Shtëpia e Big Brother VIP Albania është pasuruar me tre banorë të rinj, duke sjellë dinamika dhe energji të reja në lojë.
Në garë janë futur Ardit Murataj, gazetar dhe moderator i njohur, Livia Lozi, aktore, si dhe Shëndrit Lumi, gazetar nga Kosova.
Hyrja e tyre ka surprizuar banorët aktualë dhe ka zgjuar reagime të shumta brenda shtëpisë.
Treshja pritet të ndikojë ndjeshëm në strategjitë e lojës, aleancat mes banorëve dhe raportet brenda shtëpisë, duke shtuar edhe më shumë tension dhe kuriozitet tek publiku.
Banorët e rinj do të rrinë në ‘shpellë’. /Telegrafi/
Shkencëtarët zbulojnë diçka shqetësuese brenda gurëve “joinfektivë” – dhe kjo shpjegon pse rikthehen vazhdimisht
Për vite me radhë kemi besuar se guri në veshka është ekskluzivisht pasojë e “kimisë”: shumë pak lëngje, tepër minerale, ushqyerje e gabuar dhe gjenetikë. Megjithatë, një hulumtim i ri i shkencëtarëve nga Universiteti i Kalifornisë në Los Anxhelos sjell një zbulim befasues që mund të ndryshojë mënyrën se si e kuptojmë formimin e kësaj gjendjeje jashtëzakonisht të dhimbshme dhe shumë të shpeshtë.
Për herë të parë, studiuesit kanë gjetur prova se bakteret fshihen brenda të ashtuquajturve gurë “joinfektivë” në veshka. Dhe jo vetëm që janë të pranishme, por janë pjesë përbërëse e strukturës së tyre të brendshme.
– Bëhet fjalë për gurë kalcium-oksalat, tipi më i shpeshtë i gurëve në veshka, që përbëjnë më shumë se 70 për qind të të gjitha rasteve. Deri tani, pas nxjerrjes nga organizmi, konsideroheshin “sterilë”. Hulumtimi i ri tregon se ndoshta kurrë nuk kanë qenë të tillë. Ky zbulim vë në pikëpyetje bindjen shumëvjeçare se guri në veshka zhvillohet ekskluzivisht përmes proceseve kimike dhe fizike. Kemi treguar se bakteret mund të qëndrojnë brenda gurit dhe të marrin pjesë aktive në formimin e tij, shpjegon dr. Kimora Skotland, urologe në UCLA dhe një nga autorët e studimit.
Me fjalë të tjera, guri në veshka mund të mos jetë vetëm pasojë e dehidratimit, por edhe e një procesi mikrobiologjik që zhvillohet thellë në sistemin urinar.
Pse është i rëndësishëm ky zbulim
Një nga problemet më të mëdha te guri në veshka është rikthimi i tij i vazhdueshëm. Shumë pacientë përjetojnë të njëjtën dhimbje “ferri” disa herë gjatë jetës, shpesh pa një shpjegim të qartë pse guri formohet sërish.
Hulumtimi i ri sugjeron se, në këto raste, shkaku mund të jetë një infeksion bakterial i fshehur në veshka, ureter ose fshikëz urinare, edhe kur nuk ekzistojnë shenja klasike të infeksionit të traktit urinar. Studiuesit, përmes mikroskopisë elektronike dhe fluorescente, kanë gjetur gjurmë strukturore dhe kimike të baktereve në gurët e marrë nga pacientë që nuk kishin infeksion urinar të diagnostikuar.
Nëse konfirmohet se bakteret kanë rol aktiv në formimin e gurit, kjo hap rrugë për qasje krejtësisht të reja terapeutike. Trajtimi i infeksionit mund, të paktën te disa pacientë, të ulë rrezikun e formimit të përsëritur të gurëve, transmeton Telegrafi.
Shutterstock
Sa i shpeshtë është në të vërtetë problemi i gurit në veshka
Statistikat janë të pamëshirshme. Vlerësimet tregojnë se deri një në 11 persona gjatë jetës do të ketë gur në veshka. A keni ndier ndonjëherë dhimbje të papritur dhe shumë të fortë në shpinë, anë apo në pjesën e poshtme të barkut, aq intensive sa t’ju paralizojë? Nëse po, është e mundur që tashmë të keni përjetuar një sulm nga guri në veshka.
Guri në veshka është një depozitë e fortë e përbërë nga minerale dhe kripëra që formohen brenda veshkave. Përveç dhimbjes së padurueshme, ai mund të çojë edhe në infeksione, dëmtime të veshkave, madje edhe sepsë, nëse nuk trajtohet me kohë.
Tri arsyet më të shpeshta për formimin e gurit në veshka
Sipas dr. Rafid Jusifit, urolog në qendrën McLaren Greater Lansing, ekzistojnë disa faktorë kyç që rrisin rrezikun për formimin e gurit në veshka.
1.Dehidratimi Marrja e pamjaftueshme e lëngjeve është shkaku më i shpeshtë. Kur nuk pimë mjaftueshëm ujë, urina bëhet e përqendruar, gjë që u mundëson mineraleve të kristalizohen më lehtë dhe të formojnë gurë.
2.Ushqyerja e pasur me oksalate Nëse jeni të prirë për gurë, pikërisht disa ushqime që shpesh konsiderohen të shëndetshme mund të jenë problematike. Spinaqi, produktet e sojës, bajamet, patatja, panxhari dhe hurmat përmbajnë nivele të larta oksalatesh që kontribuojnë në formimin e gurëve kalcium-oksalat. Dr. Jusifi këshillon që marrja e këtyre ushqimeve të reduktohet, ndërsa të rritet marrja e acidit citrik, për shembull përmes lëngut të limonit ose uthullës së mollës, pasi ai mund të ndihmojë në parandalimin e formimit të gurëve.
3.Nxehtësia dhe djersitja e shtuar Temperaturat e larta, qëndrimi në ambiente të ngrohta, ushtrimet intensive ose puna fizike pa rehidratim adekuat e rrisin më tej rrezikun. Me djersitje humbim lëngje dhe, nëse nuk i kompensojmë, krijojmë kushte ideale për formimin e gurëve.
Simptomat që nuk duhen injoruar
Simptomat më të shpeshta të gurit në veshka janë:
dhimbje e fortë në pjesën e poshtme të barkut, shpinë, anë ose ijë • urinim i shpeshtë ose urgjent • gjak në urinë • të përziera dhe të vjella
Nëse këtyre simptomave u shtohen edhe ethe dhe dridhje, kjo mund të tregojë një infeksion të zhvilluar për shkak të gurit, gjë që kërkon ndihmë të menjëhershme mjekësore.
– Nëse ndjeni këto simptoma, është e rëndësishme që trajtimi të nisë sa më shpejt. Ekzistojnë metoda të ndryshme, nga barnat dhe valët ultrasonike deri te ndërhyrjet kirurgjikale. Nëse ka infeksion, ai duhet trajtuar pa vonesë, thekson dr. Jusifi.
Nëse keni dhimbje të forta, të vjella, temperaturë ose ethe, mos prisni. Shkuarja në urgjencën më të afërt mund të jetë vendimtare, sepse në disa raste guri mund të bllokojë rrugët urinare dhe të çojë në komplikime serioze.
Çfarë na mëson hulumtimi i ri
Zbulimi i baktereve brenda gurit në veshka ndryshon këndvështrimin tonë për këtë sëmundje. Guri mund të mos jetë vetëm një “problem mekanik”, por një proces i ndërlikuar ku marrin pjesë edhe mikroorganizmat.
Për pacientët që prej vitesh përballen me gurë të përsëritur, kjo mund të nënkuptojë shpresë se në të ardhmen do të trajtohet shkaku, e jo vetëm pasoja. Dhe, ndoshta më e rëndësishmja, na kujton edhe një herë se trupi rrallë funksionon thjesht. Pas çdo simptome shpesh fshihet një histori më komplekse sesa kemi menduar. /Telegrafi/
Moda e pranverës 2026 vendos theksin te eksperimentimi dhe shprehja personale përmes ngjyrave intensive dhe teksturave interesante
Moda e femrave për pranverën 2026 dërgon një mesazh të qartë: ka ardhur koha për eksperimente dhe për rikthimin e një shprehjeje të fortë vizuale. Kombinimet minimaliste njëngjyrëshe po ia lënë gradualisht vendin ngjyrave të guximshme, teksturave interesante dhe siluetave që theksojnë figurën. Dizajnerët propozojnë veshje që përshtaten lehtë me gardërobën e përditshme, por që kanë fuqinë ta ngrejnë të gjithë pamjen në një nivel më të lartë.
Nëse dëshironi të jeni në hap me modën në pranverën 2026, mjafton të përfshini në gardërobë disa elemente kyçe që tashmë dominojnë pasarelat dhe stilimin e rrugës.
1. Xhaketë me siluetë të theksuar
Backgrid
Trendet e pranverës 2026 rikthejnë xhaketat që krijojnë strukturë dhe theksojnë përmasat e trupit. Në fokus janë modelet që ndjekin vijën e belit dhe kanë supe të theksuara ose fund të zgjeruar dekorativ. Këto prerje krijojnë efektin e “orës së rërës” dhe e bëjnë edhe kombinimin më të thjeshtë të duket i menduar dhe elegant.
Si të vishet: kombinohet me pantallona të ngushta, xhinse të ngushta ose funde të ngushta për të ruajtur balancën e siluetës. Xhaketa me fund të zgjeruar duket më bukur me pantallona të drejta, ndërsa modelet me supe të theksuara mund të vishen edhe mbi fustane. Janë po aq aktuale si ngjyrat neutrale, ashtu edhe ngjyrat e forta.
2. Bluzë gjysmë transparente
profimedia
Bluzat transparente mbeten ndër hitet kryesore të sezonit, por në një version më të sofistikuar. Rrjeta plotësisht e zhveshur pa detaje po del nga moda, ndërsa në plan të parë vijnë modelet me qëndisje, printime ose zbukurime rreth qafës, si fjongo dhe lidhëse. Veçanërisht të kërkuara janë pjesët e lehta prej tili dhe organze.
Si të vishet: ideale mbi sutjenat e butë prej dantelle ose një top në ngjyrë lëkure. Kombinohen shkëlqyeshëm me pantallona me bel të lartë, funde të ngushta dhe xhinse. Bluzat me fjongo përshtaten lehtë në kombinime zyre, ndërsa modelet fluide janë perfekte për dalje në mbrëmje. Shtresëzimi është i dëshiruar dhe i jep thellësi pamjes.
3. Resa në forma të papritura
Backgrid
Resat mbeten në modë, por në një formë të rifreskuar. Në vend të skajeve klasike, tani shfaqen në versione maksi te aksesorët ose si resë të rregulluara në formë xhufkash. Më së shpeshti i shohim te çantat, këpucët, bizhuteritë, por edhe te veshjet.
Si të vishet: për ato që nuk janë gati për guxim të madh, aksesorët janë fillimi ideal. Veshjet me resë kombinojini me pjesë të thjeshta, pa dekor shtesë. Resat sjellin dinamikë dhe lëvizje, prandaj duken veçanërisht bukur në funde, xhaketa dhe fustane mbrëmjeje.
4. Çorape najloni me ngjyrë
The Image Direct
Një nga trendet më interesante të pranverës 2026 janë çorapet najloni me ngjyrë. Ato mund ta transformojnë në çast edhe kombinimin më të thjeshtë. Modelet e holla, gjysmë transparente janë perfekte për stilit romantik, ndërsa ngjyrat më të forta dhe më të dendura janë ideale për deklarata të forta mode.
Si të vishet: kombinohen me fustane, funde dhe pantallona të shkurtra. Duken më bukur me këpucë në të njëjtën ngjyrë ose në tone neutrale si e zeza apo bezha. Nëse çorapet janë të theksuara, pjesa tjetër e veshjes duhet të jetë më e qetë. Për punë zgjidhni nuanca të errëta, për mbrëmje ngjyra të forta.
5. Ngjyra kontrastuese
Backgrid
Pas disa sezonesh ku dominoi stili monokromatik, me kontraste të forta ngjyrash. rikthehet fuqishëm. Kombinimi i ngjyrave kontraste bëhet mënyra kryesore e shprehjes përmes modës. Mund të bashkohen pjesë me nuanca krejtësisht të ndryshme ose të zgjidhet veshje që tashmë ka blloqe ngjyrash të qarta.
Si të vishet: nisni thjesht, për shembull me një bluzë rozë dhe pantallona blu, ose një fund portokalli dhe top vjollcë. Për më guximtaret, ka fustane dhe komplete me kontraste të integruara. E rëndësishme është që ngjyrat të jenë të pastra dhe të ngopura.
6. Shtresëzim me materiale transparente
Splash
Pranvera 2026 inkurajon lojën me shtresa, sidomos kur bëhet fjalë për pëlhura transparente. Fundi i tejdukshëm, fustan i lehtë dhe rrjeta vishen në disa shtresa, duke krijuar efekte vizuale interesante pa rënduar siluetën.
Si të vishet: një fund i tejdukshëm mbi një fund bazë, një bluzë e hollë mbi një veshje të brendshme të thjeshtë ose një fustan i lehtë mbi pantallona. Për kombinime të përditshme mjaftojnë dy deri në tre shtresa, ndërsa kombinimet e mbrëmjes lejojnë më shumë kreativitet.
7. Aksesorët si theksi kryesor
AKM Images
Në pranverën 2026, aksesorët nuk janë më dytësorë. Çantat, këpucët dhe bizhuteritë bëhen pika qendrore e kombinimit. Në trend janë vathë të mëdhenj, çanta me forma të pazakonta dhe këpucë me dekor si resë, qëndisje dhe detaje metalike.
Si të vishet: rregulli është i thjeshtë. Nëse aksesorët janë të theksuar, veshja duhet të jetë më e thjeshtë. Vathët e mëdhenj shkojnë shkëlqyeshëm me një siluetë të pastër fustani, ndërsa çanta me resë funksionon perfekt me një kostum klasik. Kombinimi i materialeve dhe metaleve të ndryshme lejohet, por pa e tepruar.
Si t’i kombinoni me mençuri trendet
Më e rëndësishmja është të mos përpiqeni t’i vishni të gjitha trendet njëherësh. Mjafton të zgjidhni dy ose tre elemente që përshtaten natyrshëm me stilin dhe gardërobën tuaj. Pranvera 2026 ofron pjesë që kombinohen lehtë: një xhaketë me siluetë të theksuar me një fustan të thjeshtë dhe çorape najloni me ngjyrë, ose një bluzë transparente e kombinuar me pantallona me ngjyra dhe një çantë me resë. Rezultati është një pamje moderne, e veshshme dhe mbresëlënëse, pa shumë përpjekje. /Telegrafi/
Gjatë kësaj jave në Big Brother VIP Albania, në nominim ishin Brikena, Greta, Juela, Kristi, Krusita, Miri, Stenaldo dhe Rogerti, ndërsa publiku votoi për të shpëtuar banorin e preferuar.
Me pyetjen “Kë doni të shpëtoni?”, vendimi i shikuesve ishte vendimtar, dhe në fund banorja që u eliminua nga gara ishte Krusita.
Eliminimi i saj ka sjellë reagime të shumta brenda shtëpisë, ku disa nga banorët u shprehën të surprizuar dhe të mërzitur.
Tashmë, dinamika pritet të ndryshojë ndjeshëm, me strategji të reja, nominime më të forta dhe tensione gjithnjë e më të mëdha mes konkurrentëve të mbetur. /Telegrafi/
Banorët e Big Brother VIP Albania 5 zbuluan së fundmi të vërtetën pas rrengut të Vëllait të Madh me Kutinë e Pandorës së Artanit, duke i hedhur në pah lojërat dhe situatat e sajuara që i kishin mbajtur në tension.
Pas tre ditësh qëndrimi si “mysafir”, Luizi u largua përfundimisht nga shtëpia, duke lënë pas një mesazh të sinqertë për të gjithë banorët.
“U kërkoj falje atyre që mund t’i kem mërzitur vërtet. Doja të bëja vetëm humor. Kam kaluar shumë mirë dhe uroj të më fitoj më i miri. U uroj të gjithëve më të mirën. Fjalët e sinqerta janë: shijojeni. E keni marrë shumë seriozisht. Seriozisht merrni Vëllain e Madh, zarfet dhe lojërat. Ju dua shumë të gjithëve”, u shpreh Luizi përpara se të dilte nga shtëpia. /Telegrafi/
Mbushja e gabuar e makinës për larjen e enëve ul efikasitetin e larjes, rrit konsumin e energjisë dhe ngarkon në mënyrë të panevojshme pjesët kyçe të pajisjes
Shumë zakone të përditshme i kryejmë pothuajse automatikisht, pa menduar për pasojat që kanë në buxhetin tonë. Nga gabime të vogla në kuzhinë, te blerjet impulsive apo zakonet e këqija në mirëmbajtjen e shtëpisë, pikërisht këto rutina “të padukshme” mund të shpenzojnë ngadalë, por me siguri, para, shpesh pa e vërejtur fare. Shumica e familjeve e përdorin makinën për larjen e enëve pothuajse çdo ditë, por ekspertët paralajmërojnë se miliona njerëz i rendisin enët gabimisht, një gabim që me kalimin e kohës mund t’u kushtojë familjeve edhe mijëra euro.
Sipas ekspertit për makinat e larjes së enëve Endru Laflin nga organizata Which? dhe servisuesit të pajisjeve shtëpiake Stiv Nil, zakonet e gabuara gjatë mbushjes ulin efikasitetin e larjes, rrisin konsumin e energjisë dhe ngarkojnë pa nevojë komponentët kryesorë, duke shkurtuar ndjeshëm jetëgjatësinë e makinës, raporton Daily Express. Një nga problemet më të mëdha është mbingarkimi.
“Nëse enët janë shumë afër njëra-tjetrës, gryka e ujit nuk mund të qarkullojë siç duhet dhe detergjenti nuk arrin në sipërfaqet që duhen pastruar”, tha Nil. Ai shtoi se pjatat duhet të jenë të ndara të paktën pesë milimetra dhe që të gjitha objektet të jenë qartë të dukshme. Kur makina është e mbingarkuar, spërkatëset mund të bllokohen, gjë që e detyron pajisjen të punojë më fort dhe rrit rrezikun e defekteve mekanike, transmeton Telegrafi.
Një tjetër keqkuptim i shpeshtë është shpëlarja paraprake e enëve. Laflin thekson se makinat moderne për larjen e enëve janë projektuar për t’u përballur me mbetjet ushqimore dhe tashmë kanë faza të integruara të paralarjes. “Shpëlarja paraprake nuk e përmirëson larjen dhe në fakt vetëm shpenzon ujë”, tha ai, duke shtuar se mbetjet e mëdha ushqimore gjithsesi duhet të hiqen, sepse objekte si kokrrat e misrit, kockat dhe farat mund të bllokojnë kullimin dhe të shkaktojnë dëmtime serioze.
Vendosja e saktë e takëmeve është një tjetër problem i shpeshtë. Kur lugët dhe pirunët futen njëri në tjetrin në shportat e posaçme, sipërfaqet e ndotura mbeten të mbuluara dhe nuk arrijnë uji dhe detergjenti. Me kalimin e kohës, kjo çon në larje më të shpeshta dhe kosto më të larta energjie. Vendosja e takëmeve në mënyrë të alternuar, lart-poshtë, ndihmon që kjo të shmanget dhe njëkohësisht siguron që thikat të mos pengojnë punën e spërkatësve.
Ekspertët paralajmërojnë gjithashtu se shumë njerëz nuk i rregullojnë shportat në makinën për larjen e enëve. Shumica e makinave lejojnë ndryshimin e lartësisë së shportës së sipërme dhe distancës mes mbajtëseve, gjë që përmirëson qarkullimin e ujit dhe parandalon dëmtimet që ndodhin kur pjatat e mëdha vendosen në hapësira të papërshtatshme.
Nil thotë se pikërisht këto gabime, në dukje të vogla, janë shkaku i shumë defekteve me të cilat ai përballet në praktikë. “Filtrat e bllokuar, pompat e dëmtuara dhe spërkatëset e thyera janë shpesh rezultat i mbushjes së gabuar dhe mungesës së mirëmbajtjes. Nëse nuk zgjidhen me kohë, ato mund ta shkatërrojnë plotësisht makinën tuaj për larjen e enëve”, paralajmëron ai. /Telegrafi/
Gjatë mbrëmjes së sotme në Big Brother VIP Albania u zhvillua një televotim i sajuar që i surprizoi banorët dhe publikun.
Tema e kësaj nate ishte tërësisht e stisur që nga Prime-i i kaluar, duke krijuar një lojë psikologjike të zgjuar për banorët.
Përmes këtij rrengu, Vëllai i Madh zgjodhi që dy banorët “të nominuar” të ishin Brikena dhe Miri, duke i futur ata në një situatë të tensionuar dhe plot emocione.
BBVA/YouTube
Të dy u nisën drejt studios për të mësuar fatin e tyre, ndërsa pritja ishte e mbushur me nervozizëm dhe kuriozitet.
Publiku dhe banorët e tjerë ndoqën me vëmendje momentin, duke u përballur me mundësinë e largimit të njërës prej tyre nga shtëpia.
Pavarësisht tensionit të krijuar, televotimi ishte thjesht një lojë e stisur, dhe pas njoftimit të rezultatit, si Brikena ashtu edhe Miri u rikthyen të qetë dhe të sigurt në shtëpi.
Ndërkohë, Rogerti u shfaq i nervozuar dhe shprehu pakënaqësinë e tij duke thënë se kjo ishte një lojë me hile, pasi nuk ishte ende në dijeni që televotimi ishte i sajuar. /Telegrafi/
Në një mbrëmje plot emocione dhe romantizëm brenda shtëpisë së Big Brother VIP Albania, surprizat nuk munguan as këtë të martë.
Një moment i veçantë tërhoqi vëmendjen e të gjithëve gjatë Prime-it, duke treguar një tjetër anë të ndjenjave mes banorëve.
Mateo, duke ndarë një gjest të ëmbël, i dedikoi Brikenës një poezi në italisht.
Në fund të recitimit, banorët u përqafuan, duke shfaqur afërsinë dhe simpati reciproke që po zhvillohet mes tyre.
“Dua ta falënderoj Mateon për këtë surprizë. Jam shumë e lumtur që i dhashë një shans për ta njohur Mateon, sepse është një djalë i mrekullueshëm. Dhe nëse dal, i uroj më të mirën”, komentoi Brikena pas momentit të veçantë.
Ky episod i shfaqjes risolli një frymë të ngrohtë dhe romantike në lojën brenda shtëpisë. /Telegrafi/
Drejtoria e Emergjencave dhe Sigurisë në Komunën e Prizrenit ka bërë të ditur se pas tërmetit me epiqendër në këtë territor, për momentin nuk janë raportuar incidente.
Situata mbetet e qetë dhe po monitorohet vazhdimisht nga institucionet përkatëse në bashkëpunim me Drejtorinë e Emergjencave dhe Sigurisë.
Qytetarët janë udhëzuar të ruajnë qetësinë, të mos krijojnë panik dhe të qëndrojnë vigjilentë. Ekipet emergjente janë në gjendje të plotë gatishmërie për çdo nevojë apo raportim.
Numrat për kontakt emergjent janë: • 112 – Qendra e Thirrjeve Emergjente • 192 – Policia e Kosovës • 193 – Shërbimi i Zjarrfikësve • 194 – Emergjenca Mjekësore
Komuna e Prizrenit falënderon qytetarët për bashkëpunimin dhe mirëkuptimin. /Telegrafi/
Reagimi i menjëhershëm i tifozit të Man United që nuk ka prerë flokët në më shumë se një vit, është bërë viral pasi ‘Djajtë e Kuq’ nuk ia dolën të fitojnë ndaj West Hamit.
Që nga emërimi i Michael Carrick si pasardhës i Ruben Amorimit, Djajtë e Kuq kanë qenë në një formë të shkëlqyer. United kanë mundur skuadra të mëdha si Manchester City, Arsenal, Fulham dhe Tottenham Hotspur në javët e fundit.
Të martën në mbrëmje, ata mbërritën në London Stadium me synimin për të regjistruar pesë fitore radhazi ndaj Ëest Ham, që po kalon një periudhë të vështirë.
Një tifoz i United, Frank Ilett, ishte shumë i interesuar për këtë ndeshje për shkak të një sfide madhështore që kishte nisur më shumë se një vit më parë.
Ilett, i njohur si “The United Strand”, kishte vendosur të mos prerë flokët derisa United të fitonte pesë ndeshje radhazi.
Të martën ishte momenti vendimtar: nëse United do të fitonte, ai do të bënte një prerje flokësh; nëse do të barazonte apo humbiste, sfida do të rivendosej përsëri.
Pas një pjesë të parë të kujdesshme që përfundoi 0-0, West Ham kaloi në avantazh në minutën e 50-të me një gol të Tomas Soucek.
Në kohën shtesë, Benjamin Sesko shënoi për të barazuar rezultatin në 1-1 dhe për të shpëtuar një pikë për Djajtë e Kuq.
❌💇🏽♂️ ¡El corte de pelo de ‘TheUnitedStrand’ tendrá que esperar!
👉🏼 El viral aficionado del Manchester United, Frank Ilett, seguirá con el pelo largo tras el empate de su equipo.
Për “The United Strand”, sfida u rivendos sërish dhe tani i duhen përsëri pesë fitore radhazi për të marrë atë prerje flokësh të pritur me padurim.
Në fund të ndeshjes, ai qëndroi ulur në karrige, i shokuar dhe pa fjalë. Më pas ai përshëndeti miqtë e tij dhe tha: “Ishte një ndeshje e çuditshme. Zemërthyer”.
Kujtojmë se pesë ndeshjet e ardhshme të United janë kundër Everton, Crystal Palace, Newcastle United, Aston Villa dhe Bournemouth./Telegrafi/
Presidenti amerikan, Donald Trump përsëri tha se Irani dëshiron të arrijë një marrëveshje bërthamore, ndërsa paralajmëroi se “do të ishin budallenj nëse nuk do ta bënin”.
“Sipas jush e dini, aktualisht kemi një flotë të madhe që po shkon drejt Iranit. Do të shohim çfarë ndodh. Mendoj se ata duan të bëjnë një marrëveshje. Do të ishin budallenj nëse nuk e bënin”, tha lideri amerikan për Fox Business.
“Ne e shkatërruam fuqinë e tyre bërthamore herën e kaluar dhe do të shohim nëse do të shkatërrojmë më shumë këtë herë”, shtoi 79-vjeçari, para se të përsëriste se Irani dëshiron të bëjë një marrëveshje - por që ajo duhet të jetë një “marrëveshje e mirë”.
“Asnjë armë bërthamore, as raketa, as kjo, as ajo, të gjitha gjërat e ndryshme që dëshiron”, vazhdoi Trump, shkruan cnn.
Presidenti javën e kaluar tha se SHBA kishte pasur “bisedime shumë të mira” me Iranin, pasi delegacione nga të dy vendet morën pjesë në diskutime indirekte në Oman të premten.
Trump do të takohet me kryeministrin izraelit, Benjamin Netanyahu në Shtëpinë e Bardhë të mërkurën, ndërsa burime izraelite i thanë CNN-së se Netanyahu ka ndërmend t’i paraqesë informacione të reja mbi kapacitetet ushtarake iraniane. /Telegrafi/
Agjencia e Menaxhimit Emergjent (AME) ka njoftuar se sonte në orën 22:05 territori i Kosovës, përkatësisht zona juglindore Prizren–Shtërpcë, është goditur nga një tërmet me magnitudë 4.8 sipas shkallës Rihter dhe intensitet VI ballë të shkallës së Merkalit.
Sipas AME-së, tërmeti ka pasur thellësi hipoqendrore prej rreth 5 kilometrash, ndërsa epiqendra është lokalizuar rreth 23 kilometra në lindje të Prizrenit, me koordinata gjeografike 42.144 dhe 20.985.
“Tërmeti është ndier dukshëm nga qytetarët në pjesë të ndryshme të Kosovës dhe, për shkak të forcës së tij, ka pasur potencial për të rrezikuar qytetarët dhe për të shkaktuar dëme materiale të lehta” thuhet në njoftimin e Agjencisë së Menaxhimit Emergjent.
Agjencia ka theksuar se kjo ngjarje konfirmon se zona e Prizrenit është zonë sizmogjene aktive, ashtu siç parashihet edhe në Hartën e Rrezikut Sizmik për Kosovën.
“Deri në këto momente, nuk ka raportime zyrtare për dëme serioze apo persona të lënduar, ndërsa institucionet përgjegjëse janë në gatishmëri të plotë dhe po e monitorojnë situatën në vazhdimësi” theksohet në njoftim.
AME u ka bërë thirrje qytetarëve që të ruajnë qetësinë dhe të informohen vetëm nga burime zyrtare, ndërsa në rast të lëkundjeve të tjera të qëndrojnë larg dritareve dhe objekteve që mund të bien, të strehohen nën tavolina të forta ose pranë mureve mbajtëse dhe pas lëkundjeve të dalin me qetësi në hapësira të hapura.
Po ashtu, qytetarët këshillohen të mos përdorin ashensorët, të shmangin lëvizjet e panevojshme me automjete, të kontrollojnë banesat për dëmtime eventuale dhe të ndihmojnë personat në nevojë.
Për emergjenca, qytetarët mund të kontaktojnë numrat 112, 193 dhe 192, të cilët janë në dispozicion 24 orë në ditë. /Telegrafi/
Kosova ka shënuar aktivitet sizmik gjatë ditëve të fundit, sipas të dhënave të publikuara nga faqja ndërkombëtare VolcanoDiscovery, e cila monitoron lëvizjet sizmike në mbarë botën.
Sipas këtyre të dhënave, në 24 orët e fundit në Kosovë janë regjistruar disa tërmete me magnitudë mbi 2 ballë, ku më i forti ka arritur magnitudën 4.8.
Raporti tregon se gjatë shtatë ditëve të fundit në territorin e Kosovës janë evidentuar gjithsej 15 tërmete, me magnitudë maksimale deri në 4.8.
Nga këto, një tërmet ka qenë mbi magnitudë 4, një tjetër ka qenë ndërmjet magnitudës 3 dhe 4, gjashtë tërmete janë regjistruar në intervalin nga 2 deri në 3 ballë, ndërsa shtatë lëkundje të tjera kanë qenë nën magnitudë 2, të cilat zakonisht nuk ndihen nga qytetarët.
Të dhënat statistikore tregojnë se gjatë 12 muajve të fundit në Kosovë dhe zonat përreth janë regjistruar mbi 300 tërmete të magnitudave të ndryshme, shumica prej tyre me intensitet të ulët.
Në dhjetë vitet e fundit, numri i përgjithshëm i tërmeteve të regjistruara tejkalon shifrën prej 2 mijë.
Institucionet përgjegjëse vazhdojnë të monitorojnë situatën, ndërsa deri më tani nuk raportohet për dëme materiale apo persona të lënduar. /Telegrafi/
Tuner-i amerikan Renntech do të prodhojë vetëm dymbëdhjetë motorë për po aq automjete.
Kjo seri e kufizuar është një nderim për motorin ikonë Mercedes‑Benz M120 V12, i cili u përdor në modele të famshme si CLK GTR dhe Pagani Zonda.
M120 V12 është një motor atmosferik me bllok alumini, i zhvilluar për qëndrueshmëri dhe fuqi të lartë, dhe ka fituar statusin e një motori kult në historinë e Mercedesit.
Amerikanët e Renntechut po e rikthejnë këtë motor në “restomod” e tyre SEC Widebody.
Automobili, i cili i ngjan Mercedes SEC (C126), do të marrë motorin me kapacitet të rritur në 7.5 litra (nga 7.3 litra origjinal), i cili prodhon 660 kuaj/fuqi dhe 840 Nm çift‑rrotullues.
RennenTech thotë se e ka ndërtuar këtë motor vetë, bazuar në planet origjinale, për të ofruar performancë të lartë me shpirt klasik. Ata e kanë quajtur motorin Sledgehammer.
Ky model do të prodhohet vetëm në 12 kopje, dhe secili ka një interier të personalizuar për secilin pronar. /Telegrafi/
Federata e Sportit Shkollor të Kosovës ka konfirmuar se të gjithë nxënësit pjesëmarrës në programin “Drejt Malit”, i cili po zhvillohet në Qendrën e Skijimit në Brezovicë, janë të sigurt dhe në gjendje të mirë shëndetësore pas lëkundjeve sizmike që ndodhën sonte në rajon.
Në një njoftim për opinionin publik dhe prindërit, Federata thekson se stafi i programit është prezent në çdo moment pranë nxënësve, duke bashkëpunuar ngushtë me Forcën e Sigurisë së Kosovës (FSK) dhe strukturat përgjegjëse të qendrës së skijimit.
“Janë kryer verifikimet e nevojshme në hapësirat e akomodimit dhe aktivitetit, dhe nuk është evidentuar asnjë rrezik apo incident,” thuhet në njoftim.
Sipas Federatës, situata po monitorohet vazhdimisht, ndërsa janë në koordinim të plotë me institucionet përkatëse për të garantuar sigurinë maksimale të nxënësve dhe stafit.
Federata gjithashtu ka bërë thirrje për qetësi, duke i siguruar prindërit dhe opinionin publik se siguria dhe mirëqenia e nxënësve mbeten prioritet absolut.
“Çdo informacion i ri do të komunikohet në mënyrë zyrtare”, përfundon njoftimi.
Ky njoftim vjen në një moment kur lëkundjet sizmike kanë krijuar shqetësim në rajon, por falë koordinimit të institucioneve dhe masave të marra në kohë, situata në Brezovicë mbetet nën kontroll./Telegrafi/
Manchester United ka luajtur baras me rezultat 1-1 në udhëtim ndaj West Hamit në kuadër të javës së 26-të në elitën e futbollit anglez.
Rastin e parë serioz vendasit e patën në minutën e 13-të me anë të Crysencio Summerville, por goditjen e tij të bukur e priti për mrekulli Senne Lammens.
Në minutën e 23-të West Hami pati një tjetër rast të mirë shënimi, por goditjen e Aaron Ëan-Bissaka e bllokuan mbrojtësit kundërshtar.
Vendasit ia dolën të realizojnë golin e epërsisë në minutën e 50-të përmes Tomas Soucek që realizoi për 1-0 pas asistimit nga Jarrod Bowen.
Mysafirët menduan se barazuan rezultatin në minutën e 63-të kur Casemiro dërgoi topin në rrjetë për 1-1, por goli u anulua nga VAR-i për pozicion jashtë loje.
Në minutën e 76-të Benjamin Sesko pati një gjuajtje të bukur me kokë, por portieri vendas bëri një pritje të mrekullueshme për t’ia mohuar golin.
Ishte pikërisht sulmuesi slloven ai i cili realizoi në minutat shtesë të takimit për të barazuar rezultatin në 1-1 pas një krosimi të bukur nga Bryan Mbeumo.
Pas këtij barazimi Unitedi ngjitet në pozitën e katërt në tabelë dhe ka 45 pikë të grumbulluara./Telegrafi/
Agjencia për Menaxhimin e Fatkeqësive dhe Emergjencave (AFAD) njoftoi se në qytetin Kemah të provincës Erzincan ka ndodhur një tërmet me magnitudë 4.1 shkallësh të Rihterit.
Sipas informacioneve të dhëna nga AFAD, tërmeti u regjistrua në orën 00:38 të natës dhe epiqendrën e kishte në një thellësi prej 7.02 kilometrash nën sipërfaqen e tokës.
Komuna e Prishtinës ka dalë me njoftim rreth tërmetit me magnitudë 4.8 ballë të shkallës Rihter që ka goditur juglindjen e Kosovës, përkatësisht zonën Prizren–Shtërpcë, duke u ndier edhe në disa pjesë të tjera të vendit.
Sipas njoftimit zyrtar, deri më tani nuk ka raportime për persona të lënduar apo për dëme serioze materiale, ndërsa institucionet përkatëse janë duke e monitoruar situatën në vazhdimësi.
“Tërmeti është ndier në disa pjesë të vendit, por deri tani nuk ka raportime për të lënduar apo dëme serioze. Institucionet përkatëse po e monitorojnë situatën në vazhdimësi”, thuhet në njoftimin e Komunës së Prishtinës.
Komuna ka publikuar edhe udhëzime për qytetarët, duke i këshilluar që në rast të lëkundjeve të tjera të qëndrojnë larg dritareve dhe objekteve që mund të bien, të strehohen nën tavolina të forta ose pranë mureve mbajtëse, si dhe pas lëkundjeve të dalin me kujdes në hapësira të hapura.
Po ashtu, qytetarët këshillohen të mos përdorin ashensorët, të shmangin lëvizjet e panevojshme dhe të informohen vetëm nga burime zyrtare.
Për raste emergjente, qytetarët janë ftuar të kontaktojnë numrat 0800 122 33 dhe 0800 122 44.
Komuna e Prishtinës ka bërë të ditur se çdo informacion i ri do të publikohet përmes kanaleve zyrtare. /Telegrafi/
Një moment i veçantë ka mbushur shtëpinë e Big Brother me emocione të forta, duke prekur jo vetëm banorët, por edhe të gjithë ata që e kanë ndjekur nga ekrani.
Luizi, fituesi i Big Brother VIP Albania 2, doli nga ambientet e shtëpisë dhe pikërisht aty ku tre vite më parë këndoi këngën e tij të famshme për Kiarën, “Me Ty”, u surprizua nga Kiara dhe vajza e tij, Luna Mari.
BBVA/YouTube
Banori nuk i përmbajti lotët dhe me një mesazh për të gjithë banorët, ai shprehu emocionet e tij: “Ja çfarë fitova nga Big Brother. Më besoni, njerëzit jashtë duan më shumë këtë se çdo gjë tjetër. Kështu që dashuroni, dashuroni, dashuroni”.
Ky moment i veçantë tregoi se emocionet dhe lidhjet familjare janë gjithmonë më të forta se çdo konkurrencë, duke bërë që të gjithë të ndihen të prekur nga surpriza e papritur. /Telegrafi/
Disa njerëz thjesht rrezatojnë një energji që i bën të gjithë përreth tyre të ndihen më mirë. Ata kanë një qetësi, ngrohtësi dhe një prani që nuk kërkon vëmendje, por të gjithë e vënë re. Ata nuk janë këmbëngulës, nuk janë të zhurmshëm, por forca e tyre e butë, stabiliteti i shëndetshëm dhe vendosmëria i bëjnë ata llojin e njerëzve që të gjithë duan në rrethin e tyre.
Por cilat janë ato?
Demi
Demi është një person tek i cili mund të mbështeteni. Qetësia e tyre vepron si një spirancë kur gjithçka tjetër bëhet kaotike. Ata nuk hyjnë në konflikte pa arsye, gjithmonë mendojnë praktikisht dhe përpiqen të ruajnë paqen. Njerëzit i duan pranë sepse u ofrojnë një ndjenjë sigurie. Përveç kësaj, besnikëria dhe parashikueshmëria e tyre do të thotë se mund të mbështeteni tek ata në kohë të mira dhe të këqija.
Peshorja
Peshorja sjell ekuilibër kudo që shfaqet. Preferenca e tyre për harmoninë dhe drejtësinë i bën ndërmjetës idealë në situata të tensionuara. Njerëzit i duan sepse janë të sinqertë, qetësues dhe rrallë lëndojnë dikë. Ata kanë dhuratën për ta bërë çdo person të dukshëm dhe të pranuar, pa pasur nevojë për konkurrencë. Afërsia e tyre shpesh shëron më shumë sesa e kuptojnë.
Peshqit
Peshqit kanë një ngrohtësi dhe dhembshuri të natyrshme. Njerëzit përreth tyre ndihen të kuptuar, edhe kur nuk thonë asgjë. Peshqit nuk gjykojnë, nuk imponohen dhe nuk konkurrojnë - ata thjesht dëgjojnë dhe japin zemrën e tyre. Është kjo inteligjencë emocionale e qetë që i bën ata jashtëzakonisht të dëshirueshëm në çdo formë të marrëdhënies së ngushtë. Njerëzit ndihen të sigurt, të parë dhe të pranuar pranë tyre.
Login
Shutterstock
Backgrid
profimedia
Backgrid
The Image Direct
Backgrid
Splash
AKM Images
BBVA/YouTube
BBVA/YouTube
