ambient të përshtatur si banesë. Ai është gjetur në katin e parë të një pallati, në afrërsi të stadiumit “Elbasan Arena”. Sipas informacioneve paraprake, forcat zjarrfikëse janë thirrur nga fqinjët.

Zjarrfikësit kanë hapur me forcë derën e banesës, ku kanë gjetur një person në gjendje të rëndë shëndetësore. Për një orë, energjia elektrike është ndërprerë në lagjen “5 Maj”, si masë sigurie. Nga të dhënat paraprake, dyshohet se personi mund të ketë rënë aksidentalisht në kontakt me rrymën elektrike. Policia ka nisur hetimet për të zbuluar më shumë mbi ngjarjen e rëndë.

The post Çfarë po ndodh në Elbasan? Gjendet i djegur një person, fqinjët: Ndjemë aromë të djegur appeared first on Albeu.com.

Gjatë festave të fundvitit, Urgjenca e Spitalit Rajonal të Elbasanit përballet me një fluks të lartë pacientësh, ku më shumë se 300 persona paraqiten brenda 24 orëve për shkak të aksidenteve rrugore, teprimit me alkoolin, problemeve kardiake dhe dëmtimeve nga fishekzjarrët.

Drejtori i Urgjencës, Ergys Miçi, thekson se konsumimi i alkoolit gjatë mbrëmjeve festive shpesh e kthen festën familjare në traumë, veçanërisht kur drejtuesit e mjeteve drejtojnë automjetin nën efektin e tij. Sipas tij, çdo vit gjatë kësaj periudhe regjistrohen aksidente të shumta rrugore, përfshirë edhe raste me humbje jete.

“Gjatë festave ka gjithmonë teprim në konsumimin e alkoolit dhe këshillojmë të gjithë qytetarët të tregojnë kujdes, në mënyrë që festa të mos kthehet në traumë. Çdo person që konsumon alkool duhet të ketë kujdes të mos drejtojë automjetin, pasi shpesh ajo që nis si festë familjare përfundon në tragjedi. Çdo vit kemi pasur raste të shumta aksidentesh, madje edhe me humbje jete”, thotë Ergys Miçi.

Një tjetër kategori e rrezikuar janë moshat e treta dhe fëmijët, të cilët përballen me pasoja serioze shëndetësore gjatë festave. “Moshat e treta duhet të tregojnë kujdes të shtuar, pasi edhe sasi të vogla alkooli ose teprimi me ushqimin, në prani të problemeve kardiake, mund të sjellin pasoja serioze, si edemë pulmonare. Gjithashtu, personat me astmë kronike duhet të kenë kujdes në klimat e ftohta. Fëmijët duhet të mbrohen nga fishekzjarrët; vitet e kaluara kemi pasur raste me djegie dhe dëmtime të gishtave”, thotë ai.

Sipas drejtuesit të Urgjencës, fluksi i pacientëve rritet ndjeshëm gjatë kësaj periudhe, duke kaluar shifrën e zakonshme. “Fluksi i pacientëve mund të arrijë deri në 300 persona në 24 orë. Në fundvit ka një rritje të ndjeshme të fluksit, si në shërbimin paraspitalor ashtu edhe në atë spitalor. Përgatitemi për datat 31 dhjetor, 1 dhe 2 janar, duke siguruar furnizime shtesë dhe rritur gatishmërinë. Numri i rasteve mund të arrijë 250–300 në 24 orë, një fluks i konsiderueshëm për Urgjencën”. thotë Miçi.

Autoritetet shëndetësore apelojnë për kujdes maksimal gjatë festave, duke theksuar se shmangia e alkoolit në drejtimin e automjeteve dhe përdorimi i kujdesshëm i fishekzjarrëve janë thelbësore për të mos e kthyer festën në urgjencë spitalore.

The post Festat e fundvitit mbingarkojnë Urgjencën e Elbasanit, mjeku: Mbi 300 pacientë në 24 orë appeared first on Albeu.com.

Pas zgjedhjeve të parakohshme parlamentare të mbajtura më 28 dhjetor në Kosovë, është pothuajse e sigurt se Lëvizja Vetëvendosje (LVV) e Albin Kurtit do të përpiqet ta zvogëlojë ndikimin politik të Listës Serbe, duke ia dhënë postet e garantuara për komunitetin serb në Kuvend dhe në Qeveri partisë së Nenad Rashqiti nga partia “Për liri, drejtësi dhe mbijetesë”, thotë për Radion Evropa e Lirë politologu Ognjen Gogiq.

Ndërkaq, ish-gjyqtari i Gjykatës Kushtetuese, Kadri Kryeziu paralajmëron se për zgjedhjen e nënkryetarit të Kuvendit të Kosovës nga radhët e komunitetit serb është i domosdoshëm konsensusi i partive parlamentare që përfaqësojnë serbët.

Sipas rezultateve preliminare të Komisionit Qendror të Zgjedhjeve, Lista Serbe, parti që gëzon mbështetjen e Beogradit zyrtar, ka fituar rreth 42 mijë vota, ndërsa partia e Nenad Rashiqit, i cili ishte ministër në Qeverinë e Kosovës pasi Lista Serbe braktisi institucionet kosovare në nëntor të vitit 2022, ka fituar rreth 4.700 vota.

Edhe pse Lista Serbe më 28 dhjetor deklaroi se me rreth 90 për qind të votave të komunitetit serb i ka fituar të gjitha dhjetë vendet e rezervuara për serbët në Kuvendin e Kosovës, Rashiq një ditë më vonë njoftoi se kishte fituar një ulëse.

Pas zgjedhjeve parlamentare në shkurt, kur Rashiq gjithashtu fitoi një vend në Kuvend, Lista Serbe e kontestoi në Gjykatën Kushtetuese zgjedhjen e tij si nënkryetar i Kuvendit nga radhët e komunitetit serb, duke pretenduar se janë shkelur Kushtetuta dhe Rregullorja e Punës të organit ligjvënës.

Gjykata ende nuk ka marrë ndonjë vendim për këtë çështje. Kryeziu thotë se Gjykata Kushtetuese tani nuk ka domosdoshmërish nevojë të deklarohet, meqë ndërkohë janë mbajtur zgjedhje të reja, por nuk e përjashton mundësinë që Lista Serbe të paraqesë një ankesë të re nëse për nënkryetar të Kuvendit zgjidhet sërish Rashiq.

Zhvillime të mundshme dhe pasojat politike

Sipas Kushtetutës së Kosovës, njëri nga nënkryetarët e Kuvendit duhet të jetë nga “radhët e deputetëve të Kuvendit që mbajnë vende të rezervuara ose të garantuara të përfaqësuesve të komunitetit serb”. Nga ana tjetër, sipas Rregullores së Punës së Kuvendit, kandidatin për nënkryetar nga radhët e komunitetit serb e propozon shumica e deputetëve të këtij komuniteti.

Në këto dispozita bazohet edhe Kryeziu, duke shtuar se në situatën kur vendet e rezervuara për komunitetin serb i ndajnë dy ose më shumë parti, propozimi mund të përcaktohet me short.

“Në momentin kur kemi dy ose më shumë parti serbe në Kuvendin e Kosovës, subjektet politike serbe duhet të bien dakord dhe me short të vendoset se kush do të jetë kandidati për nënkryetar të Kuvendit”, thotë ai, duke paralajmëruar se nuk duhet të përsëritet situata kur Kuvendi konstituohet pa nënkryetar nga radhët e komunitetit serb.

“Kjo nuk do të thotë se kandidati duhet të vijë nga partia më e madhe, por vetëm që të jetë përfaqësues i minoritetit serb”, shton Kryeziu.

Siç thotë ai, këtë e ka konstatuar më herët edhe Gjykata Kushtetuese, kur nxori vendim mbi një ankesë të paraqitur nga Lista Serbe. Politologu Ognjen Gogiq vlerëson se Nenad Rashiq fillimisht mund të zgjidhet nënkryetar i Kuvendit, e më pas edhe ministër në Qeverinë e Kosovës, ndërsa në Kuvend do ta zëvendësonte dikush nga partia e tij.

Ai beson gjithashtu se Lista Serbe do ta kontestojë sërish zgjedhjen e Rashiqit, qoftë për nënkryetar të Kuvendit apo për ministër në Qeveri. Lista Serbe këmbëngul në qëndrimin se Rashiq nuk ka numër të mjaftueshëm votash për të përfaqësuar komunitetin serb, duke thënë se votat i ka marrë edhe në zona ku nuk jetojnë serbët.

Cili është ndikimi real i Listës Serbe?

Pas zgjedhjeve të shkurtit, kur çdo votë e deputetëve ishte e rëndësishme për formimin e institucioneve, pothuajse askush nuk llogariste në nëntë votat e Listës Serbe.

Analistët politikë vlerësojnë se në këtë pozitë të Listës Serbe ka ndikuar edhe sulmi i armatosur në Banjskë në shtator të vitit 2023, ku u vra një polic i Kosovës, dhe që u krye nga një grup serbësh të udhëhequr nga ish-nënkryetari i Listës Serbe, Millan Radoiçiq. Lista Serbe asnjëherë nuk u distancua nga ai.

Gogiq vlerëson për Radion Evropa e Lirë se institucionet e reja, të udhëhequra nga LVV-ja, në masë të madhe do ta “injorojnë” Listën Serbe dhe se ajo nuk do të ketë ndikim të rëndësishëm politik.

“Votat e Listës Serbe nuk janë të nevojshme për zgjedhjen e Qeverisë, as për zgjedhjen e kryetarit të Kuvendit. E vetmja gjë që mund të bëjnë është ta kontestojnë zgjedhjen e nënkryetarit të Kuvendit nëse zgjidhet Rashiq, por edhe kjo është nën pikëpyetje të madhe, në varësi të qëndrimit të Gjykatës Kushtetuese”, thotë ai.

Hipotetikisht, shton Gogiq, LVV-ja mund të “lëshojë pe” ndaj Listës Serbe vetëm nëse Gjykata Kushtetuese vendos se nënkryetari i Kuvendit duhet të vijë nga partia më e madhe në Kuvend e komunitetit serb, që në këtë rast është Lista Serbe.

Zyrtarët e Listës Serbe shpesh në publik deklarojnë se kjo parti është përfaqësuesja e vetme dhe legjitime e serbëve në institucionet e Kosovës, por zëri i tyre edhe më herët pothuajse nuk është dëgjuar në Kuvend apo në Qeverinë e Kosovës, meqë rrallë kanë marrë pjesë në punën e këtyre institucioneve.

Shoqëria civile nga komuniteti serb më herët i ka bërë thirrje Listës Serbe që të marrë përgjegjësi dhe të angazhohet më aktivisht në jetën institucionale, në mënyrë që përmes institucioneve të ulet paqëndrueshmëria dhe të kontribuohet për paqe./REL

The post LVV-ja do ta “zvogëlojë ndikimin e Listës Serbe” në institucionet e reja appeared first on Albeu.com.

Një ngjarje e rëndë ka tronditur pasditen e sotme qytetin e Pejë, ku dy persona janë gjetur pa shenja jete brenda një vile, e cila ndodhet në rrugën e KFOR-it.

Lajmi është konfirmuar zyrtarisht nga zëdhënësi i Policisë për Rajonin e Pejës, Fadil Gashi, i cili bëri të ditur se rreth orës 15:10 autoritetet kanë marrë njoftimin për rastin dhe kanë reaguar menjëherë duke u nisur drejt vendngjarjes.

“Sot rreth orës 15:00, policia është informuar se në një vilë në rrugën e KFOR-it dyshohet se dy persona janë pa shenja jete. Njësitet policore, së bashku me ekipin e emergjencës, kanë dalë në vendin e ngjarjes, ku mjeku kujdestar ka konstatuar vdekjen e dy personave,” deklaroi Gashi.

Sipas informacioneve paraprake, viktimat janë një mashkull dhe një femër. Deri në këtë fazë, autoritetet nuk kanë dhënë detaje të tjera mbi identitetin e tyre, ndërsa rrethanat në të cilat ka ndodhur ngjarja mbeten ende të paqarta.

Policia ka rrethuar zonën dhe ka nisur hetimet për zbardhjen e plotë të rastit, me qëllim përcaktimin e shkaqeve të vdekjes dhe verifikimin nëse bëhet fjalë për vdekje natyrale, aksident apo ndonjë vepër penale. Hetimet po vijojnë, ndërsa pritet që në orët në vijim të ketë më shumë informacion zyrtar lidhur me këtë ngjarje të rëndë.

The post E RËNDË në Kosovë/ Gjendet i vdekur një çift të rinjsh në një vilë appeared first on Albeu.com.

Ish-basketbollisti Enea Andrea, vëllai i aktores së njohur, ka ndërruar jetë në moshën 54-vjeçare si pasojë e një arresti kardiak.

Vajza e Ema Andreas, Sara Kapo ka bërë një dedikim prekës për dajën, në rrjetet sociale duke zbuluar kështu se gëzonin një raport të veccantë.

“Përjetësisht do më mungosh daja”, shkruan Sara.

Rreth shtatë vjet më parë, Enea kaloi një problem me zemrën, por pas asaj periudhe u rikthye në formën optimale fizike.

The post U nda nga jeta, vajza e Ema Andreas prek me dedikimin për dajën: Përjetësisht do më mungosh appeared first on Albeu.com.

Juxhini dhe Armela kanë biseduar me njëri-tjetin sot në lidhje me një situatë të pakëndshme të krijuar mes tyre në shtëpinë e “Big Brother VIP 5”. Aktori është shprehur se banorja i ka ulur pantallonat, ndërkohë banorja thotë se nuk ka ndodhur kështu por ‘e ka prekur’.

Pjesë nga biseda:

Armela: Batuta ime, ajo që të ktheva ishte se unë ti kam larë vetë dhe nuk është se kam kuriozitet. Nuk është se ke je ndonjë bodybuilder dhe hajde se u bëra kurioz për ty
Juxhini: Kuriozitet nuk mund të kesh vetëm për bodybuilder

Armela: Po mirë, unë atë zgjodha
Juxhini: Edhe unë ndihem kurioz si jam, i kam katrore, i kam rrethore
Armela: Ti rri gjithë ditën pa bluzë, ti kam parë muskujt. Ti e kishe për gjë tjetër, se pa bluzë ishe. Prandaj unë u preka.
Juxhini: Po këto komentet bodybuilder
Armela: Të më thua mua ‘a je kurioze këtu poshtë’. Unë mos të them bodybuilder me shaka
Juxhini: Unë të thashë me shaka se isha në ekstazë, ndërsa ti e bëre me qëllim

Armela: E vendose se me shakatë ka një limit
Juxhini: Patjetër, po limitet i vendos ti, po ma vendosur ti limitin nuk e kuptoj shakanë. E më shaka të këtij tipi nuk ka.
Armela: Ne kemi qëndruar së bashku e kur ka ardhur puna të shtuna që duhej të rregullohej fustani, nëse të kujtohej me the ‘e rregulloj unë, fus dorën këtu’, thashë jo se kam siklet
Juxhini: Ti mi ule dhe unë të thashë ‘a je kurioze’
Armela: Nuk ti ula, ti preka
Juxhini: Ajo ishte batutë spontane dhe e pamenduar, erdhi si pasojë e reagimit tënd

The post Përplasje mes Juxhinit dhe Armelës: Nuk je bodybuilder, s’ti ula pantallonat appeared first on Albeu.com.

Sportisti i njohur amerikan, njëkohësisht partneri i Cardi B, Stefon Diggs, po përballet me akuza për sulm dhe dhunë fizike që rrjedhin nga një incident që ndodhi në fillim të këtij muaji, sipas dokumenteve të gjykatës të siguruara nga Boston 25 News.

Incidenti i dyshuar ndodhi më 2 dhjetor, një ditë pas fitores të Patriots në ndeshjen e futbollit kundër New York Giants. Avokati i Diggs, Michael DiStefano, u paraqit nga distanca në Gjykatën e Qarkut Dedham të martën (30 dhjetor) dhe kërkoi që raporti i policisë në lidhje me incidentin të sekuestrohej, duke pretenduar se detajet duhej të kishin mbetur të fshehta dhe konfirmoi se klienti i tij kishte bërë tashmë një ofertë financiare për të zgjidhur çështjen me viktimën e dyshuar.

“Ndërsa flasim, ata po punojnë për të arritur një marrëveshje për këtë”, tha DiStefano nëpërmjet Boston 25 News.

Gjyqtarja konfirmoi se do ta shqyrtonte kërkesën dhe do të merrte një vendim së shpejti. Diggs është planifikuar të paraqitet për t’u paraqitur në gjyq më 23 janar, dy ditë para ndeshjes së Kampionatit AFC, megjithëse gjyqtarja pranoi të shqyrtonte një kërkesë për të shtyrë datën e paraqitjes së tij në gjyq deri në mars.

Një zëdhënës i Patriots konfirmoi se ekipi ishte në dijeni të akuzave kundër Diggs dhe do të kerkoje më shumë informacion.

“New England Patriots janë në dijeni të akuzave që janë bërë në lidhje me Stefon Diggs. Stefon e ka informuar organizatën se ai i mohon kategorikisht akuzat. Ne e mbështesim Stefonin”, thuhet në deklaratë nëpërmjet Boston 25 News.

“Ne do të vazhdojmë të mbledhim informacione dhe do të bashkëpunojmë plotësisht me autoritetet përkatëse dhe NFL-në sipas nevojës. Nga respekti për të gjitha palët e përfshira, dhe duke pasur parasysh se kjo është një çështje ligjore në vazhdim, nuk do të kemi komente të mëtejshme në këtë kohë.”

The post I dashuri i Cardi B, Stefon Diggs përballet me akuza të rënda penale appeared first on Albeu.com.

Alfonso Signorini, gazetari dhe prezantuesi i njohur italian, është nën hetim nga prokuroria e Milanos për dyshimet për dhunë seksuale dhe shantazh.

Vendimi vjen pas kallëzimit të depozituar nga ish-pjesëmarrësi i “Grande Fratello”, ose ndryshe “Big Brother” Antonio Medugno, i cili pretendon se ka qenë pjesë e një sistemi ku kërkoheshin favore seksuale për të marrë pjesë në program, denoncim i bërë publikisht edhe nga Fabrizio Corona.

Sipas mediave italiane, Signorini kishte njoftuar vetëpezullimin e menjëhershëm nga Mediaset, për shkak të akuzave të ngritura nga Corona në kanalin e tij në YouTube, “Falsissimo”.

Për t’u përballur me hetimet, Signorini ka ndryshuar avokatët, duke zgjedhur dy emra të njohur: Daniela Missaglia dhe Domenico Aiello. Missaglia, ekspertja e të drejtës së familjes dhe e individit, ka përvojë në ndarje të famshme si ajo midis Nina Moric dhe Fabrizio Corona, ndërsa Aiello është avokat penalist me përvojë në çështje të komplikuara të korrupsionit dhe kontratave publike.

“Ne kemi të gjitha mjetet për të provuar se denoncimi është i shpifur dhe autorët janë të gatshëm të shkatërrojnë jetën e njerëzve për të fituar miliona euro. Kjo është ajo që unë e quaj ‘etika e mbeturinave’”, ka deklaruar Aiello, duke iu referuar akuzave kundër Signorini.

The post Skandali në “Grande Fratello”, moderatori Alfonso Signorini nën hetim për dhunë s*ksuale dhe shantazh appeared first on Albeu.com.

Një aksident rrugor ka ndodhur në qytetin e Korçës. Një automjet është përplasur me një motorr. Si pasojë e kësaj ka mbetur i plagosur drejtuesi i motorrit, i cili është dërguar drejt ambienteve të spitalit për të marrë ndihmën e specializuar mjeksore.

Sipas informacioneve paraprake, ai ndodhet jashtë rrezikut për jetën. Policia ka shkuar në vendngjarje, ndërsa po bën zbardhjen e rrethanave.

The post Aksident rrugor në Korçë/ Makina përplaset me motorrin, plagoset një person appeared first on Albeu.com.

Kërkesa e ish-zv ministrit të Shëndetësisë Klodian Rjepaj për zëvëndësim të masës së sigurisë, është rrëzuar nga Gjykata e Posaçme. Rjepaj kërkoj zëvëndësimin e masës së sigurisë, me argumentimin se vuante nga diabeti dhe disa problme të tjera shëndetësore.

Klodian Rrjepaj u arrestua në datë 17 gusht të vitit 2023 me urdhër të SPAK, për llogari të hetimeve që nisi kjo strukturë për koncesionin e sterilizimit “Sterilizimin”. Ky i fundit dyshohet se ka kryer veprat penale ‘Falsifikim i dokumentave’ dhe ‘Shpërdorimi i detyrës’. Bashkë me të u arrestua edhe biznesmeni Ilir Rrapaj, i cili akuzohet për “Mashtrim”.

Deri tani nga hetimi i SPAK Ilir Beqaj është zyrtari më i lartë nën akuzë për shkeljet e konstatuara me kontratën e partneritetit publik-privat të sterilizimit me vlerë 100 milionë euro, pas arrestimit në gusht të vitit të kaluar të biznesmenit Ilir Rrapaj dhe zëvendësit të tij në Ministrinë e Shëndetësisë, Klodian Rrjepaj.

The post Dosja Sterilizimi/ GJKKO rrëzon kërkesën e Klodian Rrjepaj për zëvëndësim të masës së sigurisë appeared first on Albeu.com.

Turqia ka kërkuar ndihmën e Gjermanisë për të “lexuar” të dhënat e regjistruara në kutinë e zezë të avionit që u rrëzua javën e kaluar pranë Ankarasë, aksident në të cilin humbën jetën tetë persona, mes tyre edhe komandanti i forcave të armatosura të Libisë.

Zyra Federale Gjermane për Hetimin e Aksidenteve Ajrore (BFU) i tha Agjencisë Franceze të Lajmeve se ka “marrë një kërkesë” nga autoritetet turke për të ndihmuar në deshifrimin e regjistruesve të fluturimit. Kutia e zezë e avionit u gjet në fusha bujqësore, pranë vendit të përplasjes.

Në aksident humbën jetën gjenerali Mohamed al-Haddad, shefi i Shtabit të Përgjithshëm të Forcave të Armatosura të Libisë, katër këshilltarë të tij si dhe ekuipazhi prej tre personash i avionit, mes të cilëve edhe Maria Pappa, stjuardesë me origjinë nga Greqia.

Autoritetet turke ia atribuojnë aksidentin një defekti në sistemin elektrik të avionit.

Ankaraja kishte njoftuar më herët se hetimi për shkaqet e aksidentit do të kryhej nga një “vend neutral”, me shumë gjasë Gjermania.

BFU sqaroi se ka kontaktuar autoritetet turke dhe ka kërkuar fotografi të regjistruesve të fluturimit për të verifikuar nëse të dhënat e tyre mund të lexohen. Nëse kjo konfirmohet, regjistruesit do të dërgohen në Gjermani për analizë. Të dhënat e nxjerra do t’i përcillen më pas autoritetit turk përgjegjës për hetimin.

Ndërkohë, Ministria e Jashtme e Libisë njoftoi sot se i ka kërkuar Britanisë së Madhe të ndihmojë në procesin e hetimit.

The post Aksidenti ajror ku humbi jetën komandanti i forcave të armatosura të Libisë, Turqia kërkon ndihmën e Gjermanisë për analizimin e kutisë së zezë së avionit appeared first on Albeu.com.

Oprah Winfrey ka folur hapur për herë të parë mbi vendimin e saj për të ndërprerë përdorimin e ilaçeve GLP-1 për humbje peshe për një periudhë 12-mujore, duke ndarë publikisht përvojën dhe mësimet që mori nga ky proces.

Ikona televizive, e cila bashkëautorëzon një libër të ri mbi obezitetin, tregon se fillimisht ishte e frikësuar kur pranoi publikisht se përdorte medikamente për humbje peshe. Ajo pranon se e dinte që rrëfimi i saj do të shkaktonte reagime të forta dhe kritika, por vendosi të ishte e sinqertë.

Sipas Winfrey, disa muaj pasi nisi injeksionet GLP-1, ajo vendosi t’i ndërpriste menjëherë, në ditëlindjen e saj të 70-të, në janar 2024. “U përpoqa ta mposhtja ilaçin”, shprehet ajo, duke shtuar se donte të provonte nëse mund ta mbante peshën nën kontroll vetëm me dietë të shëndetshme dhe aktivitet fizik.

Edhe pse vazhdoi me ushqim të rregullt dhe stërvitje, rezultatet nuk ishin të menjëhershme. Gjatë 12 muajve pa medikament, Oprah shtoi rreth 9 kilogramë. Pikërisht kjo përvojë e bëri të kuptojë se menaxhimi i peshës për të është një proces afatgjatë dhe i vazhdueshëm.

Ajo rrëfen se kthesa erdhi pas një momenti reflektimi në korrik 2023, gjatë xhirimeve të një emisioni mbi obezitetin me ekspertë të fushës. “E kuptova se mbingrënia nuk e shkakton obezitetin; obeziteti e shkakton mbingrënien”, tha Winfrey, duke e cilësuar këtë si një nga përjetimet më çliruese të jetës së saj.

Sipas saj, pa ndihmën e GLP-1, trupi përpiqet vazhdimisht të rikthehet në atë që ekspertët e quajnë “pika e mjaftueshmërisë”, një peshë e caktuar që ndikohet nga gjenetika dhe mjedisi. Për Oprah, kjo peshë ishte rreth 96 kilogramë, një nivel që ajo pranon se nuk ishte i shëndetshëm për të, pasi vuante nga parametra të lartë kolesteroli dhe ishte në gjendje pre-diabetike.

The post Oprah Winfrey rrëfen pse ndaloi përdorimin e ilaçeve GLP-1 për 12 muaj dhe çfarë ndodhi më pas appeared first on Albeu.com.

Einxhel Shkira dhe DJ Dagz vijojnë të jenë një nga çiftet më të dashura për publikun shqiptar, jo vetëm për historinë e tyre të dashurisë, por edhe për mënyrën spontane dhe plot humor me të cilën ndajnë momente nga jeta e përditshme.

Së fundmi, moderatorja ka zbuluar një detaj mjaft interesant dhe njëkohësisht komik qe ka habitur ndjekësit e saj. Përmes një postimi në Instagram Story, Einxhel ka ndarë një bisedë private me partnerin e saj, ku tregohet se ata sapo janë bërë “shokë” në rrjetin social Facebook.

Edhe pse prej vitesh jetojnë bashkë dhe kanë ndërtuar një familje të bukur, duket se bota virtuale kishte mbetur pas, pa e reflektuar këtë lidhje. Në foton e publikuar shihet njoftimi që DJ Dagz ka pranuar kërkesën për shoqëri të Einxhelit në Facebook, gjë që ka shkaktuar menjëherë reagime pozitive nga publiku.

Moderatorja e ka shoqëruar postimin me humor, duke shkruar:

“Po ju a ndiqeni me burrin në Facebook?!”

Biseda mes çiftit vazhdon me të qeshura, ku Einxhel shprehet:

“T’merret domethënë, që 4 vjet s’jemi follow”,
ndërsa DJ Dagz i përgjigjet me shaka, duke e quajtur veten “njeri i Facebook-ut”.

Ky moment i vogël, por shumë domethënës, ka shkaktuar një valë të qeshurash mes ndjekësve, të cilët e kanë përjetuar si një situatë të zakonshme, por tepër reale për shumë çifte.

The post Katër vite bashkë, por jo në Facebook! Zbulimi që bëri Einxhel Shkira appeared first on Albeu.com.

Një aksident rrugor ka ndodhur pasditen e sotme në autostradën Tiranë–Durrës.

Sipas informacioneve paraprake, një drejtues mjeti ka humbur kontrollin dhe automjeti ka përfunduar mbi bordurën anësore të rrugës, e cila aktualisht është në rikonstruksion.

Dyshohet se dalja e makinës nga rruga është shkaktuar nga një manovër e gabuar e shoferit.

Deri më tani nuk raportohet nëse ka persona të lënduar apo viktima nga ky aksident, ndërsa policia ndodhet në vendngjarje dhe po heton rrethanat.

The post Aksident në autostradën Tiranë-Durrës, makina përfundon në mbi bordurën anësore appeared first on Albeu.com.