Ministrja e Punëve të Brendshme, Albana Koçiu ka ndjekur nga afër zhvillimet në Durrës, fshatin Vadardhë ku edhe ka nisur plani i evakuimit të banorëve.

Ministrja Koçiu u bëri thirrje banorëve të prekur, t’u përgjigjen autoriteteve për evakuim.

“Parashikohen diku tek 500 qytetarë, të cilët do të evakuohen me mjetet e forcave të aramatosura. Situata paraqitet e vështirë. Aktualisht janë të dislokuara 6 mjete të forcave të armatosura, mbi 200 punonjës në terren në zonën e Vadardhës dhe po punojmë që të mos kemi asnjë incident”, tha Koçiu.

Sipas saj “ekipet e Policisë së Shtetit, Forcave të Armatosura, Shërbimeve Zjarrfikëse, Mbrojtjes Civile dhe strukturave vendore janë në terren, në gatishmëri të plotë për t’iu gjendur pranë çdo familjeje dhe çdo qytetari të prekur nga situata e reshjeve”.

Niveli i ujit ka kaluar mbi urën e vjetër të Mifolit si pasojë e reshjeve të dendura të shiut.

Në këtë mënyrë për shkak të situatës problematike, policia ka ndaluar lëvizjen në urën e vjetër të Mifolit.

Situata mbetet shqetësuese, ndërsa ekipet e Emergjencës më herët kanë urdhëruar evakuimin e banorëve në Novoselë, Ferras dhe Katund i Ri.

Të gjitha rrugët në fshatrat e Bashkisë Elbasan janë të hapura. Megjithëse është punuar gjatë gjithë ditës me 5 fadroma, 2 borëpastruse,  4 komionë dhe 3 forisdrada dhe dhjetëra punonjës, reshjet e dëborës po e vështirësojnë shumë punën e ekipeve.

Nisur nga kjo, dhe nga fakti që nata do të sjellë ulje të mëtejshme të temperaturave, këshillohen drejtuesit e mjeteve të mos qarkullojnë të pa pajisur me zinxhirë në akset rrugore Elbasan-Gjinar, Elbasan-Labinot Mal, Elbasan- Gracen dhe Elbasan- Funar.

Aktualisht jemi të pozicionuar për pastrimin e rrugëve në Mollagjesh, Zavalinë dhe rrugët e fshatrave me qendrën e njësisë Labinot Mal.

Bashkia Elbasan u bën thirrje drejtuesve të mjeteve të tregojnë kujdes të shtuar dhe të respektojnë udhëzimet e strukturave përkatëse.

Pavarësisht se shiu vazhdon me intensitet në qytet dhe zonat e ulëta, nuk ka problematika të mëdha.

Presidenti i Republikës, Bajram Begaj po ndjek me shqetësim situatën e krijuar nga reshjet intensive në vend. Presidenti i Republikës është në komunikim të vazhdueshëm me drejtuesit e institucioneve qendrore dhe vendore, me Strukturat e Emergjencave Civile si dhe me Forcat e Armatosura, për përballimin e situatës së përmbytjeve.

Kreu i Shtetit fton qytetarët të mirëkuptojnë dhe bashkëpunojnë me ta me qëllim që kjo situatë të kalojë me sa më pak pasoja.

Presidenti i Republikës fton në mënyrë të veçantë banorë në zonat e përmbytura të ndjekin udhëzimet e strukturave përgjegjëse për evakuim të shpejtë dhe të sigurt.

Në këto momente të vështira jeta e çdo qytetari është mbi gjithçka.

Autoritetet siriane u kanë kërkuar qytetarëve të largohen nga një zonë e kontestuar në qytetin verior të Alepos. Autoritete siriane për të dytën ditë kanë hapur një korridor që ata të evakuoheshin, ndërsa përleshjet vazhduan midis qeverisë dhe forcave kurde.

Qeveria e provincës së Alepos u ka dhënë banorëve afat deri në orën 13:00 sipas orës lokale për t’u evakuuar në koordinim me ushtrinë.

Agjencia shtetërore e lajmeve SANA, duke cituar ushtrinë, ka thënë se ushtria do të fillonte “operacione të synuara” kundër Forcave Demokratike Siriane të udhëhequra nga kurdët në lagjet Sheikh Maqsoud, Achrafieh dhe Bani Zaid, gjysmë ore pas këtij afati.

Associated Press ka raportuar për të shtëna sporadike ndërsa civilët dilnin nga zona të enjten në mëngjes.

Në grabitje ka ndodhur në zonën e Yzberishtit në Tiranë.

Siç shihet edhe nga pamjet e siguruara nga “ABC News”, një person futen në ambientet e një marketi, me një thikë në dorë, kërcënon shitësen dhe marr paratë.

Më pas autori largohet menjëherë.

Çarja e argjinaturës së lumit Drojë, ka sjellë situatë kaotike në fshatin Dukagjin i Ri dhe Miliska.

Rreth 50 familje në dy fshatrat ndodhen nën pushtetin e ujit, banorët janë të izoluar në banesa, sakaq situata vijon e rënduar nga rritja e nivelit të ujit.

Sa mësohet në fshatin Miliska të Krujës, një stallë bagëtish të imta, janë përfshirë nga rrjedha e ujit.

Nga një fshat i varfër pranë Kavajës, tek skenat më të mëdha amerikane. Nga një monedhë e fshehur në pëllëmbë, tek një kukull që flet, ironizon dhe “flirton” live para publikut. Dinastia e prestidigjitatorëve Bushi është një histori që tingëllon si truk, por është realitet i pastër.
Në studion e ABC e Mëngjesit, Dashnor dhe Nikolas Bushi, baba e bir, treguan jetën mes Shqipërisë dhe Amerikës, artin e iluzionit dhe aventurën unike të ventrilokizmit, një disiplinë pothuajse e panjohur më parë në vendin tonë.
Nikolas Bushi, djali që “flet me bark”, u shndërrua në sensacion në finalen e Albania’s Got Talent. Në krah të tij është gjithmonë Chris, kukulla që nuk kursen sarkazmën dhe batutat.
“Bukuria e këtij arti është që sarkazmën nuk e bëj unë, por Chris”, thotë Nikolas.
“Unë dhe Chris flirtojmë bashkë, por për gjëra serioze vendos vetë”, shton ai me humor, duke sqaruar se asnjë personazh nuk del jashtë kontrollit të tij.
Nikolas rrëfen se ideja për këtë art lindi 8 vite më parë, e frymëzuar nga America’s Got Talent, dhe sot ndihet i lumtur që po kontribuon në përhapjen e ventrilokizmit në Shqipëri. Madje, projekte surprizë janë në horizont, mes tyre edhe një bashkëpunim i mundshëm me Terry Fator, një nga ikonat botërore të këtij arti.
Pas suksesit të djalit qëndron “dora” e Dashnor Bushit, i cili edhe vetë ka kaluar një jetë të tërë mes trukeve e numrave të shpejtësisë e iluzionizmit.
Pas disa vitesh në Itali, rruga e jetës e çoi në Shtetet e Bashkuara, ku sot jeton me gruan dhe fëmijët, me një kalendar të ngjeshur shfaqjesh në shtete të ndryshme amerikane.

Si pasojë e reshjeve intensive, gjatë orëve të fundit ka patur rritje të niveleve të lumenjve në disa qarqe të vendit, gjë që ka krijuar problematika serioze, kryesisht përmbytje të tokave bujqësore dhe banesave, rrëshqitje dherash, dëmtime infrastrukturore dhe bllokime rrugësh.

Situata më problematike paraqitet në qarqet Shkodër, Lezhë, Durrës, Fier, Berat dhe Gjirokastër, ndërsa në qarqe të tjera situata është nën monitorim ose pa rrezik.

Strukturat e Mbrojtjes Civile dhe Forcat e Armatosura, nën koordinimin e Agjencisë Kombëtare të Mbrojtjes Civile njoftojnë se janë angazhuar në terren për përballimin e emergjencës, evakuimin e banorëve, ku është e nevojshme dhe minimizimin e dëmeve.

Situata sipas qarqeve paraqitet si më poshtë:

Qarku Shkodër

• Ka rritje të nivelit të ujit në fshatin Obot, me rreth 60 cm ujë mbi rrugën kryesore. Qarkullimi bëhet vetëm për mjete të tonazhit të lartë.
• Ka rritje të sipërfaqeve të tokave bujqësore nën ujë.
• 15 banesa të rrethuara nga uji në Vaun e Dejës.
• Në disa fshatra të Malësisë së Madhe ka rrugë të bllokuara dhe prezencë uji.
• Në bashkinë Fushë-Arrëz janë evidentuar shkarje dherash dhe rënie gurësh, prezencë e shtuar e ujit në rrugët auto-rurale, që kanë shkaktuar dëmtime.

Qarku Lezhë

• Rreth 3000 ha tokë bujqësore janë nën ujë.
• Është bërë evakuimi I dy familjeve, një në fshatin ishullin Shëngjin dhe një në fshatin Kakariq.
• Rreth 100 banesa janë të rrethuara nga uji, kryesisht në njësitë administrative Dajç, Babullojë, Balldren dhe Shënkoll.
• Ka rrëshqitje dherash në fshatrat Torovicë dhe Tresh.
• Po punohet për mbylljen e çarjes së argjinaturës në lumin Droje, në fshatin Dukagjin.

Qarku Vlorë

• Niveli I lumit Vjosë në Novoselë ka kaluar mbi 8 metra.
• Janë evakuuar 13 familje pranë Urës së Mifolit dhe në Novoselë. Nuk ka prezencë uji në banesa.

Qarku Durrës

• Aktualisht situate është drejt përmirësimit, por po punohet për heqjen e ujit nga rreth 800 banesa dhe objekte, veçanërisht në zonën e burgut, Ish Kënetës, Shkozet dhe Nishtullë. Në terren ndodhen ekipe te vlerësimit të dëmeve që po vazhdojnë evidentimin dhe dokumentimin e rasteve.
• 250 persona janë të strehuar në Shtëpinë e Pushimit te Ushtrisë, Durrës dhe 55 persona janë strehuar në Kavalishencën e Ministrisë së Brendshme.
• ⁠Lumenjtë Erzen dhe Ishëm, si dhe kanali i Tones janë në kuata maksimale.
• Disa rrugë të qytetit mbeten të bllokuara, për shkak të pranisë së lartë të ujit.

Bashkia Krujë: Si pasojë e çarjes së argjinaturës së lumit Droje ka vërshime uji në dy fshatrat Dukagjin i Ri dhe Miliska. Në fshatin Miliska uji ka hyrë në banesa, ku janë prekur 50 familje. Në terren ndodhen ekipe të Bordit të Kullimit Durrës, për përballimin e situatës.

Bashkia Shijak: Ka prani uji në 15 banesa. Situata problematike veçanërisht në njësitë administrative Xhafzotaj, Maminas dhe Gjepalaj.

Qarku Gjirokastër

• Si pasojë e reshjeve të dendura ka rrëshqitje dherash në aksin Tepelenë–Gjirokastër, ku qarkullimi është I kufizuar.
• Po punohet për rikthimin e energjisë në disa zona malore.
• Nivele të larta të lumit Vjosë në Memaliaj dhe Përmet.

Qarku Kukës

• Lumenj në kuota të larta, por pa problematika aktuale.

Qarku Tiranë

• Rritje e niveleve të lumenjve në Rrogozhinë dhe Kavajë, por pa rrezik të menjëhershëm për zonat e banuara.

Qarku Korçë

• Janë disa rrugë të pakalueshme në Devoll.
• Janë evidentuar rrrëshqitje dherash dhe bllokime rrugore në Pogradec dhe Prrenjas.
• Në Maliq ka sipërfaqe të tokave bujqësore nën ujë.

Qarku Berat

• Rreth 95 hektarë toka bujqësore nën ujë.
• Ëshë evidentuar rritje e nivelit të lumit Osum.
• Në lagjen 22 Tetori dhe Goricë, janë marrë masa për sigurimin e bizneseve dhe punohet për largimin e ujit nga pedonalja me pompa thithëse.

Qarku Fier

• Rreth 200 ha tokë bujqësore të përmbytura.
• Prezencë uji në 27 banesa në disa fshatra.

Në qarqet e tjera nuk paraqiten problematika serioze.

Angazhimi i Forcave të Armatosura dhe mjeteve

Në total janë angazhuar:

• Rreth 150 efektivë të Forcave të Armatosura
• Mbi 20 mjete të kalueshmërisë së lartë dhe të tonazhit të rëndë
• 10 gomone/motobarka shpëtimi
• 15 pompa thithëse me kapacitet të lartë dhe të vogël

Forcat janë shpërndarë kryesisht në qarqet Shkodër, Lezhë, Vlorë, Durrës, Gjirokastër dhe Fier, në funksion të evakuimeve, përforcimit të argjinaturave dhe largimit të ujërave.

Moti i keq ka përfshirë vendin dhe si pasojë janë raportuar përmbytje masive. Ndërkohë njoftohet se rruga që të çon në Selenicë, në segmentin “Bishti i Malit”, është aktualisht e bllokuar për shkak të daljes nga shtrati të lumit Vjosa.

Prurjet e larta kanë shkaktuar përmbytje në zonë, duke e bërë rrugën të pakalueshme për momentin. Ndërkohë, ekipet e emergjencës dhe të Bashkisë ndodhen në terren dhe po ndjekin situatën nga afër.

Autoritetet apelojnë  që qytetarët të shmangin qarkullimin në këtë segment derisa të ketë një përmirësim të situatë.

Lumi Vjosa ka dalë nga shtrati në disa segmente. Gazetari Elton Nika tha për ABC News se si pasojë 100 hektarë tokë janë të përmbytura dhe disa fshatra janë të rrezikuara

Ndërsa situata vijon të jetë shqetësuese edhe për shkak të erërave të forta.

Ndërkohë raportohet se 13 familje janë evakuuar.

Në afërsi të zonës se quajtur Guri i Kuq në qytetin e Pogradecit për shkak të vërshimeve të përroit të Saselishtes uji ka nxjerrë në rrugën kryesore inerte e dhera gërryerjeve duke bllokuar njëkohësisht edhe njërën prej tubove shkarkuese në liqen.

Aktualisht njëra prej korsive të mjeteve në aksin rrugor Pogradec-Qafë Thanë është e bllokuar si pasoje e inerteve dhe ujit që ka dalë në rrugë.

Aktualisht në vendngjarje ndodhen 2 eskavator të cilët po bëjnë të mundur normalizimin e situatës.

Situata në Shkodër sipas përditësimeve të fundit paraqitet kryesisht e qëndrueshme.

Reshjet e shiut kanë qenë me intensitet të ulët, ndërkohë që problematikat e evidentuara mbeten të lokalizuara dhe nën monitorim të vazhdueshëm nga strukturat përgjegjëse.

Në Bashkinë Shkodër është konstatuar rënie e prurjeve të lumit Drin, ndërsa në rrugën e Obotit vijon të ketë prezencë uji, është shtuar sipërfaqja e tokave me prezencë uji  por pa problematika të tjera të raportuara deri në këto momente.

Gjatë natës janë regjistruar reshje dëbore në zonat malore, konkretisht në aksin Bogë–Theth, ku janë marrë masat e nevojshme për pastrimin dhe kriposjen e rrugës.

Si rezultat i reshjeve me intensitet të ulët, në bashkinë Vau i Dejës nuk raportohen aktualisht problematika të emergjencave civile.

Njoftimi:

Në rastet e evidentuara më herët për banesat me prezencë uji.

Kanë nisur procedurat për përgatitjen e dokumentacionit për dhënien e mbështetjes.

Bashkia ka ofruar ndihmë emergjente për çdo familje të prekur apo të rrethuar nga uji.

Situata në Bashkinë Malësi e Madhe paraqitet e qetë, me reshje të pakta shiu dhe reshje dëbore në zonat malore të Njësisë Administrative Kelmend, pa problematika. Megjithatë, në fshatin Vukpalaj rruga e aksesit është e bllokuar nga uji në disa ura hyrëse në fshat, me nivel mbi 3 m, ndërsa pjesa tjetër e zonës mbetet e aksesueshme.

Në Bashkinë Pukë nuk raportohen probleme të emergjencave civile; reshjet kanë pushuar dhe temperaturat janë të ulëta.

Sipas të dhënave nga Drejtoria e Ujitjes dhe Kullimit Lezhë, reshjet e regjistruara kanë qenë 25 mm gjatë 24 orëve të fundit, ndërsa nivelet e ujit në pikat monitoruese mbeten nën kuotat kritike. Hidrovoret vijojnë funksionimin me kapacitet të plotë dhe argjinaturat nuk paraqesin problematika.

Situata në territorin e Qarkut Shkodër mbetet e kontrolluar dhe nën monitorim të vazhdueshëm nga strukturat e Emergjencave Civile, në bashkëpunim me institucionet vendore dhe qendrore, me qëllim garantimin e sigurisë së qytetarëve.

Javën e kaluar, në Qipro u nënshkrua një plan bashkëpunimi ushtarak trepalësh midis Qipros, Greqisë dhe Izraelit, i ndjekur nga dy plane bashkëpunimi dypalësh – midis Forcave të Mbrojtjes së Izraelit (IDF) dhe Forcave të Armatosura Greke, dhe midis IDF dhe Gardës Kombëtare të Qipros.

Marrëveshjet u nënshkruan në Nikozi gjatë takimit të përbashkët vjetor të shtabeve ushtarake të tre vendeve. Nënshkrimi i tyre u njoftua zyrtarisht nga ushtria izraelite. Lajmi u prit kryesisht pozitivisht në median dhe publikun qipriot.

Edhe pse detajet e marrëveshjeve nuk u bënë publike, DW ka mësuar se ato përfshijnë dispozita për ushtrime dhe trajnime të përbashkëta ushtarake, krijimin e grupeve të punës në fusha të specializuara dhe zhvillimin e një dialogu strategjik ushtarak.

Sipas të njëjtave burime, marrëveshjet parashikojnë gjithashtu shkëmbimin e ekspertizës mbi kërcënimet moderne të sigurisë, duke përfshirë sistemet pa pilot dhe luftën elektronike.

Njoftimi i bashkëpunimit ushtarak është zbatim praktik i vendimeve politike të marra nga udhëheqësit e tre vendeve – Benjamin Netanyahu, Kyriakos Mitsotakis dhe Nikos Christodoulides – gjatë samitit të 10-të tripalësh të Izraelit, Greqisë dhe Qipros, të mbajtur më 22 dhjetor.

Duke përmbledhur një deklaratë të përbashkët për shtyp të lëshuar pas takimit në Jeruzalem, Presidenti i Qipros Nikos Christodoulides tha se të tre vendet kishin vendosur të thellonin bashkëpunimin “me fokus në energji, mbrojtje dhe siguri”, duke bërë thirrje për “marrëveshje që do të kalojnë menjëherë në fazën e zbatimit”.

Duke folur për DW, Zenonas Tziarras, nga Departamenti i Studimeve Turke dhe të Lindjes së Mesme në Universitetin e Qipros, theksoi se bashkëpunimi trepalësh midis këtyre vendeve nuk është i ri dhe se samiti i parë i tillë u mbajt në vitin 2016.

Duke theksuar se Greqia, Qiproja dhe Izraeli kanë bashkëpunuar në këto fusha për vite me radhë, Tziarras paralajmëroi se, pavarësisht tendencës së udhëheqësve politikë për të ekzagjeruar rezultatet e këtyre takimeve, duhet të jetë e qartë se “bashkëpunimi ushtarak, i mbrojtjes dhe i sigurisë nuk përbën në vetvete një aleancë”.

“Një aleancë e vërtetë nënkupton një angazhim për mbrojtje kolektive, sipas të cilit një sulm ndaj një shteti konsiderohet sulm ndaj të gjithëve. Bashkëpunimi aktual trepalësh është pra një ‘aleancë’ vetëm në emër”, tha ai.

Mungesa e rezultateve konkrete, të cilat mund të ndryshojnë ekuilibrin e fuqisë në Mesdheun Lindor, mund të shpjegojë edhe reagimin relativisht të përmbajtur të Turqisë pas njoftimit të marrëveshjes.

Presidenti turk Erdogan, ndryshe nga mediat turke pro-qeveritare që e përshkruan bashkëpunimin si një “bosht të së keqes anti-turke”, mori një ton dukshëm të moderuar, duke deklaruar se iniciativat e tre vendeve “nuk kanë peshë të vërtetë”, duke i krahasuar ato me “zhurmë boshe, si zhurma e një kanaçeje”.

Ajo që duket se e shqetëson Turqinë më shumë sesa vetë marrëveshjet trepalëshe është fakti se Greqia dhe Qiproja po i drejtohen gjithnjë e më shumë Izraelit për prokurimin e sistemeve moderne të armëve.

Në rastin e Qipros në veçanti, Ankaraja ka lëshuar paralajmërime të forta se blerja e armëve nga Izraeli mund të çojë në destabilizim në ishull./DW/

Në këtë kohë të vitit, unë gjithmonë përpiqem ta bëj një parashikim të guximshëm për vitin e ri. Për vitin 2025, parashikova se Transnistria dhe Moldavia mund të ribashkoheshin, e kjo as që u bë fjalë bile.

Prandaj, për vitin 2026 do ta bëj një parashikim edhe më të guximshëm. Parashikoj se Bashkimi Evropian do të t’ia dalë mjaft mirë.

Është e drejtë të thuhet se këto ditë në Bruksel mbizotëron shumë pesimizëm. U la kryesisht në hije në bisedimet për një zgjidhje të mundshme të luftës së Rusisë në Ukrainë, u përball me sulme të panumërta hibride si prerja e kabllove nënujore dhe inkursionet me dronë, si dhe e përjetoi përkeqësimin e marrëdhënieve transatlantike pasi Shtëpi e Bardhë po e vë hapur në dyshim bllokun. Të gjitha këto e patën ndikimin e vet ndaj Brukselit.

Rrallëherë është vënë BE-ja kaq shumë në provë nga të gjitha drejtimet. “Një dele në një botë krejtësisht të re grabitqarësh”, siç u shpreh së fundmi një diplomat i BE-së.

Dhe, sinqerisht, as këtë vit nuk pritet të jetë më mirë, sepse Shtetet e Bashkuara mund të tërheqin më shumë trupa nga kontinenti dhe ta rrisin mbështetjen për parti të ndryshme euroskeptike. Ukrainën ose do të detyrohet ta pranojë një marrëveshje poshtëruese me Moskën, ose të shtypet edhe më shumë ushtarakisht nga një Rusi e ringjallur që madje mund ta testojë një vend të BE-së ose të NATO-s — diçka për të cilën zyrtarët evropianë kanë paralajmëruar dhe kanë pranuar se nuk janë realisht të përgatitur ta përballojnë të vetëm.

Por, ekziston edhe një vizion alternativ, më i ndritshëm për BE-në, një vizion shumë pak i mundshëm, që përfshin disa mundësi për t’u shfrytëzuar dhe shumë “nëse”.

Le të fillojmë me një nga zhgënjimet kryesore në fazat përmbyllëse të vitit të kaluar: dështimin për të rënë dakord mbi një kredi reparacionesh për Ukrainën. Kjo ishte, pa dyshim, një goditje e madhe si për presidenten e Komisionit Evropian, Ursula von der Leyen, ashtu edhe për kancelarin gjerman Friedrich Merz, të cilët po bënin trysni për përdorimin e aseteve shtetërore ruse të ngrira në bllok për të gjeneruar një kredi prej 90 miliardë eurosh për Ukrainën për dy vjetët e ardhshme.

Arsyetimi ishte: pse duhet që taksapaguesit e BE-së të paguajnë faturën për plaçkitjen e Ukrainës nga Moska, kur në vend të kësaj mund të përdoren paratë e Putinit?

Megjithatë, alternativa – mbledhja e fondeve të garantuara nga buxheti i BE-së dhe të mbështetura nga 24 shtete anëtare të BE-së (Republika Çeke, Hungaria dhe Sllovakia zgjodhën të mos marrin pjesë) – nuk është në të vërtetë aq e keqe sa duket.

Por, disa liderë të BE-së humbën prestigj për shkak të kredisë së reparacioneve dhe blloku u duk i pavendosur, por në fund të fundit, Kievi do të marrë mjaftueshëm para për ta vazhduar luftën kundër Rusisë për dy vjetët e ardhshme dhe ukrainasit nuk duhet t’i kthejnë këto para derisa Rusia të paguajë dëmshpërblimin.

Ndërkohë, asetet ruse mbeten të ngrira për aq kohë sa BE-ja dëshiron t’i mbajë të bllokuara, duke ruajtur opsionin që t’i përdorë ato më vonë. Nuk është ideale, por është më shumë sesa po i ofron Kievit çdo vend apo organizatë tjetër për momentin.

Ka gjërat që blloku i ka bërë tashmë të cilat mund të fillojnë të japin fryte së shpejti. Merrni për shembull zgjerimin. Blloku do të vazhdojë të mbyllë kapitujt e anëtarësimit me Malin e Zi dhe Shqipërinë në vitin e ri, me të parin që tani pritet të bëhet shteti i 28-të anëtar i BE-së deri në vitin 2028.

Mendimi në Bruksel, edhe pse në këtë moment më shumë dëshirë sesa realitet, është se shtimi i Malit të Zi dhe potencialisht edhe i Shqipërisë relativisht shpejt do t’i nxiste Kosovën dhe Serbinë të angazhohen në bisedime për normalizimin e marrëdhënieve mes tyre, të cilat kanë qenë të ngrira prej vitesh.

Por, duke qenë se Serbia as nuk u paraqit në samitin e fundit BE–Ballkani Perëndimor në Bruksel pak para Krishtlindjeve, kjo mund vështirësi se mund të arrihet.

Duke qenë se BE-ja ka humbur më shumë anëtarë sesa që ka fituar në dekadën e fundit për shkak të Brexit-it, shtimi i njërit apo edhe i disa vendeve do t’i jepte Brukselit një shtysë, duke treguar se BE-ja mbetet ende një klub tërheqës për të tjerët.

Një referendum i mundshëm në Islandë këtë vit për të rifilluar bisedimet e anëtarësimit në BE, të pezulluara mbi një dekadë më parë, do ta përforconte më tej këtë imazh.

Pastaj është edhe heqja graduale e energjisë ruse, e cila do të përfundojë pak a shumë këtë vit dhe do ta shkëpusë bllokun nga një prej varësive të tij më të gjata ndaj Kremlinit.

Vendosur në fund të vitit 2025, ndalimi i importeve të gazit rus për kontratat afatshkurtra do të zbatohet nga 25 prilli 2026 për gazin natyror të lëngshëm (LNG) dhe nga 17 qershori 2026 për gazin përmes tubacioneve. Për kontratat afatgjata, ndërprerja është 1 janari 2027 për LNG-në dhe shtatori i po atij viti për gazin përmes tubacioneve.

Një tjetër faktor që mund ta ndihmojë BE-në është mungesa e zgjedhjeve në vitin 2026. Nëse Franca arrin të shmangë mbajtjen e zgjedhjeve të parakohshme parlamentare – gjë që aktualisht duket e mundshme – ky vit është disi anomali, pasi asnjë nga vendet e mëdha nuk duhet të përballet me votuesit në nivel kombëtar.

Kjo do të thotë se presidenti francez Emmanuel Macron dhe homologët e tij në Gjermani, Itali, Holandë, Poloni, Rumani dhe Spanjë mund ta nisin vitin 2026 të përqendruar te hartimi i politikave.

Sigurisht, ka zgjedhje që do të tërheqin vëmendje. Për shembull, votimet në dy rajone të ish-Gjermanisë Lindore, Mecklenburg-Vorpommern dhe Saksoni-Anhalt, në shtator, ku AfD pritet të dalë e para. Partia e ekstremit të djathtë mund, për herë të parë, të jetë thjesht shumë e madhe për t’u injoruar kur të nisë formimi i koalicioneve (nëse nuk fiton shumicën absolute). Kjo do të shkaktojë reflektim të thellë në Gjermani, veçanërisht pasi pritet që partia të marrë rreth një të pestën e votave edhe në dy palë zgjedhje të tjera rajonale në pjesën perëndimore të vendit më herët gjatë vitit.

Dhe në zgjedhjet parlamentare të Sllovenisë në mars, populisti i vjetër rebel Janez Jansa mund të rikthehet sërish në pushtet – duke iu bashkuar kritikëve të tjerë të Brukselit me mendësi të ngjashme që tashmë janë në pushtet në Çeki, Hungari dhe Sllovaki.

Por ky kuartet mund të jetë jetëshkurtër, pasi hungarezët shkojnë në zgjedhje në fillim të prillit. Dhe ka indikacione të forta se Viktor Orban, i cili e ka drejtuar vendin që nga viti 2010, do të mposhtet nga Peter Magyar.

Ky do të ishte rezultati me më pasoja për BE-në këtë vit, pasi Hungaria e Orbanit është parë si penguese në shumë çështje, veçanërisht ato që lidhen me Ukrainën. Ndërsa Çekia dhe Sllovakia shpesh rreshtohen me Hungarinë, pak kush beson se ato do të jenë aq të ashpra sa të bllokojnë gjërat vetë, ashtu siç ka bërë shpesh Hungaria.

Dhe, megjithëse Peter Magyar dhe partia e tij Tisza janë mjaft të vakëta ndaj Kievit gjithashtu, Brukseli do të priste që disa veto nga Budapesti thjesht të hiqeshin nëse ata do të vinin në pushtet. Lista është e gjatë dhe përfshin ndihmën ushtarake të BE-së për Ukrainën, e cila është bllokuar për tri vjet, negociatat e anëtarësimit në BE me Ukrainën (dhe Moldavinë), të ngrira që nga viti 2024, sanksione potencialisht më të ashpra ndaj Moskës (dhe Minskut), si dhe një gatishmëri më të madhe për të kanalizuar lloje të tjera fondesh për vendin e shkatërruar nga lufta.

Një humbje për Orbanin mund ta bëjë gjithashtu disi më të lehtë arritjen e një marrëveshjeje për një buxhet të ri shumëvjeçar të BE-së, pasi kushtëzimi i sundimit të ligjit – që do të thotë se fondet e BE-së mund të ngrihen në rastet e shkeljeve të sundimit të ligjit – mund të mbetet pjesë e kornizës.

Hungarisë i janë pezulluar miliona euro vitet e fundit për shkak të këtij kushtëzimi, dhe Orban ka të ngjarë të përpiqet të sabotojë çdo vazhdim të mekanizmit.

Buxheti, që mbulon vitet 2028–2034, idealisht duhet të miratohet në fund të vitit 2026. Komisioni Evropian paraqiti propozimin e tij më herët gjatë vitit 2025, një plan ambicioz me vlerë gati 2 trilionë euro, i cili përfshinte 100 miliardë euro për Ukrainën dhe rreth 130 miliardë euro për mbrojtjen.

Marrëveshja përfundimtare sigurisht që nuk do të jetë aq ambicioze, pasi shumë nga shtetet më të pasura të BE-së e urrejnë idenë e buxheteve të Brukselit që rriten pa kontroll, ndërkohë që zakonisht u duhet të shtrëngojnë buxhetet kombëtare në vend.

Prisni që një marrëveshje përfundimtare të arrihet në vitin 2027. Megjithatë, niveli i ambicies do të japë një tregues se sa serioze është BE-ja në vazhdim, veçanërisht në mbrojtjen e vetes dhe në mbështetjen e Ukrainës përtej vitit 2027.

Dhe në fund marrëdhëniet me Shtetet e Bashkuara, për të cilat zyrtarët e BE-së shpresojnë se do të përmirësohen pas një viti 2025 të trazuar, në të cilin blloku u detyrua të pranonte një tarifë prej 15% për shumicën e importeve nga BE-ja dhe pa veten të sulmuar ashpër kur vendosi një gjobë prej 120 milionë eurosh ndaj platformës X të Elon Musk për shkelje të rregullave të transparencës.

Raste të tjera kundër gjigantëve të tjerë amerikanë të internetit janë në përgatitje, edhe pse mund të arrihen marrëveshje përpara se të vendosen gjoba. Goditja ndaj gjigantëve kinezë të internetit mund të ndihmojë gjithashtu në zbutjen e marrëdhënieve me Uashingtonin.

Frika do të mbetet në të gjithë bllokun, veçanërisht sa i përket çdo vendimi për të tërhequr një numër të madh trupash amerikane nga kontinenti dhe mundësisë që sulme të tjera verbale, si reflektimet në Strategjinë e Sigurisë Kombëtare mbi “zhdukjen civilizuese” evropiane, të vazhdojnë nga zyrtarë amerikanë.

Por, duke folur me diplomatë evropianë, ekziston gjithashtu shpresa se retorika amerikane do të jetë më e butë, duke pasur parasysh se zgjedhjet e mesmandatit po afrohen në nëntor. Ndërsa viti 2025 ishte një vit përpjekjesh diplomatike të jashtme, mendimi është se politika amerikane do të zhvendoset drejt çështjeve të brendshme teksa afrohet votimi.

Politika e jashtme rrallë renditet lart në prioritetet e votuesve kur amerikanët e zakonshëm u drejtohen qendrave të votimit, duke i lënë hapësirë marrëdhënies transatlantike të rikuperohet disi në vitin 2026./REL

Read More...

Shiu mbërriti me 24 orë vonesë në PD. Doktor Berisha e nisi konferencën me parashikimin e motit. Jo atij politik.

“Mijëra e mijëra familje shqiptare kanë pësuar pasoja shumë të rënda nga përmbytjet. Vetëm në rrethin e Durrësit përllogariten rreth 4 mijë banesa, biznese dhe objekte të tjera. Dëmet janë jashtëzakonisht të mëdha.

Por nuk është vetëm rrethi i Durrësit me përmbytje, nga Gjirokastra gjer në Shkodër. Partia Demokratike kërkon menjëherë shpalljen e gjendjes së fatkeqësisë natyrore. Java përsëri nuk premton qetësi të motit”, thotë ai.

Në fakt moti rregullohet pas ditës së enjte. Por rrufetë edhe pas të enjtes do ti vazhdojë opozita.

Edi Rama u ankua, jo ndaj motit, por përse kundër tij nuk po lëshohen kritika edhe nga opozitat në Kroaci, Greqi e Mal të zi.

“Nuk e kuptoj pse nuk po më fajësojnë akoma mua, qeverinë apo qoftë edhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, por hiç, asnjë llaf, s’e kuptojnë që aleanca me shiun të çon në fitore”, tha Rama.

“Ky qëndrim cinik, tallës ndaj qytetarëve, turpëron çdo njeri që ka cipë. Por Ramaduro është në panik dhe tmerr të madh dhe nuk di se ç’flet. Pa diskutim që këto kanë qenë shira shumë intensive, por Durrësi kurrë nuk ka njohur një përmbytje të tillë. Dhe shkaqet e përmasave të kësaj përmbytje janë absolutisht vjedhja, vjedhja dhe vetëm vjedhja e fondeve.”

Ndërkohe Venezuela mbetet një temë e nxehtë në selinë blu, megjithëse shpresa për një aksion blic  të forcave delta, ka rënë. Por entuziazmi është i lartë. Doktori nuk ka amerikanët, por ka me vete memet.

“Futuni në internet, habia e internetit. Ajo xhakaventoja e tutave të Maduros, Nike, ajo është bërë virale numër 1 në Shqipëri. Në Shqipëri, pastaj në SHBA, imagjinoni ju se të gjithë duan ta shohin Edi Ramën të veshur me të. Maduron e arrestoi presidenti Trump, Ramaduron e arrestoi interneti.”, theksoi ai.

Në PD përflitet për një protestë kombëtare më 24 janar, që me kalendar i bie pas vendimit të kushtetueses për padinë e kryeministrit dhe pas mbledhjes së këshillit të mandateve për mandatin e zëvendëskryeministres.

Duket një parashikim i zymte i motit për opozitën, ndaj doktori bën thirrje të mos nxitohet.

“Asnjë datë nuk është përcaktuar. Ka një datë ditën e premte kur do të mblidhet një tryezë e gjerë e opozitës. Ajo tryezë do përcaktojë kur do thirret protesta”, shtoi ai.

Kryeministri Edi Rama ka reaguar sërish për situatën e përmbytjeve në vend.

Nëpërmjet një reagimi në Twitter, kryeministri ngre edhe shqetësimin e hedhjes së mbeturinave vend e pavend.

Gjithashtu ai shton se ekipet dhe të gjitha strukturat janë në gatishmëri të plotë

Reagimi:

Sigurisht që kur i hedhim plehrat e shishet plastike nëpër fusha e në anët e rrugëve të atdheut që e duam vetëm në stadium, vjen një ditë shiu me gjyma që i mbledh nga janë e nga s’janë dhe i dynd në det, po kur pastaj shiu është aq i furishëm sa ky i fundit, atëherë nuk e arrin dot detin si zakonisht sepse gryka e kanalit taposet krejt, duke përmbytur dynjanë… *Shkozet

Analistët politikë thonë se procesi i zgjedhjes së presidentit të Kosovës do ta prodhojë edhe një sfidë të re politike me potencial bllokues. Bazuar në rezultatet e 28 dhjetorit, situata nuk është e thjeshtë.

Procesi i numërimit të votave të zgjedhjeve të 28 dhjetorit, atyre me postë nga jashtë Kosovës, po vazhdon dhe rezultatet e përditësuara tashmë kanë sjellë një ndryshim në mandatet e fituara të deputetëve.

Lëvizja Vetëvendosje, e cila në zgjedhje mori mbi 50% të votave, tashmë ka siguruar 57 mandate. Ajo pasohet nga Partia Demokratike e Kosovës (PDK) me 23 mandate. Lidhja Demokratike e Kosovës ka rënë në 14 mandate ndërsa tek Aleanca për Ardhmërinë e Kosovës (AAK) nuk ka ndryshim, mbetet me vetëm 6 mandate.

Sipas Komisionit Qendror të Zgjedhjeve (KQZ), rezultatet përfundimtare mund të shpallen më herët sesa ishte planifikuar data 19 janar, ku më pas edhe do të certifikohen rezultatet.

Por, akoma pa u certifikuar rezultati i zgjedhjeve të 28 dhjetorit, lideri i LVV-së, Albin Kurti, ka përmendur mundësinë e zgjedhjeve të reja, nëse deri me 5 mars nuk zgjidhet Presidenti apo Presidentja. Mandati i Presidentes aktuale, Vjosa Osmani, përfundon në fund të muajit prill, por një muaj më parë duhet të zgjidhe Presidenti apo Presidentja.

Albin Kurti tha për mediet lokale se për konstituimin e Kuvendit dhe formimin e qeverisë nuk i duhet mbështetja e partive të tjera shqiptare. Por për çështjen e Presidentit, në Kuvend duhet të jenë prezent dy të tretat e deputetëve dhe për këtë tash për tash nuk i kanë votat e nevojshme.

Çfarë thotë Kurti?

“Nëse nuk arrijmë ta zgjedhim presidentin, e afati i fundit është 4 marsi, nëse nuk e kemi të kaluar buxhetin për vitin 2026, ne as nuk mund të mbajmë zgjedhje të reja. Natyrisht se ekziston mundësia teorike dhe praktike që të shkojmë në zgjedhje. 80 veta në sallë është vështirësi e konsiderueshme. Herën e kaluar nuk i bëmë dot 61, ndërsa 80 është numër shumë më i madh se 61. Kësaj radhe 61 i kemi, por 80 nuk i kemi. Ne e kemi parë deklarimin e Presidentes. Së pari, duhet ta formojmë Kuvendin dhe Qeverinë, gjithashtu duhet ta votojmë buxhetin, këta janë hapa më të rëndësishëm”, thotë Kurti.

Ai e konsideron të nevojshëm takimin me Vjosa Osmanin për të diskutuar interesimin e saj për një mandat tjetër pesëvjeçar. Presidentja e Kosovës, Vjosa Osmani, nga ana e saj, tashmë ka deklaruar se synon edhe një mandat pesëvjeçar për t’i jetësuar, siç ka thënë, “planet e saj në të mirë të vendit”.

Por nëse kandidimin e saj edhe për një mandat nuk e përkrahin deputetët në Kuvend, Osmani ka paralajmëruar se do ta kenë përballë në zgjedhjet e ardhshme përmes aktivitetit të saj politik.

“Në fund të fundit është në vullnetin e deputetëve që vendosin nëse do të më përkrahin apo jo, dhe po e them përsëri, në qoftë se vendosin që po, do të vazhdojmë me punë të mira për vendin, mbrojtje të interesave të qytetarëve. Në qoftë se vendosin që jo, atëherë unë e vazhdoj punën në një mënyrë tjetër, nëpërmjet angazhimit politik dhe kurdo që të ketë zgjedhje, atëherë i përballim idetë, nocionet, qëndrimet, energjinë, besa e shumëçka tjetër. Por qëllimi im është që të vazhdoj të jem e angazhuar politikisht dhe ta ndihmoj Republikën e Kosovës që të ecë përpara”, është shprehur Osmani.

Qëndrimet e partive të tjera

Përfaqësuesit e PDK, LDK dhe AAK nuk kanë folur deri tani rreth formimit të institucioneve të reja dhe zgjedhjes së presidentit. Ato thonë se janë duke pritur certifikimin e rezultateve përfundimtare të zgjedhjeve të 28 dhjetorit për të parë përbërjen përfundimtare të Kuvendit. Analistët politikë thonë se për zgjedhjen e presidentit të vendit, kompromisi politik është i pashmangshëm.

Ehat Miftaraj nga Instituti i Kosovës për Drejtësi (IKD) i tha DW-së se “zgjedhja e presidentit të shtetit në mungesë të 80 votave për koalicionin fitues të zgjedhjeve të fundvitit do të duhej të bazohej në marrëveshje politike dhe kompromis lidhur me një figurë unifikuese që do të ushtronte pozitën e presidentit me integritet dhe në mënyrë të paanshme”.

Sipas tij, Kosova e ka urgjencë shtetërore që menjëherë pas konstituimit të Kuvendit dhe formimit të qeverisë, pa vonesë, të miratojë ligjin për buxhetin dhe të gjitha marrëveshjet ndërkombëtare, përfshirë Planin e Rritjes.

“Sikurse LVV dhe z. Kurti, nëse e vënë në rend të parë interesin e Republikës së Kosovës, do të gjenin kompromis për të zgjedhur edhe Presidentin e Republikës për t’i dhënë drejtim zhvillimit ekonomik dhe integrimit evropian, dy procese që kanë stagnuar në status quo në pesë vitet e fundit. Kosova nuk e ka komoditetin për zgjedhje të reja, pasi kjo do të kishte pasoja të dëmshme dhe afatgjata për integrimin evropian, por edhe humbjen e besimit të partnerëve ndërkombëtarë”, thotë Miftaraj.

Analisti tjetër politik, Artan Muhaxhiri, i tha DW-së se procesi i zgjedhjes së presidentit do ta prodhojë edhe një sfidë të re me potencial bllokues.

“Prandaj, hendeku i madh aktual mes Lëvizjes Vetëvendosje dhe partive të tjera nënkupton vetëm një gjë normale: rigjetjen e vullnetit për bashkëpunim konstruktiv me kompromise reciproke ndaj interesave të dyanshme. Çdo qasje tjetër me automatizëm e çon Kosovën në zgjedhje të reja”, thotë Muhaxhiri. Sipas tij, “edhe një proces i ri zgjedhor do të ishte indikator madhor i paaftësisë së spektrit politik kosovar”.

“Do ta tregonte mungesën e plotë të integritetit personal, etikës publike dhe përgjegjësisë së tyre shtetërore ndaj dërgimit të shoqërisë në theqafje institucionale. Humbjet shumëdimensionale do të thelloheshin edhe më shumë, duke krijuar stagnime fundamentale sistemore politike dhe ekonomike, brenda vendit dhe në marrëdhëniet ndërkombëtare”, thotë Muhaxhiri.

Si zgjidhet presidenti i vendit?

Kushtetuta e Kosovës, sipas nenit 86, e përcakton procedurën për zgjedhjen e presidentit të ri të Kosovës: Presidenti i Republikës së Kosovës zgjidhet nga Kuvendi, me votim të fshehtë.

– Zgjedhja e presidentit duhet të bëhet jo më vonë se tridhjetë (30) ditë para përfundimit të mandatit të presidentit aktual.

– Secili shtetas i Republikës së Kosovës mund të nominohet si kandidat për President të Republikës së Kosovës, nëse siguron nënshkrimet e të paktën tridhjetë (30) deputetëve të Kuvendit të Kosovës. Deputetët e Kuvendit mund të nënshkruajnë vetëm për një kandidat për President të Republikës së Kosovës.

– Zgjedhja e presidentit bëhet me dy të tretat (2/3) e votave të të gjithë deputetëve të Kuvendit.

– Nëse asnjë kandidat nuk merr shumicën prej dy të tretave (2/3) në dy votimet e para, organizohet votimi i tretë ndërmjet dy kandidatëve që kanë marrë numrin më të lartë të votave në votimin e dytë dhe kandidati që merr shumicën e votave të të gjithë deputetëve zgjidhet President i Republikës së Kosovës.

– Nëse në votimin e tretë asnjë kandidat nuk zgjedhet President i Republikës së Kosovës, shpërndahet Kuvendi dhe shpallen zgjedhjet e reja, të cilat duhet të mbahen brenda dyzet e pesë (45) ditësh./DW/