PARIS, 2 shkurt /ATSH/- Qeveria e pakicës e kryeministrit francez Sébastien Lecornu i mbijetoi sot dy votave të mosbesimit, duke i dhënë fund mosmarrëveshjes disamujore mbi buxhetin e këtij viti, sipas “Euronews”.

Pas disa muajsh bllokimi politik, buxheti shtetëror i Francës për vitin 2026 u miratua përfundimisht sot në mbrëmje, pas refuzimit të dy mocioneve të mosbesimit në parlament.

Mocionet u paraqitën në përgjigje të vendimit të kryeministrit Sébastien Lecornu të premten për të thirrur nenin 49.3 të kushtetutës, i cili i lejon qeverisë të miratojë legjislacion pa votën e deputetëve.

Një mocion u paraqit nga Tubimi Kombëtar i ekstremit të djathtë, tjetri nga partitë e krahut të majtë duke përjashtuar socialistët. Meqenëse të dyja dështuan, buxheti është miratuar automatikisht.

Vota shënon kapitullin e fundit të një procesi të gjatë dhe të trazuar që ka nxjerrë në pah përçarjet e thella brenda parlamentit të fragmentuar të Francës.

Që nga zgjedhjet e parakohshme të vitit 2024 që sollën një kuvend të bllokuar, ligjvënësit kanë dështuar vazhdimisht në arritjen e një kompromisi – se si të trajtojnë financat publike në përkeqësim të vendit. Pa një shumicë të qëndrueshme, Lecornu në fund zgjodhi ta detyronte miratimin e projektligjit.

Gjatë debatit parlamentar, tensionet u rritën. Kryeministri Lecornu akuzoi opozitën për krijimin e “çrregullimit të përhershëm”, duke argumentuar se bllokimi i bisedimeve për buxhetin në një moment të tillë ishte i papërgjegjshëm.

Ndërkohë, Tubimi Kombëtar i ekstremit të djathtë dënoi atë që e quajti një “buxhet ndëshkimi dhe privimi”, duke i nxitur ligjvënësit të votonin për të rrëzuar qeverinë.

Ndarjet brenda kampit qeveritar

Buxheti nuk i ka bindur të gjithë aleatët e qeverisë. Disa ligjvënës të qendrës dhe të krahut të djathtë kanë ngritur pikëpyetje nëse objektivi i uljes së deficitit publik në 5% të PBB-së në vitin 2026 – nga 5,4% në vitin 2025 – është realist.

Sipas planit të qeverisë, bizneset do të përballen me disa rritje taksash, duke përfshirë një taksë shtesë mbi fitimet e mëdha të korporatave që pritet të mbledhin më shumë se 7 miliardë euro.

Deficiti shtetëror parashikohet të jetë rreth 132 miliardë euro, kryesisht i pandryshuar nga viti i kaluar. //a.i/

The post PARIS – Franca miraton buxhetin, ndërsa qeveria i mbijeton votave të mosbesimit appeared first on Agjencia Telegrafike Shqiptare.

TEHERAN, 2 shkurt /ATSH-DPA/- Mehdi Mahmoudian, bashkautori i filmit (triller) politik të nominuar për çmim “Oscar”, “It Was Just an Accident” është arrestuar në Iran, raportoi sot portali i lajmeve “Emtedad”.

Sipas raportit, Mahmoudian ka mundur të kontaktojë familjen e tij pasi është marrë në paraburgim. Duke cituar avokatin e tij, raporti tha se akuzat kundër tij nuk dihen ende.

Një arsye e mundshme për arrestimin e tij mund të jetë një letër që ai nënshkroi së bashku me figura të tjera publike, duke dënuar shtypjen e përgjakshme të protestave nga Irani në fillim të janarit.

Qeveria gjermane e dënoi arrestimin e Mahmoudian – duke e quajtur atë një sulm ndaj lirisë artistike.

“Arrestimi i Mehdi Mahmoudian nuk është një rast i izoluar, por pjesë e një sistemi që synon të heshtë zërat kritikë”, tha ministri i shtetit për Kulturën, Wolfram Weimer në një deklaratë.

“Ata që burgosin autorët nuk luftojnë artin, por lirinë”, shtoi ai.

“Regjimet autoritare kanë frikë nga një publik kulturor sepse ai e bën realitetin të dukshëm. Pikërisht për këtë arsye ata i përgjigjen vëmendjes ndërkombëtare me shtypje. Ne nuk duhet ta pranojmë këtë logjikë”, tha Weimer.

Weimer theksoi rolin e medias së pavarur, veçanërisht të “Deutsche Welle”, e cila vazhdon të raportojë në mënyrë gjithëpërfshirëse mbi situatën në Iran pavarësisht përpjekjeve të rëndësishme për censurë dhe frikësim. //a.i/

The post KINEMA – Bashkautori i filmit të nominuar për çmim “Oscar” arrestohet në Iran appeared first on Agjencia Telegrafike Shqiptare.

VARSHAVË, 2 shkurt /ATSH-DPA/- Policia ushtarake polake po heton rrëzimin e një droni të paidentifikuar pranë ndërtesave të një njësie zbulimi radio-elektronik.

“Droni u rrëzua të enjten 70 metra nga një depo armësh në veri të Varshavës”, raportoi “Radio ZET” pasi forcat e armatosura konfirmuan incidentin.

Njësia e ushtrisë në Przasnysz, 80 kilometra nga kryeqyteti, është përgjegjëse për monitorimin e komunikimeve me radio në kufijtë veriorë dhe lindorë të Polonisë.

Kjo përfshin Hapësirën Suwałki – zona kufitare strategjikisht e rëndësishme midis anëtarëve të NATO-s, Polonisë dhe Lituanisë, me Bjellorusinë dhe enklavën ruse të Kaliningradit – të dyja fqinjë potencialisht armiqësorë.

Hapësira prej afërsisht 65 kilometrash konsiderohet pika strategjike më e ndjeshme e NATO-s.

Ushtria polake aktualisht po teston sistemet e mbrojtjes nga dronët mes raportimeve se pavarësisht ndërtimit të ushtrisë më të madhe konvencionale të BE-së, ajo po mbetet prapa në teknologjinë jetësore të dronëve dhe anti-dronëve.

Një tjetër një balonë spiunazhi nga Bjellorusia

Ashtu si në ditët e mëparshme, ushtria raportoi sot se një objekt fluturues i ngjashëm me një balonë spiunazhi nga Bjellorusia kishte hyrë në hapësirën ajrore polake.

Sipas Rojës Kufitare Polake, balona të tilla përdoren për kontrabandën e cigareve dhe mallrave të tjera të kontrabanduara.

Megjithatë, nuk mund të përjashtohet mundësia që ato mund të synojnë edhe testimin e reagimit te sistemit polak të mbrojtjes ajrore. //a.i/

The post POLONI – Dron i paidentifikuar rrëzohet në bazën ushtarake në Varshavë appeared first on Agjencia Telegrafike Shqiptare.

BRAZILIA, 2 shkurt /ATSH-ANSA/- Kryetari i Dhomës së Deputetëve të Brazilit, Hugo Motta njoftoi sot se ratifikimi i marrëveshjes tregtare Mercosur-Bashkimi Evropian – e nënshkruar muajin e kaluar pas 26 vitesh negociatash – do të ishte një përparësi në axhendën parlamentare.

“Ne po presim dorëzimin e dokumentit nga qeveria, dhe premtojmë t’i japim përparësi votimit për traktatin”, u tha Motta gazetarëve pas mbërritjes së tij në Parlament në ditën e hapjes së vitit legjislativ.

Më herët, kryetari i Dhomës njoftoi qëllimin e votimit për traktatin para Karnavaleve.

Presidenti Luiz Inácio Lula da Silva pritet ta dorëzojë dokumentin në Parlament këtë javë.

Marrëveshja tregtare e Brazilit – e njoftuar tashmë nga vendet e tjera të bllokut Argjentina, Paraguai dhe Uruguai – u konfirmua nga zëvendëspresidenti Geraldo Alckmin.

Ai deklaroi se qeveria po planifikonte të përshpejtonte procesin e ratifikimit për të dërguar një sinjal politik në BE, pasi Parlamenti Evropian e paraqiti traktatin në Gjykatën e Drejtësisë për shqyrtim, një hap që mund të vonojë hyrjen e tij në fuqi. //a.i/

The post BRAZIL – Parlamenti njofton ratifikimin e marrëveshjes BE-Mercosur appeared first on Agjencia Telegrafike Shqiptare.

BUDAPEST, 2 shkurt /ATSH-DPA/- Hungaria ka ngritur një padi në Gjykatën Evropiane të Drejtësisë (GJED) kundër vendimit të Bashkimit Evropian për të ndaluar importet e gazit natyror nga Rusia, tha sot ministri i Jashtëm, Péter Szijjártó.

Njoftimi i Szijjártó në X, erdhi pas publikimit të rregullores për heqjen graduale të gazit rus në bazën e të dhënave ligjore të BE-së.

Sllovakia ka njoftuar gjithashtu se do të ngrejë një padi në gjykatën me seli në Luksemburg.

Szijjártó argumentoi në postimin e tij se traktatet e BE-së përcaktonin qartë se çdo shtet anëtar vendoste për zgjedhjen e burimeve dhe furnizuesve të energjisë.

“Për më tepër, parimi i solidaritetit energjetik kërkon sigurinë e furnizimit me energji për të gjitha shtetet anëtare”, shkroi ai.

“Vendimi e shkel qartë këtë parim në rastin e Hungarisë, meqenëse vetëm alternativa më të shtrenjta dhe më pak të besueshme të energjisë janë të disponueshme pa importet ruse”, tha Szijjártó.

Rregullorja, e cila u miratua nga shumica e anëtarëve të BE-së, përcakton që importet e gazit natyror nga Rusia duhet të ndërpriten deri në fund të vitit 2027.

Duke pasur parasysh pushtimin e vazhdueshëm të Ukrainës nga Kremlini, BE dëshiron të zvogëlojë të ardhurat e Rusisë nga eksportet e energjisë dhe lëndëve të para.

Hungaria është shumë e varur nga gazi rus. Që nga fillimi i luftës në Ukrainë në vitin 2022, vendi nuk ka bërë përpjekje serioze për t’u çliruar nga kjo varësi.

Kryeministri i saj populist i krahut të djathtë, Viktor Orbán, konsiderohet gjerësisht si aleati më i ngushtë i Kremlinit në BE. /a.i/

The post FOKUS – Hungaria ndërmerr veprime ligjore kundër BE-së për ndalimin e importeve të gazit rus appeared first on Agjencia Telegrafike Shqiptare.

TEL AVIV, 2 shkurt /ATSH-DPA/- Shtetet e Bashkuara të Amerikës dhe Izraeli thanë sot se kishin kryer manovra të përbashkëta detare në Detin e Kuq, duke e përshkruar stërvitjen si një rutinë.

Manovrat, të cilat u zhvilluan dje, vijnë në sfondin e tensioneve të larta midis Uashingtonit dhe Iranit.

Stërvitja përfshinte shkatërruesin e raketave të Marinës së Shteteve të Bashkuara të Amerikës “USS Delbert D. Black”, i cili më vonë udhëtoi drejt qytetit portual izraelit, Eilat.

Ushtria izraelite tha se dislokimi theksonte bashkëpunimin e ngushtë midis dy marinave dhe ushtrive përkatëse.

Gjithashtu, në manovra mori pjesë korveta e Marinës Izraelite, e ndërtuar në vitin 1993, “INS Eilat”.

Tensionet midis SHBA-së dhe Iranit janë rritur në javët e fundit. Presidenti i SHBA-së, Donald Trump, e ka kërcënuar vazhdimisht udhëheqjen iraniane me sulme ushtarake, pjesërisht për shkak të shtypjes brutale shtetërore ndaj demonstruesve gjatë protestave të fundit masive, në të cilat thuhet se janë vrarë mijëra njërëz.

Irani ka kërcënuar të kryejë kundërsulme ndaj Izraelit dhe SHBA-së në rast të një sulmi.

Megjithatë, raportet e medias thanë sot se Ministri i Jashtëm iranian, Abbas Araghchi, po planifikonte të takohej me të dërguarin special të SHBA-së, Steve Witkoff, për negociata që synonin zbutjen e tensioneve.

Ushtria amerikane e ka zgjeruar ndjeshëm praninë e saj rajonale që nga fillimi i janarit, duke përfshirë edhe dislokimin e aeroplanmbajtëses “USS Abraham Lincoln” dhe anijeve të saj shoqëruese. //a.i/

The post FOKUS – Manovra të përbashkëta SHBA-Izrael në Detin e Kuq mes tensioneve rajonale appeared first on Agjencia Telegrafike Shqiptare.

ROMË, 2 shkurt /ATSH/- Qeveria italiane po përshpejton një dekret sigurie pas përleshjeve të dhunshme në Torino, ku më shumë se 100 oficerë u plagosën dhe një polic u rrah me çekiç nga protestuesit e maskuar, një sulm që kryeministrja Giorgia Meloni e quajti një “tentativë vrasjeje”, sipas “Skytg24”.

Sipas mediave të huaja, polici, 29-vjeçari Alessandro Calista, i Njësisë Mobile të Policisë së Padovës, u rrethua nga demonstrues të maskuar dhe u godit vazhdimisht, përfshirë edhe me çekiç, përpara se një oficer tjetër të ndërhynte me një mburojë për ta nxjerrë nga turma.

Ai pësoi plagë të shumta dhe një dëmtim nga çekiçi, por doli nga spitali dje në mbrëmje, së bashku me një oficer tjetër, të shtruar në “Spitalin Molinette” të Torinos.

Autoritetet arrestuan tre burra të moshës 22, 31 dhe 35 vjeç pas dhunës të së shtunës gjatë një demonstrate kundër mbylljes së qendrës kulturore Askatasuna, e cila ka qenë një vend takimi për krahun e majtë të Torinos për disa dekada. Objekti u mbyll pak para Krishtlindjeve.

Po ashtu, më shumë se 20 individë po hetohen nga policia për akuza të ndryshme, duke përfshirë mbajtjen e armëve të papërshtatshme, rezistencën ndaj autoriteteve dhe maskimin e vetes, si dhe mbajtjen e objekteve të tilla si gurë, çelësa dhe thika, të cilat u janë sekuestruar disave prej tyre.

Qeveria propozon masa gjithëpërfshirëse

Kryeministrja Giorgia Meloni dënoi dhunën, duke e quajtur sulmin ndaj oficerit një “tentativë vrasjeje” – pasi vizitoi dje oficerët e plagosur në spitalin Molinette.

Ajo njoftoi se qeveria do të përshpejtonte një paketë sigurie që është tashmë në zhvillim e sipër, dhe zhvilloi sot një takim për të finalizuar masat që pritet t’i kalohen për miratim Këshillit te Ministrave, gjatë javës.

Masat që po shqyrtohen përfshijnë ndalimin parandalues ​​policor prej të paktën 12 orësh për shkelësit e përsëritur të dhunës, kufizime në shitjen e thikave për të miturit dhe mbrojtje të zgjeruar që shtrihet përtej policisë, edhe tek qytetarët e tjerë.

“Kur e godet dikë me çekiç, e bën duke e ditur se pasojat mund të jenë shumë, shumë serioze. Kjo nuk është protestë, këto nuk janë përplasje. Kjo quhet tentativë vrasjeje”, tha dje Meloni.

Ministri i Brendshëm, Matteo Piantedosi do të informojë nesër parlamentin mbi dhunën, të cilën zyrtarët qeveritarë e quajtën “terrorizëm urban” dhe “tentativë vrasjeje”.

Zëvendëskryeministri Matteo Salvini bëri thirrje për miratim të menjëhershëm të paketës së sigurisë, duke e përshkruar atë si antidotin më të mirë për të bllokuar menjëherë përpjekjen e së majtës ekstreme për të sjellë dhunë sërish në rrugët e qyteteve italiane. //a.i/

The post ITALI – Qeveria përgatit paketën e re të sigurisë, pas përleshjeve të dhunshme në Torino appeared first on Agjencia Telegrafike Shqiptare.

ISLAMABAD, 2 shkurt /ATSH-DPA/- Forcat e sigurisë pakistaneze vranë 22 militantë në një operacion të vazhdueshëm, duke e çuar numrin e të vdekurve në 177 në përleshjet me një grup rebelësh që luftojnë për pavarësi në provincën më të paqëndrueshme të vendit në kufi me Afganistanin.

Burime të sigurisë thanë se ushtria, agjencitë e inteligjencës dhe policia kishin shtrënguar kordonin rreth militantëve dhe mund të kishte më shumë viktima.

“Gjatë 48 orëve të fundit, të paktën 33 civilë dhe 17 anëtarë të forcave të sigurisë u vranë gjithashtu”, tha ministri i Mbrojtjes Khawaja Asif në parlament sot në mbrëmje.

Shumica e civilëve u vranë në Gawadar ku Kina po ndërton një port, si pjesë e Korridorit Ekonomik Kinë-Pakistan (CPEC) me vlerë miliarda dollarë, i cili synon të lidhë rajonin kinez Xinjiang me Portin Gwadar përmes një rrjeti autostradash dhe shinash hekurudhore.

CPEC është pjesë e Iniciativës “Një Brez, një Rrugë” të Pekinit për të përmirësuar logjistikën globale.

Asif tha se si India ashtu edhe Afganistani fshiheshin pas rritjes së militantizmit në provincën më të madhe të vendit, Baluçistani.

“Udhëheqja e terroristëve është e vendosur në Afganistan dhe ata marrin mbështetje nga atje”, tha ministri.

Ushtria Çlirimtare e Baluçistanit (BLA), një grup rebel që lufton për pavarësinë e rajonit nga Pakistani, mori përgjegjësinë për sulmet e shumëfishta dhe të koordinuara në të gjithë provincën.

Vitin e kaluar, Shtetet e Bashkuara të Amerikës e caktuan grupin separatist dhe krahun e tij të armatosur, Brigadën Majeed, si Organizata Terroriste të Huaja (FTO).

Baluçistani është provinca më e madhe e Pakistanit, që kufizohet me Afganistanin dhe Iranin.

Rajoni ka mbajtur barrën e një rritjeje të dhunës nga militantët islamikë dhe rebelët etnikë Baloç që luftojnë për pavarësi. //a.i/

The post PAKISTAN – Të paktën 177 të vrarë në përleshjet në Baluçistan appeared first on Agjencia Telegrafike Shqiptare.

TEL AVIV/GAZA, 2 shkurt /ATSH-DPA/- Izraeli ka rihapur pjesërisht pikën kufitare të Rafahut midis Egjiptit dhe Rripit të Gazës për lëvizjen e njerëzve, raportuan sot televizioni egjiptian dhe burimet izraelite të sigurisë.

“Kalimi është zyrtarisht funksional për herë të parë në rreth një vit”, tha stacioni televiziv egjiptian i lidhur me shtetin al-Qahera News, ndërsa burime izraelite të sigurisë konfirmuan gjithashtu hapjen.

“Al-Qahera News” raportoi se palestinezët që hynin nga Egjipti kishin arritur në anën palestineze të pikës kufitare të Gazës deri të hënën pasdite.

Ky veprim pritet t’u lejojë palestinezëve të plagosur dhe të sëmurë të largohen nga territori bregdetar, i cili u shkatërrua në më shumë se dy vjet luftë pas sulmeve të 7 tetorit 2023. Palestinezët që ikën nga lufta gjithashtu do të jenë në gjendje të kthehen në Gaza.

Megjithatë, dërgesat e ndihmave nuk do të kalojnë ende nga Egjipti direkt në Rripin e Gazës.

Hapja e kufirit është hapi i fundit në një plan paqeje të ndërmjetësuar nga presidenti i SHBA-së Donald Trump, sipas të cilit një armëpushim ka qenë në fuqi midis Izraelit dhe grupit militant palestinez Hamas që nga tetori.

Kalimi fillimisht ishte hapur “në një bazë prove” të dielën. //a.i/

The post GAZA – Izraeli rihap pjesërisht pikën kufitare te Rafahut për palestinezët appeared first on Agjencia Telegrafike Shqiptare.

MOSKË, 2 shkurt /ATSH-DPA/- Kremlini ka konfirmuar se raundi i ardhshëm i bisedimeve me Ukrainën dhe Shtetet e Bashkuara të Amerikës mbi një përfundim të mundshëm të luftës do të zhvillohet më vonë këtë javë në Abu Dhabi, raportoi sot agjencia ruse e lajmeve “Interfax”.

“Takimi fillimisht ishte planifikuar për të dielën”, tha zëdhënësi i Kremlinit, Dmitry Peskov në Moskë, sipas agjencisë.

Megjithatë, Peskov tha se planifikimi i mëtejshëm nga të tre delegacionet kishte qenë i nevojshëm.

“Raundi i dytë do të zhvillohet tani të mërkurën dhe të enjten në Abu Dabi”, tha ai.

Kjo përputhet me datat e dhëna të dielën nga presidenti ukrainas Volodymyr Zelensky.

Negociatat e drejtpërdrejta midis Moskës dhe Kievit rifilluan në Abu Dhabi një javë më parë pas një ndërprerjeje të gjatë.

Bisedimet, që synonin të eksploronin një rrugë drejt paqes pas pothuajse katër vitesh konflikti, u mbajtën pas dyerve të mbyllura dhe të ndërmjetësuara nga SHBA-ja përmes kryenegociatorit, Steve Witkoff.

Ndërsa ekipet negociuese i kanë përshkruar vazhdimisht bisedimet si konstruktive, një marrëveshjeje paqeje nuk është ende në horizont, me çështjet territoriale që mbeten një pikë kyçe ngërçi.

Rusia po kërkon që Kievi të tërhiqet nga disa pjesë të rajonit lindor të Donbasit të Ukrainës – një zonë e përqendruar kryesisht në provincat e Donetskut dhe Luhanskut – që mbeten nën kontrollin ukrainas. Zelensky ka refuzuar vazhdimisht lëshime të tilla territoriale.

Me kërkesë të presidentit të SHBA-së Donald Trump, Rusia pranoi të ndërpresë përkohësisht sulmet ndaj infrastrukturës energjetike deri më 1 shkurt, për shkak të të ftohtit ekstrem dhe dëmeve të shumta në Kiev dhe qytete të tjera. Sulmet ndaj objektivave të tjerë kanë vazhduar.

Peskov tha se nuk kishte asgjë për të shtuar në faktin se armëpushimi i pjesshëm zbatohej vetëm deri të dielën. //a.i/

The post MOSKË – Kremlini konfirmon raundin e ardhshëm të bisedimeve me Ukrainën në Abu Dabi appeared first on Agjencia Telegrafike Shqiptare.

KIEV, 1 shkurt /ATSH-DPA/- Të paktën nëntë persona u plagosën pasi dronët rusë goditën një maternitet në qytetin jugor të Zaporizhias, thanë sot zyrtarët.

Guvernatori ushtarak Ivan Federov tha se në sulmin fillestar ishin plagosur gjashtë persona, përfshirë dy gra që kishin qenë në spital për një ekzaminim.

“Në sulmin e dytë, u plagosën dy gra dhe një fëmijë 4-vjeçar”, tha ai.

Federov publikoi foto të ndërtesës së rrënuar në Telegram, të cilat tregonin dritare të thyera dhe dhoma spitalore të rrënuara.

Më herët, zyrtarët thanë se një burrë dhe një grua ishin vrarë në sulmet me dron rusë gjatë natës në Dnipro.

Forcat Ajrore Ukrainase raportuan një total prej 90 sulmesh me dron rusë gjatë natës në të gjithë vendin.

Sulmet vijnë mes negociatave të vazhdueshme për t’i dhënë fund luftimeve gati katër-vjeçare.

Presidenti ukrainas Volodymyr Zelensky tha sot se bisedimet tripalëshe të paqes midis Rusisë, Ukrainës dhe SHBA-së do të zhvilloheshin të mërkurën dhe të enjten në Abu Dabi.

Negociatat e drejtpërdrejta midis Moskës dhe Kievit rifilluan në Abu Dhabi një javë më parë pas një ndërprerjeje të gjatë. Ato u mbajtën pas dyerve të mbyllura dhe u ndërmjetësuan nga SHBA-ja përmes kryenegociatorit të tyre Steve Witkoff.

Përpara bisedimeve të planifikuara dypalëshe të dielën, Rusia kishte rënë dakord me një kërkesë të Presidentit të SHBA-së Donald Trump për të ndaluar përkohësisht sulmet ndaj infrastrukturës energjetike të Ukrainës, pasi sulmet në centrale shkaktuan ndërprerje masive të energjisë elektrike.

“Armëpushimi i kufizuar duhej të zgjaste deri sot”, sipas Kremlinit. //a.i/

The post UKRAINË – Rusia sulmon maternitetin në Zaporizhia, të paktën nëntë të plagosur appeared first on Agjencia Telegrafike Shqiptare.

JERUZALEM, 1 shkurt /ATSH/- Në Jeruzalem javën e kaluar, kryeministri Edi Rama i zgjodhi fjalët e tij me kujdes dhe i zgjodhi ato sipas traditës hebraike, sipas “The Jerusalem Post”.

“Talmudi mëson se kushdo që shpëton një jetë të vetme, është sikur të ketë shpëtuar të gjithë botën”, tha Rama në konferencën ndërkombëtare për antisemitizmin “Generation Truth” të organizuar nga Ministria e Çështjeve të Diasporës dhe Luftës Kundër Antisemitizmit e Izraelit.

Takimi, i mbajtur në Jeruzalem për të dytin vit radhazi, që përkon me Ditën Ndërkombëtare të Përkujtimit të Holokaustit, mblodhi udhëheqës ndërkombëtarë dhe figura të komunitetit hebraik në Izrael, për të diskutuar rritjen globale të antisemitizmit.

“Antisemitizmi nuk është thjesht një urrejtje ndaj hebrenjve, por një sulm ndaj arkitekturës morale të vetë njerëzimit”, tha Rama.

“Bëhet fjalë për njerëzimin. Historia tregon se fillon me hebrenjtë, por nuk mbaron me hebrenjtë”, tha kryeministri Rama për “The Jerusalem Post”.

Paralajmërimi i Ramës, i cili është pjesërisht instinkt historik, pjesërisht gjykim politik, qëndron në fokus të marrëdhënies së tij me Izraelin.

Pikëpamja e Ramës për Jeruzalemin nuk është pikëpamja mesatare diplomatike, por vjen nga një botë ku ai u rrit duke u mësuar të urrente shtetin hebre.

Jeruzalemi diskutohet pas Perdes së Hekurt

Historia personale e Ramës fillon në një Shqipëri komuniste të izoluar nga bota, ku paranoja ishte politikë shtetërore dhe ku pak miq gjendeshin në të dyja anët e Perdes së Hekurt.

“Që kur isha fëmijë, isha i fiksuar pas Jeruzalemit”, th ai.

“Ne jetonim në një vend krejtësisht të izoluar dhe na mësuan se duhej të përgatiteshim për “luftën e madhe”, sepse “ata” do të vinin për ne. “Ata” ishin imperialistët amerikanë, socialimperialistët sovjetikë dhe sionistët izraelitë”, shtoi Rama.

“Jeruzalemi vinte nëpërmjet dy kanaleve. Njëri ishte versioni i miratuar nga shteti, ai i nxënësve të shkollës që lexonin gazetën e Partisë Komuniste në mëngjes, me raporte rreth “sa keq ushtria sioniste vret, plagos ose zhvendos palestinezët”, tha kryeministri Rama.

“Kanali tjetër ishte më privat dhe shumë më i ndaluar nën regjimin e Enver Hoxhës”, shtoi ai.

“Kanali tjetër i lidhjes sime ishte Bibla e gjyshes sime, e cila ishte një katolike shumë e zjarrtë”, tha Rama.

“Bibla në atë kohë ishte e ndaluar, por ajo kishte një Bibël të vërtetë, dhe kështu edhe nëna ime”, shtoi ai.

“Pas rënies së komunizmit, nuk mund të vija në Izrael sepse nuk kishte udhëtime ajrore ose detare”, kujtoi ai.

“Por fillova të mësoja shumë më tepër rreth historisë së Jeruzalemit, dhe më në fund arrita të vija, dhe dashuria vetëm rritej që atëherë”, tha Rama.

Ishte pas Luftës së Ftohtë që marrëdhëniet moderne midis Izraelit dhe Shqipërisë u rindërtuan.

Marrëdhëniet u vendosën menjëherë pas themelimit të Izraelit, u ndërprenë për disa dekada dhe u rivendosën në fillim të viteve 1990.

Ambasadat u krijuan, më vonë si në Tel Aviv ashtu edhe në Tiranë, dhe bashkëpunimi u zgjerua në ekonomi, kulturë, bujqësi, kibernetikë dhe turizëm.

Në konferencën e Jeruzalemit, ai u rikthye te historia e kohës së luftës që është bërë karta morale e Shqipërisë: kodi i nderit i njohur si “Besa” dhe strehimi i hebrenjve gjatë Holokaustit.

“Kur Shqipëria u bë i vetmi vend në Evropë që nuk dorëzoi asnjë hebre gjatë Luftës së Dytë Botërore, popullsia hebraike u rrit gjatë luftës”, tha Rama, ndërsa i tha pjesëmarrësve se Shqipëria i kishte dhënë mbi 3,700 emra, Qendrës Botërore të Përkujtimit të Holokaustit “Yad Vashem” – të hebrenjve të shpëtuar gjatë Holokaustit.

“Gjatë Holokaustit, zyrtarët nazistë erdhën në Shqipëri me dy kërkesa: listat e hebrenjve dhe listat e arit”, tha Rama në konferencë.

Ai tha se përgjigjja u dha përmes autoriteteve të Shqipërisë dhe më pas u përforcua nga katër udhëheqësit fetarë të vendit – figurat që vetë nazistët i trajtuan si arbitra moralë dhe u përpoqën t’i angazhonin për të zgjidhur ato “dy çështje”.

“Por, përgjigjja e Shqipërisë nuk u përkul dhe nuk bëri pazar. Ishte e thjeshtë dhe përfundimtare: “Mund t’ua merrni arin, nuk mund t’i merrni hebrenjtë tanë. Ari ishte i tyre për ta marrë, hebrenjtë ishin tanët për t’i mbrojtur. Dhe kjo nuk është një legjendë, është një fakt”, theksoi Rama.

“Antisemitizmi po rishfaqet sërish hapur dhe pa turp, shpesh i maskuar si kritikë politike, ankth kulturor, ose edhe më keq, superioritet moral”, shtoi ai.

“Urrejtja nuk fillon me dhunë. Fillon me gjuhë. Fillon me indiferencë. Fillon me justifikime”, tha Rama.

“Sapo të fillosh të tolerosh antisemitizmin, në fakt po hap një vrimë në strukturën që i mban shoqëritë të qëndrueshme”, këmbënguli Rama.

“Është si të hapësh një vrimë, pastaj ajo bëhet gjithnjë e më e madhe me kalimin e kohës. Ose si të kesh një ndërtesë pa dritare ose dyer për mbrojtje”, shtoi ai.

Rama iu drejtua gjithashtu 7 tetorit dhe luftës dyvjeçare që pasoi, duke iu referuar perceptimit se Izraeli kishte dështuar në “luftën e PR” në Perëndim.

“Terrorizmi nuk është një perspektivë. Është thjesht një krim kundër njerëzimit. Masakra e 7 tetorit nuk ishte rezistencë. Ishte një vrasje masive”, tha ai.

Ai i pranoi vuajtjet palestineze në Gaza si “reale” dhe “vërtet zemërthyese”, por tha se detyrimet morale në Perëndim e kishin ngatërruar të vërtetën për disa njerëz.

“Ne jetojmë në kohë të vështira të së vërtetës, sepse tani opinionet po trajtohen si fakte dhe faktet po trajtohen si opinione”, tha ai.

“Është një rrëmujë. Më shumë se kaq, bazuar në besnikëri, njerëzit zgjedhin opinione se “kjo është e drejtë” dhe pastaj e konsiderojnë atë si fakt”, tha Rama.

“Është një çmenduri të turbullosh vijat morale ose të legjitimosh terrorin në emër të proporcionalitetit. Paqja nuk do të thotë dhe nuk mund të nënkuptojë neutralitet ndaj terrorit”, tha kryeministri Rama.

Gjatë intervistës, Rama argumentoi se marrëdhënia e Shqipërisë me Izraelin nuk kufizohet vetëm në historinë ceremoniale.

“Izraelitët, mund ta ndiejnë atë në terren, veçanërisht në një kohë kur hebrenjtë janë përballur me armiqësi në pjesë të Evropës”, tha ai.

“Nuk kishte asnjë tubim, nuk kishte asnjë shenjë në asnjë formë antisemitizmi ndaj numrit shumë të gjerë të turistëve hebrenj që vijnë në Shqipëri”, tha ai, duke e krahasuar atë me vendet e tjera të afërta – ku tha se turistët hebrenj kishin vuajtur për shkak të luftës së Izraelit kundër Hamasit.

Megjithatë, pati momente më të lehta gjatë vizitës së tij. Kryetari i Knesset-it, Amir Ohana, i dhuroi Ramës një palë këpucë të dizenjuara me porosi të stampuara me flamurin shqiptar si shenjë vlerësimi.

Gjithashtu, kryeministri Rama pati takime për të çuar përpara Dhomën e Tregtisë së Shqipërisë në Izrael dhe një konferencë për shtyp së bashku me kryeministrin Benjamin Netanyahu.

Rama mori gjithashtu një duartrokitje në këmbë kur doli në podiumin e Knesset-it ndërsa do iu drejtohej ligjvënësve izraelitë.

Rama e shpjegoi këtë afërsi në terma më të thjeshtë.

“Mendoj se është normale të jesh mik me Izraelin, por është një nder të konsiderohesh një mik kaq i ngushtë i Izraelit”, tha Rama.

I pyetur se çfarë do të ndodhte më pas midis dy vendeve, Rama tha: “Shpresoj se do të kemi shumë gjëra të tjera të mira”.

Për Izraelin, vizita e Ramës ishte më shumë sesa thjesht një gjest diplomatik midis vendeve miqësore.

Jeruzalemi ka një aleat të vërtetë te kryeministri shqiptar, i cili mund të qëndrojë në skenë në kryeqytetin e përjetshëm të Izraelit dhe të citojë Talmudin.

Por për Ramën, përgjigjja është e qartë dhe kthehet te ideja e tij thelbësore e njerëzimit – se “nëse i lini të fillojnë me hebrenjtë, së shpejti do të vijnë për ju”. //a.i/

The post Rama për “Jerusalem Post”: Antisemitizmi kërcënon të gjithë njerëzimin appeared first on Agjencia Telegrafike Shqiptare.

BRUKSEL, 1 shkurt /ATSH/- Aleatët evropianë dhe Kanadaja po shpenzojnë miliarda dollarë për të ndihmuar Ukrainën dhe janë zotuar të rrisin ndjeshëm buxhetet e tyre për të mbrojtur territoret e tyre, sipas AP.

Por, pavarësisht këtyre përpjekjeve, besueshmëria e NATO-s si një forcë e bashkuar nën udhëheqjen e SHBA-së ka marrë një goditje të madhe gjatë vitit të kaluar, ndërsa besimi brenda organizatës ushtarake prej 32 vendesh është shpërbërë.

Përçarja ka qenë më e dukshme për shkak të kërcënimeve të përsëritura të presidentit të SHBA-së Donald Trump për të pushtuar Groenlandën, një territor gjysmëautonom i aleatit të NATO-s, Danimarkës.

Kohët e fundit, deklaratat përçmuese të Trump për trupat e aleatëve të tij të NATO-s në Afganistan shkaktuan një protestë tjetër.

Ndërsa tensioni në Groenlandë është qetësuar për momentin, grindjet e brendshme kanë dëmtuar aftësinë e aleancës më të madhe të sigurisë në botë për të penguar kundërshtarët, sipas analistëve.

“Episodi ka rëndësi sepse kaloi një vijë që nuk mund të anashkalohet”, tha Sophia Besch nga Fondacioni Carnegie për Paqe Ndërkombëtare (CEIP) në një raport mbi krizën e Groenlandës.

“Edhe pa forcë ose sanksione, kjo shkelje e dobëson aleancën në një mënyrë të qëndrueshme”, thanë analistët.

Tensionet nuk kanë kaluar pa u vënë re në Rusi, kërcënimi më i madh i NATO-s.

Çdo pengesë ndaj Rusisë mbështetet në sigurimin që presidenti Vladimir Putin të jetë i bindur se NATO do të hakmerret nëse ai zgjeron luftën e tij përtej Ukrainës. Tani për tani, kjo nuk duket të jetë e vërtetë.

“Është një trazirë e madhe për Evropën dhe ne po e vëzhgojmë atë”, vuri në dukje ministri i Jashtëm rus Sergey Lavrov javën e kaluar.

“Kupë e mbushur”

Të kritikuar nga udhëheqësit amerikanë për dekada të tëra për shpenzimet e ulëta të mbrojtjes dhe të sulmuar vazhdimisht nga Trump, aleatët evropianë dhe Kanadaja ranë dakord në korrik të përmirësonin ndjeshëm lojën e tyre dhe të fillonin të investonin 5% të produktit të tyre të brendshëm bruto (PBB) në mbrojtje.

Premtimi kishte për qëllim heqjen e “kamzhikut” nga dora e Trump. Aleatët do të shpenzonin po aq shumë të prodhimit të tyre ekonomik në mbrojtjen thelbësore sa SHBA-ja – rreth 3,5% të PBB-së – deri në vitin 2035, dhe një shpenzim të mëtejshëm prej 1,5% në projekte të lidhura me sigurinë, si përmirësimi i urave, ajrit dhe porteve detare.

Sekretari i përgjithshëm i NATO-s Mark Rutte i ka përshëndetur këto premtime si një shenjë të shëndetit të fortë dhe fuqisë ushtarake të NATO-s. Kohët e fundit ai tha se në thelb falë Donald J. Trump, NATO ishte më e fortë se kurrë.

Edhe pse një pjesë e madhe e punës së tij ishte të siguronte që Trump të mos tërhiqej nga NATO, siç presidenti amerikan ka kërcënuar herë pas here, “lajkat” e tij ndaj udhëheqësit të SHBA-së ndonjëherë kanë ngritur shqetësime. Rutte ka refuzuar qëllimisht të flasë për përçarjen mbi Groenlandën.

Neni 5 në rrezik

Organizata e Traktatit të Atlantikut të Veriut u formua në vitin 1949 për t’iu kundërvënë kërcënimit të sigurisë që paraqiste Bashkimi Sovjetik gjatë Luftës së Ftohtë, dhe parandalimi i saj mbështetet nga një prani e fortë e trupave amerikane në Evropë.

Aleanca është ndërtuar mbi premtimin politik se një sulm ndaj një aleati duhet të përballet me një përgjigje nga të gjithë anëtarët – garancia e sigurisë kolektive e sanksionuar në Nenin 5 të rregullores së saj.

Ajo mbështetet në besimin se territoret e të gjithë 32 aleatëve duhet të mbeten të paprekshme. Planet e Trump për Groenlandën sulmojnë pikërisht këtë parim, edhe pse Neni 5 nuk zbatohet në mosmarrëveshjet e brendshme pasi mund të aktivizohet vetëm unanimisht.

“Në vend që të forcojnë aleancat tona, kërcënimet kundër Groenlandës dhe NATO-s po dëmtojnë interesat e vetë Amerikës”, thanë dy senatore amerikane, demokratja Jeanne Shaheen dhe republikanja Lisa Murkowski, në një artikull të “New York Times”.

“Sugjerimet se Shtetet e Bashkuara të Amerikës do të kapnin ose detyronin aleatët të shisnin territor nuk projektojnë forcë. Ato sinjalizojnë paparashikueshmëri, dobësojnë frenimin dhe u japin kundërshtarëve tanë pikërisht atë që duan: provë se aleancat demokratike janë të brishta dhe të pabesueshme”, thanë ata.

Edhe para se Trump të përshkallëzonte kërcënimet e tij për të marrë kontrollin e Groenlandës, aleatët e tij evropianë nuk ishin kurrë plotësisht të bindur se ai do t’i mbronte ata nëse do të sulmoheshin.

Trump ka thënë se nuk beson se aleatët do ta ndihmonin, dhe kohët e fundit ai shkaktoi më shumë zemërim kur vuri në pikëpyetje rolin e trupave evropiane dhe kanadeze që luftuan dhe vdiqën përkrah amerikanëve në Afganistan. Presidenti më vonë e ndryshoi pjesërisht qëndrimin e tij.

Në dëshminë para Komitetit të Senatit për Marrëdhëniet me Jashtë, sekretari amerikan i Shtetit, Marco Rubio, hodhi poshtë kritikat se Trump kishte minuar aleancën.

“Sa më të fortë të jenë partnerët tanë në NATO, aq më shumë fleksibilitet do të kenë Shtetet e Bashkuara të Amerikës për të siguruar interesat tona në pjesë të ndryshme të botës”, tha ai.

“Kjo nuk është një braktisje e NATO-s. Ky është një realitet i shekullit XXI dhe një botë që po ndryshon tani”, shtoi ai.

Një Rusi që nuk dekurajohet lehtë

Pavarësisht diskutimeve të NATO-s për rritjen e shpenzimeve, Moska duket e palëkundur. Shefja e politikës së jashtme të BE-së, Kaja Kallas, tha këtë javë se ishte e qartë se Rusia do të mbetej një kërcënim i madh për sigurinë për një kohë të gjatë.

“Ne po i kundërvihemi sulmeve kibernetike, sabotimit kundër infrastrukturës së rëndësishme, ndërhyrjeve të huaja dhe manipulimit të informacionit, frikësimit ushtarak, kërcënimeve territoriale dhe ndërhyrjeve politike”, tha Kallas të mërkurën.

Zyrtarët në të gjithë Evropën kanë raportuar akte sabotimi dhe fluturime misterioze me dronë mbi aeroporte dhe baza ushtarake. Identifikimi i fajtorëve është i vështirë dhe Rusia e ka mohuar përgjegjësinë.

Në një fjalim në fund të vitit, Rutte paralajmëroi se Evropa ishte në rrezik të afërt.

“Rusia e ka rikthyer luftën në Evropë dhe ne duhet të jemi të përgatitur për shkallën e luftës që duruan gjyshërit ose stërgjyshërit tanë”, tha ai.

Ndërkohë, në Rusi, Lavrov tha se mosmarrëveshja për Groenlandën paralajmëroi një krizë të thellë për NATO-n.

Dyshime për trupat amerikane
Sekretari amerikan i Mbrojtjes, Pete Hegseth, do të takohet me homologët e tij në NATO më 12 shkurt. Një vit më parë, ai i trembi aleatët duke paralajmëruar se prioritetet e sigurisë së Amerikës ishin diku tjetër dhe se Evropa duhej të kujdesej për veten tani.

Siguria në rajonin e Arktikut, ku ndodhet Groenlanda, do të jetë në krye të axhendës. Nuk është e qartë nëse Hegseth do të njoftojë një tërheqje të re të trupave amerikane në Evropë, të cilat janë thelbësore për parandalimin e NATO-s.

Mungesa e qartësisë në lidhje me këtë ka nxitur gjithashtu dyshime në lidhje me angazhimin e SHBA-së ndaj aleatëve të saj. Në tetor, NATO mësoi se deri në 1500 trupa amerikane do të tërhiqeshin nga një zonë që kufizohet me Ukrainën, duke zemëruar aleatin Rumaninë.

Një raport nga Instituti i Bashkimit Evropian për Studime të Sigurisë paralajmëroi javën e kaluar se, megjithëse trupat amerikane nuk kishin gjasa të zhdukeshin brenda natës, dyshimet në lidhje me angazhimin e SHBA-së ndaj sigurisë evropiane tregonin se “struktura e parandalimit bëhej më e lëkundshme”.

“Evropa po detyrohet të përballet me një realitet më të ashpër”, thanë, Veronica Anghel dhe Giuseppe Spatafora. //a.i/

The post ANALIZË – Aftësia e NATO-s për të penguar Rusinë goditet nga konfliktet e brendshme transatlantike appeared first on Agjencia Telegrafike Shqiptare.

KIEV, 1 shkurt /ATSH/- Pavarësisht premtimeve për një armëpushim energjetik, Ukraina është zgjuar në një makth të vërtetë blackout-i që ka paralizuar kryeqytetin dhe qytete të tjera të mëdha, sipas “Kyiv Independent”.

Ajo që duhej të ishte një ditë e qetë, pas dakordësisë mes presidentit rus, Vladimir Putin dhe homologut të tij amerikan, Donald Trump, u kthye në një kaos total që në orët e para të mëngjesit – kur Kievi mbeti pa energji elektrike, pa semaforë dhe me metronë e bllokuar.

Situata u rëndua më tej kur u ndalën sistemet e ngrohjes qendrore në temperatura që shënojnë minus 15 gradë Celsius, ndërsa mungesa e ujit dhe energjisë përfshiu me shpejtësi qyetetes si, Kharkivi, Zhytomyri dhe Odesa.

Efekti zinxhir preku madje edhe Moldavinë e Rumaninë, duke nxjerrë jashtë funksionit sistemet kompjuterike në pikat kufitare.

Edhe pse gjatë natës Rusia lëshoi rreth 85 dronë pa goditur drejtpërdrejt rrjetin, autoritetet ukrainase sqaruan se bëhej fjalë për një defekt të rëndë teknik që kishte shkaktuar shkëputjen e linjave me vendet fqinje.

Inxhinierët vendas theksojnë se katër vite bombardime të vazhdueshme i kanë dobësuar aq shumë centralet dhe rrjetin e shpërndarjes, saqë kolapse të tilla janë tashmë të pashmangshme.

Ndërkohë që defektet u riparuan gjatë mbrëmjes, frika mbetet e madhe pasi në mesnatë përfundon afati i armëpushimit të premtuar dhe bombardimet mund të rifillojnë, ndërsa Agjencia Ndërkombëtare e Energjisë Atomike paralajmëroi për rreziqe në centralet e dëmtuara nga lufta.

Në planin diplomatik, vëmendja është kthyer nga Abu Dabi, ku pritet të rinisin takimet direkte mes delegacioneve të Rusisë dhe Ukrainës për të diskutuar procesin e paqes.

Ky zhvillim vjen pas bisedimeve përgatitore në Majemi mes përfaqësuesve rusë dhe amerikanë, të cilët u shprehën optimistë për hapat e parë dhe marrëdhëniet ekonomike mes dy vendeve.

Megjithatë, presidenti Volodymyr Zelensky mbetet i prerë në qëndrimin e tij, duke insistuar se Ukraina nuk duhet të lihet mënjanë në këto bisedime.

Sipas tij, asnjë marrëveshje nuk mund të arrihet pa një takim kokë më kokë mes tij dhe Putinit, duke kërkuar kontroll të plotë mbi fatin e negociatave. //a.i/

The post FOKUS – Ukraina mbetet në terr pas ndërprerjeve masive të energjisë appeared first on Agjencia Telegrafike Shqiptare.

UASHINGTON, 1 shkurt /ATSH-DPA/- Ndërsa Bregu Lindor i SHBA-së është ende duke u rikuperuar nga stuhia vdekjeprurëse dimërore fundjavën e kaluar, disa shtete në juglindje të vendit tashmë po përgatiten për një tjetër stuhi të fuqishme.

“Një sistem i presionit të ulët atmosferik, pranë bregdetit pritet të kthehet në një “ciklon bombë” – një stuhi dimërore që po intensifikohet në mënyrë shpërthyese”, tha sot Shërbimi Kombëtar i Motit.

Priten reshje të dendura dëbore dhe erëra me forcë uragani. Karolina e Jugut dhe ajo e Veriut, një pjesë e Xhorxhias dhe Virxhinias kanë të ngjarë të preken veçanërisht nga stuhia.

Sipas raporteve të medias amerikane, meteorologët presin valë stuhie, valë të rrezikshme dhe dëmtime të mundshme të ndërtesave në rajonet bregdetare të Karolinës së Veriut.

Lokalisht, reshjet e dëborës mund të arrijnë nivele që normalisht do të shiheshin gjatë një viti të tërë.

Pas stuhisë, ajri i ftohtë arktik po përfshin sërish jugun. Deri sot në mëngjes, temperaturat do të shënojnë nën zero gradë Celcius, në disa pjesë të Floridës së Jugut.

“Këto nivele temperaturash u matën për herë të fundit në fund të viteve 1980”, sipas shërbimit të motit.

Autoritetet po paralajmërojnë për temperatura të ftohta për shkak të erës – duke rritur rrezikun e hipotermisë dhe ngrirjes.

Stuhia e re vjen pas të ftohtit ekstrem dhe reshjeve të dendura të borës, fundjavën e kaluar, të cilat, sipas raportimeve të medias, shkaktuan vdekjen e të paktën 85 personave në disa shtete të SHBA-së.

Qindra mijëra familje në shumë vende janë ende pa energji elektrike. Disa shtete kanë shpallur ose zgjatur gjendjen e jashtëzakonshme dhe i kanë bërë thirrje popullsisë të shmangë udhëtimet dhe të përgatitet për ndërprerje të mundshme të energjisë elektrike. //a.i/

The post METEO – SHBA-ja pritet të goditet nga cikloni “bombë” appeared first on Agjencia Telegrafike Shqiptare.

RIAD, 1 shkurt /ATSH-DPA/- Gjermania dhe Arabia Saudite kanë nënshkruar një deklaratë gjithëpërfshirëse për të intensifikuar bashkëpunimin në energji, gjatë një vizite të ministres gjermane të Ekonomisë, Katherina Reiche sot në Riad.

Reiche dhe ministri saudit i Energjisë Abdulaziz bin Salman nënshkruan gjithashtu 10 dokumente qëllimi për të zgjeruar bashkëpunimin midis kompanive gjermane dhe saudite.

“Marrëveshjet mbulojnë fusha kyçe për të ardhmen”, tha Reiche, duke përmendur energjinë, inteligjencën artificiale, hidrogjenin, krijimin e vlerës industriale dhe inovacionin.

Ajo vuri në dukje një deficit saudit për shkak të rënies së çmimeve të naftës, duke shtuar se Riadi po kërkonte të diversifikonte burimet e tij të të ardhurave.

“Diversifikimi është, gjithashtu një mënyrë për t’u siguruar kundër luhatjeve të çmimeve të naftës, për të vënë nën kontroll papunësinë dhe për t’i dhënë brezit të ri të vendit perspektiva për të ardhmen”, tha ministrja gjermane.

Moratoriumi i Mirëkuptimit i rënë dakord midis dy vendeve mbulon të gjitha fushat e energjisë, si dhe sektorin e kimikateve.

Ai trajton trajtimin e dioksidit të karbonit të gazit serrë, digjitalizimin në sektorin e energjisë dhe krijimin e zinxhirëve të besueshëm të furnizimit.

Bashkëpunimi midis kompanive dhe sektorit privat dhe publik do të forcohet gjithashtu. //a.i/

The post RIAD – Gjermania dhe Arabia Saudite rrisin bashkëpunimin në fushën e energjisë appeared first on Agjencia Telegrafike Shqiptare.

ANTALIA, 1 shkurt /ATSH/ – Një aksident i rëndë ka ndodhur pranë qytetit turistik bregdetar në Turqinë jugore, në Antalia, ku një autobus doli nga rruga dhe u përmbys, duke shkaktuar vdekjen e tetë personave dhe plagosjen e 26 të tjerëve, sipas “Daily Sabah”.

Guvernatori i provincës, Hulusi Sahin, konfirmoi shifrat e viktimave dhe bëri me dije se mjeti po transportonte 34 pasagjerë drejt qendrës turistike kur ndodhi ngjarja tragjike.

Sipas deklaratës së guvernatorit, shkak i aksidentit dyshohet të ketë qenë shpejtësia e lartë në një udhëkryq ku qarkullimi duhet të ishte i kufizuar, dhe lagështia në rrugë për shkak të reshjeve të shiut.

Sahin theksoi se disa prej të plagosurve ndodhen në gjendje të rëndë për jetën në spitalet e zonës. Deri më tani, autoritetet turke nuk kanë specifikuar nëse në mesin e viktimave apo të plagosurve ka shtetas të huaj.

Rajoni i Antalias njihet si një nga destinacionet më të njohura turistike në Turqi, i cili tërheq miliona vizitorë të huaj çdo vit. //a.i/

The post TURQI – Tetë të vdekur dhe 26 të plagosur në një aksident me autobus në Antalia appeared first on Agjencia Telegrafike Shqiptare.

TEHERAN, 1 shkurt /ATSH-DPA/- Irani po përgatitet për negociata me Shtetet e Bashkuara të Amerikës, tha dje sekretari i përgjithshëm i Këshillit të Sigurisë Kombëtare të Iranit, Ali Larijani.

“Në kundërshtim me narrativën e luftës së prodhuar artificialisht nga mediat, formimi i një kuadri për negociata po përparon”, tha Larijani në X.

Portuali amerikan i lajmeve “Axios” raportoi në lidhje me postimin e Larijani në X se ai ishte takuar dje në Teheran me Mohammed bin Abdulrahman Al Thani, kryeministrin e Katarit, i cili po kërkon të ndërmjetësojë midis SHBA-së dhe Iranit.

Ndërkohë, një gazetar i “Fox News” citoi presidentin e SHBA-së Donald Trump të thoshte se pala iraniane po negocionte, dhe se palët ishin në pritje se çfarë do të ndodhte.

“Irani po bisedon me ne dhe do të shohim nëse mund të bëjmë diçka, përndryshe do të shohim se çfarë do të ndodhë… Kemi një flotë të madhe që po shkon atje”, tha Trump për “Fox News”.

Bisedimet pritet të përqendrohen, ndër të tjera, në frenimin e programit bërthamor të diskutueshëm të Iranit dhe kufizimin e zhvillimit të raketave balistike.

Trump e ka kërcënuar vazhdimisht Iranin me sulme ushtarake, përfshirë edhe në lidhje me shtypjen e dhunshme të protestave të fundit.

Ministri i Jashtëm iranian, Abbas Araghchi tha të premten se vendi i tij ishte gati për negociata të drejta, por hodhi poshtë kërkesat qendrore të Trump.

“Strategjitë e mbrojtjes dhe sistemet e raketave nuk do të jenë kurrë objekt negociatash”, tha Araghchi.

Irani do të ruajë kapacitetet e tij dhe madje do t’i zgjerojë ato nëse është e nevojshme.

Ai paralajmëroi SHBA-në se konflikti ushtarak mund të shkonte përtej një lufte dypalëshe këtë herë.

Në qershor të vitit të kaluar, ushtria amerikane bombardoi objektet bërthamore në Iran. //a.i/

The post TEHERAN – Larijani: Irani po përgatitet për negociata me SHBA-në appeared first on Agjencia Telegrafike Shqiptare.

TEL AVIV/GAZA, 1 shkurt /ATSH-DPA/- Rihapja zyrtare e pikës kufitare të Rafahut midis Egjiptit dhe Rripit të Gazës është shtyrë edhe një ditë, pasi operacionet në pikën e kontrollit iu nënshtruan sot një prove, konfirmuan burime izraelite, palestineze dhe të BE-së.

“Lëvizja e njerëzve do të lejohet vetëm nga e hëna mes diskutimeve të vazhdueshme mbi sigurinë dhe procedurat operative”, raportoi agjencia izraelite e lajmeve “ynet”, duke thënë se deri më tani pika e kalimit po funksiononte vetëm “në bazë prove”.

Izraeli tha më parë këtë javë se pika e kalimit jugor të Gazës do të rihapej për “lëvizje të kufizuara” nga e diela, pasi grupi ekstremist palestinez Hamas dorëzoi eshtrat e pengut të fundit izraelit të mbajtur në Gaza.

Rihapja pas një ndërprerjeje gati 1-vjeçare është pjesë e planit të paqes në Gaza të presidentit të SHBA-së Donald Trump.

Një zëdhënës i autoritetit shëndetësor të Gazës tha se as pacientët dhe as banorët e tjerë nuk kanë qenë në gjendje të kalojnë deri më tani, pasi burime palestineze thanë më parë se rreth 50 pacientë fillimisht do të lejoheshin të largoheshin nga Rripi i Gazës së bashku me shoqëruesit e tyre.

Burime egjiptiane të sigurisë thanë se Izraeli ende nuk e ka rihapur pikën e kalimit. Ushtria izraelite mban kontrollin e kufirit pas armëpushimit të tetorit, i cili u arrit pas më shumë se dy vitesh lufte.

Hapja e pikës së kalimit për lëvizjen e njerëzve është shtyrë për nesër, thanë burimet, që do të thotë se asnjë palestinez nuk do të jetë në gjendje të largohet sot nga Gaza, me udhëtimin provë që synon të testojë operacionet.

Rreth 150 persona do të autorizohen të largohen nga Rripi i Gazës çdo ditë nga e hëna, ndërsa rreth 50 të tjerë do të lejohen të kthehen në territorin palestinez të shkatërruar nga lufta, sipas vlerësimeve të cituara nga mediat izraelite.

“Vetëm rreth 42 000 palestinezë që u larguan nga Rripi gjatë luftës midis Izraelit dhe Hamasit do të lejohen të hyjnë në Gaza përmes pikës së kalimit”, thanë autoritetet izraelite.

Sipas autoritetit shëndetësor në Rripin e Gazës, rreth 20 000 palestinezë të sëmurë aktualisht presin të largohen nga territori për trajtim në Egjipt. Midis tyre janë 440 raste akute ku mbijetesa e pacientëve është në rrezik.

Hyrja dhe dalja për në dhe nga Gaza do të autorizohet në bashkëpunim me Egjiptin dhe pas miratimit të sigurisë nga Izraeli dhe kontrollit nga një mision i Bashkimit Evropian.

Deri më tani, vetëm ndihma e kufizuar humanitare është lejuar të hyjë në territorin kryesisht të shkatërruar palestinez nëpërmjet pikave kufitare me Izraelin. //a.i/

The post FOKUS – Izraeli rihap pikën kufitare te Rafahut në Gaza në “bazë prove” appeared first on Agjencia Telegrafike Shqiptare.

KIEV, 1 shkurt /ATSH-DPA/- Bisedimet tripalëshe për paqe midis Rusisë, Ukrainës dhe SHBA-së do të zhvillohen të mërkurën dhe të enjten në Abu Dhabi, tha sot presidenti ukrainas Volodymyr Zelensky.

“Ukraina është gati për një diskutim thelbësor dhe ne jemi të interesuar të sigurohemi që rezultati të na afrojë më shumë me një fund të vërtetë dhe dinjitoz të luftës”, shkroi ai në X.

Negociatat e drejtpërdrejta midis Moskës dhe Kievit rifilluan një javë më parë pas një ndërprerjeje të gjatë. Ato u mbajtën pas dyerve të mbyllura dhe u ndërmjetësuan nga SHBA-ja përmes kryenegociatorit të tyre Steve Witkoff. Këtë herë, palët ndërluftuese po negociojnë pa përfaqësuesit e SHBA-së.

Ndërsa ekipet negociuese i kanë përshkruar vazhdimisht bisedimet si konstruktive, një marrëveshjeje paqeje nuk është ende në horizont, me çështjet territoriale që mbeten një pikë kyçe ngërçi.

Rusia po kërkon që Kievi të tërhiqet nga disa pjesë të rajonit lindor Donbas të Ukrainës – një zonë e përqendruar kryesisht në provincat e Donetskut dhe Luhanskut – që mbeten nën kontrollin ukrainas. Zelensky ka refuzuar vazhdimisht lëshime të tilla territoriale.

Delegacioni ukrainas do të udhëhiqet nga kryenegociatori Rustem Umerov, ndërsa Igor Kostyukov, kreu i shërbimit të inteligjencës ushtarake GRU, do të kryesojë ekipin rus.

Me kërkesë të presidentit të SHBA-së Donald Trump, Rusia ka rënë dakord të ndërpresë përkohësisht sulmet ndaj infrastrukturës energjetike për shkak të të ftohtit ekstrem dhe dëmeve të shumta ekzistuese në Kiev dhe qytete të tjera. Sulmet ndaj objektivave të tjerë kanë vazhduar.

Zëdhënësi i Kremlinit, Dmitry Peskov tha të premten se armëpushimi i kufizuar do të zgjaste vetëm deri të dielën, në mënyrë që të ofrojë një “bazë të mirë” për bisedimet e paqes.

Zelensky tha se nuk kishte marrëveshje zyrtare për një armëpushim të tillë, por u zotua se Ukraina nuk do të sulmonte objektivat ruse të energjisë nëse Rusia do të respektonte njoftimin e saj.

Ukraina është mbrojtur kundër pushtimit në shkallë të plotë të Rusisë për gati katër vjet me mbështetjen e Perëndimit. //a.i/

The post KIEV – Zelensky: Ukraina dhe Rusia do të zhvillojnë raundin e ri të bisedimeve për paqe javën e ardhshme appeared first on Agjencia Telegrafike Shqiptare.