Pretendimi: Kryeministri Edi Rama jep njoftimin për rritje pensionesh që po trondit pensionistët

Verdikti: E pavërtetë

——————————————————————

“Rritje pensionesh?! Edi Rama jep njoftimin që po trondit pensionistët – Shpresë apo zhgënjim i ri?”, lajmëron një postim në Facebook më 14 janar 2026, ndërsa lexuesit ftohen të klikojnë një lidhje në komente për të mësuar më shumë.

Megjithatë, pensionistët dhe dashamirësit e tyre nuk duhet të gëzohen para kohe. Ky lajm, dhe gjithë artikulli, janë të rreme.

Në brendinë e artikullit pretendohet se në një komunikim publik, Rama ka lënë të kuptohet se qeveria “po shqyrton mundësinë e një ndërhyrjeje të re në skemën e pensioneve.” Rama gjithashtu citohet të ketë thënë se “pensionistët janë një shtresë që ka dhënë shumë për këtë vend dhe meriton më shumë dinjitet.”

Një tregues fillestar që duhet të na bëjë dyshues është mungesa e ndonjë burimi, reference, apo detaji identifikues si data dhe vendi i deklaratës së Ramës. 

Artikulli flet gjithashtu për debat në opinion publik pa iu referuar ndonjë burimi specifik, përdor fjalë të pacaktuara si “disa” dhe “shumëkush” dhe flet për “ekspertë të ekonomisë” pa dhënë asnjë emër apo institucion.

Termat e vagullt dhe të përgjithshëm të përdorur në artikull, si dhe mungesave e detajeve specifike, na bën të dyshojmë më tej se artikulli jo vetëm që është i rremë, por me gjasa është gjeneruar me programe të inteligjencës artificiale. 

Është e vërtetë se Rama foli për pensionet së fundmi në podkastin e tij të 11 janarit. Megjithatë, ai nuk foli për ndonjë ndryshim në skemën e pensioneve dhe nuk tha se pensionistët kanë dhënë shumë për vendin dhe meritojnë më shumë dinjitet, siç pretendohet në artikull.

Çfarë tha Rama për pensionet në podkastin e 11 janarit 2026

Më herët, në tetor 2025, Rama ka deklaruar se nga janari 2026, pensionet do të rriteshin çdo muaj me 600-1800 lekë në varësi të llojit.

Profili i Facebook që ka ndarë këtë lajm të rremë ka ndarë dhe më parë lajme të rreme të ngjashme, duke pretenduar se gazetari shqiptar Enkel Demi kishte ndërruar jetë dhe se vrasësi i politikanit të ndjerë Sokol Olldashi ishte zbuluar.

The post I rremë titulli për rritje tronditëse pensionesh këtë fillimviti appeared first on Faktoje.al.

Pretendimi: Kjo video tregon gratë në Iran që protestojnë kundër regjimit duke hequr perçet dhe duke i djegur në 2026

Verdikti: Mungon konteksti

———————————————————-

Një video që po qarkullon në rrjete sociale shqipfolëse pretendohet se tregon gratë në Iran që protestojnë kundër regjimit duke hequr perçet dhe duke i djegur gjatë protestave masive në vend në janar 2026.

Me anë të motorrit të kërkimit pamor Google Lens, Faktoje gjeti një video të ngjashme të të njëjtit grup grash që heqin perçet ndërsa bërtasin “Liberté!” (liri) të botuar nga media franceze Frontières në shtator 2025. 

Sipas përshkrimit të videos, ajo është xhiruar në sheshin Place de la Bastille, në Paris.

Nëse krahasojmë pamjet e sheshit Bastille nga Google Earth me pamjet e videos, vërejmë se shfaqen të njejtat godina.

Prandaj, nuk është e vërtetë që video tregon gratë në Iran, gjatë protestave të janarit 2026. Ajo tregon një protestë të mbajtur në Paris në shtator 2025.

Pjesa e dytë e videos tregon një grua duke kërcyer pasi hedhi perçen në një zjarr të madh.

Një kërkim me Google Lens zbuloi se video origjinale është postuar, ndër të tjerë, nga Zëri i Amerikës në Youtube në shtator 2022. 

Sipas përshkrimit të medias amerikane, video tregon protesta në një rrugë në Sari, Iran. Protestat në atë kohë erdhën për shkak të vdekjes së 22-vjeçares Jina Mahsa Amini pas arrestimit nga policia e moralit, e cila zbaton kodin e rreptë të veshjes për gratë.

The post Këto djegie të ferexheve jo nga protestat në Iran appeared first on Faktoje.al.

Pretendimi: Çmendet kryediplomatja e Bashkimit Europian Kaja Kallas duke thënë se bota po shkon keq kështu që tani është momenti për të pirë alkool

Verdikti: Mungon konteksti

———————————————————————

Një batutë e shefes së politikës së jashtme të BE, Kaja Kallas, po qarkullon në media, përfshi ato shqipfolëse, si një “çmenduri” e kryediplomates.

Mediat i referohen një artikulli të revistës amerikane Politico, i cili citon dy persona që ishin të pranishëm në takimin e Konferencës së Presidentëve në fund të dhjetorit, një takim i udhëheqësve të grupeve të Parlamentit Europian, ku Kallas citohet të ketë thënë “çmendurinë” se gjendja aktuale e botës do të thotë se ky mund të jetë një “moment i mirë” për të filluar të pinte.

Sipas artikullit të Politico, Kallas e bëri shakanë pasi eurodeputetët filluan t’i uronin njëri-tjetrit një vit të ri të lumtur. Ata më pas shtuan se ngjarjet globale nuk e bëjnë aq vit të ri të lumtur, sipas njerëzve në dhomë. Në vazhdën e këtyre shkëmbimeve informale, Kallas bëri shaka se, edhe pse ajo nuk pi shumë alkool zakonisht, tani mund të jetë koha për të filluar duke pasur parasysh ngjarjet në të gjithë botën.

Ndryshe nga ç’nënkuptohet në raportimet mediatike, Kallas nuk këshilloi udhëheqësit evropianë të tjerët të fillonin alkoolin si një zgjidhje e problemeve aktuale me të cilën përballet BE. Ajo po fliste për vete dhe si një urim në mbledhjen e fundit të vitit para festave.

Ngjarjet globale të referuara më sipër me gjasa konsistojnë në kërcënimet e presidentit amerikan Trump për të aneksuar Groenlandën nga Danimarka, protesta masive kundër regjimit islamist në Iran, konfliktet e vazhdueshme në Ukrainë dhe Gaza dhe ndërhyrja e ShBA në Venezuelë.

Batuta informale e Kallas, e cila shprehu një ndjenjë të ndarë nga shumëkush në këtë situatë globale të nderë, u përfol nëpër media, duke u interpretuar qëllimisht si deklaratë serioze. Drejtori politik i kryeministrit hungarez Orban madje bëri thirrje që ajo të japë dorëheqjen prej kësaj deklarate.

The post E keqinterpretuar batuta e kryediplomates Kallas për t’u bërë tapë appeared first on Faktoje.al.

Pretendimi: Kjo video tregon pamje reale nga një muze i braktisur dylli me temë pedofilin dhe trafikantin e fëmijëve Jeffrey Epstein

Verdikti: E pavërtetë, Gjeneruar me AI

————————————————————

Një video që po qarkullon në rrjete sociale, përfshi ato shqipfolëse, duket se tregon një muze dylli të braktisur, në të cilin shfaqen statuja dylli të vendosura në skena që kanë lidhje me çështjen e pedofilit dhe trafikantit të fëmijëve Jeffrey Epstein dhe ishullit të tij privat ku ndodhte abuzim seksual i të miturve.

Video përmban skena të rikrijuara me statuja dylli, të bazuara në fotografi reale, dhe skena të imagjinuara.

Megjithatë, vetë video është e gjeneruar me anë të programeve të inteligjencës artificiale (AI).

Me anë të motorrit të kërkimit pamor Google Lens, Faktoje gjeti se video është postuar fillmisht në TikTok më 30 dhjetor 2025 nga llogaria emri i së cilës shfaqet dhe si mbishkrim në video, @demonflyingfox.

Siç vërehet, vetë autori i videos e ka etiketuar atë në TikTok si të gjeneruar me AI.

Në fakt, i tërë profili i demonflyingfox, që sipas përshkrimit në Youtube dëshiron “të tregojë se çfarë është e mundur me inteligjencën artificiale”, përbëhet nga përmbajtje të gjeneruara me AI.

Për të parandaluar që përmbajtje të tilla të keqinterpretohen, është e rëndësishme që çdo video, foto ose material tjetër i gjeneruar ose i manipuluar me inteligjencë artificiale të shënohet si i tillë. Kjo do të ndihmojë në informimin e audiencës dhe në mbrojtjen e tyre nga dezinformimi. Facebook i detyron përdoruesit të etiketojnë imazhet dhe videot e gjeneruara me AI si të tilla.

The post I gjeneruar muzeu i dyllit i politikanëve miq të famëkeqit Epstein appeared first on Faktoje.al.

Pretendimi: Kjo video tregon rezultatin e një vendimi të marrë së fundmi nga autoritetet gjermane për të ndaluar kripën për shkrirjen e akullit sepse dëmton mjedisin

Verdikti: Mungon konteksti

Një video që po qarkullon në rrjete sociale, përfshi ato shqipfolëse, duket se tregon një sërë njerëzish duke u mbajtur në parmakët e shkallëve të mbuluara me borë, për të mos rrëshkitur. Video shoqërohet me pretendimin se kjo situatë ka ndodhur sepse “autoritetet gjermane tani kanë vendosur të ndalojnë kripën për shkrirjen e akullit sepse “nuk është miqësore me mjedisin’”. Video dhe pretendimi është ndarë më pas në rrjet kryesisht nga kanale ruse duke vënë në lojë fokusin e Gjermanisë tek Agjenda e Gjelbër dhe “sakrificave” që u kërkohen qytetarëve në vendet evropiane ne emër të ndryshimeve klimatike. 

Me anë të motorrit të kërkimit pamor Google Lens, Faktoje gjeti se video e mësipërme u filmua nga një gazetar i Morgen Post më 4 janar 2026 dhe tregon tifozë të hokejit në Berlin.

Eshtë e vërtetë se një pjesë e madhe e komunave gjermane e kanë kufizuar përdorimin e kripës për shkrirjen e akullit për arsye mjedisore, tha Ministria gjermane e Mjedisit për kolegët spanjollë të verifikimit të fakteve Maldita. 

Kripa shkakton inflamacion në putrat e kafshëve shtëpiake nëse ecin mbi të për periudha të gjata dhe mund të çojë në tharjen e pemëve, ndotjen e depozitave të ujit në tokë dhe dëmtimin e ndërtesave historike, shpjegon Agjencia Federale Gjermane e Mjedisit (UBA).

Megjithatë, ndalimi i përdorimit të kripës nuk është një vendim i marrë së fundmi dhe në nivel federal në Gjermani. Debati rreth kësaj rregulloreje daton që nga vitet 1980, thekson UBA. Gjermania vepron në një mënyrë “mozaike” dhe disa qytete “vazhdojnë ta përdorin atë në rrugët kryesore, por e ndalojnë përdorimin e saj në shtëpi private”. Për më tepër, në raste të jashtëzakonshme, kripa përdoret edhe në shkallë ose në “sipërfaqe të tjera kritike”, si në videon e mësipërme.

Në qytete si Berlin dhe Bonn, rregulloret kanë qenë në fuqi të paktën që nga viti 2013, ndërsa marrëveshja ndërkombëtare të cilës i referohen rregulloret u nënshkrua në vitin 2015. Autoritetet gjermane këshillojnë trajtimin e akullit me materiale të tjera, të tilla si zhavorri, granulat ose rëra, të cilat, megjithëse nuk e shkrijnë akullin, zvogëlojnë rrezikun e rrëshqitjes.

Megjithatë, në situata të motit ekstrem, qeveritë komunale mund ta heqin kufizimin. Kjo ka ndodhur në Hamburg, ku është autorizuar përdorimi i kripës deri më 21 janar 2026, për shkak të një rreziku që “nuk mund të adresohet në mënyrë adekuate me pajisje mekanike të mirëmbajtjes dimërore”.

Gjobat për shkeljen e ndalimit të përhapjes së kripës ndryshojnë sipas vendndodhjes dhe mund të variojnë nga 500 deri në 50,000 euro në raste si Berlini.

The post Gjermania nuk ndaloi së fundmi hedhjen e kripës kundër akullit appeared first on Faktoje.al.

Pretendimi: Artisti shqiptar Ardit Gjebrea është arrestuar për vjedhje kompjuterash

Verdikti: E pavërtetë

——————————————————————

Një postim që ka marrë gati 200 pëlqime në Facebook njofton se prezantuesi shqiptar Ardit Gjebrea është arrestuar për vjedhje, ndërsa lexuesit ftohen të klikojnë një lidhje në komente për të mësuar më shumë.

Në brendinë e artikullit pretendohet se Gjebrea është arrestuar pasi “policia ka zbuluar prova që e lidhin atë me vjedhjen e disa sendeve të vlefshme, duke përfshirë laptopë dhe pajisje elektronike.”

Megjithatë, nuk jepet ndonjë provë, burim apo referencë për t’i mbështetur këto pretendime.

Nuk ka asnjë njoftim zyrtar nga Policia e Shtetit për një arrestim të tillë. 

Faktoje ka përgënjeshtruar dhe lajme të mëparshme nga i njejti portal, i cili ka botuar artikuj të trilluar mbi gjetjen e Bleona Matës së zhdukur në 2010, vdekjen e këngëtarit Shpat Kasapi dhe të politikanit shqiptar Azem Hajdari, dhe vdekjen e rreme të politikanit Lulzim Basha.

Titulli i artikullit keqinformon me qëllim mbledhjen e sa më shumë klikimeve në mënyrë jo etike. Pjesa më e madhe e lexuesve shkruajne komente negative për portalin apo përpiqen të përgënjeshtrojnë lajmet e rreme për personazhe të njohura, pa e kuptuar se edhe duke shkruar një koment të tillë ndihmojnë në rritjen e shikueshmërisë së portalit dhe jetëgjatësinë e mëtejshme të veprimtarisë së tij abuzive.   

Ka gjasa që ky artikull, dhe artikuj te ngjashëm të postuar nga e njejta faqe dhe përgënjeshtruar dhe më parë nga Faktoje, janë gjeneruar me anë të programeve kompjuterike të inteligjencës artificiale (AI).

The post Ardit Gjebrea viktimë e lajmeve të rreme të portaleve “informative” appeared first on Faktoje.al.

Pretendimi: Zbulohet vrasësi me pagesë i politikanit të ndjerë Sokol Olldashi

Verdikti: E pavërtetë

——————————————————————

Një postim në Facebook pretendon se, mbi 10 vjet pas vdekjes së papritur të politikanit Sokol Olldashi në vitin 2013, vrasësi i tij është zbuluar. Foto që shoqëron postimin përfshin edhe portretin e Nuredin Dumanit, personit të akuzuar për një sërë ngjarjesh kriminale dhe që ka pranuar të bashkëpunojë me Drejtësinë. Pas këtij prezantimi intrigues, lexuesit ftohen të klikojnë një lidhje në komente për të mësuar më shumë.

Në brendësi të artikullit zbulohet se kemi të bëjmë me një titull të rremë, që ka për synim të tërheqë interesin e përdoruesve dhe rrisë klikimet me qëllim përfitimi.

Artikulli në brendësi nuk zbulon asnjë emër vrasësi, apo ndonjë provë që Olldashi është vrarë nga një vrasës me pagesë.

Ai pretendon se “në rrjete sociale dhe disa portale janë shpërndarë deklarata dhe tituj tronditës që pretendojnë se pas vdekjes së Olldashit fshihet një akt kriminal i organizuar,” megjithatë nuk referon asnjë nga këto postime dhe tituj të pretenduar.

Më tej, vetë artikulli shkruan se “asnjë institucion zyrtar nuk ka konfirmuar ekzistencën e një vrasësi apo skeme kriminale.”

Sokol Olldashi vdiq më 20 nëntor 2013 si pasojë e një aksidenti automobilistik në Krrabë të Tiranës. Hetimet e deritanishme nuk kanë gjetur ndonjë provë që mund të mbështesë dyshimin për një manipulim të automjetit të të ndjerit.

Faktoje ka përgënjeshtruar dhe më parë lajme të rreme për zbulimin e vrasësit të Ollashit, që kanë për qëllim mbledhjen e klikimeve.
Faqja e Facebook që ka ndarë këtë lajm të rremë ka ndarë dhe më parë lajme të rreme të ngjashme, duke pretenduar se gazetari shqiptar Enkel Demi kishte ndërruar jetë.

The post I rremë lajmi për zbulimin e vrasësit me pagesë të Sokol Olldashit appeared first on Faktoje.al.

Pretendimi: Ky imazh tregon një person të maskuar që endet natën rrugëve të Prishtinës, duke i përndjekur qytetarët

Verdikti: E pavërtetë, Gjeneruar me AI

——————————————–

Një imazh që qarkulloi gjerësisht në mediat dhe rrjete sociale shqipfolëse javën e dytë të janarit 2026 pretendohet se tregon “Fantazmën e Prishtinës,” një person i maskuar që endet natën rrugëve të kryeqytetit kosovar. Imazhi shoqërohet edhe me pretendimin se qytetarët ankohen se ky person i maskuar po “i tmerron” me pamjen e tij duke i përndjekur ata gjatë natës.

Megjithatë, lexuesit shqiptarë në të dyja anët e kufirit nuk duhet të frikësohen. Fantazma e Prishtinës nuk është reale. Imazhi i mësipërm është gjeneruar me anë të programeve kompjuterike të inteligjencës artificiale (AI).

Këshilli i Mediave të Shkruara të Kosovës (KMShK) ka përgënjeshtruar vërtetësinë e imazhit më 12 janar në Facebook, duke e etiketuar imazhin si të gjeneruar me AI dhe duke këshilluar mediat “të kenë kujdes që përmbajtjet e ngjashme t’i verifikojnë dhe të mos i shpërndajnë, sepse mund të shkaktojnë panik.”

Ndërkaq, edhe Policia e Kosovës ka mohuar se ka marrë ndonjë ankesë apo informacion nga qytetarët lidhur me një person të tillë që po terrorizon qytetin. “Policia e Kosovës drejtoria e kryeqytetit deri më tani nuk ka pranuar ndonjë ankesë apo informatë nga qytetarët lidhur me këtë çështje,” deklaroi zëdhënësi Enis Pllana për emisionin Rreth e Rrotull.

Përdoruesit e rrjeteve sociale kanë postuar imazhe të ngjashme që dëshmojnë origjinën artificiale të imazhit, dhe sa e thjeshtë është tashmë të gjenerosh imazhe të tilla.

Të shumtë janë dhe bizneset vendase që përfituan nga interesi që ngjalli ky personazh për ta kthyer atë në një promovim në format humori për produktet e tyre. Deri më tani, nuk është raportuar ndonjë kërkesë e “fantazmës së Prishtinës” për ndonjë shpërblim nga përdorimi i imazhit për qëllime marketingu. 

Një nga postimet e marketingut që shfrytëzuan famën e “fantazmës”

The post I gjeneruar imazhi i fantazmës që po “përndjek” banorët e Prishtinës appeared first on Faktoje.al.

Pretendimi: Moti i keq në Shqipëri, Greqi dhe Itali është efekt i sistemit HAARP që prek sistemin nervor të popullatës

Verdikti: E paprovuar

————————————————————————

Në javën e parë të vitit 2026, Shqipëria u përfshi nga moti i ftohtë e me reshje, që çoi në përmbytjen e qyteteve dhe bllokimin e disa rrugëve. Opozita fajësoi keqmenaxhimin e qeverisë, kryeministri Edi Rama fajësoi hedhjen e shisheve plastike, ndërsa konspiracionistët fajësojnë famëkeqin “sistem HAARP.”

Një postim që ka marrë mbi 1000 pëlqime në Instagram pretendon se moti i paqëndrueshëm në Shqipëri, Itali dhe Greqi është efekt i “sistemit HAARP” dhe se “problemet në masë në popullatë mund të prekin sistemin nervor.”

Si zakonisht, pretendimi i jashtëzakonshëm nuk shoqërohet me ndonjë referencë, burim apo provë mbështetëse.

Nuk ka asnjë provë se moti i keq në janar 2026 u shkaktua apo ndikua nga teknologjia e HAARP.

Projekti studimor shkencor amerikan i quajtur HAARP është një projekt i përbashkët i Forcave Ajrore Amerikane dhe Marinës Amerikane i krijuar në vitin 1993, i cili i ka kaluar më vonë Universitetit të Alaskës Fairbanks (UAF) në vitin 2015.

HAARP shfaqet shpesh në narrativat konspiracioniste si një veprimtari djallëzore që përfshin shkaktimin e tërmeteve, uraganëve, përmbytjeve, thatësirave, stuhive, ndërprerjeve të energjisë, rrëzimit të avionëve apo sëmundjeve.

Karakteristika e tij kryesore është një transmetues me frekuencë të lartë që përdoret për të studiuar jonosferën, pjesë e atmosferës së sipërme të tokës. Duke analizuar se si valët e radios ndërveprojnë me elektronet në jonosferë, studiuesit në HAARP janë në gjendje të studiojnë fenomene, të tilla si efektet e aurora borealis, ose dritat veriore, në sistemet radio dhe komunikimet e avionëve në lartësi të mëdha.

HAARP ka si objekt studimi dhe eksperimentimi jonosferën, pjesë e atmosferës së sipërme të tokës. Gati të gjithë fenomenet e motit ndodhin më poshtë jonosferës, në troposferë. Kështu, HAARP nuk ka si të ndikojë në fenomenet e motit.

Që në krijimin e tij, HAARP ka qenë në shënjestrën e teorive konspirative. Fakti që puna studimore që kryen HAARP nuk është lehtësisht e kuptueshme nga publiku i gjerë, bën që këtij projekti t’i vishen fuqi mbinatyrore duke e etiketuar si shkaktar i përmbytjeve, uraganeve, thatësirave, tërmeteve, stuhive, ndërprerjeve të energjisë, rrëzimit të avionëve apo sëmundjeve. Në 2016, dy burra nga Georgia, ShBA, u arrestuan me një arsenal masiv armësh. Ata kishin në plan të shkatërronin HAARP sepse besonin se instituti kërkimor manipulonte motin, kontrollonte mendjet e njerëzve, madje edhe rrëmbente shpirtra.

Sipas shkrimtarit të shkencës, Mick West, “mënyra për të përgënjeshtruar teoritë konspirative rreth HAARP është të përpiqesh t’i shpjegosh njerëzve ekzaktësisht çfarë HAARP bën. Shpjegoi se është thjesht një radiotransmetues që është në një vend në Alaska dhe mund të ndikojë vetëm në një sasi të vogël ajri mbi të. Shpjegoji se fuqia e përdorur nga ky radiotransmetues është shumë shumë e vogël krahasuar me çfarë do të duhesh për të bërë disa nga gjërat që po pretendohen.”

“Faktoje” ka verifikuar dhe më parë pretendime të ngjashme mbi sistemin HAARP.
Shqipëria është ndër vendet evropiane më të rrezikuara nga fatkeqësitë klimatike, sipas një raporti të Bankës Botërore të vitit 2024.

The post HAARP nuk qëndron pas reshjeve që përmbytën vendin appeared first on Faktoje.al.

Pretendimi: Gruaja që ndez cigaren duke djegur foton e liderit iranian Ayatollah Khameini ndodhet në Iran, ose është kanadeze

Verdikti: Mungon konteksti

————————————————————-

Një video që po qarkullon gjerësisht në rrjet ndërsa protestat antiqeveritare në Iran vijojnë, duket se tregon një vajzë që sfidon regjimin duke djegur publikisht foton e liderit fetar iranian Ali Khamenei dhe ndezur cigaren në flakën e krijuar.

Disa media shqipfolëse e kanë ndarë videon e vajzës rebele me pretendimin se ajo është xhiruar në Iran, ndërsa profile në rrjete sociale pretendojnë se gruaja në video është kanadeze.

Në të vërtetë, fotografia është bërë në Kanada, por kjo nuk vërteton se vajza nuk është iraniane. 

Autorja e pamjes dhe videos është aktive në mediat sociale me llogarinë X @melianouss, ku përdor pseudonimin “Morticia Addams.”

Vajza ndau edhe një pamje të ekranit për të vërtetuar se videoja me cigare është bërë më 7 janar 2026.

Në profilin e saj në Instagram @meliacurls, ajo nënshkruan si Melia. Në biografinë e saj shfaqen dy flamuj: kanadez dhe iranian.

Në profilin e saj ka një video në të cilën ajo flet në persisht (Farsi), duke iu drejtuar drejtpërdrejt atyre që synojnë të marrin pjesë në protestat kundër regjimit. Në video, ajo ofron këshilla praktike se si të zvogëlohet rreziku i arrestimit, duke shpjeguar se çfarë duhet bërë nëse ndaloheni në rrugë ose në shtëpi, duke i nxitur njerëzit të mos dalin vetëm, të mos nënshkruajnë rrëfime, të mos pranojnë asgjë dhe të mbrojnë pajisjet e tyre elektronike. Ajo gjithashtu këshillon njerëzit të deklarojnë veten thjesht si kalimtarë dhe të mos i nënshtrohen presionit psikologjik të forcave të sigurisë. 

Në X/Twitter, gruaja tha se regjimi iranian ishte përpjekur ta heshtte për vite me radhë dhe se ajo u detyrua të largohej nga vendi i saj.

“Regjimi islamik dështoi të më heshtë në Iran për vite me radhë, pavarësisht torturave, poshtërimit dhe kërcënimeve. Tani, duke më etiketuar si sioniste dhe duke shfrytëzuar faktin se, pas vitesh lufte, u detyrova të largohesha nga vendi im sepse jeta ime ishte e kërcënuar nga regjimi islamik, a po përpiqeni të përfundoni atë që vetë regjimi dështoi të bënte?

Akuzat tuaja nuk do të më dëmtojnë, sepse jam plotësisht e vetëdijshme se shumë prej jush mbështesin regjimin islamik, pasi interesat tuaja jo-humanitare shërbehen nga mbijetesa e këtij regjimi kriminal,” shkroi ajo më 10 janar 2026.
E kontaktuar nga kolegët italianë të verifikimit të fakteve të Open, gruaja në foto konfirmoi se është iraniane dhe u detyrua të largohej nga vendi disa muaj më parë për shkak të kërcënimeve nga regjimi islamik. Lidhur me fenë, ajo e deklaron veten agnostike.

The post Vajza simbol e protestave kundër Khamenei, një iraniane e arratisur në Kanada appeared first on Faktoje.al.

Pretendimi: Kjo video tregon një dre të bardhë me mutacion gjenetik që shfaqet në pyll

Verdikti: E pavërtetë, Gjeneruar me AI

——————————————————————-

Në këto ditë të ftohta dimri ka marrë mbi 15 mijë pëlqime në Instagram një video që pretendohet se tregon një kafshë të rrallë, një dre të bardhë me mutacion gjenetik. Pamjet pretendohet se janë regjistruar në Rusi më 21 dhjetor 2025.

Drerët e bardhë si pasojë e një mutacion gjenetik janë të vërtetë, siç përshkruhen në këtë artikull të revistës National Geographic.

Megjithatë, video që po qarkullon në rrjet nuk është e vërtetë. Ajo nuk shoqërohet me ndonjë referencë apo burim nga i cili është botuar fillimisht. Me gjasa, video është gjeneruar nga programe kompjuterike të inteligjencës artificiale (AI). 

Video po qarkullon gjerësisht në rrjet me pretendimin se është xhiruar në një numër vendesh të ndryshme, nga Kanadaja, te ShBA

Origjina artificiale e videos dëshmohet nga mospërputhje logjike si ndryshimi i formës dhe numrit të brirëve, mungesa e zhvendosjes së borës dhe përsosmëria e panatyrshme e lëvizjes. 

Megjithëse ekzistojnë drerë të bardhë të vërtetë, nuk janë kaq përsosmërisht të bardhë. Një kafshë që jeton në natyrë do të ishte bërë me baltë në këmbë dhe trup. Brirët do të ishin të paktën pak të konsumuar dhe të bërë pis nga vitet e kaluara në pyll.

The post I gjeneruar dreri albin rus që ka mrekulluar rrjetin appeared first on Faktoje.al.

Pretendimi: Gazetari Enkel Demi ka ndërruar jetë.

Verdikti: E pavërtetë

—————————————————————–

Një postim në Facebook njofton vdekjen e trishtueshme të gazetarit shqiptar, Enkel Demi, ndërsa lexuesit ftohen të klikojnë një lidhje në komente për të mësuar më shumë.

Megjithatë, lexuesit nuk duhet të alarmohen. Ky lajm është i rremë. Nuk ka ndonjë njoftim zyrtar nga familja e Demit për humbje jete.

Vetë Demi ka përgënjeshtruar në mënyrë humoristike lajmin në emisionin e mëngjesit të 12 janarit 2026.

Artikulli keqinformon me qëllim mbledhjen e sa më shumë klikimeve në mënyrë jo etike.

Faktoje ka përgënjeshtruar edhe më parë lajme për vdekjen e rreme të personave të njohur.

The post I rremë lajmi për vdekjen e gazetarit Enkel Demi appeared first on Faktoje.al.

Pretendimi: Kjo video tregon sekuestrimin e një anijeje me flamur rus nga ShBA në janar 2026

Verdikti: Mungon konteksti

————————————————————

Një video e marinsave amerikanë që zbresin nga një helikopter në një aeroplanmbajtëse po ndahet në mediat shqipfolëse si momenti kur ShBA sekuestroi një cisternë nafte me flamur rus, të lidhur me Venezuelën, në janar 2026.

Megjithatë, me anë të motorrit të kërkimit pamor Google Lens Faktoje gjeti se video e mësipërme është postuar në X/Twitter më 5 tetor 2025 nga Margo Martin, një asistente speciale e presidentit amerikan, Donald Trump.

Departamenti i Mbrojtjes të ShBA, ka postuar pamje të të njëjtit moment, më 5 tetor, por nga një kënd i ndryshëm.

Video tregon një demonstrim të kryer në aeroplanmbajtësen USS George H. W. Bush për të shënuar 250-vjetorin e Marinës Amerikane, sipas Shërbimit të Shpërndarjes së Informacionit Vizual të Mbrojtjes, i cili tha se Trump dhe gruaja e tij Melania ishin gjithashtu të pranishëm për ta dëshmuar këtë ngjarje. Një foto e Reuters tregon çiftin Trump duke parë të njëjtën skenë në brigjet e Norfolk, Virginia, si në video.

Ndërkaq, është e vërtetë se Roja Bregdetare dhe forcat ushtarake amerikane bllokuan cisternën Bella 1 më 7 janar pas një ndjekjeje dyjavore në Atlantik, duke rrezikuar më shumë përballje me Rusinë, pasi një nëndetëse ruse dhe anije të tjera ndodheshin afër.

Video që po qarkullon në media si pamje nga kjo kapje, në fakt janë xhiruar 3 muaj më parë dhe tregojnë një shfaqje, jo një operacion real ushtarak.

The post Kjo video jo nga operacioni i marinsave ndaj anijes me naftë venezueliane appeared first on Faktoje.al.

Pretendimi: Mjeku Arben Hoxha rekomandon këtë medikament për trajtimin dhe parandalimin e variçeve.

Verdikti: E pavërtetë, Skemë mashtrimi

—————————————————————-

Një faqe interneti e dizenjuar për të ngjarë si një portal i mirëfilltë lajmesh mbi shëndetin pretendon se një mjek shqiptar me emrin Arben Hoxha jep këshilla mbi parandalimin e variçeve.

Megjithatë, çfarëdo që të klikosh në këtë faqe, do të të dërgojë tek produkti i reklamuar nga artikulli. Kjo pjesë e dizenjos së faqes tregon se ajo shënjestron sidomos përdoruesit që nuk janë shumë familjarë me teknologjinë.

Me anë të motorrit të kërkimit pamor Google Lens, Faktoje gjeti se foto e pretenduar e Arben Hoxha në fakt tregon një mjek bjellorus të quajtur Oleg Rummo, drejtor i Qendrës së Kërkimit dhe Praktikës në Minsk për Kirurgji, Transplantim dhe Hematologji. Rummo ka shërbyer dhe si deputet i parlamentit bjellorus që nga viti 2016.

Përdorimi i mediave online për të shitur produkte të caktuara për shëndetin është kthyer në një shqetësim serioz. Në një sërë artikujsh, Faktoje ka treguar se si profile online po përpiqen të mashtrojnë qytetarët, duke përdorur mjekë të rremë, me qëllim që ta bëjnë sa më të besueshëm për lexuesit produktin që shesin.

The post Mjekë të rremë për trajtimin mrekullibërës ndaj variçeve appeared first on Faktoje.al.

Pretendimi: Kjo video tregon venezuelianët duke festuar rrëzimin e presidentit Nicolas Maduro në Janar 2026

Verdkti: E pavërtetë

———————————————-

Pas rrëmbimit të bujshëm të presidentit venezuelian Nicolas Maduro nga ushtria amerikane më 3 janar 2026, në rrjete sociale po qarkullon një video që pretendohet se tregon venezuelianët duke festuar rrëzimin e tij në rrugë.

Në Venezuelë, ka pasur demonstrata si në favor të kapjes së Maduro, ashtu edhe protesta nga mbështetësit e presidentit.

Megjithatë, video e mësipërme nuk tregon asnjërën prej tyre. 

Me anë te motorit të kërkimit pamor Google Lens, Faktoje gjeti se video e mësipërme është nga 2 vite më parë. 

Video daton që nga 30 korriku 2024, kur Maria Corina Machado, udhëheqëse e opozitës venezueliane, organizoi një demonstratë përpara selisë së Kombeve të Bashkuara në Karakas për të festuar dhe shpallur fitoren e Edmundo González, kandidat i Platformës së Bashkuar Demokratike (PUD), në zgjedhjet presidenciale të vitit 2024.

Megjithatë, këshilli zgjedhor i kontrolluar nga qeveria i Venezuelës kishte shpallur fitoren e presidentit në detyrë Nicolas Maduro. Zgjedhja e Maduros ishte kontestuar nga opozita për mashtrim zgjedhor.

The post E keqinterpretuar festa e venezuelianëve pas rrëmbimit të Maduros appeared first on Faktoje.al.

Pretendimi: Kjo video tregon zjarrvënien e qëllimshme të një lokali në Zvicër natën e Vitit të Ri 2026

Verdikti: E pavërtetë

——————————————————————-

Një video që ka marrë mbi 200 pëlqime në Facebook pretendohet se tregon momentin e parë nga zjarri që vrau 40 persona në një lokal në Zvicër natën e Vitit të Ri 2026. 

Përshkrimi që shoqëron videon pretendon se video tregon zjarrvënie të qëllimshme dhe vijon të sulmojë emigrantët duke iu referuar si “shtazë,” por pa sqaruar çfarë e lidh zjarrin në Zvicër me emigracionin.

Megjithëse video mban mbishkrimin “Crans Montana”, qytetin zviceran ku ndodhi tragjedia, ajo nuk tregon zjarrin në Zvicër.

Me anë të motorrit të kërkimit pamor Google Lens, Faktoje gjeti se video e mësipërme është postuar fillimisht në Instagram më 22 dhjetor 2025, 9 ditë para se të ndodhte zjarri në Zvicër.

Profili që ka postuar videon ka taguar profilin @bella.canguu, profili i një restoranti në Canggu, Bali, Indonezi.

Mediat vendase indoneziane raportuan incidentin në ditët pas postimit të 22 dhjetorit. Sipas raportimeve zjarri në Bella Canggu u fik nga zjarrëfikësit dhe nuk pati të lënduar.

“Fillimisht, kur restoranti po zhvillonte një aktivitet për djegien e sherebelës pranë zonës së skarës, shkëndijat ndezën dekorimet e Krishtlindjeve të bëra me hala pishe të thata”, shpjegoi Komisioneri i Policisë Pasek Sudina, në deklaratën e tij më 25 dhjetor.

Qartazi, video e mësipërme nuk tregon zjarrin në Zvicër më 1 janar 2026, por një zjarr në Indonezi më 22 dhjetor 2025.

Autoritetet zvicerane thanë se lokali që shpërtheu në flakë në një resort luksoz skish, zjarr ku u vranë 40 persona gjatë festimeve të Vitit të Ri, nuk kishte pasur inspektim që nga viti 2019, duke nënvizuar shqetësimet në lidhje me masat e sigurisë që ishin në fuqi. Zyra e kryetarit të bashkisë së qytetit të Crans-Montana tha se ambjenti nuk kishte sistem automatik të shuarjes së zjarrit, sepse nuk ishte i nevojshëm për një biznes të asaj madhësie. Mosha mesatare e viktimave të zjarrit ishte 19 vjeç.

The post Video e zjarrit në Bali asnjë lidhje me incidentin në diskon e Crans Montanës appeared first on Faktoje.al.

Pretendimi: Kjo video tregon futbollisitin Cristiano Ronaldo duke punuar në një supermarket Kaufland

Verdikti: E pavërtetë, Gjeneruar me AI

———————————————–

Një video që duket se tregon futbollistin portugez Cristiano Ronaldo në “ditën e parë të punës në Kaufland,” një rrjet supermarketesh gjerman.

Megjithatë, video e mësipërme nuk është e vërtetë. Ajo është gjeneruar me anë të programeve të inteligjencës artificiale (AI). 

Një tregues që na bën të dyshojmë vërtetësinë e videos është fakti se, në të, portugezi Ronaldo duket se flet rumanisht. 

Më tej, me anë të motorrit të kërkimit pamor Google Lens, Faktoje gjeti se video e mësipërme është postuar fillimisht në Instagram nga një llogari rumune, e cila poston shpesh përmbajtje të gjeneruara dukshëm me AI.

Nuk ka ndonjë provë, dëshmi apo raportim se futbollisti i famshëm portugez ka punuar në një supermarket Kaufland. Nëse kjo do të kishte ndodhur vërtet, do të prisnim që të kishte foto dhe video të tjera të kësaj ngjarjeje të habitshme.

Për të parandaluar që përmbajtje të tilla të keqinterpretohen, është e rëndësishme që çdo video, foto ose material tjetër i gjeneruar ose i manipuluar me inteligjencë artificiale të shënohet si i tillë. Kjo do të ndihmojë në informimin e audiencës dhe në mbrojtjen e tyre nga dezinformimi. Facebook i detyron përdoruesit të etiketojnë imazhet dhe videot e gjeneruara me AI si të tilla.

The post I gjeneruar ky version i CR7 si punonjës supermarketi appeared first on Faktoje.al.

Pretendimi: Lulzim Basha ka ndërruar jetë

Verdikti: E pavërtetë

———————————————————————-

Një postim që ka marrë mbi 400 pëlqime në Facebook njofton vdekjen e papritur të ish-kryetarit të Partisë Demokratike, Lulzim Basha, ndërsa lexuesit ftohen të klikojnë një lidhje në komente për të mësuar më shumë mbi shkakun e vdekjes.

Megjithatë, lexuesit nuk duhet të alarmohen. Ky lajm është i rremë. Nuk ka ndonjë njoftim zyrtar nga familja e Bashës për humbje jete.

Duke përdorur foton e Lulzim Bashës, titulli dhe brendia e artikullit përdorin një dredhi duke iu referuar atij si “Luizin,” “Luiz,” dhe “Luzi.” 

Më tej, ai përshkruhet si “një emër i njohur dhe i dashur në botën e muzikës” dhe një “artist” me “zë unik.” Ky përshkrim nuk ka lidhje me Lulzim Bashën, i cili njihet si politikan, jo si muzikant apo këngëtar.

Ka gjasa që ky artikull, dhe artikuj te ngjashëm të postuar nga e njejta faqe dhe përgënjeshtruar dhe më parë nga Faktoje, janë gjeneruar me anë të programeve kompjuterike të inteligjencës artificiale (AI). Ngatërrimi qesharak i Lulzim Bashës me ndonjë këngëtar duket si një ‘delirim’ karakteristik i këtyre programeve gjenerative.

Faktoje ka përgënjeshtruar dhe lajme të mëparshme nga i njejti portal, i cili ka botuar artikuj të trilluar mbi gjetjen e Bleona Matës së zhdukur në 2010, vdekjen e këngëtarit Shpat Kasapi dhe të politikanit shqiptar Azem Hajdari.

Faktoje ka përgënjeshtruar edhe lajme të mëparshme mbi vdekjen e Bashës. 

Titulli i artikullit keqinformon me qëllim mbledhjen e sa më shumë klikimeve në mënyrë jo etike.

The post I rremë lajmi për ndarjen nga jeta të Lulzim Bashës appeared first on Faktoje.al.

Pretendimi: Presidenti venezuelian Nicolas Maduro u shëtit nëpër rrugët e New York në një tallje publike

Verdikti: Mungon konteksti

——————————————————————-

Më 3 janar 2026, ShBA rrëmbyen presidentin venezuelian Nicolas Maduro dhe gruan e tij Cilia Flores nën akuzën e narko-terrorizmit, duke i dërguar ata në Qendrën Metropolitan të Paraburgimit në Brooklyn për të dalë më pas në gjyq.

Një video e shpërndarë në rrjete sociale pretendon se tregon “talljen publike” me Maduron i cili shëtitet me çfarë duket si një furgon i bardhë, që ecën me dyert e hapura nëpër rrugët e New York.

Me anë të motorrit të kërkimit pamor Google Lens, Faktoje gjeti se video u postua fillimisht më 4 janar nga një llogari në Instagram që gjurmon dhe ndan pamje të automjeteve të emergjencave në dhe përreth Brooklyn, New York.

Postimi shoqërohet me përshkrimin: “Pas transferimit të Presidentit të Venezuelës të kapur Nicolás Maduro në Qendrën Metropolitan të Paraburgimit në Brooklyn, personeli ushtarak i armatosur rëndë i përfshirë në transport u pa duke ngarë furgonë me dyer të hapura në Avenue 3rd në New York, duke brohoritur së bashku me një turmë që mbështeste kapjen e tij.” Postimi nuk përmend nëse Maduro ishte në furgonin e bardhë.

Kolegët faktverifikues e Teyit hetuan pretendimin duke verifikuar vendndodhjen ku është xhiruar videoja. Ata gjurmuan vendndodhjet e eskortës që shoqëronte Maduron dhe gruan e tij gjatë gjithë natës së 3 janarit dhe i krahasuan ato me vendndodhjen ku është xhiruar video.

Ndalesat e Maduros dhe gruas së tij pas mbërritjes në New York mund të ndiqen drejtpërdrejt në CBS News.

Nicolas Maduro dhe Cilia Flores shihen duke dalë nga ndërtesa e Agjencisë për Zbatimin e Ligjit kundër Drogës (DEA) në Manhattan në një eskortë dhe duke u çuar në një helipad VIP në West 30th Street pranë 12th Ave në Manhattan. Gjatë këtij udhëtimi, është qartë e dukshme se rrugët në Manhattan ishin të mbyllura për trafikun, dyert e furgonit të bardhë ishin të mbyllura dhe rruga e ndjekur nuk ishte e ngjashme me atë të treguar në videon e mësipërme.

Maduro dhe gruaja e tij shihen duke zbritur nga një automjet i zi i blinduar në këtë vend uljeje helikopterësh në minutën e 17 të transmetimit të drejtpërdrejtë të CBS.

Automjeti i blinduar nga i cili dolën Maduro dhe gruaja e tij.

Ata u ngritën nga pista e uljes së helikopterëve për t’u çuar në Qendrën Metropolitan të Paraburgimit, dhe u shoqëruan fillimisht nga oficerët në një SUV të zi pasi zbarkuan në Brooklyn. Këto momente mund të shihen nga minuta 36:45 e tutje.

SUV ku Maduro dhe gruaja e tij u panë në Brooklyn.

Në dalje të pistës në Brooklyn, Maduro dhe Flores ndërrojnë automjetet dhe kalojnë në një makinë të blinduar. Ky moment shihet në minutën e 43-të të transmetimit.

Maduro dhe gruaja e tij zbresin nga SUV dhe futen në një automjet të blinduar.

Karvani më pas shkoi drejt Qendrës së Paraburgimit Metropolitan, ku Maduro dhe gruaja e tij do të mbahen deri në gjyqin e tyre.

Eskorta shihet duke ecur përgjatë rrugëve të mbyllura, njësoj siç bëri në Manhattan. Me të mbërritur në destinacionin e tyre, automjeti i blinduar që mbante Maduron dhe gruan e tij ndahet nga karvani dhe hyn në kampusin e Qendrës së Paraburgimit Metropolitan. Këto momente mund të shihen nga minuta 50:50 e tutje.

Automjeti i blinduar që transportonte Maduron dhe gruan e tij ndahet nga karvani

Kur gjurmojmë këto ndalesa, duket se video në fjalë është regjistruar në 3rd Ave, ku ndodhet Qendra e Paraburgimit Metropolitan. Megjithatë, Maduro dhe gruaja e tij hyjnë në kampusin e Qendrës së Paraburgimit Metropolitan pa u kthyer kurrë në këtë rrugë.

Nicolas Maduro dhe gruaja e tij, Cilia Flores, i bënë të gjitha udhëtimet e tyre rrugore në New Jork përmes rrugëve të mbyllura dhe nuk hipën kurrë në një furgon të bardhë, edhe pse të tillë u panë duke i shoqëruar me trupa të armatosura. Mbajtja e hapur e dyerve apo dritareve të mjeteve të forcave të sigurisë së eskortave të autoriteteve të larta është një procedurë e njohur për t’u kundërpërgjigjur në kohë një sulmi të armatosur.

Përveç kësaj, agjenci të shumta lajmesh ndoqën të gjithë udhëtimin e Maduros nga Venezuela në Qendrën Metropolitan të Paraburgimit.

Agjencitë e lajmeve nuk raportuan në asnjë fazë të këtij udhëtimi se Maduro ishte shëtitur në një furgon të bardhë në publik në rrugët e New York. Nëse ky pretendim do të ishte i vërtetë, do të prisnim që agjencitë e lajmeve ta kishin kapur këtë moment tronditës nga kënde të ndryshme me kamera profesionale.

The post Maduro nuk u shëtit në rrugë për t’u tallur publikisht appeared first on Faktoje.al.

Pretendimi: Ky imazh tregon një arushë me këlyshët e saj në fshatin Kolesjan të Kukësit

Verdikti: E pavërtetë, Gjeneruar me AI

————————————————–

Në dhjetor 2025, një imazh që pretendohet se tregonte një arushë me katër këlyshët e saj në Kukës u shpërnda gjerësisht në rrjete sociale, media dhe portalet shqipfolëse. Ky imazh idilik i maleve shqiptare u shpërnda edhe nga kryetari i grupit parlamentar të Partisë Socialiste Taulant Balla.

Megjithatë, imazhi i mësipërm është i rremë dhe me gjasa i gjeneruar me anë të programeve të inteligjencës artificiale (AI).

Me anë të motorit të kërkimit Google Lens, Faktoje gjeti videon nga është shkëputur imazhi i mësipërm, botuar në Youtube më 23 dhjetor 2025 nga një llogari që poston video të gjeneruara me AI.

Në versionin video, origjina artificiale e pamjeve dallohet në defektet logjike, si mungesa e gjurmëve mbi borë pasi ariu i vogël kalon mbi të.

Ndërkaq, pasi imazhi nisi të qarkullonte në rrjet blogeri Ben Trota botoi një video nga vendi ku pretendohej se ishte xhiruar arusha. Në videon e tij, vërehet qartë se atje nuk ka borë. Sipas Trotës, bora ende nuk kishte filluar të binte në Kukës në ato ditë kur pretendohet të jetë shkrepur foto.

Trota gjithashtu thekson se arinjtë me nisjen e dimrit hyjnë në hibernim për t’u rishfaqur në pranverë, një fakt natyror që u mësohet fëmijëve që në shkollën fillore. 

Viraliteti i imazhit frymëzoi krijime spontane të komentuesve që shpotisnin artificialitetin e tij. 

The post Arusha miqësore në rrugët e Kukësit e krijuar nga Inteligjenca Artificiale appeared first on Faktoje.al.