SHBA-ja mund të detyrohet të kthejë qindra miliarda dollarë të mbledhura nga tarifat.

Shtetet e Bashkuara mund të detyrohen të rimbursojnë të ardhurat e mbledhura nga tarifat doganore nëse Gjykata e Lartë e SHBA-s e shpall të paligjshme politikën e tarifave, tha presidenti amerikan, Donald Trump.

Sipas Trumpit, shumat që mund të duhen kthyer arrijnë në qindra miliarda dollarë, dhe ai vlerëson se nuk sheh se si këto para mund të kthehen pa shkaktuar dëme për një numër të madh njerëzish.

“Shtetet e Bashkuara mund të detyrohen të rimbursojnë të ardhurat nga tarifat doganore nëse Gjykata e Lartë shpall politikën e tarifave të paligjshme”, tha lideri amerikan, raporton cnbc.

Vendimi i Gjykatës së Lartë mbi ligjshmërinë e tarifave të vendosura nën International Emergency Economic Powers Act është akoma në pritje - Gjykata tërhoqi vendimin e planifikuar në seancën e fundit dhe nuk dha një afat të ri, duke e shtyrë mundësinë e një vendimi për disa javë, ndoshta deri më 20 shkurt.

Nëse gjykata i shpall tarifat të paligjshme, kjo mund të çojë në kërkesa për rimbursime nga importuesit amerikanë për tarifat që kanë paguar, dhe ekspertët juridikë thonë se kjo çështje do të jetë komplekse për t’u zbatuar praktikisht. /Telegrafi/

Kryeministri i Kosovës, Albin Kurti, ka marrë pjesë në panelin e diskutimit me temë “Besimi, Lidershipi dhe Amerika 250”, në Shtëpinë e Shteteve të Bashkuara të Amerikës në Davos.

Kjo ka tërhequr vëmendjen edhe në shtetin serb, ku ish-bashkëpartiaku i presidentit të Serbisë, Aleksandar Vuçiq, Dragan Shormaz.

Ky i fundit është talluar në kurriz të udhëheqësit serb duke deklaruar se askush nuk dëshiron ta takojë dhe ta ftojë Vuçiqin.

"Gjersa Aleksandar Vuçiq po hanë djathë me patate të nxehta dhe po i ndjek njerëzit në korridore, Kurti në Davos tashmë ka marr pjesë në Shtëpinë Amerikane në panelin e parë!", deklaroi kryetar i Këshillit Euroatlantik të Serbisë, Shormaz.

Theksojmë se paneli ku mori pjesë Kurti është pjesë e iniciativës së Forumit Ekonomik Botëror, “Komuniteti i Besimit në Veprim”, e cila synon të nxisë reflektim mbi mënyrën se si udhëheqësit nga vende të ndryshme të botës mund të ndërtojnë partneritete inovative në fushat e mjedisit, ekonomisë dhe teknologjisë.

Gjatë diskutimit, Kurti ka theksuar rolin e besimit si element kyç në ndërtimin e shërbimit dhe unitetit në shoqëri dhe në funksionimin e shtetit.

“Besimi shërben si shtyllë e shërbimit dhe unitetit në etapa të ndryshme shoqërore dhe shtetërore”, ka deklaruar Kurti, duke shtuar se optimizmi për të ardhmen buron nga angazhimi dhe aktivizmi i vazhdueshëm.

Ndryshe, kjo iniciativë, sipas organizatorëve, synon gjithashtu të shqyrtojë mënyrat se si liderët globalë mund të përshpejtojnë bashkëpunimin dhe reagimin ndaj sfidave aktuale shoqërore. /Telegrafi/

Ndërsa presidenti amerikan, Donald Trump është në rrugë për në Davos, presidenti ukrainas, Volodymyr Zelensky vazhdon të qëndrojë në Kiev.

Ai raportohet se po merret me krizën më të rëndë energjetike të shkaktuar nga sulmet masive ruse që vazhdojnë çdo natë dhe ditë.

Megjithatë, Ukraina është e përfaqësuar në Davos: ministri i mbrojtjes dhe sigurisë Rustem Umerov, shefi i zyrës Kyrylo Budanov dhe David Arakhamia, kreu i partisë “Shërbëtori i Popullit”, ndodhen në Forumin Ekonomik Botëror.

"Ata punojnë aktivisht me palën amerikane, punojnë me përfaqësues evropianë për takime të mundshme dhe për paketat e ndihmës. Raketat për mbrojtjen ajrore nevojiten çdo ditë. Arma nevojitet çdo ditë. Pajisje për rindërtim, për rezervat, janë të nevojshme çdo ditë", tha lideri ukrainas në një fjalim mbrëmjeje të martën.

"Nëse forumi sjell rezultate reale për Ukrainën – Ukraina do të përfaqësohet aty. Askush nuk ka nevojë për politikë boshe dhe biseda pa rezultate", shtoi ai.

Ndryshe, Kosova në këtë forum ndërkombëtar ekonomik po përfaqësohet nga kryeministri Albin Kurti. /Telegrafi/

Me hyrjen në fuqi të subvencioneve të reja për automjetet elektrike në Gjermani, prodhuesit e veturave kanë filluar të ofrojnë oferta të gjera.

Citroen tani ka një veturë elektrike për më pak se 8000 euro. Marka shton të njëjtën shumë mbi subvencionin shtetëror, pra 6000 euro. Nëse blerësi ka të drejtë për subvencionin maksimal, blerja e ë-C3 Urban Range në variantin e pajisjes YOU sjell një ulje çmimi deri në 12 mijë euro krahasuar me çmimin e rekomanduar të shitjes. Me një çmim fillestar prej 19,990 eurosh, çmimi bie në 7,990 euro.

Modeli ka bateri LFP prej 30 kWh, e cila i mundëson një autonomi deri në 204 km, dhe një motor me 113 kuaj-fuqi. Të gjitha këto e bëjnë atë të përshtatshëm për vozitje në qytet. Ngarkimi i shpejtë me maksimalisht 30 kW kushton 500 euro shtesë. Kondicioneri dhe sensorët e parkimit në pjesën e pasme janë standard.

Qëllimi i financimit shtetëror është të bëjë automjetet elektrike të arritshme për sa më shumë njerëz, veçanërisht për familjet private me të ardhura të mesme dhe të ulëta, dhe supozohet se Citroen ka shtuar zbritjen e tij për të nxitur shitjen e automjeteve elektrike dhe për të ulur emetimet e CO2 në shitjet totale, duke shmangur kështu gjobat financiare nga Bashkimi Evropian.

Financimi shtetëror është i destinuar ekskluzivisht për blerësit privatë. Ai mbështet blerjen ose leasing-un e një automjeti të ri M1 me energji elektrike ose hibride me ngarkim të jashtëm, i cili do të regjistrohet për herë të parë në Gjermani.

Të drejtën për financim shtetëror e kanë blerësit të cilëve të ardhurat vjetore të tatueshme të familjes nuk tejkalojnë 80 mijë euro, ndërsa shuma maksimale e subvencionit është 6000 euro. /Telegrafi/

Presidenti amerikan, Donald Trump ka ftuar përfaqësues të vendeve të ndryshme të botës në Bordin e Paqes për Gazën, duke përfshirë Kosovën dhe Shqipërinë.

Lideri amerikan ka formuar një trup këshillues për Gazën, i njohur më mirë si Bordi i Paqes, si pjesë e fazës së dytë të armëpushimit të arritur mes Izraelit dhe militantëve palestinezë të grupit të Hamasit.

Ky bord përfshin liderë botërorë që japin këshilla dhe ndihmojnë në negociata, por nuk ka fuqi ekzekutive ndërkombëtare si Organizata e Kombeve të Bashkuara (OKB).

Synimi është të mbështesë paqen dhe stabilitetin në rajon përmes dialogut dhe bashkëpunimit ndërkombëtar, transmeton Telegrafi.

Pra, në thelb është një iniciativë diplomatike e Trumpit, e projektuar si bord këshillues me ndikim në negociata dhe armëpushime, duke përfshirë liderë nga vende të ndryshme për të ndihmuar në stabilizimin e rajonit.

Megjithatë jo të gjitha vendet e kanë mirëpritur iniciativën e presidentit amerikan.

Në mesin e atyre që kanë refuzuar të jenë pjesë e kësaj iniciative është Franca, ku këtë e ka konfirmuar presidenti Emmanuel Macron.

Gjithashtu mediat kanë bërë të ditur se kryeministri britanik, Keir Starmer do ta refuzojë ftesën e Trumpit.

Theksojmë se Kosovën do ta përfaqësojë presidentja Vjosa Osmani ndërsa Shqipërinë, kryeministri Edi Rama.

Në këtë fazë, Trump pritet të njoftojë përbërjen e plotë të Bordit dhe detaje të tjera gjatë Forumit Ekonomik Botëror në Davos.

Bordi i Paqes

Shtëpia e Bardhë thotë se ky organ do të përqendrohet në çështje të tilla si "ndërtimi i kapaciteteve qeverisëse, marrëdhëniet rajonale, rindërtimi, tërheqja e investimeve, financimi në shkallë të gjerë dhe mobilizimi i kapitalit".

Presidenti i SHBA-së, Donald Trump, kryetar

Sekretari i Shtetit i SHBA-së, Marco Rubio

Steve Witkoff, negociatori special i Trump

Jared Kushner, dhëndri i Trump

Tony Blair, ish-kryeministër i Mbretërisë së Bashkuar

Marc Rowan, miliarder financier amerikan

Ajay Banga, president i Bankës Botërore

Robert Gabriel, ndihmës besnik i Trump në Këshillin e Sigurisë Kombëtare

Komiteti Kombëtar për administrimin e Gazës

Ky organ, i përbërë nga teknokratë, do të "mbikëqyrë restaurimin e shërbimeve publike kryesore, rindërtimin e institucioneve civile dhe stabilizimin e jetës së përditshme në Gaza".

Ali Shaath, ish-zëvendësministër i Autoritetit Palestinez (kreu i komitetit)

Bordi ekzekutiv i Gazës

Ky entitet ka për qëllim të "mbështesë qeverisjen efektive" dhe të ofrojë shërbime për popullin e Gazës.

Steve Witkoff

Jared Kushner

Tony Blair

Marc Rowan

Nickolay Mladenov, diplomat bullgar

Sigrid Kaag, koordinatore humanitare e OKB-së për Gazën

Ministri i Jashtëm turk Hakan Fidan

Ali Al-Thawadi, diplomat nga Katari

Gjenerali Hassan Rashad, drejtor i agjencisë së inteligjencës së Egjiptit

Reem Al-Hashimy, ministër i Emirateve

Yakir Gabay, miliarder izraelit

Ali Al-Thawadi, diplomat nga Katari

Gjenerali Hassan Rashad, drejtor i agjencisë së inteligjencës së Egjiptit

Reem Al-Hashimy, ministër i Emirateve

Yakir Gabay, miliarder izraelit

Udhëheqësit që thanë se ishin ftuar të bashkoheshin

Presidenti argjentinas Javier Milei

Presidenti brazilian Luiz Inacio Lula da Silva

Kryeministri kanadez Mark Carney

Presidenti qipriot Nikos Christodoulides

Presidenti egjiptian Abdel Fattah al-Sisi

Kryeministri hungarez Viktor Orban

Kryeministri indian Narendra Modi

Kryeministrja italiane Giorgia Meloni

Mbreti jordanez Abdullah II

Kryeministri pakistanez Shehbaz Sharif

Presidenti paraguaian Santiago Pena

Presidenti rumun Nicusor Dan

Presidenti turk Recep Tayyip Erdogan. /Telegrafi/

Pas risjelljes së idesë për blerjen e Grenlandës nga presidenti amerikan, Donald Trump, ka dalë në pah një tjetër territor që Shtetet e Bashkuara e kanë blerë nga Danimarka në vitin 1917.

Bëhet fjalë për Ishujt Virgjër amerikanë, dikur të njohur si Indet Perëndimore daneze.

Në rrjetet sociale është theksuar se brenda këtij territori ndodhet edhe ishulli Little Saint James, më i njohur si ishulli famëkeq i pedofilit të ndjerë, Jeffrey Epstein, shkruan Newsweek.

Në vitin 1917, SHBA-ja pagoi 25 milionë dollarë në ar për të marrë kontrollin mbi ishujt Saint Thomas, Saint John dhe Saint Croix.

Ishulli Little Saint James ishte pjesë e kësaj blerjeje dhe më vonë, në vitin 1998, iu shit Epsteinit.

Ishulli u bë famëkeq si pronë private ku Epstein dyshohet se kreu krime seksuale, duke u shndërruar në qendër të hetimeve penale dhe padive civile pas arrestimit dhe vdekjes së tij.

Edhe sot, Little Saint James mbetet një temë diskutimi publik, me shumë që kërkojnë të dinë se kush dhe kur e ka vizituar ishullin.

Kjo u shtua edhe më shumë pas hapjes së dosjeve të Epsteinit, të cilat hodhën dritë mbi rrjetin e tij të kontakteve dhe procedurat ligjore në vazhdim. /Telegrafi/

Politika doganore e presidentit të SHBA-së, Donald Trump, ka ndikuar fort tek eksportuesit gjermanë të mësuar me suksese.

Sipas Entit Federal gjerman të Statistikave eksportet e mallrave "Made in Germany" për në SHBA ranë vitin e kaluar me 9.4 për qind, një pakësim ky i ndjeshëm.

Kurse importet nga Shtetet e Bashkuara, në Gjermani u rritën me 2.2 për qind. Nga janari deri në nëntor 2025 eksportet gjermane në SHBA kapën një vlerë prej në 135.8 miliardë euro, kurse ato nga SHBA në Gjermani ishin 86.9 miliardë euro.

Në përgjithësi suficiti i eksporteve nga Gjermania në tregtinë me SHBA-në ra në vitin 2025 në 48.9 miliardë euro, duke arritur nivelin më të ulët që nga viti 2021 i pandemisë së coronavirusit, raporton dw.

Suficit eksportesh gjermane do të thotë që Gjermania shet dukshëm më shumë mallra në SHBA sesa anasjelltas. Për këtë shkak presidenti Trump e vuri Gjermaninë - kryesisht eksportet e veturave - në shënjestër duke kritikuar vazhdimisht suficitet e mëdha tregtare të Gjermanisë me SHBA-në dhe duke argumentuar se ato ishin të dëmshme për ekonominë amerikane. Një motiv kyç pas politikës së tij doganore proteksioniste është përpjekja për të kompensuar çekuilibra të tillë tregtarë, të cilët ai i konsideron "të padrejtë".

Dhe vërtet sidomos industria gjermane e automobilave pësoi humbje të mëdha për shkak të politikave doganore të Trumpit. Eksportet e makinave dhe të pjesëve të makinave ranë nga janari në nëntor 2025 me 17.5 për qind, duke arritur një vlerë prej 26.9 miliardë eurosh. Ndërkohë eksportet e makinerive ranë me 9.0 për qind në 24.1 miliardë euro.

Kurse industria farmaceutike arriti të ruajë volumin e saj të eksporteve, të cilat u rritën me 0.7 për qind në një vlerë prej 26.2 miliardë euro.

Nga janari deri në nëntor 2025 SHBA-ja humbi gjithashtu pozicionin e saj si partneri më i rëndësishëm tregtar i Gjermanisë, një pozicion që e kishin fituar për herë të parë në vitin 2024. Tani partneri më i rëndësishëm tregtar i Gjermanisë është sërish Kina.

Tregtia e përgjithshme me Republikën Popullore të Kinës, pra vlera e të gjitha eksporteve dhe importeve, arriti në këtë periudhë afërsisht 230.8 miliardë euro. Kurse ajo me SHBA-në ishte vetëm 222,8 miliardë euro. /Telegrafi/

Kryeministri i Izraelit, Benjamin Netanyahu, njoftoi se ka pranuar t’i bashkohet Bordit për Paqen të presidentit amerikan, Donald Trump, pas debateve dhe kritika nga kabineti i tij mbi përbërjen e komitetit ekzekutiv të këtij institucioni. Vendimi vjen pas një ftesë direkte nga Trumpi, të cilën Netanyahu e ka pranuar zyrtarisht, sipas deklaratës së bërë nga zyra e tij.

Bordi për Paqen, i udhëhequr nga Trump, ishte konceptuar fillimisht si një grup i vogël liderësh botërorë përgjegjës për mbikëqyrjen e planit të armëpushimit në Rripin e Gazës, por sipas ekspertëve, ambiciet e administratës amerikane duket se janë zgjeruar drejt një initiative më të gjerë diplomatike, që synon të përfshijë vendimmarrës nga rajone të ndryshme të botës për të ndikuar në zgjidhjen e konflikteve dhe nxitjen e bashkëpunimit ndërkombëtar.

Detaje të tjera dhe përbërja e plotë e Bordit pritet të bëhen të ditura gjatë një njoftimi që Trump do të bëjë në Forumin Ekonomik Botëror në Davos, Zvicër, ku pritet të prezantojë edhe strategjinë dhe planet e këtij institucioni.

Ndërkohë, në përpjekje për të përfshirë edhe vendet e Ballkanit, Kosova dhe Shqipëria janë ftuar të jenë pjesë e Bordit.

Ato do të përfaqësohen nga presidentja e Kosovës, Vjosa Osmani, dhe kryeministri i Shqipërisë, Edi Rama, duke treguar përkushtimin e këtyre vendeve ndaj dialogut dhe iniciativave të paqes në rajon.

Ky zhvillim shënon një hap të rëndësishëm në diplomacinë ndërkombëtare, duke krijuar mundësi për dialog të drejtpërdrejtë midis liderëve të vendeve me ndikim dhe për promovimin e paqes dhe stabilitetit në rajone të ndryshme të botës. /Telegrafi/

Presidenti i Shteteve të Bashkuara, Donald Trump, deklaroi se administrata e tij “ka përfunduar tetë luftëra brenda 10 muajsh” dhe në këtë kontekst përmendi edhe Kosovën dhe Serbinë.

Ai foli për këto suksese gjatë njëvjetorit të presidencës së tij të dytë, ku përsëri përmendi Kosovën dhe Serbinë.

Sipas mediave të huaja, Trump gjithashtu ka renditur luftërat që, sipas tij, ka arritur t’i përfundojë.

- YouTube www.youtube.com

“Nuk ka parë askush një operacion si ai që realizuam në Venezuelë. Kemi përfunduar tetë luftëra të pazgjidhura brenda 10 muajsh – Kamboxhia dhe Tajlanda që kanë qenë në luftë për vite me radhë, Kosova dhe Serbia, Kongo dhe Ruanda, Pakistani dhe India – që mund të kishin përdorur edhe armë bërthamore, sipas mendimit tim. Kryeministri i Pakistanit ishte këtu dhe tha se presidenti Trump ka shpëtuar 10 milionë njerëz, ndoshta edhe më shumë. Pastaj janë edhe Izraeli dhe Irani, Egjipti dhe Etiopia… dhe unë i kam ndalur”, tha ai gjatë një konference për media.

Lideri amerikan gjithashtu tha se ka përfunduar edhe luftën midis Armenisë dhe Azerbajxhanit, dhe në këtë kontekst presidenti i Rusisë, Vladimir Putin, i kishte thënë se “nuk mund të besoj që e përfundove këtë luftë, unë kam provuar ta zgjidh për dhjetë vjet”.

“Kam shpëtuar miliona e miliona njerëz”, pohoi 79-vjeçari.

Ndryshe, kjo nuk është hera e parë që Trump përmend Kosovën dhe Serbinë në kontekstin e luftërave që thotë se i ka përfunduar. /Telegrafi/

SHBA-ja e varur nga insulina daneze mund të shndërrohet në një pikë presioni të papritur në përplasje lidhur me Grenlandën.

Ndërsa kriza për Grenlandën thellohet, në Danimarkë po diskutohet nëse qeveria duhet të përdorë si mjet presioni dominimin e kompanisë farmaceutike Novo Nordisk si furnizues kryesor të insulinës dhe ilaçeve GLP-1 për tregun amerikan.

Shtetet e Bashkuara rrezikojnë mungesa të insulinës dhe ilaçeve GLP-1 nëse Danimarka ndalon ose kufizon eksportet, sepse rreth 30-50 për qind e insulinës që përdoret në SHBA vjen nga Danimarka - një furnizim që Uashingtoni nuk mund ta zëvendësojë lehtë.

Miliona amerikanë kanë nevojë për insulinë çdo ditë, dhe ndërprerjet mund të shkaktojnë dëme për pacientët dhe një krizë politike në SHBA, raportojnë mediat.

Qeveria amerikane kërcënon me tarifa deri në 25 për qind për të ushtruar presion ndaj Danimarkës që të pranojë shitjen e Grenlandës, dhe kjo ka nxitur diskutime ndërkombëtare, protesta në Nuuk dhe Kopenhagen dhe reagime të forta nga Bashkimi Evropian.

Prodhues të tjerë si Eli Lilly, Sanofi dhe Biocon i Indisë mund të ndihmojnë paksa, por askush prej tyre nuk mund të zëvendësojë menjëherë prodhimin danez në shkallë të gjerë. /Telegrafi/

Aeroplani i presidentit amerikan Donald Trump, Air Force One, u kthye në Joint Base Andrews rreth një ore pas ngritjes drejt Zvicrës të martën në mbrëmje.

Kjo u bë sepse ekuipazhi i aeroplanit vuri re një “problem të vogël elektrik” menjëherë pas ngritjes dhe, nga masa paraprake, vendosi të kthehej.

Një gazetar që ishte në aeroplan tha se dritat në kabinën e medias u fikën për pak çast, por nuk u dha ndonjë shpjegim tjetër në atë moment.

Pas rreth gjysmë ore fluturim, gazetarët u njoftuan se aeroplani do të kthehej, shkruan cnn.

Trump më pas u zhvendos në një aeroplan tjetër, Air Force C-32, një Boeing 757 i modifikuar që ai zakonisht e përdor për udhëtime brenda vendit, dhe rreth mesnatës nisi sërish udhëtimin drejt Davosit, ku po mbahet Forumi Ekonomik Botëror.

Aeroplanët aktualë që përdoren si Air Force One janë në shërbim prej afërsisht katër dekadash, dhe Boeing po punon për aeroplanë zëvendësues, por programi është hasur me sërë vonesash.

Aeroplanët janë modifikuar shumë për sigurinë presidenciale dhe janë të pajisur me sisteme të ndryshme komunikimi që i lejojnë presidentit të qëndrojë në kontakt me ushtrinë dhe të japë urdhëra kudo në botë.

Zëdhënësja e Shtëpisë së Bardhë theksoi gjithashtu, me shaka, se aeroplani i dhuruar nga familja sunduese e Katarit duket “shumë më mirë” për momentin. /Telegrafi/

Nuk është vetëm Krahu Lindor i Shtëpisë së Bardhë ai që është shkatërruar nga presidenti amerikan Donald Trump.

Në vitin e tij të parë pas rikthimit në detyrë, ai ka cenuar institucione dhe norma amerikane që kanë ekzistuar për breza dhe që kanë formësuar funksionimin e qeverisë federale. Ritmi i këtyre ndryshimeve ka qenë aq i shpejtë, saqë edhe vëzhguesit më të përvojë të Uashingtonit kanë pasur vështirësi t’i ndjekin zhvillimet.

Që nga inaugurimi i tij një vit më parë, presidenti 79-vjeçar ka shpërbërë në mënyrë të njëanshme agjenci federale, ka vënë në shënjestër kundërshtarë politikë, ka pezulluar financime federale dhe ka përmbysur marrëdhëniet e tregtisë globale.

Ai ka dhënë gjithashtu falje të përgjithshme për kryengritësit e 6 janarit, të cilët sulmuan Kongresin amerikan në përpjekje për të kundërshtuar rezultatet e zgjedhjeve presidenciale të vitit 2020.

Për më tepër, ka dërguar Gardën Kombëtare dhe dhjetëra agjentë të Agjencisë së Imigracionit dhe Zbatimit të Doganave (ICE) në rrugët e qyteteve amerikane, si dhe ka ndërmarrë veprime ushtarake në disa vende.

Sipas ekspertëve, të marra së bashku, këto veprime tregojnë një prirje të qartë dhe të qëndrueshme: përpjekjen për të konsoliduar dhe zgjeruar pushtetin presidencial.

— (@)

Kritikuesit e shohin këtë si një goditje të drejtpërdrejtë ndaj sistemit kushtetues të kontrolleve dhe balancave.

Norman Ornstein, studiues në Institutin Amerikan të Ndërmarrjeve, i tha The Independent se viti i kaluar përfaqësonte “një sprint drejt një autokracie”.

Nga ana tjetër, mbështetësit kundërshtojnë këto akuza, duke argumentuar se presidenti po rimerr me të drejtë kontrollin nga një klasë burokratësh të pazgjedhur dhe të rrënjosur në sistem.

“Trump do të hyjë në histori si presidenti më i suksesshëm dhe më i rëndësishëm në jetën tonë”, u shpreh Drejtori i Komunikimit i Shtëpisë së Bardhë, Steven Cheung, kur u pyet nga The Independent.

“Arritjet e tij në shërbim të popullit amerikan do të nguliten në strukturën e Amerikës dhe do të ndihen nga çdo administratë e ardhshme e Shtëpisë së Bardhë”, shtoi ai.

Më poshtë paraqitet një pasqyrë e disa prej veprimeve të Trump që, sipas kritikëve, kanë tejkaluar kufijtë institucionalë.

Shkatërrimi i agjencive, ngrirja e fondeve

Në frontin e brendshëm, shenjat e para të qasjes së zgjeruar të Trumpit ndaj autoritetit ekzekutiv u shfaqën menjëherë pas inaugurimit të tij. Ai krijoi Departamentin e Efiçiencës së Qeverisë, një strukturë e fokusuar në shkurtimin e kostove.

Ky grup i dha kompetenca të gjera mega-donatorit Elon Musk, njeriut më të pasur në botë, duke e autorizuar të mbyllte agjenci të tëra, përfshirë USAID-in. Si pasojë, rreth 300 mijë punonjës u detyruan të largoheshin nga qeveria federale.

Trump ngriti gjithashtu miliarda dollarë fonde të miratuara nga Kongresi për universitete, kërkime mjekësore dhe ndihmë të huaj. Shumica e këtyre fondeve ishin të destinuara për shtete të udhëhequra nga demokratët.

“Pushteti më qendror dhe më i palëkundur i Kongresit është pushteti i portofolit. Dhe Donald Trump ka refuzuar të shpenzojë paratë që janë miratuar”, tha për The Independent, Larry Jacobs, drejtor i Qendrës për Studimin e Politikës dhe Qeverisjes në Universitetin e Minesotës.

Shumë vëzhgues argumentojnë se veprimet gjithëpërfshirëse të Trumpit përfaqësojnë një ndryshim të thellë krahasuar me mandatin e tij të parë. Sipas tyre, arsyeja kryesore lidhet me ndryshimet në personel.

Gjatë administratës së parë, ai ishte i rrethuar nga njerëz “që punuan për të zbutur impulset e tij më të egra”, tha për The Independent profesoresha e Fakultetit të Drejtësisë në Yale, Oona Hathaway. “Këtë herë, ai e ka lënë mënjanë pjesën më të madhe të establishmentit dhe e ka mbushur Shtëpinë e Bardhë me besnikë”, shtoi ajo.

Një mori urdhrash ekzekutivë dhe faljesh

Gjatë 100 ditëve të tij të para, Trump lëshoi një numër rekord prej 124 urdhrash ekzekutivë. Disa prej tyre u konsideruan jokushtetues nga kritikët dhe gjykatat.

Mes tyre ishte një urdhër që synonte të hiqte shtetësinë bazuar në të drejtën e lindjes dhe një tjetër që kërkonte vërtetim të shtetësisë për regjistrimin e votuesve.

“Këto urdhra janë të jashtëzakonshëm, jo vetëm për numrin e tyre, por edhe për gjerësinë e ndikimit”, tha në prill Rory Little, profesor i drejtësisë në Universitetin e Kalifornisë, San Francisko.

Në mandatin e dytë, Trump ka përdorur në mënyrë agresive fuqinë e tij të faljes.

Ai i ka dhënë mëshirë mijëra njerëzve, përfshirë pothuajse të gjithë 1600 personat e akuzuar për trazirat e 6 janarit në Kapitol, si dhe figura të shumta të dënuara për mashtrim, ryshfet dhe evazion fiskal.

Shumë nga ata që përfituan nga faljet kanë lidhje politike me presidentin.

Përveç kësaj, ai ka përdorur fuqinë e tij për të armatosur Departamentin e Drejtësisë kundër armiqve politikë.

Duke e armatosur Departamentin e Drejtësisë kundër armiqve politikë

Në një tjetër shkelje të dukshme të normave presidenciale, Trump ka ushtruar publikisht presion mbi Departamentin e Drejtësisë për të hetuar kundërshtarët e tij politikë.

Në shtator, ai kritikoi ashpër Prokuroren e Përgjithshme, Pam Bondi, për mungesën e akuzave kundër ish-drejtorit të FBI-së, James Comey, të cilin e quajti “fajtor të tmerrshëm”. Ai sulmoi gjithashtu Prokurores e Përgjithshme të Nju Jorkut, Letitia James, dhe Senatorin Adam Schiff, duke shkruar në Truth Social: “DREJTËSIA DUHET TË VENDOSET.”

Menjëherë pas këtyre deklaratave, si Comey ashtu edhe James u përballën me padi nga juritë e mëdha federale, me akuza për dhënie deklaratash të rreme dhe vepra të tjera penale.

Vendosja e Gardës Kombëtare dhe bastisjet e gjera të imigracionit

Vitin e kaluar, presidenti 79‑vjeçar vendosi Gardën Kombëtare në disa qytete të SHBA‑s si pjesë të një përpjekjeje për të goditur kriminalitetin. Këto masa, shpesh të ndërmarra pa mbështetjen e zyrtarëve shtetërorë ose lokalë, kanë pak precedent historik, sipas The New York Times.

Ai gjithashtu ka rritur ndjeshëm operacionet e ICE‑s, veçanërisht në shtetet e udhëhequra nga demokratët. Të enjten, ai kërcënoi të përdorë Aktin e Kryengritjes – një fuqi emergjente që nuk është përdorur për më shumë se 30 vjet – për të vendosur ushtrinë në Minesota pas protestave kundër veprimeve të ICE‑s atje.

Duke përmbledhur këtë seri veprimesh që tejkalojnë kufijtë tradicionalë, Larry Jacobs tha se “presidenca perandorake është zhvendosur me vendosmëri dhe plotësisht në sferën e politikës së brendshme.”

Megjithatë, për mbështetësit e tij, centralizimi i pushtetit nga Trump nuk shihet si një defekt, por si një tipar pozitiv. Russ Vought, drejtori i Zyrës së Menaxhimit dhe Buxhetit, ka argumentuar se liberalët “e shtrembëruan rrënjësisht” strukturën e qeverisë, duke fuqizuar “ekspertët e karrierës” të pazgjedhur në agjencitë federale.

Sipas tij, zgjidhja është përqendrimi i më shumë pushtetit në ekzekutiv, në përputhje me teorinë e ekzekutivit unitar.

John Bolton, një mbështetës i një ekzekutivi më të fuqishëm, tha se ai beson se shumë nga veprimet e Trump kanë qenë “legjitime”. Por ai shtoi se “përpjekja për të zgjeruar pushtetin mbi jetën e përditshme — si përmes asaj që ai po bën me ICE dhe kështu me radhë — është diçka shumë e ndryshme”.

Nga ana tjetër, Yuval Levin, bashkëpunëtor i lartë në American Enterprise Institute (AEI), mori një qëndrim më nuancues. Ai i tha The New York Times se administrata ka ndërmarrë “shumë veprime”, por ka prodhuar pak “ndryshim të qëndrueshëm në politikat publike”.

Duke nënkuptuar një mandat të tretë jokushtetues

Edhe pse nuk është një veprim zyrtar, Trump ka lënë të kuptohet vazhdimisht se mund të përpiqet për një mandat të tretë në detyrë — diçka që Kushtetuta e Shteteve të Bashkuara e ndalon qartë.

“Shumë njerëz duan që unë ta bëj këtë,” tha presidenti në mars. Në dhjetor, ai deklaroi se një prej donatorëve të tij i kishte ofruar 250 milionë dollarë për të nisur një garë për vitin 2028.

Në një intervistë në janar, teksa fliste për arritjet e tij, Trump tha se “kur e mendon, nuk duhet të kemi as zgjedhje.” Shtëpia e Bardhë më vonë sqaroi se ai po e shprehte këtë në humor.

Konflikte të huaja

Disa vëzhgues thonë se Donald Trump ka shtyrë gjithashtu kufijtë e pushtetit presidencial në politikën e jashtme, duke ndërmarrë veprime ushtarake dhe kërcënuese pa miratimin e Kongresit ose pa konsensus të gjerë ndërkombëtar.

Presidentët amerikanë historikisht kanë ushtruar një liri të konsiderueshme në veprimet ushtarake jashtë vendit, veçanërisht pa një deklaratë zyrtare lufte, dhe shpesh kanë nisur sulme pa autorizim formal nga Kongresi. Megjithatë, kritikët e veprimeve të Trump thonë se ai ka tejkaluar edhe këto precedentë, duke përfshirë ndërhyrjen ushtarake të shkallës së madhe në Venezuelë, transmeton Telegrafi.

Në fillim të janarit 2026, Shtetet e Bashkuara njoftuan se forcat e tyre ushtarake kishin kryer një operacion në Venezuelë, ku presidenti Nicolás Maduro dhe bashkëshortja e tij, Cilia Flores, u kapën dhe u dërguan në New York për t’u gjykuar për akuza federale, përfshirë lidhje me narkotikë dhe terrorizëm.

Kjo ndërhyrje, e koduar si Operacioni Absolute Resolve, përfshiu sulme ajrore dhe operacione tokësore brenda territorit venezuelian dhe përbën një ndërhyrje ushtarake direkte shumë të diskutueshme nga ana e U.S. Presidentit Trump. Kritikët brenda dhe jashtë SHBA-së kanë argumentuar se ky veprim përbën një shkelje të së drejtës ndërkombëtare dhe se ai është kryer pa autorizim të qartë të Kongresit, gjë që ka nxitur debate serioze për kufijtë e pushtetit presidencial në politikën e jashtme.

Administrata gjithashtu ka kryer veprime ushtarake dhe ndërhyrje në Detin Karaibe, duke përfshirë goditje kundër anijeve që SHBA i konsideron të lidhura me trafikun e drogës dhe sekuestrimin e cisternave të naftës përkatëse. Këto masa janë kritikuar si shkelje të së drejtës ndërkombëtare dhe si përdorim të njëanshëm të forcës.

Përveç Venezuelës, Trump ka kërcënuar me veprime të ashpra ndaj Iranit, duke paralajmëruar për “veprime shumë të forta” nëse Teherani ndërmerr veprime represive ndaj protestuesve, dhe duke lënë të kuptohet se SHBA mund të ndërmarrë masa më të gjera kundër regjimit iranian.

Një tjetër çështje që ka ngjallur debat është interesimi i Trump për Grenlandën, të cilën e ka përmendur si objektiv strategjik dhe nuk ka përjashtuar përdorimin e forcës për të siguruar kontrollin e ishullit. Kjo ka shkaktuar shqetësime se një veprim i tillë mund të dëmtonte aleancat historike, përfshirë marrëdhëniet brenda NATO‑s.

Tarifa gjithëpërfshirëse

Një nga lëvizjet më të jashtëzakonshme të politikës së jashtme të Trump ka qenë vendosja e tarifave “reciproke” për dhjetëra vende, duke aplikuar një normë bazë prej 10 për qind për të gjitha importet.

Që nga hyrja e tyre në prill, këto tarifa janë ndaluar, anuluar dhe rivendosur vazhdimisht, duke krijuar një situatë të paparashikueshme në tregjet globale.

Ky vendim përfaqëson një ndryshim të rëndësishëm krahasuar me epokën pas Luftës së Dytë Botërore, kur tarifat zakonisht synonin industri ose vende të veçanta, dhe jo të gjitha importet në përgjithësi.

Michael Kazin, historian në Universitetin Georgetown, tha për The Independent se Trump madje nuk ka përpjekur të fitojë miratimin e Kongresit për shumë nga aktet e tij më të rëndësishme, përfshirë rritjen e tarifave, të cilat zakonisht kërkojnë miratimin e legjislativit.

Vetë Trump e ka bërë të qartë se nuk sheh kufizime të jashtme për pushtetin e tij në arenën ndërkombëtare. Kur u pyet nga The New York Times se me çfarë kufizimesh përballet, ai u përgjigj se “morali im. Mendja ime. Është e vetmja gjë që mund të më ndalojë”.

Publiku duket i kujdesshëm ndaj kësaj agjende të guximshme: një sondazh i fundit i Quinnipiac tregon se 54 për qind e të anketuarve besojnë se Trump ka tejkaluar autoritetin e tij.

Veprimet e administratës Trump në politikën e jashtme kanë nxitur kritika të forta edhe jashtë SHBA-së. Zyrtarë dhe udhëheqës ndërkombëtarë, përfshirë ministrin e Jashtëm rus, Sergey Lavrov kanë akuzuar Shtetet e Bashkuara për shkatërrim të rendit ndërkombëtar dhe për veprime që dëmtojnë besueshmërinë dhe sigurinë globale.

Po ashtu, figura të larta fetare në SHBA kanë shprehur shqetësime morale lidhur me përqendrimin e politikës së jashtme në përdorim të forcës, duke vënë në dukje se diplomacia po merr më pak hapësirë, dhe paralajmëruar për pasoja negative globale.

Në përgjithësi, kritikët paralajmërojnë se këto veprime mund të çojnë vendin drejt një pozicionimi më të ashpër dhe të paqëndrueshëm në arenën ndërkombëtare, ndërsa mbështetësit zakonisht i arsyetojnë ato me nevoja të sigurisë kombëtare dhe mbrojtjes së interesave amerikane.

Përgjigje e heshtur nga Kongresi dhe Gjykata Supreme

Deri më tani, shumë prej këtyre masave dramatike kanë hasur pak kundërshtime - ose madje janë mbështetur - nga Kongresi i kontrolluar nga republikanët, dega e qeverisë që themeluesit e kombit kishin synuar të luante rolin më të fuqishëm të kontrollit dhe balancës.

“Kongresi Republikan nuk ka mbajtur asnjë seancë dëgjimore mbikëqyrëse për asnjë nga mizoritë që kanë ndodhur, dhe kjo përfshin kërcënimet për të pushtuar aleatët tanë të NATO‑s, krimet e qarta të luftës që po ndodhin me sulmet ndaj Venezuelës ose abuzimet e ICE‑s”, tha Norman Ornstein, një vëzhgues i njohur i jetës politike amerikane.

“Ideja se ekziston një Kongres që mundëson gjithçka është e dukshme”, tha Barbara Comstock, ish‑kongresiste republikane. “Ka një frikë të dukshme brenda Kongresit Republikan - veçanërisht në Dhomën e Përfaqësuesve - nga baza e tyre MAGA”, shtoi ajo.

Si shembuj të mosveprimit të Kongresit, ekspertët kanë përmendur disa rezoluta të dështuara lidhur me fuqitë e luftës, të cilat synonin të rivendosnin kontrollin e Capitolit mbi presidentin në politika si ajo ndaj Venezuelës dhe Iranit, por që nuk morën mbështetje të mjaftueshme për t’u miratuar.

Megjithatë, shumë analistë vënë në dukje se një ndryshim mund të vijë pas zgjedhjeve të mesit të mandatit, të cilat historikisht kanë rezultuar në humbjen e vendeve në Kongres nga partia e presidentit.

Gjykata e Lartë ka vepruar gjithashtu me kujdes mes fluksit të veprimeve të profilit të lartë të Trumpit. Në raste të shumta, ajo ka vendosur në favor të administratës, përfshirë lejimin e një ngrirjeje të përkohshme të ndihmës së huaj.

“Gjykata Supreme në thelb i dha atij një leje të lirë,” tha Norman Ornstein.

John Bolton vuri në dukje se procesi gjyqësor ka qenë gjithmonë i ngadaltë:

“Gjykatat janë ende shumë prapa Trumpit, por në mënyrë të pashmangshme, ato fillojnë të arrijnë ritmin.”

Në muajt e ardhshëm, gjykata e lartë pritet të marrë një sërë vendimesh të profilit të lartë, duke përfshirë çështje mbi fuqitë tarifore të Trump dhe urdhrin ekzekutiv mbi shtetësinë në lindje.

Megjithatë, duke marrë parasysh pasigurinë që rrethon këto vendime dhe rezultatin e zgjedhjeve të mesit të mandatit, mbetet e paqartë nëse gjykata dhe Kongresi do të vendosin kufizime domethënëse mbi presidentin. Në fund të fundit, mbeten edhe tre vjet të mandatit të tij. /Telegrafi/

Kryeministri belg, Bart De Wever ka komentuar rreth tërheqjes së vendeve drejt Bashkimit Evropian, duke theksuar dallimin mes BE-së dhe fuqive të tjera globale.

“Populli dëshiron të bashkohet me Bashkimin Evropian. Askush nuk dëshiron të bashkohet me Kinën. Asnjë fqinj i Shteteve të Bashkuara nuk thotë: ‘Dëshirojmë të bashkohemi me Shtetet e Bashkuara.’ Askush nuk e dëshiron”, deklaroi De Wever.

Ai shtoi se arsyeja kryesore pse vendet aspiruese synojnë BE-në është respekti që kjo bashkësi ka fituar ndërkombëtarisht.

“Ata duan të bashkohen me Bashkimin Evropian thjesht sepse ne kemi respekt. Ne kemi sundimin e ligjit. Ne flasim butë”, tha Kryeministri belg.

Komentet vijnë në një kohë kur integrimi evropian dhe marrëdhëniet me fuqitë globale janë në qendër të debatit politik në kontinent.

Ndryshe, SHBA-ja kërkon me këmbëngulje që një ishulli danez i Grenlandës të jetë pjesë e shtetit amerikan. /Telegrafi/

— (@)

Presidenti i SHBA‑s, Donald Trump, në platformën e tij Truth Social ka publikuar një fotografi të një mesazhi privat që, sipas tij, i është dërguar Mark Rutte, kryeministrit të Holandës dhe sekretarit të përgjithshëm të NATO‑s.

Në këtë mesazh, Rutte e lavdëron Trump për rezultatet e arritura nga administrata e tij në Siri dhe thekson se do të përdorë paraqitjet e tij në mediat ndërkombëtare gjatë forumit të Davosit për të nxjerrë në pah punën dhe angazhimin e SHBA‑s në Siri, në Gazë dhe në Ukrainë.

Gjithashtu, Rutte shpreh gatishmërinë e tij për të gjetur një zgjidhje lidhur me Grenlandën, një temë që ka qenë e diskutueshme në skenën ndërkombëtare, dhe shprehet se mezi pret të takohet personalisht me Trumpin për të diskutuar çështjet e hapura dhe mundësitë e bashkëpunimit.

Trump ka bashkëngjitur këtë mesazh me tekstin “faleminderit Mark Rutte, sekretarit të përgjithshëm të NATO‑s!”, duke e shoqëruar me komentet e tij personale se ka pasur një bisedë shumë të mirë telefonike me Rutte për çështjen e Grenlandës dhe se të dy kanë rënë dakord për një takim të ardhshëm me palë të ndryshme gjatë forumit të Davosit, ku do të diskutojnë sfidat dhe mundësitë e bashkëpunimit ndërkombëtar.

Përveç këtij mesazhi, Trump ka publikuar edhe një tjetër që pretendon se i është dërguar nga presidenti francez, Emmanuel Macron, por media ndërkombëtare, përfshirë CNN, nuk ka mundur të verifikojë autenticitetin e këtyre mesazheve. Autoritetet e NATO‑s janë kontaktuar për koment, duke lënë të hapur mundësinë që disa detaje të mos jenë konfirmuar zyrtarisht.

Ky veprim i Trumpit, e cila përfshin publikimin e mesazheve private të liderëve ndërkombëtarë, është parë si një hap i pazakontë në diplomacinë moderne, duke ngritur pyetje rreth transparencës dhe etikës në marrëdhëniet ndërkombëtare, si dhe për ndikimin që ka imazhi publik i presidentit mbi marrëveshjet dhe bisedimet sensitive. /Telegrafi/

Sipas raportimeve të dëshmitarëve dhe videove të publikuara në rrjetet sociale, një raketë ruse e mbrojtjes ajrore goditi një ndërtesë banimi.

Ngjarja ndodhi gjatë një sulmi ukrainas me dronë, për të cilin autoritetet ruse kishin lëshuar paralajmërime të shumta për raketa në rajon.

Banorë raportuan shpërthime gjatë natës, dhe në kanalet ruse në Telegram u publikuan pamje që tregojnë sistemet e mbrojtjes ajrore duke vepruar mbi qytet. Një video thuhet se kap momentin kur raketa ruse bie mbi qytet.

Kryetari i Rostovit të Donit, Alexander Skryabin, konfirmoi një zjarr në një apartament, por tha se shkak ishin fragmente të një droni ukrainas.

Ndërkohë, guvernatori i rajonit të Rostovit, Yuri Slyusar, raportoi se një burrë humbi jetën pasi apartamenti i tij u përfshi nga zjarri, dhe katër persona, përfshirë një fëmijë 4-vjeçar, u plagosën në Rostov dhe periferi.

Rusia më parë ka goditur objektiva brenda territorit të vet gjatë sulmeve ajrore ukrainase, ndërsa Kievi akuzon Moskën se herë pas here inskenon sulme për të përhapur dezinformim. Ushtria ukrainase nuk ka komentuar raportin. /Telegrafi/

Udhëheqësi i Koresë së Veriut, Kim Jong-un, ka shkarkuar zëvendëskryeministrin përgjegjës për inxhinierinë mekanike, Jang Sung Ho, për shkak të problemeve gjatë një projekti modernizimi të fabrikës Ryongsong në veri-lindje të vendit.

Kim e akuzoi zyrtarin se gjatë punimeve shkaktoi “çarje të panevojshme” dhe përmendi se kjo çoi në një “humbje ekonomike jo të vogël”.

Shkarkimi duket se synon disiplinimin e zyrtarëve para kongresit të ardhshëm të Partisë Punëtore, ku pritet të vendosen prioritetet e reja politike dhe ekonomike, raporton skynews.

“Ta them më thjesht dhe në mënyrë figurative, Jang ishte si një dhi e lidhur për të tërhequr një karrocë me lopë. Duhet ta shikojmë këtë si një gabim të rastësishëm në praktikën tonë të emërimeve të kadrove. A mund të presim që një dhi të tërheqë një karrocë të destinuar për një lopë? Nga dita e sotme të shpall të shkarkuar, shoku zëvendëskryeministër”, tha Kim.

Sipas agjencisë shtetërore, Kim e kishte kritikuar Jang edhe vitin e kaluar në një mbledhje partie.

Qortimet publike të tilla janë të rralla, por udhëheqësi verikorean herë pas here përdor këtë formë për të rikthyer disiplinën ose për t’iu kaluar përgjegjësinë zyrtarëve për dështimet ekonomike dhe politikat e dështuara.

Vitet e fundit, Kim Jong-un ka përqendruar përpjekjet e tij për të eliminuar defetizmin, pakujdesinë dhe pasivitetin në sektorët ekonomikë, duke synuar të zgjidhë problemet kronike të ekonomisë, e cila u godit rëndë gjatë pandemisë së COVID-19.

Sipas bankës qendrore të Koresë së Jugut, ekonomia e Koresë së Veriut u rrit me 3.7 për qind në vitin 2024, por analistët paralajmërojnë se rritja e shpejtë do të jetë e vështirë për shkak të centralizimit të ekonomisë, sanksioneve ndërkombëtare dhe fokusit mbi programet e armatimit.

Kongresi i Partisë Punëtore, i pari pas pesë vitesh, pritet të zhvillohet në fund të janarit ose në shkurt, sipas shërbimit inteligjent jugkorean. /Telegrafi/

Astronomët kanë zbuluar për herë të parë dëshmi që Betelgeuze, ylli gjigant i kuq në Orion, ka një yll shoqërues të fshehur.

Shoku misterioz lë një gjurmë të dendur gazi në atmosferën e jashtme të Betelgeuzes, një fenomen që i ka habitur shkencëtarët dhe që shpjegon ndryshimet periodike në shkëlqimin e yllit.

Betelgeuze, një nga yjet më të mëdhenj të njohur, është kaq i madh sa do të mund të përmbante më shumë se 400 milionë Diell.

Shoku i tij, i quajtur Siwarha, është më i vogël dhe orbita e tij e ngushtë shkakton valë në atmosferën e jashtme të yllit gjigant.

“Është pak si një anije që lëviz në ujë”, shpjegon astronomia Andrea Dupree, një nga autorët e studimit.

“Ylli shoqërues krijon një efekt që ne tani mund ta shohim nga Toka”, shtoi ajo, raporton cnn.

Ky zbulim, i botuar në Astrophysical Journal, jo vetëm që konfirmon ekzistencën e shokut të Betelgeuzes, por gjithashtu ndihmon shkencëtarët të kuptojnë më mirë evoluimin e yjeve gjigantë dhe ciklet e tyre të ndritshme, duke u afruar një hap më pranë përgjigjes së misterit pse Betelgeuze herë pas here ndryshon shkëlqimin. /Telegrafi/

Deputetët e pavendosur në Parlamentin Evropian mund të vendosin nëse do të arrihet një marrëveshje për krijimin e zonës më të madhe të tregtisë së lirë në botë, sipas një analize të votimit të publikuar nga Politico.

Kryetarja e Komisionit Evropian, Ursula von der Leyen, dhe kryetari i Këshillit Evropian, Antonio Costa, nënshkruan marrëveshjen e shumëpritur tregtare me Argjentinën, Brazilin, Paraguain dhe Uruguain me shumë pompë gjatë fundjavës së kaluar.

Marrëveshja Mercosur, e cila është përgatitur për 25 vjet, përfshin 700 milion njerëz, dhe Brukseli e konsideron atë si një mjet kyç strategjik për të forcuar lidhjet tregtare të BE-së me Amerikën Latine, ndërsa marrëdhëniet me Shtetet e Bashkuara dhe Kinën janë përkeqësuar.

Megjithatë, mega-marrëveshja ende duhet të marrë miratimin e Parlamentit Evropian për të hyrë në fuqi, transmeton Telegrafi.

Gazetarët e Politico kontaktuan grupet e partive dhe deputetë individualë dhe përcaktuan qëllimet e votimit të 673 nga 719 deputetë të Parlamentit. Rezultatet tregojnë se marrëveshja rrezikon të ngecë.

Të paktën 301 nga këta deputetë pritet të jenë kundër marrëveshjes Mercosur kur ajo të paraqitet në Parlament, ndërsa 319 deputetë do të votonin për të.

Ky është një numër që deputetët e pavendosur dhe të paqartë mund ta ndryshojnë lehtësisht.

Ky është një moment kyç për marrëveshjen tregtare

Parlamenti nuk do të votojë për marrëveshjen vetë për disa muaj, ndoshta jo para majit. Por të mërkurën deputetët do të vendosin nëse do të dërgojnë tekstin e marrëveshjes për kontroll ligjor në Gjykatën e BE-së.

Ky proces mund të shtyjë vendimin përfundimtar deri në dy vjet.

Ky votim është në thelb një votim provë që tregon se ku do të qëndronte shumica në miratimin përfundimtar. Shumë deputetë që mbështesin marrëveshjen pritet të refuzojnë dërgimin e tekstit në Gjykatë.

Megjithatë, kjo nuk është e vërtetë për të gjithë. Për shembull, 12 deputetë nga Partia e Gjelbër gjermane mbështesin marrëveshjen, por gjithashtu mbështesin dërgimin e tekstit në Gjykatë për të kontrolluar ligjshmërinë e tij, gjë që e bën votimin edhe më të pasigurt.

Në Këshillin e BE-së, degën ndërqeveritare të bllokut, marrëveshja mori shumicë të kualifikuar pavarësisht kundërshtimit të Francës, Polonisë, Austrisë, Irlandës dhe Hungarisë. Belgjika u tërhoq, ndërsa Italia mbështeti marrëveshjen vetëm pasi siguroi mbrojtje dhe angazhime financiare për fermerët e saj.

Një votim i Parlamentit kundër marrëveshjes do të ishte një goditje e madhe për Brukselin dhe fushatën për marrëveshjen që udhëhiqet nga Gjermania.

“Nuk duhet ta humbasim këtë mundësi. Nuk ka nevojë të flasim më shumë për sovranitetin evropian ose për aftësinë e Evropës për të vepruar nëse nuk arrijmë t’i çojmë këto marrëveshje tregtare të lira në një përfundim pozitiv”, tha javën e kaluar ministri i Jashtëm Johann Wadephul, duke ftuar Parlamentin Evropian që të mbështesë marrëveshjen.

Kundërshtimi në Parlament vjen nga drejtime të ndryshme politike: pritet që deputetët e ekstremit të djathtë “Patriots for Europe” dhe grupet e majta të votojnë kundër marrëveshjes.

Grupet e tjera politike janë të ndara. Edhe brenda radhëve të Partisë Popullore Evropiane (EPP) të Ursulas von der Leyen, pritet që një e pesta e deputetëve të votojë kundër tekstit të Mercosur.

Gjithashtu ka përçarje brenda grupit liberal Renew dhe të Gjelbërve, ndërsa analiza tregon se marrëveshja tregtare ndan konservatorët dhe reformistët e djathtë evropianë në mes.

Një pyetje e madhe qëndron mbi delegacionin spanjoll brenda EPP-së. Me 22 deputetë, ata më parë konsideroheshin si një nga promovuesit kryesorë të marrëveshjes. Por, presioni i fermerëve kundër Mercosur para zgjedhjeve rajonale ka vënë në dyshim nëse ata do të qëndrojnë në kampin e marrëveshjes. Zyrtarët e lartë të EPP-së ende mbështeten në mbështetjen e tyre pavarësisht dyshimeve të fundit. /Telegrafi/

Alexander Stubb ka propozuar që homologu amerikan, Donald Trump, të kalojnë së bashku pak kohë në një sauna tradicionale finlandeze, si një mënyrë joformale dhe simbolike për të ndihmuar në zgjidhjen e situatës së ndërlikuar rreth Grenlandës.

Sipas presidentit finlandez, ky ritual tipik nordik shërben jo vetëm për relaksim, por edhe për reflektim të qetë dhe marrje vendimesh më të balancuara.

“Është më mirë të ndalemi për një moment – të shkojmë në sauna, të bëjmë një banjë të mirë me avull – dhe vetëm më pas të kërkojmë një zgjidhje të arsyeshme. Nëse do të arrinim ta bindnim presidentin Trump të shkonte në sauna, mendoj se do të arrinim diçka konkrete,” u shpreh Stubb, duke nënvizuar rëndësinë e qetësimit të tensioneve përpara dialogut politik.

Kjo, megjithatë, nuk është nisma e parë e këtij lloji nga ana e udhëheqësit finlandez.

Stubb është i njohur për promovimin e asaj që ai e quan “qasje finlandeze” ndaj diplomacisë, e cila përfshin pauza të menduara dhe reflektim përpara negociatave të vështira.

Në mars të vitit 2025, ai u kishte bërë thirrje tashmë Donald Trumpit dhe presidentit ukrainas, Volodymyr Zelensky, që të ngadalësonin ritmin e përplasjeve verbale dhe politike, duke u kthyer në tryezën e bisedimeve pas një pauze “në stilin finlandez”, me qëllim gjetjen e një zgjidhjeje më të qëndrueshme dhe afatgjatë. /Telegrafi/

— (@)

Hapet mundësia për të rezervuar një dhomë në hotelin e parë në Hënë – pagesa paraprake 1 milion dollarë.

Një startup me bazë në Kaliforni po sjell një ëndërr të shkencës-fantastikës në realitet: një hotel në Hënë.

Kompania GRU Space, e themeluar nga Skylar Chan, ka nisur të pranojë depozita deri në 1 milion dollarë për ata që duan të jenë ndër udhëtarët e parë që do të qëndrojnë në sipërfaqen hënore.

Hoteli i parë në botë në Hënë pritet të hapë dyert deri në vitin 2032, megjithëse çmimi përfundimtar i dhomave ende nuk është konfirmuar, por pritet të kalojë 10 milionë dollarë.

Pagesa paraprake mund të jetë midis 250 mijë dhe 1 milion dollarë, sipas paketës së zgjedhur, raporton odditycentral.

GRU Space ka një qasje të veçantë ndaj ndërtimit: në vend që të transportojë materiale të rënda nga Toka, kompania planifikon të përdorë robotë dhe blloqe të krijuara nga dheu hënor për të ngritur strukturat e hotelit, të përshtatura për kushtet ekstreme të Hënës.

Nëse gjithçka shkon sipas planit, ndërtimi i hotelit do të fillojë në vitin 2029, duke shënuar një hap historik në turizmin hapësinor dhe duke ofruar mundësinë e rrallë për një eksperiencë unike në një planet tjetër. /Telegrafi/