Pas lirimit me kusht të Haxhi Shalës, Dhomat e Specializuara të Kosovës kanë vendosur lirimin me kusht edhe të Bashkim Smakajt dhe Fadil Fazliut.

Sipas njoftimit zyrtar, më 10 shkurt 2026, Smakaj dhe Fazliu u liruan me kusht dhe u kthyen në Kosovë, pas rishikimit të fundit të paraburgimit nga Gjykatësi i Vetëm në çështjen gjyqësore të Prokurorit të Specializuar kundër Hashim Thaçit dhe të tjerëve, e njohur si “Çështja gjyqësore 12”.

Në vendimet e marra më 3 shkurt 2026, gjykatësi konstatoi se rrethanat kishin ndryshuar që nga rishikimi i fundit i paraburgimit në dhjetor 2025 dhe se vazhdimi i mbajtjes së tyre në paraburgim nuk ishte më i arsyeshëm dhe proporcional.

Edhe pse u vlerësua se ende ekziston një rrezik i kufizuar për pengim të procesit gjyqësor, gjykatësi arriti në përfundimin se e drejta themelore për liri peshon më shumë se këto rreziqe.

Lirohet Haxhi Shala

Si faktorë shtesë, u mor parasysh se koha e kaluar në paraburgim nga Smakaj dhe Fazliu tejkalon dënimin minimal që do të mund të shqiptohej në rast të shpalljes së fajësisë.

Po ashtu, gjykata theksoi se faza e paraqitjes së provave në procesin gjyqësor ndaj ish-krerëve të UÇK-së tashmë ka përfunduar, duke vlerësuar se çdo tentativë eventuale për pengim të procesit do të ishte e zbulueshme.

Gjykatësi konstatoi gjithashtu se nuk ekziston rrezik arratisjeje, veçanërisht duke pasur parasysh shumën e dorëzanisë financiare të ofruar nga të akuzuarit, e cila do të konfiskohej në rast shkeljeje të kushteve të lirimit.

Smakaj dhe Fazliu mbeten të akuzuar në gjykimin aktual dhe lirimi i tyre me kusht shoqërohet me një sërë masash dhe kufizimesh. Versionet e redaktuara publike të vendimeve janë publikuar në faqen zyrtare të Dhomave të Specializuara të Kosovës.

Nga DHSK-ja u rikujtua se, në përputhje me standardet ndërkombëtare të gjykimit të drejtë dhe Kushtetutën e Kosovës, paraburgimi para shpalljes së fajësisë lejohet vetëm kur ekzistojnë rreziqe konkrete dhe se këto rreziqe rishikohen çdo dy muaj nga gjykata. /Telegrafi/

Dhomat e Specializuara të Kosovës (DHSK) kanë dhënë detaje lidhur me vendimin për modifikimin e dënimit të Haxhi Shalës, i cili i hapi rrugë lirimit të tij me kusht.

Sipas njoftimit zyrtar, më 2 shkurt 2026, Kryetarja e DHSK-së, gjykatësja Ekaterina Trendafilova, vendosi të modifikojë dënimin e Shalës, duke përcaktuar kushte që do të zbatohen për pjesën e mbetur nga dënimi prej tre vjetësh.

Pas këtij vendimi, Haxhi Shala u lirua dhe u kthye në Kosovë më 10 shkurt 2026.

Sipas njoftimit thyhet se kryetarja Trendafilova mori parasysh disa faktorë, përfshirë shenjat e rehabilitimit të treguara nga Shala gjatë vuajtjes së dënimit.

Lirohet Haxhi Shala

Ajo theksoi se Shala i kishte drejtuar një letër personale, të shkruar me nismën e tij dhe pa ndihmë ligjore, në të cilën shprehte keqardhje për pasojat e veprimeve të tij ndaj personave që mund të kenë pësuar dëm.

Gjithashtu, u vlerësuan marrëdhëniet e tij pozitive familjare, mjedisi i qëndrueshëm i jetesës dhe rrjeti i gjerë shoqëror, të cilat, sipas gjykatës, tregojnë një perspektivë të arsyeshme për rehabilitim dhe riintegrim shoqëror.

Megjithatë, Kryetarja theksoi se veprat penale për të cilat Shala u shpall fajtor janë të rënda, por konstatoi se letra e tij përbënte një shenjë të distancimit të sinqertë nga veprimet kriminale, pas një periudhe reflektimi.

Nga DHSK-ja u sqarua gjithashtu se procedurat për uljen, modifikimin apo ndryshimin e dënimit, të parashikuara në nenin 51(2) të Ligjit për Dhomat e Specializuara, janë procedura individuale dhe se vuajtja e dy të tretave të dënimit nuk garanton automatikisht uljen apo ndryshimin e tij, por vetëm mundëson shqyrtimin e një kërkese të tillë.

Gjykata Themelore në Pejë, Departamenti për Krime të Rënda, ka shpallur aktgjykim dënues ndaj Dibran Fetahut, duke e gjetur fajtor për veprën penale “Përvetësimi në detyrë”, sipas nenit 425, paragrafi 3, lidhur me paragrafin 1 të Kodit Penal të Republikës së Kosovës (KPRK).

Pas përfundimit të shqyrtimit gjyqësor, trupi gjykues i shqiptoi të pandehurit dënim me burg në kohëzgjatje prej tre (3) vjetësh, në të cilin përfshihet edhe koha e kaluar në paraburgim dhe arrest shtëpiak.

Po ashtu, Fetahu u dënua edhe me gjobë në shumën prej 1 mijë euro, të cilën është i obliguar ta paguajë brenda 30 ditëve nga plotfuqishmëria e aktgjykimit.

Gjykata urdhëroi gjithashtu që i pandehuri t’i kompensojë palës së dëmtuar, Postës së Kosovës – Mitrovica 1, shumën prej 71.572,26 euro, brenda afatit prej tre muajsh nga dita kur aktgjykimi merr formë të prerë, nën kërcënimin e përmbarimit me detyrim.

Në bazë të nenit 62, paragrafi 2, pika 2.3 të KPRK-së, Fetahut i ndalohet ushtrimi i funksioneve në administratën publike ose në shërbimin publik për një periudhë dyvjeçare, pas vuajtjes së dënimit me burg.

Palët kanë të drejtë ankese kundër këtij aktgjykimi në afat prej 30 ditësh nga dita e pranimit të aktgjykimit në formë të shkruar. /Telegrafi/

Zyra e Prokurorit të Specializuar (ZPS) ka përmbyllur sot deklaratën e saj përfundimtare në procesin gjyqësor ndaj Hashim Thaçit dhe tre të akuzuarve të tjerë para Dhomave të Specializuara të Kosovës në Hagë.

Në paraqitjen e saj përmbyllëse, ZPS-ja i kërkoi Trupit Gjykues që t’i shpallë fajtorë të katër të akuzuarit për të gjitha pikat e Aktakuzës, duke argumentuar se provat e administruara gjatë procesit gjyqësor vërtetojnë përgjegjësinë e tyre penale për krimet e pretenduara.

Prokuroria kërkoi që secili prej të akuzuarve të dënohet me nga 45 vjet burgim.

Pas përfundimit të deklaratës së Prokurorisë, fjala i kaloi Mbrojtësit të Viktimave, i cili ka nisur paraqitjen e deklaratës së tij përmbyllëse, duke përfaqësuar interesat dhe kërkesat e viktimave të përfshira në këtë proces.

Procesi gjyqësor pritet të vazhdojë me deklaratat përfundimtare të palëve mbrojtëse në ditët në vijim, përpara se Trupi Gjykues të tërhiqet për vendimmarrje. /Telegrafi/

Katërmbëdhjetë persona janë intervistuar deri më tani në Gjilan, nën dyshimin për falsifikim të rezultateve të votimit në zgjedhjet e 28 dhjetorit.

Lajmin e ka konfirmuar për Telegrafin zëdhënësi i Policisë për Rajonin e Gjilanit, Ismet Hashani i cili ka bërë të ditur se hetimet janë në vazhdim.

Sipas tij, Policia Rajonale e Hetimeve, në koordinim të ngushtë me Prokurorinë e Shtetit, do të vazhdojë intervistimin edhe të personave të tjerë, varësisht nga zhvillimi i hetimeve.

“Hetimet po vazhdojnë. Deri tani janë intervistuar 14 persona dhe, varësisht nga të gjeturat, Policia Rajonale e Hetimeve me koordinim të ngushtë me Prokurorinë e Shtetit do të vazhdojë edhe intervistimin e personave të tjerë. Këta persona dyshohen për falsifikim të rezultateve të votimit", ka deklaruar Hashani. /Telegrafi/

Kryeministri në detyrë, Albin Kurti, ka deklaruar se nesër do të marrë pjesë në seancën konstituive të Kuvendit të Kosovës. Ai u shpreh optimist për zhvillimin e procesit:

“Më duhet me shku në Llap tash. Nesër do t’i përgjigjemi obligimit për seancë konstituive dhe besoj që do të shkojë mbarë e mirë gjithçka”, tha shkurt Kurti para mediave.

Të mërkurën seanca konstituive e Kuvendit të Kosovës

Deklarata e Kurtit vjen pas thirrjes së presidentes Vjosa Osmani për seancën konstituive, e cila është caktuar për nesër në ora 12:00, një ditë pas certifikimit të rezultateve të zgjedhjeve nga Komisioni Qendror i Zgjedhjeve.

Presidenca ka njoftuar se vendimi për këtë datë është marrë pas konsultimit me shumicën e partive parlamentare dhe duke marrë parasysh urgjencën e krijimit të institucioneve, miratimin e buxhetit dhe marrëveshjeve ndërkombëtare.

Seanca konstituive do të shënojë hapin e parë drejt formimit të institucioneve të reja të Kosovës. /Telegrafi/

Sot, më 10 shkurt 2026, kryetari në detyrë i Kuvendit të Kosovës, Dimal Basha, do të mbajë mbledhje me kryetarët e subjekteve politike.

Mbledhja është planifikuar të fillojë në orën 17:00.

Rendi i ditës do të fokusohet në përgatitjet për Seancën konstituive të Legjislaturës së dhjetë (X) të Kuvendit të Kosovës.

Të mërkurën seanca konstituive e Kuvendit të Kosovës

Ndryshe, presidentja Vjosa Osmani ka thirr seancën konstituive tw Kuvendit pwr nesër nw prwn 12:00.

Presidenca ka njoftuar se vendimi për këtë datë është marrë pas konsultimit me shumicën e partive parlamentare dhe duke marrë parasysh urgjencën e krijimit të institucioneve, miratimin e buxhetit dhe marrëveshjeve ndërkombëtare.

Caktimi i seancës u bë një ditë pasi Komisioni Qendror i Zgjedhjeve certifikoi rezultatet e zgjedhjeve të 28 dhjetorit. /Telegrafi/

Federata Sindikale e Punëtorëve Teknikë të Sektorit Privat të Kosovës (FSPTSPK), ka njoftuar se edhe pse paga minimale prej 425 euro bruto, e cila hyri në fuqi më 1 janar 2026 sipas vendimit të Qeverisë së Kosovës, në shumë raste nuk po respektohet.

Sipas FSPTSPK-së, shumica e punëtorëve teknikë në institucione publike përmes kompanive private kanë marrë rritje pagash, por në disa raste ka kompani që ende nuk kanë kryer pagesën për muajin Janar dhe për këto raste ende nuk kemi informata të plota se sa po zbatohet ky vendim.

“Ekzistojnë raste konkrete, si në Shkollën e Mesme Teknike dhe Gjimnazi në Drenas, ku punëtorët teknik vazhdojnë të marrin pagë prej 237 euro neto, pa asnjë ndryshim apo zbatim të vendimit për rritjen e pagës minimale", thuhet në njoftim.

Gjithashtu, sipas FSPTSPK-së në disa shkolla të Prishtinës, punëtorët teknik ende nuk kanë marrë pagat dhe nuk do të ketë rritje të pagës.

Ndërkaq, punëtorët teknik në Qendrën e mjekësisë familjare në Prishtinë marrin pagë 370 euro, që është nën pagën minimale të parashikuar.

Federata bën thirrje të fortë për kompanitë që nuk po e respektojnë vendimin.

“Kërkojmë nga të gjitha kompanitë që nuk po e respektojnë vendimin për pagën minimale, të ndërmarrin masa të menjëhershme dhe ta zbatojnë atë sa më shpejt, në përputhje me legjislacionin në fuqi", thuhet në njoftim. /Telegrafi/

Prokuroria Themelore në Ferizaj ka njoftuar se ka kërkuar nga Gjykata Themelore në Ferizaj caktimin e masës së paraburgimit për të pandehurit M.O. dhe Z.N., shtetas palestinezë, për shkak të dyshimit për veprën penale “Falsifikim i parasë” sipas Kodit Penal të Republikës së Kosovës.

Sipas Prokurorisë, më 6 shkurt 2026, rreth orës 19:30, në pikën e derivateve “Ballkan Petrol” në magjistralen Ferizaj–Prishtinë, i pandehuri M.O. dyshohet se ka futur në qarkullim para të falsifikuara.

Po ashtu, më 7 shkurt 2026, në rrugën “Skënderbeu” në Kaçanik, dy të pandehurit dyshohet se kanë poseduar 39 bankënota nga 50 dollarë, me vlerë totale 19.500 dollarë amerikanë, të cilat dyshohet se janë të falsifikuara. Bankënotat janë sekuestruar nga policia.

Dy të pandehurit aktualisht gjenden nën masën e ndalimit 48-orësh nga Prokurori i Shtetit, ndërsa për ta pritet vendimi i gjykatës për paraburgim. /Telegrafi/

Njësiti i Trafikut të Kryeqytetit, gjatë ditës së djeshme, ka shqiptuar gjithsej 220 gjoba për kundërvajtje të ndryshme në trafik.

Nga ky numër, 50 gjoba janë evidentuar përmes veturave me pajisje inteligjente, të cilat kanë regjistruar shkelje si drejtimi i automjeteve me regjistrim të skaduar dhe tejkalimi i shpejtësisë së lejuar.

Si pasojë e këtyre veprimeve, 35 shoferëve u është sekuestruar patentë-shoferi. Gjobat e shqiptuara do t’u dorëzohen kundërvajtësve përmes postës.

Njësiti i Trafikut të Kryeqytetit u bën apel të gjithë shoferëve që të respektojnë rregullat e komunikacionit dhe të tregojnë kujdes të shtuar, me qëllim rritjen e sigurisë në rrugët e kryeqytetit. /Telegrafi/

Drejtori për Arsim në Kryeqytet, Samir Shahini ka reaguar pas rastit të dhunës së ndodhur dje në shkollën fillore “Pavarësia”, duke e dënuar ashpër ngjarjen dhe duke kërkuar veprim të shpejtë nga institucionet e drejtësisë.

“Nga pozicioni si drejtor për arsim në kryeqytet, e dënoj fuqishëm rastin e ndodhur dje në Shkollën Fillore ‘Pavarësia’. Dhuna në shkolla është e papranueshme dhe nuk do të relativizohet në asnjë rrethanë. Institucionet e sigurisë tashmë e kanë rastin në trajtim dhe presim veprim të shpejtë dhe të plotë nga organet e drejtësisë”, ka deklaruar Shahini.

Ai ka theksuar se rasti në fjalë nuk është i izoluar, por sipas tij përfaqëson pasojë të një dështimi më të gjerë institucional.

“Ky rast, megjithatë, nuk është i izoluar. Ai është pasojë e drejtpërdrejtë e një dështimi të gjerë institucional. Prej vitesh, shkollat po lihen të vetme përballë problemeve të rënda sociale, pa mbështetje reale dhe pa kapacitete minimale për ndërhyrje”, ka shtuar ai.

Shahini ka kritikuar mungesën e mbështetjes profesionale në shkolla, duke përmendur mungesën e psikologëve, punëtorëve socialë dhe mekanizmave mbrojtës.

“Sot, mësimdhënësi dhe nxënësi janë të pambrojtur, ndërsa shkolla po trajtohet padrejtësisht si institucioni që duhet të përthithë çdo dështim tjetër të shtetit”, ka deklaruar ai.

Protestojnë mësimdhënësit e shkollës “Pavarësia”, Ymeri nga SBASHK-u: Përveç dhunës psikike,  po përballen edhe me dhunë fizike

Në reagimin e tij, drejtori për Arsim ka adresuar kritika të drejtpërdrejta edhe ndaj Ministrisë së Arsimit, duke e cilësuar atë përgjegjëse për gjendjen aktuale.

“Ministria e Arsimit mban përgjegjësi direkte për këtë gjendje. Në vend të veprimeve serioze, ajo vazhdon të prodhojë udhëzime administrative të shkëputura nga realiteti në terren”, ka theksuar Shahini, duke shtuar se “kjo nuk është reformë - është shmangie e përgjegjësisë”.

Ai ka bërë thirrje edhe për raportim të përgjegjshëm nga mediet, duke kritikuar sensacionalizmin dhe etiketimin pa fakte.

“Në këtë zinxhir dështimesh, edhe mediet kanë përgjegjësi. Sensacionalizimi, gjykimi i menjëhershëm dhe etiketimi i shkollave e i mësimdhënësve, pa fakte dhe pa kontekst, nuk ndihmon askënd”, ka deklaruar ai.

Shahini ka theksuar se shkollat dhe Drejtoritë Komunale të Arsimit nuk duhet të trajtohen si bartëse të dështimeve strukturore të institucioneve qendrore.

“Si Drejtor i Arsimit, refuzoj që shkollat dhe Drejtoritë Komunale të Arsimit të trajtohen si shkarkues i dështimeve strukturore të nivelit qendror”, ka thënë ai.

Në fund, Shahini ka kërkuar veprim urgjent dhe të koordinuar nga të gjitha institucionet përkatëse.

“Kërkoj veprim urgjent, të koordinuar dhe të matshëm nga të gjitha hallkat – përfshirë Ministrinë e Arsimit, shërbimet sociale, organet e sigurisë, prindërit dhe mediet. Jo deklarata formale, jo burokraci, jo heshtje, por veprim”, ka përfunduar Shahini. /Telegrafi/

Policia e Kosovës ka gjetur dhe konfiskuar armë, municion dhe pajisje ushtarake gjatë kontrollit të një shtëpie të pabanuar në Leposaviq.

Sipas njoftimit zyrtar, rasti ka ndodhur më 9 shkurt 2026, rreth orës 14:29, kur gjatë kontrollit në një objekt të pabanuar, pronë e një mashkulli shtetas i Serbisë, policia ka hasur në një sasi të konsiderueshme municioni dhe pajisjesh ushtarake.

Gjatë kontrollit janë gjetur dhe konfiskuar 59 fishekë të kalibrit të panjohur, një kuti metalike, një helmetë ushtarake, një xhaketë me emblemë të Serbisë, një futrollë për thikë, një pjesë antiplumbi, një çantë ushtarake, dy karikatorë të armës automatike AK-47, si dhe një karikator tjetër me një fishek.

Lidhur me rastin është njoftuar prokurori kompetent, i cili ka urdhëruar inicimin e rastit dhe ndërmarrjen e veprimeve të mëtejme hetimore.

Hetimet janë duke vazhduar nga organet kompetente. /Telegrafi/

Policia e Kosovës ka raportuar për tri raste të ndara që lidhen me blerje, posedim të paautorizuar dhe shpërndarje të narkotikëve, të ndodhura në Pejë, Rahovec dhe Mitrovicë të Jugut gjatë ditëve të fundit.

Në Pejë, më 26 janar 2026 rreth orës 19:40, pas vendimit të prokurorit është kryer kontroll në shtëpinë e një të dyshuari mashkull kosovar.

Gjatë kontrollit janë gjetur dhe konfiskuar tetë qese të vogla me substancë të dyshuar të llojit heroinë me peshë totale rreth 2.0 gramë, dy peshore digjitale, një mulli për bluarje, një shufër me talke, një sprej si dhe tri pajisje USB.

Rasti po hetohet nga ekipet relevante policore.

Ndërkohë, në Rahovec, më 8 shkurt 2026 rreth orës 22:30, është arrestuar një tjetër i dyshuar mashkull kosovar, pasi gjatë kontrollit i është gjetur në posedim një sasi e substancës së dyshuar narkotike. Me vendim të prokurorit, i dyshuari është dërguar në mbajtje.

Rasti i tretë është regjistruar në Mitrovicë të Jugut, më 9 shkurt 2026 rreth orës 12:26.

Gjatë kontrollit trupor, policia ka gjetur dhe konfiskuar 15 qese me substancë të dyshuar të llojit marihuanë, me peshë totale 15.31 gramë. I dyshuari mashkull kosovar është arrestuar dhe, pas intervistimit, me vendim të prokurorit është dërguar në mbajtje.

Policia e Kosovës ka bërë të ditur se hetimet për të gjitha rastet janë duke vazhduar në koordinim me Prokurorinë e Shtetit. /Telegrafi/

Një person është arrestuar mbrëmë rreth orës 21:00 në rrugën “Xhemajl Mustafa” në Podujevë, nën dyshimin për organizim të skemave piramidale dhe bixhozit të paligjshëm.

Sipas njoftimit të Policisë së Kosovës, arrestimi është realizuar në kuadër të një aksioni policor, gjatë të cilit është kryer edhe kontrolli i lokacionit.

Gjatë kontrollit janë gjetur dhe sekuestruar disa pajisje elektronike që dyshohet se janë përdorur për veprimtari të kundërligjshme, përfshirë tri shtëpiza kompjuteri, dy monitorë, një skaner si dhe pajisje të tjera përcjellëse.

I dyshuari, F.M., mashkull, me autorizim të prokurorit të shtetit është dërguar në mbajtje, ndërsa hetuesit policorë, në koordinim me Prokurorinë, po vazhdojnë veprimet e nevojshme procedurale për zbardhjen e plotë të rastit. /Telegrafi/

Ish-ministrja e Drejtësisë, njëherit nënkryetarja në detyrë e Kuvendit, Albulena Haxhiu, ka reaguar ashpër pas kërkesës së Prokurorisë së Dhomave të Specializuara për 45 vjet burg për secilin nga ish-krerët e Ushtrisë Çlirimtare të Kosovës (UÇK).

Në një postim në rrjetet sociale, Haxhiu e ka konsideruar këtë si një akt padrejtësie dhe një fyerje ndaj viktimave shqiptare të luftës, duke theksuar se nuk ka të bëjë me drejtësi, por me një ndëshkim politik dhe selektiv.

“Kjo është një orvatje prokuroriale për ndëshkim politik dhe selektiv ndaj një lufte të drejtë çlirimtare”, ka shkruar Haxhiu.

Ajo kujton krimet e Serbisë gjatë luftës, duke theksuar se masakrat, përdhunimet dhe dëbimet masive janë të dokumentuara dhe dëshmuara ndërkombëtarisht, ndërsa agresori nuk është përballur kurrë me drejtësinë.

“Në vend të gjykimit të agresorit, fatkeqësisht u votua një mekanizëm që sot mundohet të na e kriminalizojë rezistencën e popullit. UÇK po trajtohet sikur të ishte shkaku i luftës, e jo përgjigja ndaj terrorit shtetëror serb. Ky është shtrembërim i historisë”, tha ish-ministrja.

Haxhiu përfundon me një mesazh të fortë për rolin e drejtuesve të UÇK-së.

“Të kërkosh aq vite burgim për drejtues e ushtarë të UÇK-së, është tendencë për të zhveshur Kosovën nga e drejta morale e çlirimit dhe tendencë për ta barazuar viktimën me xhelatin”, tha Haxhiu,

Reagimi i ish-ministres vjen ndërkohë që gjykimi në Hagë ndaj ish-udhëheqësve të UÇK-së është në fazën përmbyllëse. /Telegrafi/

Altin Krasniqi, djali i ish-komandantit të UÇK-së, Jakup Krasniqi, ka reaguar fuqishëm pas kërkesës së Prokurorisë së Dhomave të Specializuara për 45 vjet burg për krerët e UÇK-së, duke e konsideruar këtë si një përpjekje për kriminalizimin e rezistencës shqiptare gjatë luftës së fundit në Kosovë.

“Prokuroria do ta kishte më të lehtë dhe më të sinqertë të deklaronte hapur se shqiptarët duhet të rrinin duarkryq, të pranonin vrasjen, përdhunimin dhe trajtimin çnjerëzor, sesa të guxonin të luftonin për mbijetesë dhe dinjitet”, ka shkruar Krasniqi.

Ai shton se historia nuk shkruhet nga ata që u përkulën, por nga ata që refuzuan nënshtrimin.

“Një pjesë e vogël e popullit shqiptar zgjodhi rezistencën si akt të fundit mbijetese, jo si zgjedhje politike, por si domosdoshmëri njerëzore. Sot, vetë ekzistenca jonë është dëshmia më e fuqishme se ajo luftë ishte e drejtë, e pashmangshme dhe legjitime”, u shpreh ai.

Altin Krasniqi thekson se çdo përpjekje për të kriminalizuar rezistencën është akt politik dhe jo drejtësi, duke synuar rishkrimin e historisë dhe barazimin e agresorit me viktimën.

Reagimi i tij vjen ndërkohë që gjykimi ndaj ish-udhëheqësve të UÇK-së vazhdon në Hagë dhe seanca për deklaratat përmbyllëse është planifikuar të zgjasë deri më 18 shkurt. /Telegrafi/

Policia e Kosovës ka njoftuar se ka nisur një seri kontrollesh të shtuara për mjete të transportit të mallrave dhe udhëtarëve, si pjesë e planit ROADPOL 2026.

Kontrollet do të zgjasin deri më 15 shkurt 2026 dhe do të realizohen në të gjitha rrugët e vendit.

Qëllimi i këtyre kontrolleve është rritja e sigurisë në trafik dhe parandalimi i aksidenteve, duke u fokusuar tek shoferët e kamionëve dhe autobusëve, të cilët konsiderohen shoferë profesionistë.

Policia thekson se nga ata pritet që të jenë shembull në respektimin e rregullave dhe sjelljes së sigurt në rrugë.

Ky aktivitet përfshin verifikimin e gjendjes teknike të mjeteve, respektimin e kufijve të shpejtësisë, dokumentacionin e vozitjes dhe kushtet e sigurimit për udhëtarët dhe mallrat.

Policia e Kosovës fton të gjithë pjesëmarrësit në trafik që të tregojnë kujdes dhe të respektojnë ligjin, duke kontribuar kështu në uljen e rreziqeve dhe sigurimin e rrugëve për të gjithë. /Telegrafi/

Gjykata e Apelit të GJKKO ka lënë fuqi dënimin e Shkallës së Parë me 1 vit burg për kryebashkiakun e Rrogozhinës Edison Memolla.

Vendimi është i formës së prerë për kryebashkiakun e Rrogozhinës, i cili akuzohet korrupsion aktiv në zgjedhje. Memolla nuk u paraqit në seancë dhe përfaqësohej nga avokati i tij mbrojtës.

Apeli ka lënë në fuqi edhe vendimet ndaj tre personave të tjerë: Ndriçim Tafxhafa 1 vit burg; Blerim Xhamani, 1 vit burg dhe Isuf Tosku, 8 muaj, pezullohet në shërbim prove.

Ata akuzohen për korrupsion aktiv në zgjedhje, pas publikimit të një regjistrimi audio që ngriti dyshime për ndikim të paligjshëm.

Në regjistrimin e bërë publik, Memolla, asokohe kandidat për kryebashkiak, kërkonte nga elektricisti i FSHU-së në Durrës, Ndriçim Tafxhata, që të mos ndërpriste energjinë elektrike të një abonenti debitor, në këmbim të votës së tij në zgjedhjet e pjesshme lokale të 6 marsit 2022.

Dënimi me vendim të formës së prerë i Edison Memollës e çon bashkinë e Rrogozhinës në zgjedhje të reja të cilat do të duhet të mbahen jo më afër se 30 ditë dhe jo më larg se 45 ditë nga krijimi i vakancës.

Memolla ka të drejtë për rekurs në Gjykatën e lartë lidhur me këtë vendim brenda afateve që parashikon ligji./euronews/

Në vazhdim të gjykimit ndaj krerëve të UÇK-së, Prokuroria e Dhomave të Specializuara në Hagë ka prezantuar një hartë që pasqyron 437 incidente të lidhura me krime lufte dhe kundër njerëzimit, të cilat dyshohet se janë kryer gjatë dhe menjëherë pas konfliktit të Kosovës në vitet 1998–1999.

Prokurori James Pace tregoi edhe për vendin e ndalimit në Jabllanicë për të cilin tha se gjendje afër Shtabit të UÇK-së, afër shtëpisë së Lahi Brahimajt.

Tieger: Sulmet ndaj kundërshtarëve dhe ndalimet u autorizuan nga Shtabi i Përgjithshëm

Ai shtoi se prova shkresore tregojnë dhe konfirmojnë dëshmitë e dëshmitarëve për krimet për të cilët janë ngritur akuzat.

Ndërkaq, prokurorja e Dhomave të Specializuara, Clare Lawson, theksoi se këto krime nuk janë kryer thjesht nga individë të izoluar, por nga vartësit e të akuzuarve, të cilët kanë kontribuar në mënyrë aktive dhe kanë vepruar me një synim të qartë për të realizuar veprime të paligjshme.

Ajo shtoi se përgjegjësia nuk përqendrohet vetëm te udhëheqësit, por edhe te struktura e komandës që ata kanë drejtuar.

Lawson tha se incidentet përfshijnë përndjekje, vrasje, tortura dhe keqtrajtime në kampet e kontrolluara nga UÇK-ja, duke përfshirë dhjetëra viktima që ishin të lidhura me komunitete të ndryshme etnike, përfshirë serbët, romët dhe ish-anëtarët e partive politike lokale.

“Shumë nga veprimet janë kryer nën udhëheqjen dhe autorizimin e të akuzuarve, duke pasur një plan të qartë dhe një strategji të strukturuar për të arritur qëllimet e tyre”, u shpreh prokurorja.

Pas një seance intensive gjatë mëngjesit, Dhomat e Specializuara aktualisht ndodhen në pushim të drekës, ndërsa pritet që pasditja të vazhdojë me dëshmi të reja dhe argumente përmbyllëse nga prokuroria.

Gjykimi ndaj Thaçit dhe të tjerëve në fazën përfundimtare - ZPS kërkon 45 vjet dënim për secilin

Ky gjyq ka hyrë në fazën përmbyllëse, ku po shqyrtohen provat dhe dëshmitë kryesore, ndërsa pas prokurorisë, fjalën do ta kenë ekipet mbrojtëse dhe më pas të akuzuarit.

Seanca është pjesë e një procesi që ka filluar më 3 prill 2023 dhe ka tërhequr vëmendje të madhe kombëtare dhe ndërkombëtare për rëndësinë e trajtimit të krimeve të dyshuara të luftës në Kosovë./Telegrafi/

Policia e Kosovës, konkretisht Drejtoria për Hetimin e Trafikimit me Narkotikë, ka sekuestruar rreth 7 kilogramë substancë të dyshuar narkotike të llojit marihuanë dhe ka arrestuar një person të dyshuar.

Në një aksion të zhvilluar në pikën kufitare në Merdare, Policia ka ndaluar një veturë me targa të huaja, e drejtuar nga një mashkull kosovar. Gjatë kontrollit të automjetit, janë gjetur dhe konfiskuar 7 kg marihuanë, me vlerë tregu rreth 35,000 euro.

Pas këtij aksioni, në koordinim me Prokurorinë Themelore – Departamenti për Krime të Rënda në Prishtinë, është kryer edhe kontroll i shtëpisë së të dyshuarit në Prizren. Gjatë kontrollit janë sekuestruar prova shtesë që lidhen me rastin, përfshirë: 7 kg marihuanë të ndarë në 24 paketime, 4 vetura, 1 telefon, 9 paketime me qese plastike, 2 aparate për vakum, 2 peshore digjitale dhe prova tjera materiale.

I dyshuari është arrestuar dhe me vendim të prokurorit është dërguar në ndalim për 48 orë. Hetimet në lidhje me këtë rast vazhdojnë. /Telegrafi/