Real Madrid ka finalizuar tashmë huazimin e Endrick Felipe te Lyon, dhe ai mund të mos jetë lojtari i vetëm që largohet gjatë afatit kalimtar të dimrit.

Ka interes për disa nga lojtarët e Xabi Alonsos, dhe njëri prej tyre mund të jetë në rrugë drejt Arsenalit.

Arsenal aktualisht kryeson tabelën e Ligës Premier, teksa kërkon titullin e parë kampion pas më shumë se 20 vitesh.

Mikel Arteta, natyrisht, është i interesuar të përmirësojë skuadrën për gjysmën e dytë të sezonit, dhe shpreson të shtojë një lojtar të Real Madridit në përbërje gjatë javëve të ardhshme.

Sipas CaughtOffside, Arda Guler pëlqehet nga Arsenal dhe Arteta, me shpresën që të arrihet një marrëveshje e strukturuar gjatë afatit të dimrit, e ngjashme me atë që solli Martin Odegaard në Londrën e Veriut.

Arsenal është e interesuar të huazojë Guler për gjysmën e dytë të sezonit, me synimin që të vendosë një marrëveshje të përhershme në verë.

Interesi i tyre për mesfushorin turk është i gjatë, megjithatë mund të përballen me konkurrencë nga rivalët, Liverpool dhe Manchester United.

Arsenal mund të jetë shumë i interesuar për Guler, por raporti thekson qartë se Real Madrid nuk ka plane për ta shitur.

Një largim do të kishte qenë më i mundur para këtij sezoni, por me 20-vjeçarin tashmë një lojtar kyç për Alonson, ka pak ose aspak mundësi që ai të largohet nga Bernabeu./Telegrafi/

Trajneri i Arsenalit, Mikel Arteta, u shpreh i kënaqur me paraqitjen e skuadrës së tij pas fitores bindëse 4–1 ndaj Aston Villas, në kuadër të javës së 19-të të Ligës Premier.

“Një mbrëmje e mrekullueshme. Ishte një ndeshje shumë e vështirë, ashtu siç e prisnim. Aston Villa është një kundërshtar shumë i fortë”, deklaroi Arteta pas ndeshjes.

Spanjolli pranoi se fillimi i ndeshjes nuk ishte ideal për ekipin e tij. “Luajtëm paksa të pasigurt në 10 minutat e para dhe na u desh kohë të përshtateshim. Duhet t’u japim merita kundërshtarëve, sepse arritën ta thyenin dy herë presionin tonë dhe të nisnin sulme shumë të rrezikshme. Më pas, ne morëm kontrollin e lojës dhe filluam të krijonim raste”.

Arteta theksoi veçanërisht startin e pjesës së dytë, të cilin e cilësoi vendimtar.

“E nisëm pjesën e dytë në mënyrë brilante. Ishim më aktivë dhe shumë efektivë në gjithçka që bëmë. Duhej të tregonim durim dhe të zgjidhnim momentin e duhur për të vepruar, gjë që nuk është aspak e lehtë kundër kësaj skuadre. Kjo është meritë e madhe e lojtarëve”.

telegrafi.com

Ai u ndal edhe te realizimi i rasteve, duke e krahasuar këtë ndeshje me takimet e mëparshme. “Në javët e fundit kemi krijuar shumë raste, por sot ishte ndryshe. Cilësia në përfundimin e aksioneve ishte e nivelit të lartë dhe kjo e vendosi fatin e ndeshjes”.

Trajneri i Arsenalit vlerësoi maksimalisht edhe rikthimin e Gabriel Magalhães, i cili u kthye në fushë pas gjashtë javësh mungesë.

“Pamë sa i rëndësishëm është Gabrieli për ne. Ai u rikthye më herët se sa pritej dhe u përball me qetësi Ollie Watkins, një nga sulmuesit më të mirë dhe më të vështirë për t’u markuar në Ligën Premier. Mendoj se luajti shkëlqyeshëm".

Sa i përket faktit që trajneri i Aston Villas, Unai Emery, u drejtua menjëherë për në dhomat e zhveshjes pas fishkëllimës së fundit, Arteta nuk i dha shumë rëndësi.

“Nuk është problem. Ndonjëherë ndodhin situata të tilla, ndaj për mua nuk ka asnjë çështje”, përfundoi ai për Sky Sports. /Telegrafi/

Mikel Arteta ka konfirmuar se Arsenali do të jetë aktiv gjatë afatit kalimtar të janarit, me synimin për të forcuar skuadrën në një moment vendimtar të sezonit.

Trajneri i “Topçinjve” theksoi se klubi duhet të jetë i gatshëm për të vepruar, duke pasur parasysh problemet në rritje me dëmtimet dhe presionin e garës për titull.

“Në varësi të disponueshmërisë së disa lojtarëve, afati kalimtar është aty. Ne jemi Arsenali dhe duhet ta kemi gjithmonë nën vëzhgim”, ka thënë Arteta.

Me disa futbollistë kyç jashtë fushës, trajneri spanjoll nënvizoi se klubi nuk mund të përballojë surpriza të pakëndshme.

“Detyra jonë është të jemi shumë të përgatitur, sepse gjithmonë mund të ndodhë diçka”, shtoi ai, duke lënë të kuptohet se Arsenali do të reagojë menjëherë nëse shfaqet mundësia e duhur në treg.

Këto deklarata konfirmojnë qartë ambicien e klubit londinez për të ruajtur konkurrencën dhe për të përforcuar objektivat në pjesën e dytë të sezonit.

‘Topçinjtë’ renditen në krye të tabelës dhe me statistikë të fortë deri më tani, ku kanë shënuar 33 gola dhe kanë pësuar 11. /Telegrafi/

Mesfushori Granit Xhaka është rikthyer të flet për kohën kur ishte te Arsenali, më saktësisht për incidentin në vitin 2019.

Ai u fishkëllye nga tërë tifozët vendas e pastaj zhveshi edhe fanellën duke e gjuajtur në tokë, ku ishte pranë largimit por Mikel Arteta ia ndryshoi mendjen, me këtë të fundit që u bë ndër të preferuarit pak vite më vonë.

Xhaka në një intervistë të fundit konfirmoi se donte largimin, si dhe babai i tij, Ragipi – gjithashtu e këshilloi të përshëndetet me “Emirates”.

“Valixhet ishin gati. Babai im, që gjithnjë ka qenë kritikues gjatë karrierës dhe thoshte “Sapo të ikësh njëherë, do të ikësh gjithnjë”, por në këtë situatë më këshilloi: “Duhet të largohesh nga aty. Kur tifozët janë kundër teje është gjëja më e keqe në futboll. Nuk ke asnjë shans”.

“Pse qëndrove? Shkaku i trajnerit. E njihja Mikel Artetan vetëm nga emri, jo si person. Kur mori drejtimin në Krishtlindje, menjëherë kërkonte ta dëgjonte pjesën time të historisë. Pastaj i thashë: “Mikel me gjithë respektin për ty, nuk mund ta mbaj më këtë fanellë”.

“Ai erdhi ditën tjetër sërish dhe më tha “Granit më nevojitesh. Më jep gjashtë muaj që të të bindi se je personi i duhur. Nuk mund të të bëj më kapiten, por do ta ndërtojë skuadrën përreth teje. Nëse dështojë, atëherë do të jem i pari që të ndihmon të largohesh”.

“Kurrë nuk do ta harroj atë bisedë, ende më jep dridhje trupi kur e mendoj. Fjalët e tij ishin shumë të fuqishme. E shikova, e përqafova dhe thashë “Në rregull, do të qëndroj”. Ishte vendimi i vetëm që e mora pa familjen”.

I pyetur pastaj pse kaloi te Leverkuseni, Xhaka e pranoi se kishte të bënte me kontratën afatgjatë që ia kishte ofruar gjiganti gjerman.

“Bayer Leverkuseni më ofroi kontratë të gjatë, doja të rikthehesha në gjermani dhe u ndjeva se ishte koha perfekte për t’u larguar. Doja gjithashtu të bëja hapësirë për lojtarët e rinj te Arsenali. Me Declan Rice, klubi kishte gjetur pasuesin adekuat”./Telegrafi

Arsenali ka ndryshuar qëndrim sa i përket të ardhmes së sulmuesit Gabriel Jesus, duke mos qenë më i gatshëm ta lejojë largimin e tij në afatin kalimtar të janarit, pavarësisht se më herët kishte qenë i hapur për një shitje të mundshme.

Trajneri Mikel Arteta e konsideron rikthimin në formë të brazilianit dhe rolin e tij në skuadër si elemente kyçe për pjesën e mbetur të sezonit.

Sulmuesi 27-vjeçar ka rikonfirmuar rëndësinë e tij për ekipin, pavarësisht problemeve të shpeshta me lëndimet. Pas rikuperimit nga shqetësimet në muskujt e kofshës, Jesus ka nisur të aktivizohet rregullisht, duke sjellë intensitet në presion, lëvizje pa top dhe lojë lidhëse – elemente thelbësore në sistemin e Artetës.

“Gabriel është shumë në formë. Ne kemi rritur gradualisht minutat e tij”.

“Përderisa ishte në rregull fizikisht, të gjithë ishim të kënaqur ta linim në fushë. Kur filluam të shihnim shenja lodhjeje, e zëvendësuam, por jemi shumë të kënaqur me të”.

Në mesin e vitit 2025, Arsenali kishte konsideruar seriozisht një shitje të mundshme të Gabriel Jesus në janar, veçanërisht për shkak të interesimit nga klubet saudite. Megjithatë, paraqitjet e fundit kanë ndryshuar llogaritjet në ‘Emirates’, pasi braziliani nuk shihet më si lojtar i tepërt në skuadër.

Sezonin e kaluar, Gabriel Jesus regjistroi shtatë gola dhe dy asistime në 27 paraqitje për Arsenalin në të gjitha garat, duke treguar se edhe mes lëndimeve, ai mbetet një hallkë e rëndësishme në projektin e Artetës./Telegrafi

Trajneri i Arsenalit, Mikel Arteta, ka ndarë përditësime mbi rikuperimin e lojtarëve kryesorë Kai Havertz dhe Gabriel Magalhaes.

Trajneri spanjoll zbuloi se mesfushori sulmues gjerman është afër rikthimit, ndërsa mbrojtësi brazilian do të kërkojë më shumë kohë për t'u rikthyer

"Kthimi i Kai Havertz është vetëm çështje ditësh, ndoshta javësh. Do ta monitorojmë se si ndihet në fazën tjetër të rikuperimit. Ai është një lojtar që na mungon sepse e ngre ekipin lart. Është shumë afër të luajë përsëri dhe jam i kënaqur që kjo do të ndodhë së shpejti", ka thënë fillimisht Arteta.

“Duhet t'i japim më shumë kohë pasi ai nuk ka rifilluar ende stërvitjen. Shpresojmë që ai të shërohet shpejt duke pasur parasysh situatën tonë aktuale mbrojtëse", përfundoi trajneri i Arsenalit.

Përveç Havertz dhe Magalhaes, Christian Musquera, Max Dowman, Ben White, Gabriel Martinelli dhe Piero Hincapie janë gjithashtu jashtë fushave shkaku i lëndimeve.

Pas 17 xhirove, Arsenali kryeson tabelën në Ligën Premier, dy pikë më shumë se Manchester City. /Telegrafi/

Trajneri i Arsenalit, Mikel Arteta ka insistuar se skuadra e tij duhet të mësojë ta “vrasë” ndeshjen në momentet kur është në epërsi, pavarësisht se londinezët u rikthyen në krye të Liga Premier pas fitores minimale 1-0 në udhëtim ndaj Evertonit.

Golin e vetëm të takimit e realizoi Viktor Gyokeres nga pika e penalltisë, duke shënuar për herë të parë që nga 1 nëntori, ndërsa Arsenali u shkëput përkohësisht me dy pikë në krye të tabelës ndaj Manchester Cityt.

Megjithatë, ashtu si fundjavën e kaluar kur iu desh një autogol në minutat shtesë për ta mposhtur Wolverhamptonin e fundit në tabelë, edhe këtë herë Arteta u detyrua të vuante deri në minutën e 96-të në “Goodison Park” ndaj një Evertoni të përgjysmuar nga mungesat.

“Diferenca duhej të ishte më e madhe. Ne duhet të mësojmë ta mbyllim ndeshjen kur jemi duke fituar”.

Kjo është hera e tretë në katër vitet e fundit që Arsenali e përfundon Ditën e Krishtlindjes në krye të tabelës së Liga Premier. Megjithatë, në dy rastet e mëparshme, londinezët u kapën dhe u tejkaluan nga një Manchester City dominues.

Skuadra e Pep Guardiolës ka fituar shtatë ndeshje radhazi në të gjitha garat, duke e ngushtuar ndjeshëm diferencën, e cila më herët kishte shkuar deri në shtatë pikë.

Pavarësisht kësaj, Arteta vlerësoi vazhdimësinë dhe paraqitjet e skuadrës së tij, duke theksuar se Arsenali vazhdon të shtyjë fort drejt titullit të parë kampion pas 22 vitesh pritje.

“Kjo më jep besim dhe siguri, për shkak të paraqitjeve dhe vazhdimësisë së skuadrës”.

“Kjo është shumë e vështirë për t’u arritur në këtë ligë dhe fakti që ekipi është vazhdimisht aty tregon shumë për nivelin dhe mentalitetin tonë”, nënvizoi ai./Telegrafi

Legjenda e Arsenalit, Thierry Henry, i ka dërguar një mesazh të drejtpërdrejtë, të fortë por të drejtë trajnerit Mikel Arteta dhe lojtarëve të skuadrës, duke theksuar se rruga drejt titullit nuk pranon justifikime.

Në mes të debateve për mungesat në skuadër dhe kalendarin e ngjeshur të ndeshjeve, ish-sulmuesi francez ka nënvizuar se këto janë situata me të cilat përballet çdo ekip dhe se skuadrat kampione dallohen pikërisht nga mënyra se si reagojnë në momente të vështira.

Henry, pjesë e Arsenalit të famshëm të “Invincibles”, ka bërë të qartë se ankesat vetëm largojnë vëmendjen nga rezultati dhe zgjidhjet reale.

“Le të mos flasim për këto gjëra. Të gjithë kanë probleme. Çdo skuadër kalon nëpër lëndime, lodhje dhe vendime të gabuara. Fitues janë ata që gjejnë zgjidhje, jo ata që kërkojnë shpjegime”.

Sipas legjendës së klubit londinez, një skuadër që synon titullin e kampionit tregon forcën e saj të vërtetë pikërisht atëherë kur mungojnë lojtarët kryesorë.

Henry ka theksuar se Arteta duhet ta shfrytëzojë maksimalisht thellësinë e skuadrës, duke mbajtur ritmin me rivalët kryesorë si Manchester City dhe Chelsea, por mbi të gjitha duke ndërtuar një mentalitet fitues që nuk fokusohet te aspektet negative.

Arsenali aktualisht kryeson tabelën e Liga Premier me 36 pikë pas 16 ndeshjeve të zhvilluara, duke pasur një epërsi prej dy pikësh ndaj Manchester Cityt, çka e bën edhe më vendimtare menaxhimin e kësaj periudhe të sezonit./Telegrafi

Mikel Arteta ka shprehur hapur pakënaqësinë me paraqitjen e Arsenalit, pavarësisht fitores 2-1 ndaj Wolves, e cila u sigurua vetëm falë një autogoli në minutën e 94-të nga Yerson Mosquera.

“Topçinjtë” kaluan në epërsi fillimisht po ashtu nga një autogol, kur goditja nga këndi e Bukayo Sakas u përplas në shtyllë dhe më pas në shpinën e portierit Sam Johnstone, duke përfunduar në rrjetë. Megjithatë, Wolves barazoi në minutën e 90-të, kur Tolu Arokodare realizoi me kokë ndaj David Raya-s, duke krijuar përshtypjen se mysafirët kishin rrëmbyer një pikë në “Emirates”.

Gëzimi i Wolves zgjati pak, pasi një tjetër krosim i Sakas shkaktoi autogolin e dytë të ndeshjes, këtë herë nga Mosquera, duke i dhënë Arsenalit tri pikë në frymën e fundit.

Pas ndeshjes, në intervistat për “TNT Sports” dhe “BBC Match of the Day”, Arteta pranoi se performanca ishte zhgënjyese dhe theksoi se skuadra duhet të përmirësohet menjëherë.

“E dinim që do të ishte një ndeshje e vështirë”.

“Patëm shumë situata në pjesën e parë që ishin raste të mëdha. Pastaj, në pjesën e dytë, nuk krijuam shumë raste të pastra”.

“Më pas kishim periudha ku për tre minuta rresht u tërhoqëm shumë mbrapa, ishim tepër pasivë. Kishte zakone shumë të dobëta mbrojtëse, të cilat nuk janë të pranueshme për nivelin tonë. Duhet ta përmirësojmë këtë dhe, në fund, mbështetesh në një veprim individual për të shënuar golin dhe për ta fituar ndeshjen”.

“Krijuam shumë situata pa zgjedhur lojtarin e duhur me pasimin final. Pavarësisht se si shkon loja, gjithmonë mund të gjesh një zgjidhje për ta fituar atë”.

“Tani do të kemi një javë të pastër. Pastaj vazhdojmë sërish për periudhën e Krishtlindjeve, e dimë çfarë na pret. Por kaq, e fiton ndeshjen dhe ecën përpara”.

Arsenali aktualisht është lider në Ligën Premier, pesë pikë mbi Man Cityn./Telegrafi

Trajneri i Arsenalit, Mikel Arteta, ka pranuar hapur se është i shqetësuar për numrin në rritje të lëndimeve brenda skuadrës së tij, duke theksuar se problemi mund të zgjerohet pavarësisht masave që merr në stërvitje.

Ai nënvizoi se situata ka arritur në një pikë ku çdo lëvizje është bërë e rrezikshme dhe se ekipi po futet në një cikël të vështirë dhe të rrezikshëm fizik.

“Jo, sepse nuk kemi kohë të stërvitemi”, tha Arteta kur u pyet nëse ngarkesa e tepërt në stërvitje ka ndikuar në lëndimet.

“Sot (të martën) stërviten vetëm 20 minuta, kështu që me siguri nuk është për shkak se i kemi stërvitur tepër lojtarët”.

Sipas tij, problemi nuk qëndron te metodat e stërvitjes, por te fakti që mungesat e shumta e detyrojnë trajnerin të ngarkojë futbollistët e mbetur shumë më tepër se zakonisht.

“Kur të mungojnë lojtarë, ti rrit ngarkesën te ata që janë në dispozicion, dhe kjo ka pasoja. Është një rreth shumë i rrezikshëm”, shtoi ai.

Arteta bëri edhe një ndarje të qartë të lëndimeve që kanë goditur skuadrën, duke sqaruar se disa prej tyre janë dëmtime afatgjata, ndërsa të tjerat janë dëmtime akute që ndodhin papritur.

“Duhet të ndajmë llojet e lëndimeve. Disa kanë qenë afatgjata, disa të menjëhershme. Është diçka që e analizojmë vazhdimisht”, theksoi trajneri spanjoll.

“Kemi luajtur shumë ndeshje me shumë mungesa dhe kjo i vë nën stres maksimal lojtarët që mbeten në fushë. Pastaj, natyrshëm, marrim edhe më shumë lëndime.”

Në këtë atmosferë presioni fizik dhe sportiv, Arsenalit i është shtuar edhe një lajm negativ: Max Doëman është bërë futbollisti më i fundit që ka pësuar një dëmtim serioz./Telegrafi/

Trajneri Mikel Arteta ka pranuar se vala e fundit e lëndimeve e ka detyruar Arsenalin të mbyllë derën për çdo largim gjatë janarit, pasi skuadra tashmë po funksionon në limit me lojtarët e gatshëm.

Ai shpjegoi se situata është e vështirë dhe se klubi nuk mund të rrezikojë të humbasë asnjë futbollist në këtë fazë të sezonit.

“Në këtë moment, kemi pasur situatën e lojtarëve që kanë qenë jashtë skuadrës për tre ose katër javë rresht. Kështu që e dimë që skuadrën që kemi, po e plotësojmë me lojtarët që janë të gatshëm. Për momentin, është shumë e qartë që nuk ka opsion që të bëjmë një gjë të tillë (të shesim një lojtar)”.

Nga ana tjetër, klubi anglez mbetet i hapur për përforcime të reja, por vetëm nëse paraqitet një mundësi reale që e përmirëson ose e mbron skuadrën në këto rrethana.

Mikel Arteta

“Në momentin që kemi një opsion për të prekur skuadrën, për ta përmirësuar ose për ta mbrojtur, në varësi të asaj që ndodh, mendoj se duhet të jemi të hapur për këtë”.

Tekniku spanjoll shtoi se periudha deri në mbylljen e merkatos është e paparashikueshme dhe se Arsenal duhet të jetë i gatshëm t’i përgjigjet çdo zhvillimi, duke pasur parasysh rrezikun që sjellin lëndimet e shumta.

“Nga ajo që mund të ndodhë nga tani deri në mbylljen e afatit, është futboll. Ne sigurisht do të jemi të vëmendshëm dhe e dimë se ku qëndron rreziku për skuadrën, që të jemi gati nëse duhet të bëjmë diçka”.

Ndërkohë, Arsenali në vikend do të jetë mysafir i Aston Villas./Telegrafi/

Mikel Arteta ka thënë se Arsenali është "në gatishmëri" për të hyrë në tregun e transferimeve të janarit, pasi problemet e vazhdueshme të lëndimeve po e varfërojnë skuadrën e tij.

“Topçinjtë” udhëtojnë drejt Aston Villas të shtunën, duke u shqetësuar për gjendjen fizike të Declan Rice dhe Cristhian Mosquera, pasi ata u bënë lojtarët e fundit që pësuan një dëmtim këtë sezon.

Arsenali ka qenë pa Kai Havertz, Gabriel Jesus, Viktor Gyokeres, Martin Odegaard, Gabriel Magalhaes dhe Noni Madueke, ndër të tjerë, për periudha të gjata këtë sezon, por mbetet pesë pikë përpara në krye të Ligës Premier.

Klubi londinez shpenzoi më shumë se 250 milionë funte për tetë lojtarë të rinj në verë, por Arteta la të kuptohej se mund të ketë më shumë për të ardhur nëse krijohet situata e duhur.

“Ne gjithmonë duhet të jemi të përgatitur. Në momentin që kemi një mundësi për të prekur skuadrën, për ta përmirësuar skuadrën ose për ta mbrojtur skuadrën, varësisht nga ajo që ndodh, mendoj se duhet të jemi të hapur për këtë", ka thënë fillimisht Arteta.

“Nga ajo që do të ndodhë nga këtu deri në mbylljen e afatit kalimtar, është futboll. Pra, nuk e dimë, por sigurisht që do të jemi në gatishmëri dhe e dimë se ku mund të vijë rreziku në aspektin e skuadrës dhe do të jemi gati në rast se duhet të bëjmë diçka”, përfundoi trajneri i Arsenalit.

Si Rice ashtu edhe Mosquera u detyruan të largoheshin gjatë fitores 2-0 të së mërkurës ndaj Brentford dhe Arteta këmbënguli se nuk ishte në gjendje të konfirmonte nëse ndonjëri prej lojtarëve do të ishte i aftë të luante në Villa Park deri pas seancës stërvitore të së premtes. /Telegrafi/

Trajneri i Arsenalit, Mikel Arteta, ka zbuluar afatet e reja të lëndimeve për lojtarët kryesorë si William Saliba, Leandro Trossard, Kai Havertz dhe Gabriel Jesus përpara ndeshjeve të ardhshme.

Arteta konfirmoi se Saliba dhe Trossard pritet të kthehen "brenda pak ditësh", megjithëse disponueshmëria e tyre për ndeshjen ndaj Brentford mbetet e pasigurt për shkak të dëmtimeve të vogla.

Kai Havertz dhe Gabriel Jesus janë ende jashtë fushave për shkak të periudhave më të gjata të rikuperimit, secili i përshkruar si "çështje javësh" para se të mund të rikthehen në aksion.

Lëndimi i Gabrielit rrjedh nga një këputje e ligamentit të kryqëzuar anterior, të cilën e pësoi në janar në një ndeshje kupe kundër Manchester United.

Havertz vazhdon rikuperimin nga një dëmtim në gju me optimizëm të kujdesshëm për një rikthim në dhjetor.

Dëmtimet e Salibas dhe Trossard janë muskulore, por nuk konsiderohen serioze, me skanime të mëtejshme të planifikuara për të sqaruar statusin e tyre. /Telegrafi/

Arsenali pritet të ndëshkohet me një gjobë prej 25,000 eurosh nga Federata Angleze e Futbollit pas ndeshjes së barazuar 1-1 ndaj Chelseat në “Stamford Bridge”.

Gjatë sfidës së së dielës mbrëma, gjashtë futbollistë të Arsenalit u ndëshkuan me karton të verdhë: Martin Zubimendi, Cristhian Mosquera, Riccardo Calafiori, Piero Hincapie, Myles Lewis-Skelly dhe Viktor Gyokeres.

Sipas rregullores së FA-së, çdo ekip që grumbullon gjashtë ose më shumë kartonë të verdhë brenda një ndeshjeje gjobitet automatikisht.

Shuma prej 25,000 eurosh aplikohet si ndëshkim standard për herën e parë gjatë sezonit.

Në rast se Arsenali shkel sërish këtë limit, gjoba do të dyfishohet në 50,000 euro, ndërsa për çdo rast pasues parashikohet një ndëshkim shtesë prej 25,000 eurosh.

Pavarësisht numrit të kartonëve, skuadra e Mikel Artetës vlerësohet se ishte më e disiplinuar në fushë, duke qenë se Chelsea luajti me një lojtar më pak për gati një orë pas ndërhyrjes së ashpër të Moises Caicedos ndaj Mikel Merinos. /Telegrafi/

Trajneri i Arsenalit, Mikel Arteta, ka komentuar barazimin 1–1 të ekipit të tij ndaj Chelseat në xhiron e 13-të të Ligës Premier, duke vlerësuar sfidën si shumë të fortë dhe emocionuese.

“Ndeshja ishte shumë konkurruese. Të dyja ekipet demonstruan intensitet dhe agresivitet, dhe në çdo sfidë ishte e dukshme se sa shumë ishte në lojë", tha Arteta.

Trajneri spanjoll theksoi se ekipi i tij hasi vështirësi pas pjesës së parë të ndeshjes, veçanërisht për shkak të katër lojtarëve me kartonë të verdhë dhe disa gabimeve në fillim të pjesës së dytë, që sollën pësimin e golit.

Arma sekrete e Arsenalit? Mikel Arteta i emocionuar nga rikthimi nga lëndimi i yllit të skuadrës telegrafi.com

“Duke pasur katër lojtarë me kartonë të verdhë, ishte e qartë se kundërshtari kërkonte ta shfrytëzonte këtë. Ne ishim të çorganizuar në fillim të pjesës së dytë dhe pësuam gola, duke bërë të nevojshme menaxhimin e emocioneve. Më pas, u riorganizuam, shënuam një gol të shkëlqyer dhe krijuam mundësi shtesë për shënim”, shtoi ai.

Arteta vuri në dukje gjithashtu sfidat fizike dhe emocionale të javës, përfshirë humbjen e dy lojtarëve kyç dhe kohën e reduktuar të rikuperimit. Ai e përshkroi Stamford Bridge si një provë të vështirë, duke kujtuar se Chelsea kishte mposhtur së fundmi Barcelonën.

“Ne parashikuam vështirësi në disa aspekte të ndeshjes, por pritja ime ishte të fitonim. Të pësonim një gol në fillim të pjesës së dytë ishte sfiduese emocionalisht”, përfundoi trajneri i Arsenalit. /Telegrafi/

Trajneri Mikel Arteta ka theksuar se ndjehet jashtëzakonisht krenar me mënyrën se si futbollistët e Arsenalit e kanë përballuar një javë të jashtëzakonshme në aspektin fizik dhe emocional, pavarësisht barazimit 1:1 ndaj Chelseat në derbin e Londrës – një rezultat që natyrisht la shije zhgënjimi tek “Topçinjtë”.

Duke folur për BBC-në pas ndeshjes, trajneri spanjoll nënvizoi intensitetin ekstrem të duelit, duke kujtuar se “që nga fillimi mund të ndjeje sa shumë ishte në lojë, çdo duel dhe çdo veprim ishte me ritëm maksimal, me sekuenca shumë të shkurtra loje”.

“Me 10 lojtarë ne e prisnim një ndeshje krejtësisht tjetër, e planifikuam dhe e punuam gjatë pjesës së dytë. Ata morën një goditje dënimi dhe shënuan, dhe pastaj loja u bë shumë e vështirë. Kur nuk fiton me 10 lojtarë për 45 minuta, normalisht duhet të jesh i zhgënjyer. Por duhet ta kuptoni çfarë jave kemi pasur dhe kundër kujt kemi luajtur”.

Arteta theksoi se pavarësisht gjithçkaje mbetet i impresionuar me karakterin e skuadrës.

“Ata bënë gjithçka që munden. Kurrë nuk kanë luajtur së bashku, ndaj duhet të ndërtojmë atë harmoni. Shumë gjëra ndodhën para ndeshjes. Shpirti i ekipit është i paprekur. Kemi kaluar një javë masive si mendërisht ashtu edhe fizikisht, dhe përgjithësisht mendoj se ka qenë javë pozitive.”

“Nuk di cilat janë fjalët e duhura, sepse normalisht jam i zhgënjyer që nuk morëm tre pikët ndaj një ekipi me 10 lojtarë. Por duke parë gjithë çfarë ka ndodhur gjatë javës, mendoj se më duhet të jem shumë krenar për atë që skuadra arriti”, nënvizoi tekniku spanjoll.

Arsenali mbetet lider në tabelë, tre pikë mbi Chelsean./Telegrafi

Pas fitores 3-1 të Arsenalit ndaj Bayern Munich, Joshua Kimmich bëri bujë me deklaratën se kjo ndeshje “nuk ishte vërtet për futboll” dhe se PSG ishte skuadra më e vështirë me të cilën kampionët gjermanë janë përballur këtë sezon.

Në një konferencë për shtyp, Mikel Arteta u pyet për këtë koment dhe nëse e kishte prekur në ndonjë mënyrë.

“Jo, por mendoj se mënyra se si të dyja skuadrat luajnë, mendoj se ndeshja që ata luajtën kundër PSG-së ishte shumë e ngjashme dhe mënyra si përdorin mbrojtësit e krahut”.

“Mënyra se si ne bëjmë atë që bëjmë, në aspektin e rotacioneve, krijon një lojë ku ka shumë pak sekuenca pasimesh, ndaj e di çfarë po thotë, kështu që është në rregull”.

“Është pjesë e lojës. Mendoj se loja provokohet nga mënyra si të dyja skuadrat luajnë, ndaj është plotësisht e kuptueshme”, ka deklaruar Arteta.

Arsenali po përgatitet për një ndeshje tejet të vështirë këtë vikend, ku do të luajnë në udhëtim ndaj Chelseat në derbin e madh londinez.

Bayerni në anën tjetër do të jetë nikoqir i St.Paulit, me bavarezët që synojnë ta lënë pas krahëve disfatën e pësuar në Ligën e Kampionëve./Telegrafi/

Sulmuesi i Arsenalit, Gabriel Jesus, mund të luajë në një miqësore me dyer të mbyllura teksa rrit ritmin e rikuperimit nga një dëmtim afatgjatë në gju.

Jesus pësoi një këputje të ligamentit tnë ndeshjen e FA Cup kundër Manchester United në janar dhe iu nënshtrua operacionit.

Sulmuesi i Brazilit nuk ka luajtur që atëherë, por tani është rikthyer në stërvitje të plotë dhe Mikel Arteta ka shpjeguar se si Arsenali do të kërkojë t’i rrisë gradualisht ngarkesën.

Këto plane mund të përfshijnë organizimin e një miqësoreje në kompleksin stërvitor të klubit në London Colney në javët e ardhshme.

Gabriel Jesus

“Ai po bën shumë mirë. Po i kryen të gjitha me ekipin për momentin, për gati dy javët e fundit”.

“Do t’i japim pak ekspozim të brendshëm me disa ndeshje, që të marrë ritmin fizik. Por ai duket shumë mirë në stërvitje dhe do të jetë një shtesë e madhe për ekipin”, ka thënë Arteta.

Jesus do të duhet të luftojë për minuta të rregullta sapo të kthehet, pasi Arsenali transferoi sulmuesin Viktor Gyokeres gjatë verës./Telegrafi/

Mikel Arteta ka shpjeguar pse suksesi i tij te Arsenali i detyrohet “heroit” të tij, Pep Guardiolës, ndërsa ka treguar edhe për takimin e tyre të parë me menaxherin legjendar spanjoll në moshën 15-vjeçare.

Pas tërheqjes nga futbolli profesionist në vitin 2017, Arteta punoi si trajner ndihmës nën drejtimin e Guardiolës te Manchester City, përpara se të merrte projektin e tij të parë si trajner i parë te Arsenali në dhjetor 2019.

Lidhja mes Artetës dhe Guardiolës daton që nga viti 1997, kur trajneri aktual i Arsenalit iu bashkua akademisë së famshme La Masia të Barcelonës nga Antiguoko.

Ai kaloi dy vite në sistemin e të rinjve të Barcelonës përpara se të përfaqësonte Barcelonën B për tre vite, nga 1999 deri në 2002.

Guardiola ishte një lojtar kyç në ekipin e parë gjatë kohës së Artetës në akademi.

Mikel Arteta dhe Pep Guardiola

“Dikush që e takova kur isha 15 vjeç. Ai ishte heroi im si lojtar. Përfunduam duke punuar së bashku dhe duke kaluar njërën nga periudhat më të mira të jetës sime. Dhe sërish, nëse jam ulur në karrigen ku jam sot, është falë tij”.

I pyetur pse zgjodhi t’i bashkohej Guardiolës te City, Arteta shtoi: “Ndoshta sepse sa të lidhur ishim në aspektin e filozofisë dhe mënyrës se si u edukuan në Barcelonë”.

“Pastaj, sepse mendoj se ishte gjëja e duhur për mua të largohesha nga klubi, të mësoja nga njerëz të tjerë, të kisha përvoja të ndryshme”.

“Dhe ai më dha mundësinë, pa trajnuar askënd më parë, të shkoja direkt në stafin e tij teknik. Një nga vendimet më të mira që kam marrë në jetën time”, ka deklaruar Arteta./Telegrafi/

Para përballjes me Granit Xhakën, trajneri i Arsenalit, Mikel Arteta, e ka vlerësuar lartë lojtarin e Sanderlendit, i cili rikthehet të përballet me ish skuadrën e tij.

“E adhuroj çdo minutë që kaluam së bashku. Kur u bashkova me skuadrën, do të thoja se Graniti ishte në një moment të vështirë në jetën dhe karrierën e tij. Aq sa të gjithë ne, u përpoqëm ta udhëzonim, t’i jepnim një perspektivë të ndryshme dhe ta bënim të ndihej i dashur dhe i vlerësuar. Mund të them pa frikë se ai u përgjigj në një mënyrë të jashtëzakonshme”, tha spanjolli.

Ai guxoi edhe të pranonte dicka në lidhje me raportin që kishte me shqiptarin e Zvicrës: “Xhaka më bëri edhe mua një trajner më të mirë, na ndihmoi të zhvilloheshim dhe të përmirësoheshim shumë si ekip futbolli dhe si klub. Prandaj do t’i jem përjetësisht mirënjohës, sepse kam kujtime të shkëlqyera me të”, deklaroi Arteta.

The post Trajneri i Arsenalit Mikel Arteta: Granit Xhaka më bëri një trajner më të mirë, do t’i jem përjetësisht mirënjohës appeared first on Albeu.com.