Gemini 3 Flash, një model i avancuar i inteligjencës artificiale, është i njohur për shpejtësinë dhe aftësitë e tij të larta.

Megjithatë, sipas një vlerësimi të një grupi të pavarur testues, nëse i bëhet një pyetje për diçka që ai nuk e di – për shembull, diçka komplekse, të pazakontë ose jashtë njohurive të tij – modeli pothuajse gjithmonë përpiqet të japë një përgjigje, shpesh duke shpikur ose trilluar informacionin.

Në testet e “shkallës së halucinimeve” (hallucination rate) në benchmark‑in AA‑Omniscience, Gemini 3 Flash regjistroi një normë prej 91 për qind. Kjo do të thotë se, edhe kur nuk kishte një përgjigje të saktë, modeli dha një përgjigje, shpesh krejtësisht të trilluar.

Ky fenomen i “shpikjes së përgjigjeve” është një problem i njohur te modelet e gjenerimit të tekstit. Sipas testit, Gemini nuk e menaxhon mirë situatën kur përgjigjja e saktë do të ishte “nuk e di”.

Megjithatë, kjo shifër nuk nënkupton se 91 për qind e përgjigjeve të tij janë të gabuara; ajo tregon vetëm se sa shpesh modeli shpik diçka kur nuk ka një përgjigje reale.

Pavarësisht këtij problemi, Gemini 3 Flash mbetet shumë i fuqishëm dhe performon mirë në testet e përgjithshme, megjithëse vetëbesimi i tepërt në situata të pasigurta mund të përbëjë sfidë në përdorime serioze.

Sinjali – aty ku e vërteta flet para lajmit!

/GazetaSinjali/

The post Gemini 3 Flash tregon aftësi të larta, por shpik informacion kur s’e di përgjigjen appeared first on Sinjali.

Presidentja e Kosovës, Vjosa Osmani, ka uruar besimtarët e krishterë me rastin e Krishtlindjes, duke u dërguar mesazhin e paqes, dashurisë dhe shëndetit në familje.

Në mesazhin e saj, Osmani thekson rëndësinë e bashkimit përmes traditës së respektit dhe solidaritetit.

“Në këtë festë drite e shprese, uroj nga zemra të gjithë besimtarët e krishterë që Krishtlindja t’u sjellë paqe në shpirt, dashuri në familje dhe shëndet në çdo shtëpi. Le të na bashkojë tradita jonë e respektit, solidaritetit dhe e mikpritjes, duke na dhënë forcë të ecim përpara së bashku, me besim, shpresë dhe mirëkuptim. Gëzuar për shumë mot Krishtlindjen!”, shkruan Osmani.

Sinjali – aty ku e vërteta flet para lajmit!

/GazetaSinjali/

The post Osmani uron besimtarët e krishterë për Krishtlindje: Le të na bashkojë tradita jonë e respektit, solidaritetit dhe e mikpritjes appeared first on Sinjali.

Presidenti i Francës, Emmanuel Macron, ka reaguar ashpër ndaj vendimit të Shteteve të Bashkuara për vendosjen e ndalimit të vizave ndaj ish-komisionerit evropian Thierry Breton dhe katër figurave të tjera të angazhuara në luftën kundër dezinformimit.

Përmes një postimi në platformën X, Macron e ka cilësuar këtë veprim si presion politik ndaj Bashkimit Evropian, duke theksuar se masa e ndërmarrë nga SHBA-ja përbën një kërcënim për sovranitetin digjital evropian.

“Franca dënon masat e kufizimit të vizave të marra nga Shtetet e Bashkuara ndaj Thierry Breton dhe katër figurave të tjera evropiane. Këto masa përbëjnë intimidim dhe shtrëngim, me synim minimin e sovranitetit digjital evropian,” ka shkruar Macron.

Ai ka shtuar se Franca, në bashkëpunim me Komisionin Evropian dhe partnerët evropianë, do të vazhdojë të mbrojë autonominë rregullatore të Bashkimit Evropian në fushën digjitale.

“Bashkë me Komisionin Evropian dhe partnerët tanë evropianë, do të vijojmë të mbrojmë sovranitetin tonë digjital dhe autonominë rregullatore,” ka theksuar presidenti francez.

Sinjali – aty ku e vërteta flet para lajmit!

/GazetaSinjali/

The post Macron dënon kufizimet e vizave të SHBA-së për pesë evropianët appeared first on Sinjali.

Qytetari Anton Cena ka njoftuar se sot në Qendrën Klinike Universitare të Kosovës (QKUK) ka përfunduar me sukses operimin për largimin e perdes (kataraktit) edhe në syrin e dytë.

Përmes një postimi në Facebook, Cena ka bërë të ditur se me këtë ndërhyrje është lehtësuar një brengë e madhe që e kishte prej një kohe të gjatë, duke shprehur mirënjohje për stafin mjekësor që u përkujdes për shëndetin e tij.

“Sot, në QKUK, me sukses u krye operimi për largimin e perdes (kataraktit) edhe në syrin e dytë. Me këtë ndërhyrje, u çlirua një brengë e madhe që e kisha në zemër prej një kohe shumë të gjatë”, ka shkruar ai.

Ai ka falënderuar në veçanti doktorin Florim Zejnullahu, të cilin e cilëson si më të fortin në Kosovë, si dhe mikun e tij Roni Daci, doktorin Afrim Vuciterrna, doktorin Krenar Berisha dhe gjithë stafin mjekësor për profesionalizmin dhe përkushtimin e treguar.

“Me mirënjohje të thellë falënderoj doktorin Florim Zejnullahu, si me i forti ne Kosovë, mikun tim të dashur Roni Daci, doktorin Afrim Vuciterrna, doktorin Krenar Berisha dhe gjithë stafin mjekësor të jashtëzakonshëm, të cilët me profesionalizëm, përkushtim dhe humanizëm ma kthyen qetësinë dhe shpresën. Faleminderit nga zemra – jeni vërtet për çdo lavdatë”, ka përfunduar Cena.

Sinjali – aty ku e vërteta flet para lajmit!

/GazetaSinjali/

The post Operim i suksesshëm në QKUK, qytetari falënderon mjekët: Ma kthyen qetësinë e shpresën appeared first on Sinjali.

Ministri izraelit i Mbrojtjes, Israel Katz, është tërhequr nga një deklaratë e bërë të martën, në të cilën sugjeronte krijimin e vendbanimeve izraelite në Rripin e Gazës, pas kritikave të ashpra se kjo bie ndesh me planin e paqes të udhëhequr nga Shtetet e Bashkuara për këtë enklavë palestineze.

Gjatë një fjalimi në një vendbanim izraelit në Bregun Perëndimor, Katz kishte deklaruar se “me ndihmën e Zotit”, Izraeli do të krijojë grupe pionierësh në Gazën veriore, “në vend të vendbanimeve që u evakuuan”.

“Ne do ta bëjmë këtë në mënyrën e duhur, në kohën e duhur”, kishte shtuar ai.

Deklarata u shpërnda me shpejtësi në rrjetet sociale dhe u kritikua gjerësisht, transmeton Telegerafi.

Vetëm disa orë më vonë, zyra e ministrit Katz doli me një sqarim, duke thënë se komenti ishte bërë në një “kontekst sigurie” dhe duke ritheksuar se Izraeli “nuk ka ndërmend të krijojë vendbanime në Rripin e Gazës”.

Qëndrimi i Katz bie ndesh me planin 20-pikësh të armëpushimit të propozuar nga presidenti i SHBA-së, Donald Trump, si dhe me deklaratat e mëhershme të kryeministrit izraelit Benjamin Netanyahu, i cili ka përjashtuar vazhdimisht pushtimin e Gazës.

Plani i armëpushimit, i ndërmjetësuar nga SHBA-ja, parasheh një tërheqje pothuajse të plotë të forcave izraelite nga Gaza dhe nuk përmend krijimin e vendbanimeve izraelite në këtë territor.

Një zyrtar amerikan, që foli në kushte anonimiteti, e dënoi deklaratën e Katz, duke thënë: “Sa më shumë provokon Izraeli, aq më pak vendet arabe do të duan të punojnë me ta”.

Sipas tij, Uashingtoni pret që “të gjitha palët t’i përmbahen angazhimeve që kanë bërë” në kuadër të planit të armëpushimit.

Katz po i referohej njësive ushtarake Nahal, të cilat në të kaluarën u mundësonin të rinjve të kombinonin aktivitetet pioniere me shërbimin ushtarak. Shumë nga postet e krijuara nga kjo njësi më pas evoluuan në vendbanime të plota.

Izraeli i evakuoi të gjitha vendbanimet e tij në Gaza dhe tërhoqi trupat sipas planit të Çlirimit të vitit 2005.

Megjithatë, disa zyrtarë nga koalicioni i ekstremit të djathtë i kryeministrit Netanyahu kanë bërë thirrje më herët për rindërtimin e vendbanimeve në Gaza, pas sulmit të udhëhequr nga Hamasi më 7 tetor 2023 në jug të Izraelit dhe luftës së mëvonshme Izrael–Hamas.

Ndërkohë, gjatë natës së së martës, kolonë izraelitë sulmuan një shtëpi palestineze në Bregun Perëndimor të pushtuar, sipas një zyrtari palestinez.

Kolonët thyen një derë dhe një dritare dhe hodhën gaz lotsjellës brenda një shtëpie në qytetin As Samu’.

Si pasojë, tre fëmijë palestinezë u dërguan me urgjencë në spital. Sulmuesit mbytën gjithashtu tre dele dhe plagosën katër të tjera në stallë, sipas autoriteteve palestineze.

Komisioni i Rezistencës ndaj Murit dhe Vendbanimeve, një organ qeveritar palestinez që dokumenton sulmet, publikoi pamje nga kamerat e sigurisë ku shihen pesë kolonë të maskuar, të veshur me rroba të errëta, disa prej tyre të pajisur me shkopinj gome.

Policia izraelite njoftoi se është duke e hetuar rastin dhe se ka arrestuar pesë kolonë, të dyshuar për hyrje të paautorizuar në tokë palestineze, dëmtim të pronës dhe përdorim të sprejit me piper, e jo gaz lotsjellës.

Sinjali – aty ku e vërteta flet para lajmit!

/GazetaSinjali/

The post Pas kritikave, ministri i Mbrojtjes i Izraelit heq dorë nga premtimi për të ndërtuar vendbanime në Gaza appeared first on Sinjali.

Raporti më i ri i Misionit të OSBE-së në Kosovë vlerëson se bashkëpunimi ndër-komunal (BNK), ndonëse mbështetet nga një kornizë ligjore e harmonizuar me standardet e Bashkimit Evropian, Këshillit të Evropës dhe OECD-së, vazhdon të mbetet i kufizuar dhe i pashfrytëzuar mjaftueshëm në praktikë.

Bashkëpunimi ndër-komunal nënkupton marrëveshje formale ose joformale ndërmjet dy ose më shumë komunave për arritjen e qëllimeve të përbashkëta. Kur zbatohet në mënyrë efektive, ai mund të ndikojë pozitivisht në përmirësimin e ofrimit të shërbimeve publike, tërheqjen e fondeve dhe forcimin e lidhjeve ndërmjet komuniteteve.

“Pavarësisht këtyre përfitimeve, bashkëpunimi ndër-komunal është shpesh joformal, i pastrukturuar ose nuk ndodh fare. Si rezultat, humbasin mundësitë për shërbime më të fuqishme, shpenzime publike më efikase dhe bashkëpunim më të avancuar mes komunave,” ka thënë ambasadori Gerard McGurk, Shef i Misionit të OSBE-së në Kosovë.

Raporti përfshin edhe një sërë rekomandimesh për autoritetet përgjegjëse, përfshirë thjeshtimin dhe modernizimin e kornizës ligjore për të lehtësuar krijimin e marrëveshjeve ndër-komunale, krijimin e stimujve politikë dhe një fondi të posaçëm për BNK, si dhe forcimin e mbështetjes institucionale dhe kapaciteteve të Ministrisë së Administrimit të Pushtetit Lokal.

Po ashtu, OSBE-ja rekomandon promovimin e bashkëpunimit ndër-komunal si një mjet për përfshirje gjithëpërfshirëse në ofrimin e shërbimeve sociale dhe zhvillimin e iniciativave komunitare.

Në përfundim, raporti thekson se përmes reformave dhe investimeve të qëndrueshme, bashkëpunimi ndër-komunal mund të shndërrohet nga një praktikë margjinale në një instrument kyç për përmirësimin e performancës komunale dhe forcimin e qeverisjes lokale në Kosovë.

Sinjali – aty ku e vërteta flet para lajmit!

/GazetaSinjali/

The post OSBE: Bashkëpunimi ndër-komunal në Kosovë mbetet i pazbatuar si duhet appeared first on Sinjali.

Komandanti i Forcës së Sigurisë së Kosovës, gjenerallejtënant Bashkim Jashari, ka pritur në takim Shefin e Shtabit të Forcave të Armatosura të Republikës së Shqipërisë, gjenerallejtënant Arben Kingji.

Gjatë takimit, gjeneral Jashari e falënderoi gjeneral Kingjin për lidershipin e tij në udhëheqjen e FARSH-it, si dhe për mbështetjen dhe përkrahjen vëllazërore që Forcat e Armatosura të Shqipërisë i kanë dhënë FSK-së ndër vite. Po ashtu, u diskutuan zhvillimet aktuale në fushën e sigurisë, si dhe roli i FSK-së në garantimin e sigurisë së Kosovës, duke u vlerësuar si një kontribuues i rëndësishëm në ruajtjen e stabilitetit rajonal.

Të dy gjeneralët vlerësuan lart progresin e arritur nga FSK-ja në procesin e zhvillimit dhe modernizimit, si dhe performancën e trupave gjatë aktiviteteve shumëkombëshe, veçanërisht në aspektin e ndërveprueshmërisë. Në këtë kuadër, u theksua rëndësia e mbështetjes së vazhdueshme të FARSH-it për zhvillimin e mëtejmë të FSK-së, sidomos në fushat e arsimimit, stërvitjes dhe shkëmbimit të përvojave, me qëllim avancimin e bashkëpunimit dypalësh.

Në përmbyllje të takimit, gjeneralët ritheksuan se thellimi i bashkëpunimit ndërmjet Forcave të Armatosura të Republikës së Shqipërisë dhe Forcës së Sigurisë së Kosovës mbetet një prioritet strategjik kombëtar, duke vlerësuar forcimin e kapaciteteve mbrojtëse si thelbësor për garantimin e sigurisë dhe stabilitetit rajonal.

Sinjali – aty ku e vërteta flet para lajmit!

/GazetaSinjali/

The post Bashkëpunimi Kosovë-Shqipëri, komandanti i FSK-së pret në takim Shefin e Shtabit të FARSH-it appeared first on Sinjali.

Policia e Kosovës, përmes një komunikate, ka uruar qytetarët për festat e fundvitit dhe ka bërë thirrje për kujdes, në mënyrë që festimet të zhvillohen pa incidente.

Në një videomesazh, zëdhënësi i Policisë, Baki Kelani, ka thënë se Policia ka hartuar planet policore, porse kontribut të madh dhe të pamohueshëm në siguri dhe parandalim të incidenteve mund të japin qytetarët. 

“Tani jemi në prag të festave të fundvitit. Në emër të Policisë së Kosovës, ju urojmë festat me shpresën që ju dhe familjet tuaja të gëzoni shëndet dhe mbarësi në jetë. Ashtu si çdo vit, edhe këtë vit priten organizime të ndryshme, si në ambiente familjare, hapësira të jashtme, po ashtu edhe në sheshe dhe lokacione të mbyllura. Për t’i kaluar festat sa më qetë dhe pa incidente, Policia e Kosovës ka planifikuar me kohë planet policore, duke përfshirë masat e nevojshme dhe shtimin e prezencës policore. Megjithatë, një kontribut i madh dhe i pamohueshëm në ruajtjen e sigurisë mund të jepet edhe nga ju, qytetarë të dashur, duke festuar në mënyrë të qetë dhe të sigurt, pa përdorim të mjeteve të rrezikshme, dhe sidomos duke parandaluar përdorimin e tyre nga fëmijët. Le të festojmë dhe të kontribuojmë së bashku, që këto festa të kalojnë pa probleme dhe të qeta,” thuhet në mesazh.

Sinjali – aty ku e vërteta flet para lajmit!

/GazetaSinjali/

The post Policia apelon për mospërdorim të mjeteve të rrezikshme për festat e fundvitit: Të festojmë pa incidente appeared first on Sinjali.

Venezuela ka akuzuar Shtetet e Bashkuara për “shantazhimin më të madh” gjatë një seance emergjente të Këshillit të Sigurimit të OKB-së në New York.

Sekuestrimi i dy cisternave të naftës venezuelase nga Washingtoni ishte “më keq se pirateria”, tha ambasadori venezuelas në OKB.

Mbledhja emergjente e Këshillit të Sigurimit u thirr për të diskutuar rreth sekuestrimit të cisternave, e cila ndodhi pranë bregut të Venezuelës më herët gjatë këtij muaji, raporton BBC, transmeton Sinjali.

Shtetet e Bashkuara gjithashtu kanë thënë se po ndjekin një cisternë të tretë venezuelase.

Presidenti Trump ka akuzuar presidentin e Venezuelës, Nicolas Maduro, se drejton një kartel droge dhe se bandat kanë vepruar me impunitet për një kohë të gjatë. Më 16 dhjetor, Trump urdhëroi një bllokadë detare ndaj të gjitha cisternave të naftës të sanksionuara që hyjnë dhe dalin nga Venezuela. Presidenti amerikan ka thënë se SHBA-ja do të mbajë ose shesë naftën bruto që gjendet në cisternat e sekuestruara, si dhe vetë anijet.

SHBA-ja ka dislokuar 15,000 trupa dhe një varg anijesh, përfshirë aeroplanmbajtëse, shkatërruese me raketa të udhëzuara dhe anije sulmi amfibe, në Karaibe.

Qëllimi i deklaruar i dislokimit – më i madhi në rajon që nga invazioni i SHBA-së në Panamë në 1989 – është të ndalojë rrjedhën e fentanylit dhe kokainës drejt SHBA-së.

SHBA-ja gjithashtu ka targetuar më shumë se 20 anije në Paqësor dhe Karaibe gjatë muajve të fundit, duke vrarë të paktën 100 persona, si pjesë e fushatës së presidentit Trump kundër bandave që ai akuzon për transport të drogës në rajon.

Disa ekspertë thonë se sulmet mund të shkelin ligjet që rregullojnë konfliktet e armatosura.

Përfaqësuesi i Venezuelës në OKB tha se SHBA-ja po e bën vendin e tij subjekt të “shantazhit më të madh” në historinë e tij.

Gjatë mbledhjes së Këshillit të Sigurimit të martën, Samuel Moncada tha: “Ne jemi përballë një fuqie që vepron jashtë ligjit ndërkombëtar, duke kërkuar që venezuelasit të lëshojnë vendin e tyre dhe ta dorëzojnë.”

Duke iu referuar sekuestrimit të naftës venezuelase nga SHBA-ja, ai shtoi: “Po flasim për plaçkitje, grabitje dhe rikolonizim të Venezuelës. Qeveria e Shteteve të Bashkuara nuk ka juridiksion në Karaibe.”

Duke folur për industrinë e naftës në Venezuelë, ai pyeti: “Çfarë lidhjeje ka kjo me drogën?”

Në përgjigje, ambasadori i SHBA-së në OKB, Michael Waltz, tha në Këshillin e Sigurimit se SHBA-ja nuk e njeh Maduro-n si lider legjitim të Venezuelës.

“Aftësia e Maduro-s për të shitur naftën e Venezuelës i mundëson pretendimet e tij mashtruese për pushtet dhe aktivitetet e tij narco-terroriste,” tha Waltz.

Gjatë një vizite në një panair tregtar në Caracas, presidenti Maduro tha: “Këshilli i Sigurimit po i jep mbështetje të jashtëzakonshme Venezuelës.”

Rusia dhe Kina akuzuan SHBA-në për intimidim dhe agresion.

SHBA-ja po “shkatërron në mënyrë të paligjshme anijet civile në Detin Karaibe,” tha ambasadori rus në OKB, Vassily Nebenzia, duke paralajmëruar se vendet e tjera mund të jenë të ardhshme.

Veprimet e SHBA-së kundër anijeve venezuelase, tha ai, janë “një model për aktet e ardhshme të forcës kundër shteteve të Amerikës Latine.”

Ndërkohë, përfaqësuesi kinez në OKB, Sun Lei, bëri thirrje që SHBA-ja të “ndalojë menjëherë veprimet përkatëse dhe të shmangë përshkallëzimin e mëtejshëm të tensioneve.”

Sinjali – aty ku e vërteta flet para lajmit!

/GazetaSinjali/

The post Venezuela akuzon SHBA-në për “shantazh” lidhur me sekuestrimin e cisternave të naftës appeared first on Sinjali.

Kryetari i Sindikatës së re të Korporatës Energjetike të Kosovës, Nexhat Llumnica, ka zbuluar kërkesën kryesore të punëtorëve që protestuan të mërkurën, duke kërkuar një pagë mesatare prej 1,100 eurosh.

Sipas tij, kjo shifër është përmendur më parë nga kryeshefi i KEK-ut, i cili kishte thënë se punëtorët e ndërmarrjes marrin pagë mesatare rreth kësaj vlere.

Në fjalën e tij para punëtorëve, Llumnica ka theksuar se do të bazohen në fjalën e kryeshefit dhe do të kërkojnë pagë në këtë nivel.

“Kryeshefi i KEK-ut jo vetëm se nuk është i interesuar t’i zgjidhë kërkesat e punëtorëve të KEK-ut, por po na thotë se i kemi pagat më të larta në Kosovë. Sigurisht se ai po i mendon shërbyesit civilë sikur ndërmarrjet publike, e aq më larg KEK-un që sot vdesin 1% të stafit. Kryeshefi i KEK-ut na tha se i kemi mbi 1,100 e disa euro të ardhura mujore. Ne Sindikata e re e Korporatës Energjetike të Kosovës e dimë që mesatarja e pagës bazë është rreth 750 euro. Kam thënë se e kam një surprizë, e ajo surprizë është mos t’ia shkelim fjalën kryeshefit, pra ne nga këtu kërkojmë 1,100 euro pagë mesatare. Për të mbetur kjo pagë 1,100 duhet të shtohen edhe 350 euro për secilin punëtor, në bazë të pagës mesatare. Prandaj nga këtu kjo kërkesë do të jetë legjitime dhe nuk do ta anashkalojmë asnjëherë deri në grevë.”

Llumnica ka akuzuar më tej menaxhmentin e KEK-ut për keqplanifikim dhe keqmenaxhim, duke theksuar se punëtorët janë ata që mbajnë prodhimin:

“Kjo që po e bën menaxhmenti i KEK-ut po duket si për inat, po këta punëtorë janë të cilët e mbajnë prodhimin. Ne shpeshherë kemi punuar pa menaxhment fare. Na u është thënë se performanca është e dobët, jam i bindur se performanca ka qenë shembullore, por keqplanifikimi dhe keqmenaxhimi nuk janë faj i yni.”

Protesta e fundit e punëtorëve vjen pas muajsh kërkesash të paplotësuara, duke nxitur shpalosjen e asaj që Llumnica e quajti “surpriza” për menaxhmentin.

Sinjali – aty ku e vërteta flet para lajmit!

/GazetaSinjali/

The post Punëtorët e KEK-ut tregojn “surprizën” e protestës, kërkojnë pagë mesatare 1,100 euro appeared first on Sinjali.

Një aksident trafiku ka ndodhur sot në fshatin Rudarë në Mitrovicë, ku janë përfshirë dy automjete, mes të cilave njëra zyrtare.

Si pasojë e aksidentit, janë lënduar pesë persona, dy prej të cilëve janë zyrtarë policorë.

Lajmin për Sinjalin e ka konfirmuar Munish Avdiu, zyrtar i trafikut rajonal nga Policia e Kosovës, Stacioni Policor Mitrovicë e Veriut.

“Ka ndodhur aksident trafiku me lëndime trupore në magjistrale, në rrugën nacionale në fshatin Rudar. Janë të involvuara dy automjete, një automjet zyrtar dhe një civil, janë pesë persona të lënduar. Në mesin e tyre, dy zyrtarë policorë.”, tha ai.

Sinjali – aty ku e vërteta flet para lajmit!

/GazetaSinjali/

The post Pesë persona të lënduar nga aksidenti mes dy automjeteve në Rudar, Policia: Në mesin e të lënduarve, dy zyrtarë policorë appeared first on Sinjali.

Për herë të parë që nga nisja e negociatave, presidenti ukrainas, Volodymyr Zelensky, ka vendosur të bëjë publike të gjitha 20 pikat e planit të paqes, duke hedhur dritë mbi një dokument që synon jo vetëm fundin e luftës, por edhe rindërtimin e rendit të sigurisë në Evropë.

Zbulimi u bë gjatë një takimi me gazetarët dhe u raportua nga RBC-Ukraine.

Në thelb të planit qëndron një vijë e kuqe e panegociueshme: sovraniteti i Ukrainës.

“Nuk është objekt diskutimi”, theksoi Zelensky, duke e vendosur këtë si bosht politik të gjithë dokumentit. Nga kjo pikë nis edhe arkitektura e sigurisë që Ukraina dhe aleatët perëndimorë synojnë të ndërtojnë pas përfundimit të luftës.

Plani parashikon një pakt mos-agresioni me Rusinë, të shoqëruar me mekanizma monitorimi përgjatë vijës së frontit, por thelbi i vërtetë mbeten garancitë e sigurisë, të cilat presidenti ukrainas i cilëson si çështjen kryesore.

Sipas propozimit, SHBA, NATO dhe vendet evropiane do t’i ofronin Ukrainës garanci të ngjashme me Nenin 5 të NATO-s: çdo agresion i ri rus do të shkaktonte përgjigje ushtarake dhe rikthim të sanksioneve.

Ukraina nuk pranon çmilitarizim, ndërsa forcat e saj të Armatosura parashikohen të kenë 800 mijë trupa edhe në kohë paqeje. Rusia do të angazhohej ligjërisht për një politikë mos-agresioni jo vetëm ndaj Ukrainës, por edhe ndaj Evropës.

Dimensioni evropian i planit është po aq i qartë: anëtarësimi i Ukrainës në BE kërkohet me një datë të përcaktuar, jo si premtim i pacaktuar. Plani përfshin një plan global zhvillimi, i mbështetur nga një marrëveshje investimesh dhe një fond rindërtimi prej 800 miliardë dollarësh për rikthimin e ekonomisë së shkatërruar.

Marrëdhëniet me SHBA-të zënë një vend të veçantë, përmes një marrëveshjeje të përshpejtuar për tregti të lirë, ndërsa Ukraina riafirmon statusin e saj jo-bërthamor, pjesë ky e stabilitetit rajonal.

Një vijë e kuqe tjetër është centrali bërthamor i Zaporizhzhias. Zelensky bën të qartë se nuk ka kompromis mbi këtë çështje. SHBA ka propozuar një administrim trepalësh, ndërsa Ukraina ofron modelin 50–50 me amerikanët.

Plani përfshin gjithashtu elementë arsimorë dhe kulturorë, përfshirë programe që nxisin tolerancën dhe luftojnë racizmin dhe paragjykimet, në përpjekje për të ndërtuar një paqe afatgjatë dhe jo vetëm një armëpushim formal.

Territoret mbeten pika më e ndërlikuar. Një opsion parashikon tërheqjen e Rusisë nga rajonet Dnipropetrovsk, Mykolaiv, Sumy dhe Kharkiv, ndërsa për Donetsk, Luhansk, Zaporizhzhia dhe Kherson propozohet formula “qëndrojmë aty ku jemi”. Rusia kërkon tërheqjen e Ukrainës nga Donetsku, ndërsa SHBA-të sugjerojnë krijimin e një zone të lirë ekonomike si kompromis. Nëse nuk arrihet marrëveshje, çështja mund të shkojë në referendum, së bashku me të gjithë dokumentin.

Plani parashikon gjithashtu: Angazhim të Rusisë dhe Ukrainës për të mos ndryshuar marrëveshjen me forcë;

Garantimin e lindjes së lirë në lumin Dnipro dhe Detin e Zi;

Shkëmbim të të burgosurve, kthimin e civilëve, fëmijëve dhe të burgosurve politikë;

Zgjedhje në Ukrainë menjëherë pas nënshkrimit;

Mbikëqyrje ligjore nga Këshilli i Paqes i udhëhequr nga Donald Trump;

Armëpushim i plotë dhe i menjëhershëm sapo të gjitha palët bien dakord.

Publikimi i plotë i këtyre 20 pikave zhvendos debatin nga deklaratat e përgjithshme te detajet konkrete, duke bërë të qartë se rruga drejt paqes është e mundur, por e mbushur me dilema të thella politike, territoriale dhe gjeostrategjike.

Sinjali – aty ku e vërteta flet para lajmit!

/GazetaSinjali/

The post Zelensky publikon për herë të parë 20 pikat e planit të paqes appeared first on Sinjali.

Shërbimet e Drejtori së Vendore të Policisë Shkodër kanë finalizuar fazën e katërt të operacionit policor të koduar “Neonët 4”, duke goditur 7 ambiente të dyshuara për kultivim të bimëve narkotike me anë të llambave.

Sipas njoftimit të Policisë, gjatë kontrolleve intensive në ambiente të mbyllura u arrestua në flagrancë shtetasi Gj. B., 22 vjeç, banues në Laç, Vau i Dejës, i cili kishte marrë me qira një banesë në Velipojë dhe e kishte përshtatur për kultivimin e bimëve narkotike.

Gjithashtu, u ndalua R. V., 25 vjeç, banues në Shkodër, ndërsa dy punonjës të OSHEE-së, A. U., 50 vjeç dhe Gj. T., 59 vjeç, u proceduan penalisht për veprën penale “Shpërdorimi i detyrës”, kryer në bashkëpunim.

Nga kontrolli i banesës së Gj. B., policia sekuestruar: 308 bimë të dyshuara kanabis, 85 gramë kanabis të tharë, 122 pajisje elektrike për kultivim, 4 celularë.

Në banesën e shtetasit R. V. u sekuestruan: 3 llamba dhe 1 përforcues grushti.

Gjithsej janë sekuestruar 300 bimë të dyshuara kanabis, një sasi kanabisi, 125 pajisje elektrike, 4 celularë dhe një përforcues grushti.

Operacioni u zhvillua nga shërbimet e Komisariatit të Policisë Shkodër në bashkëpunim me Seksionin për Hetimin e Narkotikëve në DVP Shkodër dhe me mbështetjen e Forcës Operacionale dhe grupit “Shqiponjat”. Kontrollimet intensive u fokusuan në evidentimin, kultivimin dhe tharjen e bimëve narkotike për shitje, si dhe dokumentimin e plotë të veprimtarisë kriminale.

Materialet procedurale iu kaluan Prokurorisë së Shkodrës për veprime të mëtejshme, ndërsa policia vazhdon punën intensive për goditjen e këtij aktiviteti kriminal.

Sinjali – aty ku e vërteta flet para lajmit!

/GazetaSinjali/

The post Shkodër: Goditen 7 ambiente të kultivimit të bimëve narkotike, 22-vjeçari arrestohet në flagrancë appeared first on Sinjali.

Seanca fillestare për tre të akuzuarit në rastin e sulmit në kanalin Ibër Lepenc në Zubin Potok është ndërprerë në Gjykatën Themelore në Prishtinë, pas kërkesave të paraqitura nga palët mbrojtëse për përjashtimin e prokurorit të rastit.

Kërkesat u parashtruan me arsyetimin se gjatë fazës hetimore nuk janë ndërmarrë veprime të plota për mbledhjen dhe administrimin e provave të propozuara nga mbrojtja.

Sipas gjykatës, seanca është ndërprerë derisa të merret vendim nga Kryeprokurori kompetent lidhur me kërkesën për përjashtim të prokurorit publik, Bekim Kodraliu.

Avokati Nebojsha Vllajiq, mbrojtës i të akuzuarit Jovan Viqentijeviq, deklaroi se ka vërejtje serioze ndaj mënyrës së veprimit të prokurorisë dhe se ka kërkuar zyrtarisht përjashtimin e prokurorit.

Ai tha se kërkesa për mbledhje të provave ishte parashtruar që më 6 dhjetor 2024, vetëm disa ditë pas arrestimit të të akuzuarit, por sipas tij asnjë nga provat e propozuara nuk është administruar.

Vllajiq theksoi se janë marrë vetëm disa incizime nga një kamerë dhe se ato janë paraqitur në mënyrë selektive, pa sqaruar kohën, e cila sipas tij është element thelbësor për rastin. Ai shtoi se mosveprimi i prokurorisë ka sjellë humbjen e disa provave përgjithmonë.

Mbrojtësi i të akuzuarit Dragisha Viqentijeviq, avokati Millosh Deleviq, u bashkua me kërkesën e kolegut të tij, duke deklaruar se edhe ai kishte kërkuar që në dhjetor të vitit 2024 dëgjimin e katër dëshmitarëve dhe mbledhjen e incizimeve nga disa objekte, përfshirë banka dhe stacioni policor në Zubin Potok, por se deri më tani prokuroria nuk ka vepruar sipas këtyre kërkesave.

“Më duhet t’i bashkangjitem kolegut, pasi edhe unë më 11 dhjetor 2024 ia kam parashtruar kërkesën që të dëgjohen katër dëshmitarë. Kam kërkuar që të mblidhen video-incizime nga kamerat e dy objekteve, nga banka KEP në Zubin Potok dhe nga stacioni policor në Zubin Potok, një orë pas sulmit. Deri në ditën e sotme, prokurori special nuk ka vepruar sipas kërkesës. Në mënyrë të pakthyeshme e ka dëmtuar të drejtën në mbrojtje të Dragisha Viqentijeviqit. Kërkojmë që të ndërpritet kjo seancë deri sa kryeprokurori të deklarohet për këtë kërkesë”, tha ai.

Ndërkaq, avokatja Jelena Krivokapiq, mbrojtëse e të akuzuarit Igor Dimoviq, tha se rasti i klientit të saj është i ndryshëm dhe se mbrojtja nuk ka vërejtje ndaj prokurorisë, duke shtuar se dokumentacioni është pranuar dhe se nuk mund të deklarohet për shkelje në këtë pjesë.

Prokurori Bekim Kodraliu, duke iu përgjigjur kërkesave të mbrojtjes, tha se hetimi është zhvilluar në mënyrë profesionale dhe të koordinuar. Ai theksoi se provat e propozuara janë analizuar dhe se për komunikimet telefonike janë bërë kërkesa për bashkëpunim ndërkombëtar me autoritetet serbe, por se nuk është pranuar përgjigje. Kodraliu shtoi se ligji përcakton qartë bazat mbi të cilat mund të kërkohet përjashtimi i prokurorit dhe se, sipas tij, këto baza nuk janë përmbushur në këtë rast.

“Unë i dëgjova me vëmendje kërkesat e palës mbrojtëse. E di që ndoshta nuk ju pëlqen hetimi që unë kam zhvilluar në këtë rast, por i njoftoj palët që hetimi ka qenë profesional dhe ka qenë i koordinuar në mënyrë të përsosur. Provat që i kanë propozuar i kam analizuar dhe i dëgjova edhe sot. Komunikimet telefonike, të pandehurit Jovan kanë qenë në komunikim përmes telekomit të Serbisë dhe ne autoriteteve serbe u kemi drejtuar dy herë me kërkesë për bashkëpunim ndërkombëtar, por nuk kemi pranuar përgjigje. Kolegu Vllajiq ka qenë prokuror në sistemin jugosllav dhe besoj që e di se kur mund të kërkohet ndërrimi i prokurorit në një rast penal. Kërkesa për përjashtim është nëse pala e dëmtuar apo familjari me të pandehurin, kujdestari ligjor apo prindi i të pandehurit ose i dëmtuari, nëse ka marrë pjesë si gjyqtar dhe nëse kam konflikt interesi. Këto janë bazat që prokurori duhet të largohet nga procedura. Këto janë pesë bazat ligjore mbi të cilat mund të kërkohet përjashtimi”, tha ai.

Gjyqtari i çështjes, Vesel Ismaili, deklaroi se me paraqitjen e kërkesës për përjashtim, ligji obligon ndërprerjen e çdo veprimi procedural deri në marrjen e vendimit përfundimtar.

Ai njoftoi se seanca e sotme ndërpritet dhe se gjykata do të presë vendimin e kryeprokurorit special lidhur me kërkesën e parashtruar.

“Nuk i kontestoj fare, por kjo i bie në kompetencë të prokurorit. Neve na obligon dispozita që, me rastin e paraqitjes së kërkesës për përjashtim, qoftë të gjyqtarit apo të prokurorit, menjëherë duhet të ndërpritet çdo veprim procedural në një çështje juridiko-penale, deri sa të shqyrtohet dhe të merret vendim. Seanca e sotme ndërpritet dhe presim vendimin e kryeprokurorit special”, tha ai.

Sinjali – aty ku e vërteta flet para lajmit!

/GazetaSinjali/

The post Ndërpritet seanca fillestare për sulmin në kanalin Ibër-Lepenc, kërkohet përjashtimi i prokurorit appeared first on Sinjali.

Përfaqësuesi i përhershëm i Shteteve të Bashkuara në NATO, Matthew Whitaker ka deklaruar se pozicioni i Ukrainës është i njohur mirë, ndërsa SHBA-ja po përpiqet të kuptojë se cilat kompromise është e gatshme të bëjë Rusia.

“Topi është tani në fushën e Rusisë. Mendoj se ata kanë një ofertë. Aktualisht ka rreth katër dokumente në tryezë: një plan paqeje me 20 pika së bashku me garanci sigurie multilaterale, garanci sigurie të ofruara specifikisht nga Shtetet e Bashkuara, një plan për rritje ekonomike dhe prosperitet pas arritjes së paqes.

Të gjitha këto po diskutohen në kohë reale. Tani kemi të qartë çfarë dëshiron Ukraina.

Po përpiqemi të kuptojmë maksimumin që është e gatshme të bëjë Rusia. Ata vazhdojnë të kryejnë sulme masive gjatë natës kundër Ukrainës, çka flet vetë për veten në një farë mase.

Por Presidenti Trump është i vetmi, si ndërmjetësuesi kryesor, që mund t’i sjellë të dyja palët në tryezën e negociatave dhe të shohë nëse mund të arrijë një marrëveshje. Ekipi i tij po bën përpjekje të jashtëzakonshme”, tha Whitaker në një intervistë për Fox News.

Ai theksoi se i vetmi që nuk pranon se viktimat janë shumë të larta dhe se negociatat janë të nevojshme është Putini.

“Por Rusia kurrë nuk ka qenë e gatshme të pranojë këtë. Ata gjithmonë kanë qenë të gatshëm të vuajnë më shumë se shumica e vendeve të tjera.

Humbje të tilla dhe miliona viktima nuk do të toleroheshin kurrë nga asnjë vend tjetër përveç Rusisë. Megjithatë, kjo është ajo që po bëjnë për fitime shumë të vogla, nëse ka fare, në fushëbetejë”, shtoi Whitaker.

Sinjali – aty ku e vërteta flet para lajmit!

/GazetaSinjali/

The post Ambasadori amerikan në NATO thotë se topi është në fushën e Rusisë për negociatat e paqes në Ukrainë appeared first on Sinjali.

Me dhjetëra, ndoshta edhe qindra kërkesa për lirimin nga paraburgimi të ish-krerëve të UÇK-së në Hagë janë paraqitur deri më tani, por asnjëra nuk është miratuar.

Shpresa e fundit për Kadri Veselin për lirimin me kusht është gjithashtu shuar, pasi Gjykata Supreme në Hagë i ka refuzuar kërkesën.

Sipas vendimit të Supremes, ku në panel është edhe kryetarja e Gjykatës Speciale, nuk është konstatuar asnjë shkelje në vendimet e mëparshme që i kishin mohuar lirimin Veselit.

“Paneli vëren se Z. Veseli nuk tregon për një shkelje thelbësore të një procedure specifike në Ligj ose në Rregullore. Siç është theksuar tashmë në Pikën 1, një kërkesë për mbrojtjen e ligjshmërisë duhet të pretendojë një shkelje thelbësore të procedurave të përcaktuara në Nenin 48(7)(b) të Ligjit. Megjithatë, dhe duke pasur parasysh se Mbrojtja argumenton konkretisht se Paneli i Apelit nuk i rivlerësoi siç duhet rreziqet sipas Nenit 41(6)(b) të Ligjit dhe në vend të kësaj u mbështet në gjetjet e mëparshme pa shqyrtuar nëse ato mbeten të mjaftueshme në këtë fazë të procedurës”, thuhet në vendim.

Gjykata thekson se Kadri Veseli paraqet rrezik të ndërhyrjes në procedura dhe të tentojë të ndikojë në dëshmitarë, duke justifikuar kështu vazhdimin e paraburgimit.

“Ndërsa Paneli pranon dhe pajtohet me Panelin e Apelit se një bazë specifike, siç është rreziku i pengimit, mund të zvogëlohet me kalimin e kohës, kjo nuk është automatike dhe varet nga rrethanat e çështjes. Nuk është e nevojshme, siç sugjeron Z. Veseli, që diçka e jashtëzakonshme të jetë e nevojshme për të treguar se rreziku nuk është zvogëluar. Ajo që është e nevojshme është që arsyet e vazhdueshme të justifikojnë paraburgimin e vazhdueshëm”, thuhet në vendim.

Gjykata gjithashtu aludon në zbulimin e informatave konfidenciale nga Veseli, pavarësisht se gjykimi është në fazën përfundimtare.

“Trupi kujton se Apeli iu referua sjelljes së mbështetur më parë si treguese të ekzistencës së rrezikut të pengimit, duke përfshirë zbulimin e supozuar të informacionit konfidencial. Duke vepruar kështu, Trupi i Apelit konsideroi se kjo sjellje ilustron gatishmërinë dhe aftësinë ‘e mundshme’ të Z. Veseli për të përhapur informacion konfidencial, dhe vuri në dukje se kjo kishte rezultuar në mbikëqyrje shtesë në Njësinë e Paraburgimit. Trupi i Apelit e konsideroi këtë të rëndësishme për vlerësimin e vazhdueshëm të rrezikut të pengimit dhe kujtoi se standardi i zbatueshëm kishte të bënte me mundësinë, në vend të pashmangshmërisë së një ngjarjeje në të ardhmen”, thuhet në vendim.

Gjykata Supreme thekson se nuk ka asnjë shkelje në procedurë dhe se rreziqet për vazhdimin e paraburgimit janë të justifikuara:

“Në dritën e sa më sipër, Trupi i Supremes konstaton se Trupi i Apelit nuk e ka keqzbatuar standardin përkatës në rrethanat e çështjes në përputhje me Nenin 41(6)(b) të Ligjit. Nuk ka asgjë në shqyrtimin e paraburgimit që sugjeron se procesi është ndërmarrë në një mënyrë kuazi-automatike. Ai vlerësoi siç duhet ekzistencën e vazhdueshme të rreziqeve përkatëse në kohën e shqyrtimit dhe ofroi arsye të mjaftueshme për të justifikuar vazhdimin e paraburgimit të z. Veseli”, thuhet në vendim.

Veseli ishte ankuar se nuk kishte asnjë provë që justifikonte vazhdimin e paraburgimit të tij, por paneli e konsideroi këtë argument të pabazuar:

“Paneli vëren se parashtrimet e Z. Veseli, në lidhje me nëse provat që favorizojnë lirimin janë shqyrtuar mjaftueshëm, janë tërësisht të natyrës faktike. Për shembull, Z. Veseli argumenton se nuk është paraqitur asnjë provë. Megjithatë, Paneli i Apelit shqyrtoi sa vijon: (i) përfshirjen e mundshme të Z. Veseli në zbulimin e paautorizuar të provave; (ii) aftësinë e tij për të marrë informacion konfidencial duke pasur parasysh pozicionin e tij në Kosovë; (iii) dhe njohuritë e tij të shtuara për informacionin konfidencial në lidhje me dëshmitarët. Për më tepër, argumentet e tij përbëjnë një mospajtim me vlerësimin diskrecionar të fakteve nga Paneli i Apelit, i cili nuk mund të merret në konsideratë brenda procedurës për mbrojtjen e ligjshmërisë”, thuhet më tej.

“Paneli vëren që në fillim se Z. Veseli nuk tregon për një shkelje të konsiderueshme të një procedure specifike në Ligj ose në Rregullore në parashtrimet e tij. Sipas Nenit 48(7)(b) të Ligjit, një palë që kërkon mbrojtje të ligjshmërisë duhet të identifikojë një shkelje të konsiderueshme të procedurave të përcaktuara në këtë Ligj dhe në Rregullore”, thuhet në vendim.

Si rrjedhojë, Kadri Veseli do të vazhdojë të qëndrojë në paraburgim.

Sinjali – aty ku e vërteta flet para lajmit!

/GazetaSinjali/

The post Rrëzimi i kërkesës së Veselit për lirimin me kusht, si e arsyetoi vendimin Gjykata Supreme në Hagë? appeared first on Sinjali.

Rusia planifikon të ndërtojë një central bërthamor në Hënë në dekadën e ardhshme për të furnizuar programin e saj hapësinor hënor dhe një stacion të përbashkët kërkimor ruso-kinez, teksa fuqitë e mëdha po nxitojnë të eksplorojnë satelitin e vetëm natyror të Tokës.

Që nga koha kur kozmonauti sovjetik, Yuri Gagarin, u bë njeriu i parë që shkoi në hapësirë më 1961, Rusia e ka paraqitur veten si një fuqi udhëheqëse në eksplorimin e hapësirës, por në dekadat e fundit ka mbetur prapa Shteteve të Bashkuara në këtë drejtim, dhe gjithnjë më prapa edhe Kinës.

Ambiciet e Rusisë pësuan një goditje të madhe në gusht të vitit 2023, kur misioni i saj pa ekuipazh Luna-25 u përplas me sipërfaqen e Hënës gjatë përpjekjes për t’u ulur, teksa miliarderi Elon Musk ka revolucionarizuar lëshimin e mjeteve hapësinore, gjë që dikur ishte një specialitet rus.

Korporata shtetërore ruse e hapësirës, Roscosmos, njoftoi se planifikon të ndërtojë një central energjetik në Hënë deri në vitin 2036, duke shtuar se ka nënshkruar një kontratë me kompaninë e industrisë hapësinore, Lavochkin Association për ta realizuar këtë projekt.

Roscosmos tha se qëllimi i centralit është që të furnizojë me energji programin hënor të Rusisë, përfshirë automjetet robotike, një observator dhe infrastrukturën e Stacionit e Përbashkët Ndërkombëtar Kërkimor Ruso-Kinez, njofton rel.

“Ky projekt është një hap i rëndësishëm drejt krijimit të një stacioni të përhershëm hënor dhe kalimin nga misionet që zhvillohen vetëm një herë në një program afatgjatë të eksplorimit të Hënës”, tha Roscosmos.

Roscosmos nuk tregoi në mënyrë eksplicite nëse centrali do të ishte bërthamor, por njoftoi se ndër pjesëmarrësit në projekt janë korporata shtetërore ruse e energjisë bërthamore Rosatom dhe Instituti Kurchatov, që është instituti kryesor i Rusisë për kërkime bërthamore.

Kreu i Roscosmos, Dmitry Bakanov, tha në muajin qershor se një nga synimet e korporatës është të ndërtojë një central bërthamor në Hënë dhe të eksplorojë Venerën, që njihet si “planeti motër” i Tokës.

Hëna, e cila ndodhet 384.400 kilometra larg nga Toka, ndikon në stabilizimin e lëkundjes së Tokës rreth boshtit të saj, duke siguruar një klimë më të qëndrueshme. Ajo po ashtu shkakton baticat dhe zbaticat në oqeanet e botës.

Sinjali – aty ku e vërteta flet para lajmit!

/GazetaSinjali/

The post Rusia synon të ndërtojë një central bërthamor në Hënë appeared first on Sinjali.

Të akuzuarit në rastin e sulmit në kanalin Ibër Lepenc në Zubin Potok, janë sjellur të mërkuren në Gjykatën Themelore në Prishtinë nën masa të rrepta sigurie, ku pas pak pritet të filloj seanca fillestare ndaj tyre.

Sulm pati ndodhur më 29 nëntor të vitit 2024 në fshatin Varagë të Zubin Potokut.

Më 9 dhjetor të këtij viti, pak më shumë se 1 vit nga sulmi, Prokuroria Speciale pas një hetimi të zhvilluar në bashkëpunim me Policinë e Kosovës – Drejtoria Kundër Terrorizmit, dhe me partnerët evropianë ka ngritur aktakuzë ndaj vëllezërve Jovan Viqentijeviq e Dragisha Viqentijeviq, dhe Igor Dimoviq për veprat penale “Rrezikimi i rendit kushtetues me shkatërrimin apo dëmtimin e instalimeve dhe pajisjeve publike” nga neni 122 lidhur me veprën penale “Kryerja e veprës terroriste”, “Armëmbajtje pa leje”, dhe “Spiunazh”.

Sipas aktakuzës, më 29.11.24 në fshatin Varagë, Komuna e Zubin Potokut, në pjesën e kanalit “Ibër Lepenc”, të pandehurit Viqentijeviq, së bashku me disa persona të tjerë ende të panjohur, pas një marrëveshje paraprake, kanë vendosur eksploziv (rreth 20 kilogramë të llojit Trinitrotoluene “TNT”) në brendësi të kanalit.

Vëllezërit Viqentijeviq akuzohen se lëndën shpërthyese e kanë aktivizuar përmes një çante të cilën e kishin lidhur me litar në një shtyllë betoni, ku si pasojë është dëmtuar rëndë struktura e betonit të kanalit, “Ibër Lepenc”, është shkaktuar ndërprerje e furnizimit me ujë të pijshëm, është rrezikuar prodhimi i energjisë elektrike, dhe ndërmarrjes “Ibër Lepenc”, i është shkaktuar dëm në vlerë prej 376,774.70 eurosh.

Sipas aktakuzës, me këto veprime, të pandehurit Viqentijeviq kanë kryer veprën penale “Rrezikimi i rendit kushtetues me shkatërrimin apo dëmtimin e instalimeve publike” nga neni 122 në lidhje me “Kryerjen e veprës terroriste”.

Dy të pandehurit akuzohen edhe për armëmbajtje pa leje, së bashku edhe me të akuzuarin tjetër Igor Dimoviq.

Ndërsa, i pandehuri Jovan Viqentijeviq akuzohet edhe për veprën penale “Spiunazhi”.

Sipas aktakuzës, i pandehuri deri në momentin e arrestimit, në cilësinë e të rekrutuarit në Shërbimin Informativ Ushtarak të Serbisë, Kolonel, ka vepruar dhe e ka ndihmuar këtë shërbim, duke mbledhur informacione dhe dokumente të klasifikuara me qëllim që të njëjtat ti përdor gjatë aktivitetit të tij të kundërligjshëm në territorin e Kosovës.

Sinjali – aty ku e vërteta flet para lajmit!

/GazetaSinjali/

The post Të akuzuarit për sulmin terrorist në Ibër-Lepenc dalin para Gjykatës appeared first on Sinjali.

Një aksion i njësive antidrogë në Istog ka rezultuar me arrestimin e Fatmir Dacit, rreth 30-vjeçar, i cili dyshohet për posedim të paautorizuar të narkotikëve dhe mbajtje të paautorizuar të armëve.

Ngjarja ka ndodhur më 23 dhjetor 2025, rreth orës 22:00, kur njësitet e DHTN-së nga Peja, në kuadër të një plani operativ, kanë ndaluar për kontroll një veturë BMW X6, ngjyrë vishnje, e cila drejtohej nga i dyshuari.

Gjatë kontrollit të automjetit, zyrtarët policorë kanë gjetur një qese plasmasi me substancë të dyshuar narkotike të llojit kokainë, me peshë totale 25.5 gramë, si dhe një brisk me gjatësi rreth 8 centimetra, i cili dyshohet se ishte në posedim të të dyshuarit.

Ekskluzive | Kapet me kokainë dhe armë të ftohtë në Istog – në pranga i dyshuari

Gazeta Sinjali mëson ekskluzivisht se në veturë ndodhej edhe një pasagjer, Arlind Tahiri, rreth 21-vjeçar, i cili është intervistuar në cilësinë e dëshmitarit dhe më pas është liruar me urdhër të Prokurorit të Shtetit.

Ndërkohë, Fatmir Daci është dërguar në mbajtje për 48 orë, ndërsa ndaj tij është iniciuar procedurë penale për veprat: “Posedim i paautorizuar i narkotikëve, substancave psikotrope ose analoge” , “Mbajtje në pronësi, kontroll ose posedim i paautorizuar të armëve”

Hetimet për rastin po vazhdojnë nga DHTN – Pejë, në koordinim me Prokurorinë kompetente, ndërsa nuk përjashtohet mundësia e zgjerimit të hetimeve edhe në pista të tjera.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

Sinjali – aty ku e vërteta flet para lajmit!

/GazetaSinjali/

The post Ekskluzive | Ky është i arrestuari për kokainë në Istog – kapet me mbi 25 gramë narkotikë në BMW X6, dërgohet në ndalim appeared first on Sinjali.

Një aksion policor i zhvilluar mbrëmjen e 23 dhjetorit 2025, rreth orës 22:00, në qytetin e Istogut, ka përfunduar me arrestimin e një personi të dyshuar për posedim të paautorizuar të narkotikëve dhe armëve.

Gazeta Sinjali mëson ekskluzivisht se njësitë e DHTN-së në Pejë, në kuadër të një plani operativ, kanë ndaluar për kontroll një veturë të tipit BMW X6, me ngjyrë vishnje, të cilën e drejtonte F. D., rreth 30-vjeçar, ndërsa si pasagjer ndodhej A. T., rreth 21-vjeçar.

Gjatë kontrollit të automjetit, zyrtarët policorë kanë gjetur dhe sekuestruar: 25.5 gram kokainë (peshë bruto), të paketuar në një qese plastike, një brisk me gjatësi tehu 8 cm, i konsideruar armë e ftohtë

Burimet bëjnë me dije se për rastin është njoftuar Prokurori i Shtetit, i cili ka udhëzuar që dëshmitari të intervistohet dhe më pas të lirohet, ndërsa ndaj F. D është caktuar masa e ndalimit prej 48 orësh.

Me urdhër të Prokurorit, ndaj të dyshuarit është iniciuar rasti penal për: “Posedim të paautorizuar të narkotikëve, substancave psikotrope ose analoge”, “Mbajtje në pronësi, kontroll ose posedim të paautorizuar të armëve”

Hetimet lidhur me këtë rast po vazhdojnë nga DHTN – Pejë, ndërsa priten edhe veprime të tjera procedurale nga organet e drejtësisë.

Sinjali – aty ku e vërteta flet para lajmit!

/GazetaSinjali/

The post Ekskluzive | Kapet me kokainë dhe armë të ftohtë në Istog – në pranga i dyshuari appeared first on Sinjali.