Senatori i Missourit, Josh Hawley, ka marrë vëmendjen e shumë njerëzve gjatë një seance dëgjimore në Kongres të martën, pasi i ka bërë disa pyetje drejtorit ekzekutiv të Netflix-it, Ted Sarandos, dhe rreth asaj që sipas tij, përmbajtja e shërbimit të transmetimit promovon "ideologjinë transgjinore".

Sipas mediave të huaja, përcjell Telegrafi, pasi bëri një sërë pyetjesh në lidhje me praktikat e punës në Netflix, Hawley ndryshoi papritur drejtim dhe e pyeti drejtorin ekzekutiv në lidhje me përmbajtjen e shfaqjeve për fëmijë në platformë.

“Pse kaq shumë përmbajtje e Netflix për fëmijë promovon një ideologji transgjinore?”, pyeti fillimisht Hawley.

Sipas tij, “pothuajse gjysma e përmbajtjes suaj për fëmijë - po flas për fëmijë të mitur tani, nuk po flas për adoleshentë, fëmijë të mitur - promovon një axhendë ideologjike transgjinore”.

Megjithatë, siç theksojnë mediat, edhe pse Hawley vazhdoi duke thënë se ai "thjesht po shqyrtonte të dhënat", ai nuk përmendi një burim për shifrat e tij.

- YouTube www.youtube.com

“Në Netflix, do të zbuloni se një sasi e madhe, dhe e them këtë si prind me tre fëmijë të vegjël, një sasi e madhe e programeve të fëmijëve tuaj kanë këtë ideologji dhe axhendë”, ka thënë Hawley. “A është ky një pozicion avokimi për Netflix? A është ky një angazhim ideologjik që keni?”.

“Netflix nuk ka asnjë axhendë politike”, u përgjigj Ted Sarandos, vetëm për t’u kritikuar përsëri nga Hawley, i cili vazhdoi të pyeste pse biblioteka e fëmijëve e Netflix ishte “plot me përmbajtje shumë të seksualizuar dhe shumë të diskutueshme”.

"Nuk paraqisni personazhe transgjinorë, histori transgjinore, tema transgjinore?", ka vazhduar me një tjetër pyetje senatori Hawley.

Hawley më pas vazhdoi të përsëriste pretendimin e tij se “gjysma” e bibliotekës së fëmijëve të Netflix përmbante shfaqje “shumë të diskutueshme” dhe “shumë të seksualizuara”.

“Senator, nuk kam asnjë ide se nga vjen ky numër”, u përgjigj Sarandos. “Nuk besoj se kjo ka qenë përvoja juaj personale”.

I ofenduar, Hawley vazhdoi duke thënë se nuk i lejon fëmijët e tij të shikojnë asgjë në Netflix nëse nuk e sheh më parë përmbajtjen.

“Nuk kam besim në atë që është në platformën tuaj”, tha më tej Hawley. /Telegrafi/

Raheem Sterling pritet të ketë arkëtuar një shumë shumë të madhe parash pas marrëveshjes për ndërprerjen e kontratës me Chelsean.

Chelsea dhe Sterling i dhanë fund bashkëpunimit muajin e kaluar, pasi palët ranë dakord me mirëkuptim të ndërpresin kontratën, pas një periudhe zhgënjyese prej tre vitesh e gjysmë në Londrën Perëndimore.

Reprezentuesi anglez iu bashkua “Bluve” në vitin 2022, duke u transferuar nga Manchester City për 50 milionë eurodhe nënshkroi një kontratë pesëvjeçare në “Stamford Bridge”, me një pagë të raportuar prej 325 mijë eurosh në javë.

Megjithatë, ai nuk arriti të përmbushë pritshmëritë, duke realizuar vetëm 19 gola në 81 paraqitje.

Sterling ra nga preferencat nën drejtimin e ish-trajnerit Enzo Maresca dhe u huazua te Arsenali për sezonin 2024/25, ku shënoi vetëm një gol në 28 ndeshje.

Pavarësisht largimit të Marescës nga Chelsea muajin e kaluar, nuk kishte asnjë rrugë rikthimi për Sterlingun. Klubi londinez konfirmoi më 28 janar se ai ishte larguar nga klubi me marrëveshje të ndërsjellë.

Sipas Press Association, Sterling ka hequr dorë nga një pjesë e shumës që i takonte për 18 muajt e mbetur të kontratës, për të siguruar largimin nga klubi.

Megjithatë, ish-drejtori menaxhues i Liverpoolit, Christian Pursloë, i cili kishte mbikëqyrur transferimin e Sterlingut nga QPR gjatë kohës së tij në “Anfield”, beson se sulmuesi ka siguruar gjithsesi një pagesë shumë të madhe si pjesë e marrëveshjes për t’u larguar nga Chelsea.

Duke folur në podcastin The Football Boardroom, ish-drejtori ekzekutiv i Aston Villas, Purslow, u shpreh se për një lojtar që të pranojë të ndërprejë kontratën, ai duhet të fitojë një shumë të madhe parash.

“Ne kemi përmendur shifrën nga 17 deri në 24 milionë euro, kjo është ajo që Raheem i detyrohej. Mua më duket se, nga këndvështrimi i Raheem dhe Chelseat, klubi do të synonte ta mbyllte këtë marrëveshje diku mes 15 dhe 20 milionë eurosh”.

“Dhe të mos harrojmë kontekstin që përmendët për çdo futbollist. Nëse agjenti i tij do të hynte në dhomë dhe do të thoshte: ‘Shikoni, kemi pasur një qasje nga klubi. Gjërat nuk po funksionojnë. Ata duan që ne të shqyrtojmë një ulje të shumës që na takon, në këmbim të pagesës së menjëhershme për ta mbyllur këtë çështje njëherë e përgjithmonë’”.

“Që lojtari të pranojë një gjë të tillë, ai duhet të shohë një mundësi për përfitim nga statusi i lojtarit të lirë”, ka deklaruar Purslow./Telegrafi/

Shoferët e autobusëve të NTP-së dhe automjeteve të ndërmarrjeve të tjera publike në Shkup, tani e tutje do të paguajnë vetë gjobat e shkeljeve në trafik, tha sot kryetari i Bashkisë së Shkupit, Orce Gjorgjievski.

Ai sqaroi se nëse një shofer kalon në të kuqe ose tejkalon shpejtësinë e lejuar, gjoba nuk do të paguhet nga ndërmarrja.
Ai tha se Bashkia e Shkupit ende nuk është në gjendjen në të cilën banorët e Shkupit meritojnë të jetojnë.

"Ende nuk e kemi rregulluar plotësisht situatën. Pse? Sepse po bëjmë gjithçka që mundemi deri në atomin e fundit, por na duhet kohë për të zgjidhur të gjitha proceset", tha ai.

Sa i përket çmimeve të parkingut, ai tha se nuk ka plan për rritjen e tyre.

"Ka institucione që paguajnë për shërbimet e parkimit, përfshirë punonjësit e Qytetit të Shkupit, me çmime preferenciale. Nuk do të ketë më diçka të tillë. Punonjësit këtu marrin një pagë dhe janë të njëjtë me qytetarët e tjerë në Shkup. Dhe do të paguajnë aq sa u nevojitet. Dikush nuk mund të paguajë 400 denarë, dhe ju paguani 1.400 për një biletë mujore. Të gjithë do të paguajnë shumën - do të jetë e njëjtë për të gjithë. Këtu nuk do të ketë tolerancë. Por kjo nuk do të thotë rritje e çmimeve, por vendosje e rendit", u përgjigj Gjorgjievski në pyetjen e një gazetari.

Gjykata Supreme e Kosovës ka pranuar gjithsej gjashtë ankesa administrative që kanë të bëjnë me rezultatet përfundimtare të zgjedhjeve të mbajtura më 28 dhjetor.

Zëdhënësja e Gjykatës Supreme, Antigona Uka, ka bërë të ditur se ankesat janë parashtruar nga subjekte të ndryshme politike dhe kandidatë, kryesisht kundër vendimeve të Panelit Zgjedhor për Ankesa dhe Parashtresa (PZAP).

Sipas saj, një ankesë është dorëzuar nga Partia Rome e Bashkuar e Kosovës, një tjetër nga Koalicioni PAI–PDAK–LPB, si dhe një ankesë nga Emilia Rexhepi, përfaqësuese e NDS-së. Po ashtu, një ankesë është paraqitur nga Partia e Re Demokratike – Nova Demokratski Stranka (NDS) nga Prizreni.

Ndërkohë, dy ankesa të veçanta janë dorëzuar nga Bekim Haxhiu, gjithashtu kundër vendimeve të PZAP-së.

Gjykata Supreme ka afat ligjor prej pesë ditësh për të shqyrtuar dhe vendosur lidhur me këto ankesa.

Endrick rikthehet sërish në qendër të tregut evropian. Sulmuesi i ri brazilian, i cili ka kontratë me Real Madridin deri në qershor të vitit 2030, është një nga emrat që po ngjall më shumë interes për afatin kalimtar të verës që po vjen.

Aktualisht, Endrick është i huazuar te Lyoni deri në fund të sezonit. Ndikimi i tij te skuadra franceze ka qenë i menjëhershëm dhe shumë pozitiv.

Ai është shndërruar në një lojtar kyç, me minuta të rregullta në dispozicion dhe një ndjenjë të qartë rritjeje konkurruese.

Lyon është shumë i kënaqur me paraqitjet e tij, aq sa ka lënë të kuptohet mundësia e zgjatjes së huazimit edhe për një sezon tjetër. Sipas tyre, vazhdimi i grumbullimit të minutave do të ishte thelbësor për zhvillimin e lojtarit.

Real Madridi, nga ana e tij, nuk e konsideron një transferim përfundimtar të Endrickut. Klubi madrilen ruan besim të palëkundur në potencialin e tij dhe është i bindur se ai do të ketë sukses në La Liga.

Megjithatë, brenda klubit pranohet se menaxhimi i tij në fillim të sezonit nuk ishte ideal, veçanërisht për shkak të minutazhit të kufizuar nën drejtimin e Xabi Alonsos.

Paris Saint-Germain nuk e ka humbur kurrë nga vëmendja Endrickun. Klubi parisien kishte tentuar ta transferonte atë edhe përpara kalimit të tij te Real Madridi dhe tani sheh një mundësi të re.

PSG e konsideron brazilianin si një përshtatje perfekte për projektin e tyre sportiv. Rinia, talenti dhe aftësia për të pasur ndikim të menjëhershëm janë cilësi shumë të vlerësuara në “Parc des Princes”.

Për këtë arsye, Paris Saint-Germain është i gatshëm të paraqesë një ofertë shumë të fortë financiare verën e ardhshme, një propozim luksoz që mund të vërë në provë vendosmërinë e klubit madrilen.

Në rrethet e PSG-së besohet se dëshira e lojtarit për vazhdimësi dhe minuta të rregullta mund të luajë në favor të tyre në një negociatë të mundshme./Telegrafi/

Në kuadër të angazhimeve të vazhdueshme për parandalimin e dukurive negative dhe rritjen e sigurisë në shkolla dhe përreth tyre, Policia në Vushtrri në bazë urdhëresës së lëshuar nga Gjykata ka realizuar kontrolle në gjashtë shkolla (të mesme të larta dhe të ulëta) në territorin e komunës.

Sipas njoftimit të lëshuar nga policia, gjatë realizimit të kontrolleve policore, në katër raste të ndara tek nxënës të ndryshëm janë gjetur dhe sekuestruar mjete të kundërligjshme, si një boks hekuri dhe tri mjete të mprehta (thika).

“Lidhur me rastet janë ndërmarrë veprimet e nevojshme policore, në koordinim me institucionet përkatëse. Policia do të vazhdojë me aktivitete parandaluese me qëllim të ofrimit të sigurisë në ambientet shkollore dhe ruajtjes së rendit dhe qetësisë publike”, thuhet në njoftim.

Dy persona thuhet se janë lënduar pasi një grumbull tullumbacesh të mbushura me gaz shpërthyen brenda ashensorit të një ndërtese banimi në Mumbai, duke shkaktuar një flakë zjarri të shkurtër që u kap nga kamerat e sigurisë.

Policia tha se një burrë dhe një grua pësuan djegie në incidentin, i cili ndodhi në Goregaon, një periferi perëndimore të qytetit bregdetar, të martën në mbrëmje.

Dhe pamjet e kamerave të sigurisë nga brenda ashensorit tregojnë një grua që hyn e para, e ndjekur nga një burrë që mbante më shumë se një duzinë tullumbacesh të paketuara brenda një qese të madhe polietileni.

Pak çaste më vonë, ndërsa një burrë tjetër përpiqet të hyjë në ashensor, tullumbacet ndizen papritmas, duke mbushur hapësirën e mbyllur me flakë.

Zjarri errëson për pak kohë kamerën përpara se të tre të dalin me nxitim nga ashensori.

Burri që mban tullumbacet shihet duke u përplasur në dysheme pasi del.

Policia tha se burri dhe gruaja e plagosur u trajtuan për djegie.

Nuk ishte e qartë se çfarë lloj gazi u përdor për të fryrë tullumbacet.

Heliumi, i përdorur zakonisht për tullumbacet, nuk është i ndezshëm.

Në të kundërt, balonat e mbushura me hidrogjen janë shumë të djegshme dhe mund të ndizen lehtë në hapësira të mbyllura ose pranë burimeve të nxehtësisë.

Autoritetet thanë se hetimet ishin duke u zhvilluar për të përcaktuar nëse është përdorur hidrogjen. /Telegrafi/

FC Ballkani është duke vazhduar me përforcime për pjesën e mbetur të sezonit, ndërsa kanë kompletuar marrëveshjen me bullgarin Stanislav Petkov.

21-vjeçari ka eksperiencë pavarësisht moshës së re, ngase ka luajtur në kampionatin slloven dhe atë bullgar.

Ai luan në pozitën e numrit 6, ndërsa Ballkani beson se do ta përforcojë dukshëm këtë pozitë me agresivitetin e tij.

Postimi i plotë pa ndërhyrje:

“𝐕𝐚𝐳𝐡𝐝𝐨𝐣𝐦𝐞̈ 𝐩𝐞̈𝐫𝐟𝐨𝐫𝐜𝐢𝐦𝐞𝐭 𝐦𝐞 𝐛𝐮𝐥𝐥𝐠𝐚𝐫𝐢𝐧 𝐒𝐭𝐚𝐧𝐢𝐬𝐥𝐚𝐯 𝐏𝐞𝐭𝐤𝐨𝐯!

FC Ballkani vazhdon të përforcohet në afatin kalimtar, tani duke transferuar mesfushorin bullgar Stanislav Petkov. 21 vjeçari, i cili vjen me një përvojë të rëndësishme nga kampionatet si ai bullgar dhe slloven, do të jetë një lojtar i ri i rëndësishëm në ekipin tonë.

Petkov luan si mesfushor defensiv dhe pritet të përforcojë dukshëm këtë repart me agresivitetin dhe aftësitë e tij mbrojtëse. Me një vlerë tregu në rritje dhe eksperiencën e fundit te Tabor Sezana, ai është gati për aventurën e re me ne.

Mirësevjen në Suharekë, Petkov”, thuhet në komunikatë.

Ballkani aktualisht është lider në elitën e futbollit kosovar me 33 pikë pas 18 xhirove, tri mbi Prishtinën./Telegrafi

Banorët e shtëpisë më të madhe në vend janë zgjuar tashmë, duke nisur një ditë të re në Big Brother VIP Kosova nën një atmosferë pozitive.

Mëngjesi i sotëm u shoqërua me mot me diell, gjë që duket se ndikoi drejtpërdrejt në disponimin e banorëve.

I frymëzuar nga energjia e mëngjesit dhe muzika që u dëgjua në shtëpi, Londrimi nuk hezitoi të kërcejë, duke sjellë gjallëri dhe humor në ambientet e përbashkëta.

- YouTube youtu.be

Lëvizjet e tij u panë si një mënyrë për të nisur ditën me energji dhe pozitivitet.

Megjithatë, jo të gjithë e pritën mirë këtë moment. Kërcimi i Londrimit nuk u pëlqye aspak nga Labi, i cili reagoi ftohtë ndaj situatës, duke krijuar një kontrast mes atmosferës së gëzueshme dhe tensioneve të vogla që vazhdojnë të shfaqen mes banorëve. /Telegrafi/

Presidentja e Kosovës, Vjosa Osmani, ka njoftuar se gjatë Samitit Botëror të Qeverisjes ka zhvilluar një takim me kryeministrin e Mbretërisë së Eswatinit, Russell Mmiso Dlamini, takim gjatë të cilit është riafirmuar njohja e pavarësisë së Kosovës nga ky shtet afrikan.

Presidenti i Serbisë, Aleksandar Vuçiq, kishte deklaruar më herët se Eswatini është një nga shtetet që e ka tërhequr njohjen ndaj pavarësisë së Kosovës. Megjithatë, sipas presidentes Osmani, gjatë takimit është konfirmuar e kundërta.

Në një postim në Facebook, Osmani ka bërë të ditur se ka shprehur mirënjohjen e popullit të Kosovës për njohjen e hershme të pavarësisë nga Eswatini, si dhe gatishmërinë për thellimin e bashkëpunimit bilateral.

“Gjatë Samitit Botëror të Qeverisjes, pata kënaqësinë ta takoj Kryeministrin e Mbretërisë së Eswatinit, Russell Mmiso Dlamini. Shpreha mirënjohjen e popullit të Kosovës për njohjen e hershme të pavarësisë nga Eswatini, si dhe gatishmërinë për të avancuar drejt lidhjes së marrëveshjeve në fusha konkrete me interes të dyanshëm. Po ashtu diskutuam për koordinim më të ngushtë në forume multilaterale”, ka shkruar Osmani.

Pretendimet e Serbisë për çnjohje të pavarësisë së Kosovës janë përsëritur edhe në vitin 2023, kur presidenti Aleksandar Vuçiq kishte deklaruar se Beogradi kishte siguruar nëntë çnjohje të njohjes së Kosovës, duke përfshirë edhe Eswatinin.

Këto deklarata ishin mohuar atëkohë nga kryeministri i Kosovës, Albin Kurti.

Ndërkohë, në kuadër të Marrëveshjes së Ohrit, të cilën Serbia e ka pranuar por nuk e ka nënshkruar, Beogradi ishte zotuar që të ndalonte fushatën e lobimit kundër Kosovës.

Megjithatë, pavarësisht këtij zotimi, Serbia nuk e ka ndalur asnjëherë fushatën e saj për çnjohjet e pavarësisë së Kosovës.

Takimi i Osmanit me kryeministrin e Eswatinit shihet si një sinjal i qartë politik dhe diplomatik se njohja e Kosovës nga ky shtet mbetet në fuqi, duke sfiduar drejtpërdrejt narrativën e promovuar nga autoritetet serbe.

Pas mbledhjes së sotme në Qeveri, Sindikata e punonjësve administrativ, organeve gjyqësore dhe shoqatave qytetare (SPAOGJSH) njoftoi se pranon formulën qeveritare për rritjen e pagave në administratë dhe gjyqësor.

Rritja, sipas kumtesës pas mbledhjes, do të zbatohet në tre këste nga 8% në vit (në vend të 10% si kërkesë sindikale), dhe pagesa duhet të fillojë në mars, me kusht që procedurat e brendshme të miratohen më parë dhe marrëveshjet kolektive të nënshkruhen nga institucionet.

Kryetari i SPAOGJSH, Trpe Deanoski, deklaroi se Qeveria e ka pranuar kërkesën sindikale "jo plotësisht", por si një hap të konsiderueshëm përpara ai tregoi pranimin e pagesës së shtesave të pagave.

"Për fat të keq, jo 10 përqind, por nuk i morëm vitin e kaluar. Megjithatë, tani Qeveria pranon t'i paguajë ato që tani e tutje, duke filluar nga marsi, në një mënyrë që të gjitha institucionet në administratën shtetërore dhe gjyqësorin, që do të thotë gjykatat, prokuroritë, do të duhet të nënshkruajnë marrëveshje kolektive individuale për të marrë këtë të drejtë", tha Deanoski.

Presidentja e Republikës së Kosovës, Vjosa Osmani, gjatë pjesëmarrjes në Samitin Botëror të Qeverisjes në Emiratet e Bashkuara Arabe, ka zhvilluar disa takime bilaterale me udhëheqës të vendeve pjesëmarrëse.

Presidentja Osmani u takua me Kryeministren e Mozambikut, Maria Benvinda Levy, me të cilën zhvilloi një diskutim, siç e përshkroi ajo, “përmbajtësor” mbi sfidat e përbashkëta dhe rëndësinë e bashkëpunimit ndërmjet dy shteteve. Ajo theksoi se partneritetet ndërkombëtare janë kyçe për adresimin e çështjeve globale dhe forcimin e marrëdhënieve dypalëshe.

Gjatë samitit, Presidentja Osmani u takua edhe me Kryeministrin e Mbretërisë së Eswatinit, Russell Mmiso Dlamini. Ajo shprehu mirënjohjen e popullit të Kosovës për njohjen e hershme të pavarësisë nga Eswatini dhe ritheksoi përkushtimin për forcim të bashkëpunimit në fusha me interes të ndërsjellë.

Në njoftimin e saj, Presidentja Osmani theksoi se diskutimet përfshinë edhe mundësinë e lidhjes së marrëveshjeve konkrete, si dhe nevojën për koordinim më të ngushtë në forume multilaterale.

Sipas saj, Kosova mbetet e përkushtuar ndaj partneriteteve të ndërtuara mbi respekt të ndërsjellë dhe një vizion të përbashkët për paqe dhe zhvillim./Telegrafi/

Agjencia amerikane e inteligjencës, CIA, ka njoftuar se pas 83 vitesh po shuhet The World Factbook, publikimi më i njohur informativ në botë, i cili për një kohë të gjatë ka shërbyer si një lloj “enciklopedie globale”.

Në këtë publikim, CIA paraqiste informacione bazë për çdo cep të botës, ndërsa ai u shërbente agjencive të inteligjencës, mediave dhe individëve anembanë globit për t’u informuar mbi gjendjen në zona të ndryshme të planetit.

Kjo bazë e të dhënash përmbante për çdo shtet të botës informacionet më themelore (gjeografia, popullsia, sistemi politik, ekonomia, fuqia ushtarake), por edhe detaje të tjera që ishin të dobishme për studiuesit dhe analistët e rajoneve të caktuara.

CIA ka vendosur ta mbyllë këtë publikim për shkak se formati i World Factbook është vjetruar, raporton politico.

Publikimi ishte konceptuar si një referencë statike që përditësohej një herë në vit ose periodikisht, ndërkohë që sot komuniteti i inteligjencës përdor baza dinamike të dhënash, burime në kohë reale dhe platforma analitike të integruara që rifreskohen vazhdimisht, gjë që e ka bërë Factbook-un shumë të ngadaltë.

Po ashtu, një pjesë e madhe e të dhënave që ofronte Factbook sot janë më të qasshme dhe përditësohen më shpesh përmes institucioneve si Banka Botërore, Kombet e Bashkuara dhe FMN-ja.

Pas mbylljes formale të World Factbook, CIA nuk do të ketë një publikim të ngjashëm dhe ka paralajmëruar se do të fokusohet në analiza më të thelluara. Të dhënat bazë, siç theksojnë, do t’ua lënë institucioneve të tjera që publikojnë statistika të tilla.

Natyrisht, një faktor në marrjen e vendimit për mbylljen e Factbook ishte edhe aspekti financiar.

Mirëmbajtja e publikimit përbënte një barrë teknike dhe kadrovike, pasi kërkonte verifikim të vazhdueshëm të të dhënave dhe marrjen e vendimeve politikisht të ndjeshme mbi statusin e shteteve dhe territoreve, ndërsa përfitimi nuk e justifikonte më këtë përpjekje. /Telegrafi/

Lionel Messi po planifikon tashmë një rikthim të mundshëm në Barcelonë në të ardhmen, edhe pse ende nuk është përcaktuar asnjë afat kohor konkret, raporton “Marca”.

Sipas mediumit spanjoll, ylli argjentinas e ka bërë të qartë dëshirën e tij për t’u rikthyer në klubin katalanas në një moment të caktuar, por një kthim i tillë nuk do të lidhet me zgjedhjet e ardhshme presidenciale të Barcelonës, duke hedhur poshtë spekulimet se rikthimi i tij do të përdorej si kartë politike.

Aktualisht, Messi është plotësisht i përqendruar te Inter Miami dhe po përgatitet për atë që pritet të jetë Kupa e fundit e Botës në karrierën e tij, çka ka bërë që çdo hap konkret drejt Barcelonës të shtyhet për më vonë.

Vizita e tij e fundit në “Camp Nou” ka rindezur menjëherë spekulimet mes tifozëve dhe mediave, megjithatë ende nuk ka qartësi se çfarë roli do të kishte Messi në rast të një rikthimi, nëse do të ishte si lojtar, ambasador apo pjesë e strukturave të klubit.

Messi la pas një trashëgimi të pakrahasueshme në Barcelonë, duke realizuar 672 gola dhe dhuruar 303 asistime në 778 paraqitje zyrtare me fanellën blaugrana.

Gjatë asaj periudhe, ai fitoi 35 trofe me klubin, përfshirë 10 tituj në La Liga dhe katër trofe të Ligës së Kampionëve, duke e vulosur përfundimisht statusin e tij si lojtari më i madh në historinë e Barcelonës./Telegrafi

Ish-gruaja e Bradley Cooper, aktorja Jennifer Esposito, ka zbuluar se mund të jetë e pastrehë pasi e ka hipotekuar atë për të financuar debutimin e saj regjisorial, dramën e vitit 2023 “Fresh Kills”.

Esposito nënshkruan skenarin dhe prodhimin në film dhe luan rolin kryesor, dhe foli për pasojat e vendimit të saj në një video në rrjetet sociale.

"Duket shumë keq tani sepse qava. Po largohem nga shtëpia ime që e kam hipotekuar për të bërë këtë film", tha Esposito në fillim të videos.

Ajo deklaroi se ishte e zhgënjyer nga mungesa e mbështetjes nga kolegët e saj.

"Jam e zhgënjyer sepse kolegët e mi nuk më mbështetën. Pas kësaj, njerëzit që janë në qendër të vëmendjes nuk mund të bëjnë një nder dhe të thonë: 'Faleminderit, shikojeni këtë film'. Mendova: 'E dini çfarë? Askush nuk i detyrohet asgjë askujt'. Pas kësaj e pyeta veten: 'A i detyrohemi njëri-tjetrit diçka? A i detyrohemi diçka si qenie njerëzore. Ndoshta kjo është arsyeja pse jemi në këto probleme. Mendoj se i detyrohemi diçka. I detyrohemi njëri-tjetrit mirësjellje", tha ajo.

Esposito, e cila portretizon Francine-n, gruan e një bosi mafioz të Nju Jorkut në vitet 1980, në filmin "Fresh Kills" foli më parë për vendimin për të financuar vetë filmin e saj të parë si regjisore dhe skenariste. Në një intervistë me KTLA, ajo shpjegoi pse ishte e gatshme të merrte një rrezik kaq të madh.

"Ky qytet të ka thënë për vite me radhë se çfarë mund dhe çfarë nuk mund të bësh. Më erdhi në majë të hundës kjo dhe mendova: 'Pse po i kërkoj botës të besojë tek unë, unë duhet të besoj tek vetja.' Kjo është arsyeja pse vendosa të investoj paratë e mia. A do të jem më e lumtur një ditë sepse shtëpia ime është shlyer, apo do të jem më e lumtur sepse më në fund i dhashë vetes mundësinë që e kam pritur kaq gjatë? Kjo është arsyeja pse vendosa ta bëj", tha ajo.

"Fresh Kills" zhvillohet në Staten Island në fund të viteve 1980 dhe ndjek Rose LaRusso, një grua të re kurioze që zbulon se babai i saj është një shef mafioz gjithnjë e më me ndikim.

Si kujtesë, Jennifer dhe Bradley u takuan dhe filluan të dilnin bashkë në vitin 2006, dhe lidhja e tyre nuk ishte ende publike derisa u panë së bashku në Golden Globes dhe u fejuan në tetor 2006. Ata u martuan në dhjetor të të njëjtit vit, por martesa mori fund shpejt, pasi Esposito paraqiti kërkesë për divorc në maj 2007, e cila u finalizua në nëntor të atij viti. /Telegrafi/

Juglindja e Shqipërisë po përjeton prej disa orësh një situatë të shtuar sizmike, me lëkundje të njëpasnjëshme që po mbahen nën vëzhgim nga specialistët dhe autoritetet.

Tërmeti më i fundit është regjistruar pak minuta më parë dhe i është shtuar serisë së goditjeve të lehta, që janë ndjerë në këtë zonë gjatë ditës së sotme, 5 shkurt.

Sipas të dhënave paraprake të publikuara nga instituti sizmologjik, lëkundja ka pasur një magnitudë 3.2 ballë të shkallës Rihter, ndërsa epiqendra është identifikuar në fshatin Hoçisht, në bashkinë Devoll.

Thellësia e tërmetit raportohet të ketë qenë relativisht e vogël, çka ka bërë që lëkundjet të ndihen nga banorët përreth, megjithëse me intensitet të ulët.

Autoritetet lokale dhe strukturat e emergjencave civile janë në ndjekje të vazhdueshme të situatës. Ato konfirmojnë se, për momentin, nuk ka të dhëna për persona të lënduar apo pasoja materiale, ndërsa monitorimi do të vijojë për çdo ndryshim të mundshëm. Gjatë ditës së djeshme, 4 shkurt, një tërmet u regjistrua në Korçë.

Studentët shqiptarë të drejtësisë të zhgënjyer nga përgjigja e Ministrisë së Drejtësisë, e cila nuk po lejon që provimi i jurisprudencës të mbahet edhe në gjuhën shqipe, po vetëm në atë maqedonase. Mevlan Ademi nga iniciativa studentore, paralajmëron se mund të përshkallëzojnë nisëm e tyre me protesta nëse situata mbetet e pazgjidhur.

“Jemi të zhgënjyer nga përgjigja e paqartë juridike nga Ministria e Drejtësisë. Provimi i jurisprudencës ka për qëllim vlerësimin e njohurive juridike e jo atyre gjuhësore, siç e kishin arsyetuar të njëjtit. Ende nuk kemi përgjigje nga disa të adresuarit tanë të peticionit, gjithsesi u bëjmë thirrje institucioneve dhe deputetëve të reagojnë për të njëjtën. Ish-ministri i Drejtësisë ka depozituar propozim-ligjin që zgjidh problematikën tonë, kështu që u mbetet deputetëve të veprojnë. Gjithsesi, kanë kaluar dy gjenerata të juristëve që kur e kemi adresuar këtë problematikë, prandaj nuk ka zgjidhje. Jemi duke e mbajtur hapur mundësinë e përshkallëzimit të iniciativës tonë me ndonjë protestë”, tha Mevlan Ademi, student.

Pas refuzimit të kërkesës së studentëve, nga Ministria thanë se provimi i jurisprudencës nuk mund të mbahet në shqip sepse shërben si test për njohjen aktive të gjuhës maqedonase, e cila, sipas tyre, është kusht ligjor për ushtrimin e profesioneve juridike. Duke e komentuar Ligjin për përdorimin e gjuhëve, nga Ministria e Drejtësisë thonë se zbatimi i ligjit nuk mund të shqyrtohet në mënyrë të izoluar, por në korrelacion me rregulloret e tjera relevante.

“Meqenëse sipas Ligjit për përdorimin e gjuhëve, gjuha maqedonase dhe alfabeti i saj cirilik është gjuhë zyrtare në të gjithë territorin e Republikës së Maqedonisë së Veriut dhe se, krahas gjuhës maqedonase, gjuhë zyrtare është edhe gjuha që flitet nga të paktën 20% e popullsisë që flet një gjuhë tjetër përveç maqedonishtes, kushti për njohjen aktive të gjuhës maqedonase është i domosdoshëm gjatë dhënies së provimit të jurisprudencës, e që në esencë paraqet kusht që të jepen të gjitha provimet e cekura që janë kusht për zgjedhjen e personit për gjyqtar, prokuror publik, avokat, noter dhe përmbarues”, thonë nga Ministria e Drejtësisë.

Nga Ministria e Drejtësisë thonë se Ligji për Provimin e Jurisprudencës nuk parashikon dhënien e provimit në gjuhë tjetër përveç maqedonishtes, ndonëse në ligj nuk ekziston dispozitë që e ndalon shprehimisht këtë, ndërsa Ligji për Përdorimin e Gjuhëve obligon institucionet të mundësojnë përdorimin e shqipes në të gjitha procedurat shtetërore.

Propozim-ligji që do ta lejonte provimin edhe në gjuhën shqipe ishte përgatitur në vitin 2024, por u hoq nga agjenda pas ndryshimit të pushtetit, ndërkohë që 385 studentë shqiptarë të juridikut kërkojnë përmes peticionit që provimi të jepet në gjuhën në të cilën studiojnë, si e drejtë e garantuar me ligj./TV21/

Gjykata e Lartë ka lënë në fuqi dënimin me burgim të përjetshëm për Ardjan dhe Florenc Çapjan, të dënuar për vrasjen e dyfishtë të Nezir dhe Gentjan Beqirit.

Vendimi u mor nga trupa gjykuese e përbërë nga gjyqtarët Sandër Simoni, Sokol Binaj dhe Enton Dhimitri, të cilët rrëzuan rekursin e paraqitur nga Ardjan Çapja, Florenc Çapja, Etjen Cani, Klajdi Dokoli dhe Ervis Bardhi, duke miratuar në tërësi vendimin e Apelit të Posaçëm të datës 15 nëntor 2023.

Më herët, Gjykata e Apelit Kundër Korrupsionit dhe Krimit të Organizuar kishte dënuar me burgim të përjetshëm Ardjan dhe Florenc Çapjan, si dhe Jorgo Lekun, për vrasjen e dyfishtë të babë e bir, Nezir dhe Gentjan Beqiri, ngjarje e ndodhur në vitin 2012.

Me këtë vendim të Gjykatës së Lartë, dënimet ndaj të pandehurve marrin formë të prerë, duke mbyllur përfundimisht një nga proceset më të bujshme gjyqësore të viteve të fundit.

Një person ka vdekur dhe tre të tjerë janë lënduar pasi një autobus me dy kate u përplas me këmbësorët në qendër të qytetit të Dublinit.

Ministri i drejtësisë i Irlandës e konfirmoi lajmin në parlamentin irlandez, duke shtuar se të plagosurit po trajtohen në spital.

Merret vesh se incidenti në rrugën për këmbësorë North Earl Street po trajtohet si një aksident rrugor, shkruajnë mediat e huaja, përcjell Telegrafi.

Shërbimet e emergjencës u thirrën pak pas orës 12:30 në kryqëzimin e Talbot Street dhe Marlborough Street.

Brigada e Zjarrfikësve të Dublinit tha se "mori raportime për një aksident rrugor që përfshinte një autobus dhe këmbësorë". /Telegrafi/

Presidenti i Ukrainës, Volodymyr Zelensky, në një intervistë për televizionin francez France 2, deklaroi se pasojat e luftës me Rusinë përbëjnë një kërcënim serioz për ekzistencën e shtetit ukrainas, por shprehu besimin se paqja mund të arrihet brenda një viti.

Ai tha se presidenti rus Vladimir Putin nuk ka frikë nga udhëheqësit evropianë, por sipas tij, frikësohet vetëm nga presidenti amerikan Donald Trump.

Sipas Zelenskyt, kjo është një fakt i padiskutueshëm, duke shtuar se “çfarëdo që Trump t’i thotë Putinit, nuk është çështja jonë”.

Zelensky rikujtoi gjithashtu se Trump ka shprehur dëshirën për t’i dhënë fund luftës përmes një kompromisi. Ukraina, tha ai, mbështet iniciativat amerikane për paqe, por nuk do të pranojë asnjë kompromis që cenon sovranitetin e saj.

Në fjalimin e tij në Forumin Ekonomik Botëror në Davos, Zelensky theksoi edhe një herë se vetëm demokracia nuk mjafton për ta ndalur Putinin, pasi ai nuk respekton rregullat dhe parimet e luftës.

Në intervistë, presidenti ukrainas kritikoi gjithashtu mungesën e presionit të mjaftueshëm ndaj Moskës, duke nënvizuar se çdo dialog me Rusinë duhet të zhvillohet mbi kushte të qarta, në mënyrë që të sjellë rezultate konkrete. /Telegrafi/